੧੭. ਮਞ੍ਚਪੀਠਾਦਿਸਙ੍ਘਿਕਸੇਨਾਸਨੇਸੁ ਪਟਿਪਜ੍ਜਿਤਬ੍ਬਵਿਨਿਚ੍ਛਯਕਥਾ

੮੨. ਵਿਹਾਰੇ ਸਙ੍ਘਿਕੇ ਸੇਯ੍ਯਂ, ਸਨ੍ਥਰਿਤ੍ਵਾਨ ਪਕ੍ਕਮੋਤਿ ਸਙ੍ਘਿਕੇ ਵਿਹਾਰੇ ਸੇਯ੍ਯਂ ਸਨ੍ਥਰਿਤ੍ਵਾਨ ਅਞ੍ਞਤ੍ਥ ਵਸਿਤੁਕਾਮਤਾਯ ਵਿਹਾਰਤੋ ਪਕ੍ਕਮਨਂ. ਤਤ੍ਰਾਯਂ ਵਿਨਿਚ੍ਛਯੋ –

‘‘ਯੋ ਪਨ ਭਿਕ੍ਖੁ ਸਙ੍ਘਿਕੇ ਵਿਹਾਰੇ ਸੇਯ੍ਯਂ ਸਨ੍ਥਰਿਤ੍ਵਾ ਵਾ ਸਨ੍ਥਰਾਪੇਤ੍ਵਾ ਵਾ ਤਂ ਪਕ੍ਕਮਨ੍ਤੋ ਨੇਵ ਉਦ੍ਧਰੇਯ੍ਯ ਨ ਉਦ੍ਧਰਾਪੇਯ੍ਯ ਅਨਾਪੁਚ੍ਛਂ ਵਾ ਗਚ੍ਛੇਯ੍ਯ, ਪਾਚਿਤ੍ਤਿਯ’’ਨ੍ਤਿ (ਪਾਚਿ. ੧੧੫) –

ਵਚਨਤੋ ਸਙ੍ਘਿਕੇ ਵਿਹਾਰੇ ਸੇਯ੍ਯਂ ਸਯਂ ਸਨ੍ਥਰਿਤ੍ਵਾ ਅਞ੍ਞੇਨ ਵਾ ਸਨ੍ਥਰਾਪੇਤ੍ਵਾ ਉਦ੍ਧਰਣਾਦੀਨਿ ਅਕਤ੍ਵਾ ਪਰਿਕ੍ਖਿਤ੍ਤਸ੍ਸ ਆਰਾਮਸ੍ਸ ਪਰਿਕ੍ਖੇਪਂ, ਅਪਰਿਕ੍ਖਿਤ੍ਤਸ੍ਸ ਉਪਚਾਰਂ ਅਤਿਕ੍ਕਮਨ੍ਤਸ੍ਸ ਪਾਚਿਤ੍ਤਿਯਂ.

ਤਤ੍ਥ ਸੇਯ੍ਯਾ ਨਾਮ ਭਿਸਿ ਚਿਮਿਲਿਕਾ ਉਤ੍ਤਰਤ੍ਥਰਣਂ ਭੂਮਤ੍ਥਰਣਂ ਤਟ੍ਟਿਕਾ ਚਮ੍ਮਖਣ੍ਡੋ ਨਿਸੀਦਨਂ ਪਚ੍ਚਤ੍ਥਰਣਂ ਤਿਣਸਨ੍ਥਾਰੋ ਪਣ੍ਣਸਨ੍ਥਾਰੋਤਿ ਦਸਵਿਧਾ. ਤਤ੍ਥ ਭਿਸੀਤਿ ਮਞ੍ਚਕਭਿਸਿ ਵਾ ਪੀਠਕਭਿਸਿ ਵਾ. ਚਿਮਿਲਿਕਾ ਨਾਮ ਸੁਧਾਦਿਪਰਿਕਮ੍ਮਕਤਾਯ ਭੂਮਿਯਾ ਵਣ੍ਣਾਨੁਰਕ੍ਖਣਤ੍ਥਂ ਕਤਾ, ਤਂ ਹੇਟ੍ਠਾ ਪਤ੍ਥਰਿਤ੍ਵਾ ਉਪਰਿ ਕਟਸਾਰਕਂ ਪਤ੍ਥਰਨ੍ਤਿ. ਉਤ੍ਤਰਤ੍ਥਰਣਂ ਨਾਮ ਮਞ੍ਚਪੀਠਾਨਂ ਉਪਰਿ ਅਤ੍ਥਰਿਤਬ੍ਬਕਪਚ੍ਚਤ੍ਥਰਣਂ. ਭੂਮਤ੍ਥਰਣਂ ਨਾਮ ਭੂਮਿਯਂ ਅਤ੍ਥਰਿਤਬ੍ਬਾ ਕਟਸਾਰਕਾਦਿਵਿਕਤਿ. ਤਟ੍ਟਿਕਾ ਨਾਮ ਤਾਲਪਣ੍ਣੇਹਿ ਵਾ ਵਾਕੇਹਿ ਵਾ ਕਤਤਟ੍ਟਿਕਾ. ਚਮ੍ਮਖਣ੍ਡੋ ਨਾਮ ਸੀਹਬ੍ਯਗ੍ਘਦੀਪਿਤਰਚ੍ਛਚਮ੍ਮਾਦੀਸੁਪਿ ਯਂ ਕਿਞ੍ਚਿ ਚਮ੍ਮਂ. ਅਟ੍ਠਕਥਾਸੁ ਹਿ ਸੇਨਾਸਨਪਰਿਭੋਗੇ ਪਟਿਕ੍ਖਿਤ੍ਤਚਮ੍ਮਂ ਨ ਦਿਸ੍ਸਤਿ, ਤਸ੍ਮਾ ਸੀਹਬ੍ਯਗ੍ਘਚਮ੍ਮਾਦੀਨਂ ਪਰਿਹਰਣੇਯੇਵ ਪਟਿਕ੍ਖੇਪੋ ਵੇਦਿਤਬ੍ਬੋ. ਨਿਸੀਦਨਨ੍ਤਿ ਸਦਸਂ ਵੇਦਿਤਬ੍ਬਂ. ਪਚ੍ਚਤ੍ਥਰਣਨ੍ਤਿ ਪਾਵਾਰੋ ਕੋਜਵੋਤਿ ਏਤ੍ਤਕਮੇਵ ਵੁਤ੍ਤਂ. ਤਿਣਸਨ੍ਥਾਰੋਤਿ ਯੇਸਂ ਕੇਸਞ੍ਚਿ ਤਿਣਾਨਂ ਸਨ੍ਥਾਰੋ. ਏਸ ਨਯੋ ਪਣ੍ਣਸਨ੍ਥਾਰੇਪਿ. ਏਵਂ ਪਨ ਇਮਂ ਦਸਵਿਧਂ ਸੇਯ੍ਯਂ ਸਙ੍ਘਿਕੇ ਵਿਹਾਰੇ ਸਨ੍ਥਰਿਤ੍ਵਾ ਵਾ ਸਨ੍ਥਰਾਪੇਤ੍ਵਾ ਵਾ ਪਕ੍ਕਮਨ੍ਤੇਨ ਆਪੁਚ੍ਛਿਤ੍ਵਾ ਪਕ੍ਕਮਿਤਬ੍ਬਂ, ਆਪੁਚ੍ਛਨ੍ਤੇਨ ਚ ਭਿਕ੍ਖੁਮ੍ਹਿ ਸਤਿ ਭਿਕ੍ਖੁ ਆਪੁਚ੍ਛਿਤਬ੍ਬੋ, ਤਸ੍ਮਿਂ ਅਸਤਿ ਸਾਮਣੇਰੋ, ਤਸ੍ਮਿਂ ਅਸਤਿ ਆਰਾਮਿਕੋ, ਤਸ੍ਮਿਂ ਅਸਤਿ ਯੇਨ ਵਿਹਾਰੋ ਕਾਰਿਤੋ, ਸੋ ਵਿਹਾਰਸਾਮਿਕੋ, ਤਸ੍ਸ ਵਾ ਕੁਲੇ ਯੋ ਕੋਚਿ ਆਪੁਚ੍ਛਿਤਬ੍ਬੋ, ਤਸ੍ਮਿਮ੍ਪਿ ਅਸਤਿ ਚਤੂਸੁ ਪਾਸਾਣੇਸੁ ਮਞ੍ਚਂ ਠਪੇਤ੍ਵਾ ਮਞ੍ਚੇ ਅਵਸੇਸਮਞ੍ਚਪੀਠਾਨਿ ਆਰੋਪੇਤ੍ਵਾ ਉਪਰਿ ਭਿਸਿਆਦਿਕਂ ਦਸਵਿਧਮ੍ਪਿ ਸੇਯ੍ਯਂ ਰਾਸਿਂ ਕਤ੍ਵਾ ਦਾਰੁਭਣ੍ਡਂ ਮਤ੍ਤਿਕਾਭਣ੍ਡਂ ਪਟਿਸਾਮੇਤ੍ਵਾ ਦ੍ਵਾਰਵਾਤਪਾਨਾਨਿ ਪਿਦਹਿਤ੍ਵਾ ਗਮਿਯਵਤ੍ਤਂ ਪੂਰੇਤ੍ਵਾ ਗਨ੍ਤਬ੍ਬਂ.

ਸਚੇ ਪਨ ਸੇਨਾਸਨਂ ਓਵਸ੍ਸਤਿ, ਛਦਨਤ੍ਥਞ੍ਚ ਤਿਣਂ ਵਾ ਇਟ੍ਠਕਾ ਵਾ ਆਨੀਤਾ ਹੋਨ੍ਤਿ, ਸਚੇ ਉਸ੍ਸਹਤਿ, ਛਾਦੇਤਬ੍ਬਂ. ਨੋ ਚੇ ਸਕ੍ਕੋਤਿ, ਯੋ ਓਕਾਸੋ ਅਨੋਵਸ੍ਸਕੋ, ਤਤ੍ਥ ਮਞ੍ਚਪੀਠਾਦੀਨਿ ਨਿਕ੍ਖਿਪਿਤ੍ਵਾ ਗਨ੍ਤਬ੍ਬਂ. ਸਚੇ ਸਬ੍ਬਮ੍ਪਿ ਓਵਸ੍ਸਤਿ, ਉਸ੍ਸਹਨ੍ਤੇਨ ਅਨ੍ਤੋਗਾਮੇ ਉਪਾਸਕਾਨਂ ਘਰੇ ਠਪੇਤਬ੍ਬਂ. ਸਚੇ ਤੇਪਿ ‘‘ਸਙ੍ਘਿਕਂ ਨਾਮ, ਭਨ੍ਤੇ, ਭਾਰਿਯਂ, ਅਗ੍ਗਿਦਾਹਾਦੀਨਂ ਭਾਯਾਮਾ’’ਤਿ ਨ ਸਮ੍ਪਟਿਚ੍ਛਨ੍ਤਿ, ਅਬ੍ਭੋਕਾਸੇਪਿ ਪਾਸਾਣਾਨਂ ਉਪਰਿ ਮਞ੍ਚਂ ਠਪੇਤ੍ਵਾ ਸੇਸਂ ਪੁਬ੍ਬੇ ਵੁਤ੍ਤਨਯੇਨੇਵ ਨਿਕ੍ਖਿਪਿਤ੍ਵਾ ਤਿਣੇਹਿ ਚ ਪਣ੍ਣੇਹਿ ਚ ਪਟਿਚ੍ਛਾਦੇਤ੍ਵਾ ਗਨ੍ਤੁਂ ਵਟ੍ਟਤਿ. ਯਞ੍ਹਿ ਤਤ੍ਥ ਅਙ੍ਗਮਤ੍ਤਮ੍ਪਿ ਅਵਸਿਸ੍ਸਤਿ, ਤਂ ਅਞ੍ਞੇਸਂ ਤਤ੍ਥ ਆਗਤਭਿਕ੍ਖੂਨਂ ਉਪਕਾਰਂ ਭਵਿਸ੍ਸਤੀਤਿ. ਉਦ੍ਧਰਿਤ੍ਵਾ ਗਚ੍ਛਨ੍ਤੇਨ ਪਨ ਮਞ੍ਚਪੀਠਕਵਾਟਂ ਸਬ੍ਬਂ ਅਪਨੇਤ੍ਵਾ ਸਂਹਰਿਤ੍ਵਾ ਚੀਵਰਵਂਸੇ ਲਗ੍ਗੇਤ੍ਵਾਵ ਗਨ੍ਤਬ੍ਬਂ. ਪਚ੍ਛਾ ਆਗਨ੍ਤ੍ਵਾ ਵਸਨਕਭਿਕ੍ਖੁਨਾਪਿ ਪੁਨ ਮਞ੍ਚਪੀਠਂ ਠਪਯਿਤ੍ਵਾ ਗਚ੍ਛਨ੍ਤੇਨ ਤਥੇਵ ਕਾਤਬ੍ਬਂ. ਅਨ੍ਤੋਕੁਟ੍ਟਤੋ ਸੇਯ੍ਯਂ ਬਹਿਕੁਟ੍ਟੇ ਪਞ੍ਞਪੇਤ੍ਵਾ ਵਸਨ੍ਤੇਨ ਗਮਨਕਾਲੇ ਪੁਨ ਗਹਿਤਟ੍ਠਾਨੇਯੇਵ ਪਟਿਸਾਮੇਤਬ੍ਬਂ. ਉਪਰਿਪਾਸਾਦਤੋ ਓਰੋਪੇਤ੍ਵਾ ਹੇਟ੍ਠਾਪਾਸਾਦੇ ਵਸਨ੍ਤਸ੍ਸਪਿ ਏਸੇਵ ਨਯੋ. ਰਤ੍ਤਿਟ੍ਠਾਨਦਿਵਾਟ੍ਠਾਨੇਸੁ ਮਞ੍ਚਪੀਠਂ ਪਞ੍ਞਪੇਤ੍ਵਾ ਬਹਿਗਮਨਕਾਲੇ ਪੁਨ ਗਹਿਤਟ੍ਠਾਨੇਯੇਵ ਠਪੇਤਬ੍ਬਂ.

੮੩. ਸੇਨਾਸਨੇਸੁ ਪਨ ਅਯਂ ਆਪੁਚ੍ਛਿਤਬ੍ਬਾਨਾਪੁਚ੍ਛਿਤਬ੍ਬਵਿਨਿਚ੍ਛਯੋ – ਯਾ ਤਾਵ ਭੂਮਿਯਂ ਦੀਘਸਾਲਾ ਵਾ ਪਣ੍ਣਸਾਲਾ ਵਾ ਹੋਤਿ, ਯਂ ਵਾ ਰੁਕ੍ਖਤ੍ਥਮ੍ਭੇਸੁ ਕਤਗੇਹਂ ਉਪਚਿਕਾਨਂ ਉਟ੍ਠਾਨਟ੍ਠਾਨਂ ਹੋਤਿ, ਤਤੋ ਪਕ੍ਕਮਨ੍ਤੇਨ ਤਾਵ ਆਪੁਚ੍ਛਿਤ੍ਵਾਵ ਪਕ੍ਕਮਿਤਬ੍ਬਂ. ਤਸ੍ਮਿਞ੍ਹਿ ਕਤਿਪਯਾਨਿ ਦਿਵਸਾਨਿ ਅਜਗ੍ਗਿਯਮਾਨੇ ਵਮ੍ਮਿਕਾਵ ਸਨ੍ਤਿਟ੍ਠਨ੍ਤਿ. ਯਂ ਪਨ ਪਾਸਾਣਪਿਟ੍ਠਿਯਂ ਵਾ ਪਾਸਾਣਤ੍ਥਮ੍ਭੇਸੁ ਵਾ ਕਤਸੇਨਾਸਨਂ ਸਿਲੁਚ੍ਚਯਲੇਣਂ ਵਾ ਸੁਧਾਲਿਤ੍ਤਸੇਨਾਸਨਂ ਵਾ, ਯਤ੍ਥ ਯਤ੍ਥ ਉਪਚਿਕਾਸਙ੍ਕਾ ਨਤ੍ਥਿ, ਤਤੋ ਪਕ੍ਕਮਨ੍ਤਸ੍ਸ ਆਪੁਚ੍ਛਿਤ੍ਵਾਪਿ ਅਨਾਪੁਚ੍ਛਿਤ੍ਵਾਪਿ ਗਨ੍ਤੁਂ ਵਟ੍ਟਤਿ, ਆਪੁਚ੍ਛਨਂ ਪਨ ਵਤ੍ਤਂ. ਸਚੇ ਤਾਦਿਸੇਪਿ ਸੇਨਾਸਨੇ ਏਕੇਨ ਪਸ੍ਸੇਨ ਉਪਚਿਕਾ ਆਰੋਹਨ੍ਤਿ, ਆਪੁਚ੍ਛਿਤ੍ਵਾਵ ਗਨ੍ਤਬ੍ਬਂ. ਯੋ ਪਨ ਆਗਨ੍ਤੁਕੋ ਭਿਕ੍ਖੁ ਸਙ੍ਘਿਕਸੇਨਾਸਨਂ ਗਹੇਤ੍ਵਾਵ ਸਨ੍ਤਂ ਭਿਕ੍ਖੁਂ ਅਨੁਵਤ੍ਤਨ੍ਤੋ ਅਤ੍ਤਨੋ ਸੇਨਾਸਨਂ ਅਗ੍ਗਹੇਤ੍ਵਾ ਵਸਤਿ, ਯਾਵ ਸੋ ਨ ਗਣ੍ਹਾਤਿ, ਤਾਵ ਤਂ ਸੇਨਾਸਨਂ ਪੁਰਿਮਭਿਕ੍ਖੁਸ੍ਸੇਵ ਪਲਿਬੋਧੋ. ਯਦਾ ਪਨ ਸੋ ਸੇਨਾਸਨਂ ਗਹੇਤ੍ਵਾ ਅਤ੍ਤਨੋ ਇਸ੍ਸਰਿਯੇਨ ਵਸਤਿ, ਤਤੋ ਪਟ੍ਠਾਯ ਆਗਨ੍ਤੁਕਸ੍ਸੇਵ ਪਲਿਬੋਧੋ. ਸਚੇ ਉਭੋਪਿ ਵਿਭਜਿਤ੍ਵਾ ਗਣ੍ਹਨ੍ਤਿ, ਉਭਿਨ੍ਨਮ੍ਪਿ ਪਲਿਬੋਧੋ.

ਮਹਾਪਚ੍ਚਰਿਯਂ ਪਨ ਵੁਤ੍ਤਂ – ਸਚੇ ਦ੍ਵੇ ਤਯੋ ਏਕਤੋ ਹੁਤ੍ਵਾ ਪਞ੍ਞਪੇਨ੍ਤਿ, ਗਮਨਕਾਲੇ ਸਬ੍ਬੇਹਿ ਆਪੁਚ੍ਛਿਤਬ੍ਬਂ. ਤੇਸੁ ਚੇ ਪਠਮਂ ਗਚ੍ਛਨ੍ਤੋ ‘‘ਪਚ੍ਛਿਮੋ ਜਗ੍ਗਿਸ੍ਸਤੀ’’ਤਿ ਆਭੋਗਂ ਕਤ੍ਵਾ ਗਚ੍ਛਤਿ, ਵਟ੍ਟਤਿ, ਪਚ੍ਛਿਮਸ੍ਸ ਆਭੋਗੇਨ ਮੁਤ੍ਤਿ ਨਤ੍ਥਿ. ਬਹੂ ਏਕਂ ਪੇਸੇਤ੍ਵਾ ਸਨ੍ਥਰਾਪੇਨ੍ਤਿ, ਗਮਨਕਾਲੇ ਸਬ੍ਬੇਹਿ ਵਾ ਆਪੁਚ੍ਛਿਤਬ੍ਬਂ, ਏਕਂ ਵਾ ਪੇਸੇਤ੍ਵਾ ਆਪੁਚ੍ਛਿਤਬ੍ਬਂ. ਅਞ੍ਞਤੋ ਮਞ੍ਚਪੀਠਾਦੀਨਿ ਆਨੇਤ੍ਵਾ ਅਞ੍ਞਤ੍ਰ ਵਸਿਤ੍ਵਾ ਗਮਨਕਾਲੇ ਤਤ੍ਥੇਵ ਨੇਤਬ੍ਬਾਨਿ. ਸਚੇ ਅਞ੍ਞਤੋ ਆਨੇਤ੍ਵਾ ਵਸਮਾਨਸ੍ਸ ਅਞ੍ਞੋ ਵੁਡ੍ਢਤਰੋ ਆਗਚ੍ਛਤਿ, ਨ ਪਟਿਬਾਹਿਤਬ੍ਬੋ, ‘‘ਮਯਾ, ਭਨ੍ਤੇ, ਅਞ੍ਞਾਵਾਸਤੋ ਆਨੀਤਂ, ਪਾਕਤਿਕਂ ਕਰੇਯ੍ਯਾਥਾ’’ਤਿ ਵਤ੍ਤਬ੍ਬਂ. ਤੇਨ ‘‘ਏਵਂ ਕਰਿਸ੍ਸਾਮੀ’’ਤਿ ਸਮ੍ਪਟਿਚ੍ਛਿਤੇ ਇਤਰਸ੍ਸ ਗਨ੍ਤੁਂ ਵਟ੍ਟਤਿ. ਏਵਂ ਅਞ੍ਞਤ੍ਥ ਹਰਿਤ੍ਵਾਪਿ ਸਙ੍ਘਿਕਪਰਿਭੋਗੇਨ ਪਰਿਭੁਞ੍ਜਨ੍ਤਸ੍ਸ ਹਿ ਨਟ੍ਠਂ ਵਾ ਜਿਣ੍ਣਂ ਵਾ ਚੋਰੇਹਿ ਵਾ ਹਟਂ ਗੀਵਾ ਨੇਵ ਹੋਤਿ, ਪੁਗ੍ਗਲਿਕਪਰਿਭੋਗੇਨ ਪਰਿਭੁਞ੍ਜਨ੍ਤਸ੍ਸ ਪਨ ਗੀਵਾ ਹੋਤਿ. ਅਞ੍ਞਸ੍ਸ ਮਞ੍ਚਪੀਠਂ ਪਨ ਸਙ੍ਘਿਕਪਰਿਭੋਗੇਨ ਵਾ ਪੁਗ੍ਗਲਿਕਪਰਿਭੋਗੇਨ ਵਾ ਪਰਿਭੁਞ੍ਜਨ੍ਤਸ੍ਸ ਨਟ੍ਠਂ ਗੀਵਾਯੇਵ. ਅਨ੍ਤੋਵਿਹਾਰੇ ਸੇਯ੍ਯਂ ਸਨ੍ਥਰਿਤ੍ਵਾ ‘‘ਅਜ੍ਜੇਵ ਆਗਨ੍ਤ੍ਵਾ ਪਟਿਜਗ੍ਗਿਸ੍ਸਾਮੀ’’ਤਿ ਏਵਂ ਸਾਪੇਕ੍ਖੋ ਨਦੀਪਾਰਂ ਗਾਮਨ੍ਤਰਂ ਵਾ ਗਨ੍ਤ੍ਵਾ ਯਤ੍ਥਸ੍ਸ ਗਮਨਚਿਤ੍ਤਂ ਉਪ੍ਪਨ੍ਨਂ, ਤਤ੍ਥੇਵ ਠਿਤੋ ਕਞ੍ਚਿ ਪੇਸੇਤ੍ਵਾ ਆਪੁਚ੍ਛਤਿ, ਨਦੀਪੂਰਰਾਜਚੋਰਾਦੀਸੁ ਵਾ ਕੇਨਚਿ ਪਲਿਬੋਧੋ ਹੋਤਿ ਉਪਦ੍ਦੁਤੋ, ਨ ਸਕ੍ਕੋਤਿ ਪਚ੍ਚਾਗਨ੍ਤੁਂ, ਏਵਂਭੂਤਸ੍ਸ ਅਨਾਪਤ੍ਤਿ.

ਵਿਹਾਰਸ੍ਸ ਉਪਚਾਰੇ ਪਨ ਉਪਟ੍ਠਾਨਸਾਲਾਯ ਵਾ ਮਣ੍ਡਪੇ ਵਾ ਰੁਕ੍ਖਮੂਲੇ ਵਾ ਸੇਯ੍ਯਂ ਸਨ੍ਥਰਿਤ੍ਵਾ ਵਾ ਸਨ੍ਥਰਾਪੇਤ੍ਵਾ ਵਾ ਤਂ ਪਕ੍ਕਮਨ੍ਤੋ ਨੇਵ ਉਦ੍ਧਰਤਿ ਨ ਉਦ੍ਧਰਾਪੇਤਿ ਅਨਾਪੁਚ੍ਛਂ ਵਾ ਗਚ੍ਛਤਿ, ਦੁਕ੍ਕਟਂ. ਵੁਤ੍ਤਪ੍ਪਕਾਰਞ੍ਹਿ ਦਸਵਿਧਂ ਸੇਯ੍ਯਂ ਅਨ੍ਤੋਗਬ੍ਭਾਦਿਮ੍ਹਿ ਗੁਤ੍ਤਟ੍ਠਾਨੇ ਪਞ੍ਞਪੇਤ੍ਵਾ ਗਚ੍ਛਨ੍ਤਸ੍ਸ ਯਸ੍ਮਾ ਸੇਯ੍ਯਾਪਿ ਸੇਨਾਸਨਮ੍ਪਿ ਉਪਚਿਕਾਹਿ ਪਲੁਜ੍ਜਤਿ, ਵਮ੍ਮਿਕਰਾਸਿਯੇਵ ਹੋਤਿ, ਤਸ੍ਮਾ ਪਾਚਿਤ੍ਤਿਯਂ ਵੁਤ੍ਤਂ. ਬਹਿ ਪਨ ਉਪਟ੍ਠਾਨਸਾਲਾਦੀਸੁ ਪਞ੍ਞਪੇਤ੍ਵਾ ਗਚ੍ਛਨ੍ਤਸ੍ਸ ਸੇਯ੍ਯਾਮਤ੍ਤਮੇਵ ਨਸ੍ਸੇਯ੍ਯ ਠਾਨਸ੍ਸ ਅਗੁਤ੍ਤਤਾਯ, ਨ ਸੇਨਾਸਨਂ, ਤਸ੍ਮਾ ਏਤ੍ਥ ਦੁਕ੍ਕਟਂ ਵੁਤ੍ਤਂ. ਮਞ੍ਚਪੀਠਂ ਪਨ ਯਸ੍ਮਾ ਨ ਸਕ੍ਕਾ ਸਹਸਾ ਉਪਚਿਕਾਹਿ ਖਾਯਿਤੁਂ, ਤਸ੍ਮਾ ਤਂ ਵਿਹਾਰੇਪਿ ਸਨ੍ਥਰਿਤ੍ਵਾ ਗਚ੍ਛਨ੍ਤਸ੍ਸ ਦੁਕ੍ਕਟਂ. ਵਿਹਾਰਸ੍ਸੂਪਚਾਰੇ ਉਪਟ੍ਠਾਨਸਾਲਾਯਂ ਮਣ੍ਡਪੇ ਰੁਕ੍ਖਮੂਲੇਪਿ ਸਨ੍ਥਰਿਤ੍ਵਾ ਪਕ੍ਕਮਨ੍ਤਸ੍ਸ ਦੁਕ੍ਕਟਮੇਵ.

੮੪. ‘‘ਯੋ ਪਨ ਭਿਕ੍ਖੁ ਸਙ੍ਘਿਕਂ ਮਞ੍ਚਂ ਵਾ ਪੀਠਂ ਵਾ ਭਿਸਿਂ ਵਾ ਕੋਚ੍ਛਂ ਵਾ ਅਜ੍ਝੋਕਾਸੇ ਸਨ੍ਥਰਿਤ੍ਵਾ ਵਾ ਸਨ੍ਥਰਾਪੇਤ੍ਵਾ ਵਾ ਤਂ ਪਕ੍ਕਮਨ੍ਤੋ ਨੇਵ ਉਦ੍ਧਰੇਯ੍ਯ ਨ ਉਦ੍ਧਰਾਪੇਯ੍ਯ ਅਨਾਪੁਚ੍ਛਂ ਵਾ ਗਚ੍ਛੇਯ੍ਯ, ਪਾਚਿਤ੍ਤਿਯ’’ਨ੍ਤਿ (ਪਾਚਿ. ੧੦੯) ਵਚਨਤੋ ਸਙ੍ਘਿਕਾਨਿ ਪਨ ਮਞ੍ਚਪੀਠਾਦੀਨਿ ਚਤ੍ਤਾਰਿ ਅਜ੍ਝੋਕਾਸੇ ਸਨ੍ਥਰਿਤ੍ਵਾ ਵਾ ਸਨ੍ਥਰਾਪੇਤ੍ਵਾ ਵਾ ਉਦ੍ਧਰਣਾਦੀਨਿ ਅਕਤ੍ਵਾ ‘‘ਅਜ੍ਜੇਵ ਆਗਮਿਸ੍ਸਾਮੀ’’ਤਿ ਗਚ੍ਛਨ੍ਤਸ੍ਸਪਿ ਥਾਮਮਜ੍ਝਿਮਸ੍ਸ ਪੁਰਿਸਸ੍ਸ ਲੇਡ੍ਡੁਪਾਤਾਤਿਕ੍ਕਮੇ ਪਾਚਿਤ੍ਤਿਯਂ. ਏਤ੍ਥ ਕੋਚ੍ਛਂ ਨਾਮ ਵਾਕਮਯਂ ਵਾ ਉਸੀਰਮਯਂ ਵਾ ਮੁਞ੍ਜਮਯਂ ਵਾ ਪਬ੍ਬਜਮਯਂ ਵਾ ਹੇਟ੍ਠਾ ਚ ਉਪਰਿ ਚ ਵਿਤ੍ਥਤਂ ਮਜ੍ਝੇ ਸਂਖਿਤ੍ਤਂ ਪਣਵਸਣ੍ਠਾਨਂ ਕਤ੍ਵਾ ਬਦ੍ਧਂ. ਤਂ ਕਿਰ ਮਜ੍ਝੇ ਸੀਹਬ੍ਯਗ੍ਘਚਮ੍ਮਪਰਿਕ੍ਖਿਤ੍ਤਮ੍ਪਿ ਕਰੋਨ੍ਤਿ, ਅਕਪ੍ਪਿਯਚਮ੍ਮਂ ਨਾਮੇਤ੍ਥ ਨਤ੍ਥਿ. ਸੇਨਾਸਨਞ੍ਹਿ ਸੋਵਣ੍ਣਮਯਮ੍ਪਿ ਵਟ੍ਟਤਿ, ਤਸ੍ਮਾ ਤਂ ਮਹਗ੍ਘਂ ਹੋਤਿ.

‘‘ਅਨੁਜਾਨਾਮਿ, ਭਿਕ੍ਖਵੇ, ਅਟ੍ਠ ਮਾਸੇ ਅਵਸ੍ਸਿਕਸਙ੍ਕੇਤੇ ਮਣ੍ਡਪੇ ਵਾ ਰੁਕ੍ਖਮੂਲੇ ਵਾ ਯਤ੍ਥ ਕਾਕਾ ਵਾ ਕੁਲਲਾ ਵਾ ਨ ਊਹਦਨ੍ਤਿ, ਤਤ੍ਥ ਸੇਨਾਸਨਂ ਨਿਕ੍ਖਿਪਿਤੁ’’ਨ੍ਤਿ (ਪਾਚਿ. ੧੧੦) ਵਚਨਤੋ ਪਨ ਵਸ੍ਸਿਕਵਸ੍ਸਾਨਮਾਸਾਤਿ ਏਵਂ ਅਪਞ੍ਞਾਤੇ ਚਤ੍ਤਾਰੋ ਹੇਮਨ੍ਤਿਕੇ, ਚਤ੍ਤਾਰੋ ਗਿਮ੍ਹਿਕੇਤਿ ਅਟ੍ਠ ਮਾਸੇ ਸਾਖਾਮਣ੍ਡਪੇ ਵਾ ਪਦਰਮਣ੍ਡਪੇ ਵਾ ਰੁਕ੍ਖਮੂਲੇ ਵਾ ਨਿਕ੍ਖਿਪਿਤੁਂ ਵਟ੍ਟਤਿ. ਯਸ੍ਮਿਂ ਪਨ ਕਾਕਾ ਵਾ ਕੁਲਲਾ ਵਾ ਅਞ੍ਞੇ ਵਾ ਸਕੁਨ੍ਤਾ ਧੁਵਨਿਵਾਸੇਨ ਕੁਲਾਵਕੇ ਕਤ੍ਵਾ ਵਸਨ੍ਤਿ, ਤਸ੍ਸ ਰੁਕ੍ਖਸ੍ਸ ਮੂਲੇ ਨ ਨਿਕ੍ਖਿਪਿਤਬ੍ਬਂ. ‘‘ਅਟ੍ਠ ਮਾਸੇ’’ਤਿ ਵਚਨਤੋ ਯੇਸੁ ਜਨਪਦੇਸੁ ਵਸ੍ਸਕਾਲੇ ਨ ਵਸ੍ਸਤਿ, ਤੇਸੁ ਚਤ੍ਤਾਰੋ ਮਾਸੇ ਨਿਕ੍ਖਿਪਿਤੁਂ ਨ ਵਟ੍ਟਤਿਯੇਵ. ‘‘ਅਵਸ੍ਸਿਕਸਙ੍ਕੇਤੇ’’ਤਿ ਵਚਨਤੋ ਯਤ੍ਥ ਹੇਮਨ੍ਤੇ ਦੇਵੋ ਵਸ੍ਸਤਿ, ਤਤ੍ਥ ਹੇਮਨ੍ਤੇਪਿ ਅਜ੍ਝੋਕਾਸੇ ਨਿਕ੍ਖਿਪਿਤੁਂ ਨ ਵਟ੍ਟਤਿ. ਗਿਮ੍ਹੇ ਪਨ ਸਬ੍ਬਤ੍ਥ ਵਿਗਤਵਲਾਹਕਂ ਵਿਸੁਦ੍ਧਂ ਨਤਂ ਹੋਤਿ, ਏਵਰੂਪੇ ਕਾਲੇ ਕੇਨਚਿਦੇਵ ਕਰਣੀਯੇਨ ਅਜ੍ਝੋਕਾਸੇ ਮਞ੍ਚਪੀਠਂ ਨਿਕ੍ਖਿਪਿਤੁਂ ਵਟ੍ਟਤਿ.

੮੫. ਅਬ੍ਭੋਕਾਸਿਕੇਨਪਿ ਵਤ੍ਤਂ ਜਾਨਿਤਬ੍ਬਂ. ਤਸ੍ਸ ਹਿ ਸਚੇ ਪੁਗ੍ਗਲਿਕਮਞ੍ਚਕੋ ਅਤ੍ਥਿ, ਤਤ੍ਥੇਵ ਸਯਿਤਬ੍ਬਂ. ਸਙ੍ਘਿਕਂ ਗਣ੍ਹਨ੍ਤੇਨ ਵੇਤ੍ਤੇਨ ਵਾ ਵਾਕੇਨ ਵਾ ਵੀਤਮਞ੍ਚਕੋ ਗਹੇਤਬ੍ਬੋ, ਤਸ੍ਮਿਂ ਅਸਤਿ ਪੁਰਾਣਮਞ੍ਚਕੋ ਗਹੇਤਬ੍ਬੋ, ਤਸ੍ਮਿਂ ਅਸਤਿ ਨਵਵਾਯਿਮੋ ਵਾ ਓਨਦ੍ਧਕੋ ਵਾ ਗਹੇਤਬ੍ਬੋ. ਗਹੇਤ੍ਵਾ ਪਨ ‘‘ਅਹਂ ਉਕ੍ਕਟ੍ਠਰੁਕ੍ਖਮੂਲਿਕੋ ਉਕ੍ਕਟ੍ਠਅਬ੍ਭੋਕਾਸਿਕੋ’’ਤਿ ਚੀਵਰਕੁਟਿਮ੍ਪਿ ਅਕਤ੍ਵਾ ਅਸਮਯੇ ਅਜ੍ਝੋਕਾਸੇ ਵਾ ਰੁਕ੍ਖਮੂਲੇ ਵਾ ਪਞ੍ਞਪੇਤ੍ਵਾ ਨਿਪਜ੍ਜਿਤੁਂ ਨ ਵਟ੍ਟਤਿ. ਸਚੇ ਪਨ ਚਤੁਗ੍ਗੁਣੇਨਪਿ ਚੀਵਰੇਨ ਕਤਾ ਕੁਟਿ ਅਤੇਮੇਨ੍ਤਂ ਰਕ੍ਖਿਤੁਂ ਨ ਸਕ੍ਕੋਤਿ, ਸਤ੍ਤਾਹਵਦ੍ਦਲਿਕਾਦੀਨਿ ਭਵਨ੍ਤਿ, ਭਿਕ੍ਖੁਨੋ ਕਾਯਾਨੁਗਤਿਕਤ੍ਤਾ ਵਟ੍ਟਤਿ. ਅਰਞ੍ਞੇ ਪਣ੍ਣਕੁਟੀਸੁ ਵਸਨ੍ਤਾਨਂ ਸੀਲਸਮ੍ਪਦਾਯ ਪਸਨ੍ਨਚਿਤ੍ਤਾ ਮਨੁਸ੍ਸਾ ਨਵਂ ਮਞ੍ਚਪੀਠਂ ਦੇਨ੍ਤਿ ‘‘ਸਙ੍ਘਿਕਪਰਿਭੋਗੇਨ ਪਰਿਭੁਞ੍ਜਥਾ’’ਤਿ, ਵਸਿਤ੍ਵਾ ਗਚ੍ਛਨ੍ਤੇਹਿ ਸਾਮਨ੍ਤਵਿਹਾਰੇ ਸਭਾਗਭਿਕ੍ਖੂਨਂ ਪੇਸੇਤ੍ਵਾ ਗਨ੍ਤਬ੍ਬਂ, ਸਭਾਗਾਨਂ ਅਭਾਵੇਨ ਅਨੋਵਸ੍ਸਕੇ ਨਿਕ੍ਖਿਪਿਤ੍ਵਾ ਗਨ੍ਤਬ੍ਬਂ, ਅਨੋਵਸ੍ਸਕੇ ਅਸਤਿ ਰੁਕ੍ਖੇ ਲਗ੍ਗੇਤ੍ਵਾ ਗਨ੍ਤਬ੍ਬਂ. ਚੇਤਿਯਙ੍ਗਣੇ ਸਮ੍ਮਜ੍ਜਨਿਂ ਗਹੇਤ੍ਵਾ ਭੋਜਨਸਾਲਙ੍ਗਣਂ ਵਾ ਉਪੋਸਥਾਗਾਰਙ੍ਗਣਂ ਵਾ ਪਰਿਵੇਣਦਿਵਾਟ੍ਠਾਨਅਗ੍ਗਿਸਾਲਾਦੀਸੁ ਵਾ ਅਞ੍ਞਤਰਂ ਸਮ੍ਮਜ੍ਜਿਤ੍ਵਾ ਧੋਵਿਤ੍ਵਾ ਪੁਨ ਸਮ੍ਮਜ੍ਜਨਿਮਾਲ਼ਕੇਯੇਵ ਠਪੇਤਬ੍ਬਾ. ਉਪੋਸਥਾਗਾਰਾਦੀਸੁ ਅਞ੍ਞਤਰਸ੍ਮਿਂ ਗਹੇਤ੍ਵਾ ਅਵਸੇਸਾਨਿ ਸਮ੍ਮਜ੍ਜਨ੍ਤਸ੍ਸਪਿ ਏਸੇਵ ਨਯੋ.

ਯੋ ਪਨ ਭਿਕ੍ਖਾਚਾਰਮਗ੍ਗਂ ਸਮ੍ਮਜ੍ਜਨ੍ਤੋ ਗਨ੍ਤੁਕਾਮੋ ਹੋਤਿ, ਤੇਨ ਸਮ੍ਮਜ੍ਜਿਤ੍ਵਾ ਸਚੇ ਅਨ੍ਤਰਾਮਗ੍ਗੇ ਸਾਲਾ ਅਤ੍ਥਿ, ਤਤ੍ਥ ਠਪੇਤਬ੍ਬਾ. ਸਚੇ ਨਤ੍ਥਿ, ਵਲਾਹਕਾਨਂ ਅਨੁਟ੍ਠਿਤਭਾਵਂ ਸਲ੍ਲਕ੍ਖੇਤ੍ਵਾ ‘‘ਯਾਵਾਹਂ ਗਾਮਤੋ ਨਿਕ੍ਖਮਾਮਿ, ਤਾਵ ਨ ਵਸ੍ਸਿਸ੍ਸਤੀ’’ਤਿ ਜਾਨਨ੍ਤੇਨ ਯਤ੍ਥ ਕਤ੍ਥਚਿ ਨਿਕ੍ਖਿਪਿਤ੍ਵਾ ਪੁਨ ਪਚ੍ਚਾਗਚ੍ਛਨ੍ਤੇਨ ਪਾਕਤਿਕਟ੍ਠਾਨੇ ਠਪੇਤਬ੍ਬਾ. ‘‘ਸਚੇ ਵਸ੍ਸਿਸ੍ਸਤੀਤਿ ਜਾਨਨ੍ਤੋ ਅਜ੍ਝੋਕਾਸੇ ਠਪੇਤਿ, ਦੁਕ੍ਕਟ’’ਨ੍ਤਿ ਮਹਾਪਚ੍ਚਰਿਯਂ ਵੁਤ੍ਤਂ. ਸਚੇ ਪਨ ਤਤ੍ਰ ਤਤ੍ਰੇਵ ਸਮ੍ਮਜ੍ਜਨਤ੍ਥਾਯ ਸਮ੍ਮਜ੍ਜਨੀ ਨਿਕ੍ਖਿਤ੍ਤਾ ਹੋਤਿ, ਤਂ ਤਂ ਠਾਨਂ ਸਮ੍ਮਜ੍ਜਿਤ੍ਵਾ ਤਤ੍ਰ ਤਤ੍ਰੇਵ ਨਿਕ੍ਖਿਪਿਤੁਂ ਵਟ੍ਟਤਿ, ਆਸਨਸਾਲਂ ਸਮ੍ਮਜ੍ਜਨ੍ਤੇਨ ਵਤ੍ਤਂ ਜਾਨਿਤਬ੍ਬਂ. ਤਤ੍ਰਿਦਂ ਵਤ੍ਤਂ – ਮਜ੍ਝਤੋ ਪਟ੍ਠਾਯ ਪਾਦਟ੍ਠਾਨਾਭਿਮੁਖਾ ਵਾਲਿਕਾ ਹਰਿਤਬ੍ਬਾ, ਕਚਵਰਂ ਹਤ੍ਥੇਹਿ ਗਹੇਤ੍ਵਾ ਬਹਿ ਛਡ੍ਡੇਤਬ੍ਬਂ.

੮੬. ਸਚੇ ਵੁਤ੍ਤਪ੍ਪਕਾਰਂ ਚਤੁਬ੍ਬਿਧਮ੍ਪਿ ਸਙ੍ਘਿਕਂ ਸੇਨਾਸਨਂ ਅਜ੍ਝੋਕਾਸੇ ਵਾ ਰੁਕ੍ਖਮੂਲੇ ਵਾ ਮਣ੍ਡਪੇ ਵਾ ਅਨੁਪਸਮ੍ਪਨ੍ਨੇਨ ਸਨ੍ਥਰਾਪੇਤਿ, ਯੇਨ ਸਨ੍ਥਰਾਪਿਤਂ, ਤਸ੍ਸ ਪਲਿਬੋਧੋ. ਸਚੇ ਪਨ ਉਪਸਮ੍ਪਨ੍ਨੇਨ ਸਨ੍ਥਰਾਪੇਤਿ, ਯੇਨ ਸਨ੍ਥਤਂ, ਤਸ੍ਸ ਪਲਿਬੋਧੋ. ਤਤ੍ਰਾਯਂ ਵਿਨਿਚ੍ਛਯੋ (ਪਾਚਿ. ਅਟ੍ਠ. ੧੧੧) – ਥੇਰੋ ਭੋਜਨਸਾਲਾਯਂ ਭਤ੍ਤਕਿਚ੍ਚਂ ਕਤ੍ਵਾ ਦਹਰਂ ਆਣਾਪੇਤਿ ‘‘ਗਚ੍ਛ ਦਿਵਾਟ੍ਠਾਨੇ ਮਞ੍ਚਪੀਠਂ ਪਞ੍ਞਪੇਹੀ’’ਤਿ. ਸੋ ਤਥਾ ਕਤ੍ਵਾ ਨਿਸਿਨ੍ਨੋ, ਥੇਰੋ ਯਥਾਰੁਚਿ ਵਿਚਰਿਤ੍ਵਾ ਤਤ੍ਥ ਗਨ੍ਤ੍ਵਾ ਥਵਿਕਂ ਵਾ ਉਤ੍ਤਰਾਸਙ੍ਗਂ ਵਾ ਠਪੇਤਿ, ਤਤੋ ਪਟ੍ਠਾਯ ਥੇਰਸ੍ਸ ਪਲਿਬੋਧੋ. ਨਿਸੀਦਿਤ੍ਵਾ ਸਯਂ ਗਚ੍ਛਨ੍ਤੋ ਨੇਵ ਉਦ੍ਧਰਤਿ ਨ ਉਦ੍ਧਰਾਪੇਤਿ, ਲੇਡ੍ਡੁਪਾਤਾਤਿਕ੍ਕਮੇ ਪਾਚਿਤ੍ਤਿਯਂ. ਸਚੇ ਪਨ ਥੇਰੋ ਤਤ੍ਥ ਥਵਿਕਂ ਵਾ ਉਤ੍ਤਰਾਸਙ੍ਗਂ ਵਾ ਅਟ੍ਠਪੇਤ੍ਵਾ ਚਙ੍ਕਮਨ੍ਤੋਵ ਦਹਰਂ ‘‘ਗਚ੍ਛ ਤ੍ਵ’’ਨ੍ਤਿ ਭਣਤਿ, ਤੇਨ ‘‘ਇਦਂ, ਭਨ੍ਤੇ, ਮਞ੍ਚਪੀਠ’’ਨ੍ਤਿ ਆਚਿਕ੍ਖਿਤਬ੍ਬਂ. ਸਚੇ ਥੇਰੋ ਵਤ੍ਤਂ ਜਾਨਾਤਿ, ‘‘ਤ੍ਵਂ ਗਚ੍ਛ, ਅਹਂ ਪਾਕਤਿਕਂ ਕਰਿਸ੍ਸਾਮੀ’’ਤਿ ਵਤ੍ਤਬ੍ਬਂ. ਸਚੇ ਬਾਲੋ ਹੋਤਿ ਅਨੁਗ੍ਗਹਿਤਵਤ੍ਤੋ, ‘‘ਗਚ੍ਛ, ਮਾ ਇਧ ਤਿਟ੍ਠ, ਨੇਵ ਨਿਸੀਦਿਤੁਂ ਨ ਨਿਪਜ੍ਜਿਤੁਂ ਦੇਮੀ’’ਤਿ ਦਹਰਂ ਤਜ੍ਜੇਤਿਯੇਵ. ਦਹਰੇਨ ‘‘ਭਨ੍ਤੇ, ਸੁਖਂ ਸਯਥਾ’’ਤਿ ਕਪ੍ਪਂ ਲਭਿਤ੍ਵਾ ਵਨ੍ਦਿਤ੍ਵਾ ਗਨ੍ਤਬ੍ਬਂ. ਤਸ੍ਮਿਂ ਗਤੇ ਥੇਰਸ੍ਸੇਵ ਪਲਿਬੋਧੋ, ਪੁਰਿਮਨਯੇਨੇਵ ਚਸ੍ਸ ਆਪਤ੍ਤਿ ਵੇਦਿਤਬ੍ਬਾ.

ਅਥ ਪਨ ਆਣਤ੍ਤਿਕ੍ਖਣੇਯੇਵ ਦਹਰੋ ‘‘ਮਯ੍ਹਂ ਭਣ੍ਡੇ ਭਣ੍ਡਧੋਵਨਾਦਿ ਕਿਞ੍ਚਿ ਕਰਣੀਯਂ ਅਤ੍ਥੀ’’ਤਿ ਵਦਤਿ, ਥੇਰੋ ਪਨ ਤਂ ‘‘ਪਞ੍ਞਪੇਤ੍ਵਾ ਗਚ੍ਛਾਹੀ’’ਤਿ ਵਤ੍ਵਾ ਭੋਜਨਸਾਲਤੋ ਨਿਕ੍ਖਮਿਤ੍ਵਾ ਅਞ੍ਞਤ੍ਥ ਗਚ੍ਛਤਿ, ਪਾਦੁਦ੍ਧਾਰੇਨ ਕਾਰੇਤਬ੍ਬੋ. ਸਚੇ ਤਤ੍ਥੇਵ ਗਨ੍ਤ੍ਵਾ ਨਿਸੀਦਤਿ, ਪੁਰਿਮਨਯੇਨੇਵ ਚਸ੍ਸ ਲੇਡ੍ਡੁਪਾਤਾਤਿਕ੍ਕਮੇ ਆਪਤ੍ਤਿ. ਸਚੇ ਪਨ ਥੇਰੋ ਸਾਮਣੇਰਂ ਆਣਾਪੇਤਿ, ਸਾਮਣੇਰੇ ਤਤ੍ਥ ਮਞ੍ਚਪੀਠਂ ਪਞ੍ਞਪੇਤ੍ਵਾ ਨਿਸਿਨ੍ਨੇਪਿ ਭੋਜਨਸਾਲਤੋ ਅਞ੍ਞਤ੍ਥ ਗਚ੍ਛਨ੍ਤੋ ਪਾਦੁਦ੍ਧਾਰੇਨ ਕਾਰੇਤਬ੍ਬੋ. ਗਨ੍ਤ੍ਵਾ ਨਿਸਿਨ੍ਨੋ ਪੁਨ ਗਮਨਕਾਲੇ ਲੇਡ੍ਡੁਪਾਤਾਤਿਕ੍ਕਮੇ ਆਪਤ੍ਤਿਯਾ ਕਾਰੇਤਬ੍ਬੋ. ਸਚੇ ਪਨ ਆਣਾਪੇਨ੍ਤੋ ‘‘ਮਞ੍ਚਪੀਠਂ ਪਞ੍ਞਪੇਤ੍ਵਾ ਤਤ੍ਥੇਵ ਨਿਸੀਦਾ’’ਤਿ ਆਣਾਪੇਤਿ, ਯਤ੍ਰਿਚ੍ਛਤਿ, ਤਤ੍ਰ ਗਨ੍ਤ੍ਵਾ ਆਗਨ੍ਤੁਂ ਲਭਤਿ. ਸਯਂ ਪਨ ਪਾਕਤਿਕਂ ਅਕਤ੍ਵਾ ਗਚ੍ਛਨ੍ਤਸ੍ਸ ਲੇਡ੍ਡੁਪਾਤਾਤਿਕ੍ਕਮੇ ਪਾਚਿਤ੍ਤਿਯਂ. ਅਨ੍ਤਰਸਨ੍ਨਿਪਾਤੇ ਮਞ੍ਚਪੀਠਾਦੀਨਿ ਪਞ੍ਞਪੇਤ੍ਵਾ ਨਿਸਿਨ੍ਨੇਹਿ ਗਮਨਕਾਲੇ ਆਰਾਮਿਕਾਨਂ ‘‘ਇਦਂ ਪਟਿਸਾਮੇਥਾ’’ਤਿ ਵਤ੍ਤਬ੍ਬਂ, ਅਵਤ੍ਵਾ ਗਚ੍ਛਨ੍ਤਾਨਂ ਲੇਡ੍ਡੁਪਾਤਾਤਿਕ੍ਕਮੇ ਆਪਤ੍ਤਿ.

੮੭. ਮਹਾਧਮ੍ਮਸ੍ਸਵਨਂ ਨਾਮ ਹੋਤਿ, ਤਤ੍ਥ ਉਪੋਸਥਾਗਾਰਤੋਪਿ ਭੋਜਨਸਾਲਤੋਪਿ ਆਹਰਿਤ੍ਵਾ ਮਞ੍ਚਪੀਠਾਨਿ ਪਞ੍ਞਪੇਨ੍ਤਿ, ਆਵਾਸਿਕਾਨਂਯੇਵ ਪਲਿਬੋਧੋ. ਸਚੇ ਆਗਨ੍ਤੁਕਾ ‘‘ਇਦਂ ਅਮ੍ਹਾਕਂ ਉਪਜ੍ਝਾਯਸ੍ਸ, ਇਦਂ ਆਚਰਿਯਸ੍ਸਾ’’ਤਿ ਗਣ੍ਹਨ੍ਤਿ, ਤਤੋ ਪਟ੍ਠਾਯ ਤੇਸਂ ਪਲਿਬੋਧੋ. ਗਮਨਕਾਲੇ ਪਾਕਤਿਕਂ ਅਕਤ੍ਵਾ ਲੇਡ੍ਡੁਪਾਤਂ ਅਤਿਕ੍ਕਮਨ੍ਤਾਨਂ ਆਪਤ੍ਤਿ. ਮਹਾਪਚ੍ਚਰਿਯਂ ਪਨ ਵੁਤ੍ਤਂ ‘‘ਯਾਵ ਅਞ੍ਞੇ ਨ ਨਿਸੀਦਨ੍ਤਿ, ਤਾਵ ਯੇਹਿ ਪਞ੍ਞਤ੍ਤਂ, ਤੇਸਂ ਭਾਰੋ, ਅਞ੍ਞੇਸੁ ਆਗਨ੍ਤ੍ਵਾ ਨਿਸਿਨ੍ਨੇਸੁ ਨਿਸਿਨ੍ਨਕਾਨਂ ਭਾਰੋ. ਸਚੇ ਤੇ ਅਨੁਦ੍ਧਰਿਤ੍ਵਾ ਵਾ ਅਨੁਦ੍ਧਰਾਪੇਤ੍ਵਾ ਵਾ ਗਚ੍ਛਨ੍ਤਿ, ਦੁਕ੍ਕਟਂ. ਕਸ੍ਮਾ? ਅਨਾਣਤ੍ਤਿਯਾ ਪਞ੍ਞਪਿਤਤ੍ਤਾ’’ਤਿ. ਧਮ੍ਮਾਸਨੇ ਪਞ੍ਞਤ੍ਤੇ ਯਾਵ ਉਸ੍ਸਾਰਕੋ ਵਾ ਧਮ੍ਮਕਥਿਕੋ ਵਾ ਨਾਗਚ੍ਛਤਿ, ਤਾਵ ਪਞ੍ਞਾਪਕਾਨਂ ਪਲਿਬੋਧੋ. ਤਸ੍ਮਿਂ ਆਗਨ੍ਤ੍ਵਾ ਨਿਸਿਨ੍ਨੇ ਤਸ੍ਸ ਪਲਿਬੋਧੋ. ਸਕਲਂ ਅਹੋਰਤ੍ਤਂ ਧਮ੍ਮਸ੍ਸਵਨਂ ਹੋਤਿ, ਅਞ੍ਞੋ ਉਸ੍ਸਾਰਕੋ ਵਾ ਧਮ੍ਮਕਥਿਕੋ ਵਾ ਉਟ੍ਠਾਤਿ, ਅਞ੍ਞੋ ਨਿਸੀਦਤਿ, ਯੋ ਯੋ ਆਗਨ੍ਤ੍ਵਾ ਨਿਸੀਦਤਿ, ਤਸ੍ਸ ਤਸ੍ਸੇਵ ਭਾਰੋ. ਉਟ੍ਠਹਨ੍ਤੇਨ ਪਨ ‘‘ਇਦਮਾਸਨਂ ਤੁਮ੍ਹਾਕਂ ਭਾਰੋ’’ਤਿ ਵਤ੍ਵਾ ਗਨ੍ਤਬ੍ਬਂ. ਸਚੇਪਿ ਇਤਰਸ੍ਮਿਂ ਅਨਾਗਤੇ ਪਠਮਂ ਨਿਸਿਨ੍ਨੋ ਉਟ੍ਠਾਯ ਗਚ੍ਛਤਿ, ਤਸ੍ਮਿਞ੍ਚ ਅਨ੍ਤੋਉਪਚਾਰਟ੍ਠੇਯੇਵ ਇਤਰੋ ਆਗਨ੍ਤ੍ਵਾ ਨਿਸੀਦਤਿ, ਉਟ੍ਠਾਯ ਗਤੋ ਆਪਤ੍ਤਿਯਾ ਨ ਕਾਰੇਤਬ੍ਬੋ. ਸਚੇ ਪਨ ਇਤਰਸ੍ਮਿਂ ਅਨਾਗਤੇਯੇਵ ਪਠਮਂ ਨਿਸਿਨ੍ਨੋ ਉਟ੍ਠਾਯਾਸਨਾ ਲੇਡ੍ਡੁਪਾਤਂ ਅਤਿਕ੍ਕਮਤਿ, ਆਪਤ੍ਤਿਯਾ ਕਾਰੇਤਬ੍ਬੋ. ‘‘ਸਬ੍ਬਤ੍ਥ ਲੇਡ੍ਡੁਪਾਤਾਤਿਕ੍ਕਮੇ ਪਠਮਪਾਦੇ ਦੁਕ੍ਕਟਂ, ਦੁਤਿਯਪਾਦੇ ਪਾਚਿਤ੍ਤਿਯ’’ਨ੍ਤਿ ਅਯਂ ਨਯੋ ਮਹਾਪਚ੍ਚਰਿਯਂ ਵੁਤ੍ਤੋਤਿ.

੮੮. ਸਚੇ ਪਨ ਵੁਤ੍ਤਪ੍ਪਕਾਰਸੇਨਾਸਨਤੋ ਅਞ੍ਞਂ ਸਙ੍ਘਿਕਂ ਚਿਮਿਲਿਕਂ ਵਾ ਉਤ੍ਤਰਤ੍ਥਰਣਂ ਵਾ ਭੂਮਤ੍ਥਰਣਂ ਵਾ ਤਟ੍ਟਿਕਂ ਵਾ ਚਮ੍ਮਖਣ੍ਡਂ ਵਾ ਪਾਦਪੁਞ੍ਛਨਿਂ ਵਾ ਫਲਕਪੀਠਂ ਵਾ ਅਜ੍ਝੋਕਾਸੇ ਸਨ੍ਥਰਿਤ੍ਵਾ ਵਾ ਸਨ੍ਥਰਾਪੇਤ੍ਵਾ ਵਾ ਤਂ ਪਕ੍ਕਮਨ੍ਤੋ ਨੇਵ ਉਦ੍ਧਰਤਿ ਨ ਉਦ੍ਧਰਾਪੇਤਿ ਅਨਾਪੁਚ੍ਛਂ ਵਾ ਗਚ੍ਛਤਿ, ਦੁਕ੍ਕਟਂ. ਆਧਾਰਕਂ ਪਤ੍ਤਪਿਧਾਨਕਂ ਪਾਦਕਠਲਿਕਂ ਤਾਲਵਣ੍ਟਂ ਬੀਜਨਿਪਤ੍ਤਕਂ ਯਂ ਕਿਞ੍ਚਿ ਦਾਰੁਭਣ੍ਡਂ ਅਨ੍ਤਮਸੋ ਪਾਨੀਯਉਲ਼ੁਙ੍ਕਂ ਪਾਨੀਯਸਙ੍ਖਂ ਅਜ੍ਝੋਕਾਸੇ ਨਿਕ੍ਖਿਪਿਤ੍ਵਾ ਗਚ੍ਛਨ੍ਤਸ੍ਸਪਿ ਦੁਕ੍ਕਟਂ. ਅਜ੍ਝੋਕਾਸੇ ਰਜਨਂ ਪਚਿਤ੍ਵਾ ਰਜਨਭਾਜਨਂ ਰਜਨਉਲ਼ੁਙ੍ਕੋ ਰਜਨਦੋਣਿਕਾਤਿ ਸਬ੍ਬਂ ਅਗ੍ਗਿਸਾਲਾਯ ਪਟਿਸਾਮੇਤਬ੍ਬਂ. ਸਚੇ ਅਗ੍ਗਿਸਾਲਾ ਨਤ੍ਥਿ, ਅਨੋਵਸ੍ਸਕੇ ਪਬ੍ਭਾਰੇ ਨਿਕ੍ਖਿਪਿਤਬ੍ਬਂ. ਤਸ੍ਮਿਮ੍ਪਿ ਅਸਤਿ ਯਤ੍ਥ ਓਲੋਕੇਨ੍ਤਾ ਭਿਕ੍ਖੂ ਪਸ੍ਸਨ੍ਤਿ, ਤਾਦਿਸੇ ਠਾਨੇ ਠਪੇਤ੍ਵਾ ਗਨ੍ਤੁਂ ਵਟ੍ਟਤਿ. ਅਞ੍ਞਪੁਗ੍ਗਲਿਕੇ ਪਨ ਮਞ੍ਚਪੀਠਾਦਿਸੇਨਾਸਨੇਪਿ ਦੁਕ੍ਕਟਮੇਵ. ਏਤ੍ਥ ਪਨ ‘‘ਯਸ੍ਮਿਂ ਵਿਸ੍ਸਾਸਗ੍ਗਾਹੋ ਨ ਰੁਹਤਿ, ਤਸ੍ਸ ਸਨ੍ਤਕੇ ਦੁਕ੍ਕਟਂ. ਯਸ੍ਮਿਂ ਪਨ ਵਿਸ੍ਸਾਸਗ੍ਗਾਹੋ ਰੁਹਤਿ, ਤਸ੍ਸ ਸਨ੍ਤਕਂ ਅਤ੍ਤਨੋ ਪੁਗ੍ਗਲਿਕਮੇਵ ਹੋਤੀ’’ਤਿ ਮਹਾਪਚ੍ਚਰਿਯਾਦੀਸੁ ਵੁਤ੍ਤਂ. ਅਤ੍ਤਨੋ ਪੁਗ੍ਗਲਿਕੇ ਪਨ ਅਨਾਪਤ੍ਤਿਯੇਵ. ਯੋ ਭਿਕ੍ਖੁ ਵਾ ਸਾਮਣੇਰੋ ਵਾ ਆਰਾਮਿਕੋ ਵਾ ਲਜ੍ਜੀ ਹੋਤਿ, ਅਤ੍ਤਨੋ ਪਲਿਬੋਧਂ ਵਿਯ ਮਞ੍ਞਤਿ, ਤਥਾਰੂਪਂ ਅਨਾਪੁਚ੍ਛਿਤ੍ਵਾ ਗਚ੍ਛਨ੍ਤਸ੍ਸਪਿ ਅਨਾਪਤ੍ਤਿ. ਯੋ ਪਨ ਆਤਪੇ ਓਤਾਪੇਨ੍ਤੋ ‘‘ਆਗਨ੍ਤ੍ਵਾ ਉਦ੍ਧਰਿਸ੍ਸਾਮੀ’’ਤਿ ਗਚ੍ਛਤਿ, ਤਸ੍ਸਪਿ ਅਨਾਪਤ੍ਤਿ.

ਇਤਿ ਪਾਲ਼ਿਮੁਤ੍ਤਕਵਿਨਯਵਿਨਿਚ੍ਛਯਸਙ੍ਗਹੇ

ਮਞ੍ਚਪੀਠਾਦਿਸਙ੍ਘਿਕਸੇਨਾਸਨੇਸੁ

ਪਟਿਪਜ੍ਜਿਤਬ੍ਬਵਿਨਿਚ੍ਛਯਕਥਾ ਸਮਤ੍ਤਾ.