੯. ਚੀਵਰਵਿਪ੍ਪਵਾਸਵਿਨਿਚ੍ਛਯਕਥਾ

੫੧. ਏਵਂ ਅਧਿਟ੍ਠਾਨਵਿਕਪ੍ਪਨਵਿਨਿਚ੍ਛਯਕਥਂ ਦਸ੍ਸੇਤ੍ਵਾ ਇਦਾਨਿ ਚੀਵਰੇਨ ਵਿਨਾਵਾਸਵਿਨਿਚ੍ਛਯਕਰਣਂ ਦਸ੍ਸੇਤੁਂ ‘‘ਚੀਵਰੇਨਵਿਨਾਵਾਸੋ’’ਤ੍ਯਾਦਿਮਾਹ. ਤਤ੍ਥ ਚੀਯਤੀਤਿ ਚੀਵਰਂ, ਚਯਂ ਸਞ੍ਚਯਂ ਕਰੀਯਤੀਤਿ ਅਤ੍ਥੋ, ਅਰਿਯਦ੍ਧਜੋ ਵਤ੍ਥਵਿਸੇਸੋ. ਇਧ ਪਨ ਤਿਚੀਵਰਾਧਿਟ੍ਠਾਨੇਨ ਅਧਿਟ੍ਠਹਿਤ੍ਵਾ ਧਾਰਿਤਂ ਚੀਵਰਤ੍ਤਯਮੇਵ. ਵਿਨਾਤਿ ਵਜ੍ਜਨਤ੍ਥੇ ਨਿਪਾਤੋ. ਵਸਨਂ ਵਾਸੋ, ਵਿਨਾ ਵਾਸੋ ਵਿਨਾਵਾਸੋ, ਚੀਵਰੇਨ ਵਿਨਾਵਾਸੋ ਚੀਵਰਵਿਨਾਵਾਸੋ, ‘‘ਚੀਵਰਵਿਪ੍ਪਵਾਸੋ’’ਤਿ ਵਤ੍ਤਬ੍ਬੇ ਵਤ੍ਤਿਚ੍ਛਾਵਸੇਨ, ਗਾਥਾਪਾਦਪੂਰਣਤ੍ਥਾਯ ਵਾ ਅਲੁਤ੍ਤਸਮਾਸਂ ਕਤ੍ਵਾ ਏਵਂ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਤਥਾ ਚ ਵਕ੍ਖਤਿ ‘‘ਤਿਚੀਵਰਾਧਿਟ੍ਠਾਨੇਨ…ਪੇ… ਵਿਪ੍ਪਵਾਸੋ’’ਤਿ, ‘‘ਇਮਂ ਸਙ੍ਘਾਟਿਂ ਅਧਿਟ੍ਠਾਮਿ, ਇਮਂ ਉਤ੍ਤਰਾਸਙ੍ਗਂ ਅਧਿਟ੍ਠਾਮਿ, ਇਮਂ ਅਨ੍ਤਰਵਾਸਕਂ ਅਧਿਟ੍ਠਾਮੀ’’ਤਿ ਏਵਂ ਨਾਮੇਨ ਅਧਿਟ੍ਠਿਤਾਨਂ ਤਿਣ੍ਣਂ ਚੀਵਰਾਨਂ ਏਕੇਕੇਨ ਵਿਪ੍ਪਵਾਸੋਤਿ ਅਤ੍ਥੋ, ਏਕੇਨਪਿ ਵਿਨਾ ਵਸਿਤੁਂ ਨ ਵਟ੍ਟਤਿ, ਵਸਨ੍ਤਸ੍ਸ ਭਿਕ੍ਖੁਨੋ ਸਹ ਅਰੁਣੁਗ੍ਗਮਨਾ ਚੀਵਰਂ ਨਿਸ੍ਸਗ੍ਗਿਯਂ ਹੋਤਿ, ਪਾਚਿਤ੍ਤਿਯਞ੍ਚ ਆਪਜ੍ਜਤੀਤਿ ਸਮ੍ਬਨ੍ਧੋ. ਵਸਿਤਬ੍ਬਨ੍ਤਿ ਏਤ੍ਥ ਵਸਨਕਿਰਿਯਾ ਚਤੁਇਰਿਯਾਪਥਸਾਧਾਰਣਾ, ਤਸ੍ਮਾ ਕਾਯਲਗ੍ਗਂ ਵਾ ਹੋਤੁ ਅਲਗ੍ਗਂ ਵਾ, ਅਡ੍ਢਤੇਯ੍ਯਰਤਨਸ੍ਸ ਪਦੇਸਸ੍ਸ ਅਨ੍ਤੋ ਕਤ੍ਵਾ ਤਿਟ੍ਠਨ੍ਤੋਪਿ ਚਰਨ੍ਤੋਪਿ ਨਿਸਿਨ੍ਨੋਪਿ ਨਿਪਨ੍ਨੋਪਿ ਹਤ੍ਥਪਾਸੇ ਕਤ੍ਵਾ ਵਸਨ੍ਤੋ ਨਾਮ ਹੋਤਿ.

ਏਵਂ ਸਾਮਞ੍ਞਤੋ ਅਵਿਪ੍ਪਵਾਸਲਕ੍ਖਣਂ ਦਸ੍ਸੇਤ੍ਵਾ ਇਦਾਨਿ ਗਾਮਾਦਿਪਨ੍ਨਰਸੋਕਾਸਵਸੇਨ ਵਿਸੇਸਤੋ ਦਸ੍ਸੇਤੁਮਾਹ ‘‘ਗਾਮਿ’’ਚ੍ਚਾਦਿ. ਤਤ੍ਥ ਗਾਮਨਿਵੇਸਨਾਨਿ ਪਾਕਟਾਨੇਵ. ਉਦੋਸਿਤੋ ਨਾਮ ਯਾਨਾਦੀਨਂ ਭਣ੍ਡਾਨਂ ਸਾਲਾ. ਅਟ੍ਟੋ ਨਾਮ ਪਟਿਰਾਜਾਦਿਪਟਿਬਾਹਨਤ੍ਥਂ ਇਟ੍ਠਕਾਹਿ ਕਤੋ ਬਹਲਭਿਤ੍ਤਿਕੋ ਚਤੁਪਞ੍ਚਭੂਮਿਕੋ ਪਤਿਸ੍ਸਯਵਿਸੇਸੋ. ਮਾਲ਼ੋ ਨਾਮ ਏਕਕੂਟਸਙ੍ਗਹਿਤੋ ਚਤੁਰਸ੍ਸਪਾਸਾਦੋ. ਪਾਸਾਦੋ ਨਾਮ ਦੀਘਪਾਸਾਦੋ. ਹਮ੍ਮਿਯਂ ਨਾਮ ਮੁਣ੍ਡਚ੍ਛਦਨਪਾਸਾਦੋ, ਮੁਣ੍ਡਚ੍ਛਦਨਪਾਸਾਦੋਤਿ ਚ ਚਨ੍ਦਿਕਙ੍ਗਣਯੁਤ੍ਤੋ ਪਾਸਾਦੋਤਿ ਵੁਚ੍ਚਤਿ. ਸਤ੍ਥੋ ਨਾਮ ਜਙ੍ਘਸਤ੍ਥੋ ਵਾ ਸਕਟਸਤ੍ਥੋ ਵਾ. ਖੇਤ੍ਤਂ ਨਾਮ ਪੁਬ੍ਬਣ੍ਣਾਪਰਣ੍ਣਾਨਂ ਵਿਰੁਹਨਟ੍ਠਾਨਂ. ਧਞ੍ਞਕਰਣਂ ਨਾਮ ਖਲਮਣ੍ਡਲਂ. ਆਰਾਮੋ ਨਾਮ ਪੁਪ੍ਫਾਰਾਮੋ ਫਲਾਰਾਮੋ. ਵਿਹਾਰਾਦਯੋ ਪਾਕਟਾ ਏਵ. ਤਤ੍ਥ ਨਿਵੇਸਨਾਦੀਨਿ ਗਾਮਤੋ ਬਹਿ ਸਨ੍ਨਿਵਿਟ੍ਠਾਨਿ ਗਹਿਤਾਨੀਤਿ ਵੇਦਿਤਬ੍ਬਂ. ਅਨ੍ਤੋਗਾਮੇ ਠਿਤਾਨਞ੍ਹਿ ਗਾਮਗ੍ਗਹਣੇਨ ਗਹਿਤਤ੍ਤਾ ਗਾਮਪਰਿਹਾਰੋਯੇਵਾਤਿ. ਗਾਮਗ੍ਗਹਣੇਨ ਚ ਨਿਗਮਨਗਰਾਨਿਪਿ ਗਹਿਤਾਨੇਵ ਹੋਨ੍ਤਿ.

ਪਰਿਖਾਯ ਵਾ ਪਰਿਕ੍ਖਿਤ੍ਤੋਤਿ ਇਮਿਨਾ ਸਮਨ੍ਤਾ ਨਦੀਤਲ਼ਾਕਾਦਿਉਦਕੇਨ ਪਰਿਕ੍ਖਿਤ੍ਤੋਪਿ ਪਰਿਕ੍ਖਿਤ੍ਤੋਯੇਵਾਤਿ ਦਸ੍ਸੇਤਿ. ਤਂ ਪਮਾਣਂ ਅਤਿਕ੍ਕਮਿਤ੍ਵਾਤਿ ਘਰਸ੍ਸ ਉਪਰਿ ਆਕਾਸੇ ਅਡ੍ਢਤੇਯ੍ਯਰਤਨਪ੍ਪਮਾਣਂ ਅਤਿਕ੍ਕਮਿਤ੍ਵਾ. ਸਭਾਯੇ ਵਾ ਵਤ੍ਥਬ੍ਬਨ੍ਤਿ ਇਮਿਨਾ ਸਭਾਸਦ੍ਦਸ੍ਸ ਪਰਿਯਾਯੋ ਸਭਾਯਸਦ੍ਦੋ ਨਪੁਂਸਕਲਿਙ੍ਗੋ ਅਤ੍ਥੀਤਿ ਦਸ੍ਸੇਤਿ. ਸਭਾਸਦ੍ਦੋ ਹਿ ਇਤ੍ਥਿਲਿਙ੍ਗੋ, ਸਭਾਯਸਦ੍ਦੋ ਨਪੁਂਸਕਲਿਙ੍ਗੋਤਿ. ਦ੍ਵਾਰਮੂਲੇ ਵਾਤਿ ਨਗਰਸ੍ਸ ਦ੍ਵਾਰਮੂਲੇ ਵਾ. ਤੇਸਨ੍ਤਿ ਸਭਾਯਨਗਰਦ੍ਵਾਰਮੂਲਾਨਂ. ਤਸ੍ਸਾ ਵੀਥਿਯਾ ਸਭਾਯਦ੍ਵਾਰਾਨਂ ਗਹਣੇਨੇਵ ਤਤ੍ਥ ਸਬ੍ਬਾਨਿਪਿ ਗੇਹਾਨਿ, ਸਾ ਚ ਅਨ੍ਤਰਵੀਥਿ ਗਹਿਤਾਯੇਵ ਹੋਤਿ. ਏਤ੍ਥ ਚ ਦ੍ਵਾਰਵੀਥਿਘਰੇਸੁ ਵਸਨ੍ਤੇਨ ਗਾਮਪ੍ਪਵੇਸਨਸਹਸੇਯ੍ਯਾਦਿਦੋਸਂ ਪਰਿਹਰਿਤ੍ਵਾ ਸੁਪ੍ਪਟਿਚ੍ਛਨ੍ਨਤਾਦਿਯੁਤ੍ਤੇਨੇਵ ਭਵਿਤਬ੍ਬਂ. ਸਭਾ ਪਨ ਯਦਿ ਸਬ੍ਬੇਸਂ ਵਸਨਤ੍ਥਾਯ ਪਪਾਸਦਿਸਾ ਕਤਾ, ਅਨ੍ਤਰਾਰਾਮੇ ਵਿਯ ਯਥਾਸੁਖਂ ਵਸਿਤੁਂ ਵਟ੍ਟਤੀਤਿ ਵੇਦਿਤਬ੍ਬਂ. ਅਤਿਹਰਿਤ੍ਵਾ ਘਰੇ ਨਿਕ੍ਖਿਪਤੀਤਿ ਵੀਥਿਂ ਮੁਞ੍ਚਿਤ੍ਵਾ ਠਿਤੇ ਅਞ੍ਞਸ੍ਮਿਂ ਘਰੇ ਨਿਕ੍ਖਿਪਤਿ. ਤੇਨਾਹ ‘‘ਵੀਥਿਹਤ੍ਥਪਾਸੋ ਨ ਰਕ੍ਖਤੀ’’ਤਿ. ਪੁਰਤੋ ਵਾ ਪਚ੍ਛਤੋ ਵਾ ਹਤ੍ਥਪਾਸੇਤਿ ਘਰਸ੍ਸ ਹਤ੍ਥਪਾਸਂ ਸਨ੍ਧਾਯ ਵਦਤਿ.

ਏਵਂ ਗਾਮਵਸੇਨ ਵਿਪ੍ਪਵਾਸਾਵਿਪ੍ਪਵਾਸਂ ਦਸ੍ਸੇਤ੍ਵਾ ਇਦਾਨਿ ਨਿਵੇਸਨਵਸੇਨ ਦਸ੍ਸੇਨ੍ਤੋ ‘‘ਸਚੇ ਏਕਕੁਲਸ੍ਸ ਸਨ੍ਤਕਂ ਨਿਵੇਸਨਂ ਹੋਤੀ’’ਤਿਆਦਿਮਾਹ. ਤਤ੍ਥ ਓਵਰਕੋ ਨਾਮ ਗਬ੍ਭਸ੍ਸ ਅਬ੍ਭਨ੍ਤਰੇ ਅਞ੍ਞੋ ਗਬ੍ਭੋਤਿ ਵਦਨ੍ਤਿ, ਗਬ੍ਭਸ੍ਸ ਵਾ ਪਰਿਯਾਯਵਚਨਮੇਤਂ. ਇਦਾਨਿ ਉਦੋਸਿਤਾਦਿਵਸੇਨ ਦਸ੍ਸੇਨ੍ਤੋ ‘‘ਉਦੋਸਿਤਿ’’ਚ੍ਚਾਦਿਮਾਹ. ਤਤ੍ਥ ਵੁਤ੍ਤਨਯੇਨੇਵਾਤਿ ‘‘ਏਕਕੁਲਸ੍ਸ ਸਨ੍ਤਕੋ ਉਦੋਸਿਤੋ ਹੋਤਿ ਪਰਿਕ੍ਖਿਤ੍ਤੋ ਚਾ’’ਤਿਆਦਿਨਾ ਨਿਵੇਸਨੇ ਵੁਤ੍ਤਨਯੇਨ. ਏਵ-ਸਦ੍ਦੋ ਵਿਸੇਸਨਿਵਤ੍ਤਿ ਅਤ੍ਥੋ. ਤੇਨ ਵਿਸੇਸੋ ਨਤ੍ਥੀਤਿ ਦਸ੍ਸੇਤਿ.

ਇਦਾਨਿ ਯੇਸੁ ਵਿਸੇਸੋ ਅਤ੍ਥਿ, ਤੇ ਦਸ੍ਸੇਨ੍ਤੋ ‘‘ਸਚੇ ਏਕਕੁਲਸ੍ਸ ਨਾਵਾ’’ਤਿਆਦਿਮਾਹ. ਤਤ੍ਥ ਪਰਿਯਾਦਿਯਿਤ੍ਵਾਤਿ ਵਿਨਿਵਿਜ੍ਝਿਤ੍ਵਾ, ਅਜ੍ਝੋਤ੍ਥਰਿਤ੍ਵਾ ਵਾ. ਵੁਤ੍ਤਮੇਵਤ੍ਥਂ ਵਿਭਾਵੇਤਿ ‘‘ਅਨ੍ਤੋਪਵਿਟ੍ਠੇਨਾ’’ਤਿਆਦਿਨਾ. ਤਤ੍ਥ ਅਨ੍ਤੋਪਵਿਟ੍ਠੇਨਾਤਿ ਗਾਮਸ੍ਸ, ਨਦਿਯਾ ਵਾ ਅਨ੍ਤੋਪਵਿਟ੍ਠੇਨ. ‘‘ਸਤ੍ਥੇਨਾ’’ਤਿ ਪਾਠਸੇਸੋ. ਨਦੀਪਰਿਹਾਰੋ ਲਬ੍ਭਤੀਤਿ ਏਤ੍ਥ ‘‘ਵਿਸੁਂ ਨਦੀਪਰਿਹਾਰਸ੍ਸ ਅਵੁਤ੍ਤਤ੍ਤਾ ਗਾਮਾਦੀਹਿ ਅਞ੍ਞਤ੍ਥ ਵਿਯ ਚੀਵਰਹਤ੍ਥਪਾਸੋਯੇਵ ਨਦੀਪਰਿਹਾਰੋ’’ਤਿ ਤੀਸੁਪਿ ਗਣ੍ਠਿਪਦੇਸੁ ਵੁਤ੍ਤਂ. ਅਞ੍ਞੇ ਪਨ ‘‘ਇਮਿਨਾ ਅਟ੍ਠਕਥਾਵਚਨੇਨ ਨਦੀਪਰਿਹਾਰੋਪਿ ਵਿਸੁਂ ਸਿਦ੍ਧੋਤਿ ਨਦੀਹਤ੍ਥਪਾਸੋ ਨ ਵਿਜਹਿਤਬ੍ਬੋ’’ਤਿ ਵਦਨ੍ਤਿ. ਯਥਾ ਪਨ ਅਜ੍ਝੋਕਾਸੇ ਸਤ੍ਤਬ੍ਭਨ੍ਤਰਵਸੇਨ ਅਰਞ੍ਞਪਰਿਹਾਰੋ ਲਬ੍ਭਤਿ, ਏਵਂ ਨਦਿਯਂ ਉਦਕੁਕ੍ਖੇਪਵਸੇਨ ਨਦੀਪਰਿਹਾਰੋ ਲਬ੍ਭਤੀਤਿ ਕਤ੍ਵਾ ਅਟ੍ਠਕਥਾਯਂ ਨਦੀਪਰਿਹਾਰੋ ਵਿਸੁਂ ਅਵੁਤ੍ਤੋ ਸਿਯਾ ਸਤ੍ਤਬ੍ਭਨ੍ਤਰਉਦਕੁਕ੍ਖੇਪਸੀਮਾਨਂ ਅਰਞ੍ਞਨਦੀਸੁ ਅਬਦ੍ਧਸੀਮਾਵਸੇਨ ਲਬ੍ਭਮਾਨਤ੍ਤਾ. ਏਵਞ੍ਚ ਸਤਿ ਸਮੁਦ੍ਦਜਾਤਸ੍ਸਰੇਸੁਪਿ ਪਰਿਹਾਰੋ ਅਵੁਤ੍ਤਸਿਦ੍ਧੋ ਹੋਤਿ ਨਦਿਯਾ ਸਮਾਨਲਕ੍ਖਣਤ੍ਤਾ, ਨਦੀਹਤ੍ਥਪਾਸੋ ਨ ਵਿਜਹਿਤਬ੍ਬੋਤਿ ਪਨ ਅਤ੍ਥੇ ਸਤਿ ਨਦਿਯਾ ਅਤਿਵਿਤ੍ਥਾਰਤ੍ਤਾ ਬਹੁਸਾਧਾਰਣਤ੍ਤਾ ਚ ਅਨ੍ਤੋਨਦਿਯਂ ਚੀਵਰਂ ਠਪੇਤ੍ਵਾ ਨਦੀਹਤ੍ਥਪਾਸੇ ਠਿਤੇਨ ਚੀਵਰਸ੍ਸ ਪਵਤ੍ਤਿਂ ਜਾਨਿਤੁਂ ਨ ਸਕ੍ਕਾ ਭਵੇਯ੍ਯ. ਏਸ ਨਯੋ ਸਮੁਦ੍ਦਜਾਤਸ੍ਸਰੇਸੁਪਿ. ਅਨ੍ਤੋਉਦਕੁਕ੍ਖੇਪੇ ਵਾ ਤਸ੍ਸ ਹਤ੍ਥਪਾਸੇ ਵਾ ਠਿਤੇਨ ਪਨ ਸਕ੍ਕਾਤਿ ਅਯਂ ਅਮ੍ਹਾਕਂ ਅਤ੍ਤਨੋਮਤਿ, ਵਿਚਾਰੇਤ੍ਵਾ ਗਹੇਤਬ੍ਬਂ. ਵਿਹਾਰਸੀਮਨ੍ਤਿ ਅਵਿਪ੍ਪਵਾਸਸੀਮਂ ਸਨ੍ਧਾਯਾਹ. ਏਤ੍ਥ ਚ ਵਿਹਾਰਸ੍ਸ ਨਾਨਾਕੁਲਸਨ੍ਤਕਭਾਵੇਪਿ ਅਵਿਪ੍ਪਵਾਸਸੀਮਾਪਰਿਚ੍ਛੇਦਬ੍ਭਨ੍ਤਰੇ ਸਬ੍ਬਤ੍ਥ ਚੀਵਰਅਵਿਪ੍ਪਵਾਸਸਮ੍ਭਵਤੋ ਪਧਾਨਤ੍ਤਾ ਤਤ੍ਥ ਸਤ੍ਥਪਰਿਹਾਰੋ ਨ ਲਬ੍ਭਤੀਤਿ ‘‘ਵਿਹਾਰਂ ਗਨ੍ਤ੍ਵਾ ਵਸਿਤਬ੍ਬ’’ਨ੍ਤਿ ਵੁਤ੍ਤਂ. ਸਤ੍ਥਸਮੀਪੇਤਿ ਇਦਂ ਯਥਾਵੁਤ੍ਤਅਬ੍ਭਨ੍ਤਰਪਰਿਚ੍ਛੇਦਵਸੇਨ ਵੁਤ੍ਤਂ.

ਯਸ੍ਮਾ ‘‘ਨਾਨਾਕੁਲਸ੍ਸ ਪਰਿਕ੍ਖਿਤ੍ਤੇ ਖੇਤ੍ਤੇ ਚੀਵਰਂ ਨਿਕ੍ਖਿਪਿਤ੍ਵਾ ਖੇਤ੍ਤਦ੍ਵਾਰਮੂਲੇ ਵਾ ਤਸ੍ਸ ਹਤ੍ਥਪਾਸੇ ਵਾ ਵਤ੍ਥਬ੍ਬ’’ਨ੍ਤਿ ਵੁਤ੍ਤਂ, ਤਸ੍ਮਾ ਦ੍ਵਾਰਮੂਲਤੋ ਅਞ੍ਞਤ੍ਥ ਖੇਤ੍ਤੇਪਿ ਵਸਨ੍ਤੇਨ ਚੀਵਰਂ ਨਿਕ੍ਖਿਪਿਤ੍ਵਾ ਹਤ੍ਥਪਾਸੇ ਕਤ੍ਵਾਯੇਵ ਵਸਿਤਬ੍ਬਂ.

ਵਿਹਾਰੋ ਨਾਮ ਸਪਰਿਕ੍ਖਿਤ੍ਤੋ ਵਾ ਅਪਰਿਕ੍ਖਿਤ੍ਤੋ ਵਾ ਸਕਲੋ ਆਵਾਸੋਤਿ ਵਦਨ੍ਤਿ. ਯਸ੍ਮਿਂ ਵਿਹਾਰੇਤਿ ਏਤ੍ਥ ਪਨ ਏਕਗੇਹਮੇਵ ਵੁਤ੍ਤਂ. ਵਿਮਤਿਵਿਨੋਦਨਿਯਂ (ਵਿ. ਵਿ. ਟੀ. ੧.੪੯੧-੪੯੪) ਪਨ ‘‘ਵਿਹਾਰੋ ਨਾਮ ਉਪਚਾਰਸੀਮਾ. ਯਸ੍ਮਿਂ ਵਿਹਾਰੇਤਿ ਤਸ੍ਸ ਅਨ੍ਤੋਪਰਿਵੇਣਾਦਿਂ ਸਨ੍ਧਾਯ ਵੁਤ੍ਤ’’ਨ੍ਤਿ ਵੁਤ੍ਤਂ. ਏਕਕੁਲਾਦਿਸਨ੍ਤਕਤਾ ਚੇਤ੍ਥ ਕਾਰਾਪਕਾਨਂ ਵਸੇਨ ਵੇਦਿਤਬ੍ਬਾ.

ਯਂ ਮਜ੍ਝਨ੍ਹਿਕੇ ਕਾਲੇ ਸਮਨ੍ਤਾ ਛਾਯਾ ਫਰਤੀਤਿ ਯਦਾ ਮਹਾਵੀਥਿਯਂ ਉਜੁਕਮੇਵ ਗਚ੍ਛਨ੍ਤਂ ਸੂਰਿਯਮਣ੍ਡਲਂ ਮਜ੍ਝਨ੍ਹਿਕਂ ਪਾਪੁਣਾਤਿ, ਤਦਾ ਯਂ ਓਕਾਸਂ ਛਾਯਾ ਫਰਤਿ, ਤਂ ਸਨ੍ਧਾਯ ਵੁਤ੍ਤਂ. ਵਿਮਤਿਵਿਨੋਦਨਿਯਂ ਪਨ ‘‘ਛਾਯਾਯ ਫੁਟ੍ਠੋਕਾਸਸ੍ਸਾਤਿ ਉਜੁਕਂ ਅਵਿਕ੍ਖਿਤ੍ਤਲੇਡ੍ਡੁਪਾਤਬ੍ਭਨ੍ਤਰਂ ਸਨ੍ਧਾਯ ਵਦਤੀ’’ਤਿ ਵੁਤ੍ਤਂ. ਅਗਮਨਪਥੇਤਿ ਤਦਹੇਵ ਗਨ੍ਤ੍ਵਾ ਨਿਵਤ੍ਤੇਤੁਂ ਅਸਕ੍ਕੁਣੇਯ੍ਯਕੇ ਸਮੁਦ੍ਦਮਜ੍ਝੇ ਯੇ ਦੀਪਕਾ, ਤੇਸੂਤਿ ਯੋਜਨਾ. ਇਤਰਸ੍ਮਿਨ੍ਤਿ ਪੁਰਤ੍ਥਿਮਦਿਸਾਯ ਚੀਵਰੇ.

੫੨. ਨਦਿਂ ਓਤਰਤੀਤਿ ਹਤ੍ਥਪਾਸਂ ਮੁਞ੍ਚਿਤ੍ਵਾ ਓਤਰਤਿ. ਨਾਪਜ੍ਜਤੀਤਿ ਪਰਿਭੋਗਪਚ੍ਚਯਾ ਦੁਕ੍ਕਟਂ ਨਾਪਜ੍ਜਤਿ. ਤੇਨਾਹ ‘‘ਸੋ ਹੀ’’ਤਿਆਦਿ. ਅਪਰਿਭੋਗਾਰਹਤ੍ਤਾਤਿ ਇਮਿਨਾ ਨਿਸ੍ਸਗ੍ਗਿਯਚੀਵਰਂ ਅਨਿਸ੍ਸਜ੍ਜਿਤ੍ਵਾ ਪਰਿਭੁਞ੍ਜਨ੍ਤਸ੍ਸ ਦੁਕ੍ਕਟਂ ਅਚਿਤ੍ਤਕਨ੍ਤਿ ਸਿਦ੍ਧਂ. ਏਕਂ ਪਾਰੁਪਿਤ੍ਵਾ ਏਕਂ ਅਂਸਕੂਟੇ ਠਪੇਤ੍ਵਾ ਗਨ੍ਤਬ੍ਬਨ੍ਤਿ ਇਦਂ ਬਹੂਨਂ ਸਞ੍ਚਰਣਟ੍ਠਾਨੇ ਏਵਂ ਅਕਤ੍ਵਾ ਗਮਨਂ ਨ ਸਾਰੁਪ੍ਪਨ੍ਤਿ ਕਤ੍ਵਾ ਵੁਤ੍ਤਂ, ਨ ਆਪਤ੍ਤਿਅਙ੍ਗਤ੍ਤਾ. ਬਹਿਗਾਮੇ ਠਪੇਤ੍ਵਾਪਿ ਅਪਾਰੁਪਿਤਬ੍ਬਤਾਯ ਵੁਤ੍ਤਂ ‘‘ਵਿਨਯਕਮ੍ਮਂ ਕਾਤਬ੍ਬ’’ਨ੍ਤਿ. ਅਥ ਵਾ ਵਿਹਾਰੇ ਸਭਾਗਂ ਭਿਕ੍ਖੁਂ ਨ ਪਸ੍ਸਤਿ, ਏਵਂ ਸਤਿ ਆਸਨਸਾਲਂ ਗਨ੍ਤ੍ਵਾ ਵਿਨਯਕਮ੍ਮਂ ਕਾਤਬ੍ਬਨ੍ਤਿ ਯੋਜਨਾ. ਆਸਨਸਾਲਂ ਗਚ੍ਛਨ੍ਤੇਨ ਕਿਂ ਤੀਹਿ ਚੀਵਰੇਹਿ ਗਨ੍ਤਬ੍ਬਨ੍ਤਿ ਆਹ ‘‘ਸਨ੍ਤਰੁਤ੍ਤਰੇਨਾ’’ਤਿ ਨਟ੍ਠਚੀਵਰਸ੍ਸ ਸਨ੍ਤਰੁਤ੍ਤਰਸਾਦਿਯਨਤੋ. ਸਙ੍ਘਾਟਿ ਪਨ ਕਿਂ ਕਾਤਬ੍ਬਾਤਿ ਆਹ ‘‘ਸਙ੍ਘਾਟਿਂ ਬਹਿਗਾਮੇ ਠਪੇਤ੍ਵਾ’’ਤਿ. ਉਤ੍ਤਰਾਸਙ੍ਗੇ ਚ ਬਹਿਗਾਮੇ ਠਪਿਤਸਙ੍ਘਾਟਿਯਞ੍ਚ ਪਠਮਂ ਵਿਨਯਕਮ੍ਮਂ ਕਤ੍ਵਾ ਪਚ੍ਛਾ ਉਤ੍ਤਰਾਸਙ੍ਗਂ ਨਿਵਾਸੇਤ੍ਵਾ ਅਨ੍ਤਰਵਾਸਕੇ ਕਾਤਬ੍ਬਂ. ਏਤ੍ਥ ਚ ਬਹਿਗਾਮੇ ਠਪਿਤਸ੍ਸਪਿ ਵਿਨਯਕਮ੍ਮਵਚਨਤੋ ਪਰਮ੍ਮੁਖਾਪਿ ਠਿਤਂ ਨਿਸ੍ਸਜ੍ਜਿਤੁਂ, ਨਿਸ੍ਸਟ੍ਠਂ ਦਾਤੁਞ੍ਚ ਵਟ੍ਟਤੀਤਿ ਵੇਦਿਤਬ੍ਬਂ.

ਦਹਰਾਨਂ ਗਮਨੇ ਸਉਸ੍ਸਾਹਤ੍ਤਾ ‘‘ਨਿਸ੍ਸਯੋ ਪਨ ਨ ਪਟਿਪ੍ਪਸ੍ਸਮ੍ਭਤੀ’’ਤਿ ਵੁਤ੍ਤਂ. ਮੁਹੁਤ੍ਤਂ…ਪੇ… ਪਟਿਪ੍ਪਸ੍ਸਮ੍ਭਤੀਤਿ ਸਉਸ੍ਸਾਹਤ੍ਤੇ ਗਮਨਸ੍ਸ ਉਪਚ੍ਛਿਨ੍ਨਤ੍ਤਾ ਵੁਤ੍ਤਂ, ਤੇਸਂ ਪਨ ਪੁਰਾਰੁਣਾ ਉਟ੍ਠਹਿਤ੍ਵਾ ਸਉਸ੍ਸਾਹੇਨ ਗਚ੍ਛਨ੍ਤਾਨਂ ਅਰੁਣੇ ਅਨ੍ਤਰਾ ਉਟ੍ਠਿਤੇਪਿ ਨ ਪਟਿਪ੍ਪਸ੍ਸਮ੍ਭਤਿ ‘‘ਯਾਵ ਅਰੁਣੁਗ੍ਗਮਨਾ ਸਯਨ੍ਤੀ’’ਤਿ ਵੁਤ੍ਤਤ੍ਤਾ. ਤੇਨੇਵ ‘‘ਗਾਮਂ ਪਵਿਸਿਤ੍ਵਾ…ਪੇ… ਨ ਪਟਿਪ੍ਪਸ੍ਸਮ੍ਭਤੀ’’ਤਿ ਵੁਤ੍ਤਂ. ਅਞ੍ਞਮਞ੍ਞਸ੍ਸ ਵਚਨਂ ਅਗ੍ਗਹੇਤ੍ਵਾਤਿਆਦਿਮ੍ਹਿ ਸਉਸ੍ਸਾਹਤ੍ਤਾ ਗਮਨਕ੍ਖਣੇ ਪਟਿਪ੍ਪਸ੍ਸਦ੍ਧਿ ਨ ਵੁਤ੍ਤਾ. ਧੇਨੁਭਯੇਨਾਤਿ ਤਰੁਣਵਚ੍ਛਗਾਵੀਨਂ ਆਧਾਵਿਤ੍ਵਾ ਸਿਙ੍ਗੇਨ ਪਹਰਣਭਯੇਨ. ਨਿਸ੍ਸਯੋ ਚ ਪਟਿਪ੍ਪਸ੍ਸਮ੍ਭਤੀਤਿ ਏਤ੍ਥ ਧੇਨੁਭਯਾਦੀਹਿ ਠਿਤਾਨਂ ਯਾਵ ਭਯਵੂਪਸਮਾ ਠਾਤਬ੍ਬਤੋ ‘‘ਅਨ੍ਤੋਅਰੁਣੇਯੇਵ ਗਮਿਸ੍ਸਾਮੀ’’ਤਿ ਨਿਯਮੇਤੁਂ ਅਸਕ੍ਕੁਣੇਯ੍ਯਤ੍ਤਾ ਵੁਤ੍ਤਂ. ਯਤ੍ਥ ਪਨ ਏਵਂ ਨਿਯਮੇਤੁਂ ਸਕ੍ਕਾ, ਤਤ੍ਥ ਅਨ੍ਤਰਾ ਅਰੁਣੇ ਉਗ੍ਗਤੇਪਿ ਨਿਸ੍ਸਯੋ ਨ ਪਟਿਪ੍ਪਸ੍ਸਮ੍ਭਤਿ ਭੇਸਜ੍ਜਤ੍ਥਾਯ ਗਾਮਂ ਪਵਿਟ੍ਠਦਹਰਾਨਂ ਵਿਯ.

ਅਨ੍ਤੋਸੀਮਾਯਂ ਗਾਮਨ੍ਤਿ ਅਵਿਪ੍ਪਵਾਸਸੀਮਾਸਮ੍ਮੁਤਿਤੋ ਪਚ੍ਛਾ ਪਤਿਟ੍ਠਾਪਿਤਗਾਮਂ ਸਨ੍ਧਾਯ ਵਦਤਿ ਗਾਮਞ੍ਚ ਗਾਮੂਪਚਾਰਞ੍ਚ ਠਪੇਤ੍ਵਾ ਸਮ੍ਮਨ੍ਨਿਤਬ੍ਬਤੋ. ਪਵਿਟ੍ਠਾਨਨ੍ਤਿ ਆਚਰਿਯਨ੍ਤੇਵਾਸਿਕਾਨਂ ਵਿਸੁਂ ਵਿਸੁਂ ਗਤਾਨਂ ਅਵਿਪ੍ਪਵਾਸਸੀਮਤ੍ਤਾ ਨੇਵ ਚੀਵਰਾਨਿ ਨਿਸ੍ਸਗ੍ਗਿਯਾਨਿ ਹੋਨ੍ਤਿ, ਸਉਸ੍ਸਾਹਤਾਯ ਨ ਨਿਸ੍ਸਯੋ ਪਟਿਪ੍ਪਸ੍ਸਮ੍ਭਤਿ. ਅਨ੍ਤਰਾਮਗ੍ਗੇਤਿ ਧਮ੍ਮਂ ਸੁਤ੍ਵਾ ਆਗਚ੍ਛਨ੍ਤਾਨਂ ਅਨ੍ਤਰਾਮਗ੍ਗੇ.

ਇਤਿ ਵਿਨਯਸਙ੍ਗਹਸਂਵਣ੍ਣਨਾਭੂਤੇ ਵਿਨਯਾਲਙ੍ਕਾਰੇ

ਚੀਵਰਵਿਪ੍ਪਵਾਸਵਿਨਿਚ੍ਛਯਕਥਾਲਙ੍ਕਾਰੋ ਨਾਮ

ਨਵਮੋ ਪਰਿਚ੍ਛੇਦੋ.