੨੩. ਨਿਸ੍ਸਯਵਿਨਿਚ੍ਛਯਕਥਾ

੧੫੧. ਏਵਂ ਉਪਸਮ੍ਪਦਾਵਿਨਿਚ੍ਛਯਂ ਕਥੇਤ੍ਵਾ ਇਦਾਨਿ ਨਿਸ੍ਸਯਵਿਨਿਚ੍ਛਯਂ ਕਥੇਤੁਂ ‘‘ਨਿਸ੍ਸਯੋਤਿ ਏਤ੍ਥ ਪਨਾ’’ਤਿਆਦਿਮਾਹ. ਤਤ੍ਥ ਨਿਸ੍ਸਯਨਂ ਨਿਸ੍ਸਯੋ, ਸੇਵਨਂ ਭਜਨਨ੍ਤ੍ਯਤ੍ਥੋ. ਨਿਪੁਬ੍ਬਸਿ ਸੇਵਾਯਨ੍ਤਿ ਧਾਤੁ ਭਾਵਸਾਧਨੋ, ਨ ‘‘ਨਿਸ੍ਸਾਯ ਨਂ ਵਸਤੀਤਿ ਨਿਸ੍ਸਯੋ’’ਤਿ ਇਧ ਵਿਯ ਅਵੁਤ੍ਤਕਮ੍ਮਸਾਧਨੋ. ਤਤ੍ਥ ਹਿ ਸੇਵਿਤਬ੍ਬੋ ਪੁਗ੍ਗਲੋ ਲਬ੍ਭਤਿ, ਇਧ ਪਨ ਸੇਵਨਕਿਰਿਯਾਤਿ. ਇਦਾਨਿ ਤਂ ਨਿਸ੍ਸਯਂ ਪੁਚ੍ਛਾਪੁਬ੍ਬਙ੍ਗਮਾਯ ਵਿਸ੍ਸਜ੍ਜਨਾਯ ਵਿਤ੍ਥਾਰਤੋ ਠਪੇਤੁਂ ‘‘ਕੇਨ ਦਾਤਬ੍ਬੋ’’ਤਿਆਦਿਮਾਹ. ਤਤ੍ਥ ਕੇਨ ਦਾਤਬ੍ਬੋ, ਕੇਨ ਨ ਦਾਤਬ੍ਬੋਤਿ ਨਿਸ੍ਸਯਦਾਯਕਂ ਕਤ੍ਤਾਰਂ ਪੁਚ੍ਛਤਿ, ਕਸ੍ਸ ਦਾਤਬ੍ਬੋ, ਕਸ੍ਸ ਨ ਦਾਤਬ੍ਬੋਤਿ ਨਿਸ੍ਸਯਪਟਿਗ੍ਗਾਹਕਂ ਸਮ੍ਪਦਾਨਂ, ਕਥਂ ਗਹਿਤੋ ਹੋਤਿ, ਕਥਂ ਪਟਿਪ੍ਪਸ੍ਸਮ੍ਭਤੀਤਿ ਕਾਰਣਂ, ਨਿਸ੍ਸਾਯ ਕੇਨ ਵਸਿਤਬ੍ਬਂ, ਕੇਨ ਨ ਵਸਿਤਬ੍ਬਨ੍ਤਿ ਨਿਸ੍ਸਯਪਟਿਪਨ੍ਨਕਂ. ਤਤੋ ਪੁਚ੍ਛਾਨੁਕ੍ਕਮੇਨ ਵਿਸ੍ਸਜ੍ਜੇਤੁਂ ‘‘ਤਤ੍ਥ’’ਤ੍ਯਾਦਿਮਾਹ. ਨ ਕੇਵਲਂ ਏਤ੍ਥੇਵ, ਅਥ ਖੋ ਨਿਸ੍ਸਯਮੁਚ੍ਚਨਙ੍ਗੇਪਿ ‘‘ਬ੍ਯਤ੍ਤੇਨਾ’’ਤਿ ਆਗਤੋ.

ਤਤ੍ਥ ਏਤ੍ਥ ਚ ਕੋ ਵਿਸੇਸੋਤਿ ਆਹ ‘‘ਏਤ੍ਥ ਚ ‘ਬ੍ਯਤ੍ਤੋ’ਤਿ ਇਮਿਨਾ ਪਰਿਸੁਪਟ੍ਠਾਪਕੋ ਬਹੁਸ੍ਸੁਤੋ ਵੇਦਿਤਬ੍ਬੋ’’ਤਿ. ਇਦਾਨਿ ਪਰਿਸੁਪਟ੍ਠਾਪਕਲਕ੍ਖਣਂ ਦਸ੍ਸੇਤੁਂ ‘‘ਪਰਿਸੁਪਟ੍ਠਾਪਕੇਨ ਹੀ’’ਤਿਆਦਿਮਾਹ. ਤਤ੍ਥ ਅਭਿਵਿਨਯੇਤਿ ਸਕਲੇ ਵਿਨਯਪਿਟਕੇ. ਵਿਨੇਤੁਨ੍ਤਿ ਸਿਕ੍ਖਾਪੇਤੁਂ. ਦ੍ਵੇ ਵਿਭਙ੍ਗਾ ਪਗੁਣਾ ਵਾਚੁਗ੍ਗਤਾ ਕਾਤਬ੍ਬਾਤਿ ਇਦਂ ਪਰਿਪੁਚ੍ਛਾਵਸੇਨ ਉਗ੍ਗਣ੍ਹਨਂ ਸਨ੍ਧਾਯ ਵੁਤ੍ਤਨ੍ਤਿ ਵਦਨ੍ਤਿ. ਏਕਸ੍ਸ ਪਮੁਟ੍ਠਂ, ਇਤਰੇਸਂ ਪਗੁਣਂ ਭਵੇਯ੍ਯਾਤਿ ਆਹ ‘‘ਤੀਹਿ ਜਨੇਹਿ ਸਦ੍ਧਿਂ ਪਰਿਵਤ੍ਤਨਕ੍ਖਮਾ ਕਾਤਬ੍ਬਾ’’ਤਿ. ਅਭਿਧਮ੍ਮੇਤਿ ਨਾਮਰੂਪਪਰਿਚ੍ਛੇਦੇ. ਹੇਟ੍ਠਿਮਾ ਵਾ ਤਯੋ ਵਗ੍ਗਾਤਿ ਮਹਾਵਗ੍ਗਤੋ ਹੇਟ੍ਠਾ ਸਗਾਥਾਵਗ੍ਗੋ ਨਿਦਾਨਵਗ੍ਗੋ ਖਨ੍ਧਵਗ੍ਗੋਤਿ ਇਮੇ ਤਯੋ ਵਗ੍ਗਾ. ‘‘ਧਮ੍ਮਪਦਮ੍ਪਿ ਸਹ ਵਤ੍ਥੁਨਾ ਉਗ੍ਗਹੇਤੁਂ ਵਟ੍ਟਤੀ’’ਤਿ ਮਹਾਪਚ੍ਚਰਿਯਂ ਵੁਤ੍ਤਤ੍ਤਾ ਜਾਤਕਭਾਣਕੇਨ ਸਾਟ੍ਠਕਥਂ ਜਾਤਕਂ ਉਗ੍ਗਹੇਤ੍ਵਾਪਿ ਧਮ੍ਮਪਦਂ ਸਹ ਵਤ੍ਥੁਨਾ ਉਗ੍ਗਹੇਤਬ੍ਬਮੇਵ.

ਪਞ੍ਚਹਿ ਭਿਕ੍ਖਵੇ ਅਙ੍ਗੇਹਿ ਸਮਨ੍ਨਾਗਤੇਨਾਤਿਆਦੀਸੁ ਨ ਸਾਮਣੇਰੋ ਉਪਟ੍ਠਾਪੇਤਬ੍ਬੋਤਿ ਉਪਜ੍ਝਾਯੇਨ ਹੁਤ੍ਵਾ ਸਾਮਣੇਰੋ ਨ ਉਪਟ੍ਠਾਪੇਤਬ੍ਬੋ. ਅਸੇਕ੍ਖੇਨ ਸੀਲਕ੍ਖਨ੍ਧੇਨਾਤਿ ਅਸੇਕ੍ਖਸ੍ਸ ਸੀਲਕ੍ਖਨ੍ਧੋਪਿ ਅਸੇਕ੍ਖੋ ਸੀਲਕ੍ਖਨ੍ਧੋ ਨਾਮ. ਅਸੇਕ੍ਖਸ੍ਸ ਅਯਨ੍ਤਿ ਹਿ ਅਸੇਕ੍ਖੋ, ਸੀਲਕ੍ਖਨ੍ਧੋ. ਏਵਂ ਸਬ੍ਬਤ੍ਥ. ਏਵਞ੍ਚ ਕਤ੍ਵਾ ਵਿਮੁਤ੍ਤਿਞਾਣਦਸ੍ਸਨਸਙ੍ਖਾਤਸ੍ਸ ਪਚ੍ਚਵੇਕ੍ਖਣਞਾਣਸ੍ਸਪਿ ਵਸੇਨ ਅਪੇਕ੍ਖਿਤ੍ਵਾ ਉਪ੍ਪਨ੍ਨਾ ਅਯਂ ਕਥਾ. ਅਸੇਕ੍ਖਸੀਲਨ੍ਤਿ ਚ ਨ ਅਗ੍ਗਫਲਸੀਲਮੇਵ ਅਧਿਪ੍ਪੇਤਂ, ਅਥ ਖੋ ਯਂ ਕਿਞ੍ਚਿ ਅਸੇਕ੍ਖਸਨ੍ਤਾਨੇ ਪਵਤ੍ਤਸੀਲਂ ਲੋਕਿਯਲੋਕੁਤ੍ਤਰਮਿਸ੍ਸਕਸ੍ਸ ਸੀਲਸ੍ਸ ਇਧਾਧਿਪ੍ਪੇਤਤ੍ਤਾ. ਸਮਾਧਿਕ੍ਖਨ੍ਧਾਦੀਸੁਪਿ ਵਿਮੁਤ੍ਤਿਕ੍ਖਨ੍ਧਪਰਿਯੋਸਾਨੇਸੁ ਅਯਮੇਵ ਨਯੋ, ਤਸ੍ਮਾ ਯਥਾ ਸੀਲਸਮਾਧਿਪਞ੍ਞਾਕ੍ਖਨ੍ਧਾ ਲੋਕਿਯਮਿਸ੍ਸਕਾ ਕਥਿਤਾ, ਏਵਂ ਵਿਮੁਤ੍ਤਿਕ੍ਖਨ੍ਧੋਪੀਤਿ ਤਦਙ੍ਗਵਿਮੁਤ੍ਤਿਆਦਯੋਪਿ ਵੇਦਿਤਬ੍ਬਾ, ਨ ਪਟਿਪ੍ਪਸ੍ਸਦ੍ਧਿਵਿਮੁਤ੍ਤਿ ਏਵ. ਵਿਮੁਤ੍ਤਿਞਾਣਦਸ੍ਸਨਂ ਪਨ ਲੋਕਿਯਮੇਵ. ਤੇਨੇਵ ਸਂਯੁਤ੍ਤਨਿਕਾਯਟ੍ਠਕਥਾਯਂ (ਸਂ.ਨਿ. ਅਟ੍ਠ. ੧.੧.੧੩੫) ਵੁਤ੍ਤਂ ‘‘ਪੁਰਿਮੇਹਿ ਚਤੂਹਿ ਪਦੇਹਿ ਲੋਕਿਯਲੋਕੁਤ੍ਤਰਸੀਲਸਮਾਧਿਪਞ੍ਞਾਵਿਮੁਤ੍ਤਿਯੋ ਕਥਿਤਾ, ਵਿਮੁਤ੍ਤਿਞਾਣਦਸ੍ਸਨਂ ਪਚ੍ਚਵੇਕ੍ਖਣਞਾਣਂ ਹੋਤਿ, ਤਂ ਲੋਕਿਯਮੇਵਾ’’ਤਿ.

ਅਸ੍ਸਦ੍ਧੋਤਿਆਦੀਸੁ ਤੀਸੁ ਵਤ੍ਥੂਸੁ ਸਦ੍ਧਾ ਏਤਸ੍ਸ ਨਤ੍ਥੀਤਿ ਅਸ੍ਸਦ੍ਧੋ. ਨਤ੍ਥਿ ਏਤਸ੍ਸ ਹਿਰੀਤਿ ਅਹਿਰਿਕੋ, ਅਕੁਸਲਸਮਾਪਤ੍ਤਿਯਾ ਅਜਿਗੁਚ੍ਛਮਾਨਸ੍ਸੇਤਂ ਅਧਿਵਚਨਂ. ਨ ਓਤ੍ਤਪ੍ਪਤੀਤਿ ਅਨੋਤ੍ਤਪ੍ਪੀ, ਅਕੁਸਲਸਮਾਪਤ੍ਤਿਯਾ ਨ ਭਾਯਤੀਤਿ ਵੁਤ੍ਤਂ ਹੋਤਿ. ਕੁਚ੍ਛਿਤਂ ਸੀਦਤੀਤਿ ਕੁਸੀਤੋ, ਹੀਨਵੀਰਿਯਸ੍ਸੇਤਂ ਅਧਿਵਚਨਂ. ਆਰਦ੍ਧਂ ਵੀਰਿਯਂ ਏਤਸ੍ਸਾਤਿ ਆਰਦ੍ਧਵੀਰਿਯੋ, ਸਮ੍ਮਪ੍ਪਧਾਨਯੁਤ੍ਤਸ੍ਸੇਤਂ ਅਧਿਵਚਨਂ. ਮੁਟ੍ਠਾ ਸਤਿ ਏਤਸ੍ਸਾਤਿ ਮੁਟ੍ਠਸ੍ਸਤੀ, ਨਟ੍ਠਸ੍ਸਤੀਤਿ ਵੁਤ੍ਤਂ ਹੋਤਿ. ਉਪਟ੍ਠਿਤਾ ਸਤਿ ਏਤਸ੍ਸਾਤਿ ਉਪਟ੍ਠਿਤਸ੍ਸਤੀ, ਨਿਚ੍ਚਂ ਆਰਮ੍ਮਣਾਭਿਮੁਖਪਵਤ੍ਤਸਤਿਸ੍ਸੇਤਂ ਅਧਿਵਚਨਂ.

ਅਧਿਸੀਲੇ ਸੀਲਵਿਪਨ੍ਨੋ ਚ ਅਜ੍ਝਾਚਾਰੇ ਆਚਾਰਵਿਪਨ੍ਨੋ ਚ ਆਪਜ੍ਜਿਤ੍ਵਾ ਅਵੁਟ੍ਠਿਤੋ ਅਧਿਪ੍ਪੇਤੋ. ਸਸ੍ਸਤੁਚ੍ਛੇਦਸਙ੍ਖਾਤਂ ਅਨ੍ਤਂ ਗਣ੍ਹਾਤਿ, ਗਾਹਯਤੀਤਿ ਵਾ ਅਨ੍ਤਗ੍ਗਾਹਿਕਾ, ਮਿਚ੍ਛਾਦਿਟ੍ਠਿ. ਪੁਰਿਮਾਨਿ ਦ੍ਵੇ ਪਦਾਨੀਤਿ ‘‘ਨ ਪਟਿਬਲੋ ਹੋਤਿ ਅਨ੍ਤੇਵਾਸਿਂ ਵਾ ਸਦ੍ਧਿਵਿਹਾਰਿਂ ਵਾ ਗਿਲਾਨਂ ਉਪਟ੍ਠਾਤੁਂ ਵਾ ਉਪਟ੍ਠਾਪੇਤੁਂ ਵਾ, ਅਨਭਿਰਤਂ ਵੂਪਕਾਸੇਤੁਂ ਵਾ ਵੂਪਕਾਸਾਪੇਤੁਂ ਵਾ’’ਤਿ ਇਮਾਨਿ ਦ੍ਵੇ ਪਦਾਨਿ.

ਅਭਿ ਵਿਸਿਟ੍ਠੋ ਉਤ੍ਤਮੋ ਸਮਾਚਾਰੋ ਅਭਿਸਮਾਚਾਰੋ, ਅਭਿਸਮਾਚਾਰੋਵ ਆਭਿਸਮਾਚਾਰਿਕੋਤਿ ਚ ਸਿਕ੍ਖਿਤਬ੍ਬਤੋ ਸਿਕ੍ਖਾਤਿ ਚ ਆਭਿਸਮਾਚਾਰਿਕਸਿਕ੍ਖਾ. ਅਭਿਸਮਾਚਾਰਂ ਵਾ ਆਰਬ੍ਭ ਪਞ੍ਞਤ੍ਤਾ ਸਿਕ੍ਖਾ ਆਭਿਸਮਾਚਾਰਿਕਸਿਕ੍ਖਾ, ਖਨ੍ਧਕਵਤ੍ਤਪਰਿਯਾਪਨ੍ਨਸਿਕ੍ਖਾਯੇਤਂ ਅਧਿਵਚਨਂ. ਮਗ੍ਗਬ੍ਰਹ੍ਮਚਰਿਯਸ੍ਸ ਆਦਿਭੂਤਾਤਿ ਆਦਿਬ੍ਰਹ੍ਮਚਰਿਯਕਾ, ਉਭਤੋਵਿਭਙ੍ਗਪਰਿਯਾਪਨ੍ਨਸਿਕ੍ਖਾਯੇਤਂ ਅਧਿਵਚਨਂ. ਤੇਨੇਵ ‘‘ਉਭਤੋਵਿਭਙ੍ਗਪਰਿਯਾਪਨ੍ਨਂ ਵਾ ਆਦਿਬ੍ਰਹ੍ਮਚਰਿਯਕਂ, ਖਨ੍ਧਕਵਤ੍ਤਪਰਿਯਾਪਨ੍ਨਂ ਆਭਿਸਮਾਚਾਰਿਕ’’ਨ੍ਤਿ ਵਿਸੁਦ੍ਧਿਮਗ੍ਗੇ (ਵਿਸੁਦ੍ਧਿ. ੧.੧੧) ਵੁਤ੍ਤਂ, ਤਸ੍ਮਾ ਸੇਕ੍ਖਪਣ੍ਣਤ੍ਤਿਯਨ੍ਤਿ ਏਤ੍ਥ ਸਿਕ੍ਖਿਤਬ੍ਬਤੋ ਸੇਕ੍ਖਾ, ਭਗਵਤਾ ਪਞ੍ਞਤ੍ਤਤ੍ਤਾ ਪਣ੍ਣਤ੍ਤਿ, ਸਬ੍ਬਾਪਿ ਉਭਤੋਵਿਭਙ੍ਗਪਰਿਯਾਪਨ੍ਨਾ ਸਿਕ੍ਖਾਪਦਪਣ੍ਣਤ੍ਤਿ ‘‘ਸੇਕ੍ਖਪਣ੍ਣਤ੍ਤੀ’’ਤਿ ਵੁਤ੍ਤਾਤਿ ਗਹੇਤਬ੍ਬਂ. ਤੇਨੇਵ ਗਣ੍ਠਿਪਦੇਪਿ ਵੁਤ੍ਤਂ ‘‘ਸੇਕ੍ਖਪਣ੍ਣਤ੍ਤਿਯਨ੍ਤਿ ਪਾਰਾਜਿਕਮਾਦਿਂ ਕਤ੍ਵਾ ਸਿਕ੍ਖਿਤਬ੍ਬਸਿਕ੍ਖਾਪਦਪਞ੍ਞਤ੍ਤਿਯ’’ਨ੍ਤਿ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵਾਤਿ ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ਮਹਾਵਗ੍ਗ ੩.੮੪).

ਉਪਜ੍ਝਾਯਾਚਰਿਯਕਥਾਯਂ ਨ ਸਾਮਣੇਰੋ ਉਪਟ੍ਠਾਪੇਤਬ੍ਬੋਤਿ ਉਪਜ੍ਝਾਯੇਨ ਹੁਤ੍ਵਾ ਨ ਪਬ੍ਬਾਜੇਤਬ੍ਬੋ. ਅਸੇਕ੍ਖਸ੍ਸ ਅਯਨ੍ਤਿ ਅਸੇਕ੍ਖੋ, ਲੋਕਿਯਲੋਕੁਤ੍ਤਰੋ ਸੀਲਕ੍ਖਨ੍ਧੋ. ਅਨ੍ਤਗ੍ਗਾਹਿਕਾਯਾਤਿ ਸਸ੍ਸਤੁਚ੍ਛੇਦਕੋਟ੍ਠਾਸਗ੍ਗਾਹਿਕਾਯ. ਪਚ੍ਛਿਮਾਨਿ ਦ੍ਵੇਤਿ ਅਪ੍ਪਸ੍ਸੁਤੋ ਹੋਤਿ, ਦੁਪ੍ਪਞ੍ਞੋ ਹੋਤੀਤਿ ਇਮਾਨਿ ਦ੍ਵੇ ਅਙ੍ਗਾਨਿ. ਪਚ੍ਛਿਮਾਨਿ ਤੀਣੀਤਿ ਨ ਪਟਿਬਲੋ ਉਪ੍ਪਨ੍ਨਂ ਕੁਕ੍ਕੁਚ੍ਚਂ ਧਮ੍ਮਤੋ ਵਿਨੋਦੇਤੁਂ, ਆਪਤ੍ਤਿਂ ਨ ਜਾਨਾਤਿ, ਆਪਤ੍ਤਿਵੁਟ੍ਠਾਨਂ ਨ ਜਾਨਾਤੀਤਿ ਇਮਾਨਿ ਤੀਣਿ. ਕੁਕ੍ਕੁਚ੍ਚਸ੍ਸ ਹਿ ਪਾਲ਼ਿਅਟ੍ਠਕਥਾਨਯਸਙ੍ਖਾਤਧਮ੍ਮਤੋ ਵਿਨੋਦੇਤੁਂ ਅਪ੍ਪਟਿਬਲਤਾ ਨਾਮ ਅਬ੍ਯਤ੍ਤਤ੍ਤਾ ਏਵ ਹੋਤੀਤਿ ਸਾਪਿ ਆਪਤ੍ਤਿਅਙ੍ਗਮੇਵ ਵੁਤ੍ਤਾ.

ਅਭਿ ਵਿਸਿਟ੍ਠੋ ਉਤ੍ਤਮੋ ਸਮਾਚਾਰੋ ਅਭਿਸਮਾਚਾਰੋ, ਵਤ੍ਤਪ੍ਪਟਿਪਤ੍ਤਿਸੀਲਂ, ਤਂ ਆਰਬ੍ਭ ਪਞ੍ਞਤ੍ਤਾ ਖਨ੍ਧਕਸਿਕ੍ਖਾਪਦਸਙ੍ਖਾਤਾ ਸਿਕ੍ਖਾ ਆਭਿਸਮਾਚਾਰਿਕਾ. ਸਿਕ੍ਖਾਪਦਮ੍ਪਿ ਹਿ ਤਦਤ੍ਥਪਰਿਪੂਰਣਤ੍ਥਿਕੇਹਿ ਉਗ੍ਗਹਣਾਦਿਵਸੇਨ ਸਿਕ੍ਖਿਤਬ੍ਬਤੋ ਸਿਕ੍ਖਾਤਿ ਵੁਚ੍ਚਤਿ. ਮਗ੍ਗਬ੍ਰਹ੍ਮਚਰਿਯਸ੍ਸ ਆਦਿਭੂਤਾ ਕਾਰਣਭੂਤਾ ਆਦਿਬ੍ਰਹ੍ਮਚਰਿਯਕਾ, ਉਭਤੋਵਿਭਙ੍ਗਪਰਿਯਾਪਨ੍ਨਸਿਕ੍ਖਾਪਦਂ. ਤੇਨੇਵੇਤ੍ਥ ਵਿਸੁਦ੍ਧਿਮਗ੍ਗੇਪਿ (ਵਿਸੁਦ੍ਧਿ. ੧.੧੧) ‘‘ਉਭਤੋਵਿਭਙ੍ਗਪਰਿਯਾਪਨ੍ਨਂ ਸਿਕ੍ਖਾਪਦਂ ਆਦਿਬ੍ਰਹ੍ਮਚਰਿਯਕਂ, ਖਨ੍ਧਕਵਤ੍ਤਪਰਿਯਾਪਨ੍ਨਂ ਆਭਿਸਮਾਚਾਰਿਕ’’ਨ੍ਤਿ ਵੁਤ੍ਤਂ, ਤਸ੍ਮਾ ਸੇਕ੍ਖਪਣ੍ਣਤ੍ਤਿਯਨ੍ਤਿ ਏਤ੍ਥ ਸਿਕ੍ਖਿਤਬ੍ਬਤੋ ਸੇਕ੍ਖਾ, ਭਗਵਤਾਵ ਪਞ੍ਞਤ੍ਤਤ੍ਤਾ ਪਞ੍ਞਤ੍ਤਿ. ਸਬ੍ਬਾਪਿ ਉਭਤੋਵਿਭਙ੍ਗਪਰਿਯਾਪਨ੍ਨਾ ਸਿਕ੍ਖਾਪਦਪਣ੍ਣਤ੍ਤਿ ‘‘ਸੇਕ੍ਖਪਣ੍ਣਤ੍ਤੀ’’ਤਿ ਵੁਤ੍ਤਾਤਿ ਗਹੇਤਬ੍ਬਂ. ਨਾਮਰੂਪਪਰਿਚ੍ਛੇਦੇਤਿ ਏਤ੍ਥ ਕੁਸਲਤ੍ਤਿਕਾਦੀਹਿ ਵੁਤ੍ਤਂ ਜਾਤਿਭੂਮਿਪੁਗ੍ਗਲਸਮ੍ਪਯੋਗਵਤ੍ਥਾਰਮ੍ਮਣਕਮ੍ਮਦ੍ਵਾਰਲਕ੍ਖਣਰਸਾਦਿਭੇਦੇਹਿ ਵੇਦਨਾਕ੍ਖਨ੍ਧਾਦਿਚਤੁਬ੍ਬਿਧਂ ਸਨਿਬ੍ਬਾਨਂ ਨਾਮਂ, ਭੂਤੋਪਾਦਾਯਭੇਦਂ ਰੂਪਞ੍ਚ ਪਰਿਚ੍ਛਿਨ੍ਦਿਤ੍ਵਾ ਜਾਨਨਪਞ੍ਞਾ, ਤਪ੍ਪਕਾਸਕੋ ਚ ਗਨ੍ਥੋ ਨਾਮਰੂਪਪਰਿਚ੍ਛੇਦੋ ਨਾਮ. ਇਮਿਨਾ ਅਭਿਧਮ੍ਮਤ੍ਥਕੁਸਲੇਨ ਭਵਿਤਬ੍ਬਨ੍ਤਿ ਦਸ੍ਸੇਤਿ. ਸਿਕ੍ਖਾਪੇਤੁਨ੍ਤਿ ਉਗ੍ਗਣ੍ਹਾਪੇਤੁਨ੍ਤਿ ਵਿਮਤਿਵਿਨੋਦਨਿਯਂ (ਵਿ. ਵਿ. ਟੀ. ਮਹਾਵਗ੍ਗ ੨.੮੪) ਵੁਤ੍ਤਂ.

੧੫੩. ਆਯਸ੍ਮਤੋ ਨਿਸ੍ਸਾਯ ਵਚ੍ਛਾਮੀਤਿ ਏਤ੍ਥ ਆਯਸ੍ਮਤੋਤਿ ਉਪਯੋਗਤ੍ਥੇ ਸਾਮਿਵਚਨਂ, ਆਯਸ੍ਮਨ੍ਤਂ ਨਿਸ੍ਸਾਯ ਵਸਿਸ੍ਸਾਮੀਤਿ ਅਤ੍ਥੋ. ਯਂ ਪਨ ਵੁਤ੍ਤਂ ਸਮਨ੍ਤਪਾਸਾਦਿਕਾਯਂ (ਮਹਾਵ. ਅਟ੍ਠ. ੭੬) ‘‘ਬ੍ਯਤ੍ਤੋ…ਪੇ… ਵੁਤ੍ਤਲਕ੍ਖਣੋਯੇਵਾ’’ਤਿ, ਤਂ ਪਰਿਸੂਪਟ੍ਠਾਕਬਹੁਸ੍ਸੁਤਂ ਸਨ੍ਧਾਯ ਵਦਤਿ. ਪਬ੍ਬਜ੍ਜਾਉਪਸਮ੍ਪਦਧਮ੍ਮਨ੍ਤੇਵਾਸਿਕੇਹਿ ਪਨ…ਪੇ… ਤਾਵ ਵਤ੍ਤਂ ਕਾਤਬ੍ਬਨ੍ਤਿ ਪਬ੍ਬਜ੍ਜਾਚਰਿਯਉਪਸਮ੍ਪਦਾਚਰਿਯਧਮ੍ਮਾਚਰਿਯਾਨਂ ਏਤੇਹਿ ਯਥਾਵੁਤ੍ਤਵਤ੍ਤਂ ਕਾਤਬ੍ਬਂ. ਤਤ੍ਥ ਯੇਨ ਸਿਕ੍ਖਾਪਦਾਨਿ ਦਿਨ੍ਨਾਨਿ, ਅਯਂ ਪਬ੍ਬਜ੍ਜਾਚਰਿਯੋ. ਯੇਨ ਉਪਸਮ੍ਪਦਕਮ੍ਮਵਾਚਾ ਵੁਤ੍ਤਾ, ਅਯਂ ਉਪਸਮ੍ਪਦਾਚਰਿਯੋ. ਯੋ ਉਦ੍ਦੇਸਂ ਵਾ ਪਰਿਪੁਚ੍ਛਂ ਵਾ ਦੇਤਿ, ਅਯਂ ਧਮ੍ਮਾਚਰਿਯੋਤਿ ਵੇਦਿਤਬ੍ਬਂ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵ.

੧੫੪. ਨਿਸ੍ਸਯਪਟਿਪ੍ਪਸ੍ਸਦ੍ਧਿਕਥਾਯਂ ਦਿਸਂ ਗਤੋਤਿ ਪੁਨ ਆਗਨ੍ਤੁਕਾਮੋ, ਅਨਾਗਨ੍ਤੁਕਾਮੋ ਵਾ ਹੁਤ੍ਵਾ ਵਾਸਤ੍ਥਾਯ ਕਞ੍ਚਿ ਦਿਸਂ ਗਤੋ. ਭਿਕ੍ਖੁਸ੍ਸ ਸਭਾਗਤਨ੍ਤਿ ਪੇਸਲਭਾਵਂ. ਓਲੋਕੇਤ੍ਵਾਤਿ ਉਪਪਰਿਕ੍ਖਿਤ੍ਵਾ. ਵਿਬ੍ਭਨ੍ਤੇ…ਪੇ… ਤਤ੍ਥ ਗਨ੍ਤਬ੍ਬਨ੍ਤਿ ਏਤ੍ਥ ‘‘ਸਚੇ ਕੇਨਚਿ ਕਰਣੀਯੇਨ ਤਦਹੇਵ ਗਨ੍ਤੁਂ ਅਸਕ੍ਕੋਨ੍ਤੋ ‘ਕਤਿਪਾਹੇਨ ਗਮਿਸ੍ਸਾਮੀ’ਤਿ ਗਮਨੇ ਸਉਸ੍ਸਾਹੋ ਹੋਤਿ, ਰਕ੍ਖਤੀ’’ਤਿ ਵਦਨ੍ਤਿ. ਮਾ ਇਧ ਪਟਿਕ੍ਕਮੀਤਿ ਮਾ ਇਧ ਪਵਿਸਿ. ਤਤ੍ਰੇਵ ਵਸਿਤਬ੍ਬਨ੍ਤਿ ਤਤ੍ਥੇਵ ਨਿਸ੍ਸਯਂ ਗਹੇਤ੍ਵਾ ਵਸਿਤਬ੍ਬਂ. ਤਂਯੇਵ ਵਿਹਾਰਂ…ਪੇ… ਵਸਿਤੁਂ ਵਟ੍ਟਤੀਤਿ ਏਤ੍ਥ ਉਪਜ੍ਝਾਯੇਨ ਪਰਿਚ੍ਚਤ੍ਤਤ੍ਤਾ ਉਪਜ੍ਝਾਯਸਮੋਧਾਨਪਰਿਹਾਰੋ ਨਤ੍ਥਿ, ਤਸ੍ਮਾ ਉਪਜ੍ਝਾਯਸਮੋਧਾਨਗਤਸ੍ਸਪਿ ਆਚਰਿਯਸ੍ਸ ਸਨ੍ਤਿਕੇ ਗਹਿਤਨਿਸ੍ਸਯੋ ਨ ਪਟਿਪ੍ਪਸ੍ਸਮ੍ਭਤਿ.

ਆਚਰਿਯਮ੍ਹਾ ਨਿਸ੍ਸਯਪਟਿਪ੍ਪਸ੍ਸਦ੍ਧੀਸੁ ਆਚਰਿਯੋ ਪਕ੍ਕਨ੍ਤੋ ਵਾ ਹੋਤੀਤਿ ਏਤ੍ਥ ‘‘ਪਕ੍ਕਨ੍ਤੋਤਿ ਦਿਸਂ ਗਤੋ’’ਤਿਆਦਿਨਾ ਉਪਜ੍ਝਾਯਸ੍ਸ ਪਕ੍ਕਮਨੇ ਯੋ ਵਿਨਿਚ੍ਛਯੋ ਵੁਤ੍ਤੋ, ਸੋ ਤਤ੍ਥ ਵੁਤ੍ਤਨਯੇਨੇਵ ਇਧਾਪਿ ਸਕ੍ਕਾ ਵਿਞ੍ਞਾਤੁਨ੍ਤਿ ਤਂ ਅਵਤ੍ਵਾ ‘‘ਕੋਚਿ ਆਚਰਿਯੋ ਆਪੁਚ੍ਛਿਤ੍ਵਾ ਪਕ੍ਕਮਤੀ’’ਤਿਆਦਿਨਾ ਅਞ੍ਞੋਯੇਵ ਨਯੋ ਆਰਦ੍ਧੋ. ਅਯਞ੍ਚ ਨਯੋ ਉਪਜ੍ਝਾਯਪਕ੍ਕਮਨੇਪਿ ਵੇਦਿਤਬ੍ਬੋਯੇਵ. ਈਦਿਸੇਸੁ ਹਿ ਠਾਨੇਸੁ ਏਕਤ੍ਥਵੁਤ੍ਤਲਕ੍ਖਣਂ ਅਞ੍ਞਤ੍ਥਾਪਿ ਦਟ੍ਠਬ੍ਬਂ. ਸਚੇ ਦ੍ਵੇ ਲੇਡ੍ਡੁਪਾਤੇ ਅਤਿਕ੍ਕਮਿਤ੍ਵਾ ਨਿਵਤ੍ਤਤਿ, ਪਟਿਪ੍ਪਸ੍ਸਦ੍ਧੋ ਹੋਤੀਤਿ ਏਤ੍ਥ ਏਤ੍ਤਾਵਤਾ ਦਿਸਾਪਕ੍ਕਨ੍ਤੋ ਨਾਮ ਹੋਤੀਤਿ ਅਨ੍ਤੇਵਾਸਿਕੇ ਅਨਿਕ੍ਖਿਤ੍ਤਧੁਰੇਪਿ ਨਿਸ੍ਸਯੋ ਪਟਿਪ੍ਪਸ੍ਸਮ੍ਭਤਿ. ਆਚਰਿਯੁਪਜ੍ਝਾਯਾ ਦ੍ਵੇ ਲੇਡ੍ਡੁਪਾਤੇ ਅਤਿਕ੍ਕਮ੍ਮ ਅਞ੍ਞਸ੍ਮਿਂ ਵਿਹਾਰੇ ਵਸਨ੍ਤੀਤਿ ਬਹਿਉਪਚਾਰਸੀਮਾਯਂ ਅਨ੍ਤੇਵਾਸਿਕਸਦ੍ਧਿਵਿਹਾਰਿਕਾਨਂ ਵਸਨਟ੍ਠਾਨਤੋ ਦ੍ਵੇ ਲੇਡ੍ਡੁਪਾਤੇ ਅਤਿਕ੍ਕਮ੍ਮ ਅਞ੍ਞਸ੍ਮਿਂ ਸੇਨਾਸਨੇ ਵਸਨ੍ਤਿ, ਅਨ੍ਤੋਉਪਚਾਰਸੀਮਾਯਂ ਪਨ ਦ੍ਵੇ ਲੇਡ੍ਡੁਪਾਤੇ ਅਤਿਕ੍ਕਮਿਤ੍ਵਾਪਿ ਵਸਤੋ ਨਿਸ੍ਸਯੋ ਨ ਪਟਿਪ੍ਪਸ੍ਸਮ੍ਭਤਿ. ‘‘ਸਚੇਪਿ ਆਚਰਿਯੋ ਮੁਞ੍ਚਿਤੁਕਾਮੋਵ ਹੁਤ੍ਵਾ ਨਿਸ੍ਸਯਪਣਾਮਨਾਯ ਪਣਾਮੇਤੀ’’ਤਿਆਦਿ ਸਬ੍ਬਂ ਉਪਜ੍ਝਾਯਸ੍ਸ ਆਣਤ੍ਤਿਯਮ੍ਪਿ ਵੇਦਿਤਬ੍ਬਨ੍ਤਿ ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ਮਹਾਵਗ੍ਗ ੩.੮੩) ਵੁਤ੍ਤਂ.

੧੫੩. ਸਾਹੂਤਿ ਸਾਧੁ ਸੁਨ੍ਦਰਂ. ਲਹੂਤਿ ਅਗਰੁ, ਸੁਭਰਤਾਤਿ ਅਤ੍ਥੋ. ਓਪਾਯਿਕਨ੍ਤਿ ਉਪਾਯਪਟਿਸਂਯੁਤ੍ਤਂ, ਏਵਂ ਪਟਿਪਜ੍ਜਨਂ ਨਿਤ੍ਥਰਣੁਪਾਯੋਤਿ ਅਤ੍ਥੋ. ਪਤਿਰੂਪਨ੍ਤਿ ਸਾਮੀਚਿਕਮ੍ਮਮਿਦਨ੍ਤਿ ਅਤ੍ਥੋ. ਪਾਸਾਦਿਕੇਨਾਤਿ ਪਸਾਦਾਵਹੇਨ, ਕਾਯਵਚੀਪਯੋਗੇਨ ਸਮ੍ਪਾਦੇਹੀਤਿ ਅਤ੍ਥੋ. ਕਾਯੇਨਾਤਿ ਏਤਦਤ੍ਥਵਿਞ੍ਞਾਪਕਂ ਹਤ੍ਥਮੁਦ੍ਦਾਦਿਂ ਦਸ੍ਸੇਨ੍ਤੋ ਕਾਯੇਨ ਵਿਞ੍ਞਾਪੇਤਿ. ‘‘ਸਾਧੂ’’ਤਿ ਸਮ੍ਪਟਿਚ੍ਛਨਂ ਸਨ੍ਧਾਯਾਤਿ ਉਪਜ੍ਝਾਯੇਨ ‘‘ਸਾਹੂ’’ਤਿਆਦੀਸੁ ਵੁਤ੍ਤੇਸੁ ਸਦ੍ਧਿਵਿਹਾਰਿਕਸ੍ਸ ‘‘ਸਾਧੂ’’ਤਿ ਸਮ੍ਪਟਿਚ੍ਛਨਵਚਨਂ ਸਨ੍ਧਾਯ ‘‘ਕਾਯੇਨ ਵਿਞ੍ਞਾਪੇਤੀ’’ਤਿਆਦਿ ਵੁਤ੍ਤਨ੍ਤਿ ਅਧਿਪ੍ਪਾਯੋ. ਆਯਾਚਨਦਾਨਮਤ੍ਤੇਨਾਤਿ ਸਦ੍ਧਿਵਿਹਾਰਿਕਸ੍ਸ ਪਠਮਂ ਆਯਾਚਨਮਤ੍ਤੇਨ, ਤਤੋ ਉਪਜ੍ਝਾਯਸ੍ਸ ਚ ‘‘ਸਾਹੂ’’ਤਿਆਦਿਨਾ ਵਚਨਮਤ੍ਤੇਨਾਤਿ ਅਤ੍ਥੋ. ਆਚਰਿਯਸ੍ਸ ਸਨ੍ਤਿਕੇ ਨਿਸ੍ਸਯਗ੍ਗਹਣੇ ਆਯਸ੍ਮਤੋ ਨਿਸ੍ਸਾਯ ਵਚ੍ਛਾਮੀਤਿ ਆਯਸ੍ਮਨ੍ਤਂ ਨਿਸ੍ਸਾਯ ਵਸਿਸ੍ਸਾਮੀਤਿ ਅਤ੍ਥੋ.

੧੫੪. ਨਿਸ੍ਸਯਪਟਿਪ੍ਪਸ੍ਸਦ੍ਧਿਕਥਾਯਂ ਯੋ ਵਾ ਏਕਸਮ੍ਭੋਗਪਰਿਭੋਗੋ, ਤਸ੍ਸ ਸਨ੍ਤਿਕੇ ਨਿਸ੍ਸਯੋ ਗਹੇਤਬ੍ਬੋਤਿ ਇਮਿਨਾ ਲਜ੍ਜੀਸੁ ਏਵ ਨਿਸ੍ਸਯਗ੍ਗਹਣਂ ਨਿਯੋਜੇਤਿ ਅਲਜ੍ਜੀਸੁ ਪਟਿਕ੍ਖਿਤ੍ਤਤ੍ਤਾ. ਏਤ੍ਥ ਚ ਪਰਿਭੋਗਸਦ੍ਦੇਨ ਏਕਕਮ੍ਮਾਦਿਕੋ ਸਂਵਾਸੋ ਗਹਿਤੋ ਪਚ੍ਚਯਪਰਿਭੋਗਸ੍ਸ ਸਮ੍ਭੋਗਸਦ੍ਦੇਨ ਗਹਿਤਤ੍ਤਾ. ਏਤੇਨ ਚ ਸਮ੍ਭੋਗਸਂਵਾਸਾਨਂ ਅਲਜ੍ਜੀਹਿ ਸਦ੍ਧਿਂ ਨ ਕਤ੍ਤਬ੍ਬਤਂ ਦਸ੍ਸੇਤਿ. ਪਰਿਹਾਰੋ ਨਤ੍ਥੀਤਿ ਆਪਤ੍ਤਿਪਰਿਹਾਰੋ ਨਤ੍ਥਿ. ਤਾਦਿਸੋਤਿ ਯਤ੍ਥ ਨਿਸ੍ਸਯੋ ਗਹਿਤਪੁਬ੍ਬੋ, ਯੋ ਚ ਏਕਸਮ੍ਭੋਗਪਰਿਭੋਗੋ, ਤਾਦਿਸੋ. ਤਥਾ ਵੁਤ੍ਤਨ੍ਤਿ ‘‘ਲਹੁਂ ਆਗਮਿਸ੍ਸਤੀ’’ਤਿ ਵੁਤ੍ਤਞ੍ਚੇਤਿ ਅਤ੍ਥੋ. ਚਤ੍ਤਾਰਿ ਪਞ੍ਚ ਦਿਵਸਾਨੀਤਿ ਇਦਂ ਉਪਲਕ੍ਖਣਮਤ੍ਤਂ. ਯਦਿ ਏਕਾਹਦ੍ਵੀਹੇਨ ਸਭਾਗਤਾ ਪਞ੍ਞਾਯਤਿ, ਞਾਤਦਿਵਸੇ ਗਹੇਤਬ੍ਬੋਵ. ਅਥਾਪਿ ਚਤੁਪਞ੍ਚਾਹੇਨਪਿ ਨ ਪਞ੍ਞਾਯਤਿ, ਯਤ੍ਤਕੇਹਿ ਦਿਵਸੇਹਿ ਪਞ੍ਞਾਯਤਿ, ਤਤ੍ਤਕਾਨਿ ਅਤਿਕ੍ਕਾਮੇਤਬ੍ਬਾਨਿ. ਸਭਾਗਤਂ ਓਲੋਕੇਮੀਤਿ ਪਨ ਲੇਸੋ ਨ ਕਾਤਬ੍ਬੋ. ਦਹਰਾ ਸੁਣਨ੍ਤੀਤਿ ਏਤ੍ਥ ਅਸੁਤ੍ਵਾਪਿ ‘‘ਆਗਮਿਸ੍ਸਤਿ, ਕੇਨਚਿ ਅਨ੍ਤਰਾਯੇਨ ਚਿਰਾਯਨ੍ਤੀ’’ਤਿ ਸਞ੍ਞਾਯ ਸਤਿਪਿ ਲਬ੍ਭਤੇਵ ਪਰਿਹਾਰੋ. ਤੇਨਾਹ ‘‘ਇਧੇਵਾਹਂ ਵਸਿਸ੍ਸਾਮੀਤਿ ਪਹਿਣਤਿ, ਪਰਿਹਾਰੋ ਨਤ੍ਥੀ’’ਤਿ. ਏਕਦਿਵਸਮ੍ਪਿ ਪਰਿਹਾਰੋ ਨਤ੍ਥੀਤਿ ਗਮਨੇ ਨਿਰੁਸ੍ਸਾਹਂ ਸਨ੍ਧਾਯ ਵੁਤ੍ਤਂ, ਸਉਸ੍ਸਾਹਸ੍ਸ ਪਨ ਸੇਨਾਸਨਪਟਿਸਾਮਨਾਦਿਵਸੇਨ ਕਤਿਪਾਹੇ ਗਤੇਪਿ ਨ ਦੋਸੋ.

ਤਤ੍ਰੇਵ ਵਸਿਤਬ੍ਬਨ੍ਤਿ ਤਤ੍ਰ ਸਭਾਗਟ੍ਠਾਨੇ ਏਵ ਨਿਸ੍ਸਯਂ ਗਹੇਤ੍ਵਾ ਵਸਿਤਬ੍ਬਂ. ਤਂਯੇਵ ਵਿਹਾਰਂ…ਪੇ… ਵਸਿਤੁਂ ਵਟ੍ਟਤੀਤਿ ਇਮਿਨਾ ਉਪਜ੍ਝਾਯੇ ਸਙ੍ਗਣ੍ਹਨ੍ਤੇਯੇਵ ਤਂਸਮੋਧਾਨੇ ਨਿਸ੍ਸਯਪਟਿਪ੍ਪਸ੍ਸਦ੍ਧਿ ਵੁਤ੍ਤਾ, ਤਸ੍ਮਿਂ ਪਨ ਕੋਧੇਨ ਵਾ ਗਣਨਿਰਪੇਕ੍ਖਤਾਯ ਵਾ ਅਸਙ੍ਗਣ੍ਹਨ੍ਤੇ ਅਞ੍ਞੇਸੁ ਗਹਿਤੋ ਨਿਸ੍ਸਯੋ ਨ ਪਟਿਪ੍ਪਸ੍ਸਮ੍ਭਤੀਤਿ ਦਸ੍ਸੇਤਿ.

ਆਚਰਿਯਮ੍ਹਾ ਨਿਸ੍ਸਯਪਟਿਪ੍ਪਸ੍ਸਦ੍ਧਿਯਂ ਵੁਤ੍ਤੋ ‘‘ਕੋਚਿ ਆਚਰਿਯੋ’’ਤਿਆਦਿਕੋ ਨਯੋ ਉਪਜ੍ਝਾਯਪਕ੍ਕਮਨਾਦੀਸੁਪਿ ਨੇਤ੍ਵਾ ਤਤ੍ਥ ਚ ਵੁਤ੍ਤੋ ਇਧਾਪਿ ਨੇਤ੍ਵਾ ਯਥਾਰਹਂ ਯੋਜੇਤਬ੍ਬੋ. ਦ੍ਵੇ ਲੇਡ੍ਡੁਪਾਤੇ ਅਤਿਕ੍ਕਮ੍ਮ ਅਞ੍ਞਸ੍ਮਿਂ ਵਿਹਾਰੇ ਵਸਨ੍ਤੀਤਿ ਉਪਚਾਰਸੀਮਤੋ ਬਹਿ ਅਞ੍ਞਸ੍ਮਿਂ ਵਿਹਾਰੇ ਅਨ੍ਤੇਵਾਸਿਕਾਦੀਨਂ ਵਸਨਟ੍ਠਾਨਤੋ ਦ੍ਵੇ ਲੇਡ੍ਡੁਪਾਤੇ ਅਤਿਕ੍ਕਮਿਤ੍ਵਾ ਵਸਨ੍ਤਿ. ਤੇਨ ਬਹਿਉਪਚਾਰੇਪਿ ਅਨ੍ਤੇਵਾਸਿਕਾਦੀਨਂ ਵਸਨਟ੍ਠਾਨਤੋ ਦ੍ਵਿਨ੍ਨਂ ਲੇਡ੍ਡੁਪਾਤਾਨਂ ਅਨ੍ਤਰੇ ਆਸਨ੍ਨੇ ਪਦੇਸੇ ਵਸਤਿ, ਨਿਸ੍ਸਯੋ ਨ ਪਟਿਪ੍ਪਸ੍ਸਮ੍ਭਤੀਤਿ ਦਸ੍ਸੇਤਿ. ਅਨ੍ਤੋਉਪਚਾਰਸੀਮਾਯਂ ਪਨ ਦ੍ਵੇ ਲੇਡ੍ਡੁਪਾਤੇ ਅਤਿਕ੍ਕਮਿਤ੍ਵਾ ਵਸਤੋ ਨਿਸ੍ਸਯੋ ਨ ਪਟਿਪ੍ਪਸ੍ਸਮ੍ਭਤੇਵਾਤਿ ਵਿਮਤਿਵਿਨੋਦਨਿਯਂ (ਵਿ. ਵਿ. ਟੀ. ਮਹਾਵਗ੍ਗ ੨.੮੩) ਵੁਤ੍ਤਂ.

ਇਤਿ ਵਿਨਯਸਙ੍ਗਹਸਂਵਣ੍ਣਨਾਭੂਤੇ ਵਿਨਯਾਲਙ੍ਕਾਰੇ

ਨਿਸ੍ਸਯਵਿਨਿਚ੍ਛਯਕਥਾਲਙ੍ਕਾਰੋ ਨਾਮ

ਤੇਵੀਸਤਿਮੋ ਪਰਿਚ੍ਛੇਦੋ.