੨. ਸਙ੍ਘਾਦਿਸੇਸਕਣ੍ਡਂ

੧. ਪਠਮਸਙ੍ਘਾਦਿਸੇਸਸਿਕ੍ਖਾਪਦਵਣ੍ਣਨਾ

੬੭੯. ਸਙ੍ਘਾਦਿਸੇਸਕਣ੍ਡੇ ‘‘ਦੁਤਿਯਸ੍ਸ ਆਰੋਚੇਤੀ’’ਤਿ ਏਤ੍ਥਾਪਿ ਦ੍ਵੀਸੁਪਿ ਅਡ੍ਡਕਾਰਕੇਸੁ ਯਸ੍ਸ ਕਸ੍ਸਚਿ ਦੁਤਿਯਸ੍ਸ ਕਥਂ ਯੋ ਕੋਚਿ ਆਰੋਚੇਤੀਤਿ ਏਵਮਤ੍ਥੋ ਗਹੇਤਬ੍ਬੋਤਿ ਆਹ ‘‘ਏਸੇਵ ਨਯੋ’’ਤਿ.

ਗਤਿਗਤਨ੍ਤਿ ਚਿਰਕਾਲਪ੍ਪਵਤ੍ਤਂ. ਆਪਤ੍ਤੀਤਿ ਆਪਜ੍ਜਨਂ. ‘‘ਨਿਸ੍ਸਾਰਣੀਯ’’ਨ੍ਤਿ ਇਦਂ ਕਤ੍ਤੁਅਤ੍ਥੇ ਸਿਦ੍ਧਨ੍ਤਿ ਆਹ ‘‘ਨਿਸ੍ਸਾਰੇਤੀ’’ਤਿ. ਆਪਨ੍ਨਂ ਭਿਕ੍ਖੁਨਿਂ ਸਙ੍ਘਤੋ ਵਿਯੋਜੇਤਿ, ਵਿਯੋਜਨਹੇਤੁ ਹੋਤੀਤਿ ਅਤ੍ਥੋ.

ਗੀਵਾਯੇਵਾਤਿ ਆਣਤ੍ਤਿਯਾ ਅਭਾਵਤੋ. ਤੇਸਂ ਅਨਤ੍ਥਕਾਮਤਾਯਾਤਿ ‘‘ਚੋਰੋ’’ਤਿ ਵੁਤ੍ਤਂ ਮਮ ਵਚਨਂ ਸੁਤ੍ਵਾ ਕੇਚਿ ਦਣ੍ਡਿਸ੍ਸਨ੍ਤਿ ਜੀਵਿਤਾ ਵੋਰੋਪੇਸ੍ਸਨ੍ਤੀਤਿ ਏਵਂ ਸਞ੍ਞਾਯ. ਏਤੇਨ ਕੇਵਲਂ ਭਯੇਨ ਵਾ ਪਰਿਕ੍ਖਾਰਗ੍ਗਹਣਤ੍ਥਂ ਵਾ ਸਹਸਾ ‘‘ਚੋਰੋ’’ਤਿ ਵੁਤ੍ਤੇ ਦਣ੍ਡਿਤੇਪਿ ਨ ਦੋਸੋਤਿ ਦਸ੍ਸੇਤਿ. ਰਾਜਪੁਰਿਸਾਨਞ੍ਹਿ ‘‘ਚੋਰੋ ਅਯ’’ਨ੍ਤਿ ਉਦ੍ਦਿਸ੍ਸ ਕਥਨੇ ਏਵ ਗੀਵਾ, ਭਿਕ੍ਖੂਨਂ, ਪਨ ਆਰਾਮਿਕਾਦੀਨਂ ਵਾ ਸਮ੍ਮੁਖਾ ‘‘ਅਸੁਕੋ ਚੋਰੋ ਏਵਮਕਾਸੀ’’ਤਿ ਕੇਨਚਿ ਵੁਤ੍ਤਵਚਨਂ ਨਿਸ੍ਸਾਯ ਆਰਾਮਿਕਾਦੀਸੁ ਰਾਜਪੁਰਿਸਾਨਂ ਵਤ੍ਵਾ ਦਣ੍ਡਾਪੇਨ੍ਤੇਸੁਪਿ ਭਿਕ੍ਖੁਸ੍ਸ ਨ ਗੀਵਾ ਰਾਜਪੁਰਿਸਾਨਂ ਅਵੁਤ੍ਤਤ੍ਤਾ. ਯੇਸਞ੍ਚ ਵੁਤ੍ਤਂ, ਤੇਹਿ ਸਯਂ ਚੋਰਸ੍ਸ ਅਦਣ੍ਡਿਤਤ੍ਤਾਤਿ ਗਹੇਤਬ੍ਬਂ. ‘‘ਤ੍ਵਂ ਏਤਸ੍ਸ ਸਨ੍ਤਕਂ ਅਚ੍ਛਿਨ੍ਦਾ’’ਤਿ ਆਣਤ੍ਤੋਪਿ ਹਿ ਸਚੇ ਅਞ੍ਞੇਨ ਅਚ੍ਛਿਨ੍ਦਾਪੇਤਿ, ਆਣਾਪਕਸ੍ਸ ਅਨਾਪਤ੍ਤਿ ਵਿਸਙ੍ਕੇਤਤ੍ਤਾ. ‘‘ਅਤ੍ਤਨੋ ਵਚਨਕਰ’’ਨ੍ਤਿ ਇਦਂ ਸਾਮੀਚਿਵਸੇਨ ਵੁਤ੍ਤਂ. ਵਚਨਂ ਅਕਰੋਨ੍ਤਾਨਂ ਰਾਜਪੁਰਿਸਾਨਮ੍ਪਿ ‘‘ਇਮਿਨਾ ਗਹਿਤਪਰਿਕ੍ਖਾਰਂ ਆਹਰਾਪੇਹਿ, ਮਾ ਚਸ੍ਸ ਦਣ੍ਡਂ ਕਰੋਹੀ’’ਤਿ ਉਦ੍ਦਿਸ੍ਸ ਵਦਨ੍ਤਸ੍ਸਾਪਿ ਦਣ੍ਡੇ ਗਹਿਤੇਪਿ ਨ ਗੀਵਾ ਏਵ ਦਣ੍ਡਗ੍ਗਹਣਸ੍ਸ ਪਟਿਕ੍ਖਿਤ੍ਤਤ੍ਤਾ, ‘‘ਅਸੁਕਭਣ੍ਡਂ ਅਵਹਰਾ’’ਤਿ ਆਣਾਪੇਤ੍ਵਾ ਵਿਪ੍ਪਟਿਸਾਰੇ ਉਪ੍ਪਨ੍ਨੇ ਪੁਨ ਪਟਿਕ੍ਖਿਪਨੇ (ਪਾਰਾ. ੧੨੧) ਵਿਯ.

ਦਾਸਾਦੀਨਂ ਸਮ੍ਪਟਿਚ੍ਛਨੇ ਵਿਯ ਤਦਤ੍ਥਾਯ ਅਡ੍ਡਕਰਣੇ ਭਿਕ੍ਖੂਨਮ੍ਪਿ ਦੁਕ੍ਕਟਨ੍ਤਿ ਆਹ ‘‘ਅਕਪ੍ਪਿਯਅਡ੍ਡੋ ਨਾਮ ਨ ਵਟ੍ਟਤੀ’’ਤਿ. ਕੇਨਚਿ ਪਨ ਭਿਕ੍ਖੁਨਾ ਖੇਤ੍ਤਾਦਿਅਤ੍ਥਾਯ ਵੋਹਾਰਿਕਾਨਂ ਸਨ੍ਤਿਕਂ ਗਨ੍ਤ੍ਵਾ ਅਡ੍ਡੇ ਕਤੇਪਿ ਤਂ ਖੇਤ੍ਤਾਦਿਸਮ੍ਪਟਿਚ੍ਛਨੇ ਵਿਯ ਸਬ੍ਬੇਸਂ ਅਕਪ੍ਪਿਯਂ ਨ ਹੋਤਿ ਪੁਬ੍ਬੇ ਏਵ ਸਙ੍ਘਸ੍ਸ ਸਨ੍ਤਕਤ੍ਤਾ, ਭਿਕ੍ਖੁਸ੍ਸੇਵ ਪਨ ਪਯੋਗਵਸੇਨ ਆਪਤ੍ਤਿਯੋ ਹੋਨ੍ਤਿ. ਦਾਸਾਦੀਨਮ੍ਪਿ ਪਨ ਅਤ੍ਥਾਯ ਰਕ੍ਖਂ ਯਾਚਿਤੁਂ ਵੋਹਾਰਿਕੇਨ ਪੁਟ੍ਠੇਨ ਸਙ੍ਘਸ੍ਸ ਉਪ੍ਪਨ੍ਨਂ ਕਪ੍ਪਿਯਕ੍ਕਮਂ ਵਤ੍ਤੁਂ, ਆਰਾਮਿਕਾਦੀਹਿ ਚ ਅਡ੍ਡਂ ਕਾਰਾਪੇਤੁਞ੍ਚ ਵਟ੍ਟਤਿ ਏਵ. ਵਿਹਾਰਵਤ੍ਥਾਦਿਕਪ੍ਪਿਯਅਡ੍ਡਂ ਪਨ ਭਿਕ੍ਖੁਨੋ ਸਯਮ੍ਪਿ ਕਾਤੁਂ ਵਟ੍ਟਤਿ.

ਭਿਕ੍ਖੁਨੀਨਂ ਵੁਤ੍ਤੋਤਿ ਰਕ੍ਖਂ ਯਾਚਨ੍ਤੀਨਂ ਭਿਕ੍ਖੁਨੀਨਂ ਵੁਤ੍ਤੋ ਉਦ੍ਦਿਸ੍ਸਅਨੁਦ੍ਦਿਸ੍ਸਵਸੇਨ ਰਕ੍ਖਾਯਾਚਨਵਿਨਿਚ੍ਛਯੋ, ਨ ਸਬ੍ਬੋ ਸਿਕ੍ਖਾਪਦਵਿਨਿਚ੍ਛਯੋ ਅਸਾਧਾਰਣਤ੍ਤਾ ਸਿਕ੍ਖਾਪਦਸ੍ਸ. ਤੇਨਾਹ ‘‘ਭਿਕ੍ਖੁਨੋਪੀ’’ਤਿਆਦਿ. ਅਨਾਕਡ੍ਢਿਤਾਯ ਅਡ੍ਡਕਰਣਂ, ਅਡ੍ਡਪਰਿਯੋਸਾਨਨ੍ਤਿ ਦ੍ਵੇ ਅਙ੍ਗਾਨਿ.

ਪਠਮਸਙ੍ਘਾਦਿਸੇਸਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੨. ਦੁਤਿਯਸਙ੍ਘਾਦਿਸੇਸਸਿਕ੍ਖਾਪਦਵਣ੍ਣਨਾ

੬੮੩. ਪਾਲ਼ਿਯਂ ਦੁਤਿਯੇ ਮਲ੍ਲਗਣਭਟਿਪੁਤ੍ਤਗਣਾਦਿਕਨ੍ਤਿਆਦੀਸੁ ਮਲ੍ਲਰਾਜੂਨਂ ਗਣੋ ਮਲ੍ਲਗਣੋ. ਭਟਿਪੁਤ੍ਤਾ ਨਾਮ ਕੇਚਿ ਗਣਰਾਜਾਨੋ, ਤੇਸਂ ਗਣੋ. ਕੇਚਿ ਪਨ ‘‘ਨਾਰਾਯਨਭਤ੍ਤਿਕੋ ਪੁਞ੍ਞਕਾਰਗਣੋ ਮਲ੍ਲਗਣੋ. ਤਥਾ ਕੁਮਾਰਭਤ੍ਤਿਕੋ ਚ ਗਣੋ ਭਟਿਪੁਤ੍ਤਗਣੋ’’ਤਿਪਿ (ਸਾਰਤ੍ਥ. ਟੀ. ਸਂਘਾਦਿਸੇਸਕਣ੍ਡ ੩.੬੮੩) ਵਦਨ੍ਤਿ. ਧਮ੍ਮਗਣੋਤਿ ਸਾਸਨੇ, ਲੋਕੇ ਵਾ ਅਨੇਕਪ੍ਪਕਾਰਪੁਞ੍ਞਕਾਰਕੋ ਗਣੋ. ਗਨ੍ਧਵਿਕਤਿਕਾਰਕੋ ਗਣੋ ਗਨ੍ਧਿਕਸੇਣੀ. ਪੇਸਕਾਰਾਦਿਗਣੋ ਦੁਸ੍ਸਿਕਸੇਣੀ. ਕਪ੍ਪਗਤਿਕਨ੍ਤਿ ਕਪ੍ਪਿਯਭਾਵਗਤਂ, ਪਬ੍ਬਜਿਤਪੁਬ੍ਬਨ੍ਤਿ ਅਤ੍ਥੋ.

੬੮੫. ਪਾਲ਼ਿਯਂ ਵੁਟ੍ਠਾਪੇਤੀਤਿ ਉਪਸਮ੍ਪਾਦੇਤਿ. ਅਕਪ੍ਪਗਤਮ੍ਪਿ ਪਬ੍ਬਾਜੇਨ੍ਤਿਯਾ ਦੁਕ੍ਕਟਨ੍ਤਿ ਵਦਨ੍ਤਿ. ਖੀਣਾਸਵਾਯਪਿ ਆਪਜ੍ਜਿਤਬ੍ਬਤੋ ‘‘ਤਿਚਿਤ੍ਤ’’ਨ੍ਤਿ ਵੁਤ੍ਤਂ. ਚੋਰਿਤਾ, ਤਂ ਞਤ੍ਵਾ ਅਨਨੁਞ੍ਞਾਤਕਾਰਣਾ ਵੁਟ੍ਠਾਪਨਨ੍ਤਿ ਦ੍ਵੇ ਅਙ੍ਗਾਨਿ.

ਦੁਤਿਯਸਙ੍ਘਾਦਿਸੇਸਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੩. ਤਤਿਯਸਙ੍ਘਾਦਿਸੇਸਸਿਕ੍ਖਾਪਦਵਣ੍ਣਨਾ

੬੯੨. ਤਤਿਯੇ ਪਰਿਕ੍ਖੇਪਂ ਅਤਿਕ੍ਕਾਮੇਨ੍ਤਿਯਾਤਿ ਗਾਮਨ੍ਤਰਸ੍ਸ ਪਰਿਕ੍ਖੇਪਂ ਅਤਿਕ੍ਕਾਮੇਨ੍ਤਿਯਾ. ‘‘ਗਾਮਨ੍ਤਰਂ ਗਚ੍ਛੇਯ੍ਯਾ’’ਤਿ ਹਿ ਵੁਤ੍ਤਂ. ਵਿਕਾਲਗਾਮਪ੍ਪਵੇਸਨਸਿਕ੍ਖਾਪਦੇ ਵਿਯ ‘‘ਅਪਰਿਕ੍ਖਿਤ੍ਤਸ੍ਸ ਉਪਚਾਰਂ ਓਕ੍ਕਮਨ੍ਤਿਯਾ’’ਤਿ ਅਵਤ੍ਵਾ ‘‘ਅਤਿਕ੍ਕਾਮੇਨ੍ਤਿਯਾ’’ਤਿ ਪਾਲ਼ਿਯਂ ਵੁਤ੍ਤਤ੍ਤਾ ਗਾਮਂ ਪਵਿਸਨ੍ਤਿਯਾ ਘਰੂਪਚਾਰੇ ਠਿਤਸ੍ਸ ਦੁਤਿਯਲੇਡ੍ਡੁਪਾਤਸਙ੍ਖਾਤਸ੍ਸ ਉਪਚਾਰਸ੍ਸ ਅਤਿਕ੍ਕਮੋ ਨਾਮ ਪਠਮਲੇਡ੍ਡੁਪਾਤਟ੍ਠਾਨਸਙ੍ਖਾਤਸ੍ਸ ਪਰਿਕ੍ਖੇਪਾਰਹਟ੍ਠਾਨਸ੍ਸ ਅਤਿਕ੍ਕਮੋ ਏਵਾਤਿ ਆਹ ‘‘ਪਰਿਕ੍ਖੇਪਾਰਹਟ੍ਠਾਨਂ ਏਕੇਨ ਪਾਦੇਨ ਅਤਿਕ੍ਕਮਤੀ’’ਤਿ.

ਮਜ੍ਝੇਤਿ ਗਾਮਮਜ੍ਝੇ. ਪਚ੍ਛਾਤਿ ਅਪਰਕਾਲੇ. ‘‘ਚਤੁਗਾਮਸਾਧਾਰਣਤ੍ਤਾ’’ਤਿ ਇਮਿਨਾ ਵਿਹਾਰਤੋ ਚਤੂਸੁ ਗਾਮੇਸੁ ਯਤ੍ਥ ਕਤ੍ਥਚਿ ਪਵਿਸਿਤੁਂ ਵਟ੍ਟਤੀਤਿ ਏਤ੍ਥ ਕਾਰਣਮਾਹ.

ਪਰਤੀਰਮੇਵ ਅਕ੍ਕਮਨ੍ਤਿਯਾਤਿ ਨਦਿਂ ਅਨੋਤਰਿਤ੍ਵਾ ਓਰਿਮਤੀਰਤੋ ਲਙ੍ਘਿਤ੍ਵਾ ਵਾ ਆਕਾਸਾਦਿਨਾ ਵਾ ਪਰਤੀਰਮੇਵ ਅਤਿਕ੍ਕਾਮੇਨ੍ਤਿਯਾ. ਓਰਿਮਤੀਰਮੇਵ ਆਗਚ੍ਛਤਿ, ਆਪਤ੍ਤੀਤਿ ਪਾਰਗਮਨਾਯ ਓਤਿਣ੍ਣਤ੍ਤਾ ਵੁਤ੍ਤਂ.

ਤਾਦਿਸੇ ਅਰਞ੍ਞੇਤਿ ਇਨ੍ਦਖੀਲਤੋ ਬਹਿਭਾਵਲਕ੍ਖਣੇ ਅਰਞ੍ਞੇ. ‘‘ਤੇਨੇਵਾ’’ਤਿਆਦਿਨਾ ਦਸ੍ਸਨੂਪਚਾਰੇ ਵਿਰਹਿਤੇ ਸਵਨੂਪਚਾਰਸ੍ਸ ਵਿਜ੍ਜਮਾਨਤ੍ਤੇਪਿ ਆਪਤ੍ਤਿ ਹੋਤੀਤਿ ਦਸ੍ਸੇਤਿ. ਅਞ੍ਞਂ ਮਗ੍ਗਂ ਗਣ੍ਹਾਤੀਤਿ ਮਗ੍ਗਮੂਲ਼੍ਹਤ੍ਤਾ ਗਣ੍ਹਾਤਿ, ਨ ਦੁਤਿਯਿਕਂ ਓਹਿਯਿਤੁਂ. ਤਸ੍ਮਾ ਅਨਾਪਤ੍ਤਿ. ਅਨਨ੍ਤਰਾਯੇਨ ਏਕਭਾਵੋ, ਅਨਾਪਦਾਯ ਗਾਮਨ੍ਤਰਗਮਨਾਦੀਸੁ ਏਕਨ੍ਤਿ ਦ੍ਵੇ ਅਙ੍ਗਾਨਿ.

ਤਤਿਯਸਙ੍ਘਾਦਿਸੇਸਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੪. ਚਤੁਤ੍ਥਸਙ੍ਘਾਦਿਸੇਸਸਿਕ੍ਖਾਪਦਵਣ੍ਣਨਾ

੬੯੪. ਚਤੁਤ੍ਥੇ ਕਾਰਕਗਣਸ੍ਸਾਤਿ ਇਮਸ੍ਸ ਕਮ੍ਮਂ ਕਾਤਬ੍ਬਨ੍ਤਿ ਯੇਹਿ ਸਨ੍ਨਿਟ੍ਠਾਨਂ ਕਤਂ, ਤੇ ਸਨ੍ਧਾਯ ਵੁਤ੍ਤਂ. ਕਮ੍ਮਵਾਚਕ੍ਖਣੇ ਸਹਠਿਤੇਤਿ ਕੇਚਿ. ਨੇਤ੍ਥਾਰਵਤ੍ਤੇਤਿ ਨਿਤ੍ਥਰਣਹੇਤੁਮ੍ਹਿ ਵਤ੍ਤੇ.

੬੯੮. ਪਾਲ਼ਿਯਂ ਅਸਨ੍ਤੇ ਕਾਰਕਸਙ੍ਘੇਤਿ ਏਤ੍ਥ ਵਿਜ੍ਜਮਾਨਂ ਸੁਦੂਰਮ੍ਪਿ ਗਨ੍ਤ੍ਵਾ ਆਪੁਚ੍ਛਿਤਬ੍ਬਂ. ਅਨ੍ਤਰਾਯੇ ਪਨ ਸਤਿ ਸਮ੍ਮਾ ਵਤ੍ਤਨ੍ਤਂ ਓਸਾਰੇਤੁਂ ਵਟ੍ਟਤੀਤਿ. ਧਮ੍ਮਕਮ੍ਮੇਨ ਉਕ੍ਖਿਤ੍ਤਤਾ, ਅਨਨੁਞ੍ਞਾਤਕਾਰਣਾ ਓਸਾਰਣਨ੍ਤਿ ਦ੍ਵੇ ਅਙ੍ਗਾਨਿ.

ਚਤੁਤ੍ਥਸਙ੍ਘਾਦਿਸੇਸਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੫. ਪਞ੍ਚਮਸਙ੍ਘਾਦਿਸੇਸਸਿਕ੍ਖਾਪਦਵਣ੍ਣਨਾ

੭੦੧. ਪਞ੍ਚਮੇ ਤਨ੍ਤਿ ਮਹਾਅਟ੍ਠਕਥਾਯਂ ਅਵਚਨਂ ‘‘ਅਨਵਸ੍ਸੁਤੋਤਿ ਜਾਨਨ੍ਤੀ ਪਟਿਗ੍ਗਣ੍ਹਾਤੀ’’ਤਿਆਦਿ ਪਾਲ਼ਿਯਾ ਸਮੇਤਿ. ਉਭਤੋ ਅਵਸ੍ਸੁਤਭਾਵੋ, ਉਦਕਦਨ੍ਤਪੋਨਤੋ ਅਞ੍ਞਂ ਸਹਤ੍ਥਾ ਗਹੇਤ੍ਵਾ ਅਜ੍ਝੋਹਰਣਨ੍ਤਿ ਦ੍ਵੇ ਅਙ੍ਗਾਨਿ.

ਪਞ੍ਚਮਸਙ੍ਘਾਦਿਸੇਸਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੬. ਛਟ੍ਠਸਙ੍ਘਾਦਿਸੇਸਸਿਕ੍ਖਾਪਦਵਣ੍ਣਨਾ

੭੦੫. ਛਟ੍ਠੇ ਪਟਿਗ੍ਗਹੋ ਤੇਨ ਨ ਵਿਜ੍ਜਤੀਤਿ ਤੇਨੇਵ ‘‘ਨ ਦੇਤੀ’’ਤਿ ਵੁਤ੍ਤਕਾਰਣੇਨ ਉਯ੍ਯੋਜਿਤਾਯ ਹਤ੍ਥਤੋ ਇਤਰਾਯ ਪਟਿਗ੍ਗਹੋਪਿ ਨਤ੍ਥਿ. ਪਰਿਭੋਗਪਚ੍ਚਯਾਤਿ ਉਯ੍ਯੋਜਿਤਾਯ ਭੋਜਨਪਰਿਯੋਸਾਨਪਚ੍ਚਯਾਤਿ ਅਤ੍ਥੋ. ਮਨੁਸ੍ਸਪੁਰਿਸਸ੍ਸ ਅਵਸ੍ਸੁਤਤਾ, ਤਂ ਞਤ੍ਵਾ ਅਨਨੁਞ੍ਞਾਤਕਾਰਣਾ ਉਯ੍ਯੋਜਨਾ, ਤੇਨ ਇਤਰਿਸ੍ਸਾ ਗਹੇਤ੍ਵਾ ਭੋਜਨਪਰਿਯੋਸਾਨਨ੍ਤਿ ਤੀਣਿ ਅਙ੍ਗਾਨਿ.

ਛਟ੍ਠਸਙ੍ਘਾਦਿਸੇਸਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੭੦੯-੭੨੭. ਸਤ੍ਤਮਤੋ ਯਾਵਦਸਮਪਰਿਯੋਸਾਨਾਨਿ ਉਤ੍ਤਾਨਾਨੇਵ.

ਸਙ੍ਘਾਦਿਸੇਸਵਣ੍ਣਨਾਨਯੋ ਨਿਟ੍ਠਿਤੋ.