੧੦. ਭਣ੍ਡਪਟਿਸਾਮਨਵਿਨਿਚ੍ਛਯਕਥਾ

੫੩. ਏਵਂ ਚੀਵਰਵਿਪ੍ਪਵਾਸਵਿਨਿਚ੍ਛਯਂ ਕਥੇਤ੍ਵਾ ਇਦਾਨਿ ਭਣ੍ਡਪਟਿਸਾਮਨਵਿਨਿਚ੍ਛਯਂ ਕਥੇਤੁਂ ‘‘ਭਣ੍ਡਸ੍ਸ ਪਟਿਸਾਮਨ’’ਨ੍ਤਿਆਦਿਮਾਹ. ਤਤ੍ਥ ਭਡਿਤਬ੍ਬਂ ਭਾਜੇਤਬ੍ਬਨ੍ਤਿ ਭਣ੍ਡਂ, ਭਡਿਤਬ੍ਬਂ ਇਚ੍ਛਿਤਬ੍ਬਨ੍ਤਿ ਵਾ ਭਣ੍ਡਂ, ਭਣ੍ਡਨ੍ਤਿ ਪਰਿਭਣ੍ਡਨ੍ਤਿ ਸਤ੍ਤਾ ਏਤੇਨਾਤਿ ਵਾ ਭਣ੍ਡਂ, ਮੂਲਧਨਂ, ਪਰਿਕ੍ਖਾਰੋ ਵਾ. ਵੁਤ੍ਤਞ੍ਹਿ ਅਭਿਧਾਨਪ੍ਪਦੀਪਿਕਾਯਂ –

‘‘ਭਾਜਨਾਦਿਪਰਿਕ੍ਖਾਰੇ, ਭਣ੍ਡਂ ਮੂਲਧਨੇਪਿ ਚਾ’’ਤਿ.

ਤਸ੍ਸ ਭਣ੍ਡਸ੍ਸ, ਪਟਿਸਾਮਿਯਤੇ ਪਟਿਸਾਮਨਂ, ਰਕ੍ਖਣਂ ਗੋਪਨਨ੍ਤਿ ਅਤ੍ਥੋ. ਤੇਨਾਹ ‘‘ਪਰੇਸਂ ਭਣ੍ਡਸ੍ਸ ਗੋਪਨ’’ਨ੍ਤਿ. ਮਾਤੁ ਕਣ੍ਣਪਿਲ਼ਨ੍ਧਨਂ ਤਾਲਪਣ੍ਣਮ੍ਪੀਤਿ ਪਿ-ਸਦ੍ਦੋ ਸਮ੍ਭਾਵਨਤ੍ਥੋ. ਤੇਨ ਪਗੇਵ ਅਞ੍ਞਾਤਕਾਨਂ ਸਨ੍ਤਕਨ੍ਤਿ ਦਸ੍ਸੇਤਿ. ਗਿਹਿਸਨ੍ਤਕਨ੍ਤਿ ਇਮਿਨਾ ਪਞ੍ਚਨ੍ਨਂ ਸਹਧਮ੍ਮਿਕਾਨਂ ਸਨ੍ਤਕਂ ਪਟਿਸਾਮੇਤੁਂ ਵਟ੍ਟਤੀਤਿ ਦੀਪੇਤਿ. ਭਣ੍ਡਾਗਾਰਿਕਸੀਸੇਨਾਤਿ ਏਤੇਨ ਵਿਸ੍ਸਾਸਗ੍ਗਾਹਾਦਿਨਾ ਗਹੇਤ੍ਵਾ ਪਟਿਸਾਮੇਨ੍ਤਸ੍ਸ ਅਨਾਪਤ੍ਤੀਤਿ ਦਸ੍ਸੇਤਿ. ਤੇਨ ਵਕ੍ਖਤਿ ‘‘ਅਤ੍ਤਨੋ ਅਤ੍ਥਾਯ ਗਹੇਤ੍ਵਾ ਪਟਿਸਾਮੇਤਬ੍ਬ’’ਨ੍ਤਿ. ਛਨ੍ਦੇਨਪਿ ਭਯੇਨਪੀਤਿ ਵਡ੍ਢਕੀਆਦੀਸੁ ਛਨ੍ਦੇਨ, ਰਾਜਵਲ੍ਲਭਾਦੀਸੁ ਭਯੇਨ ਬਲਕ੍ਕਾਰੇਨ ਪਾਤੇਤ੍ਵਾ ਗਤੇਸੁ ਚ ਪਟਿਸਾਮੇਤੁਂ ਵਟ੍ਟਤੀਤਿ ਯੋਜੇਤਬ੍ਬਂ.

ਸਙ੍ਗੋਪਨਤ੍ਥਾਯ ਅਤ੍ਤਨੋ ਹਤ੍ਥੇ ਨਿਕ੍ਖਿਤ੍ਤਸ੍ਸ ਭਣ੍ਡਸ੍ਸ ਗੁਤ੍ਤਟ੍ਠਾਨੇ ਪਟਿਸਾਮਨਪਯੋਗਂ ਵਿਨਾ ‘‘ਨਾਹਂ ਗਣ੍ਹਾਮੀ’’ਤਿਆਦਿਨਾ ਅਞ੍ਞਸ੍ਮਿਂ ਪਯੋਗੇ ਅਕਤੇ ਰਜ੍ਜਸਙ੍ਖੋਭਾਦਿਕਾਲੇ ‘‘ਨ ਦਾਨਿ ਤਸ੍ਸ ਦਸ੍ਸਾਮਿ, ਨ ਮਯ੍ਹਂ ਦਾਨਿ ਦਸ੍ਸਤੀ’’ਤਿ ਉਭੋਹਿਪਿ ਸਕਸਕਟ੍ਠਾਨੇ ਨਿਸੀਦਿਤ੍ਵਾ ਧੁਰਨਿਕ੍ਖੇਪੇ ਕਤੇਪਿ ਅਵਹਾਰੋ ਨਤ੍ਥਿ. ਕੇਚਿ ਪਨੇਤ੍ਥ ‘‘ਪਾਰਾਜਿਕਮੇਵ ਪਟਿਸਾਮਨਪਯੋਗਸ੍ਸ ਕਤਤ੍ਤਾ’’ਤਿ ਵਦਨ੍ਤਿ, ਤਂ ਤੇਸਂ ਮਤਿਮਤ੍ਤਂ, ਨ ਸਾਰਤੋ ਪਚ੍ਚੇਤਬ੍ਬਂ. ਪਟਿਸਾਮਨਕਾਲੇ ਹਿਸ੍ਸ ਥੇਯ੍ਯਚਿਤ੍ਤਂ ਨਤ੍ਥਿ, ‘‘ਨ ਦਾਨਿ ਤਸ੍ਸ ਦਸ੍ਸਾਮੀ’’ਤਿ ਥੇਯ੍ਯਚਿਤ੍ਤੁਪ੍ਪਤ੍ਤਿਕ੍ਖਣੇ ਚ ਸਾਮਿਨੋ ਧੁਰਨਿਕ੍ਖੇਪਚਿਤ੍ਤਪ੍ਪਵਤ੍ਤਿਯਾ ਹੇਤੁਭੂਤੋ ਕਾਯਵਚੀਪਯੋਗੋ ਨਤ੍ਥਿ, ਯੇਨ ਸੋ ਆਪਤ੍ਤਿਂ ਆਪਜ੍ਜੇਯ੍ਯ. ਨ ਹਿ ਅਕਿਰਿਯਸਮੁਟ੍ਠਾਨਾ ਅਯਂ ਆਪਤ੍ਤੀਤਿ. ਦਾਨੇ ਸਉਸ੍ਸਾਹੋ, ਰਕ੍ਖਤਿ ਤਾਵਾਤਿ ਅਵਹਾਰਂ ਸਨ੍ਧਾਯ ਅਵੁਤ੍ਤਤ੍ਤਾ ‘‘ਨਾਹਂ ਗਣ੍ਹਾਮੀ’’ਤਿਆਦਿਨਾ ਮੁਸਾਵਾਦਕਰਣੇ ਪਾਚਿਤ੍ਤਿਯਮੇਵ ਹੋਤਿ, ਨ ਦੁਕ੍ਕਟਂ ਥੇਯ੍ਯਚਿਤ੍ਤਾਭਾਵੇਨ ਸਹਪਯੋਗਸ੍ਸਪਿ ਅਭਾਵਤੋਤਿ ਗਹੇਤਬ੍ਬਂ.

ਯਦਿਪਿ ਮੁਖੇਨ ਦਸ੍ਸਾਮੀਤਿ ਵਦਤਿ…ਪੇ… ਪਾਰਾਜਿਕਨ੍ਤਿ ਏਤ੍ਥ ਕਤਰਪਯੋਗੇਨ ਆਪਤ੍ਤਿ, ਨ ਤਾਵ ਪਠਮੇਨ ਭਣ੍ਡਪਟਿਸਾਮਨਪਯੋਗੇਨ ਤਦਾ ਥੇਯ੍ਯਚਿਤ੍ਤਭਾਵਾ, ਨਾਪਿ ‘‘ਦਸ੍ਸਾਮੀ’’ਤਿ ਕਥਨਪਯੋਗੇਨ ਤਦਾ ਥੇਯ੍ਯਚਿਤ੍ਤੇ ਵਿਜ੍ਜਮਾਨੇਪਿ ਪਯੋਗਸ੍ਸ ਕਪ੍ਪਿਯਤ੍ਤਾਤਿ? ਵੁਚ੍ਚਤੇ – ਸਾਮਿਨਾ ‘‘ਦੇਹੀ’’ਤਿ ਬਹੁਸੋ ਯਾਚਿਯਮਾਨੋਪਿ ਅਦਤ੍ਵਾ ਯੇਨ ਪਯੋਗੇਨ ਅਤ੍ਤਨੋ ਅਦਾਤੁਕਾਮਤਂ ਸਾਮਿਕਸ੍ਸ ਞਾਪੇਸਿ, ਯੇਨ ਚ ਸੋ ਅਦਾਤੁਕਾਮੋ ਅਯਂ ਵਿਕ੍ਖਿਪਤੀਤਿ ਞਤ੍ਵਾ ਧੁਰਂ ਨਿਕ੍ਖਿਪਤਿ, ਤੇਨੇਵ ਪਯੋਗੇਨਸ੍ਸ ਆਪਤ੍ਤਿ. ਨ ਹੇਤ੍ਥ ਉਪਨਿਕ੍ਖਿਤ੍ਤਭਣ੍ਡੇ ਪਰਿਯਾਯੇਨ ਮੁਤ੍ਤਿ ਅਤ੍ਥਿ. ਅਦਾਤੁਕਾਮਤਾਯ ਹਿ ‘‘ਕਦਾ ਤੇ ਦਿਨ੍ਨਂ, ਕਤ੍ਥ ਤੇ ਦਿਨ੍ਨ’’ਨ੍ਤਿਆਦਿਪਰਿਯਾਯਵਚਨੇਨਪਿ ਸਾਮਿਕਸ੍ਸ ਧੁਰੇਨਿਕ੍ਖਿਪਾਪਿਤੇ ਆਪਤ੍ਤਿਯੇਵ. ਤੇਨੇਵ ਅਟ੍ਠਕਥਾਯਂ ਵੁਤ੍ਤਂ ‘‘ਕਿਂ ਤੁਮ੍ਹੇ ਭਣਥ…ਪੇ… ਉਭਿਨ੍ਨਂ ਧੁਰਨਿਕ੍ਖੇਪੇਨ ਭਿਕ੍ਖੁਨੋ ਪਾਰਾਜਿਕ’’ਨ੍ਤਿ. ਪਰਸਨ੍ਤਕਸ੍ਸ ਪਰੇਹਿ ਗਣ੍ਹਾਪਨੇ ਏਵ ਹਿ ਪਰਿਯਾਯਤੋ ਮੁਤ੍ਤਿ, ਨ ਸਬ੍ਬਤ੍ਥਾਤਿ ਗਹੇਤਬ੍ਬਂ. ਅਤ੍ਤਨੋ ਹਤ੍ਥੇ ਨਿਕ੍ਖਿਤ੍ਤਤ੍ਤਾਤਿ ਏਤ੍ਥ ਅਤ੍ਤਨੋ ਹਤ੍ਥੇ ਸਾਮਿਨਾ ਦਿਨ੍ਨਤਾਯ ਭਣ੍ਡਾਗਾਰਿਕਟ੍ਠਾਨੇ ਠਿਤਤ੍ਤਾ ਚ ਠਾਨਾਚਾਵਨੇਪਿ ਨਤ੍ਥਿ ਅਵਹਾਰੋ, ਥੇਯ੍ਯਚਿਤ੍ਤੇਨ ਪਨ ਗਹਣੇ ਦੁਕ੍ਕਟਤੋ ਨ ਮੁਚ੍ਚਤੀਤਿ ਵੇਦਿਤਬ੍ਬਂ. ਏਸੇਵ ਨਯੋਤਿ ਅਵਹਾਰੋ ਨਤ੍ਥਿ, ਭਣ੍ਡਦੇਯ੍ਯਂ ਪਨ ਹੋਤੀਤਿ ਅਧਿਪ੍ਪਾਯੋ.

੫੪. ਪਞ੍ਚਨ੍ਨਂ ਸਹਧਮ੍ਮਿਕਾਨਨ੍ਤਿ ਭਿਕ੍ਖੁਭਿਕ੍ਖੁਨੀਸਿਕ੍ਖਮਾਨਸਾਮਣੇਰਸਾਮਣੇਰੀਨਂ. ਏਤੇਨ ਨ ਕੇਵਲਂ ਗਿਹੀਨਂ ਏਵ, ਅਥ ਖੋ ਤਾਪਸਪਰਿਬ੍ਬਾਜਕਾਦੀਨਮ੍ਪਿ ਸਨ੍ਤਕਂ ਪਟਿਸਾਮੇਤੁਂ ਨ ਵਟ੍ਟਤੀਤਿ ਦਸ੍ਸੇਤਿ. ਨਟ੍ਠੇਪਿ ਗੀਵਾ ਨ ਹੋਤਿ, ਕਸ੍ਮਾ? ਅਸਮ੍ਪਟਿਚ੍ਛਾਪਿਤਤ੍ਤਾਤਿ ਅਤ੍ਥੋ. ਦੁਤਿਯੇ ਏਸੇਵ ਨਯੋਤਿ ਗੀਵਾ ਨ ਹੋਤਿ, ਕਸ੍ਮਾ? ਅਜਾਨਿਤਤ੍ਤਾ. ਤਤਿਯੇ ਚ ਏਸੇਵ ਨਯੋਤਿ ਗੀਵਾ ਨ ਹੋਤਿ, ਕਸ੍ਮਾ? ਪਟਿਕ੍ਖਿਪਿਤਤ੍ਤਾ. ਏਤ੍ਥ ਚ ਕਾਯੇਨ ਵਾ ਵਾਚਾਯ ਵਾ ਚਿਤ੍ਤੇਨ ਵਾ ਪਟਿਕ੍ਖਿਤ੍ਤੋਪਿ ਪਟਿਕ੍ਖਿਤ੍ਤੋਯੇਵ ਨਾਮ ਹੋਤਿ.

ਤਸ੍ਸੇਵ ਗੀਵਾ ਹੋਤਿ, ਨ ਸੇਸਭਿਕ੍ਖੂਨਂ, ਕਸ੍ਮਾ? ਤਸ੍ਸੇਵ ਭਣ੍ਡਾਗਾਰਿਕਸ੍ਸ ਭਣ੍ਡਾਗਾਰੇ ਇਸ੍ਸਰਭਾਵਤੋ. ਭਣ੍ਡਾਗਾਰਿਕਸ੍ਸ ਗੀਵਾ ਨ ਹੋਤਿ ਅਲਸਜਾਤਿਕਸ੍ਸੇਵ ਪਮਾਦੇਨ ਹਰਿਤਤ੍ਤਾ. ਦੁਤਿਯੇ ਭਣ੍ਡਾਗਾਰਿਕਸ੍ਸ ਗੀਵਾ ਨ ਹੋਤਿ ਤਸ੍ਸ ਅਨਾਰੋਚਿਤਤ੍ਤਾ. ਨਟ੍ਠੇ ਤਸ੍ਸ ਗੀਵਾ ਤੇਨ ਠਪਿਤਤ੍ਤਾ. ਤਸ੍ਸੇਵ ਗੀਵਾ, ਨ ਅਞ੍ਞੇਸਂ ਤੇਨ ਭਣ੍ਡਾਗਾਰਿਕੇਨ ਸਮ੍ਪਟਿਚ੍ਛਿਤਤ੍ਤਾ ਠਪਿਤਤ੍ਤਾ ਚ. ਨਤ੍ਥਿ ਗੀਵਾ ਤੇਨ ਪਟਿਕ੍ਖਿਪਿਤਤ੍ਤਾ. ਨਟ੍ਠਂ ਸੁਨਟ੍ਠਮੇਵ ਭਣ੍ਡਾਗਾਰਿਕਸ੍ਸ ਅਸਮ੍ਪਟਿਚ੍ਛਾਪਨਤੋ. ਨਟ੍ਠੇ ਗੀਵਾ ਤੇਨ ਠਪਿਤਤ੍ਤਾ. ਸਬ੍ਬਂ ਤਸ੍ਸ ਗੀਵਾ ਤਸ੍ਸ ਭਣ੍ਡਾਗਾਰਿਕਸ੍ਸ ਪਮਾਦੇਨ ਹਰਣਤੋ. ਤਤ੍ਥੇਵ ਉਪਚਾਰੇ ਵਿਜ੍ਜਮਾਨੇਤਿ ਭਣ੍ਡਾਗਾਰਿਕਸ੍ਸ ਸਮੀਪੇਯੇਵ ਉਚ੍ਚਾਰਪਸ੍ਸਾਵਟ੍ਠਾਨੇ ਵਿਜ੍ਜਮਾਨੇ.

੫੫. ਮਯਿ ਚ ਮਤੇ ਸਙ੍ਘਸ੍ਸ ਚ ਸੇਨਾਸਨੇ ਵਿਨਟ੍ਠੇਤਿ ਏਤ੍ਥ ਕੇਵਲਂ ਸਙ੍ਘਸ੍ਸ ਸੇਨਾਸਨਂ ਮਾ ਵਿਨਸ੍ਸੀਤਿ ਇਮਿਨਾ ਅਧਿਪ੍ਪਾਯੇਨ ਵਿਵਰਿਤੁਮ੍ਪਿ ਵਟ੍ਟਤਿਯੇਵਾਤਿ ਵਦਨ੍ਤਿ. ‘‘ਤਂ ਮਾਰੇਸ੍ਸਾਮੀ’’ਤਿ ਏਤ੍ਤਕੇ ਵੁਤ੍ਤੇਪਿ ਵਿਵਰਿਤੁਂ ਵਟ੍ਟਤਿ ‘‘ਗਿਲਾਨਪਕ੍ਖੇ ਠਿਤਤ੍ਤਾ ਅਵਿਸਯੋ’’ਤਿ ਵੁਤ੍ਤਤ੍ਤਾ. ਮਰਣਤੋ ਹਿ ਪਰਂ ਗੇਲਞ੍ਞਂ ਅਵਿਸਯਤ੍ਤਞ੍ਚ ਨਤ੍ਥਿ. ‘‘ਦ੍ਵਾਰਂ ਛਿਨ੍ਦਿਤ੍ਵਾ ਹਰਿਸ੍ਸਾਮਾ’’ਤਿ ਏਤ੍ਤਕੇ ਵੁਤ੍ਤੇਪਿ ਵਿਵਰਿਤੁਂ ਵਟ੍ਟਤਿਯੇਵ. ਸਹਾਯੇਹਿ ਭਵਿਤਬ੍ਬਨ੍ਤਿ ਤੇਹਿਪਿ ਭਿਕ੍ਖਾਚਾਰਾਦੀਹਿ ਪਰਿਯੇਸਿਤ੍ਵਾ ਅਤ੍ਤਨੋ ਸਨ੍ਤਕਮ੍ਪਿ ਕਿਞ੍ਚਿ ਕਿਞ੍ਚਿ ਦਾਤਬ੍ਬਨ੍ਤਿ ਵੁਤ੍ਤਂ ਹੋਤਿ. ਅਯਞ੍ਹਿ ਸਾਮੀਚੀਤਿ ਭਣ੍ਡਾਗਾਰੇ ਵਸਨ੍ਤਾਨਂ ਇਦਂ ਵਤ੍ਤਂ. ਲੋਲਮਹਾਥੇਰੋਤਿ ਮਨ੍ਦੋ ਮੋਮੂਹੋ ਆਕਿਣ੍ਣਵਿਹਾਰੀ ਸਦਾ ਕੀਲ਼ਾਪਸੁਤੋ ਵਾ ਮਹਾਥੇਰੋ.

੫੬. ਇਤਰੇਹੀਤਿ ਤਸ੍ਮਿਂਯੇਵ ਗਬ੍ਭੇ ਵਸਨ੍ਤੇਹਿ ਭਿਕ੍ਖੂਹਿ. ਵਿਹਾਰਰਕ੍ਖਣਵਾਰੇ ਨਿਯੁਤ੍ਤੋ ਵਿਹਾਰਵਾਰਿਕੋ, ਵੁਡ੍ਢਪਟਿਪਾਟਿਯਾ ਅਤ੍ਤਨੋ ਵਾਰੇ ਵਿਹਾਰਰਕ੍ਖਣਕੋ. ਨਿਵਾਪਨ੍ਤਿ ਭਤ੍ਤਵੇਤਨਂ. ਚੋਰਾਨਂ ਪਟਿਪਥਂ ਗਤੇਸੂਤਿ ਚੋਰਾਨਂ ਆਗਮਨਂ ਞਤ੍ਵਾ ‘‘ਪਠਮਤਰਂਯੇਵ ਗਨ੍ਤ੍ਵਾ ਸਦ੍ਦਂ ਕਰਿਸ੍ਸਾਮਾ’’ਤਿ ਚੋਰਾਨਂ ਅਭਿਮੁਖਂ ਗਤੇਸੁ. ‘‘ਚੋਰੇਹਿ ਹਟਭਣ੍ਡਂ ਆਹਰਿਸ੍ਸਾਮਾ’’ਤਿ ਤੇਸਂ ਅਨੁਪਥਂ ਗਤੇਸੁਪਿ ਏਸੇਵ ਨਯੋ. ਨਿਬਦ੍ਧਂ ਕਤ੍ਵਾਤਿ ‘‘ਅਸੁਕਕੁਲੇ ਯਾਗੁਭਤ੍ਤਂ ਵਿਹਾਰਵਾਰਿਕਾਨਂਯੇਵਾ’’ਤਿ ਏਵਂ ਨਿਯਮਨਂ ਕਤ੍ਵਾ. ਦ੍ਵੇ ਤਿਸ੍ਸੋ ਯਾਗੁਸਲਾਕਾ ਚ ਚਤ੍ਤਾਰਿ ਪਞ੍ਚ ਸਲਾਕਭਤ੍ਤਾਨਿ ਚ ਲਭਮਾਨੋਵਾਤਿ ਇਦਂ ਨਿਦਸ੍ਸਨਮਤ੍ਤਂ, ਤਤੋ ਊਨਂ ਵਾ ਹੋਤੁ ਅਧਿਕਂ ਵਾ, ਅਤ੍ਤਨੋ ਚ ਵੇਯ੍ਯਾਵਚ੍ਚਕਰਸ੍ਸ ਚ ਯਾਪਨਮਤ੍ਤਂ ਲਭਨਮੇਵ ਪਮਾਣਨ੍ਤਿ ਗਹੇਤਬ੍ਬਂ. ਨਿਸ੍ਸਿਤਕੇ ਜਗ੍ਗਾਪੇਨ੍ਤੀਤਿ ਅਤ੍ਤਨੋ ਅਤ੍ਤਨੋ ਨਿਸ੍ਸਿਤਕੇ ਭਿਕ੍ਖਾਚਰਿਯਾਯ ਪੋਸੇਨ੍ਤਾ ਨਿਸ੍ਸਿਤਕੇਹਿ ਵਿਹਾਰਂ ਜਗ੍ਗਾਪੇਨ੍ਤਿ. ਅਸਹਾਯਸ੍ਸਾਤਿ ਸਹਾਯਰਹਿਤਸ੍ਸ. ‘‘ਅਸਹਾਯਸ੍ਸ ਅਦੁਤਿਯਸ੍ਸਾ’’ਤਿ ਪਾਠੋ ਯੁਤ੍ਤੋ. ਪਚ੍ਛਿਮਂ ਪੁਰਿਮਸ੍ਸੇਵ ਵੇਵਚਨਂ. ਅਸਹਾਯਸ੍ਸ ਵਾ ਅਤ੍ਤਦੁਤਿਯਸ੍ਸ ਵਾਤਿ ਇਮਸ੍ਮਿਂ ਪਨ ਪਾਠੇ ਏਕੇਨ ਆਨੀਤਂ ਦ੍ਵਿਨ੍ਨਂ ਨਪ੍ਪਹੋਤੀਤਿ ਅਤ੍ਤਦੁਤਿਯਸ੍ਸਪਿ ਵਾਰੋ ਨਿਵਾਰਿਤੋਤਿ ਵਦਨ੍ਤਿ, ਤਂ ‘‘ਯਸ੍ਸ ਸਭਾਗੋ ਭਿਕ੍ਖੁ ਭਤ੍ਤਂ ਆਨੇਤ੍ਵਾ ਦਾਤਾ ਨਤ੍ਥੀ’’ਤਿ ਇਮਿਨਾ ਨ ਸਮੇਤਿ, ਵੀਮਂਸਿਤਬ੍ਬਂ. ਵਿਮਤਿਵਿਨੋਦਨਿਯਂ (ਵਿ. ਵਿ. ਟੀ. ੧.੧੧੨) ਪਨ ‘‘ਅਤ੍ਤਦੁਤਿਯਸ੍ਸਾਤਿ ਅਪ੍ਪਿਚ੍ਛਸ੍ਸ. ਅਤ੍ਤਾਸਰੀਰਮੇਵ ਦੁਤਿਯੋ, ਨ ਅਞ੍ਞੋਤਿ ਹਿ ਅਤ੍ਤਦੁਤਿਯੋ, ਤਦੁਭਯਸ੍ਸਪਿ ਅਤ੍ਥਸ੍ਸ ਵਿਭਾਵਨਂ ‘ਯਸ੍ਸਾ’ਤਿਆਦਿ. ਏਤੇਨ ਸਬ੍ਬੇਨ ਏਕੇਕਸ੍ਸ ਵਾਰੋ ਨ ਪਾਪੇਤਬ੍ਬੋਤਿ ਦਸ੍ਸੇਤੀ’’ਤਿ ਵੁਤ੍ਤਂ.

ਪਾਕਵਤ੍ਤਤ੍ਥਾਯਾਤਿ ਨਿਚ੍ਚਂ ਪਚਿਤਬ੍ਬਯਾਗੁਭਤ੍ਤਸਙ੍ਖਾਤਵਤ੍ਤਤ੍ਥਾਯ. ਠਪੇਨ੍ਤੀਤਿ ਦਾਯਕਾ ਠਪੇਨ੍ਤਿ. ਤਂ ਗਹੇਤ੍ਵਾਤਿ ਤਂ ਆਰਾਮਿਕਾਦੀਹਿ ਦੀਯਮਾਨਂ ਭਾਗਂ ਗਹੇਤ੍ਵਾ. ਉਪਜੀਵਨ੍ਤੇਨ ਠਾਤਬ੍ਬਨ੍ਤਿ ਅਬ੍ਭੋਕਾਸਿਕਰੁਕ੍ਖਮੂਲਿਕੇਨਪਿ ਪਾਕਵਤ੍ਤਂ ਉਪਨਿਸ੍ਸਾਯ ਜੀਵਨ੍ਤੇਨ ਅਤ੍ਤਨੋ ਪਤ੍ਤਚੀਵਰਰਕ੍ਖਣਤ੍ਥਾਯ ਵਿਹਾਰਵਾਰੇ ਸਮ੍ਪਤ੍ਤੇ ਠਾਤਬ੍ਬਂ. ਨ ਗਾਹਾਪੇਤਬ੍ਬੋਤਿ ਏਤ੍ਥ ਯਸ੍ਸ ਅਬ੍ਭੋਕਾਸਿਕਸ੍ਸਪਿ ਅਤ੍ਤਨੋ ਅਧਿਕਪਰਿਕ੍ਖਾਰੋ ਚੇ ਠਪਿਤੋ ਅਤ੍ਥਿ, ਚੀਵਰਾਦਿਸਙ੍ਘਿਕਭਾਗੇਪਿ ਆਲਯੋ ਅਤ੍ਥਿ, ਸੋਪਿ ਗਾਹਾਪੇਤਬ੍ਬੋ. ਪਰਿਪੁਚ੍ਛਨ੍ਤਿ ਪੁਚ੍ਛਿਤਪਞ੍ਹਵਿਸ੍ਸਜ੍ਜਨਂ, ਅਟ੍ਠਕਥਂ ਵਾ. ਦਿਗੁਣਨ੍ਤਿ ਅਞ੍ਞੇਹਿ ਲਬ੍ਭਮਾਨਤੋ ਦ੍ਵਿਗੁਣਂ. ਪਕ੍ਖਵਾਰੇਨਾਤਿ ਅਡ੍ਢਮਾਸਵਾਰੇਨ.

ਇਤਿ ਵਿਨਯਸਙ੍ਗਹਸਂਵਣ੍ਣਨਾਭੂਤੇ ਵਿਨਯਾਲਙ੍ਕਾਰੇ

ਭਣ੍ਡਪਟਿਸਾਮਨਵਿਨਿਚ੍ਛਯਕਥਾਲਙ੍ਕਾਰੋ ਨਾਮ

ਦਸਮੋ ਪਰਿਚ੍ਛੇਦੋ.