੨. ਵਿਲੇਖਨਸਿਕ੍ਖਾਪਦਵਣ੍ਣਨਾ

੪੩੮. ਦੁਤਿਯੇ ਅਲਜ੍ਜਿਤਾਤਿ ਅਲਜ੍ਜਿਤਾਯ. ਏਵਂ ਸੇਸੇਸੁਪਿ. ਸਞ੍ਚਿਚ੍ਚ ਆਪਤ੍ਤਿਂ ਆਪਜ੍ਜਤੀਤਿਆਦਿ ਭਿਕ੍ਖੁਭਿਕ੍ਖੁਨੀਨਞ੍ਞੇਵ ਵੁਤ੍ਤਂ ਅਲਜ੍ਜਿਲਕ੍ਖਣਂ, ਸਾਮਣੇਰਾਦੀਨਂ, ਪਨ ਗਹਟ੍ਠਾਨਞ੍ਚ ਸਾਧਾਰਣਵਸੇਨ ਯਥਾਸਕਂ ਸਿਕ੍ਖਾਪਦਵੀਤਿਕ੍ਕਮਨਪਟਿਗੂਹਨਾਦਿਤੋ ਵੇਦਿਤਬ੍ਬਂ. ਲਜ੍ਜਿਲਕ੍ਖਣੇਪਿ ਏਸੇਵ ਨਯੋ. ਕਿਞ੍ਚਾਪਿ ਕੁਕ੍ਕੁਚ੍ਚੇ ਉਪ੍ਪਨ੍ਨੇਪਿ ਮਦ੍ਦਿਤ੍ਵਾ ਕਰੋਨ੍ਤੋ, ਕਪ੍ਪਿਯੇ ਅਕਪ੍ਪਿਯਸਞ੍ਞਿਤਾਯ ਕਰੋਨ੍ਤੋਪਿ ਤਙ੍ਖਣਿਕਾਯ ਅਲਜ੍ਜਿਤਾਯ ਏਵਂ ਕਰੋਨ੍ਤਿ. ਤਥਾਪਿ ਕੁਕ੍ਕੁਚ੍ਚਾਦਿਭੇਦੇ ਵਿਸੁਂ ਗਹਿਤਾਤਿ ਦਟ੍ਠਬ੍ਬਂ.

ਵਜ੍ਜਿਪੁਤ੍ਤਕਾ ਦਸਵਤ੍ਥੁਦੀਪਕਾ. ਪਰੂਪਹਾਰਅਞ੍ਞਾਣਕਙ੍ਖਾਪਰਵਿਤਾਰਣਾਦਿਵਾਦਾਤਿ ਏਤ੍ਥ ਅਰਹਤ੍ਤਂ ਪਟਿਜਾਨਨ੍ਤਾਨਂ ਕੁਹਕਾਨਂ ਸੁਕ੍ਕਵਿਸ੍ਸਟ੍ਠਿਂ ਦਿਸ੍ਵਾ ‘‘ਮਾਰਕਾਯਿਕਾ ਦੇਵਤਾ ਅਸੁਚਿਂ ਉਪਸਂਹਰਨ੍ਤੀ’’ਤਿਗਾਹਿਨੋ ਪਰੂਪਹਾਰਵਾਦਾ ਨਾਮ. ਅਰਹਤੋ ਸਬ੍ਬੇਸਂ ਇਤ੍ਥਿਪੁਰਿਸਾਦੀਨਂ ਨਾਮਾਦਿਅਜਾਨਨੇ ਅਞ੍ਞਾਣਂ, ਤਤ੍ਥ ਸਨ੍ਨਿਟ੍ਠਾਨਭਾਵੇਨ ਕਙ੍ਖਾ, ਪਰਤੋ ਸੁਤ੍ਵਾ ਨਾਮਾਦਿਜਾਨਨੇਨ ਪਰਵਿਤਾਰਣੋ ਅਤ੍ਥੀਤਿਵਾਦਿਨੋ ਅਞ੍ਞਾਣਵਾਦਾ, ਕਙ੍ਖਾਵਾਦਾ, ਪਰਵਿਤਾਰਣਵਾਦਾ ਚ ਤੇਸਂ, ਮਹਾਸਙ੍ਘਿਕਾਦੀਨਞ੍ਚ ਵਿਭਾਗੋ ਕਥਾਵਤ੍ਥੁਪ੍ਪਕਰਣੇ ਵੁਤ੍ਤੋ.

ਚਤ੍ਤਾਰੋ ਮਗ੍ਗਾ ਚ ਫਲਾਨਿ ਚਾਤਿ ਏਤ੍ਥ ਚ-ਕਾਰੇਨ ਅਭਿਞ੍ਞਾਪਟਿਸਮ੍ਭਿਦਾਪਿ ਸਙ੍ਗਹਿਤਾਤਿ ਦਟ੍ਠਬ੍ਬਂ. ਕੇਚੀਤਿ ਪਰਿਯਤ੍ਤਿਧਰਾ ਧਮ੍ਮਕਥਿਕਾ. ਪੁਨ ਕੇਚੀਤਿ ਪਟਿਪਤ੍ਤਿਧਰਾ ਪਂਸੁਕੂਲਿਕਤ੍ਥੇਰਾ. ਇਤਰੇ ਪਨਾਤਿਆਦੀਸੁ ਅਯਂ ਅਧਿਪ੍ਪਾਯੋ – ਧਮ੍ਮਕਥਿਕਤ੍ਥੇਰਾ ਪਨ ਪਂਸੁਕੂਲਿਕਤ੍ਥੇਰੇਹਿ ਆਭਤਂ ਸੁਤ੍ਤਂ ਸੁਤ੍ਵਾ –

‘‘ਯਾਵ ਤਿਟ੍ਠਨ੍ਤਿ ਸੁਤ੍ਤਨ੍ਤਾ, ਵਿਨਯੋ ਯਾਵ ਦਿਪ੍ਪਤਿ;

ਤਾਵ ਦਕ੍ਖਨ੍ਤਿ ਆਲੋਕਂ, ਸੂਰਿਯੇ ਅਬ੍ਭੁਟ੍ਠਿਤੇ ਯਥਾ.

‘‘ਸੁਤ੍ਤਨ੍ਤੇਸੁ ਅਸਨ੍ਤੇਸੁ, ਪਮੁਟ੍ਠੇ ਵਿਨਯਮ੍ਹਿ ਚ;

ਤਮੋ ਭਵਿਸ੍ਸਤਿ ਲੋਕੇ, ਸੂਰਿਯੇ ਅਤ੍ਥਙ੍ਗਤੇ ਯਥਾ.

‘‘ਸੁਤ੍ਤਨ੍ਤੇ ਰਕ੍ਖਿਤੇ ਸਨ੍ਤੇ, ਪਟਿਪਤ੍ਤਿ ਹੋਤਿ ਰਕ੍ਖਿਤਾ;

ਪਟਿਪਤ੍ਤਿਯਂ ਠਿਤੋ ਧੀਰੋ, ਯੋਗਕ੍ਖੇਮਾ ਨ ਧਂਸਤੀ’’ਤਿ. (ਅ. ਨਿ. ਅਟ੍ਠ. ੧.੧.੧੩੦) –

ਇਦਂ ਸੁਤ੍ਤਂ ਆਹਰਿਤ੍ਵਾ ਅਤ੍ਤਨੋਵ ਵਾਦਂ ਪਤਿਟ੍ਠਪੇਨ੍ਤਾ ਪਾਰਾਜਿਕਾਨਾਪਜ੍ਜਨਵਸੇਨ ਠਿਤਾ ਪਟਿਪਤ੍ਤਿਸਙ੍ਗਹਿਤਾ ਪਰਿਯਤ੍ਤਿਯੇਵ ਮੂਲਨ੍ਤਿ ਆਹਂਸੂਤਿ. ਤੇਨਾਹ ‘‘ਸਚੇ ਪਞ੍ਚ ਭਿਕ੍ਖੂ ਚਤ੍ਤਾਰਿ ਪਾਰਾਜਿਕਾਨਿ ਰਕ੍ਖਣਕਾ…ਪੇ… ਸਾਸਨਂ ਵੁਡ੍ਢਿਂ ਵਿਰੁਲ਼੍ਹਿਂ ਗਮਯਿਸ੍ਸਨ੍ਤੀ’’ਤਿ. ਏਤੇਨ ਚ ਪਰਿਕ੍ਖੀਣੇ ਕਾਲੇ ਲਜ੍ਜਿਗਣਂ ਅਲਭਨ੍ਤੇਨ ਵਿਨਯਧਰੇਨ ਅਲਜ੍ਜਿਨੋਪਿ ਪਕਤਤ੍ਤੇ ਸਙ੍ਗਹੇਤ੍ਵਾ ਤੇਹਿ ਸਹ ਧਮ੍ਮਾਮਿਸਸਮ੍ਭੋਗਂ ਸਂਵਾਸਂ ਕਰੋਨ੍ਤੇਨ ਬਹੂ ਕੁਲਪੁਤ੍ਤੇ ਉਪਸਮ੍ਪਾਦੇਤ੍ਵਾ ਸਾਸਨਂ ਪਗ੍ਗਹੇਤੁਂ ਵਟ੍ਟਤੀਤਿ ਇਦਂ ਸਿਜ੍ਝਤੀਤਿ ਦਟ੍ਠਬ੍ਬਂ. ਗਰਹਿਤੁਕਾਮਤਾ, ਉਪਸਮ੍ਪਨ੍ਨਸ੍ਸ ਸਨ੍ਤਿਕੇ ਸਿਕ੍ਖਾਪਦਵਿਵਣ੍ਣਨਨ੍ਤਿ ਦ੍ਵੇ ਅਙ੍ਗਾਨਿ.

ਵਿਲੇਖਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.