੮. ਅਧਿਟ੍ਠਾਨਵਿਕਪ੍ਪਨਵਿਨਿਚ੍ਛਯਕਥਾ

੪੪. ਏਵਂ ਅਨਾਮਾਸਵਿਨਿਚ੍ਛਯਕਥਂ ਕਥੇਤ੍ਵਾ ਇਦਾਨਿ ਅਧਿਟ੍ਠਾਨਵਿਕਪ੍ਪਨਵਿਨਿਚ੍ਛਯਂ ਕਥੇਤੁਂ ‘‘ਅਧਿਟ੍ਠਾਨਵਿਕਪ੍ਪਨੇਸੁ ਪਨਾ’’ਤਿਆਦਿਮਾਹ. ਤਤ੍ਥ ਅਧਿਟ੍ਠਿਯਤੇ ਅਧਿਟ੍ਠਾਨਂ, ਗਹਣਂ ਸਲ੍ਲਕ੍ਖਣਨ੍ਤਿ ਅਤ੍ਥੋ. ਵਿਕਪ੍ਪਿਯਤੇ ਵਿਕਪ੍ਪਨਾ, ਸਙ੍ਕਪ੍ਪਨਂ ਚਿਨ੍ਤਨਨ੍ਤਿ ਅਤ੍ਥੋ. ਤਤ੍ਥ ‘‘ਤਿਚੀਵਰਂ ਅਧਿਟ੍ਠਾਤੁਨ੍ਤਿ ਨਾਮਂ ਵਤ੍ਵਾ ਅਧਿਟ੍ਠਾਤੁਂ. ਨ ਵਿਕਪ੍ਪੇਤੁਨ੍ਤਿ ਨਾਮਂ ਵਤ੍ਵਾ ਨ ਵਿਕਪ੍ਪੇਤੁਂ. ਏਸ ਨਯੋ ਸਬ੍ਬਤ੍ਥ. ਤਸ੍ਮਾ ਤਿਚੀਵਰਂ ਅਧਿਟ੍ਠਹਨ੍ਤੇਨ ‘ਇਮਂ ਸਙ੍ਘਾਟਿਂ ਅਧਿਟ੍ਠਾਮੀ’ਤਿਆਦਿਨਾ ਨਾਮਂ ਵਤ੍ਵਾ ਅਧਿਟ੍ਠਾਤਬ੍ਬਂ. ਵਿਕਪ੍ਪੇਨ੍ਤੇਨ ਪਨ ‘ਇਮਂ ਸਙ੍ਘਾਟਿ’ਨ੍ਤਿਆਦਿਨਾ ਤਸ੍ਸ ਤਸ੍ਸ ਚੀਵਰਸ੍ਸ ਨਾਮਂ ਅਗ੍ਗਹੇਤ੍ਵਾਵ ‘ਇਮਂ ਚੀਵਰਂ ਤੁਯ੍ਹਂ ਵਿਕਪ੍ਪੇਮੀ’ਤਿ ਵਿਕਪ੍ਪੇਤਬ੍ਬਂ. ਤਿਚੀਵਰਂ ਵਾ ਹੋਤੁ ਅਞ੍ਞਂ ਵਾ, ਯਦਿ ਤਂ ਤਂ ਨਾਮਂ ਗਹੇਤ੍ਵਾ ਵਿਕਪ੍ਪੇਤਿ, ਅਵਿਕਪ੍ਪਿਤਂ ਹੋਤਿ, ਅਤਿਰੇਕਚੀਵਰਟ੍ਠਾਨੇ ਤਿਟ੍ਠਤੀ’’ਤਿ ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ੨.੪੬੯) ਵੁਤ੍ਤਂ.

ਵਿਮਤਿਵਿਨੋਦਨਿਯਂ (ਵਿ. ਵਿ. ਟੀ. ੧.੪੬੯) ਪਨ ‘‘ਤਿਚੀਵਰਂ ਅਧਿਟ੍ਠਾਤੁਨ੍ਤਿ ਸਙ੍ਘਾਟਿਆਦਿਨਾਮੇਨ ਅਧਿਟ੍ਠਾਤੁਂ. ਨ ਵਿਕਪ੍ਪੇਤੁਨ੍ਤਿ ਇਮਿਨਾ ਨਾਮੇਨ ਨ ਵਿਕਪ੍ਪੇਤੁਂ, ਏਤੇਨ ਵਿਕਪ੍ਪਿਤਤਿਚੀਵਰੋ ਤੇਚੀਵਰਿਕੋ ਨ ਹੋਤਿ, ਤਸ੍ਸ ਤਸ੍ਮਿਂ ਅਧਿਟ੍ਠਿਤਤਿਚੀਵਰੇ ਵਿਯ ਅਵਿਪ੍ਪਵਾਸਾਦਿਨਾ ਕਾਤਬ੍ਬਵਿਧਿ ਨ ਕਾਤਬ੍ਬੋਤਿ ਦਸ੍ਸੇਤਿ, ਨ ਪਨ ਵਿਕਪ੍ਪਨੇ ਦੋਸੋ’’ਤਿ ਵੁਤ੍ਤਂ. ਵਜਿਰਬੁਦ੍ਧਿਟੀਕਾਯਂ (ਵਜਿਰ. ਟੀ. ਪਾਰਾਜਿਕ ੪੬੯) ਪਨ ‘‘ਤਿਚੀਵਰਂ ਅਧਿਟ੍ਠਾਤੁਨ੍ਤਿ ਏਤ੍ਥ ਤਿਚੀਵਰਂ ਤਿਚੀਵਰਾਧਿਟ੍ਠਾਨੇਨ ਅਧਿਟ੍ਠਾਤਬ੍ਬਯੁਤ੍ਤਕਂ, ਯਂ ਵਾ ਤਿਚੀਵਰਾਧਿਟ੍ਠਾਨੇਨ ਅਧਿਟ੍ਠਾਤੁਂ ਨ ਵਿਕਪ੍ਪੇਤੁਂ ਅਨੁਜਾਨਾਮਿ, ਤਸ੍ਸ ਅਧਿਟ੍ਠਾਨਕਾਲਪਰਿਚ੍ਛੇਦਾਭਾਵਤੋ ਸਬ੍ਬਕਾਲਂ ਇਚ੍ਛਨ੍ਤਸ੍ਸ ਅਧਿਟ੍ਠਾਤੁਂਯੇਵ ਅਨੁਜਾਨਾਮਿ, ਤਂ ਕਾਲਪਰਿਚ੍ਛੇਦਂ ਕਤ੍ਵਾ ਵਿਕਪ੍ਪੇਤੁਂ ਨਾਨੁਜਾਨਾਮਿ, ਸਤਿ ਪਨ ਪਚ੍ਚਯੇ ਯਦਾ ਤਦਾ ਵਾ ਪਚ੍ਚੁਦ੍ਧਰਿਤ੍ਵਾ ਵਿਕਪ੍ਪੇਤੁਂ ਵਟ੍ਟਤੀਤਿ ‘ਅਨਾਪਤ੍ਤਿ ਅਨ੍ਤੋਦਸਾਹਂ ਅਧਿਟ੍ਠੇਤਿ ਵਿਕਪ੍ਪੇਤੀ’ਤਿ ਵਚਨਤੋ ਸਿਦ੍ਧਂ ਹੋਤੀ’’ਤਿ ਵੁਤ੍ਤਂ.

ਇਮੇਸੁ ਪਨ ਤੀਸੁ ਟੀਕਾਵਾਦੇਸੁ ਤਤਿਯਵਾਦੋ ਯੁਤ੍ਤਤਰੋ ਵਿਯ ਦਿਸ੍ਸਤਿ. ਕਸ੍ਮਾ? ਪਾਲ਼ਿਯਾ ਅਟ੍ਠਕਥਾਯ ਚ ਸਂਸਨ੍ਦਨਤੋ. ਕਥਂ? ਪਾਲ਼ਿਯਞ੍ਹਿ ਕਤਪਰਿਚ੍ਛੇਦਾਸੁਯੇਵ ਦ੍ਵੀਸੁ ਵਸ੍ਸਿਕਸਾਟਿਕਕਣ੍ਡੁਪਟਿਚ੍ਛਾਦੀਸੁ ਤਤੋ ਪਰਂ ਵਿਕਪ੍ਪੇਤੁਨ੍ਤਿ ਵੁਤ੍ਤਂ, ਤਤੋ ਅਞ੍ਞੇਸੁ ਨ ਵਿਕਪ੍ਪੇਤੁਂ ਇਚ੍ਚੇਵ, ਤਸ੍ਮਾ ਤੇਸੁ ਅਸਤਿ ਪਚ੍ਚਯੇ ਨਿਚ੍ਚਂ ਅਧਿਟ੍ਠਾਤਬ੍ਬਮੇਵ ਹੋਤਿ, ਨ ਵਿਕਪ੍ਪੇਤਬ੍ਬਨ੍ਤਿ ਅਯਂ ਪਾਲ਼ਿਯਾ ਅਧਿਪ੍ਪਾਯੋ ਦਿਸ੍ਸਤਿ, ਇਤਰਾਸੁ ਪਨ ਦ੍ਵੀਸੁ ਅਨੁਞ੍ਞਾਤਕਾਲੇਯੇਵ ਅਧਿਟ੍ਠਾਤਬ੍ਬਂ, ‘‘ਤਤੋ ਪਰਂ ਵਿਕਪ੍ਪੇਤੁ’’ਨ੍ਤਿ ਏਵਂ ਪਾਲ਼ਿਯਾ ਸਂਸਨ੍ਦਤਿ, ਅਟ੍ਠਕਥਾਯਂ ਤਿਚੀਵਰਂ ਤਿਚੀਵਰਸਙ੍ਖੇਪੇਨ ਪਰਿਹਰਤੋ ਅਧਿਟ੍ਠਾਤੁਮੇਵ ਅਨੁਜਾਨਾਮਿ, ਨ ਵਿਕਪ੍ਪੇਤੁਂ. ਵਸ੍ਸਿਕਸਾਟਿਕਂ ਪਨ ਚਾਤੁਮਾਸਤੋ ਪਰਂ ਵਿਕਪ੍ਪੇਤੁਮੇਵ, ਨ ਅਧਿਟ੍ਠਾਤੁਂ, ਏਵਞ੍ਚ ਸਤਿ ਯੋ ਤਿਚੀਵਰੇ ਏਕੇਨ ਚੀਵਰੇਨ ਵਿਪ੍ਪਵਸਿਤੁਕਾਮੋ ਹੋਤਿ, ਤਸ੍ਸ ਚੀਵਰਾਧਿਟ੍ਠਾਨਂ ਪਚ੍ਚੁਦ੍ਧਰਿਤ੍ਵਾ ਵਿਪ੍ਪਵਾਸਸੁਖਤ੍ਥਂ ਵਿਕਪ੍ਪਨਾਯ ਓਕਾਸੋ ਦਿਨ੍ਨੋ ਹੋਤੀਤਿ.

ਪਠਮਵਾਦੇ ‘‘ਨ ਵਿਕਪ੍ਪੇਤੁ’’ਨ੍ਤਿ ਨਾਮਂ ਵਤ੍ਵਾ ‘‘ਨ ਵਿਕਪ੍ਪੇਤੁ’’ਨ੍ਤਿ ਅਤ੍ਥੋ ਵੁਤ੍ਤੋ, ਏਵਂ ਸਨ੍ਤੇ ‘‘ਤਤੋ ਪਰਂ ਵਿਕਪ੍ਪੇਤੁ’’ਨ੍ਤਿ ਏਤ੍ਥ ਤਤੋ ਪਰਂ ਨਾਮਂ ਵਤ੍ਵਾ ਵਿਕਪ੍ਪੇਤੁਨ੍ਤਿ ਅਤ੍ਥੋ ਭਵੇਯ੍ਯ, ਸੋ ਚ ਅਤ੍ਥੋ ਵਿਕਪ੍ਪਨਾਧਿਕਾਰੇਨ ਵੁਤ੍ਤੋ, ‘‘ਨਾਮਂ ਵਤ੍ਵਾ’’ਤਿ ਚ ਵਿਸੇਸਨੇ ਕਤ੍ਤਬ੍ਬੇ ਸਤਿ ‘‘ਨ ਵਿਕਪ੍ਪੇਤੁ’’ਨ੍ਤਿ ਚ ‘‘ਤਤੋ ਪਰਂ ਵਿਕਪ੍ਪੇਤੁ’’ਨ੍ਤਿ ਚ ਭੇਦਵਚਨਂ ਨ ਸਿਯਾ, ਸਬ੍ਬੇਸੁਪਿ ਚੀਵਰੇਸੁ ਨਾਮਂ ਅਵਤ੍ਵਾਵ ਵਿਕਪ੍ਪੇਤਬ੍ਬਤੋ, ਦੁਤਿਯਵਾਦੇ ਚ ‘‘ਨ ਵਿਕਪ੍ਪੇਤੁ’’ਨ੍ਤਿ ਇਮਿਨਾ ਨਾਮੇਨ ਨ ਵਿਕਪ੍ਪੇਤੁਨ੍ਤਿ ਵੁਤ੍ਤਂ, ਨ ਅਨੁਜਾਨਾਮੀਤਿ ਪਾਠਸੇਸੋ. ਪਠਮੇ ਚ ‘‘ਤਿਚੀਵਰਂ ਵਾ ਹੋਤੁ ਅਞ੍ਞਂ ਵਾ, ਯਦਿ ਤਂ ਤਂ ਨਾਮਂ ਗਹੇਤ੍ਵਾ ਵਿਕਪ੍ਪੇਤਿ, ਅਵਿਕਪ੍ਪਿਤਂ ਹੋਤਿ, ਅਤਿਰੇਕਚੀਵਰਟ੍ਠਾਨੇ ਤਿਟ੍ਠਤੀ’’ਤਿ. ਦੁਤਿਯੇ ਚ ‘‘ਨ ਪਨ ਵਿਕਪ੍ਪਨੇ ਦੋਸੋ’’ਤਿ, ਤਞ੍ਚ ਅਞ੍ਞਮਞ੍ਞਵਿਰੁਦ੍ਧਂ ਵਿਯ ਦਿਸ੍ਸਤਿ, ਤਸ੍ਮਾ ਵਿਚਾਰੇਤਬ੍ਬਮੇਤਂ.

ਤਤੋ ਪਰਂ ਵਿਕਪ੍ਪੇਤੁਨ੍ਤਿ ਚਾਤੁਮਾਸਤੋ ਪਰਂ ਵਿਕਪ੍ਪੇਤ੍ਵਾ ਪਰਿਭੁਞ੍ਜਿਤੁਨ੍ਤਿ ਤੀਸੁ ਗਣ੍ਠਿਪਦੇਸੁ ਵੁਤ੍ਤਂ. ਕੇਚਿ ਪਨ ‘‘ਤਤੋ ਪਰਂ ਵਿਕਪ੍ਪੇਤ੍ਵਾ ਯਾਵ ਆਗਾਮਿਸਂਵਚ੍ਛਰੇ ਵਸ੍ਸਾਨਂ ਚਾਤੁਮਾਸਂ, ਤਾਵ ਠਪੇਤੁਂ ਅਨੁਞ੍ਞਾਤ’’ਨ੍ਤਿਪਿ ਵਦਨ੍ਤਿ. ‘‘ਤਤੋ ਪਰਂ ਵਿਕਪ੍ਪੇਤੁਂ ਅਨੁਜਾਨਾਮੀਤਿ ਏਤ੍ਤਾਵਤਾ ਵਸ੍ਸਿਕਸਾਟਿਕਂ ਕਣ੍ਡੁਪਟਿਚ੍ਛਾਦਿਞ੍ਚ ਤਂ ਤਂ ਨਾਮਂ ਗਹੇਤ੍ਵਾ ਵਿਕਪ੍ਪੇਤੁਂ ਅਨੁਞ੍ਞਾਤਨ੍ਤਿ ਏਵਮਤ੍ਥੋ ਨ ਗਹੇਤਬ੍ਬੋ. ਤਤੋ ਪਰਂ ਵਸ੍ਸਿਕਸਾਟਿਕਾਦਿਨਾਮਸ੍ਸੇਵ ਅਭਾਵਤੋ, ਕਸ੍ਮਾ ਤਤੋ ਪਰਂ ਵਿਕਪ੍ਪੇਨ੍ਤੇਨਪਿ ਨਾਮਂ ਗਹੇਤ੍ਵਾ ਨ ਵਿਕਪ੍ਪੇਤਬ੍ਬਂ. ਉਭਿਨ੍ਨਮ੍ਪਿ ਤਤੋ ਪਰਂ ਵਿਕਪ੍ਪੇਤ੍ਵਾ ਪਰਿਭੋਗਸ੍ਸ ਅਨੁਞ੍ਞਾਤਤ੍ਤਾ ਤਥਾਵਿਕਪ੍ਪਿਤਂ ਅਞ੍ਞਨਾਮੇਨ ਅਧਿਟ੍ਠਹਿਤ੍ਵਾ ਪਰਿਭੁਞ੍ਜਿਤਬ੍ਬਨ੍ਤਿ ਤੀਸੁਪਿ ਗਣ੍ਠਿਪਦੇਸੁ ਵੁਤ੍ਤ’’ਨ੍ਤਿ ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ੨.੪੬੯) ਵੁਤ੍ਤਂ. ਵਿਮਤਿਵਿਨੋਦਨਿਯਮ੍ਪਿ (ਵਿ. ਵਿ. ਟੀ. ੧.੪੬੯) ‘‘ਤਤੋ ਪਰਨ੍ਤਿ ਚਾਤੁਮਾਸਤੋ ਪਰਂ ਵਿਕਪ੍ਪੇਤ੍ਵਾ ਪਰਿਭੁਞ੍ਜਿਤੁਂ ਅਨੁਞ੍ਞਾਤਨ੍ਤਿ ਕੇਚਿ ਵਦਨ੍ਤਿ. ਅਞ੍ਞੇ ਪਨ ‘ਵਿਕਪ੍ਪੇਤ੍ਵਾ ਯਾਵ ਆਗਾਮਿਵਸ੍ਸਾਨਂ ਤਾਵ ਠਪੇਤੁਂ ਵਟ੍ਟਤੀ’ਤਿ ਵਦਨ੍ਤਿ. ਅਪਰੇ ਪਨ ‘ਵਿਕਪ੍ਪਨੇ ਨ ਦੋਸੋ, ਤਥਾ ਵਿਕਪ੍ਪਿਤਂ ਪਰਿਕ੍ਖਾਰਾਦਿਨਾਮੇਨ ਅਧਿਟ੍ਠਹਿਤ੍ਵਾ ਪਰਿਭੁਞ੍ਜਿਤਬ੍ਬ’ਨ੍ਤਿ ਵਦਨ੍ਤੀ’’ਤਿ ਵੁਤ੍ਤਂ.

ਵਜਿਰਬੁਦ੍ਧਿਟੀਕਾਯਂ (ਵਜਿਰ. ਟੀ. ਪਾਰਾਜਿਕ ੪੬੯) ਪਨ ‘‘ਵਸ੍ਸਿਕਸਾਟਿਕਂ ਤਤੋ ਪਰਂ ਵਿਕਪ੍ਪੇਤੁਂਯੇਵ, ਨਾਧਿਟ੍ਠਾਤੁਂ. ਵਤ੍ਥਞ੍ਹਿ ਕਤਪਰਿਯੋਸਿਤਂ ਅਨ੍ਤੋਚਾਤੁਮਾਸੇ ਵਸ੍ਸਾਨਦਿਵਸਂ ਆਦਿਂ ਕਤ੍ਵਾ ਅਨ੍ਤੋਦਸਾਹੇ ਅਧਿਟ੍ਠਾਤੁਂ ਅਨੁਜਾਨਾਮਿ, ਚਾਤੁਮਾਸਤੋ ਉਦ੍ਧਂ ਅਤ੍ਤਨੋ ਸਨ੍ਤਕਂ ਕਤ੍ਵਾ ਠਪੇਤੁਕਾਮੇਨ ਵਿਕਪ੍ਪੇਤੁਂ ਅਨੁਜਾਨਾਮੀਤਿ ਅਤ੍ਥੋ’’ਤਿ ਵੁਤ੍ਤਂ. ਇਧਾਪਿ ਪਚ੍ਛਿਮਵਾਦੋ ਪਸਤ੍ਥਤਰੋਤਿ ਦਿਸ੍ਸਤਿ, ਕਸ੍ਮਾ? ਸੁਵਿਞ੍ਞੇਯ੍ਯਤ੍ਤਾ, ਪੁਰਿਮੇਸੁ ਪਨ ਆਚਰਿਯਾਨਂ ਅਧਿਪ੍ਪਾਯੋਯੇਵ ਦੁਵਿਞ੍ਞੇਯ੍ਯੋ ਹੋਤਿ ਨਾਨਾਵਾਦਸ੍ਸੇਵ ਕਥਿਤਤ੍ਤਾ. ਮੁਟ੍ਠਿਪਞ੍ਚਕਨ੍ਤਿ ਮੁਟ੍ਠਿਯਾ ਉਪਲਕ੍ਖਿਤਂ ਪਞ੍ਚਕਂ ਮੁਟ੍ਠਿਪਞ੍ਚਕਂ, ਚਤੁਹਤ੍ਥੇ ਮਿਨਿਤ੍ਵਾ ਪਞ੍ਚਮਂ ਹਤ੍ਥਮੁਟ੍ਠਿਂ ਕਤ੍ਵਾ ਮਿਨਿਤਬ੍ਬਨ੍ਤਿ ਅਧਿਪ੍ਪਾਯੋ. ਕੇਚਿ ਪਨ ‘‘ਮੁਟ੍ਠਿਹਤ੍ਥਾਨਂ ਪਞ੍ਚਕਂ ਮੁਟ੍ਠਿਪਞ੍ਚਕਂ. ਪਞ੍ਚਪਿ ਹਤ੍ਥਾ ਮੁਟ੍ਠੀ ਕਤ੍ਵਾਵ ਮਿਨਿਤਬ੍ਬਾ’’ਤਿ ਵਦਨ੍ਤਿ. ਮੁਟ੍ਠਿਤ੍ਤਿਕਨ੍ਤਿ ਏਤ੍ਥਾਪਿ ਏਸੇਵ ਨਯੋ. ਦ੍ਵਿਹਤ੍ਥੇਨ ਅਨ੍ਤਰਵਾਸਕੇਨ ਤਿਮਣ੍ਡਲਂ ਪਟਿਚ੍ਛਾਦੇਤੁਂ ਸਕ੍ਕਾਤਿ ਆਹ ‘‘ਪਾਰੁਪਨੇਨਪੀ’’ਤਿਆਦਿ. ਅਤਿਰੇਕਨ੍ਤਿ ਸੁਗਤਚੀਵਰਤੋ ਅਤਿਰੇਕਂ. ਊਨਕਨ੍ਤਿ ਮੁਟ੍ਠਿਪਞ੍ਚਕਾਦਿਤੋ ਊਨਕਂ. ਤੇਨ ਚ ਤੇਸੁ ਤਿਚੀਵਰਾਧਿਟ੍ਠਾਨਂ ਨ ਰੁਹਤੀਤਿ ਦਸ੍ਸੇਤਿ.

ਇਮਂ ਸਙ੍ਘਾਟਿਂ ਪਚ੍ਚੁਦ੍ਧਰਾਮੀਤਿ ਇਮਂ ਸਙ੍ਘਾਟਿਅਧਿਟ੍ਠਾਨਂ ਉਕ੍ਖਿਪਾਮਿ, ਪਰਿਚ੍ਚਜਾਮੀਤਿ ਅਤ੍ਥੋ. ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ੨.੪੬੯) ਪਨ ‘‘ਪਚ੍ਚੁਦ੍ਧਰਾਮੀਤਿ ਠਪੇਮਿ, ਪਰਿਚ੍ਚਜਾਮੀਤਿ ਵਾ ਅਤ੍ਥੋ’’ਇਚ੍ਚੇਵ ਵੁਤ੍ਤਂ. ਕਾਯਵਿਕਾਰਂ ਕਰੋਨ੍ਤੇਨਾਤਿ ਹਤ੍ਥੇਨ ਚੀਵਰਂ ਪਰਾਮਸਨ੍ਤੇਨ, ਚਾਲੇਨ੍ਤੇਨ ਵਾ. ਵਾਚਾਯ ਅਧਿਟ੍ਠਾਤਬ੍ਬਾਤਿ ਏਤ੍ਥ ਕਾਯੇਨਪਿ ਚਾਲੇਤ੍ਵਾ ਵਾਚਮ੍ਪਿ ਭਿਨ੍ਦਿਤ੍ਵਾ ਕਾਯਵਾਚਾਹਿ ਅਧਿਟ੍ਠਾਨਮ੍ਪਿ ਸਙ੍ਗਹਿਤਨ੍ਤਿ ਵੇਦਿਤਬ੍ਬਂ, ‘‘ਕਾਯੇਨ ਅਫੁਸਿਤ੍ਵਾ’’ਤਿ ਵਤ੍ਤਬ੍ਬਤ੍ਤਾ ਅਹਤ੍ਥਪਾਸਹਤ੍ਥਪਾਸਵਸੇਨ ਦੁਵਿਧਂ ਅਧਿਟ੍ਠਾਨਂ. ਤਤ੍ਥ ‘‘ਹਤ੍ਥਪਾਸੋ ਨਾਮ ਅਡ੍ਢਤੇਯ੍ਯਹਤ੍ਥੋ ਵੁਚ੍ਚਤਿ. ‘ਦ੍ਵਾਦਸਹਤ੍ਥ’ਨ੍ਤਿ ਕੇਚਿ ਵਦਨ੍ਤਿ, ਤਂ ਇਧ ਨ ਸਮੇਤੀ’’ਤਿ ਵਿਮਤਿਵਿਨੋਦਨਿਯਂ (ਵਿ. ਵਿ. ਟੀ. ੧.੪੬੯) ਵੁਤ੍ਤਂ. ‘‘ਇਦਾਨਿ ਸਮ੍ਮੁਖਾਪਰਮ੍ਮੁਖਾਭੇਦੇਨ ਦੁਵਿਧਂ ਅਧਿਟ੍ਠਾਨਂ ਦਸ੍ਸੇਤੁਂ ‘‘ਸਚੇ ਹਤ੍ਥਪਾਸੇਤਿਆਦਿ ਵੁਤ੍ਤਂ. ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ੨.੪੬੯) ਪਨ ‘‘ਹਤ੍ਥਪਾਸੇਤਿ ਚ ਇਦਂ ਦ੍ਵਾਦਸਹਤ੍ਥਂ ਸਨ੍ਧਾਯ ਵੁਤ੍ਤਂ, ਤਸ੍ਮਾ ਦ੍ਵਾਦਸਹਤ੍ਥਬ੍ਭਨ੍ਤਰੇ ਠਿਤਂ ‘ਇਮ’ਨ੍ਤਿ ਵਤ੍ਵਾ ਅਧਿਟ੍ਠਾਤਬ੍ਬਂ, ਤਤੋ ਪਰਂ ‘ਏਤ’ਨ੍ਤਿ ਵਤ੍ਵਾ ਅਧਿਟ੍ਠਾਤਬ੍ਬਨ੍ਤਿ ਕੇਚਿ ਵਦਨ੍ਤਿ, ਗਣ੍ਠਿਪਦੇਸੁ ਪਨੇਤ੍ਥ ਨ ਕਿਞ੍ਚਿ ਵੁਤ੍ਤਂ, ਪਾਲ਼ਿਯਂ ਅਟ੍ਠਕਥਾਯਞ੍ਚ ਸਬ੍ਬਤ੍ਥ ‘ਹਤ੍ਥਪਾਸੋ’ਤਿ ਅਡ੍ਢਤੇਯ੍ਯਹਤ੍ਥੋ ਵੁਚ੍ਚਤਿ, ਤਸ੍ਮਾ ਇਧ ਵਿਸੇਸਵਿਕਪ੍ਪਨਾਯ ਕਾਰਣਂ ਗਵੇਸਿਤਬ੍ਬ’’ਨ੍ਤਿ ਵੁਤ੍ਤਂ. ਏਵਂ ਪਾਲ਼ਿਯਟ੍ਠਕਥਾਸੁਪਿ ਅਡ੍ਢਤੇਯ੍ਯਹਤ੍ਥਮੇਵ ਹਤ੍ਥਪਾਸੋ ਵੁਤ੍ਤੋ, ਟੀਕਾਚਰਿਯੇਹਿ ਚ ਤਦੇਵ ਸਮ੍ਪਟਿਚ੍ਛਿਤੋ, ਤਸ੍ਮਾ ਅਡ੍ਢਤੇਯ੍ਯਹਤ੍ਥਬ੍ਭਨ੍ਤਰੇ ਠਿਤਂ ਚੀਵਰਂ ‘‘ਇਮ’’ਨ੍ਤਿ, ਤਤੋ ਬਹਿਭੂਤਂ ‘‘ਏਤ’’ਨ੍ਤਿ ਵਤ੍ਵਾ ਅਧਿਟ੍ਠਾਤਬ੍ਬਂ.

‘‘ਸਾਮਨ੍ਤਵਿਹਾਰੇਤਿ ਇਦਂ ਠਪਿਤਟ੍ਠਾਨਸਲ੍ਲਕ੍ਖਣਯੋਗ੍ਗੇ ਠਿਤਂ ਸਨ੍ਧਾਯ ਵੁਤ੍ਤਂ, ਤਤੋ ਦੂਰੇ ਠਿਤਮ੍ਪਿ ਠਪਿਤਟ੍ਠਾਨਂ ਸਲ੍ਲਕ੍ਖੇਨ੍ਤੇਨ ਅਧਿਟ੍ਠਾਤਬ੍ਬਮੇਵ. ਤਤ੍ਥਾਪਿ ਚੀਵਰਸ੍ਸ ਠਪਿਤਭਾਵਸਲ੍ਲਕ੍ਖਣਮੇਵ ਪਮਾਣਂ. ਨ ਹਿ ਸਕ੍ਕਾ ਨਿਚ੍ਚਸ੍ਸ ਠਾਨਂ ਸਲ੍ਲਕ੍ਖੇਤੁਂ, ਏਕਸ੍ਮਿਂ ਵਿਹਾਰੇ ਠਪੇਤ੍ਵਾ ਤਤੋ ਅਞ੍ਞਸ੍ਮਿਂ ਠਪਿਤਨ੍ਤਿ ਅਧਿਟ੍ਠਾਤੁਂ ਨ ਵਟ੍ਟਤਿ. ਕੇਚਿ ਪਨ ‘ਤਥਾਪਿ ਅਧਿਟ੍ਠਿਤੇ ਨ ਦੋਸੋ’ਤਿ ਵਦਨ੍ਤਿ, ਤਂ ਅਟ੍ਠਕਥਾਯ ਨ ਸਮੇਤਿ, ਵੀਮਂਸਿਤਬ੍ਬ’’ਨ੍ਤਿ ਵਿਮਤਿਵਿਨੋਦਨਿਯਂ (ਵਿ. ਵਿ. ਟੀ. ੧.੪੬੯) ਵੁਤ੍ਤਂ. ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ੨.੪੬੯) ਪਨ ‘‘ਸਾਮਨ੍ਤਵਿਹਾਰੋ ਨਾਮ ਯਤ੍ਥ ਤਦਹੇਵ ਗਨ੍ਤ੍ਵਾ ਨਿਵਤ੍ਤੇਤੁਂ ਸਕ੍ਕਾ. ਸਾਮਨ੍ਤਵਿਹਾਰੇਤਿ ਇਦਂ ਦੇਸਨਾਸੀਸਮਤ੍ਤਂ, ਤਸ੍ਮਾ ਠਪਿਤਟ੍ਠਾਨਂ ਸਲ੍ਲਕ੍ਖੇਤ੍ਵਾ ਦੂਰੇ ਠਿਤਮ੍ਪਿ ਅਧਿਟ੍ਠਾਤਬ੍ਬਨ੍ਤਿ ਵਦਨ੍ਤਿ. ਠਪਿਤਟ੍ਠਾਨਂ ਸਲ੍ਲਕ੍ਖੇਤ੍ਵਾਤਿ ਚ ਇਦਂ ਠਪਿਤਟ੍ਠਾਨਸਲ੍ਲਕ੍ਖਣਂ ਅਨੁਚ੍ਛਵਿਕਨ੍ਤਿ ਕਤ੍ਵਾ ਵੁਤ੍ਤਂ, ਚੀਵਰਸਲ੍ਲਕ੍ਖਣਮੇਵੇਤ੍ਥ ਪਮਾਣ’’ਨ੍ਤਿ ਵੁਤ੍ਤਂ. ਵਜਿਰਬੁਦ੍ਧਿਟੀਕਾਯਞ੍ਚ (ਵਜਿਰ. ਟੀ. ਪਾਰਾਜਿਕ ੪੬੯) ‘‘ਸਙ੍ਘਾਟਿ ਉਤ੍ਤਰਾਸਙ੍ਗੋ ਅਨ੍ਤਰਵਾਸਕਨ੍ਤਿ ਅਧਿਟ੍ਠਿਤਾਨਧਿਟ੍ਠਿਤਾਨਂ ਸਮਾਨਮੇਵ ਨਾਮਂ. ‘ਅਯਂ ਸਙ੍ਘਾਟੀ’ਤਿਆਦੀਸੁ ਅਨਧਿਟ੍ਠਿਤਾ ਵੁਤ੍ਤਾ. ‘ਤਿਚੀਵਰੇਨ ਵਿਪ੍ਪਵਸੇਯ੍ਯਾ’ਤਿ ਏਤ੍ਥ ਅਧਿਟ੍ਠਿਤਾ ਵੁਤ੍ਤਾ. ਸਾਮਨ੍ਤਵਿਹਾਰੇਤਿ ਗੋਚਰਗਾਮਤੋ ਵਿਹਾਰੇਤਿ ਧਮ੍ਮਸਿਰਿਤ੍ਥੇਰੋ. ਦੂਰਤਰੇਪਿ ਲਬ੍ਭਤੇਵਾਤਿ ਆਚਰਿਯਾ. ਅਨੁਗਣ੍ਠਿਪਦੇਪਿ ‘ਸਾਮਨ੍ਤਵਿਹਾਰੇਤਿ ਦੇਸਨਾਸੀਸਮਤ੍ਤਂ, ਤਸ੍ਮਾ ਠਪਿਤਟ੍ਠਾਨਂ ਸਲ੍ਲਕ੍ਖੇਤ੍ਵਾ ਦੂਰੇ ਠਿਤਮ੍ਪਿ ਅਧਿਟ੍ਠਾਤਬ੍ਬ’ਨ੍ਤਿ ਵੁਤ੍ਤਂ. ਸਾਮਨ੍ਤਵਿਹਾਰੋ ਨਾਮ ਯਤ੍ਥ ਤਦਹੇਵ ਗਨ੍ਤ੍ਵਾ ਨਿਵਤ੍ਤਿਤੁਂ ਸਕ੍ਕਾ. ਰਤ੍ਤਿਵਿਪ੍ਪਵਾਸਂ ਰਕ੍ਖਨ੍ਤੇਨ ਤਤੋ ਦੂਰੇ ਠਿਤਂ ਅਧਿਟ੍ਠਾਤੁਂ ਨ ਵਟ੍ਟਤਿ, ਏਵਂ ਕਿਰ ਮਹਾਅਟ੍ਠਕਥਾਯਂ ਵੁਤ੍ਤਨ੍ਤਿ. ਕੇਚਿ ‘ਚੀਵਰਵਂਸੇ ਠਪਿਤਂ ਅਞ੍ਞੋ ਪਰਿਵਤ੍ਤੇਤ੍ਵਾ ਨਾਗਦਨ੍ਤੇ ਠਪੇਤਿ, ਤਂ ਅਜਾਨਿਤ੍ਵਾ ਅਧਿਟ੍ਠਹਨ੍ਤਸ੍ਸਪਿ ਰੁਹਤਿ ਚੀਵਰਸ੍ਸ ਸਲ੍ਲਕ੍ਖਿਤਤ੍ਤਾ’ਤਿ ਵਦਨ੍ਤੀ’’ਤਿ, ਤਸ੍ਮਾ ਆਚਰਿਯਾਨਂ ਮਤਭੇਦਂ ਸਂਸਨ੍ਦਿਤ੍ਵਾ ਗਹੇਤਬ੍ਬਂ.

ਅਧਿਟ੍ਠਹਿਤ੍ਵਾ ਠਪਿਤਵਤ੍ਥੇਹੀਤਿ ਪਰਿਕ੍ਖਾਰਚੋਲ਼ਨਾਮੇਨ ਅਧਿਟ੍ਠਹਿਤ੍ਵਾ ਠਪਿਤਵਤ੍ਥੇਹਿ. ਤੇਨੇਵ ‘‘ਇਮਂ ਪਚ੍ਚੁਦ੍ਧਰਾਮੀ’’ਤਿ ਪਰਿਕ੍ਖਾਰਚੋਲ਼ਸ੍ਸ ਪਚ੍ਚੁਦ੍ਧਾਰਂ ਦਸ੍ਸੇਤਿ, ਏਤੇਨ ਚ ਤੇਚੀਵਰਿਕਧੁਤਙ੍ਗਂ ਪਰਿਹਰਨ੍ਤੇਨ ਪਂਸੁਕੂਲਾਦਿਵਸੇਨ ਲਦ੍ਧਂ ਵਤ੍ਥਂ ਦਸਾਹਬ੍ਭਨ੍ਤਰੇ ਕਤ੍ਵਾ ਰਜਿਤ੍ਵਾ ਪਾਰੁਪਿਤੁਮਸਕ੍ਕੋਨ੍ਤੇਨ ਪਰਿਕ੍ਖਾਰਚੋਲ਼ਵਸੇਨ ਅਧਿਟ੍ਠਹਿਤ੍ਵਾਵ ਦਸਾਹਮਤਿਕ੍ਕਮਾਪੇਤਬ੍ਬਂ, ਇਤਰਥਾ ਨਿਸ੍ਸਗ੍ਗਿਯਂ ਹੋਤੀਤਿ ਦਸ੍ਸੇਤਿ, ਤੇਨੇਵ ‘‘ਰਜਿਤਕਾਲਤੋ ਪਨ ਪਟ੍ਠਾਯ ਨਿਕ੍ਖਿਪਿਤੁਂ ਨ ਵਟ੍ਟਤਿ, ਧੁਤਙ੍ਗਚੋਰੋ ਨਾਮ ਹੋਤੀ’’ਤਿ ਵਿਸੁਦ੍ਧਿਮਗ੍ਗੇ (ਵਿਸੁਦ੍ਧਿ. ੧.੨੫) ਵੁਤ੍ਤਂ. ਪੁਨ ਅਧਿਟ੍ਠਾਤਬ੍ਬਾਨੀਤਿ ਇਦਞ੍ਚ ਸਙ੍ਘਾਟਿਆਦਿਤਿਚੀਵਰਨਾਮੇਨ ਅਧਿਟ੍ਠਹਿਤ੍ਵਾ ਪਰਿਭੁਞ੍ਜਿਤੁਕਾਮਸ੍ਸ ਵਸੇਨ ਵੁਤ੍ਤਂ, ਇਤਰਸ੍ਸ ਪਨ ਪੁਰਿਮਾਧਿਟ੍ਠਾਨਮੇਵ ਅਲਨ੍ਤਿ ਵੇਦਿਤਬ੍ਬਂ. ਪੁਨ ਅਧਿਟ੍ਠਾਤਬ੍ਬਨ੍ਤਿ ਇਮਿਨਾ ਕਪ੍ਪਬਿਨ੍ਦੁਪਿ ਦਾਤਬ੍ਬਨ੍ਤਿ ਦਸ੍ਸੇਤਿ. ਅਧਿਟ੍ਠਾਨਕਿਚ੍ਚਂ ਨਤ੍ਥੀਤਿ ਇਮਿਨਾ ਕਪ੍ਪਬਿਨ੍ਦੁਦਾਨਕਿਚ੍ਚਮ੍ਪਿ ਨਤ੍ਥੀਤਿ ਦਸ੍ਸੇਤਿ, ਮਹਨ੍ਤਤਰਮੇਵਾਤਿਆਦਿ ਸਬ੍ਬਾਧਿਟ੍ਠਾਨਸਾਧਾਰਣਲਕ੍ਖਣਂ. ਤਤ੍ਥ ਪੁਨ ਅਧਿਟ੍ਠਾਤਬ੍ਬਨ੍ਤਿ ਅਨਧਿਟ੍ਠਿਤਚੀਵਰਸ੍ਸ ਏਕਦੇਸਭੂਤਤ੍ਤਾ ਅਨਧਿਟ੍ਠਿਤਞ੍ਚੇ, ਅਧਿਟ੍ਠਿਤਸ੍ਸ ਅਪ੍ਪਭਾਵੇਨ ਏਕਦੇਸਭੂਤਂ ਅਧਿਟ੍ਠਿਤਸਙ੍ਖਮੇਵ ਗਚ੍ਛਤਿ, ਤਥਾ ਅਧਿਟ੍ਠਿਤਞ੍ਚੇ, ਅਨਧਿਟ੍ਠਿਤਸ੍ਸ ਏਕਦੇਸਭੂਤਂ ਅਨਧਿਟ੍ਠਿਤਸਙ੍ਖਂ ਗਚ੍ਛਤੀਤਿ ਲਕ੍ਖਣਂ. ਨ ਕੇਵਲਞ੍ਚੇਤ੍ਥ ਦੁਤਿਯਪਟ੍ਟਮੇਵ, ਅਥ ਖੋ ਤਤਿਯਪਟ੍ਟਾਦਿਕਮ੍ਪਿ. ਯਥਾਹ ‘‘ਅਨੁਜਾਨਾਮਿ ਭਿਕ੍ਖਵੇ…ਪੇ… ਉਤੁਦ੍ਧਟਾਨਂ ਦੁਸ੍ਸਾਨਂ ਚਤੁਗ੍ਗੁਣਂ ਸਙ੍ਘਾਟਿਂ…ਪੇ… ਪਂਸੁਕੂਲੇ ਯਾਵਦਤ੍ਥ’’ਨ੍ਤਿ (ਮਹਾਵ. ੩੪੮).

ਮੁਟ੍ਠਿਪਞ੍ਚਕਾਦਿਤਿਚੀਵਰਪ੍ਪਮਾਣਯੁਤ੍ਤਂ ਸਨ੍ਧਾਯ ‘‘ਤਿਚੀਵਰਂ ਪਨਾ’’ਤਿਆਦਿ ਵੁਤ੍ਤਂ. ਪਰਿਕ੍ਖਾਰਚੋਲ਼ਂ ਅਧਿਟ੍ਠਾਤੁਨ੍ਤਿ ਪਰਿਕ੍ਖਾਰਚੋਲ਼ਂ ਕਤ੍ਵਾ ਅਧਿਟ੍ਠਾਤੁਂ. ਅਵਸੇਸਾ ਭਿਕ੍ਖੂਤਿ ਵਕ੍ਖਮਾਨਕਾਲੇ ਨਿਸਿਨ੍ਨਾ ਭਿਕ੍ਖੂ. ਤਸ੍ਮਾ ਵਟ੍ਟਤੀਤਿ ਯਥਾ ‘‘ਅਨੁਜਾਨਾਮਿ, ਭਿਕ੍ਖਵੇ, ਤਿਚੀਵਰਂ ਅਧਿਟ੍ਠਾਤੁਂ, ਨ ਵਿਕਪ੍ਪੇਤੁ’’ਨ੍ਤਿ (ਮਹਾਵ. ੩੫੮) ਵੁਤ੍ਤਂ, ਏਵਂ ਪਰਿਕ੍ਖਾਰਚੋਲ਼ਮ੍ਪਿ ਵੁਤ੍ਤਂ, ਨ ਚਸ੍ਸ ਉਕ੍ਕਟ੍ਠਪਰਿਚ੍ਛੇਦੋ ਵੁਤ੍ਤੋ, ਨ ਚ ਸਙ੍ਖਾਪਰਿਚ੍ਛੇਦੋ, ਤਸ੍ਮਾ ਤੀਣਿਪਿ ਚੀਵਰਾਨਿ ਪਚ੍ਚੁਦ੍ਧਰਿਤ੍ਵਾ ਇਮਾਨਿ ਚੀਵਰਾਨਿ ਪਰਿਕ੍ਖਾਰਚੋਲ਼ਾਨਿ ਅਧਿਟ੍ਠਹਿਤ੍ਵਾ ਪਰਿਭੁਞ੍ਜਿਤੁਂ ਵਟ੍ਟਤੀਤਿ ਅਤ੍ਥੋ. ਨਿਧਾਨਮੁਖਮੇਤਨ੍ਤਿ ਏਤਂ ਪਰਿਕ੍ਖਾਰਚੋਲ਼ਾਧਿਟ੍ਠਾਨਂ ਨਿਧਾਨਮੁਖਂ ਠਪਨਮੁਖਂ, ਅਤਿਰੇਕਚੀਵਰਟ੍ਠਪਨਕਾਰਣਨ੍ਤਿ ਅਤ੍ਥੋ. ਕਥਂ ਞਾਯਤੀਤਿ ਚੇ, ਤੇਨ ਖੋ ਪਨ ਸਮਯੇਨ ਭਿਕ੍ਖੂਨਂ ਪਰਿਪੁਣ੍ਣਂ ਹੋਤਿ ਤਿਚੀਵਰਂ, ਅਤ੍ਥੋ ਚ ਹੋਤਿ ਪਰਿਸ੍ਸਾਵਨੇਹਿਪਿ ਥਵਿਕਾਹਿਪਿ. ਏਤਸ੍ਮਿਂ ਵਤ੍ਥੁਸ੍ਮਿਂ ‘‘ਅਨੁਜਾਨਾਮਿ, ਭਿਕ੍ਖਵੇ, ਪਰਿਕ੍ਖਾਰਚੋਲ਼ਕ’’ਨ੍ਤਿ ਅਨੁਞ੍ਞਾਤਤ੍ਤਾ ਭਿਕ੍ਖੂਨਞ੍ਚ ਏਕਮੇਵ ਪਰਿਸ੍ਸਾਵਨਂ, ਥਵਿਕਾ ਵਾ ਵਟ੍ਟਤਿ, ਨ ਦ੍ਵੇ ਵਾ ਤੀਣਿ ਵਾਤਿ ਪਟਿਕ੍ਖੇਪਾਭਾਵਤੋ ਵਿਕਪ੍ਪਨੂਪਗਪਚ੍ਛਿਮਪ੍ਪਮਾਣਾਨਿ, ਅਤਿਰੇਕਪ੍ਪਮਾਣਾਨਿ ਵਾ ਪਰਿਸ੍ਸਾਵਨਾਦੀਨਿ ਪਰਿਕ੍ਖਾਰਾਨਿ ਕਪ੍ਪਨ੍ਤੀਤਿ ਸਿਦ੍ਧਂ. ਪਠਮਂ ਤਿਚੀਵਰਾਧਿਟ੍ਠਾਨੇਨ ਅਧਿਟ੍ਠਾਤਬ੍ਬਂ, ਪੁਨ ਪਰਿਹਰਿਤੁਂ ਅਸਕ੍ਕੋਨ੍ਤੇਨ ਪਚ੍ਚੁਦ੍ਧਰਿਤ੍ਵਾ ਪਰਿਕ੍ਖਾਰਚੋਲ਼ਂ ਅਧਿਟ੍ਠਾਤਬ੍ਬਂ, ਨ ਤ੍ਵੇਵ ਆਦਿਤੋਵ ਇਦਂ ਵੁਤ੍ਤਂ. ਬਦ੍ਧਸੀਮਾਯ ਅਵਿਪ੍ਪਵਾਸਸੀਮਾਸਮ੍ਮੁਤਿਸਮ੍ਭਵਤੋ ਚੀਵਰਵਿਪ੍ਪਵਾਸੇ ਨੇਵਤ੍ਥਿ ਦੋਸੋਤਿ ਨ ਤਤ੍ਥ ਦੁਪ੍ਪਰਿਹਾਰੋਤਿ ਆਹ ‘‘ਅਬਦ੍ਧਸੀਮਾਯ ਦੁਪ੍ਪਰਿਹਾਰ’’ਨ੍ਤਿ.

੪੫. ਅਤਿਰਿਤ੍ਤਪ੍ਪਮਾਣਾਯ ਛੇਦਨਕਂ ਪਾਚਿਤ੍ਤਿਯਨ੍ਤਿ ਆਹ ‘‘ਅਨਤਿਰਿਤ੍ਤਪ੍ਪਮਾਣਾ’’ਤਿ. ਤਤੋ ਪਰਂ ਪਚ੍ਚੁਦ੍ਧਰਿਤ੍ਵਾ ਵਿਕਪ੍ਪੇਤਬ੍ਬਾਤਿ ਵਸ੍ਸਿਕਮਾਸਤੋ ਪਰਂ ਅਧਿਟ੍ਠਾਨਂ ਪਚ੍ਚੁਦ੍ਧਰਿਤ੍ਵਾ ਵਿਕਪ੍ਪੇਤਬ੍ਬਾ, ਇਮਿਨਾ ਚਤੁਨ੍ਨਂ ਵਸ੍ਸਿਕਮਾਸਾਨਂ ਉਪਰਿ ਅਧਿਟ੍ਠਾਨਂ ਤਿਟ੍ਠਤੀਤਿ ਵਿਞ੍ਞਾਯਤਿ, ਅਸਤੋ ਪਚ੍ਚੁਦ੍ਧਰਾਯੋਗਾ, ਯਞ੍ਚ ਮਾਤਿਕਾਟ੍ਠਕਥਾਯਂ (ਕਙ੍ਖਾ. ਅਟ੍ਠ. ਕਥਿਨਸਿਕ੍ਖਾਪਦਵਣ੍ਣਨਾ) ‘‘ਵਸ੍ਸਿਕਸਾਟਿਕਾ ਵਸ੍ਸਾਨਮਾਸਾਤਿਕ੍ਕਮੇਨਾਪਿ ਕਣ੍ਡੁਪਟਿਚ੍ਛਾਦਿ ਆਬਾਧਵੂਪਸਮੇਨਾਪਿ ਅਧਿਟ੍ਠਾਨਂ ਵਿਜਹਨ੍ਤੀ’’ਤਿ ਵੁਤ੍ਤਂ, ਤਂ ਸਮਨ੍ਤਪਾਸਾਦਿਕਾਯਂ ਨਤ੍ਥਿ, ਪਰਿਵਾਰਟ੍ਠਕਥਾਯਞ੍ਚ ‘‘ਅਤ੍ਥਾਪਤ੍ਤਿ ਹੇਮਨ੍ਤੇ ਆਪਜ੍ਜਤਿ, ਨੋ ਗਿਮ੍ਹੇ’’ਤਿ ਏਤ੍ਥ ਨ ਤਂ ਵੁਤ੍ਤਂ, ਕਤ੍ਤਿਕਪੁਣ੍ਣਮਾਸਿਯਾ ਪਚ੍ਛਿਮੇ ਪਾਟਿਪਦਦਿਵਸੇ ਵਿਕਪ੍ਪੇਤ੍ਵਾ ਠਪਿਤਂ ਵਸ੍ਸਿਕਸਾਟਿਕਂ ਨਿਵਾਸੇਨ੍ਤੋ ਹੇਮਨ੍ਤੇ ਆਪਜ੍ਜਤਿ. ਕੁਰੁਨ੍ਦਿਯਂ ਪਨ ‘‘ਕਤ੍ਤਿਕਪੁਣ੍ਣਮਦਿਵਸੇ ਅਪਚ੍ਚੁਦ੍ਧਰਿਤ੍ਵਾ ਹੇਮਨ੍ਤੇ ਆਪਜ੍ਜਤੀ’’ਤਿ ਵੁਤ੍ਤਂ, ਤਮ੍ਪਿ ਸੁਵੁਤ੍ਤਂ. ‘‘ਚਾਤੁਮਾਸਂ ਅਧਿਟ੍ਠਾਤੁਂ, ਤਤੋ ਪਰਂ ਵਿਕਪ੍ਪੇਤੁ’’ਨ੍ਤਿ ਹਿ ਵੁਤ੍ਤਂ. ਤਤ੍ਥ ਮਹਾਅਟ੍ਠਕਥਾਯਂ ਨਿਵਾਸਨਪਚ੍ਚਯਾ ਦੁਕ੍ਕਟਂ ਵੁਤ੍ਤਂ, ਕੁਰੁਨ੍ਦਟ੍ਠਕਥਾਯਂ ਪਨ ਅਪਚ੍ਚੁਦ੍ਧਾਰਪਚ੍ਚਯਾ, ਤਸ੍ਮਾ ਕੁਰੁਨ੍ਦਿਯਂ ਵੁਤ੍ਤਨਯੇਨਪਿ ਵਸ੍ਸਿਕਸਾਟਿਕਾ ਵਸ੍ਸਾਨਾਤਿਕ੍ਕਮੇਪਿ ਅਧਿਟ੍ਠਾਨਂ ਨ ਵਿਜਹਤੀਤਿ ਪਞ੍ਞਾਯਤਿ. ਅਧਿਟ੍ਠਾਨਵਿਜਹਨੇਸੁ ਚ ਵਸ੍ਸਾਨਮਾਸਆਬਾਧਾਨਂ ਵਿਗਮੇ ਵਿਜਹਨਂ ਮਾਤਿਕਾਟ੍ਠਕਥਾਯਮ੍ਪਿ ਨ ਉਦ੍ਧਟਂ, ਤਸ੍ਮਾ ਸਮਨ੍ਤਪਾਸਾਦਿਕਾਯਂ (ਪਾਰਾ. ਅਟ੍ਠ. ੨.੪੬੯) ਆਗਤਨਯੇਨ ਯਾਵ ਪਚ੍ਚੁਦ੍ਧਾਰਾ ਅਧਿਟ੍ਠਾਨਂ ਤਿਟ੍ਠਤੀਤਿ ਗਹੇਤਬ੍ਬਂ.

ਨਹਾਨਤ੍ਥਾਯ ਅਨੁਞ੍ਞਾਤਤ੍ਤਾ ‘‘ਵਣ੍ਣਭੇਦਮਤ੍ਤਰਤ੍ਤਾਪਿ ਚੇਸਾ ਵਟ੍ਟਤੀ’’ਤਿ ਵੁਤ੍ਤਂ. ਦ੍ਵੇ ਪਨ ਨ ਵਟ੍ਟਨ੍ਤੀਤਿ ਇਮਿਨਾ ਸਙ੍ਘਾਟਿਆਦੀਸੁਪਿ ਦੁਤਿਯਅਧਿਟ੍ਠਾਨਂ ਨ ਰੁਹਤਿ, ਤਂ ਅਤਿਰੇਕਚੀਵਰਂ ਹੋਤੀਤਿ ਦਸ੍ਸੇਤਿ. ਮਹਾਪਚ੍ਚਰਿਯਂ ਚੀਵਰਵਸੇਨ ਪਰਿਭੋਗਕਿਚ੍ਚਸ੍ਸ ਅਭਾਵਂ ਸਨ੍ਧਾਯ ‘‘ਅਨਾਪਤ੍ਤੀ’’ਤਿ ਵੁਤ੍ਤਾ ਸੇਨਾਸਨਪਰਿਭੋਗਤ੍ਥਾਯ ਦਿਨ੍ਨਪਚ੍ਚਤ੍ਥਰਣੇ ਵਿਯ. ਯਂ ਪਨ ‘‘ਪਚ੍ਚਤ੍ਥਰਣਮ੍ਪਿ ਅਧਿਟ੍ਠਾਤਬ੍ਬ’’ਨ੍ਤਿ ਵੁਤ੍ਤਂ, ਤਂ ਸੇਨਾਸਨਤ੍ਥਾਯੇਵਾਤਿ ਨਿਯਮਿਤਂ ਨ ਹੋਤਿ ਨਵਸੁ ਚੀਵਰੇਸੁ ਗਹਿਤਤ੍ਤਾ, ਤਸ੍ਮਾ ਅਤ੍ਤਨੋ ਨਾਮੇਨ ਅਧਿਟ੍ਠਹਿਤ੍ਵਾ ਨਿਦਹਿਤ੍ਵਾ ਪਰਿਕ੍ਖਾਰਚੋਲ਼ਂ ਵਿਯ ਯਥਾ ਤਥਾ ਵਿਨਿਯੁਜ੍ਜਿਤਮੇਵਾਤਿ ਗਹੇਤਬ੍ਬਂ, ਪਾਵਾਰੋਕੋਜਵੋਤਿ ਇਮੇਸਮ੍ਪਿ ਪਚ੍ਚਤ੍ਥਰਣਾਦਿਨਾ ਲੋਕੇਪਿ ਵੋਹਰਣਤੋ ਸੇਨਾਸਨਪਰਿਕ੍ਖਾਰਤ੍ਥਾਯ ਦਿਨ੍ਨਪਚ੍ਚਤ੍ਥਰਣਤੋ ਵਿਸੁਂ ਗਹਣਂ ਕਤਂ. ਸਚੇ ਅਵਸਾਨੇ ਅਪਰਾਵਸ੍ਸਿਕਸਾਟਿਕਾ ਉਪ੍ਪਨ੍ਨਾ ਹੋਤਿ, ਪੁਰਿਮਵਸ੍ਸਿਕਸਾਟਿਕਂ ਪਚ੍ਚੁਦ੍ਧਰਿਤ੍ਵਾ ਵਿਕਪ੍ਪੇਤ੍ਵਾ ਅਧਿਟ੍ਠਾਤਬ੍ਬਾਤਿ ਵਦਨ੍ਤਿ.

ਨਿਸੀਦਨਮ੍ਹਿ ਪਮਾਣਯੁਤ੍ਤਨ੍ਤਿ ‘‘ਦੀਘਤੋ ਸੁਗਤਵਿਦਤ੍ਥਿਯਾ ਦ੍ਵੇ ਵਿਦਤ੍ਥਿਯੋ, ਵਿਤ੍ਥਾਰਤੋ ਦਿਯਡ੍ਢਂ, ਦਸਾ ਵਿਦਤ੍ਥੀ’’ਤਿਇਮਿਨਾ ਪਮਾਣੇਨ ਯੁਤ੍ਤਂ, ਤਂ ਪਨ ਮਜ੍ਝਿਮਪੁਰਿਸਹਤ੍ਥਸਙ੍ਖਾਤੇਨ ਵਡ੍ਢਕੀਹਤ੍ਥੇਨ ਦੀਘਤੋ ਤਿਹਤ੍ਥਂ ਹੋਤਿ, ਵਿਤ੍ਥਾਰਤੋ ਛਲ਼ਙ੍ਗੁਲਾਧਿਕਦ੍ਵਿਹਤ੍ਥਂ, ਦਸਾ ਵਿਦਤ੍ਥਾਧਿਕਹਤ੍ਥਂ, ਇਦਾਨਿ ਮਨੁਸ੍ਸਾਨਂ ਪਕਤਿਹਤ੍ਥੇਨ ਦੀਘਤੋ ਵਿਦਤ੍ਥਾਧਿਕਚਤੁਹਤ੍ਥਂ ਹੋਤਿ, ਵਿਤ੍ਥਾਰਤੋ ਨਵਙ੍ਗੁਲਾਧਿਕਤਿਹਤ੍ਥਂ, ਦਸਾ ਛਲ਼ਙ੍ਗੁਲਾਧਿਕਦ੍ਵਿਹਤ੍ਥਾ, ਤਤੋ ਊਨਂ ਵਟ੍ਟਤਿ, ਨ ਅਧਿਕਂ ‘‘ਤਂ ਅਤਿਕ੍ਕਾਮਯਤੋ ਛੇਦਨਕਂ ਪਾਚਿਤ੍ਤਿਯ’’ਨ੍ਤਿ (ਪਾਚਿ. ੫੩੩) ਵੁਤ੍ਤਤ੍ਤਾ. ਕਣ੍ਡੁਪਟਿਚ੍ਛਾਦਿਯਾ ਪਮਾਣਿਕਾਤਿ ‘‘ਦੀਘਤੋ ਚਤਸ੍ਸੋ ਵਿਦਤ੍ਥਿਯੋ ਸੁਗਤਵਿਦਤ੍ਥਿਯਾ, ਤਿਰਿਯਂ ਦ੍ਵੇ ਵਿਦਤ੍ਥਿਯੋ’’ਤਿ (ਪਾਚਿ. ੫੩੮) ਵੁਤ੍ਤਤ੍ਤਾ ਏਵਂ ਵੁਤ੍ਤਪ੍ਪਮਾਣਯੁਤ੍ਤਾ, ਸਾ ਪਨ ਵਡ੍ਢਕੀਹਤ੍ਥੇਨ ਦੀਘਤੋ ਛਹਤ੍ਥਾ ਹੋਤਿ, ਵਿਤ੍ਥਾਰਤੋ ਤਿਹਤ੍ਥਾ, ਇਦਾਨਿ ਪਕਤਿਹਤ੍ਥੇਨ ਪਨ ਦੀਘਤੋ ਨਵਹਤ੍ਥਾ ਹੋਤਿ, ਤਿਰਿਯਤੋ ਵਿਦਤ੍ਥਾਧਿਕਚਤੁਹਤ੍ਥਾਤਿ ਵੇਦਿਤਬ੍ਬਾ. ਵਿਕਪ੍ਪਨੂਪਗਪਚ੍ਛਿਮਚੀਵਰਪ੍ਪਮਾਣਂ ਪਰਿਕ੍ਖਾਰਚੋਲ਼ਨ੍ਤਿ ਏਤ੍ਥ ਪਨ ਵਿਕਪ੍ਪਨੂਪਗਪਚ੍ਛਿਮਚੀਵਰਪ੍ਪਮਾਣਂ ਨਾਮ ਸੁਗਤਙ੍ਗੁਲੇਨ ਦੀਘਤੋ ਅਟ੍ਠਙ੍ਗੁਲਂ ਹੋਤਿ, ਤਿਰਿਯਤੋ ਚਤੁਰਙ੍ਗੁਲਂ, ਵਡ੍ਢਕੀਹਤ੍ਥੇਨ ਦੀਘਤੋ ਏਕਹਤ੍ਥਂ ਹੋਤਿ, ਤਿਰਿਯਤੋ ਵਿਦਤ੍ਥਿਪ੍ਪਮਾਣਂ, ਇਦਾਨਿ ਪਕਤਿਹਤ੍ਥੇਨ ਪਨ ਦੀਘਤੋ ਵਿਦਤ੍ਥਾਧਿਕਹਤ੍ਥਂ ਹੋਤਿ, ਤਿਰਿਯਤੋ ਛਲ਼ਙ੍ਗੁਲਾਧਿਕਵਿਦਤ੍ਥਿਪ੍ਪਮਾਣਂ. ਤੇਨਾਹ ‘‘ਤਸ੍ਸ ਪਮਾਣ’’ਨ੍ਤਿਆਦਿ.

ਭੇਸਜ੍ਜਤ੍ਥਾਯਾਤਿਆਦੀਸੁ ਅਤ੍ਤਨੋ ਸਨ੍ਤਕਭਾਵਤੋ ਮੋਚੇਤ੍ਵਾ ਠਪਿਤਂ ਸਨ੍ਧਾਯ ‘‘ਅਨਧਿਟ੍ਠਿਤੇਪਿ ਨਤ੍ਥਿ ਆਪਤ੍ਤੀ’’ਤਿ ਵੁਤ੍ਤਂ, ‘‘ਇਦਂ ਭੇਸਜ੍ਜਤ੍ਥਾਯ, ਇਦਂ ਮਾਤੁਯਾ’’ਤਿ ਵਿਭਜਿਤ੍ਵਾ ਸਕਸਨ੍ਤਕਭਾਵਤੋ ਮੋਚੇਤ੍ਵਾ ਠਪੇਨ੍ਤੇਨ ਅਧਿਟ੍ਠਾਨਕਿਚ੍ਚਂ ਨਤ੍ਥੀਤਿ ਅਧਿਪ੍ਪਾਯੋ. ‘‘ਇਮਿਨਾ ਭੇਸਜ੍ਜਂ ਚੇਤਾਪੇਸ੍ਸਾਮਿ, ਇਦਂ ਮਾਤੁਯਾ ਦਸ੍ਸਾਮੀ’’ਤਿ ਠਪੇਨ੍ਤੇਨ ਪਨ ਅਧਿਟ੍ਠਾਤਬ੍ਬਮੇਵਾਤਿ ਵਦਨ੍ਤਿ. ਸੇਨਾਸਨਪਰਿਕ੍ਖਾਰਤ੍ਥਾਯ ਦਿਨ੍ਨਪਚ੍ਚਤ੍ਥਰਣੇਤਿ ਏਤ੍ਥ ਅਨਿਵਾਸੇਤ੍ਵਾ ਅਪਾਰੁਪਿਤ੍ਵਾ ਕੇਵਲਂ ਮਞ੍ਚਪੀਠੇਸੁਯੇਵ ਅਤ੍ਥਰਿਤ੍ਵਾ ਪਰਿਭੁਞ੍ਜਿਯਮਾਨਂ ਪਚ੍ਚਤ੍ਥਰਣਂ ਅਤ੍ਤਨੋ ਸਨ੍ਤਕਮ੍ਪਿ ਅਨਧਿਟ੍ਠਾਤੁਂ ਵਟ੍ਟਤੀਤਿ ਵਦਨ੍ਤਿ, ਹੇਟ੍ਠਾ ਪਨ ਪਚ੍ਚਤ੍ਥਰਣਮ੍ਪਿ ਅਧਿਟ੍ਠਾਤਬ੍ਬਮੇਵਾਤਿ ਅਵਿਸੇਸੇਨ ਵੁਤ੍ਤਤ੍ਤਾ ਅਤ੍ਤਨੋ ਸਨ੍ਤਕਂ ਅਧਿਟ੍ਠਾਤਬ੍ਬਮੇਵਾਤਿ ਅਮ੍ਹਾਕਂ ਖਨ੍ਤਿ, ਵੀਮਂਸਿਤ੍ਵਾ ਗਹੇਤਬ੍ਬਂ. ਤਨ੍ਤੇ ਠਿਤਂਯੇਵ ਅਧਿਟ੍ਠਾਤਬ੍ਬਨ੍ਤਿ ਏਤ੍ਥ ਪਚ੍ਛਾ ਵੀਤਟ੍ਠਾਨਂ ਅਧਿਟ੍ਠਿਤਮੇਵ ਹੋਤਿ, ਪੁਨ ਅਧਿਟ੍ਠਾਨਕਿਚ੍ਚਂ ਨਤ੍ਥਿ. ਸਚੇ ਪਨ ਪਰਿਚ੍ਛੇਦਂ ਦਸ੍ਸੇਤ੍ਵਾ ਅਨ੍ਤਰਨ੍ਤਰਾ ਵੀਤਂ ਹੋਤਿ, ਪੁਨ ਅਧਿਟ੍ਠਾਤਬ੍ਬਨ੍ਤਿ ਵਦਨ੍ਤਿ. ਏਸੇਵ ਨਯੋਤਿ ਵਿਕਪ੍ਪਨੂਪਗਪ੍ਪਮਾਣਮਤ੍ਤੇ ਵੀਤੇ ਤਨ੍ਤੇ ਠਿਤਂਯੇਵ ਅਧਿਟ੍ਠਾਤਬ੍ਬਨ੍ਤਿ ਅਤ੍ਥੋ.

੪੬. ‘‘ਹੀਨਾਯਾਵਤ੍ਤਨੇਨਾਤਿ ‘ਸਿਕ੍ਖਂ ਅਪ੍ਪਚ੍ਚਕ੍ਖਾਯ ਗਿਹਿਭਾਵੂਪਗਮਨੇਨਾ’ਤਿ ਤੀਸੁਪਿ ਗਣ੍ਠਿਪਦੇਸੁ ਵੁਤ੍ਤਂ, ਤਂ ਯੁਤ੍ਤਂ ਅਞ੍ਞਸ੍ਸ ਦਾਨੇ ਵਿਯ ਚੀਵਰੇ ਨਿਰਾਲਯਭਾਵੇਨੇਵ ਪਰਿਚ੍ਚਤ੍ਤਤ੍ਤਾ. ਕੇਚਿ ਪਨ ‘ਹੀਨਾਯਾਵਤ੍ਤਨੇਨਾਤਿ ਭਿਕ੍ਖੁਨਿਯਾ ਗਿਹਿਭਾਵੂਪਗਮਨੇਨੇਵਾਤਿ ਏਤਮਤ੍ਥਂ ਗਹੇਤ੍ਵਾ ਭਿਕ੍ਖੁ ਪਨ ਵਿਬ੍ਭਮਨ੍ਤੋਪਿ ਯਾਵ ਸਿਕ੍ਖਂ ਨ ਪਚ੍ਚਕ੍ਖਾਤਿ, ਤਾਵ ਭਿਕ੍ਖੁਯੇਵਾਤਿ ਅਧਿਟ੍ਠਾਨਂ ਨ ਵਿਜਹਤੀ’ਤਿ ਵਦਨ੍ਤਿ, ਤਂ ਨ ਗਹੇਤਬ੍ਬਂ ‘ਭਿਕ੍ਖੁਨਿਯਾ ਹੀਨਾਯਾਵਤ੍ਤਨੇਨਾ’ਤਿ ਵਿਸੇਸੇਤ੍ਵਾ ਅਵੁਤ੍ਤਤ੍ਤਾ. ਭਿਕ੍ਖੁਨਿਯਾ ਹਿ ਗਿਹਿਭਾਵੂਪਗਮਨੇਨ ਅਧਿਟ੍ਠਾਨਵਿਜਹਨਂ ਵਿਸੁਂ ਵਤ੍ਤਬ੍ਬਂ ਨਤ੍ਥਿ ਤਸ੍ਸਾ ਵਿਬ੍ਭਮਨੇਨੇਵ ਅਸ੍ਸਮਣੀਭਾਵਤੋ. ਸਿਕ੍ਖਾਪਚ੍ਚਕ੍ਖਾਨੇਨਾਤਿ ਪਨ ਇਦਂ ਸਚੇ ਭਿਕ੍ਖੁਲਿਙ੍ਗੇ ਠਿਤੋਵ ਸਿਕ੍ਖਂ ਪਚ੍ਚਕ੍ਖਾਤਿ, ਤਸ੍ਸ ਕਾਯਲਗ੍ਗਮ੍ਪਿ ਚੀਵਰਂ ਅਧਿਟ੍ਠਾਨਂ ਵਿਜਹਤੀਤਿ ਦਸ੍ਸਨਤ੍ਥਂ ਵੁਤ੍ਤ’’ਨ੍ਤਿ ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ੨.੪੬੯) ਵੁਤ੍ਤਂ. ਵਿਮਤਿਵਿਨੋਦਨਿਯਂ (ਵਿ. ਵਿ. ਟੀ. ੧.੪੬੯) ਪਨ ‘‘ਹੀਨਾਯਾਵਤ੍ਤਨੇਨਾਤਿ ਇਦਂ ਅਨ੍ਤਿਮਵਤ੍ਥੁਂ ਅਜ੍ਝਾਪਜ੍ਜਿਤ੍ਵਾ ਭਿਕ੍ਖੁਪਟਿਞ੍ਞਾਯ ਠਿਤਸ੍ਸ ਚੇਵ ਤਿਤ੍ਥਿਯਪਕ੍ਕਨ੍ਤਸ੍ਸ ਚ ਭਿਕ੍ਖੁਨਿਯਾ ਚ ਭਿਕ੍ਖੁਨਿਭਾਵੇ ਨਿਰਪੇਕ੍ਖਤਾਯ ਗਿਹਿਲਿਙ੍ਗਤਿਤ੍ਥਿਯਲਿਙ੍ਗਗ੍ਗਹਣਂ ਸਨ੍ਧਾਯ ਵੁਤ੍ਤਂ. ਸਿਕ੍ਖਂ ਅਪ੍ਪਚ੍ਚਕ੍ਖਾਯ ਗਿਹਿਭਾਵੂਪਗਮਨਂ ਸਨ੍ਧਾਯ ਵੁਤ੍ਤਨ੍ਤਿ ਕੇਚਿ ਵਦਨ੍ਤਿ, ਤਂ ਨ ਯੁਤ੍ਤਂ, ਤਦਾਪਿ ਤਸ੍ਸ ਉਪਸਮ੍ਪਨ੍ਨਤ੍ਤਾ ਚੀਵਰਸ੍ਸ ਚ ਤਸ੍ਸ ਸਨ੍ਤਕਤ੍ਤਾ ਵਿਜਹਨਤੋ’’ਤਿ ਵੁਤ੍ਤਂ, ਇਤਿ ਇਮਾਨਿ ਦ੍ਵੇ ਵਚਨਾਨਿ ਅਞ੍ਞਮਞ੍ਞਵਿਰੁਦ੍ਧਾਨਿ ਹੁਤ੍ਵਾ ਦਿਸ੍ਸਨ੍ਤਿ.

ਅਟ੍ਠਕਥਾਯਂ ਪਨ ‘‘ਹੀਨਾਯਾਵਤ੍ਤਨੇਨ ਸਿਕ੍ਖਾਪਚ੍ਚਕ੍ਖਾਨੇਨਾ’’ਤਿ (ਪਾਰਾ. ਅਟ੍ਠ. ੨.੪੬੯) ਵਿਸੁਂ ਵੁਤ੍ਤਤ੍ਤਾ ਹੀਨਾਯਾਵਤ੍ਤਨ੍ਤੇ ਸਤਿ ਸਿਕ੍ਖਂ ਅਪ੍ਪਚ੍ਚਕ੍ਖਨ੍ਤੇਪਿ ਚੀਵਰਂ ਅਧਿਟ੍ਠਾਨਂ ਵਿਜਹਤਿ, ਸਿਕ੍ਖਂ ਪਚ੍ਚਕ੍ਖਨ੍ਤੇ ਸਤਿ ਹੀਨਾਯ ਅਨਾਵਤ੍ਤਨ੍ਤੇਪੀਤਿ ਅਧਿਪ੍ਪਾਯੋ ਦਿਸ੍ਸਤਿ, ਤਸ੍ਮਾ ਸਿਕ੍ਖਂ ਅਪ੍ਪਚ੍ਚਕ੍ਖਾਯ ਕੇਵਲਂ ਗਿਹਿਭਾਵਂ ਉਪਗਚ੍ਛਨ੍ਤਸ੍ਸ ਕਿਞ੍ਚਾਪਿ ਭਿਕ੍ਖੁਭਾਵੋ ਅਤ੍ਥਿ, ਚੀਵਰਸ੍ਸ ਚ ਤਸ੍ਸ ਸਨ੍ਤਕਤ੍ਤਾ ਵਿਜਹਨਂ, ਤਥਾਪਿ ‘‘ਹੀਨਾਯਾਵਤ੍ਤਨੇਨਾ’’ਤਿ ਵੁਤ੍ਤਤ੍ਤਾ ਗਿਹਿਭਾਵੂਪਗਮਨੇਨੇਵ ਅਧਿਟ੍ਠਾਨਵਿਜਹਨਂ ਸਿਯਾ ਯਥਾ ਤਂ ਲਿਙ੍ਗਪਰਿਵਤ੍ਤਨੇਨ. ਗਿਹਿਭਾਵਂ ਅਨੁਪਗਨ੍ਤ੍ਵਾ ਚ ਕੇਵਲਂ ਸਿਕ੍ਖਾਪਚ੍ਚਕ੍ਖਾਨਂ ਕਰੋਨ੍ਤਸ੍ਸ ਕਿਞ੍ਚਾਪਿ ਭਿਕ੍ਖੁਲਿਙ੍ਗਂ ਅਤ੍ਥਿ, ਚੀਵਰਸ੍ਸ ਚ ਤਸ੍ਸ ਸਨ੍ਤਕਤ੍ਤਾ ਵਿਜਹਨਂ, ਤਥਾਪਿ ‘‘ਸਿਕ੍ਖਾਪਚ੍ਚਕ੍ਖਾਨੇਨਾ’’ਤਿ ਵੁਤ੍ਤਤ੍ਤਾ ਸਿਕ੍ਖਾਪਚ੍ਚਕ੍ਖਾਨੇਨੇਵ ਅਧਿਟ੍ਠਾਨਵਿਜਹਨਂ ਸਿਯਾ ਯਥਾ ਤਂ ਪਚ੍ਚੁਦ੍ਧਰਣੇ, ਤਸ੍ਮਾ ਭਿਕ੍ਖੁ ਵਾ ਹੋਤੁ ਭਿਕ੍ਖੁਨੀ ਵਾ, ਹੀਨਾਯਾਵਤ੍ਤਿਸ੍ਸਾਮੀਤਿ ਚਿਤ੍ਤੇਨ ਗਿਹਿਲਿਙ੍ਗਗ੍ਗਹਣੇਨ ਚੀਵਰਂ ਅਧਿਟ੍ਠਾਨਂ ਵਿਜਹਤਿ. ਸਿਕ੍ਖਾਪਚ੍ਚਕ੍ਖਾਨੇਨ ਪਨ ਭਿਕ੍ਖੁਸ੍ਸੇਵ ਚੀਵਰਂ ਭਿਕ੍ਖੁਨਿਯਾ ਸਿਕ੍ਖਾਪਚ੍ਚਕ੍ਖਾਨਾਭਾਵਾਤਿ ਅਯਮਮ੍ਹਾਕਂ ਖਨ੍ਤਿ. ਅਨ੍ਤਿਮਵਤ੍ਥੁਅਜ੍ਝਾਪਨ੍ਨਕਤਿਤ੍ਥਿਯਪਕ੍ਕਨ੍ਤਕਾਨਂ ਪਨ ਚੀਵਰਸ੍ਸ ਅਧਿਟ੍ਠਾਨਵਿਜਹਨਂ ਅਟ੍ਠਕਥਾਯਂ ਅਨਾਗਤਤ੍ਤਾ ਤੇਸਞ੍ਚ ਹੀਨਾਯਾਵਤ੍ਤਾਨਵੋਹਾਰਾਭਾਵਾ ਵਿਚਾਰੇਤਬ੍ਬਂ.

ਕਨਿਟ੍ਠਙ੍ਗੁਲਿਨਖਵਸੇਨਾਤਿ ਹੇਟ੍ਠਿਮਪਰਿਚ੍ਛੇਦਂ ਦਸ੍ਸੇਤਿ. ਓਰਤੋ ਪਰਤੋਤਿ ਏਤ੍ਥ ਚ ‘‘ਓਰਤੋ ਛਿਦ੍ਦਂ ਅਧਿਟ੍ਠਾਨਂ ਭਿਨ੍ਦਤਿ, ਪਰਤੋ ਨ ਭਿਨ੍ਦਤੀ’’ਤਿ ਵੁਤ੍ਤਂ. ਕਥਂ ਓਰਪਰਭਾਵੋ ਵੇਦਿਤਬ੍ਬੋਤਿ? ਯਥਾ ਨਦੀਪਰਿਚ੍ਛਿਨ੍ਨੇ ਪਦੇਸੇ ਮਨੁਸ੍ਸਾਨਂ ਵਸਨਦਿਸਾਭਾਗੇ ਤੀਰਂ ਓਰਿਮਂ ਨਾਮ ਹੋਤਿ, ਇਤਰਦਿਸਾਭਾਗੇ ਤੀਰਂ ਪਾਰਿਮਂ ਨਾਮ, ਤਥਾ ਭਿਕ੍ਖੂਨਂ ਨਿਵਾਸਨਪਾਰੁਪਨਟ੍ਠਾਨਭੂਤਂ ਚੀਵਰਸ੍ਸ ਮਜ੍ਝਟ੍ਠਾਨਂ ਯਥਾਵੁਤ੍ਤਵਿਦਤ੍ਥਿਆਦਿਪ੍ਪਮਾਣਸ੍ਸ ਪਦੇਸਸ੍ਸ ਓਰਂ ਨਾਮ, ਚੀਵਰਪਰਿਯਨ੍ਤਟ੍ਠਾਨਂ ਪਰਂ ਨਾਮ, ਇਤਿ ਲੋਕਤੋ ਵਾ ਯਥਾ ਚ ਓਰਤੋ ਭੋਗਂ ਪਰਤੋ ਅਨ੍ਤਂ ਕਤ੍ਵਾ ਚੀਵਰਂ ਠਪੇਤਬ੍ਬਨ੍ਤਿ ਵੁਤ੍ਤੇ ਭਿਕ੍ਖੁਨੋ ਅਭਿਮੁਖਟ੍ਠਾਨਂ ਓਰਂ ਨਾਮ, ਇਤਰਟ੍ਠਾਨਂ ਪਰਂ ਨਾਮ, ਏਵਂ ਭਿਕ੍ਖੂਨਂ ਨਿਵਾਸਨਪਾਰੁਪਨਟ੍ਠਾਨਂ ਓਰਂ ਨਾਮ, ਇਤਰਂ ਪਰਂ ਨਾਮ. ਏਵਂ ਸਾਸਨਤੋ ਵਾ ਓਰਪਰਭਾਵੋ ਵੇਦਿਤਬ੍ਬੋ. ਤੇਨੇਵ ਯੋ ਪਨ ਦੁਬ੍ਬਲਟ੍ਠਾਨੇ ਪਠਮਂ ਅਗ੍ਗਲ਼ਂ ਦਤ੍ਵਾ ਪਚ੍ਛਾ ਦੁਬ੍ਬਲਟ੍ਠਾਨਂ ਛਿਨ੍ਦਿਤ੍ਵਾ ਅਪਨੇਤਿ, ਅਧਿਟ੍ਠਾਨਂ ਨ ਭਿਜ੍ਜਤਿ. ਮਣ੍ਡਲਪਰਿਵਤ੍ਤਨੇਪਿ ਏਸੇਵ ਨਯੋਤਿ ਸਕਲਸ੍ਮਿਂ ਚੀਵਰੇ ਅਧਿਟ੍ਠਾਨਭਿਜ੍ਜਨਾਭਿਜ੍ਜਨਭਾਵੋ ਦਸ੍ਸਿਤੋ. ਤੇਨ ਵੁਤ੍ਤਂ ਵਿਮਤਿਵਿਨੋਦਨਿਯਂ (ਵਿ. ਵਿ. ਟੀ. ੧.੪੬੯) ‘‘ਏਸ ਨਯੋਤਿ ਇਮਿਨਾ ਪਮਾਣਯੁਤ੍ਤੇਸੁ ਯਤ੍ਥ ਕਤ੍ਥਚਿ ਛਿਦ੍ਦੇ ਅਧਿਟ੍ਠਾਨਂ ਵਿਜਹਤੀਤਿਆਦਿਅਤ੍ਥਂ ਸਙ੍ਗਣ੍ਹਾਤੀ’’ਤਿ.

ਖੁਦ੍ਦਕਂ ਚੀਵਰਨ੍ਤਿ ਮੁਟ੍ਠਿਪਞ੍ਚਕਾਦਿਭੇਦਪ੍ਪਮਾਣਤੋ ਅਨੂਨਮੇਵ ਖੁਦ੍ਦਕਚੀਵਰਂ. ਮਹਨ੍ਤਂ ਵਾ ਖੁਦ੍ਦਕਂ ਕਰੋਤੀਤਿ ਏਤ੍ਥ ਤਿਣ੍ਣਂ ਚੀਵਰਾਨਂ ਚਤੂਸੁ ਪਸ੍ਸੇਸੁ ਯਸ੍ਮਿਂ ਪਦੇਸੇ ਛਿਦ੍ਦਂ ਅਧਿਟ੍ਠਾਨਂ ਨ ਵਿਜਹਤਿ, ਤਸ੍ਮਿਂ ਪਦੇਸੇ ਸਮਨ੍ਤਤੋ ਛਿਨ੍ਦਿਤ੍ਵਾ ਖੁਦ੍ਦਕਂ ਕਰੋਨ੍ਤਸ੍ਸ ਅਧਿਟ੍ਠਾਨਂ ਨ ਵਿਜਹਤੀਤਿ ਅਧਿਪ੍ਪਾਯੋ. ਵਿਮਤਿਵਿਨੋਦਨਿਯਂ ਪਨ ਵੁਤ੍ਤਂ ‘‘ਮਹਨ੍ਤਂ ਵਾ ਖੁਦ੍ਦਕਂ ਵਾ ਕਰੋਤੀਤਿ ਏਤ੍ਥ ਅਤਿਮਹਨ੍ਤਂ ਚੀਵਰਂ ਮੁਟ੍ਠਿਪਞ੍ਚਕਾਦਿਪਚ੍ਛਿਮਪ੍ਪਮਾਣਯੁਤ੍ਤਂ ਕਤ੍ਵਾ ਸਮਨ੍ਤਤੋ ਛਿਨ੍ਦਨੇਨਪਿ ਵਿਚ੍ਛਿਨ੍ਦਨਕਾਲੇ ਛਿਜ੍ਜਮਾਨਟ੍ਠਾਨਂ ਛਿਦ੍ਦਸਙ੍ਖਂ ਨ ਗਚ੍ਛਤਿ, ਅਧਿਟ੍ਠਾਨਂ ਨ ਵਿਜਹਤਿ ਏਵਾਤਿ ਸਿਜ੍ਝਤਿ, ‘ਘਟੇਤ੍ਵਾ ਛਿਨ੍ਦਤਿ ਨ ਭਿਜ੍ਜਤੀ’ਤਿ ਵਚਨੇਨ ਚ ਸਮੇਤਿ. ਪਰਿਕ੍ਖਾਰਚੋਲ਼ਂ ਪਨ ਵਿਕਪ੍ਪਨੂਪਗਪਚ੍ਛਿਮਪ੍ਪਮਾਣਤੋ ਊਨਂ ਕਤ੍ਵਾ ਛਿਦ੍ਦਂ ਅਧਿਟ੍ਠਾਨਂ ਵਿਜਹਤਿ ਅਧਿਟ੍ਠਾਨਸ੍ਸ ਅਨਿਸ੍ਸਯਤ੍ਤਾ, ਤਾਨਿ ਪੁਨ ਬਦ੍ਧਾਨਿ ਘਟਿਤਾਨਿ ਪੁਨ ਅਧਿਟ੍ਠਾਤਬ੍ਬਮੇਵਾਤਿ ਵੇਦਿਤਬ੍ਬਂ. ਕੇਚਿ ਪਨ ‘ਵਸ੍ਸਿਕਸਾਟਿਕਚੀਵਰੇ ਦ੍ਵਿਧਾ ਛਿਨ੍ਨੇ ਯਦਿਪਿ ਏਕੇਕਂ ਖਣ੍ਡਂ ਪਚ੍ਛਿਮਪ੍ਪਮਾਣਂ ਹੋਤਿ, ਏਕਸ੍ਮਿਂਯੇਵ ਖਣ੍ਡੇ ਅਧਿਟ੍ਠਾਨਂ ਤਿਟ੍ਠਤਿ, ਨ ਇਤਰਸ੍ਮਿਂ, ਦ੍ਵੇ ਪਨ ਨ ਵਟ੍ਟਨ੍ਤੀ’ਤਿ ਵੁਤ੍ਤਤ੍ਤਾ ਨਿਸੀਦਨਕਣ੍ਡੁਪਟਿਚ੍ਛਾਦੀਸੁਪਿ ਏਸੇਵ ਨਯੋਤਿ ਵਦਨ੍ਤੀ’’ਤਿ.

੪੭. ਸਮ੍ਮੁਖੇ ਪਵਤ੍ਤਾ ਸਮ੍ਮੁਖਾਤਿ ਪਚ੍ਚਤ੍ਤਵਚਨਂ, ਤਞ੍ਚ ਵਿਕਪ੍ਪਨਾਵਿਸੇਸਨਂ, ਤਸ੍ਮਾ ‘‘ਸਮ੍ਮੁਖੇ’’ਤਿ ਭੁਮ੍ਮਤ੍ਥੇ ਨਿਸ੍ਸਕ੍ਕਵਚਨਂ ਕਤ੍ਵਾਪਿ ਅਤ੍ਥਂ ਵਦਨ੍ਤਿ, ਅਭਿਮੁਖੇਤਿ ਅਤ੍ਥੋ. ਅਥ ਵਾ ਸਮ੍ਮੁਖੇਨ ਅਤ੍ਤਨੋ ਵਾਚਾਯ ਏਵ ਵਿਕਪ੍ਪਨਾ ਸਮ੍ਮੁਖਾਵਿਕਪ੍ਪਨਾ. ਪਰਮ੍ਮੁਖੇਨ ਵਿਕਪ੍ਪਨਾ ਪਰਮ੍ਮੁਖਾਵਿਕਪ੍ਪਨਾਤਿ ਕਰਣਤ੍ਥੇਨਪਿ ਅਤ੍ਥੋ ਦਟ੍ਠਬ੍ਬੋ. ਅਯਮੇਵ ਪਾਲ਼ਿਯਾ ਸਮੇਤਿ. ਸਨ੍ਨਿਹਿਤਾਸਨ੍ਨਿਹਿਤਭਾਵਨ੍ਤਿ ਆਸਨ੍ਨਦੂਰਭਾਵਂ. ਏਤ੍ਤਾਵਤਾ ਨਿਧੇਤੁਂ ਵਟ੍ਟਤੀਤਿ ਏਤ੍ਤਕੇਨੇਵ ਵਿਕਪ੍ਪਨਾਕਿਚ੍ਚਸ੍ਸ ਨਿਟ੍ਠਿਤਤ੍ਤਾ ਅਤਿਰੇਕਚੀਵਰਂ ਨ ਹੋਤੀਤਿ ਦਸਾਹਾਤਿਕ੍ਕਮੇ ਨਿਸ੍ਸਗ੍ਗਿਯਂ ਨ ਜਨੇਤੀਤਿ ਅਧਿਪ੍ਪਾਯੋ. ਪਰਿਭੁਞ੍ਜਿਤੁਂ…ਪੇ… ਨ ਵਟ੍ਟਤੀਤਿ ਸਯਂ ਅਪਚ੍ਚੁਦ੍ਧਾਰਣਪਰਿਭੁਞ੍ਜਨੇ ਪਾਚਿਤ੍ਤਿਯਂ, ਅਧਿਟ੍ਠਹਨੇ ਪਰੇਸਂ ਵਿਸ੍ਸਜ੍ਜਨੇ ਚ ਦੁਕ੍ਕਟਞ੍ਚ ਸਨ੍ਧਾਯ ਵੁਤ੍ਤਂ. ਪਰਿਭੋਗਾਦਯੋਪਿ ਵਟ੍ਟਨ੍ਤੀਤਿ ਪਰਿਭੋਗਵਿਸ੍ਸਜ੍ਜਨਅਧਿਟ੍ਠਾਨਾਨਿ ਵਟ੍ਟਨ੍ਤਿ. ਅਪਿ-ਸਦ੍ਦੇਨ ਨਿਧੇਤੁਮ੍ਪਿ ਵਟ੍ਟਤੀਤਿ ਅਤ੍ਥੋ. ਏਤੇਨ ਪਚ੍ਚੁਦ੍ਧਾਰੇਪਿ ਕਤੇ ਚੀਵਰਂ ਅਧਿਟ੍ਠਾਤੁਕਾਮੇਨ ਵਿਕਪ੍ਪਿਤਚੀਵਰਮੇਵ ਹੋਤਿ, ਨ ਅਤਿਰੇਕਚੀਵਰਂ, ਤਂ ਪਨ ਤਿਚੀਵਰਾਦਿਨਾਮੇਨ ਅਧਿਟ੍ਠਾਤੁਕਾਮੇਨ ਅਧਿਟ੍ਠਹਿਤਬ੍ਬਂ, ਇਤਰੇਨ ਵਿਕਪ੍ਪਿਤਚੀਵਰਮੇਵ ਕਤ੍ਵਾ ਪਰਿਭੁਞ੍ਜਿਤਬ੍ਬਨ੍ਤਿ ਦਸ੍ਸੇਤਿ.

ਕੇਚਿ ਪਨ ‘‘ਯਂ ਵਿਕਪ੍ਪਿਤਚੀਵਰਂ, ਤਂ ਯਾਵ ਪਰਿਭੋਗਕਾਲਾ ਅਪਚ੍ਚੁਦ੍ਧਰਾਪੇਤ੍ਵਾ ਨਿਦਹੇਤਬ੍ਬਂ, ਪਰਿਭੋਗਕਾਲੇ ਪਨ ਸਮ੍ਪਤ੍ਤੇ ਪਚ੍ਚੁਦ੍ਧਰਾਪੇਤ੍ਵਾ ਅਧਿਟ੍ਠਹਿਤ੍ਵਾ ਪਰਿਭੁਞ੍ਜਿਤਬ੍ਬਂ. ਯਦਿ ਹਿ ਤਤੋ ਪੁਬ੍ਬੇਪਿ ਪਚ੍ਚੁਦ੍ਧਰਾਪੇਯ੍ਯ, ਪਚ੍ਚੁਦ੍ਧਾਰੇਨੇਵ ਵਿਕਪ੍ਪਨਾਯ ਵਿਗਤਤ੍ਤਾ ਅਤਿਰੇਕਚੀਵਰਂ ਨਾਮ ਹੋਤਿ, ਦਸਾਹਾਤਿਕ੍ਕਮੇ ਪਤ੍ਤੇਵ ਨਿਸ੍ਸਗ੍ਗਿਯਂ, ਤਸ੍ਮਾ ਯਂ ਅਪਰਿਭੁਞ੍ਜਿਤ੍ਵਾ ਠਪੇਤਬ੍ਬਂ, ਤਦੇਵ ਵਿਕਪ੍ਪੇਤਬ੍ਬਂ. ਪਚ੍ਚੁਦ੍ਧਾਰੇ ਚ ਕਤੇ ਅਨ੍ਤੋਦਸਾਹੇਯੇਵ ਅਧਿਟ੍ਠਾਤਬ੍ਬਂ. ਯਞ੍ਚ ਅਟ੍ਠਕਥਾਯਂ (ਪਾਰਾ. ਅਟ੍ਠ. ੨.੪੬੯) ‘ਤਤੋ ਪਰਂ ਪਰਿਭੋਗਾਦਿ ਵਟ੍ਟਤੀ’ਤਿਆਦਿ ਵੁਤ੍ਤਂ, ਤਂ ਪਾਲ਼ਿਯਾ ਵਿਰੁਜ੍ਝਤੀ’’ਤਿ ਵਦਨ੍ਤਿ, ਤਂ ਤੇਸਂ ਮਤਿਮਤ੍ਤਮੇਵ. ਪਾਲ਼ਿਯਞ੍ਹਿ ‘‘ਅਨ੍ਤੋਦਸਾਹਂ ਅਧਿਟ੍ਠੇਤਿ ਵਿਕਪ੍ਪੇਤੀ’’ਤਿ (ਪਾਰਾ. ੪੬੯) ਚ ‘‘ਸਾਮਂ ਚੀਵਰਂ ਵਿਕਪ੍ਪੇਤ੍ਵਾ ਅਪਚ੍ਚੁਦ੍ਧਾਰਣਂ ਪਰਿਭੁਞ੍ਜੇਯ੍ਯ ਪਾਚਿਤ੍ਤਿਯ’’ਨ੍ਤਿ (ਪਾਚਿ. ੩੭੩) ਚ ‘‘ਅਨਾਪਤ੍ਤਿ ਸੋ ਵਾ ਦੇਤਿ, ਤਸ੍ਸ ਵਾ ਵਿਸ੍ਸਾਸਨ੍ਤੋ ਪਰਿਭੁਞ੍ਜਤੀ’’ਤਿ (ਪਾਚਿ. ੩੭੬) ਚ ਸਾਮਞ੍ਞਤੋ ਵੁਤ੍ਤਤ੍ਤਾ, ਅਟ੍ਠਕਥਾਯਞ੍ਚ (ਪਾਰਾ. ਅਟ੍ਠ. ੨.੪੬੯) ‘‘ਇਮਂ ਚੀਵਰਂ ਵਾ ਵਿਕਪ੍ਪਨਂ ਵਾ ਪਚ੍ਚੁਦ੍ਧਰਾਮੀ’’ਤਿਆਦਿਨਾ ਪਚ੍ਚੁਦ੍ਧਾਰਂ ਅਦਸ੍ਸੇਤ੍ਵਾ ‘‘ਮਯ੍ਹਂ ਸਨ੍ਤਕਂ ਪਰਿਭੁਞ੍ਜ ਵਾ ਵਿਸ੍ਸਜ੍ਜੇਹਿ ਵਾ ਯਥਾਪਚ੍ਚਯਂ ਕਰੋਹੀ’’ਤਿ ਏਵਂ ਅਤ੍ਤਨੋ ਸਨ੍ਤਕਤ੍ਤਂ ਅਮੋਚੇਤ੍ਵਾਵ ਪਰਿਭੋਗਾਦਿਵਸੇਨ ਪਚ੍ਚੁਦ੍ਧਾਰਸ੍ਸ ਵੁਤ੍ਤਤ੍ਤਾ, ‘‘ਤਤੋ ਪਭੁਤਿ ਪਰਿਭੋਗਾਦਯੋਪਿ ਵਟ੍ਟਨ੍ਤੀ’’ਤਿ ਅਧਿਟ੍ਠਾਨਂ ਵਿਨਾਪਿ ਵਿਸੁਂ ਪਰਿਭੋਗਸ੍ਸ ਨਿਧਾਨਸ੍ਸ ਚ ਵੁਤ੍ਤਤ੍ਤਾ ਵਿਕਪ੍ਪਨਾਨਨ੍ਤਰਮੇਵ ਪਚ੍ਚੁਦ੍ਧਰਾਪੇਤ੍ਵਾ ਅਨਧਿਟ੍ਠਹਿਤ੍ਵਾ ਏਵ ਚ ਤਿਚੀਵਰਰਹਿਤਂ ਵਿਕਪ੍ਪਨਾਰਹਂ ਚੀਵਰਂ ਪਰਿਭੁਞ੍ਜਿਤੁਞ੍ਚ ਨਿਦਹਿਤੁਞ੍ਚ ਇਦਂ ਪਾਟੇਕ੍ਕਂ ਵਿਨਯਕਮ੍ਮਨ੍ਤਿ ਖਾਯਤਿ. ਅਪਿਚ ਬਹੂਨਂ ਪਤ੍ਤਾਨਂ ਵਿਕਪ੍ਪੇਤੁਂ ਪਚ੍ਚੁਦ੍ਧਰੇਤੁਞ੍ਚ ਵੁਤ੍ਤਤ੍ਤਾ ਪਚ੍ਚੁਦ੍ਧਾਰੇ ਤੇਸਂ ਅਤਿਰੇਕਪਤ੍ਤਤਾ ਦਸ੍ਸਿਤਾਤਿ ਸਿਜ੍ਝਤਿ ਤੇਸੁ ਏਕਸ੍ਸੇਵ ਅਧਿਟ੍ਠਾਤਬ੍ਬਤੋ, ਤਸ੍ਮਾ ਅਟ੍ਠਕਥਾਯਂ ਆਗਤਨਯੇਨੇਵ ਗਹੇਤਬ੍ਬਂ.

ਮਿਤ੍ਤੋਤਿ ਦਲ਼੍ਹਮਿਤ੍ਤੋ. ਸਨ੍ਦਿਟ੍ਠੋਤਿ ਦਿਟ੍ਠਮਤ੍ਤੋ, ਨ ਦਲ਼੍ਹਮਿਤ੍ਤੋ. ਪਞ੍ਞਤ੍ਤਿਕੋਵਿਦੋ ਨ ਹੋਤੀਤਿ ਏਵਂ ਵਿਕਪ੍ਪਿਤੇ ਅਨਨ੍ਤਰਮੇਵ ਏਵਂ ਪਚ੍ਚੁਦ੍ਧਰਿਤਬ੍ਬਨ੍ਤਿ ਵਿਨਯਕਮ੍ਮਂ ਨ ਜਾਨਾਤਿ. ਤੇਨਾਹ ‘‘ਨ ਜਾਨਾਤਿ ਪਚ੍ਚੁਦ੍ਧਰਿਤੁ’’ਨ੍ਤਿ. ਇਮਿਨਾਪਿ ਚੇਤਂ ਵੇਦਿਤਬ੍ਬਂ ‘‘ਵਿਕਪ੍ਪਨਾਸਮਨਨ੍ਤਰਮੇਵ ਪਚ੍ਚੁਦ੍ਧਾਰੋ ਕਾਤਬ੍ਬੋ’’ਤਿ. ਵਿਕਪ੍ਪਿਤਵਿਕਪ੍ਪਨਾ ਨਾਮੇਸਾ ਵਟ੍ਟਤੀਤਿ ਅਧਿਟ੍ਠਿਤਅਧਿਟ੍ਠਾਨਂ ਵਿਯਾਤਿ ਅਧਿਪ੍ਪਾਯੋ.

੪੮. ਏਵਂ ਚੀਵਰੇ ਅਧਿਟ੍ਠਾਨਵਿਕਪ੍ਪਨਾਨਯਂ ਦਸ੍ਸੇਤ੍ਵਾ ਇਦਾਨਿ ਪਤ੍ਤੇ ਅਧਿਟ੍ਠਾਨਵਿਕਪ੍ਪਨਾਨਯਂ ਦਸ੍ਸੇਨ੍ਤੋ ‘‘ਪਤ੍ਤੇ ਪਨਾ’’ਤਿਆਦਿਮਾਹ. ਤਤ੍ਥ ਪਤਤਿ ਪਿਣ੍ਡਪਾਤੋ ਏਤ੍ਥਾਤਿ ਪਤ੍ਤੋ, ਜਿਨਸਾਸਨਭਾਵੋ ਭਿਕ੍ਖਾਭਾਜਨਵਿਸੇਸੋ. ਵੁਤ੍ਤਞ੍ਹਿ ‘‘ਪਤ੍ਤਂ ਪਕ੍ਖੇ ਦਲੇ ਪਤ੍ਤੋ, ਭਾਜਨੇ ਸੋ ਗਤੇ ਤਿਸੂ’’ਤਿ, ਤਸ੍ਮਿਂ ਪਤ੍ਤੇ. ਪਨਾਤਿ ਪਕ੍ਖਨ੍ਤਰਤ੍ਥੇ ਨਿਪਾਤੋ. ਨਯੋਤਿ ਅਧਿਟ੍ਠਾਨਵਿਕਪ੍ਪਨਾਨਯੋ. ਚੀਵਰੇ ਵੁਤ੍ਤਅਧਿਟ੍ਠਾਨਵਿਕਪ੍ਪਨਾਨਯਤੋ ਅਞ੍ਞਭੂਤੋ ਅਯਂ ਵਕ੍ਖਮਾਨੋ ਪਤ੍ਤੇ ਅਧਿਟ੍ਠਾਨਵਿਕਪ੍ਪਨਾਨਯੋ ਵੇਦਿਤਬ੍ਬੋਤਿ ਯੋਜਨਾ. ਪਤ੍ਤਂ ਅਧਿਟ੍ਠਹਨ੍ਤੇਨ ਪਮਾਣਯੁਤ੍ਤੋਵ ਅਧਿਟ੍ਠਾਤਬ੍ਬੋ, ਨ ਅਪ੍ਪਮਾਣਯੁਤ੍ਤੋਤਿ ਸਮ੍ਬਨ੍ਧੋ. ਤੇਨ ਪਮਾਣਤੋ ਊਨਾਧਿਕੇ ਪਤ੍ਤੇ ਅਧਿਟ੍ਠਾਨਂ ਨ ਰੁਹਤਿ, ਤਸ੍ਮਾ ਤਾਦਿਸਂ ਪਤ੍ਤਂ ਭਾਜਨਪਰਿਭੋਗੇਨ ਪਰਿਭੁਞ੍ਜਿਤਬ੍ਬਨ੍ਤਿ ਦਸ੍ਸੇਤਿ. ਵਕ੍ਖਤਿ ਹਿ ‘‘ਏਤੇ ਭਾਜਨਪਰਿਭੋਗੇਨ ਪਰਿਭੁਞ੍ਜਿਤਬ੍ਬਾ, ਨ ਅਧਿਟ੍ਠਾਨੂਪਗਾ ਨ ਵਿਕਪ੍ਪਨੂਪਗਾ’’ਤਿ.

ਦ੍ਵੇ ਮਗਧਨਾਲ਼ਿਯੋਤਿ ਏਤ੍ਥ ਮਗਧਨਾਲ਼ਿ ਨਾਮ ਯਾ ਮਾਗਧਿਕਾਯ ਤੁਲਾਯ ਅਡ੍ਢਤੇਰਸਪਲਪਰਿਮਿਤਂ ਉਦਕਂ ਗਣ੍ਹਾਤਿ. ਸੀਹਲ਼ਦੀਪੇ ਪਕਤਿਨਾਲ਼ਿਤੋ ਖੁਦ੍ਦਕਾ ਹੋਤਿ, ਦਮਿਲ਼ਨਾਲ਼ਿਤੋ ਪਨ ਮਹਨ੍ਤਾ. ਵੁਤ੍ਤਞ੍ਹੇਤਂ ਸਮਨ੍ਤਪਾਸਾਦਿਕਾਯਂ (ਪਾਰਾ. ਅਟ੍ਠ. ੨.੬੦੨) ‘‘ਮਗਧਨਾਲ਼ਿ ਨਾਮ ਅਡ੍ਢਤੇਰਸਪਲਾ ਹੋਤੀਤਿ ਅਨ੍ਧਕਟ੍ਠਕਥਾਯਂ ਵੁਤ੍ਤਂ. ਸੀਹਲ਼ਦੀਪੇ ਪਕਤਿਨਾਲ਼ਿ ਮਹਨ੍ਤਾ, ਦਮਿਲ਼ਨਾਲ਼ਿ ਖੁਦ੍ਦਕਾ, ਮਗਧਨਾਲ਼ਿਪਮਾਣਯੁਤ੍ਤਾ, ਤਾਯ ਮਗਧਨਾਲ਼ਿਯਾ ਦਿਯਡ੍ਢਨਾਲ਼ਿ ਏਕਾ ਸੀਹਲ਼ਨਾਲ਼ਿ ਹੋਤੀਤਿ ਮਹਾਅਟ੍ਠਕਥਾਯਂ ਵੁਤ੍ਤ’’ਨ੍ਤਿ. ਅਥ ਵਾ ਮਗਧਨਾਲ਼ਿ ਨਾਮ ਯਾ ਪਞ੍ਚ ਕੁਡੁਵਾਨਿ ਏਕਞ੍ਚ ਮੁਟ੍ਠਿਂ ਏਕਾਯ ਚ ਮੁਟ੍ਠਿਯਾ ਤਤਿਯਭਾਗਂ ਗਣ੍ਹਾਤਿ. ਵੁਤ੍ਤਞ੍ਹੇਤਂ ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ੨.੫੯੮-੬੦੨) ‘‘ਮਗਧਨਾਲ਼ਿ ਨਾਮ ਛਪਸਤਾ ਨਾਲ਼ੀਤਿ ਕੇਚਿ. ‘ਅਟ੍ਠਪਸਤਾ’ਤਿ ਅਪਰੇ. ਤਤ੍ਥ ਪੁਰਿਮਾਨਂ ਮਤੇਨ ਤਿਪਸਤਾਯ ਨਾਲ਼ਿਯਾ ਦ੍ਵੇ ਨਾਲ਼ਿਯੋ ਏਕਾ ਮਗਧਨਾਲ਼ਿ ਹੋਤਿ. ਪਚ੍ਛਿਮਾਨਂ ਚਤੁਪਸਤਾਯ ਨਾਲ਼ਿਯਾ ਦ੍ਵੇ ਨਾਲ਼ਿਯੋ ਏਕਾ ਮਗਧਨਾਲ਼ਿ. ਆਚਰਿਯਧਮ੍ਮਪਾਲਤ੍ਥੇਰੇਨ ਪਨ ਪਕਤਿਯਾ ਚਤੁਮੁਟ੍ਠਿਕਂ ਕੁਡੁਵਂ, ਚਤੁਕੁਡੁਵਂ ਨਾਲ਼ਿਕਂ, ਤਾਯ ਨਾਲ਼ਿਯਾ ਸੋਲ਼ਸ ਨਾਲ਼ਿਯੋ ਦੋਣਂ, ਤਂ ਪਨ ਮਗਧਨਾਲ਼ਿਯਾ ਦ੍ਵਾਦਸ ਨਾਲ਼ਿਯੋ ਹੋਨ੍ਤੀਤਿ ਵੁਤ੍ਤਂ, ਤਸ੍ਮਾ ਤੇਨ ਨਯੇਨ ਮਗਧਨਾਲ਼ਿ ਨਾਮ ਪਞ੍ਚ ਕੁਡੁਵਾਨਿ ਏਕਞ੍ਚ ਮੁਟ੍ਠਿਂ ਏਕਾਯ ਮੁਟ੍ਠਿਯਾ ਤਤਿਯਭਾਗਞ੍ਚ ਗਣ੍ਹਾਤੀਤਿ ਵੇਦਿਤਬ੍ਬ’’ਨ੍ਤਿ. ਤਤ੍ਥ ਕੁਡੁਵੋਤਿ ਪਸਤੋ. ਵੁਤ੍ਤਞ੍ਹਿ ਅਭਿਧਾਨਪ੍ਪਦੀਪਿਕਾਯਂ –

‘‘ਕੁਡੁਵੋ ਪਸਤੋ ਏਕੋ;

ਪਤ੍ਥੋ ਤੇ ਚਤੁਰੋ ਸਿਯੁਂ;

ਆਲ਼੍ਹਕੋ ਚਤੁਰੋ ਪਤ੍ਥਾ;

ਦੋਣਂ ਵਾ ਚਤੁਰਾਲ਼੍ਹਕ’’ਨ੍ਤਿ.

ਅਥ ਵਾ ਮਗਧਨਾਲ਼ਿ ਨਾਮ ਯਾ ਚਤੁਕੁਡੁਵਾਯ ਨਾਲ਼ਿਯਾ ਚਤਸ੍ਸੋ ਨਾਲ਼ਿਯੋ ਗਣ੍ਹਾਤਿ. ਵੁਤ੍ਤਞ੍ਹੇਤਂ ਵਿਮਤਿਵਿਨੋਦਨਿਯਂ (ਵਿ. ਵਿ. ਟੀ. ੧.੬੦੨) ‘‘ਦਮਿਲ਼ਨਾਲ਼ੀਤਿ ਪੁਰਾਣਕਨਾਲ਼ਿਂ ਸਨ੍ਧਾਯ ਵੁਤ੍ਤਂ. ਸਾ ਚ ਚਤੁਮੁਟ੍ਠਿਕੇਹਿ ਕੁਡੁਵੇਹਿ ਅਟ੍ਠਕੁਡੁਵਾ, ਤਾਯ ਨਾਲ਼ਿਯਾ ਦ੍ਵੇ ਨਾਲ਼ਿਯੋ ਮਗਧਨਾਲ਼ਿ ਗਣ੍ਹਾਤਿ, ਪੁਰਾਣਾ ਪਨ ਸੀਹਲ਼ਨਾਲ਼ਿ ਤਿਸ੍ਸੋ ਨਾਲ਼ਿਯੋ ਗਣ੍ਹਾਤੀਤਿ ਵਦਨ੍ਤਿ, ਤੇਸਂ ਮਤੇਨ ਮਗਧਨਾਲ਼ਿ ਇਦਾਨਿ ਵਤ੍ਤਮਾਨਾਯ ਚਤੁਕੁਡੁਵਾਯ ਦਮਿਲ਼ਨਾਲ਼ਿਯਾ ਚਤੁਨਾਲ਼ਿਕਾ ਹੋਤਿ, ਤਤੋ ਮਗਧਨਾਲ਼ਿਤੋ ਉਪਡ੍ਢਞ੍ਚ ਪੁਰਾਣਦਮਿਲ਼ਨਾਲ਼ਿਸਙ੍ਖਾਤਂ ਪਤ੍ਥਂ ਨਾਮ ਹੋਤਿ, ਏਤੇਨ ਚ ਓਮਕੋ ਨਾਮ ਪਤ੍ਤੋ ਪਤ੍ਥੋਦਨਂ ਗਣ੍ਹਾਤੀਤਿ ਪਾਲ਼ਿਵਚਨਂ ਸਮੇਤਿ. ਲੋਕਿਯੇਹਿਪਿ –

‘ਲੋਕਿਯਂ ਮਗਧਞ੍ਚੇਤਿ, ਪਤ੍ਥਦ੍ਵਯਮੁਦਾਹਟਂ;

ਲੋਕਿਯਂ ਸੋਲ਼ਸਪਲਂ, ਮਾਗਧਂ ਦਿਗੁਣਂ ਮਤ’ਨ੍ਤਿ. (ਵਿ. ਵਿ. ਟੀ. ੧.੬੦੨) –

ਏਵਂ ਲੋਕੇ ਨਾਲ਼ਿਯਾ ਮਗਧਨਾਲ਼ਿ ਦਿਗੁਣਾਤਿ ਦਸ੍ਸਿਤਾ. ਏਵਞ੍ਚ ਗਯ੍ਹਮਾਨੇ ਓਮਕਪਤ੍ਤਸ੍ਸ ਚ ਯਾਪਨਮਤ੍ਤੋਦਨਗਾਹਿਕਾ ਚ ਸਿਦ੍ਧਾ ਹੋਤਿ. ਨ ਹਿ ਸਕ੍ਕਾ ਅਟ੍ਠਕੁਡੁਵਤੋ ਊਨੋਦਨਗਾਹਿਨਾ ਪਤ੍ਤੇਨ ਅਥੂਪੀਕਤਂ ਪਿਣ੍ਡਪਾਤਂ ਪਰਿਯੇਸਿਤ੍ਵਾ ਯਾਪੇਤੁਂ. ਤੇਨੇਵ ਵੁਤ੍ਤਂ ਵੇਰਞ੍ਜਕਣ੍ਡਟ੍ਠਕਥਾਯਂ ‘ਪਤ੍ਥੋ ਨਾਮ ਨਾਲ਼ਿਮਤ੍ਤਂ ਹੋਤਿ, ਏਕਸ੍ਸ ਪੁਰਿਸਸ੍ਸ ਅਲਂ ਯਾਪਨਾਯਾ’ਤਿ’’. ਵੁਤ੍ਤਮ੍ਪਿ ਹੇਤਂ ਜਾਤਕਟ੍ਠਕਥਾਯਂ (ਜਾ. ਅਟ੍ਠ. ੫.੨੧.੧੯੨) ‘‘ਪਤ੍ਥੋਦਨੋ ਨਾਲਮਯਂ ਦੁਵਿਨ੍ਨ’’ਨ੍ਤਿ, ‘‘ਏਕਸ੍ਸ ਦਿਨ੍ਨਂ ਦ੍ਵਿਨ੍ਨਂ ਤਿਣ੍ਣਂ ਪਹੋਤੀ’’ਤਿ ਚ, ਤਸ੍ਮਾ ਇਧ ਵੁਤ੍ਤਨਯਾਨੁਸਾਰੇਨ ਗਹੇਤਬ੍ਬਨ੍ਤਿ. ਆਲੋਪਸ੍ਸ ਆਲੋਪਸ੍ਸ ਅਨੁਰੂਪਨ੍ਤਿ ਓਦਨਸ੍ਸ ਚਤੁਭਾਗਮਤ੍ਤਂ. ਵੁਤ੍ਤਞ੍ਹੇਤਂ ਮਜ੍ਝਿਮਨਿਕਾਯੇ ਬ੍ਰਹ੍ਮਾਯੁਸੁਤ੍ਤਸਂਵਣ੍ਣਨਾਯਂ (ਮ. ਨਿ. ਅਟ੍ਠ. ੨.੩੮੭) ‘‘ਬ੍ਯਞ੍ਜਨਸ੍ਸ ਮਤ੍ਤਾ ਨਾਮ ਓਦਨਚਤੁਤ੍ਥਭਾਗੋ’’ਤਿ. ਓਦਨਗਤਿਕਾਨੀਤਿ ਓਦਨਸ੍ਸ ਗਤਿ ਗਤਿ ਯੇਸਂ ਤਾਨਿ ਓਦਨਗਤਿਕਾਨਿ. ਗਤੀਤਿ ਚ ਓਕਾਸੋ ਓਦਨਸ੍ਸ ਅਨ੍ਤੋਪਵਿਸਨਸੀਲਤ੍ਤਾ ਓਦਨਸ੍ਸ ਓਕਾਸੋਯੇਵ ਤੇਸਂ ਓਕਾਸੋ ਹੋਤਿ, ਨ ਅਞ੍ਞਂ ਅਤ੍ਤਨੋ ਓਕਾਸਂ ਗਵੇਸਨ੍ਤੀਤਿ ਅਤ੍ਥੋ. ਭਾਜਨਪਰਿਭੋਗੇਨਾਤਿ ਉਦਕਾਹਰਣਾਦਿਨਾ ਭਾਜਨਪਰਿਭੋਗੇਨ.

ਏਵਂ ਪਮਾਣਤੋ ਅਧਿਟ੍ਠਾਨੂਪਗਵਿਕਪ੍ਪਨੂਪਗਪਤ੍ਤਂ ਦਸ੍ਸੇਤ੍ਵਾ ਇਦਾਨਿ ਪਾਕਤੋ ਮੂਲਤੋ ਚ ਤਂ ਦਸ੍ਸੇਤੁਂ ‘‘ਪਮਾਣਯੁਤ੍ਤਾਨਮ੍ਪੀ’’ਤਿਆਦਿਮਾਹ. ਤਤ੍ਥ ਅਯੋਪਤ੍ਤੋ ਪਞ੍ਚਹਿ ਪਾਕੇਹਿ ਪਤ੍ਤੋਤਿ ਕਮ੍ਮਾਰਪਕ੍ਕਂਯੇਵ ਅਨਧਿਟ੍ਠਹਿਤ੍ਵਾ ਸਮਣਸਾਰੁਪ੍ਪਨੀਲਵਣ੍ਣਕਰਣਤ੍ਥਾਯ ਪੁਨਪ੍ਪੁਨਂ ਨਾਨਾਸਮ੍ਭਾਰੇਹਿ ਪਚਿਤਬ੍ਬੋ, ਅਯੋਪਤ੍ਤਸ੍ਸ ਅਤਿਕਕ੍ਖਲ਼ਤ੍ਤਾ ਕਮ੍ਮਾਰਪਾਕੇਨ ਸਦ੍ਧਿਂ ਪਞ੍ਚਵਾਰਪਕ੍ਕੋਯੇਵ ਸਮਣਸਾਰੁਪ੍ਪਨੀਲਵਣ੍ਣੋ ਹੋਤਿ. ਮਤ੍ਤਿਕਾਪਤ੍ਤੋ ਦ੍ਵੀਹਿ ਪਾਕੇਹਿ ਪਕ੍ਕੋਤਿ ਏਤ੍ਥਾਪਿ ਏਸੇਵ ਨਯੋ. ਤਸ੍ਸ ਪਨ ਮੁਦੁਕਤ੍ਤਾ ਕੁਮ੍ਭਕਾਰਕਪਾਕੇਨ ਸਦ੍ਧਿਂ ਦ੍ਵਿਵਾਰਪਕ੍ਕੋਪਿ ਸਮਣਸਾਰੁਪ੍ਪਨੀਲਵਣ੍ਣੋ ਹੋਤਿ. ਏਵਂ ਕਤੋਯੇਵ ਹਿ ਪਤ੍ਤੋ ਅਧਿਟ੍ਠਾਨੂਪਗੋ ਵਿਕਪ੍ਪਨੂਪਗੋ ਚ ਹੋਤਿ, ਨਾਕਤੋ. ਤੇਨ ਵਕ੍ਖਤਿ ‘‘ਪਾਕੇ ਚ ਮੂਲੇ ਚ ਸੁਨਿਟ੍ਠਿਤੇਯੇਵ ਅਧਿਟ੍ਠਾਨੂਪਗੋ ਹੋਤਿ. ਯੋ ਅਧਿਟ੍ਠਾਨੂਪਗੋ, ਸ੍ਵੇਵ ਵਿਕਪ੍ਪਨੂਪਗੋ’’ਤਿ (ਵਿ. ਸਙ੍ਗ. ਅਟ੍ਠ. ੪੮). ਸੋ ਹਤ੍ਥਂ ਆਗਤੋਪਿ ਅਨਾਗਤੋਪਿ ਅਧਿਟ੍ਠਾਤਬ੍ਬੋ ਵਿਕਪ੍ਪੇਤਬ੍ਬੋਤਿ ਏਤੇਨ ਦੂਰੇ ਠਿਤਮ੍ਪਿ ਅਧਿਟ੍ਠਾਤੁਂ ਵਿਕਪ੍ਪੇਤੁਞ੍ਚ ਲਭਤਿ, ਠਪਿਤਟ੍ਠਾਨਸਲ੍ਲਕ੍ਖਣਮੇਵ ਪਮਾਣਨ੍ਤਿ ਦਸ੍ਸੇਤਿ. ਇਦਾਨਿ ਤਮੇਵਤ੍ਥਂ ਵਿਤ੍ਥਾਰੇਤੁਮਾਹ ‘‘ਯਦਿ ਹੀ’’ਤਿਆਦਿ. ਹਿ-ਸਦ੍ਦੋ ਵਿਤ੍ਥਾਰਜੋਤਕੋ. ਤਤ੍ਥ ਪਚਿਤ੍ਵਾ ਠਪੇਸ੍ਸਾਮੀਤਿ ਕਾਲ਼ਵਣ੍ਣਪਾਕਂ ਸਨ੍ਧਾਯ ਵੁਤ੍ਤਂ.

ਇਦਾਨਿ ਪਤ੍ਤਾਧਿਟ੍ਠਾਨਂ ਦਸ੍ਸੇਤੁਮਾਹ ‘‘ਤਤ੍ਥ ਦ੍ਵੇ ਪਤ੍ਤਸ੍ਸ ਅਧਿਟ੍ਠਾਨਾ’’ਤਿਆਦਿ. ਤਤ੍ਥ ਸਾਮਨ੍ਤਵਿਹਾਰੇਤਿ ਇਦਂ ਉਪਲਕ੍ਖਣਵਸੇਨ ਵੁਤ੍ਤਂ, ਤਤੋ ਦੂਰੇ ਠਿਤਮ੍ਪਿ ਅਧਿਟ੍ਠਾਤਬ੍ਬਮੇਵ. ਠਪਿਤਟ੍ਠਾਨਂ ਸਲ੍ਲਕ੍ਖੇਤ੍ਵਾਤਿ ਇਦਮ੍ਪਿ ਉਪਚਾਰਮਤ੍ਤਂ, ਪਤ੍ਤਸਲ੍ਲਕ੍ਖਣਮੇਵੇਤ੍ਥ ਪਮਾਣਂ.

ਇਦਾਨਿ ਅਧਿਟ੍ਠਾਨਵਿਜਹਨਂ ਦਸ੍ਸੇਤੁਂ ‘‘ਏਵਂ ਅਪ੍ਪਮਤ੍ਤਸ੍ਸ’’ਤ੍ਯਾਦਿਮਾਹ. ਤਤ੍ਥ ਪਤ੍ਤੇ ਵਾ ਛਿਦ੍ਦਂ ਹੋਤੀਤਿ ਮੁਖਵਟ੍ਟਿਤੋ ਹੇਟ੍ਠਾ ਦ੍ਵਙ੍ਗੁਲਮਤ੍ਤੋਕਾਸਤੋ ਪਟ੍ਠਾਯ ਯਤ੍ਥ ਕਤ੍ਥਚਿ ਛਿਦ੍ਦਂ ਹੋਤਿ.

ਸਤ੍ਤਨ੍ਨਂ ਧਞ੍ਞਾਨਨ੍ਤਿ –

‘‘ਸਾਲਿ ਵੀਹਿ ਚ ਕੁਦ੍ਰੂਸੋ;

ਗੋਧੂਮੋ ਵਰਕੋ ਯਵੋ;

ਕਙ੍ਗੂਤਿ ਸਤ੍ਤ ਧਞ੍ਞਾਨਿ;

ਨੀਵਾਰਾਦੀ ਤੁ ਤਬ੍ਭਿਦਾ’’ਤਿ. –

ਵੁਤ੍ਤਾਨਂ ਸਤ੍ਤਵਿਧਾਨਂ ਧਞ੍ਞਾਨਂ.

੪੯. ਏਵਂ ਪਤ੍ਤਾਧਿਟ੍ਠਾਨਂ ਦਸ੍ਸੇਤ੍ਵਾ ਇਦਾਨਿ ਪਤ੍ਤਵਿਕਪ੍ਪਨਂ ਦਸ੍ਸੇਤੁਂ ‘‘ਵਿਕਪ੍ਪਨੇ ਪਨਾ’’ਤਿਆਦਿਮਾਹ. ਤਂ ਚੀਵਰਵਿਕਪ੍ਪਨੇ ਵੁਤ੍ਤਨਯੇਨੇਵ ਵੇਦਿਤਬ੍ਬਂ.

੫੦. ਏਵਂ ਵਿਕਪ੍ਪਨਾਨਯਂ ਦਸ੍ਸੇਤ੍ਵਾ ਇਦਾਨਿ ਪਤ੍ਤੇ ਭਿਨ੍ਨੇ ਕਤ੍ਤਬ੍ਬਵਿਧਿਂ ਦਸ੍ਸੇਤੁਮਾਹ ‘‘ਏਵਂ ਅਧਿਟ੍ਠਹਿਤ੍ਵਾ’’ਇਚ੍ਚਾਦਿ. ਤਤ੍ਥ ਅਪਤ੍ਤੋਤਿ ਇਮਿਨਾ ਅਧਿਟ੍ਠਾਨਵਿਜਹਨਮ੍ਪਿ ਦਸ੍ਸੇਤਿ. ਪਞ੍ਚਬਨ੍ਧਨੇਪਿ ਪਤ੍ਤੇ ਅਪਰਿਪੁਣ੍ਣਪਾਕੇ ਪਤ੍ਤੇ ਵਿਯ ਅਧਿਟ੍ਠਾਨਂ ਨ ਰੁਹਤਿ. ‘‘ਤਿਪੁਪਟ੍ਟੇਨ ਵਾ’’ਤਿ ਵੁਤ੍ਤਤ੍ਤਾ ਤਮ੍ਬਲੋਹਾਦਿਕਪ੍ਪਿਯਲੋਹੇਹਿ ਅਯੋਪਤ੍ਤਸ੍ਸ ਛਿਦ੍ਦਂ ਛਾਦੇਤੁਂ ਵਟ੍ਟਤਿ. ਤੇਨੇਵ ‘‘ਲੋਹਮਣ੍ਡਲਕੇਨਾ’’ਤਿ ਵੁਤ੍ਤਂ. ਸੁਦ੍ਧੇਹਿ…ਪੇ… ਨ ਵਟ੍ਟਤੀਤਿ ਇਦਂ ਉਣ੍ਹਭੋਜਨੇ ਪਕ੍ਖਿਤ੍ਤੇ ਵਿਲੀਯਮਾਨਤ੍ਤਾ ਵੁਤ੍ਤਂ. ਫਾਣਿਤਂ ਝਾਪੇਤ੍ਵਾ ਪਾਸਾਣਚੁਣ੍ਣੇਨ ਬਨ੍ਧਿਤੁਂ ਵਟ੍ਟਤੀਤਿ ਪਾਸਾਣਚੁਣ੍ਣੇਨ ਸਦ੍ਧਿਂ ਫਾਣਿਤਂ ਪਚਿਤ੍ਵਾ ਤਥਾਪਕ੍ਕੇਨ ਪਾਸਾਣਚੁਣ੍ਣੇਨ ਬਨ੍ਧਿਤੁਂ ਵਟ੍ਟਤਿ. ਅਪਰਿਭੋਗੇਨਾਤਿ ਅਯੁਤ੍ਤਪਰਿਭੋਗੇਨ. ‘‘ਅਨੁਜਾਨਾਮਿ ਭਿਕ੍ਖਵੇ ਆਧਾਰਕ’’ਨ੍ਤਿ ਵੁਤ੍ਤਤ੍ਤਾ ਮਞ੍ਚਪੀਠਾਦੀਸੁ ਯਤ੍ਥ ਕਤ੍ਥਚਿ ਆਧਾਰਕਂ ਠਪੇਤ੍ਵਾ ਤਤ੍ਥ ਪਤ੍ਤਂ ਠਪੇਤੁਂ ਵਟ੍ਟਤਿ ਆਧਾਰਕਟ੍ਠਪਨੋਕਾਸਸ੍ਸ ਅਨਿਯਮਿਤਤ੍ਤਾਤਿ ਵਦਨ੍ਤਿ.

ਇਤਿ ਵਿਨਯਸਙ੍ਗਹਸਂਵਣ੍ਣਨਾਭੂਤੇ ਵਿਨਯਾਲਙ੍ਕਾਰੇ

ਅਧਿਟ੍ਠਾਨਵਿਕਪ੍ਪਨਵਿਨਿਚ੍ਛਯਕਥਾਲਙ੍ਕਾਰੋ ਨਾਮ

ਅਟ੍ਠਮੋ ਪਰਿਚ੍ਛੇਦੋ.