੪. ਵਿਞ੍ਞਤ੍ਤਿਵਿਨਿਚ੍ਛਯਕਥਾ

੨੧. ਏਵਂ ਭੇਸਜ੍ਜਾਦਿਵਿਨਿਚ੍ਛਯਂ ਕਥੇਤ੍ਵਾ ਇਦਾਨਿ ਵਿਞ੍ਞਤ੍ਤਿਵਿਨਿਚ੍ਛਯਂ ਕਥੇਤੁਂ ‘‘ਵਿਞ੍ਞਤ੍ਤੀਤਿ ਯਾਚਨਾ’’ਤਿਆਦਿਮਾਹ. ਤਤ੍ਥ ਵਿਞ੍ਞਾਪਨਾ ਵਿਞ੍ਞਤ੍ਤਿ, ‘‘ਇਮਿਨਾ ਨੋ ਅਤ੍ਥੋ’’ਤਿ ਵਿਞ੍ਞਾਪਨਾ, ਯਾਚਨਾਤਿ ਵੁਤ੍ਤਂ ਹੋਤਿ. ਤੇਨਾਹ ‘‘ਵਿਞ੍ਞਤ੍ਤੀਤਿ ਯਾਚਨਾ’’ਤਿ. ਤਤ੍ਰ ਵਿਞ੍ਞਤ੍ਤਿਯਂ ਅਯਂ ਮਯਾ ਵਕ੍ਖਮਾਨੋ ਵਿਨਿਚ੍ਛਯੋ ਵੇਦਿਤਬ੍ਬੋਤਿ ਯੋਜਨਾ. ਮੂਲਚ੍ਛੇਜ੍ਜਾਯਾਤਿ (ਵਿ. ਵਿ. ਟੀ. ੧.੩੪੨) ਪਰਸਨ੍ਤਕਭਾਵਤੋ ਮੋਚੇਤ੍ਵਾ ਅਤ੍ਤਨੋ ਏਵ ਸਨ੍ਤਕਕਰਣਵਸੇਨ. ਏਵਂ ਯਾਚਤੋ ਅਞ੍ਞਾਤਕਵਿਞ੍ਞਤ੍ਤਿਦੁਕ੍ਕਟਞ੍ਚੇਵ ਦਾਸਪਟਿਗ੍ਗਹਦੁਕ੍ਕਟਞ੍ਚ ਹੋਤਿ ‘‘ਦਾਸਿਦਾਸਪਟਿਗ੍ਗਹਣਾ ਪਟਿਵਿਰਤੋ (ਦੀ. ਨਿ. ੧.੧੦, ੧੯੪) ਹੋਤੀ’’ਤਿ ਵਚਨਂ ਨਿਸ੍ਸਾਯ ਅਟ੍ਠਕਥਾਯਂ ਪਟਿਕ੍ਖਿਤ੍ਤਤ੍ਤਾ. ਞਾਤਕਪਵਾਰਿਤਟ੍ਠਾਨਤੋ ਪਨ ਦਾਸਂ ਮੂਲਚ੍ਛੇਜ੍ਜਾਯ ਯਾਚਨ੍ਤਸ੍ਸ ਸਾਦਿਯਨਵਸੇਨੇਵ ਦੁਕ੍ਕਟਂ. ਸਕਕਮ੍ਮਨ੍ਤਿ ਪਾਣਵਧਕਮ੍ਮਂ. ਇਦਞ੍ਚ ਪਾਣਾਤਿਪਾਤਦੋਸਪਰਿਹਾਰਾਯ ਵੁਤ੍ਤਂ, ਨ ਵਿਞ੍ਞਤ੍ਤਿਪਰਿਹਾਰਾਯ. ਅਨਿਯਮੇਤ੍ਵਾਪਿ ਨ ਯਾਚਿਤਬ੍ਬਾਤਿ ਸਾਮੀਚਿਦਸ੍ਸਨਤ੍ਥਂ ਵੁਤ੍ਤਂ, ਸੁਦ੍ਧਚਿਤ੍ਤੇਨ ਪਨ ਹਤ੍ਥਕਮ੍ਮਂ ਯਾਚਨ੍ਤਸ੍ਸ ਆਪਤ੍ਤਿ ਨਾਮ ਨਤ੍ਥਿ. ਯਦਿਚ੍ਛਕਂ ਕਾਰਾਪੇਤੁਂ ਵਟ੍ਟਤੀਤਿ ‘‘ਹਤ੍ਥਕਮ੍ਮਂ ਯਾਚਾਮਿ, ਦੇਥਾ’’ਤਿਆਦਿਨਾ ਅਯਾਚਿਤ੍ਵਾਪਿ ਵਟ੍ਟਤਿ, ਸਕਿਚ੍ਚਪਸੁਤਮ੍ਪਿ ਏਵਂ ਕਾਰਾਪੇਨ੍ਤਸ੍ਸ ਵਿਞ੍ਞਤ੍ਤਿ ਨਤ੍ਥਿ ਏਵ, ਸਾਮੀਚਿਦਸ੍ਸਨਤ੍ਥਂ ਪਨ ਵਿਭਜਿਤ੍ਵਾ ਵੁਤ੍ਤਂ.

ਸਬ੍ਬਕਪ੍ਪਿਯਭਾਵਦੀਪਨਤ੍ਥਨ੍ਤਿ ਸਬ੍ਬਸੋ ਕਪ੍ਪਿਯਭਾਵਦਸ੍ਸਨਤ੍ਥਂ. ਮੂਲਂ ਦੇਥਾਤਿ ਵਤ੍ਤੁਂ ਵਟ੍ਟਤੀਤਿ ‘‘ਮੂਲਂ ਦਸ੍ਸਾਮਾ’’ਤਿ ਪਠਮਂ ਵੁਤ੍ਤਤ੍ਤਾ ਵਿਞ੍ਞਤ੍ਤਿ ਵਾ ‘‘ਮੂਲ’’ਨ੍ਤਿ ਵਚਨਸ੍ਸ ਕਪ੍ਪਿਯਾਕਪ੍ਪਿਯਵਤ੍ਥੁਸਾਮਞ੍ਞਵਚਨਤ੍ਤਾ ਅਕਪ੍ਪਿਯਵਚਨਂ ਵਾ ਨਿਟ੍ਠਿਤਭਤਿਕਿਚ੍ਚਾਨਂ ਦਾਪਨਤੋ ਅਕਪ੍ਪਿਯਵਤ੍ਥੁਸਾਦਿਯਨਂ ਵਾ ਨ ਹੋਤੀਤਿ ਕਤ੍ਵਾ ਵੁਤ੍ਤਂ. ਮੂਲਚ੍ਛੇਜ੍ਜਾਯ ਵਾਤਿ ਇਦਂ ਇਧ ਥਮ੍ਭਾਦੀਨਂ ਦਾਸਿਦਾਸਾਦਿਭਾਵਾਭਾਵਤੋ ਵੁਤ੍ਤਂ. ਅਨਜ੍ਝਾਵੁਤ੍ਥਕਨ੍ਤਿ ਅਪਰਿਗ੍ਗਹਿਤਂ, ਅਸ੍ਸਾਮਿਕਨ੍ਤਿ ਅਤ੍ਥੋ.

੨੨. ਨ ਕੇਵਲਞ੍ਚ…ਪੇ… ਚੀਵਰਾਦੀਨਿ ਕਾਰਾਪੇਤੁਕਾਮੇਨਾਤਿਆਦੀਸੁ ਚੀਵਰਂ ਕਾਰਾਪੇਤੁਕਾਮਸ੍ਸ ਅਞ੍ਞਾਤਕਅਪ੍ਪਵਾਰਿਤਤਨ੍ਤਵਾਯੇਹਿ ਹਤ੍ਥਕਮ੍ਮਯਾਚਨਵਸੇਨ ਵਾਯਾਪਨੇ ਵਿਞ੍ਞਤ੍ਤਿਪਚ੍ਚਯਾ ਦੁਕ੍ਕਟਾਭਾਵੇਪਿ ਚੀਵਰਵਾਯਾਪਨਸਿਕ੍ਖਾਪਦੇਨ ਯਥਾਰਹਂ ਪਾਚਿਤ੍ਤਿਯਦੁਕ੍ਕਟਾਨਿ ਹੋਨ੍ਤੀਤਿ ਵੇਦਿਤਬ੍ਬਂ. ਅਕਪ੍ਪਿਯਕਹਾਪਣਾਦਿ ਨ ਦਾਤਬ੍ਬਨ੍ਤਿ ਕਪ੍ਪਿਯਮੁਖੇਨ ਲਦ੍ਧਮ੍ਪਿ ਤਤ੍ਥ ਕਮ੍ਮਕਰਣਤ੍ਥਾਯ ਇਮਸ੍ਸ ਕਹਾਪਣਂ ਦੇਹੀਤਿ ਵਤ੍ਵਾ ‘‘ਦਾਤੁਂ ਵਟ੍ਟਤੀ’’ਤਿ ਵੁਤ੍ਤਂ. ਪੁਬ੍ਬੇ ਕਤਕਮ੍ਮਸ੍ਸ ਦਾਪਨੇ ਕਿਞ੍ਚਾਪਿ ਦੋਸੋ ਨ ਦਿਸ੍ਸਤਿ, ਤਥਾਪਿ ਅਸਾਰੁਪ੍ਪਮੇਵਾਤਿ ਵਦਨ੍ਤਿ. ਕਤਕਮ੍ਮਤ੍ਥਾਯਪਿ ਕਪ੍ਪਿਯਵੋਹਾਰੇਨ ਪਰਿਯਾਯਤੋ ਭਤਿਂ ਦਾਪੇਨ੍ਤਸ੍ਸ ਨਤ੍ਥਿ ਦੋਸੋ, ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ੧.੩੪੨) ਪਨ ‘‘ਅਕਪ੍ਪਿਯਕਹਾਪਣਾਦਿ ਨ ਦਾਤਬ੍ਬਨ੍ਤਿ ਕਿਞ੍ਚਾਪਿ ਅਕਪ੍ਪਿਯਕਹਾਪਣਾਦਿਂ ਅਸਾਦਿਯਨ੍ਤੇਨ ਕਪ੍ਪਿਯਵੋਹਾਰਤੋ ਦਾਤੁਂ ਵਟ੍ਟਤਿ, ਤਥਾਪਿ ਸਾਰੁਪ੍ਪਂ ਨ ਹੋਤਿ, ਮਨੁਸ੍ਸਾ ਚ ਏਤਸ੍ਸ ਸਨ੍ਤਕਂ ਕਿਞ੍ਚਿ ਅਤ੍ਥੀਤਿ ਵਿਹੇਠੇਤਬ੍ਬਂ ਮਞ੍ਞਨ੍ਤੀਤਿ ਅਕਪ੍ਪਿਯਕਹਾਪਣਾਦਿਦਾਨਂ ਪਟਿਕ੍ਖਿਤ੍ਤ’’ਨ੍ਤਿ ਵੁਤ੍ਤਂ. ਤਥੇਵ ਪਾਚੇਤ੍ਵਾਤਿ ਹਤ੍ਥਕਮ੍ਮਵਸੇਨੇਵ ਪਾਚੇਤ੍ਵਾ. ‘‘ਕਿਂ ਭਨ੍ਤੇ’’ਤਿ ਏਤ੍ਤਕੇਪਿ ਪੁਚ੍ਛਿਤੇ ਯਦਤ੍ਥਾਯ ਪਵਿਟ੍ਠੋ, ਤਂ ਕਥੇਤੁਂ ਲਭਤਿ ਪੁਚ੍ਛਿਤਪਞ੍ਹਤ੍ਤਾ.

੨੩. ਵਤ੍ਤਨ੍ਤਿ ਚਾਰਿਤ੍ਤਂ, ਆਪਤ੍ਤਿ ਪਨ ਨ ਹੋਤੀਤਿ ਅਧਿਪ੍ਪਾਯੋ. ਕਪ੍ਪਿਯਂ ਕਾਰਾਪੇਤ੍ਵਾ ਪਟਿਗ੍ਗਹੇਤਬ੍ਬਾਨੀਤਿ ਸਾਖਾਯ ਮਕ੍ਖਿਕਬੀਜਨੇਨ ਪਣ੍ਣਾਦਿਛੇਦੇ ਬੀਜਗਾਮਕੋਪਨਸ੍ਸ ਚੇਵ ਤਤ੍ਥ ਲਗ੍ਗਰਜਾਦਿਅਪ੍ਪਟਿਗ੍ਗਹਿਤਕਸ੍ਸ ਚ ਪਰਿਹਾਰਤ੍ਥਾਯ ਵੁਤ੍ਤਂ, ਤਦੁਭਯਾਸਙ੍ਕਾਯ ਅਸਤਿ ਤਥਾ ਅਕਰਣੇ ਦੋਸੋ ਨਤ੍ਥਿ. ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ੧.੩੪੨) ਪਨ ‘‘ਕਪ੍ਪਿਯਂ ਕਾਰਾਪੇਤ੍ਵਾ ਪਟਿਗ੍ਗਹੇਤਬ੍ਬਾਨੀਤਿ ਸਾਖਾਯ ਲਗ੍ਗਰਜਸ੍ਮਿਂ ਪਤ੍ਤੇ ਪਤਿਤੇਪਿ ਸਾਖਂ ਛਿਨ੍ਦਿਤ੍ਵਾ ਖਾਦਿਤੁਕਾਮਤਾਯਪਿ ਸਤਿ ਸੁਖਪਰਿਭੋਗਤ੍ਥਂ ਵੁਤ੍ਤ’’ਨ੍ਤਿ ਵੁਤ੍ਤਂ. ਨਦਿਯਾਦੀਸੁ ਉਦਕਸ੍ਸ ਅਪਰਿਗ੍ਗਹਿਤਤ੍ਤਾ ‘‘ਆਹਰਾਤਿ ਵਤ੍ਤੁਂ ਵਟ੍ਟਤੀ’’ਤਿ ਵੁਤ੍ਤਂ. ਗੇਹਤੋ…ਪੇ… ਨੇਵ ਵਟ੍ਟਤੀਤਿ ਪਰਿਗ੍ਗਹਿਤੁਦਕਤ੍ਤਾ ਵਿਞ੍ਞਤ੍ਤਿਯਾ ਦੁਕ੍ਕਟਂ ਹੋਤੀਤਿ ਅਧਿਪ੍ਪਾਯੋ. ‘‘ਨ ਆਹਟਂ ਪਰਿਭੁਞ੍ਜਿਤੁ’’ਨ੍ਤਿ ਵਚਨਤੋ ਵਿਞ੍ਞਤ੍ਤਿਯਾ ਆਪਨ੍ਨਂ ਦੁਕ੍ਕਟਂ ਦੇਸੇਤ੍ਵਾਪਿ ਤਂ ਵਤ੍ਥੁਂ ਪਰਿਭੁਞ੍ਜਨ੍ਤਸ੍ਸ ਪਰਿਭੋਗੇ ਪਰਿਭੋਗੇ ਦੁਕ੍ਕਟਮੇਵ, ਪਞ੍ਚਨ੍ਨਮ੍ਪਿ ਸਹਧਮ੍ਮਿਕਾਨਂ ਨ ਵਟ੍ਟਤਿ.

‘‘ਅਲਜ੍ਜੀਹਿ ਪਨ ਭਿਕ੍ਖੂਹਿ ਵਾ ਸਾਮਣੇਰੇਹਿ ਵਾ ਹਤ੍ਥਕਮ੍ਮਂ ਨ ਕਾਰੇਤਬ੍ਬ’’ਨ੍ਤਿ ਸਾਮਞ੍ਞਤੋ ਵੁਤ੍ਤਤ੍ਤਾ ਅਤ੍ਤਨੋ ਅਤ੍ਥਾਯ ਯਂ ਕਿਞ੍ਚਿ ਹਤ੍ਥਕਮ੍ਮਂ ਕਾਰੇਤੁਂ ਨ ਵਟ੍ਟਤਿ. ਯਂ ਪਨ ਅਲਜ੍ਜੀ ਨਿਵਾਰਿਯਮਾਨੋਪਿ ਬੀਜਨਾਦਿਂ ਕਰੋਤਿ, ਤਤ੍ਥ ਦੋਸੋ ਨਤ੍ਥਿ, ਚੇਤਿਯਕਮ੍ਮਾਦੀਨਿ ਪਨ ਤੇਹਿ ਕਾਰਾਪੇਤੁਂ ਵਟ੍ਟਤੀਤਿ ਵਿਮਤਿਵਿਨੋਦਨਿਯਂ (ਵਿ. ਵਿ. ਟੀ. ੧.੩੪੨) ਵੁਤ੍ਤਂ. ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ੨.੩੪੨) ਪਨ ‘‘ਅਲਜ੍ਜੀਹਿ…ਪੇ… ਨ ਕਾਰੇਤਬ੍ਬਨ੍ਤਿ ਇਦਂ ਉਤ੍ਤਰਿਭਙ੍ਗਾਧਿਕਾਰਤ੍ਤਾ ਅਜ੍ਝੋਹਰਣੀਯਂ ਸਨ੍ਧਾਯ ਵੁਤ੍ਤਂ, ਬਾਹਿਰਪਰਿਭੋਗੇਸੁ ਪਨ ਅਲਜ੍ਜੀਹਿਪਿ ਹਤ੍ਥਕਮ੍ਮਂ ਕਾਰੇਤੁਂ ਵਟ੍ਟਤੀ’’ਤਿ ਵੁਤ੍ਤਂ. ਏਤ੍ਥ ਚ ‘‘ਅਲਜ੍ਜੀਹਿ ਸਾਮਣੇਰੇਹੀ’’ਤਿ ਵੁਤ੍ਤਤ੍ਤਾ ‘‘ਸਞ੍ਚਿਚ੍ਚ ਆਪਤ੍ਤਿਂ ਆਪਜ੍ਜਤੀ’’ਤਿ (ਪਰਿ. ੩੫੯) ਅਲਜ੍ਜਿਲਕ੍ਖਣਂ ਉਕ੍ਕਟ੍ਠਵਸੇਨ ਉਪਸਮ੍ਪਨ੍ਨੇ ਪਟਿਚ੍ਚ ਉਪਲਕ੍ਖਣਤੋ ਵੁਤ੍ਤਨ੍ਤਿ ਤਂਲਕ੍ਖਣਵਿਰਹਿਤਾਨਂ ਸਾਮਣੇਰਾਦੀਨਂ ਲਿਙ੍ਗਤ੍ਥੇਨਗੋਤ੍ਰਭੁਪਰਿਯੋਸਾਨਾਨਂ ਭਿਕ੍ਖੁਪਟਿਞ੍ਞਾਨਂ ਦੁਸ੍ਸੀਲਾਨਮ੍ਪਿ ਸਾਧਾਰਣਵਸੇਨ ਅਲਜ੍ਜਿਲਕ੍ਖਣਂ ਯਥਾਠਪਿਤਪਟਿਪਤ੍ਤਿਯਾ ਅਤਿਟ੍ਠਨਮੇਵਾਤਿ ਗਹੇਤਬ੍ਬਂ.

੨੪. ਗੋਣਂ ਪਨ…ਪੇ… ਆਹਰਾਪੇਨ੍ਤਸ੍ਸ ਦੁਕ੍ਕਟਨ੍ਤਿ ਵਿਞ੍ਞਤ੍ਤਿਕ੍ਖਣੇ ਵਿਞ੍ਞਤ੍ਤਿਪਚ੍ਚਯਾ, ਪਟਿਲਾਭਕ੍ਖਣੇ ਗੋਣਾਨਂ ਸਾਦਿਯਨਪਚ੍ਚਯਾ ਚ ਦੁਕ੍ਕਟਂ. ਗੋਣਞ੍ਹਿ ਅਤ੍ਤਨੋ ਅਤ੍ਥਾਯ ਅਵਿਞ੍ਞਤ੍ਤਿਯਾ ਲਦ੍ਧਮ੍ਪਿ ਸਾਦਿਤੁਂ ਨ ਵਟ੍ਟਤਿ ‘‘ਹਤ੍ਥਿਗਵਾਸ੍ਸਵਲ਼ਵਪਟਿਗ੍ਗਹਣਾ ਪਟਿਵਿਰਤੋ ਹੋਤੀ’’ਤਿ (ਦੀ. ਨਿ. ੧.੧੦, ੧੯੪) ਵੁਤ੍ਤਤ੍ਤਾ. ਤੇਨੇਵਾਹ ‘‘ਞਾਤਕਪਵਾਰਿਤਟ੍ਠਾਨਤੋਪਿ ਮੂਲਚ੍ਛੇਜ੍ਜਾਯ ਯਾਚਿਤੁਂ ਨ ਵਟ੍ਟਤੀ’’ਤਿ. ਏਤ੍ਥ ਚ ਵਿਞ੍ਞਤ੍ਤਿਦੁਕ੍ਕਟਾਭਾਵੇਪਿ ਅਕਪ੍ਪਿਯਵਤ੍ਥੁਯਾਚਨੇਪਿ ਪਟਿਗ੍ਗਹਣੇਪਿ ਦੁਕ੍ਕਟਮੇਵ. ਰਕ੍ਖਿਤ੍ਵਾਤਿ ਚੋਰਾਦਿਉਪਦ੍ਦਵਤੋ ਰਕ੍ਖਿਤ੍ਵਾ. ਜਗ੍ਗਿਤ੍ਵਾਤਿ ਤਿਣਅਨ੍ਨਾਦੀਹਿ ਪੋਸੇਤ੍ਵਾ. ਨ ਸਮ੍ਪਟਿਚ੍ਛਿਤਬ੍ਬਨ੍ਤਿ ਅਤ੍ਤਨੋ ਅਤ੍ਥਾਯ ਗੋਸਾਦਿਯਨਸ੍ਸ ਪਟਿਕ੍ਖਿਤ੍ਤਤ੍ਤਾ ਵੁਤ੍ਤਂ.

੨੫. ਞਾਤਕਪਵਾਰਿਤਟ੍ਠਾਨੇ ਪਨ ਵਟ੍ਟਤੀਤਿ ਸਕਟਸ੍ਸ ਸਮ੍ਪਟਿਚ੍ਛਿਤਬ੍ਬਤ੍ਤਾ ਮੂਲਚ੍ਛੇਜ੍ਜਵਸੇਨ ਯਾਚਿਤੁਂ ਵਟ੍ਟਤਿ. ਤਾਵਕਾਲਿਕਂ ਵਟ੍ਟਤੀਤਿ ਉਭਯਤ੍ਥਾਪਿ ਵਟ੍ਟਤੀਤਿ ਅਤ੍ਥੋਤਿ ਵਿਮਤਿਵਿਨੋਦਨਿਯਂ (ਵਿ. ਵਿ. ਟੀ. ੧.੩੪੨) ਵੁਤ੍ਤਂ. ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ੨.੩੪੨) ਪਨ ‘‘ਸਕਟਂ ਦੇਥਾਤਿ…ਪੇ… ਨ ਵਟ੍ਟਤੀਤਿ ਮੂਲਚ੍ਛੇਜ੍ਜਵਸੇਨ ਸਕਟਂ ਦੇਥਾਤਿ ਵਤ੍ਤੁਂ ਨ ਵਟ੍ਟਤਿ. ਤਾਵਕਾਲਿਕਂ ਵਟ੍ਟਤੀਤਿ ਤਾਵਕਾਲਿਕਂ ਕਤ੍ਵਾ ਸਬ੍ਬਤ੍ਥ ਯਾਚਿਤੁਂ ਵਟ੍ਟਤੀ’’ਤਿ ਵੁਤ੍ਤਂ. ਵਾਸਿਆਦੀਨਿ ਪੁਗ੍ਗਲਿਕਾਨਿਪਿ ਵਟ੍ਟਨ੍ਤੀਤਿ ਆਹ ‘‘ਏਸ ਨਯੋ ਵਾਸੀ’’ਤਿਆਦਿ. ਵਲ੍ਲਿਆਦੀਸੁ ਚ ਪਰਪਰਿਗ੍ਗਹਿਤੇਸੁ ਏਸ ਨਯੋਤਿ ਯੋਜੇਤਬ੍ਬਂ. ਗਰੁਭਣ੍ਡਪ੍ਪਹੋਨਕੇਸੁਯੇਵਾਤਿ ਇਦਂ ਵਿਞ੍ਞਤ੍ਤਿਂ ਸਨ੍ਧਾਯ ਵੁਤ੍ਤਂ, ਅਦਿਨ੍ਨਾਦਾਨੇ ਪਨ ਤਿਣਸਲਾਕਂ ਉਪਾਦਾਯ ਪਰਪਰਿਗ੍ਗਹਿਤਂ ਥੇਯ੍ਯਚਿਤ੍ਤੇਨ ਗਣ੍ਹਤੋ ਅਵਹਾਰੋ ਏਵ, ਭਣ੍ਡਗ੍ਘੇਨ ਕਾਰੇਤਬ੍ਬੋ. ਵਲ੍ਲਿਆਦੀਸੂਤਿ ਏਤ੍ਥ ਆਦਿ-ਸਦ੍ਦੇਨ ਪਾਲ਼ਿਆਗਤਾਨਂ ਵੇਲ਼ੁਮੁਞ੍ਜਪਬ੍ਬਜਤਿਣਮਤ੍ਤਿਕਾਨਂ ਸਙ੍ਗਹੋ ਦਟ੍ਠਬ੍ਬੋ. ਤਤ੍ਥ ਚ ਯਸ੍ਮਿਂ ਪਦੇਸੇ ਹਰਿਤਾਲਜਾਤਿਹਿਙ੍ਗੁਲਿਕਾਦਿ ਅਪ੍ਪਕਮ੍ਪਿ ਮਹਗ੍ਘਂ ਹੋਤਿ, ਤਤ੍ਥ ਤਂ ਤਾਲਪਕ੍ਕਪ੍ਪਮਾਣਤੋ ਊਨਮ੍ਪਿ ਗਰੁਭਣ੍ਡਮੇਵ, ਵਿਞ੍ਞਾਪੇਤੁਞ੍ਚ ਨ ਵਟ੍ਟਤਿ.

੨੬. ਸਾਤਿ ਵਿਞ੍ਞਤ੍ਤਿ. ਪਰਿਕਥਾਦੀਸੁ ‘‘ਸੇਨਾਸਨਂ ਸਮ੍ਬਾਧ’’ਨ੍ਤਿਆਦਿਨਾ ਪਰਿਯਾਯੇਨ ਕਥਨਂ ਪਰਿਕਥਾ ਨਾਮ. ਉਜੁਕਮੇਵ ਅਕਥੇਤ੍ਵਾ ‘‘ਭਿਕ੍ਖੂਨਂ ਕਿਂ ਪਾਸਾਦੋ ਨ ਵਟ੍ਟਤੀ’’ਤਿਆਦਿਨਾ ਅਧਿਪ੍ਪਾਯੋ ਯਥਾ ਵਿਭੂਤੋ ਹੋਤਿ, ਏਵਂ ਕਥਨਂ ਓਭਾਸੋ ਨਾਮ. ਸੇਨਾਸਨਾਦਿਅਤ੍ਥਂ ਭੂਮਿਪਰਿਕਮ੍ਮਾਦਿਕਰਣਵਸੇਨ ਪਚ੍ਚਯੁਪ੍ਪਾਦਾਯ ਨਿਮਿਤ੍ਤਕਰਣਂ ਨਿਮਿਤ੍ਤਕਮ੍ਮਂ ਨਾਮ. ਤੀਸੁ ਪਚ੍ਚਯੇਸੁ ਵਿਞ੍ਞਤ੍ਤਿਆਦਯੋ ਦਸ੍ਸਿਤਾ, ਗਿਲਾਨਪਚ੍ਚਯੇ ਪਨ ਕਥਨ੍ਤਿ ਆਹ ‘‘ਗਿਲਾਨਪਚ੍ਚਯੇ ਪਨਾ’’ਤਿਆਦਿ. ਤਥਾ ਉਪ੍ਪਨ੍ਨਂ ਪਨ ਭੇਸਜ੍ਜਂ ਰੋਗੇ ਵੂਪਸਨ੍ਤੇ ਭੁਞ੍ਜਿਤੁਂ ਵਟ੍ਟਤਿ, ਨ ਵਟ੍ਟਤੀਤਿ? ਤਤ੍ਥ ਵਿਨਯਧਰਾ ‘‘ਭਗਵਤਾ ਰੋਗਸੀਸੇਨ ਪਰਿਭੋਗਸ੍ਸ ਦ੍ਵਾਰਂ ਦਿਨ੍ਨਂ, ਤਸ੍ਮਾ ਅਰੋਗਕਾਲੇਪਿ ਭੁਞ੍ਜਿਤੁਂ ਵਟ੍ਟਤਿ, ਆਪਤ੍ਤਿ ਨ ਹੋਤੀ’’ਤਿ ਵਦਨ੍ਤਿ, ਸੁਤ੍ਤਨ੍ਤਿਕਾ ਪਨ ‘‘ਕਿਞ੍ਚਾਪਿ ਆਪਤ੍ਤਿ ਨ ਹੋਤਿ, ਆਜੀਵਂ ਪਨ ਕੋਪੇਤਿ, ਤਸ੍ਮਾ ਸਲ੍ਲੇਖਪਟਿਪਤ੍ਤਿਯਂ ਠਿਤਸ੍ਸ ਨ ਵਟ੍ਟਤਿ, ਸਲ੍ਲੇਖਂ ਕੋਪੇਤੀ’’ਤਿ ਵਦਨ੍ਤੀਤਿ.

ਇਤਿ ਵਿਨਯਸਙ੍ਗਹਸਂਵਣ੍ਣਨਾਭੂਤੇ ਵਿਨਯਾਲਙ੍ਕਾਰੇ

ਵਿਞ੍ਞਤ੍ਤਿਵਿਨਿਚ੍ਛਯਕਥਾਲਙ੍ਕਾਰੋ ਨਾਮ

ਚਤੁਤ੍ਥੋ ਪਰਿਚ੍ਛੇਦੋ.