੧੩. ਦਾਨਲਕ੍ਖਣਾਦਿਵਿਨਿਚ੍ਛਯਕਥਾ

੬੯. ਏਵਂ ਰੂਪਿਯਾਦਿਪਟਿਗ੍ਗਹਣਵਿਨਿਚ੍ਛਯਂ ਕਥੇਤ੍ਵਾ ਇਦਾਨਿ ਦਾਨਵਿਸ੍ਸਾਸਗ੍ਗਾਹਲਾਭਪਰਿਣਾਮਨਵਿਨਿਚ੍ਛਯਂ ਕਥੇਤੁਂ ‘‘ਦਾਨਵਿਸ੍ਸਾਸਗ੍ਗਾਹੇਹੀ’’ਤਿਆਦਿਮਾਹ. ਤਤ੍ਥ ਦੀਯਤੇ ਦਾਨਂ, ਚੀਵਰਾਦਿਵਤ੍ਥੁਂ ਆਰਮ੍ਮਣਂ ਕਤ੍ਵਾ ਪਵਤ੍ਤੋ ਅਲੋਭਪ੍ਪਧਾਨੋ ਕਾਮਾਵਚਰਕੁਸਲਕਿਰਿਯਚਿਤ੍ਤੁਪ੍ਪਾਦੋ. ਸਸਨਂ ਸਾਸੋ, ਸਸੁ ਹਿਂਸਾਯਨ੍ਤਿ ਧਾਤੁ, ਹਿਂਸਨਨ੍ਤਿ ਅਤ੍ਥੋ, ਵਿਗਤੋ ਸਾਸੋ ਏਤਸ੍ਮਾ ਗਾਹਾਤਿ ਵਿਸ੍ਸਾਸੋ. ਗਹਣਂ ਗਾਹੋ, ਵਿਸ੍ਸਾਸੇਨ ਗਾਹੋ ਵਿਸ੍ਸਾਸਗ੍ਗਾਹੋ. ਵਿਸੇਸਨੇ ਚੇਤ੍ਥ ਕਰਣਵਚਨਂ, ਵਿਸ੍ਸਾਸਵਸੇਨ ਗਾਹੋ, ਨ ਥੇਯ੍ਯਚਿਤ੍ਤਵਸੇਨਾਤਿ ਅਤ੍ਥੋ. ਲਚ੍ਛਤੇਤਿ ਲਾਭੋ, ਚੀਵਰਾਦਿਵਤ੍ਥੁ, ਤਸ੍ਸ ਲਾਭਸ੍ਸ. ਪਰਿਣਮਿਯਤੇ ਪਰਿਣਾਮਨਂ, ਅਞ੍ਞੇਸਂ ਅਤ੍ਥਾਯ ਪਰਿਣਤਸ੍ਸ ਅਤ੍ਤਨੋ, ਅਞ੍ਞਸ੍ਸ ਵਾ ਪਰਿਣਾਮਨਂ, ਦਾਪਨਨ੍ਤਿ ਅਤ੍ਥੋ. ਦਾਨਵਿਸ੍ਸਾਸਗ੍ਗਾਹੇਹਿ ਲਾਭਸ੍ਸ ਪਰਿਣਾਮਨਨ੍ਤਿ ਏਤ੍ਥ ਉਦ੍ਦੇਸੇ ਸਮਭਿਨਿਵਿਟ੍ਠਸ੍ਸ ‘‘ਦਾਨ’’ਨ੍ਤਿ ਪਦਸ੍ਸ ਅਤ੍ਥਵਿਨਿਚ੍ਛਯੋ ਤਾਵ ਪਠਮਂ ਏਵਂ ਵੇਦਿਤਬ੍ਬੋਤਿ ਯੋਜਨਾ. ਅਤ੍ਤਨੋ ਸਨ੍ਤਕਸ੍ਸ ਚੀਵਰਾਦਿਪਰਿਕ੍ਖਾਰਸ੍ਸ ਦਾਨਨ੍ਤਿ ਸਮ੍ਬਨ੍ਧੋ. ਯਸ੍ਸ ਕਸ੍ਸਚੀਤਿ ਸਮ੍ਪਦਾਨਨਿਦ੍ਦੇਸੋ, ਯਸ੍ਸ ਕਸ੍ਸਚਿ ਪਟਿਗ੍ਗਾਹਕਸ੍ਸਾਤਿ ਅਤ੍ਥੋ.

ਯਦਿਦਂ ‘‘ਦਾਨ’’ਨ੍ਤਿ ਵੁਤ੍ਤਂ, ਤਤ੍ਥ ਕਿਂ ਲਕ੍ਖਣਨ੍ਤਿ ਆਹ ‘‘ਤਤ੍ਰਿਦਂ ਦਾਨਲਕ੍ਖਣ’’ਨ੍ਤਿ. ‘‘ਇਦਂ ਤੁਯ੍ਹਂ ਦੇਮੀ’’ਤਿ ਵਦਤੀਤਿ ਇਦਂ ਤਿਵਙ੍ਗਸਮ੍ਪਨ੍ਨਂ ਦਾਨਲਕ੍ਖਣਂ ਹੋਤੀਤਿ ਯੋਜਨਾ. ਤਤ੍ਥ ਇਦਨ੍ਤਿ ਦੇਯ੍ਯਧਮ੍ਮਨਿਦਸ੍ਸਨਂ. ਤੁਯ੍ਹਨ੍ਤਿ ਪਟਿਗ੍ਗਾਹਕਨਿਦਸ੍ਸਨਂ. ਦੇਮੀਤਿ ਦਾਯਕਨਿਦਸ੍ਸਨਂ. ਦਦਾਮੀਤਿਆਦੀਨਿ ਪਨ ਪਰਿਯਾਯਵਚਨਾਨਿ. ਵੁਤ੍ਤਞ੍ਹਿ ‘‘ਦੇਯ੍ਯਦਾਯਕਪਟਿਗ੍ਗਾਹਕਾ ਵਿਯ ਦਾਨਸ੍ਸਾ’’ਤਿ, ‘‘ਤਿਣ੍ਣਂ ਸਮ੍ਮੁਖੀਭਾਵਾ ਕੁਸਲਂ ਹੋਤੀ’’ਤਿ ਚ. ‘‘ਵਤ੍ਥੁਪਰਿਚ੍ਚਾਗਲਕ੍ਖਣਤ੍ਤਾ ਦਾਨਸ੍ਸਾ’’ਤਿ ਇਦਂ ਪਨ ਏਕਦੇਸਲਕ੍ਖਣਕਥਨਮੇਵ, ਕਿਂ ਏਵਂ ਦੀਯਮਾਨਂ ਸਮ੍ਮੁਖਾਯੇਵ ਦਿਨ੍ਨਂ ਹੋਤਿ, ਉਦਾਹੁ ਪਰਮ੍ਮੁਖਾਪੀਤਿ ਆਹ ‘‘ਸਮ੍ਮੁਖਾਪਿ ਪਰਮ੍ਮੁਖਾਪਿ ਦਿਨ੍ਨਂਯੇਵ ਹੋਤੀ’’ਤਿ. ਤੁਯ੍ਹਂ ਗਣ੍ਹਾਹੀਤਿਆਦੀਸੁ ਅਯਮਤ੍ਥੋ – ‘‘ਗਣ੍ਹਾਹੀ’’ਤਿ ਵੁਤ੍ਤੇ ‘‘ਦੇਮੀ’’ਤਿ ਵੁਤ੍ਤਸਦਿਸਂ ਹੋਤਿ, ਤਸ੍ਮਾ ਮੁਖ੍ਯਤੋ ਦਿਨ੍ਨਤ੍ਤਾ ਸੁਦਿਨ੍ਨਂ ਹੋਤਿ, ‘‘ਗਣ੍ਹਾਮੀ’’ਤਿ ਚ ਵੁਤ੍ਤੇ ਮੁਖ੍ਯਤੋ ਗਹਣਂ ਹੋਤਿ, ਤਸ੍ਮਾ ਸੁਗ੍ਗਹਿਤਂ ਹੋਤਿ. ‘‘ਤੁਯ੍ਹਂ ਮਯ੍ਹ’’ਨ੍ਤਿ ਇਮਾਨਿ ਪਨ ਪਟਿਗ੍ਗਾਹਕਪਟਿਬਨ੍ਧਤਾਕਰਣੇ ਵਚਨਾਨਿ. ਤਵ ਸਨ੍ਤਕਂ ਕਰੋਹੀਤਿਆਦੀਨਿ ਪਨ ਪਰਿਯਾਯਤੋ ਦਾਨਗ੍ਗਹਣਾਨਿ, ਤਸ੍ਮਾ ਦੁਦਿਨ੍ਨਂ ਦੁਗ੍ਗਹਿਤਞ੍ਚ ਹੋਤਿ. ਲੋਕੇ ਹਿ ਅਪਰਿਚ੍ਚਜਿਤੁਕਾਮਾਪਿ ਪੁਨ ਗਣ੍ਹਿਤੁਕਾਮਾਪਿ ‘‘ਤਵ ਸਨ੍ਤਕਂ ਹੋਤੂ’’ਤਿ ਨਿਯ੍ਯਾਤੇਨ੍ਤਿ ਯਥਾ ਤਂ ਕੁਸਰਞ੍ਞੋ ਮਾਤੁ ਰਜ੍ਜਨਿਯ੍ਯਾਤਨਂ. ਤੇਨਾਹ ‘‘ਨੇਵ ਦਾਤਾ ਦਾਤੁਂ ਜਾਨਾਤਿ, ਨ ਇਤਰੋ ਗਹੇਤੁ’’ਨ੍ਤਿ. ਸਚੇ ਪਨਾਤਿਆਦੀਸੁ ਪਨ ਦਾਯਕੇਨ ਪਞ੍ਞਤ੍ਤਿਯਂ ਅਕੋਵਿਦਤਾਯ ਪਰਿਯਾਯਵਚਨੇ ਵੁਤ੍ਤੇਪਿ ਪਟਿਗ੍ਗਾਹਕੋ ਅਤ੍ਤਨੋ ਪਞ੍ਞਤ੍ਤਿਯਂ ਕੋਵਿਦਤਾਯ ਮੁਖ੍ਯਵਚਨੇਨ ਗਣ੍ਹਾਤਿ, ਤਸ੍ਮਾ ‘‘ਸੁਗ੍ਗਹਿਤ’’ਨ੍ਤਿ ਵੁਤ੍ਤਂ.

ਸਚੇ ਪਨ ਏਕੋਤਿਆਦੀਸੁ ਪਨ ਦਾਯਕੋ ਮੁਖ੍ਯਵਚਨੇਨ ਦੇਤਿ, ਪਟਿਗ੍ਗਾਹਕੋਪਿ ਮੁਖ੍ਯਵਚਨੇਨ ਪਟਿਕ੍ਖਿਪਤਿ, ਤਸ੍ਮਾ ਦਾਯਕਸ੍ਸ ਪੁਬ੍ਬੇ ਅਧਿਟ੍ਠਿਤਮ੍ਪਿ ਚੀਵਰਂ ਦਾਨਵਸੇਨ ਅਧਿਟ੍ਠਾਨਂ ਵਿਜਹਤਿ, ਪਰਿਚ੍ਚਤ੍ਤਤ੍ਤਾ ਅਤ੍ਤਨੋ ਅਸਨ੍ਤਕਤ੍ਤਾ ਅਤਿਰੇਕਚੀਵਰਮ੍ਪਿ ਨ ਹੋਤਿ, ਤਸ੍ਮਾ ਦਸਾਹਾਤਿਕ੍ਕਮੇਪਿ ਆਪਤ੍ਤਿ ਨ ਹੋਤਿ. ਪਟਿਗ੍ਗਾਹਕਸ੍ਸਪਿ ਨ ਪਟਿਕ੍ਖਿਪਿਤਤ੍ਤਾ ਅਤ੍ਤਨੋ ਸਨ੍ਤਕਂ ਨ ਹੋਤਿ, ਤਸ੍ਮਾ ਅਤਿਰੇਕਚੀਵਰਂ ਨ ਹੋਤੀਤਿ ਦਸਾਹਾਤਿਕ੍ਕਮੇਪਿ ਆਪਤ੍ਤਿ ਨਤ੍ਥਿ. ਯਸ੍ਸ ਪਨ ਰੁਚ੍ਚਤੀਤਿ ਏਤ੍ਥ ਪਨ ਇਮਸ੍ਸ ਚੀਵਰਸ੍ਸ ਅਸ੍ਸਾਮਿਕਤ੍ਤਾ ਪਂਸੁਕੂਲਟ੍ਠਾਨੇ ਠਿਤਤ੍ਤਾ ਯਸ੍ਸ ਰੁਚ੍ਚਤਿ, ਤੇਨ ਪਂਸੁਕੂਲਭਾਵੇਨ ਗਹੇਤ੍ਵਾ ਪਰਿਭੁਞ੍ਜਿਤਬ੍ਬਂ, ਪਰਿਭੁਞ੍ਜਨ੍ਤੇਨ ਪਨ ਦਾਯਕੇਨ ਪੁਬ੍ਬਅਧਿਟ੍ਠਿਤਮ੍ਪਿ ਦਾਨਵਸੇਨ ਅਧਿਟ੍ਠਾਨਸ੍ਸ ਵਿਜਹਿਤਤ੍ਤਾ ਪੁਨ ਅਧਿਟ੍ਠਹਿਤ੍ਵਾ ਪਰਿਭੁਞ੍ਜਿਤਬ੍ਬਂ ਇਤਰੇਨ ਪੁਬ੍ਬੇ ਅਨਧਿਟ੍ਠਿਤਤ੍ਤਾਤਿ ਦਟ੍ਠਬ੍ਬਂ.

ਇਤ੍ਥਨ੍ਨਾਮਸ੍ਸ ਦੇਹੀਤਿਆਦੀਸੁ ਪਨ ਆਣਤ੍ਯਤ੍ਥੇ ਪਵਤ੍ਤਾਯ ਪਞ੍ਚਮੀਵਿਭਤ੍ਤਿਯਾ ਵੁਤ੍ਤਤ੍ਤਾ ਆਣਤ੍ਤੇਨ ਪਟਿਗ੍ਗਾਹਕਸ੍ਸ ਦਿਨ੍ਨਕਾਲੇਯੇਵ ਪਟਿਗ੍ਗਾਹਕਸ੍ਸ ਸਨ੍ਤਕਂ ਹੋਤਿ, ਨ ਤਤੋ ਪੁਬ੍ਬੇ, ਪੁਬ੍ਬੇ ਪਨ ਆਣਾਪਕਸ੍ਸੇਵ, ਤਸ੍ਮਾ ‘‘ਯੋ ਪਹਿਣਤਿ, ਤਸ੍ਸੇਵ ਸਨ੍ਤਕ’’ਨ੍ਤਿ ਵੁਤ੍ਤਂ. ਇਤ੍ਥਨ੍ਨਾਮਸ੍ਸ ਦਮ੍ਮੀਤਿ ਪਨ ਪਚ੍ਚੁਪ੍ਪਨ੍ਨਤ੍ਥੇ ਪਵਤ੍ਤਾਯ ਵਤ੍ਤਮਾਨਵਿਭਤ੍ਤਿਯਾ ਵੁਤ੍ਤਤ੍ਤਾ ਤਤੋ ਪਟ੍ਠਾਯ ਪਟਿਗ੍ਗਾਹਕਸ੍ਸੇਵ ਸਨ੍ਤਕਂ ਹੋਤਿ, ਤਸ੍ਮਾ ‘‘ਯਸ੍ਸ ਪਹੀਯਤਿ, ਤਸ੍ਸ ਸਨ੍ਤਕ’’ਨ੍ਤਿ ਵੁਤ੍ਤਂ. ਤਸ੍ਮਾਤਿ ਇਮਿਨਾ ਆਯਸ੍ਮਤਾ ਰੇਵਤਤ੍ਥੇਰੇਨ ਆਯਸ੍ਮਤੋ ਸਾਰਿਪੁਤ੍ਤਸ੍ਸ ਚੀਵਰਪੇਸਨਵਤ੍ਥੁਸ੍ਮਿਂ ਭਗਵਤਾ ਦੇਸਿਤੇਸੁ ਅਧਿਟ੍ਠਾਨੇਸੁ ਇਧ ਵੁਤ੍ਤਲਕ੍ਖਣੇਨ ਅਸਮ੍ਮੋਹਤੋ ਜਾਨਿਤਬ੍ਬਨ੍ਤਿ ਦਸ੍ਸੇਤਿ.

ਤਤ੍ਥ ਦ੍ਵਾਧਿਟ੍ਠਿਤਂ, ਸ੍ਵਾਧਿਟ੍ਠਿਤਨ੍ਤਿ ਚ ਨ ਤਿਚੀਵਰਾਧਿਟ੍ਠਾਨਂ ਸਨ੍ਧਾਯ ਵੁਤ੍ਤਂ, ਅਥ ਖੋ ਸਾਮਿਕੇ ਜੀਵਨ੍ਤੇ ਵਿਸ੍ਸਾਸਗ੍ਗਾਹਚੀਵਰਭਾਵੇਨ ਚ ਸਾਮਿਕੇ ਮਤੇ ਮਤਕਚੀਵਰਭਾਵੇਨ ਚ ਗਹਣਂ ਸਨ੍ਧਾਯ ਵੁਤ੍ਤਂ, ਤਤੋ ਪਨ ਦਸਾਹੇ ਅਨਤਿਕ੍ਕਨ੍ਤੇਯੇਵ ਤਿਚੀਵਰਾਧਿਟ੍ਠਾਨਂ ਵਾ ਪਰਿਕ੍ਖਾਰਚੋਲ਼ਾਧਿਟ੍ਠਾਨਂ ਵਾ ਵਿਕਪ੍ਪਨਂ ਵਾ ਕਾਤਬ੍ਬਂ. ਯੋ ਪਹਿਣਤੀਤਿ ਦਾਯਕਂ ਸਨ੍ਧਾਯਾਹ, ਯਸ੍ਸ ਪਹੀਯਤੀਤਿ ਪਟਿਗ੍ਗਾਹਕਂ.

ਪਰਿਚ੍ਚਜਿਤ੍ਵਾ…ਪੇ… ਨ ਲਭਤਿ, ਆਹਰਾਪੇਨ੍ਤੋ ਭਣ੍ਡਗ੍ਘੇਨ ਕਾਰੇਤਬ੍ਬੋਤਿ ਅਤ੍ਥੋ. ਅਤ੍ਤਨਾ…ਪੇ… ਨਿਸ੍ਸਗ੍ਗਿਯਨ੍ਤਿ ਇਮਿਨਾ ਪਰਸਨ੍ਤਕਭੂਤਤ੍ਤਂ ਜਾਨਨ੍ਤੋ ਥੇਯ੍ਯਪਸਯ੍ਹਵਸੇਨ ਅਚ੍ਛਿਨ੍ਦਨ੍ਤੋ ਪਾਰਾਜਿਕੋ ਹੋਤੀਤਿ ਦਸ੍ਸੇਤਿ. ਪੋਰਾਣਟੀਕਾਯਂ ਪਨ ‘‘ਸਕਸਞ੍ਞਾਯ ਵਿਨਾ ਗਣ੍ਹਨ੍ਤੋ ਭਣ੍ਡਂ ਅਗ੍ਘਾਪੇਤ੍ਵਾ ਆਪਤ੍ਤਿਯਾ ਕਾਰੇਤਬ੍ਬੋ’’ਤਿ ਵੁਤ੍ਤਂ. ਸਕਸਞ੍ਞਾਯ ਵਿਨਾਪਿ ਤਾਵਕਾਲਿਕਪਂਸੁਕੂਲਸਞ੍ਞਾਦਿਵਸੇਨ ਗਣ੍ਹਨ੍ਤੋ ਆਪਤ੍ਤਿਯਾ ਨ ਕਾਰੇਤਬ੍ਬੋ. ਅਟ੍ਠਕਥਾਯਂ ਪਨ ਪਸਯ੍ਹਾਕਾਰਂ ਸਨ੍ਧਾਯ ਵਦਤਿ. ਤੇਨਾਹ ‘‘ਅਚ੍ਛਿਨ੍ਦਤੋ ਨਿਸ੍ਸਗ੍ਗਿਯ’’ਨ੍ਤਿ. ਸਚੇ ਪਨ…ਪੇ… ਵਟ੍ਟਤੀਤਿ ਤੁਟ੍ਠਦਾਨਂ ਆਹ, ਅਥ ਪਨਾਤਿਆਦਿਨਾ ਕੁਪਿਤਦਾਨਂ. ਉਭਯਥਾਪਿ ਸਯਂ ਦਿਨ੍ਨਤ੍ਤਾ ਵਟ੍ਟਤਿ, ਗਹਣੇ ਆਪਤ੍ਤਿ ਨਤ੍ਥੀਤਿ ਅਤ੍ਥੋ.

ਮਮ ਸਨ੍ਤਿਕੇ…ਪੇ… ਏਵਂ ਪਨ ਦਾਤੁਂ ਨ ਵਟ੍ਟਤੀਤਿ ਵਤ੍ਥੁਪਰਿਚ੍ਚਾਗਲਕ੍ਖਣਤ੍ਤਾ ਦਾਨਸ੍ਸ ਏਵਂ ਦਦਨ੍ਤੋ ਅਪਰਿਚ੍ਚਜਿਤ੍ਵਾ ਦਿਨ੍ਨਤ੍ਤਾ ਦਾਨਂ ਨ ਹੋਤੀਤਿ ਨ ਵਟ੍ਟਤਿ, ਤਤੋ ਏਵ ਦੁਕ੍ਕਟਂ ਹੋਤਿ. ਆਹਰਾਪੇਤੁਂ ਪਨ ਵਟ੍ਟਤੀਤਿ ਪੁਬ੍ਬੇ ‘‘ਅਕਰੋਨ੍ਤਸ੍ਸ ਨ ਦੇਮੀ’’ਤਿ ਵੁਤ੍ਤਤ੍ਤਾ ਯਥਾਵੁਤ੍ਤਉਪਜ੍ਝਾਯਗ੍ਗਹਣਾਦੀਨਿ ਅਕਰੋਨ੍ਤੇ ਆਚਰਿਯਸ੍ਸੇਵ ਸਨ੍ਤਕਂ ਹੋਤੀਤਿ ਕਤ੍ਵਾ ਵੁਤ੍ਤਂ. ਕਰੋਨ੍ਤੇ ਪਨ ਅਨ੍ਤੇਵਾਸਿਕਸ੍ਸ ਸਨ੍ਤਕਂ ਭਵੇਯ੍ਯ ਸਬ੍ਬਸੋ ਅਪਰਿਚ੍ਚਜਿਤ੍ਵਾ ਦਿਨ੍ਨਤ੍ਤਾ. ਸਕਸਞ੍ਞਾਯ ਵਿਜ੍ਜਮਾਨਤ੍ਤਾ ‘‘ਆਹਰਾਪੇਤੁਂ ਵਟ੍ਟਤੀ’’ਤਿ ਵੁਤ੍ਤਂ ਸਿਯਾ. ਟੀਕਾਯਂ (ਸਾਰਤ੍ਥ. ਟੀ. ੨.੬੩੫) ਪਨ ‘‘ਏਵਂ ਦਿਨ੍ਨਂ ਭਤਿਸਦਿਸਤ੍ਤਾ ਆਹਰਾਪੇਤੁਂ ਵਟ੍ਟਤੀ’’ਤਿ ਵੁਤ੍ਤਂ. ਭਤਿਸਦਿਸੇ ਸਤਿਪਿ ਕਮ੍ਮੇ ਕਤੇ ਭਤਿ ਲਦ੍ਧਬ੍ਬਾ ਹੋਤਿ, ਤਸ੍ਮਾ ਆਰੋਪੇਤੁਂ ਨ ਵਟ੍ਟੇਯ੍ਯ. ਵਿਮਤਿਵਿਨੋਦਨਿਯਂ (ਵਿ. ਵਿ. ਟੀ. ੧.੬੩੫) ਪਨ ‘‘ਆਹਰਾਪੇਤੁਂ ਵਟ੍ਟਤੀਤਿ ਕਮ੍ਮੇ ਅਕਤੇ ਭਤਿਸਦਿਸਤ੍ਤਾ ਵੁਤ੍ਤ’’ਨ੍ਤਿ ਵੁਤ੍ਤਂ, ਤੇਨ ਕਮ੍ਮੇ ਕਤੇ ਆਹਰਾਪੇਤੁਂ ਨ ਵਟ੍ਟਤੀਤਿ ਸਿਦ੍ਧਂ. ਉਪਜ੍ਝਂ ਗਣ੍ਹਿਸ੍ਸਤੀਤਿ ਸਾਮਣੇਰਸ੍ਸ ਦਾਨਂ ਦੀਪੇਤਿ, ਤੇਨ ਚ ਸਾਮਣੇਰਕਾਲੇ ਦਤ੍ਵਾ ਉਪਸਮ੍ਪਨ੍ਨਕਾਲੇ ਅਚ੍ਛਿਨ੍ਦਤੋਪਿ ਪਾਚਿਤ੍ਤਿਯਂ ਦੀਪੇਤਿ. ਅਯਂ ਤਾਵ ਦਾਨੇ ਵਿਨਿਚ੍ਛਯੋਤਿ ਇਮਿਨਾ ਦਾਨਵਿਨਿਚ੍ਛਯਾਦੀਨਂ ਤਿਣ੍ਣਂ ਵਿਨਿਚ੍ਛਯਾਨਂ ਏਕਪਰਿਚ੍ਛੇਦਕਤਭਾਵਂ ਦੀਪੇਤਿ.

ਵਿਸ੍ਸਾਸਗ੍ਗਾਹਲਕ੍ਖਣਵਿਨਿਚ੍ਛਯਕਥਾ

੭੦. ਅਨੁਟ੍ਠਾਨਸੇਯ੍ਯਾ ਨਾਮ ਯਾਯ ਸੇਯ੍ਯਾਯ ਸਯਿਤੋ ਯਾਵ ਜੀਵਿਤਿਨ੍ਦ੍ਰਿਯੁਪਚ੍ਛੇਦਂ ਨ ਪਾਪੁਣਾਤਿ, ਤਾਵ ਵੁਚ੍ਚਤਿ. ਦਦਮਾਨੇਨ ਚ ਮਤਕਧਨਂ ਤਾਵ ਯੇ ਤਸ੍ਸ ਧਨੇ ਇਸ੍ਸਰਾ ਗਹਟ੍ਠਾ ਵਾ ਪਬ੍ਬਜਿਤਾ ਵਾ, ਤੇਸਂ ਦਾਤਬ੍ਬਨ੍ਤਿ ਏਤ੍ਥ ਕੇ ਗਹਟ੍ਠਾ ਕੇ ਪਬ੍ਬਜਿਤਾ ਕੇਨ ਕਾਰਣੇਨ ਤਸ੍ਸ ਧਨੇ ਇਸ੍ਸਰਾਤਿ? ਗਹਟ੍ਠਾ ਤਾਵ ਗਿਲਾਨੁਪਟ੍ਠਾਕਭੂਤਾ ਤੇਨ ਕਾਰਣੇਨ ਗਿਲਾਨੁਪਟ੍ਠਾਕਭਾਗਭੂਤੇ ਤਸ੍ਸ ਧਨੇ ਇਸ੍ਸਰਾ, ਯੇਸਞ੍ਚ ਵਾਣਿਜਾਨਂ ਹਤ੍ਥਤੋ ਕਪ੍ਪਿਯਕਾਰਕੇਨ ਪਤ੍ਤਾਦਿਪਰਿਕ੍ਖਾਰੋ ਗਾਹਾਪਿਤੋ, ਤੇਸਂ ਯਂ ਦਾਤਬ੍ਬਮੂਲਂ, ਤੇ ਚ ਤਸ੍ਸ ਧਨੇ ਇਸ੍ਸਰਾ, ਯੇਸਞ੍ਚ ਮਾਤਾਪਿਤੂਨਂ ਅਤ੍ਥਾਯ ਪਰਿਚ੍ਛਿਨ੍ਦਿਤ੍ਵਾ ਵਤ੍ਥਾਨਿ ਠਪਿਤਾਨਿ, ਤੇਪਿ ਤਸ੍ਸ ਧਨਸ੍ਸ ਇਸ੍ਸਰਾ. ਏਵਮਾਦਿਨਾ ਯੇਨ ਯੇਨ ਕਾਰਣੇਨ ਯਂ ਯਂ ਪਰਿਕ੍ਖਾਰਧਨਂ ਯੇਹਿ ਯੇਹਿ ਗਹਟ੍ਠੇਹਿ ਲਭਿਤਬ੍ਬਂ ਹੋਤਿ, ਤੇਨ ਤੇਨ ਕਾਰਣੇਨ ਤੇ ਤੇ ਗਹਟ੍ਠਾ ਤਸ੍ਸ ਤਸ੍ਸ ਧਨਸ੍ਸ ਇਸ੍ਸਰਾ.

ਪਬ੍ਬਜਿਤਾ ਪਨ ਬਾਹਿਰਕਾ ਤਥੇਵ ਸਤਿ ਕਾਰਣੇ ਇਸ੍ਸਰਾ. ਪਞ੍ਚਸੁ ਪਨ ਸਹਧਮ੍ਮਿਕੇਸੁ ਭਿਕ੍ਖੂ ਸਾਮਣੇਰਾ ਚ ਮਤਾਨਂ ਭਿਕ੍ਖੁਸਾਮਣੇਰਾਨਂ ਧਨਂ ਵਿਨਾਪਿ ਕਾਰਣੇਨ ਦਾਯਾਦਭਾਵੇਨ ਲਭਨ੍ਤਿ, ਨ ਇਤਰਾ. ਭਿਕ੍ਖੁਨੀਸਿਕ੍ਖਮਾਨਸਾਮਣੇਰੀਨਮ੍ਪਿ ਧਨਂ ਤਾਯੇਵ ਲਭਨ੍ਤਿ, ਨ ਇਤਰੇ. ਤਂ ਪਨ ਮਤਕਧਨਭਾਜਨਂ ਚਤੁਪਚ੍ਚਯਭਾਜਨਵਿਨਿਚ੍ਛਯੇ ਆਵਿ ਭਵਿਸ੍ਸਤਿ, ਬਹੂ ਪਨ ਵਿਨਯਧਰਤ੍ਥੇਰਾ ‘‘ਯੇ ਤਸ੍ਸ ਧਨਸ੍ਸ ਇਸ੍ਸਰਾ ਗਹਟ੍ਠਾ ਵਾ ਪਬ੍ਬਜਿਤਾ ਵਾ’’ਤਿ ਪਾਠਂ ਨਿਸ੍ਸਾਯ ‘‘ਮਤਭਿਕ੍ਖੁਸ੍ਸ ਧਨਂ ਗਹਟ੍ਠਭੂਤਾ ਞਾਤਕਾ ਲਭਨ੍ਤੀ’’ਤਿ ਵਿਨਿਚ੍ਛਿਨਨ੍ਤਿ, ਤਮ੍ਪਿ ਵਿਨਿਚ੍ਛਯਂ ਤਸ੍ਸ ਚ ਯੁਤ੍ਤਾਯੁਤ੍ਤਭਾਵਂ ਤਤ੍ਥੇਵ ਵਕ੍ਖਾਮ.

ਅਨਤ੍ਤਮਨਸ੍ਸ ਸਨ੍ਤਕਨ੍ਤਿ ‘‘ਦੁਟ੍ਠੁ ਕਤਂ ਤਯਾ ਮਯਾ ਅਦਿਨ੍ਨਂ ਮਮ ਸਨ੍ਤਕਂ ਗਣ੍ਹਨ੍ਤੇਨਾ’’ਤਿ ਵਚੀਭੇਦੇਨ ਵਾ ਚਿਤ੍ਤੁਪ੍ਪਾਦਮਤ੍ਤੇਨ ਵਾ ਦੋਮਨਸ੍ਸਪ੍ਪਤ੍ਤਸ੍ਸ ਸਨ੍ਤਕਂ. ਯੋ ਪਨ ਪਠਮਂਯੇਵ ‘‘ਸੁਟ੍ਠੁ ਕਤਂ ਤਯਾ ਮਮ ਸਨ੍ਤਕਂ ਗਣ੍ਹਨ੍ਤੇਨਾ’’ਤਿ ਵਚੀਭੇਦੇਨ ਵਾ ਚਿਤ੍ਤੁਪ੍ਪਾਦਮਤ੍ਤੇਨ ਵਾ ਅਨੁਮੋਦਿਤ੍ਵਾ ਪਚ੍ਛਾ ਕੇਨਚਿ ਕਾਰਣੇਨ ਕੁਪਿਤੋ, ਪਚ੍ਚਾਹਰਾਪੇਤੁਂ ਨ ਲਭਤਿ. ਯੋਪਿ ਅਦਾਤੁਕਾਮੋ, ਚਿਤ੍ਤੇਨ ਪਨ ਅਧਿਵਾਸੇਤਿ, ਨ ਕਿਞ੍ਚਿ ਵਦਤੀਤਿ ਏਤ੍ਥ ਤੁ ਪੋਰਾਣਟੀਕਾਯਂ (ਸਾਰਤ੍ਥ. ਟੀ. ੨.੧੩੧) ‘‘ਚਿਤ੍ਤੇਨ ਪਨ ਅਧਿਵਾਸੇਤੀਤਿ ਵੁਤ੍ਤਮੇਵਤ੍ਥਂ ਵਿਭਾਵੇਤੁਂ ‘ਨ ਕਿਞ੍ਚਿ ਵਦਤੀ’ਤਿ ਵੁਤ੍ਤ’’ਨ੍ਤਿ ਵੁਤ੍ਤਂ. ਏਵਂ ਸਤਿ ‘‘ਚਿਤ੍ਤੇਨਾ’’ਤਿ ਇਦਂ ਅਧਿਵਾਸਨਕਿਰਿਯਾਯ ਕਰਣਂ ਹੋਤਿ. ਅਦਾਤੁਕਾਮੋਤਿ ਏਤ੍ਥਾਪਿ ਤਮੇਵ ਕਰਣਂ ਸਿਯਾ, ਤਤੋ ‘‘ਚਿਤ੍ਤੇਨ ਅਦਾਤੁਕਾਮੋ, ਚਿਤ੍ਤੇਨ ਅਧਿਵਾਸੇਤੀ’’ਤਿਵਚਨਂ ਓਚਿਤ੍ਯਸਮ੍ਪੋਸਕਂ ਨ ਭਵੇਯ੍ਯ. ਤਂ ਠਪੇਤ੍ਵਾ ‘‘ਅਦਾਤੁਕਾਮੋ’’ਤਿ ਏਤ੍ਥ ਕਾਯੇਨਾਤਿ ਵਾ ਵਾਚਾਯਾਤਿ ਵਾ ਅਞ੍ਞਂ ਕਰਣਮ੍ਪਿ ਨ ਸਮ੍ਭਵਤਿ, ਤਦਸਮ੍ਭਵੇ ਸਤਿ ਵਿਸੇਸਤ੍ਥਵਾਚਕੋ ਪਨ-ਸਦ੍ਦੋਪਿ ਨਿਰਤ੍ਥਕੋ. ਨ ਕਿਞ੍ਚਿ ਵਦਤੀਤਿ ਏਤ੍ਥ ਤੁ ਵਦਨਕਿਰਿਯਾਯ ਕਰਣਂ ‘‘ਵਾਚਾਯਾ’’ਤਿ ਪਦਂ ਇਚ੍ਛਿਤਬ੍ਬਂ, ਤਥਾ ਚ ਸਤਿ ਅਞ੍ਞਂ ਅਧਿਵਾਸਨਕਿਰਿਯਾਯ ਕਰਣਂ, ਅਞ੍ਞਂ ਵਦਨਕਿਰਿਯਾਯ ਕਰਣਂ, ਅਞ੍ਞਾ ਅਧਿਵਾਸਨਕਿਰਿਯਾ, ਅਞ੍ਞਾ ਵਦਨਕਿਰਿਯਾ, ਤਸ੍ਮਾ ‘‘ਵੁਤ੍ਤਮੇਵਤ੍ਥਂ ਵਿਭਾਵੇਤੁ’’ਨ੍ਤਿ ਵਤ੍ਤੁਂ ਨ ਅਰਹਤਿ, ਤਸ੍ਮਾ ਯੋਪਿ ਚਿਤ੍ਤੇਨ ਅਦਾਤੁਕਾਮੋ ਹੋਤਿ, ਪਨ ਤਥਾਪਿ ਵਾਚਾਯ ਅਧਿਵਾਸੇਤਿ, ਨ ਕਿਞ੍ਚਿ ਵਦਤੀਤਿ ਯੋਜਨਂ ਕਤ੍ਵਾ ਪਨ ‘‘ਅਧਿਵਾਸੇਤੀਤਿ ਵੁਤ੍ਤਮੇਵਤ੍ਥਂ ਪਕਾਸੇਤੁਂ ਨ ਕਿਞ੍ਚਿ ਵਦਤੀਤਿ ਵੁਤ੍ਤ’’ਨ੍ਤਿ ਵਤ੍ਤੁਮਰਹਤਿ. ਏਤ੍ਥ ਤੁ ਪਨ-ਸਦ੍ਦੋ ਅਰੁਚਿਲਕ੍ਖਣਸੂਚਨਤ੍ਥੋ. ‘‘ਚਿਤ੍ਤੇਨਾ’’ਤਿ ਇਦਂ ਅਦਾਤੁਕਾਮਕਿਰਿਯਾਯ ਕਰਣਂ, ‘‘ਵਾਚਾਯਾ’’ਤਿ ਅਧਿਵਾਸਨਕਿਰਿਯਾਯ ਅਵਦਨਕਿਰਿਯਾਯ ਚ ਕਰਣਂ. ਅਧਿਵਾਸਨਕਿਰਿਯਾ ਚ ਅਵਦਨਕਿਰਿਯਾਯੇਵ. ‘‘ਅਧਿਵਾਸੇਤੀ’’ਤਿ ਵੁਤ੍ਤੇ ਅਵਦਨਕਿਰਿਯਾਯ ਅਪਾਕਟਭਾਵਤੋ ਤਂ ਪਕਾਸੇਤੁਂ ‘‘ਨ ਕਿਞ੍ਚਿ ਵਦਤੀ’’ਤਿ ਵੁਤ੍ਤਂ, ਏਵਂ ਗਯ੍ਹਮਾਨੇ ਪੁਬ੍ਬਾਪਰਵਚਨਤ੍ਥੋ ਓਚਿਤ੍ਯਸਮ੍ਪੋਸਕੋ ਸਿਯਾ, ਤਸ੍ਮਾ ਏਤ੍ਤਕਵਿਵਰੇਹਿ ਵਿਚਾਰੇਤ੍ਵਾ ਗਹੇਤਬ੍ਬੋਤਿ.

ਲਾਭਪਰਿਣਾਮਨਵਿਨਿਚ੍ਛਯਕਥਾ

੭੧. ਲਾਭਪਰਿਣਾਮਨਵਿਨਿਚ੍ਛਯੇ ਤੁਮ੍ਹਾਕਂ ਸਪ੍ਪਿਆਦੀਨਿ ਆਭਤਾਨੀਤਿ ਤੁਮ੍ਹਾਕਂ ਅਤ੍ਥਾਯ ਆਭਤਾਨਿ ਸਪ੍ਪਿਆਦੀਨਿ. ਪਰਿਣਤਭਾਵਂ ਜਾਨਿਤ੍ਵਾਪਿ ਵੁਤ੍ਤਵਿਧਿਨਾ ਵਿਞ੍ਞਾਪੇਨ੍ਤੇਨ ਤੇਸਂ ਸਨ੍ਤਕਮੇਵ ਵਿਞ੍ਞਾਪਿਤਂ ਨਾਮ ਹੋਤੀਤਿ ਆਹ ‘‘ਮਯ੍ਹਮ੍ਪਿ ਦੇਥਾਤਿ ਵਦਤਿ, ਵਟ੍ਟਤੀ’’ਤਿ.

‘‘ਪੁਪ੍ਫਮ੍ਪਿ ਆਰੋਪੇਤੁਂ ਨ ਵਟ੍ਟਤੀਤਿ ਇਦਂ ਪਰਿਣਤਂ ਸਨ੍ਧਾਯ ਵੁਤ੍ਤਂ, ਸਚੇ ਪਨ ਏਕਸ੍ਮਿਂ ਚੇਤਿਯੇ ਪੂਜਿਤਂ ਪੁਪ੍ਫਂ ਗਹੇਤ੍ਵਾ ਅਞ੍ਞਸ੍ਮਿਂ ਚੇਤਿਯੇ ਪੂਜੇਤਿ, ਵਟ੍ਟਤੀ’’ਤਿ ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ੨.੬੬੦) ਵੁਤ੍ਤਂ. ਅਟ੍ਠਕਥਾਯਂ (ਪਾਰਾ. ਅਟ੍ਠ. ੨.੬੬੦) ਪਨ ਨਿਯਮੇਤ੍ਵਾ ‘‘ਅਞ੍ਞਸ੍ਸ ਚੇਤਿਯਸ੍ਸ ਅਤ੍ਥਾਯ ਰੋਪਿਤਮਾਲਾਵਚ੍ਛਤੋ’’ਤਿ ਵੁਤ੍ਤਤ੍ਤਾ ਨ ਕੇਵਲਂ ਪਰਿਣਤਭਾਵੋਯੇਵ ਕਥਿਤੋ, ਅਥ ਖੋ ਨਿਯਮੇਤ੍ਵਾ ਰੋਪਿਤਭਾਵੋਪਿ. ਪੁਪ੍ਫਮ੍ਪੀਤਿ ਪਿ-ਸਦ੍ਦੇਨ ਕੁਤੋ ਮਾਲਾਵਚ੍ਛਨ੍ਤਿ ਦਸ੍ਸੇਤਿ. ਵਿਮਤਿਵਿਨੋਦਨਿਯਂ (ਵਿ. ਵਿ. ਟੀ. ੧.੬੬੦) ਪਨ ‘‘ਰੋਪਿਤਮਾਲਾਵਚ੍ਛਤੋਤਿ ਕੇਨਚਿ ਨਿਯਮੇਤ੍ਵਾ ਰੋਪਿਤਂ ਸਨ੍ਧਾਯ ਵੁਤ੍ਤਂ, ਅਨੋਚਿਤਂ ਮਿਲਾਯਮਾਨਂ ਓਚਿਨਿਤ੍ਵਾ ਯਤ੍ਥ ਕਤ੍ਥਚਿ ਪੂਜੇਤੁਂ ਵਟ੍ਟਤੀ’’ਤਿ ਵੁਤ੍ਤਂ. ਠਿਤਂ ਦਿਸ੍ਵਾਤਿ ਸੇਸਕਂ ਗਹੇਤ੍ਵਾ ਠਿਤਂ ਦਿਸ੍ਵਾ. ਇਮਸ੍ਸ ਸੁਨਖਸ੍ਸ ਮਾ ਦੇਹਿ, ਏਤਸ੍ਸ ਦੇਹੀਤਿ ਇਦਂ ਪਰਿਣਤੇਯੇਵ, ਤਿਰਚ੍ਛਾਨਗਤਸ੍ਸ ਪਰਿਚ੍ਚਜਿਤ੍ਵਾ ਦਿਨ੍ਨੇ ਪਨ ਤਂ ਪਲਾਪੇਤ੍ਵਾ ਅਞ੍ਞਂ ਭੁਞ੍ਜਾਪੇਤੁਂ ਵਟ੍ਟਤਿ, ਤਸ੍ਮਾ ‘‘ਕਤ੍ਥ ਦੇਮਾਤਿਆਦਿਨਾ ਏਕੇਨਾਕਾਰੇਨ ਅਨਾਪਤ੍ਤਿ ਦਸ੍ਸਿਤਾ. ਏਵਂ ਪਨ ਅਪੁਚ੍ਛਿਤੇਪਿ ‘ਅਪਰਿਣਤਂ ਇਦ’ਨ੍ਤਿ ਜਾਨਨ੍ਤੇਨ ਅਤ੍ਤਨੋ ਰੁਚਿਯਾ ਯਤ੍ਥ ਇਚ੍ਛਤਿ, ਤਤ੍ਥ ਦਾਪੇਤੁਂ ਵਟ੍ਟਤੀ’’ਤਿ ਤੀਸੁਪਿ ਗਣ੍ਠਿਪਦੇਸੁ ਵੁਤ੍ਤਂ. ਯਤ੍ਥ ਇਚ੍ਛਥ, ਤਤ੍ਥ ਦੇਥਾਤਿ ਏਤ੍ਥਾਪਿ ‘‘ਤੁਮ੍ਹਾਕਂ ਰੁਚਿਯਾ’’ਤਿ ਵੁਤ੍ਤਤ੍ਤਾ ਯਤ੍ਥ ਇਚ੍ਛਤਿ, ਤਤ੍ਥ ਦਾਪੇਤੁਂ ਲਭਤਿ.

ਪਰਿਵਾਰੇ (ਪਰਿ. ਅਟ੍ਠ. ੩੨੯) ਪਨ ਨਵ ਅਧਮ੍ਮਿਕਾਨਿ ਦਾਨਾਨੀਤਿ ਸਙ੍ਘਸ੍ਸ ਪਰਿਣਤਂ ਅਞ੍ਞਸਙ੍ਘਸ੍ਸ ਵਾ ਚੇਤਿਯਸ੍ਸ ਵਾ ਪੁਗ੍ਗਲਸ੍ਸ ਵਾ ਪਰਿਣਾਮੇਤਿ, ਚੇਤਿਯਸ੍ਸ ਪਰਿਣਤਂ ਅਞ੍ਞਚੇਤਿਯਸ੍ਸ ਵਾ ਸਙ੍ਘਸ੍ਸ ਵਾ ਪੁਗ੍ਗਲਸ੍ਸ ਵਾ ਪਰਿਣਾਮੇਤਿ, ਪੁਗ੍ਗਲਸ੍ਸ ਪਰਿਣਤਂ ਅਞ੍ਞਪੁਗ੍ਗਲਸ੍ਸ ਵਾ ਸਙ੍ਘਸ੍ਸ ਵਾ ਚੇਤਿਯਸ੍ਸ ਵਾ ਪਰਿਣਾਮੇਤੀਤਿ ਏਵਂ ਵੁਤ੍ਤਾਨਿ. ਨਵ ਪਟਿਗ੍ਗਹਾ ਪਰਿਭੋਗਾ ਚਾਤਿ ਏਤੇਸਂਯੇਵ ਦਾਨਾਨਂ ਪਟਿਗ੍ਗਹਾ ਚ ਪਰਿਭੋਗਾ ਚ. ਤੀਣਿ ਧਮ੍ਮਿਕਾਨਿ ਦਾਨਾਨੀਤਿ ਸਙ੍ਘਸ੍ਸ ਨਿਨ੍ਨਂ ਸਙ੍ਘਸ੍ਸੇਵ ਦੇਤਿ, ਚੇਤਿਯਸ੍ਸ ਨਿਨ੍ਨਂ ਚੇਤਿਯਸ੍ਸੇਵ ਦੇਤਿ, ਪੁਗ੍ਗਲਸ੍ਸ ਨਿਨ੍ਨਂ ਪੁਗ੍ਗਲਸ੍ਸੇਵ ਦੇਤੀਤਿ ਇਮਾਨਿ ਤੀਣਿ. ਪਟਿਗ੍ਗਹਪਟਿਭੋਗਾਪਿ ਤੇਸਂਯੇਵ ਪਟਿਗ੍ਗਹਾ ਚ ਪਰਿਭੋਗਾ ਚਾਤਿ ਆਗਤਂ.

ਇਤਿ ਵਿਨਯਸਙ੍ਗਹਸਂਵਣ੍ਣਨਾਭੂਤੇ ਵਿਨਯਾਲਙ੍ਕਾਰੇ

ਦਾਨਲਕ੍ਖਣਾਦਿਵਿਨਿਚ੍ਛਯਕਥਾਲਙ੍ਕਾਰੋ ਨਾਮ

ਤੇਰਸਮੋ ਪਰਿਚ੍ਛੇਦੋ.