੩. ਭੇਸਜ੍ਜਾਦਿਕਰਣਵਿਨਿਚ੍ਛਯਕਥਾ

੧੫. ਏਵਂ ਪਰਿਕ੍ਖਾਰਵਿਨਿਚ੍ਛਯਂ ਕਥੇਤ੍ਵਾ ਇਦਾਨਿ ਭੇਸਜ੍ਜਕਰਣਪਰਿਤ੍ਤਪਟਿਸਨ੍ਥਾਰਾਨਂ ਵਿਨਿਚ੍ਛਯਂ ਕਥੇਤੁਂ ‘‘ਭੇਸਜ੍ਜਾ’’ਤਿਆਦਿਮਾਹ. ਤਤ੍ਥ ਭਿਸਕ੍ਕਸ੍ਸ ਇਦਂ ਕਮ੍ਮਂ ਭੇਸਜ੍ਜਂ. ਕਿਂ ਤਂ? ਤਿਕਿਚ੍ਛਨਂ. ਕਰਿਯਤੇ ਕਰਣਂ, ਭੇਸਜ੍ਜਸ੍ਸ ਕਰਣਂ ਭੇਸਜ੍ਜਕਰਣਂ, ਵੇਜ੍ਜਕਮ੍ਮਕਰਣਨ੍ਤਿ ਵੁਤ੍ਤਂ ਹੋਤਿ. ਪਰਿਸਮਨ੍ਤਤੋ ਤਾਯਤਿ ਰਕ੍ਖਤੀਤਿ ਪਰਿਤ੍ਤਂ, ਆਰਕ੍ਖਾਤਿ ਅਤ੍ਥੋ. ਪਟਿਸਨ੍ਥਰਣਂ ਪਟਿਸਨ੍ਥਾਰੋ, ਅਤ੍ਤਨਾ ਸਦ੍ਧਿਂ ਅਞ੍ਞੇਸਂ ਸਮ੍ਬਨ੍ਧਕਰਣਨ੍ਤਿ ਅਤ੍ਥੋ. ਤਤ੍ਥ ਯੋ ਵਿਨਿਚ੍ਛਯੋ ਮਾਤਿਕਾਯਂ ‘‘ਭੇਸਜ੍ਜਕਰਣਮ੍ਪਿ ਚ ਪਰਿਤ੍ਤਂ, ਪਟਿਸਨ੍ਥਾਰੋ’’ਤਿ (ਵਿ. ਸਙ੍ਗ. ਅਟ੍ਠ. ਗਨ੍ਥਾਰਮ੍ਭਕਥਾ) ਮਯਾ ਵੁਤ੍ਤੋ, ਤਸ੍ਮਿਂ ਸਮਭਿਨਿਵਿਟ੍ਠੇ ਭੇਸਜ੍ਜਕਰਣਵਿਨਿਚ੍ਛਯੇ. ਸਹਧਮ੍ਮੋ ਏਤੇਸਨ੍ਤਿ ਸਹਧਮ੍ਮਿਕਾ, ਤੇਸਂ, ਏਕਸ੍ਸ ਸਤ੍ਥੁਨੋ ਸਾਸਨੇ ਸਹਸਿਕ੍ਖਮਾਨਧਮ੍ਮਾਨਨ੍ਤਿ ਅਤ੍ਥੋ. ਅਥ ਵਾ ਸਹਧਮ੍ਮੇ ਨਿਯੁਤ੍ਤਾ ਸਹਧਮ੍ਮਿਕਾ, ਤੇਸਂ, ਸਹਧਮ੍ਮਸਙ੍ਖਾਤੇ ਸਿਕ੍ਖਾਪਦੇ ਸਿਕ੍ਖਮਾਨਭਾਵੇਨ ਨਿਯੁਤ੍ਤਾਨਨ੍ਤਿ ਅਤ੍ਥੋ. ਵਿਵਟ੍ਟਨਿਸ੍ਸਿਤਸੀਲਾਦਿਯੁਤ੍ਤਭਾਵੇਨ ਸਮਤ੍ਤਾ ਸਮਸੀਲਸਦ੍ਧਾਪਞ੍ਞਾਨਂ. ਏਤੇਨ ਦੁਸ੍ਸੀਲਾਨਂ ਭਿਨ੍ਨਲਦ੍ਧਿਕਾਨਞ੍ਚ ਅਕਾਤੁਮ੍ਪਿ ਲਬ੍ਭਤੀਤਿ ਦਸ੍ਸੇਤਿ.

ਞਾਤਕਪਵਾਰਿਤਟ੍ਠਾਨਤੋ ਵਾਤਿ ਅਤ੍ਤਨੋ ਵਾ ਤੇਸਂ ਵਾ ਞਾਤਕਪਵਾਰਿਤਟ੍ਠਾਨਤੋ. ਨ ਕਰਿਯਿਤ੍ਥਾਤਿ ਅਕਤਾ, ਅਯੁਤ੍ਤਵਸੇਨ ਅਕਤਪੁਬ੍ਬਾ ਵਿਞ੍ਞਤ੍ਤਿ ਅਕਤਵਿਞ੍ਞਤ੍ਤਿ. ਵਜਿਰਬੁਦ੍ਧਿਟੀਕਾਯਂ (ਵਜਿਰ. ਟੀ. ਪਾਰਾਜਿਕ ੧੮੬) ਪਨ ‘‘ਅਕਤਵਿਞ੍ਞਤ੍ਤਿਯਾਤਿ ਨ ਵਿਞ੍ਞਤ੍ਤਿਯਾ. ਸਾ ਹਿ ਅਨਨੁਞ੍ਞਾਤਤ੍ਤਾ ਕਤਾਪਿ ਅਕਤਾ ਵਿਯਾਤਿ ਅਕਤਵਿਞ੍ਞਤ੍ਤਿ, ‘ਵਦੇਯ੍ਯਾਥ ਭਨ੍ਤੇ ਯੇਨਤ੍ਥੋ’ਤਿ ਏਵਂ ਅਕਤਟ੍ਠਾਨੇ ਵਿਞ੍ਞਤ੍ਤਿ ਅਕਤਵਿਞ੍ਞਤ੍ਤੀਤਿ ਲਿਖਿਤ’’ਨ੍ਤਿ ਵੁਤ੍ਤਂ. ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ੨.੧੮੫) ‘‘ਗਿਲਾਨਸ੍ਸ ਅਤ੍ਥਾਯ ਅਪ੍ਪਵਾਰਿਤਟ੍ਠਾਨਤੋ ਵਿਞ੍ਞਤ੍ਤਿਯਾ ਅਨੁਞ੍ਞਾਤਤ੍ਤਾ ਕਤਾਪਿ ਅਕਤਾ ਵਿਯਾਤਿ ਅਕਤਵਿਞ੍ਞਤ੍ਤਿ, ‘ਵਦ ਭਨ੍ਤੇ ਪਚ੍ਚਯੇਨਾ’ਤਿ ਏਵਂ ਅਕਤਪਵਾਰਣਟ੍ਠਾਨੇ ਚ ਵਿਞ੍ਞਤ੍ਤਿ ਅਕਤਵਿਞ੍ਞਤ੍ਤੀ’’ਤਿ.

੧੬. ਪਟਿਯਾਦਿਯਤੀਤਿ ਸਮ੍ਪਾਦੇਤਿ. ਅਕਾਤੁਂ ਨ ਵਟ੍ਟਤੀਤਿ ਏਤ੍ਥ ਦੁਕ੍ਕਟਨ੍ਤਿ ਵਦਨ੍ਤਿ, ਅਯੁਤ੍ਤਤਾਵਸੇਨ ਪਨੇਤ੍ਥ ਅਕਰਣਪ੍ਪਟਿਕ੍ਖੇਪੋ ਵੁਤ੍ਤੋ, ਨ ਆਪਤ੍ਤਿਵਸੇਨਾਤਿ ਗਹੇਤਬ੍ਬਂ. ਸਬ੍ਬਂ ਪਰਿਕਮ੍ਮਂ ਅਨਾਮਸਨ੍ਤੇਨਾਤਿ ਮਾਤੁਗਾਮਸਰੀਰਾਦੀਨਂ ਅਨਾਮਾਸਤ੍ਤਾ ਵੁਤ੍ਤਂ. ਯਾਵ ਞਾਤਕਾ ਨ ਪਸ੍ਸਨ੍ਤੀਤਿ ਯਾਵ ਤਸ੍ਸ ਞਾਤਕਾ ਨ ਪਸ੍ਸਨ੍ਤਿ. ‘‘ਤਿਤ੍ਥਿਯਭੂਤਾਨਂ ਮਾਤਾਪਿਤੂਨਂ ਸਹਤ੍ਥਾ ਦਾਤੁਂ ਨ ਵਟ੍ਟਤੀ’’ਤਿ ਵਜਿਰਬੁਦ੍ਧਿਟੀਕਾਯਂ (ਵਜਿਰ. ਟੀ. ਪਾਰਾਜਿਕ ੧੮੬) ਵੁਤ੍ਤਂ.

੧੭. ਪਿਤੁ ਭਗਿਨੀ ਪਿਤੁਚ੍ਛਾ. ਮਾਤੁ ਭਾਤਾ ਮਾਤੁਲੋ. ਨਪ੍ਪਹੋਨ੍ਤੀਤਿ ਕਾਤੁਂ ਨ ਸਕ੍ਕੋਨ੍ਤੀਤਿ ਟੀਕਾਸੁ ਵੁਤ੍ਤਂ. ‘‘ਤੇਸਂਯੇਵ ਸਨ੍ਤਕਂ ਭੇਸਜ੍ਜਂ ਗਹੇਤ੍ਵਾ ਕੇਵਲਂ ਯੋਜੇਤ੍ਵਾ ਦਾਤਬ੍ਬ’’ਨ੍ਤਿ ਵਤ੍ਵਾ ‘‘ਸਚੇ ਪਨ ਨਪ੍ਪਹੋਨ੍ਤਿ ਯਾਚਨ੍ਤਿ ਚ, ਦੇਥ ਨੋ ਭਨ੍ਤੇ, ਤੁਮ੍ਹਾਕਂ ਪਟਿਦਸ੍ਸਾਮਾ’’ਤਿ ਵੁਤ੍ਤਤ੍ਤਾ ਪਨ ਤੇਸਂ ਭੇਸਜ੍ਜਸ੍ਸ ਅਪ੍ਪਹੋਨਕਤ੍ਤਾ ਭੇਸਜ੍ਜਮੇਵ ਯਾਚਨ੍ਤੀਤਿ ਅਟ੍ਠਕਥਾਧਿਪ੍ਪਾਯੋ ਦਿਸ੍ਸਤਿ, ਵੀਮਂਸਿਤਬ੍ਬੋ. ਨ ਯਾਚਨ੍ਤੀਤਿ ਲਜ੍ਜਾਯ ਨ ਯਾਚਨ੍ਤਿ, ਗਾਰਵੇਨ ਵਾ. ‘‘ਆਭੋਗਂ ਕਤ੍ਵਾ’’ਤਿ ਵੁਤ੍ਤਤ੍ਤਾ ਅਞ੍ਞਥਾ ਦੇਨ੍ਤਸ੍ਸ ਆਪਤ੍ਤਿਯੇਵ. ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ੨.੧੮) ਪਨ ‘‘ਆਭੋਗਂ ਕਤ੍ਵਾਤਿ ਇਦਂ ਕਤ੍ਤਬ੍ਬਕਰਣਦਸ੍ਸਨਵਸੇਨ ਵੁਤ੍ਤਂ, ਆਭੋਗਂ ਪਨ ਅਕਤ੍ਵਾਪਿ ਦਾਤੁਂ ਵਟ੍ਟਤੀਤਿ ਤੀਸੁ ਗਣ੍ਠਿਪਦੇਸੁ ਲਿਖਿਤ’’ਨ੍ਤਿ ਵੁਤ੍ਤਂ. ਪੋਰਾਣਟੀਕਾਯਮ੍ਪਿ ਤਦੇਵ ਗਹੇਤ੍ਵਾ ਲਿਖਿਤਂ. ਵਿਮਤਿਵਿਨੋਦਨਿਯਂ (ਵਿ. ਵਿ. ਟੀ. ੧.੧੮੫) ਪਨ ਤਂ ਵਚਨਂ ਪਟਿਕ੍ਖਿਤ੍ਤਂ. ਵੁਤ੍ਤਞ੍ਹਿ ਤਤ੍ਥ ਕੇਚਿ ਪਨ ‘‘ਆਭੋਗਂ ਅਕਤ੍ਵਾਪਿ ਦਾਤੁਂ ਵਟ੍ਟਤੀਤਿ ਵਦਨ੍ਤਿ, ਤਂ ਨ ਯੁਤ੍ਤਂ ਭੇਸਜ੍ਜਕਰਣਸ੍ਸ, ਪਾਲ਼ਿਯਂ ‘ਅਨਾਪਤ੍ਤਿ ਭਿਕ੍ਖੁ ਪਾਰਾਜਿਕਸ੍ਸ, ਆਪਤ੍ਤਿ ਦੁਕ੍ਕਟਸ੍ਸਾ’ਤਿ ਏਵਂ ਅਨ੍ਤਰਾਪਤ੍ਤਿਦਸ੍ਸਨਵਸੇਨ ਸਾਮਞ੍ਞਤੋ ਪਟਿਕ੍ਖਿਤ੍ਤਤ੍ਤਾ, ਅਟ੍ਠਕਥਾਯਂ ਅਵੁਤ੍ਤਪ੍ਪਕਾਰੇਨ ਕਰੋਨ੍ਤਸ੍ਸ ਸੁਤ੍ਤੇਨੇਵ ਆਪਤ੍ਤਿਸਿਦ੍ਧਾਤਿ ਦਟ੍ਠਬ੍ਬਾ. ਤੇਨੇਵ ਅਟ੍ਠਕਥਾਯਮ੍ਪਿ ‘ਤੇਸਞ੍ਞੇਵ ਸਨ੍ਤਕ’ਨ੍ਤਿਆਦਿ ਵੁਤ੍ਤ’’ਨ੍ਤਿ.

ਏਤੇ ਦਸ ਞਾਤਕੇ ਠਪੇਤ੍ਵਾਤਿ ਤੇਸਂ ਪੁਤ੍ਤਨਤ੍ਤਾਦਯੋਪਿ ਤਪ੍ਪਟਿਬਦ੍ਧਤ੍ਤਾ ਞਾਤਕਾ ਏਵਾਤਿ ਤੇਪਿ ਏਤ੍ਥੇਵ ਸਙ੍ਗਹਿਤਾ. ਤੇਨ ਅਞ੍ਞੇਸਨ੍ਤਿ ਇਮਿਨਾ ਅਞ੍ਞਾਤਕਾਨਂ ਗਹਣਂ ਵੇਦਿਤਬ੍ਬਂ. ਤੇਨੇਵਾਹ ‘‘ਏਤੇਸਂ ਪੁਤ੍ਤਪਰਮ੍ਪਰਾਯਾ’’ਤਿਆਦਿ. ਕੁਲਪਰਿਵਟ੍ਟਾਤਿ ਕੁਲਾਨਂ ਪਟਿਪਾਟਿ, ਕੁਲਪਰਮ੍ਪਰਾਤਿ ਵੁਤ੍ਤਂ ਹੋਤਿ. ਭੇਸਜ੍ਜਂ ਕਰੋਨ੍ਤਸ੍ਸਾਤਿ ਯਥਾਵੁਤ੍ਤਵਿਧਿਨਾ ਕਰੋਨ੍ਤਸ੍ਸ, ‘‘ਤਾਵਕਾਲਿਕਂ ਦਸ੍ਸਾਮੀ’’ਤਿ ਆਭੋਗਂ ਅਕਤ੍ਵਾ ਦੇਨ੍ਤਸ੍ਸਪਿ ਪਨ ਅਨ੍ਤਰਾਪਤ੍ਤਿਦੁਕ੍ਕਟਂ ਵਿਨਾ ਮਿਚ੍ਛਾਜੀਵਨਂ ਵਾ ਕੁਲਦੂਸਨਂ ਵਾ ਨ ਹੋਤਿਯੇਵ. ਤੇਨਾਹ ‘‘ਵੇਜ੍ਜਕਮ੍ਮਂ ਵਾ ਕੁਲਦੂਸਕਾਪਤ੍ਤਿ ਵਾ ਨ ਹੋਤੀ’’ਤਿ. ਞਾਤਕਾਨਞ੍ਹਿ ਸਨ੍ਤਕਂ ਯਾਚਿਤ੍ਵਾਪਿ ਗਹੇਤੁਂ ਵਟ੍ਟਤਿ, ਤਸ੍ਮਾ ਤਤ੍ਥ ਕੁਲਦੂਸਨਾਦਿ ਨ ਸਿਯਾ. ਸਾਰਤ੍ਥਦੀਪਨਿਯਮ੍ਪਿ (ਸਾਰਤ੍ਥ. ਟੀ. ੨.੧੮੫) ‘‘ਮਯ੍ਹਂ ਦਸ੍ਸਨ੍ਤਿ ਕਰਿਸ੍ਸਨ੍ਤੀਤਿ ਪਚ੍ਚਾਸਾਯ ਕਰੋਨ੍ਤਸ੍ਸਪਿ ਯਾਚਿਤ੍ਵਾ ਗਹੇਤਬ੍ਬਟ੍ਠਾਨਤਾਯ ਞਾਤਕੇਸੁ ਵੇਜ੍ਜਕਮ੍ਮਂ ਵਾ ਕੁਲਦੂਸਕਾਪਤ੍ਤਿ ਵਾ ਨ ਹੋਤੀਤਿ ਵਦਨ੍ਤੀ’’ਤਿ ਵੁਤ੍ਤਂ. ਵਜਿਰਬੁਦ੍ਧਿਟੀਕਾਯਂ (ਵਜਿਰ. ਟੀ. ਪਾਰਾਜਿਕ ੧੮੬) ਪਨ ‘‘ਵੇਜ੍ਜਕਮ੍ਮਂ ਵਾ ਕੁਲਦੂਸਕਾਪਤ੍ਤਿ ਵਾ ਨ ਹੋਤੀਤਿ ਵਚਨਤੋ ਯਾਵ ਸਤ੍ਤਮੋ ਕੁਲਪਰਿਵਟ੍ਟੋ, ਤਾਵ ਭੇਸਜ੍ਜਂ ਕਾਤੁਂ ਵਟ੍ਟਤੀਤਿ ਵਦਨ੍ਤੀ’’ਤਿ ਏਤ੍ਤਕਮੇਵ ਵੁਤ੍ਤਂ. ਸਬ੍ਬਪਦੇਸੁ ਵਿਨਿਚ੍ਛਯੋ ਵੇਦਿਤਬ੍ਬੋਤਿ ‘‘ਚੂਲ਼ਮਾਤੁਯਾ’’ਤਿਆਦੀਸੁ ਸਬ੍ਬਪਦੇਸੁ ਚੂਲ਼ਮਾਤੁਯਾ ਸਾਮਿਕੋਤਿਆਦਿਨਾ ਯੋਜੇਤ੍ਵਾ ਹੇਟ੍ਠਾ ਵੁਤ੍ਤਨਯੇਨੇਵ ਵਿਨਿਚ੍ਛਯੋ ਵੇਦਿਤਬ੍ਬੋ.

ਉਪਜ੍ਝਾਯਸ੍ਸ ਆਹਰਾਮਾਤਿ ਇਦਂ ਉਪਜ੍ਝਾਯੇਨ ਮਮ ਞਾਤਕਾਨਂ ਭੇਸਜ੍ਜਂ ਆਹਰਥਾਤਿ ਆਣਤ੍ਤੇਹਿ ਕਤ੍ਤਬ੍ਬਵਿਧਿਦਸ੍ਸਨਤ੍ਥਂ ਵੁਤ੍ਤਂ. ਇਮਿਨਾ ਚ ਸਾਮਣੇਰਾਦੀਨਂ ਅਪਚ੍ਚਾਸਾਯਪਿ ਪਰਜਨਸ੍ਸ ਭੇਸਜ੍ਜਕਰਣਂ ਨ ਵਟ੍ਟਤੀਤਿ ਦਸ੍ਸੇਤਿ. ਵੁਤ੍ਤਨਯੇਨੇਵ ਪਰਿਯੇਸਿਤ੍ਵਾਤਿ ਇਮਿਨਾ ‘‘ਭਿਕ੍ਖਾਚਾਰਵਤ੍ਤੇਨ ਵਾ’’ਤਿਆਦਿਨਾ, ‘‘ਞਾਤਿਸਾਮਣੇਰੇਹਿ ਵਾ’’ਤਿਆਦਿਨਾ ਚ ਵੁਤ੍ਤਮਤ੍ਥਂ ਅਤਿਦਿਸਤਿ. ਅਪਚ੍ਚਾਸੀਸਨ੍ਤੇਨਾਤਿ (ਵਿ. ਵਿ. ਟੀ. ੧.੧੮੫) ਆਗਨ੍ਤੁਕਚੋਰਾਦੀਨਂ ਕਰੋਨ੍ਤੇਨਪਿ ਮਨੁਸ੍ਸਾ ਨਾਮ ਉਪਕਾਰਕਾ ਹੋਨ੍ਤੀਤਿ ਅਤ੍ਤਨੋ ਤੇਹਿ ਲਾਭਂ ਅਪਤ੍ਥਯਨ੍ਤੇਨ, ਪਚ੍ਚਾਸਾਯ ਕਰੋਨ੍ਤਸ੍ਸ ਪਨ ਵੇਜ੍ਜਕਮ੍ਮਕੁਲਦੂਸਨਾਦਿਨਾ ਦੋਸੋ ਹੋਤੀਤਿ ਅਧਿਪ੍ਪਾਯੋ. ਏਵਞ੍ਹਿ ਉਪਕਾਰੇ ਕਤੇ ਸਾਸਨਸ੍ਸ ਗੁਣਂ ਞਤ੍ਵਾ ਪਸੀਦਨ੍ਤਿ, ਸਙ੍ਘਸ੍ਸ ਵਾ ਉਪਕਾਰਕਾ ਹੋਨ੍ਤੀਤਿ ਕਰਣੇ ਪਨ ਦੋਸੋ ਨਤ੍ਥਿ. ਕੇਚਿ ਪਨ ‘‘ਅਪਚ੍ਚਾਸੀਸਨ੍ਤੇਨ ਆਗਨ੍ਤੁਕਾਦੀਨਂ ਪਟਿਕ੍ਖਿਤ੍ਤਪੁਗ੍ਗਲਾਨਮ੍ਪਿ ਦਾਤੁਂ ਵਟ੍ਟਤੀ’’ਤਿ ਵਦਨ੍ਤਿ, ਤਂ ਨ ਯੁਤ੍ਤਂ ਕਤ੍ਤਬ੍ਬਾਕਤ੍ਤਬ੍ਬਟ੍ਠਾਨਵਿਭਾਗਸ੍ਸ ਨਿਰਤ੍ਥਕਤ੍ਤਪ੍ਪਸਙ੍ਗਤੋ ਅਪਚ੍ਚਾਸੀਸਨ੍ਤੇਨ ‘‘ਸਬ੍ਬੇਸਮ੍ਪਿ ਦਾਤੁਂ ਕਾਤੁਞ੍ਚ ਵਟ੍ਟਤੀ’’ਤਿ ਏਤ੍ਤਕਮਤ੍ਤਸ੍ਸੇਵ ਵਤ੍ਤਬ੍ਬਤੋ. ਅਪਚ੍ਚਾਸੀਸਨਞ੍ਚ ਮਿਚ੍ਛਾਜੀਵਕੁਲਦੂਸਨਾਦਿਦੋਸਨਿਸੇਧਨਤ੍ਥਮੇਵ ਵੁਤ੍ਤਂ ਨ ਭੇਸਜ੍ਜਕਰਣਸਙ੍ਖਾਤਾਯ ਇਮਿਸ੍ਸਾ ਅਨ੍ਤਰਾਪਤ੍ਤਿਯਾ ਮੁਚ੍ਚਨਤ੍ਥਂ ਆਗਨ੍ਤੁਕਚੋਰਾਦੀਨਂ ਅਨੁਞ੍ਞਾਤਾਨਂ ਦਾਨੇਨੇਵ ਤਾਯ ਆਪਤ੍ਤਿਯਾ ਮੁਚ੍ਚਨਤੋਤਿ ਗਹੇਤਬ੍ਬਂ.

੧੮. ਤੇਨੇਵ ਅਪਚ੍ਚਾਸੀਸਨ੍ਤੇਨਪਿ ਅਕਾਤਬ੍ਬਟ੍ਠਾਨਂ ਦਸ੍ਸੇਤੁਂ ‘‘ਸਦ੍ਧਂ ਕੁਲ’’ਨ੍ਤਿਆਦਿ ਵੁਤ੍ਤਂ. ‘‘ਭੇਸਜ੍ਜਂ ਆਚਿਕ੍ਖਥਾ’’ਤਿ ਵੁਤ੍ਤੇਪਿ ‘‘ਅਞ੍ਞਮਞ੍ਞਂ ਪਨ ਕਥਾ ਕਾਤਬ੍ਬਾ’’ਤਿ ਇਦਂ ਪਰਿਯਾਯਤ੍ਤਾ ਵਟ੍ਟਤਿ. ਏਵਂ ਹੇਟ੍ਠਾ ਵੁਤ੍ਤਨਯੇਨ ਇਦਞ੍ਚਿਦਞ੍ਚ ਗਹੇਤ੍ਵਾ ਕਰੋਨ੍ਤੀਤਿ ਇਮਿਨਾ ਪਰਿਯਾਯੇਨ ਕਥੇਨ੍ਤਸ੍ਸਪਿ ਨੇਵਤ੍ਥਿ ਦੋਸੋਤਿ ਆਚਰਿਯਾ. ਪੁਚ੍ਛਨ੍ਤੀਤਿ ਇਮਿਨਾ ਦਿਟ੍ਠਦਿਟ੍ਠਰੋਗੀਨਂ ਪਰਿਯਾਯੇਨਪਿ ਵਤ੍ਵਾ ਵਿਚਰਣਂ ਅਯੁਤ੍ਤਨ੍ਤਿ ਦਸ੍ਸੇਤਿ. ਪੁਚ੍ਛਿਤਸ੍ਸਪਿ ਪਨ ਪਚ੍ਚਾਸੀਸਨ੍ਤਸ੍ਸ ਪਰਿਯਾਯਕਥਾਪਿ ਨ ਵਟ੍ਟਤੀਤਿ ਵਦਨ੍ਤਿ. ਸਮੁਲ੍ਲਪੇਸੀਤਿ ਅਪਚ੍ਚਾਸੀਸਨ੍ਤੋ ਏਵ ਅਞ੍ਞਮਞ੍ਞਂ ਕਥਂ ਸਮੁਟ੍ਠਾਪੇਸਿ. ਆਚਰਿਯਭਾਗੋਤਿ ਵਿਨਯਾਚਾਰਂ ਅਕੋਪੇਤ੍ਵਾ ਭੇਸਜ੍ਜਾਚਿਕ੍ਖਣੇਨ ਵੇਜ੍ਜਾਚਰਿਯਭਾਗੋ ਅਯਨ੍ਤਿ ਅਤ੍ਥੋਤਿ ਵਿਮਤਿਵਿਨੋਦਨਿਯਂ (ਵਿ. ਵਿ. ਟੀ. ੧.੧੮੫) ਵੁਤ੍ਤਂ.

ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ੨.੧੮੫) ਪਨ ‘‘ਵਿਨਯਲਕ੍ਖਣਂ ਅਜਾਨਨ੍ਤਸ੍ਸ ਅਨਾਚਰਿਯਸ੍ਸ ਤਦਨੁਰੂਪਵੋਹਾਰਾਸਮ੍ਭਵਤੋ ਈਦਿਸਸ੍ਸ ਲਾਭਸ੍ਸ ਉਪ੍ਪਤ੍ਤਿ ਨਾਮ ਨਤ੍ਥੀਤਿ ‘ਆਚਰਿਯਭਾਗੋ ਨਾਮ ਅਯ’ਨ੍ਤਿ ਵੁਤ੍ਤਂ. ਵਿਨਯੇ ਪਕਤਞ੍ਞੁਨਾ ਆਚਰਿਯੇਨ ਲਭਿਤਬ੍ਬਭਾਗੋ ਅਯਨ੍ਤਿ ਵੁਤ੍ਤਂ ਹੋਤੀ’’ਤਿ ਵੁਤ੍ਤਂ. ‘‘ਪੁਪ੍ਫਪੂਜਨਤ੍ਥਾਯ ਦਿਨ੍ਨੇਪਿ ਅਕਪ੍ਪਿਯਵੋਹਾਰੇਨ ਵਿਧਾਨਸ੍ਸ ਅਯੁਤ੍ਤਤ੍ਤਾ ‘ਕਪ੍ਪਿਯਵਸੇਨਾ’ਤਿ ਵੁਤ੍ਤਂ, ‘ਪੁਪ੍ਫਂ ਆਹਰਥਾ’ਤਿਆਦਿਨਾ ਕਪ੍ਪਿਯਵੋਹਾਰਵਸੇਨਾਤਿ ਅਤ੍ਥੋ’’ਤਿ ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ੨.੧੮੫) ਵੁਤ੍ਤਂ. ਵਿਮਤਿਵਿਨੋਦਨਿਯਂ (ਵਿ. ਵਿ. ਟੀ. ੧.੧੮੫) ਪਨ ‘‘ਪੁਪ੍ਫਪੂਜਨਤ੍ਥਾਯਪਿ ਸਮ੍ਪਟਿਚ੍ਛਿਯਮਾਨਂ ਰੂਪਿਯਂ ਅਤ੍ਤਨੋ ਸਨ੍ਤਕਤ੍ਤਭਜਨੇਨ ਨਿਸ੍ਸਗ੍ਗਿਯਮੇਵਾਤਿ ਆਹ ‘ਕਪ੍ਪਿਯਵਸੇਨ ਗਾਹਾਪੇਤ੍ਵਾ’ਤਿ. ‘ਅਮ੍ਹਾਕਂ ਰੂਪਿਯਂ ਨ ਵਟ੍ਟਤਿ, ਪੁਪ੍ਫਪੂਜਨਤ੍ਥਂ ਪੁਪ੍ਫਂ ਵਟ੍ਟਤੀ’ਤਿਆਦਿਨਾ ਪਟਿਕ੍ਖਿਪਿਤ੍ਵਾ ਕਪ੍ਪਿਯੇਨ ਕਮ੍ਮੇਨ ਗਾਹਾਪੇਤ੍ਵਾਤਿ ਅਤ੍ਥੋ’’ਤਿ ਵੁਤ੍ਤਂ. ਵਜਿਰਬੁਦ੍ਧਿਟੀਕਾਯਂ (ਵਜਿਰ. ਟੀ. ਪਾਰਾਜਿਕ ੧੮੬) ਪਨ ‘‘ਕਪ੍ਪਿਯਵਸੇਨਾਤਿ ਅਮ੍ਹਾਕਂ ਪੁਪ੍ਫਂ ਆਨੇਥਾਤਿਆਦਿਨਾ. ‘ਪੂਜਂ ਅਕਾਸੀ’ਤਿ ਵੁਤ੍ਤਤ੍ਤਾ ਸਯਂ ਗਹੇਤੁਂ ਨ ਵਟ੍ਟਤੀਤਿ ਵਦਨ੍ਤੀ’’ਤਿ ਏਤ੍ਤਕਮੇਵ ਵੁਤ੍ਤਂ. ਅਯਮੇਤ੍ਥ ਭੇਸਜ੍ਜਕਰਣਵਿਨਿਚ੍ਛਯਕਥਾਲਙ੍ਕਾਰੋ.

੧੯. ਏਵਂ ਭੇਸਜ੍ਜਕਰਣਵਿਨਿਚ੍ਛਯਂ ਕਥੇਤ੍ਵਾ ਇਦਾਨਿ ਪਰਿਤ੍ਤਕਰਣਵਿਨਿਚ੍ਛਯਂ ਕਥੇਤੁਮਾਹ ‘‘ਪਰਿਤ੍ਤੇ ਪਨਾ’’ਤਿਆਦਿ. ਤਤ੍ਥ ਯਦਿ ‘‘ਪਰਿਤ੍ਤਂ ਕਰੋਥਾ’’ਤਿ ਵੁਤ੍ਤੇ ਕਰੋਨ੍ਤਿ, ਭੇਸਜ੍ਜਕਰਣਂ ਵਿਯ ਗਿਹਿਕਮ੍ਮਂ ਵਿਯ ਚ ਹੋਤੀਤਿ ‘‘ਨ ਕਾਤਬ੍ਬ’’ਨ੍ਤਿ ਵੁਤ੍ਤਂ. ‘‘ਪਰਿਤ੍ਤਂ ਭਣਥਾ’’ਤਿ ਵੁਤ੍ਤੇ ਪਨ ਧਮ੍ਮਜ੍ਝੇਸਨਤ੍ਤਾ ਅਨਜ੍ਝਿਟ੍ਠੇਨਪਿ ਭਣਿਤਬ੍ਬੋ ਧਮ੍ਮੋ, ਪਗੇਵ ਅਜ੍ਝਿਟ੍ਠੇਨਾਤਿ ‘‘ਕਾਤਬ੍ਬ’’ਨ੍ਤਿ ਵੁਤ੍ਤਂ, ਚਾਲੇਤ੍ਵਾ ਸੁਤ੍ਤਂ ਪਰਿਮਜ੍ਜਿਤ੍ਵਾਤਿ ਪਰਿਤ੍ਤਂ ਕਰੋਨ੍ਤੇਨ ਕਾਤਬ੍ਬਵਿਧਿਂ ਦਸ੍ਸੇਤਿ. ਚਾਲੇਤ੍ਵਾ ਸੁਤ੍ਤਂ ਪਰਿਮਜ੍ਜਿਤ੍ਵਾਤਿ ਇਦਂ ਵਾ ‘‘ਪਰਿਤ੍ਤਾਣਂ ਏਤ੍ਥ ਪਵੇਸੇਮੀ’’ਤਿ ਚਿਤ੍ਤੇਨ ਏਵਂ ਕਤੇ ਪਰਿਤ੍ਤਾਣਾ ਏਤ੍ਥ ਪਵੇਸਿਤਾ ਨਾਮ ਹੋਤੀਤਿ ਵੁਤ੍ਤਂ. ਵਿਹਾਰਤੋ…ਪੇ… ਦੁਕ੍ਕਟਨ੍ਤਿ ਇਦਂ ਅਞ੍ਞਾਤਕੇ ਗਹਟ੍ਠੇ ਸਨ੍ਧਾਯ ਵੁਤ੍ਤਨ੍ਤਿ ਵਦਨ੍ਤਿ. ਪਾਦੇਸੁ ਉਦਕਂ ਆਕਿਰਿਤ੍ਵਾਤਿ ਇਦਂ ਤਸ੍ਮਿਂ ਦੇਸੇ ਚਾਰਿਤ੍ਤਵਸੇਨ ਵੁਤ੍ਤਂ. ਤਤ੍ਥ ਹਿ ਪਾਲ਼ਿਯਾ ਨਿਸਿਨ੍ਨਾਨਂ ਭਿਕ੍ਖੂਨਂ ਪਾਦੇਸੁ ਰੋਗਵੂਪਸਮਨਾਦਿਅਤ੍ਥਾਯ ਉਦਕਂ ਸਿਞ੍ਚਿਤ੍ਵਾ ਪਰਿਤ੍ਤਂ ਕਾਤੁਂ ਸੁਤ੍ਤਞ੍ਚ ਠਪੇਤ੍ਵਾ ‘‘ਪਰਿਤ੍ਤਂ ਭਣਥਾ’’ਤਿ ਵਤ੍ਵਾ ਗਚ੍ਛਨ੍ਤਿ. ਏਵਞ੍ਹਿ ਕਰਿਯਮਾਨੇ ਯਦਿ ਪਾਦੇ ਅਪਨੇਨ੍ਤਿ, ਮਨੁਸ੍ਸਾ ਤਂ ‘‘ਅਵਮਙ੍ਗਲ’’ਨ੍ਤਿ ਮਞ੍ਞਨ੍ਤਿ ‘‘ਰੋਗੋ ਨ ਵੂਪਸਮੇਸ੍ਸਤੀ’’ਤਿ. ਤੇਨਾਹ ‘‘ਨ ਪਾਦਾ ਅਪਨੇਤਬ੍ਬਾ’’ਤਿ.

ਮਤਸਰੀਰਦਸ੍ਸਨੇ ਵਿਯ ਕੇਵਲੇ ਸੁਸਾਨਦਸ੍ਸਨੇਪਿ ਇਦਂ ਜਾਤਾਨਂ ਸਤ੍ਤਾਨਂ ਵਯਗਮਨਟ੍ਠਾਨਨ੍ਤਿ ਮਰਣਸਞ੍ਞਾ ਉਪ੍ਪਜ੍ਜਤੀਤਿ ਆਹ ‘‘ਸੀਵਥਿਕਦਸ੍ਸਨੇ…ਪੇ… ਮਰਣਸ੍ਸਤਿਂ ਪਟਿਲਭਿਸ੍ਸਾਮਾਤਿ ਗਨ੍ਤੁਂ ਵਟ੍ਟਤੀ’’ਤਿ. ਲੇਸਕਪ੍ਪਂ ਅਕਤ੍ਵਾ ਸਮੁਪ੍ਪਨ੍ਨਸੁਦ੍ਧਚਿਤ੍ਤੇਨ ‘‘ਪਰਿਵਾਰਤ੍ਥਾਯ ਆਗਚ੍ਛਨ੍ਤੂ’’ਤਿ ਵੁਤ੍ਤੇਪਿ ਗਨ੍ਤੁਂ ਵਟ੍ਟਤੀਤਿ ਵਿਮਤਿਵਿਨੋਦਨਿਯਂ (ਵਿ. ਵਿ. ਟੀ. ੧.੧੮੫) ਵੁਤ੍ਤਂ. ਏਤੇਨ ਅਸੁਭਦਸ੍ਸਨਨ੍ਤਿ ਵਚਨਮਤ੍ਤੇਨ ਲੇਸਕਪ੍ਪਂ ਕਤ੍ਵਾ ਏਵਂ ਗਤੇ ਮਤਸ੍ਸ ਞਾਤਕਾ ਪਸੀਦਿਸ੍ਸਨ੍ਤਿ, ਦਾਨਂ ਦਸ੍ਸਨ੍ਤਿ, ਮਯਂ ਲਾਭਂ ਲਭਿਸ੍ਸਾਮ, ਉਪਟ੍ਠਾਕਂ ਲਭਿਸ੍ਸਾਮਾਤਿ ਅਸੁਦ੍ਧਚਿਤ੍ਤੇਨ ਗਨ੍ਤੁਂ ਨ ਵਟ੍ਟਤੀਤਿ ਦਸ੍ਸੇਤਿ. ਕਮ੍ਮਟ੍ਠਾਨਸੀਸੇਨ ਪਨ ‘‘ਮਰਣਸ੍ਸਤਿਂ ਲਭਿਸ੍ਸਾਮਾ’’ਤਿਆਦਿਨਾ ਸੁਦ੍ਧਚਿਤ੍ਤੇਨ ਪਕ੍ਕੋਸਿਤੇਪਿ ਅਪਕ੍ਕੋਸਿਤੇਪਿ ਗਨ੍ਤੁਂ ਵਟ੍ਟਤੀਤਿ ਦੀਪੇਤਿ. ਤਾਲਪਣ੍ਣਸ੍ਸ ਪਰਿਤ੍ਤਲੇਖਨਟ੍ਠਾਨਤ੍ਤਾ ਪਰਿਤ੍ਤਸੁਤ੍ਤਸ੍ਸ ਪਰਿਤ੍ਤਕਰਣਸਞ੍ਞਾਣਤ੍ਤਾ ਤਾਨਿ ਦਿਸ੍ਵਾ ਅਮਨੁਸ੍ਸਾ ਪਰਿਤ੍ਤਸਞ੍ਞਾਯ ਅਪਕ੍ਕਮਨ੍ਤੀਤਿ ਆਹ ‘‘ਤਾਲਪਣ੍ਣਂ ਪਨ ਪਰਿਤ੍ਤਸੁਤ੍ਤਂ ਵਾ ਹਤ੍ਥੇ ਵਾ ਪਾਦੇ ਵਾ ਬਨ੍ਧਿਤਬ੍ਬ’’ਨ੍ਤਿ.

ਏਤ੍ਥ ਚ ਆਦਿਤੋ ਪਟ੍ਠਾਯ ਯਾਵ ‘‘ਆਟਾਨਾਟਿਯਪਰਿਤ੍ਤਂ (ਦੀ. ਨਿ. ੩.੨੭੫ ਆਦਯੋ) ਵਾ ਭਣਿਤਬ੍ਬ’’ਨ੍ਤਿ ਏਤ੍ਤਕੋਯੇਵ ਵਿਨਯਟ੍ਠਕਥਾਭਤੋ ਪਾਲ਼ਿਮੁਤ੍ਤਪਰਿਤ੍ਤਕਰਣਵਿਨਿਚ੍ਛਯੋ, ਨ ਪਨ ਤਤੋ ਪਰਂ ਵੁਤ੍ਤੋ, ਤਸ੍ਮਾ ‘‘ਇਧ ਪਨਾ’’ਤਿਆਦਿਕੋ ਕਥਾਮਗ੍ਗੋ ਸਮਨ੍ਤਪਾਸਾਦਿਕਾਯਂ ਨਤ੍ਥਿ, ਤੀਸੁ ਟੀਕਾਸੁਪਿ ਤਂਸਂਵਣ੍ਣਨਾਨਯੋ ਨਤ੍ਥਿ, ਤਥਾਪਿ ਸੋ ਸੁਤ੍ਤਟ੍ਠਕਥਾਯਂ ਆਗਤੋਵਾਤਿ ਤਂ ਦਸ੍ਸੇਤੁਂ ‘‘ਇਧ ਪਨ ਆਟਾਨਾਟਿਯਸੁਤ੍ਤਸ੍ਸ ਪਰਿਕਮ੍ਮਂ ਵੇਦਿਤਬ੍ਬ’’ਨ੍ਤਿਆਦਿਮਾਹ. ਤਤ੍ਥ ਇਧਾਤਿ ‘‘ਆਟਾਨਾਟਿਯਪਰਿਤ੍ਤਂ ਵਾ ਭਣਿਤਬ੍ਬ’’ਨ੍ਤਿ ਵਚਨੇ. ਪਨਾਤਿ ਵਿਸੇਸਤ੍ਥੇ ਨਿਪਾਤੋ. ਦੀਘਨਿਕਾਯੇ ਪਾਥਿਕਵਗ੍ਗੇ ਆਗਤਸ੍ਸ ਆਟਾਨਾਟਿਯਪਰਿਤ੍ਤਸ੍ਸ ਪਰਿਕਮ੍ਮਂ ਏਵਂ ਵੇਦਿਤਬ੍ਬਨ੍ਤਿ ਯੋਜਨਾ. ਯਦਿ ਪਠਮਮੇਵ ਨ ਵਤ੍ਤਬ੍ਬਂ, ਅਥ ਕਿਂ ਕਾਤਬ੍ਬਨ੍ਤਿ ਆਹ ‘‘ਮੇਤ੍ਤਸੁਤ੍ਤ’’ਨ੍ਤਿਆਦਿ. ਏਵਞ੍ਹਿ ਲਦ੍ਧਾਸੇਵਨਂ ਹੁਤ੍ਵਾ ਅਤਿਓਜਵਨ੍ਤਂ ਹੋਤਿ.

ਪਿਟ੍ਠਂ ਵਾ ਮਂਸਂ ਵਾਤਿ ਵਾ-ਸਦ੍ਦੋ ਅਨਿਯਮਤ੍ਥੋ, ਤੇਨ ਮਚ੍ਛਖਣ੍ਡਪੂਵਖਜ੍ਜਕਾਦਯੋ ਸਙ੍ਗਣ੍ਹਾਤਿ. ਓਤਾਰਂ ਲਭਨ੍ਤੀਤਿ ਅਤ੍ਤਨਾ ਪਿਯਾਯਿਤਖਾਦਨੀਯਨਿਬਦ੍ਧਵਸਨਟ੍ਠਾਨਲਾਭਤਾਯ ਅਵਤਾਰਣਂ ਲਭਨ੍ਤਿ. ਹਰਿਤੂਪਲਿਤ੍ਤਨ੍ਤਿ ਅਲ੍ਲਗੋਮਯਲਿਤ੍ਤਂ. ਇਦਞ੍ਹਿ ਪੋਰਾਣਕਚਾਰਿਤ੍ਤਂ ਭੂਮਿਵਿਸੁਦ੍ਧਕਰਣਂ. ਪਰਿਸੁਦ੍ਧਂ…ਪੇ… ਨਿਸੀਦਿਤਬ੍ਬਨ੍ਤਿ ਇਮਿਨਾ ਪਰਿਤ੍ਤਕਾਰਕਸ੍ਸ ਭਿਕ੍ਖੁਨੋ ਮੇਤ੍ਤਾਕਰੁਣਾਵਸੇਨ ਚਿਤ੍ਤਵਿਸੁਦ੍ਧਿਪਿ ਇਚ੍ਛਿਤਬ੍ਬਾਤਿ ਦਸ੍ਸੇਤਿ. ਏਵਞ੍ਹਿ ਸਤਿ ਉਪਰਿ ਵਕ੍ਖਮਾਨਉਭਯਤੋ ਰਕ੍ਖਾਸਂਵਿਧਾਨੇਨ ਸਮੇਤਿ. ਟੀਕਾਯਂ (ਦੀ. ਨਿ. ਟੀ. ੩.੨੮੨) ਪਨ ‘‘ਸਰੀਰਸੁਦ੍ਧਿਪਿ ਇਚ੍ਛਿਤਬ੍ਬਾਤਿ ਦਸ੍ਸੇਤੀ’’ਤਿ ਵੁਤ੍ਤਂ. ਤਦੇਤਂ ਵਿਚਾਰੇਤਬ੍ਬਂ. ਨ ਹਿ ‘‘ਕਾਯਸੁਦ੍ਧਿਮਤ੍ਤੇਨ ਅਮਨੁਸ੍ਸਾਨਂ ਪਿਯੋ ਹੋਤੀ’’ਤਿ ਵੁਤ੍ਤਂ, ਮੇਤ੍ਤਾਵਸੇਨੇਵ ਪਨ ਵੁਤ੍ਤਂ. ਵੁਤ੍ਤਞ੍ਹੇਤਂ ਭਗਵਤਾ ‘‘ਮੇਤ੍ਤਾਯ, ਭਿਕ੍ਖਵੇ, ਚੇਤੋਵਿਮੁਤ੍ਤਿਯਾ…ਪੇ… ਏਕਾਦਸਾਨਿਸਂਸਾ ਪਾਟਿਕਙ੍ਖਾ. ਕਤਮੇ ਏਕਾਦਸ? ਸੁਖਂ ਸੁਪਤਿ, ਸੁਖਂ ਪਟਿਬੁਜ੍ਝਤਿ, ਨ ਪਾਪਕਂ ਸੁਪਿਨਂ ਪਸ੍ਸਤਿ, ਮਨੁਸ੍ਸਾਨਂ ਪਿਯੋ ਹੋਤਿ, ਅਮਨੁਸ੍ਸਾਨਂ ਪਿਯੋ ਹੋਤੀ’’ਤਿਆਦਿ (ਅ. ਨਿ. ੧੧.੧੫; ਪਰਿ. ੩੩੧; ਮਿ. ਪ. ੪.੪.੬).

ਪਰਿਤ੍ਤਕਾਰਕੋ…ਪੇ… ਸਮ੍ਪਰਿਵਾਰਿਤੇਨਾਤਿ ਇਦਂ ਪਰਿਤ੍ਤਕਰਣੋ ਬਾਹਿਰਤੋ ਆਰਕ੍ਖਾਸਂਵਿਧਾਨਂ, ‘‘ਮੇਤ੍ਤ…ਪੇ… ਵਤ੍ਤਬ੍ਬ’’ਨ੍ਤਿ ਅਬ੍ਭਨ੍ਤਰਤੋ ਆਰਕ੍ਖਾਸਂਵਿਧਾਨਂ, ਏਵਂ ਉਭਯਤੋ ਰਕ੍ਖਾਸਂਵਿਧਾਨਂ ਹੋਤਿ. ਏਵਞ੍ਹਿ ਅਮਨੁਸ੍ਸਾ ਪਰਿਤ੍ਤਕਾਰਕਸ੍ਸ ਅਨ੍ਤਰਾਯਂ ਕਾਤੁਂ ਨ ਵਿਸਹਨ੍ਤਿ. ਮਙ੍ਗਲਕਥਾ ਵਤ੍ਤਬ੍ਬਾਤਿ ਅਮਨੁਸ੍ਸਾਨਂ ਤੋਸਨਤ੍ਥਾਯ ਪਣ੍ਣਾਕਾਰਂ ਕਤ੍ਵਾ ਮਹਾਮਙ੍ਗਲਕਥਾ ਕਥੇਤਬ੍ਬਾ. ਏਵਂ ਉਪਰਿ ਵਕ੍ਖਮਾਨੇਨ ‘‘ਤੁਯ੍ਹਂ ਪਣ੍ਣਾਕਾਰਤ੍ਥਾਯ ਮਹਾਮਙ੍ਗਲਕਥਾ ਵੁਤ੍ਤਾ’’ਤਿ ਵਚਨੇਨ ਸਮੇਤਿ. ਟੀਕਾਯਂ ਪਨ ‘‘ਪੁਬ੍ਬੁਪਚਾਰਵਸੇਨ ਵਤ੍ਤਬ੍ਬਾ’’ਤਿ ਵੁਤ੍ਤਂ. ਸਬ੍ਬਸਨ੍ਨਿਪਾਤੋਤਿ ਤਸ੍ਮਿਂ ਵਿਹਾਰੇ ਤਸ੍ਮਿਂ ਗਾਮਕ੍ਖੇਤ੍ਤੇ ਸਬ੍ਬੇਸਂ ਭਿਕ੍ਖੂਨਂ ਸਨ੍ਨਿਪਾਤੋ ਘੋਸੇਤਬ੍ਬੋ ‘‘ਚੇਤਿਯਙ੍ਗਣੇ ਸਬ੍ਬੇਹਿ ਸਨ੍ਨਿਪਤਿਤਬ੍ਬ’’ਨ੍ਤਿ. ਅਨਾਗਨ੍ਤੁਂਨਾਮ ਨ ਲਭਤੀਤਿ ਅਮਨੁਸ੍ਸੋ ਬੁਦ੍ਧਾਣਾਭਯੇਨ ਰਾਜਾਣਾਭਯੇਨ ਅਨਾਗਨ੍ਤੁਂ ਨ ਲਭਤਿ ਚਤੁਨ੍ਨਂ ਮਹਾਰਾਜੂਨਂ ਆਣਾਟ੍ਠਾਨਿਯਤ੍ਤਾ. ਗਹਿਤਕਾਪਦੇਸੇਨ ਅਮਨੁਸ੍ਸੋਵ ਪੁਚ੍ਛਿਤੋ ਹੋਤੀਤਿ ‘‘ਅਮਨੁਸ੍ਸਗਹਿਤਕੋ ‘ਤ੍ਵਂ ਕੋ ਨਾਮੋ’ਤਿ ਪੁਚ੍ਛਿਤਬ੍ਬੋ’’ਤਿ ਵੁਤ੍ਤਂ. ਮਾਲਾਗਨ੍ਧਾਦੀਸੂਤਿ ਮਾਲਾਗਨ੍ਧਾਦਿਪੂਜਾਸੁ. ਆਸਨਪੂਜਾਯਾਤਿ ਚੇਤਿਯੇ ਬੁਦ੍ਧਾਸਨਪੂਜਾਯ. ਪਿਣ੍ਡਪਾਤੇਤਿ ਭਿਕ੍ਖੁਸਙ੍ਘਸ੍ਸ ਪਿਣ੍ਡਪਾਤਦਾਨੇ. ਏਵਂ ਵਤ੍ਥੁਪ੍ਪਦੇਸੇਨ ਚੇਤਨਾ ਵੁਤ੍ਤਾ, ਤਸ੍ਮਾ ਪਤ੍ਤਿਦਾਨਂ ਸਮ੍ਭਵਤਿ.

ਦੇਵਤਾਨਨ੍ਤਿ ਯਕ੍ਖਸੇਨਾਪਤੀਨਂ. ਵੁਤ੍ਤਞ੍ਹਿ ਆਟਾਨਾਟਿਯਸੁਤ੍ਤੇ (ਦੀ. ਨਿ. ੩.੨੮੩, ੨੯੩) ‘‘ਇਮੇਸਂ ਯਕ੍ਖਾਨਂ ਮਹਾਯਕ੍ਖਾਨਂ ਸੇਨਾਪਤੀਨਂ ਮਹਾਸੇਨਾਪਤੀਨਂ ਉਜ੍ਝਾਪੇਤਬ੍ਬ’’ਨ੍ਤਿਆਦਿ. ਆਟਾਤਿ ਦਬ੍ਬਿਮੁਖਸਕੁਣਾ. ਤੇ ਆਟਾ ਨਦਨ੍ਤਿ ਏਤ੍ਥਾਤਿ ਆਟਾਨਾਦਂ, ਦੇਵਨਗਰਂ, ਆਟਾਨਾਦੇ ਕਤਂ ਆਟਾਨਾਦਿਯਂ, ਸੁਤ੍ਤਂ. ਟੀਕਾਯਂ (ਦੀ. ਨਿ. ਟੀ. ੩.੨੮੨) ‘‘ਪਰਿਤ੍ਤਂ ਭਣਿਤਬ੍ਬਨ੍ਤਿ ਏਤ੍ਥਾਪਿ ‘ਮੇਤ੍ਤਚਿਤ੍ਤਂ ਪੁਰੇਚਾਰਿਕਂ ਕਤ੍ਵਾ’ਤਿ ਚ ‘ਮਙ੍ਗਲਕਥਾ ਵਤ੍ਤਬ੍ਬਾ’ਤਿ ਚ ‘ਵਿਹਾਰਸ੍ਸ ਉਪਵਨੇ’ਤਿ ਚ ਏਵਮਾਦਿ ਸਬ੍ਬਂ ਗਿਹੀਨਂ ਪਰਿਤ੍ਤਕਰਣੇ ਵੁਤ੍ਤਂ ਪਰਿਕਮ੍ਮਂ ਕਾਤਬ੍ਬਮੇਵਾ’’ਤਿ ਵੁਤ੍ਤਂ, ਏਵਂ ਸਤਿ ਅਟ੍ਠਕਥਾਯਂ (ਦੀ. ਨਿ. ਅਟ੍ਠ. ੩.੨੮੨) ‘‘ਏਤਂ ਤਾਵ ਗਿਹੀਨਂ ਪਰਿਕਮ੍ਮ’’ਨ੍ਤਿ ਵਤ੍ਵਾ ‘‘ਸਚੇ ਪਨ ਭਿਕ੍ਖੂ’’ਤਿਆਦਿਨਾ ਵਿਸੇਸਤ੍ਥਜੋਤਕੇਨ ਪਨ-ਸਦ੍ਦੇਨ ਸਹ ਵੁਚ੍ਚਮਾਨਂ ‘‘ਇਦਂ ਭਿਕ੍ਖੂਨਂ ਪਰਿਕਮ੍ਮ’’ਨ੍ਤਿ ਵਚਨਂ ਨਿਰਤ੍ਥਕਂ ਵਿਯ ਹੋਤਿ. ਅਵਿਸੇਸੇ ਹਿ ਸਤਿ ਭੇਦੋ ਕਾਤਬ੍ਬੋ ਨ ਸਿਯਾ. ਭਿਕ੍ਖੂਨਞ੍ਚ ਯਥਾਵੁਤ੍ਤਾਵ ਬਾਹਿਰਾਰਕ੍ਖਾ ਦੁਕ੍ਕਰਾ ਹੋਤਿ, ਤਸ੍ਮਾ ਗਿਹੀਨਂ ਪਰਿਤ੍ਤਕਰਣੇ ਵੁਤ੍ਤਪਰਿਕਮ੍ਮੇ ਅਸਮ੍ਪਜ੍ਜਮਾਨੇਪਿ ਅਟ੍ਠਕਥਾਯਂ ਵੁਤ੍ਤਨਯੇਨੇਵ ਕਾਤੁਂ ਵਟ੍ਟਤੀਤਿ ਨੋ ਮਤਿ.

ਇਦਂ ਪਨ ਇਧ ਆਗਤਂ ਆਟਾਨਾਟਿਯਸੁਤ੍ਤਪਰਿਕਮ੍ਮਂ ਸੁਤ੍ਵਾ ‘‘ਇਦਂ ਸੁਤ੍ਤਂ ਅਮਨੁਸ੍ਸਾਨਂ ਅਮਨਾਪਂ, ਸਜ੍ਝਾਯਨ੍ਤਸ੍ਸ ਪਰਿਤ੍ਤਂ ਕਰੋਨ੍ਤਸ੍ਸ ਅਮਨੁਸ੍ਸਾ ਅਨ੍ਤਰਾਯਂ ਕਰੇਯ੍ਯੁ’’ਨ੍ਤਿ ਮਞ੍ਞਮਾਨਾ ਪੋਰਾਣਾ ਚਤੂਹਿ ਮਹਾਰਾਜੇਹਿ ਆਰੋਚਿਤਂ ਸਬ੍ਬਞ੍ਞੁਬੁਦ੍ਧੇਨ ਦੇਸਿਤਂ ਮੂਲਭੂਤਂ ਦੀਘਨਿਕਾਯੇ ਆਗਤਂ ਆਟਾਨਾਟਿਯਸੁਤ੍ਤਂ (ਦੀ. ਨਿ. ੩.੨੭੫ ਆਦਯੋ) ਪਹਾਯ ਮੂਲਸੁਤ੍ਤਤੋ ਗਾਥਾਛਕ੍ਕਮੇਵ ਗਹੇਤ੍ਵਾ ਅਵਸੇਸਂ ਸਬ੍ਬਂ ਸੁਤ੍ਤਂ ਠਪੇਤ੍ਵਾ ਅਞ੍ਞਗਾਥਾਯੋ ਪਕ੍ਖਿਪਿਤ੍ਵਾ ‘‘ਆਟਾਨਾਟਿਯਪਰਿਤ੍ਤ’’ਨ੍ਤਿ ਠਪੇਸੁਂ, ਤਮ੍ਪਿ ਪਰਿਤ੍ਤਂ ਅਮੂਲਭੂਤਤ੍ਤਾ ਏਕੇਨਾਕਾਰੇਨ ਧਾਰੇਤੁਂ ਅਸਕ੍ਕੋਨ੍ਤਾ ਕੇਚਿ ਸਂਖਿਤ੍ਤੇਨ ਧਾਰੇਨ੍ਤਿ, ਕੇਚਿ ਵਿਤ੍ਥਾਰੇਨ, ਕੇਚਿ ਏਕਚ੍ਚਾ ਗਾਥਾਯੋ ਪਕ੍ਖਿਪਨ੍ਤਿ, ਕੇਚਿ ਨਿਕ੍ਖਿਪਨ੍ਤਿ, ਕੇਚਿ ਭਿਕ੍ਖੂ ਤਂਮਿਸ੍ਸਕਪਰਿਤ੍ਤਮ੍ਪਿ ਮਙ੍ਗਲਕਰਣਕਾਲਾਦੀਸੁ ਵਤ੍ਤੁਮਵਿਸਹਨ੍ਤਾ ਤਂ ਠਪੇਤ੍ਵਾ ਅਞ੍ਞਸੁਤ੍ਤਾਨਿਯੇਵ ਭਣਨ੍ਤਿ, ਸਬ੍ਬਮੇਤਂ ਅਯੁਤ੍ਤਂ ਵਿਯ ਦਿਸ੍ਸਤਿ. ਕਸ੍ਮਾ? ਚਤ੍ਤਾਰੋਪਿ ਮਹਾਰਾਜਾਨੋ ਇਮਂ ਆਟਾਨਾਟਿਯਂ ਰਕ੍ਖਂ ਸਂਵਿਦਹਮਾਨਾ ਬੁਦ੍ਧਸਾਸਨੇ ਅਮਨੁਸ੍ਸਾਨਂ ਪਸਾਦਾਯ, ਚਤਸ੍ਸਨ੍ਨਂ ਪਰਿਸਾਨਂ ਅਵਿਹੇਠਨਾਯ ਏਵ ਸਂਵਿਦਹਿਂਸੁ, ਨ ਅਞ੍ਞੇਨ ਕਾਰਣੇਨ. ਵੁਤ੍ਤਞ੍ਹਿ ਤਤ੍ਥ ‘‘ਤਤ੍ਥ ਸਨ੍ਤਿ ਉਲ਼ਾਰਾ ਯਕ੍ਖਾਨਿਵਾਸਿਨੋ, ਯੇ ਇਮਸ੍ਮਿਂ ਭਗਵਤੋ ਪਾਵਚਨੇ ਅਪ੍ਪਸਨ੍ਨਾ, ਤੇਸਂ ਪਸਾਦਾਯ ਉਗ੍ਗਣ੍ਹਾਤੁ ਭਨ੍ਤੇ ਭਗਵਾ ਆਟਾਨਾਟਿਯਂ ਰਕ੍ਖਂ ਭਿਕ੍ਖੂਨਂ ਭਿਕ੍ਖੁਨੀਨਂ ਉਪਾਸਕਾਨਂ ਉਪਾਸਿਕਾਨਂ ਗੁਤ੍ਤਿਯਾ ਰਕ੍ਖਾਯ ਅਵਿਹਿਂਸਾਯ ਫਾਸੁਵਿਹਾਰਾਯਾ’’ਤਿ (ਦੀ. ਨਿ. ੩.੨੭੬).

ਸਮ੍ਮਾਸਮ੍ਬੁਦ੍ਧੇਨਪਿ ਇਮਸ੍ਸ ਸੁਤ੍ਤਸ੍ਸ ਨਿਗਮਨੇ ‘‘ਉਗ੍ਗਣ੍ਹਾਥ ਭਿਕ੍ਖਵੇ ਆਟਾਨਾਟਿਯਂ ਰਕ੍ਖਂ, ਪਰਿਯਾਪੁਣਾਥ ਭਿਕ੍ਖਵੇ ਆਟਾਨਾਟਿਯਂ ਰਕ੍ਖਂ, ਧਾਰੇਥ ਭਿਕ੍ਖਵੇ ਆਟਾਨਾਟਿਯਂ ਰਕ੍ਖਂ, ਅਤ੍ਥਸਂਹਿਤਾ ਭਿਕ੍ਖਵੇ ਆਟਾਨਾਟਿਯਾ ਰਕ੍ਖਾ ਭਿਕ੍ਖੂਨਂ ਭਿਕ੍ਖੁਨੀਨਂ ਉਪਾਸਕਾਨਂ ਉਪਾਸਿਕਾਨਂ ਗੁਤ੍ਤਿਯਾ ਰਕ੍ਖਾਯ ਅਵਿਹਿਂਸਾਯ ਫਾਸੁਵਿਹਾਰਾਯਾ’’ਤਿ (ਦੀ. ਨਿ. ੩.੨੯੫) ਭਿਕ੍ਖੂਨਂ ਧਾਰਣਂ ਉਯ੍ਯੋਜਿਤਂ ਆਨਿਸਂਸਞ੍ਚ ਪਕਾਸਿਤਂ. ਅਟ੍ਠਕਥਾਚਰਿਯੇਹਿ ਚ ‘‘ਬੁਦ੍ਧਭਾਸਿਤੇ ਏਕਕ੍ਖਰਮ੍ਪਿ ਏਕਪਦਮ੍ਪਿ ਅਪਨੇਤਬ੍ਬਂ ਨਾਮ ਨਤ੍ਥੀ’’ਤਿ ਵੁਤ੍ਤਂ, ਤਸ੍ਮਾ ਚਤੂਹਿ ਮਹਾਰਾਜੇਹਿ ਸਂਵਿਦਹਿਤਂ ਸਮ੍ਮਾਸਮ੍ਬੁਦ੍ਧੇਨ ਆਹਚ੍ਚਭਾਸਿਤਂ ਤਿਸ੍ਸੋ ਸਙ੍ਗੀਤਿਯੋ ਆਰੁਲ਼੍ਹਂ ਪਕਤਿਆਟਾਨਾਟਿਯਸੁਤ੍ਤਮੇਵ ਧਾਰੇਤੁਂ ਸਜ੍ਝਾਯਿਤੁਞ੍ਚ ਯੁਤ੍ਤਂ, ਨ ਭਗਵਤਾ ਅਭਾਸਿਤਂ ਤਿਸ੍ਸੋ ਸਙ੍ਗੀਤਿਯੋ ਅਨਾਰੁਲ਼੍ਹਂ ਮਿਸ੍ਸਕਸੁਤ੍ਤਨ੍ਤਿ. ਦੀਘਨਿਕਾਯਟ੍ਠਕਥਾਯਂ (ਦੀ. ਨਿ. ਅਟ੍ਠ. ੩.੨੮੨) ਆਗਤਂ ਇਦਂ ਆਟਾਨਾਟਿਯਪਰਿਤ੍ਤਪਰਿਕਮ੍ਮਂ ਪਨ ਪਕਤਿਸਜ੍ਝਾਯਨਵਾਚਨਾਦਿਂ ਸਨ੍ਧਾਯ ਅਟ੍ਠਕਥਾਚਰਿਯੇਹਿ ਨ ਵੁਤ੍ਤਂ, ਅਥ ਖੋ ਗਹਟ੍ਠਂ ਵਾ ਪਬ੍ਬਜਿਤਂ ਵਾ ਅਮਨੁਸ੍ਸੇਹਿ ਗਹਿਤਕਾਲੇ ਮੋਚਾਪਨਤ੍ਥਾਯ ਲੋਕਿਯੇਹਿ ਮਨ੍ਤਂ ਵਿਯ ਭਣਨਂ ਸਨ੍ਧਾਯ ਵੁਤ੍ਤਂ. ਵੁਤ੍ਤਞ੍ਹਿ ਤਤ੍ਥ ‘‘ਅਮਨੁਸ੍ਸਗਹਿਤਕੋ ਤ੍ਵਂ ਕੋ ਨਾਮੋਸੀਤਿ ਪੁਚ੍ਛਿਤਬ੍ਬੋ’’ਤਿਆਦਿ (ਦੀ. ਨਿ. ਅਟ੍ਠ. ੩.੨੮੨).

ਆਟਾਨਾਟਿਯਾ ਰਕ੍ਖਾ ਚ ਨਾਮ ਨ ਸਕਲਸੁਤ੍ਤਂ, ਅਥ ਖੋ ‘‘ਵਿਪਸ੍ਸਿਸ੍ਸ ਚ ਨਮਤ੍ਥੂ’’ਤਿ ਪਦਂ ਆਦਿਂ ਕਤ੍ਵਾ ਚਤੁਨ੍ਨਂ ਮਹਾਰਾਜੂਨਂ ਵਸੇਨ ਚਤੁਕ੍ਖਤ੍ਤੁਂ ਆਗਤਂ ‘‘ਜਿਨਂ ਵਨ੍ਦਾਮ ਗੋਤਮ’’ਨ੍ਤਿ ਪਦਂ ਪਰਿਯੋਸਾਨਂ ਕਤ੍ਵਾ ਵੁਤ੍ਤਸੁਤ੍ਤੇਕਦੇਸੋਯੇਵ. ਕਥਂ ਵਿਞ੍ਞਾਯਤੀਤਿ ਚੇ? ‘‘ਅਥ ਖੋ ਵੇਸ੍ਸਵਣੋ ਮਹਾਰਾਜਾ ਭਗਵਤੋ ਅਧਿਵਾਸਨਂ ਵਿਦਿਤ੍ਵਾ ਇਮਂ ਆਟਾਨਾਟਿਯਂ ਰਕ੍ਖਂ ਅਭਾਸੀ’’ਤਿ ਆਰਭਿਤ੍ਵਾ ਯਥਾਵੁਤ੍ਤਸੁਤ੍ਤੇਕਦੇਸਸ੍ਸ ਅਵਸਾਨੇ ‘‘ਅਯਂ ਖੋ ਮਾਰਿਸਾ ਆਟਾਨਾਟਿਯਾ ਰਕ੍ਖਾ’’ਤਿ ਨਿਯ੍ਯਾਤਿਤਤ੍ਤਾ. ਤਸ੍ਮਾ ਯਥਾ ਨਾਮ ਬ੍ਯਗ੍ਘਾਦਯੋ ਅਤ੍ਤਨੋ ਭਕ੍ਖਂ ਵਿਲੁਮ੍ਪਨ੍ਤਾਨਂ ਬਲਵਦੁਟ੍ਠਚਿਤ੍ਤਾ ਭਵਨ੍ਤਿ, ਏਵਂ ਅਤ੍ਤਨਾ ਗਹਿਤਮਨੁਸ੍ਸਂ ਮੋਚਾਪੇਨ੍ਤਾਨਂ ਅਮਨੁਸ੍ਸਾ ਪਦੁਟ੍ਠਚਿਤ੍ਤਾ ਹੋਨ੍ਤਿ. ਇਤਿ ਤਥਾ ਮੋਚਾਪੇਤੁਂ ਆਰਦ੍ਧਕਾਲੇ ਭਿਕ੍ਖੂਨਂ ਪਰਿਸ੍ਸਯਵਿਨੋਦਨਤ੍ਥਂ ਇਮਂ ਆਟਾਨਾਟਿਯਪਰਿਤ੍ਤਪਰਿਕਮ੍ਮਂ ਅਟ੍ਠਕਥਾਚਰਿਯੇਹਿ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਅਯਂ ਪਰਿਤ੍ਤਕਰਣਵਿਨਿਚ੍ਛਯਕਥਾਲਙ੍ਕਾਰੋ.

੨੦. ਅਨਾਮਟ੍ਠਪਿਣ੍ਡਪਾਤੋਤਿ (ਵਿ. ਵਿ. ਟੀ. ੧.੧੮੫) ਏਤ੍ਥ ਅਮਸਿਯਿਤ੍ਥਾਤਿ ਆਮਟ੍ਠੋ, ਨ ਆਮਟ੍ਠੋ ਅਨਾਮਟ੍ਠੋ. ਪਿਣ੍ਡਂ ਪਿਣ੍ਡਂ ਹੁਤ੍ਵਾ ਪਤਤੀਤਿ ਪਿਣ੍ਡਪਾਤੋ. ਅਨਾਮਟ੍ਠੋ ਚ ਸੋ ਪਿਣ੍ਡਪਾਤੋ ਚਾਤਿ ਤਥਾ, ਅਗ੍ਗਹਿਤਅਗ੍ਗੋ, ਅਪਰਿਭੁਤ੍ਤੋ ਪਿਣ੍ਡਪਾਤੋਤਿ ਅਤ੍ਥੋ. ਸਚੇਪਿ ਕਹਾਪਣਗ੍ਘਨਕੋ ਹੋਤੀਤਿ ਇਮਿਨਾ ਦਾਯਕੇਹਿ ਬਹੁਬ੍ਯਞ੍ਜਨੇਨ ਸਮ੍ਪਾਦੇਤ੍ਵਾ ਸਕ੍ਕਚ੍ਚਂ ਦਿਨ੍ਨਭਾਵਂ ਦੀਪੇਤਿ. ਤੇਨ ਵੁਤ੍ਤਂ ‘‘ਸਦ੍ਧਾਦੇਯ੍ਯਵਿਨਿਪਾਤਨਂ ਨਤ੍ਥੀ’’ਤਿ, ਏਵਂ ਸਕ੍ਕਚ੍ਚਂ ਸਦ੍ਧਾਯ ਦਿਨ੍ਨਂ ਮਹਗ੍ਘਭੋਜਨਮ੍ਪਿ ਮਾਤਾਪਿਤੂਨਂ ਦਤ੍ਵਾ ਸਦ੍ਧਾਦੇਯ੍ਯਵਿਨਿਪਾਤਨਂ ਨਾਮ ਨ ਹੋਤਿ, ਪਗੇਵ ਅਪ੍ਪਗ੍ਘਭੋਜਨੇਤਿ ਅਧਿਪ੍ਪਾਯੋ. ਮਾਤਾਦਿਪਞ੍ਚਕਂਯੇਵ ਵਤ੍ਵਾ ਭੇਸਜ੍ਜਕਰਣੇ ਵਿਯ ਅਪਰੇਸਮ੍ਪਿ ਦਸਨ੍ਨਂ ਦਾਤੁਂ ਵਟ੍ਟਤੀਤਿ ਅਵੁਤ੍ਤਤ੍ਤਾ ਅਞ੍ਞੇਸਂ ਞਾਤਕਾਨਮ੍ਪਿ ਪੇਸੇਤ੍ਵਾ ਦਾਤੁਂ ਨ ਵਟ੍ਟਤੀਤਿ ਸਿਦ੍ਧਂ, ‘‘ਵਿਹਾਰਂ ਸਮ੍ਪਤ੍ਤਸ੍ਸ ਪਨ ਯਸ੍ਸ ਕਸ੍ਸਚਿ ਆਗਨ੍ਤੁਕਸ੍ਸ ਵਾ’’ਇਚ੍ਚਾਦਿਵਕ੍ਖਮਾਨਤ੍ਤਾ ਵਿਹਾਰਂ ਸਮ੍ਪਤ੍ਤਾਨਂ ਞਾਤਕਾਨਮ੍ਪਿ ਆਗਨ੍ਤੁਕਸਾਮਞ੍ਞੇਨ ਦਾਤੁਂ ਵਟ੍ਟਤੀਤਿ ਚ. ਥਾਲਕੇਤਿ ਸਙ੍ਘਿਕੇ ਕਂਸਾਦਿਮਯੇ ਥਾਲਕੇ. ਪਤ੍ਤੋਪਿ ਏਤ੍ਥ ਸਙ੍ਗਯ੍ਹਤਿ. ਨ ਵਟ੍ਟਤੀਤਿ ਇਮਿਨਾ ਦੁਕ੍ਕਟਨ੍ਤਿ ਦਸ੍ਸੇਤਿ. ਦਾਮਰਿਕਚੋਰਸ੍ਸਾਤਿ ਰਜ੍ਜਂ ਪਤ੍ਥੇਨ੍ਤਸ੍ਸ ਪਾਕਟਚੋਰਸ੍ਸ. ਅਦੀਯਮਾਨੇਪਿ ‘‘ਨ ਦੇਨ੍ਤੀ’’ਤਿ ਕੁਜ੍ਝਨ੍ਤੀਤਿ ਸਮ੍ਬਨ੍ਧੋ.

ਆਮਿਸਸ੍ਸ ਧਮ੍ਮਸ੍ਸ ਚ ਅਲਾਭੇਨ ਅਤ੍ਤਨੋ ਪਰਸ੍ਸ ਚ ਅਨ੍ਤਰੇ ਸਮ੍ਭਵਨ੍ਤਸ੍ਸ ਛਿਦ੍ਦਸ੍ਸ ਵਿਵਰਸ੍ਸ ਪਟਿਸਨ੍ਥਰਣਂ ਪਿਦਹਨਂ ਪਟਿਸਨ੍ਥਾਰੋ. ਸੋ ਪਨ ਧਮ੍ਮਾਮਿਸਵਸੇਨ ਦੁਵਿਧੋ. ਤਤ੍ਥ ਆਮਿਸਪਟਿਸਨ੍ਥਾਰਂ ਸਨ੍ਧਾਯ ‘‘ਕਸ੍ਸ ਕਾਤਬ੍ਬੋ, ਕਸ੍ਸ ਨ ਕਾਤਬ੍ਬੋ’’ਤਿ ਵੁਤ੍ਤਂ. ਆਗਨ੍ਤੁਕਸ੍ਸ ਵਾ…ਪੇ… ਕਾਤਬ੍ਬੋਯੇਵਾਤਿ ਵੁਤ੍ਤਮਤ੍ਥਂ ਪਾਕਟਂ ਕਾਤੁਂ ‘‘ਆਗਨ੍ਤੁਕਂ ਤਾਵਾ’’ਤਿਆਦਿਮਾਹ. ਖੀਣਪਰਿਬ੍ਬਯਨ੍ਤਿ ਇਮਿਨਾ ਅਗਤਿਭਾਵਂ ਕਰੁਣਾਟ੍ਠਾਨਤਞ੍ਚ ਦਸ੍ਸੇਤਿ. ਤੇਨ ਚ ਤਬ੍ਬਿਧੁਰਾਨਂ ਸਮਿਦ੍ਧਾਨਂ ਆਗਨ੍ਤੁਕਤ੍ਤੇਪਿ ਦਾਤੁਂ ਨ ਵਟ੍ਟਤੀਤਿ ਸਿਦ੍ਧਂ ਹੋਤਿ. ‘‘ਅਪਚ੍ਚਾਸੀਸਨ੍ਤੇਨਾ’’ਤਿ ਵਤ੍ਵਾ ਪਚ੍ਚਾਸੀਸਨਪ੍ਪਕਾਰਂ ਦਸ੍ਸੇਤੁਂ ‘‘ਮਨੁਸ੍ਸਾ ਨਾਮਾ’’ਤਿਆਦਿ ਵੁਤ੍ਤਂ. ਅਨਨੁਞ੍ਞਾਤਾਨਂ ਪਨ ਅਪਚ੍ਚਾਸੀਸਨ੍ਤੇਨਪਿ ਦਾਤੁਂ ਨ ਵਟ੍ਟਤਿ ਸਦ੍ਧਾਦੇਯ੍ਯਵਿਨਿਪਾਤਤ੍ਤਾ, ਪਚ੍ਚਾਸਾਯ ਪਨ ਸਤਿ ਕੁਲਦੂਸਨਮ੍ਪਿ ਹੋਤਿ. ਉਬ੍ਬਾਸੇਤ੍ਵਾਤਿ ਸਮਨ੍ਤਤੋ ਤਿਯੋਜਨਂ ਵਿਲੁਮ੍ਪਨ੍ਤੇ ਮਨੁਸ੍ਸੇ ਪਲਾਪੇਤ੍ਵਾ. ਵਰਪੋਤ੍ਥਕਚਿਤ੍ਤਤ੍ਥਰਣਨ੍ਤਿ ਅਨੇਕਪ੍ਪਕਾਰਂ ਇਤ੍ਥਿਪੁਰਿਸਾਦਿਉਤ੍ਤਮਰੂਪਵਿਚਿਤ੍ਤਂ ਅਤ੍ਥਰਣਂ. ਅਯਂ ਪਟਿਸਨ੍ਥਾਰਵਿਨਿਚ੍ਛਯਕਥਾਲਙ੍ਕਾਰੋ.

ਇਤਿ ਵਿਨਯਸਙ੍ਗਹਸਂਵਣ੍ਣਨਾਭੂਤੇ ਵਿਨਯਾਲਙ੍ਕਾਰੇ

ਭੇਸਜ੍ਜਾਦਿਵਿਨਿਚ੍ਛਯਕਥਾਲਙ੍ਕਾਰੋ ਨਾਮ

ਤਤਿਯੋ ਪਰਿਚ੍ਛੇਦੋ.