੨੨. ਪਬ੍ਬਜ੍ਜਾਵਿਨਿਚ੍ਛਯਕਥਾ

੧੨੩. ਏਵਂ ਪਟਿਕ੍ਖੇਪਪਵਾਰਣਾਵਿਨਿਚ੍ਛਯਂ ਕਥੇਤ੍ਵਾ ਇਦਾਨਿ ਪਬ੍ਬਜ੍ਜਾਵਿਨਿਚ੍ਛਯਂ ਕਥੇਤੁਂ ‘‘ਪਬ੍ਬਜ੍ਜਾਤਿ ਏਤ੍ਥ ਪਨਾ’’ਤ੍ਯਾਦਿਮਾਹ. ਤਤ੍ਥ ਪਠਮਂ ਵਜਿਤਬ੍ਬਾਤਿ ਪਬ੍ਬਜ੍ਜਾ, ਉਪਸਮ੍ਪਦਾਤੋ ਪਠਮਂ ਉਪਗਚ੍ਛਿਤਬ੍ਬਾਤਿ ਅਤ੍ਥੋ. ਪ-ਪੁਬ੍ਬ ਵਜ ਗਤਿਮ੍ਹੀਤਿ ਧਾਤੁ. ਕੁਲਪੁਤ੍ਤਨ੍ਤਿ ਆਚਾਰਕੁਲਪੁਤ੍ਤਂ ਸਨ੍ਧਾਯ ਵਦਤਿ. ਯੇ ਪੁਗ੍ਗਲਾ ਪਟਿਕ੍ਖਿਤ੍ਤਾ, ਤੇ ਵਜ੍ਜੇਤ੍ਵਾਤਿ ਸਮ੍ਬਨ੍ਧੋ. ਪਬ੍ਬਜ੍ਜਾਦੋਸਵਿਰਹਿਤੋਤਿ ਪਬ੍ਬਜ੍ਜਾਯ ਅਨ੍ਤਰਾਯਕਰੇਹਿ ਪਞ੍ਚਾਬਾਧਾਦਿਦੋਸੇਹਿ ਵਿਰਹਿਤੋ. ਨਖਪਿਟ੍ਠਿਪ੍ਪਮਾਣਨ੍ਤਿ ਏਤ੍ਥ ਕਨਿਟ੍ਠਙ੍ਗੁਲਿਨਖਪਿਟ੍ਠਿ ਅਧਿਪ੍ਪੇਤਾ. ‘‘ਤਞ੍ਚੇ ਨਖਪਿਟ੍ਠਿਪ੍ਪਮਾਣਮ੍ਪਿ ਵਡ੍ਢਨਪਕ੍ਖੇ ਠਿਤਂ ਹੋਤਿ, ਨ ਪਬ੍ਬਾਜੇਤਬ੍ਬੋਤਿ ਇਮਿਨਾ ਸਾਮਞ੍ਞਲਕ੍ਖਣਂ ਦਸ੍ਸਿਤਂ, ਤਸ੍ਮਾ ਯਤ੍ਥ ਕਤ੍ਥਚਿ ਸਰੀਰਾਵਯਵੇਸੁ ਨਖਪਿਟ੍ਠਿਪ੍ਪਮਾਣਂ ਵਡ੍ਢਨਕਪਕ੍ਖੇ ਠਿਤਂ ਚੇ, ਨ ਵਟ੍ਟਤੀਤਿ ਸਿਦ੍ਧਂ. ਏਵਞ੍ਚ ਸਤਿ ਨਖਪਿਟ੍ਠਿਪ੍ਪਮਾਣਮ੍ਪਿ ਅਵਡ੍ਢਨਕਪਕ੍ਖੇ ਠਿਤਂ ਚੇ, ਸਬ੍ਬਤ੍ਥ ਵਟ੍ਟਤੀਤਿ ਆਪਨ੍ਨਂ, ਤਞ੍ਚ ਨ ਸਾਮਞ੍ਞਤੋ ਅਧਿਪ੍ਪੇਤਨ੍ਤਿ ਪਦੇਸਵਿਸੇਸੇਯੇਵ ਨਿਯਮੇਤ੍ਵਾ ਦਸ੍ਸੇਨ੍ਤੋ ‘ਸਚੇ ਪਨਾ’ਤਿਆਦਿਮਾਹ. ਸਚੇ ਹਿ ਅਵਿਸੇਸੇਨ ਨਖਪਿਟ੍ਠਿਪ੍ਪਮਾਣਂ ਅਵਡ੍ਢਨਕਪਕ੍ਖੇ ਠਿਤਂ ਵਟ੍ਟੇਯ੍ਯ, ‘ਨਿਵਾਸਨਪਾਰੁਪਨੇਹਿ ਪਕਤਿਪਟਿਚ੍ਛਨ੍ਨਟ੍ਠਾਨੇ’ਤਿ ਪਦੇਸਨਿਯਮਂ ਨ ਕਰੇਯ੍ਯ, ਤਸ੍ਮਾ ਨਿਵਾਸਨਪਾਰੁਪਨੇਹਿ ਪਕਤਿਪਟਿਚ੍ਛਨ੍ਨਟ੍ਠਾਨਤੋ ਅਞ੍ਞਤ੍ਥ ਨਖਪਿਟ੍ਠਿਪ੍ਪਮਾਣਂ ਅਵਡ੍ਢਨਕਪਕ੍ਖੇ ਠਿਤਮ੍ਪਿ ਨ ਵਟ੍ਟਤੀਤਿ ਸਿਦ੍ਧਂ. ਨਖਪਿਟ੍ਠਿਪ੍ਪਮਾਣਤੋ ਖੁਦ੍ਦਕਤਰਂ ਪਨ ਅਵਡ੍ਢਨਕਪਕ੍ਖੇ ਵਾ ਵਡ੍ਢਨਕਪਕ੍ਖੇ ਵਾ ਠਿਤਂ ਹੋਤੁ, ਵਟ੍ਟਤਿ ਨਖਪਿਟ੍ਠਿਪ੍ਪਮਾਣਤੋ ਖੁਦ੍ਦਕਤਰਸ੍ਸ ਵਡ੍ਢਨਕਪਕ੍ਖੇ ਅਵਡ੍ਢਨਕਪਕ੍ਖੇ ਵਾ ਠਿਤਸ੍ਸ ਮੁਖਾਦੀਸੁਯੇਵ ਪਟਿਕ੍ਖਿਤ੍ਤਤ੍ਤਾ’’ਤਿ ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ਮਹਾਵਗ੍ਗ ੩.੮੮) ਵੁਤ੍ਤਂ.

ਵਿਮਤਿਵਿਨੋਦਨਿਯਂ (ਵਿ. ਵਿ. ਟੀ. ਮਹਾਵਗ੍ਗ ੮੮-੮੯) ਪਨ ‘‘ਪਟਿਚ੍ਛਨ੍ਨਟ੍ਠਾਨੇ ਨਖਪਿਟ੍ਠਿਪ੍ਪਮਾਣਂ ਅਵਡ੍ਢਨਕਪਕ੍ਖੇ ਠਿਤਂ ਹੋਤਿ, ਵਟ੍ਟਤੀਤਿ ਵੁਤ੍ਤਤ੍ਤਾ ਅਪ੍ਪਟਿਚ੍ਛਨ੍ਨਟ੍ਠਾਨੇ ਤਾਦਿਸਮ੍ਪਿ ਨ ਵਟ੍ਟਤਿ, ਪਟਿਚ੍ਛਨ੍ਨਟ੍ਠਾਨੇਪਿ ਚ ਵਡ੍ਢਨਕਪਕ੍ਖੇ ਠਿਤਂ ਨ ਵਟ੍ਟਤੀਤਿ ਸਿਦ੍ਧਮੇਵ ਹੋਤਿ. ਪਾਕਟਟ੍ਠਾਨੇਪਿ ਪਨ ਨਖਪਿਟ੍ਠਿਪ੍ਪਮਾਣਤੋ ਊਨਤਰਂ ਅਵਡ੍ਢਨਕਂ ਵਟ੍ਟਤੀਤਿ ਯੇ ਗਣ੍ਹੇਯ੍ਯੁਂ, ਤੇਸਂ ਤਂ ਗਹਣਂ ਪਟਿਸੇਧੇਤੁਂ ‘ਮੁਖੇ ਪਨਾ’ਤਿਆਦਿ ਵੁਤ੍ਤ’’ਨ੍ਤਿ ਵੁਤ੍ਤਂ. ਗੋਧਾ…ਪੇ… ਨ ਵਟ੍ਟਤੀਤਿ ਇਮਿਨਾ ਤਾਦਿਸੋਪਿ ਰੋਗੋ ਕੁਟ੍ਠੇਯੇਵ ਅਨ੍ਤੋਗਧੋਤਿ ਦਸ੍ਸੇਤਿ. ਗਣ੍ਡੇਪਿ ਇਮਿਨਾ ਨਯੇਨ ਵਿਨਿਚ੍ਛਯੋ ਵੇਦਿਤਬ੍ਬੋ. ਤਤ੍ਥ ਪਨ ਮੁਖਾਦੀਸੁ ਕੋਲਟ੍ਠਿਮਤ੍ਤਤੋ ਖੁਦ੍ਦਕਤਰੋਪਿ ਗਣ੍ਡੋ ਨ ਵਟ੍ਟਤੀਤਿ ਵਿਸੁਂ ਨ ਦਸ੍ਸਿਤੋ. ‘‘ਅਪ੍ਪਟਿਚ੍ਛਨ੍ਨਟ੍ਠਾਨੇ ਅਵਡ੍ਢਨਕਪਕ੍ਖੇ ਠਿਤੇਪਿ ਨ ਵਟ੍ਟਤੀ’’ਤਿ ਏਤ੍ਤਕਮੇਵ ਹਿ ਤਤ੍ਥ ਵੁਤ੍ਤਂ, ਤਥਾਪਿ ਕੁਟ੍ਠੇ ਵੁਤ੍ਤਨਯੇਨ ਮੁਖਾਦੀਸੁ ਕੋਲਟ੍ਠਿਪ੍ਪਮਾਣਤੋ ਖੁਦ੍ਦਕਤਰੋਪਿ ਗਣ੍ਡੋ ਨ ਵਟ੍ਟਤੀਤਿ ਵਿਞ੍ਞਾਯਤਿ, ਤਸ੍ਮਾ ਅਵਡ੍ਢਨਕਪਕ੍ਖੇ ਠਿਤੇਪੀਤਿ ਏਤ੍ਥ ਪਿ-ਸਦ੍ਦੋ ਅਵੁਤ੍ਤਸਮ੍ਪਿਣ੍ਡਨਤ੍ਥੋ, ਤੇਨ ਕੋਲਟ੍ਠਿਮਤ੍ਤਤੋ ਖੁਦ੍ਦਕਤਰੋਪਿ ਨ ਵਟ੍ਟਤੀਤਿ ਅਯਮਤ੍ਥੋ ਦਸ੍ਸਿਤੋਯੇਵਾਤਿ ਅਮ੍ਹਾਕਂ ਖਨ੍ਤਿ. ਪਕਤਿਵਣ੍ਣੇ ਜਾਤੇਤਿ ਰੋਗਹੇਤੁਕਸ੍ਸ ਵਿਕਾਰਵਣ੍ਣਸ੍ਸ ਅਭਾਵਂ ਸਨ੍ਧਾਯ ਵੁਤ੍ਤਂ.

ਕੋਲਟ੍ਠਿਮਤ੍ਤਕੋਤਿ ਬਦਰਟ੍ਠਿਪ੍ਪਮਾਣੋ. ‘‘ਸਞ੍ਜਾਤਛਵਿਂ ਕਾਰੇਤ੍ਵਾ’’ਤਿ ਪਾਠੋ, ਵਿਜ੍ਜਮਾਨਛਵਿਂ ਕਾਰੇਤ੍ਵਾਤਿ ਅਤ੍ਥੋ. ਵਿਮਤਿਵਿਨੋਦਨਿਯਂ (ਵਿ. ਵਿ. ਟੀ. ਮਹਾਵਗ੍ਗ ੨.੮੮-੮੯) ਪਨ ‘‘ਸਚ੍ਛਵਿਂ ਕਾਰੇਤ੍ਵਾਤਿ ਵਿਜ੍ਜਮਾਨਛਵਿਂ ਕਾਰੇਤ੍ਵਾਤਿ ਅਤ੍ਥੋ, ਸਞ੍ਛਵਿਨ੍ਤਿ ਵਾ ਪਾਠੋ, ਸਞ੍ਜਾਤਛਅਨ੍ਤਿ ਅਤ੍ਥੋ. ਗਣ੍ਡਾਦੀਸੁ ਵੂਪਸਨ੍ਤੇਸੁਪਿ ਤਂ ਠਾਨਂ ਵਿਵਣ੍ਣਮ੍ਪਿ ਹੋਤਿ, ਤਂ ਵਟ੍ਟਤੀ’’ਤਿ ਵੁਤ੍ਤਂ.

ਪਦੁਮਪੁਣ੍ਡਰੀਕਪਤ੍ਤਵਣ੍ਣਨ੍ਤਿ ਰਤ੍ਤਪਦੁਮਸੇਤਪਦੁਮਪੁਪ੍ਫਦਲਵਣ੍ਣਂ. ਕੁਟ੍ਠੇ ਵੁਤ੍ਤਨਯੇਨੇਵਾਤਿ ‘‘ਪਟਿਚ੍ਛਨ੍ਨਟ੍ਠਾਨੇ ਅਵਡ੍ਢਨਕਂ ਵਟ੍ਟਤਿ, ਅਞ੍ਞਤ੍ਥ ਨ ਕਿਞ੍ਚਿ ਵਟ੍ਟਤੀ’’ਤਿ ਵੁਤ੍ਤਨਯਂ ਦਸ੍ਸੇਤਿ. ਸੋਸਬ੍ਯਾਧੀਤਿ ਖਯਰੋਗੋ. ਯਕ੍ਖੁਮ੍ਮਾਦੋਤਿ ਕਦਾਚਿ ਆਗਨ੍ਤ੍ਵਾ ਭੂਮਿਯਂ ਪਾਤੇਤ੍ਵਾ ਹਤ੍ਥਮੁਖਾਦਿਕਂ ਅਵਯਵਂ ਭੂਮਿਯਂ ਘਂਸਨਕੋ ਯਕ੍ਖੋਵ ਰੋਗੋ.

੧੨੪. ਮਹਾਮਤ੍ਤੋਤਿ ਮਹਤਿਯਾ ਇਸ੍ਸਰਿਯਮਤ੍ਤਾਯ ਸਮਨ੍ਨਾਗਤੋ. ‘‘ਨ ਦਾਨਾਹਂ ਦੇਵਸ੍ਸ ਭਟੋ’’ਤਿ ਆਪੁਚ੍ਛਤੀਤਿ ਰਞ੍ਞਾ ਏਵ ਦਿਨ੍ਨਂ ਠਾਨਨ੍ਤਰਂ ਸਨ੍ਧਾਯ ਵੁਤ੍ਤਂ. ਯੋ ਪਨ ਰਾਜਕਮ੍ਮਿਕੇਹਿ ਅਮਚ੍ਚਾਦੀਹਿ ਠਪਿਤੋ, ਅਮਚ੍ਚਾਦੀਨਂ ਏਵ ਵਾ ਭਟੋ ਹੋਤਿ, ਤੇਨ ਤਂ ਤਂ ਅਮਚ੍ਚਾਦਿਮ੍ਪਿ ਆਪੁਚ੍ਛਿਤੁਂ ਵਟ੍ਟਤੀਤਿ.

੧੨੫. ‘‘ਧਜਬਨ੍ਧੋ’’ਤਿ ਵੁਤ੍ਤਤ੍ਤਾ ਅਪਾਕਟਚੋਰੋ ਪਬ੍ਬਾਜੇਤਬ੍ਬੋਤਿ ਵਿਞ੍ਞਾਯਤਿ. ਤੇਨ ਵਕ੍ਖਤਿ ‘‘ਯੇ ਪਨ ਅਮ੍ਬਲਬੁਜਾਦਿਚੋਰਕਾ’’ਤਿਆਦਿ. ਏਵਂ ਜਾਨਨ੍ਤੀਤਿ ‘‘ਸੀਲਵਾ ਜਾਤੋ’’ਤਿ ਜਾਨਨ੍ਤਿ.

੧੨੬. ਭਿਨ੍ਦਿਤ੍ਵਾਤਿ ਅਨ੍ਦੁਬਨ੍ਧਨਂ ਭਿਨ੍ਦਿਤ੍ਵਾ. ਛਿਨ੍ਦਿਤ੍ਵਾਤਿ ਸਙ੍ਖਲਿਕਬਨ੍ਧਨਂ ਛਿਨ੍ਦਿਤ੍ਵਾ. ਮੁਞ੍ਚਿਤ੍ਵਾਤਿ ਰਜ੍ਜੁਬਨ੍ਧਨਂ ਮੁਞ੍ਚਿਤ੍ਵਾ. ਵਿਵਰਿਤ੍ਵਾਤਿ ਗਾਮਬਨ੍ਧਨਾਦੀਸੁ ਗਾਮਦ੍ਵਾਰਾਦੀਨਿ ਵਿਵਰਿਤ੍ਵਾ. ਅਪਸ੍ਸਮਾਨਾਨਂ ਵਾ ਪਲਾਯਤੀਤਿ ਪੁਰਿਸਗੁਤ੍ਤਿਯਂ ਪੁਰਿਸਾਨਂ ਗੋਪਕਾਨਂ ਅਪਸ੍ਸਮਾਨਾਨਂ ਪਲਾਯਤਿ.

੧੨੯. ਪੁਰਿਮਨਯੇਨੇਵਾਤਿ ‘‘ਕਸਾਹਤੋ ਕਤਦਣ੍ਡਕਮ੍ਮੋ’’ਤਿ ਏਤ੍ਥ ਵੁਤ੍ਤਨਯੇਨੇਵ.

੧੩੦. ਪਲਾਤੋਪੀਤਿ ਇਣਸ੍ਸਾਮਿਕਾਨਂ ਆਗਮਨਂ ਞਤ੍ਵਾ ਭਯੇਨ ਪਲਾਤੋਪਿ ਇਣਾਯਿਕੋ. ਗੀਵਾ ਹੋਤਿ ਇਣਾਯਿਕਭਾਵਂ ਞਤ੍ਵਾ ਅਨਾਦਰੇਨ ਇਣਮੁਤ੍ਤਕੇ ਭਿਕ੍ਖੁਭਾਵੇ ਪਵੇਸਿਤਤ੍ਤਾ.

ਉਪਡ੍ਢੁਪਡ੍ਢਨ੍ਤਿ ਥੋਕਂ ਥੋਕਂ. ਦਾਤਬ੍ਬਮੇਵਾਤਿ ਇਣਾਯਿਕੇਨ ਧਨਂ ਸਮ੍ਪਜ੍ਜਤੁ ਵਾ, ਮਾ ਵਾ, ਦਾਨੇ ਸਉਸ੍ਸਾਹੇਨੇਵ ਭਵਿਤਬ੍ਬਂ, ਅਞ੍ਞੇਹਿ ਚ ਭਿਕ੍ਖੂਹਿ ‘‘ਮਾ ਧੁਰਂ ਨਿਕ੍ਖਿਪਾਹੀ’’ਤਿ ਵਤ੍ਵਾ ਸਹਾਯਕੇਹਿ ਭਵਿਤਬ੍ਬਨ੍ਤਿ ਦਸ੍ਸੇਤਿ. ਧੁਰਨਿਕ੍ਖੇਪੇਨ ਹਿਸ੍ਸ ਭਣ੍ਡਗ੍ਘੇਨ ਕਾਰੇਤਬ੍ਬਤਾ ਸਿਯਾਤਿ.

੧੩੧. ਦਾਸਚਾਰਿਤ੍ਤਂ ਆਰੋਪੇਤ੍ਵਾ ਕੀਤੋਤਿ ਇਮਿਨਾ ਦਾਸਭਾਵਪਰਿਮੋਚਨਤ੍ਥਾਯ ਕੀਤਂ ਨਿਵਤ੍ਤੇਤਿ. ਤਾਦਿਸੋ ਹਿ ਧਨਕ੍ਕੀਤੋਪਿ ਅਦਾਸੋ ਏਵ. ਵਜਿਰਬੁਦ੍ਧਿਟੀਕਾਯਂ (ਵਜਿਰ. ਟੀ. ਮਹਾਵਗ੍ਗ ੯੭) ਪਨ ‘‘ਦੇਸਚਾਰਿਤ੍ਤਨ੍ਤਿ ਸਾਵਨਪਣ੍ਣਾਰੋਪਨਾਦਿਕਂ ਤਂ ਤਂ ਦੇਸਚਾਰਿਤ੍ਤ’’ਨ੍ਤਿ ਵੁਤ੍ਤਂ. ਤਤ੍ਥ ਤਤ੍ਥ ਚਾਰਿਤ੍ਤਵਸੇਨਾਤਿ ਤਸ੍ਮਿਂ ਤਸ੍ਮਿਂ ਜਨਪਦੇ ਦਾਸਪਣ੍ਣਜ੍ਝਾਪਨਾਦਿਨਾ ਅਦਾਸਕਰਣਨਿਯਾਮੇਨ. ਅਭਿਸੇਕਾਦੀਸੁ ਸਬ੍ਬਬਨ੍ਧਨਾਨਿ ਮੋਚਾਪੇਨ੍ਤਿ, ਤਂ ਸਨ੍ਧਾਯ ‘‘ਸਬ੍ਬਸਾਧਾਰਣੇਨਾ’’ਤਿ ਵੁਤ੍ਤਂ.

ਸਚੇ ਸਯਮੇਵ ਪਣ੍ਣਂ ਆਰੋਪੇਨ੍ਤਿ, ਨ ਵਟ੍ਟਤੀਤਿ ਤਾ ਭੁਜਿਸ੍ਸਿਤ੍ਥਿਯੋ ‘‘ਮਯਮ੍ਪਿ ਵਣ੍ਣਦਾਸਿਯੋ ਹੋਮਾ’’ਤਿ ਅਤ੍ਤਨੋ ਰਕ੍ਖਣਤ੍ਥਾਯ ਸਯਮੇਵ ਰਾਜੂਨਂ ਦਾਸਿਪਣ੍ਣੇ ਅਤ੍ਤਨੋ ਨਾਮਂ ਲਿਖਾਪੇਨ੍ਤਿ, ਤਾਸਂ ਪੁਤ੍ਤਾਪਿ ਰਾਜਦਾਸਾਵ ਹੋਨ੍ਤਿ, ਤਸ੍ਮਾ ਤੇ ਪਬ੍ਬਾਜੇਤੁਂ ਨ ਵਟ੍ਟਤਿ. ਤੇਹਿ ਅਦਿਨ੍ਨਾ ਨ ਪਬ੍ਬਾਜੇਤਬ੍ਬਾਤਿ ਯਤ੍ਤਕਾ ਤੇਸਂ ਸਾਮਿਨੋ, ਤੇਸੁ ਏਕੇਨ ਅਦਿਨ੍ਨੇਪਿ ਨ ਪਬ੍ਬਾਜੇਤਬ੍ਬਾ. ਭੁਜਿਸ੍ਸੇ ਕਤ੍ਵਾ ਪਨ ਪਬ੍ਬਾਜੇਤੁਂ ਵਟ੍ਟਤੀਤਿ ਯਸ੍ਸ ਵਿਹਾਰਸ੍ਸ ਤੇ ਆਰਾਮਿਕਾ ਦਿਨ੍ਨਾ, ਤਸ੍ਮਿਂ ਵਿਹਾਰੇ ਸਙ੍ਘਂ ਞਾਪੇਤ੍ਵਾ ਫਾਤਿਕਮ੍ਮੇਨ ਧਨਾਦਿਂ ਕਤ੍ਵਾ ਭੁਜਿਸ੍ਸੇ ਕਤ੍ਵਾ ਪਬ੍ਬਾਜੇਤੁਂ ਵਟ੍ਟਤਿ. ਵਜਿਰਬੁਦ੍ਧਿਟੀਕਾਯਂ (ਵਜਿਰ. ਟੀ. ਮਹਾਵਗ੍ਗ ੯੭) ਪਨ ‘‘ਦੇਵਦਾਸਿਪੁਤ੍ਤੇ ਵਟ੍ਟਤੀਤਿ ਲਿਖਿਤਂ. ‘ਆਰਾਮਿਕਞ੍ਚੇ ਪਬ੍ਬਾਜੇਤੁਕਾਮੋ, ਅਞ੍ਞਮੇਕਂ ਦਤ੍ਵਾ ਪਬ੍ਬਾਜੇਤਬ੍ਬ’ਨ੍ਤਿ ਵੁਤ੍ਤਂ. ਮਹਾਪਚ੍ਚਰਿਵਾਦਸ੍ਸ ਅਯਮਿਧ ਅਧਿਪ੍ਪਾਯੋ, ‘ਭਿਕ੍ਖੁਸਙ੍ਘਸ੍ਸ ਆਰਾਮਿਕੇ ਦੇਮਾ’ਤਿ ਦਿਨ੍ਨਤ੍ਤਾ ਨ ਤੇ ਤੇਸਂ ਦਾਸਾ, ‘ਆਰਾਮਿਕੋ ਚ ਨੇਵ ਦਾਸੋ ਨ ਭੁਜਿਸ੍ਸੋ’ਤਿ ਵਤ੍ਤਬ੍ਬਤੋ ਨ ਦਾਸੋਤਿ ਲਿਖਿਤਂ. ਤਕ੍ਕਾਸਿਞ੍ਚਨਂ ਸੀਹਲ਼ਦੀਪੇ ਚਾਰਿਤ੍ਤਂ, ਤੇ ਚ ਪਬ੍ਬਾਜੇਤਬ੍ਬਾ ਸਙ੍ਘਸ੍ਸਾਰਾਮਿਕਤ੍ਤਾ. ਨਿਸ੍ਸਾਮਿਕਂ ਦਾਸਂ ਅਤ੍ਤਨਾਪਿ ਭੁਜਿਸ੍ਸਂ ਕਾਤੁਂ ਲਭਤੀ’’ਤਿ ਵੁਤ੍ਤਂ.

ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ਮਹਾਵਗ੍ਗ ੩.੯੭) ਪਨ ‘‘ਤਕ੍ਕਂ ਸੀਸੇ ਆਸਿਤ੍ਤਕਸਦਿਸਾਵ ਹੋਨ੍ਤੀਤਿ ਯਥਾ ਅਦਾਸੇ ਕਰੋਨ੍ਤਾ ਤਕ੍ਕੇਨ ਸੀਸਂ ਧੋਵਿਤ੍ਵਾ ਅਦਾਸਂ ਕਰੋਨ੍ਤਿ, ਏਵਂ ਆਰਾਮਿਕਵਚਨੇਨ ਦਿਨ੍ਨਤ੍ਤਾ ਅਦਾਸਾਵ ਤੇਤਿ ਅਧਿਪ੍ਪਾਯੋ. ‘ਤਕ੍ਕਾਸਿਞ੍ਚਨਂ ਪਨ ਸੀਹਲ਼ਦੀਪੇ ਚਾਰਿਤ੍ਤ’ਨ੍ਤਿ ਵਦਨ੍ਤਿ. ਨੇਵ ਪਬ੍ਬਾਜੇਤਬ੍ਬੋਤਿ ਵੁਤ੍ਤਨ੍ਤਿ ਕਪ੍ਪਿਯਵਚਨੇਨ ਦਿਨ੍ਨੇਪਿ ਸਙ੍ਘਸ੍ਸ ਆਰਾਮਿਕਦਾਸਤ੍ਤਾ ਏਵਂ ਵੁਤ੍ਤ’’ਨ੍ਤਿ ਵੁਤ੍ਤਂ. ਵਿਮਤਿਵਿਨੋਦਨਿਯਮ੍ਪਿ (ਵਿ. ਵਿ. ਟੀ. ਮਹਾਵਗ੍ਗ ੨.੯੭) ‘‘ਤਕ੍ਕਂ ਸੀਸੇ ਆਸਿਤ੍ਤਕਸਦਿਸਾਵ ਹੋਨ੍ਤੀਤਿ ਕੇਸੁਚਿ ਜਨਪਦੇਸੁ ਅਦਾਸੇ ਕਰੋਨ੍ਤਾ ਤਕ੍ਕਂ ਸੀਸੇ ਆਸਿਞ੍ਚਨ੍ਤਿ, ਤੇਨ ਕਿਰ ਤੇ ਅਦਾਸਾ ਹੋਨ੍ਤਿ, ਏਵਮਿਦਮ੍ਪਿ ਆਰਾਮਿਕਵਚਨੇਨ ਦਿਨ੍ਨਮ੍ਪੀਤਿ ਅਧਿਪ੍ਪਾਯੋ. ਤਥਾ ਦਿਨ੍ਨੇਪਿ ਸਙ੍ਘਸ੍ਸ ਆਰਾਮਿਕਦਾਸੋ ਏਵਾਤਿ ‘ਨੇਵ ਪਬ੍ਬਾਜੇਤਬ੍ਬੋ’ਤਿ ਵੁਤ੍ਤਂ. ‘ਤਾਵਕਾਲਿਕੋ ਨਾਮ’ਤਿ ਵੁਤ੍ਤਤ੍ਤਾ ਕਾਲਪਰਿਚ੍ਛੇਦਂ ਕਤ੍ਵਾ ਵਾ ਪਚ੍ਛਾਪਿ ਗਹੇਤੁਕਾਮਤਾਯ ਵਾ ਦਿਨ੍ਨਂ ਸਬ੍ਬਂ ਤਾਵਕਾਲਿਕਮੇਵਾਤਿ ਗਹੇਤਬ੍ਬਂ. ਨਿਸ੍ਸਾਮਿਕਦਾਸੋ ਨਾਮ ਯਸ੍ਸ ਸਾਮਿਕੁਲਂ ਅਞ੍ਞਾਤਿਕਂ ਮਰਣੇਨ ਪਰਿਕ੍ਖੀਣਂ, ਨ ਕੋਚਿ ਤਸ੍ਸ ਦਾਯਾਦੋ, ਸੋ ਪਨ ਸਮਾਨਜਾਤਿਕੇਹਿ ਵਾ ਨਿਵਾਸਗਾਮਵਾਸੀਹਿ ਵਾ ਇਸ੍ਸਰੇਹਿ ਵਾ ਭੁਜਿਸ੍ਸੋ ਕਤੋਵ ਪਬ੍ਬਾਜੇਤਬ੍ਬੋ. ਦੇਵਦਾਸਾਪਿ ਦਾਸਾ ਏਵ. ਤੇ ਹਿ ਕਤ੍ਥਚਿ ਦੇਸੇ ਰਾਜਦਾਸਾ ਹੋਨ੍ਤਿ, ਕਤ੍ਥਚਿ ਵਿਹਾਰਦਾਸਾ ਵਾ, ਤਸ੍ਮਾ ਪਬ੍ਬਾਜੇਤੁਂ ਨ ਵਟ੍ਟਤੀ’’ਤਿ ਵੁਤ੍ਤਂ.

ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ਮਹਾਵਗ੍ਗ ੩.੯੭) ਪਨ ‘‘ਨਿਸ੍ਸਾਮਿਕਦਾਸੋ ਨਾਮ ਯਸ੍ਸ ਸਾਮਿਕਾ ਸਪੁਤ੍ਤਦਾਰਾ ਮਤਾ ਹੋਨ੍ਤਿ, ਨ ਕੋਚਿ ਤਸ੍ਸ ਪਰਿਗ੍ਗਾਹਕੋ, ਸੋਪਿ ਪਬ੍ਬਾਜੇਤੁਂ ਨ ਵਟ੍ਟਤਿ, ਤਂ ਪਨ ਅਤ੍ਤਨਾਪਿ ਭੁਜਿਸ੍ਸਂ ਕਾਤੁਂ ਵਟ੍ਟਤਿ. ਯੇ ਵਾ ਪਨ ਤਸ੍ਮਿਂ ਰਟ੍ਠੇ ਸਾਮਿਨੋ, ਤੇਹਿਪਿ ਕਾਰਾਪੇਤੁਂ ਵਟ੍ਟਤਿ, ‘ਦੇਵਦਾਸਿਪੁਤ੍ਤਂ ਪਬ੍ਬਾਜੇਤੁਂ ਵਟ੍ਟਤੀ’ਤਿ ਤੀਸੁਪਿ ਗਣ੍ਠਿਪਦੇਸੁ ਵੁਤ੍ਤਂ. ‘ਦਾਸਸ੍ਸ ਪਬ੍ਬਜਿਤ੍ਵਾ ਅਤ੍ਤਨੋ ਸਾਮਿਕੇ ਦਿਸ੍ਵਾ ਪਲਾਯਨ੍ਤਸ੍ਸ ਆਪਤ੍ਤਿ ਨਤ੍ਥੀ’ਤਿ ਵਦਨ੍ਤੀ’’ਤਿ ਵੁਤ੍ਤਂ. ਵਿਮਤਿਵਿਨੋਦਨਿਯਂ ਪਨ ‘‘ਦਾਸਮ੍ਪਿ ਪਬ੍ਬਾਜੇਤ੍ਵਾ ਸਾਮਿਕੇ ਦਿਸ੍ਵਾ ਪਟਿਚ੍ਛਾਦਨਤ੍ਥਂ ਅਪਨੇਨ੍ਤੋ ਪਦਵਾਰੇਨ ਅਦਿਨ੍ਨਾਦਾਨਾਪਤ੍ਤਿਯਾ ਕਾਰੇਤਬ੍ਬੋ, ਦਾਸਸ੍ਸ ਪਨ ਪਲਾਯਤੋ ਅਨਾਪਤ੍ਤੀ’’ਤਿ ਵੁਤ੍ਤਂ.

੧੩੨. ਹਤ੍ਥਚ੍ਛਿਨ੍ਨਕਾਦਿਵਤ੍ਥੂਸੁ ਕਣ੍ਣਮੂਲੇਤਿ ਸਕਲਸ੍ਸ ਕਣ੍ਣਸ੍ਸ ਛੇਦਂ ਸਨ੍ਧਾਯਾਹ. ਕਣ੍ਣਸਕ੍ਖਲਿਕਾਯਾਤਿ ਕਣ੍ਣਚੂਲ਼ਿਕਾਯ. ਯਸ੍ਸ ਪਨ ਕਣ੍ਣਾਵਟ੍ਟੇਤਿ ਹੇਟ੍ਠਾ ਕੁਣ੍ਡਲਾਦਿਠਪਨਛਿਦ੍ਦਂ ਸਨ੍ਧਾਯ ਵੁਤ੍ਤਂ. ‘‘ਤਞ੍ਹਿ ਸਙ੍ਘਟ੍ਟਨਕ੍ਖਮਂ. ਅਜਪਦਕੇਤਿ ਅਜਪਦਨਾਸਿਕਟ੍ਠਿਕੋਟਿਯਂ. ਤਤੋ ਹਿ ਉਦ੍ਧਂ ਨ ਵਿਚ੍ਛਿਨ੍ਦਿਤੁਂ ਸਕ੍ਕਾ ਹੋਤਿ. ਸਨ੍ਧੇਤੁਨ੍ਤਿ ਅਵਿਰੂਪਸਣ੍ਠਾਨਂ ਸਨ੍ਧਾਯ ਵੁਤ੍ਤਂ, ਵਿਰੂਪਂ ਪਨ ਪਰਿਸਦੂਸਕਂ ਆਪਾਦੇਤਿ.

ਖੁਜ੍ਜਸਰੀਰੋਤਿ ਵਙ੍ਕਸਰੀਰੋ. ਬ੍ਰਹ੍ਮੁਨੋ ਵਿਯ ਉਜੁਕਂ ਗਤ੍ਤਂ ਸਰੀਰਂ ਯਸ੍ਸ ਸੋ ਬ੍ਰਹ੍ਮੁਜੁਗਤ੍ਤੋ, ਭਗਵਾ. ਅਵਸੇਸੋ ਸਤ੍ਤੋਤਿ ਇਮਿਨਾ ਲਕ੍ਖਣੇਨ ਰਹਿਤਸਤ੍ਤੋ. ਏਤੇਨ ਠਪੇਤ੍ਵਾ ਮਹਾਪੁਰਿਸਂ ਚਕ੍ਕਵਤ੍ਤਿਞ੍ਚ ਇਤਰੇ ਸਤ੍ਤਾ ਖੁਜ੍ਜਪਕ੍ਖਿਕਾਤਿ ਦਸ੍ਸੇਤਿ. ਯੇਭੁਯ੍ਯੇਨ ਹਿ ਸਤ੍ਤਾ ਖਨ੍ਧੇ ਕਟਿਯਂ ਜਾਣੂਸੂਤਿ ਤੀਸੁ ਠਾਨੇਸੁ ਨਮਨ੍ਤਿ, ਤੇ ਕਟਿਯਂ ਨਮਨ੍ਤਾ ਪਚ੍ਛਤੋ ਨਮਨ੍ਤਿ, ਦ੍ਵੀਸੁ ਠਾਨੇਸੁ ਨਮਨ੍ਤਾ ਪੁਰਤੋ ਨਮਨ੍ਤਿ, ਦੀਘਸਰੀਰਾ ਪਨ ਏਕੇਨ ਪਸ੍ਸੇਨ ਵਙ੍ਕਾ ਹੋਨ੍ਤਿ, ਏਕੇ ਮੁਖਂ ਉਨ੍ਨਾਮੇਤ੍ਵਾ ਨਕ੍ਖਤ੍ਤਾਨਿ ਗਣਯਨ੍ਤਾ ਵਿਯ ਚਰਨ੍ਤਿ, ਏਕੇ ਅਪ੍ਪਮਂਸਲੋਹਿਤਾ ਸੂਲਸਦਿਸਾ ਹੋਨ੍ਤਿ, ਏਕੇ ਪੁਰਤੋ ਪਬ੍ਭਾਰਾ ਹੋਨ੍ਤਿ, ਪਵੇਧਮਾਨਾ ਗਚ੍ਛਨ੍ਤਿ. ਪਰਿਵਟੁਮੋਤਿ ਸਮਨ੍ਤਤੋ ਵਟ੍ਟਕਾਯੋ. ਏਤੇਨ ਏਵਰੂਪਾ ਏਵ ਵਾਮਨਕਾ ਨ ਵਟ੍ਟਨ੍ਤੀਤਿ ਦਸ੍ਸੇਤਿ.

੧੩੩. ਅਟ੍ਠਿਸਿਰਾਚਮ੍ਮਸਰੀਰੋਤਿ ਅਟ੍ਠਿਸਿਰਾਚਮ੍ਮਮਤ੍ਤਸਰੀਰੋ. ਕੂਟਕੂਟਸੀਸੋਤਿ ਅਨੇਕੇਸੁ ਠਾਨੇਸੁ ਪਿਣ੍ਡਿਤਮਂਸਤਂ ਦਸ੍ਸੇਤੁਂ ਆਮੇਡਿਤਂ ਕਤਂ. ਤੇਨਾਹ ‘‘ਤਾਲਫਲਪਿਣ੍ਡਿਸਦਿਸੇਨਾ’’ਤਿ. ਤਾਲਫਲਾਨਂ ਮਞ੍ਜਰੀ ਪਿਣ੍ਡਿ ਨਾਮ. ਅਨੁਪੁਬ੍ਬਤਨੁਕੇਨ ਸੀਸੇਨਾਤਿ ਚੇਤਿਯਥੂਪਿਕਾ ਵਿਯ ਕਮੇਨ ਕਿਸੇਨ ਸੀਸੇਨ. ਮਹਾਵੇਲ਼ੁਪਬ੍ਬਂ ਵਿਯ ਆਦਿਤੋ ਪਟ੍ਠਾਯ ਯਾਵ ਪਰਿਯੋਸਾਨਾ ਅਵਿਸਮਥੂਲੇਨ ਸੀਸੇਨ ਸਮਨ੍ਨਾਗਤੋ ਨਾਲ਼ਿਸੀਸੋ ਨਾਮ. ਕਪ੍ਪਸੀਸੋਤਿ ਗਜਮਤ੍ਥਕਂ ਵਿਯ ਦ੍ਵਿਧਾ ਭਿਨ੍ਨਸੀਸੋ. ‘‘ਕਣ੍ਣਿਕਕੇਸੋ ਵਾ’’ਤਿ ਇਮਸ੍ਸ ਵਿਵਰਣਂ ‘‘ਪਾਣਕੇਹੀ’’ਤਿਆਦਿ. ਮਕ੍ਕਟਸ੍ਸੇਵ ਨਲਾਟੇਪਿ ਕੇਸਾਨਂ ਉਟ੍ਠਿਤਭਾਵਂ ਸਨ੍ਧਾਯਾਹ ‘‘ਸੀਸਲੋਮੇਹੀ’’ਤਿਆਦਿ.

ਮਕ੍ਕਟਭਮੁਕੋਤਿ ਨਲਾਟਲੋਮੇਹਿ ਅਵਿਭਤ੍ਤਲੋਮਭਮੁਕੋ. ਅਕ੍ਖਿਚਕ੍ਕੇਹੀਤਿ ਅਕ੍ਖਿਮਣ੍ਡਲੇਹਿ. ਕੇਕਰੋਤਿ ਤਿਰਿਯਂ ਪਸ੍ਸਨਕੋ. ਉਦਕਤਾਰਕਾਤਿ ਓਲੋਕੇਨ੍ਤਾਨਂ ਉਦਕੇ ਪਟਿਬਿਮ੍ਬਿਕਚ੍ਛਾਯਾ. ਉਦਕਬੁਬ੍ਬੁਲ਼ਨ੍ਤਿ ਕੇਚਿ. ਅਕ੍ਖਿਤਾਰਕਾਤਿ ਅਭਿਮੁਖੇ ਠਿਤਾਨਂ ਛਾਯਾ. ਅਕ੍ਖਿਭਣ੍ਡਕਾਤਿਪਿ ਵਦਨ੍ਤਿ. ਅਤਿਪਿਙ੍ਗਲਕ੍ਖਿ ਮਜ੍ਜਾਰਕ੍ਖਿ. ਮਧੁਪਿਙ੍ਗਲਨ੍ਤਿ ਮਧੁਵਣ੍ਣਪਿਙ੍ਗਲਂ. ਨਿਪ੍ਪਖੁਮਕ੍ਖੀਤਿ ਏਤ੍ਥ ਪਖੁਮ-ਸਦ੍ਦੋ ਅਕ੍ਖਿਦਲਲੋਮੇਸੁ ਨਿਰੁਲ਼੍ਹੋ, ਤਦਭਾਵਾ ਨਿਪ੍ਪਖੁਮਕ੍ਖਿ. ਅਕ੍ਖਿਪਾਕੇਨਾਤਿ ਅਕ੍ਖਿਦਲਪਰਿਯਨ੍ਤੇਸੁ ਪੂਤਿਤਾਪਜ੍ਜਨਰੋਗੇਨ.

ਚਿਪਿਟਨਾਸਿਕੋਤਿ ਅਨੁਨ੍ਨਤਨਾਸਿਕੋ. ਪਟਙ੍ਗਮਣ੍ਡੂਕੋ ਨਾਮ ਮਹਾਮੁਖਮਣ੍ਡੂਕੋ. ਭਿਨ੍ਨਮੁਖੋਤਿ ਉਪਕ੍ਕਮੁਖਪਰਿਯੋਸਾਨੋ, ਸਬ੍ਬਦਾ ਵਿਵਟਮੁਖੋ ਵਾ. ਵਙ੍ਕਮੁਖੋਤਿ ਏਕਪਸ੍ਸੇ ਅਪਕ੍ਕਮ੍ਮ ਠਿਤਹੇਟ੍ਠਿਮਹਨੁਕਟ੍ਠਿਕੋ. ਓਟ੍ਠਚ੍ਛਿਨ੍ਨਕੋਤਿ ਉਭੋਸੁ ਓਟ੍ਠੇਸੁ ਯਤ੍ਥ ਕਤ੍ਥਚਿ ਜਾਤਿਯਾ ਵਾ ਪਚ੍ਛਾ ਵਾ ਸਤ੍ਥਾਦਿਨਾ ਅਪਨੀਤਮਂਸੇਨ ਓਟ੍ਠੇਨ ਸਮਨ੍ਨਾਗਤੋ. ਏਲ਼ਮੁਖੋਤਿ ਨਿਚ੍ਚਪਗ੍ਘਰਿਤਲਾਲਾਮੁਖੋ.

ਭਿਨ੍ਨਗਲੋਤਿ ਅਵਨਤਗਲੋ. ਭਿਨ੍ਨਉਰੋਤਿ ਅਤਿਨਿਨ੍ਨਉਰਮਜ੍ਝੋ. ਏਵਂ ਭਿਨ੍ਨਪਿਟ੍ਠੀਤਿ. ਸਬ੍ਬਞ੍ਚੇਤਨ੍ਤਿ ‘‘ਕਚ੍ਛੁਗਤ੍ਤੋ’’ਤਿਆਦਿਂ ਸਨ੍ਧਾਯ ਵੁਤ੍ਤਂ. ਏਤ੍ਥ ਚ ਵਿਨਿਚ੍ਛਯੋ ਕੁਟ੍ਠਾਦੀਸੁ ਵੁਤ੍ਤੋ ਏਵਾਤਿ ਆਹ ‘‘ਵਿਨਿਚ੍ਛਯੋ’’ਤਿਆਦਿ.

ਵਾਤਣ੍ਡਿਕੋਤਿ ਅਣ੍ਡਕੇਸੁ ਵੁਦ੍ਧਿਰੋਗੇਨ ਸਮਨ੍ਨਾਗਤੋ, ਅਣ੍ਡਵਾਤਰੋਗੇਨ ਉਦ੍ਧੁਤਬੀਜਣ੍ਡਕੋਸੇਨ ਸਮਨ੍ਨਾਗਤੋ ਵਾ. ਯਸ੍ਸ ਨਿਵਾਸਨੇਨ ਪਟਿਚ੍ਛਨ੍ਨਮ੍ਪਿ ਉਣ੍ਣਤਂ ਪਕਾਸਤਿ, ਸੋਵ ਨ ਪਬ੍ਬਾਜੇਤਬ੍ਬੋ. ਵਿਕਟੋਤਿ ਤਿਰਿਯਂ ਗਮਨਪਾਦੇਹਿ ਸਮਨ੍ਨਾਗਤੋ, ਯਸ੍ਸ ਚਙ੍ਕਮਤੋ ਜਾਣੁਕਾ ਬਹਿ ਨਿਗਚ੍ਛਨ੍ਤਿ. ਸਙ੍ਘਟ੍ਟੋਤਿ ਗਚ੍ਛਤੋ ਪਰਿਵਤ੍ਤਨਪਾਦੇਹਿ ਸਮਨ੍ਨਾਗਤੋ, ਯਸ੍ਸ ਚਙ੍ਕਮਤੋ ਜਾਣੁਕਾ ਅਨ੍ਤੋ ਪਵਿਸਨ੍ਤਿ. ਮਹਾਜਙ੍ਘੋਤਿ ਥੂਲਜਙ੍ਘੋ. ਮਹਾਪਾਦੋਤਿ ਮਹਨ੍ਤੇਨ ਪਾਦਤਲੇਨ ਯੁਤ੍ਤੋ. ਪਾਦਵੇਮਜ੍ਝੇਤਿ ਪਿਟ੍ਠਿਪਾਦਵੇਮਜ੍ਝੇ. ਏਤੇਨ ਅਗ੍ਗਪਾਦੋ ਚ ਪਣ੍ਹਿ ਚ ਸਦਿਸਾਵਾਤਿ ਦਸ੍ਸੇਤਿ.

੧੩੪. ਮਜ੍ਝੇ ਸਂਕੁਟਿਤਪਾਦਤ੍ਤਾਤਿ ਕੁਣ੍ਠਪਾਦਤਾਯ ਕਾਰਣਂ ਦਸ੍ਸੇਤਿ, ਅਗ੍ਗੇ ਸਂਕੁਟਿਤਪਾਦਤ੍ਤਾਤਿ ਕੁਣ੍ਠਪਾਦਤਾਯ. ਕੁਣ੍ਠਪਾਦਸ੍ਸੇਵ ਚਙ੍ਕਮਨਵਿਭਾਵਨਂ ‘‘ਪਿਟ੍ਠਿਪਾਦਗ੍ਗੇਨ ਚਙ੍ਕਮਨ੍ਤੋ’’ਤਿ. ‘‘ਪਾਦਸ੍ਸ ਬਾਹਿਰਨ੍ਤੇਨਾ’’ਤਿ ਚ ‘‘ਅਬ੍ਭਨ੍ਤਰਨ੍ਤੇਨਾ’’ਤਿ ਚ ਇਦਂ ਪਾਦਤਲਸ੍ਸ ਉਭੋਹਿ ਪਰਿਯਨ੍ਤੇਹਿ ਚਙ੍ਕਮਨਂ ਸਨ੍ਧਾਯ ਵੁਤ੍ਤਂ.

ਮਮ੍ਮਨਨ੍ਤਿ ਖਲਿਤਵਚਨਂ, ਯੋ ਏਕਮੇਵਕ੍ਖਰਂ ਚਤੁਪਞ੍ਚਕ੍ਖਤ੍ਤੁਂ ਵਦਤਿ, ਤਸ੍ਸੇਤਂ ਅਧਿਵਚਨਂ, ਠਾਨਕਰਣਵਿਸੁਦ੍ਧਿਯਾ ਅਭਾਵੇਨ ਅਫੁਟ੍ਠਕ੍ਖਰਵਚਨਂ. ਵਚਨਾਨੁਕਰਣੇਨ ਹਿ ਸੋ ‘‘ਮਮ੍ਮਨੋ’’ਤਿ ਵੁਤ੍ਤੋ. ਯੋ ਚ ਕਰਣਸਮ੍ਪਨ੍ਨੋਪਿ ਏਕਮੇਵਕ੍ਖਰਂ ਹਿਕ੍ਕਾਰਬਹੁਸੋ ਵਦਤਿ, ਸੋਪਿ ਇਧੇਵ ਸਙ੍ਗਯ੍ਹਤਿ. ਯੋ ਵਾ ਪਨ ਤਂ ਨਿਗ੍ਗਹੇਤ੍ਵਾਪਿ ਅਨਾਮੇਡਿਤਕ੍ਖਰਮੇਵ ਸਿਥਿਲਂ ਸਿਲਿਟ੍ਠਵਚਨਂ ਵਤ੍ਤੁਂ ਸਮਤ੍ਥੋ, ਸੋ ਪਬ੍ਬਾਜੇਤਬ੍ਬੋ. ਆਪਤ੍ਤਿਤੋ ਨ ਮੁਚ੍ਚਨ੍ਤੀਤਿ ਞਤ੍ਵਾ ਕਰੋਨ੍ਤਾਵ ਨ ਮੁਚ੍ਚਨ੍ਤਿ. ਜੀਵਿਤਨ੍ਤਰਾਯਾਦਿਆਪਦਾਸੁ ਅਰੁਚਿਯਾ ਕਾਯਸਾਮਗ੍ਗਿਂ ਦੇਨ੍ਤਸ੍ਸ ਅਨਾਪਤ੍ਤਿ.

੧੩੫. ਅਭਬ੍ਬਪੁਗ੍ਗਲਕਥਾਸੁ ‘‘ਯੋ ਕਾਲ਼ਪਕ੍ਖੇ ਇਤ੍ਥੀ ਹੋਤਿ, ਜੁਣ੍ਹਪਕ੍ਖੇ ਪੁਰਿਸੋ, ਅਯਂ ਪਕ੍ਖਪਣ੍ਡਕੋ’’ਤਿ ਕੇਚਿ ਵਦਨ੍ਤਿ. ਅਟ੍ਠਕਥਾਯਂ ਪਨ ‘‘ਕਾਲ਼ਪਕ੍ਖੇ ਪਣ੍ਡਕੋ ਹੋਤਿ, ਜੁਣ੍ਹਪਕ੍ਖੇ ਪਨਸ੍ਸ ਪਰਿਲ਼ਾਹੋ ਵੂਪਸਮ੍ਮਤੀ’’ਤਿ ਅਪਣ੍ਡਕਪਕ੍ਖੇ ਪਰਿਲ਼ਾਹਵੂਪਸਮਸ੍ਸੇਵ ਵੁਤ੍ਤਤ੍ਤਾ ਪਣ੍ਡਕਪਕ੍ਖੇ ਉਸ੍ਸਨ੍ਨਪਰਿਲ਼ਾਹਤਾ ਪਣ੍ਡਕਭਾਵਾਪਤ੍ਤੀਤਿ ਵਿਞ੍ਞਾਯਤੀਤਿ ਵੀਮਂਸਿਤ੍ਵਾ ਯੁਤ੍ਤਤਰਂ ਗਹੇਤਬ੍ਬਂ. ਇਤ੍ਥਿਭਾਵੋ ਪੁਮ੍ਭਾਵੋ ਵਾ ਨਤ੍ਥਿ ਏਤਸ੍ਸਾਤਿ ਅਭਾਵਕੋ. ‘‘ਤਸ੍ਮਿਂਯੇਵਸ੍ਸ ਪਕ੍ਖੇ ਪਬ੍ਬਜ੍ਜਾ ਵਾਰਿਤਾਤਿ ਏਤ੍ਥ ਅਪਣ੍ਡਕਪਕ੍ਖੇ ਪਬ੍ਬਾਜੇਤ੍ਵਾ ਪਣ੍ਡਕਪਕ੍ਖੇ ਨਾਸੇਤਬ੍ਬੋ’’ਤਿ ਤੀਸੁਪਿ ਗਣ੍ਠਿਪਦੇਸੁ ਵੁਤ੍ਤਂ. ਕੇਚਿ ਪਨ ‘‘ਅਪਣ੍ਡਕਪਕ੍ਖੇ ਪਬ੍ਬਜਿਤੋ ਸਚੇ ਕਿਲੇਸਕ੍ਖਯਂ ਪਾਪੁਣਾਤਿ, ਨ ਨਾਸੇਤਬ੍ਬੋ’’ਤਿ ਵਦਨ੍ਤਿ, ਤਂ ਤੇਸਂ ਮਤਿਮਤ੍ਤਂ. ਪਣ੍ਡਕਸ੍ਸ ਹਿ ਕਿਲੇਸਕ੍ਖਯਾਸਮ੍ਭਵਤੋ, ਖੀਣਕਿਲੇਸਸ੍ਸ ਚ ਪਣ੍ਡਕਭਾਵਾਨਾਪਤ੍ਤਿਤੋ. ਅਹੇਤੁਕਪਟਿਸਨ੍ਧਿਕਥਾਯਞ੍ਹਿ ਅਵਿਸੇਸੇਨ ਪਣ੍ਡਕਸ੍ਸ ਅਹੇਤੁਕਪਟਿਸਨ੍ਧਿਤਾ ਵੁਤ੍ਤਾ, ਆਸਿਤ੍ਤਉਸੂਯਪਕ੍ਖਪਣ੍ਡਕਾਨਞ੍ਚ ਪਟਿਸਨ੍ਧਿਤੋ ਪਟ੍ਠਾਯੇਵ ਪਣ੍ਡਕਭਾਵੋ, ਨ ਪਵਤ੍ਤਿਯਂਯੇਵਾਤਿ ਵਦਨ੍ਤਿ. ਤੇਨੇਵ ਅਹੇਤੁਕਪਟਿਸਨ੍ਧਿਨਿਦ੍ਦੇਸੇ ਜਚ੍ਚਨ੍ਧਬਧਿਰਾਦਯੋ ਵਿਯ ਪਣ੍ਡਕੋ ਜਾਤਿਸਦ੍ਦੇਨ ਵਿਸੇਸੇਤ੍ਵਾ ਨ ਨਿਦ੍ਦਿਟ੍ਠੋ. ਚਤੁਤ੍ਥਪਾਰਾਜਿਕਸਂਵਣ੍ਣਨਾਯਞ੍ਚ (ਪਾਰਾ. ਅਟ੍ਠ. ੨.੨੩੩) ਅਭਬ੍ਬਪੁਗ੍ਗਲੇ ਦਸ੍ਸੇਨ੍ਤੇਨ ਪਣ੍ਡਕਤਿਰਚ੍ਛਾਨਗਤਉਭਤੋਬ੍ਯਞ੍ਜਨਕਾ ਤਯੋ ਵਤ੍ਥੁਵਿਪਨ੍ਨਾ ਅਹੇਤੁਕਪਟਿਸਨ੍ਧਿਕਾ, ਤੇਸਂ ਸਗ੍ਗੋ ਅਵਾਰਿਤੋ, ਮਗ੍ਗੋ ਪਨ ਵਾਰਿਤੋਤਿ ਅਵਿਸੇਸਤੋ ਵੁਤ੍ਤਨ੍ਤਿ ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ਮਹਾਵਗ੍ਗ ੩.੧੦੯) ਆਗਤਂ.

ਵਿਮਤਿਵਿਨੋਦਨਿਯਂ (ਵਿ. ਵਿ. ਟੀ. ਮਹਾਵਗ੍ਗ ੨.੧੦੯) ਪਨ ਪਣ੍ਡਕਵਤ੍ਥੁਸ੍ਮਿਂ ਆਸਿਤ੍ਤਉਸੂਯਪਕ੍ਖਪਣ੍ਡਕਾ ਤਯੋਪਿ ਪੁਰਿਸਭਾਵਲਿਙ੍ਗਾਦਿਯੁਤ੍ਤਾ ਅਹੇਤੁਕਪਟਿਸਨ੍ਧਿਕਾ, ਤੇ ਚ ਕਿਲੇਸਪਰਿਯੁਟ੍ਠਾਨਸ੍ਸ ਬਲਵਤਾਯ ਨਪੁਂਸਕਪਣ੍ਡਕਸਦਿਸਤ੍ਤਾ ‘‘ਪਣ੍ਡਕਾ’’ਤਿ ਵੁਤ੍ਤਾ, ਤੇਸੁ ਆਸਿਤ੍ਤਉਸੂਯਪਣ੍ਡਕਾਨਂ ਦ੍ਵਿਨ੍ਨਂ ਕਿਲੇਸਪਰਿਯੁਟ੍ਠਾਨਂ ਯੋਨਿਸੋਮਨਸਿਕਾਰਾਦੀਹਿ ਵੀਤਿਕ੍ਕਮਤੋ ਨਿਵਾਰੇਤੁਮ੍ਪਿ ਸਕ੍ਕਾ, ਤੇਨ ਤੇ ਪਬ੍ਬਾਜੇਤਬ੍ਬਾਤਿ ਵੁਤ੍ਤਾ. ਪਕ੍ਖਪਣ੍ਡਕਸ੍ਸ ਪਨ ਕਾਲ਼ਪਕ੍ਖੇ ਉਮ੍ਮਾਦੋ ਵਿਯ ਕਿਲੇਸਪਰਿਲ਼ਾਹੋ ਅਵਤ੍ਥਰਨ੍ਤੋ ਆਗਚ੍ਛਤਿ, ਵੀਤਿਕ੍ਕਮਂ ਪਤ੍ਵਾ ਏਵ ਚ ਨਿਵਤ੍ਤਤਿ, ਤਸ੍ਮਾ ਤਸ੍ਮਿਂ ਪਕ੍ਖੇ ਸੋ ਨ ਪਬ੍ਬਾਜੇਤਬ੍ਬੋਤਿ ਵੁਤ੍ਤੋ, ਤਦੇਤਂ ਵਿਭਾਗਂ ਦਸ੍ਸੇਤੁਂ ‘‘ਯਸ੍ਸ ਪਰੇਸ’’ਨ੍ਤਿ ਵੁਤ੍ਤਂ. ਤਤ੍ਥ ਆਸਿਤ੍ਤਸ੍ਸਾਤਿ ਮੁਖੇ ਆਸਿਤ੍ਤਸ੍ਸ ਅਤ੍ਤਨੋਪਿ ਅਸੁਚਿਮੁਚ੍ਚਨੇਨ ਪਰਿਲ਼ਾਹੋ ਵੂਪਸਮ੍ਮਤਿ. ਉਸੂਯਾਯ ਉਪ੍ਪਨ੍ਨਾਯਾਤਿ ਉਸੂਯਾਯ ਵਸੇਨ ਅਤ੍ਤਨੋ ਸੇਵੇਤੁਕਾਮਤਾਰਾਗੇ ਉਪ੍ਪਨ੍ਨੇ ਅਸੁਚਿਮੁਤ੍ਤਿਯਾ ਪਰਿਲ਼ਾਹੋ ਵੂਪਸਮ੍ਮਤਿ.

‘‘ਬੀਜਾਨਿ ਅਪਨੀਤਾਨੀ’’ਤਿ ਵੁਤ੍ਤਤ੍ਤਾ ਬੀਜੇਸੁ ਠਿਤੇਸੁ ਨਿਮਿਤ੍ਤਮਤ੍ਤੇ ਅਪਨੀਤੇ ਪਣ੍ਡਕੋ ਨ ਹੋਤਿ. ਭਿਕ੍ਖੁਨੋਪਿ ਅਨਾਬਾਧਪਚ੍ਚਯਾ ਤਦਪਨਯਨੇ ਥੁਲ੍ਲਚ੍ਚਯਮੇਵ, ਨ ਪਣ੍ਡਕਤ੍ਤਂ. ਬੀਜੇਸੁ ਪਨ ਅਪਨੀਤੇਸੁ ਅਙ੍ਗਜਾਤਮ੍ਪਿ ਰਾਗੇਨ ਕਮ੍ਮਨਿਯਂ ਨ ਹੋਤਿ, ਪੁਮਭਾਵੋ ਵਿਗਚ੍ਛਤਿ, ਮਸ੍ਸੁਆਦਿਪੁਰਿਸਲਿਙ੍ਗਮ੍ਪਿ ਉਪਸਮ੍ਪਦਾਪਿ ਵਿਗਚ੍ਛਤਿ, ਕਿਲੇਸਪਰਿਲ਼ਾਹੋਪਿ ਦੁਨ੍ਨਿਵਾਰਵੀਤਿਕ੍ਕਮੋ ਹੋਤਿ ਨਪੁਂਸਕਪਣ੍ਡਕਸ੍ਸ ਵਿਯ, ਤਸ੍ਮਾ ਈਦਿਸੋ ਉਪਸਮ੍ਪਨ੍ਨੋਪਿ ਨਾਸੇਤਬ੍ਬੋਤਿ ਵਦਨ੍ਤਿ. ਯਦਿ ਏਵਂ ਕਸ੍ਮਾ ਬੀਜੁਦ੍ਧਰਣੇ ਪਾਰਾਜਿਕਂ ਨ ਪਞ੍ਞਤ੍ਤਨ੍ਤਿ? ਏਤ੍ਥ ਤਾਵ ਕੇਚਿ ਵਦਨ੍ਤਿ ‘‘ਪਞ੍ਞਤ੍ਤਮੇਵੇਤਂ ਭਗਵਤਾ ‘ਪਣ੍ਡਕੋ ਭਿਕ੍ਖਵੇ ਅਨੁਪਸਮ੍ਪਨ੍ਨੋ ਨ ਉਪਸਮ੍ਪਾਦੇਤਬ੍ਬੋ, ਉਪਸਮ੍ਪਨ੍ਨੋ ਨਾਸੇਤਬ੍ਬੋ’ਤਿ ਵੁਤ੍ਤਤ੍ਤਾ’’ਤਿ. ਕੇਚਿ ਪਨ ‘‘ਯਸ੍ਮਾ ਬੀਜੁਦ੍ਧਰਣਕ੍ਖਣੇ ਪਣ੍ਡਕੋ ਨ ਹੋਤਿ, ਤਸ੍ਮਾ ਤਸ੍ਮਿਂ ਖਣੇ ਪਾਰਾਜਿਕਂ ਨ ਪਞ੍ਞਤ੍ਤਂ. ਯਸ੍ਮਾ ਪਨ ਸੋ ਉਦ੍ਧਟਬੀਜੋ ਭਿਕ੍ਖੁ ਅਪਰੇਨ ਸਮਯੇਨ ਵੁਤ੍ਤਨਯੇਨ ਪਣ੍ਡਕਤ੍ਤਂ ਆਪਜ੍ਜਤਿ, ਅਭਾਵਕੋ ਹੋਤਿ, ਉਪਸਮ੍ਪਦਾਯ ਅਵਤ੍ਥੁ, ਤਤੋ ਏਵ ਚਸ੍ਸ ਉਪਸਮ੍ਪਦਾ ਵਿਗਚ੍ਛਤਿ, ਤਸ੍ਮਾ ਏਸ ਪਣ੍ਡਕਤ੍ਤੁਪਗਮਨਕਾਲਤੋ ਪਟ੍ਠਾਯ ਜਾਤਿਯਾ ਨਪੁਂਸਕਪਣ੍ਡਕੇਨ ਸਦ੍ਧਿਂ ਯੋਜੇਤ੍ਵਾ ‘ਉਪਸਮ੍ਪਨ੍ਨੋ ਨਾਸੇਤਬ੍ਬੋ’ਤਿ ਅਭਬ੍ਬੋਤਿ ਵੁਤ੍ਤੋ, ਨ ਤਤੋ ਪੁਬ੍ਬੇ. ਅਯਞ੍ਚ ਕਿਞ੍ਚਾਪਿ ਸਹੇਤੁਕੋ, ਭਾਵਕ੍ਖਯੇਨ ਪਨਸ੍ਸ ਅਹੇਤੁਕਸਦਿਸਤਾਯ ਮਗ੍ਗੋਪਿ ਨ ਉਪ੍ਪਜ੍ਜਤੀ’’ਤਿ ਵਦਨ੍ਤਿ. ਅਪਰੇ ਪਨ ‘‘ਪਬ੍ਬਜ੍ਜਤੋ ਪੁਬ੍ਬੇ ਉਪਕ੍ਕਮੇਨ ਪਣ੍ਡਕਭਾਵਮਾਪਨ੍ਨਂ ਸਨ੍ਧਾਯ ‘ਉਪਸਮ੍ਪਨ੍ਨੋ ਨਾਸੇਤਬ੍ਬੋ’ਤਿ ਵੁਤ੍ਤਂ, ਉਪਸਮ੍ਪਨ੍ਨਸ੍ਸ ਪਨ ਪਚ੍ਛਾ ਉਪਕ੍ਕਮੇਨ ਉਪਸਮ੍ਪਦਾਪਿ ਨ ਵਿਗਚ੍ਛਤੀ’’ਤਿ, ਤਂ ਨ ਯੁਤ੍ਤਂ. ਯਦਗ੍ਗੇਨ ਹਿ ਪਬ੍ਬਜ੍ਜਤੋ ਪੁਬ੍ਬੇ ਉਪਕ੍ਕਮੇਨ ਅਭਬ੍ਬੋ ਹੋਤਿ, ਤਦਗ੍ਗੇਨ ਪਚ੍ਛਾਪਿ ਹੋਤੀਤਿ ਵੀਮਂਸਿਤ੍ਵਾ ਗਹੇਤਬ੍ਬਂ.

ਇਤ੍ਥਤ੍ਤਾਦਿ ਭਾਵੋ ਨਤ੍ਥਿ ਏਤਸ੍ਸਾਤਿ ਅਭਾਵਕੋ. ਪਬ੍ਬਜ੍ਜਾ ਨ ਵਾਰਿਤਾਤਿ ਏਤ੍ਥ ਪਬ੍ਬਜ੍ਜਾਗ੍ਗਹਣੇਨੇਵ ਉਪਸਮ੍ਪਦਾਪਿ ਗਹਿਤਾ. ਤੇਨਾਹ ‘‘ਯਸ੍ਸ ਚੇਤ੍ਥ ਪਬ੍ਬਜ੍ਜਾ ਵਾਰਿਤਾ’’ਤਿਆਦਿ. ਤਸ੍ਮਿਂ ਯੇਵਸ੍ਸ ਪਕ੍ਖੇ ਪਬ੍ਬਜ੍ਜਾ ਵਾਰਿਤਾਤਿ ਏਤ੍ਥ ਪਨ ਅਪਣ੍ਡਕਪਕ੍ਖੇਪਿ ਪਬ੍ਬਜ੍ਜਾਮਤ੍ਤਮੇਵ ਲਭਤਿ, ਉਪਸਮ੍ਪਦਾ ਪਨ ਤਦਾਪਿ ਨ ਵਟ੍ਟਤਿ, ਪਣ੍ਡਕਪਕ੍ਖੇ ਪਨ ਆਗਤੋ ਲਿਙ੍ਗਨਾਸਨਾਯ ਨਾਸੇਤਬ੍ਬੋਤਿ ਵੇਦਿਤਬ੍ਬਨ੍ਤਿ ਵੁਤ੍ਤਂ.

੧੩੬. ਉਭਤੋਬ੍ਯਞ੍ਜਨਮਸ੍ਸ ਅਤ੍ਥੀਤਿ ਉਭਤੋਬ੍ਯਞ੍ਜਨਕੋਤਿ ਇਮਿਨਾ ਅਸਮਾਨਾਧਿਕਰਣਵਿਸਯੋ ਬਾਹਿਰਤ੍ਥਸਮਾਸੋਯਂ, ਪੁਰਿਮਪਦੇ ਚ ਵਿਭਤ੍ਤਿਅਲੋਪੋਤਿ ਦਸ੍ਸੇਤਿ. ਬ੍ਯਞ੍ਜਨਨ੍ਤਿ ਚੇਤ੍ਥ ਪੁਰਿਸਨਿਮਿਤ੍ਤਂ ਇਤ੍ਥਿਨਿਮਿਤ੍ਤਞ੍ਚ ਅਧਿਪ੍ਪੇਤਂ. ਅਥ ਉਭਤੋਬ੍ਯਞ੍ਜਨਕਸ੍ਸ ਏਕਮੇਵ ਇਨ੍ਦ੍ਰਿਯਂ ਹੋਤਿ, ਉਦਾਹੁ ਦ੍ਵੇਤਿ? ਏਕਮੇਵ ਹੋਤਿ, ਨ ਦ੍ਵੇ. ਕਥਂ ਵਿਞ੍ਞਾਯਤੀਤਿ ਚੇ? ‘‘ਯਸ੍ਸ ਇਤ੍ਥਿਨ੍ਦ੍ਰਿਯਂ ਉਪ੍ਪਜ੍ਜਤਿ, ਤਸ੍ਸ ਪੁਰਿਸਿਨ੍ਦ੍ਰਿਯਂ ਉਪ੍ਪਜ੍ਜਤੀਤਿ, ਨੋ. ਯਸ੍ਸ ਵਾ ਪਨ ਪੁਰਿਸਿਨ੍ਦ੍ਰਿਯਂ ਉਪ੍ਪਜ੍ਜਤਿ, ਤਸ੍ਸ ਇਤ੍ਥਿਨ੍ਦ੍ਰਿਯਂ ਉਪ੍ਪਜ੍ਜਤੀਤਿ, ਨੋ’’ਤਿ (ਯਮ. ੩.ਇਨ੍ਦ੍ਰਿਯਯਮਕ.੧੮੮) ਏਕਸ੍ਮਿਂ ਸਨ੍ਤਾਨੇ ਇਨ੍ਦ੍ਰਿਯਭੂਤਭਾਵਦ੍ਵਯਸ੍ਸ ਉਪ੍ਪਤ੍ਤਿਯਾ ਅਭਿਧਮ੍ਮੇ ਪਟਿਸੇਧਿਤਤ੍ਤਾ, ਤਞ੍ਚ ਖੋ ਇਤ੍ਥਿਉਭਤੋਬ੍ਯਞ੍ਜਨਕਸ੍ਸ ਇਤ੍ਥਿਨ੍ਦ੍ਰਿਯਂ, ਪੁਰਿਸਉਭਤੋਬ੍ਯਞ੍ਜਨਕਸ੍ਸ ਪੁਰਿਸਿਨ੍ਦ੍ਰਿਯਨ੍ਤਿ. ਯਦਿ ਏਵਂ ਦੁਤਿਯਬ੍ਯਞ੍ਜਨਸ੍ਸ ਅਭਾਵੋ ਆਪਜ੍ਜਤਿ ਇਨ੍ਦ੍ਰਿਯਞ੍ਹਿ ਬ੍ਯਞ੍ਜਨਸ੍ਸ ਕਾਰਣਂ ਵੁਤ੍ਤਂ, ਤਞ੍ਚ ਤਸ੍ਸ ਨਤ੍ਥੀਤਿ? ਵੁਚ੍ਚਤੇ – ਨ ਤਸ੍ਸ ਇਨ੍ਦ੍ਰਿਯਂ ਦੁਤਿਯਬ੍ਯਞ੍ਜਨਕਾਰਣਂ. ਕਸ੍ਮਾ? ਸਦਾ ਅਭਾਵਤੋ. ਇਤ੍ਥਿਉਭਤੋਬ੍ਯਞ੍ਜਨਕਸ੍ਸ ਹਿ ਯਦਾ ਇਤ੍ਥਿਯਾ ਰਾਗਚਿਤ੍ਤਂ ਉਪ੍ਪਜ੍ਜਤਿ, ਤਦਾ ਪੁਰਿਸਬ੍ਯਞ੍ਜਨਂ ਪਾਕਟਂ ਹੋਤਿ, ਇਤ੍ਥਿਬ੍ਯਞ੍ਜਨਂ ਪਟਿਚ੍ਛਨ੍ਨਂ ਗੁਲ਼੍ਹਂ ਹੋਤਿ, ਤਥਾ ਇਤਰਸ੍ਸ ਇਤਰਂ. ਯਦਿ ਚ ਤੇਸਂ ਇਨ੍ਦ੍ਰਿਯਂ ਦੁਤਿਯਬ੍ਯਞ੍ਜਨਕਾਰਣਂ ਭਵੇਯ੍ਯ, ਸਦਾਪਿ ਬ੍ਯਞ੍ਜਨਦ੍ਵਯਂ ਤਿਟ੍ਠੇਯ੍ਯ, ਨ ਪਨ ਤਿਟ੍ਠਤਿ, ਤਸ੍ਮਾ ਵੇਦਿਤਬ੍ਬਮੇਤਂ ‘‘ਨ ਤਸ੍ਸ ਤਂ ਬ੍ਯਞ੍ਜਨਕਾਰਣਂ, ਕਮ੍ਮਸਹਾਯਂ ਪਨ ਰਾਗਚਿਤ੍ਤਮੇਵੇਤ੍ਥ ਕਾਰਣ’’ਨ੍ਤਿ. ਯਸ੍ਮਾ ਚਸ੍ਸ ਏਕਮੇਵ ਇਨ੍ਦ੍ਰਿਯਂ ਹੋਤਿ, ਤਸ੍ਮਾ ਇਤ੍ਥਿਉਭਤੋਬ੍ਯਞ੍ਜਨਕੋ ਸਯਮ੍ਪਿ ਗਬ੍ਭਂ ਗਣ੍ਹਾਤਿ, ਪਰਮ੍ਪਿ ਗਣ੍ਹਾਪੇਤਿ. ਪੁਰਿਸਉਭਤੋਬ੍ਯਞ੍ਜਨਕੋ ਪਰਂ ਗਣ੍ਹਾਪੇਤਿ, ਸਯਂ ਪਨ ਨ ਗਣ੍ਹਾਤੀਤਿ ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ਮਹਾਵਗ੍ਗ ੩.੧੧੬) ਆਗਤਂ.

ਵਿਮਤਿਵਿਨੋਦਨਿਯਂ (ਵਿ. ਵਿ. ਟੀ. ਮਹਾਵਗ੍ਗ ੨.੧੧੬) ਪਨ – ਇਤ੍ਥਿਉਭਤੋਬ੍ਯਞ੍ਜਨਕੋਤਿ ਇਤ੍ਥਿਨ੍ਦ੍ਰਿਯਯੁਤ੍ਤੋ, ਇਤਰੋ ਪਨ ਪੁਰਿਸਿਨ੍ਦ੍ਰਿਯਯੁਤ੍ਤੋ. ਏਕਸ੍ਸ ਹਿ ਭਾਵਦ੍ਵਯਂ ਸਹ ਨ ਉਪ੍ਪਜ੍ਜਤਿ ਯਮਕੇ (ਯਮ. ੩.ਇਨ੍ਦ੍ਰਿਯਯਮਕ.੧੮੮) ਪਟਿਕ੍ਖਿਤ੍ਤਤ੍ਤਾ. ਦੁਤਿਯਬ੍ਯਞ੍ਜਨਂ ਪਨ ਕਮ੍ਮਸਹਾਯੇਨ ਅਕੁਸਲਚਿਤ੍ਤੇਨੇਵ ਭਾਵਰਹਿਤਂ ਉਪ੍ਪਜ੍ਜਤਿ. ਪਕਤਿਤ੍ਥਿਪੁਰਿਸਾਨਮ੍ਪਿ ਕਮ੍ਮਮੇਵ ਬ੍ਯਞ੍ਜਨਲਿਙ੍ਗਾਨਂ ਕਾਰਣਂ, ਨ ਭਾਵੋ ਤਸ੍ਸ ਕੇਨਚਿ ਪਚ੍ਚਯੇਨ ਪਚ੍ਚਯਤ੍ਤਸ੍ਸ ਪਟ੍ਠਾਨੇ ਅਵੁਤ੍ਤਤ੍ਤਾ. ਕੇਵਲਂ ਭਾਵਸਹਿਤਾਨਂਯੇਵ ਬ੍ਯਞ੍ਜਨਲਿਙ੍ਗਾਨਂ ਪਵਤ੍ਤਦਸ੍ਸਨਤ੍ਥਂ ਅਟ੍ਠਕਥਾਸੁ (ਧ. ਸ. ਅਟ੍ਠ. ੬੩੨-੬੩੩) ‘‘ਇਤ੍ਥਿਨ੍ਦ੍ਰਿਯਂ ਪਟਿਚ੍ਚ ਇਤ੍ਥਿਲਿਙ੍ਗਾਦੀਨੀ’’ਤਿਆਦਿਨਾ ਇਨ੍ਦ੍ਰਿਯਸ੍ਸ ਬ੍ਯਞ੍ਜਨਕਾਰਣਤ੍ਤੇਨ ਵੁਤ੍ਤਂ. ਇਧ ਪਨ ਅਕੁਸਲਬਲੇਨ ਇਨ੍ਦ੍ਰਿਯਂ ਵਿਨਾਪਿ ਬ੍ਯਞ੍ਜਨਂ ਉਪ੍ਪਜ੍ਜਤੀਤਿ ਵੇਦਿਤਬ੍ਬਂ. ਉਭਿਨ੍ਨਮ੍ਪਿ ਚੇ ਤੇਸਂ ਉਭਤੋਬ੍ਯਞ੍ਜਨਕਾਨਂ. ਯਦਾ ਇਤ੍ਥਿਯਾ ਰਾਗੋ ਉਪ੍ਪਜ੍ਜਤਿ, ਤਦਾ ਪੁਰਿਸਬ੍ਯਞ੍ਜਨਂ ਪਾਕਟਂ ਹੋਤਿ, ਇਤਰਂ ਪਟਿਚ੍ਛਨ੍ਨਂ. ਯਦਾ ਪੁਰਿਸੇ ਰਾਗੋ ਉਪ੍ਪਜ੍ਜਤਿ, ਤਦਾ ਇਤ੍ਥਿਬ੍ਯਞ੍ਜਨਂ ਪਾਕਟਂ ਹੋਤਿ, ਇਤਰਂ ਪਟਿਚ੍ਛਨ੍ਨਨ੍ਤਿ ਆਗਤਂ.

੧੩੭. ਥੇਯ੍ਯਾਯ ਸਂਵਾਸੋ ਏਤਸ੍ਸਾਤਿ ਥੇਯ੍ਯਸਂਵਾਸਕੋ. ਸੋ ਚ ਨ ਸਂਵਾਸਮਤ੍ਤਸ੍ਸੇਵ ਥੇਨਕੋ ਇਧਾਧਿਪ੍ਪੇਤੋ, ਅਥ ਖੋ ਲਿਙ੍ਗਸ੍ਸ ਤਦੁਭਯਸ੍ਸ ਚ ਥੇਨਕੋਪੀਤਿ ਆਹ ‘‘ਤਯੋ ਥੇਯ੍ਯਸਂਵਾਸਕਾ’’ਤਿਆਦਿ. ਨ ਯਥਾਵੁਡ੍ਢਂ ਵਨ੍ਦਨਂ ਸਾਦਿਯਤੀਤਿ ਯਥਾਵੁਡ੍ਢਂ ਭਿਕ੍ਖੂਨਂ ਵਾ ਸਾਮਣੇਰਾਨਂ ਵਾ ਵਨ੍ਦਨਂ ਨ ਸਾਦਿਯਤਿ. ਯਥਾਵੁਡ੍ਢਂ ਵਨ੍ਦਨਂ ਸਾਦਿਯਤੀਤਿ ਅਤ੍ਤਨਾ ਮੁਸਾਵਾਦਂ ਕਤ੍ਵਾ ਦਸ੍ਸਿਤਵਸ੍ਸਾਨੁਰੂਪਂ ਯਥਾਵੁਡ੍ਢਂ ਵਨ੍ਦਨਂ ਸਾਦਿਯਤਿ. ਭਿਕ੍ਖੁਵਸ੍ਸਗਣਨਾਦਿਕੋਤਿ ਇਮਿਨਾ ਨ ਏਕਕਮ੍ਮਾਦਿਕੋਵ ਇਧ ਸਂਵਾਸੋ ਨਾਮਾਤਿ ਦਸ੍ਸੇਤਿ.

੧੩੮. ਰਾਜ…ਪੇ… ਭਯੇਨਾਤਿ ਏਤ੍ਥ ਭਯ-ਸਦ੍ਦੋ ਪਚ੍ਚੇਕਂ ਯੋਜੇਤਬ੍ਬੋ ‘‘ਰਾਜਭਯੇਨ ਦੁਬ੍ਭਿਕ੍ਖਭਯੇਨਾ’’ਤਿਆਦਿਨਾ. ਸਂਵਾਸਂ ਨਾਧਿਵਾਸੇਤਿ, ਯਾਵ ਸੋ ਸੁਦ੍ਧਮਾਨਸੋਤਿ ਰਾਜਭਯਾਦੀਹਿ ਗਹਿਤਲਿਙ੍ਗਤਾਯ ਸੋ ਸੁਦ੍ਧਮਾਨਸੋ ਯਾਵ ਸਂਵਾਸਂ ਨਾਧਿਵਾਸੇਤੀਤਿ ਅਤ੍ਥੋ. ਯੋ ਹਿ ਰਾਜਭਯਾਦਿਂ ਵਿਨਾ ਕੇਵਲਂ ਭਿਕ੍ਖੂ ਵਞ੍ਚੇਤ੍ਵਾ ਤੇਹਿ ਸਦ੍ਧਿਂ ਸਂਵਸਿਤੁਕਾਮਤਾਯ ਲਿਙ੍ਗਂ ਗਣ੍ਹਾਤਿ, ਸੋ ਅਸੁਦ੍ਧਚਿਤ੍ਤਤਾਯ ਲਿਙ੍ਗਗ੍ਗਹਣੇਨੇਵ ਥੇਯ੍ਯਸਂਵਾਸਕੋ ਨਾਮ ਹੋਤਿ. ਅਯਂ ਪਨ ਤਾਦਿਸੇਨ ਅਸੁਦ੍ਧਚਿਤ੍ਤੇਨ ਭਿਕ੍ਖੂ ਵਞ੍ਚੇਤੁਕਾਮਤਾਯ ਅਭਾਵਤੋ ਯਾਵ ਸਂਵਾਸਂ ਨਾਧਿਵਾਸੇਤਿ, ਤਾਵ ਥੇਯ੍ਯਸਂਵਾਸਕੋ ਨਾਮ ਨ ਹੋਤਿ. ਤੇਨੇਵ ‘‘ਰਾਜਭਯਾਦੀਹਿ ਗਹਿਤਲਿਙ੍ਗਾਨਂ ‘ਗਿਹੀ ਮਂ ਸਮਣੋਤਿ ਜਾਨਨ੍ਤੂ’ਤਿ ਵਞ੍ਚਨਚਿਤ੍ਤੇ ਸਤਿਪਿ ਭਿਕ੍ਖੂਨਂ ਵਞ੍ਚੇਤੁਕਾਮਤਾਯ ਅਭਾਵਾ ਦੋਸੋ ਨ ਜਾਤੋ’’ਤਿ ਤੀਸੁਪਿ ਗਣ੍ਠਿਪਦੇਸੁ ਵੁਤ੍ਤਂ. ਕੇਚਿ ਪਨ ‘‘ਵੂਪਸਨ੍ਤਭਯਤਾ ਇਧ ਸੁਦ੍ਧਚਿਤ੍ਤਤਾ’’ਤਿ ਵਦਨ੍ਤਿ, ਏਵਞ੍ਚ ਸਤਿ ਸੋ ਵੂਪਸਨ੍ਤਭਯੋ ਯਾਵ ਸਂਵਾਸਂ ਨਾਧਿਵਾਸੇਤਿ, ਤਾਵ ਥੇਯ੍ਯਸਂਵਾਸਕੋ ਨ ਹੋਤੀਤਿ ਅਯਮਤ੍ਥੋ ਵਿਞ੍ਞਾਯਤਿ. ਇਮਸ੍ਮਿਞ੍ਚ ਅਤ੍ਥੇ ਵਿਞ੍ਞਾਯਮਾਨੇ ਅਵੂਪਸਨ੍ਤਭਯਸ੍ਸ ਸਂਵਾਸਸਾਦਿਯਨੇਪਿ ਥੇਯ੍ਯਸਂਵਾਸਕੋ ਨ ਹੋਤੀਤਿ ਆਪਜ੍ਜੇਯ੍ਯ, ਨ ਚ ਅਟ੍ਠਕਥਾਯਂ ਅਵੂਪਸਨ੍ਤਭਯਸ੍ਸ ਸਂਵਾਸਸਾਦਿਯਨੇਪਿ ਅਥੇਯ੍ਯਸਂਵਾਸਕਤਾ ਦਸ੍ਸਿਤਾ. ਸਬ੍ਬਪਾਸਣ੍ਡਿਯਭਤ੍ਤਾਨਿ ਭੁਞ੍ਜਨ੍ਤੋਤਿ ਚ ਇਮਿਨਾ ਅਵੂਪਸਨ੍ਤਭਯੇਨਪਿ ਸਂਵਾਸਂ ਅਸਾਦਿਯਨ੍ਤੇਨੇਵ ਭਵਿਤਬ੍ਬਨ੍ਤਿ ਦੀਪੇਤਿ. ਤੇਨੇਵ ਤੀਸੁਪਿ ਗਣ੍ਠਿਪਦੇਸੁ ਵੁਤ੍ਤਂ ‘‘ਯਸ੍ਮਾ ਵਿਹਾਰਂ ਆਗਨ੍ਤ੍ਵਾ ਸਙ੍ਘਿਕਂ ਗਣ੍ਹਨ੍ਤਸ੍ਸ ਸਂਵਾਸਂ ਪਰਿਹਰਿਤੁਂ ਦੁਕ੍ਕਰਂ, ਤਸ੍ਮਾ ‘ਸਬ੍ਬਪਾਸਣ੍ਡਿਯਭਤ੍ਤਾਨਿ ਭੁਞ੍ਜਨ੍ਤੋ’ਤਿ ਇਦਂ ਵੁਤ੍ਤ’’ਨ੍ਤਿ. ਤਸ੍ਮਾ ਰਾਜਭਯਾਦੀਹਿ ਗਹਿਤਲਿਙ੍ਗਤਾਯੇਵੇਤ੍ਥ ਸੁਦ੍ਧਚਿਤ੍ਤਤਾਤਿ ਗਹੇਤਬ੍ਬਂ.

ਸਬ੍ਬਪਾਸਣ੍ਡਿਯਭਤ੍ਤਾਨੀਤਿ ਸਬ੍ਬਸਾਮਯਿਕਾਨਂ ਸਾਧਾਰਣਂ ਕਤ੍ਵਾ ਵੀਥਿਚਤੁਕ੍ਕਾਦੀਸੁ ਠਪੇਤ੍ਵਾ ਦਾਤਬ੍ਬਭਤ੍ਤਾਨਿ. ਕਾਯਪਰਿਹਾਰਿਯਾਨੀਤਿ ਕਾਯੇਨ ਪਰਿਹਰਿਤਬ੍ਬਾਨਿ. ਅਬ੍ਭੁਗ੍ਗਚ੍ਛਨ੍ਤੀਤਿ ਅਭਿਮੁਖਂ ਗਚ੍ਛਨ੍ਤਿ. ਕਮ੍ਮਨ੍ਤਾਨੁਟ੍ਠਾਨੇਨਾਤਿ ਕਸਿਗੋਰਕ੍ਖਾਦਿਕਮ੍ਮਾਕਰਣੇਨ. ਤਦੇਵ ਪਤ੍ਤਚੀਵਰਂ ਆਦਾਯ ਵਿਹਾਰਂ ਗਚ੍ਛਤੀਤਿ ਚੀਵਰਾਨਿ ਨਿਵਾਸਨਪਾਰੁਪਨਵਸੇਨ ਆਦਾਯ, ਪਤ੍ਤਞ੍ਚ ਅਂਸਕੂਟੇ ਲਗ੍ਗੇਤ੍ਵਾ ਵਿਹਾਰਂ ਗਚ੍ਛਤਿ.

ਨਾਪਿ ਸਯਂ ਜਾਨਾਤੀਤਿ ‘‘ਯੋ ਏਵਂ ਪਬ੍ਬਜਤਿ, ਸੋ ਥੇਯ੍ਯਸਂਵਾਸਕੋ ਨਾਮ ਹੋਤੀ’’ਤਿ ਵਾ ‘‘ਏਵਂ ਕਾਤੁਂ ਨ ਲਭਤੀ’’ਤਿ ਵਾ ‘‘ਏਵਂ ਪਬ੍ਬਜਿਤੋ ਸਮਣੋ ਨਾਮ ਨ ਹੋਤੀ’’ਤਿ ਵਾ ਨ ਜਾਨਾਤਿ. ਯੋ ਏਵਂ ਪਬ੍ਬਜਤਿ, ਸੋ ਥੇਯ੍ਯਸਂਵਾਸਕੋ ਨਾਮ ਹੋਤੀਤਿ ਇਦਂ ਪਨ ਨਿਦਸ੍ਸਨਮਤ੍ਤਂ. ਅਨੁਪਸਮ੍ਪਨ੍ਨਕਾਲੇਯੇਵਾਤਿ ਇਮਿਨਾ ਉਪਸਮ੍ਪਨ੍ਨਕਾਲੇ ਸੁਤ੍ਵਾ ਸਚੇਪਿ ਨਾਰੋਚੇਤਿ, ਥੇਯ੍ਯਸਂਵਾਸਕੋ ਨ ਹੋਤੀਤਿ ਦੀਪੇਤਿ.

ਸਿਕ੍ਖਂ ਅਪ੍ਪਚ੍ਚਕ੍ਖਾਯ…ਪੇ… ਥੇਯ੍ਯਸਂਵਾਸਕੋ ਨ ਹੋਤੀਤਿ ਇਦਂ ਭਿਕ੍ਖੂਹਿ ਦਿਨ੍ਨਲਿਙ੍ਗਸ੍ਸ ਅਪਰਿਚ੍ਚਤ੍ਤਤ੍ਤਾ ਨ ਲਿਙ੍ਗਤ੍ਥੇਨਕੋ ਹੋਤਿ, ਲਿਙ੍ਗਾਨੁਰੂਪਸ੍ਸ ਸਂਵਾਸਸ੍ਸ ਸਾਦਿਤਤ੍ਤਾ ਨਾਪਿ ਸਂਵਾਸਤ੍ਥੇਨਕੋ ਹੋਤੀਤਿ ਵੁਤ੍ਤਂ. ਏਕੋ ਭਿਕ੍ਖੁ ਕਾਸਾਯੇ ਸਉਸ੍ਸਾਹੋਵ ਓਦਾਤਂ ਨਿਵਾਸੇਤ੍ਵਾਤਿ ਏਤ੍ਥਾਪਿ ਇਦਮੇਵ ਕਾਰਣਂ ਦਟ੍ਠਬ੍ਬਂ. ਪਰਤੋ ‘‘ਸਾਮਣੇਰੋ ਸਲਿਙ੍ਗੇ ਠਿਤੋ’’ਤਿਆਦਿਨਾ ਸਾਮਣੇਰਸ੍ਸ ਵੁਤ੍ਤਵਿਧਾਨੇਸੁਪਿ ਅਥੇਯ੍ਯਸਂਵਾਸਪਕ੍ਖੇ ਅਯਮੇਵ ਨਯੋ. ‘‘ਭਿਕ੍ਖੁਨਿਯਾਪਿ ਏਸੇਵ ਨਯੋ’’ਤਿ ਵੁਤ੍ਤਮੇਵਤ੍ਥਂ ‘‘ਸਾਪਿ ਗਿਹਿਭਾਵਂ ਪਤ੍ਥਯਮਾਨਾ’’ਤਿਆਦਿਨਾ ਵਿਭਾਵੇਤਿ.

ਸਚੇ ਕੋਚਿ ਵੁਡ੍ਢਪਬ੍ਬਜਿਤੋਤਿ ਸਾਮਣੇਰਂ ਸਨ੍ਧਾਯ ਵੁਤ੍ਤਂ. ਮਹਾਪੇਲ਼ਾਦੀਸੂਤਿ ਏਤੇਨ ਗਿਹਿਸਨ੍ਤਕਂ ਦਸ੍ਸਿਤਂ. ਸਾਮਣੇਰਪਟਿਪਾਟਿਯਾ…ਪੇ… ਥੇਯ੍ਯਸਂਵਾਸਕੋ ਨ ਹੋਤੀਤਿ ਏਤ੍ਥ ਕਿਞ੍ਚਾਪਿ ਥੇਯ੍ਯਸਂਵਾਸਕੋ ਨ ਹੋਤਿ, ਪਾਰਾਜਿਕਂ ਪਨ ਆਪਜ੍ਜਤਿਯੇਵ. ਸੇਸਮੇਤ੍ਥ ਉਤ੍ਤਾਨਮੇਵਾਤਿ ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ਮਹਾਵਗ੍ਗ ੩.੧੧੦) ਵੁਤ੍ਤਂ.

ਵਿਮਤਿਵਿਨੋਦਨਿਯਂ (ਵਿ. ਵਿ. ਟੀ. ਮਹਾਵਗ੍ਗ ੨.੧੧੦) ਪਨ – ਥੇਯ੍ਯਾਯ ਲਿਙ੍ਗਗ੍ਗਹਣਮਤ੍ਤਮ੍ਪਿ ਇਧ ਸਂਵਾਸੋ ਏਵਾਤਿ ਆਹ ‘‘ਤਯੋ ਥੇਯ੍ਯਸਂਵਾਸਕਾ’’ਤਿ. ਨ ਯਥਾਵੁਡ੍ਢਂ ਵਨ੍ਦਨਨ੍ਤਿ ਭਿਕ੍ਖੂਨਂ ਸਾਮਣੇਰਾਨਂ ਵਾ ਵਨ੍ਦਨਂ ਨ ਸਾਦਿਯਤਿ. ਯਥਾਵੁਡ੍ਢਂ ਵਨ੍ਦਨਨ੍ਤਿ ਅਤ੍ਤਨਾ ਮੁਸਾਵਾਦੇਨ ਦਸ੍ਸਿਤਵਸ੍ਸਕ੍ਕਮੇਨ ਭਿਕ੍ਖੂਨਂ ਵਨ੍ਦਨਂ ਸਾਦਿਯਤਿ. ਦਹਰਸਾਮਣੇਰੋ ਪਨ ਵੁਡ੍ਢਸਾਮਣੇਰਾਨਂ, ਦਹਰਭਿਕ੍ਖੂ ਚ ਵੁਡ੍ਢਾਨਂ ਵਨ੍ਦਨਂ ਸਾਦਿਯਨ੍ਤੋਪਿ ਥੇਯ੍ਯਸਂਵਾਸਕੋ ਨ ਹੋਤਿ. ਇਮਸ੍ਮਿਂ ਅਤ੍ਥੇਤਿ ਸਂਵਾਸਤ੍ਥੇਨਕਤ੍ਥੇ. ਭਿਕ੍ਖੁਵਸ੍ਸਾਨੀਤਿ ਇਦਂ ਸਂਵਾਸਤ੍ਥੇਨਕੇ ਵੁਤ੍ਤਪਾਠਵਸੇਨ ਵੁਤ੍ਤਂ, ਸਯਮੇਵ ਪਨ ਪਬ੍ਬਜਿਤ੍ਵਾ ਸਾਮਣੇਰਵਸ੍ਸਾਨਿ ਗਣੇਨ੍ਤੋਪਿ ਉਭਯਤ੍ਥੇਨਕੋ ਏਵ. ਨ ਕੇਵਲਞ੍ਚ ਪੁਰਿਸੋਵ, ਇਤ੍ਥੀਪਿ ਭਿਕ੍ਖੂਨੀਸੁ ਏਵਂ ਪਟਿਪਜ੍ਜਤਿ, ਥੇਯ੍ਯਸਂਵਾਸਿਕਾਵ. ਆਦਿਕਮ੍ਮਿਕਾਪਿ ਚੇਤ੍ਥ ਨ ਮੁਚ੍ਚਨ੍ਤਿ. ਉਪਸਮ੍ਪਨ੍ਨੇਸੁ ਏਵ ਪਞ੍ਞਤ੍ਤਾਪਤ੍ਤਿਂ ਪਟਿਚ੍ਚ ਆਦਿਕਮ੍ਮਿਕਾ ਵੁਤ੍ਤਾ, ਤੇਨੇਵੇਤ੍ਥ ਆਦਿਕਮ੍ਮਿਕੋਪਿ ਨ ਮੁਤ੍ਤੋ.

ਰਾਜ…ਪੇ… ਭਯੇਨਾਤਿ ਏਤ੍ਥ ਭਯ-ਸਦ੍ਦੋ ਪਚ੍ਚੇਕਂ ਯੋਜੇਤਬ੍ਬੋ. ਯਾਵ ਸੋ ਸੁਦ੍ਧਮਾਨਸੋਤਿ ‘‘ਇਮਿਨਾ ਲਿਙ੍ਗੇਨ ਭਿਕ੍ਖੂ ਵਞ੍ਚੇਤ੍ਵਾ ਤੇਹਿ ਸਂਵਸਿਸ੍ਸਾਮੀ’’ਤਿ ਅਸੁਦ੍ਧਚਿਤ੍ਤਾਭਾਵੇਨ ਸੁਦ੍ਧਚਿਤ੍ਤੋ. ਤੇਨ ਹਿ ਅਸੁਦ੍ਧਚਿਤ੍ਤੇਨ ਲਿਙ੍ਗੇ ਗਹਿਤਮਤ੍ਤੇ ਪਚ੍ਛਾ ਭਿਕ੍ਖੂਹਿ ਸਹ ਸਂਵਸਤੁ ਵਾ ਮਾ ਵਾ, ਲਿਙ੍ਗਤ੍ਥੇਨਕੋ ਹੋਤਿ. ਪਚ੍ਛਾ ਸਂਵਸਨ੍ਤੋਪਿ ਅਭਬ੍ਬੋ ਹੁਤ੍ਵਾ ਸਂਵਸਤਿ, ਤਸ੍ਮਾ ਉਭਯਤ੍ਥੇਨਕੋਪਿ ਲਿਙ੍ਗਤ੍ਥੇਨਕੇ ਏਵ ਪਵਿਸਤੀਤਿ ਵੇਦਿਤਬ੍ਬਂ. ਯੋ ਪਨ ਰਾਜਾਦਿਭਯੇਨ ਸੁਦ੍ਧਚਿਤ੍ਤੋਵ ਲਿਙ੍ਗਂ ਗਹੇਤ੍ਵਾ ਵਿਚਰਨ੍ਤੋ ਪਚ੍ਛਾ ‘‘ਭਿਕ੍ਖੁਵਸ੍ਸਾਨਿ ਗਣੇਤ੍ਵਾ ਜੀਵਸ੍ਸਾਮੀ’’ਤਿ ਅਸੁਦ੍ਧਚਿਤ੍ਤਂ ਉਪ੍ਪਾਦੇਤਿ, ਸੋ ਚਿਤ੍ਤੁਪ੍ਪਾਦਮਤ੍ਤੇਨ ਥੇਯ੍ਯਸਂਵਾਸਕੋ ਨ ਹੋਤਿ ਸੁਦ੍ਧਚਿਤ੍ਤੇਨ ਗਹਿਤਲਿਙ੍ਗਤ੍ਤਾ. ਸਚੇ ਪਨ ਸੋ ਭਿਕ੍ਖੂਨਂ ਸਨ੍ਤਿਕਂ ਗਨ੍ਤ੍ਵਾ ਸਾਮਣੇਰਵਸ੍ਸਗਣਨਾਦਿਂ ਕਰੋਤਿ, ਤਦਾ ਸਂਵਾਸਤ੍ਥੇਨਕੋ, ਉਭਯਤ੍ਥੇਨਕੋ ਵਾ ਹੋਤੀਤਿ ਦਟ੍ਠਬ੍ਬਂ. ਯਂ ਪਨ ਪਰਤੋ ‘‘ਸਹ ਧੁਰਨਿਕ੍ਖੇਪੇਨ ਅਯਮ੍ਪਿ ਥੇਯ੍ਯਸਂਵਾਸਕੋਵਾ’’ਤਿ ਵੁਤ੍ਤਂ, ਤਂ ਭਿਕ੍ਖੂਹਿ ਸਙ੍ਗਮ੍ਮ ਸਂਵਾਸਾਧਿਵਾਸਨਵਸੇਨ ਧੁਰਨਿਕ੍ਖੇਪਂ ਸਨ੍ਧਾਯ ਵੁਤ੍ਤਂ. ਤੇਨ ਵੁਤ੍ਤਂ ‘‘ਸਂਵਾਸਂ ਨਾਧਿਵਾਸੇਤਿ, ਯਾਵਾ’’ਤਿ, ਤਸ੍ਸ ਤਾਵ ਥੇਯ੍ਯਸਂਵਾਸਕੋ ਨਾਮ ਨ ਵੁਚ੍ਚਤੀਤਿ ਸਮ੍ਬਨ੍ਧੋ ਦਟ੍ਠਬ੍ਬੋ. ਏਤ੍ਥ ਚ ਚੋਰਾਦਿਭਯਂ ਵਿਨਾਪਿ ਕੀਲ਼ਾਧਿਪ੍ਪਾਯੇਨ ਲਿਙ੍ਗਂ ਗਹੇਤ੍ਵਾ ਭਿਕ੍ਖੂਨਮ੍ਪਿ ਸਨ੍ਤਿਕੇ ਪਬ੍ਬਜਿਤਾਲਯਂ ਦਸ੍ਸੇਤ੍ਵਾ ਵਨ੍ਦਨਾਦਿਂ ਅਸਾਦਿਯਨ੍ਤੋਪਿ ‘‘ਸੋਭਤਿ ਨੁ ਖੋ ਮੇ ਪਬ੍ਬਜਿਤਲਿਙ੍ਗ’’ਨ੍ਤਿਆਦਿਨਾ ਸੁਦ੍ਧਚਿਤ੍ਤੇਨ ਗਣ੍ਹਨ੍ਤੋਪਿ ਥੇਯ੍ਯਸਂਵਾਸਕੋ ਨ ਹੋਤੀਤਿ ਦਟ੍ਠਬ੍ਬਂ.

ਸਬ੍ਬਪਾਸਣ੍ਡਿਯਭਤ੍ਤਾਨੀਤਿ ਸਬ੍ਬਸਾਮਯਿਕਾਨਂ ਸਾਧਾਰਣਂ ਕਤ੍ਵਾ ਪਞ੍ਞਤ੍ਤਾਨਿ ਭਤ੍ਤਾਨਿ. ਇਦਞ੍ਚ ਭਿਕ੍ਖੂਨਞ੍ਞੇਵ ਨਿਯਮਿਤਭਤ੍ਤਗ੍ਗਹਣੇ ਸਂਵਾਸੋਪਿ ਸਮ੍ਭਵੇਯ੍ਯਾਤਿ ਸਬ੍ਬਸਾਧਾਰਣਭਤ੍ਤਂ ਵੁਤ੍ਤਂ. ਸਂਵਾਸਂ ਪਨ ਅਸਾਦਿਯਿਤ੍ਵਾ ਅਭਿਕ੍ਖੁਕਵਿਹਾਰਾਦੀਸੁ ਵਿਹਾਰਭਤ੍ਤਾਦੀਨਿ ਭੁਞ੍ਜਨ੍ਤੋਪਿ ਥੇਯ੍ਯਸਂਵਾਸਕੋ ਨ ਹੋਤਿ ਏਵ. ਕਮ੍ਮਨ੍ਤਾਨੁਟ੍ਠਾਨੇਨਾਤਿ ਕਸਿਆਦਿਕਮ੍ਮਾਕਰਣੇਨ. ਪਤ੍ਤਚੀਵਰਂ ਆਦਾਯਾਤਿ ਭਿਕ੍ਖੁਲਿਙ੍ਗਵਸੇਨ ਸਰੀਰੇਨ ਧਾਰੇਤ੍ਵਾ.

ਯੋ ਏਵਂ ਪਬ੍ਬਜਤਿ, ਸੋ ਥੇਯ੍ਯਸਂਵਾਸਕੋ ਨਾਮ ਹੋਤੀਤਿ ਇਦਂ ਨਿਦਸ੍ਸਨਮਤ੍ਤਂ. ‘‘ਥੇਯ੍ਯਸਂਵਾਸਕੋ’’ਤਿ ਪਨ ਨਾਮਂ ਅਜਾਨਨ੍ਤੋਪਿ ‘‘ਏਵਂ ਕਾਤੁਂ ਨ ਵਟ੍ਟਤੀ’’ਤਿ ਵਾ ‘‘ਕਰੋਨ੍ਤੋ ਸਮਣੋ ਨਾਮ ਨ ਹੋਤੀ’’ਤਿ ਵਾ ‘‘ਯਦਿ ਆਰੋਚੇਸ੍ਸਾਮਿ, ਛਡ੍ਡਯਿਸ੍ਸਨ੍ਤਿ ਮ’’ਨ੍ਤਿ ਵਾ ‘‘ਯੇਨ ਕੇਨਚਿ ਪਬ੍ਬਜ੍ਜਾ ਮੇ ਨ ਰੁਹਤੀ’’ਤਿ ਜਾਨਾਤਿ, ਥੇਯ੍ਯਸਂਵਾਸਕੋ ਹੋਤਿ. ਯੋ ਪਨ ਪਠਮਂ ‘‘ਪਬ੍ਬਜ੍ਜਾ ਏਵਂ ਮੇ ਗਹਿਤਾ’’ਤਿ ਸਞ੍ਞੀ ਕੇਵਲਂ ਅਨ੍ਤਰਾ ਅਤ੍ਤਨੋ ਸੇਤਵਤ੍ਥਨਿਵਾਸਨਾਦਿਵਿਪ੍ਪਕਾਰਂ ਪਕਾਸੇਤੁਂ ਲਜ੍ਜਨ੍ਤੋ ਨ ਕਥੇਤਿ, ਸੋ ਥੇਯ੍ਯਸਂਵਾਸਕੋ ਨ ਹੋਤਿ. ਅਨੁਪਸਮ੍ਪਨ੍ਨਕਾਲੇਯੇਵਾਤਿ ਏਤ੍ਥ ਅਵਧਾਰਣੇਨ ਉਪਸਮ੍ਪਨ੍ਨਕਾਲੇ ਥੇਯ੍ਯਸਂਵਾਸਕਲਕ੍ਖਣਂ ਞਤ੍ਵਾ ਵਞ੍ਚਨਾਯਪਿ ਨਾਰੋਚੇਤਿ, ਥੇਯ੍ਯਸਂਵਾਸਕੋ ਨ ਹੋਤੀਤਿ ਦੀਪੇਤਿ. ਸੋ ਹਿ ਸੁਦ੍ਧਚਿਤ੍ਤੇਨ ਗਹਿਤਲਿਙ੍ਗਤ੍ਤਾ ਲਿਙ੍ਗਤ੍ਥੇਨਕੋ ਨ ਹੋਤਿ, ਲਦ੍ਧੂਪਸਮ੍ਪਦਤ੍ਤਾ ਤਦਨੁਗੁਣਸ੍ਸੇਵ ਸਂਵਾਸਸ੍ਸ ਸਾਦਿਤਤ੍ਤਾ ਸਂਵਾਸਤ੍ਥੇਨਕੋਪਿ ਨ ਹੋਤਿ. ਅਨੁਪਸਮ੍ਪਨ੍ਨੋ ਪਨ ਲਿਙ੍ਗਤ੍ਥੇਨਕੋ ਹੋਤਿ, ਸਂਵਾਸਾਰਹਸ੍ਸ ਲਿਙ੍ਗਸ੍ਸ ਗਹਿਤਤ੍ਤਾ ਸਂਵਾਸਸਾਦਿਯਨਮਤ੍ਤੇਨ ਸਂਵਾਸਤ੍ਥੇਨਕੋ ਹੋਤਿ.

ਸਲਿਙ੍ਗੇ ਠਿਤੋਤਿ ਸਲਿਙ੍ਗਭਾਵੇ ਠਿਤੋ. ਥੇਯ੍ਯਸਂਵਾਸਕੋ ਨ ਹੋਤੀਤਿ ਭਿਕ੍ਖੂਹਿ ਦਿਨ੍ਨਲਿਙ੍ਗਸ੍ਸ ਅਪਰਿਚ੍ਚਤ੍ਤਤ੍ਤਾ ਲਿਙ੍ਗਤ੍ਥੇਨਕੋ ਨ ਹੋਤਿ. ਭਿਕ੍ਖੁਪਟਿਞ੍ਞਾਯ ਅਪਰਿਚ੍ਚਤ੍ਤਤ੍ਤਾ ਸਂਵਾਸਤ੍ਥੇਨਕੋ ਨ ਹੋਤਿ. ਯਂ ਪਨ ਮਾਤਿਕਾਟ੍ਠਕਥਾਯਂ (ਕਙ੍ਖਾ. ਅਟ੍ਠ. ਪਠਮਪਾਰਾਜਿਕਵਣ੍ਣਨਾ) ‘‘ਲਿਙ੍ਗਾਨੁਰੂਪਸ੍ਸ ਸਂਵਾਸਸ੍ਸ ਸਾਦਿਤਤ੍ਤਾ ਨਾਪਿ ਸਂਵਾਸਤ੍ਥੇਨਕੋ’’ਤਿ ਕਾਰਣਂ ਵੁਤ੍ਤਂ, ਤਮ੍ਪਿ ਇਦਮੇਵ ਕਾਰਣਂ ਸਨ੍ਧਾਯ ਵੁਤ੍ਤਂ. ਇਤਰਥਾ ਸਾਮਣੇਰਸ੍ਸਾਪਿ ਭਿਕ੍ਖੁਵਸ੍ਸਗਣਨਾਦੀਸੁ ਲਿਙ੍ਗਾਨੁਰੂਪਸਂਵਾਸੋ ਏਵ ਸਾਦਿਤੋਤਿ ਸਂਵਾਸਤ੍ਥੇਨਕਤਾ ਨ ਸਿਯਾ ਭਿਕ੍ਖੂਹਿ ਦਿਨ੍ਨਲਿਙ੍ਗਸ੍ਸ ਉਭਿਨ੍ਨਮ੍ਪਿ ਸਾਧਾਰਣਤ੍ਤਾ. ਯਥਾ ਚੇਤ੍ਥ ਭਿਕ੍ਖੁ, ਏਵਂ ਸਾਮਣੇਰੋਪਿ ਪਾਰਾਜਿਕਂ ਸਮਾਪਨ੍ਨੋ ਸਾਮਣੇਰਪਟਿਞ੍ਞਾਯ ਅਪਰਿਚ੍ਚਤ੍ਤਤ੍ਤਾ ਸਂਵਾਸਤ੍ਥੇਨਕੋ ਨ ਹੋਤੀਤਿ ਵੇਦਿਤਬ੍ਬੋ. ਸੋਭਤੀਤਿ ਸਮ੍ਪਟਿਚ੍ਛਿਤ੍ਵਾਤਿ ਕਾਸਾਵਧਾਰਣੇ ਧੁਰਂ ਨਿਕ੍ਖਿਪਿਤ੍ਵਾ ਗਿਹਿਭਾਵਂ ਸਮ੍ਪਟਿਚ੍ਛਿਤ੍ਵਾ.

ਸਚੇ ਕੋਚਿ ਵੁਡ੍ਢਪਬ੍ਬਜਿਤੋਤਿ ਸਾਮਣੇਰਂ ਸਨ੍ਧਾਯ ਵੁਤ੍ਤਂ. ਮਹਾਪੇਲ਼ਾਦੀਸੂਤਿ ਵਿਲੀਵਾਦਿਮਯੇਸੁ ਘਰਦ੍ਵਾਰੇਸੁ ਠਪਿਤੇਸੁ ਭਤ੍ਤਭਾਜਨਵਿਸੇਸੇਸੁ. ਏਤੇਨ ਵਿਹਾਰੇ ਭਿਕ੍ਖੂਹਿ ਸਦ੍ਧਿਂ ਵਸ੍ਸਗਣਨਾਦੀਨਂ ਅਕਰਣਂ ਦਸ੍ਸੇਤੀਤਿ ਵੁਤ੍ਤਂ.

੧੩੯. ਤਿਤ੍ਥਿਯਪਕ੍ਕਨ੍ਤਕਕਥਾਯਂ ਤੇਸਂ ਲਿਙ੍ਗੇ ਆਦਿਨ੍ਨਮਤ੍ਤੇ ਤਿਤ੍ਥਿਯਪਕ੍ਕਨ੍ਤਕੋ ਹੋਤੀਤਿ ‘‘ਤਿਤ੍ਥਿਯੋ ਭਵਿਸ੍ਸਾਮੀ’’ਤਿ ਗਤਸ੍ਸ ਲਿਙ੍ਗਗ੍ਗਹਣੇਨੇਵ ਤੇਸਂ ਲਦ੍ਧਿਪਿ ਗਹਿਤਾਯੇਵ ਹੋਤੀਤਿ ਕਤ੍ਵਾ ਵੁਤ੍ਤਂ. ਕੇਨਚਿ ਪਨ ‘‘ਤੇਸਂ ਲਿਙ੍ਗੇ ਆਦਿਨ੍ਨਮਤ੍ਤੇ ਲਦ੍ਧਿਯਾ ਗਹਿਤਾਯਪਿ ਅਗ੍ਗਹਿਤਾਯਪਿ ਤਿਤ੍ਥਿਯਪਕ੍ਕਨ੍ਤਕੋ ਹੋਤੀ’’ਤਿ ਵੁਤ੍ਤਂ, ਤਂ ਨ ਗਹੇਤਬ੍ਬਂ. ਨ ਹਿ ‘‘ਤਿਤ੍ਥਿਯੋ ਭਵਿਸ੍ਸਾਮੀ’’ਤਿ ਗਤਸ੍ਸ ਲਿਙ੍ਗਸਮ੍ਪਟਿਚ੍ਛਨਤੋ ਅਞ੍ਞਂ ਲਦ੍ਧਿਗ੍ਗਹਣਂ ਨਾਮ ਅਤ੍ਥਿ. ਲਿਙ੍ਗਸਮ੍ਪਟਿਚ੍ਛਨੇਨੇਵ ਹਿ ਸੋ ਗਹਿਤਲਦ੍ਧਿਕੋ ਹੋਤਿ. ਤੇਨੇਵ ‘‘ਵੀਮਂਸਨਤ੍ਥਂ ਕੁਸਚੀਰਾਦੀਨਿ…ਪੇ… ਯਾਵ ਨ ਸਮ੍ਪਟਿਚ੍ਛਤਿ, ਤਾਵ ਤਂ ਲਦ੍ਧਿ ਰਕ੍ਖਤਿ, ਸਮ੍ਪਟਿਚ੍ਛਿਤਮਤ੍ਤੇ ਤਿਤ੍ਥਿਯਪਕ੍ਕਨ੍ਤਕੋ ਹੋਤੀ’’ਤਿ ਵੁਤ੍ਤਂ. ਨਗ੍ਗੋਵ ਆਜੀਵਕਾਨਂ ਉਪਸ੍ਸਯਂ ਗਚ੍ਛਤਿ, ਪਦਵਾਰੇ ਪਦਵਾਰੇ ਦੁਕ੍ਕਟਨ੍ਤਿ ‘‘ਆਜੀਵਕੋ ਭਵਿਸ੍ਸ’’ਨ੍ਤਿ ਅਸੁਦ੍ਧਚਿਤ੍ਤੇਨ ਗਮਨਪਚ੍ਚਯਾ ਦੁਕ੍ਕਟਂ ਵੁਤ੍ਤਂ. ਨਗ੍ਗੇਨ ਹੁਤ੍ਵਾ ਗਮਨਪਚ੍ਚਯਾਪਿ ਪਦਵਾਰੇ ਦੁਕ੍ਕਟਾ ਨ ਮੁਚ੍ਚਤਿਯੇਵਾਤਿ ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ਮਹਾਵਗ੍ਗ ੩.੧੧੦) ਵੁਤ੍ਤਂ.

ਵਿਮਤਿਵਿਨੋਦਨਿਯਂ (ਵਿ. ਵਿ. ਟੀ. ਮਹਾਵਗ੍ਗ ੨.੧੧੦) ਪਨ – ਤਿਤ੍ਥਿਯਪਕ੍ਕਨ੍ਤਕਾਦਿਕਥਾਸੁ ਤੇਸਂ ਲਿਙ੍ਗੇ ਆਦਿਨ੍ਨਮਤ੍ਤੇਤਿ ਵੀਮਂਸਾਦਿਅਧਿਪ੍ਪਾਯਂ ਵਿਨਾ ‘‘ਤਿਤ੍ਥਿਯੋ ਭਵਿਸ੍ਸਾਮੀ’’ਤਿ ਸਨ੍ਨਿਟ੍ਠਾਨਵਸੇਨ ਲਿਙ੍ਗੇ ਕਾਯੇਨ ਧਾਰਿਤਮਤ੍ਤੇ. ਸਯਮੇਵਾਤਿ ਤਿਤ੍ਥਿਯਾਨਂ ਸਨ੍ਤਿਕਂ ਅਗਨ੍ਤ੍ਵਾ ਸਯਮੇਵ ਸਙ੍ਘਾਰਾਮੇਪਿ ਕੁਸਚੀਰਾਦੀਨਿ ਨਿਵਾਸੇਤਿ. ਆਜੀਵਕੋ ਭਵਿਸ੍ਸਨ੍ਤਿ…ਪੇ… ਗਚ੍ਛਤੀਤਿ ਆਜੀਵਕਾਨਂ ਸਨ੍ਤਿਕੇ ਤੇਸਂ ਪਬ੍ਬਜਨਵਿਧਿਨਾ ‘‘ਆਜੀਵਕੋ ਭਵਿਸ੍ਸਾਮੀ’’ਤਿ ਗਚ੍ਛਤਿ. ਤਸ੍ਸ ਹਿ ਤਿਤ੍ਥਿਯਭਾਵੂਪਗਮਨਂ ਪਤਿ ਸਨ੍ਨਿਟ੍ਠਾਨੇ ਵਿਜ੍ਜਮਾਨੇਪਿ ‘‘ਗਨ੍ਤ੍ਵਾ ਭਵਿਸ੍ਸਾਮੀ’’ਤਿ ਪਰਿਕਪ੍ਪਿਤਤ੍ਤਾ ਪਦਵਾਰੇ ਦੁਕ੍ਕਟਮੇਵ ਵੁਤ੍ਤਂ. ਦੁਕ੍ਕਟਨ੍ਤਿ ਪਾਲ਼ਿਯਾ ਅਵੁਤ੍ਤੇਪਿ ਮੇਥੁਨਾਦੀਸੁ ਵੁਤ੍ਤਪੁਬ੍ਬਪਯੋਗਦੁਕ੍ਕਟਾਨੁਲੋਮਤੋ ਵੁਤ੍ਤਂ. ਏਤੇਨ ਚ ਸਨ੍ਨਿਟ੍ਠਾਨਵਸੇਨ ਲਿਙ੍ਗੇ ਸਮ੍ਪਟਿਚ੍ਛਿਤੇ ਪਾਰਾਜਿਕਂ, ਤਤੋ ਪੁਰਿਮਪਯੋਗੇ ਥੁਲ੍ਲਚ੍ਚਯਞ੍ਚ ਵਤ੍ਤਬ੍ਬਮੇਵ. ਥੁਲ੍ਲਚ੍ਚਯਕ੍ਖਣੇ ਨਿਵਤ੍ਤਨ੍ਤੋਪਿ ਆਪਤ੍ਤਿਂ ਦੇਸਾਪੇਤ੍ਵਾ ਮੁਚ੍ਚਤਿ ਏਵਾਤਿ ਦਟ੍ਠਬ੍ਬਂ. ਯਥਾ ਚੇਤ੍ਥ, ਏਵਂ ਸਙ੍ਘਭੇਦੇਪਿ ਲੋਹਿਤੁਪ੍ਪਾਦੇਪਿ ਭਿਕ੍ਖੂਨਂ ਪੁਬ੍ਬਪਯੋਗਾਦੀਸੁ ਦੁਕ੍ਕਟਥੁਲ੍ਲਚ੍ਚਯਪਾਰਾਜਿਕਾਹਿ ਮੁਚ੍ਚਨਸੀਮਾ ਚ ਵੇਦਿਤਬ੍ਬਾ. ਸਾਸਨਵਿਰੁਦ੍ਧਤਾਯੇਤ੍ਥ ਆਦਿਕਮ੍ਮਿਕਾਨਮ੍ਪਿ ਅਨਾਪਤ੍ਤਿ ਨ ਵੁਤ੍ਤਾ. ਪਬ੍ਬਜ੍ਜਾਯਪਿ ਅਭਬ੍ਬਤਾਦਸ੍ਸਨਤ੍ਥਂ ਪਨੇਤੇ ਅਞ੍ਞੇ ਚ ਪਾਰਾਜਿਕਕਣ੍ਡੇ ਵਿਸੁਂ ਸਿਕ੍ਖਾਪਦੇਨ ਪਾਰਾਜਿਕਾਦਿਂ ਅਦਸ੍ਸੇਤ੍ਵਾ ਇਧ ਅਭਬ੍ਬੇਸੁ ਏਵ ਵੁਤ੍ਤਾਤਿ ਵੇਦਿਤਬ੍ਬਂ.

ਤਂ ਲਦ੍ਧੀਤਿ ਤਿਤ੍ਥਿਯਵੇਸੇ ਸੇਟ੍ਠਭਾਵਗ੍ਗਹਣਮੇਵ ਸਨ੍ਧਾਯ ਵੁਤ੍ਤਂ. ਤੇਸਞ੍ਹਿ ਤਿਤ੍ਥਿਯਾਨਂ ਸਸ੍ਸਤਾਦਿਗ੍ਗਾਹਂ ਗਣ੍ਹਨ੍ਤੋਪਿ ਲਿਙ੍ਗੇ ਅਸਮ੍ਪਟਿਚ੍ਛਿਤੇ ਤਿਤ੍ਥਿਯਪਕ੍ਕਨ੍ਤਕੋ ਨ ਹੋਤਿ, ਤਂ ਲਦ੍ਧਿਂ ਅਗ੍ਗਹੇਤ੍ਵਾਪਿ ‘‘ਏਤੇਸਂ ਵਤਚਰਿਯਾ ਸੁਨ੍ਦਰਾ’’ਤਿ ਲਿਙ੍ਗਂ ਸਮ੍ਪਟਿਚ੍ਛਨ੍ਤੋ ਤਿਤ੍ਥਿਯਪਕ੍ਕਨ੍ਤਕੋ ਹੋਤਿ ਏਵ. ਲਦ੍ਧਿਯਾ ਅਭਾਵੇਨਾਤਿ ਭਿਕ੍ਖੁਭਾਵੇ ਸਾਲਯਤਾਯ ਤਿਤ੍ਥਿਯਭਾਵੂਪਗਮਨਲਦ੍ਧਿਯਾ ਅਭਾਵੇਨ. ਏਤੇਨ ਚ ਆਪਦਾਸੁ ਕੁਸਚੀਰਾਦਿਂ ਪਾਰੁਪਨ੍ਤਸ੍ਸਪਿ ਨਗ੍ਗਸ੍ਸ ਵਿਯ ਅਨਾਪਤ੍ਤੀਤਿ ਦਸ੍ਸੇਤਿ. ਉਪਸਮ੍ਪਨ੍ਨਭਿਕ੍ਖੁਨਾ ਕਥਿਤੋਤਿ ਏਤ੍ਥ ਸਙ੍ਘਭੇਦਕੋਪਿ ਉਪਸਮ੍ਪਨ੍ਨਭਿਕ੍ਖੁਨਾਵ ਕਥਿਤੋ, ਮਾਤੁਘਾਤਕਾਦਯੋ ਪਨ ਅਨੁਪਸਮ੍ਪਨ੍ਨੇਨਾਤਿਪਿ ਦਟ੍ਠਬ੍ਬਨ੍ਤਿ ਆਗਤਂ.

੧੪੦. ਤਿਰਚ੍ਛਾਨਕਥਾਯਂ ‘‘ਯੋ ਕੋਚਿ ਅਮਨੁਸ੍ਸਜਾਤਿਯੋ, ਸਬ੍ਬੋਵ ਇਮਸ੍ਮਿਂ ਅਤ੍ਥੇ ਤਿਰਚ੍ਛਾਨਗਤੋਤਿ ਵੇਦਿਤਬ੍ਬੋ’’ਤਿ ਏਤੇਨ ਏਸੋ ਮਨੁਸ੍ਸਜਾਤਿਯੋ ਏਵ ਭਗਵਤੋ ਸਾਸਨੇ ਪਬ੍ਬਜਿਤੁਂ ਵਾ ਉਪਸਮ੍ਪਜ੍ਜਿਤੁਂ ਵਾ ਲਭਤਿ, ਨ ਤਤੋ ਅਞ੍ਞੇਤਿ ਦੀਪੇਤਿ. ਤੇਨਾਹ ਭਗਵਾ ‘‘ਤੁਮ੍ਹੇ ਖੋਤ੍ਥ ਨਾਗਾ ਅਵਿਰੁਲ਼੍ਹਿਧਮ੍ਮਾ ਇਮਸ੍ਮਿਂ ਧਮ੍ਮਵਿਨਯੇ’’ਤਿ (ਮਹਾਵ. ੧੧੧).

੧੪੧. ਆਨਨ੍ਤਰਿਯਕਥਾਯਂ ਤਿਰਚ੍ਛਾਨਾਦਿਅਮਨੁਸ੍ਸਜਾਤਿਤੋ ਮਨੁਸ੍ਸਜਾਤਿਕਾਨਞ੍ਞੇਵ ਪੁਤ੍ਤੇਸੁ ਮੇਤ੍ਤਾਦਯੋਪਿ ਤਿਕ੍ਖਵਿਸਦਾ ਹੋਨ੍ਤਿ ਲੋਕੁਤ੍ਤਰਗੁਣਾ ਵਿਯਾਤਿ ਆਹ ‘‘ਮਨੁਸ੍ਸਿਤ੍ਥਿਭੂਤਾ ਜਨਿਕਾ ਮਾਤਾ’’ਤਿ. ਯਥਾ ਮਨੁਸ੍ਸਾਨਞ੍ਞੇਵ ਕੁਸਲਪਵਤ੍ਤਿ ਤਿਕ੍ਖਵਿਸਦਾ, ਏਵਂ ਅਕੁਸਲਪਵਤ੍ਤਿਪੀਤਿ ਆਹ ‘‘ਸਯਮ੍ਪਿ ਮਨੁਸ੍ਸਜਾਤਿਕੇਨੇਵਾ’’ਤਿਆਦਿ. ਅਥ ਵਾ ਯਥਾ ਸਮਾਨਜਾਤਿਯਸ੍ਸ ਵਿਕੋਪਨੇ ਕਮ੍ਮਂ ਗਰੁਤਰਂ, ਨ ਤਥਾ ਵਿਜਾਤਿਯਸ੍ਸਾਤਿ ਆਹ ‘‘ਮਨੁਸ੍ਸਿਤ੍ਥਿਭੂਤਾ’’ਤਿ. ਪੁਤ੍ਤਸਮ੍ਬਨ੍ਧੇਨ ਮਾਤੁਪਿਤੁਸਮਞ੍ਞਾ, ਦਤ੍ਤਕਿਤ੍ਤਿਮਾਦਿਵਸੇਨਪਿ ਪੁਤ੍ਤਵੋਹਾਰੋ ਲੋਕੇ ਦਿਸ੍ਸਤਿ, ਸੋ ਚ ਖੋ ਪਰਿਯਾਯਤੋਤਿ ਨਿਪ੍ਪਰਿਯਾਯਸਿਦ੍ਧਤਂ ਦਸ੍ਸੇਤੁਂ ‘‘ਜਨਿਕਾ ਮਾਤਾ’’ਤਿ ਵੁਤ੍ਤਂ. ਯਥਾ ਮਨੁਸ੍ਸਤ੍ਤਭਾਵੇ ਠਿਤਸ੍ਸੇਵ ਕੁਸਲਧਮ੍ਮਾਨਂ ਤਿਕ੍ਖਵਿਸਦਸੂਰਭਾਵਾਪਤ੍ਤਿ ਯਥਾ ਤਂ ਤਿਣ੍ਣਮ੍ਪਿ ਬੋਧਿਸਤ੍ਤਾਨਂ ਬੋਧਿਤ੍ਤਯਨਿਬ੍ਬਤ੍ਤਿਯਂ, ਏਵਂ ਮਨੁਸ੍ਸਤ੍ਤਭਾਵੇ ਠਿਤਸ੍ਸੇਵ ਅਕੁਸਲਧਮ੍ਮਾਨਮ੍ਪਿ ਤਿਕ੍ਖਵਿਸਦਸੂਰਭਾਵਾਪਤ੍ਤੀਤਿ ਆਹ ‘‘ਸਯਮ੍ਪਿ ਮਨੁਸ੍ਸਜਾਤਿਕੇਨੇਵਾ’’ਤਿ. ਆਨਨ੍ਤਰਿਯੇਨਾਤਿ ਏਤ੍ਥ ਚੁਤਿਅਨਨ੍ਤਰਂ ਨਿਰਯੇ ਪਟਿਸਨ੍ਧਿਫਲਂ ਅਨਨ੍ਤਰਂ ਨਾਮ, ਤਸ੍ਮਿਂ ਅਨਨ੍ਤਰੇ ਜਨਕਤ੍ਤੇਨ ਨਿਯੁਤ੍ਤਂ ਆਨਨ੍ਤਰਿਯਂ, ਤੇਨ. ਅਥ ਵਾ ਚੁਤਿਅਨਨ੍ਤਰਂ ਫਲਂ ਅਨਨ੍ਤਰਂ ਨਾਮ, ਤਸ੍ਮਿਂ ਅਨਨ੍ਤਰੇ ਨਿਯੁਤ੍ਤਂ, ਤਨ੍ਨਿਬ੍ਬਤ੍ਤਨੇਨ ਅਨਨ੍ਤਰਕਰਣਸੀਲਂ, ਅਨਨ੍ਤਰਪ੍ਪਯੋਜਨਂ ਵਾ ਆਨਨ੍ਤਰਿਯਂ, ਤੇਨ ਆਨਨ੍ਤਰਿਯੇਨ ਮਾਤੁਘਾਤਕਕਮ੍ਮੇਨ. ਪਿਤੁਘਾਤਕੇਪਿ ‘‘ਯੇਨ ਮਨੁਸ੍ਸਭੂਤੋ ਜਨਕੋ ਪਿਤਾ ਸਯਮ੍ਪਿ ਮਨੁਸ੍ਸਜਾਤਿਕੇਨੇਵ ਸਤਾ ਸਞ੍ਚਿਚ੍ਚ ਜੀਵਿਤਾ ਵੋਰੋਪਿਤੋ, ਅਯਂ ਆਨਨ੍ਤਰਿਯੇਨ ਪਿਤੁਘਾਤਕਕਮ੍ਮੇਨ ਪਿਤੁਘਾਤਕੋ’’ਤਿਆਦਿਨਾ ਸਬ੍ਬਂ ਵੇਦਿਤਬ੍ਬਨ੍ਤਿ ਆਹ ‘‘ਪਿਤੁਘਾਤਕੇਪਿ ਏਸੇਵ ਨਯੋ’’ਤਿ.

ਪਰਿਵਤ੍ਤਿਤਲਿਙ੍ਗਮ੍ਪਿ ਮਾਤਰਂ ਵਾ ਪਿਤਰਂ ਵਾ ਜੀਵਿਤਾ ਵੋਰੋਪੇਨ੍ਤਸ੍ਸ ਆਨਨ੍ਤਰਿਯਕਮ੍ਮਂ ਹੋਤਿਯੇਵ. ਸਤਿਪਿ ਹਿ ਲਿਙ੍ਗਪਰਿਵਤ੍ਤੇ ਸੋ ਏਵ ਏਕਕਮ੍ਮਨਿਬ੍ਬਤ੍ਤੋ ਭਵਙ੍ਗਪ੍ਪਬਨ੍ਧੋ ਜੀਵਿਤਪ੍ਪਬਨ੍ਧੋ, ਨ ਅਞ੍ਞੋਤਿ. ਯੋ ਪਨ ਸਯਂ ਮਨੁਸ੍ਸੋ ਤਿਰਚ੍ਛਾਨਭੂਤਂ ਪਿਤਰਂ ਵਾ ਮਾਤਰਂ ਵਾ, ਸਯਂ ਵਾ ਤਿਰਚ੍ਛਾਨਭੂਤੋ ਮਨੁਸ੍ਸਭੂਤਂ, ਤਿਰਚ੍ਛਾਨੋਯੇਵ ਵਾ ਤਿਰਚ੍ਛਾਨਭੂਤਂ ਜੀਵਿਤਾ ਵੋਰੋਪੇਤਿ, ਤਸ੍ਸ ਕਮ੍ਮਂ ਆਨਨ੍ਤਰਿਯਂ ਨ ਹੋਤਿ, ਭਾਰਿਯਂ ਪਨ ਹੋਤਿ, ਆਨਨ੍ਤਰਿਯਂ ਆਹਚ੍ਚੇਵ ਤਿਟ੍ਠਤਿ. ਏਲ਼ਕਚਤੁਕ੍ਕਂ ਸਙ੍ਗਾਮਚਤੁਕ੍ਕਂ ਚੋਰਚਤੁਕ੍ਕਞ੍ਚੇਤ੍ਥ ਕਥੇਤਬ੍ਬਂ. ‘‘ਏਲ਼ਕਂ ਮਾਰੇਮੀ’’ਤਿ ਅਭਿਸਨ੍ਧਿਨਾਪਿ ਹਿ ਏਲ਼ਕਟ੍ਠਾਨੇ ਠਿਤਂ ਮਨੁਸ੍ਸੋ ਮਨੁਸ੍ਸਭੂਤਂ ਮਾਤਰਂ ਵਾ ਪਿਤਰਂ ਵਾ ਮਾਰੇਨ੍ਤੋ ਆਨਨ੍ਤਰਿਯਂ ਫੁਸਤਿ ਮਰਣਾਧਿਪ੍ਪਾਯੇਨੇਵ ਆਨਨ੍ਤਰਿਯਵਤ੍ਥੁਨੋ ਵਿਕੋਪਿਤਤ੍ਤਾ. ਏਲ਼ਕਾਭਿਸਨ੍ਧਿਨਾ, ਪਨ ਮਾਤਾਪਿਤਿਅਭਿਸਨ੍ਧਿਨਾ ਵਾ ਏਲ਼ਕਂ ਮਾਰੇਨ੍ਤੋ ਆਨਨ੍ਤਰਿਯਂ ਨ ਫੁਸਤਿ ਆਨਨ੍ਤਰਿਯਵਤ੍ਥੁਨੋ ਅਭਾਵਤੋ. ਮਾਤਾਪਿਤਿਅਭਿਸਨ੍ਧਿਨਾ ਮਾਤਾਪਿਤਰੋ ਮਾਰੇਨ੍ਤੋ ਫੁਸ੍ਸਤੇਵ. ਏਸ ਨਯੋ ਇਤਰਸ੍ਮਿਮ੍ਪਿ ਚਤੁਕ੍ਕਦ੍ਵਯੇ. ਯਥਾ ਚ ਮਾਤਾਪਿਤੂਸੁ, ਏਵਂ ਅਰਹਨ੍ਤੇਸੁ ਏਤਾਨਿ ਚਤੁਕ੍ਕਾਨਿ ਵੇਦਿਤਬ੍ਬਾਨਿ. ਸਬ੍ਬਤ੍ਥ ਹਿ ਪੁਰਿਮਂ ਅਭਿਸਨ੍ਧਿਚਿਤ੍ਤਂ ਅਪ੍ਪਮਾਣਂ, ਵਧਕਚਿਤ੍ਤਂ, ਪਨ ਤਦਾਰਮ੍ਮਣਜੀਵਿਤਿਨ੍ਦ੍ਰਿਯਞ੍ਚ ਪਮਾਣਂ. ਕਤਾਨਨ੍ਤਰਿਯਕਮ੍ਮੋ ਚ ‘‘ਤਸ੍ਸ ਕਮ੍ਮਸ੍ਸ ਵਿਪਾਕਂ ਪਟਿਬਾਹੇਸ੍ਸਾਮੀ’’ਤਿ ਸਕਲਚਕ੍ਕਵਾਲ਼ਂ ਮਹਾਚੇਤਿਯਪ੍ਪਮਾਣੇਹਿ ਕਞ੍ਚਨਥੂਪੇਹਿ ਪੂਰੇਤ੍ਵਾਪਿ ਸਕਲਚਕ੍ਕਵਾਲ਼ਂ ਪੂਰੇਤ੍ਵਾ ਨਿਸਿਨ੍ਨਸ੍ਸ ਭਿਕ੍ਖੁਸਙ੍ਘਸ੍ਸ ਮਹਾਦਾਨਂ ਦਤ੍ਵਾਪਿ ਬੁਦ੍ਧਸ੍ਸ ਭਗਵਤੋ ਸਙ੍ਘਾਟਿਕਣ੍ਣਂ ਅਮੁਞ੍ਚਨ੍ਤੋ ਵਿਚਰਿਤ੍ਵਾਪਿ ਕਾਯਸ੍ਸ ਭੇਦਾ ਨਿਰਯਮੇਵ ਉਪਪਜ੍ਜਤਿ, ਪਬ੍ਬਜ੍ਜਞ੍ਚ ਨ ਲਭਤਿ. ਪਿਤੁਘਾਤਕੇ ਵੇਸਿਯਾ ਪੁਤ੍ਤੋਤਿ ਉਪਲਕ੍ਖਣਮਤ੍ਤਂ, ਕੁਲਿਤ੍ਥਿਯਾ ਅਤਿਚਾਰਿਨਿਯਾ ਪੁਤ੍ਤੋਪਿ ਅਤ੍ਤਨੋ ਪਿਤਰਂ ਅਜਾਨਿਤ੍ਵਾ ਘਾਨ੍ਤੇਨ੍ਤੋਪਿ ਪਿਤੁਘਾਤਕੋਵ ਹੋਤਿ.

ਅਰਹਨ੍ਤਘਾਤਕਕਮ੍ਮੇ ਅਵਸੇਸਨ੍ਤਿ ਅਨਾਗਾਮਿਆਦਿਕਂ. ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰੋ ਪਨ ਤਤਿਯਪਾਰਾਜਿਕਵਣ੍ਣਨਾਤੋ ਗਹੇਤਬ੍ਬੋ.

‘‘ਦੁਟ੍ਠਚਿਤ੍ਤੇਨਾ’’ਤਿ ਵੁਤ੍ਤਮੇਵਤ੍ਥਂ ਵਿਭਾਵੇਤਿ ‘‘ਵਧਕਚਿਤ੍ਤੇਨਾ’’ਤਿ. ਵਧਕਚੇਤਨਾਯ ਹਿ ਦੂਸਿਤਂ ਚਿਤ੍ਤਂ ਇਧ ਦੁਟ੍ਠਚਿਤ੍ਤਂ ਨਾਮ. ਲੋਹਿਤਂ ਉਪ੍ਪਾਦੇਤੀਤਿ ਏਤ੍ਥ ਤਥਾਗਤਸ੍ਸ ਅਭੇਜ੍ਜਕਾਯਤਾਯ ਪਰੂਪਕ੍ਕਮੇਨ ਚਮ੍ਮਚ੍ਛੇਦਂ ਕਤ੍ਵਾ ਲੋਹਿਤਪਗ੍ਘਰਣਂ ਨਾਮ ਨਤ੍ਥਿ, ਸਰੀਰਸ੍ਸ ਪਨ ਅਨ੍ਤੋਯੇਵ ਏਕਸ੍ਮਿਂ ਠਾਨੇ ਲੋਹਿਤਂ ਸਮੋਸਰਤਿ, ਆਘਾਤੇਨ ਪਕੁਪ੍ਪਮਾਨਂ ਸਞ੍ਚਿਤਂ ਹੋਤਿ. ਦੇਵਦਤ੍ਤੇਨ ਪਵਿਦ੍ਧਸਿਲਤੋ ਭਿਜ੍ਜਿਤ੍ਵਾ ਗਤਾ ਸਕ੍ਖਲਿਕਾਪਿ ਤਥਾਗਤਸ੍ਸ ਪਾਦਨ੍ਤਂ ਪਹਰਿ, ਫਰਸੁਨਾ ਪਹਟੋ ਵਿਯ ਪਾਦੋ ਅਨ੍ਤੋਲੋਹਿਤੋਯੇਵ ਅਹੋਸਿ. ਜੀਵਕੋ ਪਨ ਤਥਾਗਤਸ੍ਸ ਰੁਚਿਯਾ ਸਤ੍ਥਕੇਨ ਚਮ੍ਮਂ ਛਿਨ੍ਦਿਤ੍ਵਾ ਤਮ੍ਹਾ ਠਾਨਾ ਦੁਟ੍ਠਲੋਹਿਤਂ ਨੀਹਰਿਤ੍ਵਾ ਫਾਸੁਮਕਾਸਿ, ਤੇਨਸ੍ਸ ਪੁਞ੍ਞਕਮ੍ਮਮੇਵ ਅਹੋਸਿ. ਤੇਨਾਹ ‘‘ਜੀਵਕੋ ਵਿਯਾ’’ਤਿਆਦਿ.

ਅਥ ਯੇ ਪਰਿਨਿਬ੍ਬੁਤੇ ਤਥਾਗਤੇ ਚੇਤਿਯਂ ਭਿਨ੍ਦਨ੍ਤਿ, ਬੋਧਿਂ ਛਿਨ੍ਦਨ੍ਤਿ, ਧਾਤੁਮ੍ਹਿ ਉਪਕ੍ਕਮਨ੍ਤਿ, ਤੇਸਂ ਕਿਂ ਹੋਤੀਤਿ? ਭਾਰਿਯਂ ਕਮ੍ਮਂ ਹੋਤਿ ਆਨਨ੍ਤਰਿਯਸਦਿਸਂ. ਸਧਾਤੁਕਂ ਪਨ ਥੂਪਂ ਵਾ ਪਟਿਮਂ ਵਾ ਬਾਧਮਾਨਂ ਬੋਧਿਸਾਖਂ ਛਿਨ੍ਦਿਤੁਂ ਵਟ੍ਟਤਿ. ਸਚੇਪਿ ਤਤ੍ਥ ਨਿਲੀਨਾ ਸਕੁਣਾ ਚੇਤਿਯੇ ਵਚ੍ਚਂ ਪਾਤੇਨ੍ਤਿ, ਛਿਨ੍ਦਿਤੁਂ ਵਟ੍ਟਤਿਯੇਵ. ਪਰਿਭੋਗਚੇਤਿਯਤੋ ਹਿ ਸਰੀਰਚੇਤਿਯਂ ਗਰੁਤਰਂ. ਚੇਤਿਯਵਤ੍ਥੁਂ ਭਿਨ੍ਦਿਤ੍ਵਾ ਗਚ੍ਛਨ੍ਤੇ ਬੋਧਿਮੂਲੇਪਿ ਛਿਨ੍ਦਿਤ੍ਵਾ ਹਰਿਤੁਂ ਵਟ੍ਟਤਿ. ਯਾ ਪਨ ਬੋਧਿਸਾਖਾ ਬੋਧਿਘਰਂ ਬਾਧਤਿ, ਤਂ ਗੇਹਰਕ੍ਖਣਤ੍ਥਂ ਛਿਨ੍ਦਿਤੁਂ ਨ ਲਭਤਿ. ਬੋਧਿਅਤ੍ਥਾਯ ਹਿ ਗੇਹਂ, ਨ ਗੇਹਤ੍ਥਾਯ ਬੋਧਿ. ਆਸਨਘਰੇਪਿ ਏਸੇਵ ਨਯੋ. ਯਸ੍ਮਿਂ ਪਨ ਆਸਨਘਰੇ ਧਾਤੁ ਨਿਹਿਤਾ ਹੋਤਿ, ਤਸ੍ਸ ਰਕ੍ਖਣਤ੍ਥਾਯ ਤਂ ਸਾਖਂ ਛਿਨ੍ਦਿਤੁਂ ਵਟ੍ਟਤਿ. ਬੋਧਿਜਗ੍ਗਨਤ੍ਥਂ ਓਜੋਹਰਣਸਾਖਂ ਵਾ ਪੂਤਿਟ੍ਠਾਨਂ ਵਾ ਛਿਨ੍ਦਿਤੁਂ ਵਟ੍ਟਤਿਯੇਵ, ਸਤ੍ਥੁ ਰੂਪਕਾਯਪਟਿਜਗ੍ਗਨੇ ਵਿਯ ਪੁਞ੍ਞਮ੍ਪਿ ਹੋਤਿ.

ਸਙ੍ਘਭੇਦੇ ਚਤੁਨ੍ਨਂ ਕਮ੍ਮਾਨਨ੍ਤਿ ਅਪਲੋਕਨਾਦੀਨਂ ਚਤੁਨ੍ਨਂ ਕਮ੍ਮਾਨਂ. ਅਯਂ ਸਙ੍ਘਭੇਦਕੋਤਿ ਪਕਤਤ੍ਤਂ ਭਿਕ੍ਖੁਂ ਸਨ੍ਧਾਯ ਵੁਤ੍ਤਂ. ਪੁਬ੍ਬੇ ਏਵ ਪਾਰਾਜਿਕਂ ਸਮਾਪਨ੍ਨੋ ਵਾ ਵਤ੍ਥਾਦਿਦੋਸੇਨ ਵਿਪਨ੍ਨੁਪਸਮ੍ਪਦੋ ਵਾ ਸਙ੍ਘਂ ਭਿਨ੍ਦਨ੍ਤੋਪਿ ਆਨਨ੍ਤਰਿਯਂ ਨ ਫੁਸਤਿ, ਸਙ੍ਘੋ ਪਨ ਭਿਨ੍ਨੋਵ ਹੋਤਿ, ਪਬ੍ਬਜ੍ਜਾ ਚਸ੍ਸ ਨ ਵਾਰਿਤਾਤਿ ਦਟ੍ਠਬ੍ਬਂ.

ਭਿਕ੍ਖੁਨੀਦੂਸਨੇ ਇਚ੍ਛਮਾਨਨ੍ਤਿ ਓਦਾਤਵਤ੍ਥਵਸਨਂ ਇਚ੍ਛਮਾਨਂ. ਤੇਨੇਵਾਹ ‘‘ਗਿਹਿਭਾਵੇ ਸਮ੍ਪਟਿਚ੍ਛਿਤਮਤ੍ਤੇਯੇਵਾ’’ਤਿ. ਨੇਵ ਪਬ੍ਬਜ੍ਜਾ ਅਤ੍ਥੀਤਿ ਯੋਜਨਾ. ਯੋ ਚ ਪਟਿਕ੍ਖਿਤ੍ਤੇ ਅਭਬ੍ਬੇ ਚ ਪੁਗ੍ਗਲੇ ਞਤ੍ਵਾ ਪਬ੍ਬਾਜੇਤਿ, ਉਪਸਮ੍ਪਾਦੇਤਿ ਵਾ, ਦੁਕ੍ਕਟਂ. ਅਜਾਨਨ੍ਤਸ੍ਸ ਸਬ੍ਬਤ੍ਥ ਅਨਾਪਤ੍ਤੀਤਿ ਵੇਦਿਤਬ੍ਬਂ.

੧੪੨. ਗਬ੍ਭਮਾਸੇਹਿ ਸਦ੍ਧਿਂ ਵੀਸਤਿ ਵਸ੍ਸਾਨਿ ਅਸ੍ਸਾਤਿ ਗਬ੍ਭਵੀਸੋ. ਹਾਯਨਵਡ੍ਢਨਨ੍ਤਿ ਗਬ੍ਭਮਾਸੇਸੁ ਅਧਿਕੇਸੁ ਉਤ੍ਤਰਿ ਹਾਯਨਂ, ਊਨੇਸੁ ਵਡ੍ਢਨਨ੍ਤਿ ਵੇਦਿਤਬ੍ਬਂ. ਏਕੂਨਵੀਸਤਿਵਸ੍ਸਨ੍ਤਿ ਦ੍ਵਾਦਸ ਮਾਸੇ ਮਾਤੁਕੁਚ੍ਛਿਸ੍ਮਿਂ ਵਸਿਤ੍ਵਾ ਮਹਾਪਵਾਰਣਾਯ ਜਾਤਕਾਲਤੋ ਪਟ੍ਠਾਯ ਏਕੂਨਵੀਸਤਿਵਸ੍ਸਂ. ਪਾਟਿਪਦਦਿਵਸੇਤਿ ਪਚ੍ਛਿਮਿਕਾਯ ਵਸ੍ਸੂਪਗਮਨਦਿਵਸੇ. ‘‘ਤਿਂਸਰਤ੍ਤਿਦਿਵੋ ਮਾਸੋ’’ਤਿ (ਅ. ਨਿ. ੩.੭੧; ੮.੪੩; ਵਿਭ. ੧੦੨੩) ਵਚਨਤੋ ‘‘ਚਤ੍ਤਾਰੋ ਮਾਸਾ ਪਰਿਹਾਯਨ੍ਤੀ’’ਤਿ ਵੁਤ੍ਤਂ. ਵਸ੍ਸਂ ਉਕ੍ਕਡ੍ਢਨ੍ਤੀਤਿ ਵਸ੍ਸਂ ਉਦ੍ਧਂ ਕਡ੍ਢਨ੍ਤਿ, ਤਤਿਯਸਂਵਚ੍ਛਰੇ ਏਕਮਾਸਸ੍ਸ ਅਧਿਕਤ੍ਤਾ ਮਾਸਪਰਿਚ੍ਚਜਨਵਸੇਨ ਵਸ੍ਸਂ ਉਦ੍ਧਂ ਕਡ੍ਢਨ੍ਤੀਤਿ ਅਤ੍ਥੋ, ਤਸ੍ਮਾ ਤਤਿਯੋ ਸਂਵਚ੍ਛਰੋ ਤੇਰਸਮਾਸਿਕੋ ਹੋਤਿ. ਸਂਵਚ੍ਛਰਸ੍ਸ ਪਨ ਦ੍ਵਾਦਸਮਾਸਿਕਤ੍ਤਾ ਅਟ੍ਠਾਰਸਸੁ ਵਸ੍ਸੇਸੁ ਅਧਿਕਮਾਸੇ ਵਿਸੁਂ ਗਹੇਤ੍ਵਾ ‘‘ਛ ਮਾਸਾ ਵਡ੍ਢਨ੍ਤੀ’’ਤਿ ਵੁਤ੍ਤਂ. ਤਤੋਤਿ ਛਮਾਸਤੋ. ਨਿਕ੍ਕਙ੍ਖਾ ਹੁਤ੍ਵਾਤਿ ਅਧਿਕਮਾਸੇਹਿ ਸਦ੍ਧਿਂ ਪਰਿਪੁਣ੍ਣਵੀਸਤਿਵਸ੍ਸਤ੍ਤਾ ਨਿਬ੍ਬੇਮਤਿਕਾ ਹੁਤ੍ਵਾ. ਯਂ ਪਨ ਵੁਤ੍ਤਂ ਤੀਸੁਪਿ ਗਣ੍ਠਿਪਦੇਸੁ ‘‘ਅਟ੍ਠਾਰਸਨ੍ਨਂਯੇਵ ਵਸ੍ਸਾਨਂ ਅਧਿਕਮਾਸੇ ਗਹੇਤ੍ਵਾ ਗਣਿਤਤ੍ਤਾ ਸੇਸਵਸ੍ਸਦ੍ਵਯਸ੍ਸਪਿ ਅਧਿਕਦਿਵਸਾਨਿ ਹੋਨ੍ਤਿ, ਤਾਨਿ ਅਧਿਕਦਿਵਸਾਨਿ ਸਨ੍ਧਾਯ ‘ਨਿਕ੍ਕਙ੍ਖਾ ਹੁਤ੍ਵਾ’ਤਿ ਵੁਤ੍ਤ’’ਨ੍ਤਿ, ਤਂ ਨ ਗਹੇਤਬ੍ਬਂ. ਨ ਹਿ ਦ੍ਵੀਸੁ ਵਸ੍ਸੇਸੁ ਅਧਿਕਦਿਵਸਾਨਿ ਨਾਮ ਵਿਸੁਂ ਉਪਲਬ੍ਭਨ੍ਤਿ ਤਤਿਯੇ ਵਸ੍ਸੇ ਵਸ੍ਸੁਕ੍ਕਡ੍ਢਨਵਸੇਨ ਅਧਿਕਮਾਸੇ ਪਰਿਚ੍ਚਤ੍ਤੇਯੇਵ ਅਤਿਰੇਕਮਾਸਸਮ੍ਭਵਤੋ, ਤਸ੍ਮਾ ਦ੍ਵੀਸੁ ਵਸ੍ਸੇਸੁ ਅਤਿਰੇਕਦਿਵਸਾਨਿ ਵਿਸੁਂ ਨ ਸਮ੍ਭਵਨ੍ਤਿ.

‘‘ਤੇ ਦ੍ਵੇ ਮਾਸੇ ਗਹੇਤ੍ਵਾ ਵੀਸਤਿ ਵਸ੍ਸਾਨਿ ਪਰਿਪੁਣ੍ਣਾਨਿ ਹੋਨ੍ਤੀ’’ਤਿ ਕਸ੍ਮਾ ਵੁਤ੍ਤਂ, ਏਕੂਨਵੀਸਤਿਵਸ੍ਸਮ੍ਹਿ ਚ ਪੁਨ ਅਪਰਸ੍ਮਿਂ ਵਸ੍ਸੇ ਪਕ੍ਖਿਤ੍ਤੇ ਵੀਸਤਿ ਵਸ੍ਸਾਨਿ ਪਰਿਪੁਣ੍ਣਾਨਿ ਹੋਨ੍ਤੀਤਿ ਆਹ ‘‘ਏਤ੍ਥ ਪਨ…ਪੇ… ਵੁਤ੍ਤ’’ਨ੍ਤਿ. ਅਨੇਕਤ੍ਥਤ੍ਤਾ ਨਿਪਾਤਾਨਂ ਪਨ-ਸਦ੍ਦੋ ਹਿਸਦ੍ਦਤ੍ਥੋ, ਏਤ੍ਥ ਹੀਤਿ ਵੁਤ੍ਤਂ ਹੋਤਿ. ਇਦਞ੍ਹਿ ਵੁਤ੍ਤਸ੍ਸੇਵਤ੍ਥਸ੍ਸ ਸਮਤ੍ਥਨਵਸੇਨ ਵੁਤ੍ਤਂ. ਇਮਿਨਾ ਚ ਇਮਂ ਦੀਪੇਤਿ – ਯਂ ਵੁਤ੍ਤਂ ‘‘ਏਕੂਨਵੀਸਤਿਵਸ੍ਸਂ ਸਾਮਣੇਰਂ ਨਿਕ੍ਖਮਨੀਯਪੁਣ੍ਣਮਾਸਿਂ ਅਤਿਕ੍ਕਮ੍ਮ ਪਾਟਿਪਦਦਿਵਸੇ ਉਪਸਮ੍ਪਾਦੇਨ੍ਤੀ’’ਤਿ, ਤਤ੍ਥ ਗਬ੍ਭਮਾਸੇਪਿ ਗਹੇਤ੍ਵਾ ਦ੍ਵੀਹਿ ਮਾਸੇਹਿ ਅਪਰਿਪੁਣ੍ਣਵੀਸਤਿਵਸ੍ਸਂ ਸਨ੍ਧਾਯ ‘‘ਏਕੂਨਵੀਸਤਿਵਸ੍ਸ’’ਨ੍ਤਿ ਵੁਤ੍ਤਂ, ਤਸ੍ਮਾ ਅਧਿਕਮਾਸੇਸੁ ਦ੍ਵੀਸੁ ਗਹਿਤੇਸੁ ਏਵ ਵੀਸਤਿ ਵਸ੍ਸਾਨਿ ਪਰਿਪੁਣ੍ਣਾਨਿ ਨਾਮ ਹੋਨ੍ਤੀਤਿ. ਤਸ੍ਮਾਤਿ ਯਸ੍ਮਾ ਗਬ੍ਭਮਾਸਾਪਿ ਗਣਨੂਪਗਾ ਹੋਨ੍ਤਿ, ਤਸ੍ਮਾ. ਏਕਵੀਸਤਿਵਸ੍ਸੋ ਹੋਤੀਤਿ ਜਾਤਦਿਵਸਤੋ ਪਟ੍ਠਾਯ ਵੀਸਤਿਵਸ੍ਸੋ ਸਮਾਨੋ ਗਬ੍ਭਮਾਸੇਹਿ ਸਦ੍ਧਿਂ ਏਕਵੀਸਤਿਵਸ੍ਸੋ ਹੋਤਿ. ਅਞ੍ਞਂ ਉਪਸਮ੍ਪਾਦੇਤੀਤਿ ਉਪਜ੍ਝਾਯੋ, ਕਮ੍ਮਵਾਚਾਚਰਿਯੋ ਵਾ ਹੁਤ੍ਵਾ ਉਪਸਮ੍ਪਾਦੇਤੀਤਿ ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ਪਾਚਿਤ੍ਤਿਯ ੩.੪੦੬) ਆਗਤਂ.

ਗਬ੍ਭੇ ਸਯਿਤਕਾਲੇਨ ਸਦ੍ਧਿਂ ਵੀਸਤਿਮਂ ਵਸ੍ਸਂ ਪਰਿਪੁਣ੍ਣਮਸ੍ਸਾਤਿ ਗਬ੍ਭਵੀਸੋ. ਨਿਕ੍ਖਮਨੀਯਪੁਣ੍ਣਮਾਸੀਤਿ ਸਾਵਣਮਾਸਸ੍ਸ ਪੁਣ੍ਣਮਿਯਾ ਆਸਾਲ਼੍ਹੀਪੁਣ੍ਣਮਿਯਾ ਅਨਨ੍ਤਰਪੁਣ੍ਣਮੀ. ਪਾਟਿਪਦਦਿਵਸੇਤਿ ਪਚ੍ਛਿਮਿਕਾਯ ਵਸ੍ਸੂਪਨਾਯਿਕਾਯ, ਦ੍ਵਾਦਸ ਮਾਸੇ ਮਾਤੁਕੁਚ੍ਛਿਸ੍ਮਿਂ ਵਸਿਤ੍ਵਾ ਮਹਾਪਵਾਰਣਾਯ ਜਾਤਂ ਉਪਸਮ੍ਪਾਦੇਨ੍ਤੀਤਿ ਅਤ੍ਥੋ. ‘‘ਤਿਂਸਰਤ੍ਤਿਦਿਵੋ ਮਾਸੋ, ਦ੍ਵਾਦਸਮਾਸਿਕੋ ਸਂਵਚ੍ਛਰੋ’’ਤਿ ਵਚਨਤੋ ‘‘ਚਤ੍ਤਾਰੋ ਮਾਸਾ ਪਰਿਹਾਯਨ੍ਤੀ’’ਤਿ ਵੁਤ੍ਤਂ. ਵਸ੍ਸਂ ਉਕ੍ਕਡ੍ਢਨ੍ਤੀਤਿ ਵਸ੍ਸਂ ਉਦ੍ਧਂ ਕਡ੍ਢਨ੍ਤਿ, ‘‘ਏਕਮਾਸਂ ਅਧਿਕਮਾਸੋ’’ਤਿ ਛਡ੍ਡੇਤ੍ਵਾ ਵਸ੍ਸਂ ਉਪਗਚ੍ਛਨ੍ਤੀਤਿ ਅਤ੍ਥੋ, ਤਸ੍ਮਾ ਤਤਿਯੋ ਤਤਿਯੋ ਸਂਵਚ੍ਛਰੋ ਤੇਰਸਮਾਸਿਕੋ ਹੋਤਿ. ਤੇ ਦ੍ਵੇ ਮਾਸੇ ਗਹੇਤ੍ਵਾਤਿ ਨਿਕ੍ਖਮਨੀਯਪੁਣ੍ਣਮਾਸਤੋ ਯਾਵ ਜਾਤਦਿਵਸਭੂਤਾ ਮਹਾਪਵਾਰਣਾ, ਤਾਵ ਯੇ ਦ੍ਵੇ ਮਾਸਾ ਅਨਾਗਤਾ, ਤੇਸਂ ਅਤ੍ਥਾਯ ਅਧਿਕਮਾਸਤੋ ਲਦ੍ਧੇ ਦ੍ਵੇ ਮਾਸੇ ਗਹੇਤ੍ਵਾ. ਤੇਨਾਹ ‘‘ਯੋ ਪਵਾਰੇਤ੍ਵਾ ਵੀਸਤਿਵਸ੍ਸੋ ਭਵਿਸ੍ਸਤੀ’’ਤਿਆਦਿ. ‘‘ਨਿਕ੍ਕਙ੍ਖਾ ਹੁਤ੍ਵਾ’’ਤਿ ਇਦਂ ਅਟ੍ਠਾਰਸਨ੍ਨਂ ਵਸ੍ਸਾਨਂ ਏਵ ਅਧਿਕਮਾਸੇ ਗਹੇਤ੍ਵਾ ਤਤੋ ਵੀਸਤਿਯਾ ਵਸ੍ਸੇਸੁਪਿ ਚਾਤੁਦ੍ਦਸੀਨਂ ਅਤ੍ਥਾਯ ਚਤੁਨ੍ਨਂ ਮਾਸਾਨਂ ਪਰਿਹਾਪਨੇਨ ਸਬ੍ਬਥਾ ਪਰਿਪੁਣ੍ਣਵੀਸਤਿਵਸ੍ਸਤਂ ਸਨ੍ਧਾਯ ਵੁਤ੍ਤਂ.

ਪਵਾਰੇਤ੍ਵਾ ਵੀਸਤਿਵਸ੍ਸੋ ਭਵਿਸ੍ਸਤੀਤਿ ਮਹਾਪਵਾਰਣਾਦਿਵਸੇ ਅਤਿਕ੍ਕਨ੍ਤੇ ਗਬ੍ਭਵਸ੍ਸੇਨ ਸਹ ਵੀਸਤਿਵਸ੍ਸੋ ਭਵਿਸ੍ਸਤੀਤਿ ਅਤ੍ਥੋ. ਤਸ੍ਮਾਤਿ ਯਸ੍ਮਾ ਗਬ੍ਭਮਾਸਾਪਿ ਗਣਨੂਪਗਾ ਹੋਨ੍ਤਿ, ਤਸ੍ਮਾ. ਏਕਵੀਸਤਿਵਸ੍ਸੋਤਿ ਜਾਤਿਯਾ ਵੀਸਤਿਵਸ੍ਸਂ ਸਨ੍ਧਾਯ ਵੁਤ੍ਤਂ. ਅਞ੍ਞਂ ਉਪਸਮ੍ਪਾਦੇਤੀਤਿ ਉਪਜ੍ਝਾਯੋ, ਆਚਰਿਯੋ ਵਾ ਹੁਤ੍ਵਾ ਉਪਸਮ੍ਪਾਦੇਤਿ. ਸੋਪੀਤਿ ਉਪਸਮ੍ਪਾਦੇਨ੍ਤੋਪਿ ਅਨੁਪਸਮ੍ਪਨ੍ਨੋਤਿ ਵਿਮਤਿਵਿਨੋਦਨਿਯਂ (ਵਿ. ਵਿ. ਟੀ. ਪਾਚਿਤ੍ਤਿਯ ੨.੪੦੬) ਆਗਤਂ.

ਏਤ੍ਥ ਸਿਯਾ – ਅਟ੍ਠਕਥਾਟੀਕਾਸੁ ‘‘ਅਟ੍ਠਾਰਸਸੁ ਵਸ੍ਸੇਸੁ ਛ ਮਾਸਾ ਵਡ੍ਢਨ੍ਤੀ’’ਤਿ ਵੁਤ੍ਤਂ, ਇਦਾਨਿ ਪਨ ‘‘ਏਕੂਨਵੀਸਤਿਯਾ ਵਸ੍ਸੇਸੁ ਸਤ੍ਤ ਮਾਸਾ ਅਧਿਕਾ’’ਤਿ ਵਦਨ੍ਤਿ, ਕਥਮੇਤ੍ਥ ਵਿਞ੍ਞਾਤਬ੍ਬਨ੍ਤਿ? ਵੁਚ੍ਚਤੇ – ਅਟ੍ਠਕਥਾਟੀਕਾਸੁ ਸਾਸਨਵੋਹਾਰੇਨ ਲੋਕਿਯਗਤਿਂ ਅਨੁਪਗਮ੍ਮ ਤੀਸੁ ਤੀਸੁ ਸਂਵਚ੍ਛਰੇਸੁ ਮਾਸਛਡ੍ਡਨਂ ਗਹੇਤ੍ਵਾ ‘‘ਅਟ੍ਠਾਰਸਸੁ ਵਸ੍ਸੇਸੁ ਛ ਮਾਸਾ ਵਡ੍ਢਨ੍ਤੀ’’ਤਿ ਵੁਤ੍ਤਂ, ਇਦਾਨਿ ਪਨ ਵੇਦਵੋਹਾਰੇਨ ਚਨ੍ਦਸੂਰਿਯਗਤਿਸਙ੍ਖਾਤਂ ਤਿਥਿਂ ਗਹੇਤ੍ਵਾ ਗਣੇਨ੍ਤੋ ‘‘ਏਕੂਨਵੀਸਤਿਯਾ ਵਸ੍ਸੇਸੁ ਸਤ੍ਤ ਮਾਸਾ ਅਧਿਕਾ’’ਤਿ ਵਦਨ੍ਤੀਤਿ, ਤਂ ਵਸ੍ਸੂਪਨਾਯਿਕਕਥਾਯਂ ਆਵਿ ਭਵਿਸ੍ਸਤਿ.

੧੪੩. ਮਾਤਾ ਵਾ ਮਤਾ ਹੋਤੀਤਿ ਸਮ੍ਬਨ੍ਧੋ. ਸੋਯੇਵਾਤਿ ਪਬ੍ਬਜ੍ਜਾਪੇਕ੍ਖੋ ਏਵ.

੧੪੪. ‘‘ਏਕਸੀਮਾਯਞ੍ਚ ਅਞ੍ਞੇਪਿ ਭਿਕ੍ਖੂ ਅਤ੍ਥੀਤਿ ਇਮਿਨਾ ਏਕਸੀਮਾਯਂ ਭਿਕ੍ਖੁਮ੍ਹਿ ਅਸਤਿ ਭਣ੍ਡੁਕਮ੍ਮਾਰੋਚਨਕਿਚ੍ਚਂ ਨਤ੍ਥੀਤਿ ਦਸ੍ਸੇਤਿ. ਖਣ੍ਡਸੀਮਾਯ ਵਾ ਠਤ੍ਵਾ ਨਦੀਸਮੁਦ੍ਦਾਦੀਨਿ ਵਾ ਗਨ੍ਤ੍ਵਾ ਪਬ੍ਬਾਜੇਤਬ੍ਬੋਤਿ ਏਤੇਨ ਸਬ੍ਬੇ ਸੀਮਟ੍ਠਕਭਿਕ੍ਖੂ ਆਪੁਚ੍ਛਿਤਬ੍ਬਾ, ਅਨਾਪੁਚ੍ਛਾ ਪਬ੍ਬਾਜੇਤੁਂ ਨ ਵਟ੍ਟਤੀਤਿ ਦੀਪੇਤਿ.

੧੪੫. ਅਨਾਮਟ੍ਠਪਿਣ੍ਡਪਾਤਨ੍ਤਿ ਅਗ੍ਗਹਿਤਅਗ੍ਗਂ ਪਿਣ੍ਡਪਾਤਂ. ਸਾਮਣੇਰਭਾਗਸਮਕੋ ਆਮਿਸਭਾਗੋਤਿ ਏਤ੍ਥ ਕਿਞ੍ਚਾਪਿ ਸਾਮਣੇਰਾਨਂ ਆਮਿਸਭਾਗਸ੍ਸ ਸਮਕਮੇਵ ਦੀਯਮਾਨਤ੍ਤਾ ਵਿਸੁਂ ਸਾਮਣੇਰਭਾਗੋ ਨਾਮ ਨਤ੍ਥਿ, ਹੇਟ੍ਠਾ ਗਚ੍ਛਨ੍ਤਂ ਪਨ ਭਤ੍ਤਂ ਕਦਾਚਿ ਮਨ੍ਦਂ ਭਵੇਯ੍ਯ, ਤਸ੍ਮਾ ਉਪਰਿ ਅਗ੍ਗਹੇਤ੍ਵਾ ਸਾਮਣੇਰਪਾਲ਼ਿਯਾਵ ਗਹੇਤ੍ਵਾ ਦਾਤਬ੍ਬੋਤਿ ਅਧਿਪ੍ਪਾਯੋ. ਨਿਯਤਪਬ੍ਬਜ੍ਜਸ੍ਸੇਵ ਚਾਯਂ ਭਾਗੋ ਦੀਯਤਿ. ਤੇਨੇਵ ‘‘ਅਪਕ੍ਕਂ ਪਤ੍ਤ’’ਨ੍ਤਿਆਦਿ ਵੁਤ੍ਤਂ. ਅਞ੍ਞੇ ਵਾ ਭਿਕ੍ਖੂ ਦਾਤੁਕਾਮਾ ਹੋਨ੍ਤੀਤਿ ਸਮ੍ਬਨ੍ਧੋ.

੧੪੬. ਸਯਂ ਪਬ੍ਬਾਜੇਤਬ੍ਬੋਤਿ ਕੇਸਚ੍ਛੇਦਨਾਦੀਨਿ ਸਯਂ ਕਰੋਨ੍ਤੇਨ ਪਬ੍ਬਾਜੇਤਬ੍ਬੋ. ਕੇਸਚ੍ਛੇਦਨਂ ਕਾਸਾਯਚ੍ਛਾਦਨਂ ਸਰਣਦਾਨਨ੍ਤਿ ਹਿ ਇਮਾਨਿ ਤੀਣਿ ਕਰੋਨ੍ਤੋ ‘‘ਪਬ੍ਬਾਜੇਤੀ’’ਤਿ ਵੁਚ੍ਚਤਿ, ਤੇਸੁ ਏਕਂ ਦ੍ਵੇ ਵਾਪਿ ਕਰੋਨ੍ਤੋ ਤਥਾ ਵੋਹਰੀਯਤਿਯੇਵ, ਤਸ੍ਮਾ ਏਤਂ ਪਬ੍ਬਾਜੇਹੀਤਿ ਕੇਸਚ੍ਛੇਦਨਂ ਕਾਸਾਯਚ੍ਛਾਦਨਞ੍ਚ ਸਨ੍ਧਾਯ ਵੁਤ੍ਤਂ. ਉਪਜ੍ਝਾਯਂ ਉਦ੍ਦਿਸ੍ਸ ਪਬ੍ਬਾਜੇਤੀਤਿ ਏਤ੍ਥਾਪਿ ਏਸੇਵ ਨਯੋ. ਖਣ੍ਡਸੀਮਂ ਨੇਤ੍ਵਾਤਿ ਭਣ੍ਡੁਕਮ੍ਮਾਰੋਚਨਪਰਿਹਰਣਤ੍ਥਂ ਵੁਤ੍ਤਂ. ਤੇਨ ਸਭਿਕ੍ਖੁਕੇ ਵਿਹਾਰੇ ਅਞ੍ਞਮ੍ਪਿ ‘‘ਏਤਸ੍ਸ ਕੇਸੇ ਛਿਨ੍ਦਾ’’ਤਿ ਵਤ੍ਤੁਂ ਨ ਵਟ੍ਟਤਿ. ਪਬ੍ਬਾਜੇਤ੍ਵਾਤਿ ਕੇਸਚ੍ਛੇਦਨਂ ਸਨ੍ਧਾਯ ਵਦਤਿ. ਭਿਕ੍ਖੁਤੋ ਅਞ੍ਞੋ ਪਬ੍ਬਾਜੇਤੁਂ ਨ ਲਭਤੀਤਿ ਸਰਣਦਾਨਂ ਸਨ੍ਧਾਯ ਵੁਤ੍ਤਂ. ਤੇਨੇਵਾਹ ‘‘ਸਾਮਣੇਰੋ ਪਨਾ’’ਤਿਆਦੀਤਿ ਸਾਰਤ੍ਥਦੀਪਨਿਯਂ (ਸਾਰਤ੍ਥ ਟੀ. ਮਹਾਵਗ੍ਗ ੩.੩੪) ਆਗਤਂ. ਵਿਮਤਿਵਿਨੋਦਨਿਯਂ (ਵਿ. ਵਿ. ਟੀ. ਮਹਾਵਗ੍ਗ ੨.੩੪) ਪਨ – ਸਯਂ ਪਬ੍ਬਾਜੇਤਬ੍ਬੋਤਿ ਏਤ੍ਥ ‘‘ਕੇਸਮਸ੍ਸੁਂ ਓਹਾਰੇਤ੍ਵਾ’’ਤਿਆਦਿਵਚਨਤੋ ਕੇਸਚ੍ਛੇਦਨਕਾਸਾਯਚ੍ਛਾਦਨਸਰਣਦਾਨਾਨਿ ਪਬ੍ਬਜਨਂ ਨਾਮ, ਤੇਸੁ ਪਚ੍ਛਿਮਦ੍ਵਯਂ ਭਿਕ੍ਖੂਹਿ ਏਵ ਕਾਤਬ੍ਬਂ, ਕਾਰੇਤਬ੍ਬਂ ਵਾ. ਪਬ੍ਬਾਜੇਹੀਤਿ ਇਦਂ ਤਿਵਿਧਮ੍ਪਿ ਸਨ੍ਧਾਯ ਵੁਤ੍ਤਂ. ਖਣ੍ਡਸੀਮਂ ਨੇਤ੍ਵਾਤਿ ਭਣ੍ਡੁਕਮ੍ਮਾਰੋਚਨਪਰਿਹਰਣਤ੍ਥਂ. ਭਿਕ੍ਖੂਨਞ੍ਹਿ ਅਨਾਰੋਚੇਤ੍ਵਾ ਏਕਸੀਮਾਯ ‘‘ਏਤਸ੍ਸ ਕੇਸੇ ਛਿਨ੍ਦਾ’’ਤਿ ਅਞ੍ਞਂ ਆਣਾਪੇਤੁਮ੍ਪਿ ਨ ਵਟ੍ਟਤਿ. ਪਬ੍ਬਾਜੇਤ੍ਵਾਤਿ ਕੇਸਾਦਿਚ੍ਛੇਦਨਮੇਵ ਸਨ੍ਧਾਯ ਵੁਤ੍ਤਂ ‘‘ਕਾਸਾਯਾਨਿ ਅਚ੍ਛਾਦੇਤ੍ਵਾ’’ਤਿ ਵਿਸੁਂ ਵੁਤ੍ਤਤ੍ਤਾ. ਪਬ੍ਬਾਜੇਤੁਂ ਨ ਲਭਤੀਤਿ ਸਰਣਦਾਨਂ ਸਨ੍ਧਾਯ ਵੁਤ੍ਤਂ. ਅਨੁਪਸਮ੍ਪਨ੍ਨੇਨ ਭਿਕ੍ਖੁਆਣਤ੍ਤਿਯਾ ਦਿਨ੍ਨਮ੍ਪਿ ਸਰਣਂ ਨ ਰੁਹਤੀਤਿ ਵੁਤ੍ਤਂ.

ਵਜਿਰਬੁਦ੍ਧਿਟੀਕਾਯਮ੍ਪਿ (ਵਜਿਰ ਟੀ. ਮਹਾਵਗ੍ਗ ੩੪) – ਖਣ੍ਡਸੀਮਂ ਨੇਤ੍ਵਾਤਿ ਭਣ੍ਡੁਕਮ੍ਮਾਰੋਚਨਪਰਿਹਰਣਤ੍ਥਂ ਵੁਤ੍ਤਂ, ਤੇਨ ਸਭਿਕ੍ਖੁਕੇ ਵਿਹਾਰੇ ਅਞ੍ਞਮ੍ਪਿ ‘‘ਏਤਸ੍ਸ ਕੇਸੇ ਛਿਨ੍ਦਾ’’ਤਿ ਵਤ੍ਤੁਂ ਨ ਵਟ੍ਟਤਿ. ‘‘ਪਬ੍ਬਾਜੇਤ੍ਵਾ’’ਤਿ ਇਮਸ੍ਸ ਅਧਿਪ੍ਪਾਯਪਕਾਸਨਤ੍ਥਂ ‘‘ਕਾਸਾਯਾਨਿ ਅਚ੍ਛਾਦੇਤ੍ਵਾ ਏਹੀ’’ਤਿ ਵੁਤ੍ਤਂ. ਉਪਜ੍ਝਾਯੋ ਚੇ ਕੇਸਮਸ੍ਸੁਓਰੋਪਨਾਦੀਨਿ ਅਕਤ੍ਵਾ ਪਬ੍ਬਜ੍ਜਤ੍ਥਂ ਸਰਣਾਨਿ ਦੇਤਿ, ਨ ਰੁਹਤਿ ਪਬ੍ਬਜ੍ਜਾ. ਕਮ੍ਮਵਾਚਾਯ ਸਾਵੇਤ੍ਵਾ ਉਪਸਮ੍ਪਾਦੇਤਿ, ਰੁਹਤਿ ਉਪਸਮ੍ਪਦਾ. ਅਪਤ੍ਤਚੀਵਰਾਨਂ ਉਪਸਮ੍ਪਦਾਸਿਦ੍ਧਿਦਸ੍ਸਨਤੋ, ਕਮ੍ਮਵਿਪਤ੍ਤਿਯਾ ਅਭਾਵਤੋ ਚੇਤਂ ਯੁਜ੍ਜਤੇਵਾਤਿ ਏਕੇ. ਹੋਤਿ ਚੇਤ੍ਥ –

‘‘ਸਲਿਙ੍ਗਸ੍ਸੇਵ ਪਬ੍ਬਜ੍ਜਾ, ਵਿਲਿਙ੍ਗਸ੍ਸਾਪਿ ਚੇਤਰਾ;

ਅਪੇਤਪੁਬ੍ਬਵੇਸਸ੍ਸ, ਤਂਦ੍ਵਯਾ ਇਤਿ ਚਾਪਰੇ’’ਤਿ.

ਭਿਕ੍ਖੁਨਾ ਹਿ ਸਹਤ੍ਥੇਨ ਵਾ ਆਣਤ੍ਤਿਯਾ ਵਾ ਦਿਨ੍ਨਮੇਵ ਕਾਸਾਵਂ ਵਟ੍ਟਤਿ, ਅਦਿਨ੍ਨਂ ਨ ਵਟ੍ਟਤੀਤਿ ਪਨ ਸਨ੍ਤੇਸ੍ਵੇਵ ਕਾਸਾਵੇਸੁ, ਨਾਸਨ੍ਤੇਸੁ ਅਸਮ੍ਭਵਤੋਤਿ ਤੇਸਂ ਅਧਿਪ੍ਪਾਯੋਤਿ ਆਗਤੋ.

ਭਬ੍ਬਰੂਪੋਤਿ ਭਬ੍ਬਸਭਾਵੋ. ਤਮੇਵਤ੍ਥਂ ਪਰਿਯਾਯਨ੍ਤਰੇਨ ਵਿਭਾਵੇਤਿ ‘‘ਸਹੇਤੁਕੋ’’ਤਿ. ਞਾਤੋਤਿ ਪਾਕਟੋ. ਯਸਸ੍ਸੀਤਿ ਪਰਿਵਾਰਸਮ੍ਪਤ੍ਤਿਯਾ ਸਮਨ੍ਨਾਗਤੋ.

ਵਣ੍ਣਸਣ੍ਠਾਨਗਨ੍ਧਾਸਯੋਕਾਸਵਸੇਨ ਅਸੁਚਿਜੇਗੁਚ੍ਛਪਟਿਕੂਲਭਾਵਂ ਪਾਕਟਂ ਕਰੋਨ੍ਤੇਨਾਤਿ ਸਮ੍ਬਨ੍ਧੋ. ਤਤ੍ਥ ਕੇਸਾ ਨਾਮੇਤੇ ਵਣ੍ਣਤੋਪਿ ਪਟਿਕੂਲਾ, ਸਣ੍ਠਾਨਤੋਪਿ ਗਨ੍ਧਤੋਪਿ ਆਸਯਤੋਪਿ ਓਕਾਸਤੋਪਿ ਪਟਿਕੂਲਾ. ਮਨੁਞ੍ਞੇਪਿ ਹਿ ਯਾਗੁਪਤ੍ਤੇ ਵਾ ਭਤ੍ਤਪਤ੍ਤੇ ਵਾ ਕੇਸਵਣ੍ਣਂ ਕਿਞ੍ਚਿ ਦਿਸ੍ਵਾ ‘‘ਕੇਸਮਿਸ੍ਸਕਮਿਦਂ, ਹਰਥ ਨ’’ਨ੍ਤਿ ਜਿਗੁਚ੍ਛਨ੍ਤਿ, ਏਵਂ ਕੇਸਾ ਵਣ੍ਣਤੋ ਪਟਿਕੂਲਾ. ਰਤ੍ਤਿਂ ਭੁਞ੍ਜਨ੍ਤਾਪਿ ਕੇਸਸਣ੍ਠਾਨਂ ਅਕ੍ਕਵਾਕਂ ਵਾ ਮਕਚਿਵਾਕਂ ਵਾ ਛੁਪਿਤ੍ਵਾ ਤਥੇਵ ਜਿਗੁਚ੍ਛਨ੍ਤਿ, ਏਵਂ ਸਣ੍ਠਾਨਤੋਪਿ ਪਟਿਕੂਲਾ. ਤੇਲਮਕ੍ਖਨਪੁਪ੍ਫਧੂਮਾਦਿਸਙ੍ਖਾਰਵਿਰਹਿਤਾਨਞ੍ਚ ਕੇਸਾਨਂ ਗਨ੍ਧੋ ਪਰਮਜੇਗੁਚ੍ਛੋ ਹੋਤਿ. ਤਤੋ ਜੇਗੁਚ੍ਛਤਰੋ ਅਗ੍ਗਿਮ੍ਹਿ ਪਕ੍ਖਿਤ੍ਤਾਨਂ. ਕੇਸਾ ਹਿ ਵਣ੍ਣਸਣ੍ਠਾਨਤੋ ਅਪ੍ਪਟਿਕੂਲਾਪਿ ਸਿਯੁਂ, ਗਨ੍ਧੇਨ ਪਨ ਪਟਿਕੂਲਾਯੇਵ. ਯਥਾ ਹਿ ਦਹਰਸ੍ਸ ਕੁਮਾਰਕਸ੍ਸ ਵਚ੍ਚਂ ਵਣ੍ਣਤੋ ਹਲਿਦ੍ਦਿਵਣ੍ਣਂ, ਸਣ੍ਠਾਨਤੋ ਹਲਿਦ੍ਦਿਪਿਣ੍ਡਿਸਣ੍ਠਾਨਂ. ਸਙ੍ਕਰਟ੍ਠਾਨੇ ਛਡ੍ਡਿਤਞ੍ਚ ਉਦ੍ਧੁਮਾਤਕਕਾਲ਼ਸੁਨਖਸਰੀਰਂ ਵਣ੍ਣਤੋ ਤਾਲਪਕ੍ਕਵਣ੍ਣਂ, ਸਣ੍ਠਾਨਤੋ ਵਟ੍ਟੇਤ੍ਵਾ ਵਿਸ੍ਸਟ੍ਠਮੁਦਿਙ੍ਗਸਣ੍ਠਾਨਂ, ਦਾਠਾਪਿਸ੍ਸ ਸੁਮਨਮਕੁਲ਼ਸਦਿਸਾ, ਤਂ ਉਭਯਮ੍ਪਿ ਵਣ੍ਣਸਣ੍ਠਾਨਤੋ ਸਿਯਾ ਅਪ੍ਪਟਿਕੂਲਂ, ਗਨ੍ਧੇਨ ਪਨ ਪਟਿਕੂਲਮੇਵ, ਏਵਂ ਕੇਸਾਪਿ ਸਿਯੁਂ ਵਣ੍ਣਸਣ੍ਠਾਨਤੋ ਅਪ੍ਪਟਿਕੂਲਾ, ਗਨ੍ਧੇਨ ਪਨ ਪਟਿਕੂਲਾਯੇਵਾਤਿ.

ਯਥਾ ਪਨ ਅਸੁਚਿਟ੍ਠਾਨੇ ਗਾਮਨਿਸ੍ਸਨ੍ਦੇਨ ਜਾਤਾਨਿ ਸੂਪੇਯ੍ਯਪਣ੍ਣਾਨਿ ਨਾਗਰਿਕਮਨੁਸ੍ਸਾਨਂ ਜੇਗੁਚ੍ਛਾਨਿ ਹੋਨ੍ਤਿ ਅਪਰਿਭੋਗਾਨਿ, ਏਵਂ ਕੇਸਾਪਿ ਪੁਬ੍ਬਲੋਹਿਤਮੁਤ੍ਤਕਰੀਸਪਿਤ੍ਤਸੇਮ੍ਹਾਦਿਨਿਸ੍ਸਨ੍ਦੇਨ ਜਾਤਤ੍ਤਾ ਪਰਮਜੇਗੁਚ੍ਛਾਤਿ. ਏਵਂ ਆਸਯਤੋਪਿ ਪਟਿਕੂਲਾ. ਇਮੇ ਚ ਕੇਸਾ ਨਾਮ ਗੂਥਰਾਸਿਮ੍ਹਿ ਉਟ੍ਠਿਤਕਣ੍ਣਕਾ ਵਿਯ ਏਕਤਿਂਸਕੋਟ੍ਠਾਸਰਾਸਿਮ੍ਹਿ ਜਾਤਾ, ਤੇ ਸੁਸਾਨਸਙ੍ਕਾਰਟ੍ਠਾਨਾਦੀਸੁ ਜਾਤਸਾਕਂ ਵਿਯ, ਪਰਿਖਾਦੀਸੁ ਜਾਤਕਮਲਕੁਵਲਯਾਦਿਪੁਪ੍ਫਂ ਵਿਯ ਚ ਅਸੁਚਿਟ੍ਠਾਨੇ ਜਾਤਤ੍ਤਾ ਪਰਮਜੇਗੁਚ੍ਛਾਤਿ ਏਵਂ ਓਕਾਸਤੋ ਪਟਿਕੂਲਾਤਿਆਦਿਨਾ ਨਯੇਨ ਤਚਪਞ੍ਚਕਸ੍ਸ ਵਣ੍ਣਾਦਿਵਸੇਨ ਪਟਿਕੂਲਭਾਵਂ ਪਕਾਸੇਨ੍ਤੇਨਾਤਿ ਅਤ੍ਥੋ.

ਨਿਜ੍ਜੀਵਨਿਸ੍ਸਤ੍ਤਭਾਵਂ ਵਾ ਪਾਕਟਂ ਕਰੋਨ੍ਤੇਨਾਤਿ ਇਮੇ ਕੇਸਾ ਨਾਮ ਸੀਸਕਟਾਹਪਲਿਵੇਠਨਚਮ੍ਮੇ ਜਾਤਾ, ਤਤ੍ਥ ਯਥਾ ਵਮ੍ਮਿਕਮਤ੍ਥਕੇ ਜਾਤੇਸੁ ਕੁਣ੍ਠਤਿਣੇਸੁ ਨ ਵਮ੍ਮਿਕਮਤ੍ਥਕੋ ਜਾਨਾਤਿ ‘‘ਮਯਿ ਕੁਣ੍ਠਤਿਣਾਨਿ ਜਾਤਾਨੀ’’ਤਿ, ਨਾਪਿ ਕੁਣ੍ਠਤਿਣਾਨਿ ਜਾਨਨ੍ਤਿ ‘‘ਮਯਂ ਵਮ੍ਮਿਕਮਤ੍ਥਕੇ ਜਾਤਾਨੀ’’ਤਿ. ਏਵਮੇਵ ਨ ਸੀਸਕਟਾਹਪਲਿਵੇਠਨਚਮ੍ਮਂ ਜਾਨਾਤਿ ‘‘ਮਯਿ ਕੇਸਾ ਜਾਤਾ’’ਤਿ, ਨਾਪਿ ਕੇਸਾ ਜਾਨਨ੍ਤਿ ‘‘ਮਯਂ ਸੀਸਕਟਾਹਪਲਿਵੇਠਨਚਮ੍ਮੇ ਜਾਤਾ’’ਤਿ, ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ‘‘ਕੇਸਾ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਥਦ੍ਧੋ ਪਥਵੀਧਾਤੂ’’ਤਿਆਦਿਨਾ ਨਯੇਨ ਨਿਜ੍ਜੀਵਨਿਸ੍ਸਤ੍ਤਭਾਵਂ ਪਕਾਸੇਨ੍ਤੇਨ. ਪੁਬ੍ਬੇਤਿ ਪੁਰਿਮਬੁਦ੍ਧਾਨਂ ਸਨ੍ਤਿਕੇ. ਮਦ੍ਦਿਤਸਙ੍ਖਾਰੋਤਿ ਨਾਮਰੂਪਵਵਤ੍ਥਾਨੇਨ ਚੇਵ ਪਚ੍ਚਯਪਰਿਗ੍ਗਹਵਸੇਨ ਚ ਞਾਣੇਨ ਪਰਿਮਦ੍ਦਿਤਸਙ੍ਖਾਰੋ. ਭਾਵਿਤਭਾਵਨੋਤਿ ਕਲਾਪਸਮ੍ਮਸਨਾਦਿਨਾ ਸਬ੍ਬਸੋ ਕੁਸਲਭਾਵਨਾਯ ਪੂਰਣੇਨ ਭਾਵਿਤਭਾਵਨੋ. ਅਦਿਨ੍ਨਂ ਨ ਵਟ੍ਟਤੀਤਿ ਏਤ੍ਥ ‘‘ਪਬ੍ਬਜ੍ਜਾ ਨ ਰੁਹਤੀਤਿ ਵਦਨ੍ਤੀ’’ਤਿ ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ਮਹਾਵਗ੍ਗ ੩.੩੪) ਵੁਤ੍ਤਂ.

ਵਿਮਤਿਵਿਨੋਦਨਿਯਂ (ਵਿ. ਵਿ. ਟੀ. ਮਹਾਵਗ੍ਗ ੨.੩੪) ਪਨ – ਯਸਸ੍ਸੀਤਿ ਪਰਿਵਾਰਸਮ੍ਪਨ੍ਨੋ. ਨਿਜ੍ਜੀਵਨਿਸ੍ਸਤ੍ਤਭਾਵਨ੍ਤਿ ‘‘ਕੇਸਾ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਥਦ੍ਧੋ ਪਥਵੀਧਾਤੂ’’ਤਿਆਦਿਨਯਂ ਸਙ੍ਗਣ੍ਹਾਤਿ, ਸਬ੍ਬਂ ਵਿਸੁਦ੍ਧਿਮਗ੍ਗੇ (ਵਿਸੁਦ੍ਧਿ. ੧.੩੧੧) ਆਗਤਨਯੇਨ ਗਹੇਤਬ੍ਬਂ. ਪੁਬ੍ਬੇਤਿ ਪੁਬ੍ਬਬੁਦ੍ਧੁਪ੍ਪਾਦੇਸੁ. ਮਦ੍ਦਿਤਸਙ੍ਖਾਰੋਤਿ ਵਿਪਸ੍ਸਨਾਵਸੇਨ ਵੁਤ੍ਤਂ. ਭਾਵਿਤਭਾਵਨੋਤਿ ਸਮਥਵਸੇਨਪਿ.

ਕਾਸਾਯਾਨਿ ਤਿਕ੍ਖਤ੍ਤੁਂ ਵਾ…ਪੇ… ਪਟਿਗ੍ਗਾਹਾਪੇਤਬ੍ਬੋਤਿ ਏਤ੍ਥ ‘‘ਸਬ੍ਬਦੁਕ੍ਖਨਿਸ੍ਸਰਣਤ੍ਥਾਯ ਇਮਂ ਕਾਸਾਵਂ ਗਹੇਤ੍ਵਾ’’ਤਿ ਵਾ ‘‘ਤਂ ਕਾਸਾਵਂ ਦਤ੍ਵਾ’’ਤਿ ਵਾ ਵਤ੍ਵਾ ‘‘ਪਬ੍ਬਾਜੇਥ ਮਂ, ਭਨ੍ਤੇ, ਅਨੁਕਮ੍ਪਂ ਉਪਾਦਾਯਾ’’ਤਿ ਏਵਂ ਯਾਚਨਪੁਬ੍ਬਕਂ ਚੀਵਰਂ ਪਟਿਚ੍ਛਾਪੇਤਿ. ਅਥਾਪੀਤਿਆਦਿ ਤਿਕ੍ਖਤ੍ਤੁਂ ਪਟਿਗ੍ਗਾਹਾਪਨਤੋ ਪਰਂ ਕਤ੍ਤਬ੍ਬਵਿਧਿਦਸ੍ਸਨਂ, ਅਥਾਪੀਤਿ ਤਤੋ ਪਰਮ੍ਪੀਤਿ ਅਤ੍ਥੋ. ਕੇਚਿ ਪਨ ‘‘ਚੀਵਰਂ ਅਪ੍ਪਟਿਗ੍ਗਾਹਾਪੇਤ੍ਵਾ ਪਬ੍ਬਾਜਨਪ੍ਪਕਾਰਭੇਦਦਸ੍ਸਨਤ੍ਥਂ ‘ਅਥਾਪੀ’ਤਿ ਵੁਤ੍ਤਂ. ਅਥਾਪੀਤਿ ਅਥ ਵਾਤਿ ਅਤ੍ਥੋ’’ਤਿ ਵਦਨ੍ਤਿ. ਅਦਿਨ੍ਨਂ ਨ ਵਟ੍ਟਤੀਤਿ ਇਮਿਨਾ ਪਬ੍ਬਜ੍ਜਾ ਨ ਰੁਹਤੀਤਿ ਦਸ੍ਸੇਤਿ.

੧੪੭. ਪਾਦੇ ਵਨ੍ਦਾਪੇਤ੍ਵਾਤਿ ਪਾਦਾਭਿਮੁਖਂ ਨਮਾਪੇਤ੍ਵਾ. ਦੂਰੇ ਵਨ੍ਦਨ੍ਤੋਪਿ ਹਿ ਪਾਦੇ ਵਨ੍ਦਤੀਤਿ ਵੁਚ੍ਚਤੀਤਿ. ਉਪਜ੍ਝਾਯੇਨ ਵਾਤਿ ਏਤ੍ਥ ਯਸ੍ਸ ਸਨ੍ਤਿਕੇ ਉਪਜ੍ਝਂ ਗਣ੍ਹਾਤਿ, ਅਯਂ ਉਪਜ੍ਝਾਯੋ. ਯਂ ਆਭਿਸਮਾਚਾਰਿਕੇਸੁ ਵਿਨਯਨਤ੍ਥਾਯ ਆਚਰਿਯਂ ਕਤ੍ਵਾ ਨਿਯ੍ਯਾਤੇਨ੍ਤਿ, ਅਯਂ ਆਚਰਿਯੋ. ਸਚੇ ਪਨ ਉਪਜ੍ਝਾਯੋ ਸਯਮੇਵ ਸਬ੍ਬਂ ਸਿਕ੍ਖਾਪੇਤਿ, ਅਞ੍ਞਮ੍ਪਿ ਨ ਨਿਯ੍ਯਾਤੇਤਿ, ਉਪਜ੍ਝਾਯੋਵਸ੍ਸ ਆਚਰਿਯੋਪਿ ਹੋਤਿ. ਯਥਾ ਉਪਸਮ੍ਪਦਾਕਾਲੇ ਸਯਮੇਵ ਕਮ੍ਮਵਾਚਂ ਵਾਚੇਨ੍ਤੋ ਉਪਜ੍ਝਾਯੋਵ ਕਮ੍ਮਵਾਚਾਚਰਿਯੋਪਿ ਹੋਤੀਤਿ ਵੁਤ੍ਤਂ.

ਅਨੁਞ੍ਞਾਤਉਪਸਮ੍ਪਦਾਤਿ ਞਤ੍ਤਿਚਤੁਤ੍ਥਕਮ੍ਮੇਨ ਅਨੁਞ੍ਞਾਤਉਪਸਮ੍ਪਦਾ. ਠਾਨਕਰਣਸਮ੍ਪਦਨ੍ਤਿ ਏਤ੍ਥ ਉਰਆਦੀਨਿ ਠਾਨਾਨਿ, ਸਂਵੁਤਾਦੀਨਿ ਕਰਣਾਨੀਤਿ ਵੇਦਿਤਬ੍ਬਾਨਿ. ਅਨੁਨਾਸਿਕਨ੍ਤਂ ਕਤ੍ਵਾ ਦਾਨਕਾਲੇ ਅਨ੍ਤਰਾਵਿਚ੍ਛੇਦਂ ਅਕਤ੍ਵਾ ਦਾਤਬ੍ਬਾਨੀਤਿ ਦਸ੍ਸੇਤੁਂ ‘‘ਏਕਸਮ੍ਬਨ੍ਧਾਨੀ’’ਤਿ ਵੁਤ੍ਤਂ. ਵਿਚ੍ਛਿਨ੍ਦਿਤ੍ਵਾਤਿ ਮ-ਕਾਰਨ੍ਤਂ ਕਤ੍ਵਾ ਦਾਨਸਮਯੇ ਵਿਚ੍ਛੇਦਂ ਕਤ੍ਵਾ.

੧੪੮. ਸਬ੍ਬਮਸ੍ਸ ਕਪ੍ਪਿਯਾਕਪ੍ਪਿਯਂ ਆਚਿਕ੍ਖਿਤਬ੍ਬਨ੍ਤਿ ਦਸਸਿਕ੍ਖਾਪਦਵਿਨਿਮੁਤ੍ਤਂ ਪਰਾਮਾਸਾਪਰਾਮਾਸਾਦਿਭੇਦਂ ਕਪ੍ਪਿਯਾਕਪ੍ਪਿਯਂ ਆਚਿਕ੍ਖਿਤਬ੍ਬਂ. ਆਭਿਸਮਾਚਾਰਿਕੇਸੁ ਵਿਨੇਤਬ੍ਬੋਤਿ ਇਮਿਨਾ ‘‘ਸੇਖਿਯਉਪਜ੍ਝਾਯਵਤ੍ਤਾਦਿਆਭਿਸਮਾਚਾਰਿਕਸੀਲਮਨੇਨ ਪੂਰੇਤਬ੍ਬਂ. ਤਤ੍ਥ ਚ ਕਤ੍ਤਬ੍ਬਸ੍ਸ ਅਕਰਣੇ, ਅਕਤ੍ਤਬ੍ਬਸ੍ਸ ਚ ਕਰਣੇ ਦਣ੍ਡਕਮ੍ਮਾਰਹੋ ਹੋਤੀਤਿ ਦੀਪੇਤੀਤਿ ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ਮਹਾਵਗ੍ਗ ੩.੩੪) ਵੁਤ੍ਤਂ. ਅਨੁਨਾਸਿਕਨ੍ਤਂ ਕਤ੍ਵਾ ਦਾਨਕਾਲੇ ਅਨ੍ਤਰਾਵਿਚ੍ਛੇਦੋ ਨ ਕਾਤਬ੍ਬੋਤਿ ਆਹ ‘‘ਏਕਸਮ੍ਬਨ੍ਧਾਨੀ’’ਤਿ. ਆਭਿਸਮਾਚਾਰਿਕੇਸੁ ਵਿਨੇਤਬ੍ਬੋਤਿ ਇਮਿਨਾ ਸੇਖਿਯਵਤ੍ਤਾਕ੍ਖਨ੍ਧਕਵਤ੍ਤੇਸੁ, ਅਞ੍ਞੇਸੁ ਚ ਸੁਕ੍ਕਵਿਸ੍ਸਟ੍ਠਿਆਦਿਲੋਕਵਜ੍ਜਸਿਕ੍ਖਾਪਦੇਸੁ ਚ ਸਾਮਣੇਰੇਹਿ ਵਤ੍ਤਿਤਬ੍ਬਂ, ਤਤ੍ਥ ਅਵਤ੍ਤਮਾਨੋ ਅਲਜ੍ਜੀ ਦਣ੍ਡਕਮ੍ਮਾਰਹੋ ਚ ਹੋਤੀਤਿ ਦਸ੍ਸੇਤੀਤਿ ਵਿਮਤਿਵਿਨੋਦਨਿਯਂ (ਵਿ. ਵਿ. ਟੀ. ਮਹਾਵਗ੍ਗ ੨.੩੪).

ਉਰਾਦੀਨਿ ਠਾਨਾਨਿ ਨਾਮ, ਸਂਵੁਤਾਦੀਨਿ ਕਰਣਾਨਿ ਨਾਮ. ਅਨੁਨਾਸਿਕਨ੍ਤਂ ਕਤ੍ਵਾ ਏਕਸਮ੍ਬਨ੍ਧਂ ਕਤ੍ਵਾ ਦਾਨਕਾਲੇ ਅਨ੍ਤਰਾ ਅਟ੍ਠਤ੍ਵਾ ਵਤ੍ਤਬ੍ਬਂ, ਵਿਚ੍ਛਿਨ੍ਦਿਤ੍ਵਾ ਦਾਨਕਾਲੇਪਿ ਯਥਾਵੁਤ੍ਤਟ੍ਠਾਨੇ ਏਵ ਵਿਚ੍ਛੇਦੋ, ਅਞ੍ਞਤ੍ਰ ਨ ਵਟ੍ਟਤੀਤਿ ਲਿਖਿਤਂ, ਅਨੁਨਾਸਿਕਨ੍ਤੇ ਦੀਯਮਾਨੇ ਖਲਿਤ੍ਵਾ ‘‘ਬੁਦ੍ਧਂ ਸਰਣਂ ਗਚ੍ਛਾਮੀ’’ਤਿ ਮ-ਕਾਰੇਨ ਮਿਸ੍ਸੀਭੂਤੇ ਖੇਤ੍ਤੇ ਓਤਿਣ੍ਣਤ੍ਤਾ ਵਟ੍ਟਤੀਤਿ ਉਪਤਿਸ੍ਸਤ੍ਥੇਰੋ. ਮਿਸ੍ਸਂ ਕਤ੍ਵਾ ਵਤ੍ਤੁਂ ਵਟ੍ਟਤਿ, ਵਚਨਕਾਲੇ ਪਨ ਅਨੁਨਾਸਿਕਟ੍ਠਾਨੇ ਵਿਚ੍ਛੇਦਂ ਅਕਤ੍ਵਾ ਵਤ੍ਤਬ੍ਬਨ੍ਤਿ ਧਮ੍ਮਸਿਰਿਤ੍ਥੇਰੋ. ‘‘ਏਵਂ ਕਮ੍ਮਵਾਚਾਯਮ੍ਪੀ’’ਤਿ ਵੁਤ੍ਤਂ. ਉਭਤੋਸੁਦ੍ਧਿਯਾਵ ਵਟ੍ਟਤੀਤਿ ਏਤ੍ਥ ਮਹਾਥੇਰੋ ਪਤਿਤਦਨ੍ਤਾਦਿਕਾਰਣਤਾਯ ਅਚਤੁਰਸ੍ਸਂ ਕਤ੍ਵਾ ਵਦਤਿ, ਬ੍ਯਤ੍ਤਸਾਮਣੇਰੋ ਸਮੀਪੇ ਠਿਤੋ ਪਬ੍ਬਜ੍ਜਾਪੇਕ੍ਖਂ ਬ੍ਯਤ੍ਤਂ ਵਦਾਪੇਤਿ, ਮਹਾਥੇਰੇਨ ਅਵੁਤ੍ਤਂ ਵਦਾਪੇਤੀਤਿ ਨ ਵਟ੍ਟਤਿ. ਕਮ੍ਮਵਾਚਾਯ ਇਤਰੋ ਭਿਕ੍ਖੁ ਚੇ ਵਦਤਿ, ਵਟ੍ਟਤੀਤਿ. ਸਙ੍ਘੋ ਹਿ ਕਮ੍ਮਂ ਕਰੋਤਿ, ਨ ਪੁਗ੍ਗਲੋਤਿ. ਨ, ਨਾਨਾਸੀਮਪਵਤ੍ਤਕਮ੍ਮਵਾਚਾਸਾਮਞ੍ਞਨਯੇਨ ਪਟਿਕ੍ਖਿਪਿਤਬ੍ਬਤ੍ਤਾ. ਅਥ ਥੇਰੇਨ ਚਤੁਰਸ੍ਸਂ ਵੁਤ੍ਤਂ ਪਬ੍ਬਜ੍ਜਾਪੇਕ੍ਖਂ ਵਤ੍ਤੁਂ ਅਸਕ੍ਕੋਨ੍ਤਂ ਸਾਮਣੇਰੋ ਸਯਂ ਵਤ੍ਵਾ ਵਦਾਪੇਤਿ, ਉਭਤੋਸੁਦ੍ਧਿ ਏਵ ਹੋਤਿ ਥੇਰੇਨ ਵੁਤ੍ਤਸ੍ਸੇਵ ਵੁਤ੍ਤਤ੍ਤਾ. ‘‘ਬੁਦ੍ਧਂ ਸਰਣਂ ਗਚ੍ਛਨ੍ਤੋ ਅਸਾਧਾਰਣੇ ਬੁਦ੍ਧਗੁਣਂ, ਧਮ੍ਮਂ ਸਰਣਂ ਗਚ੍ਛਨ੍ਤੋ ਨਿਬ੍ਬਾਨਂ, ਸਙ੍ਘਂ ਸਰਣਂ ਗਚ੍ਛਨ੍ਤੋ ਸੇਕ੍ਖਧਮ੍ਮਂ ਅਸੇਕ੍ਖਧਮ੍ਮਞ੍ਚ ਸਰਣਂ ਗਚ੍ਛਤੀ’’ਤਿ ਅਗ੍ਗਹਿਤਗ੍ਗਹਣਵਸੇਨ ਯੋਜਨਾ ਕਾਤਬ੍ਬਾ. ਅਞ੍ਞਥਾ ਸਰਣਤ੍ਤਯਸਙ੍ਕਰਦੋਸੋ. ਸਬ੍ਬਮਸ੍ਸ ਕਪ੍ਪਿਯਾਕਪ੍ਪਿਯਨ੍ਤਿ ਦਸਸਿਕ੍ਖਾਪਦਵਿਨਿਮੁਤ੍ਤਂ ਪਰਾਮਾਸਾਪਰਾਮਾਸਾਦਿਭੇਦਂ. ‘‘ਆਭਿਸਮਾਚਾਰਿਕੇਸੁ ਵਿਨੇਤਬ੍ਬੋ’’ਤਿ ਵਚਨਤੋ ਸੇਖਿਯਉਪਜ੍ਝਾਯਵਤ੍ਤਾਦਿਆਭਿਸਮਾਚਾਰਿਕਸੀਲਮਨੇਨ ਪੂਰੇਤਬ੍ਬਂ. ਤਤ੍ਥ ਚਾਰਿਤ੍ਤਸ੍ਸ ਅਕਰਣੇ, ਵਾਰਿਤ੍ਤਸ੍ਸ ਕਰਣੇ ਦਣ੍ਡਕਮ੍ਮਾਰਹੋ ਹੋਤੀ’’ਤਿ ਦੀਪੇਤੀਤਿ ਵਜਿਰਬੁਦ੍ਧਿਟੀਕਾਯਂ (ਵਜਿਰ. ਟੀ. ਮਹਾਵਗ੍ਗ ੩੪) ਆਗਤੋ.

ਅਨੁਜਾਨਾਮਿ ਭਿਕ੍ਖਵੇ ਸਾਮਣੇਰਾਨਂ ਦਸ ਸਿਕ੍ਖਾਪਦਾਨੀਤਿਆਦੀਸੁ ਸਿਕ੍ਖਿਤਬ੍ਬਾਨਿ ਪਦਾਨਿ ਸਿਕ੍ਖਾਪਦਾਨਿ, ਸਿਕ੍ਖਾਕੋਟ੍ਠਾਸਾਤਿ ਅਤ੍ਥੋ. ਸਿਕ੍ਖਾਯ ਵਾ ਪਦਾਨਿ ਸਿਕ੍ਖਾਪਦਾਨਿ, ਅਧਿਸੀਲਅਧਿਚਿਤ੍ਤਅਧਿਪਞ੍ਞਾਸਿਕ੍ਖਾਨਂ ਅਧਿਗਮੁਪਾਯੋਤਿ ਅਤ੍ਥੋ. ਅਤ੍ਥਤੋ ਪਨ ਕਾਮਾਵਚਰਕੁਸਲਚਿਤ੍ਤਸਮ੍ਪਯੁਤ੍ਤਾ ਵਿਰਤਿਯੋ, ਤਂਸਮ੍ਪਯੁਤ੍ਤਧਮ੍ਮਾ ਪਨੇਤ੍ਥ ਤਗ੍ਗਹਣੇਨੇਵ ਗਹੇਤਬ੍ਬਾ. ਪਾਣੋਤਿ ਪਰਮਤ੍ਥਤੋ ਜੀਵਿਤਿਨ੍ਦ੍ਰਿਯਂ, ਤਸ੍ਸ ਅਤਿਪਾਤਨਂ ਪਬਨ੍ਧਵਸੇਨ ਪਵਤ੍ਤਿਤੁਂ ਅਦਤ੍ਵਾ ਸਤ੍ਥਾਦੀਹਿ ਅਤਿਕ੍ਕਮ੍ਮ ਅਭਿਭਵਿਤ੍ਵਾ ਪਾਤਨਂ ਪਾਣਾਤਿਪਾਤੋ, ਪਾਣਵਧੋਤਿ ਅਤ੍ਥੋ. ਸੋ ਪਨ ਅਤ੍ਥਤੋ ਪਾਣੇ ਪਾਣਸਞ੍ਞਿਨੋ ਜੀਵਿਤਿਨ੍ਦ੍ਰਿਯੁਪਚ੍ਛੇਦਕਉਪਕ੍ਕਮਸਮੁਟ੍ਠਾਪਿਕਾ ਵਧਕਚੇਤਨਾਵ, ਤਸ੍ਮਾ ਪਾਣਾਤਿਪਾਤਾ ਵੇਰਮਣਿ, ਵੇਰਹੇਤੁਤਾਯ ਵੇਰਸਙ੍ਖਾਤਂ ਪਾਣਾਤਿਪਾਤਾਦਿਪਾਪਧਮ੍ਮਂ ਮਣਤਿ ਨੀਹਰਤੀਤਿ ਵਿਰਤਿ ‘‘ਵੇਰਮਣੀ’’ਤਿ ਵੁਚ੍ਚਤਿ. ਵਿਰਮਤਿ ਏਤਾਯਾਤਿ ਵਾ ‘‘ਵਿਰਮਤੀ’’ਤਿ ਵਤ੍ਤਬ੍ਬੇ ਨਿਰੁਤ੍ਤਿਨਯੇਨ ‘‘ਵੇਰਮਣੀ’’ਤਿ ਸਮਾਦਾਨਵਿਰਤਿ ਵੁਤ੍ਤਾ. ਏਸ ਨਯੋ ਸੇਸੇਸੁਪਿ.

ਅਦਿਨ੍ਨਸ੍ਸ ਆਦਾਨਂ ਅਦਿਨ੍ਨਾਦਾਨਂ, ਥੇਯ੍ਯਚੇਤਨਾ. ਅਬ੍ਰਮ੍ਹਚਰਿਯਨ੍ਤਿ ਅਸੇਟ੍ਠਚਰਿਯਂ, ਮਗ੍ਗੇਨਮਗ੍ਗਪਟਿਪਤ੍ਤਿਸਮੁਟ੍ਠਾਪਿਕਾ ਮੇਥੁਨਚੇਤਨਾ. ਮੁਸਾਤਿ ਅਭੂਤਵਤ੍ਥੁ, ਤਸ੍ਸ ਵਾਦੋ ਅਭੂਤਂ ਞਤ੍ਵਾਵ ਭੂਤਤੋ ਵਿਞ੍ਞਾਪਨਚੇਤਨਾ ਮੁਸਾਵਾਦੋ. ਪਿਟ੍ਠਪੂਵਾਦਿਨਿਬ੍ਬਤ੍ਤਾ ਸੁਰਾ ਚੇਵ ਪੁਪ੍ਫਾਸਵਾਦਿਭੇਦਂ ਮੇਰਯਞ੍ਚ ਸੁਰਾਮੇਰਯਂ. ਤਦੇਵ ਮਦਨੀਯਟ੍ਠੇਨ ਮਜ੍ਜਞ੍ਚੇਵ ਪਮਾਦਕਾਰਣਟ੍ਠੇਨ ਪਮਾਦਟ੍ਠਾਨਞ੍ਚ, ਤਂ ਯਾਯ ਚੇਤਨਾਯ ਪਿਵਤਿ, ਤਸ੍ਸਾ ਏਵਂ ਅਧਿਵਚਨਂ.

ਅਰੁਣੁਗ੍ਗਮਨਤੋ ਪਟ੍ਠਾਯ ਯਾਵ ਮਜ੍ਝਨ੍ਹਿਕਾ, ਅਯਂ ਅਰਿਯਾਨਂ ਭੋਜਨਸ੍ਸ ਕਾਲੋ ਨਾਮ, ਤਦਞ੍ਞੋ ਵਿਕਾਲੋ. ਭੁਞ੍ਜਿਤਬ੍ਬਟ੍ਠੇਨ ਭੋਜਨਨ੍ਤਿ ਇਧ ਸਬ੍ਬਂ ਯਾਵਕਾਲਿਕਂ ਵੁਚ੍ਚਤਿ, ਤਸ੍ਸ ਅਜ੍ਝੋਹਰਣਂ ਇਧ ਉਤ੍ਤਰਪਦਲੋਪੇਨ ਭੋਜਨਨ੍ਤਿ ਅਧਿਪ੍ਪੇਤਂ. ਵਿਕਾਲੇ ਭੋਜਨਂ ਅਜ੍ਝੋਹਰਣਂ ਵਿਕਾਲਭੋਜਨਂ, ਵਿਕਾਲੇ ਵਾਯਾਵਕਾਲਿਕਸ੍ਸ ਭੋਜਨਂ ਅਜ੍ਝੋਹਰਣਂ ਵਿਕਾਲਭੋਜਨਨ੍ਤਿਪਿ ਅਤ੍ਥੋ ਗਹੇਤਬ੍ਬੋ, ਤਂ ਅਤ੍ਥਤੋ ਵਿਕਾਲੇ ਯਾਵਕਾਲਿਕਅਜ੍ਝੋਹਰਣਚੇਤਨਾਵ.

ਸਾਸਨਸ੍ਸ ਅਨਨੁਲੋਮਤ੍ਤਾ ਵਿਸੂਕਂ ਪਟਾਣੀਭੂਤਂ ਦਸ੍ਸਨਂ ‘‘ਵਿਸੂਕਦਸ੍ਸਨਂ, ਨਚ੍ਚਗੀਤਾਦਿਦਸ੍ਸਨਸਵਨਾਨਞ੍ਚੇਵ ਵਟ੍ਟਕਯੁਦ੍ਧਜੂਤਕੀਲ਼ਾਦਿਸਬ੍ਬਕੀਲ਼ਾਨਞ੍ਚ ਨਾਮਂ. ਦਸ੍ਸਨਨ੍ਤਿ ਚੇਤ੍ਥ ਪਞ੍ਚਨ੍ਨਮ੍ਪਿ ਵਿਞ੍ਞਾਣਾਨਂ ਯਥਾਸਕਂ ਵਿਸਯਸ੍ਸ ਆਲੋਚਨਸਭਾਵਤਾਯ ਦਸ੍ਸਨਸਦ੍ਦੇਨ ਸਙ੍ਗਹੇਤਬ੍ਬਤ੍ਤਾ ਸਵਨਮ੍ਪਿ ਸਙ੍ਗਹਿਤਂ. ਨਚ੍ਚਗੀਤਵਾਦਿਤਸਦ੍ਦੇਹਿ ਚੇਤ੍ਥ ਅਤ੍ਤਨੋ ਨਚ੍ਚਨਗਾਯਨਾਦੀਨਿਪਿ ਸਙ੍ਗਹਿਤਾਨੀਤਿ ਦਟ੍ਠਬ੍ਬਂ.

ਮਾਲਾਤਿ ਬਦ੍ਧਮਬਦ੍ਧਂ ਵਾ ਪੁਪ੍ਫਂ, ਅਨ੍ਤਮਸੋ ਸੁਤ੍ਤਾਦਿਮਯਮ੍ਪਿ ਅਲਙ੍ਕਾਰਤ੍ਥਾਯ ਪਿਲ਼ਨ੍ਧਿਯਮਾਨਂ ਮਾਲਾਤ੍ਵੇਵ ਵੁਚ੍ਚਤਿ. ਗਨ੍ਧਨ੍ਤਿ ਵਾਸਚੁਣ੍ਣਾਦਿਵਿਲੇਪਨਤੋ ਅਞ੍ਞਂ ਯਂ ਕਿਞ੍ਚਿ ਗਨ੍ਧਜਾਤਂ. ਵਿਲੇਪਨਨ੍ਤਿ ਪਿਸਿਤ੍ਵਾ ਗਹਿਤਂ ਛਵਿਰਾਗਕਰਣਞ੍ਚੇਵ ਗਨ੍ਧਜਾਤਞ੍ਚ. ਧਾਰਣਂ ਨਾਮ ਪਿਲ਼ਨ੍ਧਨਂ. ਮਣ੍ਡਨਂ ਨਾਮ ਊਨਟ੍ਠਾਨਪੂਰਣਂ. ਗਨ੍ਧਵਸੇਨ, ਛਵਿਰਾਗਵਸੇਨ ਵਾ ਸਾਦਿਯਨਂ ਵਿਭੂਸਨਂ ਨਾਮ, ਮਾਲਾਦੀਸੁ ਵਾ ਧਾਰਣਾਦੀਨਿ ਯਥਾਕ੍ਕਮਂ ਯੋਜੇਤਬ੍ਬਾਨਿ. ਤੇਸਂ ਧਾਰਣਾਦੀਨਂ ਠਾਨਂ ਕਾਰਣਂ ਵੀਤਿਕ੍ਕਮਚੇਤਨਾ.

ਉਚ੍ਚਾਤਿ ਉਚ੍ਚ-ਸਦ੍ਦੇਨ ਸਮਾਨਤ੍ਥੋ ਨਿਪਾਤੋ. ਉਚ੍ਚਾਸਯਨਂ ਵੁਚ੍ਚਤਿ ਪਮਾਣਾਤਿਕ੍ਕਨ੍ਤਂ ਆਸਨ੍ਦਾਦਿ. ਮਹਾਸਯਨਂ ਅਕਪ੍ਪਿਯਤ੍ਥਰਣੇਹਿ ਅਤ੍ਥਤਂ ਸਲੋਹਿਤਵਿਤਾਨਞ੍ਚ. ਏਤੇਸੁ ਹਿ ਆਸਨਂ ਸਯਨਞ੍ਚ ਉਚ੍ਚਾਸਯਨਮਹਾਸਯਨਸਦ੍ਦੇਹਿ ਗਹਿਤਾਨਿ ਉਤ੍ਤਰਪਦਲੋਪੇਨ. ਜਾਤਰੂਪਰਜਤਪਟਿਗ੍ਗਹਣਾਤਿ ਏਤ੍ਥ ਰਜਤਸਦ੍ਦੇਨ ਦਾਰੁਮਾਸਕਾਦਿ ਸਬ੍ਬਂ ਰੂਪਿਯਂ ਸਙ੍ਗਹਿਤਂ. ਮੁਤ੍ਤਾਮਣਿਆਦਯੋਪੇਤ੍ਥ ਧਞ੍ਞਕ੍ਖੇਤ੍ਤਵਤ੍ਥਾਦਯੋ ਚ ਸਙ੍ਗਹਿਤਾਤਿ ਦਟ੍ਠਬ੍ਬਾ. ਪਟਿਗ੍ਗਹਣ-ਸਦ੍ਦੇਨ ਪਨ ਪਟਿਗ੍ਗਾਹਾਪਨਸਾਦਿਯਨਾਨਿਪਿ ਸਙ੍ਗਹਿਤਾਨਿ.

੧੪੯. ਸੇਨਾਸਨਗ੍ਗਾਹੋ ਚ ਪਟਿਪ੍ਪਸ੍ਸਮ੍ਭਨ੍ਤੀਤਿ ਇਮਿਨਾ ਵਸ੍ਸਚ੍ਛੇਦਂ ਦਸ੍ਸੇਤਿ. ਉਪਸਮ੍ਪਨ੍ਨਾਨਮ੍ਪਿ ਪਾਰਾਜਿਕਸਮਾਪਤ੍ਤਿਯਾ ਸਰਣਗਮਨਾਦਿਸਾਮਣੇਰਭਾਵਸ੍ਸਪਿ ਵਿਨਸ੍ਸਨਤੋ ਸੇਨਾਸਨਗ੍ਗਾਹੋ ਚ ਪਟਿਪ੍ਪਸ੍ਸਮ੍ਭਤਿ, ਸਙ੍ਘਲਾਭਮ੍ਪਿ ਤੇ ਨ ਲਭਨ੍ਤੀਤਿ ਵੇਦਿਤਬ੍ਬਂ. ਪੁਰਿਮਿਕਾਯ ਪੁਨ ਸਰਣਾਨਿ ਗਹਿਤਾਨੀਤਿ ਸਰਣਗਹਣੇਨ ਸਹ ਤਦਹੇਵਸ੍ਸ ਵਸ੍ਸੂਪਗਮਨਮ੍ਪਿ ਦਸ੍ਸੇਤਿ. ਪਚ੍ਛਿਮਿਕਾਯ ਵਸ੍ਸਾਵਾਸਿਕਨ੍ਤਿ ਵਸ੍ਸਾਵਾਸਿਕਲਾਭਗ੍ਗਹਣਦਸ੍ਸਨਮਤ੍ਤਮੇਵੇਤਂ, ਤਤੋ ਪੁਰੇਪਿ ਵਾ ਪਚ੍ਛਾਪਿ ਵਾ ਵਸ੍ਸਾਵਾਸਿਕਞ੍ਚ ਚੀਵਰਮਾਸੇਸੁ ਸਙ੍ਘੇ ਉਪ੍ਪਨ੍ਨਕਾਲਚੀਵਰਞ੍ਚ ਪੁਰਿਮਿਕਾਯ ਉਪਗਨ੍ਤ੍ਵਾ ਅਵਿਪਨ੍ਨਸੀਲੋ ਸਾਮਣੇਰੋ ਲਭਤਿ ਏਵ. ਸਚੇ ਪਚ੍ਛਿਮਿਕਾਯ ਗਹਿਤਾਨੀਤਿ ਪਚ੍ਛਿਮਿਕਾਯ ਵਸ੍ਸੂਪਗਮਨਞ੍ਚ ਛਿਨ੍ਨਵਸ੍ਸਤਞ੍ਚ ਦਸ੍ਸੇਤਿ. ਤਸ੍ਸ ਹਿ ਕਾਲਚੀਵਰਲਾਭੋ ਨ ਪਾਪੁਣਾਤਿ, ਤਸ੍ਮਾ ‘‘ਅਪਲੋਕੇਤ੍ਵਾ ਲਾਭੋ ਦਾਤਬ੍ਬੋ’’ਤਿ ਵੁਤ੍ਤਂ. ਵਸ੍ਸਾਵਾਸਿਕਲਾਭੋ ਪਨ ਯਦਿ ਸੇਨਾਸਨਸ੍ਸਾਮਿਕਾ ਦਾਯਕਾ ਸੇਨਾਸਨਗੁਤ੍ਤਤ੍ਥਾਯ ਪਚ੍ਛਿਮਿਕਾਯ ਉਪਗਨ੍ਤ੍ਵਾ ਵਤ੍ਤਂ ਕਤ੍ਵਾ ਅਤ੍ਤਨੋ ਸੇਨਾਸਨੇ ਵਸਨ੍ਤਸ੍ਸਪਿ ਵਸ੍ਸਾਵਾਸਿਕਂ ਦਾਤਬ੍ਬਨ੍ਤਿ ਵਦਨ੍ਤਿ, ਅਨਪਲੋਕੇਤ੍ਵਾਪਿ ਦਾਤਬ੍ਬੋਵ. ਯਂ ਪਨ ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ਮਹਾਵਗ੍ਗ ੩.੧੦੮) ‘‘ਪਚ੍ਛਿਮਿਕਾਯ ਵਸ੍ਸਾਵਾਸਿਕਂ ਲਚ੍ਛਤੀਤਿ ਪਚ੍ਛਿਮਿਕਾਯ ਪੁਨ ਵਸ੍ਸਂ ਉਪਗਤਤ੍ਤਾ ਲਚ੍ਛਤੀ’’ਤਿ ਵੁਤ੍ਤਂ, ਤਮ੍ਪਿ ਵਸ੍ਸਾਵਾਸਿਕੇ ਦਾਯਕਾਨਂ ਇਮਂ ਅਧਿਪ੍ਪਾਯਂ ਨਿਸ੍ਸਾਯ ਵੁਤ੍ਤਞ੍ਚੇ, ਸੁਨ੍ਦਰਂ, ਸਙ੍ਘਿਕਂ, ਕਾਲਚੀਵਰਮ੍ਪਿ ਸਨ੍ਧਾਯ ਵੁਤ੍ਤਞ੍ਚੇ, ਨ ਯੁਜ੍ਜਤੀਤਿ ਵੇਦਿਤਬ੍ਬਂ.

ਨ ਅਜਾਨਿਤ੍ਵਾਤਿ ‘‘ਸੁਰਾ’’ਤਿ ਅਜਾਨਿਤ੍ਵਾ ਪਿਵਤੋ ਪਾਣਾਤਿਪਾਤਾਵੇਰਮਣਿਆਦਿਸਬ੍ਬਸੀਲਭੇਦਂ ਸਰਣਭੇਦਞ੍ਚ ਨ ਆਪਜ੍ਜਤਿ. ਅਕੁਸਲਂ ਪਨ ਸੁਰਾਪਾਨਾਵੇਰਮਣਿਸੀਲਭੇਦੋ ਚ ਹੋਤਿ ਮਾਲਾਦਿਧਾਰਣਾਦੀਸੁ ਵਿਯਾਤਿ ਦਟ੍ਠਬ੍ਬਂ. ਇਤਰਾਨੀਤਿ ਵਿਕਾਲਭੋਜਨਾਵੇਰਮਣਿਆਦੀਨਿ. ਤਾਨਿਪਿ ਹਿ ਸਞ੍ਚਿਚ੍ਚ ਵੀਤਿਕ੍ਕਮਨ੍ਤਸ੍ਸ ਤਂ ਤਂ ਭਿਜ੍ਜਤਿ ਏਵ, ਇਤਰੀਤਰੇਸਂ ਪਨ ਅਭਿਜ੍ਜਨੇਨ ਨਾਸਨਙ੍ਗਾਨਿ ਨ ਹੋਨ੍ਤਿ. ਤੇਨੇਵ ‘‘ਏਤੇਸੁ ਭਿਨ੍ਨੇਸੂ’’ਤਿ ਭੇਦਵਚਨਂ ਵੁਤ੍ਤਂ.

ਅਚ੍ਚਯਂ ਦੇਸਾਪੇਤਬ੍ਬੋਤਿ ‘‘ਅਚ੍ਚਯੋ ਮਂ ਭਨ੍ਤੇ ਅਚ੍ਚਾਗਮਾ’’ਤਿਆਦਿਨਾ ਸਙ੍ਘਮਜ੍ਝੇ ਦੇਸਾਪੇਤ੍ਵਾ ਸਰਣਸੀਲਂ ਦਾਤਬ੍ਬਨ੍ਤਿ ਅਧਿਪ੍ਪਾਯੋ ਪਾਰਾਜਿਕਤ੍ਤਾ ਤੇਸਂ. ਤੇਨਾਹ ‘‘ਲਿਙ੍ਗਨਾਸਨਾਯ ਨਾਸੇਤਬ੍ਬੋ’’ਤਿ. ਅਯਮੇਵ ਹਿ ਨਾਸਨਾ ਇਧਾਧਿਪ੍ਪੇਤਾਤਿ ਲਿਙ੍ਗਨਾਸਨਾਕਾਰਣੇਹਿ ਪਾਣਾਤਿਪਾਤਾਦੀਹਿ ਅਵਣ੍ਣਭਾਸਨਾਦੀਨਂ ਸਹ ਪਤਿਤਤ੍ਤਾ ਵੁਤ੍ਤਂ. ਨਨੁ ਚ ਕਣ੍ਟਕਸਾਮਣੇਰੋਪਿ ਮਿਚ੍ਛਾਦਿਟ੍ਠਿਕੋ ਏਵ, ਤਸ੍ਸ ਚ ਹੇਟ੍ਠਾ ਦਣ੍ਡਕਮ੍ਮਨਾਸਨਾਵ ਵੁਤ੍ਤਾ, ਇਧ ਪਨ ਮਿਚ੍ਛਾਦਿਟ੍ਠਿਕਸ੍ਸ ਲਿਙ੍ਗਨਾਸਨਾ ਵੁਚ੍ਚਤਿ, ਕੋ ਇਮੇਸਂ ਭੇਦੋਤਿ ਚੋਦਨਂ ਮਨਸਿ ਨਿਧਾਯਾਹ ‘‘ਸਸ੍ਸਤੁਚ੍ਛੇਦਾਨਞ੍ਹਿ ਅਞ੍ਞਤਰਦਿਟ੍ਠਿਕੋ’’ਤਿ. ਏਤ੍ਥ ਚਾਯਂ ਅਧਿਪ੍ਪਾਯੋ – ਯੋ ਹਿ ‘‘ਅਤ੍ਤਾ ਇਸ੍ਸਰੋ’’ਤਿ ਵਾ ‘‘ਨਿਚ੍ਚੋ ਧੁਵੋ’’ਤਿਆਦਿਨਾ ਵਾ ‘‘ਅਤ੍ਤਾ ਉਚ੍ਛਿਜ੍ਜਿਸ੍ਸਤਿ ਵਿਨਸ੍ਸਿਸ੍ਸਤੀ’’ਤਿਆਦਿਨਾ ਵਾ ਤਿਤ੍ਥਿਯਪਰਿਕਪ੍ਪਿਤਂ ਯਂ ਕਿਞ੍ਚਿ ਸਸ੍ਸਤੁਚ੍ਛੇਦਦਿਟ੍ਠਿਂ ਦਲ਼੍ਹਂ ਗਹੇਤ੍ਵਾ ਵੋਹਰਤਿ, ਤਸ੍ਸ ਸਾ ਪਾਰਾਜਿਕਟ੍ਠਾਨਂ ਹੋਤਿ, ਸੋ ਚ ਲਿਙ੍ਗਨਾਸਨਾਯ ਨਾਸੇਤਬ੍ਬੋ. ਯੋ ਪਨ ਈਦਿਸਂ ਦਿਟ੍ਠਿਂ ਅਗ੍ਗਹੇਤ੍ਵਾ ਸਾਸਨਿਕੋਵ ਹੁਤ੍ਵਾ ਕੇਵਲਂ ਬੁਦ੍ਧਵਚਨਾਧਿਪ੍ਪਾਯਂ ਵਿਪਰੀਤਤੋ ਗਹੇਤ੍ਵਾ ਭਿਕ੍ਖੂਹਿ ਓਵਦਿਯਮਾਨੋਪਿ ਅਪ੍ਪਟਿਨਿਸ੍ਸਜ੍ਜਿਤ੍ਵਾ ਵੋਹਰਤਿ, ਤਸ੍ਸ ਸਾ ਦਿਟ੍ਠਿ ਪਾਰਾਜਿਕਂ ਨ ਹੋਤਿ, ਸੋ ਪਨ ਕਣ੍ਟਕਨਾਸਨਾਯ ਏਵ ਨਾਸੇਤਬ੍ਬੋਤਿ ਵਿਮਤਿਵਿਨੋਦਨਿਯਂ. ਇਮਸ੍ਮਿਂ ਠਾਨੇ ਸਾਰਤ੍ਥਦੀਪਨਿਯਂ ਦਸਸਿਕ੍ਖਾਪਦਤੋ ਪਟ੍ਠਾਯ ਵਿਤ੍ਥਾਰਤੋ ਵਣ੍ਣਨਾ ਆਗਤਾ, ਸਾ ਪੋਰਾਣਟੀਕਾਯਂ ਸਬ੍ਬਸੋ ਪੋਤ੍ਥਕਂ ਆਰੁਲ਼੍ਹਾ, ਤਸ੍ਮਾ ਇਧ ਨ ਵਿਤ੍ਥਾਰਯਿਮ੍ਹ.

੧੫੦. ‘‘ਅਤ੍ਤਨੋ ਪਰਿਵੇਣਨ੍ਤਿ ਇਦਂ ਪੁਗ੍ਗਲਿਕਂ ਸਨ੍ਧਾਯ ਵੁਤ੍ਤ’’ਨ੍ਤਿ ਗਣ੍ਠਿਪਦੇਸੁ ਵੁਤ੍ਤਂ. ਅਯਂ ਪਨੇਤ੍ਥ ਗਣ੍ਠਿਪਦਕਾਰਾਨਂ ਅਧਿਪ੍ਪਾਯੋ – ਵਸ੍ਸਗ੍ਗੇਨ ਪਤ੍ਤਸੇਨਾਸਨਨ੍ਤਿ ਇਮਿਨਾ ਤਸ੍ਸ ਵਸ੍ਸਗ੍ਗੇਨ ਪਤ੍ਤਂ ਸਙ੍ਘਿਕਸੇਨਾਸਨਂ ਵੁਤ੍ਤਂ. ਅਤ੍ਤਨੋ ਪਰਿਵੇਣਨ੍ਤਿ ਇਮਿਨਾਪਿ ਤਸ੍ਸੇਵ ਪੁਗ੍ਗਲਿਕਸੇਨਾਸਨਂ ਵੁਤ੍ਤਨ੍ਤਿ. ਅਯਂ ਪਨੇਤ੍ਥ ਅਮ੍ਹਾਕਂ ਖਨ੍ਤਿ – ਯਤ੍ਥ ਵਾ ਵਸਤੀਤਿ ਇਮਿਨਾ ਸਙ੍ਘਿਕਂ ਵਾ ਹੋਤੁ ਪੁਗ੍ਗਲਿਕਂ ਵਾ, ਤਸ੍ਸ ਨਿਬਦ੍ਧਵਸਨਕਸੇਨਾਸਨਂ ਵੁਤ੍ਤਂ. ਯਤ੍ਥ ਵਾ ਪਟਿਕ੍ਕਮਤੀਤਿ ਇਮਿਨਾ ਪਨ ਯਂ ਆਚਰਿਯੁਪਜ੍ਝਾਯਸ੍ਸ ਵਸਨਟ੍ਠਾਨਂ ਉਪਟ੍ਠਾਨਾਦਿਨਿਮਿਤ੍ਤਂ ਨਿਬਦ੍ਧਂ ਪਵਿਸਤਿ, ਤਂ ਆਚਰਿਯੁਪਜ੍ਝਾਯਾਨਂ ਪਵਿਸਨਟ੍ਠਾਨਂ ਵੁਤ੍ਤਂ, ਤਸ੍ਮਾ ਤਦੁਭਯਂ ਦਸ੍ਸੇਤੁਂ ‘‘ਉਭਯੇਨਪਿ ਅਤ੍ਤਨੋ ਪਰਿਵੇਣਞ੍ਚ ਵਸ੍ਸਗ੍ਗੇਨ ਪਤ੍ਤਸੇਨਾਸਨਞ੍ਚ ਵੁਤ੍ਤ’’ਨ੍ਤਿ ਆਹ. ਤਤ੍ਥ ਅਤ੍ਤਨੋ ਪਰਿਵੇਣਨ੍ਤਿ ਇਮਿਨਾ ਆਚਰਿਯੁਪਜ੍ਝਾਯਾਨਂ ਨਿਵਾਸਨਟ੍ਠਾਨਂ ਦਸ੍ਸਿਤਂ, ਵਸ੍ਸਗ੍ਗੇਨ ਪਤ੍ਤਸੇਨਾਸਨਨ੍ਤਿ ਇਮਿਨਾ ਪਨ ਤਸ੍ਸ ਵਸਨਟ੍ਠਾਨਂ, ਤਸ੍ਮਾ ਤਦੁਭਯਮ੍ਪਿ ਸਙ੍ਘਿਕਂ ਵਾ ਹੋਤੁ ਪੁਗ੍ਗਲਿਕਂ ਵਾ, ਆਵਰਣਂ ਕਾਤਬ੍ਬਮੇਵਾਤਿ. ਮੁਖਦ੍ਵਾਰਿਕਨ੍ਤਿ ਮੁਖਦ੍ਵਾਰੇਨ ਭੁਞ੍ਜਿਤਬ੍ਬਂ. ਦਣ੍ਡਕਮ੍ਮਂ ਕਤ੍ਵਾਤਿ ਦਣ੍ਡਕਮ੍ਮਂ ਯੋਜੇਤ੍ਵਾ. ਦਣ੍ਡੇਨ੍ਤਿ ਵਿਨੇਨ੍ਤਿ ਏਤੇਨਾਤਿ ਦਣ੍ਡੋ, ਸੋਯੇਵ ਕਤ੍ਤਬ੍ਬਤ੍ਤਾ ਕਮ੍ਮਨ੍ਤਿ ਦਣ੍ਡਕਮ੍ਮਂ, ਆਵਰਣਾਦਿ. ਦਣ੍ਡਕਮ੍ਮਮਸ੍ਸ ਕਰੋਥਾਤਿ ਅਸ੍ਸ ਦਣ੍ਡਕਮ੍ਮਂ ਯੋਜੇਥ ਆਣਾਪੇਥ. ਦਣ੍ਡਕਮ੍ਮਨ੍ਤਿ ਵਾ ਨਿਗ੍ਗਹਕਮ੍ਮਂ, ਤਸ੍ਮਾ ਨਿਗ੍ਗਹਮਸ੍ਸ ਕਰੋਥਾਤਿ ਵੁਤ੍ਤਂ ਹੋਤਿ. ਏਸ ਨਯੋ ਸਬ੍ਬਤ੍ਥ ਈਦਿਸੇਸੁ ਠਾਨੇਸੁ.

ਸੇਨਾਸਨਗ੍ਗਾਹੋ ਚ ਪਟਿਪ੍ਪਸ੍ਸਮ੍ਭਨ੍ਤੀਤਿ ਇਮਿਨਾ ਛਿਨ੍ਨਵਸ੍ਸੋ ਹੋਤੀਤਿ ਦੀਪੇਤਿ. ਸਚੇ ਆਕਿਣ੍ਣਦੋਸੋਵ ਹੋਤਿ, ਆਯਤਿਂ ਸਂਵਰੇ ਨ ਤਿਟ੍ਠਤਿ, ਨਿਕ੍ਕਡ੍ਢਿਤਬ੍ਬੋਤਿ ਏਤ੍ਥ ਸਚੇ ਯਾਵਤਤਿਯਂ ਵੁਚ੍ਚਮਾਨੋ ਨ ਓਰਮਤਿ, ਸਙ੍ਘਂ ਅਪਲੋਕੇਤ੍ਵਾ ਨਾਸੇਤਬ੍ਬੋ, ਪੁਨ ਪਬ੍ਬਜ੍ਜਂ ਯਾਚਮਾਨੋਪਿ ਅਪਲੋਕੇਤ੍ਵਾ ਪਬ੍ਬਾਜੇਤਬ੍ਬੋਤਿ ਵਦਨ੍ਤਿ. ਪਚ੍ਛਿਮਿਕਾਯ ਵਸ੍ਸਾਵਾਸਿਕਂ ਲਚ੍ਛਤੀਤਿ ਪਚ੍ਛਿਮਿਕਾਯ ਪੁਨ ਵਸ੍ਸਂ ਉਪਗਤਤ੍ਤਾ ਲਚ੍ਛਤਿ. ਅਪਲੋਕੇਤ੍ਵਾ ਲਾਭੋ ਦਾਤਬ੍ਬੋਤਿ ਛਿਨ੍ਨਵਸ੍ਸਤਾਯ ਵੁਤ੍ਤਂ. ਇਤਰਾਨਿ ਪਞ੍ਚ ਸਿਕ੍ਖਾਪਦਾਨੀਤਿ ਵਿਕਾਲਭੋਜਨਾਦੀਨਿ ਪਞ੍ਚ. ਅਚ੍ਚਯਂ ਦੇਸਾਪੇਤਬ੍ਬੋਤਿ ‘‘ਅਚ੍ਚਯੋ ਮਂ ਭਨ੍ਤੇ ਅਚ੍ਚਾਗਮਾ’’ਤਿਆਦਿਨਾ ਨਯੇਨ ਦੇਸਾਪੇਤਬ੍ਬੋਤਿ ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ਮਹਾਵਗ੍ਗ ੩.੧੦੮) ਵੁਤ੍ਤਂ.

ਇਤਿ ਵਿਨਯਸਙ੍ਗਹਸਂਵਣ੍ਣਨਾਭੂਤੇ ਵਿਨਯਾਲਙ੍ਕਾਰੇ

ਪਬ੍ਬਜ੍ਜਾਵਿਨਿਚ੍ਛਯਕਥਾਲਙ੍ਕਾਰੋ ਨਾਮ

ਦ੍ਵਾਵੀਸਤਿਮੋ ਪਰਿਚ੍ਛੇਦੋ.

ਉਪਸਮ੍ਪਦਾਵਿਨਿਚ੍ਛਯਕਥਾ

ਏਵਂ ਪਬ੍ਬਜ੍ਜਾਵਿਨਿਚ੍ਛਯਂ ਕਥੇਤ੍ਵਾ ਤਦਨਨ੍ਤਰਂ ਉਪਸਮ੍ਪਦਾਵਿਨਿਚ੍ਛਯੋ ਕਥੇਤਬ੍ਬੋ, ਏਵਂ ਸਨ੍ਤੇਪਿ ਅਟ੍ਠਕਥਾਯਂ ਉਪਸਮ੍ਪਦਾਵਿਨਿਚ੍ਛਯਕਥਾ ਪਾਲ਼ਿਵਣ੍ਣਨਾਵਸੇਨੇਵ ਆਗਤਾ, ਨੋ ਪਾਲ਼ਿਮੁਤ੍ਤਕਵਿਨਿਚ੍ਛਯਵਸੇਨ, ਇਮਸ੍ਸ ਪਨ ਪਕਰਣਸ੍ਸ ਪਾਲ਼ਿਮੁਤ੍ਤਕਵਿਨਿਚ੍ਛਯਕਥਾਭੂਤਤ੍ਤਾ ਤਮਕਥੇਤ੍ਵਾ ਨਿਸ੍ਸਯਵਿਨਿਚ੍ਛਯੋ ਏਵ ਆਚਰਿਯੇਨ ਕਥਿਤੋ, ਮਯਂ ਪਨ ਉਪਸਮ੍ਪਦਾਵਿਨਿਚ੍ਛਯਸ੍ਸ ਅਤਿਸੁਖੁਮਤ੍ਤਾ ਅਤਿਗਮ੍ਭੀਰਤ੍ਤਾ ਸੁਦੁਲ੍ਲਭਤ੍ਤਾ ਸਾਸਨਾਨੁਗ੍ਗਹਤ੍ਥਂ ਆਚਰਿਯੇਨ ਅਵੁਤ੍ਤਮ੍ਪਿ ਸਮਨ੍ਤਪਾਸਾਦਿਕਤੋ ਨੀਹਰਿਤ੍ਵਾ ਵਿਮਤਿਵਿਨੋਦਨੀਆਦਿਪ੍ਪਕਰਣੇਸੁ ਆਗਤਵਿਨਿਚ੍ਛਯੇਨ ਅਲਙ੍ਕਰਿਤ੍ਵਾ ਤਂ ਵਿਨਿਚ੍ਛਯਂ ਕਥਯਿਸ੍ਸਾਮ.

ਤੇਨ ਖੋ ਪਨ ਸਮਯੇਨਾਤਿ ਯੇਨ ਸਮਯੇਨ ਭਗਵਤਾ ‘‘ਨ ਭਿਕ੍ਖਵੇ ਅਨੁਪਜ੍ਝਾਯਕੋ’’ਤਿਆਦਿਸਿਕ੍ਖਾਪਦਂ ਅਪਞ੍ਞਤ੍ਤਂ ਹੋਤਿ, ਤੇਨ ਸਮਯੇਨ. ਅਨੁਪਜ੍ਝਾਯਕਨ੍ਤਿ ਉਪਜ੍ਝਂ ਅਗਾਹਾਪੇਤ੍ਵਾ ਸਬ੍ਬੇਨ ਸਬ੍ਬਂ ਉਪਜ੍ਝਾਯਵਿਰਹਿਤਂ, ਏਵਂ ਉਪਸਮ੍ਪਨ੍ਨਾ ਨੇਵ ਧਮ੍ਮਤੋ ਨ ਆਮਿਸਤੋ ਸਙ੍ਗਹਂ ਲਭਨ੍ਤਿ, ਤੇ ਪਰਿਹਾਯਨ੍ਤਿਯੇਵ, ਨ ਵਡ੍ਢਨ੍ਤਿ. ਨ ਭਿਕ੍ਖਵੇ ਅਨੁਪਜ੍ਝਾਯਕੋਤਿ ਉਪਜ੍ਝਂ ਅਗਾਹਾਪੇਤ੍ਵਾ ਨਿਰੁਪਜ੍ਝਾਯਕੋ ਨ ਉਪਸਮ੍ਪਾਦੇਤਬ੍ਬੋ, ਯੋ ਉਪਸਮ੍ਪਾਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ ਸਿਕ੍ਖਾਪਦਪਞ੍ਞਤ੍ਤਿਤੋ ਪਟ੍ਠਾਯ ਏਵਂ ਉਪਸਮ੍ਪਾਦੇਨ੍ਤਸ੍ਸ ਆਪਤ੍ਤਿ ਹੋਤਿ, ਕਮ੍ਮਂ ਪਨ ਨ ਕੁਪ੍ਪਤਿ. ਕੇਚਿ ‘‘ਕੁਪ੍ਪਤੀ’’ਤਿ ਵਦਨ੍ਤਿ, ਤਂ ਨ ਗਹੇਤਬ੍ਬਂ. ‘‘ਸਙ੍ਘੇਨ ਉਪਜ੍ਝਾਯੇਨਾ’’ਤਿਆਦੀਸੁਪਿ ਉਭਤੋਬ੍ਯਞ੍ਜਨਕੁਪਜ੍ਝਾਯਪਰਿਯੋਸਾਨੇਸੁ ਏਸੇਵ ਨਯੋ.

ਅਪਤ੍ਤਕਾ ਹਤ੍ਥੇਸੁ ਪਿਣ੍ਡਾਯ ਚਰਨ੍ਤੀਤਿ ਯੋ ਹਤ੍ਥੇਸੁ ਪਿਣ੍ਡੋ ਲਬ੍ਭਤਿ, ਤਦਤ੍ਥਾਯ ਚਰਨ੍ਤਿ. ਸੇਯ੍ਯਥਾਪਿ ਤਿਤ੍ਥਿਯਾਤਿ ਯਥਾ ਆਜੀਵਕਨਾਮਕਾ ਤਿਤ੍ਥਿਯਾ. ਸੂਪਬ੍ਯਞ੍ਜਨੇਹਿ ਮਿਸ੍ਸੇਤ੍ਵਾ ਹਤ੍ਥੇਸੁ ਠਪਿਤਪਿਣ੍ਡਮੇਵ ਹਿ ਤੇ ਭੁਞ੍ਜਨ੍ਤਿ. ਆਪਤ੍ਤਿ ਦੁਕ੍ਕਟਸ੍ਸਾਤਿ ਏਵਂ ਉਪਸਮ੍ਪਾਦੇਨ੍ਤਸ੍ਸੇਵ ਆਪਤ੍ਤਿ ਹੋਤਿ, ਕਮ੍ਮਂ ਪਨ ਨ ਕੁਪ੍ਪਤਿ, ਅਚੀਵਰਕਾਦਿਵਤ੍ਥੂਸੁਪਿ ਏਸੇਵ ਨਯੋ.

ਯਾਚਿਤਕੇਨਾਤਿ ‘‘ਯਾਵ ਉਪਸਮ੍ਪਦਂ ਕਰੋਮ, ਤਾਵ ਦੇਥਾ’’ਤਿ ਯਾਚਿਤ੍ਵਾ ਗਹਿਤੇਨ, ਤਾਵਕਾਲਿਕੇਨਾਤਿ ਅਤ੍ਥੋ. ਈਦਿਸੇਨ ਹਿ ਪਤ੍ਤੇਨ ਵਾ ਚੀਵਰੇਨ ਵਾ ਪਤ੍ਤਚੀਵਰੇਨ ਵਾ ਉਪਸਮ੍ਪਾਦੇਨ੍ਤਸ੍ਸੇਵ ਆਪਤ੍ਤਿ ਹੋਤਿ, ਕਮ੍ਮਂ ਪਨ ਨ ਕੁਪ੍ਪਤਿ, ਤਸ੍ਮਾ ਪਰਿਪੁਣ੍ਣਪਤ੍ਤਚੀਵਰੋਵ ਉਪਸਮ੍ਪਾਦੇਤਬ੍ਬੋ. ਸਚੇ ਤਸ੍ਸ ਨਤ੍ਥਿ, ਆਚਰਿਯੁਪਜ੍ਝਾਯਾ ਚਸ੍ਸ ਦਾਤੁਕਾਮਾ ਹੋਨ੍ਤਿ, ਅਞ੍ਞੇ ਵਾ ਭਿਕ੍ਖੂ, ਨਿਰਪੇਕ੍ਖੇਹਿ ਵਿਸ੍ਸਜ੍ਜੇਤ੍ਵਾ ਅਧਿਟ੍ਠਾਨੂਪਗਂ ਪਤ੍ਤਚੀਵਰਂ ਦਾਤਬ੍ਬਂ.

ਗੋਤ੍ਤੇਨਪਿ ਅਨੁਸ੍ਸਾਵੇਤੁਨ੍ਤਿ ‘‘ਮਹਾਕਸ੍ਸਪਸ੍ਸ ਉਪਸਮ੍ਪਦਾਪੇਕ੍ਖੋ’’ਤਿ ਏਵਂ ਗੋਤ੍ਤਂ ਵਤ੍ਵਾ ਅਨੁਸ੍ਸਾਵੇਤੁਂ ਅਨੁਜਾਨਾਮੀਤਿ ਅਤ੍ਥੋ. ਦ੍ਵੇ ਏਕਾਨੁਸ੍ਸਾਵਨੇਤਿ ਦ੍ਵੇ ਏਕਤੋ ਅਨੁਸ੍ਸਾਵਨੇ, ਏਕੇਨ ਏਕਸ੍ਸ, ਅਞ੍ਞੇਨ ਇਤਰਸ੍ਸਾਤਿ ਏਵਂ ਦ੍ਵੀਹਿ ਵਾ ਆਚਰਿਯੇਹਿ ਏਕੇਨ ਵਾ ਏਕਕ੍ਖਣੇ ਕਮ੍ਮਵਾਚਂ ਅਨੁਸ੍ਸਾਵੇਨ੍ਤੇਹਿ ਉਪਸਮ੍ਪਾਦੇਤੁਂ ਅਨੁਜਾਨਾਮੀਤਿ ਅਤ੍ਥੋ. ਦ੍ਵੇ ਤਯੋ ਏਕਾਨੁਸ੍ਸਾਵਨੇ ਕਾਤੁਂ, ਤਞ੍ਚ ਖੋ ਏਕੇਨ ਉਪਜ੍ਝਾਯੇਨਾਤਿ ਦ੍ਵੇ ਵਾ ਤਯੋ ਵਾ ਜਨੇ ਪੁਰਿਮਨਯੇਨੇਵ ਏਕਤੋ ਅਨੁਸ੍ਸਾਵਨੇ ਕਾਤੁਂ ਅਨੁਜਾਨਾਮਿ, ਤਞ੍ਚ ਖੋ ਅਨੁਸ੍ਸਾਵਨਕਿਰਿਯਂ ਏਕੇਨ ਉਪਜ੍ਝਾਯੇਨ ਅਨੁਜਾਨਾਮੀਤਿ ਅਤ੍ਥੋ. ਤਸ੍ਮਾ ਏਕੇਨ ਆਚਰਿਯੇਨ ਦ੍ਵੇ ਵਾ ਤਯੋ ਵਾ ਅਨੁਸ੍ਸਾਵੇਤਬ੍ਬਾ. ਦ੍ਵੀਹਿ ਵਾ ਤੀਹਿ ਵਾ ਆਚਰਿਯੇਹਿ ਵਿਸੁਂ ਵਿਸੁਂ ਏਕੇਨ ਏਕਸ੍ਸਾਤਿ ਏਵਂ ਏਕਪ੍ਪਹਾਰੇਨੇਵ ਦ੍ਵੇ ਤਿਸ੍ਸੋ ਵਾ ਕਮ੍ਮਵਾਚਾ ਕਾਤਬ੍ਬਾ. ਸਚੇ ਪਨ ਨਾਨਾਚਰਿਯਾ ਨਾਨੁਪਜ੍ਝਾਯਾ ਹੋਨ੍ਤਿ, ਤਿਸ੍ਸਤ੍ਥੇਰੋ ਸੁਮਨਤ੍ਥੇਰਸ੍ਸ ਸਦ੍ਧਿਵਿਹਾਰਿਕਂ, ਸੁਮਨਤ੍ਥੇਰੋ ਤਿਸ੍ਸਤ੍ਥੇਰਸ੍ਸ ਸਦ੍ਧਿਵਿਹਾਰਿਕਂ ਅਨੁਸ੍ਸਾਵੇਤਿ, ਅਞ੍ਞਮਞ੍ਞਞ੍ਚ ਗਣਪੂਰਕਾ ਹੋਨ੍ਤਿ, ਵਟ੍ਟਤਿ. ਸਚੇ ਨਾਨੁਪਜ੍ਝਾਯਾ ਹੋਨ੍ਤਿ, ਏਕੋ ਆਚਰਿਯੋ ਹੋਤਿ, ‘‘ਨ ਤ੍ਵੇਵ ਨਾਨੁਪਜ੍ਝਾਯੇਨਾ’’ਤਿ ਪਟਿਕ੍ਖਿਤ੍ਤਤ੍ਤਾ ਨ ਵਟ੍ਟਤਿ. ਇਦਂ ਸਨ੍ਧਾਯ ਹਿ ਏਸ ਪਟਿਕ੍ਖੇਪੋ.

ਪਠਮਂ ਉਪਜ੍ਝਂ ਗਾਹਾਪੇਤਬ੍ਬੋਤਿ ਏਤ੍ਥ ਵਜ੍ਜਾਵਜ੍ਜਂ ਉਪਨਿਜ੍ਝਾਯਤੀਤਿ ਉਪਜ੍ਝਾ, ਤਂ ਉਪਜ੍ਝਂ ‘‘ਉਪਜ੍ਝਾਯੋ ਮੇ, ਭਨ੍ਤੇ, ਹੋਹੀ’’ਤਿ ਏਵਂ ਵਦਾਪੇਤ੍ਵਾ ਗਾਹਾਪੇਤਬ੍ਬੋ. ਵਿਤ੍ਥਾਯਨ੍ਤੀਤਿ ਵਿਤ੍ਥਦ੍ਧਗਤ੍ਤਾ ਹੋਨ੍ਤਿ. ਯਂ ਜਾਤਨ੍ਤਿ ਯਂ ਤਵ ਸਰੀਰੇ ਜਾਤਂ ਨਿਬ੍ਬਤ੍ਤਂ ਵਿਜ੍ਜਮਾਨਂ, ਤਂ ਸਙ੍ਘਮਜ੍ਝੇ ਪੁਚ੍ਛਨ੍ਤੇ ਸਨ੍ਤਂ ਅਤ੍ਥੀਤਿ ਵਤ੍ਤਬ੍ਬਨ੍ਤਿਆਦਿ. ਉਲ੍ਲੁਮ੍ਪਤੁ ਮਨ੍ਤਿ ਉਦ੍ਧਰਤੁ ਮਂ.

ਤਾਵਦੇਵਾਤਿ ਉਪਸਮ੍ਪਨ੍ਨਸਮਨਨ੍ਤਰਮੇਵ. ਛਾਯਾ ਮੇਤਬ੍ਬਾਤਿ ਏਕਪੋਰਿਸਾ ਵਾ ਦ੍ਵਿਪੋਰਿਸਾ ਵਾਤਿ ਛਾਯਾ ਮੇਤਬ੍ਬਾ. ਉਤੁਪ੍ਪਮਾਣਂ ਆਚਿਕ੍ਖਿਤਬ੍ਬਨ੍ਤਿ ‘‘ਵਸ੍ਸਾਨੋ ਹੇਮਨ੍ਤੋ ਗਿਮ੍ਹੋ’’ਤਿ ਉਤੁਪ੍ਪਮਾਣਂ ਆਚਿਕ੍ਖਿਤਬ੍ਬਂ. ਏਤ੍ਥ ਚ ਉਤੁਯੇਵ ਉਤੁਪ੍ਪਮਾਣਂ. ਸਚੇ ਵਸ੍ਸਾਨਾਦਯੋ ਅਪਰਿਪੁਣ੍ਣਾ ਹੋਨ੍ਤਿ, ਯਤ੍ਤਕੇਹਿ ਦਿਵਸੇਹਿ ਯਸ੍ਸ ਯੋ ਉਤੁ ਅਪਰਿਪੁਣ੍ਣੋ, ਤੇ ਦਿਵਸੇ ਸਲ੍ਲਕ੍ਖੇਤ੍ਵਾ ਸੋ ਦਿਵਸਭਾਗੋ ਆਚਿਕ੍ਖਿਤਬ੍ਬੋ. ਅਥ ਵਾ ‘‘ਅਯਂ ਨਾਮ ਉਤੁ, ਸੋ ਚ ਖੋ ਪਰਿਪੁਣ੍ਣੋ ਅਪਰਿਪੁਣ੍ਣੋ ਵਾ’’ਤਿ ਏਵਂ ਉਤੁਪ੍ਪਮਾਣਂ ਆਚਿਕ੍ਖਿਤਬ੍ਬਂ, ‘‘ਪੁਬ੍ਬਣ੍ਹੋ ਵਾ ਸਾਯਨ੍ਹੋ ਵਾ’’ਤਿ ਏਵਂ ਦਿਵਸਭਾਗੋ ਆਚਿਕ੍ਖਿਤਬ੍ਬੋ. ਸਙ੍ਗੀਤੀਤਿ ਇਦਮੇਵ ਸਬ੍ਬਂ ਏਕਤੋ ਕਤ੍ਵਾ ‘‘ਤ੍ਵਂ ਕਿਂ ਲਭਸਿ, ਕਾ ਤੇ ਛਾਯਾ, ਕਿਂ ਉਤੁਪ੍ਪਮਾਣਂ, ਕੋ ਦਿਵਸਭਾਗੋ’’ਤਿ ਪੁਟ੍ਠੋ ‘‘ਇਦਂ ਨਾਮ ਲਭਾਮਿ ਵਸ੍ਸਂ ਵਾ ਹੇਮਨ੍ਤਂ ਵਾ ਗਿਮ੍ਹਂ ਵਾ, ਅਯਂ ਮੇ ਛਾਯਾ, ਇਦਂ ਉਤੁਪ੍ਪਮਾਣਂ, ਅਯਂ ਦਿਵਸਭਾਗੋਤਿ ਵਦੇਯ੍ਯਾਸੀ’’ਤਿ ਏਵਂ ਆਚਿਕ੍ਖਿਤਬ੍ਬਂ.

ਓਹਾਯਾਤਿ ਛਡ੍ਡੇਤ੍ਵਾ. ਦੁਤਿਯਂ ਦਾਤੁਨ੍ਤਿ ਉਪਸਮ੍ਪਦਮਾਲ਼ਕਤੋ ਪਰਿਵੇਣਂ ਗਚ੍ਛਨ੍ਤਸ੍ਸ ਦੁਤਿਯਕਂ ਦਾਤੁਂ ਅਨੁਜਾਨਾਮਿ, ਚਤ੍ਤਾਰਿ ਚ ਅਕਰਣੀਯਾਨਿ ਆਚਿਕ੍ਖਿਤੁਨ੍ਤਿ ਅਤ੍ਥੋ. ਪਣ੍ਡੁਪਲਾਸੋਤਿ ਪਣ੍ਡੁਵਣ੍ਣੋ ਪਤ੍ਤੋ. ਬਨ੍ਧਨਾ ਪਵੁਤ੍ਤੋਤਿ ਵਣ੍ਟਤੋ ਪਤਿਤੋ. ਅਭਬ੍ਬੋ ਹਰਿਤਤ੍ਥਾਯਾਤਿ ਪੁਨ ਹਰਿਤੋ ਭਵਿਤੁਂ ਅਭਬ੍ਬੋ. ਪੁਥੁਸਿਲਾਤਿ ਮਹਾਸਿਲਾ. ਅਯਂ ਸਮਨ੍ਤਪਾਸਾਦਿਕਤੋ ਨੀਹਰਿਤ੍ਵਾ ਆਭਤੋ ਉਪਸਮ੍ਪਦਾਵਿਨਿਚ੍ਛਯੋ.

ਅਨੁਪਜ੍ਝਾਯਾਦਿਵਤ੍ਥੂਸੁ ਸਿਕ੍ਖਾਪਦਂ ਅਪਞ੍ਞਤ੍ਤਨ੍ਤਿ ‘‘ਨ ਅਨੁਪਜ੍ਝਾਯਕੋ ਉਪਸਮ੍ਪਾਦੇਤਬ੍ਬੋ’’ਤਿ (ਮਹਾਵ. ੧੧੭) ਇਧੇਵ ਪਞ੍ਞਾਪਿਯਮਾਨਂ ਸਿਕ੍ਖਾਪਦਂ ਸਨ੍ਧਾਯ ਵੁਤ੍ਤਂ. ਕਮ੍ਮਂ ਪਨ ਨ ਕੁਪ੍ਪਤੀਤਿ ਇਦਂ ਉਪਜ੍ਝਾਯਾਭਾਵੇਪਿ ‘‘ਇਤ੍ਥਨ੍ਨਾਮਸ੍ਸ ਉਪਸਮ੍ਪਦਾਪੇਕ੍ਖਾ ਇਤ੍ਥਨ੍ਨਾਮੇਨ ਉਪਜ੍ਝਾਯੇਨਾ’’ਤਿ ਮਤਸ੍ਸ ਵਾ ਵਿਬ੍ਭਨ੍ਤਸ੍ਸ ਵਾ ਪੁਰਾਣਉਪਜ੍ਝਾਯਸ੍ਸ, ਅਞ੍ਞਸ੍ਸ ਵਾ ਯਸ੍ਸ ਕਸ੍ਸਚਿ ਅਵਿਜ੍ਜਮਾਨਸ੍ਸਪਿ ਨਾਮੇਨ ਸਬ੍ਬਤ੍ਥ ਉਪਜ੍ਝਾਯਕਿਤ੍ਤਨਸ੍ਸ ਕਤਤ੍ਤਾ ਵੁਤ੍ਤਂ. ਯਦਿ ਹਿ ਉਪਜ੍ਝਾਯਕਿਤ੍ਤਨਂ ਨ ਕਰੇਯ੍ਯ, ‘‘ਪੁਗ੍ਗਲਂ ਨ ਪਰਾਮਸਤੀ’’ਤਿ ਵੁਤ੍ਤਕਮ੍ਮਵਿਪਤ੍ਤਿ ਏਵ ਸਿਯਾ. ਤੇਨੇਵ ਪਾਲ਼ਿਯਂ (ਮਹਾਵ. ੧੧੭) ‘‘ਅਨੁਪਜ੍ਝਾਯਕ’’ਨ੍ਤਿ ਵੁਤ੍ਤਂ, ਅਟ੍ਠਕਥਾਯਮ੍ਪਿ (ਮਹਾਵ. ਅਟ੍ਠ. ੧੧੭) ਅਸ੍ਸ ‘‘ਉਪਜ੍ਝਾਯਂ ਅਕਿਤ੍ਤੇਤ੍ਵਾ’’ਤਿ ਅਵਤ੍ਵਾ ‘‘ਉਪਜ੍ਝਾਯਂ ਅਗਾਹਾਪੇਤ੍ਵਾ ਸਬ੍ਬੇਨ ਸਬ੍ਬਂ ਉਪਜ੍ਝਾਯਵਿਰਹਿਤਂ’’ ਇਚ੍ਚੇਵ ਅਤ੍ਥੋ ਵੁਤ੍ਤੋ. ਪਾਲ਼ਿਯਂ ਸਙ੍ਘੇਨ ਉਪਜ੍ਝਾਯੇਨਾਤਿ ‘‘ਅਯਂ ਇਤ੍ਥਨ੍ਨਾਮੋ ਸਙ੍ਘਸ੍ਸ ਉਪਸਮ੍ਪਦਾਪੇਕ੍ਖੋ, ਇਤ੍ਥਨ੍ਨਾਮੋ ਸਙ੍ਘਂ ਉਪਸਮ੍ਪਦਂ ਯਾਚਤਿ ਸਙ੍ਘੇਨ ਉਪਜ੍ਝਾਯੇਨਾ’’ਤਿ ਏਵਂ ਕਮ੍ਮਵਾਚਾਯ ਸਙ੍ਘਮੇਵ ਉਪਜ੍ਝਾਯਂ ਕਿਤ੍ਤੇਤ੍ਵਾਤਿ ਅਤ੍ਥੋ. ਏਵਂ ਗਣੇਨ ਉਪਜ੍ਝਾਯੇਨਾਤਿ ਏਤ੍ਥਾਪਿ ‘‘ਅਯਂ ਇਤ੍ਥਨ੍ਨਾਮੋ ਗਣਸ੍ਸ ਉਪਸਮ੍ਪਦਾਪੇਕ੍ਖੋ’’ਤਿਆਦਿਨਾ ਯੋਜਨਾ ਵੇਦਿਤਬ੍ਬਾ. ਏਵਂ ਵੁਤ੍ਤੇਪਿ ਕਮ੍ਮਂ ਨ ਕੁਪ੍ਪਤਿ ਏਵ ਦੁਕ੍ਕਟਸ੍ਸੇਵ ਵੁਤ੍ਤਤ੍ਤਾ, ਅਞ੍ਞਥਾ ‘‘ਸੋ ਚ ਪੁਗ੍ਗਲੋ ਅਨੁਪਸਮ੍ਪਨ੍ਨੋ’’ਤਿ ਵਦੇਯ੍ਯ. ਤੇਨਾਹ ‘‘ਸਙ੍ਘੇਨਾ’’ਤਿਆਦਿ. ਤਤ੍ਥ ਪਣ੍ਡਕਾਦਿਉਪਜ੍ਝਾਯੇਹਿ ਕਰਿਯਮਾਨੇਸੁ ਕਮ੍ਮੇਸੁ ਪਣ੍ਡਕਾਦਿਕੇ ਵਿਨਾਵ ਯਦਿ ਪਞ੍ਚਵਗ੍ਗਾਦਿਗਣੋ ਪੂਰਤਿ, ਕਮ੍ਮਂ ਨ ਕੁਪ੍ਪਤਿ, ਇਤਰਥਾ ਕੁਪ੍ਪਤੀਤਿ ਵੇਦਿਤਬ੍ਬਂ.

ਅਪਤ੍ਤਚੀਵਰਵਤ੍ਥੂਸੁਪਿ ਪਤ੍ਤਚੀਵਰਾਨਂ ਅਭਾਵੇਪਿ ‘‘ਪਰਿਪੁਣ੍ਣਸ੍ਸ ਪਤ੍ਤਚੀਵਰ’’ਨ੍ਤਿ ਕਮ੍ਮਵਾਚਾਯ ਸਾਵਿਤਤ੍ਤਾ ਕਮ੍ਮਕੋਪਂ ਅਵਤ੍ਵਾ ਦੁਕ੍ਕਟਮੇਵ ਵੁਤ੍ਤਂ. ਇਤਰਥਾ ਸਾਵਨਾਯ ਹਾਪਨਤੋ ਕਮ੍ਮਕੋਪੋ ਏਵ ਸਿਯਾ. ਕੇਚਿ ਪਨ ‘‘ਪਠਮਂ ਅਨੁਞ੍ਞਾਤਕਮ੍ਮਵਾਚਾਯਂ ਉਪਸਮ੍ਪਨ੍ਨਾ ਵਿਯ ਇਦਾਨਿਪਿ ‘ਪਰਿਪੁਣ੍ਣਸ੍ਸ ਪਤ੍ਤਚੀਵਰ’ਨ੍ਤਿ ਅਵਤ੍ਵਾ ਕਮ੍ਮਵਾਚਾਯ ਉਪਸਮ੍ਪਨ੍ਨਾਪਿ ਸੂਪਸਮ੍ਪਨ੍ਨਾ ਏਵਾ’’ਤਿ ਵਦਨ੍ਤਿ, ਤਂ ਨ ਯੁਤ੍ਤਂ. ਅਨੁਞ੍ਞਾਤਕਾਲਤੋ ਪਟ੍ਠਾਯ ਹਿ ਅਪਰਾਮਸਨਂ ਸਾਵਨਾਯ ਹਾਪਨਵਿਪਤ੍ਤਿ ਏਵ ਹੋਤਿ ‘‘ਇਤ੍ਥਨ੍ਨਾਮੋ ਸਙ੍ਘਂ ਉਪਸਮ੍ਪਦਂ ਯਾਚਤੀ’’ਤਿ ਪਦਸ੍ਸ ਹਾਪਨੇ ਵਿਯ. ਤਮ੍ਪਿ ਹਿ ਪਚ੍ਛਾ ਅਨੁਞ੍ਞਾਤਂ, ‘‘ਸਙ੍ਘਂ, ਭਨ੍ਤੇ, ਉਪਸਮ੍ਪਦਂ ਯਾਚਾਮੀ’’ਤਿਆਦਿਵਾਕ੍ਯੇਨ ਅਯਾਚੇਤ੍ਵਾ ਤਮ੍ਪਿ ਉਪਸਮ੍ਪਾਦੇਨ੍ਤੋ ‘‘ਅਯਂ ਇਤ੍ਥਨ੍ਨਾਮੋ ਸਙ੍ਘਂ ਉਪਸਮ੍ਪਦਂ ਯਾਚਤੀ’’ਤਿ ਵਤ੍ਵਾਵ ਯਦਿ ਕਮ੍ਮਵਾਚਂ ਕਰੋਤਿ, ਕਮ੍ਮਂ ਸੁਕਤਮੇਵ ਹੋਤਿ. ਨੋ ਚੇ, ਵਿਪਨ੍ਨਂ. ਸਬ੍ਬਪਚ੍ਛਾ ਹਿ ਅਨੁਞ੍ਞਾਤਕਮ੍ਮਵਾਚਤੋ ਕਿਞ੍ਚਿਪਿ ਪਰਿਹਾਪੇਤੁਂ ਨ ਵਟ੍ਟਤਿ, ਸਾਵਨਾਯ ਹਾਪਨਮੇਵ ਹੋਤਿ, ਅਞ੍ਞੇ ਵਾ ਭਿਕ੍ਖੂ ਦਾਤੁਕਾਮਾ ਹੋਨ੍ਤੀਤਿ ਸਮ੍ਬਨ੍ਧੋ, ਅਯਮੇਤ੍ਥ ਵਿਮਤਿਵਿਨੋਦਨਿਯਾ (ਵਿ. ਵਿ. ਟੀ. ਮਹਾਵਗ੍ਗ ੨.੧੧੭) ਆਭਤੋ ਵਿਨਿਚ੍ਛਯੋ. ਸਾਰਤ੍ਥਦੀਪਨੀਵਿਨਿਚ੍ਛਯੋ ਪਨ ਇਧੇਵ ਅਨ੍ਤੋਗਧਾ ਹੋਤਿ ਅਪ੍ਪਤਰਤ੍ਤਾ ਅਵਿਸੇਸਤ੍ਤਾ ਚ.

ਵਜਿਰਬੁਦ੍ਧਿਟੀਕਾਯਂ (ਵਜਿਰ. ਟੀ. ਮਹਾਵਗ੍ਗ ੧੧੭) ਪਨ ‘‘ਕੇਚਿ ਕੁਪ੍ਪਤੀਤਿ ਵਦਨ੍ਤਿ, ਤਂ ਨ ਗਹੇਤਬ੍ਬ’’ਨ੍ਤਿ ਯਂ ਵੁਤ੍ਤਂ, ਤਂ ‘‘ਪਞ੍ਚਵਗ੍ਗਕਰਣੀਯਞ੍ਚੇ, ਭਿਕ੍ਖਵੇ, ਕਮ੍ਮਂ, ਭਿਕ੍ਖੁਨਿਪਞ੍ਚਮੋ ਕਮ੍ਮਂ ਕਰੇਯ੍ਯ, ਅਕਮ੍ਮਂ ਨ ਚ ਕਰਣੀਯ’’ਨ੍ਤਿਆਦਿਨਾ (ਮਹਾਵ. ੩੯੦) ਨਯੇਨ ਵੁਤ੍ਤਤ੍ਤਾ ਪਣ੍ਡਕਾਨਂ ਗਣਪੂਰਣਭਾਵੇ ਏਵ ਕਮ੍ਮਂ ਕੁਪ੍ਪਤਿ, ਨ ਸਬ੍ਬਨ੍ਤਿ ਕਤ੍ਵਾ ਸੁਵੁਤ੍ਤਂ, ਇਤਰਥਾ ‘‘ਪਣ੍ਡਕੁਪਜ੍ਝਾਯੇਨ ਕਮ੍ਮਂ ਕਰੇਯ੍ਯ, ਅਕਮ੍ਮਂ ਨ ਚ ਕਰਣੀਯ’’ਨ੍ਤਿਆਦਿਕਾਯ ਪਾਲ਼ਿਯਾ ਭਵਿਤਬ੍ਬਂ ਸਿਯਾ. ਯਥਾ ਅਪਰਿਪੁਣ੍ਣਪਤ੍ਤਚੀਵਰਸ੍ਸ ਉਪਸਮ੍ਪਾਦਨਕਾਲੇ ਕਮ੍ਮਵਾਚਾਯਂ ‘‘ਪਰਿਪੁਣ੍ਣਸ੍ਸ ਪਤ੍ਤਚੀਵਰ’’ਨ੍ਤਿ ਅਸਨ੍ਤਂ ਵਤ੍ਥੁਂ ਕਿਤ੍ਤੇਤ੍ਵਾ ਉਪਸਮ੍ਪਦਾਯ ਕਤਾਯ ਤਸ੍ਮਿਂ ਅਸਨ੍ਤੇਪਿ ਉਪਸਮ੍ਪਦਾ ਰੁਹਤਿ, ਏਵਂ ‘‘ਅਯਂ ਬੁਦ੍ਧਰਕ੍ਖਿਤੋ ਆਯਸ੍ਮਤੋ ਧਮ੍ਮਰਕ੍ਖਿਤਸ੍ਸ ਉਪਸਮ੍ਪਦਾਪੇਕ੍ਖੋ’’ਤਿ ਅਵਤ੍ਥੁਂ ਪਣ੍ਡਕੁਪਜ੍ਝਾਯਾਦਿਂ, ਅਸਨ੍ਤਂ ਵਾ ਵਤ੍ਥੁਂ ਕਿਤ੍ਤੇਤ੍ਵਾ ਕਤਾਯਪਿ ਗਣਪੂਰਕਾਨਮਤ੍ਥਿਤਾਯ ਉਪਸਮ੍ਪਦਾ ਰੁਹਤੇਵ. ‘‘ਨ, ਭਿਕ੍ਖਵੇ, ਪਣ੍ਡਕੁਪਜ੍ਝਾਯੇਨ ਉਪਸਮ੍ਪਾਦੇਤਬ੍ਬੋ, ਯੋ ਉਪਸਮ੍ਪਾਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ, ਸੋ ਚ ਪੁਗ੍ਗਲੋ ਅਨੁਪਸਮ੍ਪਨ੍ਨੋ’’ਤਿਆਦਿਵਚਨਸ੍ਸ ਅਭਾਵਾ ਅਯਮਤ੍ਥੋ ਸਿਦ੍ਧੋਵ ਹੋਤਿ. ਨ ਹਿ ਬੁਦ੍ਧਾ ਵਤ੍ਤਬ੍ਬਯੁਤ੍ਤਂ ਨ ਵਦਨ੍ਤਿ. ਤੇਨ ਵੁਤ੍ਤਂ ‘‘ਯੋ ਪਨ ਭਿਕ੍ਖੁ ਜਾਨਂ ਊਨਵੀਸਤਿਵਸ੍ਸਂ …ਪੇ… ਸੋ ਚ ਪੁਗ੍ਗਲੋ ਅਨੁਪਸਮ੍ਪਨ੍ਨੋ’’ਤਿਆਦਿ (ਪਾਚਿ. ੪੦੩). ਤਥਾ ‘‘ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ’’ਤਿ (ਮਹਾਵ. ੭੧) ਵਚਨਤੋ ਥੇਯ੍ਯਸਂਵਾਸਕਾਦਿਆਚਰਿਯੇਹਿ ਅਨੁਸ੍ਸਾਵਨਾਯ ਕਤਾਯ ਉਪਸਮ੍ਪਦਾ ਨ ਰੁਹਤਿ ਤੇਸਂ ਅਭਿਕ੍ਖੁਤ੍ਤਾਤਿ ਵਚਨਮ੍ਪਿ ਨ ਗਹੇਤਬ੍ਬਂ.

ਕਿਞ੍ਚ ਭਿਯ੍ਯੋ – ‘‘ਇਮਾਨਿ ਚਤ੍ਤਾਰਿ ਕਮ੍ਮਾਨਿ ਪਞ੍ਚਹਾਕਾਰੇਹਿ ਵਿਪਜ੍ਜਨ੍ਤੀ’’ਤਿਆਦਿਨਾ (ਪਰਿ. ੪੮੨) ਨਯੇਨ ਕਮ੍ਮਾਨਂ ਸਮ੍ਪਤ੍ਤਿਵਿਪਤ੍ਤਿਯਾ ਕਥਿਯਮਾਨਾਯ ‘‘ਸਤ੍ਤਹਿ ਆਕਾਰੇਹਿ ਕਮ੍ਮਾਨਿ ਵਿਪਜ੍ਜਨ੍ਤਿ ਵਤ੍ਥੁਤੋ ਵਾ ਞਤ੍ਤਿਤੋ ਵਾ ਅਨੁਸ੍ਸਾਵਨਤੋ ਵਾ ਸੀਮਤੋ ਵਾ ਪਰਿਸਤੋ ਵਾ ਉਪਜ੍ਝਾਯਤੋ ਵਾ ਆਚਰਿਯਤੋ ਵਾ’’ਤਿ ਅਕਥਿਤਤ੍ਤਾ ਨ ਗਹੇਤਬ੍ਬਂ. ‘‘ਪਰਿਸਤੋ ਵਾ’’ਤਿ ਵਚਨੇਨ ਆਚਰਿਯੁਪਜ੍ਝਾਯਾਨਂ ਵਾ ਸਙ੍ਗਹੋ ਕਤੋਤਿ ਚੇ? ਨ, ‘‘ਦ੍ਵਾਦਸਹਿ ਆਕਾਰੇਹਿ ਪਰਿਸਤੋ ਕਮ੍ਮਾਨਿ ਵਿਪਜ੍ਜਨ੍ਤੀ’’ਤਿ ਏਤਸ੍ਸ ਵਿਭਙ੍ਗੇ ਤੇਸਮਨਾਮਟ੍ਠਤ੍ਤਾ, ਅਯਮਤ੍ਥੋ ਯਸ੍ਮਾ ਤਤ੍ਥ ਤਤ੍ਥ ਸਰੂਪੇਨ ਵੁਤ੍ਤਪਾਲ਼ਿਵਸੇਨੇਵ ਸਕ੍ਕਾ ਜਾਨਿਤੁਂ, ਤਸ੍ਮਾ ਨਯਮੁਖਂ ਦਸ੍ਸੇਤ੍ਵਾ ਸਂਖਿਤ੍ਤੋਤਿ ਅਯਮਸ੍ਸ ਯੁਤ੍ਤਿਗਵੇਸਨਾਤਿ ਵੁਤ੍ਤਂ.

ਤਤ੍ਰਿਦਂ ਵਿਚਾਰੇਤਬ੍ਬਂ – ਅਨੁਪਜ੍ਝਾਯਕਂ ਉਪਸਮ੍ਪਾਦੇਨ੍ਤਾ ਤੇ ਭਿਕ੍ਖੂ ਯਥਾਵੁਤ੍ਤਨਯੇਨ ਅਭੂਤਂ ਵਤ੍ਥੁਂ ਕਿਤ੍ਤਯਿਂਸੁ, ਉਦਾਹੁ ਮੁਸਾਵਾਦਭਯਾ ਤਾਨੇਵ ਪਦਾਨਿ ਨ ਸਾਵੇਸੁਨ੍ਤਿ. ਕਿਞ੍ਚੇਤ੍ਥ – ਯਦਿ ਤਾਵ ਉਪਜ੍ਝਾਯਾਭਾਵਤੋ ਨ ਸਾਵੇਸੁਂ, ‘‘ਪੁਗ੍ਗਲਂ ਨ ਪਰਾਮਸਤੀ’’ਤਿ ਵੁਤ੍ਤਵਿਪਤ੍ਤਿਪ੍ਪਸਙ੍ਗੋ ਹੋਤਿ, ਅਥ ਸਾਵੇਸੁਂ, ਮੁਸਾਵਾਦੋ ਨੇਸਂ ਭਵਤੀਤਿ? ਵੁਚ੍ਚਤੇ – ਸਾਵੇਸੁਂਯੇਵ ਯਥਾਵੁਤ੍ਤਵਿਪਤ੍ਤਿਪ੍ਪਸਙ੍ਗਭਯਾ, ‘‘ਕਮ੍ਮਂ ਪਨ ਨ ਕੁਪ੍ਪਤੀ’’ਤਿ ਅਟ੍ਠਕਥਾਯਂ ਵੁਤ੍ਤਤ੍ਤਾ ਚ. ਨ, ਮੁਸਾਵਾਦਸ੍ਸ ਅਸਮ੍ਭਵਤੋ, ਮੁਸਾਵਾਦੇਨਪਿ ਕਮ੍ਮਸਮ੍ਭਵਤੋ ਚ. ਨ ਹਿ ਸਕ੍ਕਾ ਮੁਸਾਵਾਦੇਨ ਕਮ੍ਮਵਿਪਤ੍ਤਿਸਮ੍ਪਤ੍ਤਿਂ ਕਾਤੁਨ੍ਤਿ. ਤਸ੍ਮਾ ‘‘ਅਨੁਪਜ੍ਝਾਯਕਂ ਉਪਸਮ੍ਪਾਦੇਨ੍ਤੀ’’ਤਿ ਵਚਨਸ੍ਸ ਚ ਉਭਯਦੋਸਵਿਨਿਮੁਤ੍ਤੋ ਅਤ੍ਥੋ ਪਰਿਯੇਸਿਤਬ੍ਬੋ.

ਅਯਞ੍ਚੇਤ੍ਥ ਯੁਤ੍ਤਿ – ਯਥਾ ਪੁਬ੍ਬੇ ਪਬ੍ਬਜ੍ਜੁਪਸਮ੍ਪਦੁਪਜ੍ਝਾਯੇਸੁ ਵਿਜ੍ਜਮਾਨੇਸੁਪਿ ਉਪਜ੍ਝਾਯਗ੍ਗਹਣਕ੍ਕਮੇਨ ਅਗ੍ਗਹਿਤਤ੍ਤਾ ‘‘ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਅਨੁਪਜ੍ਝਾਯਕ’’ਨ੍ਤਿਆਦਿ ਵੁਤ੍ਤਂ, ਤਥਾ ਇਧਾਪਿ ਉਪਜ੍ਝਾਯਸ੍ਸ ਵਿਜ੍ਜਮਾਨਸ੍ਸੇਵ ਸਤੋ ਅਗ੍ਗਹਿਤਤ੍ਤਾ ‘‘ਅਨੁਪਜ੍ਝਾਯਕਂ ਉਪਸਮ੍ਪਾਦੇਨ੍ਤੀ’’ਤਿ ਵੁਤ੍ਤਂ. ਕਮ੍ਮਵਾਚਾਚਰਿਯੇਨ ਪਨ ‘‘ਗਹਿਤੋ ਤੇਨ ਉਪਜ੍ਝਾਯੋ’’ਤਿ ਸਞ੍ਞਾਯ ਉਪਜ੍ਝਾਯਂ ਕਿਤ੍ਤੇਤ੍ਵਾ ਕਮ੍ਮਵਾਚਂ ਸਾਵੇਤਬ੍ਬਂ. ਕੇਨਚਿ ਵਾ ਕਾਰਣੇਨ ਕਾਯਸਾਮਗ੍ਗਿਂ ਅਦੇਨ੍ਤਸ੍ਸ ਉਪਜ੍ਝਾਯਸ੍ਸ ਛਨ੍ਦਂ ਗਹੇਤ੍ਵਾ ਕਮ੍ਮਵਾਚਂ ਸਾਵੇਤਿ, ਉਪਜ੍ਝਾਯੋ ਵਾ ਉਪਸਮ੍ਪਦਾਪੇਕ੍ਖਸ੍ਸ ਉਪਜ੍ਝਂ ਦਤ੍ਵਾ ਪਚ੍ਛਾ ਉਪਸਮ੍ਪਨ੍ਨੇ ਤਸ੍ਮਿਂ ਤਾਦਿਸੇ ਵਤ੍ਥੁਸ੍ਮਿਂ ਸਮਨੁਯੁਞ੍ਜਿਯਮਾਨੋ ਵਾ ਅਸਮਨੁਯੁਞ੍ਜਿਯਮਾਨੋ ਵਾ ਉਪਜ੍ਝਾਯਦਾਨਤੋ ਪੁਬ੍ਬੇ ਏਵ ਸਾਮਣੇਰੋ ਪਟਿਜਾਨਾਤਿ, ਸਿਕ੍ਖਾਪਚ੍ਚਕ੍ਖਾਤਕੋ ਵਾ ਅਨ੍ਤਿਮਵਤ੍ਥੁਅਜ੍ਝਾਪਨ੍ਨਕੋ ਵਾ ਪਟਿਜਾਨਾਤਿ, ਛਨ੍ਦਹਾਰਕਾਦਯੋ ਵਿਯ ਉਪਜ੍ਝਾਯੋ ਵਾ ਅਞ੍ਞਸੀਮਾਗਤੋ ਹੋਤਿ. ਕਮ੍ਮਵਾਚਾ ਰੁਹਤੀਤਿ ਵਤ੍ਵਾ ‘‘ਅਨੁਜਾਨਾਮਿ ਭਿਕ੍ਖਵੇ ਪਚ੍ਚਨ੍ਤਿਮੇਸੁ ਜਨਪਦੇਸੁ ਵਿਨਯਧਰਪਞ੍ਚਮੇਨ ਗਣੇਨ ਉਪਸਮ੍ਪਦ’’ਨ੍ਤਿ ਵੁਤ੍ਤਤ੍ਤਾ. ਕੇਚਿ ‘‘ਵਿਨਯਧਰਪਞ੍ਚਮੇਨ ਉਪਜ੍ਝਾਯੇਨ ਸਨ੍ਨਿਹਿਤੇਨੇਵ ਭਵਿਤਬ੍ਬ’’ਨ੍ਤਿ ਵਦਨ੍ਤੀਤਿ ਪੋਰਾਣਗਣ੍ਠਿਪਦੇ ਵੁਤ੍ਤਂ. ਸੋ ਚ ਪਾਠੋ ਅਪ੍ਪਮਾਣੋ ਮਜ੍ਝਿਮੇਸੁ ਜਨਪਦੇਸੁ ਤਸ੍ਸ ਵਚਨਸ੍ਸਾਭਾਵਤੋ. ਅਸਨ੍ਨਿਹਿਤੇਪਿ ਉਪਜ੍ਝਾਯੇ ਕਮ੍ਮਵਾਚਾ ਰੁਹਤੀਤਿ ਆਪਜ੍ਜਤੀਤਿ ਚੇ? ਨ. ਕਸ੍ਮਾ? ਕਮ੍ਮਸਮ੍ਪਤ੍ਤਿਯਂ ‘‘ਪੁਗ੍ਗਲਂ ਪਰਾਮਸਤੀ’’ਤਿ ਵੁਤ੍ਤਪਾਠੋਵ ਨੋ ਪਮਾਣਂ. ਨ ਹਿ ਤਤ੍ਥ ਅਸਨ੍ਨਿਹਿਤੋ ਉਪਜ੍ਝਾਯਸਙ੍ਖਾਤੋ ਪੁਗ੍ਗਲੋ ਪਰਾਮਸਨਂ ਅਰਹਤਿ, ਤਸ੍ਮਾ ਤਤ੍ਥ ਸਙ੍ਘਪਰਾਮਸਨਂ ਵਿਯ ਪੁਗ੍ਗਲਪਰਾਮਸਨਂ ਵੇਦਿਤਬ੍ਬਂ. ਸਙ੍ਘੇਨ ਗਣੇਨ ਉਪਜ੍ਝਾਯੇਨ ਉਪਸਮ੍ਪਾਦੇਨ੍ਤਿ ਤੇਸਂ ਅਤ੍ਥਤੋ ਪੁਗ੍ਗਲਤ੍ਤਾ, ਪਣ੍ਡਕਾਦਿਉਪਜ੍ਝਾਯੇਨ ਉਪਸਮ੍ਪਾਦੇਨ੍ਤਿ ਉਪਸਮ੍ਪਾਦਨਕਾਲੇ ਅਵਿਦਿਤਤ੍ਤਾਤਿ ਪੋਰਾਣਾ.

ਅਪਤ੍ਤਚੀਵਰਂ ਉਪਸਮ੍ਪਾਦੇਨ੍ਤੀਤਿ ਕਮ੍ਮਵਾਚਾਚਰਿਯੋ ‘‘ਪਰਿਪੁਣ੍ਣਸ੍ਸ ਪਤ੍ਤਚੀਵਰ’’ਨ੍ਤਿ ਸਞ੍ਞਾਯ, ਕੇਵਲਂ ਅਤ੍ਥਸਮ੍ਪਤ੍ਤਿਂ ਅਨਪੇਕ੍ਖਿਤ੍ਵਾ ਸਨ੍ਤਪਦਨੀਹਾਰੇਨ ਵਾ ‘‘ਪਰਿਪੁਣ੍ਣਸ੍ਸ ਪਤ੍ਤਚੀਵਰ’’ਨ੍ਤਿ ਕਮ੍ਮਵਾਚਂ ਸਾਵੇਤਿ. ਯਥਾ ਏਤਰਹਿ ਮਤਵਿਪ੍ਪਵੁਤ੍ਤਮਾਤਾਪਿਤਿਕੋਪਿ ‘‘ਅਨੁਞ੍ਞਾਤੋਸਿ ਮਾਤਾਪਿਤੂਹੀ’’ਤਿ ਪੁਟ੍ਠੋ ‘‘ਆਮ ਭਨ੍ਤੇ’’ਤਿ ਵਦਤਿ, ਕਿਂ ਬਹੁਨਾ? ਅਯਂ ਪਨੇਤ੍ਥ ਸਾਰੋ – ‘‘ਤਸ੍ਮਿਂ ਸਮਯੇ ਚਤ੍ਤਾਰਿ ਕਮ੍ਮਾਨਿ ਪਞ੍ਚਹਾਕਾਰੇਹਿ ਵਿਪਜ੍ਜਨ੍ਤੀ’’ਤਿ ਲਕ੍ਖਣਸ੍ਸ ਨ ਤਾਵ ਪਞ੍ਞਤ੍ਤਤ੍ਤਾ ਅਨੁਪਜ੍ਝਾਯਕਾਦਿਂ ਉਪਸਮ੍ਪਾਦੇਨ੍ਤਿ. ਵਜ੍ਜਨੀਯਪੁਗ੍ਗਲਾਨਂ ਅਵੁਤ੍ਤਤ੍ਤਾ ਪਣ੍ਡਕੁਪਜ੍ਝਾਯਾਦਿਂ ਉਪਸਮ੍ਪਾਦੇਨ੍ਤਿ, ਤੇਰਸਨ੍ਤਰਾਯਪੁਚ੍ਛਾਯ ਅਦਸ੍ਸਨਤ੍ਤਾ ਅਪਤ੍ਤਚੀਵਰਕਂ ਉਪਸਮ੍ਪਾਦੇਨ੍ਤਿ, ‘‘ਅਨੁਜਾਨਾਮਿ ਭਿਕ੍ਖਵੇ ਞਤ੍ਤਿਚਤੁਤ੍ਥੇਨ ਕਮ੍ਮੇਨ ਉਪਸਮ੍ਪਾਦੇਤੁ’’ਨ੍ਤਿ (ਮਹਾਵ. ੬੯) ਏਵਂ ਸਬ੍ਬਪਠਮਂ ਅਨੁਞ੍ਞਾਤਾਯ ਕਮ੍ਮਵਾਚਾਯ ‘‘ਪਰਿਪੁਣ੍ਣਸ੍ਸ ਪਤ੍ਤਚੀਵਰ’’ਨ੍ਤਿ ਅਵਚਨਮੇਤ੍ਥ ਸਾਧਕਨ੍ਤਿ ਵੇਦਿਤਬ੍ਬਂ. ਤਞ੍ਹਿ ਵਚਨਂ ਅਨੁਕ੍ਕਮੇਨਾਨੁਞ੍ਞਾਤਨ੍ਤਿ.

ਇਦਂ ਤਾਵ ਸਬ੍ਬਥਾ ਹੋਤੁ, ‘‘ਮੂਗਂ ਪਬ੍ਬਾਜੇਨ੍ਤਿ ਬਧਿਰਂ ਪਬ੍ਬਾਜੇਨ੍ਤੀ’’ਤਿ ਇਦਂ ਕਥਂ ਸਮ੍ਭਵਿਤੁਮਰਹਤਿ ਆਦਿਤੋ ਪਟ੍ਠਾਯ ‘‘ਅਨੁਜਾਨਾਮਿ ਭਿਕ੍ਖਵੇ ਇਮੇਹਿ ਤੀਹਿ ਸਰਣਗਮਨੇਹਿ ਪਬ੍ਬਜ੍ਜ’’ਨ੍ਤਿਆਦਿਨਾ ਅਨੁਞ੍ਞਾਤਤ੍ਤਾਤਿ? ਵੁਚ੍ਚਤੇ – ‘‘ਏਵਞ੍ਚ ਪਨ, ਭਿਕ੍ਖਵੇ, ਪਬ੍ਬਾਜੇਤਬ੍ਬੋਤਿ, ਏਵਂ ਵਦੇਹੀਤਿ ਵਤ੍ਤਬ੍ਬੋ…ਪੇ… ਤਤਿਯਮ੍ਪਿ ਸਙ੍ਘਂ ਸਰਣਂ ਗਚ੍ਛਾਮੀ’’ਤਿ ਏਤ੍ਥ ‘‘ਏਵਂ ਵਦੇਹੀਤਿ ਵਤ੍ਤਬ੍ਬੋ’’ਤਿ ਇਮਸ੍ਸ ਵਚਨਸ੍ਸ ਮਿਚ੍ਛਾ ਅਤ੍ਥਂ ਗਹੇਤ੍ਵਾ ਮੂਗਂ ਪਬ੍ਬਾਜੇਸੁਂ. ‘‘ਏਵਂ ਵਦੇਹੀ’’ਤਿ ਤਂ ਪਬ੍ਬਜ੍ਜਾਪੇਕ੍ਖਂ ਆਣਾਪੇਤ੍ਵਾ ਸਯਂ ਉਪਜ੍ਝਾਯੇਨ ਵਤ੍ਤਬ੍ਬੋ ‘‘ਤਤਿਯਮ੍ਪਿ ਸਙ੍ਘਂ ਸਰਣਂ ਗਚ੍ਛਾਮੀ’’ਤਿ, ਸੋ ਪਬ੍ਬਜ੍ਜਾਪੇਕ੍ਖਾ ਤਥਾ ਆਣਤ੍ਤੋ ਉਪਜ੍ਝਾਯਵਚਨਸ੍ਸ ਅਨੁ ਅਨੁ ਵਦਤੁ ਵਾ ਮਾ ਵਾ, ਤਤ੍ਥ ਤਤ੍ਥ ਭਗਵਾ ‘‘ਕਾਯੇਨ ਵਿਞ੍ਞਾਪੇਤਿ, ਵਾਚਾਯ ਵਿਞ੍ਞਾਪੇਤਿ, ਕਾਯੇਨ ਵਾਚਾਯ ਵਿਞ੍ਞਾਪੇਤਿ, ਗਹਿਤੋ ਹੋਤਿ ਉਪਜ੍ਝਾਯੋ. ਦਿਨ੍ਨੋ ਹੋਤਿ ਛਨ੍ਦੋ, ਦਿਨ੍ਨਾ ਹੋਤਿ ਪਾਰਿਸੁਦ੍ਧਿ, ਦਿਨ੍ਨਾ ਹੋਤਿ ਪਵਾਰਣਾ’’ਤਿ ਵਦਤਿ. ਤਦਨੁਮਾਨੇਨ ਵਾ ਕਾਯੇਨ ਤੇਨ ਪਬ੍ਬਜ੍ਜਾਪੇਕ੍ਖੇਨ ਵਿਞ੍ਞਤ੍ਤਂ ਹੋਤਿ ਸਰਣਗਮਨਨ੍ਤਿ ਵਾ ਲੋਕੇਪਿ ਕਾਯੇਨ ਵਿਞ੍ਞਾਪੇਨ੍ਤੋ ਏਵਂ ਵਦਤੀਤਿ ਵੁਚ੍ਚਤਿ, ਤਂ ਪਰਿਯਾਯਂ ਗਹੇਤ੍ਵਾ ਮੂਗਂ ਪਬ੍ਬਾਜੇਨ੍ਤੀਤਿ ਵੇਦਿਤਬ੍ਬਂ. ਪੋਰਾਣਗਣ੍ਠਿਪਦੇ ‘‘ਮੂਗਂ ਕਥਂ ਪਬ੍ਬਾਜੇਨ੍ਤੀਤਿ ਪੁਚ੍ਛਂ ਕਤ੍ਵਾ ਤਸ੍ਸ ਕਾਯਪਸਾਦਸਮ੍ਭਵਤੋ ਕਾਯੇਨ ਪਹਾਰਂ ਦਤ੍ਵਾ ਹਤ੍ਥਮੁਦ੍ਦਾਯ ਵਿਞ੍ਞਾਪੇਤ੍ਵਾ ਪਬ੍ਬਾਜੇਸੁ’’ਨ੍ਤਿ ਵੁਤ੍ਤਂ. ਕਿਂ ਬਹੁਨਾ?

ਅਯਂ ਪਨੇਤ੍ਥ ਸਾਰੋ – ਯਥਾ ਪੁਬ੍ਬੇ ਪਬ੍ਬਜ੍ਜਾਧਿਕਾਰੇ ਵਤ੍ਤਮਾਨੇ ਪਬ੍ਬਜ੍ਜਾਭਿਲਾਪਂ ਉਪਚ੍ਛਿਨ੍ਦਿਤ੍ਵਾ ‘‘ਪਣ੍ਡਕੋ, ਭਿਕ੍ਖਵੇ, ਅਨੁਪਸਮ੍ਪਨ੍ਨੋ ਨ ਉਪਸਮ੍ਪਾਦੇਤਬ੍ਬੋ’’ਤਿਆਦਿਨਾ (ਮਹਾਵ. ੧੦੯) ਨਯੇਨ ਉਪਸਮ੍ਪਦਵਸੇਨੇਵ ਅਭਿਲਾਪੋ ਕਤੋ. ਥੇਯ੍ਯਸਂਵਾਸਕਪਦੇ ਅਸਮ੍ਭਵਤੋ ਕਿਞ੍ਚਾਪਿ ਸੋ ਨ ਕਤੋ, ਪਬ੍ਬਜ੍ਜਾਵ ਤਤ੍ਥ ਕਤਾ, ਸਬ੍ਬਤ੍ਥ ਪਨ ਉਪਸਮ੍ਪਦਾਭਿਲਾਪੇਨ ਅਧਿਪ੍ਪੇਤਾ ਤਦਨੁਭਾਵਤੋ ਉਪਸਮ੍ਪਦਾਯ, ਪਬ੍ਬਜ੍ਜਾਯ ਵਾਰਿਤਾਯ ਉਪਸਮ੍ਪਦਾ ਵਾਰਿਤਾ ਹੋਤੀਤਿ ਕਤ੍ਵਾ, ਤਥਾ ਇਧ ਉਪਸਮ੍ਪਦਾਧਿਕਾਰੇ ਵਤ੍ਤਮਾਨੇ ਉਪਸਮ੍ਪਦਾਭਿਲਾਪਂ ਉਪਚ੍ਛਿਨ੍ਦਿਤ੍ਵਾ ਉਪਸਮ੍ਪਦਮੇਵ ਸਨ੍ਧਾਯ ਪਬ੍ਬਜ੍ਜਾਭਿਲਾਪੋ ਕਤੋਤਿ ਵੇਦਿਤਬ੍ਬੋ. ਕਾਮਂ ਸੋ ਨ ਕਤ੍ਤਬ੍ਬੋ, ਮੂਗਪਦੇ ਅਸਮ੍ਭਵਤੋ ਤਸ੍ਸ ਵਸੇਨ ਆਦਿਤੋ ਪਟ੍ਠਾਯ ਉਪਸਮ੍ਪਦਾਭਿਲਾਪੋਵ ਕਤ੍ਤਬ੍ਬੋ ਵਿਯ ਦਿਸ੍ਸਤਿ, ਤਥਾਪਿ ਤਸ੍ਸੇਵ ਮੂਗਪਦਸ੍ਸ ਵਸੇਨ ਆਦਿਤੋ ਪਟ੍ਠਾਯ ਪਬ੍ਬਜ੍ਜਾਭਿਲਾਪੋਵ ਕਤੋ ਮਿਚ੍ਛਾਗਹਣਨਿਵਾਰਣਤ੍ਥਂ. ਕਥਂ? ‘‘ਮੂਗੋ, ਭਿਕ੍ਖਵੇ, ਅਪਤ੍ਤੋ ਓਸਾਰਣਂ, ਤਞ੍ਚੇ ਸਙ੍ਘੋ ਓਸਾਰੇਤਿ, ਸੋਸਾਰਿਤੋ’’ਤਿ (ਮਹਾਵ. ੩੯੬) ਵਚਨਤੋ ਹਿ ਮੂਗੋ ਉਪਸਮ੍ਪਨ੍ਨੋ ਹੋਤੀਤਿ ਸਿਦ੍ਧਂ, ਸੋ ਕੇਵਲਂ ਉਪਸਮ੍ਪਨ੍ਨੋਵ ਹੋਤਿ, ਨ ਪਨ ਪਬ੍ਬਜਿਤੋ ਤਸ੍ਸ ਪਬ੍ਬਜ੍ਜਾਯ ਅਸਮ੍ਭਵਤੋਤਿ ਮਿਚ੍ਛਾਗਾਹੋ ਹੋਤਿ, ਤਂ ਪਰਿਵਜ੍ਜਾਪੇਤ੍ਵਾ ਯੋ ਉਪਸਮ੍ਪਨ੍ਨੋ, ਸੋ ਪਬ੍ਬਜਿਤੋਵ ਹੋਤਿ. ਪਬ੍ਬਜਿਤੋ ਪਨ ਅਤ੍ਥਿ ਕੋਚਿ ਉਪਸਮ੍ਪਨ੍ਨੋ, ਅਤ੍ਥਿ ਕੋਚਿ ਅਨੁਪਸਮ੍ਪਨ੍ਨੋਤਿ ਇਮਂ ਸਮ੍ਮਾਗਾਹਂ ਉਪ੍ਪਾਦੇਤਿ ਭਗਵਾਤਿ ਵੇਦਿਤਬ੍ਬਂ.

ਅਪਿਚ ਤੇਸਂ ਹਤ੍ਥਚ੍ਛਿਨ੍ਨਾਦੀਨਂ ਪਬ੍ਬਜਿਤਾਨਂ ਸੁਪਬ੍ਬਜਿਤਭਾਵਦੀਪਨਤ੍ਥਂ, ਪਬ੍ਬਜ੍ਜਾਭਾਵਸਙ੍ਕਾਨਿਵਾਰਣਤ੍ਥਞ੍ਚੇਤ੍ਥ ਪਬ੍ਬਜ੍ਜਾਭਿਲਾਪੋ ਕਤੋ. ਕਥਂ? ‘‘ਨ, ਭਿਕ੍ਖਵੇ, ਹਤ੍ਥਚ੍ਛਿਨ੍ਨੋ ਪਬ੍ਬਾਜੇਤਬ੍ਬੋ’’ਤਿਆਦਿਨਾ (ਮਹਾਵ. ੧੧੯) ਪਟਿਕ੍ਖੇਪੇਨ, ‘‘ਪਬ੍ਬਜਿਤਾ ਸੁਪਬ੍ਬਜਿਤਾ’’ਤਿ ਵੁਤ੍ਤਟ੍ਠਾਨਾਭਾਵੇਨ ਚ ਤੇਸਂ ਪਬ੍ਬਜ੍ਜਾਭਾਵਸਙ੍ਕਾ ਭਵੇਯ੍ਯ, ਯਥਾ ਪਸਙ੍ਕਾ ਭਵੇ, ਤਥਾ ਪਸਙ੍ਕਂ ਠਪੇਯ੍ਯ. ਖਨ੍ਧਕੇ ਉਪਸਮ੍ਪਦਂ ਸਨ੍ਧਾਯ ‘‘ਹਤ੍ਥਚ੍ਛਿਨ੍ਨੋ, ਭਿਕ੍ਖਵੇ, ਅਪਤ੍ਤੋ ਓਸਾਰਣਂ, ਤਞ੍ਚੇ ਸਙ੍ਘੋ ਓਸਾਰੇਤਿ, ਸੋਸਾਰਿਤੋ’’ਤਿਆਦਿਨਾ (ਮਹਾਵ. ੩੯੬) ਨਯੇਨ ਭਗਵਾ ਨਿਵਾਰੇਤਿ. ਤੇਨੇਵ ਨਯੇਨ ਪਬ੍ਬਜਿਤਾ ਪਨੇਤੇ ਸਬ੍ਬੇਪਿ ਸੁਪਬ੍ਬਜਿਤਾ ਏਵਾਤਿ ਦੀਪੇਤਿ. ਅਞ੍ਞਥਾ ਸਬ੍ਬੇਪੇਤੇ ਉਪਸਮ੍ਪਨ੍ਨਾਵ ਹੋਨ੍ਤਿ, ਨ ਪਬ੍ਬਜਿਤਾਤਿ ਅਯਮਨਿਟ੍ਠਪ੍ਪਸਙ੍ਗੋ ਆਪਜ੍ਜਤਿ. ਕਥਂ? ‘‘ਹਤ੍ਥਚ੍ਛਿਨ੍ਨੋ, ਭਿਕ੍ਖਵੇ, ਨ ਪਬ੍ਬਾਜੇਤਬ੍ਬੋ, ਪਬ੍ਬਜਿਤੋ ਨਾਸੇਤਬ੍ਬੋ’’ਤਿ ਵਾ ‘‘ਨ, ਭਿਕ੍ਖਵੇ, ਹਤ੍ਥਚ੍ਛਿਨ੍ਨੋ ਪਬ੍ਬਾਜੇਤਬ੍ਬੋ, ਯੋ ਪਬ੍ਬਾਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ, ਸੋ ਚ ਅਪਬ੍ਬਜਿਤੋ’’ਤਿ (ਮਹਾਵ. ੧੧੯) ਵਾ ਤਨ੍ਤਿਯਾ ਠਪਿਤਾਯ ਚਮ੍ਪੇਯ੍ਯਕ੍ਖਨ੍ਧਕੇ ‘‘ਸੋਸਾਰਿਤੋ’’ਤਿ ਵੁਤ੍ਤਤ੍ਤਾ ਕੇਵਲਂ ‘‘ਇਮੇ ਹਤ੍ਥਚ੍ਛਿਨ੍ਨਾਦਯੋ ਉਪਸਮ੍ਪਨ੍ਨਾਵ ਹੋਨ੍ਤਿ, ਨ ਪਬ੍ਬਜਿਤਾ’’ਤਿ ਵਾ ‘‘ਉਪਸਮ੍ਪਨ੍ਨਾਪਿ ਚੇ ਪਬ੍ਬਜਿਤਾ, ਨਾਸੇਤਬ੍ਬਾ’’ਤਿ ਵਾ ਅਨਿਟ੍ਠਕੋਟ੍ਠਾਸੋ ਆਪਜ੍ਜਤੀਤਿ ਅਧਿਪ੍ਪਾਯੋ.

ਇਦਂ ਪਨੇਤ੍ਥ ਵਿਚਾਰੇਤਬ੍ਬਂ – ‘‘ਸੋ ਚ ਅਪਬ੍ਬਜਿਤੋ’’ਤਿ ਵਚਨਾਭਾਵਤੋ ਮੂਗਸ੍ਸ ਪਬ੍ਬਜ੍ਜਾਸਿਦ੍ਧਿਪਸਙ੍ਗਤੋ ਪਬ੍ਬਜ੍ਜਾਪਿ ਏਕਤੋਸੁਦ੍ਧਿਯਾ ਹੋਤੀਤਿ ਅਯਮਨਿਟ੍ਠਕੋਟ੍ਠਾਸੋ ਕਥਂ ਨਾਪਜ੍ਜਤੀਤਿ? ਪਬ੍ਬਜ੍ਜਾਭਿਲਾਪੇਨ ਉਪਸਮ੍ਪਦਾ ਇਧਾਧਿਪ੍ਪੇਤਾਤਿ ਸਮ੍ਮਾਗਾਹੇਨ ਨਾਪਜ੍ਜਤੀਤਿ, ਅਞ੍ਞਥਾ ਯਥਾਬ੍ਯਞ੍ਜਨਂ ਅਤ੍ਥੇ ਗਹਿਤੇ ਯਥਾਪਞ੍ਞਤ੍ਤਦੁਕ੍ਕਟਾਭਾਵਸਙ੍ਖਾਤੋ ਅਪਰੋ ਅਨਿਟ੍ਠਕੋਟ੍ਠਾਸੋ ਆਪਜ੍ਜਤਿ. ਕਥਂ? ‘‘ਨ, ਭਿਕ੍ਖਵੇ, ਮੂਗੋ ਪਬ੍ਬਾਜੇਤਬ੍ਬੋ, ਯੋ ਪਬ੍ਬਾਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ ਵੁਤ੍ਤਦੁਕ੍ਕਟਂ ਪਬ੍ਬਜ੍ਜਾਪਰਿਯੋਸਾਨੇ ਹੋਤਿ, ਨ ਤਸ੍ਸਾਵਿਪ੍ਪਕਤਾਯ. ਪੁਬ੍ਬਪਯੋਗਦੁਕ੍ਕਟਮੇਵ ਹਿ ਪਠਮਂ ਆਪਜ੍ਜਤਿ, ਤਸ੍ਮਾ ਮੂਗਸ੍ਸ ਪਬ੍ਬਜ੍ਜਾਪਰਿਯੋਸਾਨਸ੍ਸੇਵ ਅਭਾਵਤੋ ਇਮਸ੍ਸ ਦੁਕ੍ਕਟਸ੍ਸ ਓਕਾਸੋ ਚ ਨ ਸਬ੍ਬਕਾਲਂ ਸਮ੍ਭਵੇਯ੍ਯ, ਉਪਸਮ੍ਪਦਾਵਸੇਨ ਪਨ ਅਤ੍ਥੇ ਗਹਿਤੇ ਸਮ੍ਭਵਤਿ ਕਮ੍ਮਨਿਬ੍ਬਤ੍ਤਿਤੋ. ਤੇਨੇਵ ਪਾਲ਼ਿਯਂ ‘‘ਨ, ਭਿਕ੍ਖਵੇ, ਪਣ੍ਡਕੋ ਉਪਸਮ੍ਪਾਦੇਤਬ੍ਬੋ, ਯੋ ਉਪਸਮ੍ਪਾਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ ਦੁਕ੍ਕਟਂ ਨ ਪਞ੍ਞਤ੍ਤਂ. ਅਪਞ੍ਞਤ੍ਤਤ੍ਤਾ ਪੁਬ੍ਬਪਯੋਗਦੁਕ੍ਕਟਮੇਵ ਚੇਤ੍ਥ ਸਮ੍ਭਵਤਿ, ਨੇਤਰਂ. ਏਤ੍ਤਾਵਤਾ ਸਿਦ੍ਧਮੇਤਂ ਪਬ੍ਬਜ੍ਜਾਭਿਲਾਪੇਨ ਉਪਸਮ੍ਪਦਾਵ ਤਤ੍ਥ ਅਧਿਪ੍ਪੇਤਾ, ਨ ਪਬ੍ਬਜ੍ਜਾਤਿ. ਏਤ੍ਥਾਹ ਸਾਮਣੇਰਪਬ੍ਬਜ੍ਜਾ ਨ ਕਾਯਪਯੋਗਤੋ ਹੋਤੀਤਿ ਕਥਂ ਪਞ੍ਞਾਯਤੀਤਿ? ਵੁਚ੍ਚਤੇ – ਕਾਯੇਨ ਵਿਞ੍ਞਾਪੇਤੀਤਿਆਦਿਤ੍ਤਿਕਾ ਦਸ੍ਸਨਤੋਤਿ ਆਗਤੋ.

‘‘ਗੋਤ੍ਤੇਨਪਿ ਅਨੁਸ੍ਸਾਵੇਤੁ’’ਨ੍ਤਿ (ਮਹਾਵ. ੧੨੨) ਵਚਨਤੋ ਯੇਨ ਵੋਹਾਰੇਨ ਵੋਹਰਤਿ, ਤੇਨ ਵਟ੍ਟਤੀਤਿ ਸਿਦ੍ਧਂ, ਤਸ੍ਮਾ ‘‘ਕੋ ਨਾਮੋ ਤੇ ਉਪਜ੍ਝਾਯੋ’’ਤਿ ਪੁਟ੍ਠੇਨਪਿ ਗੋਤ੍ਤਮੇਵ ਨਾਮਂ ਕਤ੍ਵਾ ਵਤ੍ਤਬ੍ਬਨ੍ਤਿ ਸਿਦ੍ਧਂ ਹੋਤਿ, ਤਸ੍ਮਾ ਚਤੁਬ੍ਬਿਧੇਸੁ ਨਾਮੇਸੁ ਯੇਨ ਕੇਨਚਿ ਨਾਮੇਨ ਅਨੁਸ੍ਸਾਵਨਾ ਕਾਤਬ੍ਬਾਤਿ ਵਦਨ੍ਤਿ. ਏਕਸ੍ਸ ਬਹੂਨਿ ਨਾਮਾਨਿ ਹੋਨ੍ਤਿ, ਤਤ੍ਥ ਏਕਂ ਨਾਮਂ ਞਤ੍ਤਿਯਾ, ਏਕਂ ਅਨੁਸ੍ਸਾਵਨਾਯ ਕਾਤੁਂ ਨ ਵਟ੍ਟਤਿ, ਅਤ੍ਥਤੋ ਬ੍ਯਞ੍ਜਨਤੋ ਚ ਅਭਿਨ੍ਨਾਹਿ ਅਨੁਸ੍ਸਾਵਨਾਹਿ ਭਵਿਤਬ੍ਬਨ੍ਤਿ. ਕਿਞ੍ਚਾਪਿ ‘‘ਇਤ੍ਥਨ੍ਨਾਮੋ ਇਤ੍ਥਨ੍ਨਾਮਸ੍ਸ ਆਯਸ੍ਮਤੋ’’ਤਿ ਪਾਲ਼ਿਯਂ ‘‘ਆਯਸ੍ਮਤੋ’’ਤਿ ਪਦਂ ਪਚ੍ਛਾ ਵੁਤ੍ਤਂ, ਕਮ੍ਮਵਾਚਾਪਾਲ਼ਿਯਂ ਪਨ ‘‘ਅਯਂ ਬੁਦ੍ਧਰਕ੍ਖਿਤੋ ਆਯਸ੍ਮਤੋ ਧਮ੍ਮਰਕ੍ਖਿਤਸ੍ਸਾ’’ਤਿ ਪਠਮਂ ਲਿਖਨ੍ਤਿ, ਤਂ ਉਪ੍ਪਟਿਪਾਟਿਯਾ ਵੁਤ੍ਤਨ੍ਤਿ ਨ ਪਚ੍ਚੇਤਬ੍ਬਂ. ਪਾਲ਼ਿਯਞ੍ਹਿ ‘‘ਇਤ੍ਥਨ੍ਨਾਮੋ ਇਤ੍ਥਨ੍ਨਾਮਸ੍ਸਾ’’ਤਿ ਅਤ੍ਥਮਤ੍ਤਂ ਦਸ੍ਸਿਤਂ, ਤਸ੍ਮਾ ਪਾਲ਼ਿਯਂ ਅਵੁਤ੍ਤੋਪਿ ‘‘ਅਯਂ ਬੁਦ੍ਧਰਕ੍ਖਿਤੋ ਆਯਸ੍ਮਤੋ ਧਮ੍ਮਰਕ੍ਖਿਤਸ੍ਸਾ’’ਤਿ ਕਮ੍ਮਵਾਚਾਪਾਲ਼ਿਯਂ ਪਯੋਗੋ ਦਸ੍ਸਿਤੋ. ‘‘ਨ ਮੇ ਦਿਟ੍ਠੋ ਇਤੋ ਪੁਬ੍ਬੇ ਇਚ੍ਚਾਯਸ੍ਮਾ ਸਾਰਿਪੁਤ੍ਤੋ’’ਤਿ ਚ ‘‘ਆਯਸ੍ਮਾ ਸਾਰਿਪੁਤ੍ਤੋ ਅਤ੍ਥਕੁਸਲੋ’’ਤਿ ਚ ਪਠਮਂ ‘‘ਆਯਸ੍ਮਾ’’ਤਿ ਪਯੋਗਸ੍ਸ ਦਸ੍ਸਨਤੋਤਿ ਵਦਨ੍ਤਿ. ਕਤ੍ਥਚਿ ‘‘ਆਯਸ੍ਮਤੋ ਬੁਦ੍ਧਰਕ੍ਖਿਤਸ੍ਸਾ’’ਤਿ ਵਤ੍ਵਾ ਕਤ੍ਥਚਿ ਕੇਵਲਂ ‘‘ਬੁਦ੍ਧਰਕ੍ਖਿਤਸ੍ਸਾ’’ਤਿ ਸਾਵੇਤਿ, ਸਾਵਨਂ ਹਾਪੇਤੀਤਿ ਨ ਵੁਚ੍ਚਤਿ ਨਾਮਸ੍ਸ ਅਹਾਪਿਤਤ੍ਤਾਤਿ ਏਕੇ. ਸਚੇ ਕਤ੍ਥਚਿ ‘‘ਆਯਸ੍ਮਤੋ ਬੁਦ੍ਧਰਕ੍ਖਿਤਸ੍ਸਾ’’ਤਿ ਵਤ੍ਵਾ ਕਤ੍ਥਚਿ ‘‘ਬੁਦ੍ਧਰਕ੍ਖਿਤਸ੍ਸਾਯਸ੍ਮਤੋ’’ਤਿ ਸਾਵੇਤਿ, ਪਾਠਾਨੁਰੂਪਤ੍ਤਾ ਖੇਤ੍ਤਮੇਵ ਓਤਿਣ੍ਣਨ੍ਤਿਪਿ ਏਕੇ. ਬ੍ਯਞ੍ਜਨਭੇਦਪ੍ਪਸਙ੍ਗਤੋ ਅਨੁਸ੍ਸਾਵਨਾਨਂ ਤਂ ਨ ਵਟ੍ਟਤੀਤਿ ਵਦਨ੍ਤਿ. ਸਚੇ ਪਨ ਸਬ੍ਬਟ੍ਠਾਨੇਪਿ ਏਕੇਨੇਵ ਪਕਾਰੇਨ ਵਦਤਿ, ਵਟ੍ਟਤਿ.

ਏਕਾਨੁਸ੍ਸਾਵਨੇਤਿ ਏਤ੍ਥ ਏਕਤੋ ਅਨੁਸ੍ਸਾਵਨਂ ਏਤੇਸਨ੍ਤਿ ਏਕਾਨੁਸ੍ਸਾਵਨਾਤਿ ਅਸਮਾਨਾਧਿਕਰਣਵਿਸਯੋ ਬਾਹਿਰਤ੍ਥਸਮਾਸੋਤਿ ਦਟ੍ਠਬ੍ਬਂ. ਤੇਨੇਵਾਹ ‘‘ਦ੍ਵੇ ਏਕਤੋ ਅਨੁਸ੍ਸਾਵਨੇ’’ਤਿ. ਤਤ੍ਥ ਏਕਤੋਤਿ ਏਕਕ੍ਖਣੇਤਿ ਅਤ੍ਥੋ, ਵਿਭਤ੍ਤਿਅਲੋਪੇਨ ਚਾਯਂ ਨਿਦ੍ਦੇਸੋ. ਪੁਰਿਮਨਯੇਨੇਵ ਏਕਤੋ ਅਨੁਸ੍ਸਾਵਨੇ ਕਾਤੁਨ੍ਤਿ ‘‘ਏਕੇਨ ਏਕਸ੍ਸ, ਅਞ੍ਞੇਨ ਇਤਰਸ੍ਸਾ’’ਤਿਆਦਿਨਾ ਪੁਬ੍ਬੇ ਵੁਤ੍ਤਨਯੇਨ ਦ੍ਵੀਹਿ ਵਾ ਤੀਹਿ ਵਾ ਆਚਰਿਯੇਹਿ ਏਕੇਨ ਵਾ ਏਕਤੋ ਅਨੁਸ੍ਸਾਵਨੇ ਕਾਤੁਂ. ਵਜ੍ਜਾਵਜ੍ਜਂ ਉਪਨਿਜ੍ਝਾਯਤੀਤਿ ਉਪਜ੍ਝਾਤਿ ਇਮਿਨਾ ਉਪਜ੍ਝਾਯਸਦ੍ਦਸਮਾਨਤ੍ਥੋ ਉਪਜ੍ਝਾਸਦ੍ਦੋਪੀਤਿ ਅਤ੍ਥਂ ਦਸ੍ਸੇਤੀਤਿ ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ਮਹਾਵਗ੍ਗ ੩.੧੨੩).

ਗੋਤ੍ਤੇਨਾਪੀਤਿ ‘‘ਆਯਸ੍ਮਤੋ ਪਿਪ੍ਪਲਿਸ੍ਸ ਉਪਸਮ੍ਪਦਾਪੇਕ੍ਖੋ’’ਤਿ ਏਵਂ ਨਾਮਂ ਅਵਤ੍ਵਾ ਗੋਤ੍ਤਨਾਮੇਨਪੀਤਿ ਅਤ੍ਥੋ, ਤੇਨ ‘‘ਕੋ ਨਾਮੋ ਤੇ ਉਪਜ੍ਝਾਯੋ’’ਤਿ ਪੁਟ੍ਠੇਨ ਗੋਤ੍ਤਨਾਮੇਨ ‘‘ਆਯਸ੍ਮਾ ਕਸ੍ਸਪੋ’’ਤਿ ਵਤ੍ਤਬ੍ਬਨ੍ਤਿ ਸਿਦ੍ਧਂ ਹੋਤਿ. ਤਸ੍ਮਾ ਅਞ੍ਞਮ੍ਪਿ ਯਂ ਕਿਞ੍ਚਿ ਤਸ੍ਸ ਨਾਮਂ ਪਸਿਦ੍ਧਂ, ਤਸ੍ਮਿਂ ਵਾ ਖਣੇ ਸੁਖਗ੍ਗਹਣਤ੍ਥਂ ਨਾਮਂ ਪਞ੍ਞਾਪਿਤਂ, ਤਂ ਸਬ੍ਬਂ ਗਹੇਤ੍ਵਾਪਿ ਅਨੁਸ੍ਸਾਵਨਾ ਕਾਤਬ੍ਬਾ. ਯਥਾ ਉਪਜ੍ਝਾਯਸ੍ਸ, ਏਵਂ ਉਪਸਮ੍ਪਦਾਪੇਕ੍ਖਸ੍ਸਾਪਿ ਗੋਤ੍ਤਾਦਿਨਾਮੇਨ ਤਙ੍ਖਣਿਕਨਾਮੇਨ ਚ ਅਨੁਸ੍ਸਾਵਨਂ ਕਾਤੁਂ ਵਟ੍ਟਤਿ, ਤਸ੍ਮਿਮ੍ਪਿ ਖਣੇ ‘‘ਅਯਂ ਤਿਸ੍ਸੋ’’ਤਿ ਵਾ ‘‘ਨਾਗੋ’’ਤਿ ਵਾ ਨਾਮਂ ਕਰੋਨ੍ਤੇਹਿ ਅਨੁਸਾਸਕਸਮ੍ਮੁਤਿਤੋ ਪਠਮਮੇਵ ਕਾਤਬ੍ਬਂ. ਏਵਂ ਅਕਤ੍ਵਾਪਿ ਅਨ੍ਤਰਾਯਿਕਧਮ੍ਮਾਨੁਸਾਸਨਪੁਚ੍ਛਨਕਾਲੇਸੁ ‘‘ਕਿਨ੍ਨਾਮੋਸਿ, ਅਹਂ ਭਨ੍ਤੇ ਨਾਗੋ ਨਾਮ, ਕੋ ਨਾਮੋ ਤੇ ਉਪਜ੍ਝਾਯੋ, ਉਪਜ੍ਝਾਯੋ ਮੇ ਭਨ੍ਤੇ ਤਿਸ੍ਸੋ ਨਾਮਾ’’ਤਿਆਦਿਨਾ ਵਿਞ੍ਞਾਪੇਨ੍ਤੇਨ ਉਭਿਨ੍ਨਮ੍ਪਿ ਚਿਤ੍ਤੇ ‘‘ਮਮੇਤਂ ਨਾਮ’’ਨ੍ਤਿ ਯਥਾ ਸਞ੍ਞਂ ਉਪ੍ਪਜ੍ਜਤਿ, ਏਵਂ ਵਿਞ੍ਞਾਪੇਤਬ੍ਬਂ. ਸਚੇ ਪਨ ਤਸ੍ਮਿਂ ਖਣੇ ਪਕਤਿਨਾਮੇਨ ਵਤ੍ਵਾ ਪਚ੍ਛਾ ‘‘ਤਿਸ੍ਸੋ ਨਾਮਾ’’ਤਿ ਅਪੁਬ੍ਬਨਾਮੇਨ ਅਨੁਸ੍ਸਾਵੇਤਿ, ਨ ਵਟ੍ਟਤਿ.

ਤਤ੍ਥ ਚ ਕਿਞ੍ਚਾਪਿ ਉਪਜ੍ਝਾਯਸ੍ਸੇਵ ਨਾਮਂ ਅਗ੍ਗਹੇਤ੍ਵਾ ਯੇਨ ਕੇਨਚਿ ਨਾਮੇਨ ‘‘ਤਿਸ੍ਸਸ੍ਸ ਉਪਸਮ੍ਪਦਾਪੇਕ੍ਖੋ’’ਤਿਆਦਿਨਾਪਿ ਪੁਗ੍ਗਲੇ ਪਰਾਮਟ੍ਠੇ ਕਮ੍ਮਂ ਸੁਕਤਮੇਵ ਹੋਤਿ ਅਨੁਪਜ੍ਝਾਯਕਾਦੀਨਂ ਉਪਸਮ੍ਪਦਾਕਮ੍ਮਂ ਵਿਯ ਉਪਜ੍ਝਾਯਸ੍ਸ ਅਭਾਵੇਪਿ ਅਭਬ੍ਬਤ੍ਤੇਪਿ ਕਮ੍ਮਵਾਚਾਯ ਪੁਗ੍ਗਲੇ ਪਰਾਮਟ੍ਠੇ ਕਮ੍ਮਸ੍ਸ ਸਿਜ੍ਝਨਤੋ. ਉਪਸਮ੍ਪਦਾਪੇਕ੍ਖਸ੍ਸ ਪਨ ਯਥਾਸਕਂ ਨਾਮਂ ਵਿਨਾ ਅਞ੍ਞੇਨ ਨਾਮੇਨ ਅਨੁਸ੍ਸਾਵਿਤੇ ਕਮ੍ਮਂ ਕੁਪ੍ਪਤਿ, ਸੋ ਅਨੁਪਸਮ੍ਪਨ੍ਨੋਵ ਹੋਤਿ. ਤਤ੍ਥ ਠਿਤੋ ਅਞ੍ਞੋ ਅਨੁਪਸਮ੍ਪਨ੍ਨੋ ਵਿਯ ਗਹਿਤਨਾਮਸ੍ਸ ਵਤ੍ਥੁਪੁਗ੍ਗਲਸ੍ਸ ਤਤ੍ਥ ਅਭਾਵਾ, ਏਤਸ੍ਸ ਚ ਨਾਮਸ੍ਸ ਅਨੁਸ੍ਸਾਵਨਾਯ ਅਵੁਤ੍ਤਤ੍ਤਾ. ਤਸ੍ਮਾ ਉਪਸਮ੍ਪਦਾਪੇਕ੍ਖਸ੍ਸ ਪਕਤਿਨਾਮਂ ਪਰਿਵਤ੍ਤੇਤ੍ਵਾ ਅਪੁਬ੍ਬੇਨ ਨਾਗਾਦਿਨਾਮੇਨ ਅਨੁਸ੍ਸਾਵਿਤੁਕਾਮੇਨ ਪਟਿਕਚ੍ਚੇਵ ‘‘ਤ੍ਵਂ ਨਾਗੋ’’ਤਿਆਦਿਨਾ ਵਿਞ੍ਞਾਪੇਤ੍ਵਾ ਅਨੁਸਾਸਨਅਨ੍ਤਰਾਯਿਕਧਮ੍ਮਾਪੁਚ੍ਛਨਕ੍ਖਣੇਸੁਪਿ ਤਸ੍ਸ ਚ ਸਙ੍ਘਸ੍ਸ ਚ ਯਥਾ ਪਾਕਟਂ ਹੋਤਿ, ਤਥਾ ਪਕਾਸੇਤ੍ਵਾਵ ਨਾਗਾਦਿਨਾਮੇਨ ਅਨੁਸ੍ਸਾਵੇਤਬ੍ਬਂ. ਏਕਸ੍ਸ ਬਹੂਨਿ ਨਾਮਾਨਿ ਹੋਨ੍ਤਿ, ਤੇਸੁ ਏਕਂ ਗਹੇਤੁਂ ਵਟ੍ਟਤਿ.

ਯਂ ਪਨ ਉਪਸਮ੍ਪਦਾਪੇਕ੍ਖਉਪਜ੍ਝਾਯਾਨਂ ਏਕਤ੍ਥ ਗਹਿਤਂ ਨਾਮਂ ਤਦੇਵ ਞਤ੍ਤਿਯਾ, ਸਬ੍ਬਤ੍ਥ ਅਨੁਸ੍ਸਾਵਨਾਸੁ ਚ ਗਹੇਤਬ੍ਬਂ. ਗਹਿਤਤੋ ਹਿ ਅਞ੍ਞਸ੍ਮਿਂ ਗਹਿਤੇ ਬ੍ਯਞ੍ਜਨਂ ਭਿਨ੍ਨਂ ਨਾਮ ਹੋਤਿ, ਕਮ੍ਮਂ ਵਿਪਜ੍ਜਤਿ. ਅਤ੍ਥਤੋ ਹਿ ਬ੍ਯਞ੍ਜਨਤੋ ਚ ਅਭਿਨ੍ਨਾ ਏਵ ਞਤ੍ਤਿ ਅਨੁਸ੍ਸਾਵਨਾ ਚ ਵਟ੍ਟਨ੍ਤਿ. ਉਪਜ੍ਝਾਯਨਾਮਸ੍ਸ ਪਨ ਪੁਰਤੋ ‘‘ਆਯਸ੍ਮਤੋ ਤਿਸ੍ਸਸ੍ਸਾ’’ਤਿਆਦਿਨਾ ਆਯਸ੍ਮਨ੍ਤਪਦਂ ਸਬ੍ਬਤ੍ਥ ਯੋਜੇਤ੍ਵਾਪਿ ਅਨੁਸ੍ਸਾਵੇਤਿ. ਤਥਾ ਅਯੋਜਿਤੇਪਿ ਦੋਸੋ ਨਤ੍ਥਿ.

ਪਾਲ਼ਿਯਂ (ਮਹਾਵ. ੧੨੬) ਪਨ ਕਿਞ੍ਚਾਪਿ ‘‘ਇਤ੍ਥਨ੍ਨਾਮਸ੍ਸ ਆਯਸ੍ਮਤੋ’’ਤਿ ਪਚ੍ਛਤੋ ‘‘ਆਯਸ੍ਮਤੋ’’ਤਿ ਪਦਂ ਵੁਤ੍ਤਂ, ਤਥਾਪਿ ‘‘ਆਯਸ੍ਮਾ ਸਾਰਿਪੁਤ੍ਤੋ ਅਤ੍ਥਕੁਸਲੋ’’ਤਿਆਦਿਨਾ ਨਾਮਸ੍ਸ ਪੁਰਤੋ ‘ਆਯਸ੍ਮਨ੍ਤਪਦ’ਯੋਗਸ੍ਸ ਦਸ੍ਸਨਤੋ ਪੁਰਤੋਵ ਪਯੋਗੋ ਯੁਤ੍ਤਤਰੋ, ਤਞ੍ਚ ਏਕਤ੍ਥ ਯੋਜੇਤ੍ਵਾ ਅਞ੍ਞਤ੍ਥ ਅਯੋਜਿਤੇਪਿ ਏਕਤ੍ਥ ਪੁਰਤੋ ਯੋਜੇਤ੍ਵਾ ਅਞ੍ਞਤ੍ਥ ਪਚ੍ਛਤੋ ਯੋਜਨੇਪਿ ਸਾਵਨਾਯ ਹਾਪਨਂ ਨਾਮ ਨ ਹੋਤਿ ਨਾਮਸ੍ਸ ਅਹਾਪਿਤਤ੍ਤਾ. ਤੇਨੇਵ ਪਾਲ਼ਿਯਮ੍ਪਿ ‘‘ਇਤ੍ਥਨ੍ਨਾਮਸ੍ਸ ਆਯਸ੍ਮਤੋ’’ਤਿ ਏਕਤ੍ਥ ਯੋਜੇਤ੍ਵਾ ‘‘ਇਤ੍ਥਨ੍ਨਾਮੇਨ ਉਪਜ੍ਝਾਯੇਨਾ’’ਤਿਆਦੀਸੁ ‘‘ਆਯਸ੍ਮਤੋ’’ਤਿ ਨ ਯੋਜਿਤਨ੍ਤਿ ਵਦਨ੍ਤਿ. ਤਞ੍ਚ ਕਿਞ੍ਚਾਪਿ ਏਵਂ, ਤਥਾਪਿ ਸਬ੍ਬਟ੍ਠਾਨੇਪਿ ਏਕੇਨੇਵ ਪਕਾਰੇਨ ਯੋਜੇਤ੍ਵਾ ਏਵ ਵਾ ਅਯੋਜੇਤ੍ਵਾ ਵਾ ਅਨੁਸ੍ਸਾਵਨਂ ਪਸਤ੍ਥਤਰਨ੍ਤਿ ਗਹੇਤਬ੍ਬਂ.

ਏਕਤੋ ਸਹੇਵ ਏਕਸ੍ਮਿਂ ਖਣੇ ਅਨੁਸ੍ਸਾਵਨਂ ਏਤੇਸਨ੍ਤਿ ਏਕਾਨੁਸ੍ਸਾਵਨਾ, ਉਪਸਮ੍ਪਦਾਪੇਕ੍ਖਾ, ਏਤੇ ਏਕਾਨੁਸ੍ਸਾਵਨੇ ਕਾਤੁਂ. ਤੇਨਾਹ ‘‘ਏਕਤੋਅਨੁਸਾਵਨੇ’’ਤਿ. ਇਦਞ੍ਚ ਏਕਂ ਪਦਂ ਵਿਭਤ੍ਤਿਅਲੋਪੇਨ ਦਟ੍ਠਬ੍ਬਂ. ਏਕੇਨ ਵਾਤਿ ਦ੍ਵਿਨ੍ਨਮ੍ਪਿ ਏਕਸ੍ਮਿਂ ਖਣੇ ਏਕਾਯ ਏਵ ਕਮ੍ਮਵਾਚਾਯ ਅਨੁਸ੍ਸਾਵਨੇ ਏਕੇਨ ਆਚਰਿਯੇਨਾਤਿ ਅਤ੍ਥੋ. ‘‘ਅਯਂ ਬੁਦ੍ਧਰਕ੍ਖਿਤੋ ਚ ਅਯਂ ਧਮ੍ਮਰਕ੍ਖਿਤੋ ਚ ਆਯਸ੍ਮਤੋ ਸਙ੍ਘਰਕ੍ਖਿਤਸ੍ਸ ਉਪਸਮ੍ਪਦਾਪੇਕ੍ਖੋ’’ਤਿਆਦਿਨਾ ਨਯੇਨ ਏਕੇਨ ਆਚਰਿਯੇਨ ਦ੍ਵਿਨ੍ਨਮੇਕਸ੍ਮਿਂ ਖਣੇ ਅਨੁਸ੍ਸਾਵਨਨਯੋ ਦਟ੍ਠਬ੍ਬੋ, ਇਮਿਨਾਵ ਨਯੇਨ ਤਿਣ੍ਣਮ੍ਪਿ ਏਕੇਨ ਆਚਰਿਯੇਨ ਏਕਕ੍ਖਣੇ ਅਨੁਸ੍ਸਾਵਨਂ ਵੇਦਿਤਬ੍ਬਂ.

ਪੁਰਿਮਨਯੇਨੇਵ ਏਕਤੋ ਅਨੁਸ੍ਸਾਵਨੇ ਕਾਤੁਨ੍ਤਿ ‘‘ਏਕੇਨ ਏਕਸ੍ਸ, ਅਞ੍ਞੇਨ ਇਤਰਸ੍ਸਾ’’ਤਿਆਦਿਨਾ ਪੁਬ੍ਬੇ ਵੁਤ੍ਤਨਯੇਨ ਦ੍ਵਿਨ੍ਨਂ ਦ੍ਵੀਹਿ ਵਾ ਤਿਣ੍ਣਂ ਤੀਹਿ ਵਾ ਆਚਰਿਯੇਹਿ, ਏਕੇਨ ਵਾ ਆਚਰਿਯੇਨ ਤਯੋਪਿ ਏਕਤੋਅਨੁਸ੍ਸਾਵਨੇ ਕਾਤੁਨ੍ਤਿ ਅਤ੍ਥੋ. ‘‘ਤਞ੍ਚ ਖੋ ਏਕੇਨ ਉਪਜ੍ਝਾਯੇਨ, ਨ ਤ੍ਵੇਵ ਨਾਨੁਪਜ੍ਝਾਯੇਨਾ’’ਤਿ ਇਦਂ ਏਕੇਨ ਆਚਰਿਯੇਨ ਦ੍ਵੀਹਿ ਵਾ ਤੀਹਿ ਵਾ ਉਪਜ੍ਝਾਯੇਹਿ ਦ੍ਵੇ ਵਾ ਤਯੋ ਵਾ ਉਪਸਮ੍ਪਦਾਪੇਕ੍ਖੇ ਏਕਕ੍ਖਣੇ ਏਕਾਯ ਅਨੁਸ੍ਸਾਵਨਾਯ ਏਕਾਨੁਸ੍ਸਾਵਨੇ ਕਾਤੁਂ ਨ ਵਟ੍ਟਤੀਤਿ ਪਟਿਕ੍ਖੇਪਪਦਂ, ਨ ਪਨ ਨਾਨਾਚਰਿਯੇਹਿ ਨਾਨੁਪਜ੍ਝਾਯੇਹਿ ਤਯੋ ਏਕਾਨੁਸ੍ਸਾਵਨੇ ਕਾਤੁਂ ਨ ਵਟ੍ਟਤੀਤਿ ਆਹ ‘‘ਸਚੇ ਪਨ ਨਾਨਾਚਰਿਯਾ ਨਾਨੁਪਜ੍ਝਾਯਾ…ਪੇ… ਵਟ੍ਟਤੀ’’ਤਿ. ਯਞ੍ਚੇਤ੍ਥ ‘‘ਤਿਸ੍ਸਤ੍ਥੇਰੋ ਸੁਮਨਤ੍ਥੇਰਸ੍ਸ ਸਦ੍ਧਿਵਿਹਾਰਿਕਂ, ਸੁਮਨਤ੍ਥੇਰੋ ਤਿਸ੍ਸਤ੍ਥੇਰਸ੍ਸ ਸਦ੍ਧਿਵਿਹਾਰਿਕ’’ਨ੍ਤਿ ਏਵਂ ਉਪਜ੍ਝਾਯੇਹਿ ਅਞ੍ਞਮਞ੍ਞਂ ਸਦ੍ਧਿਵਿਹਾਰਿਕਾਨਂ ਅਨੁਸ੍ਸਾਵਨਕਰਣਂ ਵੁਤ੍ਤਂ, ਤਂ ਉਪਲਕ੍ਖਣਮਤ੍ਤਂ. ਤਸ੍ਮਾ ਸਚੇ ਤਿਸ੍ਸਤ੍ਥੇਰੋ ਸੁਮਨਤ੍ਥੇਰਸ੍ਸ ਸਦ੍ਧਿਵਿਹਾਰਿਕਂ, ਸੁਮਨਤ੍ਥੇਰੋ ਨਨ੍ਦਤ੍ਥੇਰਸ੍ਸ ਸਦ੍ਧਿਵਿਹਾਰਿਕਂ ਅਨੁਸ੍ਸਾਵੇਤਿ, ਅਞ੍ਞਮਞ੍ਞਞ੍ਚ ਗਣਪੂਰਕਾ ਹੋਨ੍ਤਿ, ਵਟ੍ਟਤਿ ਏਵ. ਸਚੇ ਪਨ ਉਪਜ੍ਝਾਯੋ ਸਯਮੇਵ ਅਤ੍ਤਨੋ ਸਦ੍ਧਿਵਿਹਾਰਿਕਂ ਅਨੁਸ੍ਸਾਵੇਤਿ, ਏਤ੍ਥ ਵਤ੍ਤਬ੍ਬਮੇਵ ਨਤ੍ਥਿ, ਕਮ੍ਮਂ ਸੁਕਤਮੇਵ ਹੋਤਿ, ਅਨੁਪਜ੍ਝਾਯਕਸ੍ਸਪਿ ਯੇਨ ਕੇਨਚਿ ਅਨੁਸ੍ਸਾਵਿਤੇ ਉਪਸਮ੍ਪਦਾ ਹੋਤਿ, ਕਿਮਙ੍ਗਂ ਪਨ ਸਉਪਜ੍ਝਾਯਕਸ੍ਸ ਉਪਜ੍ਝਾਯੇਨੇਵ ਅਨੁਸ੍ਸਾਵਨੇਤਿ ਦਟ੍ਠਬ੍ਬਂ. ਤੇਨੇਵ ਨਵਟ੍ਟਨਪਕ੍ਖਂ ਦਸ੍ਸੇਤੁਂ ‘‘ਸਚੇ ਪਨਾ’’ਤਿਆਦਿਮਾਹ.

ਉਪਜ੍ਝਾਤਿ ਉਪਜ੍ਝਾਯਸਦ੍ਦਸਮਾਨਤ੍ਥੋ ਆਕਾਰਨ੍ਤੋ ਉਪਜ੍ਝਾਸਦ੍ਦੋਤਿ ਦਸ੍ਸੇਤਿ. ਉਪਜ੍ਝਾਯ-ਸਦ੍ਦੋ ਏਵ ਵਾ ਉਪਜ੍ਝਾ, ਉਪਯੋਗਪਚ੍ਚਤ੍ਤਵਚਨੇਸੁ ਯ-ਕਾਰ ਲੋਪਂ ਕਤ੍ਵਾ ਏਵਂ ਵੁਤ੍ਤੋ ਕਰਣਵਚਨਾਦੀਸੁ ਉਪਜ੍ਝਾਸਦ੍ਦਸ੍ਸ ਪਯੋਗਾਭਾਵਾਤਿ ਦਟ੍ਠਬ੍ਬਂ. ਪਾਲ਼ਿਯਂ ਅਤ੍ਤਨਾਵ ਅਤ੍ਤਾਨਂ ਸਮ੍ਮਨ੍ਨਿਤਬ੍ਬਨ੍ਤਿ ਅਤ੍ਤਨਾਵ ਕਤ੍ਤੁਭੂਤੇਨ ਕਰਣਭੂਤੇਨ ਅਤ੍ਤਾਨਮੇਵ ਕਮ੍ਮਭੂਤਂ ਪਤਿ ਸਮ੍ਮਨ੍ਨਨਕਿਚ੍ਚਂ ਕਾਤਬ੍ਬਂ, ਅਤ੍ਤਾਨਨ੍ਤਿ ਵਾ ਪਚ੍ਚਤ੍ਤੇ ਉਪਯੋਗਵਚਨਂ, ਅਤ੍ਤਨਾਵ ਅਤ੍ਤਾ ਸਮ੍ਮਨ੍ਨਿਤਬ੍ਬੋਤਿ ਅਤ੍ਥੋ. ਨ ਕੇਵਲਞ੍ਚ ਏਤ੍ਥੇਵ, ਅਞ੍ਞਤ੍ਰਾਪਿ ਤੇਰਸਸਮ੍ਮੁਤਿਆਦੀਸੁ ਇਮਿਨਾਵ ਲਕ੍ਖਣੇਨ ਅਤ੍ਤਨਾਵ ਅਤ੍ਤਾ ਸਮ੍ਮਨ੍ਨਿਤਬ੍ਬੋਵ. ਅਪਿਚ ਸਯਂ ਕਮ੍ਮਾਰਹਤ੍ਤਾ ਅਤ੍ਤਾਨਂ ਮੁਞ੍ਚਿਤ੍ਵਾ ਚਤੁਵਗ੍ਗਾਦਿਕੋ ਗਣੋ ਸਬ੍ਬਤ੍ਥ ਇਚ੍ਛਿਤਬ੍ਬੋ.

ਸਚ੍ਚਕਾਲੋਤਿ ‘‘ਨਿਗੂਹਿਸ੍ਸਾਮੀ’’ਤਿ ਵਞ੍ਚਨਂ ਪਹਾਯ ਸਚ੍ਚਸ੍ਸੇਵ ਤੇ ਇਚ੍ਛਿਤਬ੍ਬਕਾਲੋ. ਭੂਤਕਾਲੋਤਿ ਵਞ੍ਚਨਾਯ ਅਭਾਵੇਪਿ ਮਨੁਸ੍ਸਤ੍ਤਾਦਿਵਤ੍ਥੁਨੋ ਭੂਤਤਾਯ ਅਵਸ੍ਸਂ ਇਚ੍ਛਿਤਬ੍ਬਕਾਲੋ, ਇਤਰਥਾ ਕਮ੍ਮਕੋਪਾਦਿਅਨ੍ਤਰਾਯੋ ਹੋਤੀਤਿ ਅਧਿਪ੍ਪਾਯੋ. ਮਙ੍ਕੂਤਿ ਅਧੋਮੁਖੋ. ਉਦ੍ਧਰਤੂਤਿ ਅਨੁਪਸਮ੍ਪਨ੍ਨਭਾਵਤੋ ਉਪਸਮ੍ਪਤ੍ਤਿਯਂ ਪਤਿਟ੍ਠਪੇਤੂਤਿ ਅਤ੍ਥੋ.

ਸਬ੍ਬਕਮ੍ਮਵਾਚਾਸੁ ਅਤ੍ਥਕੋਸਲ੍ਲਤ੍ਥਂ ਪਨੇਤ੍ਥ ਉਪਸਮ੍ਪਦਕਮ੍ਮਵਾਚਾਯ ਏਵਮਤ੍ਥੋ ਦਟ੍ਠਬ੍ਬੋ – ਸੁਣਾਤੂਤਿ ਸਵਨਾਣਤ੍ਤਿਯਂ ਪਠਮਪੁਰਿਸੇਕਵਚਨਂ. ਤਞ੍ਚ ਕਿਞ੍ਚਾਪਿ ਯੋ ਸੋ ਸਙ੍ਘੋ ਸਵਨਕਿਰਿਯਾਯਂ ਨਿਯੋਜੀਯਤਿ, ਤਸ੍ਸ ਸਮ੍ਮੁਖਤ੍ਤਾ ‘‘ਸੁਣਾਹੀ’’ਤਿ ਮਜ੍ਝਿਮਪੁਰਿਸਵਚਨੇਨ ਵਤ੍ਤਬ੍ਬਂ, ਤਥਾਪਿ ਯਸ੍ਮਾ ਸਙ੍ਘਸਦ੍ਦਸਨ੍ਨਿਧਾਨੇ ਪਠਮਪੁਰਿਸਪ੍ਪਯੋਗੋਵ ਸਦ੍ਦਵਿਦੂਹਿ ਸਮਾਚਿਣ੍ਣੋ ਭਵਨ੍ਤਭਗਵਨ੍ਤਆਯਸ੍ਮਾਦਿਸਦ੍ਦਸਨ੍ਨਿਧਾਨੇਸੁ ਵਿਯ ‘‘ਅਧਿਵਾਸੇਤੁ ਮੇ ਭਵਂ ਗੋਤਮੋ (ਪਾਰਾ. ੨੨), ਏਤਸ੍ਸ ਸੁਗਤ ਕਾਲੋ, ਯਂ ਭਗਵਾ ਸਾਵਕਾਨਂ ਸਿਕ੍ਖਾਪਦਂ ਪਞ੍ਞਪੇਯ੍ਯ (ਪਾਰਾ. ੨੧), ਪਕ੍ਕਮਤਾਯਸ੍ਮਾ (ਪਾਰਾ. ੪੩੬), ਸੁਣਨ੍ਤੁ ਮੇ ਆਯਸ੍ਮਨ੍ਤੋ’’ਤਿਆਦੀਸੁ (ਮਹਾਵ. ੧੬੮). ਤਸ੍ਮਾ ਇਧ ਪਠਮਪੁਰਿਸਪ੍ਪਯੋਗੋ ਕਤੋ. ਅਥ ਵਾ ਗਾਰਵਵਸੇਨੇਤਂ ਵੁਤ੍ਤਂ. ਗਰੁਟ੍ਠਾਨਿਯੇਸੁ ਹਿ ਗਾਰਵਵਸੇਨ ਮਜ੍ਝਿਮਪੁਰਿਸਪਯੋਗੁਪ੍ਪਤ੍ਤਿਯਮ੍ਪਿ ਪਠਮਪੁਰਿਸਪ੍ਪਯੋਗਂ ਪਯੁਜ੍ਜਨ੍ਤਿ ‘‘ਦੇਸੇਤੁ ਸੁਗਤੋ ਧਮ੍ਮ’’ਨ੍ਤਿਆਦੀਸੁ (ਦੀ. ਨਿ. ੨.੬੬; ਮ. ਨਿ. ੨.੩੩੮; ਮਹਾਵ. ੮) ਵਿਯਾਤਿ ਦਟ੍ਠਬ੍ਬਂ. ਕੇਚਿ ਪਨ ‘‘ਭਨ੍ਤੇ ਆਵੁਸੋਤਿ ਪਦੇ ਅਪੇਕ੍ਖਿਤ੍ਵਾ ਇਧ ਪਠਮਪੁਰਿਸਪ੍ਪਯੋਗੋ’’ਤਿ ਵਦਨ੍ਤਿ, ਤਂ ਨ ਸੁਨ੍ਦਰਂ ‘‘ਆਚਰਿਯੋ ਮੇ, ਭਨ੍ਤੇ, ਹੋਹਿ (ਮਹਾਵ. ੭੭), ਇਙ੍ਘਾਵੁਸੋ ਉਪਾਲਿ, ਇਮਂ ਪਬ੍ਬਜਿਤਂ ਅਨੁਯੁਞ੍ਜਾਹੀ’’ਤਿਆਦੀਸੁ (ਪਾਰਾ. ੫੧੭) ਤਪ੍ਪਯੋਗੇਪਿ ਮਜ੍ਝਿਮਪੁਰਿਸਪ੍ਪਯੋਗਸ੍ਸੇਵ ਦਸ੍ਸਨਤੋ.

ਮੇਤਿ ਯੋ ਸਾਵੇਤਿ, ਤਸ੍ਸ ਅਤ੍ਤਨਿਦ੍ਦੇਸੇ ਸਾਮਿਵਚਨਂ. ਭਨ੍ਤੇਤਿ ਆਲਪਨਤ੍ਥੇ ਵੁਡ੍ਢੇਸੁ ਸਗਾਰਵਵਚਨਂ, ‘‘ਆਵੁਸੋ’’ਤਿ ਪਦਂ ਪਨ ਨਵਕੇਸੁ. ਤਦੁਭਯਮ੍ਪਿ ਨਿਪਾਤੋ ‘‘ਤੁਮ੍ਹੇ ਭਨ੍ਤੇ ਤੁਮ੍ਹੇ ਆਵੁਸੋ’’ਤਿ ਬਹੂਸੁਪਿ ਸਮਾਨਰੂਪਤ੍ਤਾ. ਸਙ੍ਘੋਤਿ ਅਵਿਸੇਸਤੋ ਚਤੁਵਗ੍ਗਾਦਿਕੇ ਪਕਤਤ੍ਤਪੁਗ੍ਗਲਸਮੂਹੇ ਵਤ੍ਤਤਿ. ਇਧ ਪਨ ਪਚ੍ਚਨ੍ਤਿਮੇਸੁ ਜਨਪਦੇਸੁ ਪਞ੍ਚਵਗ੍ਗਤੋ ਪਟ੍ਠਾਯ, ਮਜ੍ਝਿਮੇਸੁ ਜਨਪਦੇਸੁ ਦਸਵਗ੍ਗਤੋ ਪਟ੍ਠਾਯ ਸਙ੍ਘੋਤਿ ਗਹੇਤਬ੍ਬੋ. ਤਤ੍ਰਾਯਂ ਪਿਣ੍ਡਤ੍ਥੋ – ਭਨ੍ਤੇ, ਸਙ੍ਘੋ ਮਮ ਵਚਨਂ ਸੁਣਾਤੂਤਿ. ਇਦਞ੍ਚ ਨਵਕਤਰੇਨ ਵਤ੍ਤਬ੍ਬਵਚਨਂ. ਸਚੇ ਪਨ ਅਨੁਸ੍ਸਾਵਕੋ ਸਬ੍ਬੇਹਿ ਭਿਕ੍ਖੂਹਿ ਵੁਡ੍ਢਤਰੋ ਹੋਤਿ, ‘‘ਸੁਣਾਤੁ ਮੇ, ਆਵੁਸੋ ਸਙ੍ਘੋ’’ਤਿ ਵਤ੍ਤਬ੍ਬਂ. ਸੋਪਿ ਚੇ ‘‘ਭਨ੍ਤੇ’’ਤਿ ਵਦੇਯ੍ਯ, ਨਵਕਤਰੋ ਵਾ ‘‘ਆਵੁਸੋ’’ਤਿ, ਕਮ੍ਮਕੋਪੋ ਨਤ੍ਥਿ. ਕੇਚਿ ਪਨ ‘‘ਏਕਤ੍ਥ ‘ਆਵੁਸੋ’ਤਿ ਵਤ੍ਵਾ ਅਞ੍ਞਤ੍ਥ ‘ਭਨ੍ਤੇ’ਤਿ ਵੁਤ੍ਤੇਪਿ ਨਤ੍ਥਿ ਦੋਸੋ ਉਭਯੇਨਪਿ ਆਲਪਨਸ੍ਸ ਸਿਜ੍ਝਨਤੋ’’ਤਿ ਵਦਨ੍ਤਿ.

ਇਦਾਨਿ ਯਮਤ੍ਥਂ ਞਾਪੇਤੁਕਾਮੋ ‘‘ਸੁਣਾਤੂ’’ਤਿ ਸਙ੍ਘਂ ਸਵਨੇ ਨਿਯੋਜੇਤਿ, ਤਂ ਞਾਪੇਨ੍ਤੋ ‘‘ਅਯਂ ਇਤ੍ਥਨ੍ਨਾਮੋ’’ਤਿਆਦਿਮਾਹ. ਤਤ੍ਥ ਅਯਨ੍ਤਿ ਉਪਸਮ੍ਪਦਾਪੇਕ੍ਖਸ੍ਸ ਹਤ੍ਥਪਾਸੇ ਸਨ੍ਨਿਹਿਤਭਾਵਦਸ੍ਸਨਂ, ਤੇਨ ਚ ਹਤ੍ਥਪਾਸੇ ਠਿਤਸ੍ਸੇਵ ਉਪਸਮ੍ਪਦਾ ਰੁਹਤੀਤਿ ਸਿਜ੍ਝਤਿ ਹਤ੍ਥਪਾਸਤੋ ਬਹਿ ਠਿਤਸ੍ਸ ‘‘ਅਯ’’ਨ੍ਤਿ ਨ ਵਤ੍ਤਬ੍ਬਤੋ. ਤੇਨੇਵ ਅਨੁਸਾਸਕਸਮ੍ਮੁਤਿਯਂ ਸੋ ਹਤ੍ਥਪਾਸਤੋ ਬਹਿ ਠਿਤਤ੍ਤਾ ‘‘ਅਯ’’ਨ੍ਤਿ ਨ ਵੁਤ੍ਤੋ, ਤਸ੍ਮਾ ਉਪਸਮ੍ਪਦਾਪੇਕ੍ਖੋ ਅਨੁਪਸਮ੍ਪਨ੍ਨੋ ਹਤ੍ਥਪਾਸੇ ਠਪੇਤਬ੍ਬੋ. ਅਯਂ ਇਤ੍ਥਨ੍ਨਾਮੋਤਿ ਅਯਂ-ਸਦ੍ਦੋ ਚ ਅਵਸ੍ਸਂ ਪਯੁਜ੍ਜਿਤਬ੍ਬੋ, ਸੋ ਚ ਇਮਸ੍ਮਿਂ ਪਠਮਨਾਮਪਯੋਗੇ ਏਵਾਤਿ ਗਹੇਤਬ੍ਬਂ. ‘‘ਇਤ੍ਥਨ੍ਨਾਮੋ’’ਤਿ ਇਦਂ ਅਨਿਯਮਤੋ ਤਸ੍ਸ ਨਾਮਦਸ੍ਸਨਂ, ਉਭਯੇਨਪਿ ਅਯਂ ਬੁਦ੍ਧਰਕ੍ਖਿਤੋਤਿਆਦਿਨਾਮਂ ਦਸ੍ਸੇਤਿ. ‘‘ਉਪਸਮ੍ਪਦਾਪੇਕ੍ਖੋ’’ਤਿ ਭਿਨ੍ਨਾਧਿਕਰਣਵਿਸਯੇ ਬਹੁਬ੍ਬੀਹਿਸਮਾਸੋ, ਉਪਸਮ੍ਪਦਂ ਮੇ ਸਙ੍ਘੋ ਅਪੇਕ੍ਖਮਾਨੋਤਿ ਅਤ੍ਥੋ. ਤਸ੍ਸ ਚ ਉਪਜ੍ਝਾਯਤਂ ਸਮਙ੍ਗਿਭਾਵੇਨ ਦਸ੍ਸੇਤੁਂ ‘‘ਇਤ੍ਥਨ੍ਨਾਮਸ੍ਸ ਆਯਸ੍ਮਤੋ’’ਤਿ ਵੁਤ੍ਤਂ. ਏਤੇਨ ‘‘ਅਯਂ ਬੁਦ੍ਧਰਕ੍ਖਿਤੋ ਆਯਸ੍ਮਤੋ ਧਮ੍ਮਰਕ੍ਖਿਤਸ੍ਸ ਸਦ੍ਧਿਵਿਹਾਰਿਕਭੂਤੋ ਉਪਸਮ੍ਪਦਾਪੇਕ੍ਖੋ’’ਤਿ ਏਵਮਾਦਿਨਾ ਨਯੇਨ ਨਾਮਯੋਜਨਾਯ ਸਹ ਅਤ੍ਥੋ ਦਸ੍ਸਿਤੋ. ਏਤ੍ਥ ਚ ‘‘ਆਯਸ੍ਮਤੋ’’ਤਿ ਪਦਂ ਅਵਤ੍ਵਾਪਿ ‘‘ਅਯਂ ਬੁਦ੍ਧਰਕ੍ਖਿਤੋ ਧਮ੍ਮਰਕ੍ਖਿਤਸ੍ਸ ਉਪਸਮ੍ਪਦਾਪੇਕ੍ਖੋ’’ਤਿ ਵਤ੍ਤੁਂ ਵਟ੍ਟਤਿ. ਤੇਨੇਵ ਪਾਲ਼ਿਯਂ ‘‘ਇਤ੍ਥਨ੍ਨਾਮੇਨ ਉਪਜ੍ਝਾਯੇਨਾ’’ਤਿ ਏਤ੍ਥ ‘‘ਆਯਸ੍ਮਤੋ’’ਤਿ ਪਦਂ ਨ ਵੁਤ੍ਤਂ. ਯਞ੍ਚੇਤ੍ਥ ਵਤ੍ਤਬ੍ਬਂ, ਤਂ ਹੇਟ੍ਠਾ ਵੁਤ੍ਤਮੇਵ.

ਨਨੁ ਚੇਤ੍ਥ ਉਪਜ੍ਝਾਯੋਪਿ ਉਪਸਮ੍ਪਦਾਪੇਕ੍ਖੋ ਵਿਯ ਹਤ੍ਥਪਾਸੇ ਠਿਤੋ ਏਵ ਇਚ੍ਛਿਤਬ੍ਬੋ, ਅਥ ਕਸ੍ਮਾ ‘‘ਅਯਂ ਇਤ੍ਥਨ੍ਨਾਮੋ ਇਮਸ੍ਸ ਇਤ੍ਥਨ੍ਨਾਮਸ੍ਸ ਉਪਸਮ੍ਪਦਾਪੇਕ੍ਖੋ’’ਤਿ ਏਵਂ ਉਪਜ੍ਝਾਯਸ੍ਸ ਨਾਮਪਰਾਮਸਨੇਪਿ ਇਦਂ-ਸਦ੍ਦਪ੍ਪਯੋਗੋ ਨ ਕਤੋਤਿ? ਨਾਯਂ ਵਿਰੋਧੋ ਉਪਜ੍ਝਾਯਸ੍ਸ ਅਭਾਵੇਪਿ ਕਮ੍ਮਕੋਪਾਭਾਵਤੋ. ਕੇਵਲਞ੍ਹਿ ਕਮ੍ਮਨਿਬ੍ਬਤ੍ਤਿਯਾ ਸਨ੍ਤਪਦਵਸੇਨ ਅਵਿਜ੍ਜਮਾਨਸ੍ਸਪਿ ਉਪਜ੍ਝਾਯਸ੍ਸ ਨਾਮਕਿਤ੍ਤਨਂ ਅਨੁਪਜ੍ਝਾਯਸ੍ਸ ਉਪਸਮ੍ਪਦਾਦੀਸੁਪਿ ਕਰੀਯਤਿ, ਤਸ੍ਮਾ ਉਪਜ੍ਝਾਯਸ੍ਸ ਅਸਨ੍ਨਿਹਿਤਾਯਪਿ ਤਪ੍ਪਰਾਮਸਨਮਤ੍ਤੇਨੇਵ ਕਮ੍ਮਸਿਦ੍ਧਿਤੋ ‘‘ਇਮਸ੍ਸਾ’’ਤਿ ਨਿਦ੍ਦਿਸਿਤੁਂ ਨ ਵਟ੍ਟਤੀਤਿ.

ਪਰਿਸੁਦ੍ਧੋ ਅਨ੍ਤਰਾਯਿਕੇਹਿ ਧਮ੍ਮੇਹੀਤਿ ਅਭਬ੍ਬਤ੍ਤਾਦਿਕੇਹਿ ਉਪਸਮ੍ਪਦਾਯ ਅਵਤ੍ਥੁਕਰੇਹਿ ਚੇਵ ਪਞ੍ਚਾਬਾਧਹਤ੍ਥਚ੍ਛਿਨ੍ਨਾਦੀਹਿ ਆਪਤ੍ਤਿਕਰੇਹਿ ਚ ਅਨ੍ਤਰਾਯਿਕਸਭਾਵੇਹਿ ਪਰਿਮੁਤ੍ਤੋ. ਏਵਂ ਵੁਤ੍ਤੇ ਏਵ ਆਪਤ੍ਤਿਮਤ੍ਤਕਰੇਹਿ ਪਞ੍ਚਾਬਾਧਾਦੀਹਿ ਅਪਰਿਮੁਤ੍ਤਸ੍ਸਪਿ ਉਪਸਮ੍ਪਦਾ ਰੁਹਤਿ, ਨਾਞ੍ਞਥਾ. ਪਰਿਪੁਣ੍ਣਸ੍ਸ ਪਤ੍ਤਚੀਵਰਨ੍ਤਿ ਪਰਿਪੁਣ੍ਣਮਸ੍ਸ ਉਪਸਮ੍ਪਦਾਪੇਕ੍ਖਸ੍ਸ ਪਤ੍ਤਚੀਵਰਂ. ਏਵਂ ਵੁਤ੍ਤੇ ਏਵ ਅਪਤ੍ਤਚੀਵਰਸ੍ਸਪਿ ਉਪਸਮ੍ਪਦਾ ਰੁਹਤਿ, ਨਾਞ੍ਞਥਾ. ਉਪਸਮ੍ਪਦਂ ਯਾਚਤੀਤਿ ‘‘ਸਙ੍ਘਂ, ਭਨ੍ਤੇ, ਉਪਸਮ੍ਪਦਂ ਯਾਚਾਮੀ’’ਤਿਆਦਿਨਾ (ਮਹਾਵ. ੧੨੬) ਯਾਚਾਪਿਤਭਾਵਂ ਸਨ੍ਧਾਯ ਵੁਤ੍ਤਂ. ਏਵਂ ਤੇਨ ਸਙ੍ਘੇ ਅਯਾਚਿਤੇਪਿ ‘‘ਇਤ੍ਥਨ੍ਨਾਮੋ ਸਙ੍ਘਂ ਉਪਸਮ੍ਪਦਂ ਯਾਚਤੀ’’ਤਿ ਵੁਤ੍ਤੇ ਏਵ ਕਮ੍ਮਂ ਅਵਿਪਨ੍ਨਂ ਹੋਤਿ, ਨਾਞ੍ਞਥਾ. ਉਪਜ੍ਝਾਯੇਨਾਤਿ ਉਪਜ੍ਝਾਯੇਨ ਕਰਣਭੂਤੇਨ, ਇਤ੍ਥਨ੍ਨਾਮਂ ਉਪਜ੍ਝਾਯਂ ਕਤ੍ਵਾ ਕਮ੍ਮਭੂਤਂ ਉਪਸਮ੍ਪਦਂ ਦਾਤੁਂ ਨਿਪ੍ਫਾਦੇਤੁਂ ਕਤ੍ਤੁਭੂਤਂ ਸਙ੍ਘਂ ਯਾਚਤੀਤਿ ਅਤ੍ਥੋ. ਯਾਚਧਾਤੁਨੋ ਪਨ ਦ੍ਵਿਕਮ੍ਮਕਤ੍ਤਾ ‘‘ਸਙ੍ਘਂ ਉਪਸਮ੍ਪਦ’’ਨ੍ਤਿ ਦ੍ਵੇ ਕਮ੍ਮਪਦਾਨਿ ਵੁਤ੍ਤਾਨਿ.

ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਨ੍ਤਿ ਏਤ੍ਥ ਪਤ੍ਤੋ ਕਾਲੋ ਇਮਸ੍ਸ ਕਮ੍ਮਸ੍ਸਾਤਿ ਪਤ੍ਤਕਾਲਂ, ਅਪਲੋਕਨਾਦਿਚਤੁਬ੍ਬਿਧਂ ਸਙ੍ਘਗਣਕਮ੍ਮਂ, ਤਦੇਵ ਸਕਤ੍ਥੇ ਯ-ਪਚ੍ਚਯੇਨ ‘‘ਪਤ੍ਤਕਲ੍ਲ’’ਨ੍ਤਿ ਵੁਚ੍ਚਤਿ. ਇਧ ਪਨ ਞਤ੍ਤਿਚਤੁਤ੍ਥਉਪਸਮ੍ਪਦਾਕਮ੍ਮਂ ਅਧਿਪ੍ਪੇਤਂ, ਤਂ ਕਾਤੁਂ ਸਙ੍ਘਸ੍ਸ ਪਤ੍ਤਕਲ੍ਲਂ ਜਾਤਂ. ਯਦੀਤਿ ਅਨੁਮਤਿਗਹਣਵਸੇਨ ਕਮ੍ਮਸ੍ਸ ਪਤ੍ਤਕਲ੍ਲਤਂ ਞਾਪੇਤਿ, ਯੋ ਹਿ ਕੋਚਿ ਤਤ੍ਥ ਅਪਤ੍ਤਕਲ੍ਲਤਂ ਮਞ੍ਞਿਸ੍ਸਤਿ, ਸੋ ਵਕ੍ਖਤਿ. ਇਮਮੇਵ ਹਿ ਅਤ੍ਥਂ ਸਨ੍ਧਾਯ ਅਨੁਸ੍ਸਾਵਨਾਸੁ ‘‘ਯਸ੍ਸਾਯਸ੍ਮਤੋ ਖਮਤਿ…ਪੇ… ਸੋ ਭਾਸੇਯ੍ਯਾ’’ਤਿ (ਮਹਾਵ. ੧੨੭) ਵੁਤ੍ਤਂ. ਤਦੇਤਂ ਪਤ੍ਤਕਲ੍ਲਂ ਵਤ੍ਥੁਸਮ੍ਪਦਾ, ਅਨ੍ਤਰਾਯਿਕੇਹਿ ਧਮ੍ਮੇਹਿ ਚਸ੍ਸ ਪਰਿਸੁਦ੍ਧਤਾ, ਸੀਮਾਸਮ੍ਪਦਾ, ਪਰਿਸਾਸਮ੍ਪਦਾ, ਪੁਬ੍ਬਕਿਚ੍ਚਨਿਟ੍ਠਾਨਨ੍ਤਿ ਇਮੇਹਿ ਪਞ੍ਚਹਿ ਅਙ੍ਗੇਹਿ ਸਙ੍ਗਹਿਤਂ.

ਤਤ੍ਥ ਵਤ੍ਥੁਸਮ੍ਪਦਾ ਨਾਮ ਯਥਾਵੁਤ੍ਤੇਹਿ ਏਕਾਦਸਅਭਬ੍ਬਪੁਗ੍ਗਲੇਹਿ ਚੇਵ ਅਨ੍ਤਿਮਵਤ੍ਥੁਅਜ੍ਝਾਪਨ੍ਨੇਹਿ ਚ ਅਞ੍ਞੋ ਪਰਿਪੁਣ੍ਣਵੀਸਤਿਵਸ੍ਸੋ ਅਨੁਪਸਮ੍ਪਨ੍ਨਭੂਤੋ ਮਨੁਸ੍ਸਪੁਰਿਸੋ. ਏਤਸ੍ਮਿਞ੍ਹਿ ਪੁਗ੍ਗਲੇ ਸਤਿ ਏਵ ਇਦਂ ਸਙ੍ਘਸ੍ਸ ਉਪਸਮ੍ਪਦਾਕਮ੍ਮਂ ਪਤ੍ਤਕਲ੍ਲਂ ਨਾਮ ਹੋਤਿ, ਨਾਸਤਿ, ਕਤਞ੍ਚ ਕੁਪ੍ਪਮੇਵ ਹੋਤਿ.

ਅਨ੍ਤਰਾਯਿਕੇਹਿ ਧਮ੍ਮੇਹਿ ਚਸ੍ਸ ਪਰਿਸੁਦ੍ਧਤਾ ਨਾਮ ਯਥਾਵੁਤ੍ਤਸ੍ਸੇਵ ਉਪਸਮ੍ਪਦਾਵਤ੍ਥੁਭੂਤਸ੍ਸ ਪੁਗ੍ਗਲਸ੍ਸ ਯੇ ਇਮੇ ਭਗਵਤਾ ਪਟਿਕ੍ਖਿਤ੍ਤਾ ਪਞ੍ਚਾਬਾਧਫੁਟ੍ਠਤਾਦਯੋ ਮਾਤਾਪਿਤੂਹਿ ਅਨਨੁਞ੍ਞਾਤਤਾਪਅਯੋਸਾਨਾ ਚੇਵ ਹਤ੍ਥਚ੍ਛਿਨ੍ਨਾਦਯੋ ਚ ਦੋਸਧਮ੍ਮਾ ਕਾਰਕਸਙ੍ਘਸ੍ਸ ਆਪਤ੍ਤਾਦਿਅਨ੍ਤਰਾਯਹੇਤੁਤਾਯ ‘‘ਅਨ੍ਤਰਾਯਿਕਾ’’ਤਿ ਵੁਚ੍ਚਨ੍ਤਿ, ਤੇਹਿ ਅਨ੍ਤਰਾਯਿਕੇਹਿ ਦੋਸਧਮ੍ਮੇਹਿ ਪਰਿਮੁਤ੍ਤਤਾ, ਇਮਿਸ੍ਸਾ ਚ ਸਤਿ ਏਵ ਇਦਂ ਕਮ੍ਮਂ ਪਤ੍ਤਕਲ੍ਲਂ ਨਾਮ ਹੋਤਿ, ਨਾਸਤਿ, ਕਤਂ ਪਨ ਕਮ੍ਮਂ ਸੁਕਤਮੇਵ ਹੋਤਿ ਠਪੇਤ੍ਵਾ ਊਨਵੀਸਤਿਵਸ੍ਸਂ ਪੁਗ੍ਗਲਂ.

ਸੀਮਾਸਮ੍ਪਦਾ ਪਨ ਉਪੋਸਥਕ੍ਖਨ੍ਧਕੇ (ਮਹਾਵ. ੧੩੮ ਆਦਯੋ) ਵਕ੍ਖਮਾਨਨਯੇਨ ਸਬ੍ਬਦੋਸਰਹਿਤਾਯ ਬਦ੍ਧਾਬਦ੍ਧਵਸੇਨੇਵ ਦੁਵਿਧਾਯ ਸੀਮਾਯ ਵਸੇਨ ਵੇਦਿਤਬ੍ਬਾ. ਤਾਦਿਸਾਯ ਹਿ ਸੀਮਾਯ ਸਤਿ ਏਵ ਇਦਂ ਕਮ੍ਮਂ ਪਤ੍ਤਕਲ੍ਲਂ ਨਾਮ ਹੋਤਿ, ਨਾਸਤਿ, ਕਤਞ੍ਚ ਕਮ੍ਮਂ ਵਿਪਜ੍ਜਤਿ.

ਪਰਿਸਾਸਮ੍ਪਦਾ ਪਨ ਯੇ ਇਮੇ ਉਪਸਮ੍ਪਦਾਕਮ੍ਮਸ੍ਸ ਸਬ੍ਬਨ੍ਤਿਮੇਨ ਪਰਿਚ੍ਛੇਦੇਨ ਕਮ੍ਮਪ੍ਪਤ੍ਤਾ ਦਸਹਿ ਵਾ ਪਞ੍ਚਹਿ ਵਾ ਅਨੂਨਾਪਾਰਾਜਿਕਂ ਅਨਾਪਨ੍ਨਾ ਅਨੁਕ੍ਖਿਤ੍ਤਾ ਚ ਸਮਾਨਸਂਵਾਸਕਾ ਭਿਕ੍ਖੂ, ਤੇਸਂ ਏਕਸੀਮਾਯ ਹਤ੍ਥਪਾਸਂ ਅਵਿਜਹਿਤ੍ਵਾ ਠਾਨਂ, ਛਨ੍ਦਾਰਹਾਨਞ੍ਚ ਛਨ੍ਦਸ੍ਸ ਆਨਯਨਂ, ਸਮ੍ਮੁਖੀਭੂਤਾਨਞ੍ਚ ਅਪ੍ਪਟਿਕੋਸਨਂ, ਉਪਸਮ੍ਪਦਾਪੇਕ੍ਖਰਹਿਤਾਨਂ ਉਪੋਸਥਕ੍ਖਨ੍ਧਕੇ ਪਟਿਕ੍ਖਿਤ੍ਤਾਨਂ ਗਹਟ੍ਠਾਦਿਅਨੁਪਸਮ੍ਪਨ੍ਨਾਨਞ੍ਚੇਵ ਪਾਰਾਜਿਕੁਕ੍ਖਿਤ੍ਤਕਨਾਨਾਸਂਵਾਸਕਭਿਕ੍ਖੁਨੀਨਞ੍ਚ ਵਜ੍ਜਨੀਯਪੁਗ੍ਗਲਾਨਂ ਸਙ੍ਘਸ੍ਸ ਹਤ੍ਥਪਾਸੇ ਅਭਾਵੋ ਚਾਤਿ ਇਮੇਹਿ ਚਤੂਹਿ ਅਙ੍ਗੇਹਿ ਸਙ੍ਗਹਿਤਾ. ਏਵਰੂਪਾਯ ਚ ਪਰਿਸਾਸਮ੍ਪਦਾਯ ਸਤਿ ਏਵ ਇਦਂ ਪਤ੍ਤਕਲ੍ਲਂ ਨਾਮ ਹੋਤਿ, ਨਾਸਤਿ. ਤਤ੍ਥ ਪੁਰਿਮਾਨਂ ਤਿਣ੍ਣਂ ਅਙ੍ਗਾਨਂ ਅਞ੍ਞਤਰਸ੍ਸਪਿ ਅਭਾਵੇ ਕਤਂ ਕਮ੍ਮਂ ਵਿਪਜ੍ਜਤਿ, ਨ ਪਚ੍ਛਿਮਸ੍ਸ.

ਪੁਬ੍ਬਕਿਚ੍ਚਨਿਟ੍ਠਾਨਂ ਨਾਮ ਯਾਨਿਮਾਨਿ ‘‘ਪਠਮਂ ਉਪਜ੍ਝਂ ਗਾਹਾਪੇਤਬ੍ਬੋ’’ਤਿਆਦਿਨਾ ਪਾਲ਼ਿਯਂ (ਮਹਾਵ. ੧੨੬) ਵੁਤ੍ਤਾਨਿ ‘‘ਉਪਜ੍ਝਾਗਾਹਾਪਨਂ, ਪਤ੍ਤਚੀਵਰਾਚਿਕ੍ਖਣਂ, ਤਤੋ ਤਂ ਹਤ੍ਥਪਾਸਤੋ ਬਹਿ ਪੇਸੇਤ੍ਵਾ ਅਨੁਸਾਸਕਸਮ੍ਮੁਤਿਕਮ੍ਮਕਰਣਂ, ਸਮ੍ਮਤੇਨ ਚ ਗਨ੍ਤ੍ਵਾ ਅਨੁਸਾਸਨਂ, ਤੇਨ ਚ ਪਠਮਤਰਂ ਆਗਨ੍ਤ੍ਵਾ ਸਙ੍ਘਸ੍ਸ ਞਤ੍ਤਿਂ ਞਾਪੇਤ੍ਵਾ ਉਪਸਮ੍ਪਦਾਪੇਕ੍ਖਂ ‘ਆਗਚ੍ਛਾਹੀ’ਤਿ ਹਤ੍ਥਪਾਸੇ ਏਵ ਅਬ੍ਭਾਨਂ, ਤੇਨ ਭਿਕ੍ਖੂਨਂ ਪਾਦੇ ਵਨ੍ਦਾਪੇਤ੍ਵਾ ਉਪਸਮ੍ਪਦਾਯਾਚਾਪਨਂ, ਤਤੋ ਅਨ੍ਤਰਾਯਿਕਧਮ੍ਮਪੁਚ੍ਛਕਸਮ੍ਮੁਤਿਕਮ੍ਮਕਰਣਂ, ਸਮ੍ਮਤੇਨ ਚ ਪੁਚ੍ਛਨ’’ਨ੍ਤਿ ਇਮਾਨਿ ਅਟ੍ਠ ਪੁਬ੍ਬਕਿਚ੍ਚਾਨਿ, ਤੇਸਂ ਸਬ੍ਬੇਸਂ ਯਾਥਾਵਤੋ ਕਰਣੇਨ ਨਿਟ੍ਠਾਨਂ. ਏਤਸ੍ਮਿਞ੍ਚ ਪੁਬ੍ਬਕਿਚ੍ਚਨਿਟ੍ਠਾਪਨੇ ਸਤਿ ਏਵ ਇਦਂ ਸਙ੍ਘਸ੍ਸ ਉਪਸਮ੍ਪਦਾਕਮ੍ਮਂ ਪਤ੍ਤਕਲ੍ਲਂ ਨਾਮ ਹੋਤਿ, ਨਾਸਤਿ. ਏਤੇਸੁ ਪਨ ਪੁਬ੍ਬਕਮ੍ਮੇਸੁ ਅਕਤੇਸੁਪਿ ਕਤਂ ਕਮ੍ਮਂ ਯਥਾਵੁਤ੍ਤੇਸੁ ਵਤ੍ਥੁਸਮ੍ਪਤ੍ਤਿਆਦੀਸੁ ਵਿਜ੍ਜਮਾਨੇਸੁ ਅਕੁਪ੍ਪਮੇਵ ਹੋਤਿ. ਤਦੇਵਮੇਤ੍ਥ ਪਤ੍ਤਕਲ੍ਲਂ ਇਮੇਹਿ ਪਞ੍ਚਹਿ ਅਙ੍ਗੇਹਿ ਸਙ੍ਗਹਿਤਨ੍ਤਿ ਵੇਦਿਤਬ੍ਬਂ. ਇਮਿਨਾਵ ਨਯੇਨ ਹੇਟ੍ਠਾ ਵੁਤ੍ਤੇਸੁ, ਵਕ੍ਖਮਾਨੇਸੁ ਚ ਸਬ੍ਬੇਸੁ ਕਮ੍ਮੇਸੁ ਪਤ੍ਤਕਲ੍ਲਤਾ ਯਥਾਰਹਂ ਯੋਜੇਤ੍ਵਾ ਞਾਤਬ੍ਬਾ.

ਇਤ੍ਥਨ੍ਨਾਮਂ ਉਪਸਮ੍ਪਾਦੇਯ੍ਯਾਤਿ ਉਪਸਮ੍ਪਦਾਨਿਪ੍ਫਾਦਨੇਨ ਤਂਸਮਙ੍ਗਿਂ ਕਰੇਯ੍ਯ ਕਰੋਤੂਤਿ ਪਤ੍ਥਨਾਯਂ, ਵਿਧਿਮ੍ਹਿ ਵਾ ਇਦਂ ਦਟ੍ਠਬ੍ਬਂ. ਯਥਾ ਹਿ ‘‘ਦੇਵਦਤ੍ਤਂ ਸੁਖਾਪੇਯ੍ਯਾ’’ਤਿ ਵੁਤ੍ਤੇ ਸੁਖਮਸ੍ਸ ਨਿਪ੍ਫਾਦੇਤ੍ਵਾ ਤਂ ਸੁਖਸਮਙ੍ਗਿਨਂ ਕਰੇਯ੍ਯਾਤਿ ਅਤ੍ਥੋ ਹੋਤਿ, ਏਵਮਿਧਾਪਿ ਉਪਸਮ੍ਪਦਮਸ੍ਸ ਨਿਪ੍ਫਾਦੇਤ੍ਵਾ ਤਂ ਉਪਸਮ੍ਪਦਾਸਮਙ੍ਗਿਨਂ ਕਰੇਯ੍ਯਾਤਿ ਅਤ੍ਥੋ. ਪਯੋਜਕਬ੍ਯਾਪਾਰੇ ਚੇਤਂ. ਯਥਾ ਸੁਖਯਨ੍ਤਂ ਕਿਞ੍ਚਿ ਸੁਦ੍ਧਕਤ੍ਤਾਰਂ ਕੋਚਿ ਹੇਤੁਕਤ੍ਤਾ ਸੁਖਹੇਤੁਨਿਪ੍ਫਾਦਨੇਨ ਸੁਖਾਪੇਯ੍ਯਾਤਿ ਵੁਚ੍ਚਤਿ, ਏਵਮਿਧਾਪਿ ਉਪਸਮ੍ਪਜ੍ਜਨ੍ਤਂ ਸੁਦ੍ਧਕਤ੍ਤਾਰਂ ਪੁਗ੍ਗਲਂ ਹੇਤੁਕਤ੍ਤੁਭੂਤੋ ਸਙ੍ਘੋ ਉਪਸਮ੍ਪਦਾਹੇਤੁਨਿਪ੍ਫਾਦਨੇਨ ਉਪਸਮ੍ਪਾਦੇਯ੍ਯਾਤਿ ਵੁਤ੍ਤੋ. ਏਤੇਨ ਚ ਸੁਖਂ ਵਿਯ ਸੁਖਦਾਯਕੇਨ ਸਙ੍ਘੇਨ ਪੁਗ੍ਗਲਸ੍ਸ ਦੀਯਮਾਨਾ ਤਥਾਪਵਤ੍ਤਪਰਮਤ੍ਥਧਮ੍ਮੇ ਉਪਾਦਾਯ ਅਰਿਯਜਨਪਞ੍ਞਤ੍ਤਾ ਉਪਸਮ੍ਪਦਾ ਨਾਮ ਸਮ੍ਮੁਤਿਸਚ੍ਚਤਾ ਅਤ੍ਥੀਤਿ ਸਮਤ੍ਥਿਤਂ ਹੋਤਿ. ਏਤ੍ਥ ਚ ‘‘ਇਤ੍ਥਨ੍ਨਾਮੋ ਸਙ੍ਘਂ ਉਪਸਮ੍ਪਦਂ ਯਾਚਤੀ’’ਤਿ (ਮਹਾਵ. ੧੨੭) ਵੁਤ੍ਤਤ੍ਤਾ ਪਰਿਵਾਸਾਦੀਸੁ ਵਿਯ ਯਾਚਨਾਨੁਗੁਣਂ ‘‘ਇਤ੍ਥਨ੍ਨਾਮਸ੍ਸ ਉਪਸਮ੍ਪਦਂ ਦਦੇਯ੍ਯਾ’’ਤਿ ਅਵਤ੍ਵਾ ‘‘ਇਤ੍ਥਨ੍ਨਾਮਂ ਉਪਸਮ੍ਪਾਦੇਯ੍ਯਾ’’ਤਿ ਵੁਤ੍ਤਤ੍ਤਾ ਇਦਂ ਉਪਸਮ੍ਪਦਾਕਮ੍ਮਂ ਦਾਨੇ ਅਸਙ੍ਗਹੇਤ੍ਵਾ ਕਮ੍ਮਲਕ੍ਖਣੇ ਏਵ ਸਙ੍ਗਹਿਤਨ੍ਤਿ ਦਟ੍ਠਬ੍ਬਂ. ਇਮਿਨਾ ਨਯੇਨ ‘‘ਇਤ੍ਥਨ੍ਨਾਮਂ ਉਪਸਮ੍ਪਾਦੇਤਿ, ਉਪਸਮ੍ਪਨ੍ਨੋ ਸਙ੍ਘੇਨਾ’’ਤਿ ਏਤ੍ਥਾਪਿ ਅਤ੍ਥੋ ਵੇਦਿਤਬ੍ਬੋ. ਕੇਵਲਞ੍ਹਿ ਤਤ੍ਥ ਵਤ੍ਤਮਾਨਕਾਲਅਤੀਤਕਾਲਵਸੇਨ, ਇਧ ਪਨ ਅਨਾਮਟ੍ਠਕਾਲਵਸੇਨਾਤਿ ਏਤ੍ਤਕਮੇਵ ਵਿਸੇਸੋ.

ਏਸਾ ਞਤ੍ਤੀਤਿ ‘‘ਸਙ੍ਘੋ ਞਾਪੇਤਬ੍ਬੋ’’ਤਿ ਵੁਤ੍ਤਞਾਪਨਾ ਏਸਾ. ਇਦਞ੍ਚ ਅਨੁਸ੍ਸਾਵਨਾਨਮ੍ਪਿ ਸਬ੍ਭਾਵਸੂਚਨਤ੍ਥਂ ਵੁਚ੍ਚਤਿ. ਅਵਸ੍ਸਞ੍ਚੇਤਂ ਵਤ੍ਤਬ੍ਬਮੇਵ. ਞਤ੍ਤਿਕਮ੍ਮੇ ਏਵ ਤਂ ਨ ਵਤ੍ਤਬ੍ਬਂ. ਤਤ੍ਥ ਪਨ ਯ੍ਯ-ਕਾਰੇ ਵੁਤ੍ਤਮਤ੍ਤੇ ਏਵ ਞਤ੍ਤਿਕਮ੍ਮਂ ਨਿਟ੍ਠਿਤਂ ਹੋਤੀਤਿ ਦਟ੍ਠਬ੍ਬਂ. ਖਮਤੀਤਿ ਰੁਚ੍ਚਤਿ. ਉਪਸਮ੍ਪਦਾਤਿ ਸਙ੍ਘੇਨ ਦੀਯਮਾਨਾ ਨਿਪ੍ਫਾਦਿਯਮਾਨਾ ਉਪਸਮ੍ਪਦਾ, ਯਸ੍ਸ ਖਮਤਿ, ਸੋ ਤੁਣ੍ਹਸ੍ਸਾਤਿ ਯੋਜਨਾ. ਤੁਣ੍ਹੀਤਿ ਚ ਅਕਥਨਤ੍ਥੇ ਨਿਪਾਤੋ, ਅਕਥਨਕੋ ਅਸ੍ਸ ਭਵੇਯ੍ਯਾਤਿ ਅਤ੍ਥੋ. ਖਮਤਿ ਸਙ੍ਘਸ੍ਸ ਇਤ੍ਥਨ੍ਨਾਮਸ੍ਸ ਉਪਸਮ੍ਪਦਾਤਿ ਪਕਤੇਨ ਸਮ੍ਬਨ੍ਧੋ. ਤਤ੍ਥ ਕਾਰਣਮਾਹ ‘‘ਤਸ੍ਮਾ ਤੁਣ੍ਹੀ’’ਤਿ. ਤਤ੍ਥ ‘‘ਆਸੀ’’ਤਿ ਸੇਸੋ. ਯਸ੍ਮਾ ‘‘ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯਾ’’ਤਿ ਤਿਕ੍ਖਤ੍ਤੁਂ ਵੁਚ੍ਚਮਾਨੋਪਿ ਸਙ੍ਘੋ ਤੁਣ੍ਹੀ ਨਿਰਵੋ ਅਹੋਸਿ, ਤਸ੍ਮਾ ਖਮਤਿ ਸਙ੍ਘਸ੍ਸਾਤਿ ਅਤ੍ਥੋ. ਏਵਨ੍ਤਿ ਇਮਿਨਾ ਪਕਾਰੇਨ. ਤੁਣ੍ਹੀਭਾਵੇਨੇਵੇਤਂ ਸਙ੍ਘਸ੍ਸ ਰੁਚ੍ਚਨਭਾਵਂ ਧਾਰਯਾਮਿ, ਬੁਜ੍ਝਾਮਿ ਜਾਨਾਮੀਤਿ ਅਤ੍ਥੋ. ਇਤਿ-ਸਦ੍ਦੋ ਪਰਿਸਮਾਪਨਤ੍ਥੇ ਕਤੋ, ਸੋ ਚ ਕਮ੍ਮਵਾਚਾਯ ਅਨਙ੍ਗਂ, ਤਸ੍ਮਾ ਅਨੁਸ੍ਸਾਵਕੇਨ ‘‘ਧਾਰਯਾਮੀ’’ਤਿ ਏਤ੍ਥ ਮਿ-ਕਾਰਪਰਿਯੋਸਾਨਮੇਵ ਵਤ੍ਵਾ ਨਿਟ੍ਠਪੇਤਬ੍ਬਂ, ਇਤਿ-ਸਦ੍ਦੋ ਨ ਪਯੁਜ੍ਜਿਤਬ੍ਬੋਤਿ ਦਟ੍ਠਬ੍ਬਂ. ਇਮਿਨਾ ਨਯੇਨ ਸਬ੍ਬਕਮ੍ਮਵਾਚਾਨਮਤ੍ਥੋ ਵੇਦਿਤਬ੍ਬੋ.

ਏਕਪੋਰਿਸਾ ਵਾਤਿਆਦਿ ਸਤ੍ਤਾਨਂ ਸਰੀਰਛਾਯਂ ਪਾਦੇਹਿ ਮਿਨਿਤ੍ਵਾ ਜਾਨਨਪ੍ਪਕਾਰਦਸ੍ਸਨਂ. ਛਸਤ੍ਤਪਦਪਰਿਮਿਤਾ ਹਿ ਛਾਯਾ ‘‘ਪੋਰਿਸਾ’’ਤਿ ਵੁਚ੍ਚਤਿ, ਇਦਞ੍ਚ ਉਤੁਪ੍ਪਮਾਣਾਚਿਕ੍ਖਣਾਦਿ ਚ ਆਗਨ੍ਤੁਕੇਹਿ ਸਦ੍ਧਿਂ ਵੀਮਂਸਿਤ੍ਵਾ ਵੁਡ੍ਢਨਵਭਾਵਂ ਞਤ੍ਵਾ ਵਨ੍ਦਨਵਨ੍ਦਾਪਨਾਦਿਕਰਣਤ੍ਥਂ ਵੁਤ੍ਤਂ. ਏਤਿ ਆਗਚ੍ਛਤਿ, ਗਚ੍ਛਤਿ ਚਾਤਿ ਉਤੁ, ਸੋਵ ਪਮੀਯਤੇ ਅਨੇਨ ਸਂਵਚ੍ਛਰਨ੍ਤਿ ਪਮਾਣਨ੍ਤਿ ਆਹ ‘‘ਉਤੁਯੇਵ ਉਤੁਪ੍ਪਮਾਣ’’ਨ੍ਤਿ. ਅਪਰਿਪੁਣ੍ਣਾਤਿ ਉਪਸਮ੍ਪਦਾਦਿਵਸੇਨ ਅਪਰਿਪੁਣ੍ਣਾ. ਯਦਿ ਉਤੁਵੇਮਜ੍ਝੇ ਉਪਸਮ੍ਪਾਦਿਤੋ, ਤਦਾ ਤਸ੍ਮਿਂ ਉਤੁਮ੍ਹਿ ਅਵਸਿਟ੍ਠਦਿਵਸਾਚਿਕ੍ਖਣਂ ਦਿਵਸਭਾਗਾਚਿਕ੍ਖਣਨ੍ਤਿ ਦਸ੍ਸੇਤਿ. ਤੇਨਾਹ ‘‘ਯਤ੍ਤਕੇਹਿ ਦਿਵਸੇਹਿ ਯਸ੍ਸ ਯੋ ਉਤੁ ਅਪਰਿਪੁਣ੍ਣੋ, ਤੇ ਦਿਵਸੇ’’ਤਿ. ਤਤ੍ਥ ਯਸ੍ਸ ਤਙ੍ਖਣਂ ਲਦ੍ਧੂਪਸਮ੍ਪਦਸ੍ਸ ਪੁਗ੍ਗਲਸ੍ਸ ਸਮ੍ਬਨ੍ਧੀ ਯੋ ਉਤੁ ਯਤ੍ਤਕੇਹਿ ਦਿਵਸੇਹਿ ਅਪਰਿਪੁਣ੍ਣੋ, ਤੇ ਦਿਵਸੇਤਿ ਯੋਜਨਾ.

ਛਾਯਾਦਿਕਮੇਵ ਸਬ੍ਬਂ ਸਙ੍ਗਹੇਤ੍ਵਾ ਗਾਯਿਤਬ੍ਬਤੋ ਕਥੇਤਬ੍ਬਤੋ ਸਙ੍ਗੀਤੀਤਿ ਆਹ ‘‘ਇਦਮੇਵਾ’’ਤਿਆਦਿ. ਤਤ੍ਥ ਏਕਤੋ ਕਤ੍ਵਾ ਆਚਿਕ੍ਖਿਤਬ੍ਬਂ. ਤ੍ਵਂ ਕਿਂ ਲਭਸੀਤਿ ਤ੍ਵਂ ਉਪਸਮ੍ਪਾਦਨਕਾਲੇ ਕਤਰਵਸ੍ਸਂ, ਕਤਰਉਤੁਞ੍ਚ ਲਭਸਿ, ਕਤਰਸ੍ਮਿਂ ਤੇ ਉਪਸਮ੍ਪਦਾ ਲਦ੍ਧਾਤਿ ਅਤ੍ਥੋ. ਵਸ੍ਸਨ੍ਤਿ ਵਸ੍ਸਾਨਉਤੁ, ਇਦਞ੍ਚ ਸਂਵਚ੍ਛਰਾਚਿਕ੍ਖਣਂ ਵਿਨਾ ਵੁਤ੍ਤਮ੍ਪਿ ਨ ਵਿਞ੍ਞਾਯਤੀਤਿ ਇਮਿਨਾ ਉਤੁਆਚਿਕ੍ਖਣੇਨੇਵ ਸਾਸਨਵਸ੍ਸੇਸੁ ਵਾ ਕਲਿਯੁਗਵਸ੍ਸਾਦੀਸੁ ਵਾ ਸਹਸ੍ਸਿਮੇ ਵਾ ਸਤਿਮੇ ਵਾ ਅਸੁਕਉਤੁਂ ਲਭਾਮੀਤਿ ਦਸ੍ਸਿਤਨ੍ਤਿ ਦਟ੍ਠਬ੍ਬਂ. ਛਾਯਾਤਿ ਇਦਂ ਪਾਲ਼ਿਯਂ ਆਗਤਪਟਿਪਾਟਿਂ ਸਨ੍ਧਾਯ ਵੁਤ੍ਤਂ, ਵਤ੍ਤਬ੍ਬਕਮ੍ਮਤੋ ਪਨ ਕਲਿਯੁਗਵਸ੍ਸਾਦੀਸੁ ਸਬ੍ਬਦੇਸਪਸਿਦ੍ਧੇਸੁ ਅਸੁਕਵਸ੍ਸੇ ਅਸੁਕਉਤੁਮ੍ਹਿ ਅਸੁਕਮਾਸੇ ਅਸੁਕਕਣ੍ਹੇ ਵਾ ਸੁਕ੍ਕੇ ਵਾ ਪਕ੍ਖੇ ਅਸੁਕੇ ਤਿਥਿਵਾਰਵਿਸੇਸਯੁਤ੍ਤੇ ਪੁਬ੍ਬਣ੍ਹਾਦਿਦਿਵਸਭਾਗੇ ਏਤ੍ਤਕੇ ਛਾਯਾਪਮਾਣੇ, ਨਾਡਿਕਾਪਮਾਣੇ ਵਾ ਮਯਾ ਉਪਸਮ੍ਪਦਾ ਲਦ੍ਧਾਤਿ ਵਦੇਯ੍ਯਾਸੀਤਿ ਏਵਂ ਆਚਿਕ੍ਖਿਤਬ੍ਬਂ. ਇਦਂ ਸੁਟ੍ਠੁ ਉਗ੍ਗਹੇਤ੍ਵਾ ਆਗਨ੍ਤੁਕੇਹਿ ਵੁਡ੍ਢਪਟਿਪਾਟਿਂ ਞਤ੍ਵਾ ਪਟਿਪਜ੍ਜਾਹੀਤਿ ਵਤ੍ਤਬ੍ਬਂ. ਇਤਿ ਏਤ੍ਤਕੋ ਕਥਾਮਗ੍ਗੋ ਵਿਮਤਿਵਿਨੋਦਨਿਯਂ ਆਗਤੋ. ਵਜਿਰਬੁਦ੍ਧਿਟੀਕਾਨਯੋ ਪਨ ਏਕਚ੍ਚੋ ਇਧੇਵ ਸਙ੍ਗਹਂ ਗਤੋ, ਏਕਚ੍ਚੋ ਅਸਨ੍ਨਿਟ੍ਠਾਨਵਿਨਿਚ੍ਛਯਤ੍ਤਾ ਸਂਸਯਹੇਤੁਕੋ ਹੋਤਿ, ਤਸ੍ਮਾ ਇਧ ਨ ਗਹਿਤੋਤਿ.

ਇਤਿ ਵਿਨਯਸਙ੍ਗਹਸਂਵਣ੍ਣਨਾਭੂਤੇ ਵਿਨਯਾਲਙ੍ਕਾਰੇ

ਉਪਸਮ੍ਪਦਾਵਿਨਿਚ੍ਛਯਕਥਾਲਙ੍ਕਾਰੋ.