੧੧. ਪਞ੍ਚਸਤਿਕਕ੍ਖਨ੍ਧਕੋ

ਖੁਦ੍ਦਾਨੁਖੁਦ੍ਦਕਸਿਕ੍ਖਾਪਦਕਥਾਵਣ੍ਣਨਾ

੪੩੭. ਪਞ੍ਚਸਤਿਕਕ੍ਖਨ੍ਧਕੇ ਪਾਲ਼ਿਯਂ ‘‘ਅਪਾਵੁਸੋ, ਅਮ੍ਹਾਕਂ ਸਤ੍ਥਾਰਂ ਜਾਨਾਸੀ’’ਤਿ ਇਦਂ ਥੇਰੋ ਸਯਂ ਭਗਵਤੋ ਪਰਿਨਿਬ੍ਬੁਤਭਾਵਂ ਜਾਨਨ੍ਤੋਪਿ ਅਤ੍ਤਨਾ ਸਹਗਤਭਿਕ੍ਖੁਪਰਿਸਾਯ ਞਾਪਨਤ੍ਥਮੇਵ, ਸੁਭਦ੍ਦਸ੍ਸ ਵੁਡ੍ਢਪਬ੍ਬਜਿਤਸ੍ਸ ਸਾਸਨਸ੍ਸ ਪਟਿਪਕ੍ਖਵਚਨਂ ਭਿਕ੍ਖੂਨਂ ਵਿਞ੍ਞਾਪਨਤ੍ਥਞ੍ਚ ਏਵਂ ਪੁਚ੍ਛਿ. ਸੁਭਦ੍ਦੋ ਹਿ ਕੁਸਿਨਾਰਾਯਂ ਭਗਵਤਿ ਅਭਿਪ੍ਪਸਨ੍ਨਾਯ ਖਤ੍ਤਿਯਾਦਿਗਹਟ੍ਠਪਰਿਸਾਯ ਮਜ੍ਝੇ ਭਗਵਤੋ ਪਰਿਨਿਬ੍ਬਾਨਂ ਸੁਤ੍ਵਾ ਹਟ੍ਠਪਹਟ੍ਠੋਪਿ ਭਯੇਨ ਪਹਟ੍ਠਾਕਾਰਂ ਵਾਚਾਯ ਪਕਾਸੇਤੁਂ ਨ ਸਕ੍ਖਿਸ੍ਸਤਿ, ਇਧੇਵ ਪਨ ਵਿਜਨਪਦੇਸੇ ਸੁਤ੍ਵਾ ਯਥਾਜ੍ਝਾਸਯਂ ਅਤ੍ਤਨੋ ਪਾਪਲਦ੍ਧਿਂ ਪਕਾਸੇਸ੍ਸਤਿ, ਤਤੋ ਤਮੇਵ ਪਚ੍ਚਯਂ ਦਸ੍ਸੇਤ੍ਵਾ ਭਿਕ੍ਖੂ ਸਮੁਸ੍ਸਾਹੇਤ੍ਵਾ ਧਮ੍ਮਵਿਨਯਸਙ੍ਗਹਂ ਕਾਰੇਤ੍ਵਾ ਏਤਸ੍ਸ ਪਾਪਭਿਕ੍ਖੁਸ੍ਸ, ਅਞ੍ਞੇਸਞ੍ਚ ਈਦਿਸਾਨਂ ਮਨੋਰਥਵਿਘਾਤਂ, ਸਾਸਨਟ੍ਠਿਤਿਞ੍ਚ ਕਰਿਸ੍ਸਾਮੀਤਿ ਜਾਨਨ੍ਤੋਵ ਤਂ ਪੁਚ੍ਛੀਤਿ ਵੇਦਿਤਬ੍ਬਂ. ਤੇਨੇਵ ਥੇਰੋ ‘‘ਏਕਮਿਦਾਹਂ, ਆਵੁਸੋ, ਸਮਯ’’ਨ੍ਤਿਆਦਿਨਾ ਸੁਭਦ੍ਦਵਚਨਮੇਵ ਦਸ੍ਸੇਤ੍ਵਾ ਧਮ੍ਮਵਿਨਯਂ ਸਙ੍ਗਾਯਾਪੇਸਿ. ਨਾਨਾਭਾਵੋਤਿ ਸਰੀਰੇਨ ਨਾਨਾਦੇਸਭਾਵੋ, ਵਿਪ੍ਪਵਾਸੋਤਿ ਅਤ੍ਥੋ. ਵਿਨਾਭਾਵੋਤਿ ਮਰਣੇਨ ਵਿਯੁਜ੍ਜਨਂ. ਅਞ੍ਞਥਾਭਾਵੋਤਿ ਭਵਨ੍ਤਰੂਪਗਮਨੇਨ ਅਞ੍ਞਾਕਾਰਪ੍ਪਤ੍ਤਿ.

੪੪੧. ‘‘ਆਕਙ੍ਖਮਾਨੋ…ਪੇ… ਸਮੂਹਨੇਯ੍ਯਾ’’ਤਿ ਇਦਂ ਭਗਵਾ ਮਯਾ ‘‘ਆਕਙ੍ਖਮਾਨੋ’’ਤਿ ਵੁਤ੍ਤਤ੍ਤਾ ਏਕਸਿਕ੍ਖਾਪਦਮ੍ਪਿ ਸਮੂਹਨਿਤਬ੍ਬਂ ਅਪਸ੍ਸਨ੍ਤਾ, ਸਮੂਹਨੇ ਚ ਦੋਸਂ ਦਿਸ੍ਵਾ ਧਮ੍ਮਸਙ੍ਗਹਕਾ ਭਿਕ੍ਖੂ ‘‘ਅਪਞ੍ਞਤ੍ਤਂ ਨ ਪਞ੍ਞਾਪੇਸ੍ਸਾਮ, ਪਞ੍ਞਤ੍ਤਂ ਨ ਸਮੁਚ੍ਛਿਨ੍ਦਿਸ੍ਸਾਮਾ’’ਤਿਆਦਿਨਾ ਪੁਨ ‘‘ਪਞ੍ਞਤ੍ਤਿਸਦਿਸਾਯ ਅਕੁਪ੍ਪਾਯ ਕਮ੍ਮਵਾਚਾਯ ਸਾਵੇਤ੍ਵਾ ਸਮਾਦਾਯ ਵਤ੍ਤਿਸ੍ਸਨ੍ਤਿ, ਤਤੋ ਯਾਵ ਸਾਸਨਨ੍ਤਰਧਾਨਾ ਅਪ੍ਪਟਿਬਾਹਿਯਾਨਿ ਸਿਕ੍ਖਾਪਦਾਨਿ ਭਵਿਸ੍ਸਨ੍ਤੀ’’ਤਿ ਇਮਿਨਾ ਅਧਿਪ੍ਪਾਯੇਨ ਅਵੋਚਾਤਿ ਦਟ੍ਠਬ੍ਬਂ. ਤੇਨੇਵ ਮਹਾਥੇਰਾਪਿ ਤਥੇਵ ਪਟਿਪਜ੍ਜਿਂਸੁ.

ਗਿਹਿਗਤਾਨੀਤਿ ਗਿਹੀਸੁ ਗਤਾਨਿ. ਖਤ੍ਤਿਯਮਹਾਸਾਰਾਦਿਗਿਹੀਹਿ ਞਾਤਾਨੀਤਿ ਅਤ੍ਥੋ. ਚਿਤਕਧੂਮਕਾਲੋ ਅਤ੍ਤਨੋ ਪਵਤ੍ਤਿਪਰਿਯੋਸਾਨਭੂਤੋ ਏਤਸ੍ਸਾਤਿ ਧੂਮਕਾਲਿਕਂ.

੪੪੩. ਓਲ਼ਾਰਿਕੇ ਨਿਮਿਤ੍ਤੇ ਕਰਿਯਮਾਨੇਪੀਤਿ ‘‘ਆਕਙ੍ਖਮਾਨੋ, ਆਨਨ੍ਦ, ਤਥਾਗਤੋ ਕਪ੍ਪਂ ਵਾ ਤਿਟ੍ਠੇਯ੍ਯ ਕਪ੍ਪਾਵਸੇਸਂ ਵਾ’’ਤਿ ਏਵਂ ਥੂਲਤਰੇ ‘‘ਤਿਟ੍ਠਤੁ, ਭਗਵਾ, ਕਪ੍ਪ’’ਨ੍ਤਿ ਯਾਚਨਹੇਤੁਭੂਤੇ ਓਕਾਸਨਿਮਿਤ੍ਤੇ ਕਮ੍ਮੇ ਕਰਿਯਮਾਨੇ. ਮਾਰੇਨ ਪਰਿਯੁਟ੍ਠਿਤਚਿਤ੍ਤੋਤਿ ਮਾਰੇਨ ਆਵਿਟ੍ਠਚਿਤ੍ਤੋ.

੪੪੫. ਉਜ੍ਜਵਨਿਕਾਯਾਤਿ ਪਟਿਸੋਤਗਾਮਿਨਿਯਾ. ਕੁਚ੍ਛਿਤੋ ਲਵੋ ਛੇਦੋ ਵਿਨਾਸੋ ਕੁਲਵੋ, ਨਿਰਤ੍ਥਕਵਿਨਿਯੋਗੋ. ਤਂ ਨ ਗਚ੍ਛਨ੍ਤੀਤਿ ਨ ਕੁਲਵਂ ਗਮੇਨ੍ਤਿ.

ਖੁਦ੍ਦਾਨੁਖੁਦ੍ਦਕਸਿਕ੍ਖਾਪਦਕਥਾਵਣ੍ਣਨਾ ਨਿਟ੍ਠਿਤਾ.

ਪਞ੍ਚਸਤਿਕਕ੍ਖਨ੍ਧਕਵਣ੍ਣਨਾਨਯੋ ਨਿਟ੍ਠਿਤੋ.