੧੬. ਸਹਸੇਯ੍ਯਵਿਨਿਚ੍ਛਯਕਥਾ
੭੯. ਦੁਵਿਧਂ ਸਹਸੇਯ੍ਯਕਨ੍ਤਿ ‘‘ਯੋ ਪਨ ਭਿਕ੍ਖੁ ਅਨੁਪਸਮ੍ਪਨ੍ਨੇਨ ਉਤ੍ਤਰਿਦਿਰਤ੍ਤਤਿਰਤ੍ਤਂ ਸਹਸੇਯ੍ਯਂ ਕਪ੍ਪੇਯ੍ਯ, ਪਾਚਿਤ੍ਤਿਯਂ (ਪਾਚਿ. ੪੯). ਯੋ ਪਨ ਭਿਕ੍ਖੁ ਮਾਤੁਗਾਮੇਨ ਸਹਸੇਯ੍ਯਂ ਕਪ੍ਪੇਯ੍ਯ, ਪਾਚਿਤ੍ਤਿਯ’’ਨ੍ਤਿ (ਪਾਚਿ. ੫੬) ਏਵਂ ਵੁਤ੍ਤਂ ਸਹਸੇਯ੍ਯਸਿਕ੍ਖਾਪਦਦ੍ਵਯਂ ਸਨ੍ਧਾਯ ਵੁਤ੍ਤਂ. ਤਤ੍ਰਾਯਂ ਵਿਨਿਚ੍ਛਯੋ (ਪਾਚਿ. ਅਟ੍ਠ. ੫੦-੫੧) – ਅਨੁਪਸਮ੍ਪਨ੍ਨੇਨ ਸਦ੍ਧਿਂ ਤਿਣ੍ਣਂ ਰਤ੍ਤੀਨਂ ਉਪਰਿ ਚਤੁਤ੍ਥਦਿਵਸੇ ਅਤ੍ਥਙ੍ਗਤੇ ਸੂਰਿਯੇ ਸਬ੍ਬਚ੍ਛਨ੍ਨਸਬ੍ਬਪਰਿਚ੍ਛਨ੍ਨੇ ਯੇਭੁਯ੍ਯਚ੍ਛਨ੍ਨਯੇਭੁਯ੍ਯਪਰਿਚ੍ਛਨ੍ਨੇ ਵਾ ਸੇਨਾਸਨੇ ਪੁਬ੍ਬਾਪਰਿਯੇਨ ਵਾ ਏਕਕ੍ਖਣੇ ਵਾ ਨਿਪਜ੍ਜਨ੍ਤਸ੍ਸ ਪਾਚਿਤ੍ਤਿਯਂ. ਤਤ੍ਥ ਛਦਨਂ ਅਨਾਹਚ੍ਚ ਦਿਯਡ੍ਢਹਤ੍ਥੁਬ੍ਬੇਧੇਨ ਪਾਕਾਰਾਦਿਨਾ ਯੇਨ ਕੇਨਚਿ ਪਰਿਚ੍ਛਨ੍ਨਮ੍ਪਿ ਸਬ੍ਬਪਰਿਚ੍ਛਨ੍ਨਮਿਚ੍ਚੇਵ ਵੇਦਿਤਬ੍ਬਂ. ਯਂ ਸੇਨਾਸਨਂ ਉਪਰਿ ਪਞ੍ਚਹਿ ਛਦਨੇਹਿ ਅਞ੍ਞੇਨ ਵਾ ਕੇਨਚਿ ਸਬ੍ਬਮੇਵ ਪਰਿਚ੍ਛਨ੍ਨਂ, ਇਦਂ ਸਬ੍ਬਚ੍ਛਨ੍ਨਂ ਨਾਮ ਸੇਨਾਸਨਂ. ਅਟ੍ਠਕਥਾਸੁ ਪਨ ਪਾਕਟਵੋਹਾਰਂ ਗਹੇਤ੍ਵਾ ਵਾਚੁਗ੍ਗਤਵਸੇਨ ‘‘ਸਬ੍ਬਚ੍ਛਨ੍ਨਂ ਨਾਮ ਪਞ੍ਚਹਿ ਛਦਨੇਹਿ ਛਨ੍ਨ’’ਨ੍ਤਿ ਵੁਤ੍ਤਂ. ਕਿਞ੍ਚਾਪਿ ਵੁਤ੍ਤਂ, ਅਥ ਖੋ ਦੁਸ੍ਸਕੁਟਿਯਂ ਸਯਨ੍ਤਸ੍ਸਪਿ ਨ ਸਕ੍ਕਾ ਅਨਾਪਤ੍ਤਿ ਕਾਤੁਂ, ਤਸ੍ਮਾ ਯਂ ਕਿਞ੍ਚਿ ਪਟਿਚ੍ਛਾਦਨਸਮਤ੍ਥਂ ਇਧ ਛਦਨਞ੍ਚ ਪਰਿਚ੍ਛਨ੍ਨਞ੍ਚ ਵੇਦਿਤਬ੍ਬਂ. ਪਞ੍ਚਵਿਧਚ੍ਛਦਨੇਯੇਵ ਹਿ ਗਯ੍ਹਮਾਨੇ ਪਦਰਚ੍ਛਨ੍ਨੇਪਿ ਸਹਸੇਯ੍ਯਾ ਨ ਭਵੇਯ੍ਯ, ਤਸ੍ਮਾ ਯਂ ਸੇਨਾਸਨਂ ਭੂਮਿਤੋ ਪਟ੍ਠਾਯ ਯਾਵਛਦਨਂ ਆਹਚ੍ਚ ਪਾਕਾਰੇਨ ਵਾ ਅਞ੍ਞੇਨ ਵਾ ਕੇਨਚਿ ਅਨ੍ਤਮਸੋ ਵਤ੍ਥੇਨਪਿ ਪਰਿਕ੍ਖਿਤ੍ਤਂ, ਇਦਂ ਸਬ੍ਬਪਰਿਚ੍ਛਨ੍ਨਂ ਨਾਮ ਸੇਨਾਸਨਂ. ਛਦਨਂ ਅਨਾਹਚ੍ਚ ਸਬ੍ਬਨ੍ਤਿਮੇਨ ਪਰਿਯਾਯੇਨ ਦਿਯਡ੍ਢਹਤ੍ਥੁਬ੍ਬੇਧੇਨ ਪਾਕਾਰਾਦਿਨਾ ਪਰਿਕ੍ਖਿਤ੍ਤਮ੍ਪਿ ਸਬ੍ਬਪਰਿਚ੍ਛਨ੍ਨਮੇਵ. ਯਸ੍ਸ ਪਨ ਉਪਰਿ ਬਹੁਤਰਂ ਠਾਨਂ ਛਨ੍ਨਂ, ਅਪ੍ਪਂ ਅਚ੍ਛਨ੍ਨਂ, ਸਮਨ੍ਤਤੋ ਵਾ ਬਹੁਤਰਂ ਪਰਿਕ੍ਖਿਤ੍ਤਂ, ਅਪ੍ਪਂ ਅਪਰਿਕ੍ਖਿਤ੍ਤਂ, ਇਦਂ ਯੇਭੁਯ੍ਯੇਨਛਨ੍ਨਂ ਯੇਭੁਯ੍ਯੇਨਪਰਿਚ੍ਛਨ੍ਨਂ ਨਾਮ.
ਇਮਿਨਾ ਲਕ੍ਖਣੇਨ ਸਮਨ੍ਨਾਗਤੋ ਸਚੇਪਿ ਸਤ੍ਤਭੂਮਿਕੋ ਪਾਸਾਦੋ ਏਕੂਪਚਾਰੋ ਹੋਤਿ, ਸਤਗਬ੍ਭਂ ਵਾ ਚਤੁਸਾਲਂ, ਏਕਂ ਸੇਨਾਸਨਮਿਚ੍ਚੇਵ ਸਙ੍ਖਂ ਗਚ੍ਛਤਿ. ਏਵਰੂਪੇ ਸੇਨਾਸਨੇ ਅਨੁਪਸਮ੍ਪਨ੍ਨੇਨ ਸਦ੍ਧਿਂ ਚਤੁਤ੍ਥਦਿਵਸੇ ਅਤ੍ਥਙ੍ਗਤੇ ਸੂਰਿਯੇ ਨਿਪਜ੍ਜਨ੍ਤਸ੍ਸ ਪਾਚਿਤ੍ਤਿਯਂ ਵੁਤ੍ਤਂ. ਸਚੇ ਪਨ ਸਮ੍ਬਹੁਲਾ ਸਾਮਣੇਰਾ, ਏਕੋ ਭਿਕ੍ਖੁ, ਸਾਮਣੇਰਗਣਨਾਯ ਪਾਚਿਤ੍ਤਿਯਾ. ਤੇ ਚੇ ਉਟ੍ਠਾਯੁਟ੍ਠਾਯ ਨਿਪਜ੍ਜਨ੍ਤਿ, ਤੇਸਂ ਪਯੋਗੇ ਪਯੋਗੇ ਭਿਕ੍ਖੁਸ੍ਸ ਆਪਤ੍ਤਿ, ਭਿਕ੍ਖੁਸ੍ਸ ਉਟ੍ਠਾਯੁਟ੍ਠਾਯ ਨਿਪਜ੍ਜਨੇ ਪਨ ਭਿਕ੍ਖੁਸ੍ਸੇਵ ਪਯੋਗੇਨ ਭਿਕ੍ਖੁਸ੍ਸ ਆਪਤ੍ਤਿ. ਸਚੇ ਸਮ੍ਬਹੁਲਾ ਭਿਕ੍ਖੂ, ਏਕੋ ਸਾਮਣੇਰੋ, ਏਕੋਪਿ ਸਬ੍ਬੇਸਂ ਆਪਤ੍ਤਿਂ ਕਰੋਤਿ. ਤਸ੍ਸ ਉਟ੍ਠਾਯੁਟ੍ਠਾਯ ਨਿਪਜ੍ਜਨੇਨਪਿ ਭਿਕ੍ਖੂਨਂ ਆਪਤ੍ਤਿਯੇਵ. ਉਭਯੇਸਂ ਸਮ੍ਬਹੁਲਭਾਵੇਪਿ ਏਸੇਵ ਨਯੋ.
੮੦. ਅਪਿਚੇਤ੍ਥ ਏਕਾਵਾਸਾਦਿਕਮ੍ਪਿ ਚਤੁਕ੍ਕਂ ਵੇਦਿਤਬ੍ਬਂ. ਯੋ ਹਿ ਏਕਸ੍ਮਿਂ ਆਵਾਸੇ ਏਕੇਨੇਵ ਅਨੁਪਸਮ੍ਪਨ੍ਨੇਨ ਸਦ੍ਧਿਂ ਤਿਰਤ੍ਤਂ ਸਹਸੇਯ੍ਯਂ ਕਪ੍ਪੇਤਿ, ਤਸ੍ਸ ਚਤੁਤ੍ਥਦਿਵਸਤੋ ਪਟ੍ਠਾਯ ਦੇਵਸਿਕਾ ਆਪਤ੍ਤਿ. ਯੋਪਿ ਏਕਸ੍ਮਿਂਯੇਵ ਆਵਾਸੇ ਨਾਨਾਅਨੁਪਸਮ੍ਪਨ੍ਨੇਹਿ ਸਦ੍ਧਿਂ ਤਿਰਤ੍ਤਂ ਸਹਸੇਯ੍ਯਂ ਕਪ੍ਪੇਤਿ, ਤਸ੍ਸਪਿ. ਯੋਪਿ ਨਾਨਾਆਵਾਸੇਸੁ ਏਕੇਨੇਵ ਅਨੁਪਸਮ੍ਪਨ੍ਨੇਨ ਸਦ੍ਧਿਂ ਤਿਰਤ੍ਤਂ ਸਹਸੇਯ੍ਯਂ ਕਪ੍ਪੇਤਿ, ਤਸ੍ਸਪਿ. ਯੋਪਿ ਨਾਨਾਆਵਾਸੇਸੁ ਨਾਨਾਅਨੁਪਸਮ੍ਪਨ੍ਨੇਹਿ ਸਦ੍ਧਿਂ ਯੋਜਨਸਤਮ੍ਪਿ ਗਨ੍ਤ੍ਵਾ ਸਹਸੇਯ੍ਯਂ ਕਪ੍ਪੇਤਿ, ਤਸ੍ਸਪਿ ਚਤੁਤ੍ਥਦਿਵਸਤੋ ਪਟ੍ਠਾਯ ਦੇਵਸਿਕਾ ਆਪਤ੍ਤਿ.
ਅਯਞ੍ਚ ਸਹਸੇਯ੍ਯਾਪਤ੍ਤਿ ਨਾਮ ‘‘ਭਿਕ੍ਖੁਂ ਠਪੇਤ੍ਵਾ ਅਵਸੇਸੋ ਅਨੁਪਸਮ੍ਪਨ੍ਨੋ ਨਾਮਾ’’ਤਿ ਵਚਨਤੋ ਅਨ੍ਤਮਸੋ ਪਾਰਾਜਿਕਵਤ੍ਥੁਭੂਤੇਨ ਤਿਰਚ੍ਛਾਨਗਤੇਨਪਿ ਸਦ੍ਧਿਂ ਹੋਤਿ, ਤਸ੍ਮਾ ਸਚੇਪਿ ਗੋਧਾਬਿਲ਼ਾਲਮਙ੍ਗੁਸਾਦੀਸੁ ਕੋਚਿ ਪਵਿਸਿਤ੍ਵਾ ਭਿਕ੍ਖੁਨੋ ਵਸਨਸੇਨਾਸਨੇ ਏਕੂਪਚਾਰਟ੍ਠਾਨੇ ਸਯਤਿ, ਸਹਸੇਯ੍ਯਾਵ ਹੋਤਿ. ਯਦਿ ਪਨ ਥਮ੍ਭਾਨਂ ਉਪਰਿ ਕਤਪਾਸਾਦਸ੍ਸ ਉਪਰਿਮਤਲੇਨ ਸਦ੍ਧਿਂ ਅਸਮ੍ਬਦ੍ਧਭਿਤ੍ਤਿਕਸ੍ਸ ਭਿਤ੍ਤਿਯਾ ਉਪਰਿਠਿਤਸੁਸਿਰਤੁਲਾਸੀਸਸ੍ਸ ਸੁਸਿਰੇਨ ਪਵਿਸਿਤ੍ਵਾ ਤੁਲਾਯ ਅਬ੍ਭਨ੍ਤਰੇ ਸਯਿਤ੍ਵਾ ਤੇਨੇਵ ਸੁਸਿਰੇਨ ਨਿਕ੍ਖਮਿਤ੍ਵਾ ਗਚ੍ਛਤਿ, ਹੇਟ੍ਠਾਪਾਸਾਦੇ ਸਯਿਤਭਿਕ੍ਖੁਸ੍ਸ ਅਨਾਪਤ੍ਤਿ. ਸਚੇ ਛਦਨੇ ਛਿਦ੍ਦਂ ਹੋਤਿ, ਤੇਨ ਪਵਿਸਿਤ੍ਵਾ ਅਨ੍ਤੋਛਦਨੇ ਵਸਿਤ੍ਵਾ ਤੇਨੇਵ ਪਕ੍ਕਮਤਿ, ਨਾਨੂਪਚਾਰੇ ਉਪਰਿਮਤਲੇ ਛਦਨਬ੍ਭਨ੍ਤਰੇ ਸਯਿਤਸ੍ਸ ਆਪਤ੍ਤਿ, ਹੇਟ੍ਠਿਮਤਲੇ ਸਯਿਤਸ੍ਸ ਅਨਾਪਤ੍ਤਿ. ਸਚੇ ਅਨ੍ਤੋਪਾਸਾਦੇਨੇਵ ਆਰੋਹਿਤ੍ਵਾ ਸਬ੍ਬਤਲਾਨਿ ਪਰਿਭੁਞ੍ਜਨ੍ਤਿ, ਏਕੂਪਚਾਰਾਨਿ ਹੋਨ੍ਤਿ, ਤੇਸੁ ਯਤ੍ਥ ਕਤ੍ਥਚਿ ਸਯਿਤਸ੍ਸ ਆਪਤ੍ਤਿ, ਸਭਾਸਙ੍ਖੇਪੇਨ ਕਤੇ ਅਡ੍ਢਕੁਟ੍ਟਕੇ ਸੇਨਾਸਨੇ ਸਯਿਤਸ੍ਸ ਤੁਲਾਵਾਲ਼ਸਘਾਟਾਦੀਸੁ ਕਪੋਤਾਦਯੋ ਸਯਨ੍ਤਿ, ਆਪਤ੍ਤਿਯੇਵ. ਪਰਿਕ੍ਖੇਪਸ੍ਸ ਬਹਿਗਤੇ ਨਿਬ੍ਬਕੋਸਬ੍ਭਨ੍ਤਰੇ ਸਯਨ੍ਤਿ, ਅਨਾਪਤ੍ਤਿ. ਪਰਿਮਣ੍ਡਲਂ ਵਾ ਚਤੁਰਸ੍ਸਂ ਵਾ ਏਕਚ੍ਛਦਨਾਯ ਗਬ੍ਭਮਾਲਾਯ ਸਤਗਬ੍ਭਂ ਚੇਪਿ ਸੇਨਾਸਨਂ ਹੋਤਿ, ਤਤ੍ਰ ਚੇ ਏਕੇਨ ਸਾਧਾਰਣਦ੍ਵਾਰੇਨ ਪਵਿਸਿਤ੍ਵਾ ਵਿਸੁਂ ਪਾਕਾਰੇਨ ਅਪਰਿਚ੍ਛਿਨ੍ਨਗਬ੍ਭੂਪਚਾਰੇ ਸਬ੍ਬਗਬ੍ਭੇਪਿ ਪਵਿਸਨ੍ਤਿ, ਏਕਗਬ੍ਭੇਪਿ ਅਨੁਪਸਮ੍ਪਨ੍ਨੇ ਨਿਪਨ੍ਨੇ ਸਬ੍ਬਗਬ੍ਭੇਸੁ ਨਿਪਨ੍ਨਾਨਂ ਆਪਤ੍ਤਿ. ਸਚੇ ਸਪਮੁਖਾ ਗਬ੍ਭਾ ਹੋਨ੍ਤਿ, ਪਮੁਖਞ੍ਚ ਉਪਰਿ ਅਚ੍ਛਨ੍ਨਂ, ਪਮੁਖੇ ਸਯਿਤੋ ਗਬ੍ਭੇ ਸਯਿਤਾਨਂ ਆਪਤ੍ਤਿਂ ਨ ਕਰੋਤਿ. ਸਚੇ ਪਨ ਗਬ੍ਭਚ੍ਛਦਨੇਨੇਵ ਸਦ੍ਧਿਂ ਸਮ੍ਬਨ੍ਧਛਦਨਂ, ਤਤ੍ਰ ਸਯਿਤੋ ਸਬ੍ਬੇਸਂ ਆਪਤ੍ਤਿਂ ਕਰੋਤਿ. ਕਸ੍ਮਾ? ਸਬ੍ਬਚ੍ਛਨ੍ਨਤ੍ਤਾ ਚ ਸਬ੍ਬਪਰਿਚ੍ਛਨ੍ਨਤ੍ਤਾ ਚ. ਗਬ੍ਭਪਰਿਕ੍ਖੇਪੋਯੇਵ ਹਿਸ੍ਸ ਪਰਿਕ੍ਖੇਪੋ.
੮੧. ਯੇਪਿ ਏਕਸਾਲਦ੍ਵਿਸਾਲਤਿਸਾਲਚਤੁਸਾਲਸਨ੍ਨਿਵੇਸਾ ਮਹਾਪਾਸਾਦਾ ਏਕਸ੍ਮਿਂ ਓਕਾਸੇ ਪਾਦੇ ਧੋਵਿਤ੍ਵਾ ਪਵਿਟ੍ਠੇਨ ਸਕ੍ਕਾ ਹੋਨ੍ਤਿ ਸਬ੍ਬਤ੍ਥ ਅਨੁਪਰਿਗਨ੍ਤੁਂ, ਤੇਸੁਪਿ ਸਹਸੇਯ੍ਯਾਪਤ੍ਤਿਯਾ ਨ ਮੁਚ੍ਚਤਿ. ਸਚੇ ਤਸ੍ਮਿਂ ਤਸ੍ਮਿਂ ਠਾਨੇ ਉਪਚਾਰਂ ਪਰਿਚ੍ਛਿਨ੍ਦਿਤ੍ਵਾ ਕਤਾ ਹੋਨ੍ਤਿ, ਏਕੂਪਚਾਰਟ੍ਠਾਨੇਯੇਵ ਆਪਤ੍ਤਿ. ਦ੍ਵੀਹਿ ਦ੍ਵਾਰੇਹਿ ਯੁਤ੍ਤਸ੍ਸ ਸੁਧਾਛਦਨਮਣ੍ਡਪਸ੍ਸ ਮਜ੍ਝੇ ਪਾਕਾਰਂ ਕਰੋਨ੍ਤਿ, ਏਕੇਨ ਦ੍ਵਾਰੇਨ ਪਵਿਸਿਤ੍ਵਾ ਏਕਸ੍ਮਿਂ ਪਰਿਚ੍ਛੇਦੇ ਅਨੁਪਸਮ੍ਪਨ੍ਨੋ ਸਯਤਿ, ਏਕਸ੍ਮਿਂ ਭਿਕ੍ਖੁ, ਅਨਾਪਤ੍ਤਿ. ਪਾਕਾਰੇ ਗੋਧਾਦੀਨਂ ਪਵਿਸਨਮਤ੍ਤਂ ਛਿਦ੍ਦਂ ਹੋਤਿ, ਏਕਸ੍ਮਿਞ੍ਚ ਪਰਿਚ੍ਛੇਦੇ ਗੋਧਾ ਸਯਨ੍ਤਿ, ਅਨਾਪਤ੍ਤਿਯੇਵ. ਨ ਹਿ ਛਿਦ੍ਦੇਨ ਗੇਹਂ ਏਕੂਪਚਾਰਂ ਨਾਮ ਹੋਤਿ. ਸਚੇ ਪਾਕਾਰਮਜ੍ਝੇ ਛਿਨ੍ਦਿਤ੍ਵਾ ਦ੍ਵਾਰਂ ਯੋਜੇਨ੍ਤਿ, ਏਕੂਪਚਾਰਤਾਯ ਆਪਤ੍ਤਿ. ਤਂ ਦ੍ਵਾਰਂ ਕਵਾਟੇਨ ਪਿਦਹਿਤ੍ਵਾ ਸਯਨ੍ਤਿ, ਆਪਤ੍ਤਿਯੇਵ. ਨ ਹਿ ਦ੍ਵਾਰਪਿਦਹਨੇਨ ਗੇਹਂ ਨਾਨੂਪਚਾਰਂ ਨਾਮ ਹੋਤਿ, ਦ੍ਵਾਰਂ ਵਾ ਅਦ੍ਵਾਰਂ. ਕਵਾਟਞ੍ਹਿ ਸਂਵਰਣਵਿਵਰਣੇਹਿ ਯਥਾਸੁਖਂ ਵਲ਼ਞ੍ਜਨਤ੍ਥਾਯ ਕਤਂ, ਨ ਵਲ਼ਞ੍ਜੁਪਚ੍ਛੇਦਨਤ੍ਥਾਯ. ਸਚੇ ਤਂ ਦ੍ਵਾਰਂ ਪੁਨ ਇਟ੍ਠਕਾਹਿ ਪਿਦਹਨ੍ਤਿ, ਅਦ੍ਵਾਰਂ ਹੋਤਿ, ਪੁਰਿਮੇ ਨਾਨੂਪਚਾਰਭਾਵੇਯੇਵ ਤਿਟ੍ਠਤਿ. ਦੀਘਪਮੁਖਂ ਚੇਤਿਯਘਰਂ ਹੋਤਿ, ਏਕਂ ਕਵਾਟਂ ਅਨ੍ਤੋ, ਏਕਂ ਬਹਿ, ਦ੍ਵਿਨ੍ਨਂ ਕਵਾਟਾਨਂ ਅਨ੍ਤਰੇ ਅਨੁਪਸਮ੍ਪਨ੍ਨੋ ਅਨ੍ਤੋਚੇਤਿਯਘਰੇ ਸਯਨ੍ਤਸ੍ਸ ਆਪਤ੍ਤਿਂ ਕਰੋਤਿ ਏਕੂਪਚਾਰਤ੍ਤਾ.
ਅਯਞ੍ਹੇਤ੍ਥ ਸਙ੍ਖੇਪੋ – ਸੇਨਾਸਨਂ ਖੁਦ੍ਦਕਂ ਵਾ ਹੋਤੁ ਮਹਨ੍ਤਂ ਵਾ, ਅਞ੍ਞੇਨ ਸਦ੍ਧਿਂ ਸਮ੍ਬਨ੍ਧਂ ਵਾ ਅਸਮ੍ਬਨ੍ਧਂ ਵਾ, ਦੀਘਂ ਵਾ ਵਟ੍ਟਂ ਵਾ ਚਤੁਰਸ੍ਸਂ ਵਾ, ਏਕਭੂਮਿਕਂ ਵਾ ਅਨੇਕਭੂਮਿਕਂ ਵਾ, ਯਂ ਯਂ ਏਕੂਪਚਾਰਂ, ਸਬ੍ਬਤ੍ਥ ਸਹਸੇਯ੍ਯਾਪਤ੍ਤਿ ਹੋਤੀਤਿ. ਏਤ੍ਥ ਚ ਯੇਨ ਕੇਨਚਿ ਪਟਿਚ੍ਛਦਨੇਨ ਸਬ੍ਬਚ੍ਛਨ੍ਨੇ ਸਬ੍ਬਪਰਿਚ੍ਛਨ੍ਨੇ ਪਾਚਿਤ੍ਤਿਯਂ, ਯੇਭੁਯ੍ਯੇਨਛਨ੍ਨੇ ਯੇਭੁਯ੍ਯੇਨਪਰਿਚ੍ਛਨ੍ਨੇ ਪਾਚਿਤ੍ਤਿਯਂ, ਸਬ੍ਬਚ੍ਛਨ੍ਨੇ ਯੇਭੁਯ੍ਯੇਨਪਰਿਚ੍ਛਨ੍ਨੇ ਪਾਚਿਤ੍ਤਿਯਂ, ਸਬ੍ਬਚ੍ਛਨ੍ਨੇ ਉਪਡ੍ਢਪਰਿਚ੍ਛਨ੍ਨੇ ਪਾਚਿਤ੍ਤਿਯਂ, ਯੇਭੁਯ੍ਯੇਨਛਨ੍ਨੇ ਉਪਡ੍ਢਪਰਿਚ੍ਛਨ੍ਨੇ ਪਾਚਿਤ੍ਤਿਯਂ, ਸਬ੍ਬਪਰਿਚ੍ਛਨ੍ਨੇ ਯੇਭੁਯ੍ਯੇਨਛਨ੍ਨੇ ਪਾਚਿਤ੍ਤਿਯਂ, ਸਬ੍ਬਪਰਿਚ੍ਛਨ੍ਨੇ ਉਪਡ੍ਢਚ੍ਛਨ੍ਨੇ ਪਾਚਿਤ੍ਤਿਯਂ, ਯੇਭੁਯ੍ਯੇਨਪਰਿਚ੍ਛਨ੍ਨੇ ਉਪਡ੍ਢਚ੍ਛਨ੍ਨੇ ਪਾਚਿਤ੍ਤਿਯਨ੍ਤਿ ਅਟ੍ਠ ਪਾਚਿਤ੍ਤਿਯਾਨਿ. ਉਪਡ੍ਢਚ੍ਛਨ੍ਨੇ ਉਪਡ੍ਢਪਰਿਚ੍ਛਨ੍ਨੇ ਦੁਕ੍ਕਟਂ, ਸਬ੍ਬਚ੍ਛਨ੍ਨੇ ਚੂਲ਼ਕਪਰਿਚ੍ਛਨ੍ਨੇ ਦੁਕ੍ਕਟਂ, ਯੇਭੁਯ੍ਯੇਨਛਨ੍ਨੇ ਚੂਲ਼ਕਪਰਿਚ੍ਛਨ੍ਨੇ ਦੁਕ੍ਕਟਂ, ਸਬ੍ਬਪਰਿਚ੍ਛਨ੍ਨੇ ਚੂਲ਼ਕਚ੍ਛਨ੍ਨੇ ਦੁਕ੍ਕਟਂ, ਯੇਭੁਯ੍ਯੇਨਪਰਿਚ੍ਛਨ੍ਨੇ ਚੂਲ਼ਕਚ੍ਛਨ੍ਨੇ ਦੁਕ੍ਕਟਨ੍ਤਿ ਪਞ੍ਚ ਦੁਕ੍ਕਟਾਨਿ ਵੇਦਿਤਬ੍ਬਾਨਿ. ਸਬ੍ਬਚ੍ਛਨ੍ਨੇ ਸਬ੍ਬਅਪਰਿਚ੍ਛਨ੍ਨੇ, ਸਬ੍ਬਪਰਿਚ੍ਛਨ੍ਨੇ ਸਬ੍ਬਅਚ੍ਛਨ੍ਨੇ, ਯੇਭੁਯ੍ਯੇਨਅਚ੍ਛਨ੍ਨੇ ਯੇਭੁਯ੍ਯੇਨਅਪਰਿਚ੍ਛਨ੍ਨੇ, ਉਪਡ੍ਢਚ੍ਛਨ੍ਨੇ ਚੂਲ਼ਕਪਰਿਚ੍ਛਨ੍ਨੇ, ਉਪਡ੍ਢਪਰਿਚ੍ਛਨ੍ਨੇ ਚੂਲ਼ਕਚ੍ਛਨ੍ਨੇ ਚੂਲ਼ਕਪਰਿਚ੍ਛਨ੍ਨੇ ਚ ਅਨਾਪਤ੍ਤਿ. ਮਾਤੁਗਾਮੇਨ ਸਹ ਨਿਪਜ੍ਜਨ੍ਤਸ੍ਸਪਿ ਅਯਮੇਵ ਵਿਨਿਚ੍ਛਯੋ. ਅਯਞ੍ਹੇਤ੍ਥ ਵਿਸੇਸੋ – ਅਨੁਪਸਮ੍ਪਨ੍ਨੇਨ ਸਦ੍ਧਿਂ ਨਿਪਜ੍ਜਨ੍ਤਸ੍ਸ ਚਤੁਤ੍ਥਦਿਵਸੇ ਆਪਤ੍ਤਿ, ਮਾਤੁਗਾਮੇਨ ਸਦ੍ਧਿਂ ਪਠਮਦਿਵਸੇਤਿ. ਯਕ੍ਖਿਪੇਤੀਹਿ ਪਨ ਦਿਸ੍ਸਮਾਨਕਰੂਪਾਹਿ ਤਿਰਚ੍ਛਾਨਗਤਿਤ੍ਥਿਯਾ ਚ ਮੇਥੁਨਧਮ੍ਮਵਤ੍ਥੁਭੂਤਾਯ ਏਵ ਦੁਕ੍ਕਟਂ, ਸੇਸਾਹਿ ਅਨਾਪਤ੍ਤਿ.
ਇਤਿ ਪਾਲ਼ਿਮੁਤ੍ਤਕਵਿਨਯਵਿਨਿਚ੍ਛਯਸਙ੍ਗਹੇ
ਸਹਸੇਯ੍ਯਵਿਨਿਚ੍ਛਯਕਥਾ ਸਮਤ੍ਤਾ.