੩੩. ਕਮ੍ਮਾਕਮ੍ਮਵਿਨਿਚ੍ਛਯਕਥਾ

੨੪੯. ਏਵਂ ਗਰੁਕਾਪਤ੍ਤਿਵੁਟ੍ਠਾਨਵਿਨਿਚ੍ਛਯਕਥਂ ਕਥੇਤ੍ਵਾ ਇਦਾਨਿ ਕਮ੍ਮਾਕਮ੍ਮਵਿਨਿਚ੍ਛਯਕਥਂ ਕਥੇਤੁਂ ‘‘ਕਮ੍ਮਾਕਮ੍ਮਨ੍ਤਿ ਏਤ੍ਥ ਪਨਾ’’ਤਿਆਦਿਮਾਹ. ਤਤ੍ਥ ਸਮਗ੍ਗੇਨ ਸਙ੍ਘੇਨ ਕਰੀਯਤੇ ਤਨ੍ਤਿ ਕਮ੍ਮਂ, ਅਪਲੋਕਨਾਦਿਚਤੁਬ੍ਬਿਧਵਿਨਯਕਮ੍ਮਂ. ਇਤਰਸ੍ਮਿਮ੍ਪਿ ਏਸੇਵ ਨਯੋ. ਅ-ਕਾਰੋ ਵੁਦ੍ਧਿਅਤ੍ਥੋ, ਨ ਵੁਦ੍ਧਿਪ੍ਪਤ੍ਤਂ ਕਮ੍ਮਂ ਅਕਮ੍ਮਂ. ਕਮ੍ਮਞ੍ਚ ਅਕਮ੍ਮਞ੍ਚ ਕਮ੍ਮਾਕਮ੍ਮਂ ਵਜ੍ਜਾਵਜ੍ਜਂ ਵਿਯ, ਫਲਾਫਲਂ ਵਿਯ ਚ. ਤਤ੍ਥ ਚ ਕਮ੍ਮਨ੍ਤਿ ਅਪਲੋਕਨਕਮ੍ਮਞਤ੍ਤਿਕਮ੍ਮਦ੍ਵਯਂ. ਅਕਮ੍ਮਨ੍ਤਿ ਞਤ੍ਤਿਦੁਤਿਯਕਮ੍ਮਞਤ੍ਤਿਚਤਉਤ੍ਥਕਮ੍ਮਦ੍ਵਯਂ. ਅਥ ਵਾ ਕਮ੍ਮਨ੍ਤਿ ਚਤੂਸੁਪਿ ਏਤੇਸੁ ਲਹੁਕਕਮ੍ਮਂ. ਅਕਮ੍ਮਨ੍ਤਿ ਗਰੁਕਕਮ੍ਮਂ. ਕਮ੍ਮਾਕਮ੍ਮਨ੍ਤਿ ਏਤ੍ਥ ਪਨ ਵਿਨਿਚ੍ਛਯੋ ਏਵਂ ਵੇਦਿਤਬ੍ਬੋਤਿ ਯੋਜਨਾ. ਤਤ੍ਥ ਪਨਾਤਿ ਪਕ੍ਖਨ੍ਤਰਤ੍ਥੇ ਨਿਪਾਤੋ, ਗਰੁਕਾਪਤ੍ਤਿਵੁਟ੍ਠਾਨਵਿਨਿਚ੍ਛਯਕਥਾਪਕ੍ਖਤੋ ਅਞ੍ਞੋ ਕਮ੍ਮਾਕਮ੍ਮਵਿਨਿਚ੍ਛਯਕਥਾਪਕ੍ਖੋ ਵੇਦਿਤਬ੍ਬੋਤਿ ਵਾ ਮਯਾ ਵੁਚ੍ਚਤੇਤਿ ਵਾ ਅਤ੍ਥੋ.

ਚਤ੍ਤਾਰਿ ਕਮ੍ਮਾਨੀਤਿ ਏਤ੍ਥ ਚਤ੍ਤਾਰੀਤਿ ਪਰਿਚ੍ਛੇਦਨਿਦਸ੍ਸਨਂ. ਤੇਨ ਵਿਨਯਕਮ੍ਮਾਨਿ ਨਾਮ ਚਤ੍ਤਾਰਿ ਏਵ ਹੋਨ੍ਤਿ, ਨ ਇਤੋ ਊਨਾਧਿਕਾਨੀਤਿ ਦਸ੍ਸੇਤਿ. ਕਮ੍ਮਾਨੀਤਿ ਪਰਿਚ੍ਛਿਨ੍ਨਕਮ੍ਮਨਿਦਸ੍ਸਨਂ. ਅਪਲੋਕਨਕਮ੍ਮਨ੍ਤਿਆਦੀਨਿ ਪਰਿਚ੍ਛਿਨ੍ਨਕਮ੍ਮਾਨਂ ਉਦ੍ਦੇਸਕਥਨਂ. ਤਤ੍ਥ ਅਪਲੋਕੀਯਤੇ ਆਯਾਚੀਯਤੇ ਅਪਲੋਕਨਂ, ਅਪਪੁਬ੍ਬਲੋਕਧਾਤੁ ਆਯਾਚਨਤ੍ਥੇ, ਯੁਪਚ੍ਚਯੋ ਭਾਵਤ੍ਥਵਾਚਕੋ. ਅਪਲੋਕਨਵਸੇਨ ਕਤ੍ਤਬ੍ਬਂ ਕਮ੍ਮਂ ਅਪਲੋਕਨਕਮ੍ਮਂ, ਸੀਮਟ੍ਠਕਸਙ੍ਘਂ ਅਪਲੋਕੇਤ੍ਵਾ ਸਙ੍ਘਾਨੁਮਤਿਯਾ ਕਤ੍ਤਬ੍ਬਂ ਕਮ੍ਮਂ. ਞਾਪਨਾ ਞਤ੍ਤਿ, ਸਙ੍ਘਸ੍ਸ ਜਾਨਾਪਨਾਤਿ ਅਤ੍ਥੋ. ਞਤ੍ਤਿਯਾ ਕਤ੍ਤਬ੍ਬਂ ਕਮ੍ਮਂ ਞਤ੍ਤਿਕਮ੍ਮਂ, ਅਨੁਸ੍ਸਾਵਨਂ ਅਕਤ੍ਵਾ ਸੁਦ੍ਧਞਤ੍ਤਿਯਾਯੇਵ ਕਤ੍ਤਬ੍ਬਕਮ੍ਮਂ. ਦ੍ਵਿਨ੍ਨਂ ਪੂਰਣੀ ਦੁਤਿਯਾ, ਞਤ੍ਤਿ ਦੁਤਿਯਾ ਏਤਸ੍ਸ ਕਮ੍ਮਸ੍ਸਾਤਿ ਞਤ੍ਤਿਦੁਤਿਯਂ, ਞਤ੍ਤਿਦੁਤਿਯਞ੍ਚ ਤਂ ਕਮ੍ਮਞ੍ਚਾਤਿ ਞਤ੍ਤਿਦੁਤਿਯਕਮ੍ਮਂ, ਏਕਾਯ ਞਤ੍ਤਿਯਾ ਏਕਾਯ ਅਨੁਸ੍ਸਾਵਨਾਯ ਕਤ੍ਤਬ੍ਬਕਮ੍ਮਂ. ਚਤੁਨ੍ਨਂ ਪੂਰਣੀ ਚਤੁਤ੍ਥੀ, ਞਤ੍ਤਿ ਚਤੁਤ੍ਥੀ ਏਤਸ੍ਸ ਕਮ੍ਮਸ੍ਸਾਤਿ ਞਤ੍ਤਿਚਤੁਤ੍ਥਂ, ਞਤ੍ਤਿਚਤੁਤ੍ਥਞ੍ਚ ਤਂ ਕਮ੍ਮਞ੍ਚਾਤਿ ਞਤ੍ਤਿਚਤੁਤ੍ਥਕਮ੍ਮਂ, ਏਕਾਯ ਞਤ੍ਤਿਯਾ ਤੀਹਿ ਅਨੁਸ੍ਸਾਵਨਾਹਿ ਕਤ੍ਤਬ੍ਬਕਮ੍ਮਂ. ਤੇਨ ਵਕ੍ਖਤਿ ‘‘ਅਪਲੋਕਨਕਮ੍ਮਂ ਨਾਮ ਸੀਮਟ੍ਠਕਸਙ੍ਘਂ ਸੋਧੇਤ੍ਵਾ’’ਤਿਆਦਿ.

ਏਵਂ ਚਤ੍ਤਾਰਿ ਕਮ੍ਮਾਨਿ ਉਦ੍ਦਿਸਿਤ੍ਵਾ ਪਰਿਵਾਰੇ (ਪਰਿ. ੪੮੨ ਆਦਯੋ) ਕਮ੍ਮਵਗ੍ਗੇ ਆਗਤਨਯੇਨੇਵ ਤੇਸਂ ਚਤੁਨ੍ਨਂ ਕਮ੍ਮਾਨਂ ਵਿਪਤ੍ਤਿਕਾਰਣਾਨਿ ਪੁਚ੍ਛਿਤ੍ਵਾ ਵਿਸ੍ਸਜ੍ਜੇਤੁਂ ‘‘ਇਮਾਨਿ ਚਤ੍ਤਾਰਿ ਕਮ੍ਮਾਨਿ ਕਤਿਹਾਕਾਰੇਹਿ ਵਿਪਜ੍ਜਨ੍ਤਿ? ਪਞ੍ਚਹਾਕਾਰੇਹਿ ਵਿਪਜ੍ਜਨ੍ਤੀ’’ਤਿਆਦਿਮਾਹ. ਤਤ੍ਥ ਵਤ੍ਥੁਤੋਤਿ ਵਿਨਯਕਮ੍ਮਸ੍ਸ ਕਾਰਣਭੂਤਵਤ੍ਥੁਤੋ. ਞਤ੍ਤਿਤੋ ਅਨੁਸ੍ਸਾਵਨਤੋਤਿ ਦ੍ਵੇਪਿ ਕਮ੍ਮਵਾਚਾਯਮੇਵ. ਸੀਮਤੋਤਿ ਕਮ੍ਮਕਰਣਟ੍ਠਾਨਭੂਤਬਦ੍ਧਸੀਮਤੋ. ਪਰਿਸਤੋਤਿ ਕਮ੍ਮਪ੍ਪਤ੍ਤਛਨ੍ਦਾਰਹਭੂਤਕਾਰਕਸਙ੍ਘਤੋ. ਤਾਨਿਯੇਵ ਹਿ ਪਞ੍ਚ ਸਬ੍ਬੇਸਂ ਵਿਨਯਕਮ੍ਮਾਨਂ ਵਿਪਤ੍ਤਿਕਾਰਣਾਨਿ ਹੋਨ੍ਤਿ.

ਤਤੋ ਤਂ ਕਮ੍ਮਵਿਪਤ੍ਤਿਕਾਰਣਭੂਤਂ ਵਤ੍ਥੁਂ ਪਾਲ਼ਿਨਯੇਨ ਵਿਤ੍ਥਾਰੇਤੁਂ ‘‘ਸਮ੍ਮੁਖਾਕਰਣੀਯਂ ਕਮ੍ਮਂ ਅਸਮ੍ਮੁਖਾ ਕਰੋਤਿ, ਵਤ੍ਥੁਵਿਪਨ੍ਨਂ ਅਧਮ੍ਮਕਮ੍ਮ’’ਨ੍ਤ੍ਯਾਦਿਮਾਹ. ਤਤ੍ਥ ਸਮ੍ਮੁਖਾਕਰਣੀਯਂ ਪਟਿਪੁਚ੍ਛਾਕਰਣੀਯਂ ਪਟਿਞ੍ਞਾਯਕਰਣੀਯਨ੍ਤਿ ਇਮੇਸਂ ਤਿਣ੍ਣਂ ਅਤਥਾਕਰਣੇਨ, ਸਤਿਵਿਨਯੋ ਅਮੂਲ਼੍ਹਵਿਨਯੋ ਤਸ੍ਸਪਾਪਿਯਸਿਕਾ ਤਜ੍ਜਨੀਯਕਮ੍ਮਂ ਨਿਯਸਕਮ੍ਮਂ ਪਬ੍ਬਾਜਨੀਯਕਮ੍ਮਂ ਪਟਿਸਾਰਣੀਯਕਮ੍ਮਂ ਉਕ੍ਖੇਪਨੀਯਕਮ੍ਮਂ ਪਰਿਵਾਸੋ ਮੂਲਾਯਪਟਿਕਸ੍ਸਨਾ ਮਾਨਤ੍ਤਂ ਅਬ੍ਭਾਨਂ ਉਪਸਮ੍ਪਦਨ੍ਤਿ ਇਮੇਸਂ ਤੇਰਸਕਮ੍ਮਾਨਂ ਅਞ੍ਞਕਮ੍ਮਾਰਹਸ੍ਸ ਅਞ੍ਞਕਮ੍ਮਕਰਣੇਨ, ਉਪੋਸਥੋ ਪਵਾਰਣਾਤਿ ਇਮੇਸਂ ਦ੍ਵਿਨ੍ਨਂ ਅਦਿਵਸੇ ਕਰਣੇਨ, ਪਣ੍ਡਕੋ ਥੇਯ੍ਯਸਂਵਾਸਕੋ ਤਿਤ੍ਥਿਯਪਕ੍ਕਨ੍ਤਕੋ ਤਿਰਚ੍ਛਾਨਗਤੋ ਮਾਤੁਘਾਤਕੋ ਪਿਤੁਘਾਤਕੋ ਅਰਹਨ੍ਤਘਾਤਕੋ ਲੋਹਿਤੁਪ੍ਪਾਦਕੋ ਸਙ੍ਘਭੇਦਕੋ ਭਿਕ੍ਖੁਨਿਦੂਸਕੋ ਉਭਤੋਬ੍ਯਞ੍ਜਨਕੋ ਊਨਵੀਸਤਿਵਸ੍ਸੋ ਅਨ੍ਤਿਮਵਤ੍ਥੁਅਜ੍ਝਾਪਨ੍ਨਪੁਬ੍ਬੋਤਿ ਇਮੇਸਂ ਤੇਰਸਨ੍ਨਂ ਪੁਗ੍ਗਲਾਨਂ ਉਪਸਮ੍ਪਦਾਕਮ੍ਮਕਰਣੇਨ ਇਤਿ ਇਮਾਨਿ ਏਕਤਿਂਸ ਕਮ੍ਮਾਨਿ ਵਤ੍ਥੁਵਿਪਨ੍ਨਂ ਅਧਮ੍ਮਕਮ੍ਮਂ ਹੋਤਿ. ਞਤ੍ਤਿਤੋ ਪਞ੍ਚ, ਅਨੁਸ੍ਸਾਵਨਤੋ ਪਞ੍ਚਾਤਿ ਇਮਾਨਿ ਦਸ ਕਾਰਣਾਨਿ ਅਨ੍ਤੋਕਮ੍ਮਵਾਚਾਯਮੇਵ ਲਭਨ੍ਤਿ, ਸੀਮਤੋ ਏਕਾਦਸ ਕਾਰਣਾਨਿ ਸੀਮਾਸਮ੍ਮੁਤਿਵਸੇਨ ਲਭਨ੍ਤਿ, ਪਰਿਸਤੋ ਦ੍ਵਾਦਸ ਕਾਰਣਾਨਿ ਚਤੁਵਗ੍ਗਪਞ੍ਚਵਗ੍ਗਦਸਵਗ੍ਗਵੀਸਤਿਵਗ੍ਗਸਙ੍ਖਾਤੇਸੁ ਚਤੂਸੁ ਸਙ੍ਘੇਸੁ ਏਕੇਕਸ੍ਮਿਂ ਕਮ੍ਮਪਤ੍ਤਛਨ੍ਦਾਰਹਸਮ੍ਮੁਖੀਭੂਤਸਙ੍ਖਾਤਾਨਂ ਤਿਣ੍ਣਂ ਤਿਣ੍ਣਂ ਸਙ੍ਘਾਨਂ ਵਸੇਨ ਲਭਨ੍ਤੀਤਿ.

ਏਵਂ ਕਮ੍ਮਵਿਪਤ੍ਤਿਕਾਰਣਾਨਿ ਦਸ੍ਸੇਤ੍ਵਾ ਪੁਨ ਚਤੁਵਗ੍ਗਸਙ੍ਘਾਦੀਸੁ ਸਨ੍ਨਿਸਿਨ੍ਨਾਨਂ ਭਿਕ੍ਖੂਨਂ ਵਿਸੇਸਨਾਮਂ ਦਸ੍ਸੇਤੁਂ ‘‘ਚਤੁਵਗ੍ਗਕਰਣੇ ਕਮ੍ਮੇ’’ਤਿਆਦਿਮਾਹ. ਤਂ ਸੁਵਿਞ੍ਞੇਯ੍ਯਮੇਵ.

੨੫੦. ਤਤੋ ਪਰਂ ਚਤੁਨ੍ਨਂ ਕਮ੍ਮਾਨਂ ਠਾਨਂ ਸਙ੍ਖੇਪਤੋ ਦਸ੍ਸੇਤੁਂ ‘‘ਅਪਲੋਕਨਕਮ੍ਮਂ ਕਤਿ ਠਾਨਾਨਿ ਗਚ੍ਛਤੀ’’ਤਿਆਦਿਮਾਹ. ਤਮ੍ਪਿ ਸੁਵਿਞ੍ਞੇਯ੍ਯਮੇਵ.

੨੫੧. ਤਤੋ ਤਾਨਿਯੇਵ ਕਮ੍ਮਾਨਿ ਤੇਸੁ ਠਾਨੇਸੁ ਪਵਤ੍ਤਾਨਿ ਵਿਤ੍ਥਾਰਤੋ ਪਕਾਸੇਤੁਕਾਮੋ ‘‘ਅਯਂ ਤਾਵ ਪਾਲ਼ਿਨਯੋ. ਅਯਂ ਪਨੇਤ੍ਥ ਆਦਿਤੋ ਪਟ੍ਠਾਯ ਵਿਨਿਚ੍ਛਯਕਥਾ’’ਤਿਆਦਿਮਾਹ. ਤਤ੍ਥ ਤਸ੍ਸਂ ਵਿਨਿਚ੍ਛਯਕਥਾਯਂ ਚਤੂਸੁ ਕਮ੍ਮੇਸੁ ਕਤਮਂ ਅਪਲੋਕਨਕਮ੍ਮਂ ਨਾਮਾਤਿ ਪੁਚ੍ਛਾਯਂ ਤਂ ਦਸ੍ਸੇਤੁਮਾਹ ‘‘ਅਪਲੋਕਨਕਮ੍ਮਂ ਨਾਮਾ’’ਤਿਆਦਿ. ਤਤ੍ਥ ਸੀਮਟ੍ਠਕਸਙ੍ਘਂ ਸੋਧੇਤ੍ਵਾਤਿ ਅਵਿਪ੍ਪਵਾਸਸਙ੍ਖਾਤਮਹਾਸੀਮਟ੍ਠਕਂ ਸਙ੍ਘਂ ਸੋਧੇਤ੍ਵਾ. ਨ ਹਿ ਖਣ੍ਡਸੀਮਾਯ ਸਨ੍ਨਿਪਤਿਤੇ ਸਙ੍ਘੇ ਸੋਧੇਤਬ੍ਬਕਿਚ੍ਚਂ ਅਤ੍ਥਿ, ਅਵਿਪ੍ਪਵਾਸਸੀਮਾਸਙ੍ਖਾਤਾਯ ਮਹਾਸੀਮਾਯ ਪਨ ਵਿਤ੍ਥਾਰਤ੍ਤਾ ਬਹੂਨਂ ਭਿਕ੍ਖੂਨਂ ਵਸਨਟ੍ਠਾਨਤ੍ਤਾ ਸਮਗ੍ਗਭਾਵਤ੍ਥਂ ਸੋਧੇਤਬ੍ਬਂ ਹੋਤਿ. ਛਨ੍ਦਾਰਹਾਨਂ ਛਨ੍ਦਂ ਆਹਰਿਤ੍ਵਾਤਿ ਤਿਸ੍ਸਂ ਸੀਮਾਯਂ ਚਤੁਵਗ੍ਗਾਦਿਗਣਂ ਪੂਰੇਤ੍ਵਾ ਹਤ੍ਥਪਾਸਂ ਅਵਿਜਹਿਤ੍ਵਾ ਠਿਤੇਹਿ ਭਿਕ੍ਖੂਹਿ ਅਞ੍ਞੇਸਂ ਹਤ੍ਥਪਾਸਂ ਅਨਾਗਤਾਨਂ ਪਕਤਤ੍ਤਭਿਕ੍ਖੂਨਂ ਛਨ੍ਦਂ ਆਹਰਿਤ੍ਵਾ. ਵੁਤ੍ਤਞ੍ਹਿ ‘‘ਚਤੁਵਗ੍ਗਕਰਣੇ ਕਮ੍ਮੇ ਚਤ੍ਤਾਰੋ ਭਿਕ੍ਖੂ ਪਕਤਤ੍ਤਾ ਕਮ੍ਮਪ੍ਪਤ੍ਤਾ, ਅਵਸੇਸਾ ਪਕਤਤ੍ਤਾ ਛਨ੍ਦਾਰਹਾ’’ਤਿ (ਪਰਿ. ੪੯੭). ਸਮਗ੍ਗਸ੍ਸ ਸਙ੍ਘਸ੍ਸ ਅਨੁਮਤਿਯਾਤਿ ਛਨ੍ਦਸ੍ਸ ਆਹਰਿਤਤ੍ਤਾ ਹਤ੍ਥਪਾਸਂ ਆਗਤਾਪਿ ਅਨਾਗਤਾਪਿ ਸਬ੍ਬੇ ਭਿਕ੍ਖੂ ਸਮਗ੍ਗਾਯੇਵ ਹੋਨ੍ਤਿ, ਤਸ੍ਮਾ ਸਮਗ੍ਗਸ੍ਸ ਸਙ੍ਘਸ੍ਸ ਅਨੁਮਤਿਯਾ. ਤਿਕ੍ਖਤ੍ਤੁਂ ਸਾਵੇਤ੍ਵਾਤਿ ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ’’ਤਿਆਦਿਨਾ ਕਮ੍ਮਵਾਚਂ ਅਭਣਿਤ੍ਵਾ ‘‘ਰੁਚ੍ਚਤਿ ਸਙ੍ਘਸ੍ਸ. ਦੁਤਿਯਮ੍ਪਿ…ਪੇ… ਤਤਿਯਮ੍ਪਿ ਰੁਚ੍ਚਤਿ ਸਙ੍ਘਸ੍ਸਾ’’ਤਿ ਤਿਕ੍ਖਤ੍ਤੁਂ ਸਾਵੇਤ੍ਵਾ ਕਤ੍ਤਬ੍ਬਕਮ੍ਮਂ ਅਪਲੋਕਨਕਮ੍ਮਂ ਨਾਮਾਤਿ ਯੋਜਨਾ. ਵੁਤ੍ਤਨਯੇਨੇਵਾਤਿ ਅਪਲੋਕਨਕਮ੍ਮੇ ਵੁਤ੍ਤਨਯੇਨੇਵ. ਇਮਿਨਾ ‘‘ਸੀਮਟ੍ਠਕਸਙ੍ਘਂ ਸੋਧੇਤ੍ਵਾ, ਛਨ੍ਦਾਰਹਾਨਂ ਛਨ੍ਦਂ ਆਹਰਿਤ੍ਵਾ’’ਤਿ ਇਦਂ ਦ੍ਵਯਂ ਅਤਿਦਿਸਤਿ. ਇਤਰੇਸੁਪਿ ਏਸੇਵ ਨਯੋ.

ਤਤ੍ਥ ਤੇਸੁ ਚਤੂਸੁ ਕਮ੍ਮੇਸੁ ਕਿਂ ਅਞ੍ਞਕਮ੍ਮਂ ਇਤਰਕਮ੍ਮਵਸੇਨ ਕਾਤਬ੍ਬਨ੍ਤਿ ਚੋਦਨਂ ਸਨ੍ਧਾਯਾਹ ‘‘ਤਤ੍ਰ’’ਇਚ੍ਚਾਦਿ. ਏਵਂ ਹੋਤੁ, ਏਵਂ ਸਨ੍ਤੇ ਅਵਿਸੇਸੇਨ ਸਬ੍ਬਮ੍ਪਿ ਕਮ੍ਮਂ ਅਞ੍ਞਵਸੇਨ ਕਤ੍ਤਬ੍ਬਨ੍ਤਿ ਆਹ ‘‘ਞਤ੍ਤਿਦੁਤਿਯਕਮ੍ਮਂ ਪਨਾ’’ਤਿਆਦਿ. ਤਤ੍ਥ ਪਨ-ਸਦ੍ਦੋ ਵਿਸੇਸਤ੍ਥਜੋਤਕੋ, ਞਤ੍ਤਿਦੁਤਿਯਕਮ੍ਮੇ ਪਨ ਵਿਸੇਸੋ ਅਤ੍ਥੀਤਿ ਅਤ੍ਥੋ. ਇਤੋ ਪਰਾਨਿ ਸੁਵਿਞ੍ਞੇਯ੍ਯਾਨੇਵ. ਪਟਿਕ੍ਖਿਤ੍ਤਮੇਵ ਅਟ੍ਠਕਥਾਯਨ੍ਤਿ ਅਜ੍ਝਾਹਾਰਸਮ੍ਬਨ੍ਧੋ. ਯਦਿ ਏਵਂ ਅਕ੍ਖਰਪਰਿਹੀਨਾਦੀਸੁ ਸਨ੍ਤੇਸੁ ਕਮ੍ਮਕੋਪੋ ਸਿਯਾਤਿ ਚੋਦਨਂ ਮਨਸਿ ਕਤ੍ਵਾ ਆਹ ‘‘ਸਚੇ ਪਨਾ’’ਤਿਆਦਿ. ਤਤ੍ਥ ਅਕ੍ਖਰਪਰਿਹੀਨਨ੍ਤਿ ‘‘ਸੁਣਾਤੁ ਮੇ’’ਤਿਆਦੀਸੁ ਸੁ-ਕਾਰ ਣਾ-ਕਾਰ ਤੁ-ਕਾਰਾਦੀਨਂ ਭਸ੍ਸਨਂ. ਪਦਪਰਿਹੀਨਨ੍ਤਿ ਸੁਣਾਤੂਤਿਆਦੀਨਂ ਵਿਭਤ੍ਯਨ੍ਤਪਦਾਨਂ ਭਸ੍ਸਨਂ. ਦੁਰੁਤ੍ਤਪਦਂ ਪਨ ਉਪਰਿ ਵਕ੍ਖਤਿ.

ਇਦਾਨਿ ਪੁਨਪ੍ਪੁਨਵਚਨੇ ਪਯੋਜਨਂ ਦਸ੍ਸੇਨ੍ਤੋ ‘‘ਇਦਂ ਅਕੁਪ੍ਪਕਮ੍ਮੇ ਦਲ਼੍ਹਿਕਮ੍ਮਂ ਹੋਤਿ, ਕੁਪ੍ਪਕਮ੍ਮੇ ਕਮ੍ਮਂ ਹੁਤ੍ਵਾ ਤਿਟ੍ਠਤੀ’’ਤਿ ਆਹ. ਤਤ੍ਥ ਇਦਨ੍ਤਿ ਇਦਂ ਪੁਨਪ੍ਪੁਨਂ ਵੁਤ੍ਤਕਮ੍ਮਂ. ਅਕੁਪ੍ਪਕਮ੍ਮੇਤਿ ਅਕੁਪ੍ਪੇ ਠਾਨਾਰਹੇ ਪੁਰੇਕਤਕਮ੍ਮੇ. ਦਲ਼੍ਹਿਕਮ੍ਮਂ ਹੋਤੀਤਿ ਥਿਰਤਰਕਮ੍ਮਂ ਹੋਤਿ ਏਕਾਯ ਰਜ੍ਜੁਯਾ ਬਨ੍ਧਿਤਬ੍ਬਭਾਰੇ ਦੁਤਿਯਤਤਿਯਾਦਿਰਜ੍ਜੂਹਿ ਬਨ੍ਧਨਂ ਵਿਯ. ਕੁਪ੍ਪਕਮ੍ਮੇਤਿ ਅਕ੍ਖਰਪਰਿਹੀਨਾਦਿਵਸੇਨ ਕੁਪ੍ਪੇ ਅਟ੍ਠਾਨਾਰਹੇ ਪੁਰੇਕਤਕਮ੍ਮੇ. ਕਮ੍ਮਂ ਹੁਤ੍ਵਾ ਤਿਟ੍ਠਤੀਤਿ ਪੁਨਪ੍ਪੁਨਂ ਵੁਤ੍ਤੇ ਸਤਿ ਤੇਸਂ ਅਕ੍ਖਰਪਰਿਹੀਨਾਦੀਨਂ ਸੋਧਿਤਤ੍ਤਾ ਪਰਿਸੁਦ੍ਧਕਮ੍ਮਂ ਹੁਤ੍ਵਾ ਤਿਟ੍ਠਤਿ. ਅਕੁਪ੍ਪਕਮ੍ਮੇ ਕੁਪ੍ਪਕਮ੍ਮੇਤਿ ਵਾ ਭਾਵੇਨਭਾਵਲਕ੍ਖਣਤ੍ਥੇ ਭੁਮ੍ਮਵਚਨਂ. ਪੁਰੇਤਰਂ ਕਤਕਮ੍ਮਸ੍ਮਿਂ ਅਕੁਪ੍ਪਕਮ੍ਮੇ ਸਤਿ ਪਚ੍ਛਾ ਇਦਂ ਪੁਨਪ੍ਪੁਨਂ ਵੁਤ੍ਤਕਮ੍ਮਂ ਦਲ਼੍ਹਿਕਮ੍ਮਂ ਹੋਤਿ, ਪੁਰੇਕਤਕਮ੍ਮਸ੍ਮਿਂ ਕੁਪ੍ਪਕਮ੍ਮੇ ਸਤਿ ਇਦਂ ਪੁਨਪ੍ਪੁਨਂ ਵੁਤ੍ਤਕਮ੍ਮਂ ਅਕੁਪ੍ਪਂ ਠਾਨਾਰਹਂ ਪਰਿਸੁਦ੍ਧਕਮ੍ਮਂ ਹੁਤ੍ਵਾ ਤਿਟ੍ਠਤੀਤਿ. ਇਮਂ ਪਾਠਂ ਨਿਸ੍ਸਾਯ ਆਚਰਿਯਵਰਾ ਏਕਪੁਗ੍ਗਲਮ੍ਪਿ ਅਨੇਕਕ੍ਖਤ੍ਤੁਂ ਉਪਸਮ੍ਪਦਕਮ੍ਮਂ ਕਰੋਨ੍ਤਿ. ਕਸ੍ਮਾ ਪਨ ਤੇ ਭਿਕ੍ਖੂ ਲਜ੍ਜੀਪੇਸਲਬਹੁਸ੍ਸੁਤਸਿਕ੍ਖਾਕਾਮਭੂਤਾਨਂ ਅਤ੍ਤਨੋ ਆਚਰਿਯੁਪਜ੍ਝਾਯਾਨਂ ਸਨ੍ਤਿਕੇ ਸਿਕ੍ਖਂ ਗਣ੍ਹਨ੍ਤੀਤਿ? ਨ ਤੇ ਅਤ੍ਤਨੋ ਆਚਰਿਯੁਪਜ੍ਝਾਯਾਨਂ ਸਨ੍ਤਿਕਾ ਲਦ੍ਧਸਿਕ੍ਖਂ ਪਚ੍ਚਕ੍ਖਾਯ ਅਞ੍ਞਂ ਗਣ੍ਹਨ੍ਤਿ, ਅਥ ਖੋ ਤਾਯ ਏਵ ਸਦ੍ਧਿਂ ਦਿਗੁਣਤਿਗੁਣਂ ਕਰੋਨ੍ਤਿ. ਏਵਂ ਸਨ੍ਤੇਪਿ ਪੁਰਿਮਸਿਕ੍ਖਾਯ ਅਸਦ੍ਦਹਨ੍ਤਾਯੇਵ ਕਰੇਯ੍ਯੁਂ, ਨੋ ਸਦ੍ਦਹਨ੍ਤਾਤਿ? ਨੋ ਅਸਦ੍ਦਹਨ੍ਤਾ, ਸਦ੍ਦਹਨ੍ਤਾਪਿ ਤੇ ਭਿਕ੍ਖੂ ਪੁਨਪ੍ਪੁਨਕਰਣੇ ਯੁਤ੍ਤਿਤੋਪਿ ਆਗਮਤੋਪਿ ਆਦੀਨਵਂ ਅਪਸ੍ਸਨ੍ਤਾ ਆਨਿਸਂਸਮੇਵ ਪਸ੍ਸਨ੍ਤਾ ਕਰੋਨ੍ਤੀਤਿ.

ਕਥਂ ਯੁਤ੍ਤਿਤੋ ਆਨਿਸਂਸਂ ਪਸ੍ਸਨ੍ਤਿ? ਯਥਾ ਹਿ ਲੋਕੇ ਅਭਿਸਿਤ੍ਤਮ੍ਪਿ ਰਾਜਾਨਂ ਪੁਨਪ੍ਪੁਨਾਭਿਸਿਞ੍ਚਨੇ ਆਦੀਨਵਂ ਨ ਪਸ੍ਸਨ੍ਤਿ, ਅਥ ਖੋ ਅਭਿਸੇਕਾਨੁਭਾਵੇਨ ਰਾਜਿਦ੍ਧਿਪ੍ਪਤ੍ਤਤਾਦੀਹਿ ਕਾਰਣੇਹਿ ਆਨਿਸਂਸਮੇਵ ਪਸ੍ਸਨ੍ਤਿ, ਯਥਾ ਚ ਸਾਸਨੇ ਚੇਤਿਯਂ ਵਾ ਪਟਿਮਂ ਵਾ ਨਿਟ੍ਠਿਤਸਬ੍ਬਕਿਚ੍ਚਂ ‘‘ਅਨੇਕਜਾਤਿਸਂਸਾਰ’’ਨ੍ਤਿਆਦੀਹਿ ਭਗਵਤੋ ਵਚਨੇਹਿ ਅਭਿਸੇਕਮਙ੍ਗਲਂ ਕਰੋਨ੍ਤਾਪਿ ਪੁਨਪ੍ਪੁਨਕਰਣੇ ਆਦੀਨਵਂ ਅਪਸ੍ਸਨ੍ਤਾ ਅਤਿਰੇਕਤਰਂ ਮਹਿਦ੍ਧਿਕਤਾਮਹਾਨੁਭਾਵਤਾਦਿਆਨਿਸਂਸਮੇਵ ਪਸ੍ਸਨ੍ਤਾ ਪੁਨਪ੍ਪੁਨਂ ਕਰੋਨ੍ਤਿਯੇਵ, ਏਵਮੇਵ ਕਤਉਪਸਮ੍ਪਦਕਮ੍ਮਂ ਭਿਕ੍ਖੁਂ ਪੁਨਦੇਵ ਕਮ੍ਮਵਾਚਾਭਣਨੇ ਆਦੀਨਵਂ ਅਪਸ੍ਸਨ੍ਤਾ ਪੁਬ੍ਬੇ ਕਤਕਮ੍ਮਸ੍ਮਿਂ ਵਤ੍ਥੁਆਦੀਸੁ ਪਞ੍ਚਸੁ ਅਙ੍ਗੇਸੁ ਏਕਸ੍ਮਿਮ੍ਪਿ ਅਙ੍ਗੇ ਅਪਰਿਪੁਣ੍ਣੇ ਸਤਿ ਕਮ੍ਮਕੋਪਸਮ੍ਭਵਤੋ ਇਦਾਨਿ ਕਤਕਮ੍ਮੇਨ ਪਰਿਪੁਣ੍ਣਅਙ੍ਗੇ ਸਤਿ ਕਮ੍ਮਸਮ੍ਪਤ੍ਤਿਸਮ੍ਭਵਞ੍ਚ ਪੁਬ੍ਬੇਵ ਕਮ੍ਮਸਮ੍ਪਤ੍ਤਿਸਮ੍ਭਵੇਪਿ ਦਲ਼੍ਹਿਕਮ੍ਮਥਿਰਤਰਸਮ੍ਭਵਞ੍ਚ ਆਨਿਸਂਸਂ ਪਸ੍ਸਨ੍ਤਾ ਕਰੋਨ੍ਤਿ. ਕਥਂ ਆਗਮਤੋ ਆਨਿਸਂਸਂ ਪਸ੍ਸਨ੍ਤਿ? ਯਥਾਵੁਤ੍ਤਪਰਿਵਾਰਟ੍ਠਕਥਾਪਾਠਵਿਨਯਸਙ੍ਗਹਪਾਠੇਸੁ ਦੁਰੁਤ੍ਤਪਦਸ੍ਸ ਸੋਧਨਤ੍ਥਂ ਪੁਨਪ੍ਪੁਨਂ ਵਤ੍ਤਬ੍ਬਭਾਵਸ੍ਸ ਉਪਲਕ੍ਖਣਨਯੇਨ ਵਚਨਤੋ. ਸੇਸਞਤ੍ਤਿਦੋਸਅਨੁਸ੍ਸਾਵਨਦੋਸਾਨਞ੍ਚ ਵਤ੍ਥੁਵਿਪਤ੍ਤਿਸੀਮਵਿਪਤ੍ਤਿਪਰਿਸਵਿਪਤ੍ਤਿਦੋਸਾਨਞ੍ਚ ਸੋਧਨਂ ਦਸ੍ਸਿਤਂ ਹੋਤਿ. ਤੇਨੇਵ ਚ ਕਾਰਣੇਨ ਅਯਮ੍ਪਿ ਪਚ੍ਛਿਮਪਾਠੋ ਆਚਰਿਯੇਨ ਵੁਤ੍ਤੋ. ਤਸ੍ਸਤ੍ਥੋ ਹੇਟ੍ਠਾ ਵੁਤ੍ਤੋਵ. ਇਤਿ ਪੁਬ੍ਬੇ ਕਤਕਮ੍ਮਸ੍ਸ ਕੋਪਸਮ੍ਭਵੇਪਿ ਇਦਾਨਿ ਕਤਕਮ੍ਮੇਨ ਸਮ੍ਪਜ੍ਜਨਸਙ੍ਖਾਤਂ ਆਨਿਸਂਸਂ ਆਗਮਤੋ ਪਸ੍ਸਨ੍ਤੀਤਿ ਦਟ੍ਠਬ੍ਬਂ.

ਕੇਚਿ ਪਨ ਆਚਰਿਯਾ ਇਮਂ ‘‘ਪੁਨਪ੍ਪੁਨਂ ਵਤ੍ਤੁਂ ਵਟ੍ਟਤੀਤਿ ਪਾਠਂ ਤਸ੍ਮਿਂਯੇਵ ਪਠਮਕਮ੍ਮਕਰਣਕਾਲੇ ਦੁਰੁਤ੍ਤਸੋਧਨਤ੍ਥਂ ਵਤ੍ਤਬ੍ਬਤਂ ਸਨ੍ਧਾਯ ਵੁਤ੍ਤਂ, ਨ ਚਿਰਕਾਲੇ’’ਤਿ ਵਦਨ੍ਤਿ, ਤਦੇਤਂ ਵਚਨਂ ਨੇਵ ਅਟ੍ਠਕਥਾਯਂ ਆਗਤਂ, ਨ ਟੀਕਾਦੀਸੁ ਵਿਨਿਚ੍ਛਿਤਂ, ਤੇਸਂ ਮਤਿਮਤ੍ਤਮੇਵ, ਤਸ੍ਮਾ ਨ ਗਹੇਤਬ੍ਬਂ. ਅਪਿਚ ਤਸ੍ਮਿਂ ਖਣੇ ਪੁਨਪ੍ਪੁਨਂ ਵਚਨਤੋਪਿ ਅਪਰਭਾਗੇ ਵਚਨਂ ਮਹਪ੍ਫਲਂ ਹੋਤਿ ਮਹਾਨਿਸਂਸਂ. ਤਸ੍ਮਿਞ੍ਹਿ ਕਾਲੇ ਪੁਨਪ੍ਪੁਨਂ ਭਣਨੇ ਞਤ੍ਤਿਦੋਸਅਨੁਸ੍ਸਾਵਨਦੋਸਾਨਿ ਪਚ੍ਛਿਮਭਣਨੇ ਸੁਟ੍ਠੁ ਭਣਨ੍ਤੋ ਸੋਧੇਤੁਂ ਸਕ੍ਕੁਣੇਯ੍ਯ, ਨ ਵਤ੍ਥੁਵਿਪਤ੍ਤਿਸੀਮਵਿਪਤ੍ਤਿਪਰਿਸਵਿਪਤ੍ਤਿਦੋਸਾਨਿ. ਤਸ੍ਮਿਞ੍ਹਿ ਖਣੇ ਤਮੇਵ ਵਤ੍ਥੁ, ਸਾ ਏਵ ਸੀਮਾ, ਸਾ ਏਵ ਪਰਿਸਾ, ਤਸ੍ਮਾ ਤਾਨਿ ਪੁਨਪ੍ਪੁਨਵਚਨੇਨ ਸੋਧੇਤੁਮਸਕ੍ਕੁਣੇਯ੍ਯਾਨਿ ਹੋਨ੍ਤਿ. ਅਪਰਭਾਗੇ ਕਰੋਨ੍ਤੋ ਪਨ ਪੁਬ੍ਬੇ ਅਪਰਿਪੁਣ੍ਣਵੀਸਤਿਵਸ੍ਸਭਾਵੇਨ ਵਤ੍ਥੁਵਿਪਤ੍ਤਿਭੂਤੇਪਿ ਇਦਾਨਿ ਪਰਿਪੁਣ੍ਣਵੀਸਤਿਵਸ੍ਸਤ੍ਤਾ ਵਤ੍ਥੁਸਮ੍ਪਤ੍ਤਿ ਹੋਤਿ, ਪੁਬ੍ਬੇ ਸੀਮਸਙ੍ਕਰਾਦਿਭਾਵੇਨ ਸੀਮਵਿਪਤ੍ਤਿਸਮ੍ਭਵੇਪਿ ਇਦਾਨਿ ਤਦਭਾਵਤ੍ਥਾਯ ਸੁਟ੍ਠੁ ਸੋਧਿਤਤ੍ਤਾ ਸੀਮਸਮ੍ਪਤ੍ਤਿ ਹੋਤਿ, ਪੁਬ੍ਬੇ ਵਗ੍ਗਕਮ੍ਮਾਦਿਵਸੇਨ ਪਰਿਸਵਿਪਤ੍ਤਿਸਮ੍ਭਵੇਪਿ ਇਦਾਨਿ ਤਦਭਾਵਤ੍ਥਾਯ ਸੁਟ੍ਠੁ ਸੋਧਿਤਤ੍ਤਾ ਪਰਿਸਸਮ੍ਪਤ੍ਤਿ ਹੋਤਿ, ਏਵਂ ਪਞ੍ਚ ਵਿਪਤ੍ਤਿਯੋ ਸੋਧੇਤ੍ਵਾ ਪਞ੍ਚ ਸਮ੍ਪਤ੍ਤਿਯੋ ਸਮ੍ਪਾਦੇਤ੍ਵਾ ਕਾਤੁਂ ਸਕ੍ਕੁਣੇਯ੍ਯਤੋ ਪਠਮਕਾਲੇ ਪੁਨਪ੍ਪੁਨਂ ਭਣਨਤੋਪਿ ਅਪਰਭਾਗੇ ਭਣਨਂ ਮਹਪ੍ਫਲਂ ਹੋਤਿ ਮਹਾਨਿਸਂਸਨ੍ਤਿ ਵੇਦਿਤਬ੍ਬਂ.

ਯਦਿ ਏਵਂ ਉਪਸਮ੍ਪਦਸਿਕ੍ਖਾਯ ਦਹਰੋ ਭਵੇਯ੍ਯਾਤਿ? ਨ ਭਵੇਯ੍ਯ. ਕਸ੍ਮਾ? ਪੋਰਾਣਸਿਕ੍ਖਂ ਅਪ੍ਪਚ੍ਚਕ੍ਖਿਤ੍ਵਾ ਤਾਯ ਏਵ ਪਤਿਟ੍ਠਿਤਤ੍ਤਾਤਿ. ਏਵਂ ਸਨ੍ਤੇਪਿ ਪੁਰੇਕਤਕਮ੍ਮਸ੍ਸ ਸਮ੍ਪਜ੍ਜਨਭਾਵੇਨ ਤਿਟ੍ਠਨ੍ਤੇ ਸਤਿ ਤਾਯ ਠਿਤਤ੍ਤਾ ਅਦਹਰੋ ਸਿਯਾ. ਪੁਰਿਮਕਮ੍ਮਸ੍ਸ ਅਸਮ੍ਪਜ੍ਜਨਭਾਵੇਨ ਇਦਾਨਿ ਕਤਕਮ੍ਮੇਯੇਵ ਉਪਸਮ੍ਪਦਭਾਵੇਨ ਤਿਟ੍ਠਨ੍ਤੇ ਸਤਿ ਕਸ੍ਮਾ ਦਹਰੋ ਨ ਭਵੇਯ੍ਯਾਤਿ? ਏਵਂ ਸਨ੍ਤੇ ਦਹਰੋ ਭਵੇਯ੍ਯ. ਏਵਂ ਦਹਰੋ ਸਮਾਨੋ ਪੁਰਿਮਸਿਕ੍ਖਾਯ ਵਸ੍ਸਂ ਗਣੇਤ੍ਵਾ ਯਥਾਵੁਡ੍ਢਂ ਵਨ੍ਦਨਾਦੀਨਿ ਸਮ੍ਪਟਿਚ੍ਛਨ੍ਤੋ ਮਹਾਸਾਵਜ੍ਜੋ ਭਵੇਯ੍ਯਾਤਿ? ਏਵਂ ਪੁਰਿਮਸਿਕ੍ਖਾਯ ਅਟ੍ਠਿਤਭਾਵਂ ਪਚ੍ਛਿਮਸਿਕ੍ਖਾਯ ਏਵ ਲਦ੍ਧੁਪਸਮ੍ਪਦਭਾਵਂ ਤਥਤੋ ਜਾਨਨ੍ਤੋ ਏਵਂ ਕਰੋਨ੍ਤੋ ਸਾਵਜ੍ਜੋ ਹੋਤਿ, ਏਵਂ ਪਨ ਅਜਾਨਨ੍ਤੋ ‘‘ਪੁਰਿਮਸਿਕ੍ਖਾਯਮੇਵ ਠਿਤੋ’’ਤਿ ਮਞ੍ਞਿਤ੍ਵਾ ਏਵਂ ਕਰੋਨ੍ਤੋ ਅਨਵਜ੍ਜੋਤਿ ਵੇਦਿਤਬ੍ਬੋ. ਕਥਂ ਵਿਞ੍ਞਾਯਤੀਤਿ ਚੇ? ‘‘ਅਨਾਪਤ੍ਤਿ ਊਨਵੀਸਤਿਵਸ੍ਸਂ ਪਰਿਪੁਣ੍ਣਸਞ੍ਞੀਤਿ ਏਤ੍ਥ ਕਿਞ੍ਚਾਪਿ ਉਪਸਮ੍ਪਾਦੇਨ੍ਤਸ੍ਸ ਅਨਾਪਤ੍ਤਿ, ਪੁਗ੍ਗਲੋ ਪਨ ਅਨੁਪਸਮ੍ਪਨ੍ਨੋਵ ਹੋਤਿ. ਸਚੇ ਪਨ ਸੋ ਦਸਵਸ੍ਸਚ੍ਚਯੇਨ ਅਞ੍ਞਂ ਉਪਸਮ੍ਪਾਦੇਤਿ, ਤਂ ਚੇ ਮੁਞ੍ਚਿਤ੍ਵਾ ਗਣੋ ਪੂਰਤਿ, ਸੂਪਸਮ੍ਪਨ੍ਨੋ. ਸੋਪਿ ਚ ਯਾਵ ਨ ਜਾਨਾਤਿ, ਤਾਵਸ੍ਸ ਨੇਵ ਸਗ੍ਗਨ੍ਤਰਾਯੋ, ਨ ਮੋਕ੍ਖਨ੍ਤਰਾਯੋ. ਞਤ੍ਵਾ ਪਨ ਪੁਨ ਉਪਸਮ੍ਪਜ੍ਜਿਤਬ੍ਬ’’ਨ੍ਤਿ ਸਮਨ੍ਤਪਾਸਾਦਿਕਾਯਂ (ਪਾਚਿ. ਅਟ੍ਠ. ੪੦੬) ਆਗਤਤ੍ਤਾ ਵਿਞ੍ਞਾਯਤਿ. ਏਵਂ ਵਤ੍ਥੁਵਿਪਨ੍ਨਤ੍ਤਾ ਕਮ੍ਮਕੋਪਤੋ ਅਨੁਪਸਮ੍ਪਨ੍ਨਸ੍ਸ ਪੁਗ੍ਗਲਸ੍ਸ ਉਪਜ੍ਝਾਯੋ ਭਵਿਤੁਂ ਯੁਤ੍ਤਕਾਲੇ ਪੁਨ ਉਪਸਮ੍ਪਜ੍ਜਨੇਨ ਉਪਸਮ੍ਪਨ੍ਨਭੂਤਭਾਵਸ੍ਸ ਅਟ੍ਠਕਥਾਯਂ ਆਗਤਤ੍ਤਾ ਇਮਿਨਾ ਨਯੇਨ ਸੀਮਵਿਪਨ੍ਨਪਅਸਵਿਪਨ੍ਨਞਤ੍ਤਿਵਿਪਨ੍ਨਅਨੁਸ੍ਸਾਵਨਵਿਪਨ੍ਨਭੂਤਤ੍ਤਾ ਕਮ੍ਮਕੋਪਤੋ ਪੁਬ੍ਬੇ ਅਨੁਪਸਮ੍ਪਨ੍ਨਭੂਤਂ ਪੁਗ੍ਗਲਮ੍ਪਿ ਅਪਰਭਾਗੇ ਵੁਡ੍ਢਿਪ੍ਪਤ੍ਤਿਕਾਲੇਪਿ ਪਞ੍ਚ ਵਿਪਤ੍ਤਿਦੋਸਾਨਿ ਸੋਧੇਤ੍ਵਾ ਪੁਨ ਉਪਸਮ੍ਪਦਕਮ੍ਮਵਾਚਾਕਰਣੇਨ ਉਪਸਮ੍ਪਾਦੇਤੁਂ ਵਟ੍ਟਤਿ. ਸੋਪਿ ਪੁਗ੍ਗਲੋ ਪੁਬ੍ਬਕਮ੍ਮਕਾਲੇ ਅਨੁਪਸਮ੍ਪਨ੍ਨੋ ਹੁਤ੍ਵਾਪਿ ਅਪਰਕਮ੍ਮਕਾਲੇ ਉਪਸਮ੍ਪਨ੍ਨੋ ਹੋਤੀਤਿ ਦਟ੍ਠਬ੍ਬੋ.

ਏਕਚ੍ਚੇ ਪਨ ਭਿਕ੍ਖੂ ਪੋਰਾਣਸਿਕ੍ਖਂ ਪਚ੍ਚਕ੍ਖਾਯ ਨਵਸਿਕ੍ਖਮੇਵ ਗਣ੍ਹਿਂਸੁ, ਤੇ ਪਨ ਭਿਕ੍ਖੂ ਨਵਸਿਕ੍ਖਾਵਸੇਨ ਦਹਰਾਵ ਭਵਨ੍ਤਿ, ਏਵਂ ਕਰਣਞ੍ਚ ਅਤਿਵਿਯ ਗੁਣਵਿਸਿਟ੍ਠਂ ਅਤ੍ਤਨੋ ਨਵਕਤਰਂ ਭਿਕ੍ਖੁਂ ਦਿਸ੍ਵਾ ਤਸ੍ਮਿਂ ਪੁਗ੍ਗਲੇ ਪਯਿਰੁਪਾਸਿਤੁਕਾਮੋ ਤਂ ਪੁਗ੍ਗਲਂ ਅਤ੍ਤਨਾ ਵੁਡ੍ਢਤਰਂ ਕਾਤੁਕਾਮੋ ਅਤ੍ਤਾਨਂ ਦਹਰਂ ਕਾਤੁਕਾਮੋ ਹੁਤ੍ਵਾ ਧਮ੍ਮਗਾਰਵੇਨ ਕਰੋਨ੍ਤੋ ਯੁਤ੍ਤੋ ਭਵੇਯ੍ਯ. ਅਥ ਪਨ ਸਿਕ੍ਖਾਸਮ੍ਪਨ੍ਨਂ ਕਤ੍ਤੁਕਾਮੋ ਏਵਂ ਕਰੇਯ੍ਯ, ਸਿਕ੍ਖਾ ਨਾਮ ਪਞ੍ਚਙ੍ਗਸਮਨ੍ਨਾਗਤੇ ਸਤਿ ਸਮ੍ਪਜ੍ਜਤਿ, ਸੀਲਵਿਸੁਦ੍ਧਿਯੇਵ ਕਾਰਣਂ ਹੋਤਿ, ਤਸ੍ਮਾ ਯਦਿ ਪੁਰਿਮਸਿਕ੍ਖਾ ਅਟ੍ਠਿਤਾ ਭਵੇਯ੍ਯ, ਪਚ੍ਚਕ੍ਖਾਨਕਿਚ੍ਚਂ ਨਤ੍ਥਿ, ਸਯਮੇਵ ਪਤਿਤਾ ਹੋਤਿ. ਪੁਰਿਮਸਿਕ੍ਖਾਯ ਠਿਤਾਯ ਸਤਿ ਵਿਬ੍ਭਮਿਤੁਕਾਮੋਯੇਵ ਪਚ੍ਚਕ੍ਖਾਨਂ ਕਰੇਯ੍ਯ, ਨ ਭਿਕ੍ਖੁਭਵਿਤੁਕਾਮੋ, ਸੋ ਪਨ ਚਤੁਪਾਰਿਸੁਦ੍ਧਿਸੀਲਮੇਵ ਪਰਿਸੁਦ੍ਧਂ ਕਰੇਯ੍ਯ, ਤਸ੍ਮਾ ਪੋਰਾਣਸਿਕ੍ਖਾਯ ਪਚ੍ਚਕ੍ਖਾਨਂ ਅਯੁਤ੍ਤਂ ਵਿਯ ਦਿਸ੍ਸਤਿ. ਤਤੋ ਪੋਰਾਣਸਿਕ੍ਖਂ ਪਚ੍ਚਕ੍ਖਾਯ ਨਵਸਿਕ੍ਖਾਗਹਣਤੋ ਪੁਨਪ੍ਪੁਨਂ ਕਰਣਂਯੇਵ ਯੁਤ੍ਤਤਰਂ ਦਿਸ੍ਸਤਿ. ਕਸ੍ਮਾ? ਪੋਰਾਣਸਿਕ੍ਖਂ ਪਚ੍ਚਕ੍ਖਾਯ ਨਵਸਿਕ੍ਖਾਗਹਣੇ ਪੁਰਿਮਕਮ੍ਮਂ ਅਸਮ੍ਪਜ੍ਜਿਤ੍ਵਾ ਪਚ੍ਛਿਮਕਮ੍ਮਸਮ੍ਪਜ੍ਜਨੇ ਸਤਿ ਕਿਞ੍ਚਾਪਿ ਪੁਰਿਮਸਿਕ੍ਖਾ ਨਤ੍ਥਿ, ਯਾ ਪਚ੍ਚਕ੍ਖਾਤਬ੍ਬਾ, ਤਥਾਪਿ ਨਵਸਿਕ੍ਖਾਯ ਸਮ੍ਪਜ੍ਜਿਤਤ੍ਤਾ ਦੋਸੋ ਨਤ੍ਥਿ, ਦਹਰਭਾਵਂ ਪਤ੍ਤੋਪਿ ਯੁਤ੍ਤਰੂਪੋਯੇਵ.

ਯਦਿ ਪੁਰਿਮਕਮ੍ਮਮ੍ਪਿ ਪਚ੍ਛਿਮਕਮ੍ਮਮ੍ਪਿ ਸਮ੍ਪਜ੍ਜਤਿਯੇਵ, ਏਵਂ ਸਤਿ ਪੁਰਿਮਸਿਕ੍ਖਾਯ ਪਚ੍ਚਕ੍ਖਾਨਂ ਨਿਰਤ੍ਥਕਂ. ਪਚ੍ਛਿਮਸਿਕ੍ਖਾਯ ਠਿਤੋਪਿ ਦਹਰਭਾਵਂ ਪਤ੍ਤਤ੍ਤਾ ਅਯੁਤ੍ਤਰੂਪੋ. ਯਦਿ ਪਨ ਪੁਰਿਮਕਮ੍ਮਮੇਵ ਸਮ੍ਪਜ੍ਜਤਿ, ਨ ਪਚ੍ਛਿਮਕਮ੍ਮਂ, ਏਵਂ ਸਤਿ ਪੁਬ੍ਬੇ ਠਿਤਪੋਰਾਣਸਿਕ੍ਖਾਪਿ ਪਚ੍ਚਕ੍ਖਾਨੇਨ ਪਤਿਤਾ. ਪਚ੍ਛਿਮਸਿਕ੍ਖਾਪਿ ਪਚ੍ਛਿਮਕਮ੍ਮਸ੍ਸ ਪਞ੍ਚਨ੍ਨਂ ਵਿਪਤ੍ਤੀਨਂ ਅਞ੍ਞਤਰੇਨ ਯੋਗਤੋ ਨ ਸਮ੍ਪਜ੍ਜਤਿ, ਤਸ੍ਮਾ ਪੁਰਿਮਸਿਕ੍ਖਾਯ ਚ ਪਤਿਤਤ੍ਤਾ ਪਚ੍ਛਿਮਸਿਕ੍ਖਾਯ ਚ ਅਲਦ੍ਧਤ੍ਤਾ ਉਭਤੋ ਭਟ੍ਠਤ੍ਤਾ ਅਯੁਤ੍ਤੋਵ ਹੋਤਿ. ਪੋਰਾਣਸਿਕ੍ਖਂ ਅਪ੍ਪਚ੍ਚਕ੍ਖਾਯ ਨਵਸਿਕ੍ਖਾਗਹਣੇ ਪਨ ਸਤਿ ਪੁਰਿਮਕਮ੍ਮਂ ਸਮ੍ਪਨ੍ਨਂ ਹੁਤ੍ਵਾ ਪਚ੍ਛਿਮਕਮ੍ਮਂ ਅਸਮ੍ਪਨ੍ਨਂ ਹੋਨ੍ਤਮ੍ਪਿ ਪੁਰਿਮਸਿਕ੍ਖਾਯ ਪਤਿਟ੍ਠਿਤੋਯੇਵ, ਪੁਰਿਮਂ ਅਸਮ੍ਪਨ੍ਨਂ ਹੁਤ੍ਵਾ ਪਚ੍ਛਿਮਂ ਸਮ੍ਪਨ੍ਨਮ੍ਪਿ ਪਚ੍ਛਿਮਸਿਕ੍ਖਾਯ ਠਿਤੋ ਏਵ. ਪੁਰਿਮਪਚ੍ਛਿਮਕਮ੍ਮਦ੍ਵਯਮ੍ਪਿ ਪਞ੍ਚਹਙ੍ਗੇਹਿ ਸਮ੍ਪਨ੍ਨਮ੍ਪਿ ਦਲ਼੍ਹਿਕਮ੍ਮਥਿਰਤਰਭੂਤਾਯ ਪੁਰਿਮਸਿਕ੍ਖਾਯ ਠਿਤੋਯੇਵ ਸੋ ਭਿਕ੍ਖੁ ਹੋਤਿ, ਤਸ੍ਮਾ ਪੁਰਿਮਸਿਕ੍ਖਂ ਪਚ੍ਚਕ੍ਖਾਯ ਨਵਸਿਕ੍ਖਾਗਹਣਤੋ ਪੁਰਿਮਸਿਕ੍ਖਂ ਅਪ੍ਪਚ੍ਚਕ੍ਖਾਯ ਪੁਨਪ੍ਪੁਨਂ ਨਵਸਿਕ੍ਖਾਗਹਣਂ ਯੁਤ੍ਤਤਰਂ ਹੋਤੀਤਿ ਦਟ੍ਠਬ੍ਬਂ.

ਇਮਂ ਪਨ ਪੁਨਪ੍ਪੁਨਂ ਕਰੋਨ੍ਤਾਨਂ ਆਚਰਿਯਾਨਂ ਵਾਦਂ ਅਮਨਸਿਕਰੋਨ੍ਤਾ ਅਞ੍ਞੇ ਆਚਰਿਯਾ ਅਨੇਕਪ੍ਪਕਾਰਂ ਅਨਿਚ੍ਛਿਤਕਥਂ ਕਥੇਨ੍ਤਿ. ਕਥਂ? ਏਕਚ੍ਚੇ ਥੇਰਾ ਏਵਂ ਵਦਨ੍ਤਿ ‘‘ਕਿਂ ਇਮੇ ਭਿਕ੍ਖੂ ਏਵਂ ਕਰੋਨ੍ਤਾ ਪਾਰਾਜਿਕਪ੍ਪਤ੍ਤਂ ਭਿਕ੍ਖੁਂ ਪੁਨ ਸਿਕ੍ਖਾਯ ਪਤਿਟ੍ਠਾਪੇਸ੍ਸਾਮਾਤਿ ਮਞ੍ਞਨ੍ਤੀ’’ਤਿ. ਤੇ ਥੇਰਾ ਪੁਨਪ੍ਪੁਨਂ ਕਮ੍ਮਵਾਚਂ ਭਣਨ੍ਤੇ ਭਿਕ੍ਖੂ ਦਿਸ੍ਵਾ ‘‘ਇਮੇ ਭਿਕ੍ਖੂ ਇਮਿਨਾ ਕਾਰਣੇਨ ਏਵਂ ਕਰੋਨ੍ਤੀ’’ਤਿ ਚਿਨ੍ਤੇਤ੍ਵਾ ਏਵਮਾਹਂਸੁ. ਏਕਚ੍ਚੇ ਪਨ ਥੇਰਾ ‘‘ਕਸ੍ਮਾ ਇਮੇ ਭਿਕ੍ਖੂ ਪੁਨਪ੍ਪੁਨਂ ਕਰੋਨ੍ਤਿ, ਯਥਾ ਨਾਮ ਅਸਨਿ ਏਕਵਾਰਮੇਵ ਪਤਨ੍ਤੀ ਸਤ੍ਤੇ ਜੀਵਿਤਕ੍ਖਯਂ ਪਾਪੇਤਿ, ਏਵਮੇਵ ਭਗਵਤੋ ਆਣਾਭੂਤਾ ਕਮ੍ਮਵਾਚਾ ਏਕਵਾਰਂ ਭਣਮਾਨਾ ਕਮ੍ਮਂ ਸਿਜ੍ਝਾਪੇਤਿ, ਨ ਅਨੇਕਵਾਰ’’ਨ੍ਤਿ, ਤੇਪਿ ‘‘ਕਮ੍ਮਸਿਜ੍ਝਨਤ੍ਥਾਯ ਪੁਨਪ੍ਪੁਨਂ ਭਣਨ੍ਤੀ’’ਤਿ ਚਿਨ੍ਤੇਤ੍ਵਾ ਏਵਮਾਹਂਸੁ. ਬਹਵੋ ਪਨ ਭਿਕ੍ਖੂ ਪੁਨਪ੍ਪੁਨਂ ਕਰੋਨ੍ਤੇ ਦਿਸ੍ਵਾ ਏਵਂ ਵਦਨ੍ਤਿ ‘‘ਇਮੇ ਭਿਕ੍ਖੂ ਆਚਰਿਯੁਪਜ੍ਝਾਯੇਹਿ ਦਿਨ੍ਨਸਿਕ੍ਖਂ ਅਸਦ੍ਦਹਨ੍ਤਾ ਏਵਂ ਕਰੋਨ੍ਤਿ, ਆਚਰਿਯੁਪਜ੍ਝਾਯਗੁਣਾਪਰਾਧਕਾ ਏਤੇ ਸਮਣਾ’’ਤਿ. ਤੇ ‘‘ਪੁਬ੍ਬਸਿਕ੍ਖਂ ਅਸਦ੍ਦਹਿਤ੍ਵਾ ਪੁਨਪ੍ਪੁਨਂ ਕਰੋਨ੍ਤੀ’’ਤਿ ਮਞ੍ਞਨ੍ਤਾ ਏਵਮਾਹਂਸੁ.

ਅਪਰੇ ਪਨ ਥੇਰਾ ‘‘ਪਠਮਂ ਉਪਸਮ੍ਪਦਕਮ੍ਮਵਾਚਾਭਣਨਕਾਲੇਯੇਵ ਪੁਨਪ੍ਪੁਨਂ ਵਤ੍ਤਬ੍ਬਂ, ਨ ਅਪਰਭਾਗੇ’’ਤਿ, ਤਤ੍ਥ ਕਾਰਣਂ ਹੇਟ੍ਠਾ ਵੁਤ੍ਤਮੇਵ. ਅਞ੍ਞੇ ਏਵਮਾਹਂਸੁ ‘‘ਞਤ੍ਤਿਦੁਤਿਯਕਮ੍ਮਵਾਚਾਯਮੇਵ ਪੁਨਪ੍ਪੁਨਂ ਵਤ੍ਤਬ੍ਬਨ੍ਤਿ ਅਟ੍ਠਕਥਾਯਂ ਵੁਤ੍ਤਂ, ਨ ਞਤ੍ਤਿਚਤੁਤ੍ਥਕਮ੍ਮੇ, ਅਥ ਚ ਪਨਿਮੇ ਭਿਕ੍ਖੂ ਞਤ੍ਤਿਚਤੁਤ੍ਥਕਮ੍ਮਭੂਤਾਯ ਉਪਸਮ੍ਪਦਕਮ੍ਮਵਾਚਾਯ ਪੁਨਪ੍ਪੁਨਂ ਕਰੋਨ੍ਤਿ, ਏਤਂ ਅਟ੍ਠਕਥਾਯ ਨ ਸਮੇਤੀ’’ਤਿ, ਤਂ ਨੀਤਤ੍ਥਮੇਵ ਗਹੇਤ੍ਵਾ ਵਦਿਂਸੁ. ਨੇਯ੍ਯਤ੍ਥਤੋ ਪਨ ਇਮਿਨਾ ਨਯੇਨ ਚਤੂਸੁਪਿ ਕਮ੍ਮੇਸੁ ਪੁਨਪ੍ਪੁਨਂ ਕਾਤਬ੍ਬਨ੍ਤਿ ਦਸ੍ਸੇਤਿ. ਕਮ੍ਮਸਙ੍ਕਰਮੇਵ ਹਿ ਞਤ੍ਤਿਦੁਤਿਯਕਮ੍ਮੇ ਵਿਸੇਸਤੋ ਵਦਤਿ, ਪੁਨਪ੍ਪੁਨਂ ਵਤ੍ਤਬ੍ਬਭਾਵੋ ਪਨ ਸਬ੍ਬੇਸੂਤਿ ਦਟ੍ਠਬ੍ਬੋ. ਤੇਨੇਵ ਹਿ ਞਤ੍ਤਿਚਤੁਤ੍ਥਕਮ੍ਮਵਾਚਾਯ ਉਪਸਮ੍ਪਨ੍ਨਟ੍ਠਾਨੇਯੇਵ ਪੁਬ੍ਬੇ ਅਨੁਪਸਮ੍ਪਨ੍ਨਸ੍ਸ ਪੁਗ੍ਗਲਸ੍ਸ ਪਚ੍ਛਾ ਉਪਸਮ੍ਪਜ੍ਜਿਤਬ੍ਬਭਾਵੋ ਅਟ੍ਠਕਥਾਯਂ ਵੁਤ੍ਤੋਤਿ.

ਪਟਿਪੁਚ੍ਛਾਕਰਣੀਯਾਦੀਸੁਪੀਤਿ ਏਤ੍ਥ ਆਦਿਸਦ੍ਦੇਨ ਪਟਿਂਞ੍ਞਾਯ ਕਰਣੀਯਾਦਯੋ ਸਙ੍ਗਣ੍ਹਾਤਿ. ਤਤ੍ਥ ਪਟਿਪੁਚ੍ਛਾਯ ਕਰਣੀਯਂ ਅਪ੍ਪਟਿਪੁਚ੍ਛਾ ਕਰੋਤੀਤਿ ਪੁਚ੍ਛਿਤ੍ਵਾ ਚੋਦੇਤ੍ਵਾ ਸਾਰੇਤ੍ਵਾ ਕਾਤਬ੍ਬਂ ਅਪੁਚ੍ਛਿਤ੍ਵਾ ਅਚੋਦੇਤ੍ਵਾ ਅਸਾਰੇਤ੍ਵਾ ਕਰੋਤਿ. ਪਟਿਞ੍ਞਾਯ ਕਰਣੀਯਂ ਅਪ੍ਪਟਿਞ੍ਞਾਯ ਕਰੋਤੀਤਿ ਪਟਿਞ੍ਞਂ ਆਰੋਪੇਤ੍ਵਾ ਯਥਾਦਿਨ੍ਨਾਯ ਪਟਿਞ੍ਞਾਯ ਕਾਤਬ੍ਬਂ ਅਪਟਿਞ੍ਞਾਯ ਪਟਿਞ੍ਞਂ ਅਕਰੋਨ੍ਤਸ੍ਸ ਵਿਲਪਨ੍ਤਸ੍ਸ ਬਲਕ੍ਕਾਰੇਨ ਕਰੋਤਿ. ਸਤਿਵਿਨਯਾਰਹਸ੍ਸਾਤਿ ਦਬ੍ਬਮਲ੍ਲਪੁਤ੍ਤਤ੍ਥੇਰਸਦਿਸਸ੍ਸ ਖੀਣਾਸਵਸ੍ਸ. ਅਮੂਲ਼੍ਹਵਿਨਯਾਰਹਸ੍ਸਾਤਿ ਗਗ੍ਗਭਿਕ੍ਖੁਸਦਿਸਸ੍ਸ ਉਮ੍ਮਤ੍ਤਕਸ੍ਸ. ਤਸ੍ਸਪਾਪਿਯਸਿਕਕਮ੍ਮਾਰਹਸ੍ਸਾਤਿ ਉਪਵਾਲ਼ਭਿਕ੍ਖੁਸਦਿਸਸ੍ਸ ਉਸ੍ਸਨ੍ਨਪਾਪਸ੍ਸ. ਤਜ੍ਜਨੀਯਕਮ੍ਮਾਰਹਸ੍ਸਾਤਿ ਪਣ੍ਡਕਲੋਹਿਤਕਭਿਕ੍ਖੁਸਦਿਸਸ੍ਸ ਭਣ੍ਡਨਕਾਰਕਸ੍ਸ. ਨਿਯਸਕਮ੍ਮਾਰਹਸ੍ਸਾਤਿ ਸੇਯ੍ਯਸਕਭਿਕ੍ਖੁਸਦਿਸਸ੍ਸ ਅਭਿਣ੍ਹਾਪਤ੍ਤਿਕਸ੍ਸ. ਪਬ੍ਬਾਜਨੀਯਕਮ੍ਮਾਰਹਸ੍ਸਾਤਿ ਅਸ੍ਸਜਿਪੁਨਬ੍ਬਸੁਕਭਿਕ੍ਖੁਸਦਿਸਸ੍ਸ ਕੁਲਦੂਸਕਸ੍ਸ. ਪਟਿਸਾਰਣੀਯਕਮ੍ਮਾਰਹਸ੍ਸਾਤਿ ਸੁਧਮ੍ਮਭਿਕ੍ਖੁਸਅਸਸ੍ਸ ਉਪਾਸਕੇ ਜਾਤਿਆਦੀਹਿ ਦੂਸੇਨ੍ਤਸ੍ਸ. ਉਕ੍ਖੇਪਨੀਯਕਮ੍ਮਾਰਹਸ੍ਸਾਤਿ ਛਨ੍ਨਭਿਕ੍ਖੁਸਦਿਸਸ੍ਸ ਆਪਤ੍ਤਿਂ ਅਪਸ੍ਸਨ੍ਤਸ੍ਸ ਆਪਤ੍ਤਿਂ ਅਦੇਸੇਨ੍ਤਸ੍ਸ ਅਰਿਟ੍ਠਭਿਕ੍ਖੁਸਦਿਸਸ੍ਸ ਮਿਚ੍ਛਾਦਿਟ੍ਠਿਂ ਅਵਿਸ੍ਸਜ੍ਜੇਨ੍ਤਸ੍ਸ. ਪਰਿਵਾਸਾਰਹਸ੍ਸਾਤਿ ਪਟਿਚ੍ਛਨ੍ਨਸਙ੍ਘਾਦਿਸੇਸਾਪਤ੍ਤਿਕਸ੍ਸ. ਮੂਲਾਯਪਟਿਕਸ੍ਸਨਾਰਹਸ੍ਸਾਤਿ ਅਨ੍ਤਰਾਪਤ੍ਤਿਂ ਆਪਨ੍ਨਸ੍ਸ. ਮਾਨਤ੍ਤਾਰਹਨ੍ਤਿ ਅਪ੍ਪਟਿਚ੍ਛਨ੍ਨਸਙ੍ਘਾਦਿਸੇਸਾਪਤ੍ਤਿਕਂ. ਅਬ੍ਭਾਨਾਰਹਨ੍ਤਿ ਚਿਣ੍ਣਮਾਨਤ੍ਤਂ ਭਿਕ੍ਖੁਂ. ਉਪਸਮ੍ਪਾਦੇਤੀਤਿ ਉਪਸਮ੍ਪਦਕਮ੍ਮਂ ਕਰੋਤਿ.

ਅਨੁਪੋਸਥੇ ਉਪੋਸਥਂ ਕਰੋਤੀਤਿ ਅਨੁਪੋਸਥਦਿਵਸੇ ਉਪੋਸਥਂ ਕਰੋਤਿ. ਉਪੋਸਥਦਿਵਸੋ ਨਾਮ ਠਪੇਤ੍ਵਾ ਕਤ੍ਤਿਕਮਾਸਂ ਅਵਸੇਸੇਸੁ ਏਕਾਦਸਸੁ ਮਾਸੇਸੁ ਭਿਨ੍ਨਸ੍ਸ ਸਙ੍ਘਸ੍ਸ ਸਾਮਗ੍ਗਿਦਿਵਸੋ ਚ ਯਥਾਵੁਤ੍ਤਾ ਚਾਤੁਦ੍ਦਸਪਨ੍ਨਰਸਾ ਚ, ਏਤਂ ਤਿਪ੍ਪਕਾਰਮ੍ਪਿ ਉਪੋਸਥਦਿਵਸਂ ਠਪੇਤ੍ਵਾ ਅਞ੍ਞਸ੍ਮਿਂ ਦਿਵਸੇ ਉਪੋਸਥਂ ਕਰੋਨ੍ਤੋ ਅਨੁਪੋਸਥੇ ਉਪੋਸਥਂ ਕਰੋਤਿ ਨਾਮ. ਯਤ੍ਰ ਹਿ ਪਤ੍ਤਚੀਵਰਾਦਿਅਤ੍ਥਾਯ ਅਪ੍ਪਮਤ੍ਤਕੇਨ ਕਾਰਣੇਨ ਵਿਵਦਨ੍ਤਾ ਉਪੋਸਥਂ ਵਾ ਪਵਾਰਣਂ ਵਾ ਠਪੇਨ੍ਤਿ, ਤਤ੍ਥ ਤਸ੍ਮਿਂ ਅਧਿਕਰਣੇ ਵਿਨਿਚ੍ਛਿਤੇ ‘‘ਸਮਗ੍ਗਾ ਜਾਤਮ੍ਹਾ’’ਤਿ ਅਨ੍ਤਰਾ ਸਾਮਗ੍ਗੀਉਪੋਸਥਂ ਕਾਤੁਂ ਨ ਲਭਨ੍ਤਿ, ਕਰੋਨ੍ਤੇਹਿ ਅਨੁਪੋਸਥੇ ਉਪੋਸਥੋ ਕਤੋ ਨਾਮ ਹੋਤਿ.

ਅਪ੍ਪਵਾਰਣਾਯ ਪਵਾਰੇਤੀਤਿ ਅਪ੍ਪਵਾਰਣਦਿਵਸੇ ਪਵਾਰੇਤਿ. ਪਵਾਰਣਦਿਵਸੋ ਨਾਮ ਏਕਸ੍ਮਿਂ ਕਤ੍ਤਿਕਮਾਸੇ ਭਿਨ੍ਨਸ੍ਸ ਸਙ੍ਘਸ੍ਸ ਸਾਮਗ੍ਗਿਦਿਵਸੋ ਚ ਪਚ੍ਚੁਕ੍ਕਡ੍ਢਿਤ੍ਵਾ ਠਪਿਤਦਿਵਸੋ ਚ ਦ੍ਵੇ ਚ ਪੁਣ੍ਣਮਾਸਿਯੋ, ਏਤਂ ਚਤੁਬ੍ਬਿਧਂ ਪਵਾਰਣਦਿਵਸਂ ਠਪੇਤ੍ਵਾ ਅਞ੍ਞਸ੍ਮਿਂ ਦਿਵਸੇ ਪਵਾਰੇਨ੍ਤੋ ਅਪ੍ਪਵਾਰਣਾਯ ਪਵਾਰੇਤਿ ਨਾਮ. ਇਧਾਪਿ ਅਪ੍ਪਮਤ੍ਤਕਸ੍ਸ ਵਿਵਾਦਸ੍ਸ ਵੂਪਸਮੇ ਸਾਮਗ੍ਗੀਪਵਾਰਣਂ ਕਾਤੁਂ ਨ ਲਭਨ੍ਤਿ. ਕਰੋਨ੍ਤੇਹਿ ਅਪ੍ਪਵਾਰਣਾਯ ਪਵਾਰਣਾ ਕਤਾ ਹੋਤੀਤਿ ਅਯਂ ਅਟ੍ਠਕਥਾਪਾਠੋ (ਪਰਿ. ਅਟ੍ਠ. ੪੮੩).

‘‘ਉਮ੍ਮਤ੍ਤਕਸ੍ਸ ਭਿਕ੍ਖੁਨੋ ਉਮ੍ਮਤ੍ਤਕਸਮ੍ਮੁਤਿ ਉਮ੍ਮਤ੍ਤਕੇਨ ਯਾਚਿਤ੍ਵਾ ਕਤੇ ਅਸਮ੍ਮੁਖਾਪਿ ਦਾਤੁਂ ਵਟ੍ਟਤਿ, ਤਤ੍ਥ ਨਿਸਿਨ੍ਨੇਪਿ ਨ ਕੁਪ੍ਪਤਿ ਨਿਯਮਾਭਾਵਤੋ. ਅਸਮ੍ਮੁਖਾ ਕਤੇ ਪਨ ਦੋਸਾਭਾਵਂ ਦਸ੍ਸੇਤੁਂ ‘ਅਸਮ੍ਮੁਖਾ ਕਤਂ ਸੁਕਤਂ ਹੋਤੀ’ਤਿ ਵੁਤ੍ਤਂ. ਦੂਤੇਨ ਉਪਸਮ੍ਪਦਾ ਪਨ ਸਮ੍ਮੁਖਾ ਕਾਤੁਂ ਨ ਸਕ੍ਕਾ ਕਮ੍ਮਵਾਚਾਨਾਨਤ੍ਤਸਮ੍ਭਵਤੋ. ਪਤ੍ਤਨਿਕ੍ਕੁਜ੍ਜਨਾਦਯੋ ਹਤ੍ਥਪਾਸਤੋ ਅਪਨੀਤਮਤ੍ਤੇਪਿ ਕਾਤੁਂ ਵਟ੍ਟਨ੍ਤਿ. ਸਙ੍ਘਸਮ੍ਮੁਖਤਾਤਿਆਦੀਸੁ ਯਾਵਤਿਕਾ ਭਿਕ੍ਖੂ ਕਮ੍ਮਪ੍ਪਤ੍ਤਾ, ਤੇ ਆਗਤਾ ਹੋਨ੍ਤਿ, ਛਨ੍ਦਾਰਹਾਨਂ ਛਨ੍ਦੋ ਆਹਤੋ ਹੋਤਿ, ਸਮ੍ਮੁਖੀਭੂਤਾ ਨ ਪਟਿਕ੍ਕੋਸਨ੍ਤਿ, ਅਯਂ ਸਙ੍ਘਸਮ੍ਮੁਖਤਾ. ਯੇਨ ਧਮ੍ਮੇਨ ਯੇਨ ਵਿਨਯੇਨ ਯੇਨ ਸਤ੍ਥੁਸਾਸਨੇਨ ਸਙ੍ਘੋ ਕਮ੍ਮਂ ਕਰੋਤਿ, ਅਯਂ ਧਮ੍ਮਸਮ੍ਮੁਖਤਾ ਵਿਨਯਸਮ੍ਮੁਖਤਾ. ਤਤ੍ਥ ਧਮ੍ਮੋਤਿ ਭੂਤਂ ਵਤ੍ਥੁ. ਵਿਨਯੋਤਿ ਚੋਦਨਾ ਚੇਵ ਸਾਰਣਾ ਚ. ਸਤ੍ਥੁਸਾਸਨਂ ਨਾਮ ਞਤ੍ਤਿਸਮ੍ਪਦਾ ਚੇਵ ਅਨੁਸ੍ਸਾਵਨਸਮ੍ਪਦਾ ਚ. ਯਸ੍ਸ ਸਙ੍ਘੋ ਕਮ੍ਮਂ ਕਰੋਤਿ, ਤਸ੍ਸ ਸਮ੍ਮੁਖਾਭਾਵੋ ਪੁਗ੍ਗਲਸਮ੍ਮੁਖਤਾ. ਕਤ੍ਤਿਕਮਾਸਸ੍ਸ ਪਵਾਰਣਮਾਸਤ੍ਤਾ ‘ਠਪੇਤ੍ਵਾ ਕਤ੍ਤਿਕਮਾਸ’ਨ੍ਤਿ ਵੁਤ੍ਤਂ. ਪਚ੍ਚੁਕ੍ਕਡ੍ਢਿਤ੍ਵਾ ਠਪਿਤਦਿਵਸੋ ਚਾਤਿ ਕਾਲ਼ਪਕ੍ਖੇ ਚਾਤੁਦ੍ਦਸਿਂ ਪਨ੍ਨਰਸਿਂ ਵਾ ਸਨ੍ਧਾਯ ਵੁਤ੍ਤਂ. ਦ੍ਵੇ ਪੁਣ੍ਣਮਾਸਿਯੋਤਿ ਪਠਮਪਚ੍ਛਿਮਵਸ੍ਸੂਪਗਤਾਨਂ ਵਸੇਨ ਵੁਤ੍ਤ’’ਨ੍ਤਿ ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ਪਰਿਵਾਰ ੩.੪੮੩) ਆਗਤਂ.

‘‘ਠਪਿਤਉਪੋਸਥਪਵਾਰਣਾਨਂ ਕਤ੍ਤਿਕਮਾਸੇ ਸਾਮਗ੍ਗਿਯਾ ਕਤਾਯ ਸਾਮਗ੍ਗੀਪਵਾਰਣਂ ਮੁਞ੍ਚਿਤ੍ਵਾ ਉਪੋਸਥਂ ਕਾਤੁਂ ਨ ਵਟ੍ਟਤੀਤਿ ਆਹ ‘ਠਪੇਤ੍ਵਾ ਕਤ੍ਤਿਕਮਾਸ’ਨ੍ਤਿ. ਸਚੇ ਪਨ ਤੇਸਂ ਨਾਨਾਸੀਮਾਸੁ ਮਹਾਪਵਾਰਣਾਯ ਵਿਸੁਂ ਪਵਾਰਿਤਾਨਂ ਕਤ੍ਤਿਕਮਾਸਬ੍ਭਨ੍ਤਰੇ ਸਾਮਗ੍ਗੀ ਹੋਤਿ, ਸਾਮਗ੍ਗੀਉਪੋਸਥੋ ਏਵ ਤੇਹਿ ਕਾਤਬ੍ਬੋ, ਨ ਪਵਾਰਣਾ ਏਕਸ੍ਮਿਂ ਵਸ੍ਸੇ ਕਤਪਵਾਰਣਾਨਂ ਪੁਨ ਪਵਾਰਣਾਯ ਅਵਿਹਿਤਤ੍ਤਾ. ਸਾਮਗ੍ਗੀਦਿਵਸੋ ਹੋਤੀਤਿ ਅਨੁਪੋਸਥਦਿਵਸੇ ਸਾਮਗ੍ਗੀਕਰਣਂ ਸਨ੍ਧਾਯ ਵੁਤ੍ਤਂ. ਸਚੇ ਪਨ ਚਾਤੁਦ੍ਦਸਿਯਂ ਪਨ੍ਨਰਸਿਯਂ ਵਾ ਸਙ੍ਘੋ ਸਾਮਗ੍ਗਿਂ ਕਰੋਤਿ, ਤਦਾ ਸਾਮਗ੍ਗੀਉਪੋਸਥਦਿਵਸੋ ਨ ਹੋਤਿ, ਚਾਤੁਦ੍ਦਸੀਪਨ੍ਨਰਸੀਉਪੋਸਥੋਵ ਹੋਤਿ. ਉਪਰਿ ਪਵਾਰਣਾਯਪਿ ਏਸੇਵ ਨਯੋ. ਪਚ੍ਚੁਕ੍ਕਡ੍ਢਿਤ੍ਵਾ ਠਪਿਤਦਿਵਸੋ ਚਾਤਿ ਭਣ੍ਡਨਕਾਰਕੇਹਿ ਉਪਦ੍ਦੁਤਾ ਵਾ ਕੇਨਚਿਦੇਵ ਕਰਣੀਯੇਨ ਪਵਾਰਣਸਙ੍ਗਹਂ ਵਾ ਕਤ੍ਵਾ ਠਪਿਤੋ ਕਾਲ਼ਪਕ੍ਖਚਾਤੁਦ੍ਦਸੀਦਿਵਸੋ ਚ. ਦ੍ਵੇ ਚ ਪੁਣ੍ਣਮਾਸਿਯੋਤਿ ਪੁਬ੍ਬਕਤ੍ਤਿਕਪੁਣ੍ਣਮਾ ਪਚ੍ਛਿਮਕਤ੍ਤਿਕਪੁਣ੍ਣਮਾ ਚਾਤਿ ਦ੍ਵੇ ਪੁਣ੍ਣਮਾਸਿਯੋ. ਏਤਂ ਚਤੁਬ੍ਬਿਧਨ੍ਤਿ ਪੁਣ੍ਣਮਾਸਿਦ੍ਵਯੇਨ ਸਦ੍ਧਿਂ ਸਾਮਗ੍ਗੀਪਵਾਰਣਂ ਚਾਤੁਦ੍ਦਸੀਪਵਾਰਣਞ੍ਚ ਸਮ੍ਪਿਣ੍ਡੇਤ੍ਵਾ, ਇਦਞ੍ਚ ਪਕਤਿਚਾਰਿਤ੍ਤਵਸੇਨ ਵੁਤ੍ਤਂ. ਤਥਾਰੂਪਪਚ੍ਚਯੇ ਪਨ ਸਤਿ ਉਭਿਨ੍ਨਂ ਪੁਣ੍ਣਮਾਸੀਨਂ ਪੁਰਿਮਾ ਦ੍ਵੇ ਚਾਤੁਦ੍ਦਸਿਯੋ, ਕਾਲ਼ਪਕ੍ਖਚਾਤੁਦ੍ਦਸਿਯਾ ਅਨਨ੍ਤਰਾ ਪਨ੍ਨਰਸੀਪੀਤਿ ਇਮੇਪਿ ਤਯੋ ਦਿਵਸਾ ਪਵਾਰਣਾਦਿਵਸਾ ਏਵਾਤਿ ਇਮਂ ਸਤ੍ਤਵਿਧਮ੍ਪਿ ਪਵਾਰਣਾਦਿਵਸਂ ਠਪੇਤ੍ਵਾ ਅਞ੍ਞਸ੍ਮਿਂ ਦਿਵਸੇ ਪਵਾਰੇਤੁਂ ਨ ਵਟ੍ਟਤੀ’’ਤਿ ਵਿਮਤਿਵਿਨੋਦਨਿਯਂ (ਵਿ. ਵਿ. ਟੀ. ਪਰਿਵਾਰ ੨.੪੮੩) ਆਗਤਂ.

ਏਵਂ ਵਤ੍ਥੁਵਿਪਤ੍ਤਿਵਿਨਿਚ੍ਛਯਂ ਦਸ੍ਸੇਤ੍ਵਾ ਇਦਾਨਿ ਞਤ੍ਤਿਵਿਪਤ੍ਤਿਵਿਨਿਚ੍ਛਯਂ ਅਨੁਸ੍ਸਾਵਨਵਿਪਤ੍ਤਿਵਿਨਿਚ੍ਛਯਞ੍ਚ ਦਸ੍ਸੇਨ੍ਤੋ ‘‘ਞਤ੍ਤਿਤੋ ਵਿਪਤ੍ਤਿਯਂ ਪਨਾ’’ਤਿਆਦਿਮਾਹ. ਤਤ੍ਥ ਪਞ੍ਚਮਞਤ੍ਤਿਵਿਪਤ੍ਤਿਯਂ ‘‘ਪਚ੍ਛਾ ਵਾ ਞਤ੍ਤਿਂ ਠਪੇਤੀ’’ਤਿ ਏਤਸ੍ਸ ਸਂਵਣ੍ਣਨਾਯਂ ਅਨੁਸ੍ਸਾਵਨਕਮ੍ਮਂ ਕਤ੍ਵਾਤਿ ਪਠਮਂ ਅਨੁਸ੍ਸਾਵਨਂ ਸਾਵੇਤ੍ਵਾ ‘‘ਏਸਾ ਞਤ੍ਤੀ’’ਤਿ ਅਨੁਸ੍ਸਾਵਨਾਨਨ੍ਤਰਮੇਵ ਸਕਲਂ ਞਤ੍ਤਿਂ ਵਤ੍ਵਾ, ਪਰਿਯੋਸਾਨੇ ‘‘ਏਸਾ ਞਤ੍ਤੀ’’ਤਿ ਵਤ੍ਵਾਤਿ ਅਧਿਪ੍ਪਾਯੋ.

੨੫੨. ਚਤੁਤ੍ਥਅਨੁਸ੍ਸਾਵਨਵਿਪਤ੍ਤਿਸਂਵਣ੍ਣਨਾਯਂ ‘‘ਯ੍ਵਾਯਨ੍ਤਿ ਬ੍ਯਞ੍ਜਨਪ੍ਪਭੇਦੋ ਅਧਿਪ੍ਪੇਤੋ. ਦਸਧਾ ਬ੍ਯਞ੍ਜਨਬੁਦ੍ਧਿਯਾ ਪਭੇਦੋਤਿ ਏਤ੍ਥ ਦਸਧਾ ਦਸਵਿਧੇਨ ਬ੍ਯਞ੍ਜਨਾਨਂ ਪਭੇਦੋਤਿ ਯੋਜੇਤਬ੍ਬਂ. ਕੇਨਾਯਂ ਪਭੇਦੋਤਿ ਆਹ ‘ਬ੍ਯਞ੍ਜਨਬੁਦ੍ਧਿਯਾ’ਤਿ. ਯਥਾਧਿਪ੍ਪੇਤਤ੍ਥਬ੍ਯਞ੍ਜਨਤੋ ਬ੍ਯਞ੍ਜਨਸਙ੍ਖਾਤਾਨਂ ਅਕ੍ਖਰਾਨਂ ਜਨਿਕਾ ਬੁਦ੍ਧਿ ਬ੍ਯਞ੍ਜਨਬੁਦ੍ਧਿ, ਤਾਯ ਬ੍ਯਞ੍ਜਨਬੁਦ੍ਧਿਯਾ, ਅਕ੍ਖਰਸਮੁਟ੍ਠਾਪਕਚਿਤ੍ਤਭੇਦੇਨੇਵਾਤਿ ਅਤ੍ਥੋ. ਯਂ ਵਾ ਸਂਯੋਗਪਰਂ ਕਤ੍ਵਾ ਵੁਚ੍ਚਤਿ, ਇਦਮ੍ਪਿ ਗਰੁਕਨ੍ਤਿ ਯੋਜਨਾ’’ਤਿ ਵਿਮਤਿਵਿਨੋਦਨਿਯਂ ਵੁਤ੍ਤਂ.

ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ਪਰਿਵਾਰ ੩.੪੮੫) ਪਨ ‘‘ਠਾਨਕਰਣਾਨਿ ਸਿਥਿਲਾਨਿ ਕਤ੍ਵਾ ਉਚ੍ਚਾਰੇਤਬ੍ਬਮਕ੍ਖਰਂ ਸਿਥਿਲਂ, ਤਾਨਿਯੇਵ ਧਨਿਤਾਨਿ ਅਸਿਥਿਲਾਨਿ ਕਤ੍ਵਾ ਉਚ੍ਚਾਰੇਤਬ੍ਬਮਕ੍ਖਰਂ ਧਨਿਤਂ. ਦ੍ਵਿਮਤ੍ਤਕਾਲਂ ਦੀਘਂ, ਏਕਮਤ੍ਤਕਾਲਂ ਰਸ੍ਸਂ. ਦਸਧਾ ਬ੍ਯਞ੍ਜਨਬੁਦ੍ਧਿਯਾ ਪਭੇਦੋਤਿ ਏਵਂ ਸਿਥਿਲਾਦਿਵਸੇਨ ਬ੍ਯਞ੍ਜਨਬੁਦ੍ਧਿਯਾ ਅਕ੍ਖਰੁਪ੍ਪਾਦਕਚਿਤ੍ਤਸ੍ਸ ਦਸਪ੍ਪਕਾਰੇਨ ਪਭੇਦੋ. ਸਬ੍ਬਾਨਿ ਹਿ ਅਕ੍ਖਰਾਨਿ ਚਿਤ੍ਤਸਮੁਟ੍ਠਾਨਾਨਿ ਯਥਾਧਿਪ੍ਪੇਤਤ੍ਥਬ੍ਯਞ੍ਜਨਤੋ ਬ੍ਯਞ੍ਜਨਾਨਿ ਚ. ਸਂਯੋਗੋ ਪਰੋ ਏਤਸ੍ਮਾਤਿ ਸਂਯੋਗਪਰੋ. ਨ ਸਂਯੋਗਪਰੋ ਅਸਂਯੋਗਪਰੋ ‘ਆਯਸ੍ਮਤੋ ਬੁਦ੍ਧਰਕ੍ਖਿਤਥੇਰਸ੍ਸ ਯਸ੍ਸ ਨ ਖਮਤੀ’ਤਿ ਏਤ੍ਥ ਤ-ਕਾਰ ਨ-ਕਾਰਸਹਿਤਾਰੋ ਅਸਂਯੋਗਪਰੋ. ਕਰਣਾਨੀਤਿ ਕਣ੍ਠਾਦੀਨਿ’’ ਇਤਿ ਏਤ੍ਤਕਂ ਵੁਤ੍ਤਂ.

ਪੁਨ ਵਿਮਤਿਵਿਨੋਦਨਿਯਂ (ਵਿ. ਵਿ. ਟੀ. ਪਰਿਵਾਰ ੨.੪੮੫) ‘‘ਤਤ੍ਥ ਆਯਸ੍ਮਤੋਤਿਆਦੀਸੁ ਸਰਾਨਨ੍ਤਰਿਤਾਨਿ ਸ-ਕਾਰ ਮ-ਕਾਰਾਦਿਬ੍ਯਞ੍ਜਨਾਨਿ ‘ਸਂਯੋਗੋ’ਤਿ ਵੁਚ੍ਚਨ੍ਤਿ. ਯੋ ਸਂਯੋਗੋ ਪਰੋ ਯਸ੍ਸ ਅ-ਕਾਰਾਦਿਨੋ, ਸੋ ਸਂਯੋਗਪਰੋ ਨਾਮ. ਰਸ੍ਸਨ੍ਤਿ ਅ-ਕਾਰਾਦਿਬ੍ਯਞ੍ਜਨਰਹਿਤਂ ਪਦਂ. ਅਸਂਯੋਗਪਰਨ੍ਤਿ ‘ਯਸ੍ਸ ਨ ਖਮਤੀ’ਤਿਆਦੀਸੁ ਸ-ਕਾਰ ਨ-ਕਾਰਾਦਿਬ੍ਯਞ੍ਜਨਸਹਿਤਂ ਪਦਂ ਸਨ੍ਧਾਯ ਵੁਤ੍ਤਂ. ਤ-ਕਾਰਸ੍ਸ ਥ-ਕਾਰਂ ਅਕਤ੍ਵਾ ‘ਸੁਣਾਤੁ ਮੇ’ਤਿਆਦਿਂ ਅਵਤ੍ਵਾ ਵਗ੍ਗਨ੍ਤਰੇ ਸਿਥਿਲਮੇਵ ਕਤ੍ਵਾ ‘ਸੁਣਾਟੁ ਮੇ’ਤਿਆਦਿਂ ਵਦਨ੍ਤੋਪਿ ਦੁਰੁਤ੍ਤਂ ਕਰੋਤਿਯੇਵ ਠਪੇਤ੍ਵਾ ਅਨੁਰੂਪਂ ਆਦੇਸਂ. ਯਞ੍ਹਿ ‘ਸਚ੍ਚਿਕਤ੍ਥਪਰਮਤ੍ਥੇਨਾ’ਤਿ ਵਤ੍ਤਬ੍ਬੇ ‘ਸਚ੍ਚਿਕਟ੍ਠਪਰਮਟ੍ਠੇਨਾ’ਤਿ ਚ ‘ਅਤ੍ਥਕਥਾ’ਤਿ ਚ ਵਤ੍ਤਬ੍ਬੇ ‘ਅਟ੍ਠਕਥਾ’ਤਿ ਚ ਤਤ੍ਥ ਤਤ੍ਥ ਵੁਚ੍ਚਤਿ, ਤਾਦਿਸਂ ਪਾਲ਼ਿਅਟ੍ਠਕਥਾਦੀਸੁ ਦਿਟ੍ਠਪਯੋਗਂ ਤਦਨੁਰੂਪਞ੍ਚ ਵਤ੍ਤੁਂ ਵਟ੍ਟਤਿ, ਤਤੋ ਅਞ੍ਞਂ ਨ ਵਟ੍ਟਤਿ. ਤੇਨਾਹ ‘ਅਨੁਕ੍ਕਮਾਗਤਂ ਪਵੇਣਿਂ ਅਵਿਨਾਸੇਨ੍ਤੇਨਾ’ਤਿਆਦਿ. ‘ਦੀਘੇ ਵਤ੍ਤਬ੍ਬੇ ਰਸ੍ਸ’ਨ੍ਤਿਆਦੀਸੁ ‘ਭਿਕ੍ਖੂਨ’ਨ੍ਤਿ ਵਤ੍ਤਬ੍ਬੇ ‘ਭਿਕ੍ਖੁਨ’ਨ੍ਤਿ ਵਾ ‘ਬਹੂਸੂ’ਤਿ ਵਤ੍ਤਬ੍ਬੇ ‘ਬਹੁਸੂ’ਤਿ ਵਾ ‘ਨਕ੍ਖਮਤੀ’ਤਿ ਵਤ੍ਤਬ੍ਬੇ ‘ਨ ਖਮਤੀ’ਤਿ ਵਾ ‘ਉਪਸਮ੍ਪਦਾਪੇਕ੍ਖੋ’ਤਿ ਵਤ੍ਤਬ੍ਬੇ ‘ਉਪਸਮ੍ਪਦਾਪੇਖੋ’ਤਿ ਵਾ ਏਵਂ ਅਨੁਰੂਪਟ੍ਠਾਨੇਸੁ ਏਵ ਦੀਘਰਸ੍ਸਾਦਿਰਸ੍ਸਦੀਘਾਦਿਵਸੇਨ ਪਰਿਵਤ੍ਤੇਤੁਂ ਵਟ੍ਟਤਿ, ਨ ਪਨ ‘ਨਾਗੋ’ਤਿ ਵਤ੍ਤਬ੍ਬੇ ‘ਨਗੋ’ਤਿ ਵਾ ‘ਸਙ੍ਘੋ’ਤਿ ਵਤ੍ਤਬ੍ਬੇ ‘ਸਘੋ’ਤਿ ਵਾ ‘ਤਿਸ੍ਸੋ’ਤਿ ਵਤ੍ਤਬ੍ਬੇ ‘ਤਿਸੋ’ਤਿ ਵਾ ‘ਯਾਚਤੀ’ਤਿ ਵਤ੍ਤਬ੍ਬੇ ‘ਯਾਚਨ੍ਤੀ’ਤਿ ਵਾ ਏਵਂ ਅਨਨੁਰੂਪਟ੍ਠਾਨੇਸੁ ਵਤ੍ਤੁਂ. ਸਮ੍ਬਨ੍ਧਂ ਪਨ ਵਵਤ੍ਥਾਨਞ੍ਚ ਸਬ੍ਬਥਾਪਿ ਵਟ੍ਟਤੀਤਿ ਗਹੇਤਬ੍ਬ’’ਨ੍ਤਿ ਆਗਤਂ. ਸੇਸਾਨਿ ਅਟ੍ਠਕਥਾਯਂ ਵੁਤ੍ਤਨਯੇਨੇਵ ਸੁਟ੍ਠੁ ਸਲ੍ਲਕ੍ਖੇਤਬ੍ਬਾਨਿ.

੨੫੩. ਸੀਮਵਿਪਤ੍ਤਿਵਿਨਿਚ੍ਛਯੋ ਪਨ ਹੇਟ੍ਠਾ ਸੀਮਕਥਾਯਂ ਸਬ੍ਬੇਨ ਕਥਿਤੋ, ਤਸ੍ਮਾ ਤਤ੍ਥ ਵੁਤ੍ਤਨਯੇਨੇਵ ਗਹੇਤਬ੍ਬੋ.

ਪਰਿਸਵਿਪਤ੍ਤਿਕਥਾਯ ਚਤੁਵਗ੍ਗਕਰਣੇਤਿ ਚਤੁਵਗ੍ਗੇਨ ਸਙ੍ਘੇਨ ਕਤ੍ਤਬ੍ਬੇ. ਅਨਿਸ੍ਸਾਰਿਤਾਤਿ ਉਪੋਸਥਟ੍ਠਪਨਾਦਿਨਾ ਵਾ ਲਦ੍ਧਿਨਾਨਾਸਂਵਾਸਕਭਾਵੇਨ ਵਾ ਨ ਬਹਿਕਤਾ. ਅਟ੍ਠਕਥਾਯਞ੍ਹਿ ‘‘ਅਪਕਤਤ੍ਤਸ੍ਸਾਤਿ ਉਕ੍ਖਿਤ੍ਤਕਸ੍ਸ ਵਾ ਯਸ੍ਸ ਵਾ ਉਪੋਸਥਪਵਾਰਣਾ ਠਪਿਤਾ ਹੋਨ੍ਤੀ’’ਤਿ (ਪਰਿ. ਅਟ੍ਠ. ੪੨੫) ਵੁਤ੍ਤਤ੍ਤਾ ਠਪਿਤਉਪੋਸਥਪਵਾਰਣੋ ਭਿਕ੍ਖੁ ਅਪਕਤਤ੍ਤੋ ਏਵਾਤਿ ਗਹੇਤਬ੍ਬਂ. ਪਰਿਸੁਦ੍ਧਸੀਲਾਤਿ ਪਾਰਾਜਿਕਂ ਅਨਾਪਨ੍ਨਾ ਅਧਿਪ੍ਪੇਤਾ. ਪਰਿਵਾਸਾਦਿਕਮ੍ਮੇਸੁ ਪਨ ਗਰੁਕਟ੍ਠਾਪਿ ਅਪਕਤਤ੍ਤਾ ਏਵਾਤਿ ਗਹੇਤਬ੍ਬਂ. ਅਵਸੇਸਾ…ਪੇ… ਛਨ੍ਦਾਰਹਾਵ ਹੋਨ੍ਤੀਤਿ ਹਤ੍ਥਪਾਸਂ ਵਿਜਹਿਤ੍ਵਾ ਠਿਤੇ ਸਨ੍ਧਾਯ ਵੁਤ੍ਤਂ, ਅਵਿਜਹਿਤ੍ਵਾ ਠਿਤਾ ਪਨ ਛਨ੍ਦਾਰਹਾ ਨ ਹੋਨ੍ਤਿ, ਤੇਪਿ ਚਤੁਵਗ੍ਗਾਦਿਤੋ ਅਧਿਕਾ ਹਤ੍ਥਪਾਸਂ ਵਿਜਹਿਤ੍ਵਾਵ ਛਨ੍ਦਾਰਹਾ ਹੋਨ੍ਤਿ, ਤਸ੍ਮਾ ਸਙ੍ਘਤੋ ਹਤ੍ਥਪਾਸਂ ਵਿਜਹਿਤ੍ਵਾ ਠਿਤੇਨੇਵ ਛਨ੍ਦੋ ਵਾ ਪਾਰਿਸੁਦ੍ਧਿ ਵਾ ਦਾਤਬ੍ਬਾ.

ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ਪਰਿਵਾਰ ੩.੪੮੮) ਪਨ ‘‘ਅਨੁਕ੍ਖਿਤ੍ਤਾ ਪਾਰਾਜਿਕਂ ਅਨਾਪਨ੍ਨਾ ਚ ਪਕਤਤ੍ਤਾਤਿ ਆਹ ‘ਪਕਤਤ੍ਤਾ ਅਨੁਕ੍ਖਿਤ੍ਤਾ’ਤਿਆਦਿ. ਤਤ੍ਥ ਅਨਿਸ੍ਸਾਰਿਤਾਤਿ ਪੁਰਿਮਪਦਸ੍ਸੇਵ ਵੇਵਚਨਂ. ਪਰਿਸੁਦ੍ਧਸੀਲਾਤਿ ਪਾਰਾਜਿਕਂ ਅਨਾਪਨ੍ਨਾ. ਨ ਤੇਸਂ ਛਨ੍ਦੋ ਵਾ ਪਾਰਿਸੁਦ੍ਧਿ ਵਾ ਏਤੀਤਿ ਤੀਸੁ ਦ੍ਵੀਸੁ ਵਾ ਨਿਸਿਨ੍ਨੇਸੁ ਏਕਸ੍ਸ ਵਾ ਦ੍ਵਿਨ੍ਨਂ ਵਾ ਛਨ੍ਦਪਾਰਿਸੁਦ੍ਧਿ ਆਹਟਾਪਿ ਅਨਾਹਟਾਵ ਹੋਤੀਤਿ ਅਧਿਪ੍ਪਾਯੋ’’ਤਿ ਆਗਤੋ. ਏਵਂ ਪਾਲ਼ਿਯਞ੍ਚ ਅਟ੍ਠਕਥਾਯ ਚ ਚਤੁਨ੍ਨਮ੍ਪਿ ਕਮ੍ਮਾਨਂ ਸਮ੍ਪਤ੍ਤਿ ਚ ਵਿਪਤ੍ਤਿ ਚ ਆਗਤਾ, ਟੀਕਾਚਰਿਯੇਹਿ ਚ ਵਿਨਿਚ੍ਛਿਤਾ, ਤਸ੍ਮਾ ਅਟ੍ਠਕਥਾਯਂ ਵੁਤ੍ਤਨਯੇਨੇਵ ਚਤ੍ਤਾਰਿ ਕਮ੍ਮਾਨਿ ਕਤ੍ਤਬ੍ਬਾਨਿ, ਨ ਅਵੁਤ੍ਤਨਯੇਨ. ਵੁਤ੍ਤਞ੍ਹਿ ਸਮਨ੍ਤਪਾਸਾਦਿਕਾਯਂ (ਪਾਰਾ. ਅਟ੍ਠ. ੧. ਗਨ੍ਥਾਰਮ੍ਭਕਥਾ; ੨.੪੩੧) –

‘‘ਬੁਦ੍ਧੇਨ ਧਮ੍ਮੋ ਵਿਨਯੋ ਚ ਵੁਤ੍ਤੋ;

ਯੋ ਤਸ੍ਸ ਪੁਤ੍ਤੇਹਿ ਤਥੇਵ ਞਾਤੋ;

ਸੋ ਯੇਹਿ ਤੇਸਂ ਮਤਿਮਚ੍ਚਜਨ੍ਤਾ;

ਯਸ੍ਮਾ ਪੁਰੇ ਅਟ੍ਠਕਥਾ ਅਕਂਸੁ.

‘‘ਤਸ੍ਮਾ ਹਿ ਯਂ ਅਟ੍ਠਕਥਾਸੁ ਵੁਤ੍ਤਂ;

ਤਂ ਵਜ੍ਜਯਿਤ੍ਵਾਨ ਪਮਾਦਲੇਖਂ;

ਸਬ੍ਬਮ੍ਪਿ ਸਿਕ੍ਖਾਸੁ ਸਗਾਰਵਾਨਂ;

ਯਸ੍ਮਾ ਪਮਾਣਂ ਇਧ ਪਣ੍ਡਿਤਾਨ’’ਨ੍ਤਿ.

ਇਮਸ੍ਮਿਞ੍ਹਿ ਕਮ੍ਮਵਗ੍ਗੇ ਅਪਲੋਕਨਾਦੀਨਂ ਚਤੁਨ੍ਨਂ ਕਮ੍ਮਾਨਂ ਕਰਣਟ੍ਠਾਨਂ ਏਕਾਦਸਵਿਪਤ੍ਤਿਸੀਮਵਿਮੁਤ੍ਤਂ ਬਦ੍ਧਸੀਮਭੂਤਂਯੇਵ ਵੁਤ੍ਤਂ, ‘‘ਏਕਾਦਸਹਿ ਆਕਾਰੇਹਿ ਸੀਮਤੋ ਕਮ੍ਮਾਨਿ ਵਿਪਜ੍ਜਨ੍ਤੀ’’ਤਿ (ਪਰਿ. ੪੮੬) ਵਚਨਤੋ ਨ ਅਬਦ੍ਧਉਪਚਾਰਸੀਮਭੂਤਂ. ਨ ਹਿ ਤਤ੍ਥ ਏਕਾਦਸਵਿਪਤ੍ਤਿ ਅਤ੍ਥਿ. ਅਟ੍ਠਕਥਾਯਮ੍ਪਿ (ਪਰਿ. ਅਟ੍ਠ. ੪੮੨) ‘‘ਅਪਲੋਕਨਕਮ੍ਮਂ ਨਾਮ ਸੀਮਟ੍ਠਕਸਙ੍ਘਂ ਸੋਧੇਤ੍ਵਾ ਛਨ੍ਦਾਰਹਾਨਂ ਛਨ੍ਦਂ ਆਹਰਿਤ੍ਵਾ ਸਮਗ੍ਗਸ੍ਸ ਸਙ੍ਘਸ੍ਸ ਅਨੁਮਤਿਯਾ ਤਿਕ੍ਖਤ੍ਤੁਂ ਸਾਵੇਤ੍ਵਾ ਕਤ੍ਤਬ੍ਬਂ ਕਮ੍ਮ’’ਨ੍ਤਿ ਅਪਲੋਕਨਕਮ੍ਮਸ੍ਸਾਪਿ ਬਦ੍ਧਸੀਮਾਯਮੇਵ ਕਤ੍ਤਬ੍ਬਭਾਵੋ ਵੁਤ੍ਤੋ, ਨ ਉਪਚਾਰਸੀਮਾਯਂ. ਨ ਹਿ ਤਤ੍ਥ ਸੀਮਟ੍ਠਕਸਙ੍ਘਸੋਧਨਞ੍ਚ ਛਨ੍ਦਾਰਹਾਨਞ੍ਚ ਅਤ੍ਥਿ, ਅਨ੍ਤੋਸੀਮਂ ਪਵਿਟ੍ਠਪਵਿਟ੍ਠਾਨਂ ਸਙ੍ਘਲਾਭੋ ਦਾਤਬ੍ਬੋਯੇਵ ਹੋਤਿ, ਤਸ੍ਮਾ ‘‘ਞਤ੍ਤਿਕਮ੍ਮਭੂਤਂ ਉਪੋਸਥਪਵਾਰਣਾਕਮ੍ਮਂ ਅਬਦ੍ਧਸੀਮਵਿਹਾਰੇਪਿ ਕਤ੍ਤਬ੍ਬ’’ਨ੍ਤਿ ਗਣ੍ਹਨ੍ਤਾਨਂ ਆਚਰਿਯਾਨਂ ਵਾਦੋਪਿ ‘‘ਞਤ੍ਤਿਦੁਤਿਯਕਮ੍ਮਭੂਤਂ ਕਥਿਨਦਾਨਕਮ੍ਮਂ ਉਪਚਾਰਸੀਮਾਯਮੇਵ ਕਤ੍ਤਬ੍ਬ’’ਨ੍ਤਿ ਗਣ੍ਹਨ੍ਤਾਨਂ ਆਚਰਿਯਾਨਂ ਵਾਦੋਪਿ ਪਾਲ਼ਿਵਿਰੋਧੋ ਅਟ੍ਠਕਥਾਵਿਰੋਧੋ ਚ ਹੋਤੀਤਿ ਵੇਦਿਤਬ੍ਬੋ. ਯਮੇਤ੍ਥ ਵਤ੍ਤਬ੍ਬਂ, ਤਂ ਉਪੋਸਥਪਵਾਰਣਕਥਾਵਣ੍ਣਨਾਯਞ੍ਚ ਕਥਿਨਕਥਾਵਣ੍ਣਨਾਯਞ੍ਚ ਵੁਤ੍ਤਂ, ਅਤ੍ਥਿਕੇਹਿ ਤਤ੍ਥ ਸੁਟ੍ਠੁ ਓਲੋਕੇਤ੍ਵਾ ਸਂਸਯੋ ਵਿਨੋਦੇਤਬ੍ਬੋ.

ਇਦਾਨਿ ਸਬ੍ਬੇ ਭਿਕ੍ਖੂ ਲੇਖਕਾਰੇਹਿ ਪਰਿਚਯਵਸੇਨ ਸਬ੍ਬਗਨ੍ਥਾਨਂ ਆਦਿਮ੍ਹਿ ਲਿਖਿਤਂ ਮਹਾਨਮਕ੍ਕਾਰਪਾਠਂ ਸਰਣਗਮਨਸ੍ਸ, ਕਮ੍ਮਵਾਚਾਯ ਚ ਆਰਮ੍ਭਕਾਲੇ ਮਹਤਾ ਉਸ੍ਸਾਹੇਨ ਭਣਨ੍ਤਿ, ਸੋ ਪਨ ਪਾਠੋ ਨੇਵ ਸਰਣਗਮਨਪਰਿਯਾਪਨ੍ਨੋ, ਨ ਕਮ੍ਮਵਾਚਾਪਰਿਯਾਪਨ੍ਨੋ, ਨਾਪਿ ਕਮ੍ਮਵਾਚਾਯ ਪੁਬ੍ਬਕਰਣਪਰਿਯਾਪਨ੍ਨੋ, ਤਸ੍ਮਿਂ ਅਭਣਿਤੇਪਿ ਨ ਸਰਣਗਮਨਸ੍ਸ ਵਾ ਕਮ੍ਮਵਾਚਾਯ ਵਾ ਹਾਨਿ ਅਤ੍ਥਿ, ਨ ਭਣਿਤੇ ਵਡ੍ਢਿ, ਤਸ੍ਮਾ ਪਕਰਣਾਚਰਿਯਾ ਸਰਣਗਮਨਾਰਮ੍ਭੇਪਿ ਕਮ੍ਮਵਾਚਾਰਮ੍ਭੇਪਿ ਤਸ੍ਸ ਮਹਾਨਮਕ੍ਕਾਰਪਾਠਸ੍ਸ ਵਣ੍ਣਨਂ ਨ ਵਦਨ੍ਤਿ, ਵਦਨ੍ਤੋ ਪਨ ‘‘ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ’’ ਇਤਿ ਪਦਾਨਂ ਅਤ੍ਥੋ ਵਿਸੁਦ੍ਧਿਮਗ੍ਗਸਮਨ੍ਤਪਾਸਾਦਿਕਾਸਾਰਤ੍ਥਦੀਪਨੀਆਦਿਪ੍ਪਕਰਣੇਸੁ ‘‘ਭਗਵਾ ਅਰਹਂ ਸਮ੍ਮਾਸਮ੍ਬੁਦ੍ਧੋ’’ ਇਤਿਪਦਾਨਂ ਅਤ੍ਥੋ ਵਿਯ ਵਿਤ੍ਥਾਰੇਨ ਵਤ੍ਤਬ੍ਬੋ ਸਿਯਾ, ਏਵਂ ਸਨ੍ਤੇਪਿ ਭਗਵਤੋ ਯਥਾਭੂਤਗੁਣਦੀਪਨਵਸੇਨ ਪਵਤ੍ਤਤ੍ਤਾ ਸਬ੍ਬੇਪਿ ਆਚਰਿਯਾ ਸਬ੍ਬੇਸੁ ਗਨ੍ਥਾਰਮ੍ਭੇਸੁ ਤਿਕ੍ਖਤ੍ਤੁਂ ਮਙ੍ਗਲਤ੍ਥਂ ਭਣਨ੍ਤਿ. ਭਣਨ੍ਤੇਹਿ ਚ ਪਨ ਨ-ਕਾਰ ਮੋ-ਕਾਰਾਦੀਨਂ ਠਾਨਕਰਣਾਦਿਸਮ੍ਪਦਂ ਅਹਾਪੇਨ੍ਤੇਨ ਸਿਥਿਲਧਨਿਤਦੀਘਰਸ੍ਸਾਦਿਵਿਸੇਸਂ ਮਨਸਿ ਕਰੋਨ੍ਤੇਨ ਸਮਣਸਾਰੁਪ੍ਪੇਨ ਪਰਿਮਣ੍ਡਲੇਨ ਪਦਬ੍ਯਞ੍ਜਨੇਨ ਭਣਿਤਬ੍ਬੋ ਹੋਤਿ, ਨ ਅਤਿਆਯਤਕੇਨ ਗੀਤਸਦ੍ਦਸਦਿਸੇਨ ਸਦ੍ਦੇਨ. ਵੁਤ੍ਤਞ੍ਹੇਤਂ ਭਗਵਤਾ ‘‘ਨ, ਭਿਕ੍ਖਵੇ, ਆਯਤਕੇਨ ਗੀਤਸ੍ਸਰੇਨ ਧਮ੍ਮੋ ਗਾਯਿਤਬ੍ਬੋ, ਯੋ ਗਾਯੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੨੪੯).

‘‘ਏਕਮਤ੍ਤੋ ਭਵੇ ਰਸ੍ਸੋ, ਦ੍ਵਿਮਤ੍ਤੋ ਦੀਘਮੁਚ੍ਚਤੇ;

ਤਿਮਤ੍ਤੋ ਤੁ ਪ੍ਲੁਤੋ ਞੇਯ੍ਯੋ, ਬ੍ਯਞ੍ਜਨਞ੍ਚਡ੍ਢਮਤ੍ਤਿਕ’’ਨ੍ਤਿ. –

ਸਦ੍ਦਪ੍ਪਕਰਣਾਚਰਿਯੇਹਿ ਵੁਤ੍ਤਂ ਸਦ੍ਦਲਕ੍ਖਣਂ ਨਿਸ੍ਸਾਯ ਨ-ਕਾਰਾਦੀਸੁ ਰਸ੍ਸਭੂਤੇ ਅਸਰੇ ਏਕਮਤ੍ਤਂ, ਨ-ਬ੍ਯਞ੍ਜਨੇ ਅਡ੍ਢਮਤ੍ਤਂ ਸਮ੍ਪਿਣ੍ਡੇਤ੍ਵਾ ਦਿਯਡ੍ਢਮਤ੍ਤਕਾਲਂ ਪਮਾਣਂ ਕਤ੍ਵਾ ਉਚ੍ਚਾਰੀਯਤੇ. ਮੋ-ਕਾਰਾਦੀਸੁ ਦੀਘਭੂਤੇ ਓ-ਕਾਰਾਦਿਸਰੇ ਦ੍ਵਿਮਤ੍ਤਂ, ਮ-ਕਾਰਾਦਿਬ੍ਯਞ੍ਜਨੇ ਅਡ੍ਢਮਤ੍ਤਂ ਸਮ੍ਪਿਣ੍ਡੇਤ੍ਵਾ ਅਡ੍ਢਤੇਯ੍ਯਮਤ੍ਤਾਕਾਲਂ ਪਮਾਣਂ ਕਤ੍ਵਾ ਉਚ੍ਚਾਰੀਯਤੇ, ਨ ਤਤੋ ਉਦ੍ਧਨ੍ਤਿ. ਨਨੁ ‘‘ਪ੍ਲੁਤੋ ਤਿਮਤ੍ਤੋ ਞੇਯ੍ਯੋ’’ਤਿ ਵੁਤ੍ਤਨ੍ਤਿ? ਸਚ੍ਚਂ, ਸਾ ਪਨ ਦੂਰਤੋ ਅਵ੍ਹਾਯਨਾਦੀਸੁਯੇਵ ਲਬ੍ਭਤਿ, ਨਾਞ੍ਞਤ੍ਥ. ਵੁਤ੍ਤਞ੍ਹਿ ਕਾਰਿਕਾਯਂ –

‘‘ਦੂਰਤੋ ਅਵ੍ਹਾਨੇ ਗੀਤੇ, ਤਥੇਵ ਰੋਦਨੇਪਿ ਚ;

ਪ੍ਲੁਤਾ ਤਿਮਤ੍ਤਿਕਾ ਵੁਤ੍ਤਾ, ਸਬ੍ਬੇਤੇ ਨੇਤ੍ਥ ਗਯ੍ਹਰੇ’’ਤਿ. –

ਕਿਤ੍ਤਕੇਨ ਪਨ ਕਾਲੇਨ ਏਕਮਤ੍ਤਾ ਵਿਞ੍ਞੇਯ੍ਯਾਤਿ? ਅਕ੍ਖਿਨਿਮਿਸਉਮ੍ਮਿਸਮਤ੍ਤਕਾਲੇਨਾਤਿ ਆਚਰਿਯਾ. ਏਕੇ ਪਨ ਆਚਰਿਯਾ ‘‘ਅਙ੍ਗੁਲਿਫੋਟਨਕਾਲਪ੍ਪਮਾਣੇਨਾ’’ਤਿ ਵਦਨ੍ਤਿ. ਵੁਤ੍ਤਞ੍ਹਿ ਆਚਰਿਯਧਮ੍ਮਸੇਨਾਪਤਿਤ੍ਥੇਰੇਨ –

‘‘ਪਮਾਣਂ ਏਕਮਤ੍ਤਸ੍ਸ, ਨਿਮਿਸੁਮ੍ਮਿਸਤੋਬ੍ਰਵੁਂ;

ਅਙ੍ਗੁਲਿਫੋਟਕਾਲਸ੍ਸ, ਪਮਾਣੇਨਾਪਿ ਅਬ੍ਰਵੁ’’ਨ੍ਤਿ.

ਏਵਂ ਸਦ੍ਦਸਤ੍ਥਾਚਰਿਯੇਹਿ ਵਚਨਤੋ ਸੁਦ੍ਧਰਸ੍ਸਸਰਟ੍ਠਾਨੇ ਏਕਮਤ੍ਤਾਪਮਾਣਂ, ਸਬ੍ਯਞ੍ਜਨਰਸ੍ਸਸਰਟ੍ਠਾਨੇ ਦਿਯਡ੍ਢਮਤ੍ਤਾਪਮਾਣਂ, ਸੁਦ੍ਧਦੀਘਸਰਟ੍ਠਾਨੇ ਦ੍ਵਿਮਤ੍ਤਾਪਮਾਣਂ, ਸਬ੍ਯਞ੍ਜਨਦੀਘਸਰਟ੍ਠਾਨੇ ਅਡ੍ਢਤੇਯ੍ਯਮਤ੍ਤਾਪਮਾਣਂ ਕਾਲਂ ਸਲ੍ਲਕ੍ਖੇਤ੍ਵਾ ਉਚ੍ਚਾਰੀਯਤੇ.

ਇਦਾਨਿ ਪਨ ਭਿਕ੍ਖੂ ਮਹਾਨਮਕ੍ਕਾਰਭਣਨੇ ਬਲਵਉਸ੍ਸਾਹਂ ਕਤ੍ਵਾ ਭਣਨ੍ਤਾ ਰਸ੍ਸਟ੍ਠਾਨੇਸੁ ਦ੍ਵਿਤਿਮਤ੍ਤਾਕਾਲਂ ਦੀਘਟ੍ਠਾਨੇਸੁ ਚਤੁਪਞ੍ਚਮਤ੍ਤਾਕਾਲਂ ਸਰਂ ਪਠਪੇਤ੍ਵਾ ਭਣਨ੍ਤਿ, ਤਦਯੁਤ੍ਤਂ ਵਿਯ ਦਿਸ੍ਸਤਿ. ਅਪਰੇ ਪਠਮਵਾਰੇ ਭਣਿਤ੍ਵਾ ‘‘ਸਮ੍ਮਾਸਮ੍ਬੁਦ੍ਧਸ੍ਸਾ’’ਤਿ ਪਰਿਯੋਸਾਨਪਦਂ ਪਤ੍ਵਾਪਿ ਤਤ੍ਥ ਅਟ੍ਠਪੇਤ੍ਵਾ ਪੁਨ ‘‘ਨਮੋ ਤਸ੍ਸਾ’’ਤਿ ਭਣਿਤ੍ਵਾ ਸ-ਕਾਰੇ ਠਪੇਤ੍ਵਾ ਥੋਕਂ ਵਿਸ੍ਸਮਿਤ੍ਵਾ ਦੁਤਿਯਵਾਰੇ ‘‘ਭਗਵਤੋ’’ਤਿ ਇਦਂ ਆਦਿਂ ਕਤ੍ਵਾ ਯਾਵ ਪਰਿਯੋਸਾਨਂ ਭਣਿਤ੍ਵਾ ਠਪੇਨ੍ਤਿ. ਤਤਿਯਵਾਰੇ ਪਨ ਆਦਿਤੋ ਪਟ੍ਠਾਯ ਪਰਿਯੋਸਾਨੇ ਠਪੇਨ੍ਤਿ. ਏਵਂ ਭਣਨ੍ਤਞ੍ਚ ਬਹੂ ਪਸਂਸਨ੍ਤਿ, ਏਵਂ ਪਨ ਕਾਤਬ੍ਬਨ੍ਤਿ ਨੇਵ ਪਾਲ਼ਿਯਂ, ਨ ਅਟ੍ਠਕਥਾਯਂ ਵਿਜ੍ਜਤਿ. ਯਥਾ ਞਤ੍ਤਿਚਤੁਤ੍ਥਕਮ੍ਮੇ ਕਰਿਯਮਾਨੇ ਤੀਣਿ ਅਨੁਸ੍ਸਾਵਨਾਨਿ ਸਦ੍ਦਤੋ ਚ ਅਤ੍ਥਤੋ ਚ ਅਭਿਨ੍ਨਾਨਿ ਅਞ੍ਞਮਞ੍ਞਂ ਸਙ੍ਕਰਵਿਰਹਿਤਾਨਿ ਕਤ੍ਵਾ ਭਣਿਤਬ੍ਬਾਨਿ, ਏਵਂ ਮਹਾਨਮਕ੍ਕਾਰਪਾਠੇ ਤਿਕ੍ਖਤ੍ਤੁਂ ਭਞ੍ਞਮਾਨੇ ਤਯੋ ਵਾਰਾ ਸਦ੍ਦਤੋ ਚ ਅਤ੍ਥਤੋ ਚ ਅਭਿਨ੍ਨੇ ਕਤ੍ਵਾ ਸਙ੍ਕਰਵਿਰਹਿਤੇ ਕਤ੍ਵਾ ਆਦਿਤੋ ਆਰਭਿਤ੍ਵਾ ਪਰਿਯੋਸਾਨੇ ਠਪੇਤਬ੍ਬਾ ਹੋਨ੍ਤੀਤਿ.

ਤਤ੍ਰਾਯਮੇਕੇਏਵਂ ਵਦਨ੍ਤਿ – ਯਥਾ ਨਾਮ ਜਵੇਨ ਗਚ੍ਛਨ੍ਤਸ੍ਸ ਠਾਤਬ੍ਬਟ੍ਠਾਨਂ ਪਤ੍ਵਾਪਿ ਸਹਸਾ ਠਾਤੁਂ ਨ ਸਕ੍ਕੋਤਿ, ਏਕਪਾਦਮਤ੍ਤਂ ਗਨ੍ਤ੍ਵਾ ਤਿਟ੍ਠਤਿ, ਏਵਂ ਆਦਿਤੋ ਭਣਨ੍ਤਸ੍ਸ ਬਲਵਉਸ੍ਸਾਹਤ੍ਤਾ ਪਰਿਯੋਸਾਨੇ ਪਤ੍ਤੇਪਿ ਠਪੇਤੁਂ ਨ ਸਕ੍ਕੋਤਿ, ‘‘ਨਮੋ ਤਸ੍ਸਾ’’ਤਿ ਦ੍ਵਿਪਦਮਤ੍ਤਂ ਭਣਿਤ੍ਵਾ ਸਕ੍ਕੋਤੀਤਿ. ਏਵਂ ਸਨ੍ਤੇ ਦੁਤਿਯਤਤਿਯਵਾਰੇਸੁ ਕਸ੍ਮਾ ਸਕ੍ਕੋਤੀਤਿ? ਤਦਾ ਪਨ ਦੁਤਿਯਵਾਰੇ ਥੋਕਂ ਵਿਸ੍ਸਮਿਤਤ੍ਤਾ ਲਦ੍ਧਸ੍ਸਾਸੋ ਹੁਤ੍ਵਾ ਸਕ੍ਕੋਤੀਤਿ. ਏਵਂ ਤੇ ਆਯਸ੍ਮਨ੍ਤੋ ਸਯਮੇਵ ਅਤ੍ਤਾਨਂ ਵਿਘਾਤਂ ਪਾਪੇਨ੍ਤਿ. ਨ ਹਿ ‘‘ਮਹਾਨਮਕ੍ਕਾਰਂ ਭਣਨ੍ਤੇਨ ਪਠਮਵਾਰੇ ਬਲਵਉਸ੍ਸਾਹੇਨ ਭਣਿਤਬ੍ਬੋ’’ਤਿ ਭਗਵਤਾ ਪਞ੍ਞਤ੍ਤੋ, ਧਮ੍ਮਸਙ੍ਗਾਹਕਤ੍ਥੇਰੇਹਿ ਵਾ ਠਪਿਤੋ ਅਤ੍ਥਿ. ਏਵਂ ਸਨ੍ਤੇ ਯਥਾ ਪਾਤਿਮੋਕ੍ਖੁਦ੍ਦੇਸਕੇਨ ਪਾਤਿਮੋਕ੍ਖਂ ਉਦ੍ਦਿਸਨ੍ਤੇਨ ਯਤ੍ਤਕਾ ਭਿਕ੍ਖੂ ਪਾਤਿਮੋਕ੍ਖਂ ਸੁਣਨ੍ਤਿ, ਤੇਸਂ ਸਵਨਪ੍ਪਮਾਣੇਨ ਯਾਵ ਪਰਿਯੋਸਾਨਾ ਉਦ੍ਦਿਸਿਤੁਂ ਅਤ੍ਤਨੋ ਸਰਪ੍ਪਮਾਣਂ ਗਹੇਤ੍ਵਾ ਪਾਤਿਮੋਕ੍ਖੋ ਉਦ੍ਦਿਸਿਤਬ੍ਬੋ, ਏਵਂ ਕਮ੍ਮਵਾਚਂ ਭਣਨ੍ਤੇਨਪਿ ਸੀਮਮਣ੍ਡਲੇ ਨਿਸਿਨ੍ਨਭਿਕ੍ਖੂਨਂ ਸਵਨਪ੍ਪਮਾਣੇਨ ਯਾਵ ਪਰਿਯੋਸਾਨਾ ਅਤ੍ਤਨੋ ਸਰਪ੍ਪਮਾਣਂ ਗਹੇਤ੍ਵਾ ਭਣਿਤਬ੍ਬਾਤਿ.

ਅਪਰੇ ਪਨ ਆਚਰਿਯਾ ਮੋ-ਕਾਰਾਦੀਸੁ ਓ-ਕਾਰਨ੍ਤਪਦੇਸੁ ਅਞ੍ਞੇਸਂ ਪਦਾਨਂ ਅਤਿਰੇਕੇਨ ਸਰੇਨ ਦ੍ਵਤ੍ਤਿਕ੍ਖਤ੍ਤੁਂ ਅਨੁਕਰਣਸਦ੍ਦਂ ਅਨੁਬਨ੍ਧਾਪਯਮਾਨਾ ਭਣਨ੍ਤਿ, ਤੇਸਂ ਆਚਰਿਯਾਨਂ ਤਾਦਿਸਂ ਭਣਨਂ ਸੁਤ੍ਵਾ ਪਰਿਚਯਪ੍ਪਤ੍ਤਾ ਅਞ੍ਞੇ ਭਿਕ੍ਖੂ ਵਾ ਗਹਟ੍ਠਾ ਵਾ ਅਞ੍ਞੇਸਂ ਆਚਰਿਯਾਨਂ ਕਮ੍ਮਵਾਚਂ ਨ ਗਰੁਂ ਕਰੋਨ੍ਤਿ, ਤਾਯ ਕਮ੍ਮਵਾਚਾਯ ਉਪਸਮ੍ਪਦਾ ਅਲਭਿਤਬ੍ਬਾ ਵਿਯ ਮਞ੍ਞਨ੍ਤਿ, ਤਾਦਿਸਂ ਪਨ ਭਣਨਂ ਤੇਸਂ ਆਚਰਿਯਾਨਂ ਸਿਸ੍ਸਾਨੁਸਿਸ੍ਸਾ ਏਵ ਤਥਾ ਭਣਨ੍ਤਿ, ਨ ਅਞ੍ਞੇ ਆਚਰਿਯਾ. ਤੇ ਪਨ ਪੋਰਾਣਾਚਰਿਯਾਨਂ ਸਰਸਮ੍ਪਨ੍ਨਾਨਂ ਅਨੁਕਰਣਸਦ੍ਦਰਹਿਤਮ੍ਪਿ ਸਹਿਤਂ ਵਿਯ ਖਾਯਮਾਨਂ ਸੁਣਨ੍ਤਾਨਂ ਅਤਿਮਨੋਰਥਂ ਸਦ੍ਦਂ ਸੁਤ੍ਵਾ ਦਿਟ੍ਠਾਨੁਗਤਿਂ ਆਪਜ੍ਜਨ੍ਤਾ ਏਵਂ ਕਰੋਨ੍ਤਿ ਮਞ੍ਞੇ. ਨ ਹਿ ਵਿਨਯੇ ਵਾ ਸਦ੍ਦਸਤ੍ਥੇਸੁ ਵਾ ਤਥਾ ਭਣਿਤਬ੍ਬਨ੍ਤਿ ਅਤ੍ਥਿ, ਤਸ੍ਮਾ ਵਿਚਾਰੇਤਬ੍ਬਮੇਤਨ੍ਤਿ.

ਬਹੂ ਪਨ ਭਿਕ੍ਖੂ ‘‘ਸਿਥਿਲਂ ਧਨਿਤਞ੍ਚ ਦੀਘਰਸ੍ਸ’’ਨ੍ਤਿਆਦਿਨਾ ਵਿਨਯੇ ਕਥਿਤਵਿਨਿਚ੍ਛਯਞ੍ਚ ‘‘ਏਤ੍ਥ ਪਞ੍ਚਸੁ ਵਗ੍ਗੇਸੂ’’ਤਿਆਦਿਨਾ ਸਦ੍ਦਸਤ੍ਥੇਸੁ ਕਤਵਿਨਿਚ੍ਛਯਞ੍ਚ ਅਜਾਨਨ੍ਤਾ ਪਿਟਕਤ੍ਤਯਕੋਵਿਦਾਨਂ ਵਿਨਯਧਰਬਹੁਸ੍ਸੁਤਤ੍ਥੇਰਾਨਂ ਸਨ੍ਤਿਕਾ ਅਲਦ੍ਧੋਪਦੇਸਾ ਹੁਤ੍ਵਾ ਤਤ੍ਥ ਤਤ੍ਥ ਉਪਸਮ੍ਪਦਂ ਕਰੋਨ੍ਤਾਨਂ ਭਿਕ੍ਖੂਨਂ ਵਚਨਮੇਵ ਗਹੇਤ੍ਵਾ ਹੇਯ੍ਯੋਪਾਦੇਯ੍ਯਂ ਅਜਾਨਨ੍ਤਾ ਪੁਬ੍ਬੇ ਪਰਦੇਸਤੋ ਆਗਤਾਨਂ ਪੁਞ੍ਞਵਨ੍ਤਾਨਂ ਸਰਸਮ੍ਪਨ੍ਨਾਨਂ ਮਹਾਥੇਰਾਨਂ ਅਨੋਸਰੇਨ ਭਣਮਾਨਾਨਂ ਸਰਂ ਸੁਤ੍ਵਾ ਤੇਸਂ ਥੇਰਵਰਾਨਂ ਮਤਿਂ ਅਪੁਚ੍ਛਿਤ੍ਵਾਵ ਯਥਾਦਿਟ੍ਠਂ ਯਥਾਸੁਤਂ ਲਿਖਿਤ੍ਵਾ ਠਪੇਨ੍ਤਾ ਅਨੁਕ੍ਕਮੇਨ ਪਣ੍ਡਿਤੇਹਿ ਹਸਿਤਬ੍ਬਂ ਅਯੁਤ੍ਤਂ ਕਥਂ ਦੀਪੇਨ੍ਤਾ ‘‘ਇਮਸ੍ਮਿਂ ਠਾਨੇ ਬ੍ਯਗ੍ਘਿਯਾ ਸਦ੍ਦਸਦਿਸਂ ਸਦ੍ਦਂ ਕਰੋਨ੍ਤਿ, ਇਮਸ੍ਮਿਂ ਠਾਨੇ ਸਕੁਣਿਯਾ ਸਦ੍ਦਸਦਿਸਂ ਸਦ੍ਦਂ ਕਰੋਨ੍ਤਿ, ਇਮਸ੍ਮਿਂ ਠਾਨੇ ਤਮ੍ਬੁਲਕਸਟਪਾਤਂ ਕਰੋਨ੍ਤਿ, ਇਮਸ੍ਮਿਂ ਠਾਨੇ ਦਕ੍ਖਿਣਤੋ ਨਮਨ੍ਤਾ ਭਣਨ੍ਤਿ, ਇਮਸ੍ਮਿਂ ਠਾਨੇ ਵਾਮਤੋ ਨਮਨ੍ਤਾ ਭਣਨ੍ਤਿ, ਇਮਸ੍ਮਿਂ ਠਾਨੇ ਵਿਲਾਸਂ ਕੁਰੁਮਾਨਾ ਭਣਨ੍ਤੀ’’ਤਿਆਦੀਨਿ ਵਤ੍ਵਾ ਤਦੇਵ ਸਦ੍ਦਹਨ੍ਤਾ ਰੁਕ੍ਖਮੂਲਉਮਙ੍ਗਲੇਣਾਦੀਸੁ ਨਿਸੀਦਿਤ੍ਵਾ ਤਮੇਵ ਵਚਨਂ ਅਨੁਸਿਕ੍ਖਨ੍ਤਾ ਤਦਨੁਰੂਪਂ ਕਮ੍ਮਵਾਚਂ ਭਣਨ੍ਤਾ ‘‘ਅਹਂ ਕਮ੍ਮਵਾਚਾਕੁਸਲੋ’’ਤਿ ਵਤ੍ਵਾ ਬਾਲਜਨੇ ਸਞ੍ਞਾਪੇਤ੍ਵਾ ਤੇਸਂ ਤੇਸਂ ਉਪਸਮ੍ਪਦਾਪੇਕ੍ਖਾਨਂ ਕਮ੍ਮਵਾਚਂ ਭਣਨ੍ਤਿ, ਇਮੇ ਭਿਕ੍ਖੂ ਭਗਵਤੋ ਆਣਂ ਅਤਿਕ੍ਕਾਮੇਨ੍ਤਿ, ਸਾਸਨਂ ਓਸਕ੍ਕਾਪੇਨ੍ਤੀਤਿ ਦਟ੍ਠਬ੍ਬਾ.

ਅਥਾਪਰੇਪਿ ਭਿਕ੍ਖੂ ਗਾਮਕਾਵਾਸਾਦੀਸੁ ਵਸਨ੍ਤਾ ਪਣ੍ਡਿਤਾਨਂ ਸਨ੍ਤਿਕੇ ਅਪਯਿਰੁਪਾਸਮਾਨਾ ਵਤ੍ਥੁਸਮ੍ਪਤ੍ਤਿਮ੍ਪਿ ਵਤ੍ਥੁਵਿਪਤ੍ਤਿਮ੍ਪਿ ਞਤ੍ਤਿਅਨੁਸ੍ਸਾਵਨਸੀਮਪਰਿਸਸਮ੍ਪਤ੍ਤਿਮ੍ਪਿ ਵਿਪਤ੍ਤਿਮ੍ਪਿ ਤਥਤੋ ਅਜਾਨਨ੍ਤਾ ਬਹਵੋ ਸਿਸ੍ਸੇ ਠਪੇਤ੍ਵਾ ਪਬ੍ਬਜ੍ਜਞ੍ਚ ਉਪਸਮ੍ਪਦਞ੍ਚ ਕਰੋਨ੍ਤਾ ਪਰਿਸਂ ਵਡ੍ਢਾਪੇਨ੍ਤਿ, ਤੇਪਿ ਭਗਵਤੋ ਸਾਸਨਂ ਓਸਕ੍ਕਾਪੇਨ੍ਤਿ, ਤਸ੍ਮਾ ਭਗਵਤੋ ਆਣਂ ਕਰੋਨ੍ਤੇਹਿ ਲਜ੍ਜੀਪੇਸਲੇਹਿ ਬਹੁਸ੍ਸੁਤੇਹਿ ਸਿਕ੍ਖਾਕਾਮੇਹਿ ਸਪ੍ਪੁਰਿਸਭਿਕ੍ਖੂਹਿ ਏਵਰੂਪਾਨਂ ਭਿਕ੍ਖੂਨਂ ਸਹਾਯਕੇਹਿ ਉਪਤ੍ਥਮ੍ਭਕੇਹਿ ਏਕਸਮ੍ਭੋਗਸਂਵਾਸਕਰੇਹਿ ਨ ਭਵਿਤਬ੍ਬਂ. ਇਦਾਨਿ ਭਿਕ੍ਖੂ –

‘‘ਚ-ਕਾਰਨ੍ਤਂ ਸ-ਕਾਰਨ੍ਤਂ, ਤ-ਕਾਰਨ੍ਤਸਮਂ ਵਦੇ;

ਞ-ਕਾਰਨ੍ਤਂ ਲ-ਕਾਰਨ੍ਤਂ, ਨ-ਕਾਰਨ੍ਤਸਮਂ ਵਦੇ’’ਤਿ. –

ਇਮਂ ਸਿਲੋਕਂ ਉਪਨਿਸ੍ਸਾਯ ਸਰਣਗਮਨੇਪਿ ‘‘ਬੁਦ੍ਧਂ ਸਰਣਂ ਗਚ੍ਛਾਮੀ’’ਤਿ ਪਾਠਂ ‘‘ਬੁਦ੍ਧਂ ਸਰਣਂ ਗਚ੍ਛਾਮੀ’’ਤਿ ਪਠਨ੍ਤਿ. ਕਮ੍ਮਵਾਚਾਯਮ੍ਪਿ ‘‘ਪਠਮਂ ਉਪਜ੍ਝਂ ਗਾਹਾਪੇਤਬ੍ਬੋ’’ਤਿਆਦਿਪਾਠਂ ‘‘ਪਠਮਂ ਉਪਜ੍ਝਂ ਗਾਹਾਪੇਤਬ੍ਬੋ’’ਤਿਆਦਿਨਾ ਪਠਨ੍ਤਿ. ਏਤ੍ਥ ਯੁਤ੍ਤਿਤੋਪਿ ਆਗਮਤੋਪਿ ਕਾਰਣਂ ਚਿਨ੍ਤੇਤਬ੍ਬਂ.

ਤਤ੍ਰਾਯਂ ਯੁਤ੍ਤਿਚਿਨ੍ਤਾ – ‘‘ਚ-ਕਾਰਨ੍ਤਂ ਸ-ਕਾਰਨ੍ਤਂ, ਤ-ਕਾਰਨ੍ਤਸਮਂ ਵਦੇ’’ਤਿ ਏਤ੍ਥ ਚ-ਕਾਰੋ ਤਾਲੁਜੋ, ਤ-ਕਾਰੋ ਦਨ੍ਤਜੋ, ਏਵਮੇਤੇ ਅਕ੍ਖਰਾ ਠਾਨਤੋਪਿ ਅਸਮਾਨਾ. ਚ-ਕਾਰੋ ਜਿਵ੍ਹਾਮਜ੍ਝਕਰਣੋ, ਤ-ਕਾਰੋ ਜਿਵ੍ਹਗ੍ਗਕਰਣੋ, ਏਵਂ ਕਰਣਤੋਪਿ ਅਸਮਾਨਾ. ਚ-ਕਾਰੋ ਦੁਤਿਯਵਗ੍ਗਪਰਿਯਾਪਨ੍ਨੋ, ਤ-ਕਾਰੋ ਚਤੁਤ੍ਥਵਗ੍ਗਪਰਿਯਾਪਨ੍ਨੋ, ਏਵਂ ਵਗ੍ਗਤੋਪਿ ਅਸਮਾਨਾ. ਸਂਯੋਗਕ੍ਖਰਵਸੇਨ ਨ ਪੁਬ੍ਬਕ੍ਖਰਾ ਸੁਤਿਂ ਲਭਨ੍ਤਾ ਸਰਵਿਸੇਸਂ ਪਾਪੁਣਨ੍ਤਿ, ਤੇਨੇਵ ਚ-ਕਾਰੇਨ ਸਦ੍ਦਸਤ੍ਥਕਾਰਾਚਰਿਯਾ ‘‘ਸਂਯੋਗੇ ਪਰੇ ਰਸ੍ਸਤ੍ਤ’’ਨ੍ਤਿ ਚ ‘‘ਸਂਯੋਗਪੁਬ੍ਬਾ ਏ-ਕਾਰੋ-ਕਾਰਾ ਰਸ੍ਸਾਇਵ ਵਤ੍ਤਬ੍ਬਾ’’ਤਿ ਚ ਵਦਨ੍ਤਿ. ਏਵਂ ਸਨ੍ਤੇ ਕਥਂ ਅਸਮਾਨਟ੍ਠਾਨਿਕੇਨ ਅਸਮਾਨਕਰਣੇਨ ਅਸਮਾਨਵਗ੍ਗੇਨ ਸਂਯੋਗਕ੍ਖਰੇਨ ਲਦ੍ਧਸੁਤਿਕਾ ਅਕ੍ਖਰਾ ਤਤੋ ਅਞ੍ਞੇਨ ਅਸਮਾਨਟ੍ਠਾਨਿਕੇਨ ਅਸਮਾਨਕਰਣੇਨ ਅਸਮਾਨਵਗ੍ਗੇਨ ਸਂਯੋਗਕ੍ਖਰੇਨ ਲਦ੍ਧਸਮਾਨਸੁਤਿਕਾ ਭਵੇਯ੍ਯੁਂ. ਨ ਕੇਵਲਞ੍ਚ ਏਤੇ ਅਕ੍ਖਰਾ ਅਸਮਾਨਟ੍ਠਾਨਿਕਾ ਅਸਮਾਨਕਰਣਾ ਅਸਮਾਨਵਗ੍ਗਾਵ ਹੋਨ੍ਤਿ, ਅਥ ਖੋ ਅਨਾਸਨ੍ਨਟ੍ਠਾਨਿਕਾ ਅਨਾਸਨ੍ਨਕਰਣਾ ਅਨਾਸਨ੍ਨਵਗ੍ਗਾ ਚ ਹੋਨ੍ਤਿ. ਯਥਾ ਚ ਵੀਣਂ ਵਾਦੇਨ੍ਤਾਨਂ ਦੂਰੇ ਤਨ੍ਤਿਸ੍ਸਰੇਨ ਤਤੋ ਦੂਰੇ ਤਨ੍ਤਿਸ੍ਸਰੋ ਅਸਮਾਨੋ ਹੋਤਿ, ਏਵਂ ਦੂਰਟ੍ਠਾਨਿਕੇਨ ਅਕ੍ਖਰੇਨ ਦੂਰਕਰਣੇਨ ਤਤੋ ਦੂਰਟ੍ਠਾਨਿਕੋ ਦੂਰਕਰਣੋ ਸਮਾਨਸੁਤਿਕੋ ਕਥਂ ਭਵੇਯ੍ਯ, ਵਗ੍ਗਕ੍ਖਰਾਨਞ੍ਚ ਅਞ੍ਞਮਞ੍ਞਂ ਅਸਙ੍ਕਰਵਸੇਨ ਅਸਮਾਨਸੁਤਿਵਸੇਨ ਪਵਤ੍ਤਨਤੋ ‘‘ਵਗ੍ਗਨ੍ਤਂ ਵਾ ਵਗ੍ਗੇ’’ਤਿ ਸੁਤ੍ਤੇ ਨਿਗ੍ਗਹਿਤਸ੍ਸ ਵਗ੍ਗਨ੍ਤਕਰਣੇ ਸਤਿ ਅਞ੍ਞਵਗ੍ਗਸ੍ਮਿਂ ਪਰੇ ਅਞ੍ਞਵਗ੍ਗਨ੍ਤਂ ਨ ਪਾਪੁਣਾਤਿ, ‘‘ਵਗ੍ਗੇ ਘੋਸਾਘੋਸਾਨਂ ਤਤਿਯਪਠਮਾ’’ਤਿ ਸੁਤ੍ਤੇਨ ਚ ਅਸਦਿਸਦ੍ਵੇਭਾਵਕਰਣੇ ਅਞ੍ਞਵਗ੍ਗੇ ਅਞ੍ਞਵਗ੍ਗਦ੍ਵੇਭਾਵੋ ਨ ਹੋਤਿ.

ਯਦਿ ਚ ਚ-ਕਾਰਨ੍ਤਕ੍ਖਰੋ ਤ-ਕਾਰਨ੍ਤਕ੍ਖਰੇਨ ਸਮਾਨਸੁਤਿਕੋ ਸਿਯਾ, ਏਵਂ ਸਤਿ ਕਿਂ ਚ-ਕਾਰਨ੍ਤਕ੍ਖਰਲੇਖਨੇਨ ਸਬ੍ਬਤ੍ਥ ਤ-ਕਾਰਨ੍ਤਮੇਵ ਲਿਖੇਯ੍ਯ, ਤਥਾ ਪਨ ਅਲਿਖਿਤ੍ਵਾ ਪਯੋਗਾਨੁਰੂਪਂ ਪਠਮਕ੍ਖਰਸ੍ਸ ਸਦਿਸਦ੍ਵੇਭਾਵਟ੍ਠਾਨੇ ‘‘ਕਚ੍ਚੋ ਕਚ੍ਚਾਯਨੋ’’ਤਿ, ਅਸਦਿਸਦ੍ਵੇਭਾਵਟ੍ਠਾਨੇ ‘‘ਵਚ੍ਛੋ ਵਚ੍ਛਾਯਨੋ’’ਤਿ ਤਤਿਯਕ੍ਖਰਸ੍ਸ ਸਦਿਸਦ੍ਵੇਭਾਵਟ੍ਠਾਨੇ ‘‘ਮਜ੍ਜਂ ਸਮ੍ਮਜ੍ਜ’’ਨ੍ਤਿ, ਅਸਦਿਸਦ੍ਵੇਭਾਵਟ੍ਠਾਨੇ ‘‘ਉਪਜ੍ਝਾ ਉਪਜ੍ਝਾਯੋ’’ਤਿ ਸਮਾਨਟ੍ਠਾਨਸਮਾਨਕਰਣਸਮਾਨਵਗ੍ਗਕ੍ਖਰਾਨਮੇਵ ਦ੍ਵੇਭਾਵੋ ਲਿਖੀਯਤਿ, ਨੋ ਇਤਰੇਸਂ, ਤਸ੍ਮਾ ਪਯੋਗਾਨੁਰੂਪਂ ਚ-ਕਾਰਨ੍ਤ ਜ-ਕਾਰਨ੍ਤਟ੍ਠਾਨੇਸੁ ਸਕਵਗ੍ਗਸੁਤਿਵਸੇਨੇਵ ਵਤ੍ਤਬ੍ਬਂ, ਨ ਅਞ੍ਞਵਗ੍ਗਸੁਤਿਵਸੇਨ. ਸ-ਕਾਰਨ੍ਤੇ ਪਨ ਸ-ਕਾਰਸ੍ਸ ਤ-ਕਾਰੇਨ ਸਮਾਨਟ੍ਠਾਨਿਕਤ੍ਤਾ ਸਮਾਨਕਰਣਤ੍ਤਾ ਚ ਵਗ੍ਗਅਵਗ੍ਗਵਸੇਨ ਭਿਨ੍ਨੇਪਿ ਅਵਗ੍ਗਕ੍ਖਰਾਨਂ ਵਗ੍ਗਕ੍ਖਰੇਹਿ ਸਾਧਾਰਣਤ੍ਤਾ ਚ ਅਵਗ੍ਗਕ੍ਖਰਾਨਂ ਵਗ੍ਗਕ੍ਖਰਾਨਂ ਵਿਯ ਵਿਸੁਂ ਸੁਤਿਯਾ ਅਭਾਵਤੋ ਚ ਸ-ਕਾਰਨ੍ਤਸ੍ਸ ਤ-ਕਾਰਨ੍ਤਭਣਨਂ ਯੁਤ੍ਤਂ ਸਿਯਾ. ਸ-ਕਾਰੋਪਿ ਹਿ ਦਨ੍ਤਜੋ, ਤ-ਕਾਰੋਪਿ, ਸ-ਕਾਰੋਪਿ ਜਿਵ੍ਹਗ੍ਗਕਰਣੋ, ਤ-ਕਾਰੋਪਿ, ਤਸ੍ਮਾ ਸਮਾਨਟ੍ਠਾਨਿਕਾਨਂ ਸਮਾਨਕਰਣਾਨਂ ਅਕ੍ਖਰਾਨਂ ਸਮਾਨਸੁਤਿਭਾਵੋ ਯੁਤ੍ਤੋ. ਞ-ਕਾਰਨ੍ਤ ਲ-ਕਾਰਨ੍ਤਾਨਂ ਨ-ਕਾਰਨ੍ਤਭਣਨੇਪਿ ਇਮਿਨਾ ਨਯੇਨ ਞ-ਕਾਰਨ੍ਤ ਨ-ਕਾਰਨ੍ਤਾਨਂ ਅਸਮਾਨਸੁਤਿਭਾਵੋ ਲ-ਕਾਰਨ੍ਤ ਨ-ਕਾਰਨ੍ਤਾਨਂ ਸਮਾਨਸੁਤਿਭਾਵੋ ਦਟ੍ਠਬ੍ਬੋਤਿ. ਅਯਮੇਤ੍ਥ ਯੁਤ੍ਤਿਚਿਨ੍ਤਾ.

ਆਗਮਚਿਨ੍ਤਾ ਪਨ ਏਵਂ ਕਾਤਬ੍ਬਾ –

‘‘ਚ-ਕਾਰਨ੍ਤਂ ਸ-ਕਾਰਨ੍ਤਂ, ਤ-ਕਾਰਨ੍ਤਸਮਂ ਵਦੇ;

ਞ-ਕਾਰਨ੍ਤਂ ਲ-ਕਾਰਨ੍ਤਂ, ਨ-ਕਾਰਨ੍ਤਸਮਂ ਵਦੇ’’ਤਿ. –

ਅਯਂ ਸਿਲੋਕੋ ਕੁਤੋ ਪਭਵੋ, ਕਤ੍ਥ ਆਗਤੋ, ਕੇਨ ਕਾਰਿਤੋਤਿ? ਤਤ੍ਥ ਕੁਤੋ ਪਭਵੋਤਿ ਭਗਵਨ੍ਤਸ੍ਮਾ ਵਾ ਧਮ੍ਮਸਙ੍ਗਾਹਕਤ੍ਥੇਰੇਹਿ ਵਾ ਅਟ੍ਠਕਥਾਚਰਿਯੇਹਿ ਵਾ ਪਭਵੋ. ਕਤ੍ਥ ਆਗਤੋਤਿ ਵਿਨਯੇ ਵਾ ਸੁਤ੍ਤਨ੍ਤੇ ਵਾ ਅਭਿਧਮ੍ਮੇ ਵਾ ਪਾਲ਼ਿਯਂ ਵਾ ਅਟ੍ਠਕਥਾਯ ਵਾ ਟੀਕਾਦੀਸੁ ਵਾ ਆਗਤੋ. ਕੇਨ ਕਾਰਿਤੋਤਿ ਨੇਤ੍ਤਿਨਿਰੁਤ੍ਤਿਪੇਟਕੋਪਦੇਸਕਚ੍ਚਾਯਨਪ੍ਪਕਰਣਕਾਰਕੇਨ ਆਯਸ੍ਮਤਾ ਮਹਾਕਚ੍ਚਾਯਨਤ੍ਥੇਰੇਨ ਵਾ ਮੁਖਮਤ੍ਤਦੀਪਨਿਕਾਰਕੇਨ ਵਜਿਰਬੁਦ੍ਧਾਚਰਿਯੇਨ ਵਾ ਪਦਰੂਪਸਿਦ੍ਧਿਕਾਰਕੇਨ ਬੁਦ੍ਧਪਿਯਾਚਰਿਯੇਨ ਵਾ ਸਦ੍ਦਨੀਤਿਪ੍ਪਕਰਣਕਾਰਕੇਨ ਅਗ੍ਗਵਂਸਾਚਰਿਯੇਨ ਵਾ ਤਦਞ੍ਞਸਤ੍ਥਕਾਰਕੇਹਿ ਮਹਾਥੇਰੇਹਿ ਵਾ ਕਾਰਿਤੋਤਿ ਏਵਂ ਆਗਮਚਿਨ੍ਤਾਯਂ ਸਤਿ ਅਯਂ ਸਿਲੋਕੋ ਭਗਵਨ੍ਤਸ੍ਮਾ ਪਭਵੋ ਧਮ੍ਮਸਙ੍ਗਾਹਕਤ੍ਥੇਰੇਹਿ ਵਾ ਅਟ੍ਠਕਥਾਚਰਿਯੇਹਿ ਵਾਤਿ ਨ ਪਞ੍ਞਾਯਤਿ. ‘‘ਵਿਨਯੇ ਵਾ ਸੁਤ੍ਤਨ੍ਤੇ ਵਾ ਅਭਿਧਮ੍ਮੇ ਵਾ ਪਾਲ਼ਿਯਂ ਵਾ ਅਟ੍ਠਕਥਾਯ ਵਾ ਟੀਕਾਸੁ ਵਾ ਆਗਤੋ’’ਤਿ ਹਿ ਨ ਸਕ੍ਕਾ ਵਤ੍ਤੁਂ. ਕਚ੍ਚਾਯਨਾਚਰਿਯਾਦੀਹਿ ਸਦ੍ਦਸਤ੍ਥਕਾਰਕੇਹਿ ਆਚਰਿਯੇਹਿ ਕਤੋਤਿਪਿ ਨ ਦਿਸ੍ਸਤਿ. ਏਵਂ ਸਨ੍ਤੇ ਅਪ੍ਪਾਟਿਹੀਰਕਤਂ ਇਦਂ ਵਚਨਂ ਆਪਜ੍ਜਤਿ.

ਏਵਂ ਪਨ ਮਯਂ ਚਿਨ੍ਤਯਿਮ੍ਹਾ – ਰਾਮਞ੍ਞਦੇਸੇ ਕਿਰ ਸਕਭਾਸਾਯਂ ਚ-ਕਾਰਨ੍ਤ ਞ-ਕਾਰਨ੍ਤਾ ਨ ਸਨ੍ਤਿ, ਤੇਨੇਵ ਰਾਮਞ੍ਞਦੇਸਿਯਾ ਭਿਕ੍ਖੂ ‘‘ਸਚ੍ਚ’’ਇਤਿ ਇਮਂ ਪਾਠਂ ਵਦਨ੍ਤਾ ‘‘ਸਤ੍ਚ’’ਇਤਿ ਵਦਨ੍ਤਿ, ‘‘ਪਞ੍ਚਙ੍ਗ’’ਇਤਿ ਪਾਠਂ ਵਦਨ੍ਤਾ ‘‘ਪਨ੍ਚਙ੍ਗ’’ਇਤਿ ਵਦਨ੍ਤਿ, ਤਸ੍ਮਾ ਅਤ੍ਤਨੋ ਵਿਸਯੇ ਅਵਿਜ੍ਜਮਾਨਂ ਚ-ਕਾਰਨ੍ਤ ਞ-ਕਾਰਨ੍ਤਂ ਯਥਾਪਾਠਂ ਵਤ੍ਤੁਮਸਕ੍ਕੋਨ੍ਤੇਹਿ ਤੇਹਿ ਭਿਕ੍ਖੂਹਿ ਸਕਭਾਸਾਨੁਰੂਪਤੋ ਅਯਂ ਸਿਲੋਕੋ ਕਾਰਿਤੋ ਭਵਿਸ੍ਸਤੀਤਿ. ਏਵਂ ਸਨ੍ਤੇਪਿ ਮਰਮ੍ਮਭਾਸਾਯ ਚ-ਕਾਰਨ੍ਤ ਞ-ਕਾਰਨ੍ਤਪਦਾਨਂ ਸੁਤਿਵਿਸੇਸਵਸੇਨ ਵਿਸੁਂ ਪਞ੍ਞਾਯਨਤੋ ਮਰਮ੍ਮਦੇਸਿਯਾ ਭਿਕ੍ਖੂ ਤਂ ਸਿਲੋਕਂ ਅਨੁਵਤ੍ਤਿਤ੍ਵਾ ‘‘ਬੁਦ੍ਧਂ ਸਰਣਂ ਗਚ੍ਛਾਮੀ’’ਤਿ ਵਾ ‘‘ਪਠਮਂ ਉਪਤ੍ਝਂ ਗਾਹਾਪੇਤਬ੍ਬੋ’’ਤਿ ਵਾ ‘‘ਹੇਤੁਪਤ੍ਚਯੋ ਆਰਮ੍ਮਣਪਤ੍ਚਯੋ’’ਤਿ ਵਾ ਵਤ੍ਤੁਂ ਨ ਅਰਹਨ੍ਤਿ. ਰਾਮਞ੍ਞਦੇਸਿਯਾਪਿ ਸਕਭਾਸਾਯ ਵਿਸੁਂ ਅਵਿਜ੍ਜਮਾਨਮ੍ਪਿ ਚ-ਕਾਰਨ੍ਤ ਞ-ਕਾਰਨ੍ਤਪਦਂ ਸਕਭਾਸਾਕਥਨਕਾਲੇਯੇਵ ਭਾਸਾਨੁਰੂਪਂ ਤ-ਕਾਰਨ੍ਤ ਨ-ਕਾਰਨ੍ਤਭਾਵੇਨ ਕਥੇਤਬ੍ਬਂ, ਮਾਗਧਭਾਸਾਕਥਨਕਾਲੇ ਪਨ ਮਾਗਧਭਾਸਾਯ ਚ-ਕਾਰਨ੍ਤ ਞ-ਕਾਰਨ੍ਤਪਦਾਨਂ ਵਿਸੁਂ ਪਯੋਗਦਸ੍ਸਨਤੋ ਮਾਗਧਭਾਸਾਨੁਰੂਪਂ ਚ-ਕਾਰਨ੍ਤ ਞ-ਕਾਰਨ੍ਤਪਦਾਨਂ ਵਿਸੁਂ ਸੁਤਿਵਸੇਨ ਯਥਾਪਾਠਮੇਵ ਕਥੇਤਬ੍ਬਾਨੀਤਿ ਨੋ ਮਤਿ. ਅਯਮੇਤ੍ਥ ਆਗਮਚਿਨ੍ਤਾ.

ਜਿਨਸਾਸਨਮਾਰਬ੍ਭ, ਕਥਾਯਂ ਕਥਿਤਾ ਮਯਾ;

ਯੁਤ੍ਤਾਯੁਤ੍ਤਂ ਚਿਨ੍ਤਯਨ੍ਤੁ, ਪਣ੍ਡਿਤਾ ਜਿਨਸਾਵਕਾ.

ਯੁਤ੍ਤਾਯੁਤ੍ਤਂ ਚਿਨ੍ਤਯਿਤ੍ਵਾ, ਯੁਤ੍ਤਞ੍ਚੇ ਧਾਰਯਨ੍ਤੁ ਤਂ;

ਅਯੁਤ੍ਤਞ੍ਚੇ ਪਜਹਨ੍ਤੁ, ਮਾਨਦੋਸਵਿਵਜ੍ਜਿਤਾਤਿ.

੨੫੪. ਏਵਂ ਚਤੁਨ੍ਨਂ ਕਮ੍ਮਾਨਂ ਸਮ੍ਪਤ੍ਤਿਵਿਪਤ੍ਤਿਂ ਦਸ੍ਸੇਤ੍ਵਾ ਇਦਾਨਿ ਤੇਸਂ ਕਮ੍ਮਾਨਂ ਠਾਨਪ੍ਪਭੇਦਂ ਦਸ੍ਸੇਨ੍ਤੋ ‘‘ਅਪਲੋਕਨਕਮ੍ਮਂ ਕਤਮਾਨਿ ਪਞ੍ਚ ਠਾਨਾਨਿ ਗਚ੍ਛਤੀ’’ਤਿਆਦਿਮਾਹ. ਤਤ੍ਥ ਵਿਨਿਚ੍ਛਯੋ ਅਟ੍ਠਕਥਾਯਂ ਵੁਤ੍ਤਨਯੇਨੇਵ ਵੇਦਿਤਬ੍ਬੋ. ਅਨੁਤ੍ਤਾਨਪਦਤ੍ਥਮੇਵ ਦਸ੍ਸਯਿਸ੍ਸਾਮ. ‘‘ਏਤਰਹਿ ਸਚੇਪਿ ਸਾਮਣੇਰੋ’’ਤਿਆਦੀਸੁ ਬੁਦ੍ਧਾਦੀਨਂ ਅਵਣ੍ਣਭਾਸਨਮ੍ਪਿ ਅਕਪ੍ਪਿਯਾਦਿਂ ਕਪ੍ਪਿਯਾਦਿਭਾਵੇਨ ਦੀਪਨਮ੍ਪਿ ਦਿਟ੍ਠਿਵਿਪਤ੍ਤਿਯਂਯੇਵ ਪਵਿਸਤਿ, ਤੇਨੇਵ ਵਕ੍ਖਤਿ ‘‘ਤਂ ਲਦ੍ਧਿਂ ਵਿਸ੍ਸਜ੍ਜਾਪੇਤਬ੍ਬੋ’’ਤਿ. ਭਿਕ੍ਖੂਨਮ੍ਪਿ ਏਸੇਵ ਨਯੋ. ਮਿਚ੍ਛਾਦਿਟ੍ਠਿਕੋਤਿ ਬੁਦ੍ਧਵਚਨਾਧਿਪ੍ਪਾਯਂ ਵਿਪਰੀਤਤੋ ਗਣ੍ਹਨ੍ਤੋ, ਸੋ ਏਵ ‘‘ਅਨ੍ਤਗ੍ਗਾਹਿਕਾਯ ਦਿਟ੍ਠਿਯਾ ਸਮਨ੍ਨਾਗਤੋ’’ਤਿ ਵੁਤ੍ਤੋ. ਕੇਚਿ ਪਨ ‘‘ਸਸ੍ਸਤੁਚ੍ਛੇਦਾਨਂ ਅਞ੍ਞਤਰਦਿਟ੍ਠਿਯਾ ਸਮਨ੍ਨਾਗਤੋ’’ਤਿ ਵਦਨ੍ਤਿ, ਤਂ ਨ ਯੁਤ੍ਤਂ. ਸਸ੍ਸਤੁਚ੍ਛੇਦਗਾਹਸ੍ਸ ਸਾਮਣੇਰਾਨਂ ਲਿਙ੍ਗਨਾਸਨਾਯ ਕਾਰਣਤ੍ਤੇਨ ਹੇਟ੍ਠਾ ਅਟ੍ਠਕਥਾਯਮੇਵ ਵੁਤ੍ਤਤ੍ਤਾ ਇਧ ਚ ਦਣ੍ਡਕਮ੍ਮਨਾਸਨਾਯ ਏਵ ਅਧਿਪ੍ਪੇਤਤ੍ਤਾ. ਕਾਯਸਮ੍ਭੋਗਸਾਮਗ੍ਗੀਤਿ ਸਹਸੇਯ੍ਯਪਟਿਗ੍ਗਹਣਾਦਿ. ਸੋਰਤੋਤਿ ਸੁਭੇ ਰਤੋ, ਸੁਟ੍ਠੁ ਓਰਤੋਤਿ ਵਾ ਸੋਰਤੋ. ਨਿਵਾਤਵੁਤ੍ਤੀਤਿ ਨੀਚਵੁਤ੍ਤਿ.

ਤਸ੍ਸਾਪਿ ਦਾਤਬ੍ਬੋਤਿ ਵਿਜ੍ਜਮਾਨਂ ਮੁਖਰਾਦਿਭਾਵਂ ਨਿਸ੍ਸਾਯ ਅਪ੍ਪਟਿਪੁਚ੍ਛਿਤ੍ਵਾਪਿ ਪਟਿਞ੍ਞਂ ਅਗ੍ਗਹੇਤ੍ਵਾਪਿ ਆਪਤ੍ਤਿਂ ਅਨਾਰੋਪੇਤ੍ਵਾਪਿ ਦੇਸਿਤਾਯਪਿ ਆਪਤ੍ਤਿਯਾ ਖੁਂਸਨਾਦਿਤੋ ਅਨੋਰਮਨ੍ਤਸ੍ਸ ਦਾਤਬ੍ਬੋਵ. ਓਰਮਨ੍ਤਸ੍ਸ ਪਨ ਖਮਾਪੇਨ੍ਤਸ੍ਸ ਨ ਦਾਤਬ੍ਬੋ. ਬ੍ਰਹ੍ਮਦਣ੍ਡਸ੍ਸ ਦਾਨਨ੍ਤਿ ਖਰਦਣ੍ਡਸ੍ਸ ਉਕ੍ਕਟ੍ਠਦਣ੍ਡਸ੍ਸ ਦਾਨਂ. ਤਜ੍ਜਨੀਯਾਦਿਕਮ੍ਮੇ ਹਿ ਕਤੇ ਓਵਾਦਾਨੁਸਾਸਨਿਪ੍ਪਦਾਨਪਟਿਕ੍ਖੇਪੋ ਨਤ੍ਥਿ, ਦਿਨ੍ਨਬ੍ਰਹ੍ਮਦਣ੍ਡੇ ਪਨ ਤਸ੍ਮਿਂ ਸਦ੍ਧਿਂ ਤਜ੍ਜਨੀਯਕਮ੍ਮਾਦਿਕਤੇਹਿ ਪਟਿਕ੍ਖਿਤ੍ਤਮ੍ਪਿ ਕਾਤੁਂ ਨ ਵਟ੍ਟਤਿ ‘‘ਨੇਵ ਵਤ੍ਤਬ੍ਬੋ’’ਤਿਆਦਿਨਾ ਆਲਾਪਸਲ੍ਲਾਪਮਤ੍ਤਸ੍ਸਪਿ ਨ-ਕਾਰੇਨ ਪਟਿਕ੍ਖਿਤਤ੍ਤਾ. ਤਞ੍ਹਿ ਦਿਸ੍ਵਾ ਭਿਕ੍ਖੂ ਗੀਵਂ ਪਰਿਵਤ੍ਤੇਤ੍ਵਾ ਓਲੋਕਨਮਤ੍ਤਮ੍ਪਿ ਨ ਕਰੋਨ੍ਤਿ, ਏਵਂ ਵਿਵਜ੍ਜੇਤਬ੍ਬਂ ਨਿਮ੍ਮਦਨਕਰਣਤ੍ਥਮੇਵ ਤਸ੍ਸ ਦਣ੍ਡਸ੍ਸ ਅਨੁਞ੍ਞਾਤਤ੍ਤਾ. ਤੇਨੇਵ ਛਨ੍ਨਤ੍ਥੇਰੋਪਿ ਉਕ੍ਖੇਪਨੀਯਾਦਿਕਮ੍ਮਕਤੋਪਿ ਅਭਾਯਿਤ੍ਵਾ ਬ੍ਰਹ੍ਮਦਣ੍ਡੇ ਦਿਨ੍ਨੇ ‘‘ਸਙ੍ਘੇਨਾਹਂ ਸਬ੍ਬਥਾ ਵਿਵਜ੍ਜਿਤੋ’’ਤਿ ਮੁਚ੍ਛਿਤੋ ਪਪਤਿ. ਯੋ ਪਨ ਬ੍ਰਹ੍ਮਦਣ੍ਡਕਤੇਨ ਸਦ੍ਧਿਂ ਞਤ੍ਵਾ ਸਂਸਟ੍ਠੋ ਅਵਿਵਜ੍ਜੇਤ੍ਵਾ ਵਿਹਰਤਿ, ਤਸ੍ਸ ਦੁਕ੍ਕਟਮੇਵਾਤਿ ਗਹੇਤਬ੍ਬਂ. ਅਞ੍ਞਥਾ ਬ੍ਰਹ੍ਮਦਣ੍ਡਵਿਧਾਨਸ੍ਸ ਨਿਰਤ੍ਥਕਤਾਪਸਙ੍ਗਤੋ. ਤੇਨਾਤਿ ਬ੍ਰਹ੍ਮਦਣ੍ਡਕਤੇਨ. ਯਥਾ ਤਜ੍ਜਨੀਯਾਦਿਕਮ੍ਮਕਤੇਹਿ, ਏਵਮੇਵ ਤਤੋ ਅਧਿਕਮ੍ਪਿ ਸਙ੍ਘਂ ਆਰਾਧੇਨ੍ਤੇਨ ਸਮ੍ਮਾ ਵਤ੍ਤਿਤਬ੍ਬਂ, ਤਞ੍ਚ ‘‘ਸੋਰਤੋ ਨਿਵਾਤਵੁਤ੍ਤੀ’’ਤਿਆਦਿਨਾ ਸਰੂਪਤੋ ਦਸ੍ਸਿਤਮੇਵ. ਤੇਨਾਹ ‘‘ਸਮ੍ਮਾ ਵਤ੍ਤਿਤ੍ਵਾ ਖਮਾਪੇਨ੍ਤਸ੍ਸ ਬ੍ਰਹ੍ਮਦਣ੍ਡੋ ਪਟਿਪ੍ਪਸ੍ਸਮ੍ਭੇਤਬ੍ਬੋ’’ਤਿ. ਪਟਿਸਙ੍ਖਾਤਿ ਪਟਿਸਙ੍ਖਾਯ, ਞਾਣੇਨ ਉਪਪਰਿਕ੍ਖਿਤ੍ਵਾ.

ਯਂ ਤਂ ਭਗਵਤਾ ਅਵਨ੍ਦਿਯਕਮ੍ਮਂ ਅਨੁਞ੍ਞਾਤਨ੍ਤਿ ਸਮ੍ਬਨ੍ਧੋ. ‘‘ਤਸ੍ਸ ਭਿਕ੍ਖੁਨੋ ਦਣ੍ਡਕਮ੍ਮਂ ਕਾਤੁ’’ਨ੍ਤਿ ਸਾਮਞ੍ਞਤੋ ਅਨੁਞ੍ਞਾਤਪ੍ਪਕਾਰਂ ਦਸ੍ਸੇਤ੍ਵਾ ਪੁਨ ਵਿਸੇਸਤੋ ਅਨੁਞ੍ਞਾਤਪ੍ਪਕਾਰਂ ਦਸ੍ਸੇਤੁਂ ‘‘ਅਥ ਖੋ’’ਤਿਆਦਿ ਪਾਲ਼ਿਉਦ੍ਧਟਾਤਿ ਵੇਦਿਤਬ੍ਬਂ. ਇਮਸ੍ਸ ਅਪਲੋਕਨਕਮ੍ਮਸ੍ਸ ਠਾਨਂ ਹੋਤੀਤਿ ਅਪਲੋਕਨਕਮ੍ਮਸਾਮਞ੍ਞਸ੍ਸ ਪਵਤ੍ਤਿਟ੍ਠਾਨਂ ਹੋਤਿ. ਵਿਸੇਸਬ੍ਯਤਿਰੇਕੇਨ ਅਵਿਜ੍ਜਮਾਨਮ੍ਪਿ ਤਦਞ੍ਞਤ੍ਥ ਅਪ੍ਪਵਤ੍ਤਿਂ ਦਸ੍ਸੇਤੁਂ ਵਿਸੇਸਨਿਸ੍ਸਿਤਂ ਵਿਯ ਵੋਹਰੀਯਤਿ. ‘‘ਕਮ੍ਮਞ੍ਞੇਵ ਲਕ੍ਖਣ’’ਨ੍ਤਿ ਇਮਿਨਾ ਓਸਾਰਣਾਦਿਵਸੇਨ ਗਹਿਤਾਵਸੇਸਾਨਂ ਸਬ੍ਬੇਸਂ ਅਪਲੋਕਨਕਮ੍ਮਸਾਮਞ੍ਞਲਕ੍ਖਣਵਸੇਨ ਗਹਿਤਤ੍ਤਾ ‘‘ਕਮ੍ਮਞ੍ਞੇਵ ਲਕ੍ਖਣਮਸ੍ਸਾਤਿ ਕਮ੍ਮਲਕ੍ਖਣ’’ਨ੍ਤਿ ਨਿਬ੍ਬਚਨਂ ਦਸ੍ਸੇਤਿ, ਇਦਞ੍ਚ ਵੁਤ੍ਤਾਵਸੇਸਾਨਂ ਕਮ੍ਮਾਨਂ ਨਿਟ੍ਠਾਨਟ੍ਠਾਨਂ ਸਙ੍ਖਾਰਕ੍ਖਨ੍ਧਧਮ੍ਮਾਯਤਨਾਦੀਨਿ ਵਿਯ ਵੁਤ੍ਤਾਵਸੇਸਖਨ੍ਧਾਯਤਨਾਨਨ੍ਤਿ ਦਟ੍ਠਬ੍ਬਂ. ਤੇਨੇਵ ਵਕ੍ਖਤਿ ‘‘ਅਯਂ ਪਨੇਤ੍ਥ ਪਾਲ਼ਿਮੁਤ੍ਤਕੋਪਿ ਕਮ੍ਮਲਕ੍ਖਣਵਿਨਿਚ੍ਛਯੋ’’ਤਿਆਦਿ. ਯਥਾ ਚੇਤ੍ਥ, ਏਵਂ ਉਪਰਿ ਞਤ੍ਤਿਕਮ੍ਮਾਦੀਸੁਪਿ ਕਮ੍ਮਲਕ੍ਖਣਂ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ਪਰਿਵਾਰ ੩.੪੯੫-੪੯੬) ਪਨ ‘‘ਕਮ੍ਮਮੇਵ ਲਕ੍ਖਣਨ੍ਤਿ ਕਮ੍ਮਲਕ੍ਖਣਂ. ਓਸਾਰਣਨਿਸ੍ਸਾਰਣਭਣ੍ਡੁਕਮ੍ਮਾਦਯੋ ਵਿਯ ਕਮ੍ਮਞ੍ਚ ਹੁਤ੍ਵਾ ਅਞ੍ਞਞ੍ਚ ਨਾਮਂ ਨ ਲਭਤਿ, ਕਮ੍ਮਮੇਵ ਹੁਤ੍ਵਾ ਉਪਲਕ੍ਖੀਯਤੀਤਿ ਕਮ੍ਮਲਕ੍ਖਣਨ੍ਤਿ ਵੁਚ੍ਚਤੀ’’ਤਿ ਵੁਤ੍ਤਂ. ਵਜਿਰਬੁਦ੍ਧਿਟੀਕਾਯਂ (ਵਜਿਰ. ਟੀ. ਪਰਿਵਾਰ ੪੯੫-੪੯੬) ਪਨ ‘‘ਇਮਸ੍ਸ ਅਪਲੋਕਨਕਮ੍ਮਸ੍ਸ ਠਾਨਂ ਹੋਤੀਤਿ ਏਵਮ੍ਪਿ ਅਪਲੋਕਨਕਮ੍ਮਂ ਪਵਤ੍ਤਤੀਤਿ ਅਤ੍ਥੋ. ਕਮ੍ਮਞ੍ਞੇਵ ਲਕ੍ਖਣਨ੍ਤਿ ਕਮ੍ਮਲਕ੍ਖਣਂ. ਓਸਾਰਣਨਿਸ੍ਸਾਰਣਭਣ੍ਡੁਕਮ੍ਮਾਦਯੋ ਵਿਯ ਕਮ੍ਮਞ੍ਚ ਹੁਤ੍ਵਾ ਅਞ੍ਞਞ੍ਚ ਨਾਮਂ ਨ ਲਭਤਿ, ਕਮ੍ਮਮੇਵ ਹੁਤ੍ਵਾ ਉਪਲਕ੍ਖੀਯਤੀਤਿ ਕਮ੍ਮਲਕ੍ਖਣਂ ਉਪਨਿਸ੍ਸਯੋ ਵਿਯ. ਹੇਤੁਪਚ੍ਚਯਾਦਿਲਕ੍ਖਣਵਿਮੁਤ੍ਤੋ ਹਿ ਸਬ੍ਬੋ ਪਚ੍ਚਯਵਿਸੇਸੋ ਤਤ੍ਥ ਸਙ੍ਗਯ੍ਹਤੀ’’ਤਿ ਵੁਤ੍ਤਂ. ਤਸ੍ਸ ਕਰਣਨ੍ਤਿ ਅਵਨ੍ਦਿਯਕਮ੍ਮਸ੍ਸ ਕਰਣਵਿਧਾਨਂ. ਨ ਵਨ੍ਦਿਤਬ੍ਬੋਤਿ, ਇਮਿਨਾ ਵਨ੍ਦਨ੍ਤਿਯਾ ਦੁਕ੍ਕਟਨ੍ਤਿ ਦਸ੍ਸੇਤੀਤਿ ਦਟ੍ਠਬ੍ਬਂ. ਸਙ੍ਘੇਨ ਕਤਂ ਕਤਿਕਂ ਞਤ੍ਵਾ ਮਦ੍ਦਨਂ ਵਿਯ ਹਿ ਸਙ੍ਘਸਮ੍ਮੁਤਿਂ ਅਨਾਦਰੇਨ ਅਤਿਕ੍ਕਮਨ੍ਤਸ੍ਸ ਆਪਤ੍ਤਿ ਏਵ ਹੋਤਿ.

੨੫੫. ਭਿਕ੍ਖੁਸਙ੍ਘਸ੍ਸਪਿ ਪਨੇਤਂ ਲਬ੍ਭਤਿਯੇਵਾਤਿ ਅਵਨ੍ਦਿਯਕਮ੍ਮਸ੍ਸ ਉਪਲਕ੍ਖਣਮਤ੍ਤੇਨ ਗਹਿਤਤ੍ਤਾ ਭਿਕ੍ਖੁਸਙ੍ਘਸ੍ਸਪਿ ਕਮ੍ਮਲਕ੍ਖਣਂ ਲਬ੍ਭਤਿ ਏਵ. ਸਲਾਕਦਾਨਟ੍ਠਾਨਂ ਸਲਾਕਗ੍ਗਂ ਨਾਮ, ਯਾਗੁਭਤ੍ਤਾਨਂ ਭਾਜਨਟ੍ਠਾਨਾਨਿ ਯਾਗਗ੍ਗਭਤ੍ਤਗ੍ਗਾਨਿ ਨਾਮ. ਏਤੇਸੁਪਿ ਹਿ ਠਾਨੇਸੁ ਸਬ੍ਬੋ ਸਙ੍ਘੋ ਉਪੋਸਥੇ ਵਿਯ ਸਨ੍ਨਿਪਤਿਤੋ, ਕਮ੍ਮਞ੍ਚ ਵਗ੍ਗਕਮ੍ਮਂ ਨ ਹੋਤਿ, ‘‘ਮਯਮੇਤਂ ਨ ਜਾਨਿਮ੍ਹਾ’’ਤਿ ਪਚ੍ਛਾ ਖੀਯਨ੍ਤਾਪਿ ਨ ਹੋਨ੍ਤਿ, ਖਣ੍ਡਸੀਮਾਯ ਪਨ ਕਤੇ ਖੀਯਨ੍ਤਿ. ਸਙ੍ਘਿਕਪਚ੍ਚਯਞ੍ਹਿ ਅਚ੍ਛਿਨ੍ਨਚੀਵਰਾਦੀਨਂ ਦਾਤੁਂ ਅਪਲੋਕੇਨ੍ਤੇਹਿ ਉਪਚਾਰਸੀਮਟ੍ਠਾਨਂ ਸਬ੍ਬੇਸਂ ਅਨੁਮਤਿਂ ਗਹੇਤ੍ਵਾਵ ਕਾਤਬ੍ਬਂ. ਯੋ ਪਨ ਵਿਸਭਾਗਪੁਗ੍ਗਲੋ ਧਮ੍ਮਿਕਂ ਅਪਲੋਕਨਂ ਪਟਿਬਾਹਤਿ, ਤਂ ਉਪਾਯੇਨ ਬਹਿਉਪਚਾਰਸੀਮਗਤਂ ਵਾ ਕਤ੍ਵਾ ਖਣ੍ਡਸੀਮਂ ਵਾ ਪਵਿਸਿਤ੍ਵਾ ਕਾਤੁਂ ਵਟ੍ਟਤਿ. ਯਂ ਸਨ੍ਧਾਯ ‘‘ਅਪਲੋਕਨਕਮ੍ਮਂ ਕਰੋਤੀ’’ਤਿ ਸਾਮਞ੍ਞਤੋ ਦਸ੍ਸੇਤਿ, ਤਂ ਅਪਲੋਕਨਕਮ੍ਮਂ ਸਰੂਪਤੋ ਦਸ੍ਸੇਤੁਂ ਆਹ ‘‘ਅਚ੍ਛਿਨ੍ਨਚੀਵਰਂ’’ਇਚ੍ਚਾਦਿ. ਯਦਿ ਅਪਲੋਕੇਤ੍ਵਾਵ ਚੀਵਰਂ ਦਾਤਬ੍ਬਂ, ਕਿਂ ਪਨ ਅਪ੍ਪਮਤ੍ਤਕਵਿਸ੍ਸਜ੍ਜਕਸਮ੍ਮੁਤਿਯਾਤਿ ਆਹ ‘‘ਅਪ੍ਪਮਤ੍ਤਕਵਿਸ੍ਸਜ੍ਜਕੇਨ ਪਨਾ’’ਤਿਆਦਿ. ਨਾਲ਼ਿ ਵਾ ਉਪਡ੍ਢਨਾਲ਼ਿ ਵਾਤਿ ਦਿਵਸੇ ਦਿਵਸੇ ਅਪਲੋਕੇਤ੍ਵਾ ਦਾਤਬ੍ਬਸ੍ਸ ਪਮਾਣਦਸ੍ਸਨਂ. ਤੇਨ ਯਾਪਨਮਤ੍ਤਮੇਵ ਅਪਲੋਕੇਤਬ੍ਬਂ, ਨ ਅਧਿਕਨ੍ਤਿ ਦਸ੍ਸੇਤਿ. ਏਕਦਿਵਸਂਯੇਵ ਵਾਤਿਆਦਿ ਦਸਵੀਸਤਿਦਿਵਸਾਨਂ ਏਕਸ੍ਮਿਂ ਦਿਵਸੇਯੇਵ ਦਾਤਬ੍ਬਪਰਿਚ੍ਛੇਦਦਸ੍ਸਨਂ. ਤੇਨ ‘‘ਯਾਵਜੀਵ’’ਨ੍ਤਿ ਵਾ ‘‘ਯਾਵਰੋਗਾ ਵੁਟ੍ਠਹਤੀ’’ਤਿ ਵਾ ਏਵਂ ਅਪਲੋਕੇਤੁਂ ਨ ਵਟ੍ਟਤੀਤਿ ਦਸ੍ਸੇਤਿ. ਇਣਪਲਿਬੋਧਨ੍ਤਿ ਇਣਵਤ੍ਥੁਂ ਦਾਤੁਂ ਵਟ੍ਟਤੀਤਿ ਸਮ੍ਬਨ੍ਧੋ. ਤਞ੍ਚ ਇਣਾਯਿਕੇਹਿ ਪਲਿਬੁਦ੍ਧਸ੍ਸ ਲਜ੍ਜੀਪੇਸਲਸ੍ਸ ਸਾਸਨੁਪਕਾਰਕਸ੍ਸ ਪਮਾਣਯੁਤ੍ਤਮੇਵ ਕਪ੍ਪਿਯਭਣ੍ਡਂ ਨਿਯਮੇਤ੍ਵਾ ਭਿਕ੍ਖੂਹਿ ਅਪਲੋਕੇਤ੍ਵਾ ਦਾਤਬ੍ਬਂ, ਨ ਪਨ ਸਹਸ੍ਸਂ ਵਾ ਸਤਸਹਸ੍ਸਂ ਵਾ ਮਹਾਇਣਂ. ਤਾਦਿਸਞ੍ਹਿ ਭਿਕ੍ਖਾਚਰਿਯਵਤ੍ਤੇਨ ਸਬ੍ਬੇਹਿ ਭਿਕ੍ਖੂਹਿ ਤਾਦਿਸਸ੍ਸ ਭਿਕ੍ਖੁਨੋ ਪਰਿਯੇਸਿਤ੍ਵਾ ਦਾਤਬ੍ਬਂ.

‘‘ਛਤ੍ਤਂ ਵਾ ਵੇਦਿਕਂ ਵਾਤਿ ਏਤ੍ਥ ਵੇਦਿਕਾਤਿ ਚੇਤਿਯਸ੍ਸ ਉਪਰਿ ਚਤੁਰਸ੍ਸਚਯੋ ਵੁਚ੍ਚਤਿ. ਛਤ੍ਤਨ੍ਤਿ ਤਤੋ ਉਦ੍ਧਂ ਵਲਯਾਨਿ ਦਸ੍ਸੇਤ੍ਵਾ ਕਤੋ ਅਗ੍ਗਚਯੋ ਵੁਚ੍ਚਤੀ’’ਤਿ ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ਪਰਿਵਾਰ ੩.੪੯੫-੪੯੬) ਵੁਤ੍ਤਂ. ਚੇਤਿਯਸ੍ਸ ਉਪਨਿਕ੍ਖੇਪਤੋਤਿ ਚੇਤਿਯਸ੍ਸ ਪਟਿਜਗ੍ਗਨਤ੍ਥਾਯ ਵਡ੍ਢਿਯਾ ਪਯੋਜੇਤ੍ਵਾ ਕਪ੍ਪਿਯਕਾਰਕੇਹਿ ਠਪਿਤਵਤ੍ਥੁਤੋ. ਸਙ੍ਘਿਕੇਨਪੀਤਿ ਨ ਕੇਵਲਞ੍ਚ ਤਤ੍ਰੁਪ੍ਪਾਦਤੋ ਪਚ੍ਚਯਦਾਯਕੇਹਿ ਚਤੁਪਚ੍ਚਯਤ੍ਥਾਯ ਸਙ੍ਘਸ੍ਸ ਦਿਨ੍ਨਵਤ੍ਥੁਨਾਪੀਤਿ ਅਤ੍ਥੋ. ਸਙ੍ਘਭਤ੍ਤਂ ਕਾਤੁਂ ਨ ਵਟ੍ਟਤੀਤਿ ਮਹਾਦਾਨਂ ਦਦਨ੍ਤੇਹਿਪਿ ਕਰਿਯਮਾਨਂ ਸਙ੍ਘਭਤ੍ਤਂ ਵਿਯ ਕਾਰੇਤੁਂ ਨ ਵਟ੍ਟਤੀਤਿ ਅਧਿਪ੍ਪਾਯੋ. ‘‘ਯਥਾਸੁਖਂ ਪਰਿਭੁਞ੍ਜਿਤੁਂ ਰੁਚ੍ਚਤੀ’’ਤਿ ਵੁਤ੍ਤਤ੍ਤਾ ਅਤ੍ਤਨੋ ਅਤ੍ਤਨੋ ਪਰਿਭੋਗਪਹੋਨਕਂ ਅਪ੍ਪਂ ਵਾ ਬਹੁਂ ਵਾ ਗਹੇਤਬ੍ਬਂ, ਅਧਿਕਂ ਪਨ ਗਹੇਤੁਂ ਨ ਲਭਤਿ.

ਉਪੋਸਥਦਿਵਸੇਤਿ ਨਿਦਸ੍ਸਨਮਤ੍ਤਂ, ਯਸ੍ਮਿਂ ਕਿਸ੍ਮਿਞ੍ਚਿ ਦਿਵਸੇਪਿ ਕਤਂ ਸੁਕਤਮੇਵ ਹੋਤਿ. ਕਰੋਨ੍ਤੇਨ ‘‘ਯਂ ਇਮਸ੍ਮਿਂ ਵਿਹਾਰੇ ਅਨ੍ਤੋਸੀਮਾਯ ਸਙ੍ਘਸਨ੍ਤਕਂ…ਪੇ… ਯਥਾਸੁਖਂ ਪਰਿਭੁਞ੍ਜਿਤੁਂ ਮਯ੍ਹਂ ਰੁਚ੍ਚਤੀ’’ਤਿ ਏਵਂ ਕਤਿਕਾ ਕਾਤਬ੍ਬਾ. ਤਥਾ ਦ੍ਵੀਹਿ ਤੀਹਿਪਿ ‘‘ਆਯਸ੍ਮਨ੍ਤਾਨਂ ਰੁਚ੍ਚਤੀ’’ਤਿ ਵਚਨਮੇਵ ਹੇਤ੍ਥ ਵਿਸੇਸੋ. ਤੇਸਮ੍ਪੀਤਿ ਰੁਕ੍ਖਾਨਂ. ਸਾ ਏਵ ਕਤਿਕਾਤਿ ਵਿਸੁਂ ਕਤਿਕਾ ਨ ਕਾਤਬ੍ਬਾਤਿ ਅਤ੍ਥੋ.

ਤੇਸਨ੍ਤਿ ਰੁਕ੍ਖਾਨਂ, ਸਙ੍ਘੋ ਸਾਮੀਤਿ ਸਮ੍ਬਨ੍ਧੋ. ਪੁਰਿਮਵਿਹਾਰੇਤਿ ਪੁਰਿਮੇ ਯਥਾਸੁਖਂ ਪਰਿਭੋਗਤ੍ਥਾਯ ਕਤਕਤਿਕੇ ਵਿਹਾਰੇ. ਪਰਿਵੇਣਾਨਿ ਕਤ੍ਵਾ ਜਗ੍ਗਨ੍ਤੀਤਿ ਯਤ੍ਥ ਅਰਕ੍ਖਿਯਮਾਨੇ ਫਲਾਫਲਾਨਿ ਰੁਕ੍ਖਾ ਚ ਵਿਨਸ੍ਸਨ੍ਤਿ, ਤਾਦਿਸਂ ਠਾਨਂ ਸਨ੍ਧਾਯ ਵੁਤ੍ਤਂ, ਤਤ੍ਥ ਸਙ੍ਘਸ੍ਸ ਕਤਿਕਾ ਨ ਪਵਤ੍ਤਤੀਤਿ ਅਧਿਪ੍ਪਾਯੋ. ਯੇਹਿ ਪਨ ਰੁਕ੍ਖਬੀਜਾਨਿ ਰੋਪੇਤ੍ਵਾ ਆਦਿਤੋ ਪਟ੍ਠਾਯ ਪਟਿਜਗ੍ਗਿਤਾ, ਤੇਪਿ ਦਸਮਭਾਗਂ ਦਤ੍ਵਾ ਰੋਪਕੇਹੇਵ ਪਰਿਭੁਞ੍ਜਿਤਬ੍ਬਾਨਿ. ਤੇਹੀਤਿ ਜਗ੍ਗਿਤੇਹਿ.

ਤਤ੍ਥਾਤਿ ਤਸ੍ਮਿਂ ਵਿਹਾਰੇ. ਮੂਲੇਤਿਆਦਿਕਾਲੇ, ਪੁਬ੍ਬੇਤਿ ਅਤ੍ਥੋ. ਦੀਘਾ ਕਤਿਕਾਤਿ ਅਪਰਿਚ੍ਛਿਨ੍ਨਕਾਲਾ ਯਥਾਸੁਖਂ ਪਰਿਭੋਗਤ੍ਥਾਯ ਕਤਿਕਾ. ਨਿਕ੍ਕੁਕ੍ਕੁਚ੍ਚੇਨਾਤਿ ‘‘ਅਭਾਜਿਤਮਿਦ’’ਨ੍ਤਿ ਕੁਕ੍ਕੁਚ੍ਚਂ ਅਕਤ੍ਵਾਤਿ ਅਤ੍ਥੋ. ਖੀਯਨਮਤ੍ਤਮੇਵ ਤਨ੍ਤਿ ਤੇਨ ਖੀਯਨੇਨ ਬਹੁਂ ਖਾਦਨ੍ਤਾਨਂ ਦੋਸੋ ਨਤ੍ਥਿ ਅਤ੍ਤਨੋ ਪਰਿਭੋਗਪ੍ਪਮਾਣਸ੍ਸੇਵ ਗਹਿਤਤ੍ਤਾ, ਖੀਯਨ੍ਤੇਪਿ ਅਤ੍ਤਨੋ ਪਹੋਨਕਂ ਗਹੇਤ੍ਵਾ ਖਾਦਿਤਬ੍ਬਨ੍ਤਿ ਅਧਿਪ੍ਪਾਯੋ.

ਗਣ੍ਹਥਾਤਿ ਨ ਵਤ੍ਤਬ੍ਬਾਤਿ ਤਥਾ ਵੁਤ੍ਤੇ ਤੇਨੇਵ ਭਿਕ੍ਖੁਨਾ ਦਿਨ੍ਨਂ ਵਿਯ ਮਞ੍ਞੇਯ੍ਯੁਂ. ਤਂ ਨਿਸ੍ਸਾਯ ਮਿਚ੍ਛਾਜੀਵਸਮ੍ਭਵੋ ਹੋਤੀਤਿ ਵੁਤ੍ਤਂ. ਤੇਨਾਹ ‘‘ਅਨੁਵਿਚਰਿਤ੍ਵਾ’’ਤਿਆਦਿ. ਉਪਡ੍ਢਭਾਗੋਤਿ ਏਕਸ੍ਸ ਭਿਕ੍ਖੁਨੋ ਪਟਿਵੀਸਤੋ ਉਪਡ੍ਢਭਾਗੋ, ਦੇਨ੍ਤੇਨ ਚ ‘‘ਏਤ੍ਤਕਂ ਦਾਤੁਂ ਸਙ੍ਘੋ ਅਨੁਞ੍ਞਾਸੀ’’ਤਿ ਏਵਂ ਅਤ੍ਤਾਨਂ ਪਰਿਮੋਚੇਤ੍ਵਾ ਯਥਾ ਤੇ ਸਙ੍ਘੇ ਏਵ ਪਸੀਦਨ੍ਤਿ, ਏਵਂ ਵਤ੍ਵਾ ਦਾਤਬ੍ਬਂ. ਅਪਚ੍ਚਾਸੀਸਨ੍ਤੇਨਾਤਿ ਗਿਲਾਨਗਮਿਕਿਸ੍ਸਰਾਦੀਨਂ ਅਨੁਞ੍ਞਾਤਪੁਗ੍ਗਲਾਨਮ੍ਪਿ ਅਤ੍ਤਨੋ ਸਨ੍ਤਕਂ ਦੇਨ੍ਤੇਨ ਅਪਚ੍ਚਾਸੀਸਨ੍ਤੇਨੇਵ ਦਾਤਬ੍ਬਂ. ਅਨਨੁਞ੍ਞਾਤਪੁਗ੍ਗਲਾਨਂ ਪਨ ਅਪਚ੍ਚਾਸੀਸਨ੍ਤੇਨਪਿ ਦਾਤੁਂ ਨ ਵਟ੍ਟਤੀਤਿ. ਸਙ੍ਘਿਕਮੇਵ ਯਥਾਕਤਿਕਾਯ ਦਾਪੇਤਬ੍ਬਂ. ਅਤ੍ਤਨੋ ਸਨ੍ਤਕਮ੍ਪਿ ਪਚ੍ਚਯਦਾਯਕਾਦਯੋ ਸਯਮੇਵ ਵਿਸ੍ਸਾਸੇਨ ਗਣ੍ਹਨ੍ਤਿ, ਨ ਵਾਰੇਤਬ੍ਬਾ, ‘‘ਲਦ੍ਧਕਪ੍ਪਿਯ’’ਨ੍ਤਿ ਤੁਣ੍ਹੀ ਭਵਿਤਬ੍ਬਂ. ਪੁਬ੍ਬੇ ਵੁਤ੍ਤਮੇਵਾਤਿ ‘‘ਕੁਦ੍ਧੋ ਹਿ ਸੋ ਰੁਕ੍ਖੇਪਿ ਛਿਨ੍ਦੇਯ੍ਯਾ’’ਤਿਆਦਿਨਾ ਤੁਣ੍ਹੀਭਾਵੇ ਕਾਰਣਂ ਪੁਬ੍ਬੇ ਵੁਤ੍ਤਮੇਵ, ਤੇਹਿ ਕਤਅਨਤ੍ਥਾਭਾਵੇਪਿ ਕਾਰੁਞ੍ਞੇਨ ਤੁਣ੍ਹੀ ਭਵਿਤੁਂ ਵਟ੍ਟਤਿ, ‘‘ਗਣ੍ਹਥਾ’’ਤਿਆਦਿ ਪਨ ਵਤ੍ਤੁਂ ਨ ਵਟ੍ਟਤਿ.

ਗਰੁਭਣ੍ਡਤ੍ਤਾ…ਪੇ… ਨ ਦਾਤਬ੍ਬਨ੍ਤਿ ਜੀਵਰੁਕ੍ਖਾਨਂ ਆਰਾਮਟ੍ਠਾਨਿਯਤ੍ਤਾ ਦਾਰੂਨਞ੍ਚ ਗੇਹਸਮ੍ਭਾਰਾਨੁਪਗਤਤ੍ਤਾ ‘‘ਸਬ੍ਬਂ ਤ੍ਵਮੇਵ ਗਣ੍ਹਾਤਿ ਦਾਤੁਂ ਨ ਵਟ੍ਟਤੀ’’ਤਿ ਵੁਤ੍ਤਂ. ਅਕਤਾਵਾਸਂ ਵਾ ਕਤ੍ਵਾਤਿ ਪੁਬ੍ਬੇ ਅਵਿਜ੍ਜਮਾਨਂ ਸੇਨਾਸਨਂ ਕਤ੍ਵਾ. ਜਗ੍ਗਿਤਕਾਲੇਤਿ ਫਲਵਾਰੇ ਸਮ੍ਪਤ੍ਤੇ. ਜਗ੍ਗਨਕਾਲੇਤਿ ਜਗ੍ਗਿਤੁਂ ਆਰਦ੍ਧਕਾਲੇ.

੨੫੬. ਞਤ੍ਤਿਕਮ੍ਮਟ੍ਠਾਨਭੇਦੇਤਿ ਞਤ੍ਤਿਕਮ੍ਮਸ੍ਸ ਠਾਨਭੇਦੇ.

ਇਤਿ ਵਿਨਯਸਙ੍ਗਹਸਂਵਣ੍ਣਨਾਭੂਤੇ ਵਿਨਯਾਲਙ੍ਕਾਰੇ

ਕਮ੍ਮਾਕਮ੍ਮਵਿਨਿਚ੍ਛਯਕਥਾਲਙ੍ਕਾਰੋ ਨਾਮ

ਤੇਤ੍ਤਿਂਸਤਿਮੋ ਪਰਿਚ੍ਛੇਦੋ.