੨੭. ਉਪਜ੍ਝਾਯਾਦਿਵਤ੍ਤਵਿਨਿਚ੍ਛਯਕਥਾ

ਉਪਜ੍ਝਾਯਵਤ੍ਤਕਥਾਵਣਨਾ

੧੮੩. ਏਵਂ ਵਸ੍ਸੂਪਨਾਯਿਕਵਿਨਿਚ੍ਛਯਂ ਕਥੇਤ੍ਵਾ ਇਦਾਨਿ ਉਪਜ੍ਝਾਯਵਤ੍ਤਾਦਿਵਤ੍ਤਕਥਂ ਕਥੇਤੁਂ ‘‘ਵਤ੍ਤਨ੍ਤਿ ਏਤ੍ਥਾ’’ਤਿਆਦਿਮਾਹ. ਤਤ੍ਥ ਵਤ੍ਤੇਤਬ੍ਬਂ ਪਵਤ੍ਤੇਤਬ੍ਬਨ੍ਤਿ ਵਤ੍ਤਂ, ਸਦ੍ਧਿਵਿਹਾਰਿਕਾਦੀਹਿ ਉਪਜ੍ਝਾਯਾਦੀਸੁ ਪਵਤ੍ਤੇਤਬ੍ਬਂ ਆਭਿਸਮਾਚਾਰਿਕਸੀਲਂ. ਤਂ ਕਤਿਵਿਧਨ੍ਤਿ ਆਹ ‘‘ਵਤ੍ਤਂ ਨਾਮੇਤਂ…ਪੇ… ਬਹੁਵਿਧ’’ਨ੍ਤਿ. ਵਚ੍ਚਕੁਟਿਵਤ੍ਤਨ੍ਤਿ ਏਤ੍ਥ ਇਤਿ-ਸਦ੍ਦੋ ਆਦ੍ਯਤ੍ਥੋ. ਤੇਨ ਸਦ੍ਧਿਵਿਹਾਰਿਕਵਤ੍ਤਅਨ੍ਤੇਵਾਸਿਕਵਤ੍ਤਅਨੁਮੋਦਨਵਤ੍ਤਾਨਿ ਸਙ੍ਗਯ੍ਹਨ੍ਤਿ. ਵੁਤ੍ਤਞ੍ਹਿ ਤਤ੍ਥ ਤਤ੍ਥ ਅਟ੍ਠਕਥਾਸੁ ‘‘ਚੁਦ੍ਦਸ ਖਨ੍ਧਕਵਤ੍ਤਾਨੀ’’ਤਿ. ਵਤ੍ਤਕ੍ਖਨ੍ਧਕੇ (ਚੂਲ਼ਵ. ੩੫੬) ਚ ਪਾਲ਼ਿਯਂ ਆਗਤਮੇਵ, ਤਤ੍ਥ ਪਨ ਆਗਨ੍ਤੁਕਵਤ੍ਤਤੋ ਪਟ੍ਠਾਯ ਆਗਤਂ, ਇਧ ਉਪਜ੍ਝਾਯਵਤ੍ਤਤੋ. ਇਤੋ ਅਞ੍ਞਾਨਿਪਿ ਪਞ੍ਚਸਤ੍ਤਤਿ ਸੇਖਿਯਵਤ੍ਤਾਨਿ ਦ੍ਵੇਅਸੀਤਿ ਮਹਾਵਤ੍ਤਾਨਿ ਚ ਵਤ੍ਤਮੇਵ. ਤੇਸੁ ਪਨ ਸੇਖਿਯਵਤ੍ਤਾਨਿ ਮਹਾਵਿਭਙ੍ਗੇ ਆਗਤਾਨਿ, ਮਹਾਵਤ੍ਤਾਨਿ ਕਮ੍ਮਕ੍ਖਨ੍ਧਕਪਾਰਿਵਾਸਿਕਕ੍ਖਨ੍ਧਕੇਸੁ (ਚੂਲ਼ਵ. ੭੫ ਆਦਯੋ), ਤਸ੍ਮਾ ਇਧ ਚੁਦ੍ਦਸ ਖਨ੍ਧਕਵਤ੍ਤਾਨਿਯੇਵ ਦਸ੍ਸਿਤਾਨਿ. ਤੇਸੁ ਉਪਜ੍ਝਾਯਵਤ੍ਤਂ ਪਠਮਂ ਦਸ੍ਸੇਨ੍ਤੋ ‘‘ਤਤ੍ਥ ਉਪਜ੍ਝਾਯਵਤ੍ਤਂ ਤਾਵ ਏਵਂ ਵੇਦਿਤਬ੍ਬ’’ਨ੍ਤ੍ਯਾਦਿਮਾਹ.

ਤਤ੍ਥ ਕੋ ਉਪਜ੍ਝਾਯੋ, ਕੇਨਟ੍ਠੇਨ ਉਪਜ੍ਝਾਯੋ, ਕਥਂ ਗਹਿਤੋ ਉਪਜ੍ਝਾਯੋ, ਕੇਨ ਵਤ੍ਤਿਤਬ੍ਬਂ ਉਪਜ੍ਝਾਯਵਤ੍ਤਂ, ਕਤਮਂ ਤਂ ਵਤ੍ਤਨ੍ਤਿ? ਤਤ੍ਥ ਕੋ ਉਪਜ੍ਝਾਯੋਤਿ ‘‘ਅਨੁਜਾਨਾਮਿ, ਭਿਕ੍ਖਵੇ, ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਦਸਵਸ੍ਸੇਨ ਵਾ ਅਤਿਰੇਕਦਸਵਸ੍ਸੇਨ ਵਾ ਉਪਸਮ੍ਪਾਦੇਤੁ’’ਨ੍ਤਿਆਦਿਵਚਨਤੋ (ਮਹਾਵ. ੭੬) ਬ੍ਯਤ੍ਤਿਬਲਸਮ੍ਪਨ੍ਨੋ ਉਪਸਮ੍ਪਦਤੋ ਪਟ੍ਠਾਯ ਦਸਵਸ੍ਸੋ ਵਾ ਅਤਿਰੇਕਦਸਵਸ੍ਸੋ ਵਾ ਭਿਕ੍ਖੁ ਉਪਜ੍ਝਾਯੋ. ਕੇਨਟ੍ਠੇਨ ਉਪਜ੍ਝਾਯੋਤਿ ਵਜ੍ਜਾਵਜ੍ਜਂ ਉਪਨਿਜ੍ਝਾਯਤੀਤਿ ਉਪਜ੍ਝਾਯੋ, ਸਦ੍ਧਿਵਿਹਾਰਿਕਾਨਂ ਖੁਦ੍ਦਕਂ ਵਜ੍ਜਂ ਵਾ ਮਹਨ੍ਤਂ ਵਜ੍ਜਂ ਵਾ ਭੁਸੋ ਚਿਨ੍ਤੇਤੀਤਿ ਅਤ੍ਥੋ. ਕਥਂ ਗਹਿਤੋ ਹੋਤਿ ਉਪਜ੍ਝਾਯੋਤਿ ਸਦ੍ਧਿਵਿਹਾਰਿਕੇਨ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ‘‘ਉਪਜ੍ਝਾਯੋ ਮੇ, ਭਨ੍ਤੇ, ਹੋਹੀ’’ਤਿ ਤਿਕ੍ਖਤ੍ਤੁਂ ਵੁਤ੍ਤੇ ਸਚੇ ਉਪਜ੍ਝਾਯੋ ‘‘ਸਾਹੂ’’ਤਿ ਵਾ ‘‘ਲਹੂ’’ਤਿ ਵਾ ‘‘ਓਪਾਯਿਕ’’ਨ੍ਤਿ ਵਾ ‘‘ਪਤਿਰੂਪ’’ਨ੍ਤਿ ਵਾ ‘‘ਪਾਸਾਦਿਕੇਨ ਸਮ੍ਪਾਦੇਹੀ’’ਤਿ ਵਾ ਇਮੇਸੁ ਪਞ੍ਚਸੁ ਪਦੇਸੁ ਯਸ੍ਸ ਕਸ੍ਸਚਿ ਪਦਸ੍ਸ ਵਸੇਨ ਕਾਯੇਨ ਵਾ ਵਾਚਾਯ ਵਾ ਕਾਯਵਾਚਾਹਿ ਵਾ ‘‘ਗਹਿਤੋ ਤਯਾ ਉਪਜ੍ਝਾਯੋ’’ਤਿ ਉਪਜ੍ਝਾਯਗ੍ਗਹਣਂ ਵਿਞ੍ਞਾਪੇਤਿ, ਗਹਿਤੋ ਹੋਤਿ ਉਪਜ੍ਝਾਯੋ. ਤਤ੍ਥ ਸਾਹੂਤਿ ਸਾਧੁ. ਲਹੂਤਿ ਅਗਰੁ, ਸੁਭਰਤਾਤਿ ਅਤ੍ਥੋ. ਓਪਾਯਿਕਨ੍ਤਿ ਉਪਾਯਪਟਿਸਂਯੁਤ੍ਤਂ, ਏਵਂ ਪਟਿਪਜ੍ਜਨਂ ਨਿਤ੍ਥਰਣੁਪਾਯੋਤਿ ਅਤ੍ਥੋ. ਪਤਿਰੂਪਨ੍ਤਿ ਸਾਮੀਚਿਕਮ੍ਮਮਿਦਨ੍ਤਿ ਅਤ੍ਥੋ. ਪਾਸਾਦਿਕੇਨਾਤਿ ਪਸਾਦਾਵਹੇਨ ਕਾਯਵਚੀਪਯੋਗੇਨ ਸਮ੍ਪਾਦੇਹੀਤਿ ਅਤ੍ਥੋ.

ਕੇਨ ਵਤ੍ਤਿਤਬ੍ਬਂ ਉਪਜ੍ਝਾਯਵਤ੍ਤਨ੍ਤਿ ਗਹਿਤਉਪਜ੍ਝਾਯੇਨ ਸਦ੍ਧਿਵਿਹਾਰਿਕੇਨ ਵਤ੍ਤਿਤਬ੍ਬਂ. ਕਤਮਂ ਤਂ ਵਤ੍ਤਨ੍ਤਿ ਇਦਂ ਆਗਤਮੇਵ, ਤਤ੍ਥ ਕਾਲਸ੍ਸੇਵ ਉਟ੍ਠਾਯ ਉਪਾਹਨਾ ਓਮੁਞ੍ਚਿਤ੍ਵਾਤਿ ਸਚਸ੍ਸ ਪਚ੍ਚੂਸਕਾਲੇ ਚਙ੍ਕਮਨਤ੍ਥਾਯ ਵਾ ਧੋਤਪਾਦਪਰਿਹਰਣਤ੍ਥਾਯ ਵਾ ਪਟਿਮੁਕ੍ਕਾ ਉਪਾਹਨਾ ਪਾਦਗਤਾ ਹੋਨ੍ਤਿ, ਤਾ ਕਾਲਸ੍ਸੇਵ ਉਟ੍ਠਾਯ ਅਪਨੇਤ੍ਵਾ. ਤਾਦਿਸਮੇਵ ਮੁਖਧੋਵਨੋਦਕਂ ਦਾਤਬ੍ਬਨ੍ਤਿ ਉਤੁਮ੍ਪਿ ਸਰੀਰਸਭਾਵੇ ਚ ਏਕਾਕਾਰੇ ਤਾਦਿਸਮੇਵ ਦਾਤਬ੍ਬਂ.

ਸਗੁਣਂ ਕਤ੍ਵਾਤਿ ਉਤ੍ਤਰਾਸਙ੍ਗਂ ਸਙ੍ਘਾਟਿਞ੍ਚਾਤਿ ਦ੍ਵੇ ਚੀਵਰਾਨਿ ਏਕਤੋ ਕਤ੍ਵਾ ਤਾ ਦ੍ਵੇਪਿ ਸਙ੍ਘਾਟਿਯੋ ਦਾਤਬ੍ਬਾ. ਸਬ੍ਬਞ੍ਹਿ ਚੀਵਰਂ ਸਙ੍ਘਟਿਤਤ੍ਤਾ ਸਙ੍ਘਾਟੀਤਿ ਵੁਚ੍ਚਤਿ. ਤੇਨ ਵੁਤ੍ਤਂ ‘‘ਸਙ੍ਘਾਟਿਯੋ ਦਾਤਬ੍ਬਾ’’ਤਿ. ਪਦਵੀਤਿਹਾਰੇਹੀਤਿ ਏਤ੍ਥ ਪਦਂ ਵੀਤਿਹਰਤਿ ਏਤ੍ਥਾਤਿ ਪਦਵੀਤਿਹਾਰੋ, ਪਦਵੀਤਿਹਾਰਟ੍ਠਾਨਂ. ਦੁਤਵਿਲਮ੍ਬਿਤਂ ਅਕਤ੍ਵਾ ਸਮਗਮਨੇਨ ਦ੍ਵਿਨ੍ਨਂ ਪਦਾਨਂ ਅਨ੍ਤਰੇ ਮੁਟ੍ਠਿਰਤਨਮਤ੍ਤਂ. ਪਦਾਨਂ ਵਾ ਵੀਤਿਹਰਣਂ ਅਭਿਮੁਖਂ ਹਰਿਤ੍ਵਾ ਨਿਕ੍ਖੇਪੋ ਪਦਵੀਤਿਹਾਰੋਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ. ਨ ਉਪਜ੍ਝਾਯਸ੍ਸ ਭਣਮਾਨਸ੍ਸ ਅਨ੍ਤਰਨ੍ਤਰਾ ਕਥਾ ਓਪਾਤੇਤਬ੍ਬਾਤਿ ਅਨ੍ਤਰਘਰੇ ਵਾ ਅਞ੍ਞਤ੍ਰ ਵਾ ਭਣਮਾਨਸ੍ਸ ਅਨਿਟ੍ਠਿਤੇ ਤਸ੍ਸ ਵਚਨੇ ਅਞ੍ਞਾ ਕਥਾ ਨ ਸਮੁਟ੍ਠਾਪੇਤਬ੍ਬਾ. ਇਤੋ ਪਟ੍ਠਾਯਾਤਿ ‘‘ਨ ਉਪਜ੍ਝਾਯਸ੍ਸ ਭਣਮਾਨਸ੍ਸਾ’’ਤਿ ਏਤ੍ਥ ਨ-ਕਾਰਤੋ ਪਟ੍ਠਾਯ. ਤੇਨ ਨਾਤਿਦੂਰੇਤਿਆਦੀਸੁ ਨ-ਕਾਰਪਟਿਸਿਦ੍ਧੇਸੁ ਆਪਤ੍ਤਿ ਨਤ੍ਥੀਤਿ ਦਸ੍ਸੇਤਿ. ਸਬ੍ਬਤ੍ਥ ਦੁਕ੍ਕਟਾਪਤ੍ਤੀਤਿ ਆਪਦਾਉਮ੍ਮਤ੍ਤਖਿਤ੍ਤਚਿਤ੍ਤਵੇਦਨਾਟ੍ਟਤਾਦੀਹਿ ਵਿਨਾ ਪਣ੍ਣਤ੍ਤਿਂ ਅਜਾਨਿਤ੍ਵਾਪਿ ਵਦਨ੍ਤਸ੍ਸ ਗਿਲਾਨਸ੍ਸ ਚ ਦੁਕ੍ਕਟਮੇਵ. ਆਪਦਾਸੁ ਹਿ ਅਨ੍ਤਰਨ੍ਤਰਾ ਕਥਾ ਵਤ੍ਤੁਂ ਵਟ੍ਟਤਿ, ਏਵਮਞ੍ਞੇਸੁ ਨ-ਕਾਰਪਟਿਸਿਦ੍ਧੇਸੁ ਈਦਿਸੇਸੁ, ਇਤਰੇਸੁ ਪਨ ਗਿਲਾਨੋਪਿ ਨ ਮੁਚ੍ਚਤਿ. ਸਬ੍ਬਤ੍ਥ ਦੁਕ੍ਕਟਾਪਤ੍ਤਿ ਵੇਦਿਤਬ੍ਬਾਤਿ ‘‘ਈਦਿਸੇਸੁ ਗਿਲਾਨੋਪਿ ਨ ਮੁਚ੍ਚਤੀ’’ਤਿ ਦਸ੍ਸਨਤ੍ਥਂ ਵੁਤ੍ਤਂ. ਅਞ੍ਞਮ੍ਪਿ ਹਿ ਯਥਾਵੁਤ੍ਤਂ ਉਪਜ੍ਝਾਯਵਤ੍ਤਂ ਅਨਾਦਰਿਯੇਨ ਅਕਰੋਨ੍ਤਸ੍ਸ ਅਗਿਲਾਨਸ੍ਸ ਵਤ੍ਤਭੇਦੇ ਸਬ੍ਬਤ੍ਥ ਦੁਕ੍ਕਟਮੇਵ, ਤੇਨੇਵ ਵਕ੍ਖਤਿ ‘‘ਅਗਿਲਾਨੇਨ ਹਿ ਸਦ੍ਧਿਵਿਹਾਰਿਕੇਨ ਸਟ੍ਠਿਵਸ੍ਸੇਨਪਿ ਸਬ੍ਬਂ ਉਪਜ੍ਝਾਯਵਤ੍ਤਂ ਕਾਤਬ੍ਬਂ, ਅਨਾਦਰਿਯੇਨ ਅਕਰੋਨ੍ਤਸ੍ਸ ਵਤ੍ਤਭੇਦੇ ਦੁਕ੍ਕਟਂ. ਨ-ਕਾਰਪਟਿਸਂਯੁਤ੍ਤੇਸੁ ਪਨ ਪਦੇਸੁ ਗਿਲਾਨਸ੍ਸਪਿ ਪਟਿਕ੍ਖਿਤ੍ਤਕਿਰਿਯਂ ਕਰੋਨ੍ਤਸ੍ਸ ਦੁਕ੍ਕਟਮੇਵਾ’’ਤਿ. ਆਪਤ੍ਤਿਸਾਮਨ੍ਤਾ ਭਣਮਾਨੋਤਿ ਪਦਸੋਧਮ੍ਮ(ਪਾਚਿ. ੪੪ ਆਦਯੋ)-ਦੁਟ੍ਠੁਲ੍ਲਾਦਿਵਸੇਨ (ਪਾਰਾ. ੨੮੩) ਆਪਤ੍ਤਿਯਾ ਆਸਨ੍ਨਵਾਚਂ ਭਣਮਾਨੋ. ਆਪਤ੍ਤਿਯਾ ਆਸਨ੍ਨਵਾਚਨ੍ਤਿ ਚ ਆਪਤ੍ਤਿਜਨਕਮੇਵ ਵਚਨਂ ਸਨ੍ਧਾਯ ਵਦਤਿ. ਯਾਯ ਹਿ ਵਾਚਾਯ ਆਪਤ੍ਤਿਂ ਆਪਜ੍ਜਤਿ, ਸਾ ਵਾਚਾ ਆਪਤ੍ਤਿਯਾ ਆਸਨ੍ਨਾਤਿ ਵੁਚ੍ਚਤਿ.

ਚੀਵਰੇਨ ਪਤ੍ਤਂ ਵੇਠੇਤ੍ਵਾਤਿ ਏਤ੍ਥ ‘‘ਉਤ੍ਤਰਾਸਙ੍ਗਸ੍ਸ ਏਕੇਨ ਕਣ੍ਣੇਨ ਵੇਠੇਤ੍ਵਾ’’ਤਿ ਗਣ੍ਠਿਪਦੇਸੁ ਵੁਤ੍ਤਂ. ਹੇਟ੍ਠਾਪੀਠਂ ਵਾ ਪਰਾਮਸਿਤ੍ਵਾਤਿ ਇਦਂ ਪੁਬ੍ਬੇ ਤਤ੍ਥ ਠਪਿਤਪਤ੍ਤਾਦਿਨਾ ਅਸਙ੍ਘਟ੍ਟਨਤ੍ਥਾਯ ਵੁਤ੍ਤਂ. ਚਕ੍ਖੁਨਾ ਓਲੋਕੇਤ੍ਵਾਪਿ ਅਞ੍ਞੇਸਂ ਅਭਾਵਂ ਞਤ੍ਵਾਪਿ ਠਪੇਤੁਂ ਵਟ੍ਟਤਿ ਏਵ. ਚਤੁਰਙ੍ਗੁਲਂ ਕਣ੍ਣਂ ਉਸ੍ਸਾਰੇਤ੍ਵਾਤਿ ਕਣ੍ਣਂ ਚਤੁਰਙ੍ਗੁਲਪ੍ਪਮਾਣਂ ਅਤਿਰੇਕਂ ਕਤ੍ਵਾ ਏਵਂ ਚੀਵਰਂ ਸਙ੍ਘਰਿਤਬ੍ਬਂ. ਓਭੋਗੇ ਕਾਯਬਨ੍ਧਨਂ ਕਾਤਬ੍ਬਨ੍ਤਿ ਕਾਯਬਨ੍ਧਨਂ ਸਙ੍ਘਰਿਤ੍ਵਾ ਚੀਵਰਭੋਗੇ ਪਕ੍ਖਿਪਿਤ੍ਵਾ ਠਪੇਤਬ੍ਬਂ. ਸਚੇ ਪਿਣ੍ਡਪਾਤੋ ਹੋਤੀਤਿ ਏਤ੍ਥ ਯੋ ਗਾਮੇਯੇਵ ਵਾ ਅਨ੍ਤਰਘਰੇ ਵਾ ਪਟਿਕ੍ਕਮਨੇ ਵਾ ਭੁਞ੍ਜਿਤ੍ਵਾ ਆਗਚ੍ਛਤਿ, ਪਿਣ੍ਡਂ ਵਾ ਨ ਲਭਤਿ, ਤਸ੍ਸ ਪਿਣ੍ਡਪਾਤੋ ਨ ਹੋਤਿ, ਗਾਮੇ ਅਭੁਤ੍ਤਸ੍ਸ ਪਨ ਲਦ੍ਧਭਿਕ੍ਖਸ੍ਸ ਵਾ ਹੋਤਿ, ਤਸ੍ਮਾ ‘‘ਸਚੇ ਪਿਣ੍ਡਪਾਤੋ ਹੋਤੀ’’ਤਿਆਦਿ ਵੁਤ੍ਤਂ. ਤਤ੍ਥ ਗਾਮੇਤਿ ਗਾਮਪਰਿਯਾਪਨ੍ਨੇ ਤਾਦਿਸੇ ਕਿਸ੍ਮਿਞ੍ਚਿ ਪਦੇਸੇ. ਅਨ੍ਤਰਘਰੇਤਿ ਅਨ੍ਤੋਗੇਹੇ. ਪਟਿਕ੍ਕਮਨੇਤਿ ਆਸਨਸਾਲਾਯਂ. ਸਚੇਪਿ ਤਸ੍ਸ ਨ ਹੋਤਿ, ਭੁਞ੍ਜਿਤੁਕਾਮੋ ਚ ਹੋਤਿ, ਉਦਕਂ ਦਤ੍ਵਾ ਅਤ੍ਤਨਾ ਲਦ੍ਧਤੋਪਿ ਪਿਣ੍ਡਪਾਤੋ ਉਪਨੇਤਬ੍ਬੋ. ਤਿਕ੍ਖਤ੍ਤੁਂ ਪਾਨੀਯੇਨ ਪੁਚ੍ਛਿਤਬ੍ਬੋਤਿ ਸਮ੍ਬਨ੍ਧੋ, ਆਦਿਮ੍ਹਿ ਮਜ੍ਝੇ ਅਨ੍ਤੇਤਿ ਏਵਂ ਤਿਕ੍ਖਤ੍ਤੁਂ ਪੁਚ੍ਛਿਤਬ੍ਬੋਤਿ ਅਤ੍ਥੋ. ਉਪਕਟ੍ਠੋਤਿ ਆਸਨ੍ਨੋ. ਧੋਤਵਾਲਿਕਾਯਾਤਿ ਉਦਕੇਨ ਗਤਟ੍ਠਾਨੇ ਨਿਰਜਾਯ ਪਰਿਸੁਦ੍ਧਵਾਲਿਕਾਯ.

ਨਿਦ੍ਧੂਮੇਤਿ ਜਨ੍ਤਾਘਰੇ ਜਲਮਾਨਅਗ੍ਗਿਧੂਮਰਹਿਤੇ. ਜਨ੍ਤਾਘਰਞ੍ਹਿ ਨਾਮ ਹਿਮਪਾਤਬਹੁਕੇਸੁ ਦੇਸੇਸੁ ਤਪ੍ਪਚ੍ਚਯਰੋਗਪੀਲ਼ਾਦਿਨਿਵਾਰਣਤ੍ਥਂ ਸਰੀਰਸੇਦਤਾਪਨਟ੍ਠਾਨਂ. ਤਤ੍ਥ ਕਿਰ ਅਨ੍ਧਕਾਰਪਟਿਚ੍ਛਨ੍ਨਤਾਯ ਬਹੂਪਿ ਏਕਤੋ ਪਵਿਸਿਤ੍ਵਾ ਚੀਵਰਂ ਨਿਕ੍ਖਿਪਿਤ੍ਵਾ ਅਗ੍ਗਿਤਾਪਪਰਿਹਾਰਾਯ ਮਤ੍ਤਿਕਾਯ ਮੁਖਂ ਲਿਮ੍ਪਿਤ੍ਵਾ ਸਰੀਰਂ ਯਾਵਦਤ੍ਥਂ ਸੇਦੇਤ੍ਵਾ ਚੁਣ੍ਣਾਦੀਹਿ ਉਬ੍ਬਟ੍ਟੇਤ੍ਵਾ ਨਹਾਯਨ੍ਤਿ. ਤੇਨੇਵ ਪਾਲ਼ਿਯਂ (ਮਹਾਵ. ੬੬) ‘‘ਚੁਣ੍ਣਂ ਸਨ੍ਨੇਤਬ੍ਬ’’ਨ੍ਤਿਆਦਿ ਵੁਤ੍ਤਂ. ਸਚੇ ਉਸ੍ਸਹਤੀਤਿ ਸਚੇ ਪਹੋਤਿ. ਵੁਤ੍ਤਮੇਵਤ੍ਥਂ ਵਿਭਾਵੇਤਿ ‘‘ਕੇਨਚਿ ਗੇਲਞ੍ਞੇਨ ਅਨਭਿਭੂਤੋ ਹੋਤੀ’’ਤਿ. ਅਪਟਿਘਂਸਨ੍ਤੇਨਾਤਿ ਭੂਮਿਯਂ ਅਪਟਿਘਂਸਨ੍ਤੇਨ. ਕਵਾਟਪੀਠਨ੍ਤਿ ਕਵਾਟਪੀਠਞ੍ਚ ਪਿਟ੍ਠਸਙ੍ਘਾਤਞ੍ਚ ਅਚ੍ਛੁਪਨ੍ਤੇਨ. ਸਨ੍ਤਾਨਕਨ੍ਤਿ ਯਂ ਕਿਞ੍ਚਿ ਕੀਟਕੁਲਾਵਕਮਕ੍ਕਟਕਸੁਤ੍ਤਾਦਿ. ਉਲ੍ਲੋਕਾ ਪਠਮਂ ਓਹਾਰੇਤਬ੍ਬਨ੍ਤਿ ਉਲ੍ਲੋਕਤੋ ਪਠਮਂ ਉਲ੍ਲੋਕਂ ਆਦਿਂ ਕਤ੍ਵਾ ਅਵਹਰਿਤਬ੍ਬਨ੍ਤਿ ਅਤ੍ਥੋ. ਉਲ੍ਲੋਕਨ੍ਤਿ ਚ ਉਦ੍ਧਂ ਓਲੋਕਨਟ੍ਠਾਨਂ, ਉਪਰਿਭਾਗਨ੍ਤਿ ਅਤ੍ਥੋ. ਆਲੋਕਸਨ੍ਧਿਕਣ੍ਣਭਾਗਾਤਿ ਆਲੋਕਸਨ੍ਧਿਭਾਗਾ ਚ ਕਣ੍ਣਭਾਗਾ ਚ, ਅਬ੍ਭਨ੍ਤਰਬਾਹਿਰਵਾਤਪਾਨਕਵਾਟਕਾਨਿ ਚ ਗਬ੍ਭਸ੍ਸ ਚ ਚਤ੍ਤਾਰੋ ਕੋਣਾ ਸਮ੍ਮਜ੍ਜਿਤਬ੍ਬਾਤਿ ਅਤ੍ਥੋ.

ਅਞ੍ਞਤ੍ਥ ਨੇਤਬ੍ਬੋਤਿ ਯਤ੍ਥ ਵਿਹਾਰਤੋ ਸਾਸਨੇ ਅਨਭਿਰਤਿ ਉਪ੍ਪਨ੍ਨਾ, ਤਤੋ ਅਞ੍ਞਤ੍ਥ ਕਲ੍ਯਾਣਮਿਤ੍ਤਾਦਿਸਮ੍ਪਤ੍ਤਿਯੁਤ੍ਤਟ੍ਠਾਨੇ ਨੇਤਬ੍ਬੋ. ਨ ਚ ਅਚ੍ਛਿਨ੍ਨੇ ਥੇਵੇ ਪਕ੍ਕਮਿਤਬ੍ਬਨ੍ਤਿ ਰਜਿਤਚੀਵਰਤੋ ਯਾਵ ਅਪ੍ਪਮਤ੍ਤਕਮ੍ਪਿ ਰਜਨਂ ਗਲ਼ਤਿ, ਨ ਤਾਵ ਪਕ੍ਕਮਿਤਬ੍ਬਂ. ਨ ਉਪਜ੍ਝਾਯਂ ਅਨਾਪੁਚ੍ਛਾ ਏਕਚ੍ਚਸ੍ਸ ਪਤ੍ਤੋ ਦਾਤਬ੍ਬੋਤਿਆਦਿ ਸਬ੍ਬਂ ਉਪਜ੍ਝਾਯਸ੍ਸ ਵਿਸਭਾਗਪੁਗ੍ਗਲਾਨਂ ਵਸੇਨ ਕਥਿਤਂ. ਏਤ੍ਥ ਚ ਵਿਸਭਾਗਪੁਗ੍ਗਲਾਨਨ੍ਤਿ ਲਜ੍ਜਿਨੋ ਵਾ ਅਲਜ੍ਜਿਨੋ ਵਾ ਉਪਜ੍ਝਾਯਸ੍ਸ ਅਵਡ੍ਢਿਕਾਮੇ ਸਨ੍ਧਾਯ ਵੁਤ੍ਤਂ. ਸਚੇ ਪਨ ਉਪਜ੍ਝਾਯੋ ਅਲਜ੍ਜੀ ਓਵਾਦਮ੍ਪਿ ਨ ਗਣ੍ਹਾਤਿ, ਲਜ੍ਜਿਨੋ ਚ ਏਤਸ੍ਸ ਵਿਸਭਾਗਾ ਹੋਨ੍ਤਿ, ਤਤ੍ਥ ਉਪਜ੍ਝਾਯਂ ਵਿਹਾਯ ਲਜ੍ਜੀਹੇਵ ਸਦ੍ਧਿਂ ਆਮਿਸਾਦਿਪਰਿਭੋਗੋ ਕਾਤਬ੍ਬੋ. ਉਪਜ੍ਝਾਯਾਦਿਭਾਵੋ ਹੇਤ੍ਥ ਨਪ੍ਪਮਾਣਨ੍ਤਿ ਦਟ੍ਠਬ੍ਬਂ. ਪਰਿਵੇਣਂ ਗਨ੍ਤ੍ਵਾਤਿ ਉਪਜ੍ਝਾਯਸ੍ਸ ਪਰਿਵੇਣਂ ਗਨ੍ਤ੍ਵਾ. ਸੁਸਾਨਨ੍ਤਿ ਇਦਂ ਉਪਲਕ੍ਖਣਂ. ਉਪਚਾਰਸੀਮਤੋ ਬਹਿ ਗਨ੍ਤੁਕਾਮੇਨ ਅਨਾਪੁਚ੍ਛਾ ਗਨ੍ਤੁਂ ਨ ਵਟ੍ਟਤਿ. ਵੁਟ੍ਠਾਨਮਸ੍ਸ ਆਗਮੇਤਬ੍ਬਨ੍ਤਿ ਗੇਲਞ੍ਞਤੋ ਵੁਟ੍ਠਾਨਂ ਅਸ੍ਸ ਆਗਮੇਤਬ੍ਬਂ.

ਉਪਜ੍ਝਾਯਵਤ੍ਤਕਥਾਵਣ੍ਣਨਾ ਨਿਟ੍ਠਿਤਾ.

ਆਚਰਿਯਵਤ੍ਤਕਥਾਵਣ੍ਣਨਾ

੧੮੪. ਆਚਰਿਯਵਤ੍ਤਕਥਾਯਂ ਕੋ ਆਚਰਿਯੋ, ਕੇਨਟ੍ਠੇਨ ਆਚਰਿਯੋ, ਕਤਿਵਿਧੋ ਆਚਰਿਯੋ, ਕਥਂ ਗਹਿਤੋ ਆਚਰਿਯੋ, ਕੇਨ ਵਤ੍ਤਿਤਬ੍ਬਂ ਆਚਰਿਯਵਤ੍ਤਂ, ਕਤਮਂ ਤਂ ਵਤ੍ਤਨ੍ਤਿ? ਤਤ੍ਥ ਕੋ ਆਚਰਿਯੋਤਿ ‘‘ਅਨੁਜਾਨਾਮਿ, ਭਿਕ੍ਖਵੇ, ਦਸਵਸ੍ਸਂ ਨਿਸ੍ਸਾਯ ਵਤ੍ਥੁਂ ਦਸਵਸ੍ਸੇਨ ਨਿਸ੍ਸਯਂ ਦਾਤੁ’’ਨ੍ਤਿਆਦਿਵਚਨਤੋ (ਮਹਾਵ. ੭੭) ਬ੍ਯਤ੍ਤਿਬਲਸਮ੍ਪਨ੍ਨੋ ਦਸਵਸ੍ਸੋ ਵਾ ਅਤਿਰੇਕਦਸਵਸ੍ਸੋ ਵਾ ਭਿਕ੍ਖੁ ਆਚਰਿਯੋ. ਕੇਨਟ੍ਠੇਨ ਆਚਰਿਯੋਤਿ ਅਨ੍ਤੇਵਾਸਿਕੇਨ ਆਭੁਸੋ ਚਰਿਤਬ੍ਬੋਤਿ ਆਚਰਿਯੋ, ਉਪਟ੍ਠਾਤਬ੍ਬੋਤਿ ਅਤ੍ਥੋ. ਕਤਿਵਿਧੋ ਆਚਰਿਯੋਤਿ ਨਿਸ੍ਸਯਾਚਰਿਯਪਬ੍ਬਜ੍ਜਾਚਰਿਯਉਪਸਮ੍ਪਦਾਚਰਿਯਧਮ੍ਮਾਚਰਿਯਵਸੇਨ ਚਤੁਬ੍ਬਿਧੋ. ਤਤ੍ਥ ਨਿਸ੍ਸਯਂ ਗਹੇਤ੍ਵਾ ਤਂ ਨਿਸ੍ਸਾਯ ਵਤ੍ਥਬ੍ਬੋ ਨਿਸ੍ਸਯਾਚਰਿਯੋ. ਪਬ੍ਬਜਿਤਕਾਲੇ ਸਿਕ੍ਖਿਤਬ੍ਬਸਿਕ੍ਖਾਪਕੋ ਪਬ੍ਬਜ੍ਜਾਚਰਿਯੋ. ਉਪਸਮ੍ਪਦਕਾਲੇ ਕਮ੍ਮਵਾਚਾਨੁਸ੍ਸਾਵਕੋ ਉਪਸਮ੍ਪਦਾਚਰਿਯੋ. ਬੁਦ੍ਧਵਚਨਸਿਕ੍ਖਾਪਕੋ ਧਮ੍ਮਾਚਰਿਯੋ ਨਾਮ. ਕਥਂ ਗਹਿਤੋ ਹੋਤਿ ਆਚਰਿਯੋਤਿ ਅਨ੍ਤੇਵਾਸਿਕੇਨ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ‘‘ਆਚਰਿਯੋ ਮੇ, ਭਨ੍ਤੇ, ਹੋਹਿ, ਆਯਸ੍ਮਤੋ ਨਿਸ੍ਸਾਯ ਵਚ੍ਛਾਮੀ’’ਤਿ ਤਿਕ੍ਖਤ੍ਤੁਂ ਵੁਤ੍ਤੇ ਆਚਰਿਯੋ ‘‘ਸਾਹੂ’’ਤਿ ਵਾ ‘‘ਲਹੂ’’ਤਿ ਵਾ ‘‘ਓਪਾਯਿਕ’’ਨ੍ਤਿ ਵਾ ‘‘ਪਤਿਰੂਪ’’ਨ੍ਤਿ ਵਾ ‘‘ਪਾਸਾਦਿਕੇਨ ਸਮ੍ਪਾਦੇਹੀ’’ਤਿ ਵਾ ਕਾਯੇਨ ਵਿਞ੍ਞਾਪੇਤਿ, ਵਾਚਾਯ ਵਿਞ੍ਞਾਪੇਤਿ, ਕਾਯਵਾਚਾਹਿ ਵਿਞ੍ਞਾਪੇਤਿ, ਗਹਿਤੋ ਹੋਤਿ ਆਚਰਿਯੋ.

ਕੇਨ ਵਤ੍ਤਿਤਬ੍ਬਂ ਆਚਰਿਯਵਤ੍ਤਨ੍ਤਿ ਅਨ੍ਤੇਵਾਸਿਕੇਨ ਵਤ੍ਤਿਤਬ੍ਬਂ ਆਚਰਿਯਵਤ੍ਤਂ. ਬ੍ਯਤ੍ਤੇਨ ਭਿਕ੍ਖੁਨਾ ਪਞ੍ਚ ਵਸ੍ਸਾਨਿ ਨਿਸ੍ਸਾਯ ਵਤ੍ਥਬ੍ਬਂ, ਅਬ੍ਯਤ੍ਤੇਨ ਯਾਵਜੀਵਂ. ਏਤ੍ਥ ਸਚਾਯਂ ਭਿਕ੍ਖੁ ਵੁਡ੍ਢਤਰਂ ਆਚਰਿਯਂ ਨ ਲਭਤਿ, ਉਪਸਮ੍ਪਦਾਯ ਸਟ੍ਠਿਵਸ੍ਸੋ ਵਾ ਸਤ੍ਤਤਿਵਸ੍ਸੋ ਵਾ ਹੋਤਿ, ਨਵਕਤਰਸ੍ਸਪਿ ਬ੍ਯਤ੍ਤਸ੍ਸ ਸਨ੍ਤਿਕੇ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ‘‘ਆਚਰਿਯੋ ਮੇ, ਆਵੁਸੋ, ਹੋਹਿ, ਆਯਸ੍ਮਤੋ ਨਿਸ੍ਸਾਯ ਵਚ੍ਛਾਮੀ’’ਤਿ ਏਵਂ ਤਿਕ੍ਖਤ੍ਤੁਂ ਵਤ੍ਵਾ ਨਿਸ੍ਸਯੋ ਗਹੇਤਬ੍ਬੋ. ਗਾਮਪ੍ਪਵੇਸਨਂ ਆਪੁਚ੍ਛਨ੍ਤੇਨਪਿ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ‘‘ਗਾਮਪ੍ਪਵੇਸਨਂ ਆਪੁਚ੍ਛਾਮਿ ਆਚਰਿਯਾ’’ਤਿ ਵਤ੍ਤਬ੍ਬਂ. ਏਸ ਨਯੋ ਸਬ੍ਬਆਪੁਚ੍ਛਨੇਸੁ. ਕਤਮਂ ਤਂ ਵਤ੍ਤਨ੍ਤਿ ਏਤ੍ਥ ਉਪਜ੍ਝਾਯਵਤ੍ਤਤੋ ਅਞ੍ਞਂ ਨਤ੍ਥੀਤਿ ਆਹ ‘‘ਇਦਮੇਵ ਚ…ਪੇ… ਆਚਰਿਯਵਤ੍ਤਨ੍ਤਿ ਵੁਚ੍ਚਤੀ’’ਤਿ. ਨਨੁ ਉਪਜ੍ਝਾਚਰਿਯਾ ਭਿਨ੍ਨਪਦਤ੍ਥਾ, ਅਥ ਕਸ੍ਮਾ ਇਦਮੇਵ ‘‘ਆਚਰਿਯਵਤ੍ਤ’’ਨ੍ਤਿ ਵੁਚ੍ਚਤੀਤਿ ਆਹ ‘‘ਆਚਰਿਯਸ੍ਸ ਕਤ੍ਤਬ੍ਬਤ੍ਤਾ’’ਤਿ. ਯਥਾ ਏਕੋਪਿ ਭਿਕ੍ਖੁ ਮਾਤੁਭਾਤਾਭੂਤਤ੍ਤਾ ‘‘ਮਾਤੁਲੋ’’ਤਿ ਚ ਧਮ੍ਮੇ ਸਿਕ੍ਖਾਪਕਤ੍ਤਾ ‘‘ਆਚਰਿਯੋ’’ਤਿ ਚ ਵੁਚ੍ਚਤਿ, ਏਵਂ ਏਕਮੇਵ ਵਤ੍ਤਂ ਉਪਜ੍ਝਾਯਸ੍ਸ ਕਤ੍ਤਬ੍ਬਤ੍ਤਾ ‘‘ਉਪਜ੍ਝਾਯਵਤ੍ਤ’’ਨ੍ਤਿ ਚ ਆਚਰਿਯਸ੍ਸ ਕਤ੍ਤਬ੍ਬਤ੍ਤਾ ‘‘ਆਚਰਿਯਵਤ੍ਤ’’ਨ੍ਤਿ ਚ ਵੁਚ੍ਚਤੀਤਿ ਅਧਿਪ੍ਪਾਯੋ. ਏਵਂ ਸਨ੍ਤੇਪਿ ਨਾਮੇ ਭਿਨ੍ਨੇ ਅਤ੍ਥੋ ਭਿਨ੍ਨੋ ਸਿਯਾਤਿ ਆਹ ‘‘ਨਾਮਮਤ੍ਤਮੇਵ ਹੇਤ੍ਥ ਨਾਨ’’ਨ੍ਤਿ. ਯਥਾ ‘‘ਇਨ੍ਦੋ ਸਕ੍ਕੋ’’ਤਿਆਦੀਸੁ ਨਾਮਮਤ੍ਤਮੇਵ ਭਿਨ੍ਨਂ, ਨ ਅਤ੍ਥੋ, ਏਵਮੇਤ੍ਥਾਪੀਤਿ ਦਟ੍ਠਬ੍ਬੋਤਿ.

ਇਦਾਨਿ ਤਸ੍ਮਿਂ ਵਤ੍ਤੇ ਸਦ੍ਧਿਵਿਹਾਰਿਕਅਨ੍ਤੇਵਾਸਿਕਾਨਂ ਵਸੇਨ ਲਬ੍ਭਮਾਨਂ ਕਞ੍ਚਿ ਵਿਸੇਸਂ ਦਸ੍ਸੇਨ੍ਤੋ ‘‘ਤਤ੍ਥ ਯਾਵ ਚੀਵਰਰਜਨ’’ਨ੍ਤ੍ਯਾਦਿਮਾਹ. ਤਤੋ ਉਪਜ੍ਝਾਯਾਚਰਿਯਾਨਂ ਵਸੇਨ ਵਿਸੇਸਂ ਦਸ੍ਸੇਤੁਂ ‘‘ਉਪਜ੍ਝਾਯੇ’’ਤ੍ਯਾਦਿਮਾਹ. ਤੇਸੁ ਵਤ੍ਤਂ ਸਾਦਿਯਨ੍ਤੇਸੁ ਆਪਤ੍ਤਿ, ਅਸਾਦਿਯਨ੍ਤੇਸੁ ਅਨਾਪਤ੍ਤਿ, ਤੇਸੁ ਅਜਾਨਨ੍ਤੇਸੁ, ਏਕਸ੍ਸ ਭਾਰਕਰਣੇਪਿ ਅਨਾਪਤ੍ਤੀਤਿ ਅਯਮੇਤ੍ਥ ਪਿਣ੍ਡਤ੍ਥੋ. ਇਦਾਨਿ ਅਨ੍ਤੇਵਾਸਿਕਵਿਸੇਸਵਸੇਨ ਲਬ੍ਭਮਾਨਵਿਸੇਸਂ ਦਸ੍ਸੇਤੁਮਾਹ ‘‘ਏਤ੍ਥ ਚਾ’’ਤਿਆਦਿ.

ਆਚਰਿਯਵਤ੍ਤਕਥਾਵਣ੍ਣਨਾ ਨਿਟ੍ਠਿਤਾ.

ਸਦ੍ਧਿਵਿਹਾਰਿਕਵਤ੍ਤਕਥਾਵਣ੍ਣਨਾ

ਸਦ੍ਧਿਵਿਹਾਰਿਕਵਤ੍ਤੇ ਕੋ ਸਦ੍ਧਿਵਿਹਾਰਿਕੋ, ਕੇਨਟ੍ਠੇਨ ਸਦ੍ਧਿਵਿਹਾਰਿਕੋ, ਕੇਨ ਵਤ੍ਤਿਤਬ੍ਬਂ ਸਦ੍ਧਿਵਿਹਾਰਿਕਵਤ੍ਤਂ, ਕਤਮਂ ਤਂ ਵਤ੍ਤਨ੍ਤਿ? ਤਤ੍ਥ ਕੋ ਸਦ੍ਧਿਵਿਹਾਰਿਕੋਤਿ ਉਪਸਮ੍ਪਨ੍ਨੋ ਵਾ ਹੋਤੁ ਸਾਮਣੇਰੋ ਵਾ, ਯੋ ਉਪਜ੍ਝਂ ਗਣ੍ਹਾਤਿ, ਸੋ ਸਦ੍ਧਿਵਿਹਾਰਿਕੋ ਨਾਮ. ਕੇਨਟ੍ਠੇਨ ਸਦ੍ਧਿਵਿਹਾਰਿਕੋਤਿ ਉਪਜ੍ਝਾਯੇਨ ਸਦ੍ਧਿਂ ਵਿਹਾਰੋ ਏਤਸ੍ਸ ਅਤ੍ਥੀਤਿ ਸਦ੍ਧਿਵਿਹਾਰਿਕੋਤਿ ਅਤ੍ਥੇਨ. ਕੇਨ ਵਤ੍ਤਿਤਬ੍ਬਂ ਸਦ੍ਧਿਵਿਹਾਰਿਕਵਤ੍ਤਨ੍ਤਿ ਉਪਜ੍ਝਾਯੇਨ ਵਤ੍ਤਿਤਬ੍ਬਂ. ਤੇਨ ਵੁਤ੍ਤਂ ਵਤ੍ਤਕ੍ਖਨ੍ਧਕੇ (ਮਹਾਵ. ੩੭੮) ‘‘ਤੇਨ ਹਿ, ਭਿਕ੍ਖਵੇ, ਉਪਜ੍ਝਾਯਾਨਂ ਸਦ੍ਧਿਵਿਹਾਰਿਕੇਸੁ ਵਤ੍ਤਂ ਪਞ੍ਞਪੇਸ੍ਸਾਮਿ, ਯਥਾ ਉਪਜ੍ਝਾਯੇਹਿ ਸਦ੍ਧਿਵਿਹਾਰਿਕੇਸੁ ਵਤ੍ਤਿਤਬ੍ਬ’’ਨ੍ਤਿ. ਕਤਮਂ ਤਂ ਵਤ੍ਤਨ੍ਤਿ ਇਦਾਨਿ ਪਕਰਣਾਗਤਂ. ਇਮਸ੍ਮਿਂ ਪਨ ਪਕਰਣੇ ਸਙ੍ਖੇਪਰੁਚਿਤ੍ਤਾ, ਆਚਰਿਯਸਦ੍ਧਿਵਿਹਾਰਿਕਅਨ੍ਤੇਵਾਸਿਕਵਤ੍ਤਾਨਞ੍ਚ ਸਮਾਨਤ੍ਤਾ ਦ੍ਵੇਪਿ ਏਕਤੋ ਵੁਤ੍ਤਾ, ਤਥਾਪਿ ਵਤ੍ਤਕ੍ਖਨ੍ਧਕੇ ਵਿਸੁਂ ਵਿਸੁਂ ਆਗਤਤ੍ਤਾ ਵਿਸੁਂ ਵਿਸੁਂਯੇਵ ਕਥਯਾਮ.

ਸਙ੍ਗਹੇਤਬ੍ਬੋ ਅਨੁਗ੍ਗਹੇਤਬ੍ਬੋਤਿ ਉਦ੍ਦੇਸਾਦੀਹਿਸ੍ਸ ਸਙ੍ਗਹੋ ਚ ਅਨੁਗ੍ਗਹੋ ਚ ਕਾਤਬ੍ਬੋ. ਤਤ੍ਥ ਉਦ੍ਦੇਸੋਤਿ ਪਾਲ਼ਿਵਚਨਂ. ਪਰਿਪੁਚ੍ਛਾਤਿ ਪਾਲ਼ਿਯਾ ਅਤ੍ਥਵਣ੍ਣਨਾ. ਓਵਾਦੋਤਿ ਅਨੋਤਿਣ੍ਣੇ ਵਤ੍ਥੁਸ੍ਮਿਂ ‘‘ਇਦਂ ਕਰੋਹਿ, ਇਦਂ ਮਾ ਕਰਿਤ੍ਥਾ’’ਤਿ ਵਚਨਂ. ਅਨੁਸਾਸਨੀਤਿ ਓਤਿਣ੍ਣੇ ਵਤ੍ਥੁਸ੍ਮਿਂ. ਅਪਿਚ ਓਤਿਣ੍ਣੇ ਵਾ ਅਨੋਤਿਣ੍ਣੇ ਵਾ ਪਠਮਂ ਵਚਨਂ ਓਵਾਦੋ, ਪੁਨਪ੍ਪੁਨਂ ਵਚਨਂ ਅਨੁਸਾਸਨੀਤਿ ਦਟ੍ਠਬ੍ਬਂ. ਸਚੇ ਉਪਜ੍ਝਾਯਸ੍ਸ ਪਤ੍ਤੋ ਹੋਤੀਤਿ ਸਚੇ ਅਤਿਰੇਕਪਤ੍ਤੋ ਹੋਤਿ. ਏਸ ਨਯੋ ਸਬ੍ਬਤ੍ਥ. ਪਰਿਕ੍ਖਾਰੋਤਿ ਅਞ੍ਞੋਪਿ ਸਮਣਪਰਿਕ੍ਖਾਰੋ. ਇਧ ਉਸ੍ਸੁਕ੍ਕਂ ਨਾਮ ਧਮ੍ਮਿਯੇਨ ਨਯੇਨ ਉਪ੍ਪਜ੍ਜਮਾਨਉਪਾਯਪਰਿਯੇਸਨਂ. ਇਤੋ ਪਰਂ ਦਨ੍ਤਕਟ੍ਠਦਾਨਂ ਆਦਿਂ ਕਤ੍ਵਾ ਆਚਮਨਕੁਮ੍ਭਿਯਾ ਉਦਕਸਿਞ੍ਚਨਪਰਿਯੋਸਾਨਂ ਵਤ੍ਤਂ ਗਿਲਾਨਸ੍ਸੇਵ ਸਦ੍ਧਿਵਿਹਾਰਿਕਸ੍ਸ ਕਾਤਬ੍ਬਂ. ਅਨਭਿਰਤਿਵੂਪਕਾਸਨਾਦਿ ਪਨ ਅਗਿਲਾਨਸ੍ਸਪਿ ਕਤ੍ਤਬ੍ਬਮੇਵ. ਚੀਵਰਂ ਰਜਨ੍ਤੇਨਾਤਿ ‘‘ਏਵਂ ਰਜੇਯ੍ਯਾਸੀ’’ਤਿ ਉਪਜ੍ਝਾਯਤੋ ਉਪਾਯਂ ਸੁਤ੍ਵਾ ਰਜਨ੍ਤੇਨ. ਸੇਸਂ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਸਙ੍ਗਹੇਤਬ੍ਬੋ ਅਨੁਗ੍ਗਹੇਤਬ੍ਬੋਤਿਆਦੀਸੁ ਅਨਾਦਰਿਯਂ ਪਟਿਚ੍ਚ ਧਮ੍ਮਾਮਿਸੇਹਿ ਅਸਙ੍ਗਣ੍ਹਨ੍ਤਾਨਂ ਆਚਰਿਯੁਪਜ੍ਝਾਯਾਨਂ ਦੁਕ੍ਕਟਂ ਵਤ੍ਤਭੇਦਤ੍ਤਾ. ਤੇਨੇਵ ਪਰਿਵਾਰੇਪਿ (ਪਰਿ. ੩੨੨) ‘‘ਨ ਦੇਨ੍ਤੋ ਆਪਜ੍ਜਤੀ’’ਤਿ ਵੁਤ੍ਤਂ. ਸੇਸਂ ਸੁਵਿਞ੍ਞੇਯ੍ਯਮੇਵ.

ਸਦ੍ਧਿਵਿਹਾਰਿਕਵਤ੍ਤਕਥਾਵਣ੍ਣਨਾ ਨਿਟ੍ਠਿਤਾ.

ਅਨ੍ਤੇਵਾਸਿਕਵਤ੍ਤਕਥਾਵਣ੍ਣਨਾ

ਅਨ੍ਤੇਵਾਸਿਕਵਤ੍ਤੇ ਕੋ ਅਨ੍ਤੇਵਾਸਿਕੋ, ਕੇਨਟ੍ਠੇਨ ਅਨ੍ਤੇਵਾਸਿਕੋ, ਕਤਿਵਿਧਾ ਅਨ੍ਤੇਵਾਸਿਕਾ, ਕੇਨ ਵਤ੍ਤਿਤਬ੍ਬਂ ਅਨ੍ਤੇਵਾਸਿਕਵਤ੍ਤਂ, ਕਤਮਂ ਤਂ ਵਤ੍ਤਨ੍ਤਿ? ਤਤ੍ਥ ਕੋ ਅਨ੍ਤੇਵਾਸਿਕੋਤਿ ਉਪਸਮ੍ਪਨ੍ਨੋ ਵਾ ਹੋਤੁ ਸਾਮਣੇਰੋ ਵਾ, ਯੋ ਆਚਰਿਯਸ੍ਸ ਸਨ੍ਤਿਕੇ ਨਿਸ੍ਸਯਂ ਗਣ੍ਹਾਤਿ, ਯੋ ਵਾ ਆਚਰਿਯਸ੍ਸ ਓਵਾਦਂ ਗਹੇਤ੍ਵਾ ਪਬ੍ਬਜਤਿ, ਯੋ ਵਾ ਤੇਨਾਨੁਸ੍ਸਾਵਿਤੋ ਹੁਤ੍ਵਾ ਉਪਸਮ੍ਪਜ੍ਜਤਿ, ਯੋ ਵਾ ਤਸ੍ਸ ਸਨ੍ਤਿਕੇ ਧਮ੍ਮਂ ਪਰਿਯਾਪੁਣਾਤਿ, ਸੋ ਸਬ੍ਬੋ ਅਨ੍ਤੇਵਾਸਿਕੋਤਿ ਵੇਦਿਤਬ੍ਬੋ. ਤਤ੍ਥ ਪਠਮੋ ਨਿਸ੍ਸਯਨ੍ਤੇਵਾਸਿਕੋ ਨਾਮ, ਦੁਤਿਯੋ ਪਬ੍ਬਜ੍ਜਨ੍ਤੇਵਾਸਿਕੋ ਨਾਮ, ਤਤਿਯੋ ਉਪਸਮ੍ਪਦਨ੍ਤੇਵਾਸਿਕੋ ਨਾਮ, ਚਤੁਤ੍ਥੋ ਧਮ੍ਮਨ੍ਤੇਵਾਸਿਕੋ ਨਾਮ. ਅਞ੍ਞਤ੍ਥ ਪਨ ਸਿਪ੍ਪਨ੍ਤੇਵਾਸਿਕੋਪਿ ਆਗਤੋ, ਸੋ ਇਧ ਨਾਧਿਪ੍ਪੇਤੋ. ਕੇਨਟ੍ਠੇਨ ਅਨ੍ਤੇਵਾਸਿਕੋਤਿ ਅਨ੍ਤੇ ਵਸਤੀਤਿ ਅਨ੍ਤੇਵਾਸਿਕੋ ਅਲੁਤ੍ਤਸਮਾਸਵਸੇਨ. ਕਤਿਵਿਧਾ ਅਨ੍ਤੇਵਾਸਿਕਾਤਿ ਯਥਾਵੁਤ੍ਤਨਯੇਨ ਚਤੁਬ੍ਬਿਧਾ ਅਨ੍ਤੇਵਾਸਿਕਾ.

ਕੇਨ ਵਤ੍ਤਿਤਬ੍ਬਂ ਅਨ੍ਤੇਵਾਸਿਕਵਤ੍ਤਨ੍ਤਿ ਚਤੁਬ੍ਬਿਧੇਹਿ ਆਚਰਿਯੇਹਿ ਅਨ੍ਤੇਵਾਸਿਕੇਸੁ ਵਤ੍ਤਿਤਬ੍ਬਂ. ਯਥਾਹ ਵਤ੍ਤਕ੍ਖਨ੍ਧਕੇ (ਚੂਲ਼ਵ. ੩੮੨) ‘‘ਤੇਨ ਹਿ, ਭਿਕ੍ਖਵੇ, ਆਚਰਿਯਾਨਂ ਅਨ੍ਤੇਵਾਸਿਕੇਸੁ ਵਤ੍ਤਂ ਪਞ੍ਞਪੇਸ੍ਸਾਮਿ, ਯਥਾ ਆਚਰਿਯੇਹਿ ਅਨ੍ਤੇਵਾਸਿਕੇਸੁ ਵਤ੍ਤਿਤਬ੍ਬ’’ਨ੍ਤਿ. ਕਤਮਂ ਤਂ ਵਤ੍ਤਨ੍ਤਿ ਯਂ ਭਗਵਤਾ ਵਤ੍ਤਕ੍ਖਨ੍ਧਕੇ ਵੁਤ੍ਤਂ, ਇਧ ਚ ਸਙ੍ਖੇਪੇਨ ਦਸ੍ਸਿਤਂ, ਤਂ ਵਤ੍ਤਨ੍ਤਿ. ਇਧ ਪਨ ਅਤ੍ਥੋ ਸਦ੍ਧਿਵਿਹਾਰਿਕਵਤ੍ਤੇ ਵੁਤ੍ਤਨਯੇਨੇਵ ਵੇਦਿਤਬ੍ਬੋ. ਅਯਂ ਪਨ ਵਿਸੇਸੋ – ਏਤੇਸੁ ਪਬ੍ਬਜ੍ਜਨ੍ਤੇਵਾਸਿਕੋ ਚ ਉਪਸਮ੍ਪਦਨ੍ਤੇਵਾਸਿਕੋ ਚ ਆਚਰਿਯਸ੍ਸ ਯਾਵਜੀਵਂ ਭਾਰੋ, ਨਿਸ੍ਸਯਨ੍ਤੇਵਾਸਿਕੋ ਚ ਧਮ੍ਮਨ੍ਤੇਵਾਸਿਕੋ ਚ ਯਾਵ ਸਮੀਪੇ ਵਸਨ੍ਤਿ, ਤਾਵਦੇਵ, ਤਸ੍ਮਾ ਆਚਰਿਯੇਹਿਪਿ ਤੇਸੁ ਸਮ੍ਮਾ ਵਤ੍ਤਿਤਬ੍ਬਂ. ਆਚਰਿਯਨ੍ਤੇਵਾਸਿਕੇਸੁ ਹਿ ਯੋ ਯੋ ਨ ਸਮ੍ਮਾ ਵਤ੍ਤਤਿ, ਤਸ੍ਸ ਤਸ੍ਸ ਆਪਤ੍ਤਿ ਵੇਦਿਤਬ੍ਬਾ.

ਅਨ੍ਤੇਵਾਸਿਕਵਤ੍ਤਕਥਾਵਣ੍ਣਨਾ ਨਿਟ੍ਠਿਤਾ.

ਆਗਨ੍ਤੁਕਵਤ੍ਤਕਥਾਵਣ੍ਣਨਾ

੧੮੫. ਆਗਨ੍ਤੁਕਵਤ੍ਤੇ ਆਗਚ੍ਛਤੀਤਿ ਆਗਨ੍ਤੁਕੋ, ਤੇਨ ਵਤ੍ਤਿਤਬ੍ਬਨ੍ਤਿ ਆਗਨ੍ਤੁਕਵਤ੍ਤਂ. ‘‘ਇਦਾਨਿ ਆਰਾਮਂ ਪਵਿਸਿਸ੍ਸਾਮੀ’’ਤਿ ਇਮਿਨਾ ਉਪਚਾਰਸੀਮਾਸਮੀਪਂ ਦਸ੍ਸੇਤਿ, ਤਸ੍ਮਾ ਉਪਚਾਰਸੀਮਾਸਮੀਪਂ ਪਤ੍ਵਾ ਉਪਾਹਨਾਓਮੁਞ੍ਚਨਾਦਿ ਸਬ੍ਬਂ ਕਾਤਬ੍ਬਂ. ਗਹੇਤ੍ਵਾਤਿ ਉਪਾਹਨਦਣ੍ਡਕੇਨ ਗਹੇਤ੍ਵਾ. ਉਪਾਹਨਪੁਞ੍ਛਨਚੋਲ਼ਕਂ ਪੁਚ੍ਛਿਤ੍ਵਾ ਉਪਾਹਨਾ ਪੁਞ੍ਛਿਤਬ੍ਬਾਤਿ ‘‘ਕਤਰਸ੍ਮਿਂ ਠਾਨੇ ਉਪਾਹਨਪੁਞ੍ਛਨਚੋਲ਼ਕ’’ਨ੍ਤਿ ਆਵਾਸਿਕੇ ਭਿਕ੍ਖੂ ਪੁਚ੍ਛਿਤ੍ਵਾ. ਪਤ੍ਥਰਿਤਬ੍ਬਨ੍ਤਿ ਸੁਕ੍ਖਾਪਨਤ੍ਥਾਯ ਆਤਪੇ ਪਤ੍ਥਰਿਤਬ੍ਬਂ. ਸਚੇ ਨਵਕੋ ਹੋਤਿ, ਅਭਿਵਾਦਾਪੇਤਬ੍ਬੋਤਿ ਤਸ੍ਸ ਵਸ੍ਸੇ ਪੁਚ੍ਛਿਤੇ ਯਦਿ ਦਹਰੋ ਹੋਤਿ, ਸਯਮੇਵ ਵਨ੍ਦਿਸ੍ਸਤਿ, ਤਦਾ ਇਮਿਨਾ ਵਨ੍ਦਾਪਿਤੋ ਹੋਤਿ. ਨਿਲ੍ਲੋਕੇਤਬ੍ਬੋਤਿ ਓਲੋਕੇਤਬ੍ਬੋ. ਬਹਿ ਠਿਤੇਨਾਤਿ ਬਹਿ ਨਿਕ੍ਖਮਨ੍ਤਸ੍ਸ ਅਹਿਨੋ ਵਾ ਅਮਨੁਸ੍ਸਸ੍ਸ ਵਾ ਮਗ੍ਗਂ ਠਤ੍ਵਾ ਠਿਤੇਨ ਨਿਲ੍ਲੋਕੇਤਬ੍ਬੋ. ਸੇਸਂ ਪੁਬ੍ਬੇ ਵੁਤ੍ਤਨਯੇਨੇਵ ਵੇਦਿਤਬ੍ਬਂ.

ਆਗਨ੍ਤੁਕਵਤ੍ਤਕਥਾਵਣ੍ਣਨਾ ਨਿਟ੍ਠਿਤਾ.

ਆਵਾਸਿਕਵਤ੍ਤਕਥਾਵਣ੍ਣਨਾ

੧੮੬. ਆਵਾਸਿਕਵਤ੍ਤੇ ਆਵਸਤੀਤਿ ਆਵਾਸਿਕੋ, ਤੇਨ ਵਤ੍ਤਿਤਬ੍ਬਨ੍ਤਿ ਆਵਾਸਿਕਵਤ੍ਤਂ. ਤਤ੍ਥ ਆਵਾਸਿਕੇਨ ਭਿਕ੍ਖੁਨਾ ਆਗਨ੍ਤੁਕਂ ਭਿਕ੍ਖੁਂ ਵੁਡ੍ਢਤਰਂ ਦਿਸ੍ਵਾ ਆਸਨਂ ਪਞ੍ਞਪੇਤਬ੍ਬਨ੍ਤਿਆਦਿ ਪਾਲ਼ਿਯਂ (ਚੂਲ਼ਵ. ੩੫੯) ਆਗਤਞ੍ਚ ਅਟ੍ਠਕਥਾਯਂ ਆਗਤਞ੍ਚ (ਚੂਲ਼ਵ. ਅਟ੍ਠ. ੩੫੯) ਗਹੇਤਬ੍ਬਂ, ਗਹੇਤ੍ਵਾ ਵੁਤ੍ਤਤ੍ਤਾ ਪਾਕਟਮੇਵ, ਉਪਾਹਨਪੁਞ੍ਛਨਂ ਪਨ ਅਤ੍ਤਨੋ ਰੁਚਿਵਸੇਨ ਕਾਤਬ੍ਬਂ. ਤੇਨੇਵ ਹੇਤ੍ਥ ‘‘ਸਚੇ ਉਸ੍ਸਹਤੀ’’ਤਿ ਵੁਤ੍ਤਂ, ਤਸ੍ਮਾ ਉਪਾਹਨਾ ਅਪੁਞ੍ਛਨ੍ਤਸ੍ਸਪਿ ਅਨਾਪਤ੍ਤਿ. ਸੇਨਾਸਨਂ ਪਞ੍ਞਪੇਤਬ੍ਬਨ੍ਤਿ ਏਤ੍ਥ ‘‘ਕਤ੍ਥ ਮਯ੍ਹਂ ਸੇਨਾਸਨਂ ਪਾਪੁਣਾਤੀ’’ਤਿ ਪੁਚ੍ਛਿਤੇਨ ਸੇਨਾਸਨਂ ਪਞ੍ਞਪੇਤਬ੍ਬਂ, ‘‘ਏਤਂ ਸੇਨਾਸਨਂ ਤੁਮ੍ਹਾਕਂ ਪਾਪੁਣਾਤੀ’’ਤਿ ਏਵਂ ਆਚਿਕ੍ਖਿਤਬ੍ਬਨ੍ਤਿ ਅਤ੍ਥੋ. ਪਪ੍ਫੋਟੇਤ੍ਵਾ ਪਤ੍ਥਰਿਤੁਂ ਪਨ ਵਟ੍ਟਤਿਯੇਵ. ਏਤੇਨ ਮਞ੍ਚਪੀਠਾਦਿਂ ਪਪ੍ਫੋਟੇਤ੍ਵਾ ਪਤ੍ਥਰਿਤ੍ਵਾ ਉਪਰਿ ਪਚ੍ਚਤ੍ਥਰਣਂ ਦਤ੍ਵਾ ਦਾਨਮ੍ਪਿ ਸੇਨਾਸਨਪਞ੍ਞਾਪਨਮੇਵਾਤਿ ਦਸ੍ਸੇਤਿ. ਮਹਾਆਵਾਸੇਪਿ ਅਤ੍ਤਨੋ ਸਨ੍ਤਿਕਂ ਸਮ੍ਪਤ੍ਤਸ੍ਸ ਆਗਨ੍ਤੁਕਸ੍ਸ ਵਤ੍ਤਂ ਅਕਾਤੁਂ ਨ ਲਬ੍ਭਤਿ. ਸੇਸਂ ਪੁਰਿਮਸਦਿਸਮੇਵ.

ਆਵਾਸਿਕਵਤ੍ਤਕਥਾਵਣ੍ਣਨਾ ਨਿਟ੍ਠਿਤਾ.

ਗਮਿਕਵਤ੍ਤਕਥਾਵਣ੍ਣਨਾ

੧੮੭. ਗਮਿਕਵਤ੍ਤੇ ਗਨ੍ਤੁਂ ਭਬ੍ਬੋਤਿ ਗਮਿਕੋ, ਤੇਨ ਵਤ੍ਤਿਤਬ੍ਬਨ੍ਤਿ ਗਮਿਕਵਤ੍ਤਂ. ਤਤ੍ਰਾਯਂ ਅਨੁਤ੍ਤਾਨਪਦਵਣ੍ਣਨਾ – ਦਾਰੁਭਣ੍ਡਨ੍ਤਿ ਸੇਨਾਸਨਕ੍ਖਨ੍ਧਕੇ (ਚੂਲ਼ਵ. ੩੨੨) ਵੁਤ੍ਤਂ ਮਞ੍ਚਪੀਠਾਦਿ. ਮਤ੍ਤਿਕਾਭਣ੍ਡਮ੍ਪਿ ਰਜਨਭਾਜਨਾਦਿ ਸਬ੍ਬਂ ਤਤ੍ਥ ਵੁਤ੍ਤਪ੍ਪਭੇਦਮੇਵ. ਤਂ ਸਬ੍ਬਂ ਅਗ੍ਗਿਸਾਲਾਯਂ ਵਾ ਅਞ੍ਞਤਰਸ੍ਮਿਂ ਵਾ ਗੁਤ੍ਤਟ੍ਠਾਨੇ ਪਟਿਸਾਮੇਤ੍ਵਾ ਗਨ੍ਤਬ੍ਬਂ, ਅਨੋਵਸ੍ਸਕੇ ਪਬ੍ਭਾਰੇਪਿ ਠਪੇਤੁਂ ਵਟ੍ਟਤਿ. ਸੇਨਾਸਨਂ ਆਪੁਚ੍ਛਿਤ੍ਵਾ ਪਕ੍ਕਮਿਤਬ੍ਬਨ੍ਤਿ ਏਤ੍ਥ ਯਂ ਪਾਸਾਣਪਿਟ੍ਠਿਯਂ ਵਾ ਪਾਸਾਣਤ੍ਥਮ੍ਭੇਸੁ ਵਾ ਕਤਸੇਨਾਸਨਂ, ਯਤ੍ਥ ਉਪਚਿਕਾ ਨਾਰੋਹਨ੍ਤਿ, ਤਂ ਅਨਾਪੁਚ੍ਛਨ੍ਤਸ੍ਸਪਿ ਅਨਾਪਤ੍ਤਿ. ਚਤੂਸੁ ਪਾਸਾਣੇਸੂਤਿਆਦਿ ਉਪਚਿਕਾਨਂ ਉਪ੍ਪਤ੍ਤਿਟ੍ਠਾਨੇ ਪਣ੍ਣਸਾਲਾਦਿਸੇਨਾਸਨੇ ਕਤ੍ਤਬ੍ਬਾਕਾਰਦਸ੍ਸਨਤ੍ਥਂ ਵੁਤ੍ਤਂ. ਅਪ੍ਪੇਵ ਨਾਮ ਅਙ੍ਗਾਨਿਪਿ ਸੇਸੇਯ੍ਯੁਨ੍ਤਿ ਅਯਂ ਅਜ੍ਝੋਕਾਸੇ ਠਪਿਤਮ੍ਹਿ ਆਨਿਸਂਸੋ. ਓਵਸ੍ਸਕਗੇਹੇ ਪਨ ਤਿਣੇਸੁ ਚ ਮਤ੍ਤਿਕਾਪਿਣ੍ਡੇਸੁ ਚ ਉਪਰਿ ਪਤਨ੍ਤੇਸੁ ਮਞ੍ਚਪੀਠਾਨਂ ਅਙ੍ਗਾਨਿਪਿ ਵਿਨਸ੍ਸਨ੍ਤਿ.

ਗਮਿਕਵਤ੍ਤਕਥਾਵਣ੍ਣਨਾ ਨਿਟ੍ਠਿਤਾ.

ਭਤ੍ਤਗ੍ਗਵਤ੍ਤਕਥਾਵਣ੍ਣਨਾ

੧੮੮. ਵਤ੍ਤਕ੍ਖਨ੍ਧਕੇ ਇਮਸ੍ਮਿਂ ਠਾਨੇ ਅਨੁਮੋਦਨਵਤ੍ਤਂ ਆਗਤਂ, ਤਤੋ ਭਤ੍ਤਗ੍ਗਵਤ੍ਤਂ. ਸਾਰਤ੍ਥਦੀਪਨਿਯਞ੍ਚ (ਸਾਰਤ੍ਥ. ਟੀ. ਚੂਲ਼ਵਗ੍ਗ ੩.੩੭੩-੩੭੪) ‘‘ਇਮਸ੍ਮਿਂ ਵਤ੍ਤਕ੍ਖਨ੍ਧਕੇ (ਚੂਲ਼ਵ. ੩੫੬) ਆਗਤਾਨਿ ਆਗਨ੍ਤੁਕਾਵਾਸਿਕਗਮਿਯਾਨੁਮੋਦਨਭਤ੍ਤਗ੍ਗਪਿਣ੍ਡਚਾਰਿਕਾਰਞ੍ਞਿਕਸੇਨਾਸਨਜਨ੍ਤਾਘਰਵਚ੍ਚਕੁਟਿਉਪਜ੍ਝਾਯਾਚਰਿਯਸਦ੍ਧਿਵਿਹਾਰਿਕਅਨ੍ਤੇਵਾਸਿਕਵਤ੍ਤਾਨਿ ਚੁਦ੍ਦਸ ਮਹਾਵਤ੍ਤਾਨਿ ਨਾਮਾ’’ਤਿ ਅਨੁਕ੍ਕਮੋ ਵੁਤ੍ਤੋ, ਇਧ ਪਨ ਵਿਨਯਸਙ੍ਗਹਪ੍ਪਕਰਣੇ ਗਮਿਕਵਤ੍ਤਤੋ ਭਤ੍ਤਗ੍ਗਵਤ੍ਤਂ ਆਗਤਂ, ਅਨੁਮੋਦਨਵਤ੍ਤਂ ਪਨ ਵਿਸੁਂ ਅਵਤ੍ਵਾ ਭਤ੍ਤਗ੍ਗਵਤ੍ਤੇਯੇਵ ਅਨ੍ਤੋਗਧਂ ਕਤ੍ਵਾ ਪਚ੍ਛਾ ਵੁਤ੍ਤਂ ਭਤ੍ਤਗ੍ਗਂ ਗਨ੍ਤ੍ਵਾ ਭਤ੍ਤੇ ਭੁਤ੍ਤੇਯੇਵ ਅਨੁਮੋਦਨਾਕਰਣਤੋ, ਪਾਲ਼ਿਯਞ੍ਚ ਅਞ੍ਞੇਸੁ ਵਤ੍ਤੇਸੁ ਵਿਯ ‘‘ਤੇਨ ਹਿ, ਭਿਕ੍ਖਵੇ, ਭਿਕ੍ਖੁਨਾ ਅਨੁਮੋਦਨਵਤ੍ਤਂ ਪਞ੍ਞਾਪੇਸ੍ਸਾਮੀ’’ਤਿ ਵਿਸੁਂ ਵਤ੍ਤਭਾਵੇਨ ਅਨਾਗਤਤ੍ਤਾ ਭਤ੍ਤਗ੍ਗਵਤ੍ਤੇਯੇਵ ਅਨ੍ਤੋਗਧਨ੍ਤਿ ਆਚਰਿਯਸ੍ਸ ਅਧਿਪ੍ਪਾਯੋ ਸਿਯਾ. ਇਮਸ੍ਸ ਚ ਵਿਨਯਾਲਙ੍ਕਾਰਪਕਰਣਸ੍ਸ ਤਸ੍ਸਾ ਵਣ੍ਣਨਾਭੂਤਤ੍ਤਾ ਸਂਵਣ੍ਣੇਤਬ੍ਬਕ੍ਕਮੇਨੇਵ ਸਂਵਣ੍ਣਨਂ ਕਥਯਿਸ੍ਸਾਮ.

ਭੁਞ੍ਜਿਤਬ੍ਬਨ੍ਤਿ ਭਤ੍ਤਂ. ਅਜਤਿ ਗਚ੍ਛਤਿ ਪਵਤ੍ਤਤਿ ਏਤ੍ਥਾਤਿ ਅਗ੍ਗਂ. ‘‘ਆਦਿਕੋਟ੍ਠਾਸਕੋਟੀਸੁ, ਪੁਰਤੋਗ੍ਗਂ ਵਰੇ ਤੀਸੂ’’ਤਿ ਅਭਿਧਾਨਪ੍ਪਦੀਪਿਕਾਯਂ ਆਗਤੇਪਿ ‘‘ਰਾਜਗ੍ਗਨ੍ਤਿ ਰਾਜਾਰਹਂ, ਸਲਾਕਗ੍ਗਨ੍ਤਿ ਸਲਾਕਗ੍ਗਹਣਟ੍ਠਾਨ’’ਨ੍ਤਿਆਦੀਸੁ ਅਞ੍ਞਤ੍ਥੇਸੁਪਿ ਪਵਤ੍ਤਨਤੋ ਭਤ੍ਤਸ੍ਸ ਅਗ੍ਗਂ ਭਤ੍ਤਗ੍ਗਂ, ਭਤ੍ਤਪਰਿਵਿਸਨਟ੍ਠਾਨਂ, ਭਤ੍ਤਗ੍ਗੇ ਵਤ੍ਤਿਤਬ੍ਬਂ ਵਤ੍ਤਂ ਭਤ੍ਤਗ੍ਗਵਤ੍ਤਨ੍ਤਿ ਵਿਗ੍ਗਹੋ. ਤਤ੍ਥ ਆਰਾਮੇ ਕਾਲੋ ਆਰੋਚਿਤੋ ਹੋਤੀਤਿ ‘‘ਕਾਲੋ ਭਨ੍ਤੇ, ਨਿਟ੍ਠਿਤਂ ਭਤ੍ਤ’’ਨ੍ਤਿ ਆਰੋਚਿਤੋ ਹੋਤਿ. ਤਿਮਣ੍ਡਲਂ ਪਟਿਚ੍ਛਾਦੇਨ੍ਤੇਨਾਤਿ ਦ੍ਵੇ ਜਾਣੁਮਣ੍ਡਲਾਨਿ ਨਾਭਿਮਣ੍ਡਲਞ੍ਚ ਪਟਿਚ੍ਛਾਦੇਨ੍ਤੇਨ. ਪਰਿਮਣ੍ਡਲਂ ਨਿਵਾਸੇਤ੍ਵਾਤਿ ਸਮਨ੍ਤਤੋ ਮਣ੍ਡਲਂ ਨਿਵਾਸੇਤ੍ਵਾ. ਉਦ੍ਧਂ ਨਾਭਿਮਣ੍ਡਲਂ, ਅਧੋ ਜਾਣੁਮਣ੍ਡਲਂ ਪਟਿਚ੍ਛਾਦੇਨ੍ਤੇਨ ਜਾਣੁਮਣ੍ਡਲਸ੍ਸ ਹੇਟ੍ਠਾ ਜਙ੍ਘਟ੍ਠਿਤੋ ਪਟ੍ਠਾਯ ਅਟ੍ਠਙ੍ਗੁਲਮਤ੍ਤਂ ਨਿਵਾਸਨਂ ਓਤਾਰੇਤ੍ਵਾ ਨਿਵਾਸੇਤਬ੍ਬਂ, ਤਤੋ ਪਰਂ ਓਤਾਰੇਨ੍ਤਸ੍ਸ ਦੁਕ੍ਕਟਨ੍ਤਿ ਵੁਤ੍ਤਂ, ਯਥਾਨਿਸਿਨ੍ਨਸ੍ਸ ਜਾਣੁਮਣ੍ਡਲਤੋ ਹੇਟ੍ਠਾ ਚਤੁਰਙ੍ਗੁਲਮਤ੍ਤਂ ਪਟਿਚ੍ਛਨ੍ਨਂ ਹੋਤੀਤਿ ਮਹਾਪਚ੍ਚਰਿਯਂ ਵੁਤ੍ਤਂ. ਕਾਯਬਨ੍ਧਨਂ ਬਨ੍ਧਿਤ੍ਵਾਤਿ ਤਸ੍ਸ ਨਿਵਾਸਨਸ੍ਸ ਉਪਰਿ ਕਾਯਬਨ੍ਧਨਂ ਬਨ੍ਧਿਤ੍ਵਾ ‘‘ਨ, ਭਿਕ੍ਖਵੇ, ਅਕਾਯਬਨ੍ਧਨੇਨ ਗਾਮੋ ਪਵਿਸਿਤਬ੍ਬੋ, ਯੋ ਪਵਿਸੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੨੭੮) ਵੁਤ੍ਤਤ੍ਤਾ. ਸਗੁਣਂ ਕਤ੍ਵਾਤਿ ਇਦਂ ਉਪਜ੍ਝਾਯਵਤ੍ਤੇ ਵੁਤ੍ਤਮੇਵ. ‘‘ਗਣ੍ਠਿਕਂ ਪਟਿਮੁਞ੍ਚਿਤ੍ਵਾਤਿ ਪਾਸਕੇ ਗਣ੍ਠਿਕਂ ਪਵੇਸੇਤ੍ਵਾ ਅਨ੍ਤੋਗਾਮੋ ਵਾ ਹੋਤੁ ਵਿਹਾਰੋ ਵਾ, ਮਨੁਸ੍ਸਾਨਂ ਪਰਿਵਿਸਨਟ੍ਠਾਨਂ ਗਚ੍ਛਨ੍ਤੇਨ ਚੀਵਰਂ ਪਾਰੁਪਿਤ੍ਵਾ ਕਾਯਬਨ੍ਧਨਂ ਬਨ੍ਧਿਤ੍ਵਾ ਗਮਨਮੇਵ ਵਟ੍ਟਤੀ’’ਤਿ ਮਹਾਅਟ੍ਠਕਥਾਸੁ ਵੁਤ੍ਤਂ. ਏਤ੍ਥ ਚ ਮਨੁਸ੍ਸਾਨਂ ਪਰਿਵਿਸਨਟ੍ਠਾਨਨ੍ਤਿ ਯਤ੍ਥ ਅਨ੍ਤੋਵਿਹਾਰੇਪਿ ਮਨੁਸ੍ਸਾ ਸਪੁਤ੍ਤਦਾਰਾ ਆਵਸਿਤ੍ਵਾ ਭਿਕ੍ਖੂ ਨੇਤ੍ਵਾ ਭੋਜੇਨ੍ਤਿ.

ਸੁਪ੍ਪਟਿਚ੍ਛਨ੍ਨੇਨਾਤਿ ਨ ਸਸੀਸਂ ਪਾਰੁਤੇਨ, ਅਥ ਖੋ ਗਣ੍ਠਿਕਂ ਪਟਿਮੁਞ੍ਚਿਤ੍ਵਾ ਅਨੁਵਾਤਨ੍ਤੇਨ ਗੀਵਂ ਪਟਿਚ੍ਛਾਦੇਤ੍ਵਾ ਉਭੋ ਕਣ੍ਣੇ ਸਮਂ ਕਤ੍ਵਾ ਪਟਿਸਂਹਰਿਤ੍ਵਾ ਯਾਵ ਮਣਿਬਨ੍ਧਾ ਪਟਿਚ੍ਛਾਦੇਨ੍ਤੇਨ. ਸੁਸਂਵੁਤੇਨਾਤਿ ਹਤ੍ਥਂ ਵਾ ਪਾਦਂ ਵਾ ਅਕੀਲ਼ਾਪੇਨ੍ਤੇਨ, ਸੁਵਿਨੀਤੇਨਾਤਿ ਅਤ੍ਥੋ. ਓਕ੍ਖਿਤ੍ਤਚਕ੍ਖੁਨਾਤਿ ਹੇਟ੍ਠਾਖਿਤ੍ਤਚਕ੍ਖੁਨਾ. ਯੋ ਅਨਾਦਰਿਯਂ ਪਟਿਚ੍ਚ ਤਹਂ ਤਹਂ ਓਲੋਕੇਨ੍ਤੋ ਭਿਯ੍ਯੋ ਤਂ ਤਂ ਦਿਸਾਭਾਗਂ ਪਾਸਾਦਂ ਕੂਟਾਗਾਰਂ ਵੀਥਿਂ ਓਲੋਕੇਨ੍ਤੋ ਗਚ੍ਛਤਿ, ਆਪਤ੍ਤਿ ਦੁਕ੍ਕਟਸ੍ਸ. ਏਕਸ੍ਮਿਂ ਪਨ ਠਾਨੇ ਠਤ੍ਵਾ ਹਤ੍ਥਿਅਸ੍ਸਾਦਿਪਰਿਸ੍ਸਯਾਭਾਵਂ ਓਲੋਕੇਤੁਂ ਵਟ੍ਟਤਿ. ਅਪ੍ਪਸਦ੍ਦੇਨਾਤਿ ਏਤ੍ਥ ਕਿਤ੍ਤਾਵਤਾ ਅਪ੍ਪਸਦ੍ਦੋ ਹੋਤਿ? ਦ੍ਵਾਦਸਹਤ੍ਥੇ ਗੇਹੇ ਆਦਿਮ੍ਹਿ ਸਙ੍ਘਤ੍ਥੇਰੋ ਮਜ੍ਝੇ ਦੁਤਿਯਤ੍ਥੇਰੋ ਅਨ੍ਤੇ ਤਤਿਯਤ੍ਥੇਰੋਤਿ ਏਵਂ ਨਿਸਿਨ੍ਨੇਸੁ ਸਙ੍ਘਤ੍ਥੇਰੋ ਦੁਤਿਯੇਨ ਸਦ੍ਧਿਂ ਮਨ੍ਤੇਤਿ, ਦੁਤਿਯਤ੍ਥੇਰੋ ਤਸ੍ਸ ਸਦ੍ਦਞ੍ਚੇਵ ਸੁਣਾਤਿ, ਕਥਞ੍ਚ ਵਵਤ੍ਥਪੇਤਿ, ਤਤਿਯਤ੍ਥੇਰੋ ਪਨ ਸਦ੍ਦਮੇਵ ਸੁਣਾਤਿ, ਕਥਂ ਨ ਵਵਤ੍ਥਪੇਤਿ, ਏਤ੍ਤਾਵਤਾ ਅਪ੍ਪਸਦ੍ਦੋ ਹੋਤਿ. ਸਚੇ ਪਨ ਤਤਿਯਤ੍ਥੇਰੋ ਕਥਂ ਵਵਤ੍ਥਪੇਤਿ, ਮਹਾਸਦ੍ਦੋ ਨਾਮ ਹੋਤਿ.

ਨ ਉਕ੍ਖਿਤ੍ਤਕਾਯਾਤਿ ਨ ਉਕ੍ਖੇਪੇਨ, ਇਤ੍ਥਮ੍ਭੂਤਲਕ੍ਖਣੇ ਕਰਣਵਚਨਂ, ਏਕਤੋ ਵਾ ਉਭਤੋ ਵਾ ਉਕ੍ਖਿਤ੍ਤਚੀਵਰੋ ਹੁਤ੍ਵਾਤਿ ਅਤ੍ਥੋ. ਅਨ੍ਤੋਇਨ੍ਦਖੀਲਤੋ ਪਟ੍ਠਾਯ ਨ ਏਵਂ ਗਨ੍ਤਬ੍ਬਂ. ਨਿਸਿਨ੍ਨਕਾਲੇ ਪਨ ਧਮਕਰਣਂ ਨੀਹਰਨ੍ਤੇਨਪਿ ਚੀਵਰਂ ਅਨੁਕ੍ਖਿਪਿਤ੍ਵਾਵ ਨੀਹਰਿਤਬ੍ਬਂ. ਨ ਉਜ੍ਜਗ੍ਘਿਕਾਯਾਤਿ ਨ ਮਹਾਹਸਿਤਂ ਹਸਨ੍ਤੋ, ਵੁਤ੍ਤਨਯੇਨੇਵੇਤ੍ਥ ਕਰਣਵਚਨਂ. ਨ ਕਾਯਪ੍ਪਚਾਲਕਨ੍ਤਿ ਕਾਯਂ ਅਚਾਲੇਤ੍ਵਾ ਕਾਯਂ ਪਗ੍ਗਹੇਤ੍ਵਾ ਨਿਚ੍ਚਲਂ ਕਤ੍ਵਾ ਉਜੁਕੇਨ ਕਾਯੇਨ ਸਮੇਨ ਇਰਿਯਾਪਥੇਨ. ਨ ਬਾਹੁਪ੍ਪਚਾਲਕਨ੍ਤਿ ਬਾਹੁਂ ਅਚਾਲੇਤ੍ਵਾ ਬਾਹੁਂ ਪਗ੍ਗਹੇਤ੍ਵਾ ਨਿਚ੍ਚਲਂ ਕਤ੍ਵਾ. ਨ ਸੀਸਪ੍ਪਚਾਲਕਨ੍ਤਿ ਸੀਸਂ ਅਚਾਲੇਤ੍ਵਾ ਸੀਸਂ ਪਗ੍ਗਹੇਤ੍ਵਾ ਨਿਚ੍ਚਲਂ ਉਜੁਂ ਠਪੇਤ੍ਵਾ. ਨ ਖਮ੍ਭਕਤੋਤਿ ਖਮ੍ਭਕਤੋ ਨਾਮ ਕਟਿਯਂ ਹਤ੍ਥਂ ਠਪੇਤ੍ਵਾ ਕਤਖਮ੍ਭੋ. ਨ ਉਕ੍ਕੁਟਿਕਾਯਾਤਿ ਏਤ੍ਥ ਉਕ੍ਕੁਟਿਕਾ ਵੁਚ੍ਚਤਿ ਪਣ੍ਹਿਯੋ ਉਕ੍ਖਿਪਿਤ੍ਵਾ ਅਗ੍ਗਪਾਦੇਹਿ ਵਾ ਅਗ੍ਗਪਾਦੇ ਉਕ੍ਖਿਪਿਤ੍ਵਾ ਪਣ੍ਹੇਹਿਯੇਵ ਵਾ ਭੂਮਿਂ ਫੁਸਨ੍ਤਸ੍ਸ ਗਮਨਂ. ਕਰਣਵਚਨਂ ਪਨੇਤ੍ਥ ਵੁਤ੍ਤਲਕ੍ਖਣਮੇਵ. ਨ ਓਗੁਣ੍ਠਿਤੇਨਾਤਿ ਸਸੀਸਂ ਪਾਰੁਤੇਨ. ਨ ਪਲ੍ਲਤ੍ਥਿਕਾਯਾਤਿ ਨ ਦੁਸ੍ਸਪਲ੍ਲਤ੍ਥਿਕਾਯ. ਏਤ੍ਥ ਆਯੋਗਪਲ੍ਲਤ੍ਥਿਕਾਪਿ ਦੁਸ੍ਸਪਲ੍ਲਤ੍ਥਿਕਾ ਏਵ. ਨ ਥੇਰੇ ਭਿਕ੍ਖੂ ਅਨੁਪਖਜ੍ਜਾਤਿ ਥੇਰੇ ਭਿਕ੍ਖੂ ਅਤਿਅਲ੍ਲੀਯਿਤ੍ਵਾ ਨ ਨਿਸੀਦਿਤਬ੍ਬਂ. ਨ ਸਙ੍ਘਾਟਿਂ ਓਤ੍ਥਰਿਤ੍ਵਾਤਿ ਨ ਸਙ੍ਘਾਟਿਂ ਅਤ੍ਥਰਿਤ੍ਵਾ ਨਿਸੀਦਿਤਬ੍ਬਂ.

ਸਕ੍ਕਚ੍ਚਨ੍ਤਿ ਸਤਿਂ ਉਪਟ੍ਠਾਪੇਤ੍ਵਾ. ਪਤ੍ਤਸਞ੍ਞੀਤਿ ਪਤ੍ਤੇ ਸਞ੍ਞਂ ਕਤ੍ਵਾ. ਸਮਸੂਪਕੋ ਨਾਮ ਯਤ੍ਥ ਭਤ੍ਤਸ੍ਸ ਚਤੁਤ੍ਥਭਾਗਪ੍ਪਮਾਣੋ ਸੂਪੋ ਹੋਤਿ. ਸਮਤਿਤ੍ਥਿਕਨ੍ਤਿ ਸਮਪੁਣ੍ਣਂ ਸਮਭਰਿਤਂ. ਥੂਪੀਕਤਂ ਪਿਣ੍ਡਪਾਤਂ ਪਟਿਗ੍ਗਣ੍ਹਾਤਿ, ਆਪਤ੍ਤਿ ਦੁਕ੍ਕਟਸ੍ਸਾਤਿ ਏਤ੍ਥ ਥੂਪੀਕਤੋ ਨਾਮ ਪਤ੍ਤਸ੍ਸ ਅਨ੍ਤੋਮੁਖਵਟ੍ਟਿਲੇਖਂ ਅਤਿਕ੍ਕਮਿਤ੍ਵਾ ਕਤੋ, ਪਤ੍ਤੇ ਪਕ੍ਖਿਤ੍ਤੋ ਭਰਿਤੋ ਪੂਰਿਤੋਤਿ ਅਤ੍ਥੋ. ਏਵਂ ਕਤਂ ਅਗ੍ਗਹੇਤ੍ਵਾ ਅਨ੍ਤੋਮੁਖਵਟ੍ਟਿਲੇਖਾਸਮਪ੍ਪਮਾਣੋ ਗਹੇਤਬ੍ਬੋ. ‘‘ਯਂ ਕਞ੍ਚਿ ਯਾਗੁਂ ਵਾ ਭਤ੍ਤਂ ਵਾ ਫਲਾਫਲਂ ਵਾ ਆਮਿਸਜਾਤਿਕਂ ਸਮਤਿਤ੍ਥਿਕਮੇਵ ਗਹੇਤਬ੍ਬਂ, ਤਞ੍ਚ ਖੋ ਅਧਿਟ੍ਠਾਨੁਪਗੇਨ ਪਤ੍ਤੇਨ, ਇਤਰੇਨ ਪਨ ਥੂਪੀਕਤਮ੍ਪਿ ਵਟ੍ਟਤਿ. ਯਾਮਕਾਲਿਕਸਤ੍ਤਾਹਕਾਲਿਕਯਾਵਜੀਵਿਕਾਨਿ ਪਨ ਅਧਿਟ੍ਠਾਨੁਪਗਪਤ੍ਤੇ ਥੂਪੀਕਤਾਨਿਪਿ ਵਟ੍ਟਨ੍ਤਿ. ਯਂ ਪਨ ਦ੍ਵੀਸੁ ਪਤ੍ਤੇਸੁ ਭਤ੍ਤਂ ਗਹੇਤ੍ਵਾ ਏਕਸ੍ਮਿਂ ਪੂਰੇਤ੍ਵਾ ਵਿਹਾਰਂ ਪੇਸੇਤੁਂ ਵਟ੍ਟਤੀ’’ਤਿ ਮਹਾਪਚ੍ਚਰਿਯਂ ਵੁਤ੍ਤਂ. ਯਂ ਪਤ੍ਤੇ ਪਕ੍ਖਿਪਿਯਮਾਨਂ ਪੂਵਉਚ੍ਛੁਖਣ੍ਡਫਲਾਫਲਾਦਿ ਹੇਟ੍ਠਾ ਓਰੋਹਤਿ, ਤਂ ਥੂਪੀਕਤਂ ਨਾਮ ਨ ਹੋਤਿ. ਪੂਵਵਟਂਸਕਂ ਠਪੇਤ੍ਵਾ ਪਿਣ੍ਡਪਾਤਂ ਦੇਨ੍ਤਿ, ਥੂਪੀਕਤਮੇਵ ਹੋਤਿ. ਪੁਪ੍ਫਵਟਂਸਕਤਕ੍ਕੋਲਕਟੁਕਫਲਾਦਿਵਟਂਸਕੇ ਪਨ ਠਪੇਤ੍ਵਾ ਦਿਨ੍ਨਂ ਥੂਪੀਕਤਂ ਨ ਹੋਤਿ. ਭਤ੍ਤਸ੍ਸ ਉਪਰਿ ਥਾਲਕਂ ਵਾ ਪਤ੍ਤਂ ਵਾ ਠਪੇਤ੍ਵਾ ਪੂਰੇਤ੍ਵਾ ਗਣ੍ਹਾਤਿ, ਥੂਪੀਕਤਂ ਨਾਮ ਨ ਹੋਤਿ. ਕੁਰੁਨ੍ਦਿਯਮ੍ਪਿ ਵੁਤ੍ਤਂ ‘‘ਥਾਲਕੇ ਵਾ ਪਤ੍ਤੇ ਵਾ ਪਕ੍ਖਿਪਿਤ੍ਵਾ ਤਂ ਪਤ੍ਤਮਤ੍ਥਕੇ ਠਪੇਤ੍ਵਾ ਦੇਨ੍ਤਿ, ਪਾਟੇਕ੍ਕਭਾਜਨਂ ਵਟ੍ਟਤਿ. ਇਧ ਅਨਾਪਤ੍ਤਿਯਂ ਗਿਲਾਨੋ ਨ ਆਗਤੋ, ਤਸ੍ਮਾ ਗਿਲਾਨਸ੍ਸਪਿ ਥੂਪੀਕਤਂ ਨ ਵਟ੍ਟਤਿ, ਸਬ੍ਬਤ੍ਥ ਪਨ ਪਟਿਗ੍ਗਹੇਤੁਮੇਵ ਨ ਵਟ੍ਟਤਿ, ਪਟਿਗ੍ਗਹਿਤਂ ਪਨ ਭੁਞ੍ਜਿਤੁਂ ਵਟ੍ਟਤੀ’’ਤਿ.

‘‘ਸਕ੍ਕਚ੍ਚ’’ਨ੍ਤਿ ਚ ‘‘ਪਤ੍ਤਸਞ੍ਞੀ’’ਤਿ ਚ ਉਭਯਂ ਵੁਤ੍ਤਨਯਮੇਵ. ਸਪਦਾਨਨ੍ਤਿ ਤਤ੍ਥ ਤਤ੍ਥ ਓਧਿਂ ਅਕਤ੍ਵਾ ਅਨੁਪਟਿਪਾਟਿਯਾ. ਸਮਸੂਪਕੇ ਵਤ੍ਤਬ੍ਬਂ ਵੁਤ੍ਤਮੇਵ. ਥੂਪਕਤੋਤਿ ਮਤ੍ਥਕਤੋ, ਵੇਮਜ੍ਝਤੋਤਿ ਅਤ੍ਥੋ. ਨ ਸੂਪਂ ਵਾ ਬ੍ਯਞ੍ਜਨਂ ਵਾਤਿਆਦਿ ਪਾਕਟਮੇਵ. ਵਿਞ੍ਞਤ੍ਤਿਯਂ ਵਤ੍ਤਬ੍ਬਂ ਨਤ੍ਥਿ. ਉਜ੍ਝਾਨਸਞ੍ਞੀਸਿਕ੍ਖਾਪਦੇਪਿ ਗਿਲਾਨੋ ਨ ਮੁਞ੍ਚਤਿ. ਨਾਤਿਮਹਨ੍ਤੋ ਕਬਲ਼ੋਤਿ ਮਯੂਰਣ੍ਡਂ ਅਤਿਮਹਨ੍ਤਂ, ਕੁਕ੍ਕੁਟਣ੍ਡਂ ਅਤਿਖੁਦ੍ਦਕਂ, ਤੇਸਂ ਵੇਮਜ੍ਝਪ੍ਪਮਾਣੋ. ਪਰਿਮਣ੍ਡਲਂ ਆਲੋਪੋਤਿ ਨਾਤਿਦੀਘੋ ਆਲੋਪੋ. ਅਨਾਹਟੇਤਿ ਅਨਾਹਰਿਤੇ, ਮੁਖਦ੍ਵਾਰਂ ਅਸਮ੍ਪਾਪਿਤੇਤਿ ਅਤ੍ਥੋ. ਸਬ੍ਬੋ ਹਤ੍ਥੋਤਿ ਏਤ੍ਥ ਹਤ੍ਥਸਦ੍ਦੋ ਤਦੇਕਦੇਸੇਸੁ ਅਙ੍ਗੁਲੀਸੁ ਦਟ੍ਠਬ੍ਬੋ ‘‘ਹਤ੍ਥਮੁਦ੍ਦੋ’’ਤਿਆਦੀਸੁ ਵਿਯ ਸਮੁਦਾਯੇ ਪਵਤ੍ਤਵੋਹਾਰਸ੍ਸ ਅਵਯਵੇ ਪਵਤ੍ਤਨਤੋ. ਏਕਙ੍ਗੁਲਿਮ੍ਪਿ ਮੁਖੇ ਪਕ੍ਖਿਪਿਤੁਂ ਨ ਵਟ੍ਟਤਿ. ਨ ਸਕਬਲ਼ੇਨਾਤਿ ਏਤ੍ਥ ਧਮ੍ਮਂ ਕਥੇਨ੍ਤੋ ਹਰੀਤਕਂ ਵਾ ਲਟ੍ਠਿਮਧੁਕਂ ਵਾ ਮੁਖੇ ਪਕ੍ਖਿਪਿਤ੍ਵਾ ਕਥੇਤਿ, ਯਤ੍ਤਕੇਨ ਵਚਨਂ ਪਰਿਪੁਣ੍ਣਂ ਹੋਤਿ, ਤਤ੍ਤਕੇ ਮੁਖਮ੍ਹਿ ਸਨ੍ਤੇ ਕਥੇਤੁਂ ਵਟ੍ਟਤਿ.

ਪਿਣ੍ਡੁਕ੍ਖੇਪਕਨ੍ਤਿ ਪਿਣ੍ਡਂ ਉਕ੍ਖਿਪਿਤ੍ਵਾ ਉਕ੍ਖਿਪਿਤ੍ਵਾ. ਕਬਲ਼ਾਵਚ੍ਛੇਦਕਨ੍ਤਿ ਕਬਲ਼ਂ ਅਵਛਿਨ੍ਦਿਤ੍ਵਾ ਅਵਛਿਨ੍ਦਿਤ੍ਵਾ. ਅਵਗਣ੍ਡਕਾਰਕਨ੍ਤਿ ਮਕ੍ਕਟੋ ਵਿਯ ਗਣ੍ਡੇ ਕਤ੍ਵਾ ਕਤ੍ਵਾ. ਹਤ੍ਥਨਿਦ੍ਧੁਨਕਨ੍ਤਿ ਹਤ੍ਥਂ ਨਿਦ੍ਧੁਨਿਤ੍ਵਾ ਨਿਦ੍ਧੁਨਿਤ੍ਵਾ. ਸਿਤ੍ਥਾਵਕਾਰਕਨ੍ਤਿ ਸਿਤ੍ਥਾਨਿ ਅਵਕਿਰਿਤ੍ਵਾ ਅਵਕਿਰਿਤ੍ਵਾ. ਜਿਵ੍ਹਾਨਿਚ੍ਛਾਰਕਨ੍ਤਿ ਜਿਵ੍ਹਂ ਨਿਚ੍ਛਾਰੇਤ੍ਵਾ ਨਿਚ੍ਛਾਰੇਤ੍ਵਾ. ਚਪੁਚਪੁਕਾਰਕਨ੍ਤਿ ‘‘ਚਪੁਚਪੂ’’ਤਿ ਏਵਂ ਸਦ੍ਦਂ ਕਤ੍ਵਾ ਕਤ੍ਵਾ. ਸੁਰੁਸੁਰੁਕਾਰਕਨ੍ਤਿ ‘‘ਸੁਰੁਸੁਰੂ’’ਤਿ ਏਵਂ ਸਦ੍ਦਂ ਕਤ੍ਵਾ ਕਤ੍ਵਾ. ਹਤ੍ਥਨਿਲ੍ਲੇਹਕਨ੍ਤਿ ਹਤ੍ਥਂ ਨਿਲ੍ਲੇਹਿਤ੍ਵਾ ਨਿਲ੍ਲੇਹਿਤ੍ਵਾ. ਭੁਞ੍ਜਨ੍ਤੇਨ ਹਿ ਅਙ੍ਗੁਲਿਮਤ੍ਤਮ੍ਪਿ ਨਿਲ੍ਲੇਹਿਤੁਂ ਨ ਵਟ੍ਟਤਿ, ਘਨਯਾਗੁਫਾਣਿਤਪਾਯਾਸਾਦਿਕੇ ਪਨ ਅਙ੍ਗੁਲੀਹਿ ਗਹੇਤ੍ਵਾ ਅਙ੍ਗੁਲਿਯੋ ਮੁਖੇ ਪਵੇਸੇਤ੍ਵਾ ਭੁਞ੍ਜਿਤੁਂ ਵਟ੍ਟਤਿ. ਪਤ੍ਤਨਿਲ੍ਲੇਹਕਓਟ੍ਠਨਿਲ੍ਲੇਹਕੇਸੁਪਿ ਏਸੇਵ ਨਯੋ, ਤਸ੍ਮਾ ਅਙ੍ਗੁਲਿਯਾਪਿ ਪਤ੍ਤੋ ਨ ਨਿਲ੍ਲੇਹਿਤਬ੍ਬੋ, ਏਕਓਟ੍ਠੋਪਿ ਜਿਵ੍ਹਾਯ ਨ ਨਿਲ੍ਲੇਹਿਤਬ੍ਬੋ, ਓਟ੍ਠਮਂਸੇਹਿ ਏਵ ਪਨ ਗਹੇਤ੍ਵਾ ਅਨ੍ਤੋ ਪਵੇਸੇਤੁਂ ਵਟ੍ਟਤਿ.

ਨ ਸਾਮਿਸੇਨ ਹਤ੍ਥੇਨ ਪਾਨੀਯਥਾਲਕੋਤਿ ਏਤਂ ਪਟਿਕੂਲਵਸੇਨ ਪਟਿਕ੍ਖਿਤ੍ਤਂ, ਤਸ੍ਮਾ ਸਙ੍ਘਿਕਮ੍ਪਿ ਪੁਗ੍ਗਲਿਕਮ੍ਪਿ ਗਿਹਿਸਨ੍ਤਕਮ੍ਪਿ ਅਤ੍ਤਨੋ ਸਨ੍ਤਕਮ੍ਪਿ ਸਙ੍ਖਮ੍ਪਿ ਸਰਾਵਮ੍ਪਿ ਆਮਿਸਮਕ੍ਖਿਤਂ ਨ ਗਹੇਤਬ੍ਬਮੇਵ, ਗਣ੍ਹਨ੍ਤਸ੍ਸ ਦੁਕ੍ਕਟਂ. ਸਚੇ ਪਨ ਹਤ੍ਥਸ੍ਸ ਏਕਦੇਸੋ ਆਮਿਸਮਕ੍ਖਿਤੋ ਨ ਹੋਤਿ, ਤੇਨ ਪਦੇਸੇਨ ਗਹੇਤੁਂ ਵਟ੍ਟਤਿ. ਨ ਸਸਿਤ੍ਥਕਂ ਪਤ੍ਤਧੋਵਨਂ ਅਨ੍ਤਰਘਰੇ ਛਡ੍ਡੇਤਬ੍ਬਨ੍ਤਿ ਏਤ੍ਥ ਉਦ੍ਧਰਿਤ੍ਵਾ ਵਾਤਿ ਸਿਤ੍ਥਾਨਿ ਏਕਤੋ ਉਦ੍ਧਰਿਤ੍ਵਾ ਏਕਸ੍ਮਿਂ ਠਾਨੇ ਰਾਸਿਂ ਕਤ੍ਵਾ ਉਦਕਂ ਛਡ੍ਡੇਤਿ. ਭਿਨ੍ਦਿਤ੍ਵਾ ਵਾ ਉਦਕਗਤਿਕਾਨਿ ਕਤ੍ਵਾ ਛਡ੍ਡੇਤਿ, ਪਟਿਗ੍ਗਹੇਨ ਸਮ੍ਪਟਿਚ੍ਛਨ੍ਤੋ ਨਂ ਪਟਿਗ੍ਗਹੇ ਛਡ੍ਡੇਤਿ, ਬਹਿ ਨੀਹਰਿਤ੍ਵਾ ਵਾ ਛਡ੍ਡੇਤਿ, ਏਵਂ ਛਡ੍ਡੇਨ੍ਤਸ੍ਸ ਅਨਾਪਤ੍ਤਿ. ਨ ਤਾਵ ਥੇਰੇਨ ਉਦਕਨ੍ਤਿ ਇਦਂ ਹਤ੍ਥਧੋਵਨਉਦਕਂ ਸਨ੍ਧਾਯ ਵੁਤ੍ਤਂ. ਅਨ੍ਤਰਾ ਪਿਪਾਸਿਤੇਨ, ਪਨ ਗਲੇ ਵਿਲਗ੍ਗਾਮਿਸੇਨ ਵਾ ਪਾਨੀਯਂ ਪਿਵਿਤ੍ਵਾ ਨ ਧੋਵਿਤਬ੍ਬਾਤਿ.

ਭਤ੍ਤਗ੍ਗਵਤ੍ਤਕਥਾਵਣ੍ਣਨਾ ਨਿਟ੍ਠਿਤਾ.

ਅਨੁਮੋਦਨਵਤ੍ਤਕਥਾਵਣ੍ਣਨਾ

ਅਨੁਮੋਦਨਵਤ੍ਤੇ ਅਨੁ ਪੁਨਪ੍ਪੁਨਂ ਮੋਦਿਯਤੇ ਪਮੋਦਿਯਤੇਤਿ ਅਨੁਮੋਦਨਾ. ਕਾ ਸਾ? ਧਮ੍ਮਕਥਾ. ਅਨੁਮੋਦਨਾਯ ਕਤ੍ਤਬ੍ਬਂ ਵਤ੍ਤਂ ਅਨੁਮੋਦਨਵਤ੍ਤਂ. ਪਞ੍ਚਮੇ ਨਿਸਿਨ੍ਨੇਤਿ ਅਨੁਮੋਦਨਤ੍ਥਾਯ ਨਿਸਿਨ੍ਨੇ. ਉਪਨਿਸਿਨ੍ਨਕਥਾ ਨਾਮ ਬਹੂਸੁ ਸਨ੍ਨਿਪਤਿਤੇਸੁ ਪਰਿਕਥਾਕਥਨਂ. ਸੇਸਂ ਸੁਵਿਞ੍ਞੇਯ੍ਯਮੇਵ.

ਅਨੁਮੋਦਨਵਤ੍ਤਕਥਾਵਣ੍ਣਨਾ ਨਿਟ੍ਠਿਤਾ.

ਪਿਣ੍ਡਚਾਰਿਕਵਤ੍ਤਕਥਾਵਣ੍ਣਨਾ

੧੮੯. ਪਿਣ੍ਡਚਾਰਿਕਵਤ੍ਤੇ ਪਿਣ੍ਡਿਤਬ੍ਬੋ ਸਙ੍ਘਰਿਤਬ੍ਬੋਤਿ ਪਿਣ੍ਡੋ, ਪਿਣ੍ਡਪਾਤੋ. ਪਿਣ੍ਡਾਯ ਚਰਣਂ ਸੀਲਮਸ੍ਸਾਤਿ ਪਿਣ੍ਡਚਾਰੀ, ਸੋ ਏਵ ਪਿਣ੍ਡਚਾਰਿਕੋ ਸਕਤ੍ਥੇ ਕਪਚ੍ਚਯਵਸੇਨ. ਪਿਣ੍ਡਚਾਰਿਕੇਨ ਵਤ੍ਤਿਤਬ੍ਬਂ ਵਤ੍ਤਂ ਪਿਣ੍ਡਚਾਰਿਕਵਤ੍ਤਂ. ਤਤ੍ਰਾਯਮਨੁਤ੍ਤਾਨਪਦਵਣ੍ਣਨਾ – ਨਿਵੇਸਨਂ ਨਾਮ ਇਤ੍ਥਿਕੁਮਾਰਿਕਾਦੀਨਂ ਵਸਨਟ੍ਠਾਨਂ. ਯਸ੍ਮਾ ਪਵਿਸਨਨਿਕ੍ਖਮਨਦ੍ਵਾਰਂ ਅਸਲ੍ਲਕ੍ਖੇਤ੍ਵਾ ਸਹਸਾ ਪਵਿਸਨ੍ਤੋ ਵਿਸਭਾਗਾਰਮ੍ਮਣਂ ਵਾ ਪਸ੍ਸੇਯ੍ਯ, ਪਰਿਸ੍ਸਯੋ ਵਾ ਭਵੇਯ੍ਯ, ਤਸ੍ਮਾ ‘‘ਨਿਵੇਸਨਂ…ਪੇ… ਪਵਿਸਿਤਬ੍ਬ’’ਨ੍ਤਿ ਵੁਤ੍ਤਂ. ਅਤਿਦੂਰੇ ਤਿਟ੍ਠਨ੍ਤੋ ਅਪਸ੍ਸਨ੍ਤੋ ਵਾ ਭਵੇਯ੍ਯ, ‘‘ਅਞ੍ਞਸ੍ਸ ਗੇਹੇ ਤਿਟ੍ਠਤੀ’’ਤਿ ਵਾ ਮਞ੍ਞੇਯ੍ਯ. ਅਚ੍ਚਾਸਨ੍ਨੇ ਤਿਟ੍ਠਨ੍ਤੋ ਅਪਸ੍ਸਿਤਬ੍ਬਂ ਵਾ ਪਸ੍ਸੇਯ੍ਯ, ਅਸੁਣਿਤਬ੍ਬਂ ਵਾ ਸੁਣੇਯ੍ਯ, ਤੇਨ ਮਨੁਸ੍ਸਾਨਂ ਅਗਾਰਵੋ ਵਾ ਅਪ੍ਪਸਾਦੋ ਵਾ ਭਵੇਯ੍ਯ, ਤਸ੍ਮਾ ‘‘ਨਾਤਿਦੂਰੇ ਨਾਚ੍ਚਾਸਨ੍ਨੇ ਠਾਤਬ੍ਬ’’ਨ੍ਤਿ ਵੁਤ੍ਤਂ. ਅਤਿਚਿਰਂ ਤਿਟ੍ਠਨ੍ਤੋ ਅਦਾਤੁਕਾਮਾਨਂ ਮਨੋਪਦੋਸੋ ਭਵੇਯ੍ਯ, ਅਞ੍ਞਤ੍ਥ ਭਿਕ੍ਖਾ ਚ ਪਰਿਕ੍ਖਯੇਯ੍ਯ, ਅਤਿਲਹੁਕਂ ਨਿਵਤ੍ਤਨ੍ਤੋ ਦਾਤੁਕਾਮਾਨਂ ਪੁਞ੍ਞਹਾਨਿ ਚ ਭਵੇਯ੍ਯ, ਭਿਕ੍ਖੁਨੋ ਚ ਭਿਕ੍ਖਾਯ ਅਸਮ੍ਪਜ੍ਜਨਂ, ਤਸ੍ਮਾ ‘‘ਨਾਤਿਚਿਰਂ ਠਾਤਬ੍ਬਂ, ਨਾਤਿਲਹੁਕਂ ਨਿਵਤ੍ਤਿਤਬ੍ਬਂ, ਠਿਤੇਨ ਸਲ੍ਲਕ੍ਖੇਤਬ੍ਬ’’ਨ੍ਤਿ ਵੁਤ੍ਤਂ. ਸਲ੍ਲਕ੍ਖਣਾਕਾਰਂ ਦਸ੍ਸੇਤਿ ‘‘ਸਚੇ ਕਮ੍ਮਂ ਵਾ ਨਿਕ੍ਖਿਪਤੀ’’ਤਿਆਦਿਨਾ. ਤਤ੍ਥ ਕਮ੍ਮਂ ਵਾ ਨਿਕ੍ਖਿਪਤੀਤਿ ਕਪ੍ਪਾਸਂ ਵਾ ਸੁਪ੍ਪਂ ਵਾ ਮੁਸਲਂ ਵਾ ਯਞ੍ਚ ਗਹੇਤ੍ਵਾ ਕਮ੍ਮਂ ਕਰੋਨ੍ਤਿ, ਠਿਤਾ ਵਾ ਨਿਸਿਨ੍ਨਾ ਵਾ ਹੋਨ੍ਤਿ, ਤਂ ਨਿਕ੍ਖਿਪਤਿ. ਪਰਾਮਸਤੀਤਿ ਗਣ੍ਹਾਤਿ. ਠਪੇਤਿ ਵਾਤਿ ‘‘ਤਿਟ੍ਠਥ ਭਨ੍ਤੇ’’ਤਿ ਵਦਨ੍ਤੀ ਠਪੇਤਿ ਨਾਮ. ਅਵਕ੍ਕਾਰਪਾਤੀਤਿ ਅਤਿਰੇਕਪਿਣ੍ਡਪਾਤਂ ਅਪਨੇਤ੍ਵਾ ਠਪਨਤ੍ਥਾਯ ਏਕਾ ਸਮੁਗ੍ਗਪਾਤਿ. ਏਤ੍ਥ ਚ ਸਮੁਗ੍ਗਪਾਤਿ ਨਾਮ ਸਮੁਗ੍ਗਪੁਟਸਦਿਸਾ ਪਾਤਿ. ਸੇਸਂ ਵੁਤ੍ਤਨਯਮੇਵ.

ਪਿਣ੍ਡਚਾਰਿਕਵਤ੍ਤਕਥਾਵਣ੍ਣਨਾ ਨਿਟ੍ਠਿਤਾ.

ਆਰਞ੍ਞਿਕਵਤ੍ਤਕਥਾਵਣ੍ਣਨਾ

੧੯੦. ਆਰਞ੍ਞਿਕਵਤ੍ਤੇ ਨ ਰਮਨ੍ਤਿ ਜਨਾ ਏਤ੍ਥਾਤਿ ਅਰਞ੍ਞਂ. ਵੁਤ੍ਤਞ੍ਹਿ –

‘‘ਰਮਣੀਯਾਨਿ ਅਰਞ੍ਞਾਨਿ, ਯਤ੍ਥ ਨ ਰਮਤੀ ਜਨੋ;

ਵੀਤਰਾਗਾ ਰਮਿਸ੍ਸਨ੍ਤਿ, ਨ ਤੇ ਕਾਮਗਵੇਸਿਨੋ’’ਤਿ. (ਧ. ਪ. ੯੯);

ਅਰਞ੍ਞੇ ਵਸਤੀਤਿ ਆਰਞ੍ਞਿਕੋ, ਤੇਨ ਵਤ੍ਤਿਤਬ੍ਬਂ ਵਤ੍ਤਂ ਆਰਞ੍ਞਿਕਵਤ੍ਤਂ. ਤਤ੍ਰਾਯਂ ਵਿਸੇਸਪਦਾਨਮਤ੍ਥੋ – ਕਾਲਸ੍ਸੇਵ ਉਟ੍ਠਾਯਾਤਿ ਅਰਞ੍ਞਸੇਨਾਸਨਸ੍ਸ ਗਾਮਤੋ ਦੂਰਤ੍ਤਾ ਵੁਤ੍ਤਂ, ਤੇਨੇਵ ਕਾਰਣੇਨ ‘‘ਪਤ੍ਤਂ ਗਹੇਤ੍ਵਾ ਚੀਵਰਂ ਪਾਰੁਪਿਤ੍ਵਾ ਗਚ੍ਛਨ੍ਤੋ ਪਰਿਸ੍ਸਮੋ ਹੋਤੀ’’ਤਿ ਵੁਤ੍ਤਂ. ਪਤ੍ਤਂ ਥਵਿਕਾਯ ਪਕ੍ਖਿਪਿਤ੍ਵਾ ਅਂਸੇ ਲਗ੍ਗੇਤ੍ਵਾ ਚੀਵਰਂ ਖਨ੍ਧੇ ਕਰਿਤ੍ਵਾ ਅਰਞ੍ਞਮਗ੍ਗੋ ਨ ਦੁਸ੍ਸੋਧਨੋ ਹੋਤਿ, ਤਸ੍ਮਾ ਕਣ੍ਟਕਸਰੀਸਪਾਦਿਪਰਿਸ੍ਸਯਵਿਮੋਚਨਤ੍ਥਂ ਉਪਾਹਨਾ ਆਰੋਹਿਤ੍ਵਾ. ਅਰਞ੍ਞਂ ਨਾਮ ਯਸ੍ਮਾ ਚੋਰਾਦੀਨਂ ਵਿਚਰਟ੍ਠਾਨਂ ਹੋਤਿ, ਤਸ੍ਮਾ ‘‘ਦਾਰੁਭਣ੍ਡਂ ਮਤ੍ਤਿਕਾਭਣ੍ਡਂ ਪਟਿਸਾਮੇਤ੍ਵਾ ਦ੍ਵਾਰਵਾਤਪਾਨਂ ਥਕੇਤ੍ਵਾ ਵਸਨਟ੍ਠਾਨਤੋ ਨਿਕ੍ਖਮਿਤਬ੍ਬ’’ਨ੍ਤਿ ਵੁਤ੍ਤਂ. ਇਤੋ ਪਰਾਨਿ ਭਤ੍ਤਗ੍ਗਵਤ੍ਤਪਿਣ੍ਡਚਾਰਿਕਵਤ੍ਤੇਸੁ ਵੁਤ੍ਤਸਦਿਸਾਨੇਵ. ਗਾਮਤੋ ਨਿਕ੍ਖਮਿਤ੍ਵਾ ਸਚੇ ਬਹਿਗਾਮੇ ਉਦਕਂ ਨਤ੍ਥਿ, ਅਨ੍ਤੋਗਾਮੇਯੇਵ ਭਤ੍ਤਕਿਚ੍ਚਂ ਕਤ੍ਵਾ, ਅਥ ਬਹਿਗਾਮੇ ਅਤ੍ਥਿ, ਭਤ੍ਤਕਿਚ੍ਚਂ ਕਤ੍ਵਾ ਪਤ੍ਤਂ ਧੋਵਿਤ੍ਵਾ ਵੋਦਕਂ ਕਤ੍ਵਾ ਥਵਿਕਾਯ ਪਕ੍ਖਿਪਿਤ੍ਵਾ ਚੀਵਰਂ ਸਙ੍ਘਰਿਤ੍ਵਾ ਅਂਸੇ ਕਰਿਤ੍ਵਾ ਉਪਾਹਨਾ ਆਰੋਹਿਤ੍ਵਾ ਗਨ੍ਤਬ੍ਬਂ.

ਭਾਜਨਂ ਅਲਭਨ੍ਤੇਨਾਤਿਆਦਿ ਅਰਞ੍ਞਸੇਨਾਸਨਸ੍ਸ ਦੁਲ੍ਲਭਦਬ੍ਬਸਮ੍ਭਾਰਤ੍ਤਾ ਵੁਤ੍ਤਂ, ਅਗ੍ਗਿ ਉਪਟ੍ਠਾਪੇਤਬ੍ਬੋਤਿਆਦਿ ਵਾਲ਼ਮਿਗਸਰੀਸਪਾਦਿਬਾਹਿਰਪਰਿਸ੍ਸਯਕਾਲੇ ਚ ਵਾਤਪਿਤ੍ਤਾਦਿਅਜ੍ਝਤ੍ਤਪਅਸ੍ਸਯਕਾਲੇ ਚ ਇਚ੍ਛਿਤਬ੍ਬਤ੍ਤਾ. ਬਹੂਨਂ ਪਨ ਵਸਨਟ੍ਠਾਨੇ ਤਾਦਿਸਾਨਿ ਸੁਲਭਾਨਿ ਹੋਨ੍ਤੀਤਿ ਆਹ ‘‘ਗਣਵਾਸਿਨੋ ਪਨ ਤੇਨ ਵਿਨਾਪਿ ਵਟ੍ਟਤੀ’’ਤਿ. ਕਤ੍ਤਰਦਣ੍ਡੋ ਨਾਮ ਪਰਿਸ੍ਸਯਵਿਨੋਦਨੋ ਹੋਤਿ, ਤਸ੍ਮਾ ਅਰਞ੍ਞੇ ਵਿਹਰਨ੍ਤੇਨ ਅਵਸ੍ਸਂ ਇਚ੍ਛਿਤਬ੍ਬੋਤਿ ਵੁਤ੍ਤਂ ‘‘ਕਤ੍ਤਰਦਣ੍ਡੋ ਉਪਟ੍ਠਾਪੇਤਬ੍ਬੋ’’ਤਿ. ਨਕ੍ਖਤ੍ਤਾਨੇਵ ਨਕ੍ਖਤ੍ਤਪਦਾਨਿ. ਚੋਰਾਦੀਸੁ ਆਗਨ੍ਤ੍ਵਾ ‘‘ਅਜ੍ਜ, ਭਨ੍ਤੇ, ਕੇਨ ਨਕ੍ਖਤ੍ਤੇਨ ਚਨ੍ਦੋ ਯੁਤ੍ਤੋ’’ਤਿ ਪੁਚ੍ਛਿਤੇਸੁ ‘‘ਨ ਜਾਨਾਮਾ’’ਤਿ ਵੁਤ੍ਤੇ ਕੁਜ੍ਝਨ੍ਤਿ, ਤਸ੍ਮਾ ਵੁਤ੍ਤਂ ‘‘ਨਕ੍ਖਤ੍ਤਪਦਾਨਿ ਉਗ੍ਗਹੇਤਬ੍ਬਾਨਿ ਸਕਲਾਨਿ ਵਾ ਏਕਦੇਸਾਨਿ ਵਾ’’ਤਿ, ਤਥਾ ਦਿਸਾਮੂਲ਼੍ਹੇਸੁ ‘‘ਕਤਮਾਯਂ, ਭਨ੍ਤੇ, ਦਿਸਾ’’ਤਿ ਪੁਚ੍ਛਿਤੇਸੁ, ਤਸ੍ਮਾ ‘‘ਦਿਸਾਕੁਸਲੇਨ ਭਵਿਤਬ੍ਬ’’ਨ੍ਤਿ.

ਆਰਞ੍ਞਿਕਵਤ੍ਤਕਥਾਵਣ੍ਣਨਾ ਨਿਟ੍ਠਿਤਾ.

ਸੇਨਾਸਨਵਤ੍ਤਕਥਾਵਣ੍ਣਨਾ

੧੯੧. ਸੇਨਾਸਨਵਤ੍ਤੇ ਸਯਨ੍ਤਿ ਏਤ੍ਥਾਤਿ ਸੇਨਂ, ਸਯਨਨ੍ਤਿ ਅਤ੍ਥੋ. ਆਵਸਨ੍ਤਿ ਏਤ੍ਥਾਤਿ ਆਸਨਂ. ਸੇਨਞ੍ਚ ਆਸਨਞ੍ਚ ਸੇਨਾਸਨਂ. ਸੇਨਾਸਨੇਸੁ ਕਤ੍ਤਬ੍ਬਂ ਵਤ੍ਤਂ ਸੇਨਾਸਨਵਤ੍ਤਂ. ਇਧ ਪਨ ਯਂ ਵਤ੍ਤਬ੍ਬਂ, ਤਂ ਉਪਜ੍ਝਾਯਵਤ੍ਤਕਥਾਯਂ (ਵਿ. ਸਙ੍ਗ. ਅਟ੍ਠ. ੧੮੩ ) ਵੁਤ੍ਤਮੇਵ. ਤਤ੍ਥ ਪਨ ਉਪਜ੍ਝਾਯੇਨ ਵੁਤ੍ਥਵਿਹਾਰੋ ਵੁਤ੍ਤੋ, ਇਧ ਪਨ ਅਤ੍ਤਨਾ ਵੁਤ੍ਥਵਿਹਾਰੋਤਿ ਅਯਮੇਵ ਵਿਸੇਸੋ. ਨ ਵੁਡ੍ਢਂ ਅਨਾਪੁਚ੍ਛਾਤਿ ਏਤ੍ਥ ਤਸ੍ਸ ਓਵਰਕੇ ਤਦੁਪਚਾਰੇ ਚ ਆਪੁਚ੍ਛਿਤਬ੍ਬਨ੍ਤਿ ਵਦਨ੍ਤਿ. ਭੋਜਨਸਾਲਾਦੀਸੁਪਿ ਏਵਮੇਵ ਪਟਿਪਜ੍ਜਿਤਬ੍ਬਨ੍ਤਿ ਭੋਜਨਸਾਲਾਦੀਸੁਪਿ ਉਦ੍ਦੇਸਦਾਨਾਦਿ ਆਪੁਚ੍ਛਿਤ੍ਵਾਵ ਕਾਤਬ੍ਬਨ੍ਤਿ ਅਤ੍ਥੋ.

ਸੇਨਾਸਨਵਤ੍ਤਕਥਾਵਣ੍ਣਨਾ ਨਿਟ੍ਠਿਤਾ.

ਜਨ੍ਤਾਘਰਵਤ੍ਤਕਥਾਵਣ੍ਣਨਾ

੧੯੨. ਜਨ੍ਤਾਘਰਵਤ੍ਤੇ ਜਾਯਤੀਤਿ ਜਂ, ਕਿਂ ਤਂ? ਸਰੀਰਂ. ਜਂ ਤਾਯਤਿ ਰਕ੍ਖਤੀਤਿ ਜਨ੍ਤਾ, ਕਾ ਸਾ? ਤਿਕਿਚ੍ਛਾ. ਗਯ੍ਹਤੇਤਿ ਘਰਂ, ਕਿਂ ਤਂ? ਨਿਵੇਸਨਂ, ਜਨ੍ਤਾਯ ਸਰੀਰਤਿਕਿਚ੍ਛਾਯ ਕਤਂ ਘਰਂ ਜਨ੍ਤਾਘਰਂ, ਜਨ੍ਤਾਘਰੇ ਕਤ੍ਤਬ੍ਬਂ ਵਤ੍ਤਂ ਜਨ੍ਤਾਘਰਵਤ੍ਤਂ. ਤਤ੍ਥ ਪਰਿਭਣ੍ਡਨ੍ਤਿ ਬਹਿਜਗਤਿ. ਸੇਸਂ ਉਪਜ੍ਝਾਯਵਤ੍ਤੇ ਵੁਤ੍ਤਨਯਤ੍ਤਾ ਸੁਵਿਞ੍ਞੇਯ੍ਯਮੇਵ.

ਜਨ੍ਤਾਘਰਵਤ੍ਤਕਥਾਵਣ੍ਣਨਾ ਨਿਟ੍ਠਿਤਾ.

ਵਚ੍ਚਕੁਟਿਵਤ੍ਤਕਥਾਵਣ੍ਣਨਾ

੧੯੩. ਵਚ੍ਚਕੁਟਿਵਤ੍ਤੇ ਵਚ੍ਚਯਤੇ ਊਹਦਯਤੇਤਿ ਵਚ੍ਚਂ, ਕਰੀਸਂ. ਕੁਟੀਯਤਿ ਛਿਨ੍ਦੀਯਤਿ ਆਤਪੋ ਏਤਾਯਾਤਿ ਕੁਟਿ, ਵਚ੍ਚਤ੍ਥਾਯ ਕਤਾ ਕੁਟਿ ਵਚ੍ਚਕੁਟਿ, ਵਚ੍ਚਕੁਟਿਯਾ ਵਤ੍ਤਿਤਬ੍ਬਂ ਵਤ੍ਤਂ ਵਚ੍ਚਕੁਟਿਵਤ੍ਤਂ, ਇਧ ਚ ਵਤ੍ਤਕ੍ਖਨ੍ਧਕੇ ਆਚਮਨਵਤ੍ਤਂ ਪਠਮਂ ਆਗਤਂ, ਪਚ੍ਛਾ ਵਚ੍ਚਕੁਟਿਵਤ੍ਤਂ. ਇਮਸ੍ਮਿਂ ਪਨ ਪਕਰਣੇ ਪਠਮਂ ਵਚ੍ਚਂ ਕਤ੍ਵਾ ਪਚ੍ਛਾ ਆਚਮਤੀਤਿ ਅਧਿਪ੍ਪਾਯੇਨ ਵਚ੍ਚਕੁਟਿਵਤ੍ਤਂ ਪਠਮਂ ਆਗਤਂ, ਤਸ੍ਮਾ ਤਦਨੁਕ੍ਕਮੇਨ ਕਥਯਿਸ੍ਸਾਮ. ਦਨ੍ਤਕਟ੍ਠਂ ਖਾਦਨ੍ਤੇਨਾਤਿ ਅਯਂ ਵਚ੍ਚਕੁਟਿਯਾਪਿ ਸਬ੍ਬਤ੍ਥੇਵ ਪਟਿਕ੍ਖੇਪੋ. ਨਿਬਦ੍ਧਗਮਨਤ੍ਥਾਯਾਤਿ ਅਤ੍ਤਨਾ ਨਿਬਦ੍ਧਗਮਨਤ੍ਥਾਯ. ਪੁਗ੍ਗਲਿਕਟ੍ਠਾਨਂ ਵਾਤਿ ਅਤ੍ਤਨੋ ਵਿਹਾਰਂ ਸਨ੍ਧਾਯ ਵੁਤ੍ਤਂ. ਸੇਸਂ ਸੁਵਿਞ੍ਞੇਯ੍ਯਮੇਵਾਤਿ.

ਵਚ੍ਚਕੁਟਿਵਤ੍ਤਕਥਾਵਣ੍ਣਨਾ ਨਿਟ੍ਠਿਤਾ.

ਇਤਿ ਵਿਨਯਸਙ੍ਗਹਸਂਵਣ੍ਣਨਾਭੂਤੇ ਵਿਨਯਾਲਙ੍ਕਾਰੇ

ਉਪਜ੍ਝਾਯਵਤ੍ਤਾਦਿਵਤ੍ਤਵਿਨਿਚ੍ਛਯਕਥਾਲਙ੍ਕਾਰੋ ਨਾਮ

ਸਤ੍ਤਵੀਸਤਿਮੋ ਪਰਿਚ੍ਛੇਦੋ.