੩੨. ਗਰੁਕਾਪਤ੍ਤਿਵੁਟ੍ਠਾਨਵਿਨਿਚ੍ਛਯਕਥਾ

ਪਟਿਚ੍ਛਨ੍ਨਪਰਿਵਾਸਕਥਾ

੨੩੬. ਏਵਂ ਚੋਦਨਾਦਿਵਿਨਿਚ੍ਛਯਂ ਕਥੇਤ੍ਵਾ ਇਦਾਨਿ ਗਰੁਕਾਪਤ੍ਤਿਵੁਟ੍ਠਾਨਵਿਨਿਚ੍ਛਯਂ ਕਥੇਤੁਂ ‘‘ਗਰੁਕਾਪਤ੍ਤਿਵੁਟ੍ਠਾਨ’’ਨ੍ਤਿਆਦਿਮਾਹ. ਤਤ੍ਥ ਗਰੁ ਅਲਹੁਕਂ ਪਟਿਕਰਣਂ ਏਤਿਸ੍ਸਾ ਆਪਤ੍ਤਿਯਾਤਿ ਗਰੁਕਾ, ਆਪਜ੍ਜਿਤਬ੍ਬਾਤਿ ਆਪਤ੍ਤਿ, ਗਰੁਕਾ ਚ ਸਾ ਆਪਤ੍ਤਿ ਚਾਤਿ ਗਰੁਕਾਪਤ੍ਤਿ, ਵੁਟ੍ਠਹਤੇ ਵੁਟ੍ਠਾਨਂ, ਗਰੁਕਾਪਤ੍ਤਿਯਾ ਵੁਟ੍ਠਾਨਂ ਗਰੁਕਾਪਤ੍ਤਿ ਵੁਟ੍ਠਾਨਂ. ਕਿਂ ਤਂ? ਸਙ੍ਘਾਦਿਸੇਸਾਪਤ੍ਤਿਤੋ ਪਰਿਸੁਦ੍ਧਭਾਵੋ. ਤੇਨਾਹ ‘‘ਪਰਿਵਾਸਮਾਨਤ੍ਤਾਦੀਹਿ ਵਿਨਯਕਮ੍ਮੇਹਿ ਗਰੁਕਾਪਤ੍ਤਿਤੋ ਵੁਟ੍ਠਾਨ’’ਨ੍ਤਿ. ਕਿਞ੍ਚਾਪਿ ਚਤੁਬ੍ਬਿਧੋ ਪਰਿਵਾਸੋ, ਅਪ੍ਪਟਿਚ੍ਛਨ੍ਨਪਰਿਵਾਸੋ ਪਨ ਇਧ ਨਾਧਿਪ੍ਪੇਤੋਤਿ ਆਹ ‘‘ਤਿਵਿਧੋ ਪਰਿਵਾਸੋ’’ਤਿ. ਤਥਾ ਹਿ ਵੁਤ੍ਤਂ ਸਮਨ੍ਤਪਾਸਾਦਿਕਾਯਂ (ਚੂਲ਼ਵ. ਅਟ੍ਠ. ੭੫) ‘‘ਤਤ੍ਥ ਚਤੁਬ੍ਬਿਧੋ ਪਰਿਵਾਸੋ – ਅਪ੍ਪਟਿਚ੍ਛਨ੍ਨਪਰਿਵਾਸੋ ਪਟਿਚ੍ਛਨ੍ਨਪਰਿਵਾਸੋ ਸੁਦ੍ਧਨ੍ਤਪਰਿਵਾਸੋ ਸਮੋਧਾਨਪਰਿਵਾਸੋਤਿ. ਤੇਸੁ ‘ਯੋ ਸੋ, ਭਿਕ੍ਖਵੇ, ਅਞ੍ਞੋਪਿ ਅਞ੍ਞਤਿਤ੍ਥਿਯਪੁਬ੍ਬੋ ਇਮਸ੍ਮਿਂ ਧਮ੍ਮਵਿਨਯੇ ਆਕਙ੍ਖਤਿ ਪਬ੍ਬਜ੍ਜਂ, ਆਕਙ੍ਖਤਿ ਉਪਸਮ੍ਪਦਂ, ਤਸ੍ਸ ਚਤ੍ਤਾਰੋ ਮਾਸੇ ਪਰਿਵਾਸੋ ਦਾਤਬ੍ਬੋ’ਤਿ ਏਵਂ ਮਹਾਖਨ੍ਧਕੇ (ਮਹਾਵ. ੮੬) ਵੁਤ੍ਤੋ ਤਿਤ੍ਥਿਯਪਰਿਵਾਸੋ ਅਪ੍ਪਟਿਚ੍ਛਨ੍ਨਪਰਿਵਾਸੋ ਨਾਮ. ਤਤ੍ਥ ਯਂ ਵਤ੍ਤਬ੍ਬਂ, ਤਂ ਵੁਤ੍ਤਮੇਵ. ਅਯਂ ਪਨ ਇਧ ਅਨਧਿਪ੍ਪੇਤੋ’’ਤਿ. ਇਤੋ ਪਰਂ ਅਟ੍ਠਕਥਾਯਂ ਵੁਤ੍ਤਨਯੇਨੇਵ ਸੁਵਿਞ੍ਞੇਯ੍ਯੋਤਿ ਤਸ੍ਮਾ ਦੁਬ੍ਬਿਞ੍ਞੇਯ੍ਯਟ੍ਠਾਨੇਯੇਵ ਵਣ੍ਣਯਿਸ੍ਸਾਮ.

੨੩੭. ਏਵਂ ਯੋ ਯੋ ਆਪਨ੍ਨੋ ਹੋਤਿ, ਤਸ੍ਸ ਤਸ੍ਸ ਨਾਮਂ ਗਹੇਤ੍ਵਾ ਕਮ੍ਮਵਾਚਾ ਕਾਤਬ੍ਬਾਤਿ ਏਤੇਨ ਪਾਲ਼ਿਯਂ ਸਬ੍ਬਸਾਧਾਰਣਵਸੇਨ ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਅਯਂ ਇਤ੍ਥਨ੍ਨਾਮੋ ਭਿਕ੍ਖੂ’’ਤਿ ਚ ‘‘ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ’’ਤਿ ਚ ਆਗਤੇਪਿ ਕਮ੍ਮਵਾਚਾਭਣਨਕਾਲੇ ਤਥਾ ਅਭਣਿਤ੍ਵਾ ‘‘ਅਯਂ ਬੁਦ੍ਧਰਕ੍ਖਿਤੋ ਭਿਕ੍ਖੂ’’ਤਿ ਚ ‘‘ਇਮਸ੍ਸ ਬੁਦ੍ਧਰਕ੍ਖਿਤਸ੍ਸ ਭਿਕ੍ਖੁਨੋ’’ਤਿ ਚ ਏਵਂ ਸਕਸਕਨਾਮਂ ਉਦ੍ਧਰਿਤ੍ਵਾਵ ਕਮ੍ਮਵਾਚਾ ਕਾਤਬ੍ਬਾਤਿ ਦਸ੍ਸੇਤਿ.

ਮਾਲ਼ਕਸੀਮਾਯਮੇਵ ਵਤ੍ਤਂ ਸਮਾਦਾਤਬ੍ਬਂ, ਨ ਤਤੋ ਬਹਿ. ਕਸ੍ਮਾ? ‘‘ਅਞ੍ਞਤ੍ਥ ਕਮ੍ਮਵਾਚਾ ਅਞ੍ਞਤ੍ਥ ਸਮਾਦਾਨ’’ਨ੍ਤਿ ਵਤ੍ਤਬ੍ਬਦੋਸਪ੍ਪਸਙ੍ਗਤੋ. ਅਸਮਾਦਿਨ੍ਨਵਤ੍ਤਸ੍ਸ ਆਰੋਚਨਾਸਮ੍ਭਵਤੋ, ਮਾਲ਼ਕਸੀਮਾਯ ਸਨ੍ਨਿਪਤਿਤਾਨਂ ਭਿਕ੍ਖੂਨਂ ਏਕਸ੍ਸਪਿ ਅਨਾਰੋਚਨੇ ਸਤਿ ਰਤ੍ਤਿਚ੍ਛੇਦਸਮ੍ਭਵਤੋ ਚ. ਪਰਿਵਾਸਂ ਸਮਾਦਿਯਾਮਿ, ਵਤ੍ਤਂ ਸਮਾਦਿਯਾਮੀਤਿ ਇਮੇਸੁ ਦ੍ਵੀਸੁ ਪਦੇਸੁ ਏਕੇਕੇਨ ਵਾ ਉਭੋਹਿ ਪਦੇਹਿ ਵਾ ਸਮਾਦਾਤਬ੍ਬਂ. ਕਥਂ ਵਿਞ੍ਞਾਯਤੀਤਿ ਚੇ? ‘‘ਏਕਪਦੇਨਪਿ ਚੇਤ੍ਥ ਨਿਕ੍ਖਿਤ੍ਤੋ ਹੋਤਿ ਪਰਿਵਾਸੋ, ਦ੍ਵੀਹਿ ਪਨ ਸੁਨਿਕ੍ਖਿਤ੍ਤੋਯੇਵ, ਸਮਾਦਾਨੇਪਿ ਏਸੇਵ ਨਯੋ’’ਤਿ ਵਕ੍ਖਮਾਨਤ੍ਤਾ. ਸਮਾਦਿਯਿਤ੍ਵਾ ਤਤ੍ਥੇਵ ਸਙ੍ਘਸ੍ਸ ਆਰੋਚੇਤਬ੍ਬਂ, ਨ ਤਤ੍ਥ ਅਨਾਰੋਚੇਤ੍ਵਾ ਅਞ੍ਞਤ੍ਥ ਗਨ੍ਤਬ੍ਬਂ. ਕਸ੍ਮਾ? ਵੁਟ੍ਠਿਤਾਯ ਪਰਿਸਾਯ ਪੁਨ ਸਨ੍ਨਿਪਾਤੇਤੁਂ ਦੁਕ੍ਕਰਤ੍ਤਾ, ਏਕਸ੍ਸਪਿ ਭਿਕ੍ਖੁਨੋ ਅਨਾਰੋਚੇਤ੍ਵਾ ਅਰੁਣੁਟ੍ਠਾਪਨੇ ਸਤਿ ਰਤ੍ਤਿਚ੍ਛੇਦਕਰਤ੍ਤਾ.

ਆਰੋਚੇਨ੍ਤੇਨ ਏਵਂ ਆਰੋਚੇਤਬ੍ਬਨ੍ਤਿ ਸਮ੍ਬਨ੍ਧੋ. ‘‘ਅਹਂ ਭਨ੍ਤੇ…ਪੇ… ਸਙ੍ਘੋ ਧਾਰੇਤੂ’’ਤਿ ਏਤ੍ਤਕਮੇਵ ਵਤ੍ਵਾ ਯਾਚਨੇ ਵਿਯ ‘‘ਦੁਤਿਯਮ੍ਪਿ ਤਤਿਯਮ੍ਪੀ’’ਤਿ ਅਵੁਤ੍ਤਤ੍ਤਾ ਅਚ੍ਚਾਯਿਕਕਰਣੇ ਸਤਿ ਏਕਵਾਰਂ ਆਰੋਚਿਤੇਪਿ ਉਪਪਨ੍ਨਮੇਵਾਤਿ ਦਟ੍ਠਬ੍ਬਂ. ਵੇਦਿਯਾਮਹਂ ਭਨ੍ਤੇ, ਵੇਦਿਯਤੀਤਿ ਮਂ ਸਙ੍ਘੋ ਧਾਰੇਤੂਤਿ ਏਤ੍ਥ ‘‘ਵੇਦਿਯਾਮੀਤਿ ਚਿਤ੍ਤੇਨ ਸਮ੍ਪਟਿਚ੍ਛਿਤ੍ਵਾ ਸੁਖਂ ਅਨੁਭਵਾਮਿ, ਨ ਤਪ੍ਪਚ੍ਚਯਾ ਅਹਂ ਦੁਕ੍ਖਿਤੋਤਿ ਅਧਿਪ੍ਪਾਯੋ’’ਤਿ ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ਚੂਲ਼ਵਗ੍ਗ ੩.੯੭) ਵੁਤ੍ਤਂ. ਏਤ੍ਥ ਚ ‘‘ਸੁਖਂ ਵੇਦੇਮਿ ਵੇਦਨ’’ਨ੍ਤਿਆਦੀਸੁ ਵਿਯ ਪਿ-ਸਦ੍ਦੋ ਅਨੁਭਵਨਤ੍ਥੋ ਹੋਤਿ. ਵਜਿਰਬੁਦ੍ਧਿਟੀਕਾਯਂ (ਵਜਿਰ. ਟੀ. ਚੂਲ਼ਵਗ੍ਗ ੯੭) ਪਨ ‘‘ਵੇਦਿਯਾਮੀਤਿ ਜਾਨੇਮਿ, ਚਿਤ੍ਤੇਨ ਸਮ੍ਪਟਿਚ੍ਛਿਤ੍ਵਾ ਸੁਖਂ ਅਨੁਭਵਾਮਿ, ਨ ਤਪ੍ਪਚ੍ਚਯਾ ਅਹਂ ਦੁਕ੍ਖਿਤੋਤਿ ਅਧਿਪ੍ਪਾਯੋਤਿ ਲਿਖਿਤ’’ਨ੍ਤਿ ਵੁਤ੍ਤਂ. ਏਤ੍ਥ ਪਨ ‘‘ਦੀਪਙ੍ਕਰੋ ਲੋਕਵਿਦੂ’’ਤਿਆਦੀਸੁ ਵਿਯ ਞਾਣਤ੍ਥੋ ਅਨੁਭਵਨਤ੍ਥੋ ਚ. ਵਿਮਤਿਵਿਨੋਦਨਿਯਂ (ਵਿ. ਵਿ. ਟੀ. ਚੂਲ਼ਵਗ੍ਗ ੨.੯੭) ਪਨ ‘‘ਵੇਦਿਯਾਮਹਨ੍ਤਿ ਜਾਨਾਪੇਮਹਂ, ਆਰੋਚੇਮੀਤਿ ਅਤ੍ਥੋ, ਅਨੁਭਵਾਮੀਤਿਪਿਸ੍ਸ ਅਤ੍ਥਂ ਵਦਨ੍ਤਿ. ਪੁਰਿਮਂ ਪਨ ਪਸਂਸਨ੍ਤਿ ਆਰੋਚਨਵਚਨਤ੍ਤਾ’’ਤਿ. ਏਤ੍ਥ ਤੁ –

‘‘ਸਮ੍ਪਨ੍ਨਂ ਸਾਲਿਕੇਦਾਰਂ, ਸੁਵਾ ਖਾਦਨ੍ਤਿ ਬ੍ਰਾਹ੍ਮਣ;

ਪਟਿਵੇਦੇਮਿ ਤੇ ਬ੍ਰਹ੍ਮੇ, ਨ ਨਂ ਵਾਰੇਤੁਮੁਸ੍ਸਹੇ’’ਤਿ. –

ਆਦੀਸੁ ਵਿਯ ਆਰੋਚਨਤ੍ਥੋਤਿ ਦਟ੍ਠਬ੍ਬੋ.

ਆਰੋਚੇਤ੍ਵਾ…ਪੇ… ਨਿਕ੍ਖਿਪਿਤਬ੍ਬਨ੍ਤਿ ਦੁਕ੍ਕਟਪਰਿਮੋਚਨਤ੍ਥਂ ਵੁਤ੍ਤਂ. ਕੇਚਿ ਪਨ ‘‘ਤਦਹੇਵ ਪੁਨ ਵਤ੍ਤਂ ਸਮਾਦਿਯਿਤ੍ਵਾ ਅਰੁਣਂ ਉਟ੍ਠਾਪੇਤੁਕਾਮਸ੍ਸ ਰਤ੍ਤਿਚ੍ਛੇਦਪਰਿਹਾਰਤ੍ਥਮ੍ਪੀ’’ਤਿ ਵਦਨ੍ਤਿ. ਯਸ੍ਸ ਮਾਲ਼ਕੇ ਨਾਰੋਚਿਤਂ, ਤਸ੍ਸ ਆਰੋਚੇਤ੍ਵਾ ਨਿਕ੍ਖਿਪਿਤਬ੍ਬਂ. ਯਸ੍ਸ ਆਰੋਚਿਤਂ, ਤਸ੍ਸ ਪੁਨ ਆਰੋਚਨਕਿਚ੍ਚਂ ਨਤ੍ਥਿ, ਕੇਵਲਂ ਨਿਕ੍ਖਿਪਿਤਬ੍ਬਮੇਵ. ‘‘ਸਭਾਗਾ ਭਿਕ੍ਖੂ ਵਸਨ੍ਤੀ’’ਤਿ ਵੁਤ੍ਤਤ੍ਤਾ ਵਿਸਭਾਗਾਨਂ ਵਸਨਟ੍ਠਾਨੇ ਵਤ੍ਤਂ ਅਸਮਾਦਿਯਿਤ੍ਵਾ ਬਹਿ ਏਵ ਕਾਤੁਮ੍ਪਿ ਵਟ੍ਟਤੀਤਿ ਦਟ੍ਠਬ੍ਬਂ. ਦ੍ਵੇ ਲੇਡ੍ਡੁਪਾਤੇ ਅਤਿਕ੍ਕਮਿਤ੍ਵਾਤਿ ਇਦਂ ਵਿਹਾਰੇ ਭਿਕ੍ਖੂਨਂ ਸਜ੍ਝਾਯਾਦਿਸਦ੍ਦਸਵਨੂਪਚਾਰਵਿਜਹਨਤ੍ਥਂ ਵੁਤ੍ਤਂ, ਮਹਾਮਗ੍ਗਤੋ ਓਕ੍ਕਮ੍ਮਾਤਿ ਇਦਂ ਮਗ੍ਗਪਟਿਪਨ੍ਨਾਨਂ ਭਿਕ੍ਖੂਨਂ ਸਵਨੂਪਚਾਰਾਤਿਕ੍ਕਮਨਤ੍ਥਂ, ਗੁਮ੍ਬੇਨ ਵਾਤਿਆਦਿ ਦਸ੍ਸਨੂਪਚਾਰਵਿਜਹਨਤ੍ਥਂ. ਸੋਪਿ ਕੇਨਚਿ ਕਮ੍ਮੇਨ ਪੁਰੇਅਰੁਣੇ ਏਵ ਗਚ੍ਛਤੀਤਿ ਇਮਿਨਾ ਆਰੋਚਨਾਯ ਕਤਾਯ ਸਬ੍ਬੇਸੁ ਭਿਕ੍ਖੂਸੁ ਬਹਿਵਿਹਾਰਂ ਗਤੇਸੁਪਿ ਊਨੇਗਣੇਚਰਣਦੋਸੋ ਵਾ ਵਿਪ੍ਪਵਾਸਦੋਸੋ ਵਾ ਨ ਹੋਤਿ ਆਰੋਚਨਤ੍ਥਤ੍ਤਾ ਸਹਵਾਸਸ੍ਸਾਤਿ ਦਸ੍ਸੇਤਿ. ਤੇਨਾਹ ‘‘ਅਯਞ੍ਚਾ’’ਤਿਆਦਿ. ਅਨਿਕ੍ਖਿਤ੍ਤਵਤ੍ਤੇਨ ਅਨ੍ਤੋਉਪਚਾਰਗਤਾਨਂ ਸਬ੍ਬੇਸਮ੍ਪਿ ਆਰੋਚੇਤਬ੍ਬਾ. ‘‘ਅਯਂ ਨਿਕ੍ਖਿਤ੍ਤਵਤ੍ਤਸ੍ਸ ਪਰਿਹਾਰੋ’’ਤਿ ਵੁਤ੍ਤਂ, ਤਤ੍ਥ ਨਿਕ੍ਖਿਤ੍ਤਵਤ੍ਤਸ੍ਸਾਤਿ ਵਤ੍ਤਂ ਨਿਕ੍ਖਿਪਿਤ੍ਵਾ ਪਰਿਵਸਨ੍ਤਸ੍ਸਾਤਿ ਅਤ੍ਥੋ. ਅਯਂ ਪਨੇਤ੍ਥ ਥੇਰਸ੍ਸ ਅਧਿਪ੍ਪਾਯੋ – ਵਤ੍ਤਂ ਨਿਕ੍ਖਿਪਿਤ੍ਵਾ ਪਰਿਵਸਨ੍ਤਸ੍ਸ ਉਪਚਾਰਗਤਾਨਂ ਸਬ੍ਬੇਸਂ ਆਰੋਚਨਕਿਚ੍ਚਂ ਨਤ੍ਥਿ, ਦਿਟ੍ਠਰੂਪਾਨਂ ਸੁਤਸਦ੍ਦਾਨਂ ਆਰੋਚੇਤਬ੍ਬਂ, ਅਦਿਟ੍ਠਅਸੁਤਾਨਮ੍ਪਿ ਅਨ੍ਤੋਦ੍ਵਾਦਸਹਤ੍ਥਗਤਾਨਂ ਆਰੋਚੇਤਬ੍ਬਂ. ਇਦਂ ਵਤ੍ਤਂ ਨਿਕ੍ਖਿਪਿਤ੍ਵਾ ਪਰਿਵਸਨ੍ਤਸ੍ਸ ਲਕ੍ਖਣਨ੍ਤਿ. ਥੇਰਸ੍ਸਾਤਿ ਮਹਾਪਦੁਮਤ੍ਥੇਰਸ੍ਸ.

੨੩੮. ਕੁਕ੍ਕੁਚ੍ਚਵਿਨੋਦਨਤ੍ਥਾਯਾਤਿ ਇਮੇਸੁ ਪਟਿਚ੍ਛਨ੍ਨਦਿਵਸਪ੍ਪਮਾਣੇਨ ਪਰਿਵਸਿਤਦਿਵਸੇਸੁ ‘‘ਸਿਯੁਂ ਨੁ ਖੋ ਤਿਵਿਧਰਤ੍ਤਿਚ੍ਛੇਦਕਾਰਣਯੁਤ੍ਤਾਨਿ ਕਾਨਿਚਿ ਦਿਵਸਾਨਿ, ਏਵਂ ਸਤਿ ਅਪਰਿਪੁਣ੍ਣਪਰਿਵਾਸਦਿਵਸਤ੍ਤਾ ਨ ਮਾਨਤ੍ਤਾਰਹੋ ਭਵੇਯ੍ਯ, ਅਸਤਿ ਚ ਮਾਨਤ੍ਤਾਰਹਭਾਵੇ ਮਾਨਤ੍ਤਂ ਦਿਨ੍ਨਮ੍ਪਿ ਅਦਿਨ੍ਨਂਯੇਵ ਭਵੇਯ੍ਯ, ਏਵਞ੍ਚ ਸਤਿ ਆਪਨ੍ਨਾਪਤ੍ਤਿਤੋ ਵੁਟ੍ਠਾਨਂ ਨ ਭਵੇਯ੍ਯਾ’’ਤਿ ਇਮਸ੍ਸ ਵਿਨਯਕੁਕ੍ਕੁਚ੍ਚਸ੍ਸ ਵਿਨੋਦਨਤ੍ਥਾਯ. ਏਕੇਨ ਵਾ ਦ੍ਵੀਹਿ ਵਾ ਤੀਹਿ ਵਾ ਦਿਵਸੇਹਿ ਅਧਿਕਤਰਾਨਿ ਦਿਵਸਾਨਿ ਪਰਿਵਸਿਤ੍ਵਾ ਨਨੁ ਚਾਯਂ ਪਰਿਵੁਤ੍ਥਪਰਿਵਾਸੋ, ਤਸ੍ਮਾਨੇਨ ਮਾਨਤ੍ਤਮੇਵ ਯਾਚਿਤਬ੍ਬਂ, ਅਥ ਕਸ੍ਮਾ ਵਤ੍ਤਂ ਸਮਾਦਿਯਿਤ੍ਵਾ ਮਾਨਤ੍ਤਂ ਯਾਚਿਤਬ੍ਬਨ੍ਤਿ ਆਹਾਤਿ ਚੋਦਨਂ ਮਨਸਿ ਕਰੋਨ੍ਤੇਨ ਵੁਤ੍ਤਂ ‘‘ਅਯਞ੍ਹਿ ਵਤ੍ਤੇ ਸਮਾਦਿਨ੍ਨੇ’’ਤਿਆਦਿ. ਹਿ ਯਸ੍ਮਾ ਅਯਂ ਭਿਕ੍ਖੁ ਵਤ੍ਤੇ ਸਮਾਦਿਨ੍ਨੇ ਏਵ ਮਾਨਤ੍ਤਾਰਹੋ ਹੋਤਿ, ਨ ਅਸਮਾਦਿਨ੍ਨੇ, ਇਤਿ ਤਸ੍ਮਾ ਵਤ੍ਤਂ ਸਮਾਦਿਯਿਤ੍ਵਾ ਮਾਨਤ੍ਤਂ ਯਾਚਿਤਬ੍ਬਨ੍ਤਿ ਸਮ੍ਬਨ੍ਧੋ. ਨਨੁ ਚ ਕਮ੍ਮਵਾਚਾਯਂ ‘‘ਸੋ ਪਰਿਵੁਤ੍ਥਪਰਿਵਾਸੋ ਸਙ੍ਘਂ ਮਾਨਤ੍ਤਂ ਯਾਚਤਿ’’ਇਚ੍ਚੇਵ ਵੁਤ੍ਤਂ, ਨ ਵੁਤ੍ਤਂ ‘‘ਸਮਾਦਿਨ੍ਨਵਤ੍ਤੋ’’ਤਿ, ਅਥ ਕਸ੍ਮਾ ‘‘ਵਤ੍ਤੇ ਸਮਾਦਿਨ੍ਨੇ ਏਵ ਮਾਨਤ੍ਤਾਰਹੋ ਹੋਤੀ’’ਤਿ ਵੁਤ੍ਤਨ੍ਤਿ ਚੋਦਨਂ ਸਨ੍ਧਾਯਾਹ ‘‘ਨਿਕ੍ਖਿਤ੍ਤਵਤ੍ਤੇਨ ਪਰਿਵੁਤ੍ਥਤ੍ਤਾ’’ਤਿ. ਯਸ੍ਮਾ ਅਯਂ ਭਿਕ੍ਖੁ ਨਿਕ੍ਖਿਤ੍ਤਵਤ੍ਤੇਨ ਹੁਤ੍ਵਾ ਪਰਿਵੁਤ੍ਥੋ ਹੋਤਿ, ਨੋ ਅਨਿਕ੍ਖਿਤ੍ਤਵਤ੍ਤੇਨ, ਤਸ੍ਮਾ ਨਿਕ੍ਖਿਤ੍ਤਵਤ੍ਤੇਨ ਹੁਤ੍ਵਾ ਪਰਿਵੁਤ੍ਥਤ੍ਤਾ ਅਯਂ ਭਿਕ੍ਖੁ ਵਤ੍ਤੇ ਸਮਾਦਿਨ੍ਨੇ ਏਵ ਮਾਨਤ੍ਤਾਰਹੋ ਹੋਤਿ, ਨੋ ਅਸਮਾਦਿਨ੍ਨੇਤਿ ਯੋਜਨਾ. ਤਥਾ ਹਿ ਵੁਤ੍ਤਂ ‘‘ਅਨਿਕ੍ਖਿਤ੍ਤਵਤ੍ਤਸ੍ਸ ਪਨ ਪੁਨ ਸਮਾਦਾਨਕਿਚ੍ਚਂ ਨਤ੍ਥਿ. ਸੋ ਹਿ ਪਟਿਚ੍ਛਨ੍ਨਦਿਵਸਾਤਿਕ੍ਕਮੇਨੇਵ ਮਾਨਤ੍ਤਾਰਹੋ ਹੋਤਿ, ਤਸ੍ਮਾ ਤਸ੍ਸ ਮਾਨਤ੍ਤਂ ਦਾਤਬ੍ਬਮੇਵਾ’’ਤਿ.

ਚਤੂਹਿ ਪਞ੍ਚਹਿ ਵਾ ਭਿਕ੍ਖੂਹਿ ਸਦ੍ਧਿਨ੍ਤਿ ਊਨੇਗਣੇਚਰਣਦੋਸਾ ਵਿਮੁਚ੍ਚਨਤ੍ਥਂ. ਪਰਿਕ੍ਖਿਤ੍ਤਸ੍ਸ ਵਿਹਾਰਸ੍ਸ ਪਰਿਕ੍ਖੇਪਤੋਤਿਆਦਿ ਕਿਞ੍ਚਾਪਿ ਪਾਲ਼ਿਯਂ ਨਤ੍ਥਿ, ਅਥ ਖੋ ਅਟ੍ਠਕਥਾਚਰਿਯਾਨਂ ਵਚਨੇਨ ਤਥਾ ਏਵ ਪਟਿਪਜ੍ਜਿਤਬ੍ਬਨ੍ਤਿ ਚ ਵੁਤ੍ਤਂ. ‘‘ਅਤ੍ਥਿਭਾਵਂ ਸਲ੍ਲਕ੍ਖੇਤ੍ਵਾਤਿ ਦ੍ਵਾਦਸਹਤ੍ਥੇ ਉਪਚਾਰੇ ਸਲ੍ਲਕ੍ਖੇਤ੍ਵਾ, ਅਨਿਕ੍ਖਿਤ੍ਤਵਤ੍ਤਾਨਂ ਉਪਚਾਰਸੀਮਾਯ ਆਗਤਭਾਵਂ ਸਲ੍ਲਕ੍ਖੇਤ੍ਵਾ ਸਹਵਾਸਾਦਿਕਂ ਵੇਦਿਤਬ੍ਬਨ੍ਤਿ ਚ ਵੁਤ੍ਤਂ. ‘ਨਿਕ੍ਖਿਪਨ੍ਤੇਨ ਆਰੋਚੇਤ੍ਵਾ ਨਿਕ੍ਖਿਪਿਤਬ੍ਬਂ ਪਯੋਜਨਂ ਅਤ੍ਥੀ’ਤਿ ਚ ਵੁਤ੍ਤਂ, ਨ ਪਨ ਤਂ ਪਯੋਜਨਂ ਦਸ੍ਸਿਤ’’ਨ੍ਤਿ ਵਜਿਰਬੁਦ੍ਧਿਟੀਕਾਯਂ (ਵਜਿਰ. ਟੀ. ਚੂਲ਼ਵਗ੍ਗ ੯੭) ਵੁਤ੍ਤਂ, ਵਤ੍ਤਭੇਦਦੁਕ੍ਕਟਾ ਮੁਚ੍ਚਨਪਯੋਜਨਂ ਹੋਤੀਤਿ ਵੇਦਿਤਬ੍ਬਂ.

੨੩੯. ਅਬ੍ਭਾਨਂ ਕਾਤੁਂ ਨ ਵਟ੍ਟਤੀਤਿ ਕਤਮ੍ਪਿ ਅਕਤਮੇਵ ਹੋਤੀਤਿ ਅਤ੍ਥੋ. ‘‘ਤੇਨਾਪਿ ਵਤ੍ਤਂ ਸਮਾਦਿਯਿਤ੍ਵਾ ਆਰੋਚੇਤ੍ਵਾ ਅਬ੍ਭਾਨਂ ਯਾਚਿਤਬ੍ਬ’’ਨ੍ਤਿ ਵੁਤ੍ਤਤ੍ਤਾ ਅਬ੍ਭਾਨਯਾਚਨਤ੍ਥਂ ਮਾਨਤ੍ਤਸ੍ਸ ਸਮਾਦਿਯਨਕਾਲੇਪਿ ਆਰੋਚੇਤਬ੍ਬਮੇਵ. ਪੁਬ੍ਬੇ ਮਾਨਤ੍ਤਚਾਰਿਤਕਾਲੇ ਆਰੋਚਿਤਮੇਵਾਤਿ ਅਨਾਰੋਚੇਤ੍ਵਾ ਅਬ੍ਭਾਨਂ ਨ ਯਾਚਿਤਬ੍ਬਨ੍ਤਿ ਵਿਞ੍ਞਾਯਤਿ. ਏਵਂ ਮਾਨਤ੍ਤਯਾਚਨਕਾਲੇਪਿ ਪਰਿਵਾਸਂ ਸਮਾਦਿਯਿਤ੍ਵਾ ਆਰੋਚੇਤਬ੍ਬਮੇਵਾਤਿ ਦਟ੍ਠਬ੍ਬਂ.

੨੪੦. ਚਿਣ੍ਣਮਾਨਤ੍ਤੋ ਭਿਕ੍ਖੁ ਅਬ੍ਭੇਤਬ੍ਬੋਤਿ ਚਿਣ੍ਣਮਾਨਤ੍ਤਸ੍ਸ ਚ ਅਬ੍ਭਾਨਾਰਹਸ੍ਸ ਚ ਨਿਨ੍ਨਾਨਾਕਰਣਤ੍ਤਾ ਵੁਤ੍ਤਂ. ਅਞ੍ਞਥਾ ‘‘ਅਬ੍ਭਾਨਾਰਹੋ ਅਬ੍ਭੇਤਬ੍ਬੋ’’ਤਿ ਵਤ੍ਤਬ੍ਬਂ ਸਿਯਾ. ਉਕ੍ਖੇਪਨੀਯਕਮ੍ਮਕਤੋਪਿ ਅਤ੍ਤਨੋ ਲਦ੍ਧਿਗ੍ਗਹਣਵਸੇਨ ਸਭਾਗਭਿਕ੍ਖੁਮ੍ਹਿ ਸਤਿ ਤਸ੍ਸ ਅਨਾਰੋਚਾਪੇਤੁਂ ਨ ਲਭਤਿ.

‘‘ਅਨਨ੍ਤਰਾਯਿਕਸ੍ਸ ਪਨ ਅਨ੍ਤਰਾਯਿਕਸਞ੍ਞਾਯ ਛਾਦਯਤੋ ਅਚ੍ਛਨ੍ਨਾਵਾ’’ਤਿ ਪਾਠੋ. ਅਵੇਰਿਭਾਵੇਨ ਸਭਾਗੋ ਅਵੇਰਿਸਭਾਗੋ. ‘‘ਸਭਾਗਸਙ੍ਘਾਦਿਸੇਸਂ ਆਪਨ੍ਨਸ੍ਸ ਪਨ ਸਨ੍ਤਿਕੇ ਆਵਿ ਕਾਤੁਂ ਨ ਵਟ੍ਟਤੀ’’ਤਿ ਪਸਙ੍ਗਤੋ ਇਧੇਵ ਪਕਾਸਿਤਂ. ਲਹੁਕੇਸੁ ਪਟਿਕ੍ਖੇਪੋ ਨਤ੍ਥਿ. ਤਤ੍ਥ ਞਤ੍ਤਿਯਾ ਆਵਿ ਕਤ੍ਵਾ ਉਪੋਸਥਂ ਕਾਤੁਂ ਅਨੁਞ੍ਞਾਤਤ੍ਤਾ ਲਹੁਕਸਭਾਗਂ ਆਵਿ ਕਾਤੁਂ ਵਟ੍ਟਤੀਤਿ. ਸਭਾਗਸਙ੍ਘਾਦਿਸੇਸਂ ਪਨ ਞਤ੍ਤਿਯਾ ਆਰੋਚਨਂ ਨ ਵਟ੍ਟਤੀਤਿ ਕਿਰ. ‘‘ਤਸ੍ਸ ਸਨ੍ਤਿਕੇ ਤਂ ਆਪਤ੍ਤਿਂ ਪਟਿਕਰਿਸ੍ਸਤੀਤਿ (ਮਹਾਵ. ੧੭੧) ਵੁਤ੍ਤਤ੍ਤਾ ਲਹੁਕਸ੍ਸੇਵਾਯਂ ਸਮਨੁਞ੍ਞਾਤਾ. ਨ ਹਿ ਸਕ੍ਕਾ ਸੁਦ੍ਧਸ੍ਸ ਏਕਸ੍ਸ ਸਨ੍ਤਿਕੇ ਸਙ੍ਘਾਦਿਸੇਸਸ੍ਸ ਪਟਿਕਰਣਂ ਕਾਤੁ’’ਨ੍ਤਿ ਲਿਖਿਤਂ. ਲਹੁਕੇਸੁਪਿ ਸਭਾਗਂ ਆਵਿ ਕਾਤੁਂ ਨ ਵਟ੍ਟਤੀਤਿ. ਤਸ੍ਮਾ ਏਵ ਹਿ ਞਤ੍ਤਿਯਾ ਆਵਿਕਰਣਂ ਅਨੁਞ੍ਞਾਤਂ, ਇਤਰਥਾ ਤਂ ਨਿਰਤ੍ਥਕਂ ਸਿਯਾ. ਅਞ੍ਞਮਞ੍ਞਾਰੋਚਨਸ੍ਸ ਵਟ੍ਟਤਿ, ਤਤੋ ਨ ਵਟ੍ਟਤੀਤਿ ਦੀਪਨਤ੍ਥਮੇਵ ਞਤ੍ਤਿਯਾ ਆਵਿਕਰਣਮਨੁਞ੍ਞਾਤਂ, ਤੇਨੇਵ ਇਧ ‘‘ਸਭਾਗਸਙ੍ਘਾਦਿਸੇਸਂ ਆਪਨ੍ਨਸ੍ਸਾ’’ਤਿਆਦਿ ਵੁਤ੍ਤਂ, ਅਯਮਤ੍ਥੋ ‘‘ਏਤ੍ਤਾਵਤਾ ਤੇ ਦ੍ਵੇ ਨਿਰਾਪਤ੍ਤਿਕਾ ਹੋਨ੍ਤਿ, ਤੇਸਂ ਸਨ੍ਤਿਕੇ ਸੇਸੇਹਿ ਸਭਾਗਾਪਤ੍ਤਿਯੋ ਦੇਸੇਤਬ੍ਬਾ’’ਤਿ ਵਚਨੇਨ ਕਙ੍ਖਾਵਿਤਰਣਿਯਮ੍ਪਿ (ਕਙ੍ਖਾ. ਅਟ੍ਠ. ਨਿਦਾਨਵਣ੍ਣਨਾ) ਪਕਾਸਿਤੋਵ. ਸਙ੍ਘਾਦਿਸੇਸਂ ਪਨ ਞਤ੍ਤਿਯਾ ਆਰੋਚੇਤ੍ਵਾ ਉਪੋਸਥਂ ਕਾਤੁਂ ਵਟ੍ਟਤਿ. ਤਸ੍ਸਾ ਞਤ੍ਤਿਯਾ ਅਯਮਤ੍ਥੋ – ਯਦਾ ਸੁਦ੍ਧਂ ਭਿਕ੍ਖੁਂ ਪਸ੍ਸਿਸ੍ਸਤਿ, ਤਸ੍ਸ ਸਨ੍ਤਿਕੇ ਅਞ੍ਞਮਞ੍ਞਾਰੋਚਨਵਸੇਨ ਪਟਿਕਰਿਸ੍ਸਤਿ, ਏਵਂ ਪਟਿਕਤੇ ‘‘ਨ ਚ, ਭਿਕ੍ਖਵੇ, ਸਾਪਤ੍ਤਿਕੇਨ ਪਾਤਿਮੋਕ੍ਖਂ ਸੋਤਬ੍ਬਂ, ਯੋ ਸੁਣੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੩੮੬) ਵੁਤ੍ਤਾਪਤ੍ਤਿਤੋ ਮੋਕ੍ਖੋ ਹੋਤਿ, ਤਸ੍ਮਾ ‘‘ਗਰੁਕਂ ਵਾ ਹੋਤੁ ਲਹੁਕਂ ਵਾ, ਞਤ੍ਤਿਯਾ ਆਵਿ ਕਾਤੁਂ ਵਟ੍ਟਤੀ’’ਤਿ ਵੁਤ੍ਤਂ. ਉਭੋਸੁ ਨਯੇਸੁ ਯੁਤ੍ਤਤਰਂ ਗਹੇਤਬ੍ਬਂ. ‘‘ਨਾਮਞ੍ਚੇਵ ਆਪਤ੍ਤਿ ਚਾਤਿ ਤੇਨ ਤੇਨ ਵੀਤਿਕ੍ਕਮੇਨਾਪਨ੍ਨਾਪਤ੍ਤਿ ਆਪਤ੍ਤਿ. ਨਾਮਨ੍ਤਿ ਤਸ੍ਸਾ ਆਪਤ੍ਤਿਯਾ ਨਾਮ’’ਨ੍ਤਿ ਲਿਖਿਤਂ. ਆਰੋਚੇਤ੍ਵਾ ਨਿਕ੍ਖਿਪਿਤਬ੍ਬਨ੍ਤਿ ਏਤ੍ਥ ਆਰੋਚਨਂ ਵਤ੍ਤਭੇਦਦੁਕ੍ਕਟਪਰਿਹਰਣਪ੍ਪਯੋਜਨਨ੍ਤਿ ਵੇਦਿਤਬ੍ਬਂ.

‘‘ਸਤਿਯੇਵ ਅਨ੍ਤਰਾਯੇ ਅਨ੍ਤਰਾਯਿਕਸਞ੍ਞੀ ਛਾਦੇਤਿ, ਅਚ੍ਛਨ੍ਨਾ ਹੋਤਿ. ਅਨ੍ਤਰਾਯਿਕਸ੍ਸ ਪਨ ਅਨ੍ਤਰਾਯਿਕਸਞ੍ਞਾਯ ਵਾ ਅਨਨ੍ਤਰਾਯਿਕਸਞ੍ਞਾਯ ਵਾ ਛਾਦਯਤੋ ਅਚ੍ਛਨ੍ਨਾਵਾ’’ਤਿਪਿ ਪਾਠੋ. ਅਵੇਰੀਤਿ ਹਿਤਕਾਮੋ. ਉਦ੍ਧਸ੍ਤੇ ਅਰੁਣੇਤਿ ਉਟ੍ਠਿਤੇ ਅਰੁਣੇ. ਸੁਦ੍ਧਸ੍ਸ ਸਨ੍ਤਿਕੇਤਿ ਸਭਾਗਸਙ੍ਘਾਦਿਸੇਸਂ ਅਨਾਪਨ੍ਨਸ੍ਸ ਸਨ੍ਤਿਕੇ. ਵਤ੍ਥੁਨ੍ਤਿ ਅਸੁਚਿਮੋਚਨਾਦਿਵੀਤਿਕ੍ਕਮਂ. ਸੁਕ੍ਕਵਿਸ੍ਸਟ੍ਠੀਤਿ ਵਤ੍ਥੁ ਚੇਵ ਗੋਤ੍ਤਞ੍ਚਾਤਿ ‘‘ਸੁਕ੍ਕਵਿਸ੍ਸਟ੍ਠੀ’’ਤਿ ਇਦਂ ਅਸੁਚਿਮੋਚਨਲਕ੍ਖਣਸ੍ਸ ਵੀਤਿਕ੍ਕਮਸ੍ਸ ਪਕਾਸਨਤੋ ਵਤ੍ਥੁ ਚੇਵ ਹੋਤਿ, ਸਜਾਤਿਯਸਾਧਾਰਣਵਿਜਾਤਿਯਵਿਨਿਵਤ੍ਤਸਭਾਵਾਯ ਸੁਕ੍ਕਵਿਸ੍ਸਟ੍ਠਿਯਾ ਏਵ ਪਕਾਸਨਤੋ ਗੋਤ੍ਤਞ੍ਚ ਹੋਤੀਤਿ ਅਤ੍ਥੋ. ਗਂ ਤਾਯਤੀਤਿ ਹਿ ਗੋਤ੍ਤਂ. ਸਙ੍ਘਾਦਿਸੇਸੋਤਿ ਨਾਮਞ੍ਚੇਵ ਆਪਤ੍ਤਿ ਚਾਤਿ ਸਙ੍ਘਾਦਿਸੇਸੋਤਿ ਤੇਨ ਤੇਨ ਵੀਤਿਕ੍ਕਮੇਨ ਆਪਨ੍ਨਸ੍ਸ ਆਪਤ੍ਤਿਨਿਕਾਯਸ੍ਸ ਨਾਮਪਕਾਸਨਤੋ ਨਾਮਞ੍ਚੇਵ ਹੋਤਿ, ਆਪਤ੍ਤਿਸਭਾਵਤੋ ਆਪਤ੍ਤਿ ਚ.

ਸੁਦ੍ਧਸ੍ਸਾਤਿ ਸਭਾਗਸਙ੍ਘਾਦਿਸੇਸਂ ਅਨਾਪਨ੍ਨਸ੍ਸ, ਤਤੋ ਵੁਟ੍ਠਿਤਸ੍ਸ ਵਾ. ਅਞ੍ਞਸ੍ਮਿਨ੍ਤਿ ਸੁਦ੍ਧਨ੍ਤਪਰਿਵਾਸਵਸੇਨ ਆਪਤ੍ਤਿਵੁਟ੍ਠਾਨਤੋ ਅਞ੍ਞਸ੍ਮਿਂ ਆਪਤ੍ਤਿਵੁਟ੍ਠਾਨੇ. ਪਟਿਚ੍ਛਾਦਿਯਿਤ੍ਥਾਤਿ ਪਟਿਚ੍ਛਨ੍ਨਾ. ਕਾ ਸਾ? ਆਪਤ੍ਤਿ. ਦਿਵਸਾਦੀਹਿ ਪਰਿਚ੍ਛਿਨ੍ਦਿਤ੍ਵਾ ਵਸਨਂ ਪਰਿਵਾਸੋ. ਕੋ ਸੋ? ਵਿਨਯਕਮ੍ਮਕਰਣਂ. ਪਟਿਚ੍ਛਨ੍ਨਾਯ ਆਪਤ੍ਤਿਯਾ ਪਰਿਵਾਸੋ ਪਟਿਚ੍ਛਨ੍ਨਪਰਿਵਾਸੋ.

ਪਟਿਚ੍ਛਨ੍ਨਪਰਿਵਾਸਕਥਾ ਨਿਟ੍ਠਿਤਾ.

ਸੁਦ੍ਧਨ੍ਤਪਰਿਵਾਸਕਥਾ

੨੪੨. ਸੁਜ੍ਝਨਂ ਸੁਦ੍ਧੋ, ਕੋ ਸੋ? ਆਪਤ੍ਤਿਵਿਗਮੋ. ਅਮਤਿ ਓਸਾਨਭਾਵਂ ਗਚ੍ਛਤੀਤਿ ਅਨ੍ਤੋ, ਸੁਦ੍ਧੋ ਅਨ੍ਤੋ ਯਸ੍ਸ ਪਰਿਵਾਸਸ੍ਸਾਤਿ ਸੁਦ੍ਧਨ੍ਤੋ, ਸੁਦ੍ਧਨ੍ਤੋ ਚ ਸੋ ਪਰਿਵਾਸੋ ਚਾਤਿ ਸੁਦ੍ਧਨ੍ਤਪਰਿਵਾਸੋ, ਸੁਦ੍ਧਕਾਲਂ ਪਰਿਯਨ੍ਤਂ ਕਤ੍ਵਾ ਅਸੁਦ੍ਧਕਾਲਪ੍ਪਮਾਣੇਨ ਪਰਿਚ੍ਛਿਨ੍ਦਿਤ੍ਵਾ ਕਤਪਰਿਵਾਸੋ.

ਸੁਦ੍ਧਨ੍ਤਪਰਿਵਾਸਕਥਾ ਨਿਟ੍ਠਿਤਾ.

ਓਧਾਨਸਮੋਧਾਨਪਰਿਵਾਸਕਥਾ

੨੪੩. ਸਮੋਧੀਯਤੇ ਸਮੋਧਾਨਂ, ਨਾਨਾਕਾਲਿਕਾ ਨਾਨਾਵਤ੍ਥੁਕਾ ਆਪਤ੍ਤਿਯੋ ਅਗ੍ਘਾਦਿਵਸੇਨ ਸਮੋਧਾਨਂ ਏਕੀਕਰਣਂ, ਸਮੋਧਾਨੇਤ੍ਵਾ ਕਤੋ ਪਰਿਵਾਸੋ ਸਮੋਧਾਨਪਰਿਵਾਸੋਤਿ ਵਿਗ੍ਗਹੋ. ਕਮ੍ਮਵਾਚਾਯਂ ‘‘ਪਟਿਕਸ੍ਸਿਤੋ ਸਙ੍ਘੇਨ ਇਤ੍ਥਨ੍ਨਾਮੋ ਭਿਕ੍ਖੁ ਅਨ੍ਤਰਾ ਸਮ੍ਬਹੁਲਾਨਂ ਆਪਤ੍ਤੀਨਂ ਅਪ੍ਪਟਿਚ੍ਛਨ੍ਨਾਨਂ ਮੂਲਾਯਪਟਿਕਸ੍ਸਨਾ, ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ ਏਤ੍ਥ ਗਤ੍ਯਤ੍ਥਧਾਤੁਯਾ ਕਮ੍ਮਨਿ ਚ ਨਯਨਤ੍ਥਧਾਤੁਯਾ ਕਮ੍ਮਨਿ ਚ ਤਦਤ੍ਥਸਮ੍ਪਦਾਨੇ ਚ ਵਿਭਤ੍ਤਿਪਰਿਣਾਮੇ ਚਾਤਿ ਇਮੇਸੁ ਚਤੂਸੁ ਠਾਨੇਸੁ ਆਯਾਦੇਸਸ੍ਸ ਵੁਤ੍ਤਤ੍ਤਾ, ਪਟਿਪੁਬ੍ਬਕਸਧਾਤੁਯਾ ਚ ਨਯਨਤ੍ਥਤ੍ਤਾ ‘‘ਮੂਲਾਯਾ’’ਤਿ ਇਦਂ ‘‘ਪਟਿਕਸ੍ਸਿਤੋ’’ਤਿ ਏਤ੍ਥ ਕਮ੍ਮਂ, ਤਸ੍ਮਾ ‘‘ਪਟਿਕਸ੍ਸਿਤੋ…ਪੇ… ਮੂਲਾਯ’’ ਇਤਿ ਏਤ੍ਤਕਮੇਵ ਭਵਿਤਬ੍ਬਂ, ਨ ‘‘ਮੂਲਾਯਪਟਿਕਸ੍ਸਨਾ’’ਤਿ ਏਵਂ ਮਞ੍ਞਮਾਨਾ ਸਦ੍ਦਵਿਦੁਨੋ ‘‘ਪਟਿਕਸ੍ਸਨਾ’’ਤਿ ਇਦਂ ਅਧਿਕਨ੍ਤਿ ਵਾ ਵਦੇਯ੍ਯੁਂ ਮਕ੍ਖੇਯ੍ਯੁਂ ਵਾ, ਨ ਪਨੇਤਂ ਵਤ੍ਤਬ੍ਬਂ. ਨਵਪਾਠੇਸੁਯੇਵ ਅਯਂ ਪਾਠੋ ਸਦ੍ਦਲਕ੍ਖਣਯੁਤ੍ਤੋ ਵਾ ਅਯੁਤ੍ਤੋ ਵਾਤਿ ਚਿਨ੍ਤੇਤਬ੍ਬੋ, ਨ ਪਨ ਪਾਲ਼ਿਯਟ੍ਠਕਥਾਦਿਤੋ ਆਗਤੇਸੁ ਪੋਰਾਣਪਾਠੇਸੁ. ਤੇਸੁ ਪਨ ਕਥਂ ਯੋਜਿਯਮਾਨੋ ਅਯਂ ਪਾਠੋ ਸਦ੍ਦਯੁਤ੍ਤਿਯਾ ਚ ਅਤ੍ਥਯੁਤ੍ਤਿਯਾ ਚ ਸਮਨ੍ਨਾਗਤੋ ਭਵੇਯ੍ਯਾਤਿ ਯੋਜਨਾਕਾਰੋਯੇਵ ਚਿਨ੍ਤੇਤਬ੍ਬੋ. ਅਯਞ੍ਚ ਪਾਠੋ ਪੋਰਾਣਪਾਲ਼ਿਪਾਠੋਵ, ਤਸ੍ਮਾ ‘‘ਮੂਲਾਯਪਟਿਕਸ੍ਸਨਾ’’ਤਿ ਇਦਂ ਕਰਣਵਸੇਨ ਵਿਪਰਿਣਾਮੇਤ੍ਵਾ ‘‘ਮੂਲਾਯਪਟਿਕਸ੍ਸਨਾਯ ਪਟਿਕਸ੍ਸਿਤੋ’’ਤਿ ਯੋਜੇਤਬ੍ਬਂ.

ਕਥਂ ਪਨੇਤਸ੍ਸ ਪੋਰਾਣਪਾਠਭਾਵੋ ਜਾਨਿਤਬ੍ਬੋਤਿ? ਪਕਰਣੇ ਆਗਤਤ੍ਤਾ. ਵੁਤ੍ਤਞ੍ਹਿ ਵਿਮਤਿਵਿਨੋਦਨਿਯਂ (ਵਿ. ਵਿ. ਟੀ. ਚੂਲ਼ਵਗ੍ਗ ੨.੧੦੨) ‘‘ਪਾਲ਼ਿਯਂ ਪਟਿਕਸ੍ਸਿਤੋ ਸਙ੍ਘੇਨ ਉਦਾਯਿ ਭਿਕ੍ਖੁ ਅਨ੍ਤਰਾ ਏਕਿਸ੍ਸਾ ਆਪਤ੍ਤਿਯਾ…ਪੇ… ਮੂਲਾਯਪਟਿਕਸ੍ਸਨਾਤਿ ਇਦਂ ਕਰਣਵਸੇਨ ਵਿਪਰਿਣਾਮੇਤ੍ਵਾ ਮੂਲਾਯਪਟਿਕਸ੍ਸਨਾਯ ਪਟਿਕਸ੍ਸਿਤੋਤਿ ਯੋਜੇਤਬ੍ਬ’’ਨ੍ਤਿ. ਅਥ ਵਾ ‘‘ਮੂਲਾਯ ਪਟਿਕਸ੍ਸਨਾ ਮੂਲਾਯਪਟਿਕਸ੍ਸਨਾ’’ਤਿ ਅਲੁਤ੍ਤਸਮਾਸਵਸੇਨ ਉਤ੍ਤਰਪਦੇਨ ਸਮਾਸਂ ਕਤ੍ਵਾ ਸਙ੍ਘੇਨ ਇਤ੍ਥਨ੍ਨਾਮੋ ਭਿਕ੍ਖੁ ਅਨ੍ਤਰਾ ਸਮ੍ਬਹੁਲਾਨਂ ਆਪਤ੍ਤੀਨਂ ਅਪ੍ਪਟਿਚ੍ਛਨ੍ਨਾਨਂ ਹੇਤੁ ਪਟਿਕਸ੍ਸਿਤੋ. ਸਾ ਮੂਲਾਯਪਟਿਕਸ੍ਸਨਾ ਖਮਤਿ ਸਙ੍ਘਸ੍ਸਾਤਿ ਯੋਜੇਤਬ੍ਬਂ. ਤਥਾ ਹਿ ਵੁਤ੍ਤਂ ਤਤ੍ਥੇਵ (ਵਿ. ਵਿ. ਟੀ. ਚੂਲ਼ਵਗ੍ਗ ੨.੧੦੨) ‘‘ਅਥ ਵਾ ਮੂਲਾਯਪਟਿਕਸ੍ਸਨਾ ਖਮਤਿ ਸਙ੍ਘਸ੍ਸਾਤਿ ਉਤ੍ਤਰਪਦੇਨ ਸਹ ਪਚ੍ਚਤ੍ਤਵਸੇਨੇਵ ਯੋਜੇਤੁਮ੍ਪਿ ਵਟ੍ਟਤੀ’’ਤਿ.

ਤਂ ਦੇਨ੍ਤੇਨ ਪਠਮਂ ਮੂਲਾਯ ਪਟਿਕਸ੍ਸਿਤ੍ਵਾ ਪਚ੍ਛਾਪਰਿਵਾਸੋ ਦਾਤਬ੍ਬੋਤਿ ਏਤ੍ਥ ਤਂ ਓਧਾਨਸਮੋਧਾਨਪਰਿਵਾਸਂ ਦੇਨ੍ਤੇਨ ਪਠਮਂ ਤਂ ਭਿਕ੍ਖੁਂ ਮੂਲਾਯ ਪਟਿਕਸ੍ਸਿਤ੍ਵਾ ਮੂਲਦਿਵਸੇ ਆਕਡ੍ਢਿਤ੍ਵਾ ਤਸ੍ਸ ਅਨ੍ਤਰਾਪਤ੍ਤਿਯਾ ਸਮੋਧਾਨਪਰਿਵਾਸੋ ਦਾਤਬ੍ਬੋਤਿ ਅਤ੍ਥੋ. ਯਥਾ ਕਿਂ ਵਿਮਤਿਵਿਨੋਦਨਿਯਂ (ਵਿ. ਵਿ. ਟੀ. ਚੂਲ਼ਵਗ੍ਗ ੨.੧੦੨) ‘‘ਉਦਾਯਿਂ ਭਿਕ੍ਖੁਂ ਅਨ੍ਤਰਾ ਏਕਿਸ੍ਸਾ ਆਪਤ੍ਤਿਯਾ…ਪੇ… ਮੂਲਾਯ ਪਟਿਕਸ੍ਸਿਤ੍ਵਾਤਿ ਏਤ੍ਥ ਅਨ੍ਤਰਾ ਏਕਿਸ੍ਸਾ ਆਪਤ੍ਤਿਯਾ ਹੇਤੁਭੂਤਾਯ ਉਦਾਯਿਂ ਭਿਕ੍ਖੁਂ ਮੂਲਾਯ ਪਟਿਕਸ੍ਸਿਤ੍ਵਾ ਮੂਲਦਿਵਸੇ ਆਕਡ੍ਢਿਤ੍ਵਾ ਤਸ੍ਸਾ ਅਨ੍ਤਰਾਪਤ੍ਤਿਯਾ ਸਮੋਧਾਨਪਰਿਵਾਸਂ ਦੇਤੂਤਿ ਯੋਜਨਾ’’ਤਿ ਵੁਤ੍ਤਂ. ਮਹਾਸੁਮਤ੍ਥੇਰਵਾਦੇ ਆਵਿਕਾਰਾਪੇਤ੍ਵਾ ਵਿਸ੍ਸਜ੍ਜੇਤਬ੍ਬੋਤਿ ਤਸ੍ਸ ਅਤੇਕਿਚ੍ਛਭਾਵਂ ਤੇਨੇਵ ਸਙ੍ਘਸ੍ਸ ਪਾਕਟਂ ਕਾਰੇਤ੍ਵਾ ਲਜ੍ਜੀਗਣਤੋ ਵਿਯੋਜਨਵਸੇਨ ਵਿਸ੍ਸਜ੍ਜੇਤਬ੍ਬੋਤਿ ਅਤ੍ਥੋ.

ਓਧਾਨਸਮੋਧਾਨਪਰਿਵਾਸਕਥਾ ਨਿਟ੍ਠਿਤਾ.

ਅਗ੍ਘਸਮੋਧਾਨਪਰਿਵਾਸਕਥਾ

੨੪੪. ਅਗ੍ਘੇਨ ਅਗ੍ਘਵਸੇਨ ਅਰਹਵਸੇਨ ਸਮੋਧਾਨਂ ਅਗ੍ਘਸਮੋਧਾਨਂ, ਆਪਨ੍ਨਾਸੁ ਸਮ੍ਬਹੁਲਾਸੁ ਆਪਤ੍ਤੀਸੁ ਯਾ ਆਪਤ੍ਤਿਯੋ ਚਿਰਤਰਪ੍ਪਟਿਚ੍ਛਨ੍ਨਾਯੋ, ਤਾਸਂ ਅਗ੍ਘੇਨ ਸਮੋਧਾਯ ਤਾਸਂ ਰਤ੍ਤਿਪਰਿਚ੍ਛੇਦਵਸੇਨ ਅਵਸੇਸਾਨਂ ਊਨਤਰਪ੍ਪਟਿਚ੍ਛਨ੍ਨਾਨਂ ਆਪਤ੍ਤੀਨਂ ਪਰਿਵਾਸੋ ਦੀਯਤਿ, ਅਯਂ ਵੁਚ੍ਚਤਿ ਅਗ੍ਘਸਮੋਧਾਨੋ . ਸਤਂ ਆਪਤ੍ਤਿਯੋਤਿ ਕਾਯਸਂਸਗ੍ਗਾਦਿਵਸੇਨ ਏਕਦਿਵਸੇ ਆਪਨ੍ਨਾ ਸਤਂ ਆਪਤ੍ਤਿਯੋ. ਦਸਸਤਨ੍ਤਿ ਸਹਸ੍ਸਆਪਤ੍ਤਿਯੋ. ਰਤ੍ਤਿਸਤਂ ਛਾਦਯਿਤ੍ਵਾਨਾਤਿ ਯੋਜੇਤਬ੍ਬਂ. ‘‘ਅਗ੍ਘਸਮੋਧਾਨੋ ਨਾਮ ਸਭਾਗਵਤ੍ਥੁਕਾਯੋ ਸਮ੍ਬਹੁਲਾ ਆਪਤ੍ਤਿਯੋ ਆਪਨ੍ਨਸ੍ਸ ਬਹੁਰਤ੍ਤਿਂ ਪਟਿਚ੍ਛਾਦਿਤਾਪਤ੍ਤਿਯਂ ਨਿਕ੍ਖਿਪਿਤ੍ਵਾ ਦਾਤਬ੍ਬੋ, ਇਤਰੋ ਨਾਨਾਵਤ੍ਥੁਕਾਨਂ ਵਸੇਨਾਤਿ ਅਯਮੇਤੇਸਂ ਵਿਸੇਸੋ’’ਤਿ ਵਜਿਰਬੁਦ੍ਧਿਟੀਕਾਯਂ (ਵਜਿਰ. ਟੀ. ਚੂਲ਼ਵਗ੍ਗ ੧੦੨) ਵੁਤ੍ਤਂ.

ਅਗ੍ਘਸਮੋਧਾਨਪਰਿਵਾਸਕਥਾ ਨਿਟ੍ਠਿਤਾ.

੨੪੬. ਲਿਙ੍ਗਪਰਿਵਤ੍ਤਨਕਕਥਾਯਂ ਯਦਿ ਕਸ੍ਸਚਿ ਭਿਕ੍ਖੁਨੋ ਇਤ੍ਥਿਲਿਙ੍ਗਂ ਪਾਤੁ ਭਵੇਯ੍ਯ, ਕਿਂ ਤੇਨ ਪੁਨ ਉਪਜ੍ਝਾ ਗਹੇਤਬ੍ਬਾ, ਪੁਨ ਉਪਸਮ੍ਪਦਾ ਕਾਤਬ੍ਬਾ, ਕਿਂ ਭਿਕ੍ਖੂਪਸਮ੍ਪਦਾਤੋ ਪਟ੍ਠਾਯ ਵਸ੍ਸਗਣਨਾ ਕਾਤਬ੍ਬਾ, ਉਦਾਹੁ ਇਤੋ ਪਟ੍ਠਾਯਾਤਿ ਪੁਚ੍ਛਾਯ ਸਤਿ ਤਂ ਪਰਿਹਰਿਤੁਮਾਹ ‘‘ਸਚੇ’’ਤਿਆਦਿ. ਏਵਂ ਸਨ੍ਤੇ ਸਾ ਭਿਕ੍ਖੁਨੀ ਭਿਕ੍ਖੂਨਂ ਮਜ੍ਝੇਯੇਵ ਵਸਿਤਬ੍ਬਂ ਭਵੇਯ੍ਯਾਤਿ ਚੋਦਨਂ ਸਨ੍ਧਾਯਾਹ ‘‘ਅਪ੍ਪਤਿਰੂਪ’’ਨ੍ਤਿਆਦਿ. ਏਵਂ ਸਨ੍ਤੇ ਭਿਕ੍ਖੁਭੂਤਕਾਲੇ ਆਪਜ੍ਜਿਤਾਪਤ੍ਤਿਯੋ ਕਥਂ ਕਾਤਬ੍ਬਾਤਿ ਚੋਦਨਂ ਮਨਸਿ ਕਤ੍ਵਾ ਆਹ ‘‘ਯਾ ਦੇਸਨਾਗਾਮਿਨਿਯੋ ਵਾ’’ਤਿਆਦਿ. ਤਤ੍ਥ ਭਿਕ੍ਖੂਨਂ ਭਿਕ੍ਖੁਨੀਹਿ ਸਾਧਾਰਣਾਤਿ ਸਞ੍ਚਰਿਤ੍ਤਾਦਯੋ. ਅਸਾਧਾਰਣਾਤਿ ਸੁਕ੍ਕਵਿਸ੍ਸਟ੍ਠਿਆਦਯੋ. ਹੋਤੁ ਭਗਵਤੋ ਅਨੁਞ੍ਞਾਤਵਸੇਨ ਲਿਙ੍ਗੇ ਪਰਿਵਤ੍ਤੇ ਅਸਾਧਾਰਣਾਪਤ੍ਤੀਹਿ ਵੁਟ੍ਠਿਤਭਾਵੋ, ਪੁਨ ਪਕਤਿਲਿਙ੍ਗੇ ਉਪ੍ਪਨ੍ਨੇ ਪੁਨ ਆਪਤ੍ਤਿ ਸਿਯਾਤਿ ਆਸਙ੍ਕਂ ਪਰਿਹਰਿਤੁਂ ‘‘ਪੁਨ ਪਕਤਿਲਿਙ੍ਗੇ’’ਤਿਆਦਿ ਵੁਤ੍ਤਂ. ਇਦਾਨਿ ਤਮਤ੍ਥਂ ਪਾਲ਼ਿਯਾ ਸਾਧੇਤੁਂ ‘‘ਵੁਤ੍ਤਞ੍ਚੇਤ’’ਨ੍ਤਿਆਦਿਮਾਹ. ਤਸ੍ਸਤ੍ਥੋ ਪਠਮਪਾਰਾਜਿਕਵਣ੍ਣਨਾਯ ਟੀਕਾਸੁ (ਸਾਰਤ੍ਥ. ਟੀ. ੨.੬੯; ਵਜਿਰ. ਟੀ. ਪਾਰਾਜਿਕ ੬੯) ਵੁਤ੍ਤਨਯੇਨੇਵ ਦਟ੍ਠਬ੍ਬੋ, ਇਧ ਪਨ ਗਰੁਕਾਪਤ੍ਤਿਵੁਟ੍ਠਾਨਕਥਾਭੂਤਤ੍ਤਾ ਸਾਯੇਵ ਕਥਾ ਵੁਚ੍ਚਤੇ.

੨੪੭. ਤਤ੍ਥ ਭਿਕ੍ਖੁਨੀਹਿ ਸਾਧਾਰਣਾਯ ਪਟਿਚ੍ਛਨ੍ਨਾਯ ਆਪਤ੍ਤਿਯਾਤਿ ਸਞ੍ਚਰਿਤ੍ਤਾਦਿਆਪਤ੍ਤਿਯਾ, ਹੇਤ੍ਵਤ੍ਥੇ ਚੇਤਂ ਕਰਣਵਚਨਂ. ਪਰਿਵਸਨ੍ਤਸ੍ਸਾਤਿ ਅਨਾਦਰੇ ਸਾਮਿਵਚਨਂ. ਪਕ੍ਖਮਾਨਤ੍ਤਮੇਵ ਦਾਤਬ੍ਬਂ, ਨ ਪੁਨ ਪਰਿਵਾਸੋ ਦਾਤਬ੍ਬੋ ਭਿਕ੍ਖੁਨਿਭਾਵੇ ਅਪਰਿਵਾਸਾਰਹਤ੍ਤਾਤਿ ਅਧਿਪ੍ਪਾਯੋ. ਮਾਨਤ੍ਤਂ ਚਰਨ੍ਤਸ੍ਸਾਤਿ ਅਨਾਦਰੇਯੇਵ ਸਾਮਿਵਚਨਂ, ਛਾਰਤ੍ਤਮਾਨਤ੍ਤੇ ਆਚਿਣ੍ਣੇਯੇਵ ਪਰਿਵਤ੍ਤਤਿ, ਪੁਨ ਪਕ੍ਖਮਾਨਤ੍ਤਮੇਵ ਦਾਤਬ੍ਬਨ੍ਤਿ. ਤੇਨ ਵਕ੍ਖਤਿ ‘‘ਸਚੇ ਚਿਣ੍ਣਮਾਨਤ੍ਤਸ੍ਸਾ’’ਤਿਆਦਿ. ਅਕੁਸਲਵਿਪਾਕੇ ਪਰਿਕ੍ਖੀਣੇਤਿ ਪੁਰਿਸਿਨ੍ਦ੍ਰਿਯਸ੍ਸ ਅਨ੍ਤਰਧਾਨਂ ਸਨ੍ਧਾਯ ਵੁਤ੍ਤਂ. ਇਤ੍ਥਿਨ੍ਦ੍ਰਿਯਪਤਿਟ੍ਠਾਨਂ ਪਨ ਕੁਸਲਵਿਪਾਕਮੇਵ. ਵੁਤ੍ਤਞ੍ਹਿ ਅਟ੍ਠਕਥਾਯਂ ‘‘ਉਭਯਮ੍ਪਿ ਅਕੁਸਲੇਨ ਅਨ੍ਤਰਧਾਯਤਿ, ਕੁਸਲੇਨ ਪਟਿਲਬ੍ਭਤੀ’’ਤਿ. ਛਾਰਤ੍ਤਂ ਮਾਨਤ੍ਤਮੇਵ ਦਾਤਬ੍ਬਂ, ਨ ਪਰਿਵਾਸੋ ਦਾਤਬ੍ਬੋ, ਨ ਵਾ ਪਕ੍ਖਮਾਨਤ੍ਤਂ ਦਾਤਬ੍ਬਂ.

‘‘ਅਯਂ ਪਨ ਵਿਸੇਸੋ’’ਤਿ ਵਤ੍ਵਾ ਤਂ ਵਿਸੇਸਂ ਦਸ੍ਸੇਤੁਮਾਹ ‘‘ਸਚੇ’’ਤਿਆਦਿ. ਪਰਿਵਾਸਦਾਨਂ ਨਤ੍ਥਿ, ਛਾਰਤ੍ਤਂ ਮਾਨਤ੍ਤਮੇਵ ਦਾਤਬ੍ਬਂ. ਕਸ੍ਮਾ? ਭਿਕ੍ਖੁਨਿਕਾਲੇ ਪਟਿਚ੍ਛਨ੍ਨਤ੍ਤਾ. ਭਿਕ੍ਖੁਕਾਲੇ ਛਨ੍ਨਾਯੇਵ ਹਿ ਆਪਤ੍ਤਿ ਪਰਿਵਾਸਾਰਹਾ ਹੋਤਿ, ਨੋ ਭਿਕ੍ਖੁਨਿਕਾਲੇਤਿ ਅਯਮੇਤਾਸਂ ਵਿਸੇਸੋ. ਪਕ੍ਖਮਾਨਤ੍ਤਂ ਚਰਨ੍ਤਿਯਾਤਿ ਅਨਾਦਰੇ ਸਾਮਿਵਚਨਂ, ਪਕ੍ਖਮਾਨਤ੍ਤੇ ਆਚਿਣ੍ਣੇਯੇਵਾਤਿ ਅਤ੍ਥੋ. ਤਥਾ ਹਿ ਵਕ੍ਖਤਿ ‘‘ਚਿਣ੍ਣਮਾਨਤ੍ਤਾਯਾ’’ਤਿਆਦਿ. ਛਾਰਤ੍ਤਂ ਮਾਨਤ੍ਤਂ ਚਰਨ੍ਤਸ੍ਸਾਤਿਆਦਿ ਵੁਤ੍ਤਨਯਮੇਵ.

ਪਰਿਵਾਸਵਿਨਿਚ੍ਛਯਕਥਾ

ਇਦਾਨਿ ਸਙ੍ਘਾਦਿਸੇਸਾਪਤ੍ਤਿ ਯਸ੍ਮਾ ਸਾਵਸੇਸਗਰੁਕਾਪਤ੍ਤਿ ਹੋਤਿ ਸਤੇਕਿਚ੍ਛਾ, ਤਸ੍ਮਾ ਯਥਾ ਨਾਮ ਰੋਗਾਤੁਰੋ ਪੁਗ੍ਗਲੋ ਕਿਞ੍ਚਿ ਅਤ੍ਤਨੋ ਹਿਤਸੁਖਕਾਰਣਂ ਕਾਤੁਂ ਨ ਸਕ੍ਕੋਤਿ, ਤਮੇਨਂ ਕਾਰੁਣਿਕੋ ਤਿਕਿਚ੍ਛਕੋ ਕਰੁਣਾਸਞ੍ਚੋਦਿਤੋ ਤਿਕਿਚ੍ਛਂ ਕਤ੍ਵਾ ਗੇਲਞ੍ਞਤੋ ਵੁਟ੍ਠਾਪੇਤ੍ਵਾ ਹਿਤਸੁਖਂ ਜਨੇਤਿ, ਏਵਂ ਸਙ੍ਘਾਦਿਸੇਸਾਪਤ੍ਤਿਸਮਙ੍ਗੀ ਪੁਗ੍ਗਲੋ ਆਣਾਵੀਤਿਕ੍ਕਮਨ੍ਤਰਾਯਿਕਭਾਵਤੋ ਸਗ੍ਗਮੋਕ੍ਖਮਗ੍ਗਂ ਸੋਧੇਤੁਂ ਨ ਸਕ੍ਕੋਤਿ, ਤਮੇਨਂ ਮਹਾਕਾਰੁਣਿਕੋ ਭਗਵਾ ਮਹਾਕਰੁਣਾਯ ਸਞ੍ਚੋਦਿਤਮਾਨਸੋ ਅਨੇਕੇਹਿ ਨਯੇਹਿ ਆਪਤ੍ਤਿਤੋ ਵੁਟ੍ਠਾਨਂ ਕਤ੍ਵਾ ਸਗ੍ਗਮੋਕ੍ਖਸੁਖੇ ਪਤਿਟ੍ਠਪੇਤਿ, ਭਗਵਤੋ ਅਧਿਪ੍ਪਾਯਞ੍ਞੁਨੋ ਅਟ੍ਠਕਥਾਚਰਿਯਾਪਿ ਅਨੇਕੇਹਿ ਕਾਰਣੇਹਿ ਭਗਵਤੋ ਵਚਨਸ੍ਸ ਅਤ੍ਥਂ ਪਕਾਸੇਤ੍ਵਾ ਵਿਸੁਦ੍ਧਕਾਮਾਨਂ ਨਯਂ ਦੇਨ੍ਤਿ, ਤਥਾ ਟੀਕਾਚਰਿਯਾਦਯੋਪਿ. ਏਵਂ ਦਿਨ੍ਨੇ ਪਨ ਨਯੇ ਯੋਨਿਸੋ ਮਨਸਿ ਕਾਤੁਂ ਸਕ੍ਕੋਨ੍ਤਾ ਪਣ੍ਡਿਤਾ ਯਥਾਨੁਸਿਟ੍ਠਂ ਪਟਿਪਜ੍ਜਨ੍ਤਿ, ਅਸਕ੍ਕੋਨ੍ਤਾ ਅਞ੍ਞਥਾ ਅਤ੍ਥਂ ਗਹੇਤ੍ਵਾ ਨ ਯਥਾਨੁਸਿਟ੍ਠਂ ਪਟਿਪਜ੍ਜਨ੍ਤਿ, ਤੇਸਂ ਦਿਟ੍ਠਾਨੁਗਤਿਂ ਅਨੁਗਚ੍ਛਨ੍ਤਾ ਸਿਸ੍ਸਾਦਯੋਪਿ ਤਥੇਵ ਕਰੋਨ੍ਤਿ, ਤਸ੍ਮਾ ਭਗਵਤੋ ਵਚਨਞ੍ਚ ਪੁਬ੍ਬੇਨਾਪਰਂ ਸਂਸਨ੍ਦਿਤ੍ਵਾ ਅਟ੍ਠਕਥਾਟੀਕਾਦਿਵਚਨਞ੍ਚ ਸਮ੍ਮਾ ਤੁਲਯਿਤ੍ਵਾ ਤਥਤੋ ਭਗਵਤੋ ਅਧਿਪ੍ਪਾਯਂ ਞਤ੍ਵਾ ਯਥਾਨੁਸਿਟ੍ਠਂ ਪਟਿਪਜ੍ਜਨ੍ਤੇਹਿ ਗਰੁਕਾਪਤ੍ਤਿਤੋ ਵੁਟ੍ਠਹਨਤ੍ਥਂ ਯੋਗੋ ਕਰਣੀਯੋ.

ਤਸ੍ਮਾ ਯਦਾ ਭਿਕ੍ਖੂ ਆਗਚ੍ਛਨ੍ਤਿ ਵਿਨਯਧਰਸ੍ਸ ਸਨ੍ਤਿਕਂ ‘‘ਗਰੁਕਾਪਤ੍ਤਿਵੁਟ੍ਠਾਨਂ ਕਰਿਸ੍ਸਾਮਾ’’ਤਿ, ਤਦਾ ਵਿਨਯਧਰੇਨ ‘‘ਤ੍ਵਂ ਕਤਰਾਪਤ੍ਤਿਂ ਆਪਨ੍ਨੋ’’ਤਿ ਪੁਚ੍ਛਿਤਬ੍ਬੋ. ‘‘ਸਙ੍ਘਾਦਿਸੇਸਂ ਆਪਨ੍ਨੋ’’ਤਿ ਵੁਤ੍ਤੇ ‘‘ਕਤਰਸਙ੍ਘਾਦਿਸੇਸ’’ਨ੍ਤਿ ਪੁਚ੍ਛਿਤ੍ਵਾ ‘‘ਇਮਂ ਨਾਮਾ’’ਤਿ ਵੁਤ੍ਤੇ ਸੁਕ੍ਕਵਿਸ੍ਸਟ੍ਠਿਯਂ ਮੋਚੇਤੁਕਾਮਚੇਤਨਾ, ਉਪਕ੍ਕਮੋ, ਮੁਚ੍ਚਨਨ੍ਤਿ ਤੀਣਿ ਅਙ੍ਗਾਨਿ. ਕਾਯਸਂਸਗ੍ਗੇ ਮਨੁਸ੍ਸਿਤ੍ਥੀ, ਇਤ੍ਥਿਸਞ੍ਞਿਤਾ, ਕਾਯਸਂਸਗ੍ਗਰਾਗੋ, ਤੇਨ ਰਾਗੇਨ ਵਾਯਾਮੋ, ਹਤ੍ਥਗ੍ਗਾਹਾਦਿਸਮਾਪਜ੍ਜਨਨ੍ਤਿ ਪਞ੍ਚ ਅਙ੍ਗਾਨਿ. ਦੁਟ੍ਠੁਲ੍ਲਵਾਚਾਯਂ ਮਨੁਸ੍ਸਿਤ੍ਥੀ, ਇਤ੍ਥਿਸਞ੍ਞਿਤਾ, ਦੁਟ੍ਠੁਲ੍ਲਵਾਚਸ੍ਸਾਦਰਾਗੋ, ਤੇਨ ਰਾਗੇਨ ਓਭਾਸਨਂ, ਤਙ੍ਖਣਵਿਜਾਨਨਨ੍ਤਿ ਪਞ੍ਚ ਅਙ੍ਗਾਨਿ. ਅਤ੍ਤਕਾਮੇ ਮਨੁਸ੍ਸਿਤ੍ਥੀ, ਇਤ੍ਥਿਸਞ੍ਞਿਤਾ, ਅਤ੍ਤਕਾਮਪਾਰਿਚਰਿਯਾਯ ਰਾਗੋ, ਤੇਨ ਰਾਗੇਨ ਵਣ੍ਣਭਣਨਂ, ਤਙ੍ਖਣਵਿਜਾਨਨਨ੍ਤਿ ਪਞ੍ਚ ਅਙ੍ਗਾਨਿ. ਸਞ੍ਚਰਿਤ੍ਤੇ ਯੇਸੁ ਸਞ੍ਚਰਿਤ੍ਤਂ ਸਮਾਪਜ੍ਜਤਿ, ਤੇਸਂ ਮਨੁਸ੍ਸਜਾਤਿਕਤਾ, ਨਾਲਂਵਚਨੀਯਤਾ, ਪਟਿਗ੍ਗਣ੍ਹਨਵੀਮਂਸਨਪਚ੍ਚਾਹਰਣਾਨੀਤਿ ਪਞ੍ਚ ਅਙ੍ਗਾਨਿ. ਕੁਟਿਕਾਰੇ ਉਲ੍ਲਿਤ੍ਤਾਦੀਨਂ ਅਞ੍ਞਤਰਤਾ, ਹੇਟ੍ਠਿਮਪਮਾਣਸਮ੍ਭਵੋ, ਅਦੇਸਿਤਵਤ੍ਥੁਕਤਾ, ਪਮਾਣਾਤਿਕ੍ਕਨ੍ਤਤਾ, ਅਤ੍ਤੁਦ੍ਦੇਸਿਕਤਾ, ਵਾਸਾਗਾਰਤਾ, ਲੇਪਘਟਨਾਤਿ ਸਤ੍ਤ ਪਮਾਣਯੁਤ੍ਤਾਦੀਸੁ ਛਧਾ ਅਙ੍ਗਾਨਿ. ਵਿਹਾਰਕਾਰੇ ਤਾਨਿਯੇਵ ਛ ਅਙ੍ਗਾਨਿ. ਦੁਟ੍ਠਦੋਸੇ ਯਂ ਚੋਦੇਤਿ, ਤਸ੍ਸ ਉਪਸਮ੍ਪਨ੍ਨੋਤਿ ਸਙ੍ਖ੍ਯੁਪਗਮਨਂ, ਤਸ੍ਮਿਂ ਸੁਦ੍ਧਸਞ੍ਞਿਤਾ, ਯੇਨ ਪਾਰਾਜਿਕੇਨ ਚੋਦੇਤਿ, ਤਸ੍ਸ ਦਿਟ੍ਠਾਦਿਵਸੇਨ ਅਮੂਲਕਤਾ, ਚਾਵਨਾਧਿਪ੍ਪਾਯੇਨ ਸਮ੍ਮੁਖਾਚੋਦਨਾ, ਤਸ੍ਸ ਤਙ੍ਖਣਵਿਜਾਨਨਨ੍ਤਿ ਪਞ੍ਚ ਅਙ੍ਗਾਨਿ. ਅਞ੍ਞਭਾਗਿਯੇ ਅਞ੍ਞਭਾਗਿਯਸ੍ਸ ਅਧਿਕਰਣਸ੍ਸ ਕਞ੍ਚਿਦੇਸਂ ਲੇਸਮਤ੍ਤਂ ਉਪਾਦਿਯਨਤਾ, ਪੁਰਿਮਾਨਿ ਪਞ੍ਚਾਤਿ ਛ ਅਙ੍ਗਾਨਿ. ਸਙ੍ਘਭੇਦੇ ਭੇਦਾਯ ਪਰਕ੍ਕਮਨਂ, ਧਮ੍ਮਕਮ੍ਮੇਨ ਸਮਨੁਭਾਸਨਂ, ਕਮ੍ਮਵਾਚਾਪਰਿਯੋਸਾਨਂ, ਅਪ੍ਪਟਿਨਿਸ੍ਸਜ੍ਜਨਨ੍ਤਿ ਚਤ੍ਤਾਰਿ ਅਙ੍ਗਾਨਿ. ਭੇਦਾਨੁਵਤ੍ਤਕੇ ਅਙ੍ਗੇਸੁ ਯਥਾ ਤਤ੍ਥ ਪਰਕ੍ਕਮਨਂ, ਏਵਂ ਇਧ ਅਨੁਵਤ੍ਤਨਨ੍ਤਿ ਚਤ੍ਤਾਰਿ ਅਙ੍ਗਾਨਿ. ਦੁਬ੍ਬਚੇ ਅਙ੍ਗੇਸੁ ਯਥਾ ਤਤ੍ਥ ਪਰਕ੍ਕਮਨਂ, ਏਵਂ ਇਧ ਅਵਚਨੀਯਕਰਣਤਾਤਿ ਚਤ੍ਤਾਰਿ ਅਙ੍ਗਾਨਿ. ਕੁਲਦੂਸਕੇ ਅਙ੍ਗੇਸੁ ਯਥਾ ਤਤ੍ਥ ਪਰਕ੍ਕਮਨਂ, ਏਵਂ ਇਧ ਛਨ੍ਦਾਦੀਹਿ ਪਾਪਨਨ੍ਤਿ ਚਤ੍ਤਾਰਿ ਅਙ੍ਗਾਨਿ. ਇਤਿ ਇਮਾਨਿ ਅਙ੍ਗਾਨਿ ਸੋਧੇਤ੍ਵਾ ਸਚੇ ਅਙ੍ਗਪਾਰਿਪੂਰੀ ਹੋਤਿ, ‘‘ਸਙ੍ਘਾਦਿਸੇਸੋ’’ਤਿ ਵਤ੍ਤਬ੍ਬੋ. ਨੋ ਚੇ, ‘‘ਨਾਯਂ ਸਙ੍ਘਾਦਿਸੇਸੋ, ਥੁਲ੍ਲਚ੍ਚਯਾਦੀਸੁ ਅਞ੍ਞਤਰਾਪਤ੍ਤੀ’’ਤਿ ਵਤ੍ਵਾ ‘‘ਨਾਯਂ ਵੁਟ੍ਠਾਨਗਾਮਿਨੀ, ਦੇਸਨਾਗਾਮਿਨੀ ਅਯਂ ਆਪਤ੍ਤਿ, ਤਸ੍ਮਾ ਪਤਿਰੂਪਸ੍ਸ ਭਿਕ੍ਖੁਸ੍ਸ ਸਨ੍ਤਿਕੇ ਦੇਸੇਹੀ’’ਤਿ ਵਤ੍ਵਾ ਦੇਸਾਪੇਤਬ੍ਬੋ.

ਅਥ ਪਨ ਅਨਾਪਤ੍ਤਿਚ੍ਛਾਯਾ ਪਞ੍ਞਾਯਤਿ, ‘‘ਅਨਾਪਤ੍ਤੀ’’ਤਿ ਵਤ੍ਵਾ ਉਯ੍ਯੋਜੇਤਬ੍ਬਾ. ਸਚੇ ਪਨ ਸਙ੍ਘਾਦਿਸੇਸਚ੍ਛਾਯਾ ਪਞ੍ਞਾਯਤਿ, ‘‘ਤ੍ਵਂ ਇਮਂ ਆਪਤ੍ਤਿਂ ਆਪਜ੍ਜਿਤ੍ਵਾ ਛਾਦੇਸਿ, ਨ ਛਾਦੇਸੀ’’ਤਿ ਪੁਚ੍ਛਿਤ੍ਵਾ ‘‘ਨ ਛਾਦੇਮੀ’’ਤਿ ਵੁਤ੍ਤੇ ‘‘ਤੇਨ ਹਿ ਤ੍ਵਂ ਨ ਪਰਿਵਾਸਾਰਹੋ, ਮਾਨਤ੍ਤਾਰਹੋਵ ਹੋਤੀ’’ਤਿ ਵਤ੍ਤਬ੍ਬੋ. ‘‘ਛਾਦੇਮੀ’’ਤਿ ਪਨ ਵੁਤ੍ਤੇ ‘‘ਦਸਸੁ ਆਕਾਰੇਸੁ ਅਞ੍ਞਤਰਕਾਰਣੇਨ ਛਾਦੇਸਿ, ਉਦਾਹੁ ਅਞ੍ਞਕਾਰਣੇਨਾ’’ਤਿ ਪੁਚ੍ਛਿਤ੍ਵਾ ‘‘ਦਸਸੁ ਅਞ੍ਞਤਰਕਾਰਣੇਨਾ’’ਤਿ ਵੁਤ੍ਤੇ ‘‘ਏਵਮ੍ਪਿ ਮਾਨਤ੍ਤਾਰਹੋ ਹੋਤਿ, ਨ ਪਰਿਵਾਸਾਰਹੋ’’ਤਿ ਵਤ੍ਤਬ੍ਬੋ. ਅਥ ‘‘ਅਞ੍ਞਕਾਰਣੇਨਾ’’ਤਿ ਵਦਤਿ, ਏਵਂ ਸਨ੍ਤੇਪਿ ‘‘ਤ੍ਵਂ ਆਪਤ੍ਤਿਆਪਨ੍ਨਭਾਵਂ ਜਾਨਨ੍ਤੋ ਪਟਿਚ੍ਛਾਦੇਸਿ, ਉਦਾਹੁ ਅਜਾਨਨ੍ਤੋ’’ਤਿ ਪੁਚ੍ਛਿਤ੍ਵਾ ‘‘ਅਜਾਨਨ੍ਤੋ ਪਟਿਚ੍ਛਾਦੇਮੀ’’ਤਿ ਵੁਤ੍ਤੇ ਚ ‘‘ਆਪਤ੍ਤਿਆਪਨ੍ਨਭਾਵਂ ਸਰਨ੍ਤੋ ਪਟਿਚ੍ਛਾਦੇਸਿ, ਉਦਾਹੁ ਵਿਸਰਿਤ੍ਵਾ ਪਟਿਚ੍ਛਾਦੇਸੀ’’ਤਿ ਪੁਚ੍ਛਿਤ੍ਵਾ ‘‘ਵਿਸਰਿਤ੍ਵਾ ਪਟਿਚ੍ਛਾਦੇਮੀ’’ਤਿ ਵੁਤ੍ਤੇ ਚ ‘‘ਆਪਤ੍ਤਿਆਪਨ੍ਨਭਾਵੇ ਵੇਮਤਿਕੋ ਹੁਤ੍ਵਾ ਪਟਿਚ੍ਛਾਦੇਸਿ, ਉਦਾਹੁ ਨਿਬ੍ਬੇਮਤਿਕੋ ਹੁਤ੍ਵਾ’’ਤਿ ਪੁਚ੍ਛਿਤ੍ਵਾ ‘‘ਵੇਮਤਿਕੋ ਹੁਤ੍ਵਾ’’ਤਿ ਵੁਤ੍ਤੇ ਚ ‘‘ਨ ਤ੍ਵਂ ਪਰਿਵਾਸਾਰਹੋ, ਮਾਨਤ੍ਤਾਰਹੋਵ ਹੋਤੀ’’ਤਿ ਵਤ੍ਤਬ੍ਬੋ.

ਅਥ ‘‘ਜਾਨਨ੍ਤੋ ਪਟਿਚ੍ਛਾਦੇਮੀ’’ਤਿ ਵੁਤ੍ਤੇ ਚ ‘‘ਸਰਨ੍ਤੋ ਪਟਿਚ੍ਛਾਦੇਮੀ’’ਤਿ ਵੁਤ੍ਤੇ ਚ ‘‘ਨਿਬ੍ਬੇਮਤਿਕੋ ਹੁਤ੍ਵਾ ਪਟਿਚ੍ਛਾਦੇਮੀ’’ਤਿ ਵੁਤ੍ਤੇ ਚ ‘‘ਤ੍ਵਂ ਪਰਿਵਾਸਾਰਹੋ’’ਤਿ ਵਤ੍ਤਬ੍ਬੋ. ਵੁਤ੍ਤਞ੍ਹੇਤਂ ਸਮੁਚ੍ਚਯਕ੍ਖਨ੍ਧਕੇ (ਚੂਲ਼ਵ. ੧੪੪) ‘‘ਸੋ ਏਵਂ ਵਦਤਿ ‘ਯਾਯਂ, ਆਵੁਸੋ, ਆਪਤ੍ਤਿ ਜਾਨਪਟਿਚ੍ਛਨ੍ਨਾ, ਧਮ੍ਮਿਕਂ ਤਸ੍ਸਾ ਆਪਤ੍ਤਿਯਾ ਪਰਿਵਾਸਦਾਨਂ, ਧਮ੍ਮਤ੍ਤਾ ਰੁਹਤਿ. ਯਾ ਚ ਖ੍ਵਾਯਂ, ਆਵੁਸੋ, ਆਪਤ੍ਤਿ ਅਜਾਨਪ੍ਪਟਿਚ੍ਛਨ੍ਨਾ, ਅਧਮ੍ਮਿਕਂ ਤਸ੍ਸਾ ਆਪਤ੍ਤਿਯਾ ਪਰਿਵਾਸਦਾਨਂ, ਅਧਮ੍ਮਤ੍ਤਾ ਨ ਰੁਹਤਿ. ਏਕਿਸ੍ਸਾ, ਆਵੁਸੋ, ਆਪਤ੍ਤਿਯਾ ਭਿਕ੍ਖੁ ਮਾਨਤ੍ਤਾਰਹੋ’’’ਤਿ ਚ, ‘‘ਸੋ ਏਵਂ ਵਦਤਿ ‘ਯਾਯਂ ਆਪਤ੍ਤਿ ਸਰਮਾਨਪਟਿਚ੍ਛਨ੍ਨਾ, ਧਮ੍ਮਿਕਂ ਤਸ੍ਸਾ ਆਪਤ੍ਤਿਯਾ ਪਰਿਵਾਸਦਾਨਂ, ਧਮ੍ਮਤ੍ਤਾ ਰੁਹਤਿ. ਯਾ ਚ ਖ੍ਵਾਯਂ ਆਪਤ੍ਤਿ ਅਸਰਮਾਨਪਟਿਚ੍ਛਨ੍ਨਾ, ਅਧਮ੍ਮਿਕਂ ਤਸ੍ਸਾ ਆਪਤ੍ਤਿਯਾ ਪਰਿਵਾਸਦਾਨਂ, ਅਧਮ੍ਮਤ੍ਤਾ ਨ ਰੁਹਤਿ. ਏਕਿਸ੍ਸਾ, ਆਵੁਸੋ, ਆਪਤ੍ਤਿਯਾ ਭਿਕ੍ਖੁ ਮਾਨਤ੍ਤਾਰਹੋ’’’ਤਿ ਚ, ‘‘ਸੋ ਏਵਂ ਵਦਤਿ ‘ਯਾਯਂ, ਆਵੁਸੋ, ਆਪਤ੍ਤਿ ਨਿਬ੍ਬੇਮਤਿਕਪਟਿਚ੍ਛਨ੍ਨਾ, ਧਮ੍ਮਿਕਂ ਤਸ੍ਸਾ ਆਪਤ੍ਤਿਯਾ ਪਰਿਵਾਸਦਾਨਂ, ਧਮ੍ਮਤ੍ਤਾ ਰੁਹਤਿ. ਯਾ ਚ ਖ੍ਵਾਯਂ, ਆਵੁਸੋ, ਆਪਤ੍ਤਿ ਵੇਮਤਿਕਪਟਿਚ੍ਛਨ੍ਨਾ, ਅਧਮ੍ਮਿਕਂ ਤਸ੍ਸਾ ਆਪਤ੍ਤਿਯਾ ਪਰਿਵਾਸਦਾਨਂ, ਅਧਮ੍ਮਤ੍ਤਾ ਨ ਰੁਹਤਿ. ਏਕਿਸ੍ਸਾ, ਆਵੁਸੋ, ਆਪਤ੍ਤਿਯਾ ਭਿਕ੍ਖੁਮਾਨਤ੍ਤਾਰਹੋ’’’ਤਿ ਚ.

ਏਵਂ ਪਰਿਵਾਸਾਰਹਭਾਵਂ ਪਕਾਸੇਤ੍ਵਾ ‘‘ਅਯਂ ਭਿਕ੍ਖੁ ਪਰਿਵਾਸਾਰਹੋ, ਤੀਸੁ ਪਰਿਵਾਸੇਸੁ ਕਤਰਪਰਿਵਾਸਾਰਹੋ’’ਤਿ ਚਿਨ੍ਤੇਤ੍ਵਾ ‘‘ਭਿਕ੍ਖੁ ਤ੍ਵਂ ਕਤਿ ਆਪਤ੍ਤਿਯੋ ਛਾਦੇਸੀ’’ਤਿ ਪੁਚ੍ਛਿਤ੍ਵਾ ‘‘ਏਕਂ ਆਪਤ੍ਤਿ’’ਨ੍ਤਿ ਵਾ ‘‘ਦ੍ਵੇ ਤੀਣਿ ਤਤੁਤ੍ਤਰਿ ਵਾ ਆਪਤ੍ਤਿਯੋ ਛਾਦੇਮੀ’’ਤਿ ਵਾ ਵੁਤ੍ਤੇ ‘‘ਕਤੀਹਂ ਤ੍ਵਂ ਆਪਤ੍ਤਿਂ ਪਟਿਚ੍ਛਾਦੇਸੀ’’ਤਿ ਪੁਚ੍ਛਿਤ੍ਵਾ ‘‘ਏਕਾਹਮੇਵਾਹਂ ਪਟਿਚ੍ਛਾਦੇਮੀ’’ਤਿ ਵਾ ‘‘ਦ੍ਵੀਹਂ ਤੀਹਂ ਤਤੁਤ੍ਤਰਿ ਵਾ ਪਟਿਚ੍ਛਾਦੇਮੀ’’ਤਿ ਵਾ ਵੁਤ੍ਤੇ ‘‘ਯਾਵਤੀਹਂ ਪਟਿਚ੍ਛਾਦੇਸਿ, ਤਾਵਤੀਹਂ ਤ੍ਵਂ ਪਟਿਵਸਿਸ੍ਸਸੀ’’ਤਿ ਵਤ੍ਤਬ੍ਬੋ. ਵੁਤ੍ਤਞ੍ਹੇਤਂ ਭਗਵਤਾ ‘‘ਯਾਵਤੀਹਂ ਜਾਨਂ ਪਟਿਚ੍ਛਾਦੇਤਿ, ਤਾਵਤੀਹਂ ਤੇਨ ਭਿਕ੍ਖੁਨਾ ਅਕਾਮਾ ਪਰਿਵਤ੍ਥਬ੍ਬ’’ਨ੍ਤਿ. ਤਤੋ ‘‘ਅਯਂ ਭਿਕ੍ਖੁ ਆਪਤ੍ਤਿਪਰਿਯਨ੍ਤਂ ਜਾਨਾਤਿ, ਤਸ੍ਮਾ ਪਟਿਚ੍ਛਨ੍ਨਪਰਿਵਾਸਾਰਹੋ’’ਤਿ (ਪਾਰਾ. ੪੪੨) ਞਤ੍ਵਾ ਤਦਨੁਰੂਪਾ ਕਮ੍ਮਵਾਚਾ ਕਾਤਬ੍ਬਾ.

ਏਤ੍ਥ ਚ ਆਪਤ੍ਤਿਪਰਿਯਨ੍ਤਪੁਚ੍ਛਨਂ ਕਮ੍ਮਵਾਚਾਕਰਣਤ੍ਥਮੇਵ ਹੋਤਿ, ਰਤ੍ਤਿਪਰਿਯਨ੍ਤਪੁਚ੍ਛਨਂ ਪਨ ਤਦਤ੍ਥਞ੍ਚੇਵ ਸੁਦ੍ਧਨ੍ਤਪਰਿਵਾਸਸ੍ਸ ਅਨਨੁਰੂਪਭਾਵਦਸ੍ਸਨਤ੍ਥਞ੍ਚ ਹੋਤਿ. ਵੁਤ੍ਤਞ੍ਹਿ ਅਟ੍ਠਕਥਾਯਂ (ਚੁਲ਼ਵ. ਅਟ੍ਠ. ੧੦੨) ‘‘ਸੋ ਦੁਵਿਧੋ ਚੂਲ਼ਸੁਦ੍ਧਨ੍ਤੋ ਮਹਾਸੁਦ੍ਧਨ੍ਤੋਤਿ, ਦੁਵਿਧੋਪਿ ਚੇਸ ਰਤ੍ਤਿਪਰਿਚ੍ਛੇਦਂ ਸਕਲਂ ਵਾ ਏਕਚ੍ਚਂ ਵਾ ਅਜਾਨਨ੍ਤਸ੍ਸ ਚ ਅਸਰਨ੍ਤਸ੍ਸ ਚ ਤਤ੍ਥ ਵੇਮਤਿਕਸ੍ਸ ਚ ਦਾਤਬ੍ਬੋ. ਆਪਤ੍ਤਿਪਰਿਯਨ੍ਤਂ ਪਨ ‘ਅਹਂ ਏਤ੍ਤਕਾ ਆਪਤ੍ਤਿਯੋ ਆਪਨ੍ਨੋ’ਤਿ ਜਾਨਾਤੁ ਵਾ, ਮਾ ਵਾ, ਅਕਾਰਣਮੇਤ’’ਨ੍ਤਿ. ਤਤੋ ਤਸ੍ਸ ਭਿਕ੍ਖੁਨੋ ਨਿਸੀਦਨਟ੍ਠਾਨਂ ਜਾਨਿਤਬ੍ਬਂ. ਦੁਵਿਧਞ੍ਹਿ ਨਿਸੀਦਨਟ੍ਠਾਨਂ ਅਨਿਕ੍ਖਿਤ੍ਤਵਤ੍ਤੇਨ ਨਿਸੀਦਿਤਬ੍ਬਟ੍ਠਾਨਂ, ਨਿਕ੍ਖਿਤ੍ਤਵਤ੍ਤੇਨ ਨਿਸੀਦਿਤਬ੍ਬਟ੍ਠਾਨਨ੍ਤਿ.

ਤਤ੍ਥ ਅਪ੍ਪਭਿਕ੍ਖੁਕੇ ਵਿਹਾਰੇ ਸਭਾਗਭਿਕ੍ਖੂਨਂ ਵਸਨਟ੍ਠਾਨੇ ਉਪਚਾਰਸੀਮਾਪਰਿਚ੍ਛਿਨ੍ਨੋ ਅਨ੍ਤੋਵਿਹਾਰੋ ਅਨਿਕ੍ਖਿਤ੍ਤਵਤ੍ਤੇਨ ਨਿਸੀਦਿਤਬ੍ਬਟ੍ਠਾਨਂ ਹੋਤਿ. ਉਪਚਾਰਸੀਮਂ ਅਤਿਕ੍ਕਮ੍ਮ ਮਹਾਮਗ੍ਗਤੋ ਓਕ੍ਕਮ੍ਮ ਗੁਮ੍ਬਵਤਿਪਟਿਚ੍ਛਨ੍ਨਟ੍ਠਾਨਂ ਨਿਕ੍ਖਿਤ੍ਤਵਤ੍ਤੇਨ ਨਿਸੀਦਿਤਬ੍ਬਟ੍ਠਾਨਂ ਹੋਤਿ. ਵੁਤ੍ਤਞ੍ਹਿ ਅਟ੍ਠਕਥਾਯਂ (ਚੂਲ਼ਵ. ਅਟ੍ਠ. ੧੦੨) ‘‘ਸਚੇ ਅਪ੍ਪਭਿਕ੍ਖੁਕੋ ਵਿਹਾਰੋ ਹੋਤਿ, ਸਭਾਗਾ ਭਿਕ੍ਖੂ ਵਸਨ੍ਤਿ, ਵਤ੍ਤਂ ਅਨਿਕ੍ਖਿਪਿਤ੍ਵਾ ਵਿਹਾਰੇਯੇਵ ਰਤ੍ਤਿਪਰਿਗ੍ਗਹੋ ਕਾਤਬ੍ਬੋ. ਅਥ ਨ ਸਕ੍ਕਾ ਸੋਧੇਤੁਂ, ਵੁਤ੍ਤਨਯੇਨੇਵ ਵਤ੍ਤਂ ਨਿਕ੍ਖਿਪਿਤ੍ਵਾ ਪਚ੍ਚੂਸਸਮਯੇ ਏਕੇਨ ਭਿਕ੍ਖੁਨਾ ਸਦ੍ਧਿਂ ਮਾਨਤ੍ਤਵਣ੍ਣਨਾਯਂ ਵੁਤ੍ਤਨਯੇਨੇਵ ਉਪਚਾਰਸੀਮਂ ਅਤਿਕ੍ਕਮਿਤ੍ਵਾ ਮਹਾਮਗ੍ਗਾ ਓਕ੍ਕਮ੍ਮ ਪਟਿਚ੍ਛਨ੍ਨਟ੍ਠਾਨੇ ਨਿਸੀਦਿਤ੍ਵਾ ਅਨ੍ਤੋਅਰੁਣੇਯੇਵ ਵੁਤ੍ਤਨਯੇਨੇਵ ਵਤ੍ਤਂ ਸਮਾਦਿਯਿਤ੍ਵਾ ਤਸ੍ਸ ਭਿਕ੍ਖੁਨੋ ਪਰਿਵਾਸੋ ਆਰੋਚੇਤਬ੍ਬੋ’’ਤਿ. ‘‘ਮਾਨਤ੍ਤਵਣ੍ਣਨਾਯਂ ਵੁਤ੍ਤਨਯੇਨੇਵਾ’’ਤਿ ਚ ‘‘ਸਚੇ ਅਪ੍ਪਭਿਕ੍ਖੁਕੋ ਵਿਹਾਰੋ ਹੋਤਿ, ਸਭਾਗਾ ਭਿਕ੍ਖੂ ਵਸਨ੍ਤਿ, ਵਤ੍ਤਂ ਅਨਿਕ੍ਖਿਪਿਤ੍ਵਾ ਅਨ੍ਤੋਵਿਹਾਰੇਯੇਵ ਰਤ੍ਤਿਯੋ ਗਣੇਤਬ੍ਬਾ. ਅਥ ਨ ਸਕ੍ਕਾ ਸੋਧੇਤੁਂ, ਵੁਤ੍ਤਨਯੇਨੇਵ ਵਤ੍ਤਂ ਨਿਕ੍ਖਿਪਿਤ੍ਵਾ ਪਚ੍ਚੂਸਸਮਯੇ ਚਤੂਹਿ ਪਞ੍ਚਹਿ ਵਾ ਭਿਕ੍ਖੂਹਿ ਸਦ੍ਧਿਂ ਪਰਿਕ੍ਖਿਤ੍ਤਸ੍ਸ ਵਿਹਾਰਸ੍ਸ ਪਰਿਕ੍ਖੇਪਤੋ, ਅਪਰਿਕ੍ਖਿਤ੍ਤਸ੍ਸ ਪਰਿਕ੍ਖੇਪਾਰਹਟ੍ਠਾਨਤੋ ਦ੍ਵੇ ਲੇਡ੍ਡੁਪਾਤੇ ਅਤਿਕ੍ਕਮਿਤ੍ਵਾ ਮਹਾਮਗ੍ਗਤੋ ਓਕ੍ਕਮ੍ਮ ਗੁਮ੍ਬੇਨ ਵਾ ਵਤਿਯਾ ਵਾ ਪਟਿਚ੍ਛਨ੍ਨਟ੍ਠਾਨੇ ਨਿਸੀਦਿਤਬ੍ਬ’’ਨ੍ਤਿ (ਵਿ. ਸਙ੍ਗ. ਅਟ੍ਠ. ੨੩੮) ਇਦਂ ਵਚਨਂ ਸਨ੍ਧਾਯ ਵੁਤ੍ਤਂ.

ਤਤ੍ਥ ਅਪ੍ਪਭਿਕ੍ਖੁਕੋ ਵਿਹਾਰੋ ਹੋਤੀਤਿ ਇਦਂ ਬਹੁਭਿਕ੍ਖੁਕੇ ਵਿਹਾਰੇ ਅਞ੍ਞੇ ਭਿਕ੍ਖੂ ਗਚ੍ਛਨ੍ਤਿ, ਅਞ੍ਞੇ ਭਿਕ੍ਖੂ ਆਗਚ੍ਛਨ੍ਤਿ, ਤਸ੍ਮਾ ਰਤ੍ਤਿਚ੍ਛੇਦਵਤ੍ਤਭੇਦਕਾਰਣਾਨਿ ਸੋਧੇਤੁਂ ਦੁਕ੍ਕਰਤ੍ਤਾ ਵੁਤ੍ਤਂ. ਵਕ੍ਖਤਿ ਹਿ ‘‘ਅਥ ਨ ਸਕ੍ਕਾ ਸੋਧੇਤੁ’’ਨ੍ਤਿ. ਸਭਾਗਾ ਭਿਕ੍ਖੂ ਵਸਨ੍ਤੀਤਿ ਇਦਂ ਵਿਸਭਾਗਾਨਂ ਵੇਰੀਭਿਕ੍ਖੂਨਂ ਸਨ੍ਤਿਕੇ ਵਤ੍ਤਂ ਆਰੋਚੇਨ੍ਤੋ ਪਕਾਸੇਤੁਕਾਮੋ ਹੋਤਿ, ਤਸ੍ਮਾ ਵੁਤ੍ਤਂ. ਵੁਤ੍ਤਞ੍ਹਿ ਅਟ੍ਠਕਥਾਯਂ (ਚੂਲ਼ਵ. ਅਟ੍ਠ. ੧੦੨; ਵਿ. ਸਙ੍ਗ. ਅਟ੍ਠ. ੨੩੬) ‘‘ਤਸ੍ਮਾ ਅਵੇਰਿਸਭਾਗਸ੍ਸ ਸਨ੍ਤਿਕੇ ਆਰੋਚੇਤਬ੍ਬਾ. ਯੋ ਪਨ ਵਿਸਭਾਗੋ ਹੋਤਿ ਸੁਤ੍ਵਾ ਪਕਾਸੇਤੁਕਾਮੋ, ਏਵਰੂਪਸ੍ਸ ਉਪਜ੍ਝਾਯਸ੍ਸਪਿ ਸਨ੍ਤਿਕੇ ਨਾਰੋਚੇਤਬ੍ਬਾ’’ਤਿ, ਤਸ੍ਮਾ ਵਿਸਭਾਗਾਨਂ ਵਸਨਟ੍ਠਾਨੇ ਵਤ੍ਤਂ ਅਸਮਾਦਿਯਿਤ੍ਵਾ ਬਹਿਯੇਵ ਕਾਤੁਮ੍ਪਿ ਵਟ੍ਟਤੀਤਿ ਦਟ੍ਠਬ੍ਬਂ. ਵਿਹਾਰੇਯੇਵਾਤਿ ਅਨ੍ਤੋਉਪਚਾਰਸੀਮਾਯਮੇਵ. ਵਕ੍ਖਤਿ ਹਿ ‘‘ਅਥ ਨ ਸਕ੍ਕਾ…ਪੇ… ਉਪਚਾਰਸੀਮਂ ਅਤਿਕ੍ਕਮਿਤ੍ਵਾ’’ਤਿ. ਰਤ੍ਤਿਪਰਿਗ੍ਗਹੋ ਕਾਤਬ੍ਬੋਤਿ ਰਤ੍ਤਿਗਣਨਾ ਕਾਤਬ੍ਬਾ. ਵੁਤ੍ਤਞ੍ਹਿ ਮਾਨਤ੍ਤਵਣ੍ਣਨਾਯਂ ‘‘ਰਤ੍ਤਿਯੋ ਗਣੇਤਬ੍ਬਾ’’ਤਿ. ਅਥ ਨ ਸਕ੍ਕਾ ਸੋਧੇਤੁਨ੍ਤਿ ਬਹੁਭਿਕ੍ਖੁਕਤ੍ਤਾ ਵਾ ਵਿਹਾਰਸ੍ਸ ਵਿਸਭਾਗਾਨਂ ਵਸਨਟ੍ਠਾਨਤ੍ਤਾ ਵਾ ਰਤ੍ਤਿਚ੍ਛੇਦਵਤ੍ਤਾਭੇਦਕਾਰਣਾਨਿਪਿ ਸੋਧੇਤੁਂ ਨ ਸਕ੍ਕਾ. ਵਤ੍ਤਂ ਨਿਕ੍ਖਿਪਿਤ੍ਵਾਤਿ ਪਰਿਵਾਸਵਤ੍ਤਂ ਨਿਕ੍ਖਿਪਿਤ੍ਵਾ. ਪਚ੍ਚੂਸਸਮਯੇਤਿ ਪਚ੍ਛਿਮਯਾਮਕਾਲੇ ਅਰੁਣੋਦਯਤੋ ਪੁਰੇਤਰਮੇਵ. ਤਥਾ ਹਿ ਵਕ੍ਖਤਿ ‘‘ਅਨ੍ਤੋਅਰੁਣੇਯੇਵ ਵੁਤ੍ਤਨਯੇਨ ਵਤ੍ਤਂ ਸਮਾਦਿਯਿਤ੍ਵਾ ਤਸ੍ਸ ਭਿਕ੍ਖੁਨੋ ਪਰਿਵਾਸੋ ਆਰੋਚੇਤਬ੍ਬੋ’’ਤਿ. ਏਕੇਨ ਭਿਕ੍ਖੁਨਾ ਸਦ੍ਧਿਨ੍ਤਿ ਵਿਪ੍ਪਵਾਸਰਤ੍ਤਿਚ੍ਛੇਦਵਿਮੁਚ੍ਚਨਤ੍ਥਂ ਵਿਨਾ ਪਕਤਤ੍ਤੇਨ ਸਭਿਕ੍ਖੁਕਆਵਾਸਅਭਿਕ੍ਖੁਕਅਨਾਵਾਸਗਮਨਸਙ੍ਖਾਤਵਤ੍ਤਭੇਦਵਿਮੁਚ੍ਚਨਤ੍ਥਞ੍ਚ ਵੁਤ੍ਤਂ. ਤਥਾ ਹਿ ਵੁਤ੍ਤਂ ‘‘ਨ, ਭਿਕ੍ਖਵੇ, ਪਾਰਿਵਾਸਿਕੇਨ ਭਿਕ੍ਖੁਨਾ ਸਭਿਕ੍ਖੁਕਾ ਆਵਾਸਾ ਅਭਿਕ੍ਖੁਕੋ ਅਨਾਵਾਸੋ ਗਨ੍ਤਬ੍ਬੋ ਅਞ੍ਞਤ੍ਰ ਪਕਤਤ੍ਤੇਨ ਅਞ੍ਞਤ੍ਰ ਅਨ੍ਤਰਾਯਾ’’ਤਿ (ਚੂਲ਼ਵ. ੭੬).

ਮਾਨਤ੍ਤਵਣ੍ਣਨਾਯਂ ਵੁਤ੍ਤਨਯੇਨਾਤਿ ‘‘ਪਰਿਕ੍ਖਿਤ੍ਤਸ੍ਸ ਵਿਹਾਰਸ੍ਸ ਪਰਿਕ੍ਖੇਪਤੋ, ਅਪਰਿਕ੍ਖਿਤ੍ਤਸ੍ਸ ਪਰਿਕ੍ਖੇਪਾਰਹਟ੍ਠਾਨਤੋ ਦ੍ਵੇ ਲੇਡ੍ਡੁਪਾਤੇ ਅਤਿਕ੍ਕਮਿਤ੍ਵਾ’’ਤਿ ਵੁਤ੍ਤਨਯੇਨ. ਯਦਿ ਏਵਂ ਵਿਸਮਮਿਦਂ ਨਯਦਸ੍ਸਨਂ, ਪਰਿਕ੍ਖੇਪਪਰਿਕ੍ਖੇਪਾਰਹਟ੍ਠਾਨੇ ਏਵ ਹਿ ਉਪਚਾਰਸੀਮਾ ਹੋਤਿ, ਕਸ੍ਮਾ ਤਤ੍ਥ ਉਪਚਾਰਸੀਮਤੋ ਦ੍ਵੇਲੇਡ੍ਡੁਪਾਤਾਤਿਕ੍ਕਮੋ ਵੁਤ੍ਤੋ, ਇਧ ਪਨ ਉਪਚਾਰਸੀਮਾਤਿਕ੍ਕਮੋ ਏਵਾਤਿ? ਸਚ੍ਚਂ, ਤਥਾਪਿ ਵਿਹਾਰੇ ਭਿਕ੍ਖੂਨਂ ਸਜ੍ਝਾਯਾਦਿਸਦ੍ਦਸਵਨਸਬ੍ਭਾਵਤੋ ਸੁਵਿਦੂਰਾਤਿਕ੍ਕਮੋ ਵੁਤ੍ਤੋ, ਇਧ ਪਨ ਉਪਚਾਰਸੀਮਤੋ ਅਤਿਕ੍ਕਮਮਤ੍ਤੋਪਿ ਅਤਿਕ੍ਕਮੋਯੇਵਾਤਿ ਕਤ੍ਵਾ ਵੁਤ੍ਤੋ. ਬੁਦ੍ਧਮਤਞ੍ਞੁਨੋ ਹਿ ਅਟ੍ਠਕਥਾਚਰਿਯਾ. ਤਥਾ ਹਿ ਵੁਤ੍ਤਂ ਵਜਿਰਬੁਦ੍ਧਿਟੀਕਾਯਂ (ਵਜਿਰ. ਟੀ. ਚੂਲ਼ਵਗ੍ਗ ੯੭) ‘‘ਪਰਿਕ੍ਖਿਤ੍ਤਸ੍ਸ ਵਿਹਾਰਸ੍ਸ ਪਰਿਕ੍ਖੇਪਤੋਤਿਆਦਿ ਕਿਞ੍ਚਾਪਿ ਪਾਲ਼ਿਯਂ ਨਤ੍ਥਿ, ਅਥ ਖੋ ਅਟ੍ਠਕਥਾਚਰਿਯਾਨਂ ਵਚਨੇਨ ਤਥਾ ਏਵ ਪਟਿਪਜ੍ਜਿਤਬ੍ਬਨ੍ਤਿ ਚ ਵੁਤ੍ਤ’’ਨ੍ਤਿ.

ਮਾਨਤ੍ਤਵਣ੍ਣਨਾਯਂ ਚਤੂਹਿ ਪਞ੍ਚਹਿ ਵਾ ਭਿਕ੍ਖੂਹਿ ਸਦ੍ਧਿਨ੍ਤਿ ਇਦਂ ਪਨ ਊਨੇਗਣੇਚਰਣਰਤ੍ਤਿਚ੍ਛੇਦਵਿਮੁਚ੍ਚਨਤ੍ਥਂ ਵੁਤ੍ਤਂ. ਦ੍ਵੇ ਲੇਡ੍ਡੁਪਾਤੇ ਅਤਿਕ੍ਕਮਿਤ੍ਵਾਤਿਆਦਿ ਅਞ੍ਞੇਸਂ ਭਿਕ੍ਖੂਨਂ ਸਵਨੂਪਚਾਰਦਸ੍ਸਨੂਪਚਾਰਵਿਜਹਨਤ੍ਥਂ ਵੁਤ੍ਤਂ. ਤੇਨੇਵਾਹ ਟੀਕਾਚਰਿਯੋ ‘‘ਦ੍ਵੇ ਲੇਡ੍ਡੁਪਾਤੇ ਅਤਿਕ੍ਕਮਿਤ੍ਵਾਤਿ ਇਦਂ ਵਿਹਾਰੇ ਭਿਕ੍ਖੂਨਂ ਸਜ੍ਝਾਯਾਦਿਸਦ੍ਦਸਵਨੂਪਚਾਰਵਿਜਹਨਤ੍ਥਂ ਵੁਤ੍ਤਂ, ‘ਮਹਾਮਗ੍ਗਤੋ ਓਕ੍ਕਮ੍ਮਾਤਿ ਇਦਂ ਮਗ੍ਗਪਟਿਪਨ੍ਨਾਨਂ ਭਿਕ੍ਖੂਨਂ ਸਵਨੂਪਚਾਰਵਿਜਹਨਤ੍ਥਂ, ਗੁਮ੍ਬੇਨ ਵਾਤਿਆਦਿ ਦਸ੍ਸਨੂਪਚਾਰਵਿਜਹਨਤ੍ਥ’’ਨ੍ਤਿ. ਤਸ੍ਮਾ ਯਥਾਵੁਤ੍ਤਂ ਦੁਵਿਧਂ ਠਾਨਂ ਪਰਿਵਸਨ੍ਤਮਾਨਤ੍ਤਚਾਰਿਕਭਿਕ੍ਖੂਹਿ ਨਿਸੀਦਿਤਬ੍ਬਟ੍ਠਾਨਂ ਹੋਤਿ. ਤੇਸੁ ਚ ਯਦਿ ਅਨ੍ਤੋਵਿਹਾਰੇਯੇਵ ਨਿਸੀਦਿਤ੍ਵਾ ਪਰਿਵਸਤਿ, ਉਪਚਾਰਸੀਮਗਤਾਨਂ ਸਬ੍ਬੇਸਂ ਭਿਕ੍ਖੂਨਂ ਆਰੋਚੇਤਬ੍ਬਂ ਹੋਤਿ. ਅਥ ਬਹਿਉਪਚਾਰਸੀਮਾਯਂ, ਦਿਟ੍ਠਰੂਪਾਨਂ ਸੁਤਸਦ੍ਦਾਨਂ ਆਰੋਚੇਤਬ੍ਬਂ. ਅਦਿਟ੍ਠਅਸੁਤਾਨਮ੍ਪਿ ਅਨ੍ਤੋਦ੍ਵਾਦਸਹਤ੍ਥਗਤਾਨਂ ਆਰੋਚੇਤਬ੍ਬਮੇਵ. ਵੁਤ੍ਤਞ੍ਹਿ ਵਜਿਰਬੁਦ੍ਧਿਟੀਕਾਯਂ ‘‘ਵਤ੍ਤਂ ਨਿਕ੍ਖਿਪਿਤ੍ਵਾ ਵਸਨ੍ਤਸ੍ਸ ਉਪਚਾਰਸੀਮਗਤਾਨਂ ਸਬ੍ਬੇਸਂ ਆਰੋਚਨਕਿਚ੍ਚਂ ਨਤ੍ਥਿ, ਦਿਟ੍ਠਰੂਪਾਨਂ ਸੁਤਸਦ੍ਦਾਨਂ ਆਰੋਚੇਤਬ੍ਬਂ. ਅਦਿਟ੍ਠਅਸ੍ਸੁਤਾਨਮ੍ਪਿ ਅਨ੍ਤੋਦ੍ਵਾਦਸਹਤ੍ਥਗਤਾਨਂ ਆਰੋਚੇਤਬ੍ਬਂ. ਇਦਂ ਵਤ੍ਤਂ ਨਿਕ੍ਖਿਪਿਤ੍ਵਾ ਵਸਨ੍ਤਸ੍ਸ ਲਕ੍ਖਣਨ੍ਤਿ ਵੁਤ੍ਤ’’ਨ੍ਤਿ. ਇਦਞ੍ਚ ਵਤ੍ਤਂ ਅਨਿਕ੍ਖਿਪਿਤ੍ਵਾ ਵਸਨ੍ਤਸ੍ਸ ਅਨ੍ਤੋਵਿਹਾਰੇਯੇਵ ਰਤ੍ਤਿਪਰਿਗ੍ਗਹਸ੍ਸ ਚ ਨਿਕ੍ਖਿਪਿਤ੍ਵਾ ਵਸਨ੍ਤਸ੍ਸ ਉਪਚਾਰਸੀਮਂ ਅਤਿਕ੍ਕਮਿਤ੍ਵਾ ਵਤ੍ਤਸਮਾਦਾਨਸ੍ਸ ਚ ਅਟ੍ਠਕਥਾਯਂ ਵੁਤ੍ਤਤ੍ਤਾ ਵੁਤ੍ਤਂ. ਉਪਚਾਰੋ ਪਨ ਅਨ੍ਤੋਸੀਮਾਯ ਠਿਤਾਨਂ ਸਕਲਉਪਚਾਰਸੀਮਾ ਹੋਤਿ, ਬਹਿਉਪਚਾਰਸੀਮਾਯ ਠਿਤਾਨਂ ਦ੍ਵਾਦਸਹਤ੍ਥਮਤ੍ਤਂ. ਤੇਨੇਵ ਹਿ ਉਦ੍ਦੇਸਭਤ੍ਤਾਦਿਸਙ੍ਘਲਾਭੋ ਯਦਿ ਅਨ੍ਤੋਸੀਮਾਯ ਉਪ੍ਪਜ੍ਜਤਿ, ਸੀਮਟ੍ਠਕਸਙ੍ਘਸ੍ਸ ਹੋਤਿ. ਯਦਿ ਬਹਿਸੀਮਾਯਂ, ਦ੍ਵਾਦਸਹਤ੍ਥਬ੍ਭਨ੍ਤਰੇ ਪਤ੍ਤਭਿਕ੍ਖੂਨਂ, ਤਸ੍ਮਾ ਉਪਚਾਰਵਸੇਨਪਿ ਏਸ ਅਤ੍ਥੋ ਵਿਞ੍ਞਾਯਤਿ. ਤਥਾ ਹਿ ਵੁਤ੍ਤਂ ਵਜਿਰਬੁਦ੍ਧਿਟੀਕਾਯਂ (ਵਜਿਰ. ਟੀ. ਚੂਲ਼ਵਗ੍ਗ ੯੭) ‘‘ਅਤ੍ਥਿਭਾਵਂ ਸਲ੍ਲਕ੍ਖੇਤ੍ਵਾਤਿ ਦ੍ਵਾਦਸਹਤ੍ਥੇ ਉਪਚਾਰੇ ਸਲ੍ਲਕ੍ਖੇਤ੍ਵਾ ਅਨਿਕ੍ਖਿਤ੍ਤਵਤ੍ਤਾਨਂ ਉਪਚਾਰਸੀਮਾਯ ਆਗਤਭਾਵਂ ਸਲ੍ਲਕ੍ਖੇਤ੍ਵਾ ਸਹਵਾਸਾਦਿਕਂ ਵੇਦਿਤਬ੍ਬਨ੍ਤਿ ਚ ਵੁਤ੍ਤ’’ਨ੍ਤਿ.

ਏਵਂ ਅਨਿਕ੍ਖਿਤ੍ਤਵਤ੍ਤਾਨਂ ਹੁਤ੍ਵਾ ਪਰਿਵਸਨ੍ਤਾਨਂ ਅਨ੍ਤੋਵਿਹਾਰੇਯੇਵ ਵਸਨਸ੍ਸ, ਨਿਕ੍ਖਿਤ੍ਤਵਤ੍ਤਾਨਂ ਹੁਤ੍ਵਾ ਪਰਿਵਸਨ੍ਤਾਨਂ ਵਿਹਾਰਤੋ ਬਹਿ ਦ੍ਵੇ ਲੇਡ੍ਡੁਪਾਤੇ ਅਤਿਕ੍ਕਮਿਤ੍ਵਾ ਵਸਨਸ੍ਸ ਚ ਅਟ੍ਠਕਥਾਦੀਸੁ ਪਕਰਣੇਸੁ ਆਗਤਤ੍ਤਾ ਤਥਾਗਤਨਯੋ ਪਕਰਣਾਗਤਨਯੋ ਹੋਤਿ. ਇਦਾਨਿ ਪਨ ਆਚਰਿਯਾ ਅਨਿਕ੍ਖਿਤ੍ਤਵਤ੍ਤਸ੍ਸ ਚ ਰਤ੍ਤਿਚ੍ਛੇਦਵਤ੍ਤਭੇਦਦੋਸੇ ਪਰਿਹਰਿਤੁਂ ਅਤਿਦੁਕ੍ਕਰਤ੍ਤਾ, ਨਿਕ੍ਖਿਤ੍ਤਵਤ੍ਤਸ੍ਸ ਚ ਦੇਵਸਿਕਂ ਪਚ੍ਚੂਸਸਮਯੇ ਬਹਿਸੀਮਗਮਨਸ੍ਸ ਦੁਕ੍ਖਤ੍ਤਾ, ਵਾਲ਼ਸਰੀਸਪਾਦਿਪਰਿਸਯਸ੍ਸ ਚ ਆਸਙ੍ਕਿਤਬ੍ਬਭਾਵਤੋ ਰਤ੍ਤਿਚ੍ਛੇਦਵਤ੍ਤਭੇਦਪਰਿਹਰਣਵਸੇਨ ਲਕ੍ਖਣਪਾਰਿਪੂਰਿਮੇਵ ਮਨਸਿ ਕਰੋਨ੍ਤਾ ਨਿਕ੍ਖਿਤ੍ਤਵਤ੍ਤਾਪਿ ਸਮਾਨਾ ਅਨ੍ਤੋਵਿਹਾਰੇਯੇਵ ਪਰਿਵਾਸਵਸਨਞ੍ਚ ਮਾਨਤ੍ਤਚਰਣਞ੍ਚ ਕਰੋਨ੍ਤਿ.

ਏਕਚ੍ਚੇ ਆਚਰਿਯਾ ਬਹਿਉਪਚਾਰਸੀਮਾਯਂ ਪਤਿਰੂਪਟ੍ਠਾਨੇ ਪਕਤਤ੍ਤਾਨਂ ਭਿਕ੍ਖੂਨਂ ਵਸਨਸਾਲਂ ਕਾਰਾਪੇਤ੍ਵਾ ਪਾਰਿਵਾਸਿਕਭਿਕ੍ਖੂਨਂ ਨਿਪਜ੍ਜਨਮਞ੍ਚਂ ਸਬ੍ਬਤੋ ਛਨ੍ਨਪਰਿਚ੍ਛਿਨ੍ਨਂ ਸਦ੍ਵਾਰਬਨ੍ਧਨਂ ਸੁਗੁਤ੍ਤਂ ਕਾਰਾਪੇਤ੍ਵਾ ਤਂ ਪਦੇਸਂ ਵਤਿਯਾ ਪਰਿਕ੍ਖਿਪਾਪੇਤ੍ਵਾ ਸਾਯਨ੍ਹਸਮਯੇ ਤਤ੍ਥ ਗਨ੍ਤ੍ਵਾ ਉਪਟ੍ਠਾਕਸਾਮਣੇਰਾਦਯੋ ਨਿਵਤ੍ਤਾਪੇਤ੍ਵਾ ਪੁਰਿਮਯਾਮੇ ਵਾ ਮਜ੍ਝਿਮਯਾਮੇ ਵਾ ਸਮਨ੍ਤਤੋ ਸਦ੍ਦਛਿਜ੍ਜਨਕਾਲੇ ਪਕਤਤ੍ਤਭਿਕ੍ਖੂ ਸਾਲਾਯਂ ਨਿਪਜ੍ਜਾਪੇਤ੍ਵਾ ਪਾਰਿਵਾਸਿਕਭਿਕ੍ਖੂ ਵਤ੍ਤਂ ਸਮਾਦਾਪੇਤ੍ਵਾ ਆਰੋਚਾਪੇਤ੍ਵਾ ਅਤ੍ਤਨੋ ਅਤ੍ਤਨੋ ਮਞ੍ਚਕੇਸੁ ਨਿਪਜ੍ਜਾਪੇਤ੍ਵਾ ਪਚ੍ਛਿਮਯਾਮਕਾਲੇ ਉਟ੍ਠਾਪੇਤ੍ਵਾ ਅਰੁਣੇ ਉਟ੍ਠਿਤੇ ਆਰੋਚਾਪੇਤ੍ਵਾ ਵਤ੍ਤਂ ਨਿਕ੍ਖਿਪਾਪੇਨ੍ਤਿ. ਏਸ ਨਯੋ ਪਕਰਣੇਸੁ ਅਨਾਗਤਤ੍ਤਾ ਆਚਰਿਯਾਨਂ ਮਤੇਨ ਕਤਤ੍ਤਾ ਆਚਰਿਯਨਯੋ ਨਾਮ. ਏਸ ਨਯੋਪਿ ਯਥਾਰੁਤਤੋ ਪਕਰਣੇਸੁ ਅਨਾਗਤੋਪਿ ਪਕਰਣਾਨੁਲੋਮਵਸੇਨ ਰਤ੍ਤਿਚ੍ਛੇਦਵਤ੍ਤਭੇਦਦੋਸੇ ਪਰਿਹਰਿਤ੍ਵਾ ਲਜ੍ਜਿਪੇਸਲੇਹਿ ਬਹੁਸ੍ਸੁਤੇਹਿ ਸਿਕ੍ਖਾਕਾਮੇਹਿ ਵਿਨਯੇ ਪਕਤਞ੍ਞੂਹਿ ਵਿਚਾਰਿਤੋ ਸਮਾਨੋ ਸੁਨ੍ਦਰੋ ਪਸਤ੍ਥੋਵ ਹੋਤਿ, ਤਸ੍ਮਾ ‘‘ਅਨੁਲੋਮਨਯੋ’’ਤਿਪਿ ਵਤ੍ਤੁਂ ਵਟ੍ਟਤਿ.

ਨਨੁ ਚ ਅਨਿਕ੍ਖਿਤ੍ਤਵਤ੍ਤਾਨਂਯੇਵ ਅਨ੍ਤੋਵਿਹਾਰੇ ਵਸਨਂ ਅਟ੍ਠਕਥਾਯਂ ਵੁਤ੍ਤਂ, ਅਥ ਕਸ੍ਮਾ ਨਿਕ੍ਖਿਤ੍ਤਵਤ੍ਤਾਪਿ ਸਮਾਨਾ ਵਸਨ੍ਤੀਤਿ? ਸਚ੍ਚਂ, ਤਤ੍ਥ ਪਨ ਅਪ੍ਪਭਿਕ੍ਖੁਕਤ੍ਤਾ ਸਭਾਗਭਿਕ੍ਖੂਨਂ ਵਸਨਟ੍ਠਾਨਤ੍ਤਾ ਚ ਰਤ੍ਤਿਚ੍ਛੇਦਵਤ੍ਤਭੇਦਦੋਸੇ ਚ ਪਰਿਹਰਿਤੁਂ ਸਕ੍ਕੁਣੇਯ੍ਯਭਾਵਤੋ ਸਕਲਰਤ੍ਤਿਨ੍ਦਿਵਮ੍ਪਿ ਵਤ੍ਤਂ ਅਨਿਕ੍ਖਿਪਿਤ੍ਵਾ ਵਸਨਂ ਵੁਤ੍ਤਂ, ਇਧ ਪਨ ਤਥਾ ਅਸਕ੍ਕੁਣੇਯ੍ਯਭਾਵਤੋ ਦਿਵਾ ਵਤ੍ਤਂ ਨਿਕ੍ਖਿਪਿਤ੍ਵਾ ਰਤ੍ਤਿਯਂ ਸਮਾਦਿਯਨ੍ਤੋ ਆਗਨ੍ਤੁਕਾਨਂ ਅਨਾਗਮਨਕਾਲਭਾਵਤੋ, ਸਦ੍ਦਛਿਜ੍ਜਨਕਾਲਭਾਵਤੋ ਚ ਰਤ੍ਤਿਚ੍ਛੇਦਾਦਿਦੋਸੇ ਪਰਿਹਰਿਤੁਂ ਸਕ੍ਕੁਣੇਯ੍ਯਤ੍ਤਾ ਤਦਨੁਲੋਮੋਯੇਵ ਹੋਤੀਤਿ ਮਨ੍ਤ੍ਵਾ ਆਚਰਿਯਾ ਏਵਂ ਕਰੋਨ੍ਤੀਤਿ ਦਟ੍ਠਬ੍ਬਂ.

ਏਵਂ ਹੋਤੁ, ਬਹਿਉਪਚਾਰਸੀਮਾਯ ਵਸਨ੍ਤਾਨਂ ਪਟਿਚ੍ਛਨ੍ਨਟ੍ਠਾਨੇ ਨਿਸੀਦਨਮੇਵ ਅਟ੍ਠਕਥਾਯਂ ਵੁਤ੍ਤਂ, ਨ ਪਕਤਤ੍ਤਸਾਲਾਕਰਣਮਞ੍ਚਕਰਣਾਦੀਨਿ, ਅਥ ਕਸ੍ਮਾ ਏਤਾਨਿ ਕਰੋਨ੍ਤੀਤਿ? ਸਚ੍ਚਂ, ਤਥਾਪਿ ਪਕਤਤ੍ਤਸਾਲਾਕਰਣਂ ਪਾਰਿਵਾਸਿਕਾਨਂ ਭਿਕ੍ਖੂਨਂ ਪਕਤਤ੍ਤੇਹਿ ਭਿਕ੍ਖੂਹਿ ਵਿਪ੍ਪਵਾਸਰਤ੍ਤਿਚ੍ਛੇਦਵਤ੍ਤਭੇਦਦੋਸਪਰਿਹਰਣਤ੍ਥਂ, ਤਂ ‘‘ਤਯੋ ਖੋ, ਉਪਾਲਿ, ਪਾਰਿਵਾਸਿਕਸ੍ਸ ਭਿਕ੍ਖੁਨੋ ਰਤ੍ਤਿਚ੍ਛੇਦਾ ਸਹਵਾਸੋ, ਵਿਪ੍ਪਵਾਸੋ, ਅਨਾਰੋਚਨਾ’’ਤਿ ਵੁਤ੍ਤਪਾਠਂ (ਚੂਲ਼ਵ. ੮੩) ਅਨੁਲੋਮੇਤਿ. ਮਞ੍ਚਕਰਣਂ ਸਹਵਾਸਰਤ੍ਤਿਚ੍ਛੇਦਵਤ੍ਤਭੇਦਦੋਸਪਰਿਹਰਣਤ੍ਥਂ, ਤਂ ‘‘ਨ, ਭਿਕ੍ਖਵੇ, ਪਾਰਿਵਾਸਿਕੇਨ ਭਿਕ੍ਖੁਨਾ ਪਕਤਤ੍ਤੇਨ ਭਿਕ੍ਖੁਨਾ ਸਦ੍ਧਿਂ ਏਕਚ੍ਛਨ੍ਨੇ ਆਵਾਸੇ ਵਤ੍ਥਬ੍ਬਂ, ਨ ਏਕਚ੍ਛਨ੍ਨੇ ਅਨਾਵਾਸੇ ਵਤ੍ਥਬ੍ਬਂ, ਨ ਏਕਚ੍ਛਨ੍ਨੇ ਆਵਾਸੇ ਵਾ ਅਨਾਵਾਸੇ ਵਾ ਵਤ੍ਥਬ੍ਬ’’ਨ੍ਤਿ ਵੁਤ੍ਤਪਾਠਞ੍ਚ (ਚੂਲ਼ਵ. ੮੧) ਯਥਾਵੁਤ੍ਤਪਾਠਞ੍ਚ ਅਨੁਲੋਮੇਤਿ. ਆਦਿ-ਸਦ੍ਦੇਨ ਸਾਯਨ੍ਹਸਮਯੇ ਗਮਨਾਦੀਨਿ ਸਙ੍ਗਣ੍ਹਾਤਿ. ਤੇਸੁ ਅਟ੍ਠਕਥਾਯਂ ਪਚ੍ਚੂਸਸਮਯੇ ਗਮਨੇ ਏਵ ਵੁਤ੍ਤੇਪਿ ਸਾਯਨ੍ਹਸਮਯੇ ਗਮਨਂ ਰਤ੍ਤਿਗਮਨਸ੍ਸ ਬਹੁਪਰਿਸ੍ਸਯਤ੍ਤਾ ਪਰਿਸ੍ਸਯਵਿਨੋਦਨਤ੍ਥਂ, ਤਂ ‘‘ਅਨ੍ਤਰਾਯਤੋ ਪਰਿਮੁਚ੍ਚਨਤ੍ਥਾਯ ਗਨ੍ਤਬ੍ਬਮੇਵਾ’’ਤਿ ਵੁਤ੍ਤਂ ਅਟ੍ਠਕਥਾਪਾਠਂ (ਚੂਲ਼ਵ. ਅਟ੍ਠ. ੭੬) ਅਨੁਲੋਮੇਤਿ. ਉਪਟ੍ਠਾਕਸਾਮਣੇਰਾਦੀਨਂ ਨਿਵਤ੍ਤਾਪਨਂ ਅਨੁਪਸਮ੍ਪਨ੍ਨੇਨ ਸਹਸੇਯ੍ਯਸਙ੍ਕਾਨਿਵਤ੍ਤਨਤ੍ਥਂ, ਤਂ ‘‘ਯੋ ਪਨ ਭਿਕ੍ਖੁ ਅਨੁਪਸਮ੍ਪਨ੍ਨੇਨ ਸਹਸੇਯ੍ਯਂ ਕਪ੍ਪੇਯ੍ਯ, ਪਾਚਿਤ੍ਤਿਯ’’ਨ੍ਤਿ ਵੁਤ੍ਤਂ ਮਾਤਿਕਾਪਾਠਂ (ਪਾਚਿ. ੪੯) ਅਨੁਲੋਮੇਤਿ. ਪੁਰਿਮਯਾਮੇ ਵਾ ਮਜ੍ਝਿਮਯਾਮੇ ਵਾ ਸਮਨ੍ਤਤੋ ਸਦ੍ਦਛਿਜ੍ਜਨਕਾਲੇ ਪਕਤਤ੍ਤਭਿਕ੍ਖੂ ਸਾਲਾਯਂ ਨਿਪਜ੍ਜਾਪੇਤ੍ਵਾ ਪਾਰਿਵਾਸਿਕਭਿਕ੍ਖੂਨਂ ਵਤ੍ਤਸਮਾਦਾਪਨਂ ਅਞ੍ਞਭਿਕ੍ਖੂਨਂ ਸਦ੍ਦਸਵਨਵਿਵਜ੍ਜਨਤ੍ਥਂ, ਤਂ ਅਨਾਰੋਚਨਰਤ੍ਤਿਚ੍ਛੇਦਦੋਸਪਰਿਹਰਣਤ੍ਥਂ, ਤਂ ਯਥਾਵੁਤ੍ਤਰਤ੍ਤਿਚ੍ਛੇਦਪਾਠਂ ਅਨੁਲੋਮੇਤਿ.

ਨਨੁ ਚ ਅਟ੍ਠਕਥਾਯਂ ਅਨ੍ਤੋਅਰੁਣੇਯੇਵ ਵਤ੍ਤਸਮਾਦਾਪਨਂ ਵੁਤ੍ਤਂ, ਅਥ ਕਸ੍ਮਾ ‘‘ਪੁਰਿਮਯਾਮਮਜ੍ਝਿਮਯਾਮੇਸੂ’’ਤਿ ਵੁਤ੍ਤਨ੍ਤਿ? ਨਾਯਂ ਦੋਸੋ, ਹਿਯ੍ਯੋਅਰੁਣੁਗ੍ਗਮਨਤੋ ਪਟ੍ਠਾਯ ਹਿ ਯਾਵ ਅਜ੍ਜਅਰੁਣੁਗ੍ਗਮਨਾ ਏਕੋ ਰਤ੍ਤਿਨ੍ਦਿਵੋ ਅਜ੍ਜਅਰੁਣਸ੍ਸ ਅਨ੍ਤੋ ਨਾਮ, ਅਜ੍ਜਅਰੁਣਤੋ ਪਟ੍ਠਾਯ ਪਚ੍ਛਾਕਾਲੋ ਅਰੁਣਸ੍ਸ ਬਹਿ ਨਾਮ, ਤਸ੍ਮਾ ਪੁਰਿਮਮਜ੍ਝਿਮਯਾਮੇਸੁ ਕਤਵਤ੍ਤਸਮਾਦਾਨਮ੍ਪਿ ਅਰੁਣੋਦਯਤੋ ਪੁਰੇ ਕਤਤ੍ਤਾ ਅਨ੍ਤੋਅਰੁਣੇ ਕਤਂਯੇਵ ਹੋਤਿ. ਵਤ੍ਤਂ ਅਸਮਾਦਿਯਿਤ੍ਵਾ ਨਿਪਜ੍ਜਨੇ ਚ ਸਤਿ ਨਿਦ੍ਦਾਵਸੇਨ ਅਰੁਣੁਗ੍ਗਮਨਕਾਲਂ ਅਜਾਨਿਤ੍ਵਾ ਵਤ੍ਤਸਮਾਦਾਨਂ ਅਤਿਕ੍ਕਨ੍ਤਂ ਭਵੇਯ੍ਯ, ਤਸ੍ਮਾ ਪੁਰੇਤਰਮੇਵ ਸਮਾਦਾਨਂ ਕਤ੍ਵਾ ਨਿਪਜ੍ਜਨਂ ਞਾਯਾਗਤਂ ਹੋਤਿ, ‘‘ਅਨ੍ਤੋਅਰੁਣੇਯੇਵ ਵੁਤ੍ਤਨਯੇਨੇਵ ਵਤ੍ਤਂ ਸਮਾਦਿਯਿਤ੍ਵਾ’’ਤਿ ਵੁਤ੍ਤਅਟ੍ਠਕਥਾਪਾਠਞ੍ਚ (ਚੂਲ਼ਵ. ਅਟ੍ਠ. ੧੦੨) ਅਨੁਲੋਮੇਤਿ.

ਏਵਂ ਹੋਤੁ, ਏਵਂ ਸਨ੍ਤੇਪਿ ਕਸ੍ਮਾ ‘‘ਆਰੋਚਾਪੇਤ੍ਵਾ’’ਤਿ ਵੁਤ੍ਤਂ, ਨਨੁ ਮਾਲ਼ਕਸੀਮਾਯਂ ਸਮਾਦਿਨ੍ਨਕਾਲੇਯੇਵ ਵਤ੍ਤਮਾਰੋਚਿਤਨ੍ਤਿ? ਸਚ੍ਚਂ ਆਰੋਚਿਤਂ, ਅਯਂ ਪਨ ਭਿਕ੍ਖੁ ਦਿਵਾ ਵਤ੍ਤਂ ਨਿਕ੍ਖਿਪਿਤ੍ਵਾ ਨਿਸਿਨ੍ਨੋ, ਇਦਾਨਿ ਸਮਾਦਿਨ੍ਨੋ, ਤਸ੍ਮਾ ਮਾਲ਼ਕਸੀਮਾਯ ਆਰੋਚਿਤਮ੍ਪਿ ਪੁਨ ਆਰੋਚੇਤਬ੍ਬਂ ਹੋਤਿ. ਇਦਮ੍ਪਿ ‘‘ਅਨ੍ਤੋਅਰੁਣੇਯੇਵ ਵੁਤ੍ਤਨਯੇਨੇਵ ਵਤ੍ਤਂ ਸਮਾਦਿਯਿਤ੍ਵਾ ਤਸ੍ਸ ਭਿਕ੍ਖੁਨੋ ਪਰਿਵਾਸੋ ਆਰੋਚੇਤਬ੍ਬੋ’’ਤਿ ਪਾਠਂ (ਚੂਲ਼ਵ. ਅਟ੍ਠ. ੧੦੨) ਅਨੁਲੋਮੇਤਿ. ਅਥ ‘‘ਅਤ੍ਤਨੋ ਅਤ੍ਤਨੋ ਮਞ੍ਚਕੇਸੁ ਨਿਪਜ੍ਜਾਪੇਤ੍ਵਾ’’ਤਿ ਕਸ੍ਮਾ ਵੁਤ੍ਤਂ, ਨਨੁ ਅਞ੍ਞਮਞ੍ਞਸ੍ਸ ਮਞ੍ਚੇਸੁ ਨਿਪਜ੍ਜਮਾਨਾਪਿ ਪਕਤਤ੍ਤਸਾਲਤੋ ਨਿਬ੍ਬੋਦਕਪਤਨਟ੍ਠਾਨਤੋ ਬਹਿ ਨਿਪਜ੍ਜਮਾਨਾ ਸਹਵਾਸਰਤ੍ਤਿਚ੍ਛੇਦਦੋਸਤੋ ਮੁਤ੍ਤਾਯੇਵਾਤਿ? ਨ ਪਨੇਵਂ ਦਟ੍ਠਬ੍ਬਂ. ਨ ਹਿ ਪਾਰਿਵਾਸਿਕੋ ਪਕਤਤ੍ਤਭਿਕ੍ਖੂਹੇਵ ਏਕਚ੍ਛਨ੍ਨੇ ਨਿਪਨ੍ਨੋ ਸਹਵਾਸਰਤ੍ਤਿਚ੍ਛੇਦਪ੍ਪਤ੍ਤੋ ਹੋਤਿ, ਅਥ ਖੋ ਅਞ੍ਞਮਞ੍ਞਮ੍ਪਿ ਹੋਤਿਯੇਵ. ਵੁਤ੍ਤਞ੍ਚੇਤਂ ਸਮਨ੍ਤਪਾਸਾਦਿਕਾਯਂ (ਚੂਲ਼ਵ. ਅਟ੍ਠ. ੮੧) ‘‘ਸਚੇ ਹਿ ਦ੍ਵੇ ਪਾਰਿਵਾਸਿਕਾ ਏਕਤੋ ਵਸੇਯ੍ਯੁਂ, ਤੇ ਅਞ੍ਞਮਞ੍ਞਸ੍ਸ ਅਜ੍ਝਾਚਾਰਂ ਞਤ੍ਵਾ ਅਗਾਰਵਾ ਵਾ ਵਿਪ੍ਪਟਿਸਾਰਿਨੋ ਵਾ ਹੁਤ੍ਵਾ ਪਾਪਿਟ੍ਠਤਰਂ ਵਾ ਆਪਤ੍ਤਿਂ ਆਪਜ੍ਜੇਯ੍ਯੁਂ ਵਿਬ੍ਭਮੇਯ੍ਯੁਂ ਵਾ, ਤਸ੍ਮਾ ਨੇਸਂ ਸਹਸੇਯ੍ਯਾ ਸਬ੍ਬਪ੍ਪਕਾਰੇਨ ਪਟਿਕ੍ਖਿਤ੍ਤਾ’’ਤਿ. ‘‘ਪਚ੍ਛਿਮਯਾਮਕਾਲੇ ਉਟ੍ਠਾਪੇਤ੍ਵਾ ਅਰੁਣੇ ਉਟ੍ਠਿਤੇ ਆਰੋਚਾਪੇਤ੍ਵਾ ਵਤ੍ਤਂ ਨਿਕ੍ਖਿਪਾਪੇਨ੍ਤੀ’’ਤਿ ਏਤ੍ਥ ਅਰੁਣੇ ਅਨੁਟ੍ਠਿਤੇਯੇਵ ਵਤ੍ਤਨਿਕ੍ਖਿਪਨੇ ਕਰਿਯਮਾਨੇ ਰਤ੍ਤਿਚ੍ਛੇਦੋ ਹੋਤਿ, ਸਾ ਰਤ੍ਤਿ ਗਣਨੂਪਗਾ ਨ ਹੋਤਿ, ਤਸ੍ਮਾ ਪਠਮਪਰਿਚ੍ਛੇਦੇ ਵੁਤ੍ਤਂ ਅਰੁਣਕਥਾਵਿਨਿਚ੍ਛਯਂ ਓਲੋਕੇਤ੍ਵਾ ਅਰੁਣੁਗ੍ਗਮਨਭਾਵੋ ਸੁਟ੍ਠੁ ਜਾਨਿਤਬ੍ਬੋ.

‘‘ਆਰੋਚਾਪੇਤ੍ਵਾ ਵਤ੍ਤਂ ਨਿਕ੍ਖਿਪਾਪੇਤਬ੍ਬ’’ਨ੍ਤਿ ਵੁਤ੍ਤਂ. ਕਸ੍ਮਾ ਆਰੋਚਾਪੇਤਿ, ਨਨੁ ਸਮਾਦਿਨ੍ਨਕਾਲੇਯੇਵ ਆਰੋਚਿਤਨ੍ਤਿ? ਸਚ੍ਚਂ, ਤਥਾਪਿ ਪਾਰਿਵਾਸਿਕਵਤ੍ਤਸਮਾਦਾਨਕਾਲੇ ਆਰੋਚਿਤੇਸੁ ਭਿਕ੍ਖੂਸੁ ਏਕਚ੍ਚੇ ਨਿਕ੍ਖਿਪਨਕਾਲੇ ਗਚ੍ਛਨ੍ਤਿ, ਅਞ੍ਞੇ ਆਗਚ੍ਛਨ੍ਤਿ, ਏਵਂ ਪਰਿਸਸਙ੍ਕਮਨਮ੍ਪਿ ਸਿਯਾ, ਤਥਾ ਚ ਸਤਿ ਅਭਿਨਵਾਗਤਾਨਂ ਸਬ੍ਭਾਵਾ ਆਰੋਚੇਤਬ੍ਬਂ ਹੋਤਿ, ਅਸਤਿ ਪਨ ਅਭਿਨਵਾਗਤਭਿਕ੍ਖੁਮ੍ਹਿ ਆਰੋਚਨਕਿਚ੍ਚਂ ਨਤ੍ਥਿ. ਏਵਂ ਸਨ੍ਤੇਪਿ ਆਰੋਚਨੇ ਦੋਸਾਭਾਵਤੋ ਪੁਨ ਆਰੋਚਨਂ ਞਾਯਾਗਤਂ ਹੋਤਿ, ਮਾਨਤ੍ਤਚਰਣਕਾਲੇ ਪਨ ਸਮਾਦਾਨੇ ਆਰੋਚਿਤੇਪਿ ਨਿਕ੍ਖਿਪਨੇ ਅਵਸ੍ਸਂ ਆਰੋਚੇਤਬ੍ਬਮੇਵ. ਕਸ੍ਮਾ? ਦਿਵਸਨ੍ਤਰਭਾਵਤੋ. ‘‘ਦੇਵਸਿਕਂ ਆਰੋਚੇਤਬ੍ਬ’’ਨ੍ਤਿ (ਚੂਲ਼ਵ. ਅਟ੍ਠ. ੯੦) ਹਿ ਵੁਤ੍ਤਂ. ਏਵਂ ਸਨ੍ਤੇਪਿ ਸਾਯਂ ਸਮਾਦਾਨਕਾਲੇ ਆਰੋਚੇਸ੍ਸਤਿ, ਤਸ੍ਮਾ ਨਿਕ੍ਖਿਪਨੇ ਆਰੋਚਨਕਿਚ੍ਚਂ ਨਤ੍ਥੀਤਿ ਚੇ? ਨ, ਸਾਯਂ ਸਮਾਦਾਨਕਾਲੇ ਏਤੇ ਭਿਕ੍ਖੂ ਆਗਚ੍ਛਿਸ੍ਸਨ੍ਤਿਪਿ, ਨ ਆਗਚ੍ਛਿਸ੍ਸਨ੍ਤਿਪਿ, ਅਨਾਗਤਾਨਂ ਕਥਂ ਆਰੋਚੇਤੁਂ ਲਭਿਸ੍ਸਤਿ, ਅਨਾਰੋਚਨੇ ਚ ਸਤਿ ਰਤ੍ਤਿਚ੍ਛੇਦੋ ਸਿਯਾ, ਤਸ੍ਮਾ ਤਸ੍ਮਿਂ ਦਿਵਸੇ ਅਰੁਣੇ ਉਟ੍ਠਿਤੇ ਵਤ੍ਤਨਿਕ੍ਖਿਪਨਤੋ ਪੁਰੇਯੇਵ ਆਰੋਚੇਤਬ੍ਬਨ੍ਤਿ ਨੋ ਮਤਿ, ਸੁਟ੍ਠੁਤਰਂ ਉਪਧਾਰੇਤ੍ਵਾ ਗਹੇਤਬ੍ਬਂ. ਏਵਂ ਪਕਰਣਾਗਤਨਯੇਨ ਵਾ ਪਕਰਣਾਨੁਲੋਮਆਚਰਿਯਨਯੇਨ ਵਾ ਸਮ੍ਮਾਸਮ੍ਬੁਦ੍ਧਸ੍ਸ ਆਣਂ ਪਤਿਟ੍ਠਾਪੇਨ੍ਤੇਨ ਵਿਨਯਕੋਵਿਦੇਨ ਬਹੁਸ੍ਸੁਤੇਨ ਲਜ੍ਜੀਪੇਸਲਭੂਤੇਨ ਵਿਨਯਧਰੇਨ ਵਿਸੁਦ੍ਧਿਕਾਮਾਨਂ ਪੇਸਲਾਨਂ ਭਿਕ੍ਖੂਨਂ ਸੀਲਵਿਸੁਦ੍ਧਤ੍ਥਾਯ ਸੁਟ੍ਠੁ ਵਿਚਾਰੇਤ੍ਵਾ ਪਰਿਵਾਸਵਤ੍ਤਾਮਾਨਤ੍ਤਚਰਣਵਤ੍ਤਾਨਿ ਆਚਿਕ੍ਖਿਤਬ੍ਬਾਨੀਤਿ.

ਇਮਸ੍ਮਿਂ ਠਾਨੇ ਲਜ੍ਜੀਭਿਕ੍ਖੂਨਂ ਪਰਿਵਾਸਾਦਿਕਥਾਯ ਕੁਸਲਤ੍ਥਂ ਨਾਨਾਵਾਦਨਯੋ ਵੁਚ੍ਚਤੇ – ਕੇਚਿ ਭਿਕ੍ਖੂ ‘‘ਪਕਤਤ੍ਤਸਾਲਂ ਕੁਰੁਮਾਨੇਨ ਤਸ੍ਸਾ ਸਾਲਾਯ ਮਜ੍ਝੇ ਥਮ੍ਭਂ ਨਿਮਿਤ੍ਤਂ ਕਤ੍ਵਾ ਤਤੋ ਦ੍ਵਾਦਸਹਤ੍ਥਮਤ੍ਤਂ ਪਦੇਸਂ ਸਲ੍ਲਕ੍ਖੇਤ੍ਵਾ ਯਥਾ ਪਞ੍ਞਤ੍ਤੇ ਪਾਰਿਵਾਸਿਕਾਨਂ ਮਞ੍ਚੇ ਨਿਪਨ੍ਨਸ੍ਸ ਭਿਕ੍ਖੁਸ੍ਸ ਗੀਵਾ ਤਸ੍ਸ ਪਦੇਸਸ੍ਸ ਉਪਰਿ ਹੋਤਿ, ਤਥਾ ਪਞ੍ਞਾਪੇਤਬ੍ਬੋ. ਏਵਂ ਕਤੇ ਸੁਕਤਂ ਹੋਤੀ’’ਤਿ ਵਦਨ੍ਤਿ ਕਰੋਨ੍ਤਿ ਚ. ਏਕਚ੍ਚੇ ‘‘ਮਞ੍ਚੇ ਨਿਪਨ੍ਨਸ੍ਸ ਭਿਕ੍ਖੁਸ੍ਸ ਕਟਿ ਤਸ੍ਸ ਪਦੇਸਸ੍ਸ ਉਪਰਿ ਹੋਤਿ, ਯਥਾ ਪਞ੍ਞਾਪੇਤਬ੍ਬੋ, ਏਵਂ ਕਤੇ ਸੁਕਤਂ ਹੋਤੀ’’ਤਿ ਵਦਨ੍ਤਿ ਕਰੋਨ੍ਤਿ ਚ, ਤਂ ਵਚਨਂ ਨੇਵ ਪਾਲ਼ਿਯਂ, ਨ ਅਟ੍ਠਕਥਾਟੀਕਾਦੀਸੁ ਵਿਜ੍ਜਤਿ, ਕੇਵਲਂ ਤੇਸਂ ਪਰਿਕਪ੍ਪਮੇਵ. ਅਯਂ ਪਨ ਨੇਸਂ ਅਧਿਪ੍ਪਾਯੋ ਸਿਯਾ – ‘‘ਦ੍ਵਾਦਸਹਤ੍ਥਂ ਪਨ ਉਪਚਾਰਂ ਮੁਞ੍ਚਿਤ੍ਵਾ ਨਿਸੀਦਿਤੁਂ ਵਟ੍ਟਤੀ’’ਤਿ ਅਟ੍ਠਕਥਾਯਂ ਵੁਤ੍ਤਵਚਨਞ੍ਚ ‘‘ਅਥ ਦ੍ਵਾਦਸਹਤ੍ਥਂ ਉਪਚਾਰਂ ਓਕ੍ਕਮਿਤ੍ਵਾ ਅਜਾਨਨ੍ਤਸ੍ਸੇਵ ਗਚ੍ਛਤਿ, ਰਤ੍ਤਿਚ੍ਛੇਦੋ ਹੋਤਿ ਏਵ, ਵਤ੍ਤਭੇਦੋ ਪਨ ਨਤ੍ਥੀ’’ਤਿ ਅਟ੍ਠਕਥਾਵਚਨਞ੍ਚ (ਚੂਲ਼ਵ. ਅਟ੍ਠ. ੯੭) ‘‘ਅਦਿਟ੍ਠਅਸ੍ਸੁਤਾਨਮ੍ਪਿ ਅਨ੍ਤੋਦ੍ਵਾਦਸਹਤ੍ਥਗਤਾਨਂ ਆਰੋਚੇਤਬ੍ਬ’’ਨ੍ਤਿ ਵੁਤ੍ਤਟੀਕਾਵਚਨਞ੍ਚ (ਸਾਰਤ੍ਥ. ਟੀ. ਚੂਲ਼ਵਗ੍ਗ ੩.੯੭) ‘‘ਅਦਿਟ੍ਠਅਸ੍ਸੁਤਾਨਮ੍ਪਿ ਅਨ੍ਤੋਦ੍ਵਾਦਸਹਤ੍ਥਗਤਾਨਂ ਆਰੋਚੇਤਬ੍ਬਂ, ‘ਇਦਂ ਵਤ੍ਤਂ ਨਿਕ੍ਖਿਪਿਤ੍ਵਾ ਵਸਨ੍ਤਸ੍ਸ ਲਕ੍ਖਣ’ਨ੍ਤਿ ਵੁਤ੍ਤ’’ਨ੍ਤਿ ਵੁਤ੍ਤਵਜਿਰਬੁਦ੍ਧਿਟੀਕਾਵਚਨਞ੍ਚ (ਵਜਿਰ. ਟੀ. ਚੂਲ਼ਵਗ੍ਗ ੯੭) ‘‘ਅਤ੍ਥਿਭਾਵਂ ਸਲ੍ਲਕ੍ਖੇਤ੍ਵਾਤਿ ਦ੍ਵਾਦਸਹਤ੍ਥੇ ਉਪਚਾਰੇ ਸਲ੍ਲਕ੍ਖੇਤ੍ਵਾ, ਅਨਿਕ੍ਖਿਤ੍ਤਵਤ੍ਤਾਨਂ ਉਪਚਾਰਸੀਮਾਯ ਆਗਤਭਾਵਂ ਸਲ੍ਲਕ੍ਖੇਤ੍ਵਾ ਸਹਵਾਸਾਦਿਕਂ ਵੇਦਿਤਬ੍ਬ’’ਨ੍ਤਿ ਵੁਤ੍ਤਂ ਵਜਿਰਬੁਦ੍ਧਿਟੀਕਾਵਚਨਞ੍ਚ ਪਸ੍ਸਿਤ੍ਵਾ ਅਯੋਨਿਸੋ ਅਤ੍ਥਂ ਗਹੇਤ੍ਵਾ ਸਬ੍ਬਤ੍ਥ ਦ੍ਵਾਦਸਹਤ੍ਥਮੇਵ ਪਮਾਣਂ, ਤਤੋ ਊਨਮ੍ਪਿ ਅਧਿਕਮ੍ਪਿ ਨ ਵਟ੍ਟਤਿ, ਤਸ੍ਮਾ ਯਥਾਵੁਤ੍ਤਨਯੇਨ ਮਜ੍ਝੇ ਥਮ੍ਭਤੋ ਦ੍ਵਾਦਸਹਤ੍ਥਮਤ੍ਤੇ ਪਦੇਸੇ ਨਿਪਨ੍ਨਸ੍ਸ ਭਿਕ੍ਖੁਸ੍ਸ ਗੀਵਾ ਵਾ ਕਟਿ ਵਾ ਹੋਤੁ, ਏਵਂ ਸਨ੍ਤੇ ਦ੍ਵਾਦਸਹਤ੍ਥਪ੍ਪਦੇਸੇ ਪਾਰਿਵਾਸਿਕਭਿਕ੍ਖੁ ਹੋਤਿ, ਤਤੋ ਸਹਵਾਸਤੋ ਵਾ ਵਿਪ੍ਪਵਾਸਤੋ ਵਾ ਰਤ੍ਤਿਚ੍ਛੇਦਵਤ੍ਤਭੇਦਦੋਸਾ ਨ ਹੋਨ੍ਤੀਤਿ.

ਤਤ੍ਰੇਵਂ ਯੁਤ੍ਤਾਯੁਤ੍ਤਵਿਚਾਰਣਾ ਕਾਤਬ੍ਬਾ. ਯਥਾਵੁਤ੍ਤਪਾਠੇਸੁ ਪਠਮਪਾਠਸ੍ਸ ਅਯਮਧਿਪ੍ਪਾਯੋ – ਪਕਤਤ੍ਤਭਿਕ੍ਖੁਮ੍ਹਿ ਛਮਾਯ ਨਿਸਿਨ੍ਨੇ ਯਦਿ ਪਾਰਿਵਾਸਿਕਭਿਕ੍ਖੁ ਆਸਨੇ ਨਿਸੀਦਿਤੁਕਾਮੋ, ਪਕਤਤ੍ਤਸ੍ਸ ਭਿਕ੍ਖੁਨੋ ਨਿਸਿਨ੍ਨਟ੍ਠਾਨਤੋ ਦ੍ਵਾਦਸਹਤ੍ਥਂ ਉਪਚਾਰਂ ਮੁਞ੍ਚਿਤ੍ਵਾਵ ਨਿਸੀਦਿਤੁਂ ਵਟ੍ਟਤਿ, ਨ ਦ੍ਵਾਦਸਹਤ੍ਥਬ੍ਭਨ੍ਤਰੇਤਿ. ਏਤੇਨ ਦ੍ਵੀਸੁਪਿ ਛਮਾਯ ਨਿਸਿਨ੍ਨੇਸੁ ਦ੍ਵਾਦਸਹਤ੍ਥਬ੍ਭਨ੍ਤਰੇਪਿ ਵਟ੍ਟਤਿ, ਦ੍ਵਾਦਸਹਤ੍ਥਪ੍ਪਦੇਸਤੋ ਬਹਿ ਨਿਸੀਦਨ੍ਤੋ ਆਸਨੇਪਿ ਨਿਸੀਦਿਤੁਂ ਵਟ੍ਟਤੀਤਿ ਦਸ੍ਸੇਤਿ. ਤੇਨਾਹ ‘‘ਨ ਛਮਾਯ ਨਿਸਿਨ੍ਨੇਤਿ ਪਕਤਤ੍ਤੇ ਭੂਮਿਯਂ ਨਿਸਿਨ੍ਨੇ ਇਤਰੇਨ ਅਨ੍ਤਮਸੋ ਤਿਣਸਨ੍ਥਰੇਪਿ ਉਚ੍ਚਤਰੇ ਵਾਲਿਕਤਲੇਪਿ ਵਾ ਨ ਨਿਸੀਦਿਤਬ੍ਬਂ, ਦ੍ਵਾਦਸਹਤ੍ਥਂ ਪਨ ਉਪਚਾਰਂ ਮੁਞ੍ਚਿਤ੍ਵਾ ਨਿਸੀਦਿਤੁਂ ਵਟ੍ਟਤੀ’’ਤਿ (ਚੂਲ਼ਵ. ਅਟ੍ਠ. ੮੧). ਇਤਿ ਪਕਤਤ੍ਤੇ ਛਮਾਯ ਨਿਸਿਨ੍ਨੇ ਪਾਰਿਵਾਸਿਕੇਨ ਨਿਸੀਦਿਤਬ੍ਬਟ੍ਠਾਨਦੀਪਕੋ ਅਯਂ ਪਾਠੋ, ਨ ਮਞ੍ਚਪਞ੍ਞਾਪਨਟ੍ਠਾਨਸਯਨਟ੍ਠਾਨਦੀਪਕੋ, ਤਂ ਪੁਬ੍ਬਾਪਰਪਰਿਪੁਣ੍ਣਂ ਸਕਲਂ ਪਾਠਂ ਅਨੋਲੋਕੇਤ੍ਵਾ ਏਕਦੇਸਮਤ੍ਤਮੇਵ ਪਸ੍ਸਿਤ੍ਵਾ ਪਰਿਕਪ੍ਪਵਸੇਨ ਅਯੋਨਿਸੋ ਅਧਿਪ੍ਪਾਯਂ ਗਣ੍ਹਨ੍ਤਿ.

ਦੁਤਿਯਪਾਠਸ੍ਸ ਪਨ ਅਯਮਧਿਪ੍ਪਾਯੋ – ਬਹਿ ਉਪਚਾਰਸੀਮਾਯ ਪਟਿਚ੍ਛਨ੍ਨਟ੍ਠਾਨੇ ਵਤ੍ਤਂ ਸਮਾਦਿਯਿਤ੍ਵਾ ਨਿਸਿਨ੍ਨੇ ਭਿਕ੍ਖੁਸ੍ਮਿਂ ਤਸ੍ਸ ਨਿਸਿਨ੍ਨਟ੍ਠਾਨਤੋ ਦ੍ਵਾਦਸਹਤ੍ਥਂ ਉਪਚਾਰਂ ਓਕ੍ਕਮਿਤ੍ਵਾ ਤਸ੍ਸ ਅਜਾਨਨ੍ਤਸ੍ਸੇਵ ਅਞ੍ਞੋ ਭਿਕ੍ਖੁ ਗਚ੍ਛਤਿ, ਤਸ੍ਸ ਪਾਰਿਵਾਸਿਕਸ੍ਸ ਭਿਕ੍ਖੁਨੋ ਰਤ੍ਤਿਚ੍ਛੇਦੋ ਹੋਤਿ, ਵਤ੍ਤਭੇਦੋ ਪਨ ਨਤ੍ਥਿ. ਕਸ੍ਮਾ ਰਤ੍ਤਿਚ੍ਛੇਦੋ ਹੋਤਿ? ਉਪਚਾਰਂ ਓਕ੍ਕਮਿਤਤ੍ਤਾ. ਕਸ੍ਮਾ ਨ ਵਤ੍ਤਭੇਦੋ? ਅਜਾਨਨ੍ਤਤ੍ਤਾਤਿ. ਏਤੇਨ ਬਹਿਉਪਚਾਰਸੀਮਾਯ ਉਪਚਾਰੋ ਦ੍ਵਾਦਸਹਤ੍ਥਪ੍ਪਮਾਣੋ ਹੋਤਿ ਆਰੋਚਨਕ੍ਖੇਤ੍ਤਭੂਤੋਤਿ ਦਸ੍ਸੇਤਿ. ਤੇਨਾਹ ‘‘ਗੁਮ੍ਬੇਨ ਵਾ ਵਤਿਯਾ ਵਾ ਪਟਿਚ੍ਛਨ੍ਨਟ੍ਠਾਨੇ ਨਿਸੀਦਿਤਬ੍ਬਂ, ਅਨ੍ਤੋਅਰੁਣੇਯੇਵ ਵੁਤ੍ਤਨਯੇਨ ਵਤ੍ਤਂ ਸਮਾਦਿਯਿਤ੍ਵਾ ਆਰੋਚੇਤਬ੍ਬਂ. ਸਚੇ ਅਞ੍ਞੋ ਕੋਚਿ ਭਿਕ੍ਖੁ ਕੇਨਚਿਦੇਵ ਕਰਣੀਯੇਨ ਤਂ ਠਾਨਂ ਆਗਚ੍ਛਤਿ, ਸਚੇ ਏਸ ਤਂ ਪਸ੍ਸਤਿ, ਸਦ੍ਦਂ ਵਾਸ੍ਸ ਸੁਣਾਤਿ, ਆਰੋਚੇਤਬ੍ਬਂ. ਅਨਾਰੋਚੇਨ੍ਤਸ੍ਸ ਰਤ੍ਤਿਚ੍ਛੇਦੋ ਚੇਵ ਵਤ੍ਤਭੇਦੋ ਚ. ਅਥ ਦ੍ਵਾਦਸਹਤ੍ਥਂ ਉਪਚਾਰਂ ਓਕ੍ਕਮਿਤ੍ਵਾ ਅਜਾਨਨ੍ਤਸ੍ਸੇਵ ਗਚ੍ਛਤਿ, ਰਤ੍ਤਿਚ੍ਛੇਦੋ ਹੋਤਿ ਏਵ, ਵਤ੍ਤਭੇਦੋ ਪਨ ਨਤ੍ਥੀ’’ਤਿ (ਚੂਲ਼ਵ. ਅਟ੍ਠ. ੯੭). ਇਤਿ ਅਯਮ੍ਪਿ ਪਾਠੋ ਆਰੋਚਨਕ੍ਖੇਤ੍ਤਦੀਪਕੋ ਹੋਤਿ, ਨ ਮਞ੍ਚਪਞ੍ਞਾਪਨਾਦਿਦੀਪਕੋਤਿ ਦਟ੍ਠਬ੍ਬਂ.

ਤਤਿਯਪਾਠਸ੍ਸ ਪਨ ਅਯਮਧਿਪ੍ਪਾਯੋ – ਕਿਂ ਬਹਿਉਪਚਾਰਸੀਮਾਯ ਵਤ੍ਤਸਮਾਦਾਨਟ੍ਠਾਨਂ ਆਗਤਭਿਕ੍ਖੂਨਂ ਦਿਟ੍ਠਰੂਪਾਨਂ ਸੁਤਸਦ੍ਦਾਨਂਯੇਵ ਆਰੋਚੇਤਬ੍ਬਨ੍ਤਿ ਪੁਚ੍ਛਾਯ ਸਤਿ ਅਦਿਟ੍ਠਅਸ੍ਸੁਤਾਨਮ੍ਪਿ ਅਨ੍ਤੋਦ੍ਵਾਦਸਹਤ੍ਥਗਤਾਨਂ ਆਰੋਚੇਤਬ੍ਬਨ੍ਤਿ ਵਿਸ੍ਸਜ੍ਜੇਤਬ੍ਬਨ੍ਤਿ. ਏਤੇਨ ਅਦਿਟ੍ਠਅਸ੍ਸੁਤਾਨਂ ਪਨ ਅਨ੍ਤੋਦ੍ਵਾਦਸਹਤ੍ਥਗਤਾਨਂਯੇਵ ਆਰੋਚੇਤਬ੍ਬਂ, ਨ ਬਹਿਦ੍ਵਾਦਸਹਤ੍ਥਗਤਾਨਂ, ਦਿਟ੍ਠਸੁਤਾਨਂ ਪਨ ਅਨ੍ਤੋਦ੍ਵਾਦਸਹਤ੍ਥਗਤਾਨਮ੍ਪਿ ਬਹਿਦ੍ਵਾਦਸਹਤ੍ਥਗਤਾਨਮ੍ਪਿ ਆਕਾਸਾਦਿਗਤਾਨਮ੍ਪਿ ਆਰੋਚੇਤਬ੍ਬਮੇਵਾਤਿ ਦਸ੍ਸੇਤਿ. ਤੇਨਾਹ ‘‘ਅਯਂ ਪਨੇਤ੍ਥ ਥੇਰਸ੍ਸ ਅਧਿਪ੍ਪਾਯੋ – ਵਤ੍ਤਂ ਨਿਕ੍ਖਿਪਿਤ੍ਵਾ ਪਰਿਵਸਨ੍ਤਸ੍ਸ ਉਪਚਾਰਗਤਾਨਂ ਸਬ੍ਬੇਸਂ ਆਰੋਚਨਕਿਚ੍ਚਂ ਨਤ੍ਥਿ, ਦਿਟ੍ਠਰੂਪਾਨਂ ਸੁਤਸਦ੍ਦਾਨਂ ਆਰੋਚੇਤਬ੍ਬਂ, ਅਦਿਟ੍ਠਅਸ੍ਸੁਤਾਨਮ੍ਪਿ ਅਨ੍ਤੋਦ੍ਵਾਦਸਹਤ੍ਥਗਤਾਨਂ ਆਰੋਚੇਤਬ੍ਬਂ. ਇਦਂ ਵਤ੍ਤਂ ਨਿਕ੍ਖਿਪਿਤ੍ਵਾ ਪਰਿਵਸਨ੍ਤਸ੍ਸ ਲਕ੍ਖਣ’’ਨ੍ਤਿ (ਸਾਰਤ੍ਥ. ਟੀ. ਚੂਲ਼ਵਗ੍ਗ ੩.੯੭). ਇਤਿ ਅਯਮ੍ਪਿ ਪਾਠੋ ਆਰੋਚੇਤਬ੍ਬਲਕ੍ਖਣਦੀਪਕੋ ਹੋਤਿ, ਨ ਮਞ੍ਚਪਞ੍ਞਾਪਨਾਦਿਦੀਪਕੋਤਿ. ਚਤੁਤ੍ਥਪਾਠਸ੍ਸ ਅਧਿਪ੍ਪਾਯੋਪਿ ਤਤਿਯਪਾਠਸ੍ਸ ਅਧਿਪ੍ਪਾਯਸਦਿਸੋਵ.

ਪਞ੍ਚਮਪਾਠਸ੍ਸ ਪਨ ਅਯਮਧਿਪ੍ਪਾਯੋ – ਅਤ੍ਥਿਭਾਵਂ ਸਲ੍ਲਕ੍ਖੇਤ੍ਵਾਤਿ ਏਤ੍ਥ ਏਤਸ੍ਮਿਂ ਅਟ੍ਠਕਥਾਵਚਨੇ ਨਿਕ੍ਖਿਤ੍ਤਵਤ੍ਤਾਨਂ ਭਿਕ੍ਖੂਨਂ ਅਤ੍ਤਨੋ ਨਿਸਿਨ੍ਨਟ੍ਠਾਨਤੋ ਦ੍ਵਾਦਸਹਤ੍ਥੇ ਉਪਚਾਰੇ ਅਞ੍ਞੇਸਂ ਭਿਕ੍ਖੂਨਂ ਅਤ੍ਥਿਭਾਵਂ ਸਲ੍ਲਕ੍ਖੇਤ੍ਵਾ ਅਨਿਕ੍ਖਿਤ੍ਤਵਤ੍ਤਾਨਂ ਉਪਚਾਰਸੀਮਾਯ ਅਞ੍ਞੇਸਂ ਭਿਕ੍ਖੂਨਂ ਆਗਤਭਾਵਂ ਸਲ੍ਲਕ੍ਖੇਤ੍ਵਾ ਸਹਵਾਸਾਦਿਕਂ ਵੇਦਿਤਬ੍ਬਂ. ਆਦਿ-ਸਦ੍ਦੇਨ ਵਿਪ੍ਪਵਾਸਅਨਾਰੋਚਨਊਨੇਗਣੇਚਰਣਾਨਿ ਸਙ੍ਗਣ੍ਹਾਤਿ. ਅਯਞ੍ਚ ਯਸ੍ਮਾ ਗਣਸ੍ਸ ਆਰੋਚੇਤ੍ਵਾ ਭਿਕ੍ਖੂਨਞ੍ਚ ਅਤ੍ਥਿਭਾਵਂ ਸਲ੍ਲਕ੍ਖੇਤ੍ਵਾ ਵਸਿ, ਤਸ੍ਮਾ ਨਿਕ੍ਖਿਤ੍ਤਵਤ੍ਤਾਨਂ ਬਹਿਉਪਚਾਰਸੀਮਾਯ ਸਮਾਦਿਨ੍ਨਤ੍ਤਾ ਅਤ੍ਤਨੋ ਨਿਸਿਨ੍ਨਟ੍ਠਾਨਤੋ ਦ੍ਵਾਦਸਹਤ੍ਥੇ ਉਪਚਾਰੇ ਅਞ੍ਞੇਸਂ ਭਿਕ੍ਖੂਨਂ ਅਤ੍ਥਿਭਾਵਂ ਸਲ੍ਲਕ੍ਖੇਤ੍ਵਾ ਅਨਿਕ੍ਖਿਤ੍ਤਵਤ੍ਤਾਨਂ ਅਨ੍ਤੋਵਿਹਾਰੇ ਸਮਾਦਿਨ੍ਨਤ੍ਤਾ ਉਪਚਾਰਸੀਮਾਯ ਅਞ੍ਞੇਸਂ ਭਿਕ੍ਖੂਨਂ ਆਗਤਭਾਵਂ ਸਲ੍ਲਕ੍ਖੇਤ੍ਵਾ ਸਹਵਾਸਵਿਪ੍ਪਵਾਸਅਨਾਰੋਚਨਊਨੇਗਣੇਚਰਣਸਙ੍ਖਾਤਾਨਿ ਵਤ੍ਤਚ੍ਛੇਦਕਾਰਣਾਨਿ ਵੇਦਿਤਬ੍ਬਾਨੀਤਿ. ਵੁਤ੍ਤਞ੍ਹਿ ਅਟ੍ਠਕਥਾਯਂ (ਚੂਲ਼ਵ. ਅਟ੍ਠ. ੯੭) ‘‘ਅਯਞ੍ਚ ਯਸ੍ਮਾ ਗਣਸ੍ਸ ਆਰੋਚੇਤ੍ਵਾ ਭਿਕ੍ਖੂਨਞ੍ਚ ਅਤ੍ਥਿਭਾਵਂ ਸਲ੍ਲਕ੍ਖੇਤ੍ਵਾਵ ਵਸਿ, ਤੇਨਸ੍ਸ ਊਨੇਗਣੇਚਰਣਦੋਸੋ ਵਾ ਵਿਪ੍ਪਵਾਸੋ ਵਾ ਨ ਹੋਤੀ’’ਤਿ. ਇਤਿ ਅਯਞ੍ਚ ਪਾਠੋ ਪਕਤਤ੍ਤਭਿਕ੍ਖੂਸੁ ਗਤੇਸੁਪਿ ਵਤ੍ਤਂ ਆਰੋਚੇਤ੍ਵਾ ਭਿਕ੍ਖੂਨਂ ਅਤ੍ਥਿਭਾਵਂ ਸਲ੍ਲਕ੍ਖੇਤ੍ਵਾ ਵਸਿਤਤ੍ਤਾ ਦੋਸਾਭਾਵਮੇਵ ਦੀਪੇਤਿ, ਨ ਮਞ੍ਚਪਞ੍ਞਾਪਨਾਦੀਨਿ. ਇਤਿ ਇਮੇਸਂ ਪਾਠਾਨਂ ਅਯੋਨਿਸੋ ਅਧਿਪ੍ਪਾਯਂ ਗਹੇਤ੍ਵਾ ‘‘ਸਬ੍ਬਤ੍ਥ ਦ੍ਵਾਦਸਹਤ੍ਥਮੇਵ ਪਮਾਣ’’ਨ੍ਤਿ ਮਞ੍ਞਮਾਨਾ ਵਿਚਾਰਿਂਸੁ, ਤੇਸਂ ਦਿਟ੍ਠਾਨੁਗਤਿਂ ਆਪਜ੍ਜਮਾਨਾ ਸਿਸ੍ਸਾਨੁਸਿਸ੍ਸਾਦਯੋਪਿ ਤਥੇਵ ਕਰੋਨ੍ਤਿ, ਤਦੇਤਂ ਅਪ੍ਪਮਾਣਂ.

ਕਥਂ? ਯਂ ਤਤ੍ਥ ਪਕਤਤ੍ਤਸਾਲਾਯ ਮਜ੍ਝੇ ਥਮ੍ਭਂ ਨਿਮਿਤ੍ਤਂ ਕਤ੍ਵਾ ਦ੍ਵਾਦਸਹਤ੍ਥਂ ਮਿਨਿਂਸੁ, ਤਦਪ੍ਪਮਾਣਂ. ਨ ਹਿ ਥਮ੍ਭੇਨ ਵਾ ਸਾਲਾਯ ਵਾ ਸਹਵਾਸੋ ਵਾ ਵਿਪ੍ਪਵਾਸੋ ਵਾ ਵੁਤ੍ਤੋ, ਅਥ ਖੋ ਪਕਤਤ੍ਤਭਿਕ੍ਖੁਨਾਵ. ਵੁਤ੍ਤਞ੍ਹਿ ਸਮਨ੍ਤਪਾਸਾਦਿਕਾਯਂ (ਚੂਲ਼ਵ. ਅਟ੍ਠ. ੮੩) ‘‘ਤਤ੍ਥ ਸਹਵਾਸੋਤਿ ਯ੍ਵਾਯਂ ਪਕਤਤ੍ਤੇਨ ਭਿਕ੍ਖੁਨਾ ਸਦ੍ਧਿਂ ਏਕਚ੍ਛਨ੍ਨੇਤਿਆਦਿਨਾ ਨਯੇਨ ਵੁਤ੍ਤੋ ਏਕਤੋ ਵਾਸੋ. ਵਿਪ੍ਪਵਾਸੋਤਿ ਏਕਕਸ੍ਸੇਵ ਵਾਸੋ’’ਤਿ. ਯਞ੍ਹਿ ਤਤੋ ਦ੍ਵਾਦਸਹਤ੍ਥਮਤ੍ਤਟ੍ਠਾਨੇ ਭਿਕ੍ਖੁਸ੍ਸ ਗੀਵਾਟ੍ਠਪਨਂ ਵਾ ਕਟਿਟ੍ਠਪਨਂ ਵਾ ਵਦਨ੍ਤਿ, ਤਦਪਿ ਅਪ੍ਪਮਾਣਂ. ਬਹਿਉਪਚਾਰਸੀਮਾਯ ਹਿ ਪਰਿਵਸਨ੍ਤਸ੍ਸ ਭਿਕ੍ਖੁਸ੍ਸ ਸਕਲਸਰੀਰਂ ਪਕਤਤ੍ਤਭਿਕ੍ਖੂਨਂ ਅਨ੍ਤੋਦ੍ਵਾਦਸਹਤ੍ਥੇ ਉਪਚਾਰੇ ਠਪੇਤਬ੍ਬਂ ਹੋਤਿ, ਨ ਏਕਦੇਸਮਤ੍ਤਂ.

ਤੇਸਂ ਪਨ ਅਯਮਧਿਪ੍ਪਾਯੋ ਸਿਯਾ – ਦ੍ਵਾਦਸਹਤ੍ਥਪ੍ਪਦੇਸਤੋ ਸਕਲਸਰੀਰਸ੍ਸ ਅਨ੍ਤੋਕਰਣੇ ਸਤਿ ਸਹਵਾਸੋ ਭਵੇਯ੍ਯ, ਬਹਿਕਰਣੇ ਸਤਿ ਵਿਪ੍ਪਵਾਸੋ, ਤੇਨ ਉਪਡ੍ਢਂ ਅਨ੍ਤੋ ਉਪਡ੍ਢਂ ਬਹਿ ਹੋਤੂਤਿ, ਤਂ ਮਿਚ੍ਛਾਞਾਣਵਸੇਨ ਹੋਤਿ. ਨ ਹਿ ਸਹਵਾਸਦੋਸੋ ਦ੍ਵਾਦਸਹਤ੍ਥੇਨ ਕਥਿਤੋ, ਅਥ ਖੋ ਏਕਚ੍ਛਨ੍ਨੇ ਸਯਨੇਨ. ਵੁਤ੍ਤਞ੍ਹੇਤਂ ਭਗਵਤਾ ਪਾਰਿਵਾਸਿਕਕ੍ਖਨ੍ਧਕੇ (ਚੂਲ਼ਵ. ੮੧) ‘‘ਨ, ਭਿਕ੍ਖਵੇ, ਪਾਰਿਵਾਸਿਕੇਨ ਭਿਕ੍ਖੁਨਾ ਪਕਤਤ੍ਤੇਨ ਭਿਕ੍ਖੁਨਾ ਸਦ੍ਧਿਂ ਏਕਚ੍ਛਨ੍ਨੇ ਆਵਾਸੇ ਵਤ੍ਥਬ੍ਬਂ, ਨ ਏਕਚ੍ਛਨ੍ਨੇ ਅਨਾਵਾਸੇ ਵਤ੍ਥਬ੍ਬਂ, ਨ ਏਕਚ੍ਛਨ੍ਨੇ ਆਵਾਸੇ ਵਾ ਅਨਾਵਾਸੇ ਵਾ ਵਤ੍ਥਬ੍ਬ’’ਨ੍ਤਿ. ਅਟ੍ਠਕਥਾਯਮ੍ਪਿ (ਚੂਲ਼ਵ. ਅਟ੍ਠ. ੮੧) ਵੁਤ੍ਤਂ ‘‘ਏਕਚ੍ਛਨ੍ਨੇ ਆਵਾਸੇ’’ਤਿਆਦੀਸੁ ਆਵਾਸੋ ਨਾਮ ਵਸਨਤ੍ਥਾਯ ਕਤਸੇਨਾਸਨਂ. ਅਨਾਵਾਸੋ ਨਾਮ ਚੇਤਿਯਘਰਂ ਬੋਧਿਘਰਂ ਸਮ੍ਮੁਞ੍ਜਨਿਅਟ੍ਟਕੋ ਦਾਰੁਅਟ੍ਟਕੋ ਪਾਨੀਯਮਾਲ਼ੋ ਵਚ੍ਚਕੁਟਿ ਦ੍ਵਾਰਕੋਟ੍ਠਕੋਤਿ ਏਵਮਾਦਿ. ਤਤਿਯਪਦੇਨ ਤਦੁਭਯਮ੍ਪਿ ਗਹਿਤਂ, ‘ਏਤੇਸੁ ਯਤ੍ਥ ਕਤ੍ਥਚਿ ਏਕਚ੍ਛਨ੍ਨੇ ਛਦਨਤੋ ਉਦਕਪਤਨਟ੍ਠਾਨਪਰਿਚ੍ਛਿਨ੍ਨੇ ਓਕਾਸੇ ਉਕ੍ਖਿਤ੍ਤਕੋ ਵਸਿਤੁਂ ਨ ਲਭਤਿ, ਪਾਰਿਵਾਸਿਕੋ ਪਨ ਅਨ੍ਤੋਆਵਾਸੇਯੇਵ ਨ ਲਭਤੀ’ਤਿ ਮਹਾਪਚ੍ਚਰਿਯਂ ਵੁਤ੍ਤਂ. ਮਹਾਅਟ੍ਠਕਥਾਯਂ ਪਨ ‘ਅਵਿਸੇਸੇਨ ਉਦਕਪਾਤੇਨ ਵਾਰਿਤ’ਨ੍ਤਿ ਵੁਤ੍ਤਂ. ਕੁਰੁਨ੍ਦਿਯਂ ‘ਏਤੇਸੁ ਏਤ੍ਤਕੇਸੁ ਪਞ੍ਚਵਣ੍ਣਛਦਨਬਦ੍ਧਟ੍ਠਾਨੇਸੁ ਪਾਰਿਵਾਸਿਕਸ੍ਸ ਚ ਉਕ੍ਖਿਤ੍ਤਕਸ੍ਸ ਚ ਪਕਤਤ੍ਤੇਨ ਸਦ੍ਧਿਂ ਉਦਕਪਾਤੇਨ ਵਾਰਿਤ’ਨ੍ਤਿ ਵੁਤ੍ਤਂ, ਤਸ੍ਮਾ ਨਾਨੂਪਚਾਰੇਪਿ ਏਕਚ੍ਛਨ੍ਨੇ ਨ ਵਟ੍ਟਤਿ. ਸਚੇ ਪਨੇਤ੍ਥ ਤਦਹੁਪਸਮ੍ਪਨ੍ਨੇਪਿ ਪਕਤਤ੍ਤੇ ਪਠਮਂ ਪਵਿਸਿਤ੍ਵਾ ਨਿਪਨ੍ਨੇ ਸਟ੍ਠਿਵਸ੍ਸੋਪਿ ਪਾਰਿਵਾਸਿਕੋ ਪਚ੍ਛਾ ਪਵਿਸਿਤ੍ਵਾ ਜਾਨਨ੍ਤੋ ਨਿਪਜ੍ਜਤਿ, ਰਤ੍ਤਿਚ੍ਛੇਦੋ ਚੇਵ ਵਤ੍ਤਭੇਦਦੁਕ੍ਕਟਞ੍ਚ, ਅਜਾਨਨ੍ਤਸ੍ਸ ਰਤ੍ਤਿਚ੍ਛੇਦੋਵ, ਨ ਵਤ੍ਤਭੇਦਦੁਕ੍ਕਟਂ. ਸਚੇ ਪਨ ਤਸ੍ਮਿਂ ਪਠਮਂ ਨਿਪਨ੍ਨੇ ਪਚ੍ਛਾ ਪਕਤਤ੍ਤੋ ਪਵਿਸਿਤ੍ਵਾ ਨਿਪਜ੍ਜਤਿ, ਪਾਰਿਵਾਸਿਕੋ ਚ ਜਾਨਾਤਿ, ਰਤ੍ਤਿਚ੍ਛੇਦੋ ਚੇਵ ਵਤ੍ਤਭੇਦਦੁਕ੍ਕਟਞ੍ਚ. ਨੋ ਚੇ ਜਾਨਾਤਿ, ਰਤ੍ਤਿਚ੍ਛੇਦੋਵ, ਨ ਵਤ੍ਤਭੇਦਦੁਕ੍ਕਟਨ੍ਤਿ, ਤਸ੍ਮਾ ਸਾਲਾਯਪਿ ਵਿਹਾਰੇਪਿ ਛਦਨਤੋ ਉਦਕਪਤਨਟ੍ਠਾਨਤੋ ਮੁਤ੍ਤਮਤ੍ਤੇਯੇਵ ਸਹਵਾਸਦੋਸੋ ਨ ਵਿਜ੍ਜਤੀਤਿ ਦਟ੍ਠਬ੍ਬਂ.

ਏਕਚ੍ਚੇ ਪਨ ਮਜ੍ਝਿਮਤ੍ਥਮ੍ਭਤੋ ਦ੍ਵਾਦਸਹਤ੍ਥਾਯਾਮੇਨ ਦਣ੍ਡਕੇਨ ਚਕ੍ਕਂ ਭਮਿਤ੍ਵਾ ਸਮਨ੍ਤਤੋ ਬਾਹਿਰੇ ਲੇਖਂ ਕਰੋਨ੍ਤਿ, ਏਵਂ ਕਤੇ ਸਾ ਬਾਹਿਰਲੇਖਾ ਆਵਟ੍ਟਤੋ ਦ੍ਵਾਸਤ੍ਤਤਿਹਤ੍ਥਮਤ੍ਤਾ ਹੋਤਿ, ਤਤੋ ਤਂ ਪਦੇਸਂ ਦ੍ਵਾਦਸਹਤ੍ਥੇਨ ਦਣ੍ਡਕੇਨ ਮਿਨਿਤ੍ਵਾ ਭਾਜਿਯਮਾਨਂ ਛਭਾਗਮੇਵ ਹੋਤਿ, ਤਤੋ ਤੇਸਂ ਛਭਾਗਾਨਂ ਸੀਮਾਯ ਏਕੇਕਸ੍ਮਿਂ ਮਞ੍ਚੇ ਪਞ੍ਞਪਿਯਮਾਨੇ ਛਲ਼ੇਵ ਮਞ੍ਚਟ੍ਠਾਨਾਨਿ ਹੋਨ੍ਤਿ, ਤਸ੍ਮਾ ਏਕਸ੍ਮਿਂ ਵਟ੍ਟਮਣ੍ਡਲੇ ਛ ਭਿਕ੍ਖੂਯੇਵ ਅਪੁਬ੍ਬਂ ਅਚਰਿਮਂ ਵਸਿਤੁਂ ਲਭਨ੍ਤਿ, ਨ ਤਤੋ ਉਦ੍ਧਨ੍ਤਿ ਵਦਨ੍ਤਿ. ਕਸ੍ਮਾ ਪਨ ਏਵਂ ਕਰੋਨ੍ਤੀਤਿ? ਪੁਬ੍ਬੇ ਵੁਤ੍ਤਨਯੇਨ ‘‘ਸਬ੍ਬਤ੍ਥ ਦ੍ਵਾਦਸਹਤ੍ਥਮਤ੍ਤਮੇਵ ਪਮਾਣ’’ਨ੍ਤਿ ਗਹਿਤਤ੍ਤਾ. ਏਵਂ ਕਿਰ ਨੇਸਮਧਿਪ੍ਪਾਯੋ – ਪਾਰਿਵਾਸਿਕੋ ਪਕਤਤ੍ਤਸ੍ਸ ਭਿਕ੍ਖੁਨੋ ਦ੍ਵਾਦਸਹਤ੍ਥਬ੍ਭਨ੍ਤਰੇ ਸਯਮਾਨੋ ਸਹਵਾਸੋ ਸਿਯਾ, ਬਾਹਿਰੇ ਸਯਮਾਨੋ ਵਿਪ੍ਪਵਾਸੋ, ਤਥਾ ਅਞ੍ਞਮਞ੍ਞਸ੍ਸਪੀਤਿ. ਏਵਂ ਕਰੋਨ੍ਤਾਨਂ ਪਨ ਨੇਸਂ ਸਕਅਧਿਪ੍ਪਾਯੋਪਿ ਨ ਸਿਜ੍ਝਤਿ, ਕੁਤੋ ਭਗਵਤੋ ਅਧਿਪ੍ਪਾਯੋ.

ਕਥਂ? ਪਾਰਿਵਾਸਿਕੋ ਭਿਕ੍ਖੁ ਪਕਤਤ੍ਤਭਿਕ੍ਖੂਨਞ੍ਚ ਅਞ੍ਞਮਞ੍ਞਸ੍ਸ ਚ ਦ੍ਵਾਦਸਹਤ੍ਥਮਤ੍ਤੇ ਪਦੇਸੇ ਹੋਤੂਤਿ ਨੇਸਮਧਿਪ੍ਪਾਯੋ. ਅਥ ਪਨ ਮਜ੍ਝਿਮਤ੍ਥਮ੍ਭਂ ਨਿਮਿਤ੍ਤਂ ਕਤ੍ਵਾ ਮਿਨਿਯਮਾਨਾ ਸਮਨ੍ਤਤੋ ਬਾਹਿਰਲੇਖਾ ਥਮ੍ਭਤੋਯੇਵ ਦ੍ਵਾਦਸਹਤ੍ਥਮਤ੍ਤਾ ਹੋਤਿ, ਨ ਪਕਤਤ੍ਤਭਿਕ੍ਖੂਹਿ. ਤੇ ਹਿ ਥਮ੍ਭਤੋ ਬਹਿ ਏਕਰਤਨਦ੍ਵਿਤਿਰਤਨਾਦਿਟ੍ਠਾਨੇ ਠਿਤਾ, ਬਾਹਿਰਤੋਪਿ ਲੇਖਾਯੇਵ ਥਮ੍ਭਤੋ ਦ੍ਵਾਦਸਹਤ੍ਥਮਤ੍ਤਾ ਹੋਤਿ, ਨ ਤਸ੍ਸੂਪਰਿ ਨਿਪਨ੍ਨਭਿਕ੍ਖੁ. ਸੋ ਹਿ ਦ੍ਵਿਰਤਨਮਤ੍ਤੇਨਪਿ ਤਿਰਤਨਮਤ੍ਤੇਨਪਿ ਲੇਖਾਯ ਅਨ੍ਤੋਪਿ ਹੋਤਿ ਬਹਿਪਿ. ਅਞ੍ਞਮਞ੍ਞਸ੍ਸਪਿ ਛਭਾਗਸੀਮਾਯੇਵ ਅਞ੍ਞਮਞ੍ਞਸ੍ਸ ਦ੍ਵਾਦਸਹਤ੍ਥਮਤ੍ਤਾ ਹੋਤਿ, ਨ ਤਸ੍ਸੂਪਰਿ ਪਞ੍ਞਤ੍ਤਮਞ੍ਚੋ ਵਾ ਤਤ੍ਥ ਨਿਪਨ੍ਨਭਿਕ੍ਖੁ ਵਾ. ਮਞ੍ਚੋ ਹਿ ਏਕਰਤਨਮਤ੍ਤੇਨ ਵਾ ਦ੍ਵਿਰਤਨਮਤ੍ਤੇਨ ਵਾ ਸੀਮਂ ਅਤਿਕ੍ਕਮਿਤ੍ਵਾ ਠਿਤੋ, ਭਿਕ੍ਖੂਪਿ ਸਯਮਾਨਾ ਨ ਸੀਮਾਯ ਉਪਰਿਯੇਵ ਸਯਨ੍ਤਿ, ਵਿਦਤ੍ਥਿਮਤ੍ਤੇਨ ਵਾ ਰਤਨਮਤ੍ਤੇਨ ਵਾ ਸੀਮਂ ਅਤਿਕ੍ਕਮਿਤ੍ਵਾ ਵਾ ਅਪ੍ਪਤ੍ਵਾ ਵਾ ਸਯਨ੍ਤਿ, ਤਸ੍ਮਾ ਤੇ ਪਾਰਿਵਾਸਿਕਾ ਭਿਕ੍ਖੂ ਪਕਤਤ੍ਤਭਿਕ੍ਖੂਨਮ੍ਪਿ ਅਞ੍ਞਮਞ੍ਞਸ੍ਸਪਿ ਦ੍ਵਾਦਸਹਤ੍ਥਮਤ੍ਤਟ੍ਠਾਯਿਨੋ ਨ ਹੋਨ੍ਤਿ, ਤਤੋ ਊਨਾਵ ਹੋਨ੍ਤਿ, ਤਸ੍ਮਾ ਸਕਅਧਿਪ੍ਪਾਯੋਪਿ ਨ ਸਿਜ੍ਝਤਿ.

ਭਗਵਤੋ ਪਨ ਅਧਿਪ੍ਪਾਯੋ – ਯਦਿ ਅਪ੍ਪਭਿਕ੍ਖੁਕਾਦਿਅਙ੍ਗਸਮ੍ਪਨ੍ਨਤ੍ਤਾ ਵਿਹਾਰਸ੍ਸ ਵਤ੍ਤਂ ਅਨਿਕ੍ਖਿਪਿਤ੍ਵਾ ਅਨ੍ਤੋਵਿਹਾਰੇਯੇਵ ਪਰਿਵਸਤਿ, ਏਵਂ ਸਤਿ ਪਕਤਤ੍ਤੇਨ ਭਿਕ੍ਖੁਨਾ ਨ ਏਕਚ੍ਛਨ੍ਨੇ ਆਵਾਸੇ ਵਸਿਤਬ੍ਬਂ. ਯਦਿ ਤਾਦਿਸਆਵਾਸੇ ਵਾ ਅਨਾਵਾਸੇ ਵਾ ਛਦਨਤੋ ਉਦਕਪਤਨਟ੍ਠਾਨਸ੍ਸ ਅਨ੍ਤੋ ਸਯੇਯ੍ਯ, ਸਹਵਾਸੋ ਨਾਮ, ਰਤ੍ਤਿਚ੍ਛੇਦੋ ਹੋਤੀਤਿ ਅਯਮਤ੍ਥੋ ਯਥਾਵੁਤ੍ਤ-ਪਾਲ਼ਿਯਾ ਚ ਅਟ੍ਠਕਥਾਯ ਚ ਪਕਾਸੇਤਬ੍ਬੋ. ਨ ਏਕਚ੍ਛਨ੍ਨੇ ਆਵਾਸੇ ਦ੍ਵੀਹਿ ਵਤ੍ਥਬ੍ਬਂ. ਯਦਿ ਵਸੇਯ੍ਯ, ਵੁਡ੍ਢਸ੍ਸ ਰਤ੍ਤਿਚ੍ਛੇਦੋਯੇਵ, ਨਵਕਸ੍ਸ ਰਤ੍ਤਿਚ੍ਛੇਦੋ ਚੇਵ ਵਤ੍ਤਭੇਦਦੁਕ੍ਕਟਞ੍ਚ ਹੋਤਿ. ਸਮਵਸ੍ਸਾ ਚੇ, ਅਜਾਨਨ੍ਤਸ੍ਸ ਰਤ੍ਤਿਚ੍ਛੇਦੋਯੇਵ, ਜਾਨਨ੍ਤਸ੍ਸ ਉਭਯਮ੍ਪੀਤਿ ਅਯਮਤ੍ਥੋ ‘‘ਤਯੋ ਖੋ, ਉਪਾਲਿ, ਪਾਰਿਵਾਸਿਕਸ੍ਸ ਭਿਕ੍ਖੁਨੋ ਰਤ੍ਤਿਚ੍ਛੇਦਾ ਸਹਵਾਸੋ ਵਿਪ੍ਪਵਾਸੋ ਅਨਾਰੋਚਨਾ’’ਤਿ ਚ ‘‘ਨ, ਭਿਕ੍ਖਵੇ, ਪਾਰਿਵਾਸਿਕੇਨ ਭਿਕ੍ਖੁਨਾ ਪਾਰਿਵਾਸਿਕੇਨ ਵੁਡ੍ਢਤਰੇਨ ਸਦ੍ਧਿਂ ਨ ਏਕਚ੍ਛਨ੍ਨੇ ਆਵਾਸੇ ਵਤ੍ਥਬ੍ਬ’’ਨ੍ਤਿ (ਚੂਲ਼ਵ. ੮੨) ਚ ‘‘ਵੁਡ੍ਢਤਰੇਨਾਤਿ ਏਤ੍ਥ…ਪੇ… ਸਚੇ ਹਿ ਦ੍ਵੇ ਪਾਰਿਵਾਸਿਕਾ ਏਕਤੋ ਵਸੇਯ੍ਯੁਂ, ਤੇ ਅਞ੍ਞਮਞ੍ਞਸ੍ਸ ਅਜ੍ਝਾਚਾਰਂ ਞਤ੍ਵਾ ਅਗਾਰਵਾ ਵਾ ਵਿਪ੍ਪਟਿਸਾਰਿਨੋ ਵਾ ਹੁਤ੍ਵਾ ਪਾਪਿਟ੍ਠਤਰਂ ਵਾ ਆਪਤ੍ਤਿਂ ਆਪਜ੍ਜੇਯ੍ਯੁਂ ਵਿਬ੍ਭਮੇਯ੍ਯੁਂ ਵਾ, ਤਸ੍ਮਾ ਨੇਸਂ ਸਹਸੇਯ੍ਯਾ ਸਬ੍ਬਪ੍ਪਕਾਰੇਨ ਪਟਿਕ੍ਖਿਤ੍ਤਾ’’ਤਿ (ਚੂਲ਼ਵ. ਅਟ੍ਠ. ੮੧) ਚ ਇਮੇਹਿ ਪਾਲ਼ਿਅਟ੍ਠਕਥਾਪਾਠੇਹਿ ਪਕਾਸੇਤਬ੍ਬੋ. ਵਿਪ੍ਪਵਾਸੇਪਿ ਪਾਰਿਵਾਸਿਕੇਨ ਅਭਿਕ੍ਖੁਕੇ ਆਵਾਸੇ ਨ ਵਤ੍ਥਬ੍ਬਂ, ਪਕਤਤ੍ਤੇਨ ਵਿਨਾ ਅਭਿਕ੍ਖੁਕੋ ਆਵਾਸੋ ਨ ਗਨ੍ਤਬ੍ਬੋ, ਬਹਿਸੀਮਾਯਂ ਭਿਕ੍ਖੂਨਂ ਵਸਨਟ੍ਠਾਨਤੋ ਦ੍ਵਾਦਸਹਤ੍ਥਪ੍ਪਮਾਣਸ੍ਸ ਉਪਚਾਰਸ੍ਸ ਅਨ੍ਤੋ ਨਿਸੀਦਿਤਬ੍ਬਨ੍ਤਿ ਭਗਵਤੋ ਅਧਿਪ੍ਪਾਯੋ.

ਅਯਮਤ੍ਥੋ ‘‘ਨ, ਭਿਕ੍ਖਵੇ, ਪਾਰਿਵਾਸਿਕੇਨ ਭਿਕ੍ਖੁਨਾ ਸਭਿਕ੍ਖੁਕਾ ਆਵਾਸਾ ਅਭਿਕ੍ਖੁਕੋ ਆਵਾਸੋ ਗਨ੍ਤਬ੍ਬੋ ਅਞ੍ਞਤ੍ਰ ਪਕਤਤ੍ਤੇਨ ਅਞ੍ਞਤ੍ਰ ਅਨ੍ਤਰਾਯਾ’’ਤਿਆਦਿ (ਚੂਲ਼ਵ. ੭੬) ਚ ‘‘ਤਯੋ ਖੋ, ਉਪਾਲਿ…ਪੇ… ਅਨਾਰੋਚਨਾ’’ਤਿ ਚ ‘‘ਚਤ੍ਤਾਰੋ ਖੋ, ਉਪਾਲਿ, ਮਾਨਤ੍ਤਚਾਰਿਕਸ੍ਸ ਭਿਕ੍ਖੁਨੋ ਰਤ੍ਤਿਚ੍ਛੇਦਾ ਸਹਵਾਸੋ, ਵਿਪ੍ਪਵਾਸੋ, ਅਨਾਰੋਚਨਾ, ਊਨੇਗਣੇਚਰਣ’’ਨ੍ਤਿ (ਚੂਲ਼ਵ. ੯੨) ਚ ‘‘ਵਿਪ੍ਪਵਾਸੋਤਿ ਏਕਕਸ੍ਸੇਵ ਵਾਸੋ’’ਤਿ ਚ ‘‘ਅਯਞ੍ਚ ਯਸ੍ਮਾ ਗਣਸ੍ਸ ਆਰੋਚੇਤ੍ਵਾ ਭਿਕ੍ਖੂਨਞ੍ਚ ਅਤ੍ਥਿਭਾਵਂ ਸਲ੍ਲਕ੍ਖੇਤ੍ਵਾਵ ਵਸਿ, ਤੇਨਸ੍ਸ ਊਨੇਗਣੇਚਰਣਦੋਸੋ ਵਾ ਵਿਪ੍ਪਵਾਸੋ ਵਾ ਨ ਹੋਤੀ’’ਤਿ ਚ ‘‘ਅਤ੍ਥਿਭਾਵਂ ਸਲ੍ਲਕ੍ਖੇਤ੍ਵਾਤਿ ਦ੍ਵਾਦਸਹਤ੍ਥੇ ਉਪਚਾਰੇ ਸਲ੍ਲਕ੍ਖੇਤ੍ਵਾ, ਅਨਿਕ੍ਖਿਤ੍ਤਵਤ੍ਤਾਨਂ ਉਪਚਾਰਸੀਮਾਯ ਆਗਤਭਾਵਂ ਸਲ੍ਲਕ੍ਖੇਤ੍ਵਾ ਸਹਵਾਸਾਦਿਕਂ ਵੇਦਿਤਬ੍ਬ’’ਨ੍ਤਿ ਚ ਆਗਤੇਹਿ ਪਾਲ਼ਿਯਟ੍ਠਕਥਾ-ਵਜਿਰਬੁਦ੍ਧਿਟੀਕਾਪਾਠੇਹਿ ਪਕਾਸੇਤਬ੍ਬੋ, ਤਸ੍ਮਾ ਵਿਹਾਰੇ ਪਰਿਵਸਨ੍ਤਸ੍ਸ ਉਪਚਾਰਸੀਮਾਯ ਅਬ੍ਭਨ੍ਤਰੇ ਯਤ੍ਥ ਕਤ੍ਥਚਿ ਵਸਨ੍ਤਸ੍ਸ ਨਤ੍ਥਿ ਵਿਪ੍ਪਵਾਸੋ, ਬਹਿਉਪਚਾਰਸੀਮਾਯਂ ਪਰਿਵਸਨ੍ਤਸ੍ਸ ਭਿਕ੍ਖੂਨਂ ਨਿਸਿਨ੍ਨਪਰਿਯਨ੍ਤਤੋ ਦ੍ਵਾਦਸਹਤ੍ਥਬ੍ਭਨ੍ਤਰੇ ਵਸਨ੍ਤਸ੍ਸ ਚ ਨਤ੍ਥਿ ਵਿਪ੍ਪਵਾਸੋਤਿ, ਤਞ੍ਚ ਪਰਿਵਾਸਕਾਲੇ ‘‘ਏਕੇਨ ਭਿਕ੍ਖੁਨਾ ਸਦ੍ਧਿ’’ਨ੍ਤਿ ਵਚਨਤੋ ਏਕਸ੍ਸਪਿ ਭਿਕ੍ਖੁਨੋ, ਮਾਨਤ੍ਤਚਰਣਕਾਲੇ ‘‘ਚਤੂਹਿ ਪਞ੍ਚਹਿ ਵਾ ਭਿਕ੍ਖੂਹਿ ਸਦ੍ਧਿ’’ਨ੍ਤਿ (ਚੂਲ਼ਵ. ਅਟ੍ਠ. ੧੦੨) ਵਚਨਤੋ ਚ ਚਤੁਨ੍ਨਂ ਪਞ੍ਚਨ੍ਨਮ੍ਪਿ ਭਿਕ੍ਖੂਨਂ ਹਤ੍ਥਪਾਸਭੂਤੇ ਦ੍ਵਾਦਸਹਤ੍ਥਬ੍ਭਨ੍ਤਰੇਪਿ ਵਸਿਤੁਂ ਲਭਤਿ, ਨਤ੍ਥਿ ਵਿਪ੍ਪਵਾਸੋਤਿ ਦਟ੍ਠਬ੍ਬਂ.

ਵਤ੍ਤਂ ਸਮਾਦਿਯਿਤ੍ਵਾ ਤੇਸਂ ਭਿਕ੍ਖੂਨਂ ਆਰੋਚਿਤਕਾਲਤੋ ਪਨ ਪਟ੍ਠਾਯ ਕੇਨਚਿ ਕਰਣੀਯੇਨ ਤੇਸੁ ਭਿਕ੍ਖੂਸੁ ਗਤੇਸੁਪਿ ਯਥਾਵੁਤ੍ਤਅਟ੍ਠਕਥਾਪਾਠਨਯੇਨ ਵਿਪ੍ਪਵਾਸੋ ਨ ਹੋਤਿ. ਤਥਾ ਹਿ ਵੁਤ੍ਤਂ ਵਿਮਤਿਵਿਨੋਦਨਿਯਂ (ਵਿ. ਵਿ. ਟੀ. ਚੂਲ਼ਵਗ੍ਗ ੨.੯੭) ‘‘ਸੋਪਿ ਕੇਨਚਿ ਕਮ੍ਮੇਨ ਪੁਰੇਅਰੁਣੇ ਏਵ ਗਚ੍ਛਤੀਤਿ ਇਮਿਨਾ ਆਰੋਚਨਾਯ ਕਤਾਯ ਸਬ੍ਬੇਸੁਪਿ ਭਿਕ੍ਖੂਸੁ ਬਹਿਵਿਹਾਰਂ ਗਤੇਸੁ ਊਨੇਗਣੇਚਰਣਦੋਸੋ ਵਾ ਵਿਪ੍ਪਵਾਸਦੋਸੋ ਵਾ ਨ ਹੋਤਿ ਆਰੋਚਿਤਤ੍ਤਾ ਸਹਵਾਸਸ੍ਸਾਤਿ ਦਸ੍ਸੇਤਿ. ਤੇਨਾਹ ‘ਅਯਞ੍ਚਾ’ਤਿਆਦੀ’’ਤਿ. ਅਪਰੇ ਪਨ ਆਚਰਿਯਾ ‘‘ਬਹਿਸੀਮਾਯ ਵਤ੍ਤਸਮਾਦਾਨਟ੍ਠਾਨੇ ਵਤਿਪਰਿਕ੍ਖੇਪੋਪਿ ਪਕਤਤ੍ਤਭਿਕ੍ਖੂਹੇਵ ਕਾਤਬ੍ਬੋ, ਨ ਕਮ੍ਮਾਰਹਭਿਕ੍ਖੂਹਿ. ਯਥਾ ਲੋਕੇ ਬਨ੍ਧਨਾਗਾਰਾਦਿ ਦਣ੍ਡਕਾਰਕੇਹਿ ਏਵ ਕਤ੍ਤਬ੍ਬਂ, ਨ ਦਣ੍ਡਾਰਹੇਹਿ, ਏਵਮਿਧਾਪੀ’’ਤਿ ਵਦਨ੍ਤਿ, ਤਮ੍ਪਿ ਅਟ੍ਠਕਥਾਦੀਸੁ ਨ ਦਿਸ੍ਸਤਿ. ਨ ਹਿ ਵਤਿਪਰਿਕ੍ਖੇਪੋ ਦਣ੍ਡਕਮ੍ਮਤ੍ਥਾਯ ਕਾਰਿਤੋ, ਅਥ ਖੋ ਦਸ੍ਸਨੂਪਚਾਰਵਿਜਹਨਤ੍ਥਮੇਵ. ਤਥਾ ਹਿ ਵੁਤ੍ਤਂ ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ਚੂਲ਼ਵਗ੍ਗ ੩.੯੭) ‘‘ਗੁਮ੍ਬੇਨ ਵਾ ਵਤਿਯਾ ਵਾ ਪਟਿਚ੍ਛਨ੍ਨਟ੍ਠਾਨੇਤਿ ਦਸ੍ਸਨੂਪਚਾਰਵਿਜਹਨਤ੍ਥ’’ਨ੍ਤਿ. ਤਥਾ ਵਿਮਤਿਵਿਨੋਦਨਿਯਮ੍ਪਿ (ਵਿ. ਵਿ. ਟੀ. ਚੂਲ਼ਵਗ੍ਗ ੨.੯੭) ‘‘ਗੁਮ੍ਬੇਨ ਵਾਤਿਆਦਿ ਦਸ੍ਸਨੂਪਚਾਰਵਿਜਹਨਤ੍ਥ’’ਨ੍ਤਿ. ਇਤੋ ਪਰਂ ਅਟ੍ਠਕਥਾਯਂ ਵੁਤ੍ਤਨਯੇਨੇਵ ਪਰਿਵਾਸਦਾਨਞ੍ਚ ਮਾਨਤ੍ਤਦਾਨਞ੍ਚ ਵੇਦਿਤਬ੍ਬਂ. ਯਤ੍ਥ ਪਨ ਸਂਸਯਿਤਬ੍ਬਂ ਅਤ੍ਥਿ, ਤਤ੍ਥ ਸਂਸਯਵਿਨੋਦਨਤ੍ਥਾਯ ਕਥੇਤਬ੍ਬਂ ਕਥਯਾਮ.

ਏਕਚ੍ਚੇ ਭਿਕ੍ਖੂ ਏਵਂ ਵਦਨ੍ਤਿ – ਪਾਰਿਵਾਸਿਕੋ ਭਿਕ੍ਖੁ ਵੁਡ੍ਢਤਰੋਪਿ ਸਮਾਨੋ ਵਤ੍ਤੇ ਸਮਾਦਿਨ੍ਨੇ ਨਵਕਟ੍ਠਾਨੇ ਠਿਤੋ. ਤਥਾ ਹਿ ਵੁਤ੍ਤਂ ‘‘ਯਤ੍ਥ ਪਨ ਨਿਸੀਦਾਪੇਤ੍ਵਾ ਪਰਿਵਿਸਨ੍ਤਿ, ਤਤ੍ਥ ਸਾਮਣੇਰਾਨਂ ਜੇਟ੍ਠਕੇਨ, ਭਿਕ੍ਖੂਨਂ ਸਙ੍ਘਨਵਕੇਨ ਹੁਤ੍ਵਾ ਨਿਸੀਦਿਤਬ੍ਬ’’ਨ੍ਤਿ (ਚੂਲ਼ਵ. ਅਟ੍ਠ. ੭੫) ਤਸ੍ਮਾ ਆਰੋਚਿਤਕਾਲਾਦੀਸੁ ‘‘ਅਹਂ ਭਨ੍ਤੇ’’ਇਚ੍ਚੇਵ ਵਤ੍ਤਬ੍ਬਂ, ਨ ‘‘ਅਹਂ ਆਵੁਸੋ’’ਤਿ. ਤਤ੍ਰੇਵਂ ਵਿਚਾਰਣਾ ਕਾਤਬ੍ਬਾ – ਪਾਰਿਵਾਸਿਕਾਦਯੋ ਭਿਕ੍ਖੂ ਸੇਯ੍ਯਾਪਰਿਯਨ੍ਤਆਸਨਪਰਿਯਨ੍ਤਭਾਗਿਤਾਯ ਨਵਕਟ੍ਠਾਨੇ ਠਿਤਾ, ਨ ਏਕਨ੍ਤੇਨ ਨਵਕਭੂਤਤ੍ਤਾ. ਤਥਾ ਹਿ ਵੁਤ੍ਤਂ ਭਗਵਤਾ ‘‘ਅਨੁਜਾਨਾਮਿ, ਭਿਕ੍ਖਵੇ, ਪਾਰਿਵਾਸਿਕਾਨਂ ਭਿਕ੍ਖੂਨਂ ਪਞ੍ਚ ਯਥਾਵੁਡ੍ਢਂ ਉਪੋਸਥਂ ਪਵਾਰਣਂ ਵਸ੍ਸਿਕਸਾਟਿਕਂ ਓਣੋਜਨਂ ਭਤ੍ਤ’’ਨ੍ਤਿ (ਚੂਲ਼ਵ. ੭੫). ਅਟ੍ਠਕਥਾਯਞ੍ਚ (ਚੂਲ਼ਵ. ਅਟ੍ਠ. ੮੧) ‘‘ਪਕਤਤ੍ਤਂ ਭਿਕ੍ਖੁਂ ਦਿਸ੍ਵਾ ਆਸਨਾ ਵੁਟ੍ਠਾਤਬ੍ਬਂ, ਪਕਤਤ੍ਤੋ ਭਿਕ੍ਖੁ ਆਸਨੇਨ ਨਿਮਨ੍ਤੇਤਬ੍ਬੋ’’ਤਿ ਏਤਿਸ੍ਸਾ ਪਾਲ਼ਿਯਾ ਸਂਵਣ੍ਣਨਾਯ ‘‘ਵੁਟ੍ਠਾਤਬ੍ਬਂ, ਨਿਮਨ੍ਤੇਤਬ੍ਬੋਤਿ ਤਦਹੁਪਸਮ੍ਪਨ੍ਨਮ੍ਪਿ ਦਿਸ੍ਵਾ ਵੁਟ੍ਠਾਤਬ੍ਬਮੇਵ, ਵੁਟ੍ਠਾਯ ਚ ‘ਅਹਂ ਇਮਿਨਾ ਸੁਖਨਿਸਿਨ੍ਨੋ ਵੁਟ੍ਠਾਪਿਤੋ’ਤਿ ਪਰਮ੍ਮੁਖੇਨ ਨ ਗਨ੍ਤਬ੍ਬਂ, ‘ਇਦਂ ਆਚਰਿਯ ਆਸਨਂ, ਏਤ੍ਥ ਨਿਸੀਦਥਾ’ਤਿ ਏਵਂ ਨਿਮਨ੍ਤੇਤਬ੍ਬੋਯੇਵਾ’’ਤਿ ਏਤ੍ਥੇਵ ‘‘ਆਚਰਿਯਾ’’ਤਿ ਆਲਪਨਵਿਸੇਸੋ ਵੁਤ੍ਤੋ, ਨ ਅਞ੍ਞਤ੍ਥ. ਯਦਿ ਵੁਡ੍ਢਤਰੇਨਪਿ ‘‘ਭਨ੍ਤੇ’’ਇਚ੍ਚੇਵ ਵਤ੍ਤਬ੍ਬੋ ਸਿਯਾ, ਇਧਾਪਿ ‘‘ਇਦਂ, ਭਨ੍ਤੇ, ਆਸਨ’’ਨ੍ਤਿ ਵਤ੍ਤਬ੍ਬਂ ਭਵੇਯ੍ਯ, ਨ ਪਨ ਵੁਤ੍ਤਂ, ਤਸ੍ਮਾ ਨ ਤੇਸਂ ਤਂ ਵਚਨਂ ਸਾਰਤੋ ਪਚ੍ਚੇਤਬ੍ਬਂ. ਇਮਸ੍ਮਿਂ ਪਨ ਵਿਨਯਸਙ੍ਗਹਪ੍ਪਕਰਣੇ (ਵਿ. ਸਙ੍ਗ. ਅਟ੍ਠ. ੨੩੭) ‘‘ਆਰੋਚੇਨ੍ਤੇਨ ਸਚੇ ਨਵਕਤਰੋ ਹੋਤਿ, ‘ਆਵੁਸੋ’ਤਿ ਵਤ੍ਤਬ੍ਬਂ. ਸਚੇ ਵੁਡ੍ਢਤਰੋ, ‘ਭਨ੍ਤੇ’ਤਿ ਵਤ੍ਤਬ੍ਬ’’ਨ੍ਤਿ ਵੁਤ੍ਤਂ, ਇਦਞ੍ਚ ‘‘ਏਕੇਨ ਭਿਕ੍ਖੁਨਾ ਸਦ੍ਧਿ’’ਨ੍ਤਿ ਹੇਟ੍ਠਾ ਵੁਤ੍ਤਤ੍ਤਾ ਤਂ ਪਟਿਗ੍ਗਾਹਕਭੂਤਂ ਪਕਤਤ੍ਤਂ ਭਿਕ੍ਖੁਂ ਸਨ੍ਧਾਯ ਵੁਤ੍ਤਨ੍ਤਿ ਦਟ੍ਠਬ੍ਬਂ.

ਬਹਵੋ ਪਨ ਭਿਕ੍ਖੂ ਪਾਰਿਵਾਸਿਕਂ ਭਿਕ੍ਖੁਂ ਸਙ੍ਘਮਜ੍ਝੇ ਨਿਸੀਦਾਪੇਤ੍ਵਾ ਵਤ੍ਤਂ ਯਾਚਾਪੇਤ੍ਵਾ ਕਮ੍ਮਵਾਚਾਪਰਿਯੋਸਾਨੇ ਸਮਾਦਾਪੇਤ੍ਵਾ ਆਰੋਚਨਮਕਾਰੇਤ੍ਵਾ ਸਙ੍ਘਮਜ੍ਝਤੋ ਨਿਕ੍ਖਮਾਪੇਤ੍ਵਾ ਪਰਿਸਪਰਿਯਨ੍ਤੇ ਨਿਸੀਦਾਪੇਤ੍ਵਾ ਤਤ੍ਥ ਨਿਸਿਨ੍ਨੇਨ ਆਰੋਚਾਪੇਤ੍ਵਾ ਵਤ੍ਤਂ ਨਿਕ੍ਖਿਪਾਪੇਨ੍ਤਿ, ਏਵਂ ਕਰੋਨ੍ਤਾਨਞ੍ਚ ਨੇਸਂ ਅਯਮਧਿਪ੍ਪਾਯੋ – ਅਯਂ ਭਿਕ੍ਖੁ ਵਤ੍ਤੇ ਅਸਮਾਦਿਨ੍ਨੇ ਵੁਡ੍ਢਟ੍ਠਾਨਿਯੋਪਿ ਹੋਤਿ, ਤਸ੍ਮਾ ਯਾਚਨਕਾਲੇ ਚ ਕਮ੍ਮਵਾਚਾਸਵਨਕਾਲੇ ਚ ਵਤ੍ਤਸਮਾਦਾਨਕਾਲੇ ਚ ਸਙ੍ਘਮਜ੍ਝੇ ਨਿਸੀਦਨਾਰਹੋ ਹੋਤਿ, ਵਤ੍ਤੇ ਪਨ ਸਮਾਦਿਨ੍ਨੇ ਨਵਕਟ੍ਠਾਨਿਯੋ, ਤਸ੍ਮਾ ਨ ਸਙ੍ਘਮਜ੍ਝੇ ਨਿਸੀਦਨਾਰਹੋ, ਆਸਨਪਰਿਯਨ੍ਤਭਾਗਿਤਾਯ ਪਰਿਸਪਰਿਯਨ੍ਤੇਯੇਵ ਨਿਸੀਦਨਾਰਹੋਤਿ, ਤਦੇਤਂ ਏਵਂ ਵਿਚਾਰੇਤਬ੍ਬਂ – ਅਯਂ ਭਿਕ੍ਖੁ ਸਙ੍ਘਮਜ੍ਝੇ ਨਿਸੀਦਮਾਨੋ ਆਸਨਂ ਗਹੇਤ੍ਵਾ ਯਥਾਵੁਡ੍ਢਂ ਨਿਸਿਨ੍ਨੋ ਨ ਹੋਤਿ, ਅਥ ਖੋ ਕਮ੍ਮਾਰਹਭਾਵੇਨ ਆਸਨਂ ਅਗ੍ਗਹੇਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਉਕ੍ਕੁਟਿਕਮੇਵ ਨਿਸਿਨ੍ਨੋ ਹੋਤਿ, ਕਮ੍ਮਾਰਹੋ ਚ ਨਾਮ ਸਙ੍ਘਮਜ੍ਝੇਯੇਵ ਠਪੇਤਬ੍ਬੋ ਹੋਤਿ, ਨੋ ਬਹਿ, ਤਸ੍ਮਾ ‘‘ਸਙ੍ਘਮਜ੍ਝੇ ਨਿਸੀਦਨਾਰਹੋ ਨ ਹੋਤੀ’’ਤਿ ਨ ਸਕ੍ਕਾ ਵਤ੍ਤੁਂ ਤਸ੍ਮਿਂ ਕਾਲੇ, ਨਿਕ੍ਖਮਾਪਿਤੇ ਚ ਵਤ੍ਤਾਰੋਚਨਵਤ੍ਤਨਿਕ੍ਖਿਪਨਾਨਂ ਅਨਿਟ੍ਠਿਤਤ੍ਤਾ ਅਞ੍ਞਮਞ੍ਞਂ ਆਹਚ੍ਚ ਸੁਟ੍ਠੁ ਨਿਸਿਨ੍ਨਂ ਭਿਕ੍ਖੁਸਙ੍ਘਂ ਪਰਿਹਰਿਤੁਮਸਕ੍ਕੁਣੇਯ੍ਯਤ੍ਤਾ, ਚੀਵਰਕਣ੍ਣਪਾਦਪਿਟ੍ਠਿਆਦੀਹਿ ਬਾਧਿਤਤ੍ਤਾ ਅਗਾਰਵਕਿਰਿਯਾ ਵਿਯ ਦਿਸ੍ਸਤਿ, ਆਰੋਚਨਕਿਰਿਯਞ੍ਚ ਵਤ੍ਤਨਿਕ੍ਖਿਪਨਞ੍ਚ ਸਙ੍ਘਮਜ੍ਝੇਯੇਵ ਕਤ੍ਤਬ੍ਬਂ ਪਰਿਯਨ੍ਤੇ ਨਿਸੀਦਿਤ੍ਵਾ ਕਰੋਨ੍ਤੋ ਅਟ੍ਠਕਥਾਵਿਰੋਧੋ ਹੋਤਿ. ਵੁਤ੍ਤਞ੍ਹਿ ਅਟ੍ਠਕਥਾਯਂ (ਚੂਲ਼ਵ. ਅਟ੍ਠ. ੯੭) ‘‘ਵਤ੍ਤਂ ਸਮਾਦਿਯਿਤ੍ਵਾ ਤਤ੍ਥੇਵ ਸਙ੍ਘਸ੍ਸ ਆਰੋਚੇਤਬ੍ਬਂ…ਪੇ… ਆਰੋਚੇਤ੍ਵਾ ਸਚੇ ਨਿਕ੍ਖਿਪਿਤੁਕਾਮੋ, ਵੁਤ੍ਤਨਯੇਨੇਵ ਸਙ੍ਘਮਜ੍ਝੇ ਨਿਕ੍ਖਿਪਿਤਬ੍ਬ’’ਨ੍ਤਿ. ਕਸ੍ਮਾ? ਸਮਾਦਾਨਟ੍ਠਾਨੇਯੇਵ ਆਰੋਚਾਪੇਤ੍ਵਾ ਤਤ੍ਥੇਵ ਨਿਕ੍ਖਿਪਾਪੇਤ੍ਵਾ ਨਿਟ੍ਠਿਤਸਬ੍ਬਕਿਚ੍ਚਮੇਵ ਨਿਕ੍ਖਮਾਪੇਤ੍ਵਾ ਅਤ੍ਤਨੋ ਆਸਨੇ ਨਿਸੀਦਾਪੇਨ੍ਤੋ ਞਾਯਾਗਤੋਤਿ ਅਮ੍ਹਾਕਂ ਖਨ੍ਤਿ.

ਤਥਾ ਸਾਯਂ ਵਤ੍ਤਾਰੋਚਨਕਾਲੇ ਬਹੂਸੁ ਪਾਰਿਵਾਸਿਕੇਸੁ ਵੁਡ੍ਢਤਰਂ ਪਠਮਂ ਸਮਾਦਾਪੇਤ੍ਵਾ ਆਰੋਚਾਪੇਤ੍ਵਾ ਅਨੁਕ੍ਕਮੇਨ ਸਬ੍ਬਪਚ੍ਛਾ ਨਵਕਤਰਂ ਸਮਾਦਾਪੇਨ੍ਤਿ ਆਰੋਚਾਪੇਨ੍ਤਿ, ਪਾਤੋ ਨਿਕ੍ਖਿਪਨਕਾਲੇ ਪਨ ਨਵਕਤਰਂ ਪਠਮਂ ਆਰੋਚਾਪੇਤ੍ਵਾ ਨਿਕ੍ਖਿਪਾਪੇਨ੍ਤਿ, ਤਤੋ ਅਨੁਕ੍ਕਮੇਨ ਵੁਡ੍ਢਤਰਂ ਸਬ੍ਬਪਚ੍ਛਾ ਆਰੋਚਾਪੇਤ੍ਵਾ ਨਿਕ੍ਖਿਪਾਪੇਨ੍ਤਿ. ਤੇਸਂ ਅਯਮਧਿਪ੍ਪਾਯੋ ਸਿਯਾ – ਯਦਾ ਦਸ ਭਿਕ੍ਖੂ ਪਕਤਤ੍ਤਾ ਦਸ ਭਿਕ੍ਖੂ ਪਾਰਿਵਾਸਿਕਾ ਹੋਨ੍ਤਿ, ਤਦਾ ਵੁਡ੍ਢਤਰੇਨ ਪਠਮਂ ਸਮਾਦਿਯਿਤ੍ਵਾ ਆਰੋਚਿਤੇ ਤਸ੍ਸ ਆਰੋਚਨਂ ਅਵਸੇਸਾ ਏਕੂਨਵੀਸਤਿ ਭਿਕ੍ਖੂ ਸੁਣਨ੍ਤਿ, ਦੁਤਿਯਸ੍ਸ ਅਟ੍ਠਾਰਸ, ਤਤਿਯਸ੍ਸ ਸਤ੍ਤਰਸਾਤਿ ਅਨੁਕ੍ਕਮੇਨ ਹਾਯਿਤ੍ਵਾ ਸਬ੍ਬਨਵਕਸ੍ਸ ਆਰੋਚਨਂ ਦਸ ਪਕਤਤ੍ਤਾ ਸੁਣਨ੍ਤਿ ਸੇਸਾਨਂ ਅਪਕਤਤ੍ਤਭਾਵਤੋ. ਤਤੋ ਨਿਕ੍ਖਿਪਨਕਾਲੇ ਸਬ੍ਬਨਵਕੋ ਪੁਬ੍ਬੇ ਅਤ੍ਤਨਾ ਆਰੋਚਿਤਾਨਂ ਦਸਨ੍ਨਂ ਭਿਕ੍ਖੂਨਂ ਆਰੋਚੇਤ੍ਵਾ ਨਿਕ੍ਖਿਪਤਿ, ਤਤੋ ਪਟਿਲੋਮੇਨ ਦੁਤਿਯੋ ਏਕਾਦਸਨ੍ਨਂ, ਤਤਿਯੋ ਦ੍ਵਾਦਸਨ੍ਨਨ੍ਤਿ ਅਨੁਕ੍ਕਮੇਨ ਵਡ੍ਢਿਤ੍ਵਾ ਸਬ੍ਬਜੇਟ੍ਠਕੋ ਅਤ੍ਤਨਾ ਪੁਬ੍ਬੇ ਆਰੋਚਿਤਾਨਂ ਏਕੂਨਵੀਸਤਿਭਿਕ੍ਖੂਨਂ ਆਰੋਚੇਤ੍ਵਾ ਨਿਕ੍ਖਿਪਤਿ, ਏਵਂ ਯਥਾਨੁਕ੍ਕਮੇਨ ਨਿਕ੍ਖਿਪਨਂ ਹੋਤਿ. ਸਬ੍ਬਜੇਟ੍ਠਕੇ ਪਨ ਪਠਮਂ ਨਿਕ੍ਖਿਤ੍ਤੇ ਸਤਿ ਪੁਬ੍ਬੇ ਅਤ੍ਤਨਾ ਆਰੋਚਿਤਾਨਂ ਨਵਨ੍ਨਂ ਭਿਕ੍ਖੂਨਂ ਤਦਾ ਅਪਕਤਤ੍ਤਭਾਵਤੋ ਆਰੋਚਿਤਾਨਂ ਸਨ੍ਤਿਕੇ ਨਿਕ੍ਖਿਪਨਂ ਨ ਹੋਤਿ, ਤਥਾ ਸੇਸਾਨਂ. ਤੇਸਂ ਪਨ ਏਕਚ੍ਚਾਨਂ ਊਨਂ ਹੋਤਿ, ਏਕਚ੍ਚਾਨਂ ਅਧਿਕਂ, ਤਸ੍ਮਾ ਯਥਾਵੁਤ੍ਤਨਯੇਨ ਸਬ੍ਬਨਵਕਤੋ ਪਟ੍ਠਾਯ ਅਨੁਕ੍ਕਮੇਨ ਨਿਕ੍ਖਿਪਿਤਬ੍ਬਨ੍ਤਿ.

ਏਵਂਵਾਦੀਨਂ ਪਨ ਤੇਸਮਾਯਸ੍ਮਨ੍ਤਾਨਂ ਵਾਦੇ ਪਕਤਤ੍ਤਾਯੇਵ ਭਿਕ੍ਖੂ ਆਰੋਚੇਤਬ੍ਬਾ ਹੋਨ੍ਤਿ, ਨੋ ਅਪਕਤਤ੍ਤਾ. ਪੁਬ੍ਬੇ ਆਰੋਚਿਤਾਨਂਯੇਵ ਸਨ੍ਤਿਕੇ ਵਤ੍ਤਂ ਨਿਕ੍ਖਿਪਿਤਬ੍ਬਂ ਹੋਤਿ, ਨੋ ਅਨਾਰੋਚਿਤਾਨਂ. ਏਵਂ ਪਨ ਪਕਤਤ੍ਤਾਯੇਵ ਭਿਕ੍ਖੂ ਆਰੋਚੇਤਬ੍ਬਾ ਨ ਹੋਨ੍ਤਿ, ਅਥ ਖੋ ਅਪਕਤਤ੍ਤਾਪਿ ‘‘ਸਚੇ ਦ੍ਵੇ ਪਾਰਿਵਾਸਿਕਾ ਗਤਟ੍ਠਾਨੇ ਅਞ੍ਞਮਞ੍ਞਂ ਪਸ੍ਸਨ੍ਤਿ, ਉਭੋਹਿ ਅਞ੍ਞਮਞ੍ਞਸ੍ਸ ਆਰੋਚੇਤਬ੍ਬ’’ਨ੍ਤਿ ਅਟ੍ਠਕਥਾਯਂ ਵੁਤ੍ਤਤ੍ਤਾ. ਪੁਬ੍ਬੇ ਆਰੋਚਿਤਾਨਮ੍ਪਿ ਅਨਾਰੋਚਿਤਾਨਮ੍ਪਿ ਸਨ੍ਤਿਕੇ ਆਰੋਚੇਤ੍ਵਾ ਨਿਕ੍ਖਿਪਿਤਬ੍ਬਮੇਵ ‘‘ਸਚੇ ਸੋ ਭਿਕ੍ਖੁ ਕੇਨਚਿਦੇਵ ਕਰਣੀਯੇਨ ਪਕ੍ਕਨ੍ਤੋ ਹੋਤਿ, ਯਂ ਅਞ੍ਞਂ ਸਬ੍ਬਪਠਮਂ ਪਸ੍ਸਤਿ, ਤਸ੍ਸ ਆਰੋਚੇਤ੍ਵਾ ਨਿਕ੍ਖਿਪਿਤਬ੍ਬ’’ਨ੍ਤਿ (ਚੂਲ਼ਵ. ਅਟ੍ਠ. ੧੦੨) ਵੁਤ੍ਤਤ੍ਤਾ, ਤਸ੍ਮਾ ਤਥਾ ਅਕਰੋਨ੍ਤੇਪਿ ਸਬ੍ਬੇਸਂ ਆਰੋਚਿਤਤ੍ਤਾ ਨਤ੍ਥਿ ਦੋਸੋ. ਅਪ੍ਪੇਕਚ੍ਚੇ ਭਿਕ੍ਖੂ ‘‘ਪਕਤਤ੍ਤਸ੍ਸੇਵਾਯਂ ਆਰੋਚਨਾ’’ਤਿ ਮਞ੍ਞਮਾਨਾ ਸਾਯਂ ਵੁਡ੍ਢਪਟਿਪਾਟਿਯਾ ਵਤ੍ਤਂ ਸਮਾਦਿਯਿਤ੍ਵਾ ਆਰੋਚੇਤ੍ਵਾ ਅਤ੍ਤਨੋ ਸਯਨਂ ਪਵਿਸਿਤ੍ਵਾ ਦ੍ਵਾਰਜਗ੍ਗਨਸਯਨਸੋਧਨਾਦੀਨਿ ਕਰੋਨ੍ਤਾ ਅਞ੍ਞੇਸਂ ਆਰੋਚਿਤਂ ਨ ਸੁਣਨ੍ਤਿ. ਅਪ੍ਪੇਕਚ੍ਚੇ ਪਾਤੋ ਸਯਂ ਆਰੋਚੇਤ੍ਵਾ ਨਿਕ੍ਖਿਪਿਤ੍ਵਾ ਅਞ੍ਞੇਸਂ ਆਰੋਚਨਂ ਵਾ ਨਿਕ੍ਖਿਪਨਂ ਵਾ ਅਨਾਗਮੇਤ੍ਵਾ ਭਿਕ੍ਖਾਚਾਰਾਦੀਨਂ ਅਤ੍ਥਾਯ ਗਚ੍ਛਨ੍ਤਿ, ਏਵਂ ਕਰੋਨ੍ਤਾਨਂ ਤੇਸਂ ਆਰੋਚਨਂ ਏਕਚ੍ਚਾਨਂ ਅਸੁਤਭਾਵਸਮ੍ਭਵਤੋ ਸਾਸਙ੍ਕੋ ਹੋਤਿ ਪਾਰਿਵਾਸਿਕਾਨਂ ਅਞ੍ਞਮਞ੍ਞਾਰੋਚਨਸ੍ਸ ਪਕਰਣੇਸੁ ਆਗਤਤ੍ਤਾ. ਨ ਕੇਵਲਂ ਸਾਰਤ੍ਥਦੀਪਨਿਯਂਯੇਵ, ਅਥ ਖੋ ਵਜਿਰਬੁਦ੍ਧਿਟੀਕਾਯਮ੍ਪਿ (ਵਜਿਰ. ਟੀ. ਚੂਲ਼ਵਗ੍ਗ ੭੬) ‘‘ਸਚੇ ਦ੍ਵੇ ਪਾਰਿਵਾਸਿਕਾ ਗਤਟ੍ਠਾਨੇ ਅਞ੍ਞਮਞ੍ਞਂ ਪਸ੍ਸਨ੍ਤਿ, ਉਭੋਹਿਪਿ ਅਞ੍ਞਮਞ੍ਞਸ੍ਸ ਆਰੋਚੇਤਬ੍ਬਂ ਅਵਿਸੇਸੇਨ ‘ਆਗਨ੍ਤੁਕੇਨ ਆਰੋਚੇਤਬ੍ਬਂ, ਆਗਨ੍ਤੁਕਸ੍ਸ ਆਰੋਚੇਤਬ੍ਬ’ਨ੍ਤਿ ਵੁਤ੍ਤਤ੍ਤਾ’’ਤਿ ਵੁਤ੍ਤਂ.

ਤਥਾ ਅਪ੍ਪੇਕਚ੍ਚੇ ਪਕਤਤ੍ਤਾ ਭਿਕ੍ਖੂ ਪਾਰਿਵਾਸਿਕੇਸੁ ਭਿਕ੍ਖੂਸੁ ਸਾਯਂ ਵਤ੍ਤਸਮਾਦਾਨਤ੍ਥਂ ਪਕਤਤ੍ਤਸਾਲਤੋ ਨਿਕ੍ਖਮਿਤ੍ਵਾ ਅਤ੍ਤਨੋ ਅਤ੍ਤਨੋ ਸਯਨਸਮੀਪਂ ਗਤੇਸੁ ਅਤ੍ਤਨੋ ਸਯਨਪਞ੍ਞਾਪਨਪਅਕ੍ਖਾਰਠਪਨਅਞ੍ਞਮਞ੍ਞਆਲਾਪਸਲ੍ਲਾਪਕਰਣਾਦਿਵਸੇਨ ਆਲ਼ੋਲੇਨ੍ਤਾ ਪਾਰਿਵਾਸਿਕਾਨਂ ਵਤ੍ਤਾਰੋਚਨਂ ਨ ਸੁਣਨ੍ਤਿ, ਨ ਮਨਸਿ ਕਰੋਨ੍ਤਿ. ਅਪ੍ਪੇਕਚ੍ਚੇ ਪਾਤੋ ਵਤ੍ਤਨਿਕ੍ਖਿਪਨਕਾਲੇ ਪਾਰਿਵਾਸਿਕਭਿਕ੍ਖੂਸੁ ਵਤ੍ਤਾਰੋਚਨਵਤ੍ਤਨਿਕ੍ਖਿਪਨਾਨਿ ਕਰੋਨ੍ਤੇਸੁਪਿ ਨਿਦ੍ਦਾਪਸੁਤਾ ਹੁਤ੍ਵਾ ਨ ਸੁਣਨ੍ਤਿ. ਏਵਂ ਕਰੋਨ੍ਤਾਨਮ੍ਪਿ ਤੇਸਂ ਏਕਚ੍ਚਾਨਂ ਅਸ੍ਸੁਤਸਮ੍ਭਵਤੋ ਵਤ੍ਤਾਰੋਚਨਂ ਸਾਸਙ੍ਕਂ ਹੋਤੀਤਿ. ਹੋਤੁ ਸਾਸਙ੍ਕਂ, ਸੁਣਨ੍ਤਾਨਂ ਅਸ੍ਸੁਤਸਮ੍ਭਵੇਪਿ ਆਰੋਚਕਾਨਂ ਸਮ੍ਮਾਆਰੋਚਨੇਨ ਵਤ੍ਤਸ੍ਸ ਪਰਿਪੁਣ੍ਣਤ੍ਤਾ ਕੋ ਦੋਸੋਤਿ ਚੇ? ਆਰੋਚਕਾਨਂ ਸਮ੍ਮਾ ਆਰੋਚਿਤਤ੍ਤਾ ਵਤ੍ਤੇ ਪਰਿਪੁਣ੍ਣੇਪਿ ਵਤ੍ਤਭੇਦਦੁਕ੍ਕਟਤੋਵ ਵਿਮੁਤ੍ਤੋ ਸਿਯਾ, ਨ ਰਤ੍ਤਿਚ੍ਛੇਦਤੋ. ਵੁਤ੍ਤਞ੍ਹਿ ਸਮਨ੍ਤਪਾਸਾਦਿਕਾਯਂ (ਚੂਲ਼ਵ. ਅਟ੍ਠ. ੭੬) ‘‘ਸਚੇ ਵਾਯਮਨ੍ਤੋਪਿ ਸਮ੍ਪਾਪੁਣਿਤੁਂ ਵਾ ਸਾਵੇਤੁਂ ਵਾ ਨ ਸਕ੍ਕੋਤਿ, ਰਤ੍ਤਿਚ੍ਛੇਦੋਵ ਹੋਤਿ, ਨ ਵਤ੍ਤਭੇਦਦੁਕ੍ਕਟ’’ਨ੍ਤਿ.

ਅਥਞ੍ਞੇ ਭਿਕ੍ਖੂ ਵਤ੍ਤਂ ਸਮਾਦਿਯਿਤ੍ਵਾ ਰਤ੍ਤਿਂ ਨਿਪਨ੍ਨਾ ਨਿਦ੍ਦਾਭਾਵੇਨ ਮਨੁਸ੍ਸਸਦ੍ਦਮ੍ਪਿ ਸੁਣਨ੍ਤਿ, ਭੇਰਿਆਦਿਸਦ੍ਦਮ੍ਪਿ ਸੁਣਨ੍ਤਿ, ਸਕਟਨਾਵਾਦਿਯਾਨਸਦ੍ਦਮ੍ਪਿ ਸੁਣਨ੍ਤਿ, ਤੇ ਤੇਨ ਸਦ੍ਦੇਨ ਆਸਙ੍ਕਨ੍ਤਿ ‘‘ਭਿਕ੍ਖੂਨਂ ਨੁ ਖੋ ਅਯ’’ਨ੍ਤਿ, ਤੇ ਤੇਨ ਕਾਰਣੇਨ ਰਤ੍ਤਿਚ੍ਛੇਦਂ ਮਞ੍ਞਨ੍ਤਿ. ਕਸ੍ਮਾ? ‘‘ਅਯਞ੍ਚ ਨੇਸਂ ਛਤ੍ਤਸਦ੍ਦਂ ਵਾ ਉਕ੍ਕਾਸਿਤਸਦ੍ਦਂ ਵਾ ਖਿਪਿਤਸਦ੍ਦਂ ਵਾ ਸੁਤ੍ਵਾ ਆਗਨ੍ਤੁਕਭਾਵਂ ਜਾਨਾਤਿ, ਗਨ੍ਤ੍ਵਾ ਆਰੋਚੇਤਬ੍ਬਂ. ਗਤਕਾਲੇ ਜਾਨਨ੍ਤੇਨਪਿ ਅਨੁਬਨ੍ਧਿਤ੍ਵਾ ਆਰੋਚੇਤਬ੍ਬਮੇਵ. ਸਮ੍ਪਾਪੁਣਿਤੁਂ ਅਸਕ੍ਕੋਨ੍ਤਸ੍ਸ ਰਤ੍ਤਿਚ੍ਛੇਦੋਵ ਹੋਤਿ, ਨ ਵਤ੍ਤਭੇਦਦੁਕ੍ਕਟ’’ਨ੍ਤਿ (ਚੂਲ਼ਵ. ਅਟ੍ਠ. ੭੬) ਵੁਤ੍ਤਤ੍ਤਾਤਿ. ਤੇ ਏਵਂ ਸਞ੍ਞਾਪੇਤਬ੍ਬਾ – ਮਾਯਸ੍ਮਨ੍ਤੋ ਏਵਂ ਮਞ੍ਞਿਤ੍ਥ, ਨਾਯਂ ਪਾਠੋ ਬਹਿਸੀਮਟ੍ਠਵਸੇਨ ਵੁਤ੍ਤੋ, ਅਥ ਖੋ ਉਪਚਾਰਸੀਮਟ੍ਠਵਸੇਨ ਵੁਤ੍ਤੋ. ਵੁਤ੍ਤਞ੍ਹਿ ਤਤ੍ਥੇਵ ‘‘ਯੇਪਿ ਅਨ੍ਤੋਵਿਹਾਰਂ ਅਪ੍ਪਵਿਸਿਤ੍ਵਾ ਉਪਚਾਰਸੀਮਂ ਓਕ੍ਕਮਿਤ੍ਵਾ ਗਚ੍ਛਨ੍ਤੀ’’ਤਿ. ਤਤ੍ਥਪਿ ਆਗਨ੍ਤੁਕਭਾਵਸ੍ਸ ਜਾਨਿਤਤ੍ਤਾ ਰਤ੍ਤਿਚ੍ਛੇਦੋ ਹੋਤਿ, ਤਸ੍ਮਾ ਦੂਰੇਸਦ੍ਦਸਵਨਮਤ੍ਤੇਨ ਰਤ੍ਤਿਚ੍ਛੇਦੋ ਨਤ੍ਥਿ, ‘‘ਅਯਂ ਭਿਕ੍ਖੂਨਂ ਸਦ੍ਦੋ, ਅਯਂ ਭਿਕ੍ਖੂਹਿ ਵਾਦਿਤਭੇਰਿਘਣ੍ਟਾਦਿਸਦ੍ਦੋ, ਅਯਂ ਭਿਕ੍ਖੂਹਿ ਪਾਜਿਤਸਕਟਨਾਵਾਦਿਸਦ੍ਦੋ’’ਤਿ ਨਿਸਿਨ੍ਨਟ੍ਠਾਨਤੋ ਜਾਨਨ੍ਤੋਯੇਵ ਰਤ੍ਤਿਚ੍ਛੇਦਕਰੋ ਹੋਤਿ. ਤੇਨਾਹ ‘‘ਆਯਸ੍ਮਾ ਕਰਵੀਕਤਿਸ੍ਸਤ੍ਥੇਰੋ ‘ਸਮਣੋ ਅਯ’ਨ੍ਤਿ ਵਵਤ੍ਥਾਨਮੇਵ ਪਮਾਣ’’ਨ੍ਤਿ.

ਦਿਵਾ ਦੂਰੇ ਗਚ੍ਛਨ੍ਤਂ ਜਨਕਾਯਂ ਦਿਸ੍ਵਾਪਿ ‘‘ਇਮੇ ਭਿਕ੍ਖੂ ਨੁ ਖੋ’’ਤਿ ਪਰਿਕਪ੍ਪੇਨ੍ਤਾ ਰਤ੍ਤਿਚ੍ਛੇਦਂ ਮਞ੍ਞਨ੍ਤਿ, ਤਮ੍ਪਿ ਅਕਾਰਣਂ. ਕਸ੍ਮਾ? ‘‘ਭਿਕ੍ਖੂ’’ਤਿ ਵਵਤ੍ਥਾਨਸ੍ਸ ਅਭਾਵਾ. ਵੁਤ੍ਤਞ੍ਹਿ ਅਟ੍ਠਕਥਾਯਂ ‘‘ਨਦੀਆਦੀਸੁ ਨਾਵਾਯ ਗਚ੍ਛਨ੍ਤਮ੍ਪਿ ਪਰਤੀਰੇ ਠਿਤਮ੍ਪਿ ਆਕਾਸੇ ਗਚ੍ਛਨ੍ਤਮ੍ਪਿ ਪਬ੍ਬਤਥਲਅਰਞ੍ਞਾਦੀਸੁ ਦੂਰੇ ਠਿਤਮ੍ਪਿ ਭਿਕ੍ਖੁਂ ਦਿਸ੍ਵਾ ਸਚੇ ‘ਭਿਕ੍ਖੂ’ਤਿ ਵਵਤ੍ਥਾਨਂ ਅਤ੍ਥਿ, ਨਾਵਾਦੀਹਿ ਵਾ ਗਨ੍ਤ੍ਵਾ ਮਹਾਸਦ੍ਦਂ ਕਤ੍ਵਾ ਵਾ ਵੇਗੇਨ ਅਨੁਬਨ੍ਧਿਤ੍ਵਾ ਵਾ ਆਰੋਚੇਤਬ੍ਬ’’ਨ੍ਤਿ. ਇਤਿ ਭਿਕ੍ਖੁਂ ਦਿਸ੍ਵਾਪਿ ‘‘ਭਿਕ੍ਖੂ’’ਤਿ ਵਵਤ੍ਥਾਨਮੇਵ ਪਮਾਣਂ. ਅਭਿਕ੍ਖੁਂ ਪਨ ‘‘ਭਿਕ੍ਖੂ’’ਤਿ ਵਵਤ੍ਥਾਨੇ ਸਨ੍ਤੇਪਿ ਵਾ ਅਸਨ੍ਤੇਪਿ ਵਾ ਕਿਂ ਵਤ੍ਤਬ੍ਬਂ ਅਤ੍ਥਿ, ਬਹਵੋ ਪਨ ਭਿਕ੍ਖੂ ਇਦਂ ਰੂਪਦਸ੍ਸਨਂ ਸਦ੍ਦਸਵਨਞ੍ਚ ਆਸਙ੍ਕਨ੍ਤਾ ‘‘ਪਭਾਤੇ ਸਤਿ ਤਂ ਦ੍ਵਯਂ ਭਵੇਯ੍ਯ, ਤਸ੍ਮਾ ਮਨੁਸ੍ਸਾਨਂ ਗਮਨਕਾਲਸਦ੍ਦਕਰਣਕਾਲਤੋ ਪੁਬ੍ਬੇਯੇਵ ਵਤ੍ਤਂ ਨਿਕ੍ਖਿਪਿਤਬ੍ਬ’’ਨ੍ਤਿ ਮਞ੍ਞਮਾਨਾ ਅਨੁਗ੍ਗਤੇਯੇਵ ਅਰੁਣੇ ਵਤ੍ਤਂ ਨਿਕ੍ਖਿਪਨ੍ਤਿ, ਤਦਯੁਤ੍ਤਂ ਰਤ੍ਤਿਚ੍ਛੇਦਤ੍ਤਾਤਿ.

ਅਥ ਪਨ ਵਿਨਯਧਰੇਨ ‘‘ਕਿਤ੍ਤਕਾ ਤੇ ਆਪਤ੍ਤਿਯੋ, ਛਾਦੇਸਿ, ਕੀਵਤੀਹਂ ਪਟਿਚ੍ਛਾਦੇਸੀ’’ਤਿ ਪੁਟ੍ਠੋ ਸਮਾਨੋ ‘‘ਅਹਂ, ਭਨ੍ਤੇ, ਆਪਤ੍ਤਿਪਰਿਯਨ੍ਤਂ ਨ ਜਾਨਾਮਿ, ਰਤ੍ਤਿਪਰਿਯਨ੍ਤਂ ਨ ਜਾਨਾਮਿ, ਆਪਤ੍ਤਿਪਰਿਯਨ੍ਤਂ ਨਸ੍ਸਰਾਮਿ, ਰਤ੍ਤਿਪਰਿਯਨ੍ਤਂ ਨਸ੍ਸਰਾਮਿ, ਆਪਤ੍ਤਿਪਰਿਯਨ੍ਤੇ ਵੇਮਤਿਕੋ, ਰਤ੍ਤਿਪਰਿਯਨ੍ਤੇ ਵੇਮਤਿਕੋ’’ਤਿ ਵੁਤ੍ਤੇ ‘‘ਅਯਂ ਭਿਕ੍ਖੁ ਸੁਦ੍ਧਨ੍ਤਪਰਿਵਾਸਾਰਹੋ’’ਤਿ ਞਤ੍ਵਾ ਤਸ੍ਸਪਿ ਦੁਵਿਧਤ੍ਤਾ ਚੂਲ਼ਸੁਦ੍ਧਨ੍ਤਮਹਾਸੁਦ੍ਧਨ੍ਤਵਸੇਨ ‘‘ਤੇਸੁ ਅਯਂ ਭਿਕ੍ਖੁ ਇਮਸ੍ਸ ਅਰਹੋ’’ਤਿ ਞਾਪਨਤ੍ਥਂ ਉਪਸਮ੍ਪਦਤੋ ਪਟ੍ਠਾਯ ਅਨੁਲੋਮਕ੍ਕਮੇਨ ਵਾ ਆਰੋਚਿਤਦਿਵਸਤੋ ਪਟ੍ਠਾਯ ਪਟਿਲੋਮਕ੍ਕਮੇਨ ਵਾ ‘‘ਕਿਤ੍ਤਕਂ ਕਾਲਂ ਤ੍ਵਂ ਆਰੋਚਨਆਵਿਕਰਣਾਦਿਵਸੇਨ ਸੁਦ੍ਧੋ’’ਤਿ ਪੁਚ੍ਛਿਤ੍ਵਾ ‘‘ਆਮ ਭਨ੍ਤੇ, ਏਤ੍ਤਕਂ ਕਾਲਂ ਅਹਂ ਸੁਦ੍ਧੋਮ੍ਹੀ’’ਤਿ ਵੁਤ੍ਤੇ ‘‘ਅਯਂ ਭਿਕ੍ਖੁ ਏਕਚ੍ਚਂ ਰਤ੍ਤਿਪਰਿਯਨ੍ਤਂ ਜਾਨਾਤਿ, ਤਸ੍ਮਾ ਚੂਲ਼ਸੁਦ੍ਧਨ੍ਤਾਰਹੋ’’ਤਿ ਞਤ੍ਵਾ ਤਸ੍ਸ ਸੁਦ੍ਧਕਾਲਂ ਅਪਨੇਤ੍ਵਾ ਅਸੁਦ੍ਧਕਾਲਵਸੇਨ ਪਰਿਯਨ੍ਤਂ ਕਤ੍ਵਾ ਚੂਲ਼ਸੁਦ੍ਧਨ੍ਤਪਰਿਵਾਸੋ ਦਾਤਬ੍ਬੋ. ਅਯਂ ਉਦ੍ਧਮ੍ਪਿ ਆਰੋਹਤਿ, ਅਧੋਪਿ ਓਰੋਹਤਿ. ਯੋ ਪਨ ਅਨੁਲੋਮਵਸੇਨ ਵਾ ਪਟਿਲੋਮਵਸੇਨ ਵਾ ਪੁਚ੍ਛਿਯਮਾਨੋ ‘‘ਸਕਲਮ੍ਪਿ ਰਤ੍ਤਿਪਰਿਯਨ੍ਤਂ ਅਹਂ ਨ ਜਾਨਾਮਿ ਨਸ੍ਸਰਾਮਿ, ਵੇਮਤਿਕੋ ਹੋਮੀ’’ਤਿ ਵੁਤ੍ਤੇ ‘‘ਅਯਂ ਭਿਕ੍ਖੁ ਸਕਲਮ੍ਪਿ ਰਤ੍ਤਿਪਰਿਯਨ੍ਤਂ ਨ ਜਾਨਾਤਿ, ਤਸ੍ਮਾ ਮਹਾਸੁਦ੍ਧਨ੍ਤਾਰਹੋ’’ਤਿ ਞਤ੍ਵਾ ਤਸ੍ਸ ਉਪਸਮ੍ਪਦਤੋ ਪਟ੍ਠਾਯ ਯਾਵ ਵਤ੍ਤਸਮਾਦਾਨਾ ਏਤ੍ਤਕਂ ਕਾਲਂ ਪਰਿਯਨ੍ਤਂ ਕਤ੍ਵਾ ਮਹਾਸੁਦ੍ਧਨ੍ਤਪਰਿਵਾਸੋ ਦਾਤਬ੍ਬੋ. ਉਦ੍ਧਂਆਰੋਹਨਅਧੋਓਰੋਹਨਭਾਵੋ ਪਨੇਸਂ ਅਟ੍ਠਕਥਾਯਂ (ਚੂਲ਼ਵ. ਅਟ੍ਠ. ੧੦੨) ਵੁਤ੍ਤੋਯੇਵ. ਇਤੋ ਪਰਮ੍ਪਿ ਵਿਧਾਨਂ ਅਟ੍ਠਕਥਾਯਂ ਆਗਤਨਯੇਨੇਵ ਦਟ੍ਠਬ੍ਬਂ.

ਇਦਾਨਿ ਪਨ ਬਹਵੋ ਭਿਕ੍ਖੂ ‘‘ਅਯਂ ਚੂਲ਼ਸੁਦ੍ਧਨ੍ਤਾਰਹੋ, ਅਯਂ ਮਹਾਸੁਦ੍ਧਨ੍ਤਾਰਹੋ’’ਤਿ ਅਵਿਚਿਨਨ੍ਤਾ ਅਨ੍ਤੋਕਮ੍ਮਵਾਚਾਯਂ ‘‘ਆਪਤ੍ਤਿਪਰਿਯਨ੍ਤਂ ਨ ਜਾਨਾਤਿ, ਰਤ੍ਤਿਪਰਿਯਨ੍ਤਂ ਨ ਜਾਨਾਤਿ, ਆਪਤ੍ਤਿਪਰਿਯਨ੍ਤਂ ਨਸ੍ਸਰਤਿ, ਰਤ੍ਤਿਪਰਿਯਨ੍ਤਂ ਨਸ੍ਸਰਤਿ, ਆਪਤ੍ਤਿਪਰਿਯਨ੍ਤੇ ਵੇਮਤਿਕੋ, ਰਤ੍ਤਿਪਰਿਯਨ੍ਤੇ ਵੇਮਤਿਕੋ’’ਤਿ ਅਵਿਸੇਸਵਚਨਮੇਵ ਮਨਸਿ ਕਰੋਨ੍ਤਾ ‘‘ਇਮਾਯ ਕਮ੍ਮਵਾਚਾਯ ਦਿਨ੍ਨਂ ਸੁਦ੍ਧਨ੍ਤਪਰਿਵਾਸਂ ਗਹੇਤ੍ਵਾ ਪਞ੍ਚਾਹਮਤ੍ਤਂ ਵਾ ਦਸਾਹਮਤ੍ਤਂ ਵਾ ਪਰਿਵਸਿਤ੍ਵਾ ਅਪਰਿਯਨ੍ਤਰਤ੍ਤਿਪਟਿਚ੍ਛਾਦਿਤਾਹਿ ਅਪਰਿਯਨ੍ਤਾਹਿ ਆਪਤ੍ਤੀਹਿ ਮੋਕ੍ਖੋ ਹੋਤੀ’’ਤਿ ਮਞ੍ਞਨ੍ਤਾ ਪਞ੍ਚਾਹਮਤ੍ਤਂ ਵਾ ਦਸਾਹਮਤ੍ਤਂ ਵਾ ਪਰਿਵਸਿਤ੍ਵਾ ਮਾਨਤ੍ਤਂ ਯਾਚਨ੍ਤਿ, ਏਵਂ ਕਰੋਨ੍ਤਾ ਤੇ ਭਿਕ੍ਖੂ ਸਹਸ੍ਸਕ੍ਖਤ੍ਤੁਂ ਪਰਿਵਸਨ੍ਤਾਪਿ ਆਪਤ੍ਤਿਤੋ ਨ ਮੁਚ੍ਚੇਯ੍ਯੁਂ. ਕਸ੍ਮਾਤਿ ਚੇ? ਪਾਲ਼ਿਯਾ ਚ ਅਟ੍ਠਕਥਾਯ ਚ ਵਿਰੁਜ੍ਝਨਤੋ. ਵੁਤ੍ਤਞ੍ਹਿ ਪਾਲ਼ਿਯਂ (ਪਾਰਾ. ੪੪੨) ‘‘ਯਾਵਤੀਹਂ ਜਾਨਂ ਪਟਿਚ੍ਛਾਦੇਤਿ, ਤਾਵਤੀਹਂ ਤੇਨ ਭਿਕ੍ਖੁਨਾ ਅਕਾਮਾ ਪਰਿਵਤ੍ਥਬ੍ਬਂ. ਪਰਿਵੁਤ੍ਥਪਰਿਵਾਸੇਨ ਭਿਕ੍ਖੁਨਾ ਉਤ੍ਤਰਿ ਛਾਰਤ੍ਤਂ ਭਿਕ੍ਖੁਮਾਨਤ੍ਤਾਯ ਪਟਿਪਜ੍ਜਿਤਬ੍ਬਂ. ਚਿਣ੍ਣਮਾਨਤ੍ਤੋ ਭਿਕ੍ਖੁ ਯਤ੍ਥ ਸਿਯਾ ਵੀਸਤਿਗਣੋ ਭਿਕ੍ਖੁਸਙ੍ਘੋ, ਤਤ੍ਥ ਸੋ ਭਿਕ੍ਖੁ ਅਬ੍ਭੇਤਬ੍ਬੋ’’ਤਿ, ਤਸ੍ਮਾ ਪਟਿਚ੍ਛਨ੍ਨਦਿਵਸਮਤ੍ਤਂ ਅਪਰਿਵਸਿਤ੍ਵਾ ਮਾਨਤ੍ਤਾਰਹੋ ਨਾਮ ਨ ਹੋਤਿ, ਅਮਾਨਤ੍ਤਾਰਹਸ੍ਸ ਮਾਨਤ੍ਤਦਾਨਂ ਨ ਰੁਹਤਿ, ਅਚਿਣ੍ਣਮਾਨਤ੍ਤੋ ਅਬ੍ਭਾਨਾਰਹੋ ਨ ਹੋਤਿ, ਅਨਬ੍ਭਾਨਾਰਹਸ੍ਸ ਅਬ੍ਭਾਨਂ ਨ ਰੁਹਤਿ, ਅਨਬ੍ਭਿਤੋ ਭਿਕ੍ਖੁ ਆਪਤ੍ਤਿਮੁਤ੍ਤੋ ਪਕਤਤ੍ਤੋ ਨ ਹੋਤੀਤਿ ਅਯਮੇਤ੍ਥ ਭਗਵਤੋ ਅਧਿਪ੍ਪਾਯੋ.

ਅਟ੍ਠਕਥਾਯਂ (ਚੂਲ਼ਵ. ਅਟ੍ਠ. ੧੦੨) ਪਨ ਚੂਲ਼ਸੁਦ੍ਧਨ੍ਤੇ ‘‘ਤਂ ਗਹੇਤ੍ਵਾ ਪਰਿਵਸਨ੍ਤੇਨ ਯਤ੍ਤਕਂ ਕਾਲਂ ਅਤ੍ਤਨੋ ਸੁਦ੍ਧਿਂ ਜਾਨਾਤਿ, ਤਤ੍ਤਕਂ ਅਪਨੇਤ੍ਵਾ ਅਵਸੇਸਂ ਮਾਸਂ ਵਾ ਦ੍ਵਿਮਾਸਂ ਵਾ ਪਰਿਵਸਿਤਬ੍ਬ’’ਨ੍ਤਿ, ਮਹਾਸੁਦ੍ਧਨ੍ਤੇ ‘‘ਤਂ ਗਹੇਤ੍ਵਾ ਗਹਿਤਦਿਵਸਤੋ ਯਾਵ ਉਪਸਮ੍ਪਦਦਿਵਸੋ, ਤਾਵ ਰਤ੍ਤਿਯੋ ਗਣੇਤ੍ਵਾ ਪਰਿਵਸਿਤਬ੍ਬ’’ਨ੍ਤਿ ਵੁਤ੍ਤਂ, ਤਸ੍ਮਾ ਪਟਿਚ੍ਛਨ੍ਨਰਤ੍ਤਿਪ੍ਪਮਾਣਂ ਪਰਿਵਸਨ੍ਤੋਯੇਵ ਮਾਨਤ੍ਤਾਰਹੋ ਹੋਤਿ, ਨ ਪਞ੍ਚਾਹਦਸਾਹਰਤ੍ਤਿਪ੍ਪਮਾਣਮਤ੍ਤਂ ਪਰਿਵਸਨ੍ਤੋਤਿ ਅਯਂ ਅਟ੍ਠਕਥਾਚਰਿਯਾਨਂ ਅਧਿਪ੍ਪਾਯੋ. ਤੇਨੇਵ ਚ ਕਾਰਣੇਨ ਦੇਸਨਾਆਰੋਚਨਾਦੀਹਿ ਸਬ੍ਬਕਾਲਂ ਆਪਤ੍ਤਿਂ ਸੋਧੇਤ੍ਵਾ ਵਸਨ੍ਤਾਨਂ ਲਜ੍ਜੀਪੇਸਲਾਨਂ ਸਿਕ੍ਖਾਕਾਮਾਨਂ ਭਿਕ੍ਖੂਨਂ ਸੁਦ੍ਧਨ੍ਤਪਰਿਵਾਸਂ ਦਾਤੁਂ ਅਯੁਤ੍ਤਰੂਪੋ, ਦੇਸਨਾਆਰੋਚਨਾਦੀਹਿ ਆਪਤ੍ਤਿਂ ਅਸੋਧੇਤ੍ਵਾ ਪਮਾਦਵਸੇਨ ਚਿਰਕਾਲਂ ਵਸਨ੍ਤਾਨਂ ਜਨਪਦਵਾਸਿਕਾਦੀਨਂ ਦਾਤੁਂ ਯੁਤ੍ਤਰੂਪੋਤਿ ਵੇਦਿਤਬ੍ਬਂ. ਏਤ੍ਥਾਪਿ ਅਵਸੇਸਵਿਨਿਚ੍ਛਯੋ ਅਟ੍ਠਕਥਾਯਂ ਵੁਤ੍ਤਨਯੇਨੇਵ ਵੇਦਿਤਬ੍ਬੋ.

ਅਥ ਪਨ ਵਿਨਯਧਰੇਨ ‘‘ਤ੍ਵਂ, ਆਵੁਸੋ, ਕਤਰਆਪਤ੍ਤਿਂ ਆਪਨ੍ਨੋ, ਕਤਿ ਰਤ੍ਤਿਯੋ ਤੇ ਛਾਦਿਤਾ’’ਤਿ ਪੁਟ੍ਠੋ ‘‘ਅਹਂ, ਭਨ੍ਤੇ, ਸਙ੍ਘਾਦਿਸੇਸਂ ਆਪਤ੍ਤਿਂ ਆਪਜ੍ਜਿਤ੍ਵਾ ਪਕ੍ਖਮਤ੍ਤਂ ਪਟਿਚ੍ਛਾਦਿਤਾ, ਤੇਨਾਹਂ ਸਙ੍ਘਂ ਪਕ੍ਖਪਰਿਵਾਸਂ ਯਾਚਿਤ੍ਵਾ ਸਙ੍ਘੇਨ ਦਿਨ੍ਨੇ ਪਕ੍ਖਪਰਿਵਾਸੇ ਪਰਿਵਸਿਤ੍ਵਾ ਅਨਿਕ੍ਖਿਤ੍ਤਵਤ੍ਤੋਵ ਹੁਤ੍ਵਾ ਅਨ੍ਤਰਾ ਸਙ੍ਘਾਦਿਸੇਸਾਪਤ੍ਤਿਂ ਆਪਜ੍ਜਿਤ੍ਵਾ ਪਞ੍ਚਾਹਮਤ੍ਤਂ ਛਾਦਿਤਾ’’ਤਿ ਵੁਤ੍ਤੇ ‘‘ਅਯਂ ਭਿਕ੍ਖੁ ਸਮੋਧਾਨਪਰਿਵਾਸਾਰਹੋ, ਤੀਸੁ ਚ ਸਮੋਧਾਨਪਰਿਵਾਸੇਸੁ ਓਧਾਨਸਮੋਧਾਨਾਰਹੋ’’ਤਿ ਞਤ੍ਵਾ ‘‘ਤੇਨ ਹਿ ਭਿਕ੍ਖੁ ਤ੍ਵਂ ਮੂਲਾਯਪਟਿਕਸ੍ਸਨਾਰਹੋ’’ਤਿ ਵਤ੍ਵਾ ਤਂ ਮੂਲਾਯ ਪਟਿਕਸ੍ਸਿਤ੍ਵਾ ਪਰਿਵੁਤ੍ਥਦਿਵਸੇ ਅਦਿਵਸੇ ਕਤ੍ਵਾ ਅਨ੍ਤਰਾ ਪਟਿਚ੍ਛਨ੍ਨੇ ਪਞ੍ਚ ਦਿਵਸੇ ਮੂਲਾਪਤ੍ਤਿਯਾ ਪਟਿਚ੍ਛਨ੍ਨੇਸੁ ਦਿਵਸੇਸੁ ਸਮੋਧਾਨੇਤ੍ਵਾ ਓਧਾਨਸਮੋਧਾਨੋ ਦਾਤਬ੍ਬੋ. ਇਤੋ ਪਰਾਨਿ ਓਧਾਨਸਮੋਧਾਨੇ ਵਤ੍ਤਬ੍ਬਵਚਨਾਨਿ ਪਾਲ਼ਿਯਂ ਅਟ੍ਠਕਥਾਯਞ੍ਚ ਵੁਤ੍ਤਨਯੇਨੇਵ ਵੇਦਿਤਬ੍ਬਾਨਿ.

ਅਥ ਪਨ ਵਿਨਯਧਰੇਨ ਪੁਟ੍ਠੋ ‘‘ਅਹਂ, ਭਨ੍ਤੇ, ਸਮ੍ਬਹੁਲਾ ਸਙ੍ਘਾਦਿਸੇਸਾ ਆਪਤ੍ਤਿਯੋ ਆਪਜ੍ਜਿਂ, ਸਮ੍ਬਹੁਲਾ ਆਪਤ੍ਤਿਯੋ ਏਕਾਹਪ੍ਪਟਿਚ੍ਛਨ੍ਨਾਯੋ…ਪੇ… ਸਮ੍ਬਹੁਲਾ ਆਪਤ੍ਤਿਯੋ ਦਸਾਹਪ੍ਪਟਿਚ੍ਛਨ੍ਨਾਯੋ’’ਤਿ ਵੁਤ੍ਤੇ ‘‘ਅਯਂ ਭਿਕ੍ਖੁ ਅਗ੍ਘਸਮੋਧਾਨਾਰਹੋ’’ਤਿ ਞਤ੍ਵਾ ਤਾਸਂ ਆਪਤ੍ਤੀਨਂ ਯਾ ਆਪਤ੍ਤਿਯੋ ਚਿਰਤਰਪ੍ਪਟਿਚ੍ਛਨ੍ਨਾਯੋ, ਤਾਸਂ ਅਗ੍ਘੇਨ ਸਮੋਧਾਨਪਰਿਵਾਸੋ ਦਾਤਬ੍ਬੋ. ਤਤ੍ਰੇਵਂ ਵਦਨ੍ਤਿ – ‘‘ਯਾ ਆਪਤ੍ਤਿਯੋ ਚਿਰਤਰਪ੍ਪਟਿਚ੍ਛਨ੍ਨਾਯੋ, ਤਾਸਂ ਅਗ੍ਘੇਨ ਸਮੋਧਾਨਪਰਿਵਾਸੋ ਦਾਤਬ੍ਬੋ’’ਤਿ ਵੁਤ੍ਤੋ, ਏਵਂ ਸਨ੍ਤੇ ਪਕ੍ਖਪ੍ਪਟਿਚ੍ਛਨ੍ਨਮਾਸਪ੍ਪਟਿਚ੍ਛਨ੍ਨਾਦੀਸੁ ਕਥਨ੍ਤਿ? ਤੇਸੁਪਿ ‘‘ਯਾ ਆਪਤ੍ਤਿਯੋ ਪਕ੍ਖਪ੍ਪਟਿਚ੍ਛਨ੍ਨਾਯੋ, ਯਾ ਆਪਤ੍ਤਿਯੋ ਮਾਸਪ੍ਪਟਿਚ੍ਛਨ੍ਨਾਯੋ’’ਤਿ ਵਤ੍ਤਬ੍ਬੋਤਿ. ਯਦਿ ਏਵਂ ਪਾਲ਼ਿਵਿਰੋਧੋ ਆਪਜ੍ਜਤਿ. ਪਾਲ਼ਿਯਞ੍ਹਿ ਦਸਾਹਪ੍ਪਟਿਚ੍ਛਨ੍ਨਪਰਿਯੋਸਾਨਾ ਏਵ ਆਪਤ੍ਤਿ ਦਸ੍ਸਿਤਾ, ਨ ਪਕ੍ਖਪ੍ਪਟਿਚ੍ਛਨ੍ਨਮਾਸਪ੍ਪਟਿਚ੍ਛਨ੍ਨਾਦਯੋਤਿ? ਸਚ੍ਚਂ, ਪਾਲ਼ਿਯਂ ਤਥਾਦਸ੍ਸਨਂ ਪਨ ਨਯਦਸ੍ਸਨਮਤ੍ਤਂ. ਤਥਾ ਹਿ ਵੁਤ੍ਤਂ ਅਟ੍ਠਕਥਾਯਂ (ਚੂਲ਼ਵ. ਅਟ੍ਠ. ੧੦੨) ‘‘ਪਞ੍ਚਦਸ ਦਿਵਸਾਨਿ ਪਟਿਚ੍ਛਨ੍ਨਾਯ ‘ਪਕ੍ਖਪ੍ਪਟਿਚ੍ਛਨ੍ਨ’ਨ੍ਤਿ ਵਤ੍ਵਾ ਯੋਜਨਾ ਕਾਤਬ੍ਬਾ…ਪੇ… ਏਵਂ ਯਾਵ ਸਟ੍ਠਿਸਂਵਚ੍ਛਰਂ, ਅਤਿਰੇਕਸਟ੍ਠਿਸਂਵਚ੍ਛਰਪ੍ਪਟਿਚ੍ਛਨ੍ਨਨ੍ਤਿ ਵਾ ਤਤੋ ਵਾ ਭਿਯ੍ਯੋਪਿ ਵਤ੍ਵਾ ਯੋਜਨਾ ਕਾਤਬ੍ਬਾ’’ਤਿ. ਮਹਾਪਦੁਮਤ੍ਥੇਰੇਨਪਿ ਵੁਤ੍ਤਂ ‘‘ਅਯਂ ਸਮੁਚ੍ਚਯਕ੍ਖਨ੍ਧਕੋ ਨਾਮ ਬੁਦ੍ਧਾਨਂ ਠਿਤਕਾਲਸਦਿਸੋ, ਆਪਤ੍ਤਿ ਨਾਮ ਪਟਿਚ੍ਛਨ੍ਨਾ ਵਾ ਹੋਤੁ ਅਪ੍ਪਟਿਚ੍ਛਨ੍ਨਾ ਵਾ ਸਮਕਊਨਤਰਅਤਿਰੇਕਪ੍ਪਟਿਚ੍ਛਨ੍ਨਾ ਵਾ, ਵਿਨਯਧਰਸ੍ਸ ਕਮ੍ਮਵਾਚਂ ਯੋਜੇਤੁਂ ਸਮਤ੍ਥਭਾਵੋਯੇਵੇਤ੍ਥ ਪਮਾਣ’’ਨ੍ਤਿ, ਤਸ੍ਮਾ ਪਕ੍ਖਪ੍ਪਟਿਚ੍ਛਨ੍ਨਾਦੀਨਂ ਕਮ੍ਮਵਾਚਾਕਰਣੇ ਕੁਕ੍ਕੁਚ੍ਚਂ ਨ ਕਾਤਬ੍ਬਨ੍ਤਿ.

ਹੋਤੁ, ਏਵਮ੍ਪਿ ਪਕ੍ਖਪ੍ਪਟਿਚ੍ਛਨ੍ਨਂ ਪਰਿਯਨ੍ਤਂ ਕਤ੍ਵਾ ਕਤਾਯ ਕਮ੍ਮਵਾਚਾਯ ਤਤੋ ਉਦ੍ਧਂ ਆਪਤ੍ਤਿ ਨਤ੍ਥੀਤਿ ਕਥਂ ਜਾਨੇਯ੍ਯਾਤਿ? ਇਦਾਨਿ ਸਿਕ੍ਖਾਕਾਮਾ ਭਿਕ੍ਖੂ ਦੇਵਸਿਕਮ੍ਪਿ ਦੇਸਨਾਰੋਚਨਾਵਿਕਰਣਾਨਿ ਕਰੋਨ੍ਤਿ ਏਕਾਹਿਕਦ੍ਵੀਹਿਕਾਦਿਵਸੇਨਪਿ, ਕਿਚ੍ਚਪਸੁਤਾ ਹੁਤ੍ਵਾ ਤਥਾ ਅਸਕ੍ਕੋਨ੍ਤਾਪਿ ਉਪੋਸਥਦਿਵਸਂ ਨਾਤਿਕ੍ਕਮਨ੍ਤਿ, ਗਿਲਾਨਾਦਿਵਸੇਨ ਤਦਤਿਕ੍ਕਨ੍ਤਾਪਿ ਅਤਿਕ੍ਕਨ੍ਤਭਾਵਂ ਜਾਨਨ੍ਤਿ, ਤਸ੍ਮਾ ਤਦਤਿਕ੍ਕਨ੍ਤਭਾਵੇ ਸਤਿ ਅਤਿਰੇਕਪਕ੍ਖਪ੍ਪਟਿਚ੍ਛਨ੍ਨਮਾਸਪ੍ਪਟਿਚ੍ਛਨ੍ਨਾਦਿਵਸੇਨ ਵਡ੍ਢੇਤ੍ਵਾ ਕਮ੍ਮਵਾਚਂ ਕਰੇਯ੍ਯ, ਤਦਤਿਕ੍ਕਨ੍ਤਭਾਵੇ ਪਨ ਅਸਤਿ ਪਕ੍ਖਪ੍ਪਟਿਚ੍ਛਨ੍ਨਪਰਿਯਨ੍ਤਾ ਹੋਤਿ, ਤਸ੍ਮਾ ਪਕ੍ਖਪਰਿਯਨ੍ਤਕਮ੍ਮਵਾਚਾਕਰਣਂ ਞਾਯਾਗਤਂ ਹੋਤੀਤਿ ਦਟ੍ਠਬ੍ਬਂ.

ਏਵਂ ਹੋਤੁ, ਤਥਾਪਿ ਯਦੇਤਂ ‘‘ਸਮ੍ਬਹੁਲਾ ਆਪਤ੍ਤਿਯੋ ਏਕਾਹਪ੍ਪਟਿਚ੍ਛਨ੍ਨਾਯੋ…ਪੇ… ਸਮ੍ਬਹੁਲਾ ਆਪਤ੍ਤਿਯੋ ਪਕ੍ਖਪ੍ਪਟਿਚ੍ਛਨ੍ਨਾਯੋ’’ਤਿ ਵੁਤ੍ਤਂ, ਤਤ੍ਥ ਇਮਿਨਾਯੇਵ ਅਨੁਕ੍ਕਮੇਨ ਮਯਾ ਪਟਿਚ੍ਛਾਦਿਤਾ ਆਪਤ੍ਤਿਯੋ ਹੋਨ੍ਤੀਤਿ ਕਥਂ ਜਾਨੇਯ੍ਯ, ਅਜਾਨਨੇ ਚ ਸਤਿ ‘‘ਯਾ ਚ ਖ੍ਵਾਯਂ, ਆਵੁਸੋ, ਆਪਤ੍ਤਿ ਅਜਾਨਪ੍ਪਟਿਚ੍ਛਨ੍ਨਾ, ਅਧਮ੍ਮਿਕਂ ਤਸ੍ਸਾ ਆਪਤ੍ਤਿਯਾ ਪਰਿਵਾਸਦਾਨਂ, ਅਧਮ੍ਮਤ੍ਤਾ ਨ ਰੁਹਤੀ’’ਤਿ ਇਦਂ ਆਪਜ੍ਜਤੀਤਿ? ਨਾਪਜ੍ਜਤਿ. ਤਤ੍ਥ ਹਿ ਆਪਤ੍ਤਿਯਾ ਆਪਨ੍ਨਭਾਵਂ ਅਜਾਨਨ੍ਤੋ ਹੁਤ੍ਵਾ ਪਟਿਚ੍ਛਾਦੇਤਿ, ਤਸ੍ਮਾ ‘‘ਆਪਤ੍ਤਿ ਚ ਹੋਤਿ ਆਪਤ੍ਤਿਸਞ੍ਞੀ ਚਾ’’ਤਿ ਵੁਤ੍ਤਆਪਤ੍ਤਿਸਞ੍ਞਿਤਾਭਾਵਾ ਅਪ੍ਪਟਿਚ੍ਛਨ੍ਨਮੇਵ ਹੋਤਿ, ਤਸ੍ਮਾ ਅਪ੍ਪਟਿਚ੍ਛਨ੍ਨਾਯ ਆਪਤ੍ਤਿਯਾ ਪਰਿਵਾਸਦਾਨਂ ਅਧਮ੍ਮਿਕਂ ਹੋਤਿ. ਇਧ ਪਨ ‘‘ਏਤ੍ਤਕਾ ਰਤ੍ਤਿਯੋ ਮਯਾ ਛਾਦਿਤਾ’’ਤਿ ਛਨ੍ਨਕਾਲਮੇਵ ਨ ਜਾਨਾਤਿ, ਤਦਜਾਨਭਾਵੇ ਸਤਿਪਿ ਪਰਿਵਾਸਦਾਨਂ ਰੁਹਤਿ. ਤੇਨੇਵ ਚ ਕਾਰਣੇਨ ਸੁਦ੍ਧਨ੍ਤਪਰਿਵਾਸੇ (ਚੂਲ਼ਵ. ੧੫੬-੧੫੭) ‘‘ਆਪਤ੍ਤਿਪਰਿਯਨ੍ਤਂ ਨ ਜਾਨਾਤਿ, ਰਤ੍ਤਿਪਰਿਯਨ੍ਤਂ ਨ ਜਾਨਾਤਿ, ਆਪਤ੍ਤਿਪਰਿਯਨ੍ਤਂ ਨਸ੍ਸਰਤਿ, ਰਤ੍ਤਿਪਰਿਯਨ੍ਤਂ ਨਸ੍ਸਰਤਿ, ਆਪਤ੍ਤਿਪਰਿਯਨ੍ਤੇ ਵੇਮਤਿਕੋ, ਰਤ੍ਤਿਪਰਿਯਨ੍ਤੇ ਵੇਮਤਿਕੋ’’ਤਿ ਰਤ੍ਤਿਪਰਿਯਨ੍ਤਸ੍ਸ ਅਜਾਨਨਅਸਰਣਵੇਮਤਿਕਭਾਵੇ ਸਤਿਪਿ ਪਰਿਵਾਸਦਾਨਂ ਵੁਤ੍ਤਂ, ਤਸ੍ਮਾ ਛਾਦਿਤਕਾਲਂ ਤਥਤੋ ਅਜਾਨਨ੍ਤੋਪਿ ‘‘ਸਮ੍ਬਹੁਲਾ ਆਪਤ੍ਤਿਯੋ ਏਕਾਹਪ੍ਪਟਿਚ੍ਛਨ੍ਨਾਯੋ…ਪੇ… ਸਮ੍ਬਹੁਲਾ ਆਪਤ੍ਤਿਯੋ ਪਕ੍ਖਪ੍ਪਟਿਚ੍ਛਨ੍ਨਾਯੋ’’ਤਿ ਏਤ੍ਥ ਅਪ੍ਪਵਿਟ੍ਠਸ੍ਸ ਅਭਾਵਾ ਸਮ੍ਪਜ੍ਜਤਿਯੇਵਾਤਿ ਦਟ੍ਠਬ੍ਬਂ.

ਅਥਾਪਿ ਏਵਂ ਵਦੇਯ੍ਯੁਂ – ‘‘ਸਮ੍ਬਹੁਲਾ ਆਪਤ੍ਤਿਯੋ ਏਕਾਹਪ੍ਪਟਿਚ੍ਛਨ੍ਨਾਯੋ…ਪੇ… ਸਮ੍ਬਹੁਲਾ ਆਪਤ੍ਤਿਯੋ ਪਕ੍ਖਪ੍ਪਟਿਚ੍ਛਨ੍ਨਾਯੋ’’ਤਿ ਵੁਤ੍ਤੇ ਤੇਸੁ ਦਿਵਸੇਸੁ ਆਪਤ੍ਤਿਯੋ ਅਤ੍ਥਿ ਪਟਿਚ੍ਛਨ੍ਨਾਯੋਪਿ, ਅਤ੍ਥਿ ਅਪ੍ਪਟਿਚ੍ਛਨ੍ਨਾਯੋਪਿ, ਅਤ੍ਥਿ ਚਿਰਪ੍ਪਟਿਚ੍ਛਨ੍ਨਾਯੋਪਿ, ਅਤ੍ਥਿ ਅਚਿਰਪ੍ਪਟਿਚ੍ਛਨ੍ਨਾਯੋਪਿ, ਅਤ੍ਥਿ ਏਕਾਪਿ, ਅਤ੍ਥਿ ਸਮ੍ਬਹੁਲਾਪਿ, ਸਬ੍ਬਾ ਤਾ ਆਪਤ੍ਤਿਯੋ ਏਤੇਨੇਵ ਪਦੇਨ ਸਙ੍ਗਹਿਤਾ ਸਿਯੁਨ੍ਤਿ? ਸਙ੍ਗਹਿਤਾ ਏਵ. ਨ ਹੇਤ੍ਥ ਸਂਸਯੋ ਕਾਤਬ੍ਬੋ. ਵੁਤ੍ਤਞ੍ਹੇਤਂ ਅਟ੍ਠਕਥਾਯਂ (ਚੂਲ਼ਵ. ਅਟ੍ਠ. ੧੦੨) ‘‘ਅਞ੍ਞਸ੍ਮਿਂ ਪਨ ਆਪਤ੍ਤਿਵੁਟ੍ਠਾਨੇ ਇਦਂ ਲਕ੍ਖਣਂ – ਯੋ ਅਪ੍ਪਟਿਚ੍ਛਨ੍ਨਂ ਆਪਤ੍ਤਿਂ ‘ਪਟਿਚ੍ਛਨ੍ਨਾ’ਤਿ ਵਿਨਯਕਮ੍ਮਂ ਕਰੋਤਿ, ਤਸ੍ਸ ਆਪਤ੍ਤਿ ਵੁਟ੍ਠਾਤਿ. ਯੋ ਪਟਿਚ੍ਛਨ੍ਨਂ ‘ਅਪ੍ਪਟਿਚ੍ਛਨ੍ਨਾ’ਤਿ ਵਿਨਯਕਮ੍ਮਂ ਕਰੋਤਿ, ਤਸ੍ਸ ਨ ਵੁਟ੍ਠਾਤਿ. ਅਚਿਰਪ੍ਪਟਿਚ੍ਛਨ੍ਨਂ ‘ਚਿਰਪ੍ਪਟਿਚ੍ਛਨ੍ਨਾ’ਤਿ ਕਰੋਨ੍ਤਸ੍ਸਪਿ ਵੁਟ੍ਠਾਤਿ, ਚਿਰਪ੍ਪਟਿਚ੍ਛਨ੍ਨਂ ‘ਅਚਿਰਪ੍ਪਟਿਚ੍ਛਨ੍ਨਾ’ਤਿ ਕਰੋਨ੍ਤਸ੍ਸ ਨ ਵੁਟ੍ਠਾਤਿ. ਏਕਂ ਆਪਤ੍ਤਿਂ ਆਪਜ੍ਜਿਤ੍ਵਾ ‘ਸਮ੍ਬਹੁਲਾ’ਤਿ ਕਰੋਨ੍ਤਸ੍ਸਪਿ ਵੁਟ੍ਠਾਤਿ ਏਕਂ ਵਿਨਾ ਸਮ੍ਬਹੁਲਾਨਂ ਅਭਾਵਤੋ. ਸਮ੍ਬਹੁਲਾ ਪਨ ਆਪਜ੍ਜਿਤ੍ਵਾ ‘ਏਕਂ ਆਪਜ੍ਜਿ’ਨ੍ਤਿ ਕਰੋਨ੍ਤਸ੍ਸ ਨ ਵੁਟ੍ਠਾਤੀ’’ਤਿ, ਤਸ੍ਮਾ ਏਤੇਹਿ ਪਦੇਹਿ ਸਬ੍ਬਾਸਂ ਪਟਿਚ੍ਛਨ੍ਨਾਪਤ੍ਤੀਨਂ ਸਙ੍ਗਹਿਤਤ੍ਤਾ ਤਾਹਿ ਆਪਤ੍ਤੀਹਿ ਵੁਟ੍ਠਾਨਂ ਸਮ੍ਭਵਤੀਤਿ ਦਟ੍ਠਬ੍ਬਂ.

ਅਥ ਪਨ ਵਿਨਯਧਰੇਨ ਪੁਟ੍ਠੋ ‘‘ਅਹਂ, ਭਨ੍ਤੇ, ਸਮ੍ਬਹੁਲਾ ਸਙ੍ਘਾਦਿਸੇਸਾ ਆਪਤ੍ਤਿਯੋ ਆਪਜ੍ਜਿਂ ਏਕਂ ਸੁਕ੍ਕਵਿਸ੍ਸਟ੍ਠਿਂ, ਏਕਂ ਕਾਯਸਂਸਗ੍ਗਂ, ਏਕਂ ਦੁਟ੍ਠੁਲ੍ਲਵਾਚਂ, ਏਕਂ ਅਤ੍ਤਕਾਮਂ, ਏਕਂ ਸਞ੍ਚਰਿਤ੍ਤਂ, ਏਕਂ ਕੁਟਿਕਾਰਂ, ਏਕਂ ਵਿਹਾਰਕਾਰਂ, ਏਕਂ ਦੁਟ੍ਠਦੋਸਂ, ਏਕਂ ਅਞ੍ਞਭਾਗਿਯਂ, ਏਕਂ ਸਙ੍ਘਭੇਦਂ, ਏਕਂ ਭੇਦਾਨੁਵਤ੍ਤਕਂ, ਏਕਂ ਦੁਬ੍ਬਚਂ, ਏਕਂ ਕੁਲਦੂਸਕ’’ਨ੍ਤਿ ਵੁਤ੍ਤੇ ‘‘ਅਯਂ ਭਿਕ੍ਖੁ ਮਿਸ੍ਸਕਸਮੋਧਾਨਪਰਿਵਾਸਾਰਹੋ’’ਤਿ ਞਤ੍ਵਾ ਅਟ੍ਠਕਥਾਯਂ (ਚੂਲ਼ਵ. ਅਟ੍ਠ. ੧੦੨) ਆਗਤਨਯੇਨ ਪਰਿਵਾਸੋ ਦਾਤਬ੍ਬੋ. ਏਤ੍ਥਾਹ – ਅਗ੍ਘਸਮੋਧਾਨਮਿਸ੍ਸਕਸਮੋਧਾਨਾਨਂ ਕੋ ਵਿਸੇਸੋ, ਕਿਂ ਨਾਨਾਕਰਣਨ੍ਤਿ? ਵੁਚ੍ਚਤੇ – ਅਗ੍ਘਸਮੋਧਾਨਪਰਿਵਾਸੋ ਅਚਿਰਪ੍ਪਟਿਚ੍ਛਨ੍ਨਾ ਆਪਤ੍ਤਿਯੋ ਚਿਰਪ੍ਪਟਿਚ੍ਛਨ੍ਨਾਯਂ ਆਪਤ੍ਤਿਯਂ ਸਮੋਧਾਨੇਤ੍ਵਾ ਤਸ੍ਸਾ ਚਿਰਪ੍ਪਟਿਚ੍ਛਨ੍ਨਾਯ ਆਪਤ੍ਤਿਯਾ ਅਗ੍ਘਵਸੇਨ ਦੀਯਤਿ, ਮਿਸ੍ਸਕਸਮੋਧਾਨਪਰਿਵਾਸੋ ਨਾਨਾਵਤ੍ਥੁਕਾ ਆਪਤ੍ਤਿਯੋ ਸਮੋਧਾਨੇਤ੍ਵਾ ਤਾਸਂ ਮਿਸ੍ਸਕਵਸੇਨ ਦੀਯਤਿ, ਅਯਮੇਤੇਸਂ ਵਿਸੇਸੋ. ਅਥ ਵਾ ਅਗ੍ਘਸਮੋਧਾਨੋ ਸਭਾਗਵਤ੍ਥੂਨਂ ਆਪਤ੍ਤੀਨਂ ਸਮੋਧਾਨਵਸੇਨ ਹੋਤਿ, ਇਤਰੋ ਵਿਸਭਾਗਵਤ੍ਥੂਨਨ੍ਤਿ ਆਚਰਿਯਾ. ਤੇਨੇਵਾਹ ਆਚਰਿਯਵਜਿਰਬੁਦ੍ਧਿਤ੍ਥੇਰੋ (ਵਜਿਰ. ਟੀ. ਚੂਲ਼ਵਗ੍ਗ ੧੦੨) ‘‘ਅਗ੍ਘਸਮੋਧਾਨੋ ਨਾਮ ਸਭਾਗਵਤ੍ਥੁਕਾਯੋ ਸਮ੍ਬਹੁਲਾ ਆਪਤ੍ਤਿਯੋ ਆਪਨ੍ਨਸ੍ਸ ਬਹੁਰਤ੍ਤਿਂ ਪਟਿਚ੍ਛਾਦਿਤਾਪਤ੍ਤਿਯਂ ਨਿਕ੍ਖਿਪਿਤ੍ਵਾ ਦਾਤਬ੍ਬੋ, ਇਤਰੋ ਨਾਨਾਵਤ੍ਥੁਕਾਨਂ ਵਸੇਨਾਤਿ ਅਯਮੇਤੇਸਂ ਵਿਸੇਸੋ’’ਤਿ.

ਅਥ ਸਿਯਾ ‘‘ਏਵਂ ਚਿਰਪ੍ਪਟਿਚ੍ਛਨ੍ਨਾਯੋ ਚ ਅਚਿਰਪ੍ਪਟਿਚ੍ਛਨ੍ਨਾਯੋ ਚ ਨਾਨਾਵਤ੍ਥੁਕਾਯੋ ਆਪਤ੍ਤਿਯੋ ਆਪਜ੍ਜਨ੍ਤਸ੍ਸ ਕੋ ਪਰਿਵਾਸੋ ਦਾਤਬ੍ਬੋ ਅਗ੍ਘਸਮੋਧਾਨੋ ਵਾ ਮਿਸ੍ਸਕਸਮੋਧਾਨੋ ਵਾ, ਅਥ ਤਦੁਭਯਾ ਵਾ’’ਤਿ. ਕਿਞ੍ਚੇਤ੍ਥ – ਯਦਿ ਅਗ੍ਘਸਮੋਧਾਨਂ ਦਦੇਯ੍ਯ, ਚਿਰਪ੍ਪਟਿਚ੍ਛਨ੍ਨਾਹਿ ਚ ਅਚਿਰਪ੍ਪਟਿਚ੍ਛਨ੍ਨਾਹਿ ਚ ਸਭਾਗਵਤ੍ਥੁਕਾਹਿ ਆਪਤ੍ਤੀਹਿ ਵੁਟ੍ਠਿਤੋ ਭਵੇਯ੍ਯ, ਚਿਰਪ੍ਪਟਿਚ੍ਛਨ੍ਨਾਹਿ ਚ ਅਚਿਰਪ੍ਪਟਿਚ੍ਛਨ੍ਨਾਹਿ ਚ ਨੋ ਵਿਸਭਾਗਵਤ੍ਥੁਕਾਹਿ. ਯਦਿ ਚ ਮਿਸ੍ਸਕਸਮੋਧਾਨਂ ਦਦੇਯ੍ਯ, ਸਮਾਨਕਾਲਪ੍ਪਟਿਚ੍ਛਨ੍ਨਾਹਿ ਵਿਸਭਾਗਵਤ੍ਥੂਹਿ ਆਪਤ੍ਤੀਹਿ ਵੁਟ੍ਠਿਤੋ ਭਵੇਯ੍ਯ, ਨੋ ਅਸਮਾਨਕਆਲਪ੍ਪਟਿਚ੍ਛਨ੍ਨਾਹਿ ਸਭਾਗਵਤ੍ਥੁਕਾਹਿ ਚ, ਅਥ ਤਦੁਭਯਮ੍ਪਿ ਦਦੇਯ੍ਯ, ‘‘ਏਕਸ੍ਮਿਂ ਕਮ੍ਮੇ ਦ੍ਵੇ ਪਰਿਵਾਸਾ ਦਾਤਬ੍ਬਾ’’ਤਿ ਨੇਵ ਪਾਲ਼ਿਯਂ, ਨ ਅਟ੍ਠਕਥਾਯਂ ਵੁਤ੍ਤਨ੍ਤਿ? ਵੁਚ੍ਚਤੇ – ਇਦਞ੍ਹਿ ਸਬ੍ਬਮ੍ਪਿ ਪਰਿਵਾਸਾਦਿਕਂ ਵਿਨਯਕਮ੍ਮਂ ਵਤ੍ਥੁਵਸੇਨ ਵਾ ਗੋਤ੍ਤਵਸੇਨ ਵਾ ਨਾਮਵਸੇਨ ਵਾ ਆਪਤ੍ਤਿਵਸੇਨ ਵਾ ਕਾਤੁਂ ਵਟ੍ਟਤਿਯੇਵ.

ਤਤ੍ਥ ਸੁਕ੍ਕਵਿਸ੍ਸਟ੍ਠੀਤਿ ਵਤ੍ਥੁ ਚੇਵ ਗੋਤ੍ਤਞ੍ਚ. ਸਙ੍ਘਾਦਿਸੇਸੋਤਿ ਨਾਮਞ੍ਚੇਵ ਆਪਤ੍ਤਿ ਚ. ਤਤ੍ਥ ‘‘ਸੁਕ੍ਕਵਿਸ੍ਸਟ੍ਠਿਂ ਕਾਯਸਂਸਗ੍ਗ’’ਨ੍ਤਿਆਦਿਵਚਨੇਨਾਪਿ ‘‘ਨਾਨਾਵਤ੍ਥੁਕਾਯੋ’’ਤਿ ਵਚਨੇਨਪਿ ਵਤ੍ਥੁ ਚੇਵ ਗੋਤ੍ਤਞ੍ਚ ਗਹਿਤਂ ਹੋਤਿ, ‘‘ਸਙ੍ਘਾਦਿਸੇਸੋ’’ਤਿ ਵਚਨੇਨਪਿ ‘‘ਆਪਤ੍ਤਿਯੋ’’ਤਿ ਵਚਨੇਨਪਿ ਨਾਮਞ੍ਚੇਵ ਆਪਤ੍ਤਿ ਚ ਗਹਿਤਾ ਹੋਤਿ, ਤਸ੍ਮਾ ਅਗ੍ਘਸਮੋਧਾਨਵਸੇਨ ਪਰਿਵਾਸੇ ਦਿਨ੍ਨੇ ‘‘ਅਹਂ, ਭਨ੍ਤੇ, ਸਮ੍ਬਹੁਲਾ ਸਙ੍ਘਾਦਿਸੇਸਾ ਆਪਤ੍ਤਿਯੋ ਆਪਜ੍ਜਿ’’ਨ੍ਤਿਆਦਿਵਚਨੇਨੇਵ ਵਤ੍ਥੁਸ੍ਸ ਚ ਗੋਤ੍ਤਸ੍ਸ ਚ ਨਾਮਸ੍ਸ ਚ ਆਪਤ੍ਤਿਯਾ ਚ ਗਹਿਤਤ੍ਤਾ ਚਿਰਪ੍ਪਟਿਚ੍ਛਨ੍ਨਾਹਿ ਅਚਿਰਪ੍ਪਟਿਚ੍ਛਨ੍ਨਾਹਿ ਚ ਸਭਾਗਵਤ੍ਥੁਕਾਹਿ ਚ ਵਿਸਭਾਗਵਤ੍ਥੁਕਾਹਿ ਚ ਸਬ੍ਬਾਹਿ ਆਪਤ੍ਤੀਹਿ ਵੁਟ੍ਠਾਤੀਤਿ ਦਟ੍ਠਬ੍ਬਂ. ਵੁਤ੍ਤਞ੍ਹੇਤਂ ਸਮਨ੍ਤਪਾਸਾਦਿਕਾਯਂ ‘‘ਏਤ੍ਥ ਚ ‘ਸਙ੍ਘਾਦਿਸੇਸਾ ਆਪਤ੍ਤਿਯੋ ਆਪਜ੍ਜਿਂ ਨਾਨਾਵਤ੍ਥੁਕਾਯੋ’ਤਿਪਿ ‘ਸਙ੍ਘਾਦਿਸੇਸਾ ਆਪਤ੍ਤਿਯੋ ਆਪਜ੍ਜਿ’ਨ੍ਤਿਪਿ ਏਵਂ ਪੁਬ੍ਬੇ ਵੁਤ੍ਤਨਯੇਨ ਵਤ੍ਥੁਵਸੇਨਪਿ ਗੋਤ੍ਤਵਸੇਨਪਿ ਨਾਮਵਸੇਨਪਿ ਆਪਤ੍ਤਿਵਸੇਨਪਿ ਯੋਜੇਤ੍ਵਾ ਕਮ੍ਮਵਾਚਂ ਕਾਤੁਂ ਵਟ੍ਟਤਿਯੇਵਾਤਿ ਅਯਂ ਮਿਸ੍ਸਕਸਮੋਧਾਨੋ’’ਤਿ, ਇਮਸ੍ਮਿਞ੍ਚ ਵਿਨਯਸਙ੍ਗਹਪ੍ਪਕਰਣੇ (ਵਿ. ਸਙ੍ਗ. ਅਟ੍ਠ. ੨੪੫) ਤਥੇਵ ਵਤ੍ਵਾ ‘‘ਤਸ੍ਮਾ ਨ ਇਧ ਵਿਸੁਂ ਕਮ੍ਮਵਾਚਂ ਯੋਜੇਤ੍ਵਾ ਦਸ੍ਸਯਿਸ੍ਸਾਮ, ਪੁਬ੍ਬੇ ਸਬ੍ਬਾਪਤ੍ਤਿਸਾਧਾਰਣਂ ਕਤ੍ਵਾ ਯੋਜੇਤ੍ਵਾ ਦਸ੍ਸਿਤਾਯ ਏਵ ਕਮ੍ਮਵਾਚਾਯ ਨਾਨਾਵਤ੍ਥੁਕਾਹਿਪਿ ਆਪਤ੍ਤੀਹਿ ਵੁਟ੍ਠਾਨਸਮ੍ਭਵਤੋ ਸਾਯੇਵੇਤ੍ਥ ਕਮ੍ਮਵਾਚਾ ਅਲ’’ਨ੍ਤਿ.

ਯਦਿ ਏਵਂ ਆਚਰਿਯਵਜਿਰਬੁਦ੍ਧਿਤ੍ਥੇਰੇਨ ਦ੍ਵਿਨ੍ਨਂ ਵਿਸੇਸੋ ਨ ਵਤ੍ਤਬ੍ਬੋ, ਅਥ ਕਸ੍ਮਾ ਵੁਤ੍ਤੋਤਿ? ਤੀਸੁ ਸਮੋਧਾਨਪਰਿਵਾਸੇਸੁ ਓਧਾਨਸਮੋਧਾਨੋ ਮੂਲਾਯਪਟਿਕਸ੍ਸਨਾਯ ਓਧੂਨਿਤਕਾਲੇਯੇਵ ਦਾਤਬ੍ਬੋ, ਅਗ੍ਘਸਮੋਧਾਨਮਿਸ੍ਸਕਸਮੋਧਾਨਪਰਿਵਾਸਾ ਪਨ ਵਿਸੁਂਯੇਵ ਦਾਤਬ੍ਬਾ. ‘‘ਏਵਂ ਦਿਨ੍ਨੇ ਏਤੇਸਂ ਕੋ ਵਿਸੇਸੋ’’ਤਿ ਚਿਨ੍ਤਾਯਂ ਵਿਸੇਸਸਮ੍ਭਵਮਤ੍ਤਦਸ੍ਸਨਤ੍ਥਂ ਵੁਤ੍ਤੋ. ਅਟ੍ਠਕਥਾਯਂ ਪਨ ਪਰਿਵਾਸਾਦਿਕਮ੍ਮਸ੍ਸ ਲਕ੍ਖਣਂ ਦਸ੍ਸੇਤੁਂ ‘‘ਵਤ੍ਥੁਵਸੇਨ ਵਾ’’ਤਿਆਦਿਮਾਹ, ਤਸ੍ਮਾ ਲਕ੍ਖਣਵਸੇਨੇਵ ਸਭਾਗਵਤ੍ਥੁਕਾਹਿਪਿ ਆਪਤ੍ਤੀਹਿ ਵੁਟ੍ਠਾਨਂ ਸਮ੍ਭਵਤਿ. ਤੇਨੇਵ ਚ ਕਾਰਣੇਨ ਸਾਰਤ੍ਥਦੀਪਨਿਨਾਮਿਕਾਯਂ ਵਿਨਯਟੀਕਾਯਞ੍ਚ ਵਿਮਤਿਵਿਨੋਦਨਿਨਾਮਿਕਾਯਂ ਵਿਨਯਟੀਕਾਯਞ੍ਚ ਨ ਕੋਚਿ ਵਿਸੇਸੋ ਵੁਤ੍ਤੋਤਿ ਦਟ੍ਠਬ੍ਬੋ.

ਯਦਿ ਏਵਂ ਮਿਸ੍ਸਕਸਮੋਧਾਨਕਮ੍ਮਵਾਚਾਯਪਿ ਚਿਰਪ੍ਪਟਿਚ੍ਛਨ੍ਨਾਹਿ ਅਚਿਰਪ੍ਪਟਿਚ੍ਛਨ੍ਨਾਹਿਪਿ ਆਪਤ੍ਤੀਹਿ ਵੁਟ੍ਠਾਨਂ ਸਮ੍ਭਵੇਯ੍ਯ. ਤਤ੍ਥਪਿ ਹਿ ‘‘ਅਹਂ, ਭਨ੍ਤੇ, ਸਮ੍ਬਹੁਲਾ ਸਙ੍ਘਾਦਿਸੇਸਾ ਆਪਤ੍ਤਿਯੋ ਆਪਜ੍ਜਿਂ ਨਾਨਾਵਤ੍ਥੁਕਾਯੋ’’ਤਿਪਿ ‘‘ਏਕਾ ਸੁਕ੍ਕਵਿਸ੍ਸਟ੍ਠਿ…ਪੇ… ਏਕਾ ਕੁਲਦੂਸਕਾ’’ਤਿਪਿ ਵਤ੍ਤਬ੍ਬਂ. ਏਵਂ ਸਤਿ ‘‘ਸਮ੍ਬਹੁਲਾ’’ਤਿਪਿ ‘‘ਸਙ੍ਘਾਦਿਸੇਸਾ ਆਪਤ੍ਤਿਯੋ’’ਤਿਪਿ ਵਤ੍ਥੁਗੋਤ੍ਤਨਾਮਾਪਤ੍ਤੀਹਿ ਕਿਤ੍ਤਨਸਮ੍ਭਵਤੋ ਚਿਰਪ੍ਪਟਿਚ੍ਛਨ੍ਨਾਹਿਪਿ ਅਚਿਰਪ੍ਪਟਿਚ੍ਛਨ੍ਨਾਹਿਪਿ ਆਪਤ੍ਤੀਹਿ ਵੁਟ੍ਠਾਨਂ ਸਮ੍ਭਵੇਯ੍ਯਾਤਿ? ਨ ਪਨੇਵਂ ਦਟ੍ਠਬ੍ਬਂ. ਵਤ੍ਥਾਦਿਕਿਤ੍ਤਨਞ੍ਹਿ ਸਬ੍ਬਾਪਤ੍ਤੀਨਂ ਗਣ੍ਹਨਤ੍ਥਂ ਹੋਤਿ. ਏਵਂ ਗਣ੍ਹਨ੍ਤੇਪਿ ਪਟਿਚ੍ਛਨ੍ਨਕਾਲਸ੍ਸ ਅਕਥਿਤਤ੍ਤਾ ‘‘ਏਤ੍ਤਕਂ ਨਾਮ ਕਾਲਂ ਪਰਿਵਸਿਤਬ੍ਬ’’ਨ੍ਤਿ ਨ ਪਞ੍ਞਾਯਤਿ, ਤਸ੍ਮਿਂ ਅਪਞ੍ਞਾਯਮਾਨੇ ਤੇਨ ਪਮਾਣੇਨ ਪਰਿਵਾਸੋ ਨ ਹੋਤਿ, ਤਸ੍ਮਿਂ ਅਸਤਿ ਆਪਤ੍ਤਿਤੋ ਵੁਟ੍ਠਾਨਂ ਨ ਸਮ੍ਭਵਤਿ, ਤਸ੍ਮਾ ਮਿਸ੍ਸਕਸਮੋਧਾਨਕਮ੍ਮਵਾਚਾਯ ਚਿਰਪ੍ਪਟਿਚ੍ਛਨ੍ਨਾਹਿਪਿ ਅਚਿਰਪ੍ਪਟਿਚ੍ਛਨ੍ਨਾਹਿਪਿ ਆਪਤ੍ਤੀਹਿ ਵੁਟ੍ਠਾਨਂ ਨ ਸਮ੍ਭਵਤੀਤਿ ਦਟ੍ਠਬ੍ਬਂ.

ਪਰਿਵਾਸਵਿਨਿਚ੍ਛਯਕਥਾ ਨਿਟ੍ਠਿਤਾ.

ਮਾਨਤ੍ਤਵਿਨਿਚ੍ਛਯਕਥਾ

ਮਾਨਤ੍ਤਕਥਾਯਮ੍ਪਿ ਮਾਨਤ੍ਤਂ ਨਾਮ ਅਪ੍ਪਟਿਚ੍ਛਨ੍ਨਮਾਨਤ੍ਤਂ ਪਟਿਚ੍ਛਨ੍ਨਮਾਨਤ੍ਤਂ ਪਕ੍ਖਮਾਨਤ੍ਤਂ ਸਮੋਧਾਨਮਾਨਤ੍ਤਨ੍ਤਿ ਚਤੁਬ੍ਬਿਧਂ ਹੋਤਿ. ਤਤ੍ਥ ਯੋ ਭਿਕ੍ਖੁ ਸਙ੍ਘਾਦਿਸੇਸਂ ਆਪਤ੍ਤਿਂ ਆਪਜ੍ਜਿਤ੍ਵਾ ਤਂ ਦਿਵਸਮੇਵ ਆਰੋਚੇਤਿ, ਏਕਰਤ੍ਤਿਮਤ੍ਤਮ੍ਪਿ ਨ ਪਟਿਚ੍ਛਾਦੇਤਿ, ਤਸ੍ਸ ਪਰਿਵਾਸਂ ਅਦਤ੍ਵਾਵ ਦਿਨ੍ਨਂ ਮਾਨਤ੍ਤਂ ਅਪ੍ਪਟਿਚ੍ਛਨ੍ਨਮਾਨਤ੍ਤਂ ਨਾਮ. ਯੋ ਆਪਜ੍ਜਿਤ੍ਵਾ ਦਸਹਿ ਆਕਾਰੇਹਿ ਵਿਨਾ ਤਂ ਦਿਵਸਂ ਨਾਰੋਚੇਤਿ, ਏਕਰਤ੍ਤਾਦਿਵਸੇਨ ਪਟਿਚ੍ਛਾਦੇਤਿ, ਤਤ੍ਥ ਯਥਾਪਟਿਚ੍ਛਨ੍ਨਦਿਵਸਂ ਪਰਿਵਾਸਂ ਦਤ੍ਵਾ ਪਰਿਵੁਤ੍ਥਪਰਿਵਾਸਸ੍ਸ ਦਿਨ੍ਨਂ ਮਾਨਤ੍ਤਂ ਪਟਿਚ੍ਛਨ੍ਨਮਾਨਤ੍ਤਂ ਨਾਮ. ਆਪਤ੍ਤਿਂ ਆਪਜ੍ਜਿਤ੍ਵਾ ਪਟਿਚ੍ਛਨ੍ਨਾਯ ਵਾ ਅਪ੍ਪਟਿਚ੍ਛਨ੍ਨਾਯ ਵਾ ਭਿਕ੍ਖੁਨਿਯਾ ਪਕ੍ਖਮਤ੍ਤਮੇਵ ਦਿਨ੍ਨਂ ਮਾਨਤ੍ਤਂ ਪਕ੍ਖਮਾਨਤ੍ਤਂ ਨਾਮ. ਭਿਕ੍ਖੁ ਪਨ ਪਟਿਚ੍ਛਨ੍ਨਾਯ ਆਪਤ੍ਤਿਯਾ ਪਰਿਵਸਿਤ੍ਵਾ ਅਨਿਕ੍ਖਿਤ੍ਤਵਤ੍ਤਕਾਲੇਯੇਵ ਪੁਨ ਆਪਜ੍ਜਿਤ੍ਵਾ ਨ ਪਟਿਚ੍ਛਾਦੇਤਿ, ਤਸ੍ਸ ਮੂਲਾਯ ਪਟਿਕਸ੍ਸਿਤ੍ਵਾ ਪਰਿਵੁਤ੍ਥਦਿਵਸੇ ਅਦਿਵਸੇ ਕਤ੍ਵਾ ਅਪ੍ਪਟਿਚ੍ਛਾਦਿਤਤ੍ਤਾ ਸਮੋਧਾਨਪਰਿਵਾਸਂ ਅਦਤ੍ਵਾ ਦਿਨ੍ਨਂ ਮਾਨਤ੍ਤਂ ਸਮੋਧਾਨਮਾਨਤ੍ਤਂ ਨਾਮ. ਮਾਨਤ੍ਤਾਰਹਕਾਲੇਪਿ ਮਾਨਤ੍ਤਚਰਣਕਾਲੇਪਿ ਅਬ੍ਭਾਨਾਰਹਕਾਲੇਪਿ ਏਸੇਵ ਨਯੋ. ਤੇਸੁ ਤੀਣਿ ਮਾਨਤ੍ਤਾਨਿ ਅਟ੍ਠਕਥਾਯਂ ਵੁਤ੍ਤਨਯੇਨ ਸੁਵਿਞ੍ਞੇਯ੍ਯਤ੍ਤਾ ਨ ਵੁਤ੍ਤਾਨਿ. ਪਕ੍ਖਮਾਨਤ੍ਤਂ ਪਚ੍ਛਾ ਆਗਮਿਸ੍ਸਤਿ.

ਯਾਨਿ ਪਨ ਪਰਿਵਾਸਮਾਨਤ੍ਤਾਨਿ ਅਨਵਟ੍ਠਿਤਤ੍ਤਾ ਪੁਥੁਜ੍ਜਨਸ੍ਸ ਗਿਹਿਆਦਿਵਸੇਨ ਪਰਿਵਤ੍ਤਨੇ ਸਤਿ ਪੁਨ ਦਾਤਬ੍ਬਾਦਾਤਬ੍ਬਭਾਵੇ ਸਙ੍ਕਿਤਬ੍ਬਾਨਿ, ਤਾਨਿ ਦਸ੍ਸੇਤੁਂ ਪਾਲ਼ਿਯਂ ਅਨੇਕੇਹਿ ਪਕਾਰੇਹਿ ਵਿਤ੍ਥਾਰਤੋ ਵੁਤ੍ਤਾਨਿ. ਤੇਸੁ ਭਿਕ੍ਖੂਨਂ ਸਂਸਯਵਿਨੋਦਨਤ੍ਥਾਯ ਏਕਦੇਸਂ ਦਸ੍ਸੇਤੁਂ ‘‘ਸਚੇ ਕੋਚੀ’’ਤਿਆਦਿਮਾਹ. ਤਤ੍ਥ ਵਿਬ੍ਭਮਤੀਤਿ ਵਿਰੂਪੋ ਹੁਤ੍ਵਾ ਭਮਤਿ, ਹੀਨਾਯਾਵਤ੍ਤਤਿ ਗਿਹੀ ਹੋਤੀਤਿ ਅਤ੍ਥੋ. ਸਾਮਣੇਰੋ ਹੋਤੀਤਿ ਉਪਸਮ੍ਪਨ੍ਨਭਾਵਂ ਜਹਿਤ੍ਵਾ ਸਾਮਣੇਰਭਾਵਂ ਉਪਗਚ੍ਛਤਿ. ਤਤ੍ਥ ਪਾਰਾਜਿਕਪ੍ਪਤ੍ਤਭਾਵੇਨ ਵਾ ‘‘ਗਿਹੀਤਿ ਮਂ ਧਾਰੇਥਾ’’ਤਿਆਦਿਨਾ ਸਿਕ੍ਖਾਪਚ੍ਚਕ੍ਖਾਨੇਨ ਵਾ ਗਿਹੀ ਹੋਤਿ. ਤੇਸੁ ਪਠਮੇਨ ਪੁਨ ਉਪਸਮ੍ਪਦਾਯ ਅਭਬ੍ਬਤ੍ਤਾ ਪੁਨ ਪਰਿਵਾਸੋ ਨ ਰੁਹਤਿਯੇਵ, ਦੁਤਿਯੇਨ ਪਨ ਪੁਨ ਉਪਸਮ੍ਪਦਾਯ ਭਬ੍ਬਤ੍ਤਾ ‘‘ਸੋ ਚੇ ਪੁਨ ਉਪਸਮ੍ਪਜ੍ਜਤੀ’’ਤਿ ਵੁਤ੍ਤਂ. ਇਤਰੋ ਪਨ ਪਾਰਾਜਿਕਪ੍ਪਤ੍ਤਭਾਵੇਨ ਸਾਮਣੇਰੋ ਨ ਹੋਤਿ. ਕਸ੍ਮਾ? ਸਰਣਗਮਨਾਦੀਨਂ ਵਿਨਸ੍ਸਨਤੋ. ਵੁਤ੍ਤਞ੍ਹਿ ਵਿਮਤਿਵਿਨੋਦਨਿਯਂ (ਵਿ. ਵਿ. ਟੀ. ਮਹਾਵਗ੍ਗ ੨.੧੦੮) ‘‘ਉਪਸਮ੍ਪਨ੍ਨਾਨਮ੍ਪਿ ਪਾਰਾਜਿਕਸਮਆਪਤ੍ਤਿਯਾ ਸਰਣਗਮਨਾਦਿਸਾਮਣੇਰਭਾਵਸ੍ਸਪਿ ਵਿਨਸ੍ਸਨਤੋ ਸੇਨਾਸਨਗ੍ਗਾਹੋ ਚ ਪਟਿਪ੍ਪਸ੍ਸਮ੍ਭਤਿ, ਸਙ੍ਘਲਾਭਮ੍ਪਿ ਤੇਨ ਲਭਨ੍ਤੀਤਿ ਵੇਦਿਤਬ੍ਬ’’ਨ੍ਤਿ, ਗਿਹੀ ਪਨ ਹੁਤ੍ਵਾ ਪੁਨ ਸਾਮਣੇਰਭਾਵਮਤ੍ਤਂ ਲਦ੍ਧਬ੍ਬਂ ਹੋਤਿ. ‘‘ਸਾਮਣੇਰੋਤਿ ਮਂ ਧਾਰੇਥਾ’’ਤਿਆਦਿਨਾ ਪਨ ਸਿਕ੍ਖਾਪਚ੍ਚਕ੍ਖਾਨੇ ਕਤੇ ਸਿਯਾ ਸਾਮਣੇਰਭਾਵੋ, ਤਤੋਪਿ ਪੁਨ ਉਪਸਮ੍ਪਜ੍ਜਿਤੁਕਾਮਤਾਯ ਸਤਿ ਸਿਯਾ ਉਪਸਮ੍ਪਨ੍ਨਭਾਵੋ. ‘‘ਗਿਹੀਤਿ ਮਂ ਧਾਰੇਥਾ’’ਤਿਆਦਿਨਾ ਸਿਕ੍ਖਾਪਚ੍ਚਕ੍ਖਾਨਂ ਕਤ੍ਵਾ ਗਿਹਿਭਾਵਂ ਉਪਗਤੇਪਿ ਪੁਨ ਸਾਮਣੇਰਪਬ੍ਬਜ੍ਜਂ ਪਬ੍ਬਜਿਤ੍ਵਾ ਸਾਮਣੇਰੋ ਹੋਤਿ. ਤਤੋ ਪੁਨ ਉਪਸਮ੍ਪਜ੍ਜਿਤੁਂ ਲਦ੍ਧਬ੍ਬਤ੍ਤਾ ‘‘ਪੁਨ ਉਪਸਮ੍ਪਜ੍ਜਤੀ’’ਤਿ ਵੁਤ੍ਤੋ. ਤੇਸਂ ਭਿਕ੍ਖੁਭਾਵੇ ਪਰਿਵਾਸੇ ਅਨਿਟ੍ਠਿਤੇਪਿ ਗਿਹਿਸਾਮਣੇਰਭਾਵਂ ਪਤ੍ਤਤ੍ਤਾ ਪਰਿਵਾਸੋ ਨ ਰੁਹਤਿ ਉਪਸਮ੍ਪਨ੍ਨਾਨਮੇਵ ਪਰਿਵਾਸਸ੍ਸ ਭਗਵਤਾ ਪਞ੍ਞਤ੍ਤਤ੍ਤਾਤਿ ਅਤ੍ਥੋ.

ਏਵਂ ਸਨ੍ਤੇ ਪੁਨ ਉਪਸਮ੍ਪਜ੍ਜਨ੍ਤਸ੍ਸ ਕਿਂ ਪਰਿਵਾਸੋ ਪੁਨ ਦਾਤਬ੍ਬੋਤਿ ਆਹ ‘‘ਸੋ ਚੇ ਪੁਨ ਉਪਸਮ੍ਪਜ੍ਜਤੀ’’ਤਿਆਦਿ. ਤਸ੍ਸਤ੍ਥੋ – ਸੋ ਵਿਬ੍ਭਨ੍ਤਕੋ ਸੋ ਵਾ ਸਾਮਣੇਰੋ ਪੁਨ ਉਪਸਮ੍ਪਨ੍ਨਭਾਵਂ ਉਪਗਚ੍ਛਤਿ, ਪੁਰਿਮਂ ਪੁਬ੍ਬੇ ਭਿਕ੍ਖੁਭੂਤਕਾਲੇ ਦਿਨ੍ਨਂ ਪਰਿਵਾਸਦਾਨਂ ਏਵ ਇਦਾਨਿ ਪਰਿਵਾਸਦਾਨਂ ਹੋਤਿ. ਯੋ ਪਰਿਵਾਸੋ ਪੁਬ੍ਬੇ ਭਿਕ੍ਖੁਭੂਤਕਾਲੇ ਦਿਨ੍ਨੋ, ਸੋ ਪਰਿਵਾਸੋ ਸੁਦਿਨ੍ਨੋ, ਦੁਦਿਨ੍ਨੋ ਨ ਹੋਤਿ. ਯੋ ਯਤ੍ਤਕੋ ਕਾਲੋ ਪਰਿਵੁਤ੍ਥੋ, ਸੋ ਤਤ੍ਤਕੋ ਕਾਲੋ ਸੁਪਰਿਵੁਤ੍ਥੋਯੇਵ ਹੋਤਿ, ਨ ਦੁਪਰਿਵੁਤ੍ਥੋ, ਤਸ੍ਮਾ ਅਵਸੇਸੋ ਕਾਲੋ ਪਰਿਵਸਿਤਬ੍ਬੋਤਿ. ਇਦਂ ਵੁਤ੍ਤਂ ਹੋਤਿ – ਪੁਬ੍ਬੇ ਭਿਕ੍ਖੁਕਾਲੇ ਪਕ੍ਖਪ੍ਪਟਿਚ੍ਛਨ੍ਨਾਯ ਆਪਤ੍ਤਿਯਾ ਪਰਿਵਾਸਂ ਗਹੇਤ੍ਵਾ ਦਸਦਿਵਸਮਤ੍ਤਂ ਪਰਿਵਸਿਤ੍ਵਾ ਅਨਿਟ੍ਠਿਤੇਯੇਵ ਪਰਿਵਾਸੇ ਵਿਬ੍ਭਮਿਤ੍ਵਾ ਸਾਮਣੇਰੋ ਵਾ ਹੁਤ੍ਵਾ ਪੁਨ ਉਪਸਮ੍ਪਨ੍ਨੇਨ ਅਵਸੇਸਪਞ੍ਚਦਿਵਸੇ ਪਰਿਵਸਿਤ੍ਵਾ ਪਰਿਵਾਸੋ ਨਿਟ੍ਠਾਪੇਤਬ੍ਬੋਤਿ. ਮਾਨਤ੍ਤਾਰਹਾਦੀਸੁਪਿ ਏਸੇਵ ਨਯੋ. ਉਮ੍ਮਤ੍ਤਕਾਦੀਸੁਪਿ ਤਸ੍ਮਿਂ ਕਾਲੇ ਅਜਾਨਨ੍ਤਤ੍ਤਾ ‘‘ਪਰਿਵਾਸੋ ਨ ਰੁਹਤੀ’’ਤਿ ਵੁਤ੍ਤਂ. ਤਿਣ੍ਣਮ੍ਪਿ ਉਕ੍ਖਿਤ੍ਤਕਾਨਂ ਕਮ੍ਮਨਾਨਾਸਂਵਾਸਕਤ੍ਤਾ ਤੇਹਿ ਸਹਸਂਵਾਸੋਯੇਵ ਨਤ੍ਥੀਤਿ ਉਕ੍ਖਿਤ੍ਤਕਾਨਂ ਪਰਿਵਾਸੋ ਨ ਰੁਹਤੀਤਿ ਵੁਤ੍ਤਂ.

ਸਚੇ ਪੁਨ ਓਸਾਰੀਯਤੀਤਿ ਉਕ੍ਖੇਪਨੀਯਕਮ੍ਮਂ ਪਟਿਪ੍ਪਸ੍ਸਮ੍ਭਨਵਸੇਨ ਸਮਾਨਸਂਵਾਸਕਭਾਵਂ ਪਵੇਸੀਯਤਿ. ‘‘ਸਚੇ ਕਸ੍ਸਚਿ ਭਿਕ੍ਖੁਨੋ ਇਤ੍ਥਿਲਿਙ੍ਗਂ ਪਾਤੁਭਵਤੀ’’ਤਿਆਦੀਸੁ ਅਟ੍ਠਕਥਾਯਂ ਵੁਤ੍ਤਨਯੇਨੇਵ ਅਤ੍ਥੋ ਸੁਵਿਞ੍ਞੇਯ੍ਯੋ ਹੋਤਿ. ਯਂ ਪਨ ਵੁਤ੍ਤਂ ‘‘ਪਕ੍ਖਮਾਨਤ੍ਤਂ ਪਚ੍ਛਾ ਆਗਮਿਸ੍ਸਤੀ’’ਤਿ, ਤਤ੍ਰੇਵਂ ਜਾਨਿਤਬ੍ਬਂ – ਪਕ੍ਖਮਾਨਤ੍ਤਨ੍ਤਿ ਭਿਕ੍ਖੁਨਿਯਾ ਦਾਤਬ੍ਬਮਾਨਤ੍ਤਂ. ਤਂ ਪਨ ਪਟਿਚ੍ਛਨ੍ਨਾਯਪਿ ਅਪ੍ਪਟਿਚ੍ਛਨ੍ਨਾਯਪਿ ਆਪਤ੍ਤਿਯਾ ਅਡ੍ਢਮਾਸਮਤ੍ਤਮੇਵ ਦਾਤਬ੍ਬਂ. ਵੁਤ੍ਤਞ੍ਹੇਤਂ ‘‘ਗਰੁਧਮ੍ਮਂ ਅਜ੍ਝਾਪਨ੍ਨਾਯ ਭਿਕ੍ਖੁਨਿਯਾ ਉਭਤੋਸਙ੍ਘੇ ਪਕ੍ਖਮਾਨਤ੍ਤਂ ਚਰਿਤਬ੍ਬ’’ਨ੍ਤਿ (ਪਾਚਿ. ੧੪੯; ਚੂਲ਼ਵ. ੪੦੩; ਅ. ਨਿ. ੮.੫੧). ਤਂ ਪਨ ਭਿਕ੍ਖੁਨੀਹਿ ਅਤ੍ਤਨੋ ਸੀਮਂ ਸੋਧੇਤ੍ਵਾ ਵਿਹਾਰਸੀਮਾਯ ਵਾ ਵਿਹਾਰਸੀਮਂ ਸੋਧੇਤੁਂ ਅਸਕ੍ਕੋਨ੍ਤੀਹਿ ਖਣ੍ਡਸੀਮਾਯ ਵਾ ਸਬ੍ਬਨ੍ਤਿਮੇਨ ਪਰਿਚ੍ਛੇਦੇਨ ਚਤੁਵਗ੍ਗਗਣਂ ਸਨ੍ਨਿਪਾਤਾਪੇਤ੍ਵਾ ਦਾਤਬ੍ਬਂ. ਸਚੇ ਏਕਾ ਆਪਤ੍ਤਿ ਹੋਤਿ, ਏਕਿਸ੍ਸਾ ਵਸੇਨ, ਸਚੇ ਦ੍ਵੇ ਵਾ ਤਿਸ੍ਸੋ ਵਾ ਸਮ੍ਬਹੁਲਾ ਵਾ ਏਕਵਤ੍ਥੁਕਾ ਵਾ ਨਾਨਾਵਤ੍ਥੁਕਾ ਵਾ, ਤਾਸਂ ਤਾਸਂ ਵਸੇਨ ਵਤ੍ਥੁਗੋਤ੍ਤਨਾਮਆਪਤ੍ਤੀਸੁ ਯਂ ਯਂ ਇਚ੍ਛਤਿ, ਤਂ ਤਂ ਆਦਾਯ ਯੋਜਨਾ ਕਾਤਬ੍ਬਾ.

ਤਤ੍ਰਿਦਂ ਏਕਾਪਤ੍ਤਿਵਸੇਨ ਮੁਖਮਤ੍ਤਨਿਦਸ੍ਸਨਂ – ਤਾਯ ਆਪਨ੍ਨਾਯ ਭਿਕ੍ਖੁਨਿਯਾ ਭਿਕ੍ਖੁਨਿਸਙ੍ਘਂ ਉਪਸਙ੍ਕਮਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਵੁਡ੍ਢਾਨਂ ਭਿਕ੍ਖੁਨੀਨਂ ਪਾਦੇ ਵਨ੍ਦਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ ‘‘ਅਹਂ, ਅਯ੍ਯੇ, ਏਕਂ ਆਪਤ੍ਤਿਂ ਆਪਜ੍ਜਿਂ ਗਾਮਨ੍ਤਰਂ, ਸਾਹਂ, ਅਯ੍ਯ,ਏ ਏਕਿਸ੍ਸਾ ਆਪਤ੍ਤਿਯਾ ਗਾਮਨ੍ਤਰਾਯ ਪਕ੍ਖਮਾਨਤ੍ਤਂ ਯਾਚਾਮੀ’’ਤਿ. ਏਵਂ ਤਿਕ੍ਖਤ੍ਤੁਂ ਯਾਚਾਪੇਤ੍ਵਾ ਬ੍ਯਤ੍ਤਾਯ ਭਿਕ੍ਖੁਨਿਯਾ ਪਟਿਬਲਾਯ ਸਙ੍ਘੋ ਞਾਪੇਤਬ੍ਬੋ ‘‘ਸੁਣਾਤੁ ਮੇ, ਅਯ੍ਯੇ, ਸਙ੍ਘੋ, ਅਯਂ ਇਤ੍ਥਨ੍ਨਾਮਾ ਭਿਕ੍ਖੁਨੀ ਏਕਂ ਆਪਤ੍ਤਿਂ ਆਪਜ੍ਜਿ ਗਾਮਨ੍ਤਰਂ, ਸਾ ਸਙ੍ਘਂ ਏਕਿਸ੍ਸਾ ਆਪਤ੍ਤਿਯਾ ਗਾਮਨ੍ਤਰਾਯ ਪਕ੍ਖਮਾਨਤ੍ਤਂ ਯਾਚਤਿ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਤ੍ਥਨ੍ਨਾਮਾਯ ਭਿਕ੍ਖੁਨਿਯਾ ਏਕਿਸ੍ਸਾ ਆਪਤ੍ਤਿਯਾ ਗਾਮਨ੍ਤਰਾਯ ਪਕ੍ਖਮਾਨਤ੍ਤਂ ਦਦੇਯ੍ਯ, ਏਸਾ ਞਤ੍ਤਿ. ਸੁਣਾਤੁ ਮੇ, ਅਯ੍ਯੇ, ਸਙ੍ਘੋ…ਪੇ… ਦੁਤਿਯਮ੍ਪਿ. ਤਤਿਯਮ੍ਪਿ ਏਤਮਤ੍ਥਂ ਵਦਾਮਿ. ਸੁਣਾਤੁ ਮੇ, ਅਯ੍ਯੇ, ਸਙ੍ਘੋ…ਪੇ… ਭਾਸੇਯ੍ਯ. ਦਿਨ੍ਨਂ ਸਙ੍ਘੇਨ ਇਤ੍ਥਨ੍ਨਾਮਾਯ ਭਿਕ੍ਖੁਨਿਯਾ ਏਕਿਸ੍ਸਾ ਆਪਤ੍ਤਿਯਾ ਗਾਮਨ੍ਤਰਾਯ ਪਕ੍ਖਮਾਨਤ੍ਤਂ, ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.

ਕਮ੍ਮਵਾਚਾਪਰਿਯੋਸਾਨੇ ਵਤ੍ਤਂ ਸਮਾਦਿਯਿਤ੍ਵਾ ਭਿਕ੍ਖੁਮਾਨਤ੍ਤਕਥਾਯਂ ਵੁਤ੍ਤਨਯੇਨੇਵ ਸਙ੍ਘਸ੍ਸ ਆਰੋਚੇਤ੍ਵਾ ਨਿਕ੍ਖਿਤ੍ਤਵਤ੍ਤਂ ਵਸਿਤੁਕਾਮਾਯ ਤਥੇਵ ਸਙ੍ਘਸ੍ਸ ਮਜ੍ਝੇ ਵਾ ਪਕ੍ਕਨ੍ਤਾਸੁ ਭਿਕ੍ਖੁਨੀਸੁ ਏਕਭਿਕ੍ਖੁਨਿਯਾ ਵਾ ਦੁਤਿਯਿਕਾਯ ਵਾ ਸਨ੍ਤਿਕੇ ਵੁਤ੍ਤਨਯੇਨੇਵ ਨਿਕ੍ਖਿਪਿਤਬ੍ਬਂ. ਅਞ੍ਞਿਸ੍ਸਾ ਪਨ ਆਗਨ੍ਤੁਕਾਯ ਸਨ੍ਤਿਕੇ ਆਰੋਚੇਤ੍ਵਾ ਨਿਕ੍ਖਿਪਿਤਬ੍ਬਂ, ਨਿਕ੍ਖਿਤ੍ਤਕਾਲਤੋ ਪਟ੍ਠਾਯ ਪਕਤਤ੍ਤਟ੍ਠਾਨੇ ਤਿਟ੍ਠਤਿ.

ਪੁਨ ਸਮਾਦਿਯਿਤ੍ਵਾ ਅਰੁਣਂ ਉਟ੍ਠਪੇਨ੍ਤਿਯਾ ਪਨ ਭਿਕ੍ਖੁਨੀਨਂਯੇਵ ਸਨ੍ਤਿਕੇ ਵਸਿਤੁਂ ਨ ਲਬ੍ਭਤਿ. ‘‘ਉਭਤੋਸਙ੍ਘੇ ਪਕ੍ਖਮਾਨਤ੍ਤਂ ਚਰਿਤਬ੍ਬ’’ਨ੍ਤਿ ਹਿ ਵੁਤ੍ਤਂ, ਤਸ੍ਮਾ ਅਸ੍ਸਾ ਆਚਰਿਯੁਪਜ੍ਝਾਯਾਹਿ ਵਿਹਾਰਂ ਗਨ੍ਤ੍ਵਾ ਸਙ੍ਗਾਹਕਪਕ੍ਖੇ ਠਿਤੋ ਏਕੋ ਮਹਾਥੇਰੋ ਵਾ ਧਮ੍ਮਕਥਿਕੋ ਵਾ ਭਿਕ੍ਖੁ ਵਤ੍ਤਬ੍ਬੋ ‘‘ਏਕਿਸ੍ਸਾ ਭਿਕ੍ਖੁਨਿਯਾ ਵਿਨਯਕਮ੍ਮਂ ਕਤ੍ਤਬ੍ਬਮਤ੍ਥਿ, ਤਤ੍ਰ ਨੋ ਅਯ੍ਯਾ ਚਤ੍ਤਾਰੋ ਭਿਕ੍ਖੂ ਪੇਸੇਥਾ’’ਤਿ. ਸਙ੍ਗਹਂ ਅਕਾਤੁਂ ਨ ਲਬ੍ਭਤਿ, ‘‘ਪੇਸੇਸ੍ਸਾਮਾ’’ਤਿ ਵਤ੍ਤਬ੍ਬਂ. ਚਤੂਹਿ ਪਕਤਤ੍ਤਭਿਕ੍ਖੁਨੀਹਿ ਮਾਨਤ੍ਤਚਾਰਿਨਿਂ ਭਿਕ੍ਖੁਨਿਂ ਗਹੇਤ੍ਵਾ ਅਨ੍ਤੋਅਰੁਣੇਯੇਵ ਨਿਕ੍ਖਿਪਿਤ੍ਵਾ ਗਾਮੂਪਚਾਰਤੋ ਦ੍ਵੇ ਲੇਡ੍ਡੁਪਾਤੇ ਅਤਿਕ੍ਕਮਿਤ੍ਵਾ ਮਗ੍ਗਾ ਓਕ੍ਕਮ੍ਮ ਗੁਮ੍ਬਵਤਿਆਦੀਹਿ ਪਟਿਚ੍ਛਨ੍ਨੇ ਠਾਨੇ ਨਿਸੀਦਿਤਬ੍ਬਂ, ਵਿਹਾਰੂਪਚਾਰਤੋਪਿ ਦ੍ਵੇ ਲੇਡ੍ਡੁਪਾਤਾ ਅਤਿਕ੍ਕਮਿਤਬ੍ਬਾ. ਚਤੂਹਿ ਪਕਤਤ੍ਤਭਿਕ੍ਖੂਹਿਪਿ ਤਤ੍ਥ ਗਨ੍ਤਬ੍ਬਂ, ਗਨ੍ਤ੍ਵਾ ਪਨ ਭਿਕ੍ਖੁਨੀਹਿ ਸਦ੍ਧਿਂ ਨ ਏਕਟ੍ਠਾਨੇ ਨਿਸੀਦਿਤਬ੍ਬਂ, ਪਟਿਕ੍ਕਮਿਤ੍ਵਾ ਅਵਿਦੂਰੇ ਠਾਨੇ ਨਿਸੀਦਿਤਬ੍ਬਂ. ਕੁਰੁਨ੍ਦਿਮਹਾਪਚ੍ਚਰੀਸੁ ਪਨ ‘‘ਭਿਕ੍ਖੁਨੀਹਿ ਬ੍ਯਤ੍ਤਂ ਏਕਂ ਵਾ ਦ੍ਵੇ ਵਾ ਉਪਾਸਿਕਾਯੋ ਭਿਕ੍ਖੂਹਿਪਿ ਏਕਂ ਵਾ ਦ੍ਵੇ ਵਾ ਉਪਾਸਕੇ ਅਤ੍ਤਰਕ੍ਖਣਤ੍ਥਾਯ ਗਹੇਤ੍ਵਾ ਗਨ੍ਤਬ੍ਬ’’ਨ੍ਤਿ ਵੁਤ੍ਤਂ. ਕੁਰੁਨ੍ਦਿਯਂਯੇਵ ਚ ‘‘ਭਿਕ੍ਖੁਨੁਪਸ੍ਸਯਸ੍ਸ ਚ ਵਿਹਾਰਸ੍ਸ ਚ ਉਪਚਾਰਂ ਮੁਞ੍ਚਿਤੁਂ ਵਟ੍ਟਤੀ’’ਤਿ ਵੁਤ੍ਤਂ, ‘‘ਗਾਮਸ੍ਸਾ’’ਤਿ ਨ ਵੁਤ੍ਤਂ.

ਏਵਂ ਨਿਸਿਨ੍ਨੇਸੁ ਪਨ ਭਿਕ੍ਖੁਨੀਸੁ ਚ ਭਿਕ੍ਖੂਸੁ ਚ ਤਾਯ ਭਿਕ੍ਖੁਨਿਯਾ ‘‘ਮਾਨਤ੍ਤਂ ਸਮਾਦਿਯਾਮਿ, ਵਤ੍ਤਂ ਸਮਾਦਿਯਾਮੀ’’ਤਿ ਵਤ੍ਤਂ ਸਮਾਦਿਯਿਤ੍ਵਾ ਭਿਕ੍ਖੁਨਿਸਙ੍ਘਸ੍ਸ ਤਾਵ ਏਵਂ ਆਰੋਚੇਤਬ੍ਬਂ ‘‘ਅਹਂ, ਅਯ੍ਯੇ, ਏਕਂ ਆਪਤ੍ਤਿਂ ਆਪਜ੍ਜਿਂ ਗਾਮਨ੍ਤਰਂ, ਸਾਹਂ ਸਙ੍ਘਂ ਏਕਿਸ੍ਸਾ ਆਪਤ੍ਤਿਯਾ ਗਾਮਨ੍ਤਰਾਯ ਪਕ੍ਖਮਾਨਤ੍ਤਂ ਯਾਚਿਂ, ਤਸ੍ਸਾ ਮੇ ਸਙ੍ਘੋ ਏਕਿਸ੍ਸਾ ਆਪਤ੍ਤਿਯਾ ਗਾਮਨ੍ਤਰਾਯ ਪਕ੍ਖਮਾਨਤ੍ਤਂ ਅਦਾਸਿ, ਸਾਹਂ ਮਾਨਤ੍ਤਂ ਚਰਾਮਿ, ਵੇਦਿਯਾਮਹਂ ਅਯ੍ਯੇ, ਵੇਦਿਯਤੀਤਿ ਮਂ ਸਙ੍ਘੋ ਧਾਰੇਤੂ’’ਤਿ.

ਤਤੋ ਭਿਕ੍ਖੁਸਙ੍ਘਸ੍ਸ ਸਨ੍ਤਿਕਂ ਗਨ੍ਤ੍ਵਾ ਏਵਂ ਆਰੋਚੇਤਬ੍ਬਂ ‘‘ਅਹਂ, ਅਯ੍ਯਾ, ਏਕਂ ਆਪਤ੍ਤਿਂ ਆਪਜ੍ਜਿਂ…ਪੇ… ਵੇਦਿਯਾਮਹਂ ਅਯ੍ਯਾ, ਵੇਦਿਯਤੀਤਿ ਮਂ ਸਙ੍ਘੋ ਧਾਰੇਤੂ’’ਤਿ. ਇਧਾਪਿ ਯਾਯ ਕਾਯਚਿ ਭਾਸਾਯ ਆਰੋਚੇਤੁਂ ਵਟ੍ਟਤਿ. ਆਰੋਚੇਤ੍ਵਾ ਚ ਭਿਕ੍ਖੁਨਿਸਙ੍ਘਸ੍ਸੇਵ ਸਨ੍ਤਿਕੇ ਨਿਸੀਦਿਤਬ੍ਬਂ, ਆਰੋਚਿਤਕਾਲਤੋ ਪਟ੍ਠਾਯ ਭਿਕ੍ਖੂਨਂ ਗਨ੍ਤੁਂ ਵਟ੍ਟਤਿ. ਸਚੇ ਸਾਸਙ੍ਕਾ ਹੋਤਿ, ਭਿਕ੍ਖੁਨਿਯੋ ਤਤ੍ਥੇਵ ਠਾਨਂ ਪਚ੍ਚਾਸੀਸਨ੍ਤਿ, ਠਾਤਬ੍ਬਂ. ਸਚੇ ਅਞ੍ਞੋ ਭਿਕ੍ਖੁ ਵਾ ਭਿਕ੍ਖੁਨੀ ਵਾ ਤਂ ਠਾਨਂ ਏਤਿ, ਪਸ੍ਸਨ੍ਤਿਯਾ ਆਰੋਚੇਤਬ੍ਬਂ. ਨੋ ਚੇ ਆਰੋਚੇਤਿ, ਰਤ੍ਤਿਚ੍ਛੇਦੋ ਚੇਵ ਵਤ੍ਤਭੇਦਦੁਕ੍ਕਟਞ੍ਚ. ਸਚੇ ਅਜਾਨਨ੍ਤਿਯਾ ਏਵ ਉਪਚਾਰਂ ਓਕ੍ਕਮਿਤ੍ਵਾ ਗਚ੍ਛਤਿ, ਰਤ੍ਤਿਚ੍ਛੇਦੋਵ ਹੋਤਿ, ਨ ਵਤ੍ਤਭੇਦਦੁਕ੍ਕਟਂ. ਸਚੇ ਭਿਕ੍ਖੁਨਿਯੋ ਉਪਜ੍ਝਾਯਾਦੀਨਂ ਵਤ੍ਤਕਰਣਤ੍ਥਂ ਪਗੇਵ ਗਨ੍ਤੁਕਾਮਾ ਹੋਨ੍ਤਿ, ਰਤ੍ਤਿਵਿਪ੍ਪਵਾਸਗਣਓਹੀਯਨਗਾਮਨ੍ਤਰਾਪਤ੍ਤਿਰਕ੍ਖਣਤ੍ਥਂ ਏਕਂ ਭਿਕ੍ਖੁਨਿਂ ਠਪੇਤ੍ਵਾ ਗਨ੍ਤਬ੍ਬਂ, ਤਾਯ ਅਰੁਣੇ ਉਟ੍ਠਿਤੇ ਤਸ੍ਸਾ ਸਨ੍ਤਿਕੇ ਵਤ੍ਤਂ ਨਿਕ੍ਖਿਪਿਤਬ੍ਬਂ. ਏਤੇਨੁਪਾਯੇਨ ਅਖਣ੍ਡਾ ਪਞ੍ਚਦਸ ਰਤ੍ਤਿਯੋ ਮਾਨਤ੍ਤਂ ਚਰਿਤਬ੍ਬਂ.

ਅਨਿਕ੍ਖਿਤ੍ਤਵਤ੍ਤਾਯ ਪਨ ਪਾਰਿਵਾਸਿਕਕ੍ਖਨ੍ਧਕੇ ਵੁਤ੍ਤਨਯੇਨੇਵ ਸਮ੍ਮਾ ਵਤ੍ਤਿਤਬ੍ਬਂ. ਅਯਂ ਪਨ ਵਿਸੇਸੋ – ‘‘ਆਗਨ੍ਤੁਕਸ੍ਸ ਆਰੋਚੇਤਬ੍ਬ’’ਨ੍ਤਿ ਏਤ੍ਥ ਯਤ੍ਤਕਾ ਪੁਰੇਭਤ੍ਤਂ ਵਾ ਪਚ੍ਛਾਭਤ੍ਤਂ ਵਾ ਤਂ ਗਾਮਂ ਭਿਕ੍ਖੂ ਵਾ ਭਿਕ੍ਖੁਨਿਯੋ ਵਾ ਆਗਚ੍ਛਨ੍ਤਿ, ਸਬ੍ਬੇਸਂ ਆਰੋਚੇਤਬ੍ਬਂ. ਅਨਾਰੋਚੇਨ੍ਤਿਯਾ ਰਤ੍ਤਿਚ੍ਛੇਦੋ ਚੇਵ ਵਤ੍ਤਭੇਦਦੁਕ੍ਕਟਞ੍ਚ. ਸਚੇਪਿ ਰਤ੍ਤਿਂ ਕੋਚਿ ਭਿਕ੍ਖੁ ਤਂ ਗਾਮੂਪਚਾਰਂ ਓਕ੍ਕਮਿਤ੍ਵਾ ਗਚ੍ਛਤਿ, ਰਤ੍ਤਿਚ੍ਛੇਦੋ ਹੋਤਿਯੇਵ, ਅਜਾਨਨਪਚ੍ਚਯਾ ਪਨ ਵਤ੍ਤਭੇਦਤੋ ਮੁਚ੍ਚਤਿ. ਕੁਰੁਨ੍ਦੀਆਦੀਸੁ ਪਨ ‘‘ਅਨਿਕ੍ਖਿਤ੍ਤਵਤ੍ਤਭਿਕ੍ਖੂਨਂ ਵੁਤ੍ਤਨਯੇਨੇਵ ਕਥੇਤਬ੍ਬ’’ਨ੍ਤਿ ਵੁਤ੍ਤਂ, ਤਂ ਪਾਰਿਵਾਸਿਕਵਤ੍ਤਾਦੀਨਂ ਉਪਚਾਰਸੀਮਾਯ ਪਰਿਚ੍ਛਿਨ੍ਨਤ੍ਤਾ ਯੁਤ੍ਤਤਰਂ ਦਿਸ੍ਸਤਿ. ਉਪੋਸਥੇ ਆਰੋਚੇਤਬ੍ਬਂ, ਪਵਾਰਣਾਯ ਆਰੋਚੇਤਬ੍ਬਂ, ਚਤੁਨ੍ਨਂ ਭਿਕ੍ਖੂਨਞ੍ਚ ਭਿਕ੍ਖੁਨੀਨਞ੍ਚ ਦੇਵਸਿਕਂ ਆਰੋਚੇਤਬ੍ਬਂ. ਸਚੇ ਭਿਕ੍ਖੂਨਂ ਤਸ੍ਮਿਂ ਗਾਮੇ ਭਿਕ੍ਖਾਚਾਰੋ ਸਮ੍ਪਜ੍ਜਤਿ, ਤਤ੍ਥੇਵ ਗਨ੍ਤਬ੍ਬਂ. ਨੋ ਚੇ ਸਮ੍ਪਜ੍ਜਤਿ, ਅਞ੍ਞਤ੍ਰ ਚਰਿਤ੍ਵਾਪਿ ਤਤ੍ਰ ਆਗਨ੍ਤ੍ਵਾ ਅਤ੍ਤਾਨਂ ਦਸ੍ਸੇਤ੍ਵਾ ਗਨ੍ਤਬ੍ਬਂ, ਬਹਿਗਾਮੇ ਵਾ ਸਙ੍ਕੇਤਟ੍ਠਾਨਂ ਕਾਤਬ੍ਬਂ ‘‘ਅਸੁਕਸ੍ਮਿਂ ਨਾਮ ਠਾਨੇ ਅਮ੍ਹੇ ਪਸ੍ਸਿਸ੍ਸਤੀ’’ਤਿ. ਤਾਯ ਸਙ੍ਕੇਤਟ੍ਠਾਨਂ ਗਨ੍ਤ੍ਵਾ ਆਰੋਚੇਤਬ੍ਬਂ, ਸਙ੍ਕੇਤਟ੍ਠਾਨੇ ਅਦਿਸ੍ਵਾ ਵਿਹਾਰਂ ਗਨ੍ਤ੍ਵਾ ਆਰੋਚੇਤਬ੍ਬਂ. ਵਿਹਾਰੇ ਸਬ੍ਬਭਿਕ੍ਖੂਨਂ ਆਰੋਚੇਤਬ੍ਬਂ. ਸਚੇ ਸਬ੍ਬੇਸਂ ਸਕ੍ਕਾ ਨ ਹੋਤਿ ਆਰੋਚੇਤੁਂ, ਬਹਿ ਉਪਚਾਰਸੀਮਾਯ ਠਤ੍ਵਾ ਭਿਕ੍ਖੁਨਿਯੋ ਪੇਸੇਤਬ੍ਬਾ, ਤਾਹਿ ਆਨੀਤਾਨਂ ਚਤੁਨ੍ਨਂ ਭਿਕ੍ਖੂਨਂ ਆਰੋਚੇਤਬ੍ਬਂ. ਸਚੇ ਵਿਹਾਰੋ ਦੂਰੋ ਹੋਤਿ ਸਾਸਙ੍ਕੋ, ਉਪਾਸਕੇ ਚ ਉਪਾਸਿਕਾਯੋ ਚ ਗਹੇਤ੍ਵਾ ਗਨ੍ਤਬ੍ਬਂ. ਸਚੇ ਪਨ ਅਯਂ ਏਕਾ ਵਸਤਿ, ਰਤ੍ਤਿਵਿਪ੍ਪਵਾਸਂ ਆਪਜ੍ਜਤਿ, ਤਸ੍ਮਾਸ੍ਸਾ ਏਕਾ ਪਕਤਤ੍ਤਾ ਭਿਕ੍ਖੁਨੀ ਸਮ੍ਮਨ੍ਨਿਤ੍ਵਾ ਦਾਤਬ੍ਬਾ ਏਕਚ੍ਛਨ੍ਨੇ ਵਸਨਤ੍ਥਾਯ.

ਏਵਂ ਅਖਣ੍ਡਂ ਮਾਨਤ੍ਤਂ ਚਰਿਤ੍ਵਾ ਵੀਸਤਿਗਣੇ ਭਿਕ੍ਖੁਨਿਸਙ੍ਘੇ ਵੁਤ੍ਤਨਯੇਨੇਵ ਅਬ੍ਭਾਨਂ ਕਾਤਬ੍ਬਂ. ‘‘ਸਚੇ ਮਾਨਤ੍ਤਂ ਚਰਮਾਨਾ ਅਨ੍ਤਰਾਪਤ੍ਤਿਂ ਆਪਜ੍ਜਤਿ, ਮੂਲਾਯ ਪਟਿਕਸ੍ਸਿਤ੍ਵਾ ਤਸ੍ਸਾ ਆਪਤ੍ਤਿਯਾ ਮਾਨਤ੍ਤਂ ਦਾਤਬ੍ਬ’’ਨ੍ਤਿ ਕੁਰੁਨ੍ਦਿਯਂ ਵੁਤ੍ਤਂ, ਇਦਂ ਪਕ੍ਖਮਾਨਤ੍ਤਂ ਨਾਮ. ਇਦਂ ਪਨ ਪਕ੍ਖਮਾਨਤ੍ਤਂ ਸਮਨ੍ਤਪਾਸਾਦਿਕਾਯਂ (ਚੂਲ਼ਵ. ਅਟ੍ਠ. ੧੦੨) ਪਾਲ਼ਿਮੁਤ੍ਤਵਿਨਯਵਿਨਿਚ੍ਛਯਭਾਵੇਨ ਆਗਤਮ੍ਪਿ ਇਮਸ੍ਮਿਂ ਵਿਨਯਸਙ੍ਗਹਪ੍ਪਕਰਣੇ ਆਚਰਿਯੇਨ ਅਨੁਦ੍ਧਟਂ. ਅਯਂ ਪਨਾਚਰਿਯਸ੍ਸ ਅਧਿਪ੍ਪਾਯੋ ਸਿਯਾ – ਇਦਂ ਪਕ੍ਖਮਾਨਤ੍ਤਂ ਭਿਕ੍ਖੁਨਿਯੋਯੇਵ ਸਨ੍ਧਾਯ ਭਗਵਤਾ ਵਿਸੁਂ ਪਞ੍ਞਤ੍ਤਂ, ਭਿਕ੍ਖੂਹਿ ਅਸਾਧਾਰਣਂ, ਇਮਸ੍ਮਿਞ੍ਚ ਕਾਲੇ ਭਿਕ੍ਖੁਨਿਸਙ੍ਘੋ ਨਤ੍ਥਿ, ਤਸ੍ਮਾ ਗਨ੍ਥਸ੍ਸ ਲਹੁਭਾਵਤ੍ਥਂ ਇਦਮ੍ਪਿ ਅਞ੍ਞਮ੍ਪਿ ਈਦਿਸਂ ਅਜ੍ਝੁਪੇਕ੍ਖਿਤਬ੍ਬਨ੍ਤਿ. ਅਮ੍ਹੇਹਿ ਪਨ ਭਿਕ੍ਖੁਨਿਸਙ੍ਘੇ ਅਵਿਜ੍ਜਮਾਨੇਪਿ ‘‘ਭਿਕ੍ਖੁਸਙ੍ਘੋ ਭਿਕ੍ਖੁਨੀਹਿ ਸਮਾਦਾਤਬ੍ਬਵਤ੍ਤਂ ਜਾਨਿਸ੍ਸਤਿ. ‘ਦੁਬ੍ਬਲਜਾਤਿਕਾ ਹਿ ਭੀਰੁਕਜਾਤਿਕਾ ਭਿਕ੍ਖੁਨਿਯੋ ਭਗਵਤੋ ਆਣਂ ਪਤਿਟ੍ਠਾਪੇਨ੍ਤਿਯੋ ਏਵਰੂਪਂ ਦੁਕ੍ਕਰਂ ਦੁਰਭਿਸਮ੍ਭਵਂ ਵਤ੍ਤਂ ਸਮਾਦਯਿਂਸੁ, ਕਿਮਙ੍ਗਂ ਪਨ ਮਯ’ਨ੍ਤਿ ਮਨਸਿ ਕਰੋਨ੍ਤਾ ਭਗਵਤੋ ਆਣਂ ਪਤਿਟ੍ਠਾਪੇਨ੍ਤਾ ਪਰਿਵਾਸਾਦਿਵਤ੍ਤਂ ਸਮਾਦਿਯਿਸ੍ਸਨ੍ਤੀ’’ਤਿ ਮਨ੍ਤ੍ਵਾ ਆਚਰਿਯੇਨ ਅਨੁਦ੍ਧਟਮ੍ਪਿ ਇਮਸ੍ਮਿਂ ਵਿਨਯਾਲਙ੍ਕਾਰਪ੍ਪਕਰਣੇ ਉਦ੍ਧਟਂ, ਤਸ੍ਮਾ ਸਮ੍ਮਾਸਮ੍ਬੁਦ੍ਧੇ ਸਞ੍ਜਾਤਸਦ੍ਧਾਪੇਮਗਾਰਵਾਦਿਯੁਤ੍ਤੇਹਿ ਸਤ੍ਥੁਸਾਸਨਕਰੇਹਿ ਭਿਕ੍ਖੂਹਿ ਸਮ੍ਮਾ ਸਿਕ੍ਖਿਤਬ੍ਬਂ. ਇਤੋ ਪਰਾਨਿ ਅਟ੍ਠਕਥਾਯਂ ਆਗਤਨਯੇਨੇਵ ਵੇਦਿਤਬ੍ਬਾਨਿ.

ਮਾਨਤ੍ਤਵਿਨਿਚ੍ਛਯਕਥਾ ਨਿਟ੍ਠਿਤਾ.

੨੪੮. ਪਾਰਿਵਾਸਿਕਵਤ੍ਤਕਥਾਯਂ ਨਵਕਤਰਂ ਪਾਰਿਵਾਸਿਕਨ੍ਤਿ ਅਤ੍ਤਨਾ ਨਵਕਤਰਂ ਪਾਰਿਵਾਸਿਕਂ. ਪਾਰਿਵਾਸਿਕਸ੍ਸ ਹਿ ਅਤ੍ਤਨਾ ਨਵਕਤਰਂ ਪਾਰਿਵਾਸਿਕਂ ਠਪੇਤ੍ਵਾ ਅਞ੍ਞੇ ਮੂਲਾਯਪਟਿਕਸ੍ਸਨਾਰਹ ਮਾਨਤ੍ਤਾਰਹ ਮਾਨਤ੍ਤਚਾਰਿਕ ਅਬ੍ਭਾਨਾਰਹਾਪਿ ਪਕਤਤ੍ਤਟ੍ਠਾਨੇਯੇਵ ਤਿਟ੍ਠਨ੍ਤਿ. ਤੇਨਾਹ ‘‘ਅਨ੍ਤਮਸੋ ਮੂਲਾਯਪਟਿਕਸ੍ਸਨਾਰਹਾਦੀਨਮ੍ਪੀ’’ਤਿ. ਅਨ੍ਤਮਸੋ ਮੂਲਾਯਪਟਿਕਸ੍ਸਨਾਰਹਾਦੀਨਮ੍ਪੀਤਿ ਆਦਿ-ਸਦ੍ਦੇਨ ਮਾਨਤ੍ਤਾਰਹਮਾਨਤ੍ਤਚਾਰਿਕਅਬ੍ਭਾਨਾਰਹੇ ਸਙ੍ਗਣ੍ਹਾਤਿ. ਤੇ ਹਿ ਪਾਰਿਵਾਸਿਕਾਨਂ, ਪਾਰਿਵਾਸਿਕਾ ਚ ਤੇਸਂ ਪਕਤਤ੍ਤਟ੍ਠਾਨੇ ਏਵ ਤਿਟ੍ਠਨ੍ਤਿ. ਅਧੋਤਪਾਦਟ੍ਠਪਨਕਨ੍ਤਿ ਯਤ੍ਥ ਠਤ੍ਵਾ ਪਾਦੇ ਧੋਵਨ੍ਤਿ, ਤਾਦਿਸਂ ਦਾਰੁਫਲਕਖਣ੍ਡਾਦਿਂ. ਪਾਦਘਂਸਨਨ੍ਤਿ ਸਕ੍ਖਰਕਥਲਾਦਿਂ. ਪਾਦੇ ਘਂਸਨ੍ਤਿ ਏਤੇਨਾਤਿ ਪਾਦਘਂਸਨਂ, ਸਕ੍ਖਰਕਥਲਾਦਿ. ਵੁਤ੍ਤਞ੍ਹਿ ਭਗਵਤਾ ‘‘ਅਨੁਜਾਨਾਮਿ, ਭਿਕ੍ਖਵੇ, ਤਿਸ੍ਸੋ ਪਾਦਘਂਸਨਿਯੋ ਸਕ੍ਖਰਂ ਕਥਲਂ ਸਮੁਦ੍ਦਫੇਣ’’ਨ੍ਤਿ (ਚੂਲ਼ਵ. ੨੬੯). ਸਦ੍ਧਿਵਿਹਾਰਿਕਾਨਮ੍ਪਿ ਸਾਦਿਯਨ੍ਤਸ੍ਸਾਤਿ ਸਦ੍ਧਿਵਿਹਾਰਿਕਾਨਮ੍ਪਿ ਅਭਿਵਾਦਨਾਦਿਂ ਸਾਦਿਯਨ੍ਤਸ੍ਸ. ਵਤ੍ਤਂ ਕਰੋਨ੍ਤੀਤਿ ਏਤ੍ਤਕਮਤ੍ਤਸ੍ਸੇਵ ਵੁਤ੍ਤਤ੍ਤਾ ਸਦ੍ਧਿਵਿਹਾਰਿਕਾਦੀਹਿਪਿ ਅਭਿਵਾਦਨਾਦਿਂ ਕਾਤੁਂ ਨ ਵਟ੍ਟਤਿ. ‘‘ਮਾ ਮਂ ਗਾਮਪ੍ਪਵੇਸਨਂ ਆਪੁਚ੍ਛਥਾ’’ਤਿ ਵੁਤ੍ਤੇ ਅਨਾਪੁਚ੍ਛਾਪਿ ਗਾਮਂ ਪਵਿਸਿਤੁਂ ਵਟ੍ਟਤਿ.

ਯੋ ਯੋ ਵੁਡ੍ਢੋਤਿ ਪਾਰਿਵਾਸਿਕੇਸੁ ਭਿਕ੍ਖੂਸੁ ਯੋ ਯੋ ਵੁਡ੍ਢੋ. ਨਵਕਤਰਸ੍ਸ ਸਾਦਿਤੁਨ੍ਤਿ ਪਾਰਿਵਾਸਿਕਨਵਕਤਰਸ੍ਸ ਅਭਿਵਾਦਨਾਦਿਂ ਸਾਦਿਤੁਂ. ‘‘ਪਾਰਿਸੁਦ੍ਧਿਉਪੋਸਥੇ ਕਰਿਯਮਾਨੇ’’ਤਿ ਇਦਂ ਪਵਾਰਣਦਿਵਸੇਸੁ ਸਙ੍ਘੇ ਪਵਾਰੇਨ੍ਤੇ ਅਨੁਪਗਤਛਿਨ੍ਨਵਸ੍ਸਾਦੀਹਿ ਕਰਿਯਮਾਨਂ ਪਾਰਿਸੁਦ੍ਧਿਉਪੋਸਥਮ੍ਪਿ ਸਨ੍ਧਾਯ ਵੁਤ੍ਤਂ. ਤਤ੍ਥੇਵਾਤਿ ਸਙ੍ਘਨਵਕਟ੍ਠਾਨੇਯੇਵ. ਅਤ੍ਤਨੋ ਪਾਲ਼ਿਯਾ ਪਵਾਰੇਤਬ੍ਬਨ੍ਤਿ ਅਤ੍ਤਨੋ ਵਸ੍ਸਗ੍ਗੇਨ ਪਤ੍ਤਪਾਲ਼ਿਯਾ ਪਵਾਰੇਤਬ੍ਬਂ, ਨ ਪਨ ਸਬ੍ਬੇਸੁ ਪਵਾਰਿਤੇਸੂਤਿ ਅਤ੍ਥੋ.

ਓਣੋਜਨਂ ਨਾਮ ਵਿਸ੍ਸਜ੍ਜਨਂ, ਤਂ ਪਨ ਪਾਰਿਵਾਸਿਕੇਨ ਪਾਪਿਤਸ੍ਸ ਅਤ੍ਤਨਾ ਸਮ੍ਪਟਿਚ੍ਛਿਤਸ੍ਸੇਵ ਪੁਨਦਿਵਸਾਦਿਅਤ੍ਥਾਯ ਵਿਸ੍ਸਜ੍ਜਨਂ ਕਾਤਬ੍ਬਂ. ਅਸਮ੍ਪਟਿਚ੍ਛਿਤ੍ਵਾ ਚੇ ਵਿਸ੍ਸਜ੍ਜੇਤਿ, ਨ ਲਭਤੀਤਿ ਵੁਤ੍ਤਂ. ਯਦਿ ਪਨ ਨ ਗਣ੍ਹਾਤਿ ਨ ਵਿਸ੍ਸਜ੍ਜੇਤੀਤਿ ਯਦਿ ਪੁਰਿਮਦਿਵਸੇ ਅਤ੍ਤਨੋ ਨ ਗਣ੍ਹਾਤਿ, ਗਹੇਤ੍ਵਾ ਚ ਨ ਵਿਸ੍ਸਜ੍ਜੇਤਿ.

ਚਤੁਸ੍ਸਾਲਭਤ੍ਤਨ੍ਤਿ ਭੋਜਨਸਾਲਾਯ ਪਟਿਪਾਟਿਯਾ ਦੀਯਮਾਨਂ ਭਤ੍ਤਂ. ਹਤ੍ਥਪਾਸੇ ਠਿਤੇਨਾਤਿ ਦਾਯਕਸ੍ਸ ਹਤ੍ਥਪਾਸੇ ਠਿਤੇਨ, ਪਟਿਗ੍ਗਹਣਰੁਹਨਟ੍ਠਾਨੇਤਿ ਅਧਿਪ੍ਪਾਯੋ. ਮਹਾਪੇਲ਼ਭਤ੍ਤੇਪੀਤਿ ਮਹਨ੍ਤੇਸੁ ਭਤ੍ਤਪਚ੍ਛਿਆਦਿਭਾਜਨੇਸੁ ਠਪੇਤ੍ਵਾ ਦੀਯਮਾਨਭਤ੍ਤੇਸੁਪਿ. ਇਤੋ ਪਰਮ੍ਪਿ ਪਾਰਿਵਾਸਿਕਵਤ੍ਤਂ ਪਾਲ਼ਿਯਂ (ਚੂਲ਼ਵ. ੭੫) ਆਗਤਨਯੇਨੇਵ ਵੇਦਿਤਬ੍ਬਂ. ਤਤ੍ਥ ਪਨ ਅਟ੍ਠਕਥਾਯਂ ਆਗਤਨਯੇਨੇਵ ਅਤ੍ਥੋ ਸੁਵਿਞ੍ਞੇਯ੍ਯੋ ਹੋਤਿ, ਤਸ੍ਮਾ ਦੁਬ੍ਬਿਞ੍ਞੇਯ੍ਯਟ੍ਠਾਨੇਯੇਵ ਕਥਯਿਸ੍ਸਾਮ.

‘‘ਨ ਸਾਮਣੇਰੋ ਉਪਟ੍ਠਾਪੇਤਬ੍ਬੋ’’ਤਿ ਏਤ੍ਥ ਦੁਬ੍ਬਿਧਂ ਸਾਮਣੇਰਂ ਦਸ੍ਸੇਤੁਂ ‘‘ਅਞ੍ਞੋ’’ਤਿਆਦਿਮਾਹ. ‘‘ਨ ਭਿਕ੍ਖੁਨਿਯੋ ਓਵਦਿਤਬ੍ਬਾ’’ਤਿ ਏਤ੍ਥ ਲਦ੍ਧਸਮ੍ਮੁਤਿਕੇਨ ਆਣਤ੍ਤੋਪਿ ਗਰੁਧਮ੍ਮੇਹਿ ਅਞ੍ਞੇਹਿ ਵਾ ਓਵਦਿਤੁਂ ਨ ਲਭਤੀਤਿ ਆਹ ‘‘ਪਟਿਬਲਸ੍ਸ ਵਾ ਭਿਕ੍ਖੁਸ੍ਸ ਭਾਰੋ ਕਾਤਬ੍ਬੋ’’ਤਿ. ਆਗਤਾ ਭਿਕ੍ਖੁਨਿਯੋ ਵਤ੍ਤਬ੍ਬਾਤਿ ਸਮ੍ਬਨ੍ਧੋ. ਸਵਚਨੀਯਨ੍ਤਿ ਸਦੋਸਂ. ਜੇਟ੍ਠਕਟ੍ਠਾਨਂ ਨ ਕਾਤਬ੍ਬਨ੍ਤਿ ਪਧਾਨਟ੍ਠਾਨਂ ਨ ਕਾਤਬ੍ਬਂ. ਕਿਂ ਤਨ੍ਤਿ ਆਹ ‘‘ਪਾਤਿਮੋਕ੍ਖੁਦ੍ਦੇਸਕੇਨਾ’’ਤਿਆਦਿ.

ਰਜੇਹਿ ਹਤਾ ਉਪਹਤਾ ਭੂਮਿ ਏਤਿਸ੍ਸਾਤਿ ਰਜੋਹਤਭੂਮਿ, ਰਜੋਕਿਣ੍ਣਭੂਮੀਤਿ ਅਤ੍ਥੋ. ਪਚ੍ਚਯਨ੍ਤਿ ਵਸ੍ਸਾਵਾਸਿਕਲਾਭਂ ਸਨ੍ਧਾਯ ਵੁਤ੍ਤਂ. ਏਕਪਸ੍ਸੇ ਠਤ੍ਵਾਤਿ ਪਾਲ਼ਿਂ ਵਿਹਾਯ ਭਿਕ੍ਖੂਨਂ ਪਚ੍ਛਤੋ ਠਤ੍ਵਾ. ਸੇਨਾਸਨਂ ਨ ਲਭਤੀਤਿ ਸੇਯ੍ਯਪਰਿਯਨ੍ਤਭਾਗਿਤਾਯ ਵਸ੍ਸਗ੍ਗੇਨ ਗਣ੍ਹਿਤੁਂ ਨ ਲਭਤਿ. ਅਸ੍ਸਾਤਿ ਭਵੇਯ੍ਯ. ‘‘ਆਗਨ੍ਤੁਕੇਨ ਆਰੋਚੇਤਬ੍ਬਂ, ਆਗਨ੍ਤੁਕਸ੍ਸ ਆਰੋਚੇਤਬ੍ਬ’’ਨ੍ਤਿ ਅਵਿਸੇਸੇਨ ਵੁਤ੍ਤਤ੍ਤਾ ਸਚੇ ਦ੍ਵੇ ਪਾਰਿਵਾਸਿਕਾ ਗਤਟ੍ਠਾਨੇ ਅਞ੍ਞਮਞ੍ਞਂ ਪਸ੍ਸਨ੍ਤਿ, ਉਭੋਹਿਪਿ ਅਞ੍ਞਮਞ੍ਞਸ੍ਸ ਆਰੋਚੇਤਬ੍ਬਂ. ਯਥਾ ਬਹਿ ਦਿਸ੍ਵਾ ਆਰੋਚਿਤਸ੍ਸ ਭਿਕ੍ਖੁਨੋ ਵਿਹਾਰਂ ਆਗਤੇਨ ਪੁਨ ਆਰੋਚਨਕਿਚ੍ਚਂ ਨਤ੍ਥਿ, ਏਵਂ ਅਞ੍ਞਵਿਹਾਰਂ ਗਤੇਨਪਿ ਤਤ੍ਥ ਪੁਬ੍ਬੇ ਆਰੋਚਿਤਸ੍ਸ ਪੁਨ ਆਰੋਚਨਕਿਚ੍ਚਂ ਨਤ੍ਥੀਤਿ ਵਦਨ੍ਤਿ. ਅਵਿਸੇਸੇਨਾਤਿ ਪਾਰਿਵਾਸਿਕਸ੍ਸ ਚ ਉਕ੍ਖਿਤ੍ਤਕਸ੍ਸ ਚ ਅਵਿਸੇਸੇਨ.

ਓਬਦ੍ਧਨ੍ਤਿ ਪਲਿਬੁਦ੍ਧਂ. ਸਹਵਾਸੋਤਿ ਵੁਤ੍ਤਪ੍ਪਕਾਰੇ ਛਨ੍ਨੇ ਭਿਕ੍ਖੁਨਾ ਸਦ੍ਧਿਂ ਸਯਨਮੇਵ ਅਧਿਪ੍ਪੇਤਂ, ਨ ਸੇਸਇਰਿਯਾਪਥਕਪ੍ਪਨਂ. ਸੇਸਮੇਤ੍ਥ ਸੁਵਿਞ੍ਞੇਯ੍ਯਮੇਵ.

ਪਾਪਿਟ੍ਠਤਰਾਤਿ ਪਾਰਾਜਿਕਾਪਤ੍ਤੀਤਿ ਉਕ੍ਕਂਸਵਸੇਨ ਵੁਤ੍ਤਂ. ਸਞ੍ਚਰਿਤ੍ਤਾਦਿਪਣ੍ਣਤ੍ਤਿਵਜ੍ਜਤੋ ਪਨ ਸੁਕ੍ਕਵਿਸ੍ਸਟ੍ਠਾਦਿਕਾ ਲੋਕਵਜ੍ਜਾਵ. ਤਤ੍ਥਪਿ ਸਙ੍ਘਭੇਦਾਦਿਕਾ ਪਾਪਿਟ੍ਠਤਰਾ ਏਵ. ਕਮ੍ਮਨ੍ਤਿ ਪਾਰਿਵਾਸਿਕਕਮ੍ਮਵਾਚਾਤਿ ਏਤੇਨ ‘‘ਕਮ੍ਮਭੂਤਾ ਵਾਚਾ ਕਮ੍ਮਵਾਚਾ’’ਤਿ ਕਮ੍ਮਵਾਚਾਸਦ੍ਦਸ੍ਸ ਅਤ੍ਥੋਪਿ ਸਿਦ੍ਧੋਤਿ ਵੇਦਿਤਬ੍ਬੋ. ਸਵਚਨੀਯਨ੍ਤਿ ਏਤ੍ਥ ਸ-ਸਦ੍ਦੋ ‘‘ਸਨ੍ਤਿ’’ਅਤ੍ਥਂ ਵਦਤਿ, ਅਤ੍ਤਨੋ ਵਚਨੇਨ ਅਤ੍ਤਨੋ ਪਵਤ੍ਤਨਕਮ੍ਮਨ੍ਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ, ‘‘ਮਾ ਪਕ੍ਕਮਾਹੀ’’ਤਿ ਵਾ ‘‘ਏਹਿ ਵਿਨਯਧਰਾਨਂ ਸਮ੍ਮੁਖੀਭਾਵ’’ਨ੍ਤਿ ਵਾ ਏਵਂ ਅਤ੍ਤਨੋ ਆਣਾਯ ਪਵਤ੍ਤਨਕਕਮ੍ਮਂ ਨ ਕਾਤਬ੍ਬਨ੍ਤਿ ਅਧਿਪ੍ਪਾਯੋ. ਏਵਞ੍ਹਿ ਕੇਨਚਿ ਸਵਚਨੀਯੇ ਕਤੇ ਅਨਾਦਰੇਨ ਅਤਿਕ੍ਕਮਿਤੁਂ ਨ ਵਟ੍ਟਤਿ, ਬੁਦ੍ਧਸ੍ਸ ਸਙ੍ਘਸ੍ਸ ਆਣਾ ਅਤਿਕ੍ਕਨ੍ਤਾ ਨਾਮ ਹੋਤਿ. ਰਜੋਹਤਭੂਮੀਤਿ ਪਣ੍ਣਸਾਲਾਵਿਸੇਸਨਂ. ਪਚ੍ਚਯਨ੍ਤਿ ਵਸ੍ਸਾਵਾਸਿਕਚੀਵਰਂ. ਸੇਨਾਸਨਂ ਨ ਲਭਤੀਤਿ ਵਸ੍ਸਗ੍ਗੇਨ ਨ ਲਭਤਿ. ਅਪਣ੍ਣਕਪਟਿਪਦਾਤਿ ਅਵਿਰਦ੍ਧਪਟਿਪਦਾ. ਸਚੇ ਵਾਯਮਨ੍ਤੋਪੀਤਿ ਏਤ੍ਥ ਅਵਿਸਯਭਾਵਂ ਞਤ੍ਵਾ ਅਵਾਯਮਨ੍ਤੋਪਿ ਸਙ੍ਗਯ੍ਹਤਿ. ਅਵਿਸੇਸੇਨਾਤਿ ਪਾਰਿਵਾਸਿਕੁਕ੍ਖਿਤ੍ਤਕਾਨਂ ਸਾਮਞ੍ਞੇਨ. ਪਞ੍ਚਵਣ੍ਣਛਦਨਬਨ੍ਧਨਟ੍ਠਾਨੇਸੂਤਿ ਪਞ੍ਚਪ੍ਪਕਾਰਛਦਨੇਹਿ ਛਨ੍ਨਟ੍ਠਾਨੇਸੁ. ਓਬਦ੍ਧਨ੍ਤਿ ਉਟ੍ਠਾਨਾਦਿਬ੍ਯਾਪਾਰਪਟਿਬਦ੍ਧਂ, ਪੀਲ਼ਿਤਨ੍ਤਿ ਅਤ੍ਥੋ. ਮਞ੍ਚੇ ਵਾ ਪੀਠੇ ਵਾਤਿ ਏਤ੍ਥ ਵਾਸਦ੍ਦੋ ਸਮੁਚ੍ਚਯਤ੍ਥੋ. ਤੇਨ ਤਟ੍ਟਿਕਾਚਮ੍ਮਖਣ੍ਡਾਦੀਸੁ ਦੀਘਾਸਨੇਸੁਪਿ ਨਿਸੀਦਿਤੁਂ ਨ ਵਟ੍ਟਤੀਤਿ ਦੀਪਿਤਂ ਹੋਤਿ. ਨ ਵਤ੍ਤਭੇਦਦੁਕ੍ਕਟਨ੍ਤਿ ਵੁਡ੍ਢਤਰਸ੍ਸ ਜਾਨਨ੍ਤਸ੍ਸਪਿ ਵਤ੍ਤਭੇਦੇ ਦੁਕ੍ਕਟਂ ਨਤ੍ਥੀਤਿ ਦਸ੍ਸੇਤਿ. ਵਤ੍ਤਂ ਨਿਕ੍ਖਿਪਾਪੇਤ੍ਵਾਤਿ ਇਦਮ੍ਪਿ ਪਰਿਵਾਸਾਦਿਮੇਵ ਸਨ੍ਧਾਯ ਵੁਤ੍ਤਂ, ਨ ਸੇਸਕਮ੍ਮਾਨਿ.

‘‘ਸੇਨਾਸਨਂ ਨ ਲਭਤਿ ਸੇਯ੍ਯਪਰਿਯਨ੍ਤਭਾਗਿਤਾਯ. ਉਦ੍ਦੇਸਾਦੀਨਿ ਦਾਤੁਮ੍ਪਿ ਨ ਲਭਤੀਤਿ ਵਦਨ੍ਤਿ. ‘ਤਦਹੁਪਸਮ੍ਪਨ੍ਨੇਪਿ ਪਕਤਤ੍ਤੇ’ਤਿ ਵਚਨਤੋ ਅਨੁਪਸਮ੍ਪਨ੍ਨੇਹਿ ਵਸਿਤੁਂ ਵਟ੍ਟਤਿ. ਸਮਵਸ੍ਸਾਤਿ ਏਤੇਨ ਅਪਚ੍ਛਾ ਅਪੁਰਿਮਂ ਨਿਪਜ੍ਜਨੇ ਦ੍ਵਿਨ੍ਨਮ੍ਪਿ ਵਤ੍ਤਭੇਦਾਪਤ੍ਤਿਭਾਵਂ ਦੀਪੇਤਿ. ਅਤ੍ਤਨੋ ਅਤ੍ਤਨੋ ਨਵਕਤਰਨ੍ਤਿ ਪਾਰਿਵਾਸਿਕਾਦਿਨਵਕਤਰਂ. ਪਠਮਂ ਸਙ੍ਘਮਜ੍ਝੇ ਪਰਿਵਾਸਂ ਗਹੇਤ੍ਵਾ ਨਿਕ੍ਖਿਤ੍ਤਵਤ੍ਤੇਨ ਪੁਨ ਏਕਸ੍ਸਪਿ ਸਨ੍ਤਿਕੇ ਸਮਾਦਿਯਿਤੁਂ ਨਿਕ੍ਖਿਪਿਤੁਞ੍ਚ ਵਟ੍ਟਤਿ, ਮਾਨਤ੍ਤੇ ਪਨ ਨਿਕ੍ਖਿਪਿਤੁਂ ਵਟ੍ਟਤਿ. ਊਨੇਗਣੇਚਰਣਦੋਸਤ੍ਤਾ ਨ ਗਹੇਤੁਨ੍ਤਿ ਏਕੇ. ਪਠਮਂ ਆਦਿਨ੍ਨਵਤ੍ਤਂ ਏਕਸ੍ਸ ਸਨ੍ਤਿਕੇ ਯਥਾ ਨਿਕ੍ਖਿਪਿਤੁਂ ਵਟ੍ਟਤਿ, ਤਥਾ ਸਮਾਦਿਯਿਤੁਮ੍ਪਿ ਵਟ੍ਟਤੀਤਿ ਪੋਰਾਣਗਣ੍ਠਿਪਦੇ’’ਤਿ ਵਜਿਰਬੁਦ੍ਧਿਟੀਕਾਯਂ (ਵਜਿਰ. ਟੀ. ਚੂਲ਼ਵਗ੍ਗ ੭੬) ਵੁਤ੍ਤਨ੍ਤਿ.

ਇਦਂ ਏਤ੍ਥ ਯਂ ਵਤ੍ਤਂ ‘‘ਚਤੁਨਵੁਤਿਪਾਰਿਵਾਸਿਕਵਤ੍ਤ’’ਨ੍ਤਿ ਪਾਰਿਵਾਸਿਕਕ੍ਖਨ੍ਧਕਪਾਲ਼ਿਯਂ (ਚੂਲ਼ਵ. ੭੫) ਆਗਤਂ, ਸਮਨ੍ਤਪਾਸਾਦਿਕਾਯਮ੍ਪਿ ਏਤ੍ਤਕਾਯ ਪਾਲ਼ਿਯਾ (ਚੂਲ਼ਵ. ਅਟ੍ਠ. ੭੫-੮੪) ਵਣ੍ਣਨਂ ਵਤ੍ਵਾ ‘‘ਪਾਰਿਵਾਸਿਕਵਤ੍ਤਕਥਾ ਨਿਟ੍ਠਿਤਾ’’ਤਿ ਆਹ. ਇਮਸ੍ਮਿਂ ਵਿਨਯਸਙ੍ਗਹਪਕਰਣੇ (ਵਿ. ਸਙ੍ਗ. ਅਟ੍ਠ. ੨੪੮) ਪਨ ‘‘ਨ ਛਮਾਯਂ ਚਙ੍ਕਮਨ੍ਤੇ ਚਙ੍ਕਮੇ ਚਙ੍ਕਮਿਤਬ੍ਬ’’ਨ੍ਤਿ ਇਮਸ੍ਸਾਨਨ੍ਤਰਂ ‘‘ਪਾਰਿਵਾਸਿਕਚਤੁਤ੍ਥੋ ਚੇ, ਭਿਕ੍ਖਵੇ’’ਤਿਆਦੀਨਿ ਅਗ੍ਗਹੇਤ੍ਵਾ ‘‘ਨ, ਭਿਕ੍ਖਵੇ, ਪਾਰਿਵਾਸਿਕੇਨ ਭਿਕ੍ਖੁਨਾ ਸਾਦਿਤਬ੍ਬ’’ਨ੍ਤਿਆਦੀਨਿ ਪਠਮਂ ਪਞ੍ਞਤ੍ਤਪਦਾਨਿ ਗਹੇਤ੍ਵਾ ਤੇਸਂ ਪਦਾਨਂ ਸਂਵਣ੍ਣਨਂ ਕਤ੍ਵਾ ‘‘ਇਦਂ ਪਾਰਿਵਾਸਿਕਵਤ੍ਤ’’ਨ੍ਤਿ ਅਞ੍ਞਥਾ ਅਨੁਕ੍ਕਮੋ ਵੁਤ੍ਤੋ, ਸੋ ਪਾਲ਼ਿਯਾ ਚ ਅਟ੍ਠਕਥਾਯ ਚ ਨ ਸਮੇਤਿ. ਆਚਰਿਯਸ੍ਸ ਪਨ ਅਯਮਧਿਪ੍ਪਾਯੋ ਸਿਯਾ – ‘‘ਪਾਰਿਵਾਸਿਕਚਤੁਤ੍ਥੋ ਚੇ, ਭਿਕ੍ਖਵੇ’’ਤਿਆਦੀਨਿ ਪਾਰਿਵਾਸਿਕਭਿਕ੍ਖੂਨਂ ਸਮਾਦਿਯਿਤਬ੍ਬਾਨਿ ਨ ਹੋਨ੍ਤਿ, ਅਥ ਖੋ ਕਮ੍ਮਕਾਰਕਾਨਂ ਭਿਕ੍ਖੂਨਂ ਕਤ੍ਤਬ੍ਬਾਕਤ੍ਤਬ੍ਬਕਮ੍ਮਦਸ੍ਸਨਮੇਤਂ, ਤਸ੍ਮਾ ਪਾਰਿਵਾਸਿਕਵਤ੍ਤੇ ਨ ਪਵੇਸੇਤਬ੍ਬਂ. ‘‘ਨ, ਭਿਕ੍ਖਵੇ, ਪਾਰਿਵਾਸਿਕੇਨ ਭਿਕ੍ਖੁਨਾ ਸਾਦਿਤਬ੍ਬ’’ਨ੍ਤਿਆਦੀਨਿ ਪਨ ਪਾਰਿਵਾਸਿਕਭਿਕ੍ਖੂਨਂ ਸਮ੍ਮਾਵਤ੍ਤਿਤਬ੍ਬਵਤ੍ਤਾਨਿਯੇਵ ਹੋਨ੍ਤਿ, ਤਸ੍ਮਾ ਇਮਾਨਿਯੇਵ ਪਾਰਿਵਾਸਿਕਵਤ੍ਤੇ ਪਵੇਸੇਤਬ੍ਬਾਨੀਤਿ. ਅਮ੍ਹੇਹਿ ਪਨ ਪਾਲ਼ਿਅਟ੍ਠਕਥਾਟੀਕਾਸੁ ਆਗਤਾਨੁਕ੍ਕਮੇਨ ਪਠਮਂ ਪਞ੍ਞਤ੍ਤਵਤ੍ਤਾਨਂ ਅਤ੍ਥਂ ਪਠਮਂ ਦਸ੍ਸੇਤ੍ਵਾ ਪਚ੍ਛਾ ਪਞ੍ਞਤ੍ਤਪਦਾਨਂ ਅਤ੍ਥੋ ਪਚ੍ਛਾ ਵੁਤ੍ਤੋਤਿ ਦਟ੍ਠਬ੍ਬੋ.

ਇਤਿ ਵਿਨਯਸਙ੍ਗਹਸਂਵਣ੍ਣਨਾਭੂਤੇ ਵਿਨਯਾਲਙ੍ਕਾਰੇ

ਗਰੁਕਾਪਤ੍ਤਿਵੁਟ੍ਠਾਨਵਿਨਿਚ੍ਛਯਕਥਾਲਙ੍ਕਾਰੋ ਨਾਮ

ਦ੍ਵਤ੍ਤਿਂਸਤਿਮੋ ਪਰਿਚ੍ਛੇਦੋ.