੨. ਅਤ੍ਥਙ੍ਗਤਸਿਕ੍ਖਾਪਦਵਣ੍ਣਨਾ

੧੫੩. ਦੁਤਿਯੇ ਕੋਕਨਦਨ੍ਤਿ ਪਦੁਮਵਿਸੇਸਂ, ਤਂ ਕਿਰ ਬਹੁਪਤ੍ਤਂ ਵਣ੍ਣਸਮ੍ਪਨ੍ਨਂ. ਅਯਞ੍ਹੇਤ੍ਥ ਅਤ੍ਥੋ – ਯਥਾ ਕੋਕਨਦਸਙ੍ਖਾਤਂ ਪਦੁਮਂ, ਏਵਂ ਫੁਲ੍ਲਮੁਖਪਦੁਮਂ ਅਵੀਤਗੁਣਗਨ੍ਧਂ ਨਿਮ੍ਮਲੇ ਅਨ੍ਤਲਿਕ੍ਖੇ ਆਦਿਚ੍ਚਂ ਵਿਯ ਚ ਅਤ੍ਤਨੋ ਤੇਜਸਾ ਤਪਨ੍ਤਂ ਤਤੋ ਏਵ ਵਿਰੋਚਮਾਨਂ ਅਙ੍ਗੇਹਿ ਨਿਚ੍ਛਰਣਕਜੁਤਿਯਾ ਅਙ੍ਗੀਰਸਂ ਸਮ੍ਮਾਸਮ੍ਬੁਦ੍ਧਂ ਪਸ੍ਸਾਤਿ. ਰਜੋਹਰਣਨ੍ਤਿ ਸਰੀਰੇ ਰਜਂ ਪੁਞ੍ਛਤੀਤਿ ਰਜੋਹਰਣਨ੍ਤਿ ਪੁਞ੍ਛਨਚੋਲ਼ਸ੍ਸ ਨਾਮਂ. ਓਭਾਸਵਿਸ੍ਸਜ੍ਜਨਪੁਬ੍ਬਕਾ ਭਾਸਿਤਗਾਥਾ ਓਭਾਸਗਾਥਾ ਨਾਮ. ਵਿਸੁਦ੍ਧਿਮਗ੍ਗਾਦੀਸੁ (ਵਿਸੁਦ੍ਧਿ. ੨.੩੮੬) ਪਨ ‘‘ਰਾਗੋ ਰਜੋ ਨ ਚ ਪਨ ਰੇਣੁ ਵੁਚ੍ਚਤੀ’’ਤਿਆਦਿ ਓਭਾਸਗਾਥਾ ਵੁਤ੍ਤਾ, ਨ ਪਨੇਸਾ ‘‘ਅਧਿਚੇਤਸੋ’’ਤਿ ਗਾਥਾ. ਅਯਞ੍ਚ ਚੂਲ਼ਪਨ੍ਥਕਤ੍ਥੇਰਸ੍ਸ ਉਦਾਨਗਾਥਾਤਿ ਉਦਾਨਪਾਲ਼ਿਯਂ ਨਤ੍ਥਿ, ਏਕੁਦਾਨਿਯਤ੍ਥੇਰਸ੍ਸ (ਥੇਰਗਾ. ੧.੬੭ ਏਕੁਦਾਨਿਯਤ੍ਥੇਰਗਾਥਾਵਣ੍ਣਨਾ) ਨਾਯਂ ਉਦਾਨਗਾਥਾਤਿ ਤਤ੍ਥ ਵੁਤ੍ਤਂ. ਇਧ ਪਨ ਪਾਲ਼ਿਯਾ ਏਵ ਵੁਤ੍ਤਤ੍ਤਾ ਥੇਰਸ੍ਸਾਪਿ ਉਦਾਨਗਾਥਾਤਿ ਗਹੇਤਬ੍ਬਂ. ਇਧ ਚ ਅਗਰੁਧਮ੍ਮੇਨਾਪਿ ਓਵਦਤੋ ਪਾਚਿਤ੍ਤਿਯਮੇਵ. ਅਤ੍ਥਙ੍ਗਤਸੂਰਿਯਤਾ, ਪਰਿਪੁਣ੍ਣੂਪਸਮ੍ਪਨ੍ਨਤਾ, ਓਵਦਨਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ.

ਅਤ੍ਥਙ੍ਗਤਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.