੧. ਦਿਵਾਸੇਯ੍ਯਵਿਨਿਚ੍ਛਯਕਥਾ

੧. ਤਤ੍ਥ ਦਿਵਾਸੇਯ੍ਯਾਤਿ ਦਿਵਾਨਿਪਜ੍ਜਨਂ. ਤਤ੍ਰਾਯਂ ਵਿਨਿਚ੍ਛਯੋ – ‘‘ਅਨੁਜਾਨਾਮਿ, ਭਿਕ੍ਖਵੇ, ਦਿਵਾ ਪਟਿਸਲ੍ਲੀਯਨ੍ਤੇਨ ਦ੍ਵਾਰਂ ਸਂਵਰਿਤ੍ਵਾ ਪਟਿਸਲ੍ਲੀਯਿਤੁ’’ਨ੍ਤਿ (ਪਾਰਾ. ੭੭) ਵਚਨਤੋ ਦਿਵਾ ਨਿਪਜ੍ਜਨ੍ਤੇਨ ਦ੍ਵਾਰਂ ਸਂਵਰਿਤ੍ਵਾ ਨਿਪਜ੍ਜਿਤਬ੍ਬਂ. ਏਤ੍ਥ ਚ ਕਿਞ੍ਚਾਪਿ ਪਾਲ਼ਿਯਂ ‘‘ਅਯਂ ਨਾਮ ਆਪਤ੍ਤੀ’’ਤਿ ਨ ਵੁਤ੍ਤਾ, ਵਿਵਰਿਤ੍ਵਾ ਨਿਪਨ੍ਨਦੋਸੇਨ ਪਨ ਉਪ੍ਪਨ੍ਨੇ ਵਤ੍ਥੁਸ੍ਮਿਂ ਦ੍ਵਾਰਂ ਸਂਵਰਿਤ੍ਵਾ ਨਿਪਜ੍ਜਿਤੁਂ ਅਨੁਞ੍ਞਾਤਤ੍ਤਾ ਅਸਂਵਰਿਤ੍ਵਾ ਨਿਪਜ੍ਜਨ੍ਤਸ੍ਸ ਅਟ੍ਠਕਥਾਯਂ ਦੁਕ੍ਕਟਂ (ਪਾਰਾ. ਅਟ੍ਠ. ੧.੭੭) ਵੁਤ੍ਤਂ. ਭਗਵਤੋ ਹਿ ਅਧਿਪ੍ਪਾਯਂ ਞਤ੍ਵਾ ਉਪਾਲਿਤ੍ਥੇਰਾਦੀਹਿ ਅਟ੍ਠਕਥਾ ਠਪਿਤਾ. ‘‘ਅਤ੍ਥਾਪਤ੍ਤਿ ਦਿਵਾ ਆਪਜ੍ਜਤਿ, ਨੋ ਰਤ੍ਤਿ’’ਨ੍ਤਿ (ਪਰਿ. ੩੨੩) ਇਮਿਨਾਪਿ ਚੇਤਂ ਸਿਦ੍ਧਂ.

੨. ਕੀਦਿਸਂ ਪਨ ਦ੍ਵਾਰਂ ਸਂਵਰਿਤਬ੍ਬਂ, ਕੀਦਿਸਂ ਨ ਸਂਵਰਿਤਬ੍ਬਂ? ਰੁਕ੍ਖਪਦਰਵੇਲ਼ੁਪਦਰਕਿਲਞ੍ਜਪਣ੍ਣਾਦੀਨਂ ਯੇਨ ਕੇਨਚਿ ਕਵਾਟਂ ਕਤ੍ਵਾ ਹੇਟ੍ਠਾ ਉਦੁਕ੍ਖਲੇ ਉਪਰਿ ਉਤ੍ਤਰਪਾਸਕੇ ਚ ਪਵੇਸੇਤ੍ਵਾ ਕਤਂ ਪਰਿਵਤ੍ਤਕਦ੍ਵਾਰਮੇਵ ਸਂਵਰਿਤਬ੍ਬਂ. ਅਞ੍ਞਂ ਗੋਰੂਪਾਨਂ ਵਜੇਸੁ ਵਿਯ ਰੁਕ੍ਖਸੂਚਿਕਣ੍ਟਕਦ੍ਵਾਰਂ, ਗਾਮਥਕਨਕਂ ਚਕ੍ਕਲਕਯੁਤ੍ਤਦ੍ਵਾਰਂ, ਫਲਕੇਸੁ ਵਾ ਕਿਟਿਕਾਸੁ ਵਾ ਦ੍ਵੇ ਤੀਣਿ ਚਕ੍ਕਲਕਾਨਿ ਯੋਜੇਤ੍ਵਾ ਕਤਂ ਸਂਸਰਣਕਿਟਿਕਦ੍ਵਾਰਂ, ਆਪਣੇਸੁ ਵਿਯ ਕਤਂ ਉਗ੍ਘਾਟਨਕਿਟਿਕਦ੍ਵਾਰਂ, ਦ੍ਵੀਸੁ ਤੀਸੁ ਠਾਨੇਸੁ ਵੇਲ਼ੁਸਲਾਕਾ ਗੋਪ੍ਫੇਤ੍ਵਾ ਪਣ੍ਣਕੁਟੀਸੁ ਕਤਂ ਸਲਾਕਹਤ੍ਥਕਦ੍ਵਾਰਂ, ਦੁਸ੍ਸਸਾਣਿਦ੍ਵਾਰਨ੍ਤਿ ਏਵਰੂਪਂ ਦ੍ਵਾਰਂ ਨ ਸਂਵਰਿਤਬ੍ਬਂ. ਪਤ੍ਤਹਤ੍ਥਸ੍ਸ ਕਵਾਟਪ੍ਪਣਾਮਨੇ ਪਨ ਏਕਂ ਦੁਸ੍ਸਸਾਣਿਦ੍ਵਾਰਮੇਵ ਅਨਾਪਤ੍ਤਿਕਰਂ, ਅਵਸੇਸਾਨਿ ਪਣਾਮੇਨ੍ਤਸ੍ਸ ਆਪਤ੍ਤਿ. ਦਿਵਾ ਪਟਿਸਲ੍ਲੀਯਨ੍ਤਸ੍ਸ ਪਨ ਪਰਿਵਤ੍ਤਕਦ੍ਵਾਰਮੇਵ ਆਪਤ੍ਤਿਕਰਂ, ਸੇਸਾਨਿ ਸਂਵਰਿਤ੍ਵਾ ਵਾ ਅਸਂਵਰਿਤ੍ਵਾ ਵਾ ਨਿਪਜ੍ਜਨ੍ਤਸ੍ਸ ਆਪਤ੍ਤਿ ਨਤ੍ਥਿ, ਸਂਵਰਿਤ੍ਵਾ ਪਨ ਨਿਪਜ੍ਜਿਤਬ੍ਬਂ, ਏਤਂ ਵਤ੍ਤਂ.

੩. ਪਰਿਵਤ੍ਤਕਦ੍ਵਾਰਂ ਕਿਤ੍ਤਕੇਨ ਸਂਵੁਤਂ ਹੋਤਿ? ਸੂਚਿਘਟਿਕਾਸੁ ਦਿਨ੍ਨਾਸੁ ਸਂਵੁਤਮੇਵ ਹੋਤਿ. ਅਪਿਚ ਖੋ ਸੂਚਿਮਤ੍ਤੇਪਿ ਦਿਨ੍ਨੇ ਵਟ੍ਟਤਿ, ਘਟਿਕਾਮਤ੍ਤੇਪਿ ਦਿਨ੍ਨੇ ਵਟ੍ਟਤਿ, ਦ੍ਵਾਰਬਾਹਂ ਫੁਸਿਤ੍ਵਾ ਠਪਿਤਮਤ੍ਤੇਪਿ ਵਟ੍ਟਤਿ, ਈਸਕਂ ਅਫੁਸਿਤੇਪਿ ਵਟ੍ਟਤਿ, ਸਬ੍ਬਨ੍ਤਿਮੇਨ ਵਿਧਿਨਾ ਯਾਵਤਾ ਸੀਸਂ ਨਪ੍ਪਵਿਸਤਿ, ਤਾਵਤਾ ਅਫੁਸਿਤੇਪਿ ਵਟ੍ਟਤਿ. ਸਚੇ ਬਹੂਨਂ ਵਲ਼ਞ੍ਜਨਟ੍ਠਾਨਂ ਹੋਤਿ, ਭਿਕ੍ਖੁਂ ਵਾ ਸਾਮਣੇਰਂ ਵਾ ‘‘ਦ੍ਵਾਰਂ, ਆਵੁਸੋ, ਜਗ੍ਗਾਹੀ’’ਤਿ ਵਤ੍ਵਾਪਿ ਨਿਪਜ੍ਜਿਤੁਂ ਵਟ੍ਟਤਿ. ਅਥ ਭਿਕ੍ਖੂ ਚੀਵਰਕਮ੍ਮਂ ਵਾ ਅਞ੍ਞਂ ਵਾ ਕਿਞ੍ਚਿ ਕਰੋਨ੍ਤਾ ਨਿਸਿਨ੍ਨਾ ਹੋਨ੍ਤਿ, ‘‘ਏਤੇ ਦ੍ਵਾਰਂ ਜਗ੍ਗਿਸ੍ਸਨ੍ਤੀ’’ਤਿ ਆਭੋਗਂ ਕਤ੍ਵਾਪਿ ਨਿਪਜ੍ਜਿਤੁਂ ਵਟ੍ਟਤਿ. ਕੁਰੁਨ੍ਦਟ੍ਠਕਥਾਯਂ ਪਨ ‘‘ਉਪਾਸਕਮ੍ਪਿ ਆਪੁਚ੍ਛਿਤ੍ਵਾ ਵਾ ‘ਏਸ ਜਗ੍ਗਿਸ੍ਸਤੀ’ਤਿ ਆਭੋਗਂ ਕਤ੍ਵਾ ਵਾ ਨਿਪਜ੍ਜਿਤੁਂ ਵਟ੍ਟਤਿ, ਕੇਵਲਂ ਭਿਕ੍ਖੁਨਿਂ ਵਾ ਮਾਤੁਗਾਮਂ ਵਾ ਆਪੁਚ੍ਛਿਤੁਂ ਨ ਵਟ੍ਟਤੀ’’ਤਿ ਵੁਤ੍ਤਂ, ਤਂ ਯੁਤ੍ਤਂ. ਏਵਂ ਸਬ੍ਬਤ੍ਥਪਿ ਯੋ ਯੋ ਥੇਰਵਾਦੋ ਵਾ ਅਟ੍ਠਕਥਾਵਾਦੋ ਵਾ ਪਚ੍ਛਾ ਵੁਚ੍ਚਤਿ, ਸੋ ਸੋਵ ਪਮਾਣਨ੍ਤਿ ਗਹੇਤਬ੍ਬਂ.

੪. ਅਥ ਦ੍ਵਾਰਸ੍ਸ ਉਦੁਕ੍ਖਲਂ ਵਾ ਉਤ੍ਤਰਪਾਸਕੋ ਵਾ ਭਿਨ੍ਨੋ ਹੋਤਿ ਅਟ੍ਠਪਿਤੋ ਵਾ, ਸਂਵਰਿਤੁਂ ਨ ਸਕ੍ਕੋਤਿ, ਨਵਕਮ੍ਮਤ੍ਥਂ ਵਾ ਪਨ ਇਟ੍ਠਕਪੁਞ੍ਜੋ ਵਾ ਮਤ੍ਤਿਕਾਦੀਨਂ ਵਾ ਰਾਸਿ ਅਨ੍ਤੋਦ੍ਵਾਰੇ ਕਤੋ ਹੋਤਿ, ਅਟ੍ਟਂ ਵਾ ਬਨ੍ਧਨ੍ਤਿ, ਯਥਾ ਸਂਵਰਿਤੁਂ ਨ ਸਕ੍ਕੋਤਿ. ਏਵਰੂਪੇ ਅਨ੍ਤਰਾਯੇ ਸਤਿ ਅਸਂਵਰਿਤ੍ਵਾਪਿ ਨਿਪਜ੍ਜਿਤੁਂ ਵਟ੍ਟਤਿ. ਯਦਿ ਪਨ ਕਵਾਟਂ ਨਤ੍ਥਿ, ਲਦ੍ਧਕਪ੍ਪਮੇਵ. ਉਪਰਿ ਸਯਨ੍ਤੇਨ ਨਿਸ੍ਸੇਣਿਂ ਆਰੋਪੇਤ੍ਵਾ ਨਿਪਜ੍ਜਿਤਬ੍ਬਂ. ਸਚੇ ਨਿਸ੍ਸੇਣਿਮਤ੍ਥਕੇ ਥਕਨਕਂ ਹੋਤਿ, ਥਕੇਤ੍ਵਾਪਿ ਨਿਪਜ੍ਜਿਤਬ੍ਬਂ. ਗਬ੍ਭੇ ਨਿਪਜ੍ਜਨ੍ਤੇਨ ਗਬ੍ਭਦ੍ਵਾਰਂ ਵਾ ਪਮੁਖਦ੍ਵਾਰਂ ਵਾ ਯਂ ਕਿਞ੍ਚਿ ਸਂਵਰਿਤ੍ਵਾ ਨਿਪਜ੍ਜਿਤੁਂ ਵਟ੍ਟਤਿ. ਸਚੇ ਏਕਕੁਟ੍ਟਕੇ ਗੇਹੇ ਦ੍ਵੀਸੁ ਪਸ੍ਸੇਸੁ ਦ੍ਵਾਰਾਨਿ ਕਤ੍ਵਾ ਵਲ਼ਞ੍ਜਨ੍ਤਿ, ਦ੍ਵੇਪਿ ਦ੍ਵਾਰਾਨਿ ਜਗ੍ਗਿਤਬ੍ਬਾਨਿ, ਤਿਭੂਮਕੇਪਿ ਪਾਸਾਦੇ ਦ੍ਵਾਰਂ ਜਗ੍ਗਿਤਬ੍ਬਮੇਵ. ਸਚੇ ਭਿਕ੍ਖਾਚਾਰਾ ਪਟਿਕ੍ਕਮ੍ਮ ਲੋਹਪਾਸਾਦਸਦਿਸਂ ਪਾਸਾਦਂ ਬਹੂ ਭਿਕ੍ਖੂ ਦਿਵਾਵਿਹਾਰਤ੍ਥਂ ਪਵਿਸਨ੍ਤਿ, ਸਙ੍ਘਤ੍ਥੇਰੇਨ ਦ੍ਵਾਰਪਾਲਸ੍ਸ ‘‘ਦ੍ਵਾਰਂ ਜਗ੍ਗਾਹੀ’’ਤਿ ਵਤ੍ਵਾ ਵਾ ‘‘ਦ੍ਵਾਰਜਗ੍ਗਨਂ ਨਾਮ ਏਤਸ੍ਸ ਭਾਰੋ’’ਤਿ ਆਭੋਗਂ ਕਤ੍ਵਾ ਵਾ ਪਵਿਸਿਤ੍ਵਾ ਨਿਪਜ੍ਜਿਤਬ੍ਬਂ. ਯਾਵ ਸਙ੍ਘਨਵਕੇਨ ਏਵਮੇਵ ਕਾਤਬ੍ਬਂ. ਪੁਰੇ ਪਵਿਸਨ੍ਤਾਨਂ ‘‘ਦ੍ਵਾਰਜਗ੍ਗਨਂ ਨਾਮ ਪਚ੍ਛਿਮਾਨਂ ਭਾਰੋ’’ਤਿ ਏਵਂ ਆਭੋਗਂ ਕਾਤੁਮ੍ਪਿ ਵਟ੍ਟਤਿ. ਅਨਾਪੁਚ੍ਛਾ ਵਾ ਆਭੋਗਂ ਅਕਤ੍ਵਾ ਵਾ ਅਨ੍ਤੋਗਬ੍ਭੇ ਵਾ ਅਸਂਵੁਤਦ੍ਵਾਰੇ ਬਹਿ ਵਾ ਨਿਪਜ੍ਜਨ੍ਤਾਨਂ ਆਪਤ੍ਤਿ. ਗਬ੍ਭੇ ਵਾ ਬਹਿ ਵਾ ਨਿਪਜ੍ਜਨਕਾਲੇਪਿ ‘‘ਦ੍ਵਾਰਜਗ੍ਗਨਂ ਨਾਮ ਮਹਾਦ੍ਵਾਰੇ ਦ੍ਵਾਰਪਾਲਸ੍ਸ ਭਾਰੋ’’ਤਿ ਆਭੋਗਂ ਕਤ੍ਵਾ ਨਿਪਜ੍ਜਿਤੁਂ ਵਟ੍ਟਤਿਯੇਵ. ਏਵਂ ਲੋਹਪਾਸਾਦਾਦੀਸੁ ਆਕਾਸਤਲੇ ਨਿਪਜ੍ਜਨ੍ਤੇਨਪਿ ਦ੍ਵਾਰਂ ਸਂਵਰਿਤਬ੍ਬਮੇਵ.

ਅਯਞ੍ਹੇਤ੍ਥ ਸਙ੍ਖੇਪੋ – ਇਦਂ ਦਿਵਾਪਟਿਸਲ੍ਲੀਯਨਂ ਯੇਨ ਕੇਨਚਿ ਪਰਿਕ੍ਖਿਤ੍ਤੇ ਸਦ੍ਵਾਰਬਨ੍ਧੇ ਠਾਨੇ ਕਥਿਤਂ, ਤਸ੍ਮਾ ਅਬ੍ਭੋਕਾਸੇ ਵਾ ਰੁਕ੍ਖਮੂਲੇ ਵਾ ਮਣ੍ਡਪੇ ਵਾ ਯਤ੍ਥ ਕਤ੍ਥਚਿ ਸਦ੍ਵਾਰਬਨ੍ਧੇ ਨਿਪਜ੍ਜਨ੍ਤੇਨ ਦ੍ਵਾਰਂ ਸਂਵਰਿਤ੍ਵਾਵ ਨਿਪਜ੍ਜਿਤਬ੍ਬਂ. ਸਚੇ ਮਹਾਪਰਿਵੇਣਂ ਹੋਤਿ ਮਹਾਬੋਧਿਯਙ੍ਗਣਲੋਹਪਾਸਾਦਙ੍ਗਣਸਦਿਸਂ ਬਹੂਨਂ ਓਸਰਣਟ੍ਠਾਨਂ, ਯਤ੍ਥ ਦ੍ਵਾਰਂ ਸਂਵੁਤਮ੍ਪਿ ਸਂਵੁਤਟ੍ਠਾਨੇ ਨ ਤਿਟ੍ਠਤਿ, ਦ੍ਵਾਰਂ ਅਲਭਨ੍ਤਾ ਪਾਕਾਰਂ ਆਰੁਹਿਤ੍ਵਾਪਿ ਵਿਚਰਨ੍ਤਿ, ਤਤ੍ਥ ਸਂਵਰਣਕਿਚ੍ਚਂ ਨਤ੍ਥਿ. ਰਤ੍ਤਿਂ ਦ੍ਵਾਰਂ ਵਿਵਰਿਤ੍ਵਾ ਨਿਪਨ੍ਨੋ ਅਰੁਣੇ ਉਗ੍ਗਤੇ ਵੁਟ੍ਠਾਤਿ, ਅਨਾਪਤ੍ਤਿ. ਸਚੇ ਪਨ ਪਬੁਜ੍ਝਿਤ੍ਵਾ ਪੁਨ ਸੁਪਤਿ, ਆਪਤ੍ਤਿ. ਯੋ ਪਨ ‘‘ਅਰੁਣੇ ਉਗ੍ਗਤੇ ਵੁਟ੍ਠਹਿਸ੍ਸਾਮੀ’’ਤਿ ਪਰਿਚ੍ਛਿਨ੍ਦਿਤ੍ਵਾਵ ਦ੍ਵਾਰਂ ਅਸਂਵਰਿਤ੍ਵਾ ਰਤ੍ਤਿਂ ਨਿਪਜ੍ਜਤਿ, ਯਥਾਪਰਿਚ੍ਛੇਦਮੇਵ ਵੁਟ੍ਠਾਤਿ, ਤਸ੍ਸ ਆਪਤ੍ਤਿਯੇਵ. ਮਹਾਪਚ੍ਚਰਿਯਂ ਪਨ ‘‘ਏਵਂ ਨਿਪਜ੍ਜਨ੍ਤੋ ਅਨਾਦਰਿਯਦੁਕ੍ਕਟਾਪਿ ਨ ਮੁਚ੍ਚਤੀ’’ਤਿ ਵੁਤ੍ਤਂ.

੫. ਯੋ ਪਨ ਬਹੁਦੇਵ ਰਤ੍ਤਿਂ ਜਗ੍ਗਿਤ੍ਵਾ ਅਦ੍ਧਾਨਂ ਵਾ ਗਨ੍ਤ੍ਵਾ ਦਿਵਾ ਕਿਲਨ੍ਤਰੂਪੋ ਮਞ੍ਚੇ ਨਿਸਿਨ੍ਨੋ ਪਾਦੇ ਭੂਮਿਤੋ ਅਮੋਚੇਤ੍ਵਾਵ ਨਿਦ੍ਦਾਵਸੇਨ ਨਿਪਜ੍ਜਤਿ, ਤਸ੍ਸ ਅਨਾਪਤ੍ਤਿ. ਸਚੇ ਓਕ੍ਕਨ੍ਤਨਿਦ੍ਦੋ ਅਜਾਨਨ੍ਤੋਪਿ ਪਾਦੇ ਮਞ੍ਚਕਂ ਆਰੋਪੇਤਿ, ਆਪਤ੍ਤਿਯੇਵ. ਨਿਸੀਦਿਤ੍ਵਾ ਅਪਸ੍ਸਾਯ ਸੁਪਨ੍ਤਸ੍ਸ ਅਨਾਪਤ੍ਤਿ. ਯੋਪਿ ਚ ‘‘ਨਿਦ੍ਦਂ ਵਿਨੋਦੇਸ੍ਸਾਮੀ’’ਤਿ ਚਙ੍ਕਮਨ੍ਤੋ ਪਤਿਤ੍ਵਾ ਸਹਸਾ ਵੁਟ੍ਠਾਤਿ, ਤਸ੍ਸਪਿ ਅਨਾਪਤ੍ਤਿ. ਯੋ ਪਨ ਪਤਿਤ੍ਵਾ ਤਤ੍ਥੇਵ ਸਯਤਿ, ਨ ਵੁਟ੍ਠਾਤਿ, ਤਸ੍ਸ ਆਪਤ੍ਤਿ.

ਕੋ ਮੁਚ੍ਚਤਿ, ਕੋ ਨ ਮੁਚ੍ਚਤੀਤਿ? ਮਹਾਪਚ੍ਚਰਿਯਂ ਤਾਵ ‘‘ਏਕਭਙ੍ਗੇਨ ਨਿਪਨ੍ਨਕੋ ਏਵ ਮੁਚ੍ਚਤਿ. ਪਾਦੇ ਪਨ ਭੂਮਿਤੋ ਮੋਚੇਤ੍ਵਾ ਨਿਪਨ੍ਨੋਪਿ ਯਕ੍ਖਗਹਿਤਕੋਪਿ ਵਿਸਞ੍ਞੀਭੂਤੋਪਿ ਨ ਮੁਚ੍ਚਤੀ’’ਤਿ ਵੁਤ੍ਤਂ. ਕੁਰੁਨ੍ਦਟ੍ਠਕਥਾਯਂ ਪਨ ‘‘ਬਨ੍ਧਿਤ੍ਵਾ ਨਿਪਜ੍ਜਾਪਿਤੋਵ ਮੁਚ੍ਚਤੀ’’ਤਿ ਵੁਤ੍ਤਂ. ਮਹਾਅਟ੍ਠਕਥਾਯਂ ਪਨ ‘‘ਯੋ ਚਙ੍ਕਮਨ੍ਤੋ ਮੁਚ੍ਛਿਤ੍ਵਾ ਪਤਿਤੋ ਤਤ੍ਥੇਵ ਸੁਪਤਿ, ਤਸ੍ਸਪਿ ਅਵਿਸਯਤਾਯ ਆਪਤ੍ਤਿ ਨ ਦਿਸ੍ਸਤਿ. ਆਚਰਿਯਾ ਪਨ ਏਵਂ ਨ ਕਥਯਨ੍ਤਿ, ਤਸ੍ਮਾ ਆਪਤ੍ਤਿਯੇਵਾਤਿ ਮਹਾਪਦੁਮਤ੍ਥੇਰੇਨ ਵੁਤ੍ਤਂ. ਦ੍ਵੇ ਪਨ ਜਨਾ ਆਪਤ੍ਤਿਤੋ ਮੁਚ੍ਚਨ੍ਤਿਯੇਵ, ਯੋ ਚ ਯਕ੍ਖਗਹਿਤਕੋ, ਯੋ ਚ ਬਨ੍ਧਿਤ੍ਵਾ ਨਿਪਜ੍ਜਾਪਿਤੋ’’ਤਿ.

ਇਤਿ ਪਾਲ਼ਿਮੁਤ੍ਤਕਵਿਨਯਵਿਨਿਚ੍ਛਯਸਙ੍ਗਹੇ

ਦਿਵਾਸੇਯ੍ਯਵਿਨਿਚ੍ਛਯਕਥਾ ਸਮਤ੍ਤਾ.