੧. ਮਹਾਖਨ੍ਧਕੋ

ਬੋਧਿਕਥਾਵਣ੍ਣਨਾ

ਮਹਾਵਗ੍ਗੇ ਉਭਿਨ੍ਨਂ ਪਾਤਿਮੋਕ੍ਖਾਨਨ੍ਤਿ ਉਭਿਨ੍ਨਂ ਪਾਤਿਮੋਕ੍ਖਵਿਭਙ੍ਗਾਨਂ. ਯਂ ਖਨ੍ਧਕਂ ਸਙ੍ਗਾਯਿਂਸੂਤਿ ਸਮ੍ਬਨ੍ਧੋ. ਖਨ੍ਧਾਨਂ ਸਮੂਹੋ, ਖਨ੍ਧਾਨਂ ਵਾ ਪਕਾਸਨਤੋ ਖਨ੍ਧਕੋ. ਖਨ੍ਧਾਤਿ ਚੇਤ੍ਥ ਪਬ੍ਬਜ੍ਜਾਦਿਚਾਰਿਤ੍ਤਵਾਰਿਤ੍ਤਸਿਕ੍ਖਾਪਦਪਞ੍ਞਤ੍ਤਿਸਮੂਹੋ ਅਧਿਪ੍ਪੇਤੋ. ਪਦਭਾਜਨੀਯੇ ਯੇਸਂ ਪਦਾਨਂ ਅਤ੍ਥਾ ਯੇਹਿ ਅਟ੍ਠਕਥਾਨਯੇਹਿ ਪਕਾਸਿਤਾਤਿ ਯੋਜਨਾ. ਅਥ ਵਾ ਯੇ ਅਤ੍ਥਾਤਿ ਯੋਜੇਤਬ੍ਬਂ. ਹਿ-ਸਦ੍ਦੋ ਚੇਤ੍ਥ ਪਦਪੂਰਣੇ ਦਟ੍ਠਬ੍ਬੋ.

੧. ਵਿਸੇਸਕਾਰਣਨ੍ਤਿ ‘‘ਯੇਨ ਸਮਯੇਨ ਆਯਸ੍ਮਤੋ ਸਾਰਿਪੁਤ੍ਤਤ੍ਥੇਰਸ੍ਸ ਸਿਕ੍ਖਾਪਦਪਞ੍ਞਤ੍ਤਿਯਾਚਨਹੇਤੁਭੂਤੋ ਪਰਿਵਿਤਕ੍ਕੋ ਉਦਪਾਦਿ, ਤੇਨ ਸਮਯੇਨਾ’’ਤਿਆਦਿਨਾ ਵੁਤ੍ਤਕਾਰਣਂ ਵਿਯ ਵਿਸੇਸਕਾਰਣਂ ਭੁਮ੍ਮਵਚਨਨਿਵਤ੍ਤਨਕਕਾਰਣਨ੍ਤਿ ਅਤ੍ਥੋ. ਏਤਸ੍ਸਾਤਿ ਅਭਿਸਮ੍ਬੋਧਿਤੋ ਪਟ੍ਠਾਯ ਸਤ੍ਥੁ ਚਰਿਯਾਵਿਭਾਵਨਸ੍ਸ ਵਿਨਯਪਞ੍ਞਤ੍ਤਿਯਂ ਕਿਂ ਪਯੋਜਨਂ? ਯਦਿ ਵਿਸੇਸਕਾਰਣਂ ਨਤ੍ਥੀਤਿ ਅਧਿਪ੍ਪਾਯੋ. ਨਿਦਾਨਦਸ੍ਸਨਂ ਪਯੋਜਨਨ੍ਤਿ ਯੋਜਨਾ. ਨਿਦਾਨਨ੍ਤਿਚੇਤ੍ਥ ਸਿਕ੍ਖਾਪਦਪਞ੍ਞਤ੍ਤਿਹੇਤੁਭੂਤਂ ਵਤ੍ਥੁਪੁਗ੍ਗਲਾਦਿਕਾਰਣਂ ਅਧਿਪ੍ਪੇਤਂ, ਨ ਪਞ੍ਞਤ੍ਤਿਟ੍ਠਾਨਮੇਵ. ਤੇਨਾਹ ‘‘ਯਾ ਹੀ’’ਤਿਆਦਿ.

ਉਰੁਵੇਲਾਯਨ੍ਤਿ ਏਤ੍ਥ ਉਰੁ-ਸਦ੍ਦੋ ਮਹਨ੍ਤਵਾਚੀ. ਵੇਲਾ-ਸਦ੍ਦੋ ਤੀਰਪਰਿਯਾਯੋ. ਉਨ੍ਨਤਤ੍ਤਾਦਿਨਾ ਵੇਲਾ ਵਿਯ ਵੇਲਾ. ਉਰੁ ਮਹਨ੍ਤੀ ਵੇਲਾ ਉਰੁਵੇਲਾ, ਤਸ੍ਸਂ. ਤੇਨਾਹ ‘‘ਮਹਾਵੇਲਾਯ’’ਨ੍ਤਿਆਦਿ. ਮਰਿਯਾਦਾਤਿ ਸੀਲਾਦਿਗੁਣਸੀਮਾ. ਪਤ੍ਤਪੁਟੇਨਾਤਿ ਤਾਲਾਦੀਨਂ ਪਣ੍ਣਪੁਟੇਨ.

‘‘ਪਠਮਾਭਿਸਮ੍ਬੁਦ੍ਧੋ’’ਤਿ ਅਨੁਨਾਸਿਕਲੋਪੇਨਾਯਂ ਨਿਦ੍ਦੇਸੋਤਿ ਆਹ ‘‘ਪਠਮਂ ਅਭਿਸਮ੍ਬੁਦ੍ਧੋ’’ਤਿ. ਪਠਮਨ੍ਤਿ ਚ ਭਾਵਨਪੁਂਸਕਨਿਦ੍ਦੇਸੋ. ਤਸ੍ਮਾ ਅਭਿਸਮ੍ਬੁਦ੍ਧੋ ਹੁਤ੍ਵਾ ਸਬ੍ਬਪਠਮਂ ਬੋਧਿਰੁਕ੍ਖਮੂਲੇ ਵਿਹਰਤੀਤਿ ਯੋਜਨਾ ਦਟ੍ਠਬ੍ਬਾ.

ਪਾਲ਼ਿਯਂ ਅਥ ਖੋਤਿ ਏਤ੍ਥ ਅਥਾਤਿ ਏਤਸ੍ਮਿਂ ਸਮਯੇਤਿ ਅਤ੍ਥੋ ਅਨੇਕਤ੍ਥਤ੍ਤਾ ਨਿਪਾਤਾਨਂ. ਸਤ੍ਤਾਹਨ੍ਤਿ ਅਚ੍ਚਨ੍ਤਸਂਯੋਗੇ ਏਤਂ ਉਪਯੋਗਵਚਨਂ. ਅਥ ਖੋਤਿ ਅਧਿਕਾਰਨ੍ਤਰਦਸ੍ਸਨੇ ਨਿਪਾਤੋ. ਤੇਨ ਵਿਮੁਤ੍ਤਿਸੁਖਪਟਿਸਂਵੇਦਨਂ ਪਹਾਯ ਪਟਿਚ੍ਚਸਮੁਪ੍ਪਾਦਮਨਸਿਕਾਰੇ ਅਧਿਕਤਭਾਵਂ ਦਸ੍ਸੇਤਿ. ਪਟਿਚ੍ਚਾਤਿ ਪਟਿਮੁਖਂ ਗਨ੍ਤ੍ਵਾ, ਅਞ੍ਞਮਞ੍ਞਂ ਅਪੇਕ੍ਖਿਤ੍ਵਾਤਿ ਅਤ੍ਥੋ. ਏਤੇਨ ਕਾਰਣਬਹੁਤਾ ਦਸ੍ਸਿਤਾ. ਸਹਿਤੇਤਿ ਕਾਰਿਯਬਹੁਤਾ. ਅਨੁਲੋਮਨ੍ਤਿ ਭਾਵਨਪੁਂਸਕਨਿਦ੍ਦੇਸੋ. ਸ੍ਵੇਵਾਤਿ ਸੋ ਏਵ ਪਚ੍ਚਯਾਕਾਰੋ. ਪੁਰਿਮਨਯੇਨ ਵਾ ਵੁਤ੍ਤੋਤਿ ‘‘ਅਵਿਜ੍ਜਾਪਚ੍ਚਯਾ ਸਙ੍ਖਾਰਾ’’ਤਿਆਦਿਨਾ ਨਯੇਨ ਵੁਤ੍ਤੋ ਪਚ੍ਚਯਾਕਾਰੋ. ਪਵਤ੍ਤਿਯਾਤਿ ਸਂਸਾਰਪ੍ਪਵਤ੍ਤਿਯਾ.

ਪਾਲ਼ਿਯਂ ‘‘ਅਵਿਜ੍ਜਾਪਚ੍ਚਯਾ’’ਤਿਆਦੀਸੁ ਦੁਕ੍ਖਾਦੀਸੁ ਅਞ੍ਞਾਣਂ ਅਵਿਜ੍ਜਾ. ਲੋਕਿਯਕੁਸਲਾਕੁਸਲਚੇਤਨਾ ਸਙ੍ਖਾਰਾ. ਲੋਕਿਯਵਿਪਾਕਮੇਵ ਵਿਞ੍ਞਾਣਂ. ਲੋਕਿਯਵੇਦਨਾਦਿਕ੍ਖਨ੍ਧਤ੍ਤਯਂ ਨਾਮਂ, ਭੂਤੁਪਾਦਾਯਭੇਦਂ ਰੂਪਂ. ਪਸਾਦਵਿਞ੍ਞਾਣਭੇਦਂ ਸਲ਼ਾਯਤਨਂ. ਵਿਪਾਕਭੂਤੋ ਸਬ੍ਬੋ ਫਸ੍ਸੋ, ਵੇਦਨਾ ਚ. ਰਾਗੋ ਤਣ੍ਹਾ. ਬਲਵਰਾਗੋ, ਤਿਵਿਧਾ ਚ ਦਿਟ੍ਠਿ ਉਪਾਦਾਨਂ. ਭਵੋ ਪਨ ਦੁਵਿਧੋ ਕਮ੍ਮਭਵੋ, ਉਪਪਤ੍ਤਿਭਵੋ ਚ. ਤਤ੍ਥ ਕਮ੍ਮਭਵੋ ਸਾਸਵਕੁਸਲਾਕੁਸਲਚੇਤਨਾਵ, ਉਪਪਤ੍ਤਿਭਵੋ ਉਪਾਦਿਨ੍ਨਕਕ੍ਖਨ੍ਧਾ. ਤੇਸਂ ਉਪਪਤ੍ਤਿ ਜਾਤਿ. ਪਾਕੋ ਜਰਾ. ਭੇਦੋ ਮਰਣਂ. ਤੇ ਏਵ ਨਿਸ੍ਸਾਯ ਸੋਚਨਂ ਸੋਕੋ. ਕਨ੍ਦਨਂ ਪਰਿਦੇਵੋ. ਦੁਕ੍ਖਂ ਕਾਯਿਕਂ. ਦੋਮਨਸ੍ਸਂ ਚੇਤਸਿਕਂ. ਅਤਿਵਿਯ ਸੋਕੋ ਉਪਾਯਾਸੋ.

ਪਚ੍ਚੇਕਞ੍ਚ ਸਮ੍ਭਵਤਿ-ਸਦ੍ਦੋ ਯੋਜੇਤਬ੍ਬੋ. ਤੇਨਾਹ ‘‘ਇਮਿਨਾ ਨਯੇਨਾ’’ਤਿਆਦਿ. ‘‘ਦੁਕ੍ਖਰਾਸਿਸ੍ਸਾ’’ਤਿ ਇਮਿਨਾ ਨ ਸਤ੍ਤਸ੍ਸ. ਨਾਪਿ ਸੁਭਸੁਖਾਦੀਨਨ੍ਤਿ ਦਸ੍ਸੇਤਿ.

ਹਵੇਤਿ ਬ੍ਯਤ੍ਤਨ੍ਤਿ ਇਮਸ੍ਮਿਂ ਅਤ੍ਥੇ ਨਿਪਾਤੋ. ‘‘ਅਨੁਲੋਮਪਚ੍ਚਯਾਕਾਰਪਟਿਵੇਧਸਾਧਕਾ ਬੋਧਿਪਕ੍ਖਿਯਧਮ੍ਮਾ’’ਤਿ ਇਦਂ ਪਠਮਵਾਰੇ ਕਿਞ੍ਚਾਪਿ ‘‘ਅਵਿਜ੍ਜਾਯਤ੍ਵੇਵ ਅਸੇਸਵਿਰਾਗਨਿਰੋਧਾ’’ਤਿਆਦਿਨਾ ਪਟਿਲੋਮਪਚ੍ਚਯਾਕਾਰੋਪਿ ਆਗਤੋ, ਤਥਾਪਿ ‘‘ਯਤੋ ਪਜਾਨਾਤਿ ਸਹੇਤੁਧਮ੍ਮ’’ਨ੍ਤਿ ਅਨੁਲੋਮਪਚ੍ਚਯਾਕਾਰਪਟਿਵੇਧਸ੍ਸੇਵ ਕਾਰਣਤ੍ਤੇਨ ਵੁਤ੍ਤਨ੍ਤਿ. ਯਥਾ ਚੇਤ੍ਥ, ਏਵਂ ਦੁਤਿਯਵਾਰੇਪਿ ‘‘ਯਤੋ ਖਯਂ ਪਚ੍ਚਯਾਨਂ ਅਵੇਦੀ’’ਤਿ ਗਾਥਾਯ ਵੁਤ੍ਤਤ੍ਤਾ ‘‘ਪਚ੍ਚਯਾਨਂ ਖਯਸਙ੍ਖਾਤ’’ਨ੍ਤਿਆਦਿ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਨੋ ਕਲ੍ਲੋ ਪਞ੍ਹੋਤਿ ਅਯੁਤ੍ਤੋ ਨ ਬ੍ਯਾਕਾਤਬ੍ਬੋ, ਅਵਿਜ੍ਜਮਾਨਂ ਅਤ੍ਤਾਨਂ ਸਿਦ੍ਧਂ ਕਤ੍ਵਾ ‘‘ਕੋ ਫੁਸਤੀ’’ਤਿ ਤਸ੍ਸ ਕਿਰਿਯਾਯ ਪੁਟ੍ਠਤ੍ਤਾ ‘‘ਕੋ ਵਞ੍ਝਾਪੁਤ੍ਤੋ ਫੁਸਤੀ’’ਤਿਆਦਿ ਵਿਯਾਤਿ ਅਧਿਪ੍ਪਾਯੋ. ਸੋਲ਼ਸ ਕਙ੍ਖਾਤਿ ‘‘ਅਹੋਸਿਂ ਨੁ ਖੋ ਅਹਮਤੀਤਮਦ੍ਧਾਨਂ, ਨਨੁ ਖੋ ਅਹੋਸਿਂ, ਕਿਂ ਨੁ ਖੋ ਅਹੋਸਿਂ, ਕਥਂ ਨੁ ਖੋ ਅਹੋਸਿਂ, ਕਿਂ ਹੁਤ੍ਵਾ ਕਿਂ ਅਹੋਸਿਂ ਨੁ ਖੋ ਅਹਮਤੀਤਮਦ੍ਧਾਨਂ, ਭਵਿਸ੍ਸਾਮਿ ਨੁ ਖੋ ਅਹਂ ਅਨਾਗਤਮਦ੍ਧਾਨਂ, ਨਨੁ ਖੋ ਭਵਿਸ੍ਸਾਮਿ, ਕਿਂ ਨੁ ਖੋ ਭਵਿਸ੍ਸਾਮਿ, ਕਥਂ ਨੁ ਖੋ ਭਵਿਸ੍ਸਾਮਿ, ਕਿਂ ਹੁਤ੍ਵਾ ਕਿਂ ਭਵਿਸ੍ਸਾਮਿ ਨੁ ਖੋ ਅਹਂ ਅਨਾਗਤਮਦ੍ਧਾਨਂ, ਅਹਂ ਨੁ ਖੋਸ੍ਮਿ, ਨੋ ਨੁ ਖੋਸ੍ਮਿ, ਕਿਂ ਨੁ ਖੋਸ੍ਮਿ, ਕਥਂ ਨੁ ਖੋਸ੍ਮਿ, ਅਯਂ ਨੁ ਖੋ ਸਤ੍ਤੋ ਕੁਤੋ ਆਗਤੋ, ਸੋ ਕੁਹਿਂ ਗਾਮੀ ਭਵਿਸ੍ਸਤੀ’’ਤਿ (ਮ. ਨਿ. ੧.੧੮; ਸਂ. ਨਿ. ੨.੨੦) ਏਵਂ ਆਗਤਾ ਅਤੀਤੇ ਪਞ੍ਚ, ਅਨਾਗਤੇ ਪਞ੍ਚ, ਪਚ੍ਚੁਪ੍ਪਨ੍ਨੇ ਛਾਤਿ ਸੋਲ਼ਸਵਿਧਾ ਕਙ੍ਖਾ.

ਤਤ੍ਥ ਕਿਂ ਨੁ ਖੋਤਿ ਮਨੁਸ੍ਸਦੇਵਾਦੀਸੁ, ਖਤ੍ਤਿਯਾਦੀਸੁ ਵਾ ਅਞ੍ਞਤਰਂ ਨਿਸ੍ਸਾਯ ਕਙ੍ਖਤਿ. ਕਥਂ ਨੁ ਖੋਤਿ ਪਨ ਸਣ੍ਠਾਨਾਕਾਰਾਦੀਸੁ ਇਸ੍ਸਰਾਦਿਜਨਕਂ, ਕਾਰਣਂ ਵਾ ਨਿਸ੍ਸਾਯ. ਕਿਂ ਹੁਤ੍ਵਾ ਕਿਂ ਅਹੋਸਿਨ੍ਤਿ ਚ ਮਨੁਸ੍ਸਾਦੀਸੁ ਪਠਮਂ ਕਿਂ ਹੁਤ੍ਵਾ ਪਚ੍ਛਾ ਕਿਂ ਅਹੋਸਿਨ੍ਤਿ ਕਙ੍ਖਤਿ. ਅਹਂ ਨੁ ਖੋਸ੍ਮੀਤਿਆਦਿ ਇਦਾਨਿ ਅਤ੍ਤਨੋ ਵਿਜ੍ਜਮਾਨਾਵਿਜ੍ਜਮਾਨਤਂ, ਸਰੂਪਪਕਾਰਾਦਿਕਞ੍ਚ ਕਙ੍ਖਤਿ. ਵਪਯਨ੍ਤੀਤਿ ਵਿਅਪਯਨ੍ਤਿ ਬ੍ਯਪਗਚ੍ਛਨ੍ਤਿ. ਤੇਨਾਹ ‘‘ਅਪਗਚ੍ਛਨ੍ਤਿ ਨਿਰੁਜ੍ਝਨ੍ਤੀ’’ਤਿ.

੩. ਤਸ੍ਸ ਵਸੇਨਾਤਿ ਤਸ੍ਸ ਪਚ੍ਚਯਾਕਾਰਪਜਾਨਨਸ੍ਸ, ਪਚ੍ਚਯਕ੍ਖਯਾਧਿਗਮਸ੍ਸ ਚ ਵਸੇਨ. ਏਕੇਕਮੇਵ ਕੋਟ੍ਠਾਸਨ੍ਤਿ ਅਨੁਲੋਮਪਟਿਲੋਮਤੋ ਏਕੇਕਮੇਵ ਕੋਟ੍ਠਾਸਂ. ਪਾਟਿਪਦਰਤ੍ਤਿਯਾ ਏਵਂ ਮਨਸਾਕਾਸੀਤਿ ਰਤ੍ਤਿਯਾ ਤੀਸੁਪਿ ਯਾਮੇਸੁ ਏਵਂ ਇਧ ਖਨ੍ਧਕਪਾਲ਼ਿਯਾ ਆਗਤਨਯੇਨ ਅਨੁਲੋਮਪਟਿਲੋਮਂਯੇਵ ਮਨਸਾਕਾਸਿ.

ਅਜਪਾਲਕਥਾਵਣ੍ਣਨਾ

੪. ਤਸ੍ਸ ਸਤ੍ਤਾਹਸ੍ਸ ਅਚ੍ਚਯੇਨਾਤਿ ਪਲ੍ਲਙ੍ਕਸਤ੍ਤਾਹਸ੍ਸ ਅਪਗਮਨੇਨ. ਤਮ੍ਹਾ ਸਮਾਧਿਮ੍ਹਾਤਿ ਅਰਹਤ੍ਤਫਲਸਮਾਪਤ੍ਤਿਸਮਾਧਿਮ੍ਹਾ. ਅਨ੍ਤਰਨ੍ਤਰਾ ਏਵ ਹਿ ਪਚ੍ਚਯਾਕਾਰਮਨਸਿਕਾਰੋ. ਅਵਸੇਸਕਾਲਂ ਪਨ ਸਬ੍ਬਂ ਭਗਵਾ ਫਲਸਮਾਪਤ੍ਤਿਯਾਪਿ ਵੀਤਿਨਾਮੇਸਿ. ਤਂ ਸਨ੍ਧਾਯ ‘‘ਤਮ੍ਹਾ ਸਮਾਧਿਮ੍ਹਾ’’ਤਿ ਵੁਤ੍ਤਂ. ਰਤਨਚਙ੍ਕਮੇਤਿ ਭਗਵਤੋ ਚਿਰਂ ਠਿਤਸ੍ਸ ਚਙ੍ਕਮਨਾਧਿਪ੍ਪਾਯਂ ਞਤ੍ਵਾ ਦੇਵਤਾਹਿ ਮਾਪਿਤੇ ਰਤਨਚਙ੍ਕਮੇ. ਰਤਨਘਰਨ੍ਤਿ ਭਗਵਤੋ ਨਿਸੀਦਨਾਧਿਪ੍ਪਾਯਂ ਞਤ੍ਵਾ ਦੇਵਤਾਹਿ ਮਾਪਿਤਂ ਰਤਨਮਯਂ ਗੇਹਂ.

ਤਤ੍ਰਾਪੀਤਿ ਨ ਕੇਵਲਂ ਰਤਨਘਰੇਯੇਵ. ਤਤ੍ਰਾਪਿ ਅਜਪਾਲਨਿਗ੍ਰੋਧਮੂਲੇਪਿ ਅਭਿਧਮ੍ਮਂ ਵਿਚਿਨਨ੍ਤੋ ਏਵ ਅਨ੍ਤਰਨ੍ਤਰਾ ਵਿਮੁਤ੍ਤਿਸੁਖਂ ਪਟਿਸਂਵੇਦੇਨ੍ਤੋਤਿ ਅਤ੍ਥੋ. ਤਤ੍ਥਾਪਿ ਹਿ ਅਨਨ੍ਤਨਯਸਮਨ੍ਤਪਟ੍ਠਾਨਂ ਸਮ੍ਮਸਤੋ ਸਮ੍ਮਾਸਮ੍ਬੁਦ੍ਧਸ੍ਸ ਪੀਤਿਸਮੁਟ੍ਠਿਤਾ ਛਬ੍ਬਣ੍ਣਾ ਬੁਦ੍ਧਰਸ੍ਮਿਯੋ ਰਤਨਘਰੇ ਵਿਯ ਨਿਚ੍ਛਰਿਂਸੁ ਏਵ. ‘‘ਹੁਂਹੁ’’ਨ੍ਤਿ ਕਰੋਨ੍ਤੋਤਿ ‘‘ਸਬ੍ਬੇ ਹੀਨਜਾਤਿਕਾ ਮਂ ਮਾ ਉਪਗਚ੍ਛਨ੍ਤੂ’’ਤਿ ਮਾਨਵਸੇਨ, ਸਮੀਪਂ ਉਪਗਤੇਸੁ ਕੋਧਵਸੇਨ ਚ ‘‘ਅਪੇਥਾ’’ਤਿ ਅਧਿਪ੍ਪਾਯਨਿਚ੍ਛਾਰਿਤਂ ਹੁਂਹੁਂਕਾਰਂ ਕਰੋਨ੍ਤੋ.

ਬ੍ਰਹ੍ਮਞ੍ਞਨ੍ਤਿ ਬ੍ਰਾਹ੍ਮਣਤ੍ਤਂ. ਅਨ੍ਤਨ੍ਤਿ ਨਿਬ੍ਬਾਨਂ. ਦੇਵਾਨਂ ਵਾ ਅਨ੍ਤਨ੍ਤਿ ਮਗ੍ਗਞਾਣਾਨਂ ਵਾ ਅਨ੍ਤਭੂਤਂ ਅਰਹਤ੍ਤਫਲਂ.

ਮੁਚਲਿਨ੍ਦਕਥਾਵਣ੍ਣਨਾ

੫. ਮੁਚਲਿਨ੍ਦਮੂਲੇਤਿ ਏਤ੍ਥ ਚ ਮੁਚਲਿਨ੍ਦੋ ਵੁਚ੍ਚਤਿ ਨੀਪਰੁਕ੍ਖੋ, ਯੋ ‘‘ਨਿਚੁਲੋ’’ਤਿਪਿ ਵੁਚ੍ਚਤਿ. ਉਪ੍ਪਨ੍ਨਮੇਘੋਤਿ ਸਕਲਚਕ੍ਕਵਾਲ਼ਗਬ੍ਭਂ ਪੂਰੇਤ੍ਵਾ ਉਪ੍ਪਨ੍ਨੋ ਮਹਾਮੇਘੋ. ਵਦ੍ਦਲਿਕਾਤਿ ਵੁਟ੍ਠਿਯਾ ਏਵ ਇਤ੍ਥਿਲਿਙ੍ਗਵਸੇਨ ਨਾਮਂ. ਯਾ ਚ ਸਤ੍ਤਾਹਂ ਪਵਤ੍ਤਤ੍ਤਾ ਸਤ੍ਤਾਹਵਦ੍ਦਲਿਕਾਤਿ ਵੁਤ੍ਤਾਤਿ ਆਹ ‘‘ਸਤ੍ਤਾਹਂ ਅਵਿਚ੍ਛਿਨ੍ਨਵੁਟ੍ਠਿਕਾ ਅਹੋਸੀ’’ਤਿ. ਸੀਤਵਾਤੇਨ ਦੂਸਿਤਂ ਦਿਨਮੇਤਿਸ੍ਸਾ ਵਦ੍ਦਲਿਕਾਯਾਤਿ ਸੀਤਵਾਤਦੁਦ੍ਦਿਨੀਤਿ ਆਹ ‘‘ਉਦਕਫੁਸਿਤਸਮ੍ਮਿਸ੍ਸੇਨਾ’’ਤਿਆਦਿ. ਉਬ੍ਬਿਦ੍ਧਤਾ ਨਾਮ ਦੂਰਭਾਵੇਨ ਉਪਟ੍ਠਾਨਨ੍ਤਿ ਆਹ ‘‘ਮੇਘਵਿਗਮੇਨ ਦੂਰੀਭੂਤ’’ਨ੍ਤਿ. ਇਨ੍ਦਨੀਲਮਣਿ ਵਿਯ ਦਿਬ੍ਬਤਿ ਜੋਤੇਤੀਤਿ ਦੇਵੋ, ਆਕਾਸੋ.

ਏਤਮਤ੍ਥਂ ਵਿਦਿਤ੍ਵਾਤਿ ਵਿਵੇਕਸ੍ਸ ਸੁਖਭਾਵਂ ਵਿਦਿਤ੍ਵਾ. ਸਬ੍ਬਸੋ ਅਸਨ੍ਤੁਟ੍ਠਿਸਮੁਚ੍ਛੇਦਕਤ੍ਤਾ ਮਗ੍ਗਞਾਣਾਨਂ ‘‘ਚਤੁਮਗ੍ਗਞਾਣਸਨ੍ਤੋਸੇਨਾ’’ਤਿ ਵੁਤ੍ਤਂ. ਅਕੁਪ੍ਪਨਭਾਵੋਤਿ ਅਕੁਜ੍ਝਨਸਭਾਵੋ.

ਰਾਜਾਯਤਨਕਥਾਵਣ੍ਣਨਾ

੬. ਪਚ੍ਚਗ੍ਘੇਤਿ ਅਭਿਨਵੇ. ਅਯਮੇਵ ਅਤ੍ਥੋ ਪਸਤ੍ਥੋ, ਨ ਪੁਰਿਮੋ. ਨ ਹਿ ਬੁਦ੍ਧਾ ਮਹਗ੍ਘਂ ਪਤ੍ਤਂ ਪਰਿਭੁਞ੍ਜਨ੍ਤਿ.

ਬ੍ਰਹ੍ਮਯਾਚਨਕਥਾਵਣ੍ਣਨਾ

੭. ਆਲੀਯਨ੍ਤਿ ਸੇਵੀਯਨ੍ਤੀਤਿ ਆਲਯਾ. ਪਞ੍ਚ ਕਾਮਗੁਣਾਤਿ ਆਹ ‘‘ਸਤ੍ਤਾ…ਪੇ… ਵੁਚ੍ਚਨ੍ਤੀ’’ਤਿ. ਸੁਟ੍ਠੁ ਮੁਦਿਤਾਤਿ ਅਤਿਵਿਯ ਪਮੁਦਿਤਾ. ਠਾਨਂ ਸਨ੍ਧਾਯਾਤਿ ਠਾਨ-ਸਦ੍ਦਂ ਅਪੇਕ੍ਖਿਤ੍ਵਾ. ਇਮੇਸਨ੍ਤਿ ਸਙ੍ਖਾਰਾਦੀਨਂ ਫਲਾਨਂ. ਪਾਲ਼ਿਯਂ ਸਬ੍ਬਸਙ੍ਖਾਰਸਮਥੋਤਿਆਦੀਨਿ ਨਿਬ੍ਬਾਨਵੇਵਚਨਾਨਿ. ਅਪਿਸ੍ਸੂਤਿ ਸਮ੍ਪਿਣ੍ਡਨਤ੍ਥੇ ਨਿਪਾਤੋ. ਨ ਕੇਵਲਂ ਏਤਦਹੋਸਿ, ਇਮਾਪਿ ਗਾਥਾ ਪਟਿਭਂਸੂਤਿ ਅਤ੍ਥੋ.

ਕਿਚ੍ਛੇਨ ਮੇ ਅਧਿਗਤਨ੍ਤਿ ਪਾਰਮਿਪੂਰਣਂ ਸਨ੍ਧਾਯ ਵੁਤ੍ਤਂ, ਨ ਦੁਕ੍ਖਾਪਟਿਪਦਂ. ਬੁਦ੍ਧਾਨਞ੍ਹਿ ਚਤ੍ਤਾਰੋ ਮਗ੍ਗਾ ਸੁਖਾਪਟਿਪਦਾਵ ਹੋਨ੍ਤਿ. ਹ-ਇਤਿ ਬ੍ਯਤ੍ਤਂ, ਏਕਂਸਨ੍ਤਿ ਦ੍ਵੀਸੁ ਅਤ੍ਥੇਸੁ ਨਿਪਾਤੋ, ਬ੍ਯਤ੍ਤਂ, ਏਕਂਸੇਨ ਵਾ ਅਲਨ੍ਤਿ ਵਿਯੋਜੇਨ੍ਤਿ. ਹਲਨ੍ਤਿ ਵਾ ਏਕੋ ਨਿਪਾਤੋ.

੮. ਪਾਲ਼ਿਯਂ ਸਹਮ੍ਪਤਿਸ੍ਸਾਤਿ ਸੋ ਕਿਰ ਕਸ੍ਸਪਸ੍ਸ ਭਗਵਤੋ ਸਾਸਨੇ ਸਹਕੋ ਨਾਮ ਥੇਰੋ ਪਠਮਜ੍ਝਾਨਭੂਮਿਯਂ ਬ੍ਰਹ੍ਮਪਤਿ ਹੁਤ੍ਵਾ ਨਿਬ੍ਬਤ੍ਤੋ, ਤੇਨ ਨਂ ‘‘ਸਹਮ੍ਪਤੀ’’ਤਿ ਸਞ੍ਜਾਨਿਂਸੁ. ਅਸ੍ਸਵਨਤਾਤਿ ਅਸ੍ਸਵਨਤਾਯ, ਅਸ੍ਸਵਨੇਨਾਤਿ ਅਤ੍ਥੋ. ਸਵਨਮੇਵ ਹਿ ਸਵਨਤਾ ਯਥਾ ਦੇਵਤਾਤਿ.

ਧਮ੍ਮੋ ਅਸੁਦ੍ਧੋਤਿ ਮਿਚ੍ਛਾਦਿਟ੍ਠਿਧਮ੍ਮੋ. ਸਮਲੇਹੀਤਿ ਪੂਰਣਕਸ੍ਸਪਾਦੀਹਿ ਛਹਿ ਸਤ੍ਥਾਰੇਹਿ. ਅਪਾਪੁਰਾਤਿ ਦੇਸਨਾਹਤ੍ਥੇਨ ਵਿਵਰ. ਦ੍ਵਾਰਨ੍ਤਿ ਅਰਿਯਮਗ੍ਗਂ ਸਨ੍ਧਾਯ ਵਦਤਿ.

ਸੇਲੇਤਿ ਘਨਸਿਲਾਮਯੇ. ਤਥੂਪਮਨ੍ਤਿ ਏਤ੍ਥ ਤਥਾ-ਸਦ੍ਦੋ ਤਂ-ਸਦ੍ਦਤ੍ਥੇ ਦਟ੍ਠਬ੍ਬੋ. ਤੇਨ ਸੋ ਸੇਲਪਬ੍ਬਤੋ ਉਪਮਾ ਯਸ੍ਸ. ਤਂ ਤਥੂਪਮਨ੍ਤਿ ਅਤ੍ਥੋ. ਤੇਨ ਵਾ ਪਬ੍ਬਤਾਦਿਨਾ ਪਕਾਰੇਨ ਉਪਮਾ ਅਸ੍ਸਾਤਿਪਿ ਅਤ੍ਥੋ. ਧਮ੍ਮਮਯਨ੍ਤਿ ਲੋਕੁਤ੍ਤਰਧਮ੍ਮਭੂਤਂ. ਉਟ੍ਠਾਹੀਤਿ ਧਮ੍ਮਦੇਸਨਤ੍ਥਾਯ ਚਾਰਿਕਚਰਣਤ੍ਥਂ ਇਮਮ੍ਹਾ ਆਸਨਾ ਕਾਯੇਨ, ਅਪ੍ਪੋਸ੍ਸੁਕ੍ਕਭਾਵਤੋ ਵਾ ਚਿਤ੍ਤੇਨ ਉਟ੍ਠੇਹਿ, ਅਯਮੇਵ ਵਾ ਪਾਠੋ. ਤੇਨੇਵ ‘‘ਵਿਚਰ, ਦੇਸਸ੍ਸੂ’’ਤਿ ਦੁਵਿਧੇਪਿ ਕਾਯਚਿਤ੍ਤਪਯੋਗੇ ਨਿਯੋਜੇਸਿ. ਵੀਰਾਤਿਆਦਿ ਚਤ੍ਤਾਰਿ ਥੁਤਿਵਸੇਨ ਸਮ੍ਬੋਧਨਾਨਿ.

੯. ਬੁਦ੍ਧਚਕ੍ਖੁਨਾਤਿ ਇਨ੍ਦ੍ਰਿਯਪਰੋਪਰਿਯਤ੍ਤਞਾਣੇਨ, ਆਸਯਾਨੁਸਯਞਾਣੇਨ ਚ. ਇਮੇਸਞ੍ਹਿ ਦ੍ਵਿਨ੍ਨਂ ‘‘ਬੁਦ੍ਧਚਕ੍ਖੂ’’ਤਿ ਨਾਮਂ. ਸ੍ਵਾਕਾਰਾਤਿ ਸਦ੍ਧਿਨ੍ਦ੍ਰਿਯਾਦਯੋਵ ਆਕਾਰਾ ਸੁਨ੍ਦਰਾ ਯੇਸਂ, ਤੇ ਸ੍ਵਾਕਾਰਾ, ਸੁਵਿਞ੍ਞਾਪਯਾ, ਪਰਲੋਕਞ੍ਚ ਵਜ੍ਜਞ੍ਚ ਭਯਤੋ ਦਸ੍ਸਨਸੀਲਾ ਚਾਤਿ ਦਟ੍ਠਬ੍ਬਂ. ਉਪ੍ਪਲਾਨਿ ਏਤ੍ਥ ਸਨ੍ਤੀਤਿ ਉਪ੍ਪਲਿਨੀਤਿ ਗਚ੍ਛਲਤਾਪਿ ਪੋਕ੍ਖਰਣੀਪਿ ਵੁਚ੍ਚਤਿ. ਇਧ ਪਨ ਪੋਕ੍ਖਰਣੀ. ਏਵਮਿਤਰੇਸੁਪਿ. ਉਦਕਾਨੁਗ੍ਗਤਾਨੀਤਿ ਉਦਕਤੋ ਅਨੁਗ੍ਗਤਾਨਿ. ਅਨ੍ਤੋ ਨਿਮੁਗ੍ਗਾਨੇਵ ਹੁਤ੍ਵਾ ਪੁਸਨ੍ਤਿ ਵਡ੍ਢਨ੍ਤਿ, ਤਾਨਿ ਅਨ੍ਤੋਨਿਮੁਗ੍ਗਪੋਸੀਨਿ. ਅਚ੍ਚੁਗ੍ਗਮ੍ਮਾਤਿ ਉਦਕਂ ਅਤਿਕ੍ਕਮਨਵਸੇਨ ਉਗ੍ਗਨ੍ਤ੍ਵਾ.

ਅਪਾਰੁਤਾਤਿ ਵਿਵਟਾ. ਤੇਸਨ੍ਤਿ ਸਉਪਨਿਸ੍ਸਯਾਨਂ ਸਤ੍ਤਾਨਂ. ਦ੍ਵਾਰਾਤਿ ਅਰਿਯਮਗ੍ਗਦ੍ਵਾਰਾਨਿ. ਇਦਞ੍ਚ ਅਤ੍ਤਨੋ ਸਯਮ੍ਭੁਞਾਣੇਨ ਸਉਪਨਿਸ੍ਸਯਾਨਂ ਤੇਸਂ ਮਗ੍ਗੁਪ੍ਪਤ੍ਤਿਦਿਟ੍ਠਤਂ ਸਨ੍ਧਾਯ ਵਦਤਿ. ਵਿਹਿਂਸਸਞ੍ਞੀਤਿਆਦੀਸੁ ਏਵਮਤ੍ਥੋ ਦਟ੍ਠਬ੍ਬੋ – ‘‘ਅਹਞ੍ਹਿ ਅਤ੍ਤਨੋ ਪਗੁਣਂ ਸੁਪ੍ਪਵਤ੍ਤਿਤਮ੍ਪਿ ਇਮਂ ਪਣੀਤਂ ਧਮ੍ਮਂ ਅਜਾਨਨ੍ਤੇਸੁ ਮਨੁਜੇਸੁ ਦੇਸਨਾਯ ਵਿਹਿਂਸਾ ਕਾਯਵਾਚਾਕਿਲਮਥੋ ਹੋਤੀ’’ਤਿ ਏਵਂ ਵਿਹਿਂਸਸਞ੍ਞੀ ਹੁਤ੍ਵਾ ਨ ਭਾਸਿਂ ਭਾਸਿਤੁਂ ਨ ਇਚ੍ਛਿਂ. ਇਦਾਨਿ ਪਨ ਹੇਤੁਸਮ੍ਪਨ੍ਨਾ ਅਤ੍ਤਨੋ ਸਦ੍ਧਾਭਾਜਨਂ ਵਿਵਰਨ੍ਤੁ, ਪੂਰੇਸ੍ਸਾਮਿ ਨੇਸਂ ਸਙ੍ਕਪ੍ਪਨ੍ਤਿ.

ਪਞ੍ਚਵਗ੍ਗਿਯਕਥਾਵਣ੍ਣਨਾ

੧੦. ਆਲ਼ਾਰੋਤਿ ਨਾਮਂ. ਕਾਲਾਮੋਤਿ ਗੋਤ੍ਤਂ. ਭਗਵਤੋਪਿ ਖੋ ਞਾਣਂ ਉਦਪਾਦੀਤਿ ਕਿਂ ਇਦਾਨੇਵ ਉਦਪਾਦਿ, ਨਨੁ ਬੋਧਿਮੂਲੇ ਤੇਕਾਲਿਕਾ, ਕਾਲਵਿਨਿਮੁਤ੍ਤਾ ਚ ਸਬ੍ਬੇ ਧਮ੍ਮਾ ਸਬ੍ਬਾਕਾਰਤੋ ਦਿਟ੍ਠਾਤਿ? ਸਚ੍ਚਂ ਦਿਟ੍ਠਾ, ਤਥਾਪਿ ਨਾਮਾਦਿਵਸੇਨ ਅਵਿਕਪ੍ਪਿਤਾ ਏਕਚਿਤ੍ਤਕ੍ਖਣਿਕਤ੍ਤਾ ਸਬ੍ਬਞ੍ਞੁਤਞ੍ਞਾਣਸ੍ਸ. ਨ ਹਿ ਏਕੇਨ ਚਿਤ੍ਤੇਨ ਸਬ੍ਬਧਮ੍ਮਾਨਂ ਨਾਮਜਾਤਿਆਦਿਕਂ ਪਚ੍ਚੇਕਂ ਅਨਨ੍ਤਂ ਵਿਭਾਗਂ ਵਿਕਪ੍ਪੇਤੁਂ ਸਕ੍ਕਾ ਵਿਕਪ੍ਪਾਨਂ ਵਿਰੁਦ੍ਧਾਨਂ ਸਹਾਨੁਪ੍ਪਤ੍ਤਿਤੋ, ਸਬ੍ਬਵਿਕਪ੍ਪਾਰਹਧਮ੍ਮਦਸ੍ਸਨਮੇਵ ਪਨਾਨੇਨ ਸਕ੍ਕਾ ਕਾਤੁਂ. ਯਥਾ ਦਿਟ੍ਠੇਸੁ ਪਨ ਯਥਿਚ੍ਛਿਤਾਕਾਰਂ ਆਰਬ੍ਭ ਵਿਕਪ੍ਪੋ ਉਪ੍ਪਜ੍ਜਤਿ ਚਕ੍ਖੁਵਿਞ੍ਞਾਣੇਨ ਦਿਟ੍ਠੇ ਚਿਤ੍ਤਪਟੇ ਵਿਯ. ਇਧਾਪਿ ਆਲ਼ਾਰਂ ਨਿਸ੍ਸਾਯ ਆਵਜ੍ਜਨਾਨਨ੍ਤਰਮੇਵ ਸਬ੍ਬਾਕਾਰਞਾਣਂ ਉਦਪਾਦਿ. ਨ ਕੇਵਲਞ੍ਚ ਤਂ, ਅਥ ਖੋ ਪਞ੍ਚਵਗ੍ਗਿਯਾ ਏਵ ਪਠਮਂ ਧਮ੍ਮਂ ਜਾਨਿਸ੍ਸਨ੍ਤਿ, ਤਪ੍ਪਮੁਖਾ ਚ ਦੇਵਤਾ, ਆਲ਼ਾਰੋ ਕਾਲਂ ਕਤ੍ਵਾ ਆਕਿਞ੍ਚਞ੍ਞਾਯਤਨੇ, ਉਦਕੋ ਚ ਨੇਵਸਞ੍ਞਾਨਾਸਞ੍ਞਾਯਤਨੇ ਨਿਬ੍ਬਤ੍ਤੋਤਿ ਏਵਮਾਦਿਕਂ ਸਬ੍ਬਮ੍ਪਿ ਨਿਸ੍ਸਾਯ ਞਾਣਂ ਉਪ੍ਪਜ੍ਜਤਿ ਏਵ. ਤਂ ਪਨ ਖਣਸਮ੍ਪਤ੍ਤਿਯਾ ਦੁਲ੍ਲਭਭਾਵਂ ਦਸ੍ਸੇਤੁਂ ਕਮੇਨ ਓਲੋਕੇਤ੍ਵਾ ਦੇਵਤਾਯ ਵੁਤ੍ਤੇ ਞਾਣਂ ਵਿਯ ਕਤ੍ਵਾ ਵੁਤ੍ਤਂ. ਸਦ੍ਦਗਤਿਯਾ ਹਿ ਬਨ੍ਧਤ੍ਤਾ ਏਕੇਨ ਞਾਣੇਨ ਞਾਤਮ੍ਪਿ ਵੁਚ੍ਚਮਾਨਂ ਕਮੇਨ ਞਾਤਂ ਵਿਯ ਪਟਿਭਾਤਿ, ਦੇਵਤਾਪਿ ਚ ਭਗਵਤਾ ਞਾਤਮੇਵਤ੍ਥਂ ਆਰੋਚੇਸਿ. ਤੇਨੇਵ ‘‘ਭਗਵਤੋਪਿ ਖੋ ਞਾਣਂ ਉਦਪਾਦੀ’’ਤਿ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਏਵਮਞ੍ਞਤ੍ਥਾਪਿ ਈਦਿਸੇਸੁ ‘‘ਲੋਕਂ ਵੋਲੋਕੇਨ੍ਤੋ ਅਸੁਕਂ ਅਦ੍ਦਸ, ਤਤ੍ਥ ਮਯਿ ਗਤੇ ਕਿਂ ਭਵਿਸ੍ਸਤੀ’’ਤਿ ਏਵਮਾਦਿਨਾ ਸਤ੍ਥੁ ਹਿਤੇਸਿਤਾਸਨ੍ਦਸ੍ਸਨਵਸਪ੍ਪਵਤ੍ਤੇਸੁ. ਸਬ੍ਬਤ੍ਥ ਵਚਨਗਤਿਯਂ ਕਮਵੁਤ੍ਤਿਤੇ ਪਞ੍ਞਾਯਮਾਨੇਪਿ ਏਕੇਨੇਵ ਞਾਣੇਨ ਸਕਲਾਵਬੋਧੋ ਵੇਦਿਤਬ੍ਬੋ. ਬਹੁਕਾਰਾ ਖੋ ਮੇ ਪਞ੍ਚਵਗ੍ਗਿਯਾਤਿ ਉਪਕਾਰਸ੍ਸਾਪਿ ਵਿਜ੍ਜਮਾਨਤਂ ਸਨ੍ਧਾਯ ਵੁਤ੍ਤਂ, ਨ ਪਨ ਧਮ੍ਮਦੇਸਨਾਯ ਕਾਰਣਤ੍ਤੇਨ ਅਨੁਪਕਾਰਾਨਮ੍ਪਿ ਦੇਸਨਤੋ.

੧੧. ਅਨ੍ਤਰਾ ਚ ਗਯਂ ਅਨ੍ਤਰਾ ਚ ਬੋਧਿਨ੍ਤਿ ਗਯਾਯ, ਬੋਧਿਸ੍ਸ ਚ ਅਨ੍ਤਰੇ ਤਿਗਾਵੁਤੇ ਠਾਨੇ.

ਸਬ੍ਬਾਭਿਭੂਤਿ ਸਬ੍ਬਂ ਤੇਭੂਮਕਧਮ੍ਮਂ ਅਭਿਭਵਿਤ੍ਵਾ ਠਿਤੋ. ਅਨੂਪਲਿਤ੍ਤੋਤਿ ਕਿਲੇਸਲੇਪੇਨ ਅਲਿਤ੍ਤੋ. ਤਤੋ ਏਵ ਸਬ੍ਬਞ੍ਜਹੋ. ਤਣ੍ਹਕ੍ਖਯੇ ਵਿਮੁਤ੍ਤੋਤਿ ਤਣ੍ਹਕ੍ਖਯੇ ਨਿਬ੍ਬਾਨੇ ਆਰਮ੍ਮਣਕਰਣਵਸਏਨ ਵਿਮੁਤ੍ਤੋ. ਏਵਂ ਸਯਂ ਸਬ੍ਬਧਮ੍ਮੇ ਅਤ੍ਤਨਾਵ ਜਾਨਿਤ੍ਵਾ. ਕਮੁਦ੍ਦਿਸੇਯ੍ਯਨ੍ਤਿ ਕਂ ਅਞ੍ਞਂ ‘‘ਅਯਂ ਮੇ ਆਚਰਿਯੋ’’ਤਿ ਉਦ੍ਦਿਸੇਯ੍ਯਂ.

ਕਾਸਿਨਂ ਪੁਰਨ੍ਤਿ ਬਾਰਾਣਸਿਂ. ਆਹਞ੍ਛਨ੍ਤਿ ਆਹਨਿਸ੍ਸਾਮਿ. ਅਮਤਾਧਿਗਮਾਯ ਉਗ੍ਘੋਸਨਤੋ ਅਮਤਦੁਨ੍ਦੁਭਿਨ੍ਤਿ ਸਤ੍ਥੁ ਧਮ੍ਮਦੇਸਨਾ ਵੁਤ੍ਤਾ, ‘‘ਅਮਤਭੇਰਿਂ ਪਹਰਿਸ੍ਸਾਮੀ’’ਤਿ ਗਚ੍ਛਾਮੀਤਿ ਅਤ੍ਥੋ.

ਅਰਹਸਿ ਅਨਨ੍ਤਜਿਨੋਤਿ ਅਨਨ੍ਤਜਿਨੋਪਿ ਭਵਿਤੁਂ ਯੁਤ੍ਤੋਤਿ ਅਤ੍ਥੋ. ਅਨਨ੍ਤਞਾਣਤਾਯ ਅਨਨ੍ਤੋ ਜਿਨੋ ਚ, ਅਨਨ੍ਤੇਨ ਵਾ ਞਾਣੇਨ, ਅਨਨ੍ਤਂ ਵਾ ਦੋਸਂ ਜਿਤਵਾ, ਉਪ੍ਪਾਦਵਯਨ੍ਤਰਹਿਤਤਾਯ ਵਾ ਅਨਨ੍ਤਂ ਨਿਬ੍ਬਾਨਂ ਅਜਿਨਿ ਕਿਲੇਸਾਰਯੋ ਮਦ੍ਦਿਤ੍ਵਾ ਗਣ੍ਹੀਤਿਪਿ ਅਨਨ੍ਤਜਿਨੋ.

ਹੁਪੇਯ੍ਯਾਪੀਤਿ ਏਵਮ੍ਪਿ ਭਵੇਯ੍ਯ, ਏਵਂਵਿਧੇ ਰੂਪਕਾਯਰਤਨੇ ਈਦਿਸੇਨ ਞਾਣੇਨ ਭਵਿਤਬ੍ਬਨ੍ਤਿ ਅਧਿਪ੍ਪਾਯੋ. ਏਵਂ ਨਾਮ ਕਥਨਞ੍ਹਿਸ੍ਸ ਉਪਨਿਸ੍ਸਯਸਮ੍ਪਨ੍ਨਸ੍ਸ ਅਪਰਕਾਲੇ ਦੁਕ੍ਖਪ੍ਪਤ੍ਤਸ੍ਸ ਭਗਵਨ੍ਤਂ ਉਪਗਮ੍ਮ ਪਬ੍ਬਜਿਤ੍ਵਾ ਮਗ੍ਗਫਲਪਟਿਵੇਧਾਯ ਪਚ੍ਚਯੋ ਜਾਤੋ. ਤਥਾਹੇਸ ਭਗਵਾ ਤੇਨ ਸਮਾਗਮਤ੍ਥਂ ਪਦਸਾਵ ਮਗ੍ਗਂ ਪਟਿਪਜ੍ਜਿ.

੧੨. ਬਾਹੁਲ੍ਲਿਕੋਤਿ ਪਚ੍ਚਯਬਾਹੁਲ੍ਲਿਕੋ. ਪਧਾਨਵਿਬ੍ਭਨ੍ਤੋਤਿ ਪਧਾਨਤੋ ਦੁਕ੍ਕਰਚਰਣਤੋ ਪਰਿਹੀਨੋ. ਨਤ੍ਥਿ ਏਤ੍ਥ ਅਗਾਰਿਯਂ, ਅਗਾਰਸ੍ਸ ਹਿਤਂ ਕਸਿਗੋਰਕ੍ਖਾਦਿਕਮ੍ਮਨ੍ਤਿ ਅਨਗਾਰਿਯਾ, ਪਬ੍ਬਜ੍ਜਾ, ਤਂ ਅਨਗਾਰਿਯਂ. ਪਬ੍ਬਜਨ੍ਤੀਤਿ ਉਪਗਚ੍ਛਨ੍ਤਿ. ਤਦਨੁਤ੍ਤਰਨ੍ਤਿ ਤਂ ਅਨੁਤ੍ਤਰਂ. ਬ੍ਰਹ੍ਮਚਰਿਯਪਰਿਯੋਸਾਨਨ੍ਤਿ ਮਗ੍ਗਬ੍ਰਹ੍ਮਚਰਿਯਸ੍ਸ ਪਰਿਯੋਸਾਨਂ, ਅਰਹਤ੍ਤਫਲਨ੍ਤਿ ਅਤ੍ਥੋ. ਤਸ੍ਸ ਹਿ ਅਤ੍ਥਾਯ ਕੁਲਪੁਤ੍ਤਾ ਪਬ੍ਬਜਨ੍ਤਿ. ਦਿਟ੍ਠੇਵ ਧਮ੍ਮੇਤਿ ਇਮਸ੍ਮਿਂ ਪਚ੍ਚਕ੍ਖੇ ਅਤ੍ਤਭਾਵੇ. ਸਯਨ੍ਤਿ ਅਪਰਪ੍ਪਚ੍ਚਯਾ. ਅਭਿਞ੍ਞਾ ਸਚ੍ਛਿਕਤ੍ਵਾਤਿ ਅਤ੍ਤਨੋਵ ਞਾਣੇਨ ਪਚ੍ਚਕ੍ਖਂ ਕਤ੍ਵਾ. ਉਪਸਮ੍ਪਜ੍ਜਾਤਿ ਪਾਪੁਣਿਤ੍ਵਾ.

ਇਰਿਯਾਯਾਤਿ ਦੁਕ੍ਕਰਇਰਿਯਾਯ. ਉਤ੍ਤਰਿਮਨੁਸ੍ਸਧਮ੍ਮਾਤਿਆਦੀਸੁ ਮਨੁਸ੍ਸਧਮ੍ਮਤੋ ਲੋਕਿਯਞਾਣਤੋ ਉਪਰਿ ਅਰਿਯਂ ਕਾਤੁਂ ਅਲਂ ਸਮਤ੍ਥੋ ਅਲਮਰਿਯੋ. ਞਾਣਦਸ੍ਸਨਵਿਸੇਸੋਤਿ ਸਬ੍ਬਞ੍ਞੁਤਞ੍ਞਾਣਸ੍ਸ ਪੁਬ੍ਬਭਾਗਂ ਅਧਿਪ੍ਪੇਤਂ. ਨੋਤਿ ਨੁ. ਭਾਸਿਤਮੇਤਨ੍ਤਿ ਏਵਰੂਪਮੇਤਂ ਵਾਕ੍ਯਭੇਦਨ੍ਤਿ ਅਤ੍ਥੋ. ਤੇ ਚ ‘‘ਯਦਿ ਏਸ ਪਧਾਨਕਾਲੇ ‘ਅਹਂ ਅਰਹਾ’ਤਿ ਵਦੇਯ੍ਯ, ਮਯਞ੍ਚ ਸਦ੍ਦਹਾਮ, ਨ ਚਾਨੇਨ ਤਦਾ ਵੁਤ੍ਤਂ. ਇਦਾਨਿ ਪਨ ਵਿਜ੍ਜਮਾਨਮੇਵ ਗੁਣਂ ਵਦਤੀ’’ਤਿ ਏਕਪਦੇਨ ਸਤਿਂ ਲਭਿਤ੍ਵਾ ‘‘ਬੁਦ੍ਧੋ ਜਾਤੋ’’ਤਿ ਉਪ੍ਪਨ੍ਨਗਾਰਵਾ ਆਵੁਸੋਵਾਦਂ ਪਹਾਯ ‘‘ਨੋ ਹੇਤਂ, ਭਨ੍ਤੇ’’ਤਿ ਆਹਂਸੁ. ਅਞ੍ਞਾ ਚਿਤ੍ਤਨ੍ਤਿ ਅਞ੍ਞਾਯ ਅਰਹਤ੍ਤਪ੍ਪਤ੍ਤਿਯਾ ਚਿਤ੍ਤਂ.

੧੩. ਅਨ੍ਤਾਤਿ ਕੋਟ੍ਠਾਸਾ ਦ੍ਵੇ ਭਾਗਾ. ਕਾਮੇਸੁ ਕਾਮਸੁਖਲ੍ਲਿਕਾਨੁਯੋਗੋਤਿ ਵਤ੍ਥੁਕਾਮੇਸੁ ਕਿਲੇਸਕਾਮਸੁਖਸ੍ਸ ਅਨੁਭਵੋ. ਕਿਲੇਸਕਾਮਾ ਏਵ ਵਾ ਆਮਿਸਸੁਖੇਨ ਅਲ੍ਲੀਯਨਤੋ ਕਾਮਸੁਖਲ੍ਲਿਕਾਤਿ ਵੁਤ੍ਤਾਤਿ ਦਟ੍ਠਬ੍ਬਾ. ਗਮ੍ਮੋਤਿ ਗਾਮਵਾਸੀਨਂ ਸਨ੍ਤਕੋ. ਅਤ੍ਤਕਿਲਮਥਾਨੁਯੋਗੋਤਿ ਅਤ੍ਤਨੋ ਕਿਲਮਥਸ੍ਸ ਕਣ੍ਟਕਸੇਯ੍ਯਾਦਿਦੁਕ੍ਖਸ੍ਸ ਅਨੁਯੋਗੋ. ਉਭੋ ਅਨ੍ਤੇਤਿ ਯਥਾਵੁਤ੍ਤੇ ਲੋਭੋ ਵਾ ਸਸ੍ਸਤੋ ਵਾ ਏਕੋ ਅਨ੍ਤੋ, ਦੋਸੋ ਵਾ ਉਚ੍ਛੇਦੋ ਵਾ ਏਕੋਤਿ ਵੇਦਿਤਬ੍ਬੋ.

ਚਕ੍ਖੁਕਰਣੀਤਿਆਦੀਸੁ ਅਤ੍ਤਨਾ ਸਮ੍ਪਯੁਤ੍ਤਞਾਣਚਕ੍ਖੁਂ ਕਰੋਤੀਤਿ ਚਕ੍ਖੁਕਰਣੀ. ਦੁਤਿਯਂ ਤਸ੍ਸੇਵ ਵੇਵਚਨਂ. ਉਪਸਮੋਤਿ ਕਿਲੇਸੁਪਸਮੋ. ਅਭਿਞ੍ਞਾ, ਸਮ੍ਬੋਧੋ ਚ ਚਤੁਸਚ੍ਚਪਟਿਵੇਧੋਵ. ਨਿਬ੍ਬਾਨਂ ਅਸਙ੍ਖਤਧਾਤੁ. ਏਤੇਸਮ੍ਪਿ ਅਤ੍ਥਾਯ ਸਂਵਤ੍ਤਤੀਤਿ ਪਟਿਪਦਂ ਥੋਮੇਤਿ. ਸਮ੍ਮਾਦਿਟ੍ਠੀਤਿ ਞਾਣਂ. ਸਮ੍ਮਾਸਙ੍ਕਪ੍ਪੋਤਿ ਵਿਤਕ੍ਕੋ. ਸੇਸਂ ਧਮ੍ਮਤੋ ਸੁਵਿਞ੍ਞੇਯ੍ਯਮੇਵ.

੧੪. ਏਵਂ ਚਤ੍ਤਾਰੋਪਿ ਮਗ੍ਗੇ ਏਕਤੋ ਦਸ੍ਸੇਤ੍ਵਾ ਇਦਾਨਿ ਤੇਹਿ ਮਗ੍ਗੇਹਿ ਪਟਿਵਿਜ੍ਝਿਤਬ੍ਬਾਨਿ ਚਤ੍ਤਾਰਿ ਅਰਿਯਸਚ੍ਚਾਨਿ ਦਸ੍ਸੇਤੁਂ ‘‘ਇਦਂ ਖੋ ਪਨ, ਭਿਕ੍ਖਵੇ’’ਤਿਆਦਿਮਾਹ. ਜਾਤਿਪਿ ਦੁਕ੍ਖਾਤਿਆਦੀਸੁ ਤਤ੍ਥ ਤਤ੍ਥ ਭਵੇ ਨਿਬ੍ਬਤ੍ਤਮਾਨਾਨਂ ਸਤ੍ਤਾਨਂ ਸਬ੍ਬਪਠਮਂ ਰੂਪਾਰੂਪਧਮ੍ਮਪ੍ਪਵਤ੍ਤਿ ਇਧ ਜਾਤਿ ਨਾਮ, ਸਾ ਚ ਤਤ੍ਥ ਤਤ੍ਥ ਭਵੇਸੁ ਉਪਲਬ੍ਭਮਾਨਾਨਂ ਦੁਕ੍ਖਾਦੀਨਂ ਵਤ੍ਥੁਭਾਵਤੋ ਦੁਕ੍ਖਾ, ਏਵਂ ਜਰਾਦੀਸੁ ਦੁਕ੍ਖਵਤ੍ਥੁਕਤਾਯ ਦੁਕ੍ਖਤਾ ਵੇਦਿਤਬ੍ਬਾ. ਪਞ੍ਚੁਪਾਦਾਨਕ੍ਖਨ੍ਧਾ ਪਨ ਦੁਕ੍ਖਦੁਕ੍ਖਵਿਪਰਿਣਾਮਦੁਕ੍ਖਸਙ੍ਖਾਰਦੁਕ੍ਖਵਸੇਨ ਦੁਕ੍ਖਾ ਏਵ. ਪੋਨੋਭਵਿਕਾਤਿ ਪੁਨਬ੍ਭਵਕਰਣਂ ਪੁਨਬ੍ਭਵੋ ਉਤ੍ਤਰਪਦਲੋਪੇਨ, ਪੁਨਬ੍ਭਵੋ ਸੀਲਮੇਤਿਸ੍ਸਾਤਿ ਪੋਨੋਭਵਿਕਾ. ਨਨ੍ਦਿਰਾਗਸਹਗਤਾਤਿ ਏਤ੍ਥ ਰੂਪਾਦੀਸੁ ਨਨ੍ਦਤਿ ਪਿਯਾਯਤੀਤਿ ਨਨ੍ਦੀ, ਸਾ ਏਵ ਰਾਗੋਤਿ ਨਨ੍ਦਿਰਾਗੋਤਿ ਭਾਵਪ੍ਪਧਾਨੋਯਂ ਨਿਦ੍ਦੇਸੋ, ਨਨ੍ਦਿਰਾਗਤ੍ਤਨ੍ਤਿ ਅਤ੍ਥੋ. ਤੇਨ ਸਹਗਤਾਨਿ ਨਨ੍ਦਿਰਾਗਸਹਗਤਾ. ਤਤ੍ਰ ਤਤ੍ਰਾਤਿ ਤਸ੍ਮਿਂ ਤਸ੍ਮਿਂ ਭਵੇ. ਰੂਪਾਦੀਸੁ ਛਸੁ ਆਰਮ੍ਮਣੇਸੁ ਕਾਮਸ੍ਸਾਦਨਵਸੇਨ ਪਵਤ੍ਤਾ ਕਾਮਤਣ੍ਹਾ ਨਾਮ. ਸਸ੍ਸਤਦਿਟ੍ਠਿਯਾ ਸਹ ਪਵਤ੍ਤਾ ਭਵਤਣ੍ਹਾ. ਉਚ੍ਛੇਦਦਿਟ੍ਠਿਯਾ ਸਹ ਪਵਤ੍ਤਾ ਵਿਭਵਤਣ੍ਹਾ. ਅਸੇਸਵਿਰਾਗਨਿਰੋਧੋਤਿਆਦਿਨਾ ਨਿਬ੍ਬਾਨਮੇਵ ਵੁਚ੍ਚਤਿ. ਤਤ੍ਥ ਵਿਰਜ੍ਜਨਂ ਵਿਗਮਨਂ ਵਿਰਾਗੋ. ਨਿਰੁਜ੍ਝਨਂ ਨਿਰੋਧੋ. ਉਭਯੇਨਾਪਿ ਸੁਟ੍ਠੁ ਵਿਗਮੋਵ ਵੁਚ੍ਚਤਿ. ਅਸੇਸਾਯਪਿ ਤਣ੍ਹਾਯ ਵਿਰਾਗੋ, ਨਿਰੋਧੋ ਚ ਯੇਨ ਹੋਤਿ, ਸੋ ਅਸੇਸਵਿਰਾਗਨਿਰੋਧੋ, ਨਿਬ੍ਬਾਨਮੇਵ. ਯਸ੍ਮਾ ਚ ਤਂ ਆਗਮ੍ਮ ਤਣ੍ਹਂ, ਵਟ੍ਟਞ੍ਚ ਚਜਨ੍ਤਿ ਪਟਿਨਿਸ੍ਸਜ੍ਜਨ੍ਤਿ ਵਿਮੁਚ੍ਚਨ੍ਤਿ ਨ ਅਲ੍ਲੀਯਨ੍ਤਿ, ਤਸ੍ਮਾ ਚਾਗੋ ਪਟਿਨਿਸ੍ਸਗ੍ਗੋ ਮੁਤ੍ਤਿ ਅਨਾਲਯੋਤਿ ਵੁਚ੍ਚਤਿ.

੧੫. ਚਕ੍ਖੁਨ੍ਤਿਆਦੀਨਿ ਞਾਣਵੇਵਚਨਾਨੇਵ.

੧੬. ਯਾਵਕੀਵਞ੍ਚਾਤਿ ਯਤ੍ਤਕਂ ਕਾਲਂ. ਤਿਪਰਿਵਟ੍ਟਨ੍ਤਿ ਸਚ੍ਚਞਾਣ, ਕਿਚ੍ਚਞਾਣ, ਕਤਞਾਣਸਙ੍ਖਾਤਾਨਂ ਤਿਣ੍ਣਂ ਪਰਿਵਟ੍ਟਾਨਂ ਵਸੇਨ ਤਿਪਰਿਵਟ੍ਟਂ ਞਾਣਦਸ੍ਸਨਂ. ਏਤ੍ਥ ਚ ‘‘ਇਦਂ ਦੁਕ੍ਖਂ ਅਰਿਯਸਚ੍ਚਂ, ਇਦਂ ਦੁਕ੍ਖਸਮੁਦਯ’’ਨ੍ਤਿ ਏਵਂ ਚਤੂਸੁ ਸਚ੍ਚੇਸੁ ਯਥਾਭੂਤਞਾਣਂ ਸਚ੍ਚਞਾਣਂ ਨਾਮ. ਤੇਸੁ ਏਵ ‘‘ਪਰਿਞ੍ਞੇਯ੍ਯਂ ਪਹਾਤਬ੍ਬਂ ਸਚ੍ਛਿਕਾਤਬ੍ਬਂ ਭਾਵੇਤਬ੍ਬ’’ਨ੍ਤਿ ਏਵਂ ਕਤ੍ਤਬ੍ਬਕਿਚ੍ਚਜਾਨਨਞਾਣਂ ਕਿਚ੍ਚਞਾਣਂ ਨਾਮ. ‘‘ਪਰਿਞ੍ਞਾਤਂ ਪਹੀਨਂ ਸਚ੍ਛਿਕਤਂ ਭਾਵਿਤ’’ਨ੍ਤਿ ਤਸ੍ਸ ਕਿਚ੍ਚਸ੍ਸ ਕਤਭਾਵਜਾਨਨਞਾਣਂ ਕਤਞਾਣਂ ਨਾਮ. ਦ੍ਵਾਦਸਾਕਾਰਨ੍ਤਿ ਤੇਸਮੇਵ ਏਕੇਕਸ੍ਮਿਂ ਸਚ੍ਚੇ ਤਿਣ੍ਣਂ ਤਿਣ੍ਣਂ ਆਕਾਰਾਨਂ ਵਸੇਨ ਦ੍ਵਾਦਸਾਕਾਰਂ.

ਅਭਿਸਮ੍ਬੁਦ੍ਧੋਤਿ ਪਚ੍ਚਞ੍ਞਾਸਿਨ੍ਤਿ ਅਭਿਸਮ੍ਬੁਦ੍ਧੋ ਅਰਹਤ੍ਤਂ ਪਤ੍ਤੋਤਿ ਏਵਂ ਨ ਪਟਿਜਾਨਿਂ. ਯਤੋ ਚ ਖੋਤਿ ਯਤੋ ਬੋਧਿਮੂਲੇ ਨਿਸਿਨ੍ਨਕਾਲਤੋ ਪਟ੍ਠਾਯ. ਅਥਾਹਨ੍ਤਿ ਤਤੋ ਪਰਂ ਅਹਂ. ਞਾਣਞ੍ਚ ਪਨ ਮੇਤਿ ਪਚ੍ਚਵੇਕ੍ਖਣਞਾਣਂ ਸਨ੍ਧਾਯ ਵਦਤਿ. ਅਕੁਪ੍ਪਾ ਮੇਤਿਆਦਿ ਤਸ੍ਸ ਪਵਤ੍ਤਿਆਕਾਰਦਸ੍ਸਨਂ. ਤਤ੍ਥ ਅਕੁਪ੍ਪਾ ਮੇ ਵਿਮੁਤ੍ਤੀਤਿ ਅਰਹਤ੍ਤਫਲਂ ਤਸ੍ਸ ਮਗ੍ਗਸਙ੍ਖਾਤਕਾਰਣਤੋ ਚ ਆਰਮ੍ਮਣਤੋ ਚ ਅਕੁਪ੍ਪਤਾ ਵੇਦਿਤਬ੍ਬਾ.

ਇਮਸ੍ਮਿਂ ਪਨ ਵੇਯ੍ਯਾਕਰਣਸ੍ਮਿਨ੍ਤਿ ਨਿਗ੍ਗਾਥਸੁਤ੍ਤੇ. ਭਞ੍ਞਮਾਨੇਤਿ ਭਣਿਯਮਾਨੇ. ਧਮ੍ਮਚਕ੍ਖੁਨ੍ਤਿ ਇਧ ਚਤੁਸਚ੍ਚਧਮ੍ਮੇਸੁ ਚਕ੍ਖੁਕਿਚ੍ਚਕਰਣਤੋ ਸੋਤਾਪਤ੍ਤਿਮਗ੍ਗੋ ਅਧਿਪ੍ਪੇਤੋ. ਯਂ ਕਿਞ੍ਚੀਤਿਆਦਿ ਨਿਬ੍ਬਾਨਾਰਮ੍ਮਣਤ੍ਤੇਪਿ ਕਿਚ੍ਚਵਸੇਨ ਅਸਮ੍ਮੋਹਤੋ ਪਵਤ੍ਤਿਦਸ੍ਸਨਤ੍ਥਂ ਵੁਤ੍ਤਂ.

੧੭. ਧਮ੍ਮਚਕ੍ਕਨ੍ਤਿ ਪਟਿਵੇਧਞਾਣਧਮ੍ਮਞ੍ਚੇਵ ਦੇਸਨਾਞਾਣਧਮ੍ਮਞ੍ਚ ਪਵਤ੍ਤਨਟ੍ਠੇਨ ਚਕ੍ਕਨ੍ਤਿ ਧਮ੍ਮਚਕ੍ਕਂ. ਓਭਾਸੋਤਿ ਸਬ੍ਬਞ੍ਞੁਤਞ੍ਞਾਣਾਨੁਭਾਵੇਨ ਪਵਤ੍ਤੋ ਚਿਤ੍ਤਪਚ੍ਚਯਉਤੁਸਮੁਟ੍ਠਾਨੋ ਦਸਸਹਸ੍ਸਿਲੋਕਧਾਤੁਂ ਫਰਿਤ੍ਵਾ ਠਿਤੋ ਓਭਾਸੋ.

੧੮. ਦਿਟ੍ਠੋ ਅਰਿਯਸਚ੍ਚਧਮ੍ਮੋ ਏਤੇਨਾਤਿ ਦਿਟ੍ਠਧਮ੍ਮੋ. ਏਸ ਨਯੋ ਸੇਸੇਸੁਪਿ. ਅਤ੍ਤਨੋ ਪਚ੍ਚਕ੍ਖਤੋ ਅਧਿਗਤਤ੍ਤਾ ਨ ਪਰਂ ਪਚ੍ਚੇਤਿ, ਪਰਸ੍ਸ ਸਦ੍ਧਾਯ ਏਤ੍ਥ ਨ ਪਵਤ੍ਤਤੀਤਿ ਅਪਰਪ੍ਪਚ੍ਚਯੋ. ਏਹਿ ਭਿਕ੍ਖੂਤਿ ਏਤ੍ਤਕੇ ਵੁਤ੍ਤਮਤ੍ਤੇ ਪਬ੍ਬਜ੍ਜਾ, ਉਪਸਮ੍ਪਦਾ ਚ ਸਿਜ੍ਝਤਿ, ਤੇਨੇਵ ਤਤ੍ਥ ਇਤਿ-ਸਦ੍ਦੇਨ ਪਰਿਚ੍ਛੇਦੋ ਦਸ੍ਸਿਤੋਤਿ ਵਦਨ੍ਤਿ. ਕੇਚਿ ਪਨ ‘‘ਸਮ੍ਮਾ ਦੁਕ੍ਖਸ੍ਸ ਅਨ੍ਤਕਿਰਿਯਾਯਾਤਿ ਵਚਨਪਰਿਯੋਸਾਨੇ ਏਵ ਉਪਸਮ੍ਪਦਾ ਸਿਜ੍ਝਤਿ, ਅਟ੍ਠਕਥਾਯਂ ਪਨ ‘ਏਹਿ ਭਿਕ੍ਖੂਤਿ ਭਗਵਤੋ ਵਚਨੇਨਾ’ਤਿ ਇਦਂ ਏਹਿਭਿਕ੍ਖੁਸਦ੍ਦੋਪਲਕ੍ਖਿਤਵਚਨਂ ਏਹਿਭਿਕ੍ਖੁਵਚਨਨ੍ਤਿਆਦਿਪਦਵਸੇਨ ਵੁਤ੍ਤਂ ਮੁਸਾਵਾਦਵਗ੍ਗੋਤਿਆਦੀਸੁ ਵਿਯਾ’’ਤਿ ਵਦਨ੍ਤਿ, ਤਦੇਤਂ ਪਠਮਪਾਰਾਜਿਕਟ੍ਠਕਥਾਯਂ ‘‘ਭਗਵਾ ਹਿ…ਪੇ… ਏਹਿ ਭਿਕ੍ਖੁ, ਚਰ ਬ੍ਰਹ੍ਮਚਰਿਯਂ ਸਮ੍ਮਾ ਦੁਕ੍ਖਸ੍ਸ ਅਨ੍ਤਕਿਰਿਯਾਯਾ’’ਤਿ (ਪਾਰਾ. ਅਟ੍ਠ. ੧.੪੫ ਭਿਕ੍ਖੂਪਦਭਾਜਨੀਯਵਣ੍ਣਨਾ) ਇਮਿਨਾ ਵਚਨੇਨ ਸਮੇਤਿ. ਯਤ੍ਤਕਞ੍ਹਿ ਭਗਵਤਾ ਨਿਯਮੇਨ ਵੁਚ੍ਚਤਿ, ਤਤ੍ਤਕਂ ਸਬ੍ਬਮ੍ਪਿ ਅਙ੍ਗਮੇਵ. ਸੇਕ੍ਖਪੁਥੁਜ੍ਜਨਾਨਞ੍ਹਿ ਏਤਂ ਪਰਿਪੁਣ੍ਣਂ ਵੁਚ੍ਚਤਿ, ਅਸੇਕ੍ਖਾਨਂ ਪਨ ‘‘ਚਰ ਬ੍ਰਹ੍ਮਚਰਿਯ’’ਨ੍ਤਿ ਪਰਿਯੋਸਾਨਨ੍ਤਿ ਦਟ੍ਠਬ੍ਬਂ ਸਿਕ੍ਖਤ੍ਤਯਸਮਿਦ੍ਧਿਤੋ. ਲੋਕਿਯਸਮ੍ਪਦਾਹਿ ਉਪਰਿਭੂਤਾ ਸੇਟ੍ਠਭੂਤਾ ਸਮ੍ਪਦਾਤਿ ਉਪਸਮ੍ਪਦਾ.

੧੯-੨੧. ਨੀਹਾਰਭਤ੍ਤੋਤਿ ਭਿਕ੍ਖੂਹਿ ਗਾਮਤੋ ਨੀਹਰਿਤ੍ਵਾ ਦਿਨ੍ਨਭਤ੍ਤੋ. ਕਲ੍ਲਂ ਨੂਤਿ ਯੁਤ੍ਤਂ ਨੁ. ਏਤਂ ਮਮਾਤਿਆਦਿ ਯਥਾਕ੍ਕਮਂ ਤਣ੍ਹਾਮਾਨਦਿਟ੍ਠਿਗਾਹਾਨਂ ਦਸ੍ਸਨਂ.

੨੨-੨੩. ਤਸ੍ਮਾ ਤਿਹਾਤਿ ਏਤ੍ਥ ਤਿਹਾਤਿ ਨਿਪਾਤਮਤ੍ਤਂ, ਤਸ੍ਮਾਤਿ ਅਤ੍ਥੋ. ਨਿਬ੍ਬਿਨ੍ਦਤੀਤਿ ਵੁਟ੍ਠਾਨਗਾਮਿਨਿਵਿਪਸ੍ਸਨਾਵਸੇਨ ਉਕ੍ਕਣ੍ਠਤਿ. ਵਿਰਜ੍ਜਤੀਤਿ ਚਤੁਨ੍ਨਂ ਮਗ੍ਗਾਨਂ ਵਸੇਨ ਨ ਰਜ੍ਜਤਿ. ਵਿਮੁਚ੍ਚਤੀਤਿ ਫਲਵਸੇਨ ਵਿਮੁਚ੍ਚਤਿ. ਵਿਮੁਤ੍ਤਸ੍ਮਿਨ੍ਤਿਆਦਿ ਪਚ੍ਚਵੇਕ੍ਖਣਞਾਣਦਸ੍ਸਨਂ. ਬ੍ਰਹ੍ਮਚਰਿਯਨ੍ਤਿ ਮਗ੍ਗਬ੍ਰਹ੍ਮਚਰਿਯਂ. ਕਰਣੀਯਂ ਚਤੂਸੁ ਸਚ੍ਚੇਸੁ ਚਤੂਹਿ ਮਗ੍ਗੇਹਿ ਪਚ੍ਚੇਕਂ ਕਤ੍ਤਬ੍ਬਂ ਪਰਿਞ੍ਞਾਦਿਵਸੇਨ ਸੋਲ਼ਸਵਿਧਂ ਕਿਚ੍ਚਂ. ਨਾਪਰਂ ਇਤ੍ਥਤ੍ਤਾਯਾਤਿ ਇਤ੍ਥਭਾਵਾਯ ਸੋਲ਼ਸਕਿਚ੍ਚਭਾਵਾਯ, ਕਿਲੇਸਕ੍ਖਯਾਯ ਵਾ ਅਪਰਂ ਪੁਨ ਮਗ੍ਗਭਾਵਨਾਕਿਚ੍ਚਂ ਮੇ ਨਤ੍ਥੀਤਿ ਪਜਾਨਾਤਿ. ਅਥ ਵਾ ਇਤ੍ਥਤ੍ਤਾਯਾਤਿ ਇਤ੍ਥਭਾਵਤੋ ਵਤ੍ਤਮਾਨਕ੍ਖਨ੍ਧਸਨ੍ਤਾਨਤੋ ਅਪਰਂ ਖਨ੍ਧਸਨ੍ਤਾਨਂ ਮਯ੍ਹਂ ਨ ਭਵਿਸ੍ਸਤੀਤਿ ਅਤ੍ਥੋ.

ਪਬ੍ਬਜ੍ਜਾਕਥਾਵਣ੍ਣਨਾ

੧੫. ਆਲ਼ਮ੍ਬਰਨ੍ਤਿ ਪਣਵਂ. ਵਿਕੇਸਿਕਨ੍ਤਿ ਵਿਪ੍ਪਕਿਣ੍ਣਕੇਸਂ. ਵਿਕ੍ਖੇਲ਼ਿਕਨ੍ਤਿ ਵਿਸ੍ਸਨ੍ਦਮਾਨਲਾਲਂ. ਸੁਸਾਨਂ ਮਞ੍ਞੇਤਿ ਸੁਸਾਨਂ ਵਿਯ ਅਦ੍ਦਸ ਸਕਂ ਪਰਿਜਨਨ੍ਤਿ ਸਮ੍ਬਨ੍ਧੋ. ਉਦਾਨਂ ਉਦਾਨੇਸੀਤਿ ਸਂਵੇਗਵਸਪ੍ਪਵਤ੍ਤਂ ਵਚਨਂ ਨਿਚ੍ਛਾਰੇਸਿ. ਉਪਸ੍ਸਟ੍ਠਨ੍ਤਿ ਦੁਕ੍ਖੇਨ ਸਮ੍ਮਿਸ੍ਸਂ, ਦੁਕ੍ਖੋਤਿਣ੍ਣਂ ਸਬ੍ਬਸਤ੍ਤਕਾਯਜਾਤਨ੍ਤਿ ਅਤ੍ਥੋ.

੨੬. ਇਦਂ ਖੋ ਯਸਾਤਿ ਭਗਵਾ ਨਿਬ੍ਬਾਨਂ ਸਨ੍ਧਾਯਾਹ. ਅਨੁਪੁਬ੍ਬਿਂ ਕਥਨ੍ਤਿ ਅਨੁਪਟਿਪਾਟਿਕਥਂ. ਆਦੀਨਵਨ੍ਤਿ ਦੋਸਂ. ਓਕਾਰਨ੍ਤਿ ਨਿਹੀਨਤਾ ਨਿਹੀਨਜਨਸੇਵਿਤਤ੍ਤਾ. ਸਂਕਿਲੇਸਨ੍ਤਿ ਤੇਹਿ ਸਤ੍ਤਾਨਂ ਸਂਕਿਲੇਸਨਂ, ਸਂਕਿਲੇਸਵਿਸਯਨ੍ਤਿ ਵਾ ਅਤ੍ਥੋ. ਕਲ੍ਲਚਿਤ੍ਤਨ੍ਤਿ ਅਰੋਗਚਿਤ੍ਤਂ. ਸਾਮਂ ਅਤ੍ਤਨਾਵ ਉਕ੍ਕਂਸੋ ਉਕ੍ਖਿਪਨਂ ਏਤਿਸ੍ਸਨ੍ਤਿ ਸਾਮੁਕ੍ਕਂਸਿਕਾ, ਸਚ੍ਚਦੇਸਨਾ. ਤਸ੍ਸਾ ਸਰੂਪਦਸ੍ਸਨਂ ‘‘ਦੁਕ੍ਖ’’ਨ੍ਤਿਆਦਿ.

੨੭. ਅਸ੍ਸਦੂਤੇਤਿ ਅਸ੍ਸਆਰੁਲ਼੍ਹੇ ਦੂਤੇ. ਇਦ੍ਧਾਭਿਸਙ੍ਖਾਰਨ੍ਤਿ ਇਦ੍ਧਿਕਿਰਿਯਂ. ਅਭਿਸਙ੍ਖਰੇਸਿ ਅਕਾਸਿ.

੨੮. ਯਥਾਦਿਟ੍ਠਨ੍ਤਿ ਪਠਮਮਗ੍ਗੇਨ ਦਿਟ੍ਠਂ ਚਤੁਸ੍ਸਚ੍ਚਭੂਮਿਂ ਸੇਸਮਗ੍ਗਤ੍ਤਯੇਨ ਪਚ੍ਚਵੇਕ੍ਖਨ੍ਤਸ੍ਸ, ਪਸ੍ਸਨ੍ਤਸ੍ਸਾਤਿ ਅਤ੍ਥੋ. ਮਾਤੁ ਨੋ ਜੀਵਿਤਨ੍ਤਿ ਏਤ੍ਥ ਨੋਤਿ ਨਿਪਾਤਮਤ੍ਤਂ, ਮਾਤੁ ਜੀਵਿਤਨ੍ਤਿ ਅਤ੍ਥੋ. ਯਸਸ੍ਸ ਖੀਣਾਸਵਤ੍ਤਾ ‘‘ਏਹਿ ਭਿਕ੍ਖੁ, ਸ੍ਵਾਕ੍ਖਾਤੋ ਧਮ੍ਮੋ, ਚਰ ਬ੍ਰਹ੍ਮਚਰਿਯ’’ਨ੍ਤਿ ਏਤ੍ਤਕੇਨੇਵ ਭਗਵਾ ਉਪਸਮ੍ਪਦਂ ਅਦਾਸਿ. ਖੀਣਾਸਵਾਨਞ੍ਹਿ ਏਤ੍ਤਕੇਨੇਵ ਉਪਸਮ੍ਪਦਾ ਅਨੁਞ੍ਞਾਤਾ ਪੁਬ੍ਬੇਵ ਦੁਕ੍ਖਸ੍ਸ ਪਰਿਕ੍ਖੀਣਤ੍ਤਾ. ਚਰ ਬ੍ਰਹ੍ਮਚਰਿਯਨ੍ਤਿ ਸਾਸਨਬ੍ਰਹ੍ਮਚਰਿਯਸਙ੍ਖਾਤਂ ਸਿਕ੍ਖਾਪਦਪੂਰਣਂ ਸਨ੍ਧਾਯ ਵੁਤ੍ਤਂ, ਨ ਮਗ੍ਗਬ੍ਰਹ੍ਮਚਰਿਯਂ.

੩੦. ਸੇਟ੍ਠਾਨੁਸੇਟ੍ਠੀਨਨ੍ਤਿ ਸੇਟ੍ਠਿਨੋ ਚ ਅਨੁਸੇਟ੍ਠਿਨੋ ਚ ਪਵੇਣੀਵਸੇਨ ਆਗਤਾ ਯੇਸਂ ਕੁਲਾਨਂ ਸਨ੍ਤਿ, ਤੇਸਂ ਸੇਟ੍ਠਾਨੁਸੇਟ੍ਠੀਨਂ ਕੁਲਾਨਂ. ਓਰਕੋਤਿ ਲਾਮਕੋ.

੩੨-੩੩. ਮਾ ਏਕੇਨ ਦ੍ਵੇਤਿ ਏਕੇਨ ਮਗ੍ਗੇਨ ਦ੍ਵੇ ਭਿਕ੍ਖੂ ਮਾ ਅਗਮਿਤ੍ਥ. ਵਿਸੁਦ੍ਧੇ ਸਤ੍ਤੇ, ਗੁਣੇ ਵਾ ਮਾਰੇਤੀਤਿ ਮਾਰੋ. ਪਾਪੇ ਨਿਯੁਤ੍ਤੋ ਪਾਪਿਮਾ.

ਸਬ੍ਬਪਾਸੇਹੀਤਿ ਸਬ੍ਬਕਿਲੇਸਪਾਸੇਹਿ. ਯੇ ਦਿਬ੍ਬਾ ਯੇ ਚ ਮਾਨੁਸਾਤਿ ਯੇ ਦਿਬ੍ਬਕਾਮਗੁਣਨਿਸ੍ਸਿਤਾ, ਮਾਨੁਸਕਕਾਮਗੁਣਨਿਸ੍ਸਿਤਾ ਚ ਕਿਲੇਸਪਾਸਾ ਨਾਮ ਅਤ੍ਥਿ, ਸਬ੍ਬੇਹਿ ਤੇਹਿ. ‘‘ਤ੍ਵਂ ਬੁਦ੍ਧੋ’’ਤਿ ਦੇਵਮਨੁਸ੍ਸੇਹਿ ਕਰਿਯਮਾਨਸਕ੍ਕਾਰਸਮ੍ਪਟਿਚ੍ਛਨਂ ਸਨ੍ਧਾਯ ਵਦਤਿ.

ਅਨ੍ਤਲਿਕ੍ਖੇ ਚਰਨ੍ਤੇ ਪਞ੍ਚਾਭਿਞ੍ਞੇਪਿ ਬਨ੍ਧਤੀਤਿ ਅਨ੍ਤਲਿਕ੍ਖਚਰੋ, ਰਾਗਪਾਸੋ. ਮਾਰੋ ਪਨ ਪਾਸਮ੍ਪਿ ਅਨ੍ਤਲਿਕ੍ਖਚਰਂ ਮਞ੍ਞਤਿ. ਮਾਨਸੋਤਿ ਮਨੋਸਮ੍ਪਯੁਤ੍ਤੋ.

ਜਾਨਾਤਿ ਮਨ੍ਤਿ ਸੋ ਕਿਰ ‘‘ਮਹਾਨੁਭਾਵੋ ਅਞ੍ਞੋ ਦੇਵਪੁਤ੍ਤੋ ਨਿਵਾਰੇਤੀਤਿ ਭੀਤੋ ਨਿਵਤ੍ਤਿਸ੍ਸਤਿ ਨੁ ਖੋ’’ਤਿਸਞ੍ਞਾਯ ਵਤ੍ਵਾ ‘‘ਨਿਹਤੋ ਤ੍ਵਮਸਿ ਅਨ੍ਤਕਾ’’ਤਿ ਵੁਤ੍ਤੇ ‘‘ਜਾਨਾਤਿ ਮ’’ਨ੍ਤਿ ਦੁਮ੍ਮਨੋ ਪਲਾਯਿ.

੩੪. ਪਰਿਵਿਤਕ੍ਕੋ ਉਦਪਾਦੀਤਿ ਯਸ੍ਮਾ ਏਹਿਭਿਕ੍ਖੁਭਾਵਾਯ ਉਪਨਿਸ੍ਸਯਰਹਿਤਾਨਮ੍ਪਿ ਪਬ੍ਬਜਿਤੁਕਾਮਤਾ ਉਪ੍ਪਜ੍ਜਿਸ੍ਸਤਿ, ਬੁਦ੍ਧਾ ਚ ਤੇ ਨ ਪਬ੍ਬਾਜੇਨ੍ਤਿ, ਤਸ੍ਮਾ ਤੇਸਮ੍ਪਿ ਪਬ੍ਬਜ੍ਜਾਵਿਧਿਂ ਦਸ੍ਸੇਨ੍ਤੋ ਏਵਂ ਪਰਿਵਿਤਕ੍ਕੇਸੀਤਿ ਦਟ੍ਠਬ੍ਬਂ. ਉਪਨਿਸ੍ਸਯਸਮ੍ਪਨ੍ਨਾ ਪਨ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਏਹਿਭਿਕ੍ਖੁਭਾਵੇਨੇਵ ਪਬ੍ਬਜਨ੍ਤਿ. ਯੇ ਪਟਿਕ੍ਖਿਤ੍ਤਪੁਗ੍ਗਲਾਤਿ ਸਮ੍ਬਨ੍ਧੋ. ਸਯਂ ਪਬ੍ਬਾਜੇਤਬ੍ਬੋਤਿ ਏਤ੍ਥ ‘‘ਕੇਸਮਸ੍ਸੁਂ ਓਹਾਰੇਤ੍ਵਾ’’ਤਿਆਦਿਵਚਨਤੋ ਕੇਸਚ੍ਛੇਦਨਕਾਸਾਯਚ੍ਛਾਦਨਸਰਣਦਾਨਾਨਿ ਪਬ੍ਬਜ੍ਜਾ ਨਾਮ, ਤੇਸੁ ਪਚ੍ਛਿਮਦ੍ਵਯਂ ਭਿਕ੍ਖੂਹਿ ਏਵ ਕਾਤਬ੍ਬਂ, ਕਾਰੇਤਬ੍ਬਂ ਵਾ. ‘‘ਪਬ੍ਬਾਜੇਹੀ’’ਤਿ ਇਦਂ ਤਿਵਿਧਮ੍ਪਿ ਸਨ੍ਧਾਯ ਵੁਤ੍ਤਂ. ਖਣ੍ਡਸੀਮਂ ਨੇਤ੍ਵਾਤਿ ਭਣ੍ਡੁਕਮ੍ਮਾਰੋਚਨਪਰਿਹਰਣਤ੍ਥਂ. ਭਿਕ੍ਖੂਨਞ੍ਹਿ ਅਨਾਰੋਚੇਤ੍ਵਾ ਏਕਸੀਮਾਯ ‘‘ਏਤਸ੍ਸ ਕੇਸੇ ਛਿਨ੍ਦਾ’’ਤਿ ਅਞ੍ਞਂ ਆਣਾਪੇਤੁਮ੍ਪਿ ਨ ਵਟ੍ਟਤਿ. ਪਬ੍ਬਾਜੇਤ੍ਵਾਤਿ ਕੇਸਾਦਿਚ੍ਛੇਦਨਮੇਵ ਸਨ੍ਧਾਯ ਵੁਤ੍ਤਂ ‘‘ਕਾਸਾਯਾਨਿ ਅਚ੍ਛਾਦੇਤ੍ਵਾ’’ਤਿ ਵਿਸੁਂ ਵੁਤ੍ਤਤ੍ਤਾ. ਪਬ੍ਬਾਜੇਤੁਂ ਨ ਲਭਤੀਤਿ ਸਰਣਦਾਨਂ ਸਨ੍ਧਾਯ ਵੁਤ੍ਤਂ, ਅਨੁਪਸਮ੍ਪਨ੍ਨੇਨ ਭਿਕ੍ਖੁਆਣਤ੍ਤਿਯਾ ਦਿਨ੍ਨਮ੍ਪਿ ਸਰਣਂ ਨ ਰੁਹਤਿ.

ਯਸਸ੍ਸੀਤਿ ਪਰਿਵਾਰਸਮ੍ਪਨ੍ਨੋ. ਨਿਜ੍ਜੀਵਨਿਸ੍ਸਤ੍ਤਭਾਵਨ੍ਤਿ ‘‘ਕੇਸਾ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਥਦ੍ਧੋ ਪਥਵੀਧਾਤੂ’’ਤਿਆਦਿਨਯਂ ਸਙ੍ਗਣ੍ਹਾਤਿ, ਸਬ੍ਬਂ ਵਿਸੁਦ੍ਧਿਮਗ੍ਗੇ (ਵਿਸੁਦ੍ਧਿ. ੧.੩੧੧) ਆਗਤਨਯੇਨ ਗਹੇਤਬ੍ਬਂ. ਪੁਬ੍ਬੇਤਿ ਪੁਬ੍ਬਬੁਦ੍ਧੁਪ੍ਪਾਦੇਸੁ. ਮਦ੍ਦਿਤਸਙ੍ਖਾਰੋਤਿ ਵਿਪਸ੍ਸਨਾਵਸੇਨ ਵੁਤ੍ਤਂ. ਭਾਵਿਤਭਾਵਨੋਤਿ ਸਮਥਵਸੇਨਾਪਿ.

ਕਾਸਾਯਾਨਿ ਤਿਕ੍ਖਤ੍ਤੁਂ ਵਾ…ਪੇ… ਪਟਿਗ੍ਗਾਹਾਪੇਤਬ੍ਬੋਤਿ ਏਤ੍ਥ ‘‘ਸਬ੍ਬਦੁਕ੍ਖਨਿਸ੍ਸਰਣਤ੍ਥਾਯ ਇਮਂ ਕਾਸਾਵਂ ਗਹੇਤ੍ਵਾ’’ਤਿ ਵਾ ‘‘ਤਂ ਕਾਸਾਵਂ ਦਤ੍ਵਾ’’ਤਿ ਵਾ ਵਤ੍ਵਾ ‘‘ਪਬ੍ਬਾਜੇਥ ਮਂ, ਭਨ੍ਤੇ, ਅਨੁਕਮ੍ਪਂ ਉਪਾਦਾਯਾ’’ਤਿ ਏਵਂ ਯਾਚਨਪੁਬ੍ਬਕਂ ਚੀਵਰਂ ਪਟਿਚ੍ਛਾਪੇਤਿ. ਅਥਾਪੀਤਿਆਦਿ ਤਿਕ੍ਖਤ੍ਤੁਂ ਪਟਿਗ੍ਗਾਹਾਪਨਤੋ ਪਰਂ ਕਤ੍ਤਬ੍ਬਵਿਧਿਦਸ੍ਸਨਂ. ਅਥਾਪੀਤਿ ਤਤੋ ਪਰਮ੍ਪੀਤਿ ਅਤ੍ਥੋ. ਕੇਚਿ ਪਨ ‘‘ਚੀਵਰਂ ਅਪ੍ਪਟਿਗ੍ਗਾਹਾਪੇਤ੍ਵਾ ਪਬ੍ਬਜਨਪ੍ਪਕਾਰਭੇਦਦਸ੍ਸਨਤ੍ਥਂ ‘‘ਅਥਾਪੀ’’ਤਿ ਵੁਤ੍ਤਂ, ਅਥਾਪੀਤਿ ਚ ਅਥ ਵਾਤਿ ਅਤ੍ਥੋ’’ਤਿ ਵਦਨ੍ਤਿ. ‘‘ਅਦਿਨ੍ਨਂ ਨ ਵਟ੍ਟਤੀ’’ਤਿ ਇਮਿਨਾ ਪਬ੍ਬਜ੍ਜਾ ਨ ਰੁਹਤੀਤਿ ਦਸ੍ਸੇਤਿ.

ਪਾਦੇ ਵਨ੍ਦਾਪੇਤ੍ਵਾਤਿ ਪਾਦਾਭਿਮੁਖਂ ਨਮਾਪੇਤ੍ਵਾ. ਦੂਰੇ ਵਨ੍ਦਨ੍ਤੋਪਿ ਹਿ ਪਾਦੇ ਵਨ੍ਦਤੀਤਿ ਵੁਚ੍ਚਤਿ. ਉਪਜ੍ਝਾਯੇਨ ਵਾਤਿ ਏਤ੍ਥ ਯਸ੍ਸ ਸਨ੍ਤਿਕੇ ਉਪਜ੍ਝਂ ਗਣ੍ਹਾਤਿ, ਅਯਂ ਉਪਜ੍ਝਾਯੋ. ਆਭਿਸਮਾਚਾਰਿਕੇਸੁ ਵਿਨਯਨਤ੍ਥਂ ਯਂ ਆਚਰਿਯਂ ਕਤ੍ਵਾ ਨਿਯ੍ਯਾਤੇਨ੍ਤਿ, ਅਯਂ ਆਚਰਿਯੋ. ਸਚੇ ਪਨ ਉਪਜ੍ਝਾਯੋ ਸਯਮੇਵ ਸਬ੍ਬਂ ਸਿਕ੍ਖਾਪੇਤਿ, ਅਞ੍ਞਸ੍ਮਿਂ ਨ ਨਿਯ੍ਯਾਤੇਤਿ, ਉਪਜ੍ਝਾਯੋਵਸ੍ਸ ਆਚਰਿਯੋਪਿ ਹੋਤਿ, ਯਥਾ ਉਪਸਮ੍ਪਦਾਕਾਲੇ ਸਯਮੇਵ ਕਮ੍ਮਵਾਚਂ ਵਾਚੇਨ੍ਤੋ ਉਪਜ੍ਝਾਯੋਵ ਕਮ੍ਮਵਾਚਾਚਰਿਯੋਪਿ ਹੋਤਿ.

ਅਨੁਨਾਸਿਕਨ੍ਤਂ ਕਤ੍ਵਾ ਦਾਨਕਾਲੇ ਅਨ੍ਤਰਾ ਵਿਚ੍ਛੇਦੋ ਨ ਕਾਤਬ੍ਬੋਤਿ ਆਹ ‘‘ਏਕਸਮ੍ਬਨ੍ਧਾਨੀ’’ਤਿ.

‘‘ਆਭਿਸਮਾਚਾਰਿਕੇਸੁ ਵਿਨੇਤਬ੍ਬੋ’’ਤਿ ਇਮਿਨਾ ਸੇਖਿਯਵਤ੍ਤਖਨ੍ਧਕਵਤ੍ਤੇਸੁ, ਅਞ੍ਞੇਸੁ

ਚ ਸੁਕ੍ਕਵਿਸ੍ਸਟ੍ਠਿਆਦਿਲੋਕਵਜ੍ਜਸਿਕ੍ਖਾਪਦੇਸੁ ਸਾਮਣੇਰੇਹਿ ਵਤ੍ਤਿਤਬ੍ਬਂ, ਤਤ੍ਥ ਅਵਤ੍ਤਮਾਨੋ ਅਲਜ੍ਜੀ, ਦਣ੍ਡਕਮ੍ਮਾਰਹੋ ਚ ਹੋਤੀਤਿ ਦਸ੍ਸੇਤਿ.

ਪਬ੍ਬਜ੍ਜਾਕਥਾਵਣ੍ਣਨਾ ਨਿਟ੍ਠਿਤਾ.

ਦੁਤਿਯਮਾਰਕਥਾਵਣ੍ਣਨਾ

੩੫. ਪਾਲ਼ਿਯਂ ਅਨੁਤ੍ਤਰਂ ਵਿਮੁਤ੍ਤਿਂ ਅਨੁਪਾਪੁਣਾਥਾਤਿ ‘‘ਖੀਣਾਸਵਾ ਮਯਂ, ਕਿਂ ਅਮ੍ਹਾਕਂ ਪਧਾਨੇਨਾ’’ਤਿ ਵਾਸਨਾਦੋਸੇਨ ਵੋਸਾਨਂ ਅਨਾਪਜ੍ਜਿਤ੍ਵਾ ਪਨ੍ਤੇਸੁ ਸੇਨਾਸਨੇਸੁ ਫਲਸਮਾਪਤ੍ਤਿਯਾਵ ਵੀਤਿਨਾਮਨਤ੍ਥਂ, ਤਂ ਦਿਸ੍ਵਾ ਅਞ੍ਞੇਸਮ੍ਪਿ ਦਿਟ੍ਠਾਨੁਗਤਿਸਮਾਪਜ੍ਜਨਤ੍ਥਞ੍ਚ ਓਵਦਤੀਤਿ ਵੇਦਿਤਬ੍ਬਂ.

ਦੁਤਿਯਮਾਰਕਥਾਵਣ੍ਣਨਾ ਨਿਟ੍ਠਿਤਾ.

ਭਦ੍ਦਵਗ੍ਗਿਯਕਥਾਵਣ੍ਣਨਾ

੩੬. ਇਦਂ ਨੇਸਂ ਪੁਬ੍ਬਕਮ੍ਮਨ੍ਤਿ ਤੇਸਂ ਤਿਂਸਜਨਾਨਂ ਏਕਤੋ ਅਭਿਸਮਯਸ੍ਸ ਪੁਬ੍ਬਕਮ੍ਮਂ. ਅਞ੍ਞਮ੍ਪਿ ਤੇਸਂ ਪਚ੍ਚੇਕਂ ਪੁਬ੍ਬਬੁਦ੍ਧੁਪ੍ਪਾਦੇਸੁ ਸਦ੍ਧਮ੍ਮਸ੍ਸਵਨਸਰਣਗਮਨਦਾਨਸੀਲਸਮਾਧਿਵਿਪਸ੍ਸਨਾਸਮਾਯੋਗਵਸੇਨ ਬਹੁਂ ਵਿਵਟ੍ਟੂਪਨਿਸ੍ਸਯਂ ਕੁਸਲਂ ਅਤ੍ਥੇਵਾਤਿ ਗਹੇਤਬ੍ਬਂ. ਇਤਰਥਾ ਹਿ ਤਦਹੇਵ ਪਟਿਵੇਧੋ, ਏਹਿਭਿਕ੍ਖੁਭਾਵਾਦਿਵਿਸੇਸੋ ਚ ਨ ਸਮ੍ਪਜ੍ਜੇਯ੍ਯ.

ਭਦ੍ਦਵਗ੍ਗਿਯਕਥਾਵਣ੍ਣਨਾ ਨਿਟ੍ਠਿਤਾ.

ਉਰੁਵੇਲਪਾਟਿਹਾਰਿਯਕਥਾਵਣ੍ਣਨਾ

੩੭-੩੮. ਪਾਲ਼ਿਯਂ ਅਗਰੂਤਿ ਭਾਰਿਯਂ ਨ ਸਿਯਾਤਿ ਅਤ੍ਥੋ. ਉਭਿਨ੍ਨਂ ਸਜੋਤਿਭੂਤਾਨਨ੍ਤਿ ਉਭੋਸੁ ਸਜੋਤਿਭੂਤੇਸੁ. ਪਤ੍ਤੇ ਪਕ੍ਖਿਪੀਤਿ ਤਂ ਨਾਗਂ ਨਿਹਤਤੇਜਂ ਧਮ੍ਮਦੇਸਨਾਯ ਸਨ੍ਤਪ੍ਪੇਤ੍ਵਾ ਸਰਣਸੀਲਾਨਿ ਦਤ੍ਵਾ ਸਕਲਰਤ੍ਤਿਂ ਭਗਵਨ੍ਤਂ ਪਯਿਰੁਪਾਸਿਤ੍ਵਾ ਠਿਤਂ ਜਟਿਲਾਨਂ ਦਸ੍ਸਨਤ੍ਥਂ ਪਤ੍ਤੇ ਪਕ੍ਖਿਪਿ, ਨ ਅਹਿਤੁਣ੍ਡਿਕੋ ਵਿਯ ਬਲਕ੍ਕਾਰੇਨਾਤਿ ਵੇਦਿਤਬ੍ਬਂ. ਯਤ੍ਰ ਹਿ ਨਾਮਾਤਿ ਯੋ ਨਾਮ.

੩੯. ਅਜ੍ਜਣ੍ਹੋਤਿ ਅਜ੍ਜ ਏਕਦਿਵਸਂ. ਅਗ੍ਗਿਸਾਲਮ੍ਹੀਤਿ ਅਗ੍ਯਾਗਾਰੇ. ਸੁਮਨਾਨਂ ਬੁਦ੍ਧਾਨਂ ਮਨਸਾ ਸਦਿਸੋ ਮਨੋ ਅਸ੍ਸਾਤਿ ਸੁਮਨਮਨਸੋ. ਅਧਿਚਿਤ੍ਤੋਤਿ ਮਹਾਕਰੁਣਾਦੀਹਿ ਅਧਿਚਿਤ੍ਤੋ. ਉਦਿਚ੍ਛਰੇਤਿ ਉਲ੍ਲੋਕੇਸੁਂ, ਪਰਿਵਾਰੇਸੁਨ੍ਤਿ ਅਤ੍ਥੋ. ਅਨੇਕਵਣ੍ਣਾ ਅਚ੍ਚਿਯੋਤਿ ਛਬ੍ਬਣ੍ਣਰਂਸਿਯੋ ਵੁਤ੍ਤਾ. ਅਹਂ ਤੇ ਧੁਵਭਤ੍ਤੇਨ ਪਟਿਮਾਨਨਂ ਕਰਿਸ੍ਸਾਮੀਤਿ ਸੇਸੋ.

੪੦. ਅਭਿਕ੍ਕਨ੍ਤਾਯ ਰਤ੍ਤਿਯਾਤਿ ਪਰਿਕ੍ਖੀਣਾਯ ਰਤ੍ਤਿਯਾ, ਮਜ੍ਝਰਤ੍ਤਿਸਮਯੇਤਿ ਅਤ੍ਥੋ. ਅਭਿਕ੍ਕਨ੍ਤਵਣ੍ਣਾਤਿ ਅਭਿਰੂਪਚ੍ਛਵਿਵਣ੍ਣਾ. ਕੇਵਲਕਪ੍ਪਨ੍ਤਿ ਏਤ੍ਥ ਕੇਵਲ-ਸਦ੍ਦਸ੍ਸ ਅਨਵਸੇਸਤ੍ਥੋ, ਕਪ੍ਪ-ਸਦ੍ਦਸ੍ਸ ਸਮਨ੍ਤਭਾਵੋ, ਤਸ੍ਮਾ ਅਨਵਸੇਸਂ ਸਮਨ੍ਤਤੋ ਵਨਸਣ੍ਡਨ੍ਤਿ ਅਤ੍ਥੋ. ਚਤੁਦ੍ਦਿਸਾਤਿ ਚਤੂਸੁ ਦਿਸਾਸੁ. ਯਤ੍ਰ ਹਿ ਨਾਮਾਤਿ ਯਂ ਨਾਮ.

੪੩. ਅਙ੍ਗਮਗਧਾਤਿ ਅਙ੍ਗਮਗਧਰਟ੍ਠਵਾਸਿਨੋ. ਇਦ੍ਧਿਪਾਟਿਹਾਰਿਯਨ੍ਤਿ ਅਭਿਞ੍ਞਿਦ੍ਧਿਯੇਵ ਪਟਿਪਕ੍ਖਾਨਂ ਤਿਤ੍ਥਿਯਾਨਂ, ਵੇਨੇਯ੍ਯਸਤ੍ਤਗਤਦੋਸਾਨਞ੍ਚ ਹਰਣਤੋ ਅਪਨਯਨਤੋ ਪਾਟਿਹਾਰਿਯਂ, ਤਂ ਤਂ ਵਾ ਸਤ੍ਤਹਿਤਂ ਪਟਿਚ੍ਚ ਹਰਿਤਬ੍ਬਂ ਪਵਤ੍ਤੇਤਬ੍ਬਨ੍ਤਿ ਪਟਿਹਾਰਿਯਂ, ਤਦੇਵ ਪਾਟਿਹਾਰਿਯਂ. ਇਦ੍ਧਿ ਏਵ ਪਾਟਿਹਾਰਿਯਂ ਇਦ੍ਧਿਪਾਟਿਹਾਰਿਯਂ.

੪੪. ਪਂਸੁਕੂਲਂ ਉਪ੍ਪਨ੍ਨਂ ਹੋਤੀਤਿ ਪੁਣ੍ਣਾਯ ਦਾਸਿਯਾ ਸਰੀਰਂ ਪਰਿਕ੍ਖਿਪਿਤ੍ਵਾ ਛਡ੍ਡਿਤਂ ਸਾਣਮਯਂ ਕਿਮਿਕੁਲਾਕੁਲਂ ਪਰਿਯੇਸਨਵਸੇਨ ਉਪ੍ਪਨ੍ਨਂ ਹੋਤਿ, ਯਂ ਭਗਵਾ ਭੂਮਿਂ ਕਮ੍ਪੇਨ੍ਤੋ ਪਾਰੁਪਿਤ੍ਵਾ ਪਚ੍ਛਾ ਮਹਾਕਸ੍ਸਪਤ੍ਥੇਰਸ੍ਸ ਅਦਾਸਿ, ਤਂ ਸਨ੍ਧਾਯੇਤਂ ਵੁਤ੍ਤਨ੍ਤਿ ਵਦਨ੍ਤਿ. ਕਤ੍ਥ ਨੁ ਖੋਤਿਆਦਿਪਰਿਵਿਤਕ੍ਕੋ ਜਟਿਲਾਨਂ ਵਿਵਿਧਪਾਟਿਹਾਰਿਯਦਸ੍ਸਨਤ੍ਥਂ ਕਤੋ. ਪਾਣਿਨਾ ਖਣਨ੍ਤੋ ਵਿਯ ਇਦ੍ਧਿਯਾ ਮਤ੍ਤਿਕਂ ਅਪਨੇਤ੍ਵਾ ਦਿਨ੍ਨਤ੍ਤਾ ਵੁਤ੍ਤਂ ‘‘ਪਾਣਿਨਾ ਪੋਕ੍ਖਰਣਿਂ ਖਣਿਤ੍ਵਾ’’ਤਿ.

੪੬. ਫਾਲਿਯਨ੍ਤੁ, ਕਸ੍ਸਪ, ਕਟ੍ਠਾਨੀਤਿ ਉਰੁਵੇਲਕਸ੍ਸਪੇਨ ਨਿਵੇਦਿਤੇ ਏਵਮਵੋਚਾਤਿ ਦਟ੍ਠਬ੍ਬਂ. ਏਵਂ ਸੇਸੇਸੁਪਿ.

੪੯. ਅਨ੍ਤਰਟ੍ਠਕਾਸੁ ਹਿਮਪਾਤਸਮਯੇਤਿ ਏਤ੍ਥ ਮਾਘਮਾਸਸ੍ਸ ਅਵਸਾਨੇ ਚਤਸ੍ਸੋ, ਫਗ੍ਗੁਣਮਾਸਸ੍ਸ ਆਦਿਮ੍ਹਿ ਚਤਸ੍ਸੋਤਿ ਏਵਂ ਉਭਿਨ੍ਨਂ ਮਾਸਾਨਂ ਅਨ੍ਤਰੇ ਅਟ੍ਠਰਤ੍ਤਿਯੋ ਅਨ੍ਤਰਟ੍ਠਕਾ ਨਾਮ. ਤਾਸੁ ਅਨ੍ਤਰਟ੍ਠਕਾਸੁ ਰਤ੍ਤੀਸੁ ਹਿਮਪਾਤਕਾਲੇ. ਉਮ੍ਮੁਜ੍ਜਨਨਿਮੁਜ੍ਜਨਮ੍ਪਿ ਸਹਸਾ ਤਦੁਭਯਕਰਣਵਸੇਨ ਵੁਤ੍ਤਂ.

੫੦. ਉਦਕਵਾਹਕੋਤਿ ਉਦਕੋਘੋ. ਰੇਣੁਹਤਾਯਾਤਿ ਰਜੋਕਿਣ੍ਣਾਯ, ਅਤਿਨ੍ਤਾਯਾਤਿ ਅਤ੍ਥੋ. ਨਾਵਾਯਾਤਿ ਕੁਲ੍ਲੇਨ. ਇਦਂ ਨੁ ਤ੍ਵਂ ਮਹਾਸਮਣਾਤਿ ਇਧ ਨੁ ਤ੍ਵਂ. ਧ-ਕਾਰਸ੍ਸ ਦ-ਕਾਰਂ, ਅਨੁਸਾਰਞ੍ਚ ਕਤ੍ਵਾ ‘‘ਇਦਂ ਨੂ’’ਤਿ ਵੁਤ੍ਤਂ ‘‘ਏਕਮਿਦਾਹ’’ਨ੍ਤਿਆਦੀਸੁ (ਦੀ. ਨਿ. ੧.੧੬੫, ੨੬੫) ਵਿਯ. ‘‘ਇਮਸ੍ਮਿਂ ਪਦੇਸੇ ਤ੍ਵਂ ਨੁ ਖੋ ਠਿਤੋਸੀ’’ਤਿ ਪੁਚ੍ਛਿ. ਅਯਮਹਮਸ੍ਮੀਤਿ ਅਯਮਹਂ ਇਧ ਠਿਤੋਸ੍ਮੀਤਿ ਅਤ੍ਥੋ.

੫੧. ਚਿਰਪਟਿਕਾਤਿ ਚਿਰਕਾਲਤੋ ਪਟ੍ਠਾਯ. ਕੇਸਮਿਸ੍ਸਂ ਸਬ੍ਬਂ ਪਰਿਕ੍ਖਾਰਂ ਉਦਕੇ ਪਵਾਹੇਤ੍ਵਾਤਿਪਿ ਯੋਜੇਤਬ੍ਬਂ. ਅਰਣਿਕਮਣ੍ਡਲੁਆਦਿਕਾ ਤਾਪਸਪਰਿਕ੍ਖਾਰਾ ਖਾਰੀ ਨਾਮ, ਤਂਹਰਣਕਕਾਜਂ ਖਾਰਿਕਾਜਂ ਨਾਮ. ਅਗ੍ਗਿਹੁਤਮਿਸ੍ਸਨ੍ਤਿ ਅਗ੍ਗਿਪੂਜੋਪਕਰਣਸਹਿਤਂ.

੫੨-੩. ਉਪਸਗ੍ਗੋਤਿ ਉਪਦ੍ਦਵੋ. ‘‘ਅਡ੍ਢੁਡ੍ਢਾਨਿ ਪਾਟਿਹਾਰਿਯਸਹਸ੍ਸਾਨੀ’’ਤਿ ਇਦਂ ਨਾਗਦਮਨਾਦੀਨਿ ਪਨ੍ਨਰਸ ਪਾਟਿਹਾਰਿਯਾਨਿ ਵਜ੍ਜੇਤ੍ਵਾ ਵੁਤ੍ਤਂ ਅਪ੍ਪਕਮਧਿਕਂ ਗਣਨੂਪਗਂ ਨ ਹੋਤੀਤਿ.

੫੪. ਗਯਾਯਨ੍ਤਿ ਗਯਾਨਾਮਿਕਾਯ ਨਦਿਯਾ ਅਦੂਰਭਵਤ੍ਤਾ ਗਾਮੋ ਇਤ੍ਥਿਲਿਙ੍ਗਵਸੇਨ ਗਯਾ ਨਾਮ ਜਾਤੋ, ਤਸ੍ਸਂ. ਗਯਾਸੀਸੇਤਿ ਏਵਂਨਾਮਕੇ ਪਿਟ੍ਠਿਪਾਸਾਣੇ.

‘‘ਯਮਿਦਂ ਚਕ੍ਖੁਸਮ੍ਫਸ੍ਸਪਚ੍ਚਯਾ…ਪੇ… ਸੁਖਂ ਵਾ’’ਤਿਆਦਿਨਾ ਚਕ੍ਖੁਵਿਞ੍ਞਾਣਵੀਥਿਚਿਤ੍ਤੇਸੁ ਸੋਮਨਸ੍ਸਦੋਮਨਸ੍ਸਉਪੇਕ੍ਖਾਵੇਦਨਾਮੁਖੇਨ ਸੇਸਾਰੂਪਕ੍ਖਨ੍ਧਾਨਮ੍ਪਿ ਆਦਿਤ੍ਤਤਂ ਦਸ੍ਸੇਤਿ. ਏਸ ਨਯੋ ਸੇਸੇਸੁਪਿ. ਮਨੋਤਿ ਭਵਙ੍ਗਚਿਤ੍ਤਂ ਮਨੋਦ੍ਵਾਰਸ੍ਸ ਅਧਿਪ੍ਪੇਤਤ੍ਤਾ. ਮਨੋਵਿਞ੍ਞਾਣਨ੍ਤਿ ਮਨੋਦ੍ਵਾਰਵੀਥਿਪਅਯਾਪਨ੍ਨਮੇਵ ਗਹਿਤਂ.

ਉਰੁਵੇਲਪਾਟਿਹਾਰਿਯਕਥਾਵਣ੍ਣਨਾ ਨਿਟ੍ਠਿਤਾ.

ਬਿਮ੍ਬਿਸਾਰਸਮਾਗਮਕਥਾਵਣ੍ਣਨਾ

੫੫. ਯਞ੍ਞਾ ਅਭਿਵਦਨ੍ਤੀਤਿ ਯਾਗਹੇਤੁ ਇਜ੍ਝਨ੍ਤੀਤਿ ਵਦਨ੍ਤਿ. ਉਪਧੀਸੂਤਿ ਏਤ੍ਥ ਦੁਕ੍ਖਸੁਖਾਦੀਨਂ ਅਧਿਟ੍ਠਾਨਟ੍ਠੇਨ ਚਤ੍ਤਾਰੋ ਉਪਧੀ ਕਾਮਖਨ੍ਧਕਿਲੇਸਅਭਿਸਙ੍ਖਾਰੂਪਧੀਨਂ ਵਸੇਨ. ਤੇਸੁ ਖਨ੍ਧੂਪਧਿ ਇਧਾਧਿਪ੍ਪੇਤੋਤਿ ਆਹ ‘‘ਖਨ੍ਧੂਪਧੀਸੁ ਮਲਨ੍ਤਿ ਞਤ੍ਵਾ’’ਤਿ. ਯਞ੍ਞਾਤਿ ਯਞ੍ਞਹੇਤੁ. ਯਿਟ੍ਠੇਤਿ ਮਹਾਯਾਗੇ. ਹੁਤੇਤਿ ਦਿਵਸੇ ਦਿਵਸੇ ਕਤ੍ਤਬ੍ਬੇ ਅਗ੍ਗਿਪਰਿਚਰਣੇ. ਕਿਂ ਵਕ੍ਖਾਮੀਤਿ ਕਥਂ ਵਕ੍ਖਾਮਿ.

੫੭-੮. ਆਸੀਸਨਾਤਿ ਮਨੋਰਥਾ. ਸਿਙ੍ਗੀਸੁਵਣ੍ਣਨਿਕ੍ਖੇਨਾਤਿ ਸਿਙ੍ਗੀਸੁਵਣ੍ਣਸ੍ਸ ਰਾਸਿਨਾ. ਸੁਵਣ੍ਣੇਸੁ ਹਿ ਯੁਤ੍ਤਿਕਤਂ ਹੀਨਂ. ਤਤੋ ਰਸਵਿਦ੍ਧਂ ਸੇਟ੍ਠਂ, ਤਤੋ ਆਕਰੁਪ੍ਪਨ੍ਨਂ ਸੇਟ੍ਠਂ, ਤਤੋ ਯਂਕਿਞ੍ਚਿ ਦਿਬ੍ਬਸੁਵਣ੍ਣਂ ਸੇਟ੍ਠਂ, ਤਤ੍ਰਾਪਿ ਚਾਮੀਕਰਂ, ਤਤੋ ਸਾਤਕੁਮ੍ਭਂ, ਤਤੋ ਜਮ੍ਬੁਨਦਂ, ਤਤੋਪਿ ਸਿਙ੍ਗੀਸੁਵਣ੍ਣਂ ਸੇਟ੍ਠਂ. ਤਸ੍ਸ ਨਿਕ੍ਖਂ ਨਾਮ ਪਞ੍ਚਸੁਵਣ੍ਣਪਰਿਮਾਣਂ. ਅਟ੍ਠਸੁਵਣ੍ਣਾਦਿਭੇਦਂ ਅਨੇਕਵਿਧਮ੍ਪਿ ਵਦਨ੍ਤਿ. ਦਸਸੁ ਅਰਿਯਵਾਸੇਸੂਤਿ –

‘‘ਇਧ, ਭਿਕ੍ਖਵੇ, ਭਿਕ੍ਖੁ ਪਞ੍ਚਙ੍ਗਵਿਪ੍ਪਹੀਨੋ ਹੋਤਿ ਛਲ਼ਙ੍ਗਸਮਨ੍ਨਾਗਤੋ ਏਕਾਰਕ੍ਖੋ ਚਤੁਰਾਪਸ੍ਸੇਨੋ ਪਣੁਨ੍ਨਪਚ੍ਚੇਕਸਚ੍ਚੋ ਸਮਵਯਸਟ੍ਠੇਸਨੋ ਅਨਾਵਿਲਸਙ੍ਕਪ੍ਪੋ ਪਸ੍ਸਦ੍ਧਕਾਯਸਙ੍ਖਾਰੋ ਸੁਵਿਮੁਤ੍ਤਚਿਤ੍ਤੋ ਸੁਵਿਮੁਤ੍ਤਪਞ੍ਞੋ’’ਤਿ (ਦੀ. ਨਿ. ੩.੩੪੮, ੩੬੦; ਅ. ਨਿ. ੧੦.੧੯) –

ਏਵਮਾਗਤੇਸੁ ਦਸਸੁ ਅਰਿਯਵਾਸੇਸੁ. ਤਤ੍ਥ ਪਞ੍ਚਙ੍ਗਵਿਪ੍ਪਹੀਨੋਤਿ ਪਞ੍ਚਨੀਵਰਣੇਹਿ ਵਿਪ੍ਪਯੁਤ੍ਤਤਾ ਵੁਤ੍ਤਾ. ਛਲ਼ਙ੍ਗਸਮਨ੍ਨਾਗਤੋਤਿ ਇਟ੍ਠਾਦੀਸੁ ਛਸੁ ਆਰਮ੍ਮਣੇਸੁ ਸੋਮਨਸ੍ਸਿਤਾਦਿਪਟਿਪਕ੍ਖਾ ਛਲ਼ਙ੍ਗੁਪੇਕ੍ਖਾ ਵੁਤ੍ਤਾ. ਏਕਾਰਕ੍ਖੋਤਿ ਉਪਟ੍ਠਿਤਸਤਿਤਾ. ਸਙ੍ਖਾਯਸੇਵਨਾ ਅਧਿਵਾਸਨਾ ਪਰਿਵਜ੍ਜਨਾ ਵਿਨੋਦਨਾਸਙ੍ਖਾਤਾਨਿ ਚਤ੍ਤਾਰਿ ਅਪਸ੍ਸੇਨਾ ਨਿਸ੍ਸਯਾ ਏਤਸ੍ਸਾਤਿ ਚਤੁਰਾਪਸ੍ਸੇਨੋ, ਏਤੇਨ ਚ ਤੇ ਨਿਸ੍ਸਯਾ ਦਸ੍ਸਿਤਾ. ਪਣੁਨ੍ਨਾਨਿ ਅਪਨੀਤਾਨਿ ਦਿਟ੍ਠਿਗਤਿਕੇਹਿ ਪਚ੍ਚੇਕਂ ਗਹਿਤਾਨਿ ਦਿਟ੍ਠਿਸਚ੍ਚਾਨਿ ਯਸ੍ਸ, ਸੋ ਪਣੁਨ੍ਨਪਚ੍ਚੇਕਸਚ੍ਚੋ, ਤੇਨ ਲੋਕਿਯਞਾਣੇਨ ਦਿਟ੍ਠਿਪ੍ਪਹਾਨਂ ਵੁਤ੍ਤਂ. ਕਾਮੇਸਨਾ ਭਵੇਸਨਾਬ੍ਰਹ੍ਮਚਰਿਯੇਸਨਾਸਙ੍ਖਾਤਾ ਏਸਨਾ ਸਮ੍ਮਦੇਵ ਅਵਯਾ ਅਨੂਨਾ ਸਟ੍ਠਾ ਨਿਸਟ੍ਠਾ ਅਨੇਨਾਤਿ ਸਮਵਯਸਟ੍ਠੇਸਨੋ. ਏਤੇਨ ਤਿਣ੍ਣਂ ਏਸਨਾਨਂ ਅਭਾਵੋ ਵੁਤ੍ਤੋ. ‘‘ਅਨਾਵਿਲਸਙ੍ਕਪ੍ਪੋ’’ਤਿ ਇਮਿਨਾ ਕਾਮਵਿਤਕ੍ਕਾਦੀਹਿ ਅਨਾਵਿਲਚਿਤ੍ਤਤਾ. ‘‘ਪਸ੍ਸਦ੍ਧਕਾਯਸਙ੍ਖਾਰੋ’’ਤਿ ਇਮਿਨਾ ਚਤੁਤ੍ਥਜ੍ਝਾਨਸਮਾਯੋਗੇਨ ਵਿਗਤਦਰਥਤਾ ਵੁਤ੍ਤਾ. ‘‘ਸੁਵਿਮੁਤ੍ਤਚਿਤ੍ਤੋ’’ਤਿ ਇਮਿਨਾ ਮਗ੍ਗੋ. ‘‘ਸੁਵਿਮੁਤ੍ਤਪਞ੍ਞੋ’’ਤਿ ਇਮਿਨਾ ਪਚ੍ਚਵੇਕ੍ਖਣਞਾਣਮੁਖੇਨ ਫਲਞਾਣਂ ਵੁਤ੍ਤਂ. ਏਤੇ ਹਿ ਅਰਿਯਾ ਵਸਨ੍ਤਿ ਏਤ੍ਥਾਤਿ ਅਰਿਯਵਾਸਾਤਿ ਵੁਚ੍ਚਨ੍ਤਿ. ਤੇ ਪਨ ਵਾਸਾ ਵੁਤ੍ਥਾ ਵਸਿਤਾ ਸਮ੍ਪਾਦਿਤਾ ਯੇਨ, ਸੋ ਵੁਤ੍ਥਵਾਸੋ, ਭਗਵਾ. ਦਸਬਲੋਤਿ ਦਸਹਿ ਕਾਯਬਲੇਹਿ, ਞਾਣਬਲੇਹਿ ਚ ਉਪੇਤੋ. ਯਾਨਿ ਹੇਤਾਨਿ –

‘‘ਕਾਲ਼ਾਵਕਞ੍ਚ ਗਙ੍ਗੇਯ੍ਯਂ, ਪਣ੍ਡਰਂ ਤਮ੍ਬਪਿਙ੍ਗਲਂ;

ਗਨ੍ਧਮਙ੍ਗਲਹੇਮਞ੍ਚ, ਉਪੋਸਥਛਦ੍ਦਨ੍ਤਿਮੇ ਦਸਾ’’ਤਿ. (ਮ. ਨਿ. ਅਟ੍ਠ. ੧.੧੪੮; ਸਂ. ਨਿ. ਅਟ੍ਠ. ੨.੨.੨੨; ਅ. ਨਿ. ਅਟ੍ਠ. ੩.੧੦.੨੧; ਵਿਭ. ਅਟ੍ਠ. ੭੬੦; ਉਦਾ. ਅਟ੍ਠ. ੭੫; ਬੁ. ਵ. ਅਟ੍ਠ. ੧.੩੯; ਚੂਲ਼ਨਿ. ਅਟ੍ਠ. ੮੧; ਪਟਿ. ਮ. ਅਟ੍ਠ. ੨.੨.੪੪) –

ਏਵਂ ਵੁਤ੍ਤਾਨਿ ਦਸਹਤ੍ਥਿਕੁਲਾਨਿ ਪੁਰਿਮਪੁਰਿਮਤੋ ਦਸਬਲਗੁਣੋਪੇਤਾਨਿ, ਤੇਸੁ ਸਬ੍ਬਜੇਟ੍ਠਾਨਂ ਦਸਨ੍ਨਂ ਛਦ੍ਦਨ੍ਤਾਨਂ ਬਲਾਨਿ ਭਗਵਤੋ ਕਾਯਸ੍ਸ ਦਸਬਲਾਨਿ ਨਾਮ. ਤਞ੍ਚ ਕਾਲ਼ਾਵਕਸਙ੍ਖਾਤਾਨਂ ਪਕਤਿਹਤ੍ਥੀਨਂ ਕੋਟਿਸਹਸ੍ਸਸ੍ਸ, ਮਜ੍ਝਿਮਪੁਰਿਸਾਨਂ ਪਨ ਦਸਨ੍ਨਂ ਕੋਟਿਸਹਸ੍ਸਾਨਞ੍ਚ ਬਲਂ ਹੋਤਿ, ਤਂ ‘‘ਨਾਰਾਯਨਸਙ੍ਘਾਤਬਲ’’ਨ੍ਤਿਪਿ ਵੁਚ੍ਚਤਿ.

ਯਾਨਿ ਪਨੇਤਾਨਿ ਪਾਲ਼ਿਯਂ ‘‘ਇਧ, ਸਾਰਿਪੁਤ੍ਤ, ਤਥਾਗਤੋ ਠਾਨਞ੍ਚ ਠਾਨਤੋ ਅਟ੍ਠਾਨਞ੍ਚ ਅਟ੍ਠਾਨਤੋ ਯਥਾਭੂਤਂ ਪਜਾਨਾਤੀ’’ਤਿਆਦਿਨਾ (ਮ. ਨਿ. ੧.੧੪੮; ਅ. ਨਿ. ੧੦.੨੧; ਵਿਭ. ੭੬੦; ਪਟਿ. ਮ. ੨.੪੪) ਵੁਤ੍ਤਾਨਿ ਠਾਨਾਠਾਨਞਾਣਬਲਂ, ਕਮ੍ਮਵਿਪਾਕਞਾਣਬਲਂ, ਸਬ੍ਬਤ੍ਥਗਾਮਿਨਿਪਟਿਪਦਾਞਾਣਬਲਂ, ਅਨੇਕਧਾਤੁਨਾਨਾਧਾਤੁਲੋਕਞਾਣਬਲਂ, ਸਤ੍ਤਾਨਂ ਨਾਨਾਧਿਮੁਤ੍ਤਿਕਤਾਞਾਣਬਲਂ, ਇਨ੍ਦ੍ਰਿਯਪਰੋਪਰਿਯਤ੍ਤਞਾਣਬਲਂ, ਝਾਨਵਿਮੋਕ੍ਖਸਮਾਧਿਸਮਾਪਤ੍ਤੀਨਂ ਸਂਕਿਲੇਸਵੋਦਾਨਵੁਟ੍ਠਾਨਞਾਣਬਲਂ, ਪੁਬ੍ਬੇਨਿਵਾਸਞਾਣਬਲਂ, ਦਿਬ੍ਬਚਕ੍ਖੁਞਾਣਬਲਂ, ਆਸਵਕ੍ਖਯਞਾਣਬਲਨ੍ਤਿ ਦਸਬਲਞਾਣਾਨਿ, ਇਮਾਨਿ ਭਗਵਤੋ ਦਸਬਲਾਨਿ ਨਾਮ. ਦਸਹਿ ਅਸੇਕ੍ਖੇਹਿ ਅਙ੍ਗੇਹੀਤਿ ਅਰਹਤ੍ਤਫਲਸਮ੍ਪਯੁਤ੍ਤੇਹਿ ਪਾਲ਼ਿਯਂ ‘‘ਅਸੇਕ੍ਖਾ ਸਮ੍ਮਾਦਿਟ੍ਠਿ…ਪੇ… ਅਸੇਕ੍ਖੋ ਸਮ੍ਮਾਸਮਾਧਿ, ਅਸੇਕ੍ਖਂ ਸਮ੍ਮਾਞਾਣਂ, ਅਸੇਕ੍ਖਾ ਸਮ੍ਮਾਵਿਮੁਤ੍ਤੀ’’ਤਿ (ਦੀ. ਨਿ. ੩.੩੪੮, ੩੬੦) ਏਵਂ ਵੁਤ੍ਤੇਹਿ ਦਸਹਿ ਅਸੇਕ੍ਖਧਮ੍ਮੇਹਿ ਸਮਨ੍ਨਾਗਤੋ. ਏਤ੍ਥ ਚ ਦਸ੍ਸਨਟ੍ਠੇਨ ਵੁਤ੍ਤਾ ਸਮ੍ਮਾਦਿਟ੍ਠਿ ਏਵ ਜਾਨਨਟ੍ਠੇਨ ਸਮ੍ਮਾਞਾਣਨ੍ਤਿਪਿ ਵੁਤ੍ਤਾ, ਵੁਤ੍ਤਾਵਸੇਸਾ ਪਨ ਫਲਚਿਤ੍ਤਸਮ੍ਪਯੁਤ੍ਤਾ ਸਬ੍ਬੇ ਫਸ੍ਸਾਦਿਧਮ੍ਮਾ ਸਮ੍ਮਾਵਿਮੁਤ੍ਤੀਤਿ ਵੁਤ੍ਤਾਤਿ ਦਟ੍ਠਬ੍ਬਂ.

ਬਿਮ੍ਬਿਸਾਰਸਮਾਗਮਕਥਾਵਣ੍ਣਨਾ ਨਿਟ੍ਠਿਤਾ.

ਸਾਰਿਪੁਤ੍ਤਮੋਗ੍ਗਲ੍ਲਾਨਪਬ੍ਬਜ੍ਜਾਕਥਾਵਣ੍ਣਨਾ

੬੦. ਸਾਰੀਬ੍ਰਾਹ੍ਮਣਿਯਾ ਪੁਤ੍ਤੋ ਸਾਰਿਪੁਤ੍ਤੋ. ਮੋਗ੍ਗਲੀਬ੍ਰਾਹ੍ਮਣਿਯਾ ਪੁਤ੍ਤੋ ਮੋਗ੍ਗਲ੍ਲਾਨੋ. ਛਨ੍ਨਪਰਿਬ੍ਬਾਜਕਸ੍ਸਾਤਿ ਸੇਤਵਤ੍ਥੇਨ ਹਿਰਿਕੋਪੀਨਂ ਛਾਦੇਤ੍ਵਾ ਵਿਚਰਣਕਪਰਿਬ੍ਬਾਜਕਸ੍ਸ, ਤੇਨ ‘‘ਨਾਯਂ ਨਗ੍ਗਪਰਿਬ੍ਬਾਜਕੋ’’ਤਿ ਦਸ੍ਸੇਤਿ. ‘‘ਉਪਞ੍ਞਾਤ’’ਨ੍ਤਿ ਇਮਸ੍ਸ ਵਿਵਰਣਂ ਞਾਤੋ ਚੇਵਾਤਿ. ‘‘ਮਗ੍ਗ’’ਨ੍ਤਿ ਇਮਸ੍ਸ ਵਿਵਰਣਂ ਉਪਗਤੋ ਚ ਮਗ੍ਗੋਤਿ. ਤੇਨ ਚ ਉਪਞ੍ਞਾਤਨ੍ਤਿ ਏਤ੍ਥ ਞਾਤ-ਸਦ੍ਦੋ ਞਾਣਪਰਿਯਾਯੋ. ਮਗ੍ਗਨ੍ਤਿ ਲਿਙ੍ਗਵਿਪਲ੍ਲਾਸੇਨ ਮਗ੍ਗੋਵ ਵੁਤ੍ਤੋ. ਉਪਸਦ੍ਦੋ ਚ ਉਪਗਮਨਤ੍ਥੋ ਮਗ੍ਗਸਦ੍ਦੇਨਪਿ ਸਮ੍ਬਨ੍ਧਿਤਬ੍ਬੋਤਿ ਦਸ੍ਸੇਤਿ. ਇਦਂ ਵੁਤ੍ਤਂ ਹੋਤਿ – ਯਸ੍ਮਾ ਪਿਟ੍ਠਿਤੋ ਪਿਟ੍ਠਿਤੋ ਅਨੁਬਨ੍ਧਨਂ ਨਾਮ ਅਤ੍ਥਿਕੇਹਿ ਉਪਞ੍ਞਾਤਂ ਉਪਗਤਞਾਣਞ੍ਚੇਵ ਹੋਤਿ, ਤੇਹਿ ਉਪਗਤੋ ਪਟਿਪਨ੍ਨੋ ਮਗ੍ਗੋ ਚ, ਤਸ੍ਮਾ ਯਂਨੂਨਾਹਂ ਅਨੁਬਨ੍ਧੇਯ੍ਯਨ੍ਤਿ. ਉਪਞ੍ਞਾਤਂ ਨਿਬ੍ਬਾਨਨ੍ਤਿ ਉਪਪਤ੍ਤਿਯਾ ਅਨੁਮਾਨੇਨ ਞਾਤਂ ਨਿਬ੍ਬਾਨਂ. ‘‘ਮਗ੍ਗ’’ਨ੍ਤਿ ਇਮਸ੍ਸ ਵਿਵਰਣਂ ਮਗ੍ਗਨ੍ਤੋਤਿ, ਅਨੁਮਾਨੇਨ ਞਾਤਂ ਪਚ੍ਚਕ੍ਖਤੋ ਦਸ੍ਸਨਤ੍ਥਾਯ ਗਵੇਸਨ੍ਤੋਤਿ ਅਤ੍ਥੋ.

ਨਿਰੋਧੋ ਚ ਨਿਰੋਧੂਪਾਯੋ ਚ ਏਕਸੇਸੇਨ ਨਿਰੋਧੋਤਿ ਵੁਤ੍ਤੋਤਿ ਦਸ੍ਸੇਨ੍ਤੋ ‘‘ਅਥ ਵਾ’’ਤਿਆਦਿਮਾਹ. ਪਟਿਪਾਦੇਨ੍ਤੋਤਿ ਨਿਗਮੇਨ੍ਤੋ.

ਇਤੋ ਉਤ੍ਤਰੀਤਿ ਇਤੋ ਮਯਾ ਲਦ੍ਧਸੋਤਾਪਤ੍ਤਿਤੋ ਉਤ੍ਤਰਿ ਇਤਰਮਗ੍ਗਤ੍ਤਯਂ ਯਦਿਪਿ ਨਤ੍ਥਿ, ਤਥਾਪਿ ਏਸੋ ਏਵ ਮਯਾ ਗਵੇਸਿਤੋ ਨਿਬ੍ਬਾਨਧਮ੍ਮੋਤਿ ਅਤ੍ਥੋ.

੬੨-੩. ਤਦਾਰਮ੍ਮਣਾਯਾਤਿ ਨਿਬ੍ਬਾਨਾਰਮ੍ਮਣਾਯ ਸੋਤਾਪਤ੍ਤਿਫਲਵਿਮੁਤ੍ਤਿਯਾ. ਤੇਸਂ ਆਯਸ੍ਮਨ੍ਤਾਨਨ੍ਤਿ ਸਪਰਿਸਾਨਂ ਤੇਸਂ ਦ੍ਵਿਨ੍ਨਂ ਪਰਿਸਾਨਂ ਤਸ੍ਮਿਂਯੇਵ ਖਣੇ ਭਗਵਤੋ ਧਮ੍ਮਂ ਸੁਤ੍ਵਾ ਅਰਹਤ੍ਤਂ ਪਾਪੁਣਿ, ਅਗ੍ਗਸਾਵਕਾ ਪਨ ਅਤ੍ਤਨੋ ਞਾਣਕਿਚ੍ਚਸ੍ਸ ਮਹਨ੍ਤਤਾਯ ਕਤਿਪਾਹਚ੍ਚਯੇਨ. ਤੇਨਾਹ ‘‘ਏਵ’’ਨ੍ਤਿਆਦਿ. ਉਸੂਯਨਕਿਰਿਯਾਯ ਕਮ੍ਮਭਾਵਂ ਸਨ੍ਧਾਯ ‘‘ਉਪਯੋਗਤ੍ਥੇਵਾ’’ਤਿ ਵੁਤ੍ਤਂ.

ਸਾਰਿਪੁਤ੍ਤਮੋਗ੍ਗਲ੍ਲਾਨਪਬ੍ਬਜ੍ਜਾਕਥਾਵਣ੍ਣਨਾ ਨਿਟ੍ਠਿਤਾ.

ਉਪਜ੍ਝਾਯਵਤ੍ਤਕਥਾਵਣ੍ਣਨਾ

੬੪. ਵਜ੍ਜਾਵਜ੍ਜਨ੍ਤਿ ਖੁਦ੍ਦਕਂ, ਮਹਨ੍ਤਞ੍ਚ ਵਜ੍ਜਂ. ਉਤ੍ਤਿਟ੍ਠਪਤ੍ਤਨ੍ਤਿ ਏਤ੍ਥ ਉਤ੍ਤਿਟ੍ਠਂ ਨਾਮ ਪਿਣ੍ਡਾਯ ਚਰਣਂ ਵੁਚ੍ਚਤਿ ‘‘ਉਤ੍ਤਿਟ੍ਠੇ ਨਪ੍ਪਮਜ੍ਜੇਯ੍ਯਾ’’ਤਿਆਦੀਸੁ (ਧ. ਪ. ੧੬੮) ਵਿਯ. ਉਤ੍ਤਿਟ੍ਠਤ੍ਥਾਯ ਗਹਿਤਂ ਪਤ੍ਤਂ ਉਤ੍ਤਿਟ੍ਠਪਤ੍ਤਂ, ਤੇਨਾਹ ‘‘ਪਿਣ੍ਡਾਯ ਚਰਣਕਪਤ੍ਤ’’ਨ੍ਤਿ. ਤਸ੍ਸ ਉਪਨਾਮੇ ਕੋ ਦੋਸੋਤਿ ਆਹ ‘‘ਤਸ੍ਮਿਂ ਹੀ’’ਤਿਆਦਿ. ਤਸ੍ਮਾਤਿ ਯਸ੍ਮਾ ਮਨੁਸ੍ਸਾ ਏਤਸ੍ਮਿਂਯੇਵ ਏਤੇ ਭੁਞ੍ਜਨ੍ਤੀਤਿ ਉਤ੍ਤਿਟ੍ਠਪਤ੍ਤੇ ਉਚ੍ਛਿਟ੍ਠਸਞ੍ਞਿਨੋ, ਤਸ੍ਮਾ ਉਤ੍ਤਿਟ੍ਠਪਤ੍ਤਨ੍ਤਿ ਵੁਤ੍ਤਂ ਉਤ੍ਤਿਟ੍ਠ-ਸਦ੍ਦੇਨੇਵ ਮਨੁਸ੍ਸਾਨਂ ਸਞ੍ਞਾਯ ਉਚ੍ਛਿਟ੍ਠਤਾਪਿ ਗਮ੍ਮਤੀਤਿ. ਕੇਚਿ ਪਨ ‘‘ਉਚ੍ਛਿਟ੍ਠਸਦ੍ਦੇਨ ਸਮਾਨਤ੍ਥੋ ਉਤ੍ਤਿਟ੍ਠਸਦ੍ਦੋ’’ਤਿ ਵਦਨ੍ਤਿ. ‘‘ਉਤ੍ਤਿਟ੍ਠਾ’’ਤਿ ਤ੍ਵਾਪਚ੍ਚਯਨ੍ਤੋਪਿ ਹੋਤੀਤਿ ਆਹ ‘‘ਉਟ੍ਠਹਿਤ੍ਵਾ’’ਤਿ. ਉਪਜ੍ਝਾਯਂ ਗਹੇਤੁਨ੍ਤਿ ਉਪਜ੍ਝਾਯਤ੍ਤਂ ਮਨਸਾ ਗਹੇਤੁਂ, ਯਾਚਨਵਚਨੇਨ ਤਸ੍ਸ ਅਨੁਮਤਿਂ ਗਹੇਤੁਨ੍ਤਿ ਵਾ ਅਤ੍ਥੋ.

੬੫. ਪਤਿਸ੍ਸਯਨਂ ਪਤਿਸ੍ਸੋ, ਗਰੁਂ ਨਿਸ੍ਸਾਯ ਵਤ੍ਤਨਭਾਵੋ, ਯਂਕਿਞ੍ਚਿ ਗਾਰਵਨ੍ਤਿ ਅਤ੍ਥੋ. ਸਹ ਪਤਿਸ੍ਸੇਨ ਸਪ੍ਪਤਿਸ੍ਸੋ, ਪਰਂ ਜੇਟ੍ਠਂ ਕਤ੍ਵਾ ਤਸ੍ਸੋਵਾਦੇ ਵਤ੍ਤਨਤਾਤਿ ਅਤ੍ਥੋ. ਤੇਨਾਹ ‘‘ਜੇਟ੍ਠਕਭਾਵਞ੍ਚ ਉਪਟ੍ਠਪੇਤ੍ਵਾ’’ਤਿ. ਸਾਹੂਤਿ ਸਾਧੁ ਸੁਨ੍ਦਰਂ. ਲਹੂਤਿ ਅਗਰੁ, ਸੁਭਰਤਾਤਿ ਅਤ੍ਥੋ. ਓਪਾਯਿਕਨ੍ਤਿ ਉਪਾਯਪਟਿਸਂਯੁਤ੍ਤਂ, ਏਵਂ ਪਟਿਪਜ੍ਜਨਂ ਨਿਤ੍ਥਰਣੂਪਾਯੋਤਿ ਅਤ੍ਥੋ. ਪਤਿਰੂਪਨ੍ਤਿ ਸਾਮੀਚਿਕਮ੍ਮਮਿਦਨ੍ਤਿ ਅਤ੍ਥੋ. ਪਾਸਾਦਿਕੇਨਾਤਿ ਪਸਾਦਾਵਹੇਨ ਕਾਯਵਚੀਪਯੋਗੇਨ ਸਮ੍ਪਾਦੇਹੀਤਿ ਅਤ੍ਥੋ. ਕਾਯੇਨਾਤਿ ਏਤਦਤ੍ਥਵਿਞ੍ਞਾਪਕਂ ਹਤ੍ਥਮੁਦ੍ਦਾਦਿਂ ਦਸ੍ਸੇਨ੍ਤੋ ਕਾਯੇਨ ਵਿਞ੍ਞਾਪੇਤਿ. ਸਾਧੂਤਿ ਸਮ੍ਪਟਿਚ੍ਛਨਂ ਸਨ੍ਧਾਯਾਤਿ ਉਪਜ੍ਝਾਯੇਨ ‘‘ਸਾਹੂ’’ਤਿਆਦੀਸੁ ਵੁਤ੍ਤੇਸੁ ਸਦ੍ਧਿਵਿਹਾਰਿਕਸ੍ਸ ‘‘ਸਾਧੂ’’ਤਿ ਸਮ੍ਪਟਿਚ੍ਛਨਂ ਵਚਨਂ ਸਨ੍ਧਾਯ ‘‘ਕਾਯੇਨ ਵਿਞ੍ਞਾਪੇਤੀ’’ਤਿਆਦਿ ਵੁਤ੍ਤਨ੍ਤਿ ਅਧਿਪ੍ਪਾਯੋ. ਆਯਾਚਨਦਾਨਮਤ੍ਤੇਨਾਤਿ ਸਦ੍ਧਿਵਿਹਾਰਿਕਸ੍ਸ ਪਠਮਂ ਆਯਾਚਨਮਤ੍ਤੇਨ, ਤਤੋ ਉਪਜ੍ਝਾਯਸ੍ਸ ਚ ‘‘ਸਾਹੂ’’ਤਿਆਦਿਨਾ ਵਚਨਮਤ੍ਤੇਨਾਤਿ ਅਤ੍ਥੋ.

੬੬. ਅਸ੍ਸਾਤਿ ਸਦ੍ਧਿਵਿਹਾਰਿਕਸ੍ਸ. ਦ੍ਵੇ ਚੀਵਰਾਨੀਤਿ ਉਤ੍ਤਰਾਸਙ੍ਗਂ, ਸਙ੍ਘਾਟਿਞ੍ਚ ਸਨ੍ਧਾਯ ਵਦਤਿ. ਇਤੋ ਪਟ੍ਠਾਯਾਤਿ ‘‘ਨ ਉਪਜ੍ਝਾਯਸ੍ਸ ਭਣਮਾਨਸ੍ਸਾ’’ਤਿ ਏਤ੍ਥ ਨ-ਕਾਰਤੋ ਪਟ੍ਠਾਯ, ਤੇਨ ‘‘ਨਾਤਿਦੂਰੇ’’ਤਿਆਦੀਸੁ ਨ-ਕਾਰਪਟਿਸਿਦ੍ਧੇਸੁ ਆਪਤ੍ਤਿ ਨਤ੍ਥੀਤਿ ਦਸ੍ਸੇਤਿ. ਸਬ੍ਬਤ੍ਥ ਦੁਕ੍ਕਟਾਪਤ੍ਤੀਤਿ ਆਪਦਾਉਮ੍ਮਤ੍ਤਖਿਤ੍ਤਚਿਤ੍ਤਵੇਦਨਟ੍ਟਤਾਦੀਹਿ ਵਿਨਾ ਪਣ੍ਣਤ੍ਤਿਂ ਅਜਾਨਿਤ੍ਵਾਪਿ ਵਦਨ੍ਤਸ੍ਸ ਗਿਲਾਨਸ੍ਸਪਿ ਦੁਕ੍ਕਟਮੇਵ. ਆਪਦਾਸੁ ਹਿ ਅਨ੍ਤਰਨ੍ਤਰਾ ਕਥਾ ਵਤ੍ਤੁਂ ਵਟ੍ਟਤਿ. ਏਵਮਞ੍ਞੇਸੁਪਿ ਨ-ਕਾਰਪਟਿਸਿਦ੍ਧੇਸੁ ਈਦਿਸੇਸੁ, ਇਤਰੇਸੁ ਪਨ ਗਿਲਾਨੋਪਿ ਨ ਮੁਚ੍ਚਤਿ. ਪਾਲ਼ਿਯਂ ‘‘ਹੇਟ੍ਠਾਪੀਠਂ ਵਾ ਪਰਾਮਸਿਤ੍ਵਾ’’ਤਿ ਇਦਂ ਪੁਬ੍ਬੇ ਤਤ੍ਥ ਠਪਿਤਪਤ੍ਤਾਦਿਨਾ ਅਸਙ੍ਘਟ੍ਟਨਤ੍ਥਾਯ ਵੁਤ੍ਤਂ, ਚਕ੍ਖੁਨਾ ਓਲੋਕੇਤ੍ਵਾਪਿ ਅਞ੍ਞੇਸਂ ਅਭਾਵਂ ਞਤ੍ਵਾਪਿ ਠਪੇਤੁਂ ਵਟ੍ਟਤਿ ਏਵ. ਆਪਤ੍ਤਿਯਾ ਆਸਨ੍ਨਨ੍ਤਿ ਆਪਤ੍ਤਿਕਰਣਮੇਵ.

ਗਾਮੇਤਿ ਅਨ੍ਤੋਗਾਮੇ ਤਾਦਿਸੇ ਮਣ੍ਡਪਾਦਿਮ੍ਹਿ. ਅਨ੍ਤਰਘਰੇਤਿ ਅਨ੍ਤੋਗੇਹੇ. ਪਟਿਕ੍ਕਮਨੇਤਿ ਆਸਨਸਾਲਾਯਂ. ਧੋਤਵਾਲਿਕਾਯਾਤਿ ਉਦਕੇਨ ਗਤਟ੍ਠਾਨੇ ਨਿਰਜਾਯ ਪਰਿਸੁਦ੍ਧਵਾਲਿਕਾਯ. ਨਿਦ੍ਧੂਮੇਤਿ ਜਨ੍ਤਾਘਰੇ ਜਲਿਯਮਾਨਅਗ੍ਗਿਧੂਮਰਹਿਤੇ. ਜਨ੍ਤਾਘਰਞ੍ਹਿ ਨਾਮ ਹਿਮਪਾਤਬਹੁਲੇਸੁ ਦੇਸੇਸੁ ਤਪ੍ਪਚ੍ਚਯਰੋਗਪੀਲ਼ਾਦਿਨਿਵਾਰਣਤ੍ਥਂ ਸਰੀਰਸੇਦਾਪਨਟ੍ਠਾਨਂ. ਤਤ੍ਥ ਕਿਰ ਅਨ੍ਧਕਾਰਪਟਿਚ੍ਛਨ੍ਨਤਾਯ ਬਹੂਪਿ ਏਕਤੋ ਪਵਿਸਿਤ੍ਵਾ ਚੀਵਰਂ ਨਿਕ੍ਖਿਪਿਤ੍ਵਾ ਅਗ੍ਗਿਤਾਪਪਰਿਹਾਰਾਯ ਮਤ੍ਤਿਕਾਯ ਮੁਖਂ ਲਿਮ੍ਪਿਤ੍ਵਾ ਸਰੀਰਂ ਯਾਵਦਤ੍ਥਂ ਸੇਦੇਤ੍ਵਾ ਚੁਣ੍ਣਾਦੀਹਿ ਉਬ੍ਬਟ੍ਟੇਤ੍ਵਾ ਨਹਾਯਨ੍ਤਿ. ਤੇਨੇਵ ਪਾਲ਼ਿਯਂ ‘‘ਚੁਣ੍ਣਂ ਸਨ੍ਨੇਤਬ੍ਬ’’ਨ੍ਤਿਆਦਿ ਵੁਤ੍ਤਂ. ਉਲ੍ਲੋਕਨ੍ਤਿ ਉਦ੍ਧਂ ਓਲੋਕਨਟ੍ਠਾਨਂ. ਉਪਰਿਭਾਗਨ੍ਤਿ ਅਤ੍ਥੋ.

ਅਞ੍ਞਤ੍ਥ ਨੇਤਬ੍ਬੋਤਿ ਯਤ੍ਥ ਵਿਹਰਤੋ ਸਾਸਨੇ ਅਨਭਿਰਤਿ ਉਪ੍ਪਨ੍ਨਾ, ਤਤੋ ਅਞ੍ਞਤ੍ਥ ਕਲ੍ਯਾਣਮਿਤ੍ਤਾਦਿਸਮ੍ਪਤ੍ਤਿਯੁਤ੍ਤਟ੍ਠਾਨੇ ਨੇਤਬ੍ਬੋ. ਵਿਸਭਾਗਪੁਗ੍ਗਲਾਨਨ੍ਤਿ ਲਜ੍ਜਿਨੋ ਵਾ ਅਲਜ੍ਜਿਨੋ ਵਾ ਉਪਜ੍ਝਾਯਸ੍ਸ ਅਵਡ੍ਢਿਕਾਮੇ ਸਨ੍ਧਾਯ ਵੁਤ੍ਤਂ. ਸਚੇ ਪਨ ਉਪਜ੍ਝਾਯੋ ਅਲਜ੍ਜੀ ਓਵਾਦਮ੍ਪਿ ਨ ਗਣ੍ਹਾਤਿ, ਲਜ੍ਜਿਨੋ ਚ ਏਤਸ੍ਸ ਵਿਸਭਾਗਾ ਹੋਨ੍ਤਿ, ਤਤ੍ਥ ਉਪਜ੍ਝਾਯਂ ਵਿਹਾਯ ਲਜ੍ਜੀਹੇਵ ਸਦ੍ਧਿਂ ਆਮਿਸਾਦਿਪਰਿਭੋਗੋ ਕਾਤਬ੍ਬੋ. ਉਪਜ੍ਝਾਯਾਦਿਭਾਵੋ ਹੇਤ੍ਥ ਨ ਪਮਾਣਨ੍ਤਿ ਦਟ੍ਠਬ੍ਬਂ. ਪਰਿਵੇਣਂ ਗਨ੍ਤ੍ਵਾਤਿ ਉਪਜ੍ਝਾਯਸ੍ਸ ਪਰਿਵੇਣਂ ਗਨ੍ਤ੍ਵਾ. ‘‘ਨ ਸੁਸਾਨ’’ਨ੍ਤਿ ਇਦਂ ਉਪਲਕ੍ਖਣਂ, ਉਪਚਾਰਸੀਮਤੋ ਬਹਿ ਗਨ੍ਤੁਕਾਮੇਨ ਅਨਾਪੁਚ੍ਛਾ ਗਨ੍ਤੁਂ ਨ ਵਟ੍ਟਤਿ.

ਉਪਜ੍ਝਾਯਵਤ੍ਤਕਥਾਵਣ੍ਣਨਾ ਨਿਟ੍ਠਿਤਾ.

ਸਦ੍ਧਿਵਿਹਾਰਿਕਵਤ੍ਤਕਥਾਵਣ੍ਣਨਾ

੬੭. ਸਦ੍ਧਿਵਿਹਾਰਿਕਵਤ੍ਤਕਥਾਯਂ ਸਙ੍ਗਹੇਤਬ੍ਬੋ ਅਨੁਗ੍ਗਹੇਤਬ੍ਬੋਤਿਆਦੀਸੁ ਅਨਾਦਰਿਯਂ ਪਟਿਚ੍ਚ ਧਮ੍ਮਾਮਿਸੇਹਿ ਅਸਙ੍ਗਣ੍ਹਨ੍ਤਾਨਂ ਆਚਰਿਯੁਪਜ੍ਝਾਯਾਨਂ ਦੁਕ੍ਕਟਂ ਵਤ੍ਤਭੇਦਤ੍ਤਾ. ਤੇਨੇਵ ਪਰਿਵਾਰੇਪਿ ‘‘ਨਦੇਨ੍ਤੋ ਆਪਜ੍ਜਤੀ’’ਤਿ (ਪਰਿ. ੩੨੨) ਵੁਤ੍ਤਂ. ਸੇਸਂ ਸੁਵਿਞ੍ਞੇਯ੍ਯਮੇਵ.

ਸਦ੍ਧਿਵਿਹਾਰਿਕਵਤ੍ਤਕਥਾਵਣ੍ਣਨਾ ਨਿਟ੍ਠਿਤਾ.

ਨਸਮ੍ਮਾਵਤ੍ਤਨਾਦਿਕਥਾਵਣ੍ਣਨਾ

੬੮. ਨਸਮ੍ਮਾਵਤ੍ਤਨਾਦਿਕਥਾਯਂ ਵਤ੍ਤਂ ਨ ਪੂਰੇਯ੍ਯਾਤਿ ‘‘ਵਤ੍ਤਕਰਣਕਾਲੋ’’ਤਿ ਵਤ੍ਥੁਵਿਜਾਨਨਵਸੇਨ ਞਤ੍ਵਾ ਮਾਨਕੋਸਜ੍ਜਾਦਿਵਸੇਨ ਵਾ ਉਪਜ੍ਝਾਯਾਦੀਸੁ ਅਨਾਦਰੇਨ ਵਾ ‘‘ਅਕਾਤੁਂ ਨ ਵਟ੍ਟਤੀ’’ਤਿ ਅਜਾਨਨਤਾਯ ਵਾ ਨ ਕਰੇਯ੍ਯ, ਦੁਕ੍ਕਟਮੇਵ. ਅਸਞ੍ਚਿਚ੍ਚ ਅਸਤਿਯਾਤਿਆਦੀਹਿ ਚ ਅਕਰੋਨ੍ਤਸ੍ਸ ਪਨ ਅਨਾਪਤ੍ਤਿ. ਸਬ੍ਬਾਨਿ ਹਿ ਵਤ੍ਤਾਨਿ ਸੇਖਿਯਾਨੇਵ, ਤਸ੍ਮਾ ਸੇਖਿਯੇਸੁ ਵੁਤ੍ਤਨਯੇਨੇਵੇਤ੍ਥ ਸਬ੍ਬੋਪਿ ਵਿਨਿਚ੍ਛਯੋ ਵੇਦਿਤਬ੍ਬੋ. ਗੇਹਸ੍ਸਿਤਪੇਮਨ੍ਤਿ ਮੇਤ੍ਤਾਪੇਮਂ.

ਸਾਦਿਯਨਂ ਵਾ ਅਸਾਦਿਯਨਂ ਵਾ ਨ ਜਾਨਾਤੀਤਿ ‘‘ਮਯਿ ਸਾਦਿਯਨ੍ਤੇ ਅਕਰੋਨ੍ਤਾਨਂ ਆਪਤ੍ਤਿ ਹੋਤਿ, ਪਟਿਕ੍ਖਿਪਿਤ੍ਵਾ ਅਸਾਦਿਯਨ੍ਤੇ ਆਪਤ੍ਤਿ ਨ ਹੋਤੀ’’ਤਿ ਏਵਂ ਨ ਜਾਨਾਤੀਤਿ ਅਤ੍ਥੋ. ‘‘ਤੇਸੁ ਏਕੋ ਵਤ੍ਤਸਮ੍ਪਨ੍ਨੋ ਭਿਕ੍ਖੁ…ਪੇ… ਤੇਸਂ ਅਨਾਪਤ੍ਤੀ’’ਤਿ ਵਚਨਤੋ ਸਚੇ ਕੋਚਿ ‘‘ਤੁਮ੍ਹਾਕਂ ਸਦ੍ਧਿਵਿਹਾਰਿਕੇ, ਅਨ੍ਤੇਵਾਸਿਕੇ ਵਾ ਗਿਲਾਨੇ ਉਪਟ੍ਠਹਿਸ੍ਸਾਮਿ, ਓਵਾਦਾਨੁਸਾਸਨਿਆਦਿਕਂ ਸਬ੍ਬਂ ਕਤ੍ਤਬ੍ਬਂ ਕਰਿਸ੍ਸਾਮੀ’’ਤਿ ਵਦਤਿ, ਤੇ ਵਾ ਸਦ੍ਧਿਵਿਹਾਰਿਕਾਦਯੋ ‘‘ਅਪ੍ਪੋਸ੍ਸੁਕ੍ਕਾ ਹੋਥਾ’’ਤਿ ਵਦਨ੍ਤਿ, ਵਤ੍ਤਂ ਵਾ ਨ ਸਾਦਿਯਨ੍ਤਿ, ਆਚਰਿਯੁਪਜ੍ਝਾਯਾਨਮ੍ਪਿ ਅਨਾਪਤ੍ਤਿ.

ਨਸਮ੍ਮਾਵਤ੍ਤਨਾਦਿਕਥਾਵਣ੍ਣਨਾ ਨਿਟ੍ਠਿਤਾ.

ਰਾਧਬ੍ਰਾਹ੍ਮਣਵਤ੍ਥੁਕਥਾਵਣ੍ਣਨਾ

੬੯. ਰਾਧਬ੍ਰਾਹ੍ਮਣਵਤ੍ਥੁਸ੍ਮਿਂ ਪਾਲ਼ਿਯਂ ਉਪ੍ਪਣ੍ਡੁਪ੍ਪਣ੍ਡੁਕਜਾਤੋਤਿ ਸਕਲਸਰੀਰੇ ਸਞ੍ਜਾਤਪਣ੍ਡੁਵਣ੍ਣੋ. ਪਣ੍ਡੁਵਣ੍ਣਸ੍ਸ ਸਕਲਸਰੀਰੇ ਬ੍ਯਾਪਿਤਭਾਵਦਸ੍ਸਨਤ੍ਥਞ੍ਹਿ ਵਿਚ੍ਛਾਵਚਨਂ ਕਤਂ. ਅਧਿਕਾਰਨ੍ਤਿ ਉਪਕਾਰਂ. ਕਤਵੇਦਿਨੋਤਿ ਅਤ੍ਤਨੋ ਕਤਂ ਉਪਕਾਰਂ ਪਟਿਕਿਰਿਯਾਯ ਞਾਪਕਾ. ਉਪਸਮ੍ਪਦਾਕਮ੍ਮਵਾਚਾਯ ਯਂ ਵਤ੍ਤਬ੍ਬਂ, ਤਂ ਪਰਿਯੋਸਾਨੇ ਵਕ੍ਖਾਮ. ਪਰਿਮਣ੍ਡਲੇਹੀਤਿ ਪਰਿਪੁਣ੍ਣੇਹਿ.

੭੧-੭੩. ਪਣ੍ਣਤ੍ਤਿਵੀਤਿਕ੍ਕਮਨ੍ਤਿ ਸਿਕ੍ਖਾਪਦਵੀਤਿਕ੍ਕਮਂ. ਪਾਲ਼ਿਯਂ ਪਿਣ੍ਡਿਯਾਲੋਪਭੋਜਨਨ੍ਤਿ ਜਙ੍ਘਪਿਣ੍ਡਿਮਂਸਬਲੇਨ ਚਰਿਤ੍ਵਾ ਆਲੋਪਾਲੋਪਵਸੇਨ ਪਰਿਯਿਟ੍ਠਭੋਜਨਂ. ਅਤਿਰੇਕਲਾਭੋਤਿ ਭਿਕ੍ਖਾਹਾਰਤੋ ਅਧਿਕਲਾਭੋ. ਸਙ੍ਘਭਤ੍ਤਾਦੀਨਂ ਵਿਭਾਗੋ ਸੇਨਾਸਨਕ੍ਖਨ੍ਧਕੇ ਆਵਿ ਭਵਿਸ੍ਸਤਿ. ਵਿਹਾਰੋਤਿ ਤਿਣਕੁਟਿਕਾਦਿਸਹਿਤੋ ਪਾਕਾਰਪਰਿਚ੍ਛਿਨ੍ਨੋ ਸਕਲੋ ਸਙ੍ਘਾਰਾਮੋ. ਅਡ੍ਢਯੋਗੋਤਿ ਏਕਸਾਲੋ ਦੀਘਪਾਸਾਦੋ. ਹਤ੍ਥਿਪਿਟ੍ਠਿਗਰੁਲ਼ਸਣ੍ਠਾਨੋ ਦੀਘਪਾਸਾਦੋਤਿਪਿ ਵਦਨ੍ਤਿ. ਪਾਸਾਦੋਤਿ ਚਤੁਰਸ੍ਸੋ ਉਚ੍ਚੋ ਅਨੇਕਭੂਮਕਪਾਸਾਦੋ. ਹਮ੍ਮਿਯਨ੍ਤਿ ਮੁਣ੍ਡਚ੍ਛਦਨੋ ਚਨ੍ਦਿਕਙ੍ਗਣਯੁਤ੍ਤੋ ਨਾਤਿਉਚ੍ਚੋ ਪਾਸਾਦੋ. ਗੁਹਾਤਿ ਪਬ੍ਬਤਗੁਹਾ. ਪੂਤਿਮੁਤ੍ਤਨ੍ਤਿ ਗੋਮੁਤ੍ਤਂ.

ਰਾਧਬ੍ਰਾਹ੍ਮਣਵਤ੍ਥੁਕਥਾਵਣ੍ਣਨਾ ਨਿਟ੍ਠਿਤਾ.

ਆਚਰਿਯਵਤ੍ਤਕਥਾਵਣ੍ਣਨਾ

੭੬. ਸਹਧਮ੍ਮਿਕਂ ਵੁਚ੍ਚਮਾਨੋਤਿ ‘‘ਏਵਂ ਨਿਵਾਸੇਤਬ੍ਬ’’ਨ੍ਤਿਆਦਿਨਾ ਸਿਕ੍ਖਾਪਦੇਨ ਓਵਦਿਯਮਾਨੋ. ਵਾਦਂ ਆਰੋਪੇਤ੍ਵਾਤਿ ‘‘ਓਲਮ੍ਬਿਤ੍ਵਾ ਨਿਵਾਸਨਾਦੀਸੁ ਕੋ ਦੋਸੋ? ਯਦਿ ਦੋਸੋ ਭਵੇਯ੍ਯ, ਪਰਿਮਣ੍ਡਲਨਿਵਾਸਨਾਦੀਸੁਪਿ ਦੋਸੋ ਸਿਯਾ’’ਤਿਆਦਿਨਾ ਨਿਗ੍ਗਹਂ ਆਰੋਪੇਤ੍ਵਾ. ਤਂਯੇਵ ਤਿਤ੍ਥਾਯਤਨਨ੍ਤਿ ਦਿਟ੍ਠਿਸਙ੍ਖਾਤਤਿਤ੍ਥਮੇਵ ਆਯਤਨਂ ਦੁਕ੍ਖੁਪ੍ਪਤ੍ਤਿਟ੍ਠਾਨਨ੍ਤਿ ਤਿਤ੍ਥਾਯਤਨਂ. ਆਯਸ੍ਮਤੋ ਨਿਸ੍ਸਾਯ ਵਚ੍ਛਾਮੀਤਿ ਆਯਸ੍ਮਨ੍ਤਂ ਨਿਸ੍ਸਾਯ ਵਸਿਸ੍ਸਾਮੀਤਿ ਅਤ੍ਥੋ.

ਆਚਰਿਯਵਤ੍ਤਕਥਾਵਣ੍ਣਨਾ ਨਿਟ੍ਠਿਤਾ.

ਪਣਾਮਨਾਖਮਾਪਨਾਕਥਾਵਣ੍ਣਨਾ

੮੦. ਯਂ ਪੁਬ੍ਬੇ ਲਕ੍ਖਣਂ ਵੁਤ੍ਤਂ, ਤੇਨੇਵ ਲਕ੍ਖਣੇਨ ਨਿਸ੍ਸਯਨ੍ਤੇਵਾਸਿਕਸ੍ਸ ਆਪਤ੍ਤਿ ਨ ਵੇਦਿਤਬ੍ਬਾਤਿ ਸਮ੍ਬਨ੍ਧਯੋਜਨਾ ਦਟ੍ਠਬ੍ਬਾ. ਪੋਤ੍ਥਕੇਸੁ ਪਨ ‘‘ਨ ਤੇਨੇਵ ਲਕ੍ਖਣੇਨਾ’’ਤਿ ਏਤ੍ਥ ਨ-ਕਾਰਂ ਛਡ੍ਡੇਤ੍ਵਾ ‘‘ਤੇਨੇਵ ਲਕ੍ਖਣੇਨ ਨਿਸ੍ਸਯਨ੍ਤੇਵਾਸਿਕਸ੍ਸ ਆਪਤ੍ਤਿ ਵੇਦਿਤਬ੍ਬਾ’’ਤਿ ਲਿਖਨ੍ਤਿ, ਤਂ ਪਮਾਦਲਿਖਿਤਂ. ਤਥਾ ਹਿ ਤੇਨੇਵ ਲਕ੍ਖਣੇਨ ਆਪਤ੍ਤਿਭਾਵੇ ਗਯ੍ਹਮਾਨੇ ਨਿਸ੍ਸਯਮੁਤ੍ਤਕਸ੍ਸਾਪਿ ਅਮੁਤ੍ਤਕਸ੍ਸਾਪਿ ਆਪਤ੍ਤਿ ਏਵਾਤਿ ਵੁਤ੍ਤਲਕ੍ਖਣੇਨ ਆਪਤ੍ਤਿਂ ਆਪਜ੍ਜੇਯ੍ਯ. ਤਥਾ ਚ ‘‘ਨਿਸ੍ਸਯਨ੍ਤੇਵਾਸਿਕੇਨ ਹਿ ਯਾਵ ਆਚਰਿਯਂ ਨਿਸ੍ਸਾਯ ਵਸਤਿ, ਤਾਵ ਸਬ੍ਬਂ ਆਚਰਿਯਵਤ੍ਤਂ ਕਾਤਬ੍ਬ’’ਨ੍ਤਿ ਇਮਿਨਾ ਅਨਨ੍ਤਰਵਚਨੇਨ ਵਿਰੋਧੋ ਸਿਯਾ. ਵਿਸੁਦ੍ਧਿਮਗ੍ਗੇਪਿ ਚ –

‘‘ਨਿਸ੍ਸਯਾਚਰਿਯ, ਉਦ੍ਦੇਸਾਚਰਿਯ, ਨਿਸ੍ਸਯਨ੍ਤੇਵਾਸਿਕ, ਉਦ੍ਦੇਸਨ੍ਤੇਵਾਸਿਕ, ਸਮਾਨਾਚਰਿਯਕਾ ਪਨ ਯਾਵ ਨਿਸ੍ਸਯਉਦ੍ਦੇਸਾ ਅਨੁਪਚ੍ਛਿਨ੍ਨਾ. ਤਾਵ ਪਟਿਜਗ੍ਗਿਤਬ੍ਬਾ’’ਤਿ (ਵਿਸੁਦ੍ਧਿ. ੧.੪੧) –

ਵੁਤ੍ਤਂ. ਤਸ੍ਮਾ ਵੁਤ੍ਤਨਯੇਨ ਇਧ ਪਰਿਗਲ਼ਿਤਂ ਨ-ਕਾਰਂ ਆਨੇਤ੍ਵਾ ਤੇਨੇਵ ਸਦ੍ਧਿਵਿਹਾਰਿਕਸ੍ਸ ਵੁਤ੍ਤੇਨੇਵ ਲਕ੍ਖਣੇਨ ਨਿਸ੍ਸਯਨ੍ਤੇਵਾਸਿਕਸ੍ਸ ਆਪਤ੍ਤਿ ਨ ਵੇਦਿਤਬ੍ਬਾਤਿ ਏਵਮਤ੍ਥੋ ਗਹੇਤਬ੍ਬੋ.

ਪਣਾਮਨਾਖਮਾਪਨਾਕਥਾਵਣ੍ਣਨਾ ਨਿਟ੍ਠਿਤਾ.

ਨਿਸ੍ਸਯਪਟਿਪ੍ਪਸ੍ਸਦ੍ਧਿਕਥਾਵਣ੍ਣਨਾ

੮੩. ਨਿਸ੍ਸਯਪਟਿਪ੍ਪਸ੍ਸਦ੍ਧਿਕਥਾਯਂ ‘‘ਯੋ ਵਾ ਏਕਸਮ੍ਭੋਗਪਰਿਭੋਗੋ, ਤਸ੍ਸ ਸਨ੍ਤਿਕੇ ਨਿਸ੍ਸਯੋ ਗਹੇਤਬ੍ਬੋ’’ਤਿ ਇਮਿਨਾ ਲਜ੍ਜੀਸੁ ਏਵ ਨਿਸ੍ਸਯਗ੍ਗਹਣਂ ਨਿਯੋਜੇਤਿ ਅਲਜ੍ਜੀਸੁ ਪਟਿਕ੍ਖਿਤ੍ਤਤ੍ਤਾ. ਏਤ੍ਥ ਚ ਪਰਿਭੋਗਸਦ੍ਦੇਨ ਏਕਕਮ੍ਮਾਦਿਕੋ ਸਂਵਾਸੋ ਗਹਿਤੋ ਪਚ੍ਚਯਪਰਿਭੋਗਸ੍ਸ ਸਮ੍ਭੋਗ-ਸਦ੍ਦੇਨ ਗਹਿਤਤ੍ਤਾ, ਏਤੇਨ ਚ ਸਮ੍ਭੋਗਸਂਵਾਸਾਨਂ ਅਲਜ੍ਜੀਹਿ ਸਦ੍ਧਿਂ ਨ ਕਤ੍ਤਬ੍ਬਤਂ ਦਸ੍ਸੇਤਿ. ਪਰਿਹਾਰੋ ਨਤ੍ਥੀਤਿ ਆਪਤ੍ਤਿਪਰਿਹਾਰੋ ਨਤ੍ਥਿ. ਤਾਦਿਸੋਤਿ ਯਤ੍ਥ ਨਿਸ੍ਸਯੋ ਗਹਿਤਪੁਬ੍ਬੋ, ਯੋ ਚ ਏਕਸਮ੍ਭੋਗਪਰਿਭੋਗੋ, ਤਾਦਿਸੋ. ਤਥਾ ਵੁਤ੍ਤਨ੍ਤਿ ‘‘ਲਹੁਂ ਆਗਮਿਸ੍ਸਾਮੀ’’ਤਿ ਵੁਤ੍ਤਞ੍ਚੇਤਿ ਅਤ੍ਥੋ. ‘‘ਚਤ੍ਤਾਰਿ ਪਞ੍ਚ ਦਿਵਸਾਨੀ’’ਤਿ ਇਦਂ ਉਪਲਕ੍ਖਣਮਤ੍ਤਂ. ਯਦਿ ਏਕਾਹਦ੍ਵੀਹੇਨ ਸਭਾਗਤਾ ਪਞ੍ਞਾਯਤਿ, ਞਾਤਦਿਵਸੇਨ ਗਹੇਤਬ੍ਬੋਵ. ਅਥਾਪਿ ਚਤੁਪਞ੍ਚਾਹੇਨਾਪਿ ਨ ਪਞ੍ਞਾਯਤਿ, ਯਤ੍ਤਕੇਹਿ ਦਿਵਸੇਹਿ ਪਞ੍ਞਾਯਤਿ, ਤਤ੍ਤਕਾਨਿ ਅਤਿਕ੍ਕਮੇਤਬ੍ਬਾਨਿ. ਸਭਾਗਤਂ ਓਲੋਕੇਮੀਤਿ ਪਨ ਲੇਸੋ ਨ ਕਾਤਬ੍ਬੋ.

ਦਹਰਾ ਸੁਣਨ੍ਤੀਤਿ ਏਤ੍ਥ ਅਸੁਤ੍ਵਾਪਿ ਆਗਮਿਸ੍ਸਤਿ, ਕੇਨਚਿ ਅਨ੍ਤਰਾਯੇਨ ਚਿਰਾਯਤੀਤਿ ਸਞ੍ਞਾਯ ਸਤਿ ਲਬ੍ਭਤੇਵ ਪਰਿਹਾਰੋ. ਤੇਨਾਹ ‘‘ਇਧੇਵਾਹਂ ਵਸਿਸ੍ਸਾਮੀਤਿ ਪਹਿਣਤਿ, ਪਰਿਹਾਰੋ ਨਤ੍ਥੀ’’ਤਿ.

ਏਕਦਿਵਸਮ੍ਪਿ ਪਰਿਹਾਰੋ ਨਤ੍ਥੀਤਿ ਗਮਨੇ ਨਿਰੁਸ੍ਸਾਹਂ ਸਨ੍ਧਾਯ ਵੁਤ੍ਤਂ. ਸਉਸ੍ਸਾਹਸ੍ਸ ਪਨ ਸੇਨਾਸਨਪਟਿਸਾਮਨਾਦਿਵਸੇਨ ਕਤਿਪਾਹੇ ਗਤੇਪਿ ਨ ਦੋਸੋ.

ਤਤ੍ਰੇਵ ਵਸਿਤਬ੍ਬਨ੍ਤਿ ਤਤ੍ਰ ਸਭਾਗਟ੍ਠਾਨੇ ਏਵ ਨਿਸ੍ਸਯਂ ਗਹੇਤ੍ਵਾ ਵਸਿਤਬ੍ਬਂ. ‘‘ਤਂਯੇਵ ਵਿਹਾਰਂ…ਪੇ… ਵਸਿਤੁਂ ਵਟ੍ਟਤੀ’’ਤਿ ਇਮਿਨਾ ਉਪਜ੍ਝਾਯੇ ਸਙ੍ਗਣ੍ਹਨ੍ਤੇਯੇਵ ਤਂਸਮੋਧਾਨੇ ਨਿਸ੍ਸਯਪਟਿਪ੍ਪਸ੍ਸਦ੍ਧਿ ਵੁਤ੍ਤਾ, ਤਸ੍ਮਿਂ ਪਨ ਕੋਧੇਨ ਵਾ ਗਣਨਿਰਪੇਕ੍ਖਤਾਯ ਵਾ ਅਸਙ੍ਗਣ੍ਹਨ੍ਤੇ ਅਞ੍ਞੇਸੁ ਗਹਿਤੋ ਨਿਸ੍ਸਯੋ ਨ ਪਟਿਪ੍ਪਸ੍ਸਮ੍ਭਤੀਤਿ ਦਸ੍ਸੇਤਿ.

ਆਚਰਿਯਮ੍ਹਾ ਨਿਸ੍ਸਯਪਟਿਪ੍ਪਸ੍ਸਦ੍ਧਿਯਂ ਵੁਤ੍ਤੋ ‘‘ਕੋਚਿ ਆਚਰਿਯੋ’’ਤਿਆਦਿਕੋ ਨਯੋ ਉਪਜ੍ਝਾਯਪਕ੍ਕਮਨਾਦੀਸੁਪਿ ਨੇਤ੍ਵਾ ਤਤ੍ਥ ਚ ਵੁਤ੍ਤੋ ਇਧਾਪਿ ਨੇਤ੍ਵਾ ਯਥਾਰਹਂ ਯੋਜੇਤਬ੍ਬੋ.

ਦ੍ਵੇ ਲੇਡ੍ਡੁਪਾਤੇ ਅਤਿਕ੍ਕਮ੍ਮ ਅਞ੍ਞਸ੍ਮਿਂ ਵਿਹਾਰੇ ਵਸਨ੍ਤੀਤਿ ਉਪਚਾਰਸੀਮਤੋ ਬਹਿ ਅਞ੍ਞਸ੍ਮਿਂ ਵਿਹਾਰੇ ਅਨ੍ਤੇਵਾਸਿਕਾਨਂ ਵਸਨਟ੍ਠਾਨਤੋ ਦ੍ਵੇ ਲੇਡ੍ਡੁਪਾਤੇ ਅਤਿਕ੍ਕਮ੍ਮ ਵਸਨ੍ਤਿ. ਤੇਨ ਬਹਿਉਪਚਾਰੇਪਿ ਅਨ੍ਤੇਵਾਸਿਕਾਦੀਨਂ ਵਸਨਟ੍ਠਾਨਤੋ ਦ੍ਵਿਨ੍ਨਂ ਲੇਡ੍ਡੁਪਾਤਾਨਂ ਅਨ੍ਤਰੇ ਆਸਨ੍ਨਪਦੇਸੇ ਵਸਤਿ, ਨਿਸ੍ਸਯੋ ਨ ਪਟਿਪ੍ਪਸ੍ਸਮ੍ਭਤੀਤਿ ਦਸ੍ਸੇਤਿ. ਅਨ੍ਤੋਉਪਚਾਰਸੀਮਾਯਂ ਪਨ ਦ੍ਵੇ ਲੇਡ੍ਡੁਪਾਤੇ ਅਤਿਕ੍ਕਮਿਤ੍ਵਾ ਵਸਤੋ ਨਿਸ੍ਸਯੋ ਨ ਪਟਿਪ੍ਪਸ੍ਸਮ੍ਭਤੇਵ.

ਨਿਸ੍ਸਯਪਟਿਪ੍ਪਸ੍ਸਦ੍ਧਿਕਥਾਵਣ੍ਣਨਾ ਨਿਟ੍ਠਿਤਾ.

ਉਪਸਮ੍ਪਾਦੇਤਬ੍ਬਪਞ੍ਚਕਕਥਾਵਣ੍ਣਨਾ

੮੪. ਉਪਜ੍ਝਾਚਰਿਯਲਕ੍ਖਣਕਥਾਯਂ ਨ ਸਾਮਣੇਰੋ ਉਪਟ੍ਠਾਪੇਤਬ੍ਬੋਤਿ ਉਪਜ੍ਝਾਯੇਨ ਹੁਤ੍ਵਾ ਨ ਪਬ੍ਬਾਜੇਤਬ੍ਬੋ. ਅਸੇਕ੍ਖਸ੍ਸ ਅਯਨ੍ਤਿ ਅਸੇਕ੍ਖੋ, ਲੋਕਿਯਲੋਕੁਤ੍ਤਰੋ ਸੀਲਕ੍ਖਨ੍ਧੋ.

ਅਨ੍ਤਗ੍ਗਾਹਿਕਾਯਾਤਿ ਸਸ੍ਸਤੁਚ੍ਛੇਦਕੋਟ੍ਠਾਸਗ੍ਗਾਹਿਕਾਯ. ਪਚ੍ਛਿਮਾਨਿ ਦ੍ਵੇਤਿ ਅਪ੍ਪਸ੍ਸੁਤੋ ਹੋਤਿ, ਦੁਪ੍ਪਞ੍ਞੋ ਹੋਤੀਤਿ ਇਮਾਨਿ ਦ੍ਵੇ ਅਙ੍ਗਾਨਿ. ਪਚ੍ਛਿਮਾਨਿ ਤੀਣੀਤਿ ਨ ਪਟਿਬਲੋ ਉਪ੍ਪਨ੍ਨਂ ਕੁਕ੍ਕੁਚ੍ਚਂ ਧਮ੍ਮਤੋ ਵਿਨੋਦੇਤੁਂ, ਆਪਤ੍ਤਿਂ ਨ ਜਾਨਾਤਿ, ਆਪਤ੍ਤਿਯਾ ਵੁਟ੍ਠਾਨਂ ਨ ਜਾਨਾਤੀਤਿ ਇਮਾਨਿ ਤੀਣਿ. ਕੁਕ੍ਕੁਚ੍ਚਸ੍ਸ ਹਿ ਪਾਲ਼ਿਅਟ੍ਠਕਥਾਨਯਸਙ੍ਖਾਤਧਮ੍ਮਤੋ ਵਿਨੋਦੇਤੁਂ ਅਪਟਿਬਲਤਾ ਨਾਮ ਅਬ੍ਯਤ੍ਤਤਾ ਏਵ ਹੋਤੀਤਿ ਸਾਪਿ ਆਪਤ੍ਤਿਅਙ੍ਗਮੇਵ ਵੁਤ੍ਤਾ.

ਅਭਿਵਿਸਿਟ੍ਠੋ ਉਤ੍ਤਮੋ ਸਮਾਚਾਰੋ ਆਭਿਸਮਾਚਾਰੋ, ਵਤ੍ਤਪਟਿਵਤ੍ਤਸੀਲਂ. ਤਂ ਆਰਬ੍ਭ ਪਞ੍ਞਤ੍ਤਾ ਖਨ੍ਧਕਸਿਕ੍ਖਾਪਦਸਙ੍ਖਾਤਾ ਸਿਕ੍ਖਾ ਆਭਿਸਮਾਚਾਰਿਕਾ. ਸਿਕ੍ਖਾਪਦਮ੍ਪਿ ਹਿ ਤਂ ਤਤ੍ਥ ਪਟਿਪੂਰਣਤ੍ਥਿਕੇਹਿ ਉਗ੍ਗਹਣਾਦਿਵਸੇਨ ਸਿਕ੍ਖਿਤਬ੍ਬਤੋ ‘‘ਸਿਕ੍ਖਾ’’ਤਿ ਵੁਚ੍ਚਤਿ. ਮਗ੍ਗਬ੍ਰਹ੍ਮਚਰਿਯਸ੍ਸ ਆਦਿਭੂਤਾ ਕਾਰਣਭੂਤਾਤਿ ਆਦਿਬ੍ਰਹ੍ਮਚਰਿਯਕਾ ਸਿਕ੍ਖਾ, ਉਭਤੋਵਿਭਙ੍ਗਪਰਿਯਾਪਨ੍ਨਸਿਕ੍ਖਾਪਦਂ. ਤੇਨੇਵ ਵਿਸੁਦ੍ਧਿਮਗ੍ਗੇਪਿ ‘‘ਉਭਤੋਵਿਭਙ੍ਗਪਰਿਯਾਪਨ੍ਨਸਿਕ੍ਖਾਪਦਂ ਆਦਿਬ੍ਰਹ੍ਮਚਰਿਯਕਂ, ਖਨ੍ਧਕਵਤ੍ਤਪਅਯਾਪਨ੍ਨਂ ਆਭਿਸਮਾਚਾਰਿਕ’’ਨ੍ਤਿ (ਵਿਸੁਦ੍ਧਿ. ੧.੧੧) ਵੁਤ੍ਤਂ. ਤਸ੍ਮਾ ਸੇਕ੍ਖਪਣ੍ਣਤ੍ਤਿਯ’’ਨ੍ਤਿ ਏਤ੍ਥ ਸਿਕ੍ਖਿਤਬ੍ਬਤੋ ਸੇਕ੍ਖਾ, ਭਗਵਤਾ ਪਞ੍ਞਤ੍ਤਤ੍ਤਾ ਪਣ੍ਣਤ੍ਤਿ. ਸਬ੍ਬਾਪਿ ਉਭਤੋਵਿਭਙ੍ਗਪਰਿਯਾਪਨ੍ਨਾ ਸਿਕ੍ਖਾਪਦਪਣ੍ਣਤ੍ਤਿ ‘‘ਸੇਕ੍ਖਪਣ੍ਣਤ੍ਤੀ’’ਤਿ ਵੁਤ੍ਤਾਤਿ ਗਹੇਤਬ੍ਬਾ. ਨਾਮਰੂਪਪਰਿਚ੍ਛੇਦੇਤਿ ਏਤ੍ਥ ਕੁਸਲਤ੍ਤਿਕਾਦੀਹਿ ਵੁਤ੍ਤਂ ਜਾਤਿਭੂਮਿਪੁਗ੍ਗਲਸਮ੍ਪਯੋਗਵਤ੍ਥਾਰਮ੍ਮਣਕਮ੍ਮਦ੍ਵਾਰਲਕ੍ਖਣਰਸਾਦਿਭੇਦੇਹਿ ਵੇਦਨਾਕ੍ਖਨ੍ਧਾਦਿਚਤੁਬ੍ਬਿਧਂ ਸਨਿਬ੍ਬਾਨਂ ਨਾਮਂ, ਭੂਤੁਪਾਦਾਯਭੇਦਂ ਰੂਪਞ੍ਚ ਪਰਿਚ੍ਛਿਨ੍ਦਿਤ੍ਵਾ ਜਾਨਨਪਞ੍ਞਾ, ਤਪ੍ਪਕਾਸਕੋ ਚ ਗਨ੍ਥੋ ਨਾਮਰੂਪਪਰਿਚ੍ਛੇਦੋ ਨਾਮ. ਇਮਿਨਾ ਅਭਿਧਮ੍ਮਤ੍ਥਕੁਸਲੇਨ ਭਵਿਤਬ੍ਬਨ੍ਤਿ ਦਸ੍ਸੇਤਿ. ਸਿਕ੍ਖਾਪੇਤੁਨ੍ਤਿ ਉਗ੍ਗਣ੍ਹਾਪੇਤੁਂ.

ਉਪਸਮ੍ਪਾਦੇਤਬ੍ਬਪਞ੍ਚਕਕਥਾਵਣ੍ਣਨਾ ਨਿਟ੍ਠਿਤਾ.

ਅਞ੍ਞਤਿਤ੍ਥਿਯਪੁਬ੍ਬਵਤ੍ਥੁਕਥਾਵਣ੍ਣਨਾ

੮੬. ਤਿਤ੍ਥਿਯਪਰਿਵਾਸਕਥਾਯਂ ਆਜੀਵਕਸ੍ਸ ਵਾਤਿਆਦੀਸੁ ਅਕਿਰਿਯਵਾਦੀ ਆਜੀਵਕੋ ਨਾਮ, ਕਿਰਿਯਵਾਦਿਨੋ ਪਨ ਨਿਗਣ੍ਠਾਪਿ ਅਞ੍ਞੇਪਿ ਨਗ੍ਗਤਿਤ੍ਥਿਕਾ ਅਚੇਲਕਪਦੇ ਸਙ੍ਗਹਿਤਾ. ਸਬ੍ਬਥਾ ਨਗ੍ਗਸ੍ਸੇਵ ਤਿਤ੍ਥਿਯਪਰਿਵਾਸੋ ਵਿਹਿਤੋ. ਸੋ ਚ ਤੇਨੇਵ ਨਗ੍ਗਵੇਸੇਨ ਭਿਕ੍ਖੂਨਂ ਸਨ੍ਤਿਕਂ ਆਗਤਸ੍ਸ, ਨ ਪਟਿਚ੍ਛਾਦੇਤ੍ਵਾ ਆਗਤਸ੍ਸਾਤਿ ਦਸ੍ਸੇਤੁਂ ‘‘ਸਚੇ ਸੋਪੀ’’ਤਿਆਦਿ ਵੁਤ੍ਤਂ. ਤਤ੍ਥ ਸੋਪੀਤਿ ਆਜੀਵਕੋ.

ਆਮਿਸਕਿਞ੍ਚਿਕ੍ਖਸਮ੍ਪਦਾਨਂ ਨਾਮ ਅਪ੍ਪਮਤ੍ਤਕਸ੍ਸ ਦੇਯ੍ਯਧਮ੍ਮਸ੍ਸ ਅਨੁਪ੍ਪਦਾਨਂ. ਰੂਪੂਪਜੀਵਿਕਾਤਿ ਅਤ੍ਤਨੋ ਰੂਪਮੇਵ ਨਿਸ੍ਸਾਯ ਜੀਵਨ੍ਤਿਯੋ. ਵੇਸਿਯਾ ਗੋਚਰੋ ਬਹੁਲਂ ਪਵਤ੍ਤਿਟ੍ਠਾਨਂ ਅਸ੍ਸਾਤਿ ਵੇਸਿਯਾਗੋਚਰੋ. ਏਸ ਨਯੋ ਸਬ੍ਬਤ੍ਥ. ਯੋਬ੍ਬਨ੍ਨਾਤੀਤਾਤਿ ਅਨਿਵਿਦ੍ਧਾ ਏਵ ਮਹਲ੍ਲਿਕਭਾਵਂ ਪਤ੍ਤਾ ਥੁਲ੍ਲਕੁਮਾਰੀ ਏਵਾਤਿ ਵੁਤ੍ਤਂ. ਆਦਾਯਸ੍ਸਾਤਿ ਆਦਾਨਸ੍ਸ ਗਹਣਸ੍ਸ.

ਅਞ੍ਞਤਿਤ੍ਥਿਯਪੁਬ੍ਬਵਤ੍ਥੁਕਥਾਵਣ੍ਣਨਾ ਨਿਟ੍ਠਿਤਾ.

ਪਞ੍ਚਾਬਾਧਵਤ੍ਥੁਕਥਾਵਣ੍ਣਨਾ

੮੮-੯. ਪਞ੍ਚਾਬਾਧਾਦਿਵਤ੍ਥੂਸੁ ਪਾਲ਼ਿਯਂ ਸੋਮ੍ਹਿ ਅਰੋਗੋ, ਵਿਬ੍ਭਮਿਸ੍ਸਾਮੀਤਿ ਸੋ ਅਹਂ ਅਰੋਗੋ, ਵਿਬ੍ਭਮਿਸ੍ਸਾਮੀਤਿ ਅਤ੍ਥੋ. ਨਖਪਿਟ੍ਠਿਪ੍ਪਮਾਣਨ੍ਤਿ ਕਨਿਟ੍ਠਙ੍ਗੁਲਿਨਖਪਿਟ੍ਠਿ ਅਧਿਪ੍ਪੇਤਾ. ‘‘ਪਟਿਚ੍ਛਨ੍ਨੇ ਠਾਨੇ ਨਖਪਿਟ੍ਠਿਪ੍ਪਮਾਣਂ ਅਵਡ੍ਢਨਕਪਕ੍ਖੇ ਠਿਤਂ ਹੋਤਿ, ਵਟ੍ਟਤੀ’’ਤਿ ਵੁਤ੍ਤਤ੍ਤਾ ਅਪ੍ਪਟਿਚ੍ਛਨ੍ਨਟ੍ਠਾਨੇ ਤਾਦਿਸਮ੍ਪਿ ਨ ਵਟ੍ਟਤਿ, ਪਟਿਚ੍ਛਨ੍ਨਟ੍ਠਾਨੇਪਿ ਚ ਵਡ੍ਢਨਕਪਕ੍ਖੇ ਠਿਤੋਪਿ ਨ ਵਟ੍ਟਤੀਤਿ ਸਿਦ੍ਧਮੇਵ ਹੋਤਿ. ਪਾਕਟਟ੍ਠਾਨੇਪਿ ਪਨ ਨਖਪਿਟ੍ਠਿਪ੍ਪਮਾਣਤੋ ਊਨਤਰਂ ਅਵਡ੍ਢਨਕਂ ਵਟ੍ਟਤੀਤਿ ਯੇ ਗਣ੍ਹੇਯ੍ਯੁਂ, ਤੇਸਂ ਤਂ ਗਹਣਂ ਪਟਿਸੇਧੇਤੁਂ ‘‘ਮੁਖੇ ਪਨਾ’’ਤਿਆਦਿ ਵੁਤ੍ਤਂ.

ਕੋਲਟ੍ਠਿਮਤ੍ਤਕੋਪੀਤਿ ਬਦਰਟ੍ਠਿਪ੍ਪਮਾਣੋਪਿ. ਅਵਡ੍ਢਨਕਪਕ੍ਖੇ ਠਿਤੋਪਿ ਨ ਵਟ੍ਟਤੀਤਿ ਏਤ੍ਥ ਪਿ-ਸਦ੍ਦੇਨ ਕੋਲਟ੍ਠਿਮਤ੍ਤਤੋ ਖੁਦ੍ਦਕਤਰੋਪਿ ਗਣ੍ਡੋ ਨ ਵਟ੍ਟਤੀਤਿ ਦਸ੍ਸੇਤਿ. ਤੇਨਾਹ ‘‘ਸਚ੍ਛਵਿਂ ਕਾਰੇਤ੍ਵਾ’’ਤਿ, ਵਿਜ੍ਜਮਾਨਚ੍ਛਵਿਂ ਕਤ੍ਵਾਤਿ ਅਤ੍ਥੋ. ‘‘ਸਞ੍ਛਵਿ’’ਨ੍ਤਿ ਵਾ ਪਾਠੋ, ਸਞ੍ਜਾਤਚ੍ਛਵਿਨ੍ਤਿ ਅਤ੍ਥੋ. ਗਣ੍ਡਾਦੀਸੁ ਵੂਪਸਨ੍ਤੇਸੁਪਿ ਗਣ੍ਡਾਨਂ ਵਿਵਣ੍ਣਮ੍ਪਿ ਹੋਤਿ, ਤਂ ਵਟ੍ਟਤਿ.

ਪਦੁਮਪੁਣ੍ਡਰੀਕਪਤ੍ਤਵਣ੍ਣਨ੍ਤਿ ਰਤ੍ਤਪਦੁਮਸੇਤਪਦੁਮਪੁਪ੍ਫਦਲਵਣ੍ਣਂ. ਕੁਟ੍ਠੇ ਵੁਤ੍ਤਨਯੇਨੇਵਾਤਿ ਪਟਿਚ੍ਛਨ੍ਨਟ੍ਠਾਨੇ ਅਵਡ੍ਢਨਕਂ ਵਟ੍ਟਤਿ, ਅਞ੍ਞਤ੍ਥ ਨ ਕਿਞ੍ਚਿਪਿ ਵਟ੍ਟਤੀਤਿ ਵੁਤ੍ਤਨਯਂ ਦਸ੍ਸੇਤਿ. ਸੋਸਬ੍ਯਾਧੀਤਿ ਖਯਰੋਗੋ. ਯਕ੍ਖੁਮ੍ਮਾਰੋਤਿ ਕਦਾਚਿ ਕਦਾਚਿ ਆਗਨ੍ਤ੍ਵਾ ਭੂਮਿਯਂ ਪਾਤੇਤ੍ਵਾ ਹਤ੍ਥਮੁਖਾਦਿਕਂ ਅਵਯਵਂ ਭੂਮਿਯਂ ਘਂਸਨਕੋ ਯਕ੍ਖੋਵ ਰੋਗੋ.