੨. ਪਰਿਕ੍ਖਾਰਵਿਨਿਚ੍ਛਯਕਥਾ
੬. ਏਵਂ ਦਿਵਾਸੇਯ੍ਯਵਿਨਿਚ੍ਛਯਂ ਕਥੇਤ੍ਵਾ ਇਦਾਨਿ ਪਰਿਕ੍ਖਾਰਵਿਨਿਚ੍ਛਯਂ ਕਥੇਤੁਂ ‘‘ਪਰਿਕ੍ਖਾਰੋਤਿ ਸਮਣਪਰਿਕ੍ਖਾਰੋ’’ਤਿਆਦਿਮਾਹ. ਤਤ੍ਥ ਦਿਵਾਸੇਯ੍ਯਵਿਨਿਚ੍ਛਯਕਥਾਯ ਆਦਿਮ੍ਹਿ ਵੁਤ੍ਤਂ ‘‘ਤਤ੍ਥਾ’’ਤਿ ਪਦਂ ਆਨੇਤ੍ਵਾ ਤਤ੍ਥ ਤੇਸੁ ਮਾਤਿਕਾਪਦੇਸੁ ਸਮਭਿਨਿਵਿਟ੍ਠਸ੍ਸ ‘‘ਪਰਿਕ੍ਖਾਰੋ’’ਤਿ ਪਦਸ੍ਸ ‘‘ਸਮਣਪਰਿਕ੍ਖਾਰੋ’’ਤਿ ਅਤ੍ਥੋ ਦਟ੍ਠਬ੍ਬੋਤਿ ਯੋਜਨਾ, ਏਸ ਨਯੋ ਇਤੋ ਪਰੇਪਿ. ਸਮਣਪਰਿਕ੍ਖਾਰੋ ਵੁਤ੍ਤੋ, ਨ ਗਿਹਿਪਰਿਕ੍ਖਾਰੋਤਿ ਅਧਿਪ੍ਪਾਯੋ. ਪਰਿਸਮਨ੍ਤਤੋ ਕਰਿਯਤੇਤਿ ਪਰਿਕ੍ਖਾਰੋ, ਛਤ੍ਤਾਦਿਕੋ. ਤਤ੍ਰਾਤਿ ਸਮਣਪਰਿਕ੍ਖਾਰੇ. ਕਪ੍ਪਤੀਤਿ ਕਪ੍ਪਿਯੋ, ਨ ਕਪ੍ਪਿਯੋ ਅਕਪ੍ਪਿਯੋ, ਕਪ੍ਪਿਯੋ ਚ ਅਕਪ੍ਪਿਯੋ ਚ ਕਪ੍ਪਿਯਾਕਪ੍ਪਿਯੋ, ਸਮਾਹਾਰਦ੍ਵਨ੍ਦੇਪਿ ਪੁਲ੍ਲਿਙ੍ਗਮਿਚ੍ਛਨ੍ਤਿ ਪਣ੍ਡਿਤਾ. ਕਪ੍ਪਿਯਾਕਪ੍ਪਿਯੋ ਚ ਸੋ ਪਰਿਕ੍ਖਾਰੋ ਚੇਤਿ ਤਥਾ, ਤਸ੍ਸ ਵਿਨਿਚ੍ਛਯੋ ਕਪ੍ਪਿਯਾਕਪ੍ਪਿਯਪਰਿਕ੍ਖਾਰਵਿਨਿਚ੍ਛਯੋ.
ਕੇਚਿ ਤਾਲਪਣ੍ਣਚ੍ਛਤ੍ਤਨ੍ਤਿ ਇਦਂ ਉਪਲਕ੍ਖਣਮਤ੍ਤਂ. ਸਬ੍ਬਮ੍ਪਿ ਹਿ ਛਤ੍ਤਂ ਤਥਾਕਰਿਯਮਾਨਂ ਨ ਵਟ੍ਟਤਿ. ਤੇਨੇਵਾਹ ਵਜਿਰਬੁਦ੍ਧਿਟੀਕਾਯਂ (ਵਜਿਰ. ਟੀ. ਪਾਰਾਜਿਕ ੮੫) ‘‘ਸਬ੍ਬਪਰਿਕ੍ਖਾਰੇਸੁ ਵਣ੍ਣਮਟ੍ਠਵਿਕਾਰਂ ਕਰੋਨ੍ਤਸ੍ਸ ਦੁਕ੍ਕਟਨ੍ਤਿ ਦੀਪੇਨ੍ਤੇਨ ਨ ਵਟ੍ਟਤੀਤਿ ਵੁਤ੍ਤਨ੍ਤਿ ਵੇਦਿਤਬ੍ਬ’’ਨ੍ਤਿ. ਨ ਵਣ੍ਣਮਟ੍ਠਤ੍ਥਾਯਾਤਿ ਇਮਿਨਾ ਥਿਰਕਰਣਤ੍ਥਂ ਏਕਵਣ੍ਣਸੁਤ੍ਤੇਨ ਵਿਨਨ੍ਧਿਯਮਾਨਂ ਯਦਿ ਵਣ੍ਣਮਟ੍ਠਂ ਹੋਤਿ, ਤਤ੍ਥ ਨ ਦੋਸੋਤਿ ਦਸ੍ਸੇਤਿ. ਆਰਗ੍ਗੇਨਾਤਿ ਨਿਖਾਦਨਮੁਖੇਨ. ਯਦਿ ਨ ਵਟ੍ਟਤਿ, ਤਾਦਿਸਂ ਛਤ੍ਤਦਣ੍ਡਂ ਲਭਿਤ੍ਵਾ ਕਿਂ ਕਾਤਬ੍ਬਨ੍ਤਿ ਆਹ ‘‘ਘਟਕਂ ਵਾ’’ਤਿਆਦਿ. ਸੁਤ੍ਤਕੇਨ ਵਾ ਦਣ੍ਡੋ ਵੇਠੇਤਬ੍ਬੋਤਿ ਯਥਾ ਲੇਖਾ ਨ ਪਞ੍ਞਾਯਤਿ, ਤਥਾ ਵੇਠੇਤਬ੍ਬੋ. ਦਣ੍ਡਬੁਨ੍ਦੇਤਿ ਦਣ੍ਡਮੂਲੇ, ਛਤ੍ਤਦਣ੍ਡਸ੍ਸ ਹੇਟ੍ਠਿਮਕੋਟਿਯਨ੍ਤਿ ਅਤ੍ਥੋ. ਛਤ੍ਤਮਣ੍ਡਲਿਕਨ੍ਤਿ ਛਤ੍ਤਸ੍ਸ ਅਨ੍ਤੋ ਖੁਦ੍ਦਕਮਣ੍ਡਲਂ, ਛਤ੍ਤਪਞ੍ਜਰੇ ਮਣ੍ਡਲਾਕਾਰੇਨ ਬਦ੍ਧਦਣ੍ਡਵਲਯਂ ਵਾ. ਉਕ੍ਕਿਰਿਤ੍ਵਾਤਿ ਨਿਨ੍ਨਂ, ਉਨ੍ਨਤਂ ਵਾ ਕਤ੍ਵਾ ਉਟ੍ਠਾਪੇਤ੍ਵਾ. ਸਾ ਵਟ੍ਟਤੀਤਿ ਸਾ ਲੇਖਾ ਰਜ੍ਜੁਕੇਹਿ ਬਨ੍ਧਨ੍ਤੁ ਵਾ ਮਾ ਵਾ, ਬਨ੍ਧਿਤੁਂ ਯੁਤ੍ਤਟ੍ਠਾਨਤ੍ਤਾ ਵਟ੍ਟਤਿ. ਤੇਨ ਵੁਤ੍ਤਂ ਆਚਰਿਯਬੁਦ੍ਧਦਤ੍ਤਮਹਾਥੇਰੇਨ –
‘‘ਛਤ੍ਤਂ ਪਣ੍ਣਮਯਂ ਕਿਞ੍ਚਿ, ਬਹਿ ਅਨ੍ਤੋ ਚ ਸਬ੍ਬਸੋ;
ਪਞ੍ਚਵਣ੍ਣੇਨ ਸੁਤ੍ਤੇਨ, ਸਿਬ੍ਬਿਤੁਂ ਨ ਚ ਵਟ੍ਟਤਿ.
‘‘ਛਿਨ੍ਦਿਤੁਂ ਅਡ੍ਢਚਨ੍ਦਂ ਵਾ, ਪਣ੍ਣੇ ਮਕਰਦਨ੍ਤਕਂ;
ਘਟਕਂ ਵਾਲ਼ਰੂਪਂ ਵਾ, ਲੇਖਾ ਦਣ੍ਡੇ ਨ ਵਟ੍ਟਤਿ.
‘‘ਸਿਬ੍ਬਿਤੁਂ ਏਕਵਣ੍ਣੇਨ, ਛਤ੍ਤਂ ਸੁਤ੍ਤੇਨ ਵਟ੍ਟਤਿ;
ਥਿਰਤ੍ਥਂ ਪਞ੍ਚਵਣ੍ਣੇਨ, ਪਞ੍ਜਰਂ ਵਾ ਵਿਨਨ੍ਧਿਤੁਂ.
‘‘ਘਟਕਂ ਵਾਲ਼ਰੂਪਂ ਵਾ, ਲੇਖਾ ਵਾ ਪਨ ਕੇਵਲਾ;
ਛਿਨ੍ਦਿਤ੍ਵਾ ਵਾਪਿ ਘਂਸਿਤ੍ਵਾ, ਧਾਰੇਤੁਂ ਪਨ ਵਟ੍ਟਤਿ.
‘‘ਅਹਿਚ੍ਛਤ੍ਤਕਸਣ੍ਠਾਨਂ, ਦਣ੍ਡਬੁਨ੍ਦਮ੍ਹਿ ਵਟ੍ਟਤਿ;
ਉਕ੍ਕਿਰਿਤ੍ਵਾ ਕਤਾ ਲੇਖਾ, ਬਨ੍ਧਨਤ੍ਥਾਯ ਵਟ੍ਟਤੀ’’ਤਿ.
ਤਸ੍ਸ ਵਣ੍ਣਨਾਯਮ੍ਪਿ ਛਤ੍ਤਂ ਪਣ੍ਣਮਯਂ ਕਿਞ੍ਚੀਤਿ ਤਾਲਪਣ੍ਣਾਦਿਪਣ੍ਣਚ੍ਛਦਨਂ ਯਂ ਕਿਞ੍ਚਿ ਛਤ੍ਤਂ. ਬਹੀਤਿ ਉਪਰਿ. ਅਨ੍ਤੋਤਿ ਹੇਟ੍ਠਾ. ਸਿਬ੍ਬਿਤੁਨ੍ਤਿ ਰੂਪਂ ਦਸ੍ਸੇਤ੍ਵਾ ਸੂਚਿਕਮ੍ਮਂ ਕਾਤੁਂ. ਪਣ੍ਣੇਤਿ ਛਦਨਪਣ੍ਣੇ. ਅਡ੍ਢਚਨ੍ਦਨ੍ਤਿ ਅਡ੍ਢਚਨ੍ਦਾਕਾਰਂ. ਮਕਰਦਨ੍ਤਕਨ੍ਤਿ ਮਕਰਦਨ੍ਤਾਕਾਰਂ, ਯਂ ‘‘ਗਿਰਿਕੂਟ’’ਨ੍ਤਿ ਵੁਚ੍ਚਤਿ. ਛਿਨ੍ਦਿਤੁਂ ਨ ਵਟ੍ਟਤੀਤਿ ਸਮ੍ਬਨ੍ਧੋ. ਮੁਖਵਟ੍ਟਿਯਾ ਨਾਮੇਤ੍ਵਾ ਬਦ੍ਧਪਣ੍ਣਕੋਟਿਯਾ ਵਾ ਮਤ੍ਥਕਮਣ੍ਡਲਕੋਟਿਯਾ ਵਾ ਗਿਰਿਕੂਟਾਦਿਂ ਕਰੋਨ੍ਤਿ, ਇਮਿਨਾ ਤਂ ਪਟਿਕ੍ਖਿਤ੍ਤਂ. ਦਣ੍ਡੇਤਿ ਛਤ੍ਤਦਣ੍ਡੇ. ਘਟਕਨ੍ਤਿ ਘਟਾਕਾਰੋ. ਵਾਲ਼ਰੂਪਂ ਵਾਤਿ ਬ੍ਯਗ੍ਘਾਦਿਵਾਲ਼ਾਨਂ ਰੂਪਕਂ ਵਾ. ਲੇਖਾਤਿ ਉਕ੍ਕਿਰਿਤ੍ਵਾ ਵਾ ਛਿਨ੍ਦਿਤ੍ਵਾ ਵਾ ਚਿਤ੍ਤਕਮ੍ਮਵਸੇਨ ਵਾ ਕਤਰਾਜਿ. ਪਞ੍ਚਵਣ੍ਣਾਨਂ ਸੁਤ੍ਤਾਨਂ ਅਨ੍ਤਰੇ ਨੀਲਾਦਿਏਕਵਣ੍ਣੇਨ ਸੁਤ੍ਤੇਨ ਥਿਰਤ੍ਥਂ ਛਤ੍ਤਂ ਅਨ੍ਤੋ ਚ ਬਹਿ ਚ ਸਿਬ੍ਬਿਤੁਂ ਵਾ ਛਤ੍ਤਦਣ੍ਡਗ੍ਗਾਹਕਸਲਾਕਪਞ੍ਜਰਂ ਥਿਰਤ੍ਥਂ ਵਿਨਨ੍ਧਿਤੁਂ ਵਾ ਵਟ੍ਟਤੀਤਿ ਯੋਜਨਾ. ਪਞ੍ਚਵਣ੍ਣਾਨਂ ਏਕਵਣ੍ਣੇਨ ਥਿਰਤ੍ਥਨ੍ਤਿ ਇਮਿਨਾ ਅਨੇਕਵਣ੍ਣੇਹਿ ਸੁਤ੍ਤੇਹਿ ਵਣ੍ਣਮਟ੍ਠਤ੍ਥਾਯ ਸਿਬ੍ਬਿਤੁਞ੍ਚ ਵਿਨਨ੍ਧਿਤੁਞ੍ਚ ਨ ਵਟ੍ਟਤੀਤਿ ਦੀਪੇਤਿ. ਪੋਤ੍ਥਕੇਸੁ ਪਨ ‘‘ਪਞ੍ਚਵਣ੍ਣੇਨਾ’’ਤਿ ਪਾਠੋ ਦਿਸ੍ਸਤਿ, ਤਸ੍ਸ ਏਕਵਣ੍ਣੇਨ ਪਞ੍ਚਵਣ੍ਣੇਨ ਵਾ ਸੁਤ੍ਤੇਨ ਥਿਰਤ੍ਥਂ ਸਿਬ੍ਬਿਤੁਂ ਵਿਨਨ੍ਧਿਤੁਂ ਵਾ ਵਟ੍ਟਤੀਤਿ ਯੋਜਨਾ ਕਾਤਬ੍ਬਾ ਹੋਤਿ.
ਏਤ੍ਥ ਚ ਹੇਟ੍ਠਾ ਵੁਤ੍ਤੇਨ ‘‘ਪਞ੍ਚਵਣ੍ਣੇਨ ਸੁਤ੍ਤੇਨ ਸਿਬ੍ਬਿਤੁਂ ਨ ਚ ਵਟ੍ਟਤੀ’’ਤਿ ਪਾਠੇਨ ਚ ‘‘ਕੇਚਿ ਤਾਲਪਣ੍ਣਚ੍ਛਤ੍ਤਂ ਅਨ੍ਤੋ ਵਾ ਬਹਿ ਵਾ ਪਞ੍ਚਵਣ੍ਣੇਨ ਸੁਤ੍ਤੇਨ ਸਿਬ੍ਬੇਤ੍ਵਾ ਵਣ੍ਣਮਟ੍ਠਂ ਕਰੋਨ੍ਤਿ, ਤਂ ਨ ਵਟ੍ਟਤਿ, ਏਕਵਣ੍ਣੇ ਪਨ ਨੀਲੇਨ ਵਾ ਪੀਤਕੇਨ ਵਾ ਯੇਨ ਕੇਨਚਿ ਸੁਤ੍ਤੇਨ ਅਨ੍ਤੋ ਵਾ ਬਹਿ ਵਾ ਸਿਬ੍ਬਿਤੁਂ, ਛਤ੍ਤਦਣ੍ਡਗ੍ਗਾਹਕਂ ਸਲਾਕਪਞ੍ਜਰਂ ਵਾ ਵਿਨਨ੍ਧਿਤੁਂ ਵਟ੍ਟਤਿ, ਤਞ੍ਚ ਖੋ ਥਿਰਕਰਣਤ੍ਥਂ, ਨ ਵਣ੍ਣਮਟ੍ਠਤ੍ਥਾਯਾ’’ਤਿ ਅਟ੍ਠਕਥਾਪਾਠੇਨ ਚ ਵਿਰੁਜ੍ਝਤਿ, ਤਸ੍ਮਾ ਸੋ ਨ ਗਹੇਤਬ੍ਬੋ.
ਲੇਖਾ ਵਾ ਪਨ ਕੇਵਲਾਤਿ ਯਥਾਵੁਤ੍ਤਪ੍ਪਕਾਰਾ ਸਕਲਾ ਲੇਖਾ ਵਾ. ਛਿਨ੍ਦਿਤ੍ਵਾਤਿ ਉਕ੍ਕਿਰਿਤ੍ਵਾ ਕਤਂ ਛਿਨ੍ਦਿਤ੍ਵਾ. ਘਂਸਿਤ੍ਵਾਤਿ ਚਿਤ੍ਤਕਮ੍ਮਾਦਿਵਸੇਨ ਕਤਂ ਘਂਸਿਤ੍ਵਾ. ਦਣ੍ਡਬੁਨ੍ਦਮ੍ਹੀਤਿ ਛਤ੍ਤਦਣ੍ਡਸ੍ਸ ਪਞ੍ਜਰੇ ਗਾਹਣਤ੍ਥਾਯ ਫਾਲਿਤਬੁਨ੍ਦਮ੍ਹਿ, ਮੂਲੇਤਿ ਅਤ੍ਥੋ. ਅਯਮੇਤ੍ਥ ਨਿਸ੍ਸਨ੍ਦੇਹੇ ਵੁਤ੍ਤਨਯੋ. ਖੁਦ੍ਦਸਿਕ੍ਖਾਗਣ੍ਠਿਪਦੇ ਪਨ ‘‘ਛਤ੍ਤਪਿਣ੍ਡਿਯਾ ਮੂਲੇ’’ਤਿ ਵੁਤ੍ਤਂ. ਅਹਿਚ੍ਛਤ੍ਤਕਸਣ੍ਠਾਨਨ੍ਤਿ ਫੁਲ੍ਲਅਹਿਚ੍ਛਤ੍ਤਕਾਕਾਰਂ. ਰਜ੍ਜੁਕੇਹਿ ਗਾਹਾਪੇਤ੍ਵਾ ਦਣ੍ਡੇ ਬਨ੍ਧਨ੍ਤਿ, ਤਸ੍ਮਿਂ ਬਨ੍ਧਨਟ੍ਠਾਨੇ ਵਲਯਮਿਵ ਉਕ੍ਕਿਰਿਤ੍ਵਾਤਿ ਵਲਯਂ ਵਿਯ ਉਪਟ੍ਠਾਪੇਤ੍ਵਾ. ਬਨ੍ਧਨਤ੍ਥਾਯਾਤਿ ਵਾਤੇਨ ਯਥਾ ਨ ਚਲਤਿ, ਏਵਂ ਰਜ੍ਜੂਹਿ ਦਣ੍ਡੇ ਪਞ੍ਜਰਸ੍ਸ ਬਨ੍ਧਨਤ੍ਥਾਯ. ਉਕ੍ਕਿਰਿਤ੍ਵਾ ਕਤਾ ਲੇਖਾ ਵਟ੍ਟਤੀਤਿ ਯੋਜਨਾ. ਯਥਾ ਵਾਤਪ੍ਪਹਾਰੇਨ ਅਚਲਨਤ੍ਥਂ ਛਤ੍ਤਮਣ੍ਡਲਿਕਂ ਰਜ੍ਜੁਕੇਹਿ ਗਾਹਾਪੇਤ੍ਵਾ ਦਣ੍ਡੇ ਬਨ੍ਧਨ੍ਤਿ, ਤਸ੍ਮਿਂ ਬਨ੍ਧਨਟ੍ਠਾਨੇ ਵਲਯਮਿਵ ਉਕ੍ਕਿਰਿਤ੍ਵਾ ਲੇਖਂ ਠਪੇਨ੍ਤਿ, ਸਾ ਵਟ੍ਟਤੀਤਿ. ਸਚੇਪਿ ਨ ਬਨ੍ਧਤਿ, ਬਨ੍ਧਨਾਰਹਟ੍ਠਾਨਤ੍ਤਾ ਵਲਯਂ ਉਕ੍ਕਿਰਿਤ੍ਵਾ ਵਟ੍ਟਤੀਤਿ ਗਣ੍ਠਿਪਦੇ ਵਤ੍ਤਨ੍ਤੀਤਿ ਆਗਤਂ, ਤਸ੍ਮਾ ਪਕ੍ਖਰਣੇਸੁ ਆਗਤਨਯੇਨੇਵ ਛਤ੍ਤੇ ਪਟਿਪਜ੍ਜਿਤਬ੍ਬਨ੍ਤਿ.
੭. ਚੀਵਰੇ ਪਨ ਨਾਨਾਸੁਤ੍ਤਕੇਹੀਤਿ (ਸਾਰਤ੍ਥ. ਟੀ. ੨.੮੫; ਵਿ. ਵਿ. ਟੀ. ੧.੮੫) ਨਾਨਾਵਣ੍ਣੇਹਿ ਸੁਤ੍ਤੇਹਿ. ਇਦਞ੍ਚ ਤਥਾ ਕਰੋਨ੍ਤਾਨਂ ਵਸੇਨ ਵੁਤ੍ਤਂ, ਏਕਵਣ੍ਣਸੁਤ੍ਤਕੇਨਪਿ ਨ ਵਟ੍ਟਤਿਯੇਵ. ‘‘ਪਕਤਿਸੂਚਿਕਮ੍ਮਮੇਵ ਵਟ੍ਟਤੀ’’ਤਿ ਹਿ ਵੁਤ੍ਤਂ. ਪਟ੍ਟਮੁਖੇਤਿ ਦ੍ਵਿਨ੍ਨਂ ਪਟ੍ਟਾਨਂ ਸਙ੍ਘਟਿਤਟ੍ਠਾਨਂ ਸਨ੍ਧਾਯੇਤਂ ਵੁਤ੍ਤਂ. ਪਰਿਯਨ੍ਤੇਤਿ ਚੀਵਰਪਰਿਯਨ੍ਤੇ. ਅਨੁਵਾਤਂ ਸਨ੍ਧਾਯੇਤਂ ਵੁਤ੍ਤਂ. ਵੇਣੀਤਿ ਵਰਕਸੀਸਾਕਾਰੇਨ ਸਿਬ੍ਬਨਂ. ਸਙ੍ਖਲਿਕਨ੍ਤਿ ਦ੍ਵਿਗੁਣਸਙ੍ਖਲਿਕਾਕਾਰੇਨ ਸਿਬ੍ਬਨਂ, ਬਿਲ਼ਾਲਸਙ੍ਖਲਿਕਾਕਾਰੇਨ ਸਿਬ੍ਬਨਂ ਵਾ. ਵੇਣਿਂ ਵਾ ਸਙ੍ਖਲਿਕਂ ਵਾ ਕਰੋਨ੍ਤੀਤਿ ਕਰਣਕਿਰਿਯਾਯ ਸਮ੍ਬਨ੍ਧੋ. ਅਗ੍ਘਿਯਂ ਨਾਮ ਚੇਤਿਯਸਣ੍ਠਾਨਂ, ਯਂ ‘‘ਅਗ੍ਘਿਯਤ੍ਥਮ੍ਭੋ’’ਤਿ ਵਦਨ੍ਤਿ. ਗਯਾ ਨਾਮ ਮੂਲੇ ਤਨੁਕਂ ਅਗ੍ਗੇ ਮਹਨ੍ਤਂ ਕਤ੍ਵਾ ਗਦਾਕਾਰੇਨ ਸਿਬ੍ਬਨਂ. ਮੁਗ੍ਗਰੋ ਨਾਮ ਮੂਲੇ ਚ ਅਗ੍ਗੇ ਚ ਏਕਸਦਿਸਂ ਕਤ੍ਵਾ ਮੁਗ੍ਗਰਾਕਾਰੇਨ ਸਿਬ੍ਬਨਂ. ਕਕ੍ਕਟਕ੍ਖੀਨਿ ਉਕ੍ਕਿਰਨ੍ਤੀਤਿ ਗਣ੍ਠਿਕਪਟ੍ਟਪਾਸਕਪਟ੍ਟਾਨਂ ਅਨ੍ਤੇ ਪਾਲ਼ਿਬਦ੍ਧਂ ਕਤ੍ਵਾ ਕਕ੍ਕਟਕਾਨਂ ਅਕ੍ਖਿਸਣ੍ਠਾਨਂ ਪਟ੍ਠਪੇਨ੍ਤਿ, ਕਰੋਨ੍ਤੀਤਿ ਅਤ੍ਥੋ. ‘‘ਕੋਣਸੁਤ੍ਤਪਿਲ਼ਕਾਤਿ ਗਣ੍ਠਿਕਪਾਸਕਪਟ੍ਟਾਨਂ ਕੋਣੇਹਿ ਨੀਹਟਸੁਤ੍ਤਾਨਂ ਕੋਟਿਯੋ’’ਤਿ ਤੀਸੁਪਿ ਗਣ੍ਠਿਪਦੇਸੁ ਵੁਤ੍ਤਂ. ਕਥਂ ਪਨ ਤਾ ਪਿਲ਼ਕਾ ਦੁਵਿਞ੍ਞੇਯ੍ਯਰੂਪਾ ਕਾਤਬ੍ਬਾਤਿ? ਕੋਣੇਹਿ ਨੀਹਟਸੁਤ੍ਤਾਨਂ ਅਨ੍ਤੇਸੁ ਏਕਵਾਰਂ ਗਣ੍ਠਿਕਕਰਣੇਨ ਵਾ ਪੁਨ ਨਿਵਤ੍ਤੇਤ੍ਵਾ ਸਿਬ੍ਬਨੇਨ ਵਾ ਦੁਵਿਞ੍ਞੇਯ੍ਯਸਭਾਵਂ ਕਤ੍ਵਾ ਸੁਤ੍ਤਕੋਟਿਯੋ ਰਸ੍ਸਂ ਕਤ੍ਵਾ ਛਿਨ੍ਦਿਤਬ੍ਬਾ. ਧਮ੍ਮਸਿਰਿਤ੍ਥੇਰੇਨ ਪਨ ‘‘ਕੋਣਸੁਤ੍ਤਾ ਚ ਪਿਲ਼ਕਾ, ਦੁਵਿਞ੍ਞੇਯ੍ਯਾਵ ਕਪ੍ਪਰੇ’’ਤਿ ਵੁਤ੍ਤਂ, ਤਥਾ ਆਚਰਿਯਬੁਦ੍ਧਦਤ੍ਤਤ੍ਥੇਰੇਨਪਿ ‘‘ਸੁਤ੍ਤਾ ਚ ਪਿਲ਼ਕਾ ਤਤ੍ਥ, ਦੁਵਿਞ੍ਞੇਯ੍ਯਾਵ ਦੀਪਿਤਾ’’ਤਿ ਵੁਤ੍ਤਂ, ਤਸ੍ਮਾ ਤੇਸਂ ਮਤੇਨ ਕੋਣਸੁਤ੍ਤਾ ਚ ਪਿਲ਼ਕਾ ਚ ਕੋਣਸੁਤ੍ਤਪਿਲ਼ਕਾਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ.
ਵਿਮਤਿਵਿਨੋਦਨਿਯਮ੍ਪਿ (ਵਿ. ਵਿ. ਟੀ. ੧.੮੫) ਕੋਣਸੁਤ੍ਤਪਿਲ਼ਕਾਤਿ ਗਣ੍ਠਿਕਪਾਸਕਪਟ੍ਟਾਨਂ ਕੋਣੇਹਿ ਬਹਿ ਨਿਗ੍ਗਤਸੁਤ੍ਤਾਨਂ ਪਿਲ਼ਕਾਕਾਰੇਨ ਠਪਿਤਕੋਟਿਯੋਤਿ ਕੇਚਿ ਵਦਨ੍ਤਿ, ਤੇ ਪਿਲ਼ਕੇ ਛਿਨ੍ਦਿਤ੍ਵਾ ਦੁਵਿਞ੍ਞੇਯ੍ਯਾ ਕਾਤਬ੍ਬਾਤਿ ਤੇਸਂ ਅਧਿਪ੍ਪਾਯੋ. ਕੇਚਿ ਪਨ ‘‘ਕੋਣਸੁਤ੍ਤਾ ਚ ਪਿਲ਼ਕਾ ਚਾਤਿ ਦ੍ਵੇਯੇਵਾ’’ਤਿ ਵਦਨ੍ਤਿ, ਤੇਸਂ ਮਤੇਨ ਗਣ੍ਠਿਕਪਾਸਕਪਟ੍ਟਾਨਂ ਕੋਣਤੋ ਕੋਣਂ ਨੀਹਟਸੁਤ੍ਤਾ ਕੋਣਸੁਤ੍ਤਾ ਨਾਮ. ਸਮਨ੍ਤਤੋ ਪਨ ਪਰਿਯਨ੍ਤੇਨ ਗਤਾ ਚਤੁਰਸ੍ਸਸੁਤ੍ਤਾ ਪਿਲ਼ਕਾ ਨਾਮ. ਤਂ ਦੁਵਿਧਮ੍ਪਿ ਕੇਚਿ ਚੀਵਰਤੋ ਵਿਸੁਂ ਪਞ੍ਞਾਨਤ੍ਥਾਯ ਵਿਕਾਰਯੁਤ੍ਤਂ ਕਰੋਨ੍ਤਿ, ਤਂ ਨਿਸੇਧਾਯ ‘‘ਦੁਵਿਞ੍ਞੇਯ੍ਯਰੂਪਾ ਵਟ੍ਟਤੀ’’ਤਿ ਵੁਤ੍ਤਂ, ਨ ਪਨ ਸਬ੍ਬਥਾ ਅਚਕ੍ਖੁਗੋਚਰਭਾਵੇਨ ਸਿਬ੍ਬਨਤ੍ਥਾਯ ਤਥਾਸਿਬ੍ਬਨਸ੍ਸ ਅਸਕ੍ਕੁਣੇਯ੍ਯਤ੍ਤਾ, ਯਥਾ ਪਕਤਿਚੀਵਰਤੋ ਵਿਕਾਰੋ ਨ ਪਞ੍ਞਾਯਤਿ, ਏਵਂ ਸਿਬ੍ਬਿਤਬ੍ਬਨ੍ਤਿ ਅਧਿਪ੍ਪਾਯੋ. ਰਜਨਕਮ੍ਮਤੋ ਪੁਬ੍ਬੇ ਪਞ੍ਞਾਯਮਾਨੋਪਿ ਵਿਸੇਸੋ ਚੀਵਰੇ ਰਤ੍ਤੇ ਏਕਵਣ੍ਣਤੋ ਨ ਪਞ੍ਞਾਯਤੀਤਿ ਆਹ ‘‘ਚੀਵਰੇ ਰਤ੍ਤੇ’’ਤਿ.
੮. ਮਣਿਨਾਤਿ ਨੀਲਮਣਿਆਦਿਪਾਸਾਣੇਨ, ਅਂਸਬਦ੍ਧਕਕਾਯਬਨ੍ਧਨਾਦਿਕਂ ਅਚੀਵਰਤ੍ਤਾ ਸਙ੍ਖਾਦੀਹਿ ਘਂਸਿਤੁਂ ਵਟ੍ਟਤੀਤਿ ਵਦਨ੍ਤਿ. ਕਣ੍ਣਸੁਤ੍ਤਕਨ੍ਤਿ ਚੀਵਰਸ੍ਸ ਦੀਘਤੋ ਤਿਰਿਯਞ੍ਚ ਸਿਬ੍ਬਿਤਾਨਂ ਚਤੂਸੁ ਕਣ੍ਣੇਸੁ ਕੋਣੇਸੁ ਚ ਨਿਕ੍ਖਨ੍ਤਾਨਂ ਸੁਤ੍ਤਸੀਸਾਨਮੇਤਂ ਨਾਮਂ, ਤਂ ਛਿਨ੍ਦਿਤ੍ਵਾਵ ਪਾਰੁਪਿਤਬ੍ਬਂ. ਤੇਨਾਹ ‘‘ਰਜਿਤਕਾਲੇ ਛਿਨ੍ਦਿਤਬ੍ਬ’’ਨ੍ਤਿ. ਭਗਵਤਾ ਅਨੁਞ੍ਞਾਤਂ ਏਕਂ ਕਣ੍ਣਸੁਤ੍ਤਮ੍ਪਿ ਅਤ੍ਥਿ, ਤਂ ਪਨ ਨਾਮੇਨ ਸਦਿਸਮ੍ਪਿ ਇਤੋ ਅਞ੍ਞਮੇਵਾਤਿ ਦਸ੍ਸੇਤੁਂ ‘‘ਯਂ ਪਨਾ’’ਤਿਆਦਿ ਵੁਤ੍ਤਂ. ਲਗ੍ਗਨਤ੍ਥਾਯਾਤਿ ਚੀਵਰਰਜ੍ਜੁਯਂ ਚੀਵਰਬਨ੍ਧਨਤ੍ਥਾਯ. ਵਿਮਤਿਵਿਨੋਦਨਿਯਂ (ਵਿ. ਵਿ. ਟੀ. ੧.੮੫) ਏਤ੍ਤਕਮੇਵ ਵੁਤ੍ਤਂ.
ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ੨.੮੫) ਪਨ ‘‘ਪਾਸਕਂ ਕਤ੍ਵਾ ਬਨ੍ਧਿਤਬ੍ਬਨ੍ਤਿ ਰਜਨਕਾਲੇ ਬਨ੍ਧਿਤਬ੍ਬਂ, ਸੇਸਕਾਲੇ ਮੋਚੇਤ੍ਵਾ ਠਪੇਤਬ੍ਬ’’ਨ੍ਤਿ ਵੁਤ੍ਤਂ. ਵਿਨਯਸਙ੍ਗਹਪ੍ਪਕਰਣਸ੍ਸ ਪੋਰਾਣਟੀਕਾਯਮ੍ਪਿ ਇਦਮੇਵ ਗਹੇਤ੍ਵਾ ਵੁਤ੍ਤਂ, ਤਂ ਪਨ ਚੀਵਰਕ੍ਖਨ੍ਧਕੇ (ਮਹਾਵ. ੩੪੪) ‘‘ਮਜ੍ਝੇਨ ਲਗ੍ਗੇਨ੍ਤਿ, ਉਭਤੋ ਗਲਤਿ, ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਕਣ੍ਣੇ ਬਨ੍ਧਿਤੁਨ੍ਤਿ. ਕਣ੍ਣੋ ਜੀਰਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਕਣ੍ਣਸੁਤ੍ਤਕ’’ਨ੍ਤਿ ਏਵਂ ਅਨੁਞ੍ਞਾਤਚੀਵਰਰਜ੍ਜੁਯਂ ਰਜਿਤ੍ਵਾ ਪਸਾਰਿਤਚੀਵਰਸ੍ਸ ਓਲਮ੍ਬਕਸੁਤ੍ਤਂ ਸਨ੍ਧਾਯ ਵੁਤ੍ਤਨ੍ਤਿ ਦਟ੍ਠਬ੍ਬਂ.
ਗਣ੍ਠਿਕੇਤਿ ਚੀਵਰਪਾਰੁਪਨਕਾਲੇ ਪਾਸਕੇ ਲਗ੍ਗਾਪਨਤ੍ਥਂ ਕਤੇ ਦਨ੍ਤਾਦਿਮਯੇ ਗਣ੍ਠਿਕੇ. ਪਿਲ਼ਕਾਤਿ ਬਿਨ੍ਦੁਂ ਬਿਨ੍ਦੁਂ ਕਤ੍ਵਾ ਉਟ੍ਠਾਪੇਤਬ੍ਬਪਿਲ਼ਕਾ. ਵੁਤ੍ਤਞ੍ਹੇਤਂ ਵਿਨਯਵਿਨਿਚ੍ਛਯਪ੍ਪਕਰਣੇ –
‘‘ਨਾਨਾਵਣ੍ਣੇਹਿ ਸੁਤ੍ਤੇਹਿ, ਮਣ੍ਡਨਤ੍ਥਾਯ ਚੀਵਰਂ;
ਸਮਂ ਸਤਪਦਾਦੀਨਂ, ਸਿਬ੍ਬਿਤੁਂ ਨ ਚ ਵਟ੍ਟਤਿ.
‘‘ਪਤ੍ਤਸ੍ਸ ਪਰਿਯਨ੍ਤੇ ਵਾ, ਤਥਾ ਪਤ੍ਤਮੁਖੇਪਿ ਚ;
ਵੇਣਿਂ ਸਙ੍ਖਲਿਕਂ ਵਾਪਿ, ਕਰੋਤੋ ਹੋਤਿ ਦੁਕ੍ਕਟਂ.
‘‘ਪਟ੍ਟਮ੍ਪਿ ਗਣ੍ਠਿਪਾਸਾਨਂ, ਅਟ੍ਠਕੋਣਾਦਿਕਂ ਵਿਧਿਂ;
ਤਤ੍ਥਗ੍ਘਿਯਗਦਾਰੂਪਂ, ਮੁਗ੍ਗਰਾਦਿਂ ਕਰੋਨ੍ਤਿ ਚ.
‘‘ਤਤ੍ਥ ਕਕ੍ਕਟਕਕ੍ਖੀਨਿ, ਉਟ੍ਠਾਪੇਨ੍ਤਿ ਨ ਵਟ੍ਟਤਿ;
ਸੁਤ੍ਤਾ ਚ ਪਿਲ਼ਕਾ ਤਤ੍ਥ, ਦੁਵਿਞ੍ਞੇਯ੍ਯਾਵ ਦੀਪਿਤਾ.
‘‘ਚਤੁਕੋਣਾਵ ਵਟ੍ਟਨ੍ਤਿ, ਗਣ੍ਠਿਪਾਸਕਪਟ੍ਟਕਾ;
ਕਣ੍ਣਕੋਣੇਸੁ ਸੁਤ੍ਤਾਨਿ, ਰਤ੍ਤੇ ਛਿਨ੍ਦੇਯ੍ਯ ਚੀਵਰੇ.
‘‘ਸੂਚਿਕਮ੍ਮਵਿਕਾਰਂ ਵਾ, ਅਞ੍ਞਂ ਵਾ ਪਨ ਕਿਞ੍ਚਿਪਿ;
ਚੀਵਰੇ ਭਿਕ੍ਖੁਨਾ ਕਾਤੁਂ, ਕਾਰਾਪੇਤੁਂ ਨ ਵਟ੍ਟਤਿ.
‘‘ਯੋ ਚ ਪਕ੍ਖਿਪਤਿ ਭਿਕ੍ਖੁ ਚੀਵਰਂ,
ਕਞ੍ਜਿਪਿਟ੍ਠਖਲਿਅਲ੍ਲਿਕਾਦਿਸੁ;
ਵਣ੍ਣਮਟ੍ਠਮਭਿਪਤ੍ਥਯਂ ਪਰਂ;
ਤਸ੍ਸ ਨਤ੍ਥਿ ਪਨ ਮੁਤ੍ਤਿ ਦੁਕ੍ਕਟਾ.
‘‘ਸੂਚਿਹਤ੍ਥਮਲਾਦੀਨਂ, ਕਰਣੇ ਚੀਵਰਸ੍ਸ ਚ;
ਤਥਾ ਕਿਲਿਟ੍ਠਕਾਲੇ ਚ, ਧੋਵਨਤ੍ਥਂ ਤੁ ਵਟ੍ਟਤਿ.
‘‘ਰਜਨੇ ਪਨ ਗਨ੍ਧਂ ਵਾ, ਤੇਲਂ ਵਾ ਲਾਖਮੇਵ ਵਾ;
ਕਿਞ੍ਚਿ ਪਕ੍ਖਿਪਿਤੁਂ ਤਤ੍ਥ, ਭਿਕ੍ਖੁਨੋ ਨ ਚ ਵਟ੍ਟਤਿ.
‘‘ਸਙ੍ਖੇਨ ਮਣਿਨਾ ਵਾਪਿ, ਅਞ੍ਞੇਨਪਿ ਚ ਕੇਨਚਿ;
ਚੀਵਰਂ ਨ ਚ ਘਟ੍ਟੇਯ੍ਯ, ਘਂਸਿਤਬ੍ਬਂ ਨ ਦੋਣਿਯਾ.
‘‘ਚੀਵਰਂ ਦੋਣਿਯਂ ਕਤ੍ਵਾ, ਨਾਤਿਘਟ੍ਟੇਯ੍ਯ ਮੁਟ੍ਠਿਨਾ;
ਰਤ੍ਤਂ ਪਹਰਿਤੁਂ ਕਿਞ੍ਚਿ, ਹਤ੍ਥੇਹੇਵ ਚ ਵਟ੍ਟਤਿ.
‘‘ਗਣ੍ਠਿਕੇ ਪਨ ਲੇਖਾ ਵਾ, ਪਿਲ਼ਕਾ ਵਾ ਨ ਵਟ੍ਟਤਿ;
ਕਪ੍ਪਬਿਨ੍ਦੁਵਿਕਾਰੋ ਵਾ, ਪਾਲ਼ਿਕਣ੍ਣਿਕਭੇਦਤੋ’’ਤਿ.
ਵਿਨਯਸਾਰਤ੍ਥਸਨ੍ਦੀਪਨਿਯਮ੍ਪਿ ਸਮਂ ਸਤਪਦਾਦੀਨਨ੍ਤਿ ਸਤਪਦਾਦੀਹਿ ਸਦਿਸਂ. ਤੁਲ੍ਯਤ੍ਥੇ ਕਰਣਵਚਨਪ੍ਪਸਙ੍ਗੇ ਸਾਮਿਵਚਨਂ. ਪਟ੍ਟਸ੍ਸ ਪਰਿਯਨ੍ਤੇ ਵਾਤਿ ਅਨੁਵਾਤਸ੍ਸ ਉਭਯਪਰਿਯਨ੍ਤੇ ਵਾ. ਪਟ੍ਟਮੁਖੇਪਿ ਵਾਤਿ ਦ੍ਵਿਨ੍ਨਂ ਆਯਾਮਵਿਤ੍ਥਾਰਪਟ੍ਟਾਨਂ ਸਙ੍ਘਟਿਤਟ੍ਠਾਨੇ, ਕਣ੍ਣੇਪਿ ਵਾ ਏਕਸ੍ਸੇਵ ਵਾ ਪਟ੍ਟਸ੍ਸ ਊਨਪੂਰਣਤ੍ਥਂ ਘਟਿਤਟ੍ਠਾਨੇਪਿ ਵਾ. ਵੇਣੀਤਿ ਕੁਦ੍ਰੂਸਸੀਸਾਕਾਰੇਨ ਸਿਬ੍ਬਨਂ. ਕੇਚਿ ‘‘ਵਰਕਸੀਸਾਕਾਰੇਨਾ’’ਤਿ ਵਦਨ੍ਤਿ. ਸਙ੍ਖਲਿਕਨ੍ਤਿ ਬਿਲ਼ਾਲਦਾਮਸਦਿਸਸਿਬ੍ਬਨਂ. ਕੇਚਿ ‘‘ਸਤਪਦਿਸਦਿਸ’’ਨ੍ਤਿ ਵਦਨ੍ਤਿ.
ਪਟ੍ਟਮ੍ਪੀਤਿ ਪਤ੍ਤਮ੍ਪਿ. ਅਟ੍ਠਕੋਣਾਦਿਕੋ ਵਿਧਿ ਪਕਾਰੋ ਏਤਸ੍ਸਾਤਿ ਅਟ੍ਠਕੋਣਾਦਿਕਵਿਧਿ, ਤਂ. ਅਟ੍ਠਕੋਣਾਦਿਕਨ੍ਤਿ ਵਾ ਗਾਥਾਬਨ੍ਧਵਸੇਨ ਨਿਗ੍ਗਹਿਤਾਗਮੋ. ‘‘ਅਟ੍ਠਕੋਣਾਦਿਕਂ ਵਿਧਿ’’ਨ੍ਤਿ ਏਤਂ ‘‘ਪਟ੍ਟ’’ਨ੍ਤਿ ਏਤਸ੍ਸ ਸਮਾਨਾਧਿਕਰਣਵਿਸੇਸਨਂ, ਕਿਰਿਯਾਵਿਸੇਸਨਂ ਵਾ. ‘‘ਕਰੋਨ੍ਤੀ’’ਤਿ ਇਮਿਨਾ ਸਮ੍ਬਨ੍ਧੋ. ਅਥ ਵਾ ਪਟ੍ਟਨ੍ਤਿ ਏਤ੍ਥ ਭੁਮ੍ਮਤ੍ਥੇ ਉਪਯੋਗਵਚਨਂ, ਪਟ੍ਟੇਤਿ ਅਤ੍ਥੋ. ਇਮਸ੍ਮਿਂ ਪਕ੍ਖੇ ਅਟ੍ਠਕੋਣਾਦਿਕਨ੍ਤਿ ਉਪਯੋਗਵਚਨਂ. ਵਿਧਿਨ੍ਤਿ ਏਤਸ੍ਸ ਵਿਸੇਸਨਂ. ਇਧ ਵਕ੍ਖਮਾਨਚਤੁਕੋਣਸਣ੍ਠਾਨਤੋ ਅਞ੍ਞਂ ਅਟ੍ਠਕੋਣਾਦਿਕਂ ਨਾਮ. ਤਤ੍ਥਾਤਿ ਤਸ੍ਮਿਂ ਪਟ੍ਟਦ੍ਵਯੇ. ਅਗ੍ਘਿਯਗਦਾਰੂਪਨ੍ਤਿ ਅਗ੍ਘਿਯਸਣ੍ਠਾਨਞ੍ਚੇਵ ਗਦਾਸਣ੍ਠਾਨਞ੍ਚ ਸਿਬ੍ਬਨਂ. ਮੁਗ੍ਗਰਨ੍ਤਿ ਲਗੁਲ਼ਸਣ੍ਠਾਨਸਿਬ੍ਬਨਂ. ਆਦਿ-ਸਦ੍ਦੇਨ ਚੇਤਿਯਾਦਿਸਣ੍ਠਾਨਾਨਂ ਗਹਣਂ.
ਤਤ੍ਥਾਤਿ ਪਟ੍ਟਦ੍ਵਯੇ ਤਸ੍ਮਿਂ ਠਾਨੇ. ਕਕ੍ਕਟਕਕ੍ਖੀਨੀਤਿ ਕੁਲ਼ੀਰਕਚ੍ਛਿਸਦਿਸਾਨਿ ਸਿਬ੍ਬਨਵਿਕਾਰਾਨਿ. ਉਟ੍ਠਾਪੇਨ੍ਤੀਤਿ ਕਰੋਨ੍ਤਿ. ਤਤ੍ਥਾਤਿ ਤਸ੍ਮਿਂ ਗਣ੍ਠਿਕਪਾਸਕਪਟ੍ਟਕੇ. ਸੁਤ੍ਤਾਤਿ ਕੋਣਤੋ ਕੋਣਂ ਸਿਬ੍ਬਿਤਸੁਤ੍ਤਾ ਚੇਵ ਚਤੁਰਸ੍ਸੇ ਸਿਬ੍ਬਿਤਸੁਤ੍ਤਾ ਚ. ਪਿਲ਼ਕਾਤਿ ਤੇਸਮੇਵ ਸੁਤ੍ਤਾਨਂ ਨਿਵਤ੍ਤੇਤ੍ਵਾ ਸਿਬ੍ਬਿਤਕੋਟਿਯੋ ਚ. ਦੁਵਿਞ੍ਞੇਯ੍ਯਾਵਾਤਿ ਰਜਨਕਾਲੇ ਦੁਵਿਞ੍ਞੇਯ੍ਯਰੂਪਾ ਅਨੋਲ਼ਾਰਿਕਾ ਦੀਪਿਤਾ ਵਟ੍ਟਨ੍ਤੀਤਿ. ਯਥਾਹ ‘‘ਕੋਣਸੁਤ੍ਤਪਿਲ਼ਕਾ ਚ ਚੀਵਰੇ ਰਤ੍ਤੇ ਦੁਵਿਞ੍ਞੇਯ੍ਯਰੂਪਾ ਵਟ੍ਟਨ੍ਤੀ’’ਤਿ (ਪਾਰਾ. ਅਟ੍ਠ. ੧.੮੫).
ਗਣ੍ਠਿਕਪਟ੍ਟਿਕਾ ਪਾਸਪਟ੍ਟਿਕਾਤਿ ਯੋਜਨਾ. ਕਣ੍ਣਕੋਣੇਸੁ ਸੁਤ੍ਤਾਨੀਤਿ ਚੀਵਰਕਣ੍ਣੇ ਸੁਤ੍ਤਾ ਚੇਵ ਪਾਸਕਪਟ੍ਟਾਨਂ ਕੋਣੇਸੁ ਸੁਤ੍ਤਾਨਿ ਚ ਅਚ੍ਛਿਨ੍ਦਤਿ. ਏਤ੍ਥ ਚ ਚੀਵਰੇ ਆਯਾਮਤੋ ਵਿਤ੍ਥਾਰਤੋ ਚ ਸਿਬ੍ਬਿਤ੍ਵਾ ਅਨੁਵਾਤਤੋ ਬਹਿ ਨਿਕ੍ਖਮਿਤਸੁਤ੍ਤਂ ਚੀਵਰਂ ਰਜਿਤ੍ਵਾ ਸੁਕ੍ਖਾਪਨਕਾਲੇ ਰਜ੍ਜੁਯਾ ਵਾ ਚੀਵਰਵਂਸੇ ਵਾ ਬਨ੍ਧਿਤ੍ਵਾ ਓਲਮ੍ਬਿਤੁਂ ਅਨੁਵਾਤੇ ਬਨ੍ਧਸੁਤ੍ਤਾਨਿ ਚ ਕਣ੍ਣਸੁਤ੍ਤਾਨਿ ਨਾਮ. ਯਥਾਹ ‘‘ਚੀਵਰਸ੍ਸ ਕਣ੍ਣਸੁਤ੍ਤਕਂ ਨ ਚ ਵਟ੍ਟਤਿ, ਰਜਿਤਕਾਲੇ ਛਿਨ੍ਦਿਤਬ੍ਬਂ, ਯਂ ਪਨ ‘ਅਨੁਜਾਨਾਮਿ ਭਿਕ੍ਖਵੇ ਕਣ੍ਣਸੁਤ੍ਤਕ’ਨ੍ਤਿ ਏਵਂ ਅਨੁਞ੍ਞਾਤਂ, ਤਂ ਅਨੁਵਾਤੇ ਪਾਸਕਂ ਕਤ੍ਵਾ ਬਨ੍ਧਿਤਬ੍ਬਂ ਰਜਨਕਾਲੇ ਲਗ੍ਗਨਤ੍ਥਾਯਾ’’ਤਿ (ਪਾਰਾ. ਅਟ੍ਠ. ੧.੮੫).
ਸੂਚਿਕਮ੍ਮਵਿਕਾਰਂ ਵਾਤਿ ਚੀਵਰਮਣ੍ਡਨਤ੍ਥਾਯ ਨਾਨਾਸੁਤ੍ਤਕੇਹਿ ਸਤਪਦਿਸਦਿਸਂ ਸਿਬ੍ਬਨ੍ਤਾ ਆਗਨ੍ਤੁਕਪਟ੍ਟਂ ਠਪੇਨ੍ਤਿ, ਏਵਰੂਪਂ ਸੂਚਿਕਮ੍ਮਵਿਕਾਰਂ ਵਾ. ਅਞ੍ਞਂ ਵਾ ਪਨ ਕਿਞ੍ਚਿਪੀਤਿ ਅਞ੍ਞਮ੍ਪਿ ਯਂ ਕਿਞ੍ਚਿ ਮਾਲਾਕਮ੍ਮਮਿਗਪਕ੍ਖਿਪਦਾਦਿਕਂ ਸਿਬ੍ਬਨਵਿਕਾਰਂ. ਕਾਤੁਨ੍ਤਿ ਸਯਂ ਕਾਤੁਂ. ਕਾਰਾਪੇਤੁਨ੍ਤਿ ਅਞ੍ਞੇਨ ਵਾ ਕਾਰਾਪੇਤੁਂ.
ਯੋ ਭਿਕ੍ਖੁ ਪਰਂ ਉਤ੍ਤਮਂ ਵਣ੍ਣਮਟ੍ਠਮਭਿਪਤ੍ਥਯਨ੍ਤੋ ਕਞ੍ਜਿਕਪਿਟ੍ਠਖਲਿਅਲ੍ਲਿਕਾਦੀਸੁ ਚੀਵਰਂ ਪਕ੍ਖਿਪਤਿ, ਤਸ੍ਸ ਪਨ ਭਿਕ੍ਖੁਨੋ ਦੁਕ੍ਕਟਾ ਮੋਕ੍ਖੋ ਨ ਵਿਜ੍ਜਤੀਤਿ ਯੋਜਨਾ. ਕਞ੍ਜਿਕਨ੍ਤਿ ਵਾਯਨਤਨ੍ਤਮਕ੍ਖਨਂ ਕਞ੍ਜਿਕਸਦਿਸਾ ਸੁਲਾਕਞ੍ਜਿਕਂ. ਪਿਟ੍ਠਨ੍ਤਿ ਤਣ੍ਡੁਲਪਿਟ੍ਠਂ. ਤਣ੍ਡੁਲਪਿਟ੍ਠੇਹਿ ਪਕ੍ਕਾ ਖਲਿ. ਅਲ੍ਲਿਕਾਤਿ ਨਿਯ੍ਯਾਸੋ. ਆਦਿ-ਸਦ੍ਦੇਨ ਲਾਖਾਦੀਨਂ ਗਹਣਂ. ਚੀਵਰਸ੍ਸ ਕਰਣੇ ਕਰਣਕਾਲੇ ਸਮੁਟ੍ਠਿਤਾਨਂ ਸੂਚਿਹਤ੍ਥਮਲਾਦੀਨਂ ਕਿਲਿਟ੍ਠਕਾਲੇ ਧੋਵਨਤ੍ਥਞ੍ਚ ਕਞ੍ਜਿਕਪਿਟ੍ਠਖਲਿਅਲ੍ਲਿਕਾਦੀਸੁ ਪਕ੍ਖਿਪਤਿ, ਵਟ੍ਟਤੀਤਿ ਯੋਜਨਾ.
ਤਤ੍ਥਾਤਿ ਯੇਨ ਕਸਾਵੇਨ ਚੀਵਰਂ ਰਜਤਿ, ਤਸ੍ਮਿਂ ਰਜਨੇ ਚੀਵਰਸ੍ਸ ਸੁਗਨ੍ਧਭਾਵਤ੍ਥਾਯ ਗਨ੍ਧਂ ਵਾ ਉਜ੍ਜਲਭਾਵਤ੍ਥਾਯ ਤੇਲਂ ਵਾ ਵਣ੍ਣਤ੍ਥਾਯ ਲਾਖਂ ਵਾ. ਕਿਞ੍ਚੀਤਿ ਏਵਰੂਪਂ ਯਂ ਕਿਞ੍ਚਿ. ਮਣਿਨਾਤਿ ਪਾਸਾਣੇਨ. ਅਞ੍ਞੇਨਪਿ ਚ ਕੇਨਚੀਤਿ ਯੇਨ ਉਜ੍ਜਲਂ ਹੋਤਿ, ਏਵਰੂਪੇਨ ਮੁਗ੍ਗਰਾਦਿਨਾ ਅਞ੍ਞੇਨਪਿ ਕੇਨਚਿ ਵਤ੍ਥੁਨਾ. ਦੋਣਿਯਾਤਿ ਰਜਨਮ੍ਬਣੇ ਨ ਘਂਸਿਤਬ੍ਬਂ ਹਤ੍ਥੇਨ ਗਾਹਾਪੇਤ੍ਵਾ ਨ ਗਹੇਤਬ੍ਬਂ. ਰਤ੍ਤਂ ਚੀਵਰਂ ਹਤ੍ਥੇਹਿ ਕਿਞ੍ਚਿ ਥੋਕਂ ਪਹਰਿਤੁਂ ਵਟ੍ਟਤੀਤਿ ਯੋਜਨਾ. ਯਤ੍ਥ ਪਕ੍ਕਰਜਨਂ ਪਕ੍ਖਿਪਨ੍ਤਿ, ਸਾ ਰਜਨਦੋਣੀ. ਤਤ੍ਥ ਅਂਸਬਦ੍ਧਕਕਾਯਬਨ੍ਧਨਾਦਿਂ ਘਟ੍ਟੇਤੁਂ ਵਟ੍ਟਤੀਤਿ ਗਣ੍ਠਿਪਦੇ ਵੁਤ੍ਤਂ.
ਗਣ੍ਠਿਕੇਤਿ ਵੇਲ਼ੁਦਨ੍ਤਵਿਸਾਣਾਦਿਮਯਗਣ੍ਠਿਕੇ. ਲੇਖਾ ਵਾਤਿ ਵਟ੍ਟਾਦਿਭੇਦਾ ਲੇਖਾ ਵਾ. ਪਿਲ਼ਕਾਤਿ ਸਾਸਪਬੀਜਸਦਿਸਾ ਖੁਦ੍ਦਕਬੁਬ੍ਬੁਲ਼ਾ. ਪਾਲ਼ਿਕਣ੍ਣਿਕਭੇਦਤੋਤਿ ਮਣਿਕਾਵਲ਼ਿਰੂਪਪੁਪ੍ਫਕਣ੍ਣਿਕਰੂਪਭੇਦਤੋ. ‘‘ਕਪ੍ਪਬਿਨ੍ਦੁਵਿਕਾਰੋ ਵਾ ਨ ਵਟ੍ਟਤੀਤਿ ਯੋਜਨਾ’’ਤਿ ਵੁਤ੍ਤਂ, ਤਸ੍ਮਾ ਤਥੇਵ ਚੀਵਰੇ ਪਟਿਪਜ੍ਜਿਤਬ੍ਬਂ.
੯. ਪਤ੍ਤੇ ਵਾ ਥਾਲਕੇ ਵਾਤਿਆਦੀਸੁ ਥਾਲਕੇਤਿ ਤਮ੍ਬਾਦਿਮਯੇ ਪੁਗ੍ਗਲਿਕੇ ਤਿਵਿਧੇਪਿ ਕਪ੍ਪਿਯਥਾਲਕੇ. ਨ ਵਟ੍ਟਤੀਤਿ ਮਣਿਵਣ੍ਣਕਰਣਪਯੋਗੋ ਨ ਵਟ੍ਟਤਿ, ਤੇਲਵਣ੍ਣਪਯੋਗੋ ਪਨ ਵਟ੍ਟਤਿ. ਤੇਲਵਣ੍ਣੋਤਿ ਸਮਣਸਾਰੁਪ੍ਪਵਣ੍ਣਂ ਸਨ੍ਧਾਯ ਵੁਤ੍ਤਂ, ਮਣਿਵਣ੍ਣਂ ਪਨ ਪਤ੍ਤਂ ਅਞ੍ਞੇਨ ਕਤਂ ਲਭਿਤ੍ਵਾ ਪਰਿਭੁਞ੍ਜਿਤੁਂ ਵਟ੍ਟਤੀਤਿ ਵਦਨ੍ਤਿ. ਪਤ੍ਤਮਣ੍ਡਲੇਤਿ ਤਿਪੁਸੀਸਾਦਿਮਯੇ ਪਤ੍ਤਟ੍ਠਪਨਕਮਣ੍ਡਲੇ. ‘‘ਨ ਭਿਕ੍ਖਵੇ ਵਿਚਿਤ੍ਰਾਨਿ ਪਤ੍ਤਮਣ੍ਡਲਾਨਿ ਧਾਰੇਤਬ੍ਬਾਨਿ ਰੂਪਕਾਕਿਣ੍ਣਾਨਿ ਭਿਤ੍ਤਿਕਮ੍ਮਕਤਾਨੀ’’ਤਿ (ਚੂਲ਼ਵ. ੨੫੩) ਵੁਤ੍ਤਤ੍ਤਾ ‘‘ਭਿਤ੍ਤਿਕਮ੍ਮਂ ਨ ਵਟ੍ਟਤੀ’’ਤਿ ਵੁਤ੍ਤਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਮਕਰਦਨ੍ਤਕਂ ਛਿਨ੍ਦਿਤੁ’’ਨ੍ਤਿ (ਚੂਲ਼ਵ. ੨੫੩) ਵੁਤ੍ਤਤ੍ਤਾ ‘‘ਮਕਰਦਨ੍ਤਕਂ ਪਨ ਵਟ੍ਟਤੀ’’ਤਿ ਵੁਤ੍ਤਂ. ਤੇਨਾਹੁ ਪੋਰਾਣਾ –
‘‘ਥਾਲਕਸ੍ਸ ਚ ਪਤ੍ਤਸ੍ਸ, ਬਹਿ ਅਨ੍ਤੋਪਿ ਵਾ ਪਨ;
ਆਰਗ੍ਗੇਨ ਕਤਾ ਲੇਖਾ, ਨ ਚ ਵਟ੍ਟਤਿ ਕਾਚਿਪਿ.
‘‘ਆਰੋਪੇਤ੍ਵਾ ਭਮਂ ਪਤ੍ਤਂ, ਮਜ੍ਜਿਤ੍ਵਾ ਚੇ ਪਚਨ੍ਤਿ ਚ;
‘ਮਣਿਵਣ੍ਣਂ ਕਰਿਸ੍ਸਾਮ’, ਇਤਿ ਕਾਤੁਂ ਨ ਵਟ੍ਟਤਿ.
‘‘ਪਤ੍ਤਮਣ੍ਡਲਕੇ ਕਿਞ੍ਚਿ;
ਭਿਤ੍ਤਿਕਮ੍ਮਂ ਨ ਵਟ੍ਟਤਿ;
ਨ ਦੋਸੋ ਕੋਚਿ ਤਤ੍ਥਸ੍ਸ;
ਕਾਤੁਂ ਮਕਰਦਨ੍ਤਕ’’ਨ੍ਤਿ.
ਵਿਨਯਸਾਰਤ੍ਥਸਨ੍ਦੀਪਨਿਯਮ੍ਪਿ ਆਰਗ੍ਗੇਨਾਤਿ ਆਰਕਣ੍ਟਕਗ੍ਗੇਨ, ਸੂਚਿਮੁਖੇਨ ਵਾ. ਕਾਚਿਪਿ ਲੇਖਾਤਿ ਵਟ੍ਟਕਗੋਮੁਤ੍ਤਾਦਿਸਣ੍ਠਾਨਾ ਯਾ ਕਾਚਿਪਿ ਰਾਜਿ. ਭਮਂ ਆਰੋਪੇਤ੍ਵਾਤਿ ਭਮੇ ਅਲ੍ਲੀਯਾਪੇਤ੍ਵਾ. ਪਤ੍ਤਮਣ੍ਡਲਕੇਤਿ ਪਤ੍ਤੇ ਛਵਿਰਕ੍ਖਣਤ੍ਥਾਯ ਤਿਪੁਸੀਸਾਦੀਹਿ ਕਤੇ ਪਤ੍ਤਸ੍ਸ ਹੇਟ੍ਠਾ ਆਧਾਰਾਦੀਨਂ ਉਪਰਿ ਕਾਤਬ੍ਬੇ ਪਤ੍ਤਮਣ੍ਡਲਕੇ. ਭਿਤ੍ਤਿਕਮ੍ਮਨ੍ਤਿ ਨਾਨਾਕਾਰਰੂਪਕਕਮ੍ਮਵਿਚਿਤ੍ਤਂ. ਯਥਾਹ ‘‘ਨ, ਭਿਕ੍ਖਵੇ, ਵਿਚਿਤ੍ਰਾਨਿ ਪਤ੍ਤਮਣ੍ਡਲਾਨਿ ਧਾਰੇਤਬ੍ਬਾਨਿ ਰੂਪਕਾਕਿਣ੍ਣਾਨਿ ਭਿਤ੍ਤਿਕਮ੍ਮਕਤਾਨੀ’’ਤਿ. ਤਤ੍ਥਾਤਿ ਤਸ੍ਮਿਂ ਪਤ੍ਤਮਣ੍ਡਲੇ. ਅਸ੍ਸਾਤਿ ਭਿਕ੍ਖੁਸ੍ਸ. ਮਕਰਦਨ੍ਤਕਨ੍ਤਿ ਗਿਰਿਕੂਟਨ੍ਤਿ ਵੁਤ੍ਤਂ, ਤਸ੍ਮਾ ਏਵਂ ਪਤ੍ਤਥਾਲਕਾਦੀਸੁ ਪਟਿਪਜ੍ਜਿਤਬ੍ਬਂ.
ਧਮਕਰਣ…ਪੇ… ਲੇਖਾ ਨ ਵਟ੍ਟਤੀਤਿ ਆਰਗ੍ਗੇਨ ਦਿਨ੍ਨਲੇਖਾ ਨ ਵਟ੍ਟਤਿ, ਜਾਤਿਹਿਙ੍ਗੁਲਿਕਾਦਿਵਣ੍ਣੇਹਿ ਕਤਲੇਖਾ ਪਨ ਵਟ੍ਟਤਿ. ਛਤ੍ਤਮੁਖਵਟ੍ਟਿਯਨ੍ਤਿ ਧਮਕਰਣਸ੍ਸ ਹਤ੍ਥੇਨ ਗਹਣਤ੍ਥਂ ਕਤਸ੍ਸ ਛਤ੍ਤਾਕਾਰਸ੍ਸ ਮੁਖਵਟ੍ਟਿਯਂ. ‘‘ਪਰਿਸ੍ਸਾਵਨਬਨ੍ਧਟ੍ਠਾਨੇ’’ਤਿ ਕੇਚਿ. ਵਿਨਯਵਿਨਿਚ੍ਛਯੇਪਿ –
‘‘ਨ ਧਮ੍ਮਕਰਣਚ੍ਛਤ੍ਤੇ, ਲੇਖਾ ਕਾਚਿਪਿ ਵਟ੍ਟਤਿ;
ਕੁਚ੍ਛਿਯਂ ਵਾ ਠਪੇਤ੍ਵਾ ਤਂ, ਲੇਖਂ ਤੁ ਮੁਖਵਟ੍ਟਿਯ’’ਨ੍ਤਿ. –
ਵੁਤ੍ਤਂ. ਤਟ੍ਟੀਕਾਯਂ ਪਨ ‘‘ਮੁਖਵਟ੍ਟਿਯਾ ਯਾ ਲੇਖਾ ਪਰਿਸ੍ਸਾਵਨਬਨ੍ਧਨਤ੍ਥਾਯ ਅਨੁਞ੍ਞਾਤਾ, ਤਂ ਲੇਖਂ ਠਪੇਤ੍ਵਾ ਧਮਕਰਣਚ੍ਛਤ੍ਤੇ ਵਾ ਕੁਚ੍ਛਿਯਂ ਵਾ ਕਾਚਿ ਲੇਖਾ ਨ ਵਟ੍ਟਤੀਤਿ ਯੋਜਨਾ’’ਤਿ ਵੁਤ੍ਤਂ, ਤਸ੍ਮਾ ਤਤ੍ਥ ਵੁਤ੍ਤਨਯੇਨੇਵ ਧਮਕਰਣੇ ਪਟਿਪਜ੍ਜਿਤਬ੍ਬਂ.
੧੦. ਕਾਯਬਨ੍ਧਨੇ ਪਨ ਕਕ੍ਕਟਕ੍ਖੀਨੀਤਿ ਕਕ੍ਕਟਕਸ੍ਸ ਅਕ੍ਖਿਸਦਿਸਾਨਿ. ਮਕਰਮੁਖਨ੍ਤਿ ਮਕਰਮੁਖਸਣ੍ਠਾਨਂ. ਦੇਡ੍ਡੁਭਸੀਸਨ੍ਤਿ ਉਦਕਸਪ੍ਪਸੀਸਸਦਿਸਸਣ੍ਠਾਨਾਨਿ. ਅਚ੍ਛੀਨੀਤਿ ਕੁਞ੍ਜਰਚ੍ਛਿਸਣ੍ਠਾਨਾਨਿ. ਏਕਮੇਵ ਵਟ੍ਟਤੀਤਿ ਏਤ੍ਥ ਏਕਰਜ੍ਜੁਕਂ ਦ੍ਵਿਗੁਣਤਿਗੁਣਂ ਕਤ੍ਵਾ ਬਨ੍ਧਿਤੁਂ ਨ ਵਟ੍ਟਤਿ, ਏਕਮੇਵ ਪਨ ਸਤਵਾਰਮ੍ਪਿ ਸਰੀਰਂ ਪਰਿਕ੍ਖਿਪਿਤ੍ਵਾ ਬਨ੍ਧਿਤੁਂ ਵਟ੍ਟਤਿ. ‘‘ਬਹੁਰਜ੍ਜੁਕੇ ਏਕਤੋ ਕਤ੍ਵਾ ਏਕੇਨ ਨਿਰਨ੍ਤਰਂ ਵੇਠੇਤ੍ਵਾ ਕਤਂ ਬਹੁਰਜ੍ਜੁਕਨ੍ਤਿ ਨ ਵਤ੍ਤਬ੍ਬਂ, ਤਂ ਵਟ੍ਟਤੀ’’ਤਿ ਵੁਤ੍ਤਤ੍ਤਾ ਤਂ ਮੁਰਜਸਙ੍ਖਂ ਨ ਗਚ੍ਛਤੀਤਿ ਵੇਦਿਤਬ੍ਬਂ. ਮੁਰਜਞ੍ਹਿ ਨਾਨਾਵਣ੍ਣੇਹਿ ਸੁਤ੍ਤੇਹਿ ਮੁਰਜਵਟ੍ਟਿਸਣ੍ਠਾਨਂ ਵੇਠੇਤ੍ਵਾ ਕਰੋਨ੍ਤਿ. ਇਦਂ ਪਨ ਮੁਰਜਂ ਮਦ੍ਦਵੀਣਸਙ੍ਖਾਤਂ ਪਾਮਙ੍ਗਸਣ੍ਠਾਨਞ੍ਚ ਦਸਾਸੁ ਵਟ੍ਟਤਿ ‘‘ਕਾਯਬਨ੍ਧਨਸ੍ਸ ਦਸਾ ਜੀਰਨ੍ਤਿ. ਅਨੁਜਾਨਾਮਿ, ਭਿਕ੍ਖਵੇ, ਮੁਰਜਂ ਮਦ੍ਦਵੀਣ’’ਨ੍ਤਿ (ਚੂਲ਼ਵ. ੨੭੮) ਵੁਤ੍ਤਤ੍ਤਾ.
ਵਿਧੇਤਿ ਦਸਾਪਰਿਯੋਸਾਨੇ ਥਿਰਭਾਵਾਯ ਦਨ੍ਤਵਿਸਾਣਸੁਤ੍ਤਾਦੀਹਿ ਕਤੇ ਵਿਧੇ. ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ੨.੮੫) ਪਨ ‘‘ਕਾਯਬਨ੍ਧਨਸ੍ਸ ਪਾਸਨ੍ਤੇ ਦਸਾਮੂਲੇ ਤਸ੍ਸ ਥਿਰਭਾਵਤ੍ਥਂ ਕਤ੍ਤਬ੍ਬੇ ਦਨ੍ਤਵਿਸਾਣਾਦਿਮਯੇ ਵਿਧੇ’’ਤਿ ਵੁਤ੍ਤਂ. ਅਟ੍ਠਮਙ੍ਗਲਾਨਿ ਨਾਮ ਸਙ੍ਖੋ, ਚਕ੍ਕਂ, ਪੁਣ੍ਣਕੁਮ੍ਭੋ, ਗਯਾ, ਸਿਰੀਵਚ੍ਛੋ, ਅਙ੍ਕੁਸੋ, ਧਜਂ, ਸੋਵਤ੍ਥਿਕਨ੍ਤਿ. ਮਚ੍ਛਯੁਗਲ਼ਛਤ੍ਤਨਨ੍ਦਿਯਾਵਟ੍ਟਾਦਿਵਸੇਨਪਿ ਵਦਨ੍ਤਿ. ਪਰਿਚ੍ਛੇਦਲੇਖਾਮਤ੍ਤਨ੍ਤਿ ਦਨ੍ਤਾਦੀਹਿ ਕਤਸ੍ਸ ਵਿਧਸ੍ਸ ਉਭੋਸੁ ਕੋਟੀਸੁ ਕਾਤਬ੍ਬਪਰਿਚ੍ਛੇਦਰਾਜਿਮਤ੍ਤਂ. ਵਿਨਯਵਿਨਿਚ੍ਛਯਪ੍ਪਕਰਣੇਪਿ –
‘‘ਸੁਤ੍ਤਂ ਵਾ ਦਿਗੁਣਂ ਕਤ੍ਵਾ, ਕੋਟ੍ਟੇਨ੍ਤਿ ਚ ਤਹਿਂ ਤਹਿਂ;
ਕਾਯਬਨ੍ਧਨਸੋਭਤ੍ਥਂ, ਤਂ ਨ ਵਟ੍ਟਤਿ ਭਿਕ੍ਖੁਨੋ.
‘‘ਦਸਾਮੁਖੇ ਦਲ਼੍ਹਤ੍ਥਾਯ, ਦ੍ਵੀਸੁ ਅਨ੍ਤੇਸੁ ਵਟ੍ਟਤਿ;
ਮਾਲਾਕਮ੍ਮਲਤਾਕਮ੍ਮ-ਚਿਤ੍ਤਿਕਮ੍ਪਿ ਨ ਵਟ੍ਟਤਿ.
‘‘ਅਕ੍ਖੀਨਿ ਤਤ੍ਥ ਦਸ੍ਸੇਤ੍ਵਾ;
ਕੋਟ੍ਟਿਤੇ ਪਨ ਕਾ ਕਥਾ.
ਕਕ੍ਕਟਕ੍ਖੀਨਿ ਵਾ ਤਤ੍ਥ;
ਉਟ੍ਠਾਪੇਤੁਂ ਨ ਵਟ੍ਟਤਿ.
‘‘ਘਟਂ ਦੇਡ੍ਡੁਭਸੀਸਂ ਵਾ, ਮਕਰਸ੍ਸ ਮੁਖਮ੍ਪਿ ਵਾ;
ਵਿਕਾਰਰੂਪਂ ਯਂ ਕਿਞ੍ਚਿ, ਨ ਵਟ੍ਟਤਿ ਦਸਾਮੁਖੇ.
‘‘ਉਜੁਕਂ ਮਚ੍ਛਕਣ੍ਟਂ ਵਾ, ਮਟ੍ਠਂ ਵਾ ਪਨ ਪਟ੍ਟਿਕਂ;
ਖਜ੍ਜੂਰਿਪਤ੍ਤਕਾਕਾਰਂ, ਕਤ੍ਵਾ ਵਟ੍ਟਤਿ ਕੋਟ੍ਟਿਤਂ.
‘‘ਪਟ੍ਟਿਕਾ ਸੂਕਰਨ੍ਤਨ੍ਤਿ, ਦੁਵਿਧਂ ਕਾਯਬਨ੍ਧਨਂ;
ਰਜ੍ਜੁਕਾ ਦੁਸ੍ਸਪਟ੍ਟਾਦਿ, ਸਬ੍ਬਂ ਤਸ੍ਸਾਨੁਲੋਮਿਕਂ.
‘‘ਮੁਰਜਂ ਮਦ੍ਦਵੀਣਞ੍ਚ, ਦੇਡ੍ਡੁਭਞ੍ਚ ਕਲਾਬੁਕਂ;
ਰਜ੍ਜੁਯੋ ਚ ਨ ਵਟ੍ਟਨ੍ਤਿ, ਪੁਰਿਮਾ ਦ੍ਵੇਦਸਾ ਸਿਯੁਂ.
‘‘ਦਸਾ ਪਾਮਙ੍ਗਸਣ੍ਠਾਨਾ, ਨਿਦ੍ਦਿਟ੍ਠਾ ਕਾਯਬਨ੍ਧਨੇ;
ਏਕਾ ਦ੍ਵਿਤਿਚਤਸ੍ਸੋ ਵਾ, ਵਟ੍ਟਨ੍ਤਿ ਨ ਤਤੋ ਪਰਂ.
‘‘ਏਕਰਜ੍ਜੁਮਯਂ ਵੁਤ੍ਤਂ, ਮੁਨਿਨਾ ਕਾਯਬਨ੍ਧਨਂ;
ਤਞ੍ਚ ਪਾਮਙ੍ਗਸਣ੍ਠਾਨਂ, ਏਕਮ੍ਪਿ ਚ ਨ ਵਟ੍ਟਤਿ.
‘‘ਰਜ੍ਜੁਕੇ ਏਕਤੋ ਕਤ੍ਵਾ, ਬਹੂ ਏਕਾਯ ਰਜ੍ਜੁਯਾ;
ਨਿਰਨ੍ਤਰਞ੍ਹਿ ਵੇਠੇਤ੍ਵਾ, ਕਤਂ ਵਟ੍ਟਤਿ ਬਨ੍ਧਿਤੁਂ.
‘‘ਦਨ੍ਤਕਟ੍ਠਵਿਸਾਣਟ੍ਠਿ-ਲੋਹਵੇਲ਼ੁਨਲ਼ਬ੍ਭਵਾ;
ਜਤੁਸਙ੍ਖਮਯਾ ਸੁਤ੍ਤ-ਫਲਜਾ ਵਿਧਕਾ ਮਤਾ.
‘‘ਕਾਯਬਨ੍ਧਨਵਿਧੇਪਿ, ਵਿਕਾਰੋ ਨ ਚ ਵਟ੍ਟਤਿ;
ਤਤ੍ਥ ਤਤ੍ਥ ਪਰਿਚ੍ਛੇਦ-ਲੇਖਾਮਤ੍ਤਂ ਤੁ ਵਟ੍ਟਤੀ’’ਤਿ. –
ਵੁਤ੍ਤਂ.
ਵਿਨਯਸਾਰਤ੍ਥਸਨ੍ਦੀਪਨਿਯਮ੍ਪਿ ਤਹਿਂ ਤਹਿਨ੍ਤਿ ਪਟ੍ਟਿਕਾਯ ਤਤ੍ਥ ਤਤ੍ਥ. ਤਨ੍ਤਿ ਤਥਾਕੋਟ੍ਟਿਤਦਿਗੁਣਸੁਤ੍ਤਕਾਯਬਨ੍ਧਨਂ. ਅਨ੍ਤੇਸੁ ਦਲ਼੍ਹਤ੍ਥਾਯ ਦਸਾਮੁਖੇ ਦਿਗੁਣਂ ਕਤ੍ਵਾ ਕੋਟ੍ਟੇਨ੍ਤਿ, ਵਟ੍ਟਤੀਤਿ ਯੋਜਨਾ. ਚਿਤ੍ਤਕਮ੍ਪੀਤਿ ਮਾਲਾਕਮ੍ਮਲਤਾਕਮ੍ਮਚਿਤ੍ਤਯੁਤ੍ਤਮ੍ਪਿ ਕਾਯਬਨ੍ਧਨਂ. ਅਕ੍ਖੀਨੀਤਿ ਕੁਞ੍ਜਰਕ੍ਖੀਨਿ. ਤਤ੍ਥਾਤਿ ਕਾਯਬਨ੍ਧਨੇ ਨ ਵਟ੍ਟਤੀਤਿ ਕਾ ਕਥਾ. ਉਟ੍ਠਾਪੇਤੁਨ੍ਤਿ ਉਕ੍ਕਿਰਿਤੁਂ.
ਘਟਨ੍ਤਿ ਘਟਸਣ੍ਠਾਨਂ. ਦੇਡ੍ਡੁਭਸੀਸਂ ਵਾਤਿ ਉਦਕਸਪ੍ਪਸੀਸਂ ਮੁਖਸਣ੍ਠਾਨਂ ਵਾ. ਯਂ ਕਿਞ੍ਚਿ ਵਿਕਾਰਰੂਪਂ ਦਸਾਮੁਖੇ ਨ ਵਟ੍ਟਤੀਤਿ ਯੋਜਨਾ. ਏਤ੍ਥ ਚ ਉਭਯਪਸ੍ਸੇਸੁ ਮਚ੍ਛਕਣ੍ਟਕਯੁਤ੍ਤਂ ਮਚ੍ਛਸ੍ਸ ਪਿਟ੍ਠਿਕਣ੍ਟਕਂ ਵਿਯ ਯਸ੍ਸਾ ਪਟ੍ਟਿਕਾਯ ਵਾਯਨਂ ਹੋਤਿ, ਇਦਂ ਕਾਯਬਨ੍ਧਨਂ ਮਚ੍ਛਕਣ੍ਟਕਂ ਨਾਮ. ਯਸ੍ਸ ਖਜ੍ਜੂਰਿਪਤ੍ਤਸਣ੍ਠਾਨਮਿਵ ਵਾਯਨਂ ਹੋਤਿ, ਤਂ ਖਜ੍ਜੂਰਿਪਤ੍ਤਕਾਕਾਰਂ ਨਾਮ.
ਪਕਤਿਵਿਕਾਰਾ ਪਟ੍ਟਿਕਾ ਸੂਕਰਨ੍ਤਂ ਨਾਮ ਕੁਞ੍ਚਿਕਾਕੋਸਸਣ੍ਠਾਨਂ. ਤਸ੍ਸ ਦੁਵਿਧਸ੍ਸ ਕਾਯਬਨ੍ਧਨਸ੍ਸ. ਤਤ੍ਥ ਰਜ੍ਜੁਕਾ ਸੂਕਰਨ੍ਤਾਨੁਲੋਮਿਕਾ, ਦੁਸ੍ਸਪਟ੍ਟਂ ਪਟ੍ਟਿਕਾਨੁਲੋਮਿਕਂ. ਆਦਿ-ਸਦ੍ਦੇਨ ਮੁਦ੍ਦਿਕਕਾਯਬਨ੍ਧਨਂ ਗਹਿਤਂ, ਤਞ੍ਚ ਸੂਕਰਨ੍ਤਾਨੁਲੋਮਿਕਂ. ਯਥਾਹ ‘‘ਏਕਰਜ੍ਜੁਕਂ ਪਨ ਮੁਦ੍ਦਿਕਕਾਯਬਨ੍ਧਨਞ੍ਚ ਸੂਕਰਨ੍ਤਂ ਅਨੁਲੋਮੇਤੀ’’ਤਿ (ਚੂਲ਼ਵ. ਅਟ੍ਠ. ੨੭੮). ਤਤ੍ਥ ਰਜ੍ਜੁਕਾ ਨਾਮ ਏਕਾਵਟ੍ਟਾ, ਬਹੁਰਜ੍ਜੁਕਸ੍ਸ ਅਕਪ੍ਪਿਯਭਾਵਂ ਵਕ੍ਖਤਿ. ਮੁਦ੍ਦਿਕਕਾਯਬਨ੍ਧਨਂ ਨਾਮ ਚਤੁਰਸ੍ਸਂ ਅਕਤ੍ਵਾ ਸਜ੍ਜਿਤਨ੍ਤਿ ਗਣ੍ਠਿਪਦੇ ਵੁਤ੍ਤਂ.
ਮੁਰਜਂ ਨਾਮ ਮੁਰਜਵਟ੍ਟਿਸਣ੍ਠਾਨਂ ਵੇਠੇਤ੍ਵਾ ਕਤਂ. ਵੇਠੇਤ੍ਵਾਤਿ ਨਾਨਾਸੁਤ੍ਤੇਹਿ ਵੇਠੇਤ੍ਵਾ. ਸਿਕ੍ਖਾਭਾਜਨਵਿਨਿਚ੍ਛਯੇ ਪਨ ‘‘ਬਹੁਕਾ ਰਜ੍ਜੁਯੋ ਏਕਤੋ ਕਤ੍ਵਾ ਏਕਾਯ ਰਜ੍ਜੁਯਾ ਵੇਠਿਤ’’ਨ੍ਤਿ ਵੁਤ੍ਤਂ. ਮਦ੍ਦਵੀਣਂ ਨਾਮ ਪਾਮਙ੍ਗਸਣ੍ਠਾਨਂ. ਦੇਡ੍ਡੁਭਕਂ ਨਾਮ ਉਦਕਸਪ੍ਪਸਦਿਸਂ. ਕਲਾਬੁਕਂ ਨਾਮ ਬਹੁਰਜ੍ਜੁਕਂ. ਰਜ੍ਜੁਯੋਤਿ ਉਭਯਕੋਟਿਯਂ ਏਕਤੋ ਅਬਨ੍ਧਾ ਬਹੁਰਜ੍ਜੁਯੋ, ਤਥਾਬਨ੍ਧਾ ਕਲਾਬੁਕਂ ਨਾਮ ਹੋਤਿ. ਨ ਵਟ੍ਟਨ੍ਤੀਤਿ ਮੁਰਜਾਦੀਨਿ ਇਮਾਨਿ ਸਬ੍ਬਾਨਿ ਕਾਯਬਨ੍ਧਨਾਨਿ ਨ ਵਟ੍ਟਨ੍ਤਿ. ਪੁਰਿਮਾ ਦ੍ਵੇਤਿ ਮੁਰਜਂ ਮਦ੍ਦਵੀਣਨਾਮਞ੍ਚਾਤਿ ਦ੍ਵੇ. ‘‘ਦਸਾਸੁ ਸਿਯੁ’’ਨ੍ਤਿ ਵਤ੍ਤਬ੍ਬੇ ਗਾਥਾਬਨ੍ਧਵਸੇਨ ਵਣ੍ਣਲੋਪੇਨ ‘‘ਦਸਾ ਸਿਯੁ’’ਨ੍ਤਿ ਵੁਤ੍ਤਂ. ਯਥਾਹ ‘‘ਮੁਰਜਂ ਮਦ੍ਦਵੀਣਨ੍ਤਿ ਇਦਂ ਦਸਾਸੁਯੇਵ ਅਨੁਞ੍ਞਾਤ’’ਨ੍ਤਿ.
ਪਾਮਙ੍ਗਸਣ੍ਠਾਨਾਤਿ ਪਾਮਙ੍ਗਦਾਮਂ ਵਿਯ ਚਤੁਰਸ੍ਸਸਣ੍ਠਾਨਾ. ਏਕਰਜ੍ਜੁਮਯਨ੍ਤਿ ਨਾਨਾਵਟ੍ਟੇ ਏਕਤੋ ਵਟ੍ਟੇਤ੍ਵਾ ਕਤਂ ਰਜ੍ਜੁਮਯਂ ਕਾਯਬਨ੍ਧਨਂ ਵਤ੍ਤੁਂ ਵਟ੍ਟਤੀਤਿ ‘‘ਰਜ੍ਜੁਕਾ ਦੁਸ੍ਸਪਟ੍ਟਾਦੀ’’ਤਿ ਏਤ੍ਥ ਏਕਵਟ੍ਟਰਜ੍ਜੁਕਾ ਗਹਿਤਾ. ਇਧ ਪਨ ਨਾਨਾਵਟ੍ਟੇ ਏਕਤੋ ਵਟ੍ਟੇਤ੍ਵਾ ਕਤਾ ਏਕਾਵ ਰਜ੍ਜੁ ਗਹਿਤਾ. ਤਞ੍ਚਾਤਿ ਤਂ ਵਾ ਨਯਮ੍ਪਿ ਏਕਰਜ੍ਜੁਕਕਾਯਬਨ੍ਧਨਂ ਪਾਮਙ੍ਗਸਣ੍ਠਾਨੇਨ ਗਨ੍ਥਿਤਂ. ਏਕਮ੍ਪਿ ਚ ਨ ਵਟ੍ਟਤੀਤਿ ਕੇਵਲਮ੍ਪਿ ਨ ਵਟ੍ਟਤਿ.
ਬਹੂ ਰਜ੍ਜੁਕੇ ਏਕਤੋ ਕਤ੍ਵਾਤਿ ਯੋਜਨਾ. ਵਟ੍ਟਤਿ ਬਨ੍ਧਿਤੁਨ੍ਤਿ ਮੁਰਜਂ ਕਲਾਬੁਕਞ੍ਚ ਨ ਹੋਤਿ, ਰਜ੍ਜੁਕਕਾਯਬਨ੍ਧਨਮੇਵ ਹੋਤੀਤਿ ਅਧਿਪ੍ਪਾਯੋ. ਅਯਂ ਪਨ ਵਿਨਿਚ੍ਛਯੋ ‘‘ਬਹੁਰਜ੍ਜੁਕੇ ਏਕਤੋ ਕਤ੍ਵਾ ਏਕੇਨ ਨਿਰਨ੍ਤਰਂ ਵੇਠੇਤ੍ਵਾ ਕਤਂ ਬਹੁਰਜ੍ਜੁਕਨ੍ਤਿ ਨ ਵਤ੍ਤਬ੍ਬਂ, ਤਂ ਵਟ੍ਟਤੀ’’ਤਿ ਅਟ੍ਠਕਥਾਗਤੋ ਇਧ ਵੁਤ੍ਤੋ. ਸਿਕ੍ਖਾਭਾਜਨਵਿਨਿਚ੍ਛਯੇ ‘‘ਬਹੁਰਜ੍ਜੁਯੋ ਏਕਤੋ ਕਤ੍ਵਾ ਏਕਾਯ ਵੇਠਿਤਂ ਮੁਰਜਂ ਨਾਮਾ’’ਤਿ ਯਂ ਵੁਤ੍ਤਂ, ਤਂ ਇਮਿਨਾ ਵਿਰੁਜ੍ਝਨਤੋ ਨ ਗਹੇਤਬ੍ਬਂ.
ਦਨ੍ਤ-ਸਦ੍ਦੇਨ ਹਤ੍ਥਿਦਨ੍ਤਾ ਵੁਤ੍ਤਾ. ਜਤੂਤਿ ਲਾਖਾ. ਸਙ੍ਖਮਯਨ੍ਤਿ ਸਙ੍ਖਨਾਭਿਮਯਂ. ਵਿਧਕਾ ਮਤਾਤਿ ਏਤ੍ਥ ਵੇਧਿਕਾਤਿਪਿ ਪਾਠੋ, ਵਿਧਪਰਿਯਾਯੋ. ਕਾਯਬਨ੍ਧਨਵਿਧੇਤਿ ਕਾਯਬਨ੍ਧਨਸ੍ਸ ਦਸਾਯ ਥਿਰਭਾਵਤ੍ਥਂ ਕਟ੍ਠਦਨ੍ਤਾਦੀਹਿ ਕਤੇ ਵਿਧੇ. ਵਿਕਾਰੋ ਅਟ੍ਠਮਙ੍ਗਲਾਦਿਕੋ. ਤਤ੍ਥ ਤਤ੍ਥਾਤਿ ਤਸ੍ਮਿਂ ਤਸ੍ਮਿਂ ਠਾਨੇ. ਤੁ-ਸਦ੍ਦੇਨ ਘਟਾਕਾਰੋਪਿ ਵਟ੍ਟਤੀਤਿ ਦੀਪੇਤੀਤਿ ਅਤ੍ਥੋ ਪਕਾਸਿਤੋ, ਤਸ੍ਮਾ ਤੇਨ ਨਯੇਨ ਕਾਯਬਨ੍ਧਨਵਿਚਾਰੋ ਕਾਤਬ੍ਬੋਤਿ.
੧੧. ਅਞ੍ਜਨਿਯਂ ‘‘ਉਜੁਕਮੇਵਾ’’ਤਿ ਵੁਤ੍ਤਤ੍ਤਾ ਚਤੁਰਸ੍ਸਾਦਿਸਣ੍ਠਾਨਾਪਿ ਵਙ੍ਕਗਤਿਕਾ ਨ ਵਟ੍ਟਤਿ. ਸਿਪਾਟਿਕਾਯਾਤਿ ਵਾਸਿਆਦਿਭਣ੍ਡਪਕ੍ਖਿਪਨੇ. ਵਿਨਯਵਿਨਿਚ੍ਛਯਪ੍ਪਕਰਣੇ ਪਨ –
‘‘ਮਾਲਾਕਮ੍ਮਲਤਾਕਮ੍ਮ-ਨਾਨਾਰੂਪਵਿਚਿਤ੍ਤਿਤਾ;
ਨ ਚ ਵਟ੍ਟਤਿ ਭਿਕ੍ਖੂਨਂ, ਅਞ੍ਜਨੀ ਜਨਰਞ੍ਜਨੀ.
‘‘ਤਾਦਿਸਂ ਪਨ ਘਂਸਿਤ੍ਵਾ, ਵੇਠੇਤ੍ਵਾ ਸੁਤ੍ਤਕੇਨ ਵਾ;
ਵਲ਼ਞ੍ਜਨ੍ਤਸ੍ਸ ਭਿਕ੍ਖੁਸ੍ਸ, ਨ ਦੋਸੋ ਕੋਚਿ ਵਿਜ੍ਜਤਿ.
‘‘ਵਟ੍ਟਾ ਵਾ ਚਤੁਰਸ੍ਸਾ ਵਾ, ਅਟ੍ਠਂਸਾ ਵਾਪਿ ਅਞ੍ਜਨੀ;
ਵਟ੍ਟਤੇਵਾਤਿ ਨਿਦ੍ਦਿਟ੍ਠਾ, ਵਣ੍ਣਮਟ੍ਠਾ ਨ ਵਟ੍ਟਤਿ.
‘‘ਤਥਾਞ੍ਜਨਿਸਲਾਕਾਪਿ, ਅਞ੍ਜਨਿਥਵਿਕਾਯ ਚ;
ਨਾਨਾਵਣ੍ਣੇਹਿ ਸੁਤ੍ਤੇਹਿ, ਚਿਤ੍ਤਕਮ੍ਮਂ ਨ ਵਟ੍ਟਤਿ.
‘‘ਏਕਵਣ੍ਣੇਨ ਸੁਤ੍ਤੇਨ, ਸਿਪਾਟਿਂ ਯੇਨ ਕੇਨਚਿ;
ਯਂ ਕਿਞ੍ਚਿ ਪਨ ਸਿਬ੍ਬੇਤ੍ਵਾ, ਵਲ਼ਞ੍ਜਨ੍ਤਸ੍ਸ ਵਟ੍ਟਤੀ’’ਤਿ. –
ਆਗਤਂ.
ਤਟ੍ਟੀਕਾਯਮ੍ਪਿ ਮਾਲਾ…ਪੇ… ਚਿਤ੍ਤਿਤਾਤਿ ਮਾਲਾਕਮ੍ਮਲਤਾਕਮ੍ਮੇਹਿ ਚ ਮਿਗਪਕ੍ਖਿਰੂਪਾਦਿਨਾਨਾਰੂਪੇਹਿ ਚ ਵਿਚਿਤ੍ਤਿਤਾ. ਜਨਰਞ੍ਜਨੀਤਿ ਬਾਲਜਨਪਲੋਭਿਨੀ. ਅਟ੍ਠਂਸਾ ਵਾਪੀਤਿ ਏਤ੍ਥ ਅਪਿ-ਸਦ੍ਦੇਨ ਸੋਲ਼ਸਂਸਾਦੀਨਂ ਗਹਣਂ. ਵਣ੍ਣਮਟ੍ਠਾਤਿ ਮਾਲਾਕਮ੍ਮਾਦਿਵਣ੍ਣਮਟ੍ਠਾ. ਅਞ੍ਜਨੀਸਲਾਕਾਪਿ ਤਥਾ ਵਣ੍ਣਮਟ੍ਠਾ ਨ ਵਟ੍ਟਤੀਤਿ ਯੋਜਨਾ. ਅਞ੍ਜਨੀਥਵਿਕਾਯ ਚ ਨਾਨਾਵਣ੍ਣੇਹਿ ਸੁਤ੍ਤੇਹਿ ਚਿਤ੍ਤਕਮ੍ਮਂ ਨ ਵਟ੍ਟਤੀਤਿ ਪਾਠੋ ਯੁਜ੍ਜਤਿ, ‘‘ਥਵਿਕਾਪਿ ਵਾ’’ਤਿ ਪਾਠੋ ਦਿਸ੍ਸਤਿ, ਸੋ ਨ ਗਹੇਤਬ੍ਬੋ. ‘‘ਪੀਤਾਦਿਨਾ ਯੇਨ ਕੇਨਚਿ ਏਕਵਣ੍ਣੇਨ ਸੁਤ੍ਤੇਨ ਪਿਲੋਤਿਕਾਦਿਮਯਂ ਕਿਞ੍ਚਿਪਿ ਸਿਪਾਟਿਕਂ ਸਿਬ੍ਬੇਤ੍ਵਾ ਵਲ਼ਞ੍ਜਨ੍ਤਸ੍ਸ ਵਟ੍ਟਤੀਤਿ ਯੋਜਨਾ’’ਤਿ ਆਗਤਂ.
੧੨. ਆਰਕਣ੍ਟਕਾਦੀਸੁ ਆਰਕਣ੍ਟਕੇਤਿ ਪੋਤ੍ਥਕਾਦਿਅਭਿਸਙ੍ਖਰਣਤ੍ਥਂ ਕਤੇ ਦੀਘਮੁਖਸਤ੍ਥਕੇ. ਭਮਕਾਰਾਨਂ ਦਾਰੁਆਦਿਲਿਖਨਸਤ੍ਥਕਨ੍ਤਿ ਕੇਚਿ. ਵਟ੍ਟਮਣਿਕਨ੍ਤਿ ਵਟ੍ਟਂ ਕਤ੍ਵਾ ਉਟ੍ਠਾਪੇਤਬ੍ਬਬੁਬ੍ਬੁਲ਼ਕਂ. ਅਞ੍ਞਨ੍ਤਿ ਇਮਿਨਾ ਪਿਲ਼ਕਾਦਿਂ ਸਙ੍ਗਣ੍ਹਾਤਿ. ਪਿਪ੍ਫਲਿਕੇਤਿ ਯਂ ਕਿਞ੍ਚਿ ਛੇਦਨਕੇ ਖੁਦ੍ਦਕਸਤ੍ਥੇ. ਮਣਿਕਨ੍ਤਿ ਏਕਵਟ੍ਟਮਣਿ. ਪਿਲ਼ਕਨ੍ਤਿ ਸਾਸਪਮਤ੍ਤਿਕਾਮੁਤ੍ਤਰਾਜਿਸਦਿਸਾ ਬਹੁਵਟ੍ਟਲੇਖਾ. ਇਮਸ੍ਮਿਂ ਅਧਿਕਾਰੇ ਅਵੁਤ੍ਤਤ੍ਤਾ ਲੇਖਨਿਯਂ ਯਂ ਕਿਞ੍ਚਿ ਵਣ੍ਣਮਟ੍ਠਂ ਵਟ੍ਟਤੀਤਿ ਵਦਨ੍ਤਿ. ਵਜਿਰਬੁਦ੍ਧਿਟੀਕਾਯਂ ਪਨ ‘‘ਕੁਞ੍ਚਿਕਾਯ ਸੇਨਾਸਨਪਰਿਕ੍ਖਾਰਤ੍ਤਾ ਸੁਵਣ੍ਣਰੂਪਿਯਮਯਾਪਿ ਵਟ੍ਟਤੀਤਿ ਛਾਯਾ ਦਿਸ੍ਸਤਿ. ‘ਕੁਞ੍ਚਿਕਾਯ ਵਣ੍ਣਮਟ੍ਠਕਮ੍ਮਂ ਨ ਵਟ੍ਟਤੀ’ਤਿ (ਪਾਰਾ. ਅਟ੍ਠ. ੧.੮੫) ਵਚਨਤੋ ਅਞ੍ਞੇ ਕਪ੍ਪਿਯਲੋਹਾਦਿਮਯਾਵ ਕੁਞ੍ਚਿਕਾ ਕਪ੍ਪਨ੍ਤਿ ਪਰਿਹਰਣੀਯਪਰਿਕ੍ਖਾਰਤ੍ਤਾ’’ਤਿ ਵੁਤ੍ਤਂ. ਆਰਕਣ੍ਟਕੋ ਪੋਤ੍ਥਕਾਦਿਕਰਣਸਤ੍ਥਕਜਾਤਿ, ਆਮਣ੍ਡਸਾਰਕੋ ਆਮਲਕਫਲਮਯੋਤਿ ਵਦਨ੍ਤਿ.
ਵਲਿਤਕਨ੍ਤਿ ਨਖਚ੍ਛੇਦਨਕਾਲੇ ਦਲ਼੍ਹਗ੍ਗਹਣਤ੍ਥਂ ਵਲਿਯੁਤ੍ਤਮੇਵ ਕਰੋਨ੍ਤਿ. ਤਸ੍ਮਾ ਤਂ ਵਟ੍ਟਤੀਤਿ ਇਮਿਨਾ ਅਞ੍ਞਮ੍ਪਿ ਵਿਕਾਰਂ ਦਲ਼੍ਹੀਕਮ੍ਮਾਦਿਅਤ੍ਥਾਯ ਕਰੋਨ੍ਤਿ, ਨ ਵਣ੍ਣਮਟ੍ਠਤ੍ਥਾਯ, ਤਂ ਵਟ੍ਟਤੀਤਿ ਦੀਪਿਤਂ, ਤੇਨ ਚ ਕਤ੍ਤਰਦਣ੍ਡਕੋਟਿਯਂ ਅਞ੍ਞਮਞ੍ਞਂ ਸਙ੍ਘਟ੍ਟਨੇਨ ਸਦ੍ਦਨਿਚ੍ਛਰਣਤ੍ਥਾਯ ਕਤਵਲਯਾਦਿਕਂ ਅਵੁਤ੍ਤਮ੍ਪਿ ਯਤੋ ਉਪਪਨ੍ਨਂ ਹੋਤਿ. ਏਤ੍ਥ ਚ ਦਲ਼੍ਹੀਕਮ੍ਮਾਦੀਤਿ ਆਦਿ-ਸਦ੍ਦੇਨ ਪਰਿਸ੍ਸਯਵਿਨੋਦਨਾਦਿਂ ਸਙ੍ਗਣ੍ਹਾਤਿ, ਤੇਨ ਕਤ੍ਤਰਯਟ੍ਠਿਕੋਟਿਯਂ ਕਤਵਲਯਾਨਂ ਅਞ੍ਞਮਞ੍ਞਸਙ੍ਘਟ੍ਟਨੇਨ ਸਦ੍ਦਨਿਚ੍ਛਰਣਂ ਦੀਘਜਾਤਿਕਾਦਿਪਰਿਸ੍ਸਯਵਿਨੋਦਨਤ੍ਥਂ ਹੋਤਿ, ਤਸ੍ਮਾ ਵਟ੍ਟਤੀਤਿ ਦੀਪੇਤਿ. ਤੇਨਾਹ ਆਚਰਿਯਵਰੋ –
‘‘ਮਣਿਕਂ ਪਿਲ਼ਕਂ ਵਾਪਿ, ਪਿਪ੍ਫਲੇ ਆਰਕਣ੍ਟਕੇ;
ਠਪੇਤੁਂ ਪਨ ਯਂ ਕਿਞ੍ਚਿ, ਨ ਚ ਵਟ੍ਟਤਿ ਭਿਕ੍ਖੁਨੋ.
‘‘ਦਣ੍ਡਕੇਪਿ ਪਰਿਚ੍ਛੇਦ-ਲੇਖਾਮਤ੍ਤਂ ਤੁ ਵਟ੍ਟਤਿ;
ਵਲਿਤ੍ਵਾ ਚ ਨਖਚ੍ਛੇਦਂ, ਕਰੋਨ੍ਤੀਤਿ ਹਿ ਵਟ੍ਟਤੀ’’ਤਿ.
ਤਸ੍ਸ ਵਣ੍ਣਨਾਯਮ੍ਪਿ ਮਣਿਕਨ੍ਤਿ ਥੂਲਬੁਬ੍ਬੁਲ਼ਂ. ਪੀਲ਼ਕਨ੍ਤਿ ਸੁਖੁਮਬੁਬ੍ਬੁਲ਼ਂ. ਪਿਪ੍ਫਲੇਤਿ ਵਤ੍ਥਚ੍ਛੇਦਨਸਤ੍ਥੇ. ਆਰਕਣ੍ਟਕੇਤਿ ਪਤ੍ਤਧਾਰਵਲਯਾਨਂ ਵਿਜ੍ਝਨਕਣ੍ਟਕੇ. ਠਪੇਤੁਨ੍ਤਿ ਉਟ੍ਠਾਪੇਤੁਂ. ਯਂ ਕਿਞ੍ਚੀਤਿ ਸੇਸਵਣ੍ਣਮਟ੍ਠਮ੍ਪਿ ਚ. ਦਣ੍ਡਕੇਤਿ ਪਿਪ੍ਫਲਿਦਣ੍ਡਕੇ. ਯਥਾਹ ‘‘ਪਿਪ੍ਫਲਿਕੇਪਿ ਮਣਿਕਂ ਵਾ ਪਿਲ਼ਕਂ ਵਾ ਯਂ ਕਿਞ੍ਚਿ ਠਪੇਤੁਂ ਨ ਵਟ੍ਟਤਿ, ਦਣ੍ਡਕੇ ਪਨ ਪਰਿਚ੍ਛੇਦਲੇਖਾ ਵਟ੍ਟਤੀ’’ਤਿ. ਪਰਿਚ੍ਛੇਦਲੇਖਾਮਤ੍ਤਨ੍ਤਿ ਆਣਿਬਨ੍ਧਨਟ੍ਠਾਨਂ ਪਤ੍ਵਾ ਪਰਿਚ੍ਛਿਨ੍ਦਨਤ੍ਥਂ ਏਕਾਵ ਲੇਖਾ ਵਟ੍ਟਤੀਤਿ. ਵਲਿਤ੍ਵਾਤਿ ਉਭਯਕੋਟਿਮੁਖਂ ਕਤ੍ਵਾ ਮਜ੍ਝੇ ਵਲਿਯੋ ਗਾਹੇਤ੍ਵਾ ਨਖਚ੍ਛੇਦਂ ਯਸ੍ਮਾ ਕਰੋਨ੍ਤਿ, ਤਸ੍ਮਾ ਵਟ੍ਟਤੀਤਿ ਯੋਜਨਾਤਿ ਆਗਤਾ.
ਉਤ੍ਤਰਾਰਣਿਯਂ ਮਣ੍ਡਲਨ੍ਤਿ ਉਤ੍ਤਰਾਰਣਿਯਾ ਪਵੇਸਨਤ੍ਥਂ ਆਵਾਟਮਣ੍ਡਲਂ ਹੋਤਿ. ਦਨ੍ਤਕਟ੍ਠਚ੍ਛੇਦਨਵਾਸਿਯਂ ਉਜੁਕਮੇਵ ਬਨ੍ਧਿਤੁਨ੍ਤਿ ਸਮ੍ਬਨ੍ਧੋ. ਏਤ੍ਥ ਚ ਉਜੁਕਮੇਵਾਤਿ ਇਮਿਨਾ ਵਙ੍ਕਂ ਕਤ੍ਵਾ ਬਨ੍ਧਿਤੁਂ ਨ ਵਟ੍ਟਤੀਤਿ ਦਸ੍ਸੇਤਿ, ਤੇਨੇਵ ਅਞ੍ਜਨਿਯਮ੍ਪਿ ਤਥਾ ਦਸ੍ਸਿਤਂ. ਉਭੋਸੁ ਪਸ੍ਸੇਸੁ ਏਕਪਸ੍ਸੇ ਵਾਤਿ ਵਚਨਸੇਸੋ, ਵਾਸਿਦਣ੍ਡਸ੍ਸ ਉਭੋਸੁ ਪਸ੍ਸੇਸੁ ਦਣ੍ਡਕੋਟੀਨਂ ਅਚਲਨਤ੍ਥਂ ਬਨ੍ਧਿਤੁਨ੍ਤਿ ਅਤ੍ਥੋ. ਕਪ੍ਪਿਯਲੋਹੇਨ ਚਤੁਰਸ੍ਸਂ ਵਾ ਅਟ੍ਠਂਸਂ ਵਾ ਕਾਤੁਂ ਵਟ੍ਟਤੀਤਿ ਯੋਜਨਾ.
੧੩. ਆਮਣ੍ਡਸਾਰਕੇਤਿ ਆਮਲਕਫਲਾਨਿ ਪਿਸਿਤ੍ਵਾ ਤੇਨ ਕਕ੍ਕੇਨ ਕਤਤੇਲਭਾਜਨੇ. ਤਤ੍ਥ ਕਿਰ ਪਕ੍ਖਿਤ੍ਤਂ ਤੇਲਂ ਸੀਤਂ ਹੋਤਿ. ਤਥਾ ਹਿ ਵੁਤ੍ਤਂ ਆਚਰਿਯੇਨ –
‘‘ਉਤ੍ਤਰਾਰਣਿਯਂ ਵਾਪਿ, ਧਨੁਕੇ ਪੇਲ੍ਲਦਣ੍ਡਕੇ;
ਮਾਲਾਕਮ੍ਮਾਦਿ ਯਂ ਕਿਞ੍ਚਿ, ਵਣ੍ਣਮਟ੍ਠਂ ਨ ਵਟ੍ਟਤਿ.
‘‘ਸਣ੍ਡਾਸੇ ਦਨ੍ਤਕਟ੍ਠਾਨਂ, ਤਥਾ ਛੇਦਨਵਾਸਿਯਾ;
ਦ੍ਵੀਸੁ ਪਸ੍ਸੇਸੁ ਲੋਹੇਨ, ਬਨ੍ਧਿਤੁਂ ਪਨ ਵਟ੍ਟਤਿ.
‘‘ਤਥਾ ਕਤ੍ਤਰਦਣ੍ਡੇਪਿ, ਚਿਤ੍ਤਕਮ੍ਮਂ ਨ ਵਟ੍ਟਤਿ;
ਵਟ੍ਟਲੇਖਾਵ ਵਟ੍ਟਨ੍ਤਿ, ਏਕਾ ਵਾ ਦ੍ਵੇਪਿ ਹੇਟ੍ਠਤੋ.
‘‘ਵਿਸਾਣੇ ਨਾਲ਼ਿਯਂ ਵਾਪਿ, ਤਥੇਵਾਮਣ੍ਡਸਾਰਕੇ;
ਤੇਲਭਾਜਨਕੇ ਸਬ੍ਬਂ, ਵਣ੍ਣਮਟ੍ਠਂ ਤੁ ਵਟ੍ਟਤੀ’’ਤਿ.
ਟੀਕਾਯਮ੍ਪਿ ਅਰਣਿਸਹਿਤੇ ਭਨ੍ਤਕਿਚ੍ਚਕਰੋ ਦਣ੍ਡੋ ਉਤ੍ਤਰਾਰਣੀ ਨਾਮ. ਵਾਪੀਤਿ ਪਿ-ਸਦ੍ਦੇਨ ਅਧਰਾਰਣਿਂ ਸਙ੍ਗਣ੍ਹਾਤਿ. ਉਦੁਕ੍ਖਲਦਣ੍ਡਸ੍ਸੇਤਂ ਅਧਿਵਚਨਂ. ਅਞ੍ਛਨਕਯਨ੍ਤਧਨੁ ਧਨੁਕਂ ਨਾਮ. ਮੁਸਲਮਤ੍ਥਕਪੀਲ਼ਨਦਣ੍ਡਕੋ ਪੇਲ੍ਲਦਣ੍ਡਕੋ ਨਾਮ. ਸਣ੍ਡਾਸੇਤਿ ਅਗ੍ਗਿਸਣ੍ਡਾਸੇ. ਦਨ੍ਤਕਟ੍ਠਾਨਂ ਛੇਦਨਵਾਸਿਯਾ ਤਥਾ ਯਂ ਕਿਞ੍ਚਿ ਵਣ੍ਣਮਟ੍ਠਂ ਨ ਵਟ੍ਟਤੀਤਿ ਸਮ੍ਬਨ੍ਧੋ. ਦ੍ਵੀਸੁ ਪਸ੍ਸੇਸੂਤਿ ਵਾਸਿਯਾ ਉਭੋਸੁ ਪਸ੍ਸੇਸੁ. ਲੋਹੇਨਾਤਿ ਕਪ੍ਪਿਯਲੋਹੇਨ. ਬਨ੍ਧਿਤੁਂ ਵਟ੍ਟਤੀਤਿ ਉਜੁਕਮੇਵ ਵਾ ਚਤੁਰਸ੍ਸਂ ਵਾ ਅਟ੍ਠਂਸਂ ਵਾ ਬਨ੍ਧਿਤੁਂ ਵਟ੍ਟਤਿ. ਸਣ੍ਡਾਸੇਤਿ ਅਗ੍ਗਿਸਣ੍ਡਾਸੇਤਿ ਨਿਸ੍ਸਨ੍ਦੇਹੇ ਵੁਤ੍ਤਂ. ਅਟ੍ਠਕਥਾਯਂ ਪਨੇਤ੍ਥ ਸੂਚਿਸਣ੍ਡਾਸੋ ਦਸ੍ਸਿਤੋ. ਹੇਟ੍ਠਾਤਿ ਹੇਟ੍ਠਾ ਅਯੋਪਟ੍ਟਵਲਯੇ. ‘‘ਉਪਰਿ ਅਹਿਚ੍ਛਤ੍ਤਕਮਕੁਲ਼ਮਤ੍ਤ’’ਨ੍ਤਿ ਅਟ੍ਠਕਥਾਯਂ ਵੁਤ੍ਤਂ. ਵਿਸਾਣੇਤਿ ਤੇਲਾਸਿਞ੍ਚਨਕਗਵਯਮਹਿਂਸਾਦਿਸਿਙ੍ਗੇ. ਨਾਲ਼ਿਯਂ ਵਾਪੀਤਿ ਵੇਲ਼ੁਨਾਲ਼ਿਕਾਦਿਨਾਲ਼ਿਯਂ. ਅਪਿ-ਸਦ੍ਦੇਨ ਅਲਾਬੁਂ ਸਙ੍ਗਣ੍ਹਾਤਿ. ਆਮਣ੍ਡਸਾਰਕੇਤਿ ਆਮਲਕਚੁਣ੍ਣਮਯਤੇਲਘਟੇ. ਤੇਲਭਾਜਨਕੇਤਿ ਵੁਤ੍ਤਪ੍ਪਕਾਰੇਯੇਵ ਤੇਲਭਾਜਨੇ. ਸਬ੍ਬਂ ਵਣ੍ਣਮਟ੍ਠਂ ਵਟ੍ਟਤੀਤਿ ਪੁਮਿਤ੍ਥਿਰੂਪਰਹਿਤਂ ਮਾਲਾਕਮ੍ਮਾਦਿ ਸਬ੍ਬਂ ਵਣ੍ਣਮਟ੍ਠਂ ਵਟ੍ਟਤੀਤਿ ਆਗਤਂ.
ਭੂਮਤ੍ਥਰਣੇਤਿ ਕਟਸਾਰਾਦਿਮਯੇ ਪਰਿਕਮ੍ਮਕਤਾਯ ਭੂਮਿਯਾ ਅਤ੍ਥਰਿਤਬ੍ਬਅਤ੍ਥਰਣੇ. ਪਾਨੀਯਘਟੇਤਿ ਇਮਿਨਾ ਸਬ੍ਬਭਾਜਨੇ ਸਙ੍ਗਣ੍ਹਾਤਿ. ਸਬ੍ਬਂ…ਪੇ… ਵਟ੍ਟਤੀਤਿ ਯਥਾਵੁਤ੍ਤੇਸੁ ਮਞ੍ਚਾਦੀਸੁ ਇਤ੍ਥਿਪੁਰਿਸਰੂਪਮ੍ਪਿ ਵਟ੍ਟਤਿ. ਤੇਲਭਾਜਨੇਸੁਯੇਵ ਇਤ੍ਥਿਪੁਰਿਸਰੂਪਾਨਂ ਪਟਿਕ੍ਖਿਪਿਤਤ੍ਤਾ ਤੇਲਭਾਜਨੇਨ ਸਹ ਅਗਣੇਤ੍ਵਾ ਵਿਸੁਂ ਮਞ੍ਚਾਦੀਨਂ ਗਹਿਤਤ੍ਤਾ ਚਾਤਿ ਵਦਨ੍ਤਿ. ਕਿਞ੍ਚਾਪਿ ਵਦਨ੍ਤਿ, ਏਤੇਸਂ ਪਨ ਮਞ੍ਚਾਦੀਨਂ ਹਤ੍ਥੇਨ ਆਮਸਿਤਬ੍ਬਭਣ੍ਡਤ੍ਤਾ ਇਤ੍ਥਿਰੂਪਮੇਤ੍ਥ ਨ ਵਟ੍ਟਤੀਤਿ ਗਹੇਤਬ੍ਬਂ. ਵਜਿਰਬੁਦ੍ਧਿਟੀਕਾਯਂ (ਵਜਿਰ. ਟੀ. ਪਾਰਾਜਿਕ ੮੫) ਪਨ ‘‘ਤਾਲਵਣ੍ਟਬੀਜਨਿਆਦੀਸੁ ਵਣ੍ਣਮਟ੍ਠਕਮ੍ਮਂ ਵਟ੍ਟਤੀ’’ਤਿ ਵੁਤ੍ਤਂ. ਕਿਞ੍ਚਾਪਿ ਤਾਨਿ ਕੁਞ੍ਚਿਕਾ ਵਿਯ ਪਰਿਹਰਣੀਯਾਨਿ, ਅਥ ਖੋ ਉਚ੍ਚਾਵਚਾਨਿ ਨ ਧਾਰੇਤਬ੍ਬਾਨੀਤਿ ਪਟਿਕ੍ਖੇਪਾਭਾਵਤੋ ਵੁਤ੍ਤਂ. ਕੇਵਲਞ੍ਹਿ ਤਾਨਿ ‘‘ਅਨੁਜਾਨਾਮਿ ਭਿਕ੍ਖਵੇ ਵਿਧੂਪਨਞ੍ਚ ਤਾਲਵਣ੍ਟਞ੍ਚਾ’’ਤਿਆਦਿਨਾ ਵੁਤ੍ਤਾਨਿ. ਗਣ੍ਠਿਪਦੇ ਪਨ ‘‘ਤੇਲਭਾਜਨੇਸੁ ਵਣ੍ਣਮਟ੍ਠਕਮ੍ਮਂ ਵਟ੍ਟਤਿ, ਸੇਨਾਸਨਪਰਿਕ੍ਖਾਰਤ੍ਤਾ ਵੁਤ੍ਤ’’ਨ੍ਤਿ ਵੁਤ੍ਤਂ. ਆਚਰਿਯਬੁਦ੍ਧਦਤ੍ਤਤ੍ਥੇਰੇਨਪਿ ਵੁਤ੍ਤਮੇਵ –
‘‘ਪਾਨੀਯਸ੍ਸ ਉਲ਼ੁਙ੍ਕੇਪਿ, ਦੋਣਿਯਂ ਰਜਨਸ੍ਸਪਿ;
ਘਟੇ ਫਲਕਪੀਠੇਪਿ, ਵਲਯਾਧਾਰਕਾਦਿਕੇ.
‘‘ਤਥਾ ਪਤ੍ਤਪਿਧਾਨੇ ਚ, ਤਾਲਵਣ੍ਟੇ ਚ ਬੀਜਨੇ;
ਪਾਦਪੁਞ੍ਛਨਿਯਂ ਵਾਪਿ, ਸਮ੍ਮੁਞ੍ਜਨਿਯਮੇਵ ਚ.
‘‘ਮਞ੍ਚੇ ਭੂਮਤ੍ਥਰੇ ਪੀਠੇ, ਭਿਸਿਬਿਮ੍ਬੋਹਨੇਸੁ ਚ;
ਮਾਲਾਕਮ੍ਮਾਦਿਕਂ ਚਿਤ੍ਤਂ, ਸਬ੍ਬਮੇਵ ਚ ਵਟ੍ਟਤੀ’’ਤਿ.
੧੪. ਏਵਂ ਸਮਣਪਰਿਕ੍ਖਾਰੇਸੁ ਕਪ੍ਪਿਯਾਕਪ੍ਪਿਯਂ ਕਥੇਤ੍ਵਾ ਇਦਾਨਿ ਸੇਨਾਸਨੇ ਕਥੇਤੁਂ ‘‘ਸੇਨਾਸਨੇ ਪਨਾ’’ਤ੍ਯਾਦਿਮਾਹ. ਏਤ੍ਥ ਪਨ-ਸਦ੍ਦੋ ਵਿਸੇਸਜੋਤਕੋ. ਤੇਨ ਸਬ੍ਬਰਤਨਮਯਮ੍ਪਿ ਵਣ੍ਣਮਟ੍ਠਕਮ੍ਮਂ ਵਟ੍ਟਤਿ, ਕਿਮਙ੍ਗਂ ਪਨ ਅਞ੍ਞਵਣ੍ਣਮਟ੍ਠਕਮ੍ਮਨ੍ਤਿ ਅਤ੍ਥਂ ਜੋਤੇਤਿ. ਯਦਿ ਏਵਂ ਕਿਸ੍ਮਿਞ੍ਚਿ ਪਟਿਸੇਧੇਤਬ੍ਬੇ ਸਨ੍ਤੇਪਿ ਤਥਾ ਵਤ੍ਤਬ੍ਬਂ ਸਿਯਾਤਿ ਆਹ ‘‘ਸੇਨਾਸਨੇ ਕਿਞ੍ਚਿ ਪਟਿਸੇਧੇਤਬ੍ਬਂ ਨਤ੍ਥੀ’’ਤਿ. ਵੁਤ੍ਤਮ੍ਪਿ ਚੇਤਂ ਆਚਰਿਯਬੁਦ੍ਧਦਤ੍ਤਤ੍ਥੇਰੇਨ –
‘‘ਨਾਨਾਮਣਿਮਯਤ੍ਥਮ੍ਭ-ਕਵਾਟਦ੍ਵਾਰਭਿਤ੍ਤਿਕਂ;
ਸੇਨਾਸਨਮਨੁਞ੍ਞਾਤਂ, ਕਾ ਕਥਾ ਵਣ੍ਣਮਟ੍ਠਕੇ.
‘‘ਸੋਵਣ੍ਣਿਯਂ ਦ੍ਵਾਰਕਵਾਟਬਦ੍ਧਂ;
ਸੁਵਣ੍ਣਨਾਨਾਮਣਿਭਿਤ੍ਤਿਭੂਮਿਂ;
ਨ ਕਿਞ੍ਚਿ ਏਕਮ੍ਪਿ ਨਿਸੇਧਨੀਯਂ;
ਸੇਨਾਸਨਂ ਵਟ੍ਟਤਿ ਸਬ੍ਬਮੇਵਾ’’ਤਿ.