੨. ਅਞ੍ਞਵਾਦਕਸਿਕ੍ਖਾਪਦਵਣ੍ਣਨਾ

੯੪. ਦੁਤਿਯੇ ਅਞ੍ਞਂ ਵਚਨਨ੍ਤਿ ਯਂ ਦੋਸਵਿਭਾਵਨਤ੍ਥਂ ਪਰੇਹਿ ਵੁਤ੍ਤਵਚਨਂ ਤਂ ਤਸ੍ਸ ਅਨਨੁਚ੍ਛਵਿਕੇਨ ਅਞ੍ਞੇਨ ਵਚਨੇਨ ਪਟਿਚਰਤਿ.

੯੮. ਯਦੇਤਂ ਅਞ੍ਞੇਨਞ੍ਞਂ ਪਟਿਚਰਣਵਸੇਨ ਪਵਤ੍ਤਵਚਨਂ, ਤਦੇਵ ਪੁਚ੍ਛਿਤਮਤ੍ਥਂ ਠਪੇਤ੍ਵਾ ਅਞ੍ਞਂ ਵਦਤਿ ਪਕਾਸੇਤੀਤਿ ਅਞ੍ਞਵਾਦਕਨ੍ਤਿ ਆਹ ‘‘ਅਞ੍ਞੇਨਞ੍ਞਂ ਪਟਿਚਰਣਸ੍ਸੇਤਂ ਨਾਮ’’ਨ੍ਤਿ. ਤੁਣ੍ਹੀਭੂਤਸ੍ਸੇਤਂ ਨਾਮਨ੍ਤਿ ਤੁਣ੍ਹੀਭਾਵਸ੍ਸੇਤਂ ਨਾਮਂ, ਅਯਮੇਵ ਵਾ ਪਾਠੋ. ਅਞ੍ਞਵਾਦਕਂ ਆਰੋਪੇਤੁਨ੍ਤਿ ਅਞ੍ਞਵਾਦੇ ਆਰੋਪੇਤੁਂ. ਵਿਹੇਸਕਨ੍ਤਿ ਵਿਹੇਸਕਤ੍ਤਂ.

੯੯. ਪਾਲ਼ਿਯਂ ਨ ਉਗ੍ਘਾਟੇਤੁਕਾਮੋਤਿ ਪਟਿਚ੍ਛਾਦੇਤੁਕਾਮੋ.

੧੦੦. ਅਨਾਰੋਪਿਤੇ ਅਞ੍ਞਵਾਦਕੇਤਿ ਵੁਤ੍ਤਦੁਕ੍ਕਟਂ ਪਾਲ਼ਿਯਂ ਆਗਤਅਞ੍ਞੇਨਞ੍ਞਪਟਿਚਰਣਵਸੇਨ ਯੁਜ੍ਜਤਿ, ਅਟ੍ਠਕਥਾਯਂ ਆਗਤਨਯੇਨ ਪਨ ਮੁਸਾਵਾਦੇਨ ਅਞ੍ਞੇਨਞ੍ਞਂ ਪਟਿਚਰਨ੍ਤਸ੍ਸ ਪਾਚਿਤ੍ਤਿਯੇਨ ਸਦ੍ਧਿਂ ਦੁਕ੍ਕਟਂ, ਆਰੋਪਿਤੇ ਇਮਿਨਾਵ ਪਾਚਿਤ੍ਤਿਯਂ. ਕੇਚਿ ਪਨ ‘‘ਮੁਸਾਵਾਦਪਾਚਿਤ੍ਤਿਯੇਨ ਸਦ੍ਧਿਂ ਪਾਚਿਤ੍ਤਿਯਦ੍ਵਯ’’ਨ੍ਤਿ ਵਦਨ੍ਤਿ, ਵੀਮਂਸਿਤਬ੍ਬਂ. ਆਦਿਕਮ੍ਮਿਕਸ੍ਸਪਿ ਮੁਸਾਵਾਦੇ ਇਮਿਨਾਵ ਅਨਾਪਤ੍ਤੀਤਿ ਦਟ੍ਠਬ੍ਬਂ. ਧਮ੍ਮਕਮ੍ਮੇਨ ਆਰੋਪਿਤਤਾ, ਆਪਤ੍ਤਿਯਾ ਵਾ ਵਤ੍ਥੁਨਾ ਵਾ ਅਨੁਯੁਞ੍ਜਿਯਮਾਨਤਾ, ਛਾਦੇਤੁਕਾਮਤਾਯ ਅਞ੍ਞੇਨਞ੍ਞਂ ਪਟਿਚਰਣਂ, ਤੁਣ੍ਹੀਭਾਵੋ ਚਾਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ.

ਅਞ੍ਞਵਾਦਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.