੪. ਪਾਚਿਤ੍ਤਿਯਕਣ੍ਡਂ
੧. ਲਸੁਣਵਗ੍ਗੋ
੧. ਪਠਮਲਸੁਣਾਦਿਸਿਕ੍ਖਾਪਦਵਣ੍ਣਨਾ
੭੯੭. ਪਾਚਿਤ੍ਤਿਯੇਸੁ ਲਸੁਣਵਗ੍ਗਸ੍ਸ ਪਠਮੇ ਬਦਰਸਾਲ਼ਵਂ ਨਾਮ ਬਦਰਫਲਾਨਿ ਸੁਕ੍ਖਾਪੇਤ੍ਵਾ ਤੇਹਿ ਕਤ੍ਤਬ੍ਬਬ੍ਯਞ੍ਜਨਵਿਕਤਿ. ਆਮਕਮਾਗਧਲਸੁਣਞ੍ਚੇਵ, ਅਜ੍ਝੋਹਰਣਞ੍ਚਾਤਿ ਦ੍ਵੇ ਅਙ੍ਗਾਨਿ.
੭੯੯-੮੧੨. ਦੁਤਿਯਾਦੀਨਿ ਉਤ੍ਤਾਨਤ੍ਥਾਨਿ.
੮੧੫. ਛਟ੍ਠੇ ਪਾਲ਼ਿਯਂ ਆਸੁਮ੍ਭਿਤ੍ਵਾਤਿ ਪਾਤੇਤ੍ਵਾ.
੮੧੭. ਦਧਿਮਤ੍ਥੂਤਿ ਦਧਿਮ੍ਹਿ ਪਸਨ੍ਨੋਦਕਂ. ਰਸਖੀਰਾਦੀਨਨ੍ਤਿ ਮਂਸਰਸਖੀਰਾਦੀਨਂ. ਭੁਞ੍ਜਨ੍ਤਸ੍ਸ ਭਿਕ੍ਖੁਨੋ ਹਤ੍ਥਪਾਸੇ ਠਾਨਂ, ਪਾਨੀਯਸ੍ਸ ਵਾ ਵਿਧੂਪਨਸ੍ਸ ਵਾ ਗਹਣਨ੍ਤਿ ਦ੍ਵੇ ਅਙ੍ਗਾਨਿ.
੮੨੨. ਸਤ੍ਤਮੇ ਅਵਿਞ੍ਞਤ੍ਤਿਯਾ ਲਦ੍ਧਨ੍ਤਿ ਅਤ੍ਤਨੋ ਵਿਞ੍ਞਤ੍ਤਿਂ ਵਿਨਾ ਲਦ੍ਧਂ. ਪੁਬ੍ਬਾਪਰਵਿਰੁਦ੍ਧਨ੍ਤਿ ਸਯਂ ਕਰਣੇ ਪਾਚਿਤ੍ਤਿਯਨ੍ਤਿ ਇਦਂ ਕਾਰਾਪਨੇ ਦੁਕ੍ਕਟਵਚਨੇਨ ਵਿਰੁਜ੍ਝਨਂ ਸਨ੍ਧਾਯ ਵੁਤ੍ਤਂ. ਤੇਨਾਹ ‘‘ਨ ਹੀ’’ਤਿਆਦਿ, ‘‘ਅਵਿਞ੍ਞਤ੍ਤਿਯਾ ਲਦ੍ਧ’’ਨ੍ਤਿਆਦਿਵਚਨੇਨ ਵਾ ਵਿਰੁਜ੍ਝਨਂ ਸਨ੍ਧਾਯ ਵੁਤ੍ਤਂ. ਅਞ੍ਞਾਯ ਵਿਞ੍ਞਤ੍ਤਿਪਿ ਹਿ ਇਮਿਸ੍ਸਾ ਅਵਿਞ੍ਞਤ੍ਤਿਯਾ ਲਦ੍ਧਮੇਵਾਤਿ. ਆਮਕਧਞ੍ਞਵਿਞ੍ਞਾਪਨਾਦਿ, ਤਂ ਭਜ੍ਜਨਾਦਿਨਾ ਅਜ੍ਝੋਹਰਣਨ੍ਤਿ ਦ੍ਵੇ ਅਙ੍ਗਾਨਿ.
੮੨੪. ਅਟ੍ਠਮੇ ਨਿਬ੍ਬਿਟ੍ਠੋਤਿ ਲਦ੍ਧੋ. ਕੇਣੀਤਿ ਰਞ੍ਞੋ ਦਾਤਬ੍ਬੋ ਆਯੋ, ਆਯੁਪ੍ਪਤ੍ਤਿਟ੍ਠਾਨਨ੍ਤਿ ਅਤ੍ਥੋ. ਤੇਨਾਹ ‘‘ਏਕਂ ਠਾਨਨ੍ਤਰ’’ਨ੍ਤਿਆਦਿ. ਠਾਨਨ੍ਤਰਨ੍ਤਿ ਚ ਗਾਮਜਨਪਦਾਣਾਯਤ੍ਤਂ. ਵਲ਼ਞ੍ਜਿਯਮਾਨਤਿਰੋਕੁਟ੍ਟਾਦਿਤਾ, ਅਨਪਲੋਕੇਤ੍ਵਾ ਉਚ੍ਚਾਰਾਦੀਨਂ ਛਡ੍ਡਨਾਦੀਤਿ ਦ੍ਵੇ ਅਙ੍ਗਾਨਿ.
੮੩੦. ਨਵਮੇ ‘‘ਮਤ੍ਥਕਚ੍ਛਿਨ੍ਨਨਾਲ਼ਿਕੇਰਮ੍ਪੀ’’ਤਿ ਵੁਤ੍ਤਤ੍ਤਾ ਹਰਿਤੂਪਰਿ ਛਡ੍ਡਨਮੇਵ ਪਟਿਕ੍ਖਿਤ੍ਤਂ. ਤੇਨਾਹ ‘‘ਅਨਿਕ੍ਖਿਤ੍ਤਬੀਜੇਸੂ’’ਤਿਆਦਿ. ਯਤ੍ਥ ਚ ਛਡ੍ਡੇਤੁਂ ਵਟ੍ਟਤਿ, ਤਤ੍ਥ ਹਰਿਤੇ ਵਚ੍ਚਾਦਿਂ ਕਾਤੁਮ੍ਪਿ ਵਟ੍ਟਤਿ ਏਵ. ਸਬ੍ਬੇਸਨ੍ਤਿ ਭਿਕ੍ਖੁਭਿਕ੍ਖੁਨੀਨਂ.
੮੩੬-੭. ਦਸਮੇ ਤੇਸਂਯੇਵਾਤਿ ਯੇਸਂ ਨਿਚ੍ਚਂ ਪਸ੍ਸਤਿ. ਆਰਾਮੇ ਠਤ੍ਵਾਤਿ ਠਿਤਨਿਸਨ੍ਨਟ੍ਠਾਨੇ ਏਵ ਠਤ੍ਵਾ ਸਮਨ੍ਤਤੋ ਗੀਵਂ ਪਰਿਵਤ੍ਤੇਤ੍ਵਾਪਿ ਪਸ੍ਸਤਿ, ਅਨਾਪਤ੍ਤਿ. ਠਿਤਟ੍ਠਾਨਤੋ ਗਨ੍ਤ੍ਵਾ ਪਸ੍ਸਿਤੁਂ ਨ ਵਟ੍ਟਤਿ. ਕੇਚਿ ਪਨ ‘‘ਵਟ੍ਟਤੀ’’ਤਿ ਵਦਨ੍ਤਿ. ਤਂ ਪਨ ‘‘ਦਸ੍ਸਨਾਯ ਗਚ੍ਛੇਯ੍ਯ, ਪਾਚਿਤ੍ਤਿਯ’’ਨ੍ਤਿ ਸਾਮਞ੍ਞਤੋ ਗਮਨਸ੍ਸ ਪਟਿਕ੍ਖਿਤ੍ਤਤ੍ਤਾ, ਅਨਾਪਤ੍ਤਿਯਮ੍ਪਿ ਗਮਨਾਯ ਅਵੁਤ੍ਤਤ੍ਤਾ ਚ ਨ ਗਹੇਤਬ੍ਬਂ. ਨਚ੍ਚਾਦਿਤਾ, ਅਨਨੁਞ੍ਞਾਤਕਾਰਣਾ ਗਮਨਂ, ਦਸ੍ਸਨਾਦਿ ਚਾਤਿ ਤੀਣਿ ਅਙ੍ਗਾਨਿ.
ਨਿਟ੍ਠਿਤੋ ਲਸੁਣਵਗ੍ਗੋ ਪਠਮੋ.
੨. ਅਨ੍ਧਕਾਰਵਗ੍ਗੋ
੧. ਪਠਮਾਦਿਸਿਕ੍ਖਾਪਦਵਣ੍ਣਨਾ
੮੪੧. ਦੁਤਿਯਵਗ੍ਗਸ੍ਸ ਪਠਮੇ ਦਾਨੇ ਵਾਤਿ ਦਾਨਨਿਮਿਤ੍ਤਂ. ਰਤ੍ਤਨ੍ਧਕਾਰੇ ਪੁਰਿਸਸ੍ਸ ਹਤ੍ਥਪਾਸੇ ਠਾਨਾਦਿ, ਰਹੋਪੇਕ੍ਖਾ, ਸਹਾਯਾਭਾਵੋਤਿ ਤੀਣਿ ਅਙ੍ਗਾਨਿ.
੮੪੨-੮੫੦. ਦੁਤਿਯਾਦੀਨਿ ਉਤ੍ਤਾਨਾਨਿ.
੮੫੪. ਪਞ੍ਚਮੇ ਪਲ੍ਲਙ੍ਕਸ੍ਸ ਅਨੋਕਾਸੇਤਿ ਊਰੁਬਦ੍ਧਾਸਨਸ੍ਸ ਅਪ੍ਪਹੋਨਕੇ. ਪੁਰੇਭਤ੍ਤਂ ਅਨ੍ਤਰਘਰੇ ਪਲ੍ਲਙ੍ਕਪ੍ਪਹੋਨਕਾਸਨੇ ਨਿਸਜ੍ਜਾ, ਅਨਨੁਞ੍ਞਾਤਕਾਰਣਾ ਅਨਾਪੁਚ੍ਛਾ ਵੁਤ੍ਤਪਰਿਚ੍ਛੇਦਾਤਿਕ੍ਕਮੋਤਿ ਦ੍ਵੇ ਅਙ੍ਗਾਨਿ.
੮੬੦-੮੭੯. ਛਟ੍ਠਾਦੀਨਿ ਉਤ੍ਤਾਨਾਨਿ.
ਨਿਟ੍ਠਿਤੋ ਅਨ੍ਧਕਾਰਵਗ੍ਗੋ ਦੁਤਿਯੋ.
੩. ਨਗ੍ਗਵਗ੍ਗੋ
੧. ਪਠਮਾਦਿਸਿਕ੍ਖਾਪਦਵਣ੍ਣਨਾ
੮੮੩-੮੮੭. ਤਤਿਯਵਗ੍ਗਸ੍ਸ ਪਠਮਦੁਤਿਯਾਨਿ ਉਤ੍ਤਾਨਾਨਿ.
੮੯੩. ਤਤਿਯੇ ਵਿਸਿਬ੍ਬੇਤ੍ਵਾਤਿ ਵਿਜਟੇਤ੍ਵਾ. ਧੁਰਂ ਨਿਕ੍ਖਿਤ੍ਤਮਤ੍ਤੇਤਿ ਵਿਸਿਬ੍ਬਨਦਿਵਸਤੋ ਪਞ੍ਚ ਦਿਵਸੇ ਅਤਿਕ੍ਕਾਮੇਤ੍ਵਾ ਧੁਰਂ ਨਿਕ੍ਖਿਤ੍ਤਮਤ੍ਤੇ. ਅਨ੍ਤੋਪਞ੍ਚਾਹੇ ਪਨ ਧੁਰਨਿਕ੍ਖੇਪੇਪਿ ਅਨਾਪਤ੍ਤਿ ਏਵ ‘‘ਅਞ੍ਞਤ੍ਰ ਚਤੂਹਪਞ੍ਚਾਹਾ’’ਤਿ ਵੁਤ੍ਤਤ੍ਤਾ. ਉਪਸਮ੍ਪਨ੍ਨਾਯ ਚੀਵਰਂ ਸਿਬ੍ਬਨਤ੍ਥਾਯ ਵਿਸਿਬ੍ਬੇਤ੍ਵਾ ਪਞ੍ਚਹਾਤਿਕ੍ਕਮੋ, ਅਨਨੁਞ੍ਞਾਤਕਾਰਣਾ ਧੁਰਨਿਕ੍ਖੇਪੋਤਿ ਦ੍ਵੇ ਅਙ੍ਗਾਨਿ.
੯੦੦. ਚਤੁਤ੍ਥੇ ਪਞ੍ਚਨ੍ਨਂ ਚੀਵਰਾਨਂ ਅਪਰਿਵਤ੍ਤਨਂ, ਅਨਨੁਞ੍ਞਾਤਕਾਰਣਾ ਪਞ੍ਚਾਹਾਤਿਕ੍ਕਮੋਤਿ ਦ੍ਵੇ ਅਙ੍ਗਾਨਿ.
੯੦੩. ਪਞ੍ਚਮਂ ਉਤ੍ਤਾਨਮੇਵ.
੯੦੯. ਛਟ੍ਠੇ ਵਿਕਪ੍ਪਨੁਪਗਸ੍ਸ ਸਙ੍ਘੇ ਪਰਿਣਤਤਾ, ਵਿਨਾ ਆਨਿਸਂਸਦਸ੍ਸਨੇਨ ਅਨ੍ਤਰਾਯਕਰਣਨ੍ਤਿ ਦ੍ਵੇ ਅਙ੍ਗਾਨਿ.
੯੧੧. ਸਤ੍ਤਮਂ ਉਤ੍ਤਾਨਮੇਵ.
੯੧੬. ਅਟ੍ਠਮੇ ਕੁਮ੍ਭਥੂਣਂ ਨਾਮ ਕੁਮ੍ਭਸਦ੍ਦੋ, ਤੇਨ ਕੀਲ਼ਨ੍ਤੀਤਿ ਕੁਮ੍ਭਥੂਣਿਕਾ. ਤੇਨਾਹ ‘‘ਘਟਕੇਨ ਕੀਲ਼ਨਕਾ’’ਤਿ. ਦੀਘਨਿਕਾਯਟ੍ਠਕਥਾਯਂ ਪਨ ‘‘ਚਤੁਰਸ੍ਸਅਮ੍ਬਣਕਤਾਲ਼’’ਨ੍ਤਿ ਵੁਤ੍ਤਂ. ਤਞ੍ਹਿ ਰੁਕ੍ਖਸਾਰਾਦਿਮਯਂ ਅਨ੍ਤੋਛਿਦ੍ਦਂ ਚਤੂਸੁ ਪਸ੍ਸੇਸੁ ਚਮ੍ਮੋਨਦ੍ਧਂ ਵਾਦਿਤਭਣ੍ਡਂ, ਯਂ ‘‘ਬਿਮ੍ਬਿਸਕ’’ਨ੍ਤਿਪਿ ਵੁਚ੍ਚਤਿ, ਤਂ ਵਾਦੇਨ੍ਤਾਪਿ ਕੁਮ੍ਭਥੂਣਿਕਾ. ਤੇਨਾਹ ‘‘ਬਿਮ੍ਬਿਸਕਵਾਦਿਤਕਾਤਿਪਿ ਵਦਨ੍ਤੀ’’ਤਿ.
੯੧੮. ਪਾਲ਼ਿਯਂ ਕਪ੍ਪਕਤਨ੍ਤਿ ਕਪ੍ਪਕਤਂ ਨਿਵਾਸਨਪਾਰੁਪਨੂਪਗਂ. ਸਮਣਚੀਵਰਤਾ, ਅਨਨੁਞ੍ਞਾਤਾਨਂ ਦਾਨਨ੍ਤਿ ਦ੍ਵੇ ਅਙ੍ਗਾਨਿ.
੯੨੧-੯੩੧. ਨਵਮਦਸਮਾਨਿ ਉਤ੍ਤਾਨਾਨੇਵ.
ਨਿਟ੍ਠਿਤੋ ਨਗ੍ਗਵਗ੍ਗੋ ਤਤਿਯੋ.
੪. ਤੁਵਟ੍ਟਵਗ੍ਗੋ
੧੦. ਦਸਮਸਿਕ੍ਖਾਪਦਵਣ੍ਣਨਾ
੯੭੬. ਤੁਵਟ੍ਟਵਗ੍ਗਸ੍ਸ ਦਸਮੇ ਚਾਰਿਕਾਯ ਅਪਕ੍ਕਮਨਂ ਪਣ੍ਣਤ੍ਤਿਵਜ੍ਜਮੇਵ. ਪਣ੍ਣਤ੍ਤਿਵਿਜਾਨਨਚਿਤ੍ਤੇਨ ਸਚਿਤ੍ਤਕਤਂ ਸਨ੍ਧਾਯ ਪਨੇਤ੍ਥ ‘‘ਲੋਕਵਜ੍ਜ’’ਨ੍ਤਿ ਦਟ੍ਠਬ੍ਬਂ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵ.
ਨਿਟ੍ਠਿਤੋ ਤੁਵਟ੍ਟਵਗ੍ਗੋ ਚਤੁਤ੍ਥੋ.
੫. ਚਿਤ੍ਤਾਗਾਰਵਗ੍ਗੋ
੧. ਪਠਮਾਦਿਸਿਕ੍ਖਾਪਦਵਣ੍ਣਨਾ
੯੭੮. ਚਿਤ੍ਤਾਗਾਰਵਗ੍ਗਸ੍ਸ ਪਠਮੇ ਪਾਟੇਕ੍ਕਾ ਆਪਤ੍ਤਿਯੋਤਿ ਗੀਵਾਯ ਪਰਿਵਤ੍ਤਨਪ੍ਪਯੋਗਗਣਨਾਯ.
੧੦੧੫. ਨਵਮੇ ਹਤ੍ਥਿਆਦੀਸੁ ਸਿਪ੍ਪ-ਸਦ੍ਦੋ ਪਚ੍ਚੇਕਂ ਯੋਜੇਤਬ੍ਬੋ, ਤਥਾ ਆਥਬ੍ਬਣਾਦੀਸੁ ਮਨ੍ਤ-ਸਦ੍ਦੋ. ਤਤ੍ਥ ਆਥਬ੍ਬਣਮਨ੍ਤੋ ਨਾਮ ਆਥਬ੍ਬਣਵੇਦਵਿਹਿਤੋ ਪਰੂਪਘਾਤਕਰੋ ਮਨ੍ਤੋ. ਖੀਲਨਮਨ੍ਤੋ ਨਾਮ ਵੇਰਿਮਾਰਣਤ੍ਥਾਯ ਸਾਰਦਾਰੁਮਯਂ ਖੀਲਂ ਮਨ੍ਤੇਤ੍ਵਾ ਪਥਵਿਯਂ ਆਕੋਟਨਮਨ੍ਤੋ. ਅਗਦਪ੍ਪਯੋਗੋ ਵਿਸਪ੍ਪਯੋਜਨਂ. ਨਾਗਮਣ੍ਡਲਨ੍ਤਿ ਸਪ੍ਪਾਨਂ ਪਵੇਸਨਿਵਾਰਣਤ੍ਥਂ ਮਣ੍ਡਲਬਨ੍ਧਮਨ੍ਤੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵ.
ਨਿਟ੍ਠਿਤੋ ਚਿਤ੍ਤਾਗਾਰਵਗ੍ਗੋ ਪਞ੍ਚਮੋ.
੧੦੨੫-੧੧੧੬. ਆਰਾਮਵਗ੍ਗੇ, ਗਬ੍ਭਿਨਿਵਗ੍ਗੇ ਚ ਸਬ੍ਬਂ ਉਤ੍ਤਾਨਮੇਵ.
੮. ਕੁਮਾਰਿਭੂਤਵਗ੍ਗੋ
੧. ਪਠਮਾਦਿਸਿਕ੍ਖਾਪਦਵਣ੍ਣਨਾ
੧੧੧੯. ਅਟ੍ਠਮਵਗ੍ਗਸ੍ਸ ਪਠਮੇ ਸਬ੍ਬਪਠਮਾ ਦ੍ਵੇ ਮਹਾਸਿਕ੍ਖਮਾਨਾਤਿ ਗਬ੍ਭਿਨਿਵਗ੍ਗੇ (ਪਾਚਿ. ੧੦੬੭ ਆਦਯੋ) ਸਬ੍ਬਪਠਮਂ ਵੁਤ੍ਤਾ ਦ੍ਵੇ. ਸਿਕ੍ਖਮਾਨਾ ਇਚ੍ਚੇਵ ਵਤ੍ਤਬ੍ਬਾਤਿ ਸਮ੍ਮੁਤਿਕਮ੍ਮਾਦੀਸੁ ਅਞ੍ਞਥਾ ਵੁਤ੍ਤੇ ਕਮ੍ਮਂ ਕੁਪ੍ਪਤੀਤਿ ਅਧਿਪ੍ਪਾਯੋ.
੧੧੬੭. ਏਕਾਦਸਮੇ ਪਾਰਿਵਾਸਿਯੇਨ ਛਨ੍ਦਦਾਨੇਨਾਤਿ ਪਰਿਵੁਤ੍ਥੇਨ ਨਵਿਕਪ੍ਪਵੁਤ੍ਥੇਨ ਵਿਗਤੇਨ ਛਨ੍ਦਦਾਨੇਨਾਤਿ ਅਤ੍ਥੋ, ਛਨ੍ਦਵਿਸ੍ਸਜ੍ਜਨਮਤ੍ਤੇਨ ਵਾ.
੧੧੬੮. ‘‘ਵੁਟ੍ਠਿਤਾਯਾ’’ਤਿ ਏਤੇਨ ‘‘ਇਦਾਨਿ ਕਮ੍ਮਂ ਨ ਕਰਿਸ੍ਸਾਮਾ’’ਤਿ ਧੁਰਂ ਨਿਕ੍ਖਿਪਿਤ੍ਵਾ ਕਾਯੇਨ ਅਵੁਟ੍ਠਹਿਤ੍ਵਾ ਨਿਸਿਨ੍ਨਾਯਪਿ ਪਰਿਸਾਯ ਕਮ੍ਮਂ ਕਾਤੁਂ ਨ ਵਟ੍ਟਤੀਤਿ ਦਸ੍ਸੇਤਿ. ਤੇਨਾਹ ‘‘ਛਨ੍ਦਂ ਅਵਿਸ੍ਸਜ੍ਜੇਤ੍ਵਾ ਅਵੁਟ੍ਠਿਤਾਯਾ’’ਤਿ. ਪਾਲ਼ਿਯਂ ਪਨ ‘‘ਅਨਾਪਤ੍ਤਿ ਅਵੁਟ੍ਠਿਤਾਯ ਪਰਿਸਾਯਾ’’ਤਿ ਸਾਮਞ੍ਞਤੋ ਵੁਤ੍ਤਤ੍ਤਾ, ਉਪੋਸਥਕ੍ਖਨ੍ਧਕੇ ਚ ‘‘ਨ, ਭਿਕ੍ਖਵੇ, ਪਾਰਿਵਾਸਿਕਪਾਰਿਸੁਦ੍ਧਿਦਾਨੇਨ ਉਪੋਸਥੋ ਕਾਤਬ੍ਬੋ ਅਞ੍ਞਤ੍ਰ ਅਵੁਟ੍ਠਿਤਾਯ ਪਰਿਸਾਯਾ’’ਤਿ (ਮਹਾਵ. ੧੮੩) ਵੁਤ੍ਤਤ੍ਤਾ, ਤਦਟ੍ਠਕਥਾਯਮ੍ਪਿ ‘‘ਪਾਰਿਵਾਸਿਯਪਾਰਿਸੁਦ੍ਧਿਦਾਨਂ ਨਾਮ ਪਰਿਸਾਯ ਵੁਟ੍ਠਿਤਕਾਲਤੋ ਪਟ੍ਠਾਯ ਨ ਵਟ੍ਟਤਿ, ਅਵੁਟ੍ਠਿਤਾਯ ਪਨ ਵਟ੍ਟਤੀ’’ਤਿ (ਮਹਾਵ. ਅਟ੍ਠ. ੧੮੩) ਵੁਤ੍ਤਤ੍ਤਾ ਚ ‘‘ਕਮ੍ਮਂ ਨ ਕਰਿਸ੍ਸਾਮੀ’’ਤਿ ਧੁਰਂ ਨਿਕ੍ਖਿਪਿਤ੍ਵਾ ਨਿਸਿਨ੍ਨਾਯਪਿ ਕਮ੍ਮਂ ਕਾਤੁਂ ਵਟ੍ਟਤੀਤਿ ਗਹੇਤਬ੍ਬਂ. ਸੇਸਂ ਉਤ੍ਤਾਨਮੇਵ.
ਨਿਟ੍ਠਿਤੋ ਕੁਮਾਰਿਭੂਤਵਗ੍ਗੋ ਅਟ੍ਠਮੋ.
੧੧੮੧. ਛਤ੍ਤਵਗ੍ਗੋ ਉਤ੍ਤਾਨੋ ਏਵ.
ਖੁਦ੍ਦਕਵਣ੍ਣਨਾਨਯੋ ਨਿਟ੍ਠਿਤੋ.