੧. ਮੁਸਾਵਾਦਵਗ੍ਗੋ

੧. ਮੁਸਾਵਾਦਸਿਕ੍ਖਾਪਦਵਣ੍ਣਨਾ

੧. ਮੁਸਾਵਾਦਵਗ੍ਗਸ੍ਸ ਪਠਮਸਿਕ੍ਖਾਪਦੇ ਖੁਦ੍ਦਕਾਨਨ੍ਤਿ ਏਤ੍ਥ ‘‘ਖੁਦ੍ਦਕ-ਸਦ੍ਦੋ ਬਹੁ-ਸਦ੍ਦਪਰਿਯਾਯੋ’’ਤਿ ਵਦਨ੍ਤਿ. ਤਤ੍ਥਾਤਿ ਤੇਸੁ ਵਗ੍ਗੇਸੁ, ਖੁਦ੍ਦਕੇਸੁ ਵਾ. ‘‘ਜਾਨਿਤਬ੍ਬਤੋ’’ਤਿ ਹੇਤੁਨੋ ਵਿਪਕ੍ਖੇਪਿ ਨਿਬ੍ਬਾਨੇ ਵਤ੍ਤਨਤੋ ਅਨੇਕਨ੍ਤਿਕਤ੍ਤੇ ਪਰੇਹਿ ਵੁਤ੍ਤੇ ‘‘ਨ ਮਯਾ ਅਯਂ ਹੇਤੁ ਵੁਤ੍ਤੋ’’ਤਿ ਤਂ ਕਾਰਣਂ ਪਟਿਚ੍ਛਾਦੇਤੁਂ ਪੁਨ ‘‘ਜਾਤਿਧਮ੍ਮਤੋਤਿ ਮਯਾ ਵੁਤ੍ਤ’’ਨ੍ਤਿਆਦੀਨਿ ਵਦਤਿ. ‘‘ਸਮ੍ਪਜਾਨ’’ਨ੍ਤਿ ਵਤ੍ਤਬ੍ਬੇ ਅਨੁਨਾਸਿਕਲੋਪੇਨ ਨਿਦ੍ਦੇਸੋਤਿ ਆਹ ‘‘ਜਾਨਨ੍ਤੋ’’ਤਿ.

੨. ਸਮ੍ਪਜਾਨਮੁਸਾਵਾਦੇਤਿ ਅਤ੍ਤਨਾ ਵੁਚ੍ਚਮਾਨਸ੍ਸ ਅਤ੍ਥਸ੍ਸ ਵਿਤਥਭਾਵਂ ਪੁਬ੍ਬੇਪਿ ਜਾਨਿਤ੍ਵਾ, ਵਚਨਕ੍ਖਣੇ ਚ ਜਾਨਨ੍ਤਸ੍ਸ ਮੁਸਾਵਾਦਭਣਨੇ. ਤੇਨਾਹ ‘‘ਜਾਨਿਤ੍ਵਾ’’ਤਿਆਦਿ. ਮੁਸਾਵਾਦੇਤਿ ਚ ਨਿਮਿਤ੍ਤਤ੍ਥੇ ਭੁਮ੍ਮਂ, ਤਸ੍ਮਾ ਮੁਸਾਭਣਨਨਿਮਿਤ੍ਤਂ ਪਾਚਿਤ੍ਤਿਯਨ੍ਤਿ ਏਵਮੇਤ੍ਥ, ਇਤੋ ਪਰੇਸੁਪਿ ਈਦਿਸੇਸੁ ਅਤ੍ਥੋ ਵੇਦਿਤਬ੍ਬੋ.

੩. ਵਦਨ੍ਤਿ ਏਤਾਯਾਤਿ ਵਾਚਾਤਿ ਆਹ ‘‘ਮਿਚ੍ਛਾ’’ਤਿਆਦਿ. ‘‘ਧਨੁਨਾ ਵਿਜ੍ਝਤੀ’’ਤਿਆਦੀਸੁ ਵਿਯ ‘‘ਚਕ੍ਖੁਨਾ ਦਿਟ੍ਠ’’ਨ੍ਤਿ ਪਾਕਟਵਸੇਨ ਵੁਤ੍ਤਨ੍ਤਿ ਆਹ ‘‘ਓਲ਼ਾਰਿਕੇਨਾ’’ਤਿ.

੧੧. ਗਤੋ ਭਵਿਸ੍ਸਤੀਤਿ ਏਤ੍ਥਾਪਿ ਸਨ੍ਨਿਟ੍ਠਾਨਤੋ ਵੁਤ੍ਤਤ੍ਤਾ ਮੁਸਾਵਾਦੋ ਜਾਤੋ. ਆਪਤ੍ਤਿਨ੍ਤਿ ਪਾਚਿਤ੍ਤਿਯਾਪਤ੍ਤਿਂ, ਨ ਦੁਬ੍ਭਾਸਿਤਂ. ਜਾਤਿਆਦੀਹਿ ਦਸਹਿ ਅਕ੍ਕੋਸਵਤ੍ਥੂਹਿ ਪਰਂ ਦਵਾ ਵਦਨ੍ਤਸ੍ਸ ਹਿ ਤਂ ਹੋਤਿ. ਚਾਰੇਸੁਨ੍ਤਿ ਉਪਨੇਸੁਂ. ਵਤ੍ਥੁਵਿਪਰੀਤਤਾ, ਵਿਸਂਵਾਦਨਪੁਰੇਕ੍ਖਾਰਤਾ, ਯਮਤ੍ਥਂ ਵਤ੍ਥੁਕਾਮੋ, ਤਸ੍ਸ ਪੁਗ੍ਗਲਸ੍ਸ ਵਿਞ੍ਞਾਪਨਪਯੋਗੋ ਚਾਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਵਤ੍ਥੁਵਿਪਰੀਤਤਾਯ ਹਿ ਅਸਤਿ ਵਿਸਂਵਾਦਨਪੁਰੇਕ੍ਖਾਰਤਾਯ ਵਿਞ੍ਞਾਪਿਤੇਪਿ ਮੁਸਾਵਾਦੋ ਨ ਹੋਤਿ, ਦੁਕ੍ਕਟਮਤ੍ਤਮੇਵ ਹੋਤਿ. ਤਸ੍ਮਾ ਸਾਪਿ ਅਙ੍ਗਮੇਵਾਤਿ ਗਹੇਤਬ੍ਬਂ. ਉਤ੍ਤਰਿਮਨੁਸ੍ਸਧਮ੍ਮਾਰੋਚਨਤ੍ਥਂ ਮੁਸਾ ਭਣਨ੍ਤਸ੍ਸ ਪਾਰਾਜਿਕਂ, ਪਰਿਯਾਯੇਨ ਥੁਲ੍ਲਚ੍ਚਯਂ, ਅਮੂਲਕੇਨ ਪਾਰਾਜਿਕੇਨ ਅਨੁਦ੍ਧਂਸਨਤ੍ਥਂ ਸਙ੍ਘਾਦਿਸੇਸੋ, ਸਙ੍ਘਾਦਿਸੇਸੇਨਾਨੁਦ੍ਧਂਸਨਓਮਸਵਾਦਾਦੀਸੁ ਪਾਚਿਤ੍ਤਿਯਂ, ਅਨੁਪਸਮ੍ਪਨ੍ਨੇਸੁ ਦੁਕ੍ਕਟਂ, ਉਕ੍ਕਟ੍ਠਹੀਨਜਾਤਿਆਦੀਹਿ ਦਵਾ ਅਕ੍ਕੋਸਨ੍ਤਸ੍ਸ ਦੁਬ੍ਭਾਸਿਤਂ, ਕੇਵਲਂ ਮੁਸਾ ਭਣਨ੍ਤਸ੍ਸ ਇਧ ਪਾਚਿਤ੍ਤਿਯਂ ਵੁਤ੍ਤਂ.

ਮੁਸਾਵਾਦਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੨. ਓਮਸਵਾਦਸਿਕ੍ਖਾਪਦਵਣ੍ਣਨਾ

੧੩. ਦੁਤਿਯੇ ਪੁਬ੍ਬੇ ਪਤਿਟ੍ਠਿਤਾਰਪ੍ਪਦੇਸਂ ਪੁਨ ਅਰੇ ਪਤ੍ਤੇਤਿ ਪਠਮਂ ਭੂਮਿਯਂ ਪਤਿਟ੍ਠਿਤਨੇਮਿਪ੍ਪਦੇਸੇ ਪਰਿਵਤ੍ਤੇਤ੍ਵਾ ਪੁਨ ਭੂਮਿਯਂ ਪਤਿਟ੍ਠਿਤੇਤਿ ਅਤ੍ਥੋ.

੧੫. ਪੁਬ੍ਬੇਤਿ ਅਟ੍ਠੁਪ੍ਪਤ੍ਤਿਯਂ. ਪੁਪ੍ਫਛਡ੍ਡਕਾ ਨਾਮ ਗਬ੍ਭਮਲਾਦਿਹਾਰਕਾ. ਤਚ੍ਛਕਕਮ੍ਮਨ੍ਤਿ ਪਾਸਾਣਕੋਟ੍ਟਨਾਦਿਵਡ੍ਢਕੀਕਮ੍ਮਂ. ਹਤ੍ਥਮੁਦ੍ਦਾਗਣਨਾਤਿ ਅਙ੍ਗੁਲਿਸਙ੍ਕੋਚਨੇਨੇਵ ਗਣਨਾ. ਅਚ੍ਛਿਦ੍ਦਕਗਣਨਾ ਨਾਮ ਏਕਟ੍ਠਾਨਦਸਟ੍ਠਾਨਾਦੀਸੁ ਸਾਰਿਯੋ ਠਪੇਤ੍ਵਾ ਅਨੁਕ੍ਕਮੇਨ ਗਣਨਾ. ਆਦਿ-ਸਦ੍ਦੇਨ ਸਙ੍ਕਲਨਪਟਉਪ੍ਪਾਦਨਵੋਕ੍ਲਨਭਾਗਹਾਰਾਦਿਵਸੇਨ ਪਵਤ੍ਤਾ ਪਿਣ੍ਡਗਣਨਾ ਗਹਿਤਾ. ਯਸ੍ਸ ਸਾ ਪਗੁਣਾ, ਸੋ ਰੁਕ੍ਖਮ੍ਪਿ ਦਿਸ੍ਵਾ ‘‘ਏਤ੍ਤਕਾਨਿ ਏਤ੍ਥ ਪਣ੍ਣਾਨੀ’’ਤਿ ਜਾਨਾਤਿ. ਯਭ-ਮੇਥੁਨੇਤਿ ਵਚਨਤੋ ਆਹ ‘‘ਯ-ਕਾਰ-ਭ-ਕਾਰੇ’’ਤਿਆਦਿ.

੧੬. ਨ ਪੁਰਿਮੇਨਾਤਿ ਮੁਸਾਵਾਦਸਿਕ੍ਖਾਪਦੇਨ. ਸੋਪਿ ਆਪਤ੍ਤਿਯਾਤਿ ਉਪਸਗ੍ਗਾਦਿਵਿਸਿਟ੍ਠੇਹਿਪਿ ਵਦਨ੍ਤੋ ਪਾਚਿਤ੍ਤਿਯਾਪਤ੍ਤਿਯਾਵ ਕਾਰੇਤਬ੍ਬੋ.

੨੬. ਦੁਬ੍ਭਾਸਿਤਨ੍ਤਿ ਸਾਮਞ੍ਞਤੋ ਵੁਤ੍ਤਤ੍ਤਾ ਪਾਲ਼ਿਯਂ ਅਨਾਗਤੇਹਿਪਿ ਪਰਮ੍ਮੁਖਾ ਵਦਨ੍ਤਸ੍ਸਪਿ ਦੁਬ੍ਭਾਸਿਤਮੇਵਾਤਿ ਆਚਰਿਯਾ ਵਦਨ੍ਤਿ ਤਤੋ ਲਾਮਕਾਪਤ੍ਤਿਯਾ ਅਭਾਵਾ, ਅਨਾਪਤ੍ਤਿਯਾਪੇਤ੍ਥ ਭਵਿਤੁਂ ਅਯੁਤ੍ਤਤ੍ਤਾ. ਸਬ੍ਬਸਤ੍ਤਾਤਿ ਏਤ੍ਥ ਵਚਨਤ੍ਥਵਿਦੂਹਿ ਤਿਰਚ੍ਛਾਨਾਦਯੋਪਿ ਗਹਿਤਾ.

੩੫. ਅਨੁਸਾਸਨੀਪੁਰੇਕ੍ਖਾਰਤਾਯ ਵਾ ਪਾਪਗਰਹਿਤਾਯ ਵਾ ਵਦਨ੍ਤਾਨਂ ਚਿਤ੍ਤਸ੍ਸ ਲਹੁਪਰਿਵਤ੍ਤਿਭਾਵਤੋ ਅਨ੍ਤਰਨ੍ਤਰਾ ਕੋਪੇ ਉਪ੍ਪਨ੍ਨੇਪਿ ਅਨਾਪਤ੍ਤਿ. ਕਾਯਵਿਕਾਰਮਤ੍ਤੇਨਪਿ ਓਮਸਨਸਮ੍ਭਵਤੋ ‘‘ਤਿਸਮੁਟ੍ਠਾਨਂ, ਕਾਯਕਮ੍ਮ’’ਨ੍ਤਿ ਚ ਵੁਤ੍ਤਂ. ਪਰਿਵਾਰੇ ਪਨ ‘‘ਚਤੁਤ੍ਥੇਨ ਆਪਤ੍ਤਿਸਮੁਟ੍ਠਾਨੇਨ…ਪੇ… ਦੁਬ੍ਭਾਸਿਤਂ ਆਪਜ੍ਜੇਯ੍ਯਾਤਿ. ਨ ਹੀਤਿ ਵਤ੍ਤਬ੍ਬ’’ਨ੍ਤਿਆਦਿਨਾ (ਪਰਿ. ੨੭੬) ਇਤਰਾਨਿ ਸਮੁਟ੍ਠਾਨਾਨਿ ਪਟਿਕ੍ਖਿਪਿਤ੍ਵਾ ਪਞ੍ਚਮਸ੍ਸੇਵ ਵੁਤ੍ਤਤ੍ਤਾ ਆਹ ‘‘ਦੁਬ੍ਭਾਸਿਤਾਪਤ੍ਤਿ ਪਨੇਤ੍ਥ ਵਾਚਾਚਿਤ੍ਤਤੋ ਸਮੁਟ੍ਠਾਤੀ’’ਤਿ. ਦਵਕਮ੍ਯਤਾਯ ਹਿ ਕਾਯਵਾਚਾਚਿਤ੍ਤੇਹਿ ਓਮਸਨ੍ਤਸ੍ਸਪਿ ਵਾਚਾਚਿਤ੍ਤਮੇਵ ਆਪਤ੍ਤਿਯਾ ਅਙ੍ਗਂ ਹੋਤਿ, ਨ ਪਨ ਕਾਯੋ ਵਿਜ੍ਜਮਾਨੋਪਿ ਧਮ੍ਮਦੇਸਨਾਪਤ੍ਤਿ ਵਿਯ ਕੇਵਲਂ ਕਾਯਵਿਕਾਰੇਨੇਵ. ਓਮਸਨ੍ਤਸ੍ਸ ਪਨ ਕਿਞ੍ਚਾਪਿ ਇਧ ਦੁਬ੍ਭਾਸਿਤਾਪਤ੍ਤਿਯਾ ਅਨਾਪਤ੍ਤਿ, ਅਥ ਖੋ ਕਾਯਕੀਲ਼ਾਪਟਿਕ੍ਖੇਪਸਿਕ੍ਖਾਪਦੇਨ ਦੁਕ੍ਕਟਮੇਵਾਤਿ ਦਟ੍ਠਬ੍ਬਂ. ਉਪਸਮ੍ਪਨ੍ਨਂ ਜਾਤਿਆਦੀਹਿ ਅਨਞ੍ਞਾਪਦੇਸੇਨ ਅਕ੍ਕੋਸਨਂ, ਤਸ੍ਸ ਜਾਨਨਂ, ਅਤ੍ਥਪੁਰੇਕ੍ਖਾਰਤਾਦੀਨਂ ਅਭਾਵੋਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ.

ਓਮਸਵਾਦਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੩. ਪੇਸੁਞ੍ਞਸਿਕ੍ਖਾਪਦਵਣ੍ਣਨਾ

੩੬. ਤਤਿਯੇ ਭਣ੍ਡਨਂ ਜਾਤਂ ਏਤੇਸਨ੍ਤਿ ਭਣ੍ਡਨਜਾਤਾ. ਪਿਸਤੀਤਿ ਪਿਸੁਣਾ, ਵਾਚਾ, ਸਮਗ੍ਗੇ ਭਿਨ੍ਨੇ ਕਰੋਤੀਤਿ ਅਤ੍ਥੋ. ਤਾਯ ਵਾਚਾਯ ਸਮਨ੍ਨਾਗਤੋ ਪਿਸੁਣੋ, ਤਸ੍ਸ ਕਮ੍ਮਂ ਪੇਸੁਞ੍ਞਨ੍ਤਿ ਏਵਮੇਤ੍ਥ ਅਤ੍ਥੋ ਵੇਦਿਤਬ੍ਬੋ.

ਇਧਾਪਿ ਜਾਤਿਆਦੀਹਿ ਦਸਹਿ ਵਤ੍ਥੂਹਿ ਪੇਸੁਞ੍ਞਂ ਉਪਸਂਹਰਨ੍ਤਸ੍ਸੇਵ ਪਾਚਿਤ੍ਤਿਯਂ, ਇਤਰੇਹਿ ਅਕ੍ਕੋਸਵਤ੍ਥੂਹਿ ਦੁਕ੍ਕਟਂ. ਅਨਕ੍ਕੋਸਵਤ੍ਥੂਹਿ ਪਨ ਉਪਸਂਹਰਨ੍ਤਸ੍ਸ ਦੁਕ੍ਕਟਮੇਵਾਤਿ ਵਦਨ੍ਤਿ. ਜਾਤਿਆਦੀਹਿ ਅਨਞ੍ਞਾਪਦੇਸੇਨ ਅਕ੍ਕੋਸਨ੍ਤਸ੍ਸ ਭਿਕ੍ਖੁਨੋ ਸੁਤ੍ਵਾ ਭਿਕ੍ਖੁਸ੍ਸ ਉਪਸਂਹਰਣਂ, ਪਿਯਕਮ੍ਯਤਾਭੇਦਾਧਿਪ੍ਪਾਯੇਸੁ ਅਞ੍ਞਤਰਤਾ, ਤਸ੍ਸ ਵਿਜਾਨਨਾਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ.

ਪੇਸੁਞ੍ਞਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੪. ਪਦਸੋਧਮ੍ਮਸਿਕ੍ਖਾਪਦਵਣ੍ਣਨਾ

੪੫. ਚਤੁਤ੍ਥੇ ਪੁਰਿਮਬ੍ਯਞ੍ਜਨੇਨ ਸਦਿਸਨ੍ਤਿ ‘‘ਰੂਪਂ ਅਨਿਚ੍ਚ’’ਨ੍ਤਿ ਏਤ੍ਥ ਅਨਿਚ੍ਚ-ਸਦ੍ਦੇਨ ਸਦਿਸਂ ‘‘ਵੇਦਨਾ ਅਨਿਚ੍ਚਾ’’ਤਿ ਏਤ੍ਥ ਅਨਿਚ੍ਚ-ਸਦ੍ਦਂ ਵਦਤਿ. ਅਕ੍ਖਰਸਮੂਹੋਤਿ ਅਵਿਭਤ੍ਤਿਕੋ ਵੁਤ੍ਤੋ. ਪਦਨ੍ਤਿ ਵਿਭਤ੍ਤਿਅਨ੍ਤਂ ਵੁਤ੍ਤਂ.

ਏਕਂ ਪਦਨ੍ਤਿ ਗਾਥਾਪਦਮੇਵ ਸਨ੍ਧਾਯ ਵਦਤਿ. ਪਦਗਣਨਾਯਾਤਿ ਗਾਥਾਪਦਗਣਨਾਯ. ਅਪਾਪੁਣਿਤ੍ਵਾਤਿ ਸਦ੍ਧਿਂ ਅਕਥੇਤ੍ਵਾ. ਏਤੇਨ ਗਾਥਾਯ ਪਚ੍ਛਿਮਪਾਦੇ ਵੁਚ੍ਚਮਾਨੇ ਸਾਮਣੇਰੋ ਪਠਮਪਾਦਾਦਿਂ ਵਦਤਿ, ਆਪਤ੍ਤਿਯੇਵ, ਤਸ੍ਮਿਂ ਨਿਸ੍ਸਦ੍ਦੇ ਏਵ ਇਤਰੇਨ ਵਤ੍ਤਬ੍ਬਨ੍ਤਿ ਦਸ੍ਸੇਤਿ.

ਅਟ੍ਠਕਥਾਨਿਸ੍ਸਿਤੋਤਿ ਸਙ੍ਗੀਤਿਤ੍ਤਯਾਰੁਲ਼੍ਹਂ ਪੋਰਾਣਟ੍ਠਕਥਂ ਸਨ੍ਧਾਯ ਵਦਤਿ. ਇਦਾਨਿਪਿ ‘‘ਯਥਾਪਿ ਦੀਪਿਕੋ ਨਾਮ, ਨਿਲੀਯਿਤ੍ਵਾ ਗਣ੍ਹਤੇ ਮਿਗੇ’’ਤਿ (ਮਿ. ਪ. ੬.੧.੫; ਵਿਸੁਦ੍ਧਿ. ੧.੨੧੭; ਦੀ. ਨਿ. ਅਟ੍ਠ. ੨.੩੭੪; ਮ. ਨਿ. ਅਟ੍ਠ. ੧.੧੦੭; ਪਾਰਾ. ਅਟ੍ਠ. ੨.੧੬੫; ਪਟਿ. ਮ. ਅਟ੍ਠ. ੨.੧.੧੬੩) ਏਵਮਾਦਿਕਂ ਅਟ੍ਠਕਥਾਵਚਨਂ ਅਤ੍ਥੇਵ, ਬੁਦ੍ਧਘੋਸਾਚਰਿਯਾਦੀਹਿ ਪੋਰਾਣਟ੍ਠਕਥਾਨਯੇਨ ਵੁਤ੍ਤਮ੍ਪਿ ਇਧ ਸਙ੍ਗਹੇਤਬ੍ਬਨ੍ਤਿ ਵਦਨ੍ਤਿ. ਪਾਲ਼ਿਨਿਸ੍ਸਿਤੋਤਿ ਉਦਾਨਵਗ੍ਗਸਙ੍ਗਹਾਦਿਕੋ. ਵਿਵਟ੍ਟੂਪਨਿਸ੍ਸਿਤਨ੍ਤਿ ਨਿਬ੍ਬਾਨਨਿਸ੍ਸਿਤਂ. ਥੇਰਸ੍ਸਾਤਿ ਨਾਗਸੇਨਤ੍ਥੇਰਸ੍ਸ. ਮਗ੍ਗਕਥਾਦੀਨਿ ਪਕਰਣਾਨਿ.

੪੬. ਪਾਲ਼ਿਯਂ ਅਕ੍ਖਰਾਯਾਤਿਆਦਿ ਲਿਙ੍ਗਵਿਪਲ੍ਲਾਸੇਨ ਵੁਤ੍ਤਂ, ਅਕ੍ਖਰੇਨਾਤਿਆਦਿਨਾ ਅਤ੍ਥੋ ਗਹੇਤਬ੍ਬੋ.

੪੮. ਉਪਚਾਰਂ ਮੁਞ੍ਚਿਤ੍ਵਾਤਿ ਪਰਿਸਾਯ ਦ੍ਵਾਦਸਹਤ੍ਥਂ ਮੁਞ੍ਚਿਤ੍ਵਾ ਏਕਤੋ ਠਿਤਸ੍ਸ ਵਾ ਨਿਸਿਨ੍ਨਸ੍ਸ ਵਾ ਅਨੁਪਸਮ੍ਪਨ੍ਨਸ੍ਸ ਅਕਥੇਤ੍ਵਾ ਅਞ੍ਞੇ ਉਦ੍ਦਿਸ੍ਸ ਭਣਨ੍ਤਸ੍ਸਾਪਿ ਅਨਾਪਤ੍ਤਿ. ਸਚੇ ਪਨ ਦੂਰੇ ਨਿਸਿਨ੍ਨਮ੍ਪਿ ਉਦ੍ਦਿਸ੍ਸ ਭਣਤਿ, ਆਪਤ੍ਤਿ ਏਵ. ਓਪਾਤੇਤੀਤਿ ਸਦ੍ਧਿਂ ਕਥੇਤਿ. ਅਨੁਪਸਮ੍ਪਨ੍ਨਤਾ, ਵੁਤ੍ਤਲਕ੍ਖਣਧਮ੍ਮਂ ਪਦਸੋ ਵਾਚਨਤਾ, ਏਕਤੋ ਭਣਨਞ੍ਚਾਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ.

ਪਦਸੋਧਮ੍ਮਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੫. ਸਹਸੇਯ੍ਯਸਿਕ੍ਖਾਪਦਵਣ੍ਣਨਾ

੫੦-੫੧. ਪਞ੍ਚਮੇ ਤਤ੍ਰਿਦਂ ਨਿਦਸ੍ਸਨਨ੍ਤਿ ਸੇਸੋ. ਦਿਰਤ੍ਤਤਿਰਤ੍ਤਨ੍ਤਿ ਏਤ੍ਥ ਦਿਰਤ੍ਤਗ੍ਗਹਣਂ ਵਚਨਾਲਙ੍ਕਾਰਤ੍ਥਂ, ਨਿਰਨ੍ਤਰਂ ਤਿਸ੍ਸੋਵ ਰਤ੍ਤਿਯੋ ਵਸਿਤ੍ਵਾ ਚਤੁਤ੍ਥਦਿਵਸਾਦੀਸੁ ਸਯਨ੍ਤਸ੍ਸੇਵ ਆਪਤ੍ਤਿ, ਨ ਏਕਨ੍ਤਰਿਕਾਦਿਵਸੇਨ ਸਯਨ੍ਤਸ੍ਸਾਤਿ ਦਸ੍ਸਨਤ੍ਥਮ੍ਪੀਤਿ ਦਟ੍ਠਬ੍ਬਂ. ਦਿਰਤ੍ਤਵਿਸਿਟ੍ਠਞ੍ਹਿ ਤਿਰਤ੍ਤਂ ਵੁਚ੍ਚਮਾਨਂ, ਤੇਨ ਅਨਨ੍ਤਰਿਕਮੇਵ ਤਿਰਤ੍ਤਂ ਦੀਪੇਤੀਤਿ. ਪਞ੍ਚਹਿ ਛਦਨੇਹੀਤਿ ਇਟ੍ਠਕਸਿਲਾਸੁਧਾਤਿਣਪਣ੍ਣੇਹਿ. ਵਾਚੁਗ੍ਗਤਵਸੇਨਾਤਿ ਪਗੁਣਵਸੇਨ. ਦਿਯਡ੍ਢਹਤ੍ਥੁਬ੍ਬੇਧੋ ਵਡ੍ਢਕੀਹਤ੍ਥੇਨ ਗਹੇਤਬ੍ਬੋ. ਏਕੂਪਚਾਰੋ ਏਕੇਨ ਮਗ੍ਗੇਨ ਪਵਿਸਿਤ੍ਵਾ ਅਬ੍ਭੋਕਾਸਂ ਅਨੁਕ੍ਕਮਿਤ੍ਵਾ ਸਬ੍ਬਤ੍ਥ ਅਨੁਪਰਿਗਮਨਯੋਗ੍ਗੋ, ਏਤਂ ਬਹੁਦ੍ਵਾਰਮ੍ਪਿ ਏਕੂਪਚਾਰੋਵ. ਤਤ੍ਥ ਪਨ ਕੁਟ੍ਟਾਦੀਹਿ ਰੁਨ੍ਧਿਤ੍ਵਾ ਵਿਸੁਂ ਦ੍ਵਾਰਂ ਯੋਜੇਨ੍ਤਿ, ਨਾਨੂਪਚਾਰੋ ਹੋਤਿ. ਸਚੇ ਪਨ ਰੁਨ੍ਧਤਿ ਏਵ, ਵਿਸੁਂ ਦ੍ਵਾਰਂ ਨ ਯੋਜੇਨ੍ਤਿ, ‘‘ਏਤਮ੍ਪਿ ਏਕੂਪਚਾਰਮੇਵ ਮਤ੍ਤਿਕਾਦੀਹਿ ਪਿਹਿਤਦ੍ਵਾਰੋ ਵਿਯ ਗਬ੍ਭੋ’’ਤਿ ਗਹੇਤਬ੍ਬਂ. ਅਞ੍ਞਥਾ ਗਬ੍ਭੇ ਪਵਿਸਿਤ੍ਵਾ ਪਮੁਖਾਦੀਸੁ ਨਿਪਨ੍ਨਾਨੁਪਸਮ੍ਪਨ੍ਨੇਹਿ ਸਹਸੇਯ੍ਯਾਪਰਿਮੁਤ੍ਤਿਯਾ ਗਬ੍ਭਦ੍ਵਾਰਂ ਮਤ੍ਤਿਕਾਦੀਹਿ ਪਿਦਹਾਪੇਤ੍ਵਾ ਉਟ੍ਠਿਤੇ ਅਰੁਣੇ ਵਿਵਰਾਪੇਨ੍ਤਸ੍ਸਪਿ ਅਨਾਪਤ੍ਤਿ ਭਵੇਯ੍ਯਾਤਿ.

ਤੇਸਂ ਪਯੋਗੇ ਪਯੋਗੇ ਭਿਕ੍ਖੁਸ੍ਸ ਆਪਤ੍ਤੀਤਿ ਏਤ੍ਥ ਕੇਚਿ ‘‘ਅਨੁਟ੍ਠਹਨੇਨ ਅਕਿਰਿਯਸਮੁਟ੍ਠਾਨਾ ਆਪਤ੍ਤਿ ਵੁਤ੍ਤਾ ਤਸ੍ਮਿਂ ਖਣੇ ਸਯਨ੍ਤਸ੍ਸ ਕਿਰਿਯਾਭਾਵਾ. ਇਦਞ੍ਹਿ ਸਿਕ੍ਖਾਪਦਂ ਸਿਯਾ ਕਿਰਿਯਾਯ ਸਮੁਟ੍ਠਾਤਿ, ਸਿਯਾ ਅਕਿਰਿਯਾਯ ਸਮੁਟ੍ਠਾਤਿ. ਕਿਰਿਯਾਸਮੁਟ੍ਠਾਨਤਾ ਚਸ੍ਸ ਤਬ੍ਬਹੁਲਵਸੇਨ ਵੁਤ੍ਤਾਤਿ ਵਦਤਿ. ਯਥਾ ਚੇਤਂ, ਏਵਂ ਦਿਵਾਸਯਨਮ੍ਪਿ. ਅਨੁਟ੍ਠਹਨੇਨ, ਹਿ ਦ੍ਵਾਰਾਸਂਵਰਣੇਨ ਚੇਤਂ ਅਕਿਰਿਯਸਮਉਟ੍ਠਾਨਮ੍ਪਿ ਹੋਤੀ’’ਤਿ ਵਦਨ੍ਤਿ. ਇਦਞ੍ਚ ਯੁਤ੍ਤਂ ਵਿਯ ਦਿਸ੍ਸਤਿ, ਵੀਮਂਸਿਤ੍ਵਾ ਗਹੇਤਬ੍ਬਂ.

‘‘ਉਪਰਿਮਤਲੇਨ ਸਦ੍ਧਿਂ ਅਸਮ੍ਬਦ੍ਧਭਿਤ੍ਤਿਕਸ੍ਸਾ’’ਤਿ ਇਦਂ ਸਮ੍ਬਦ੍ਧਭਿਤ੍ਤਿਕੇ ਵਤ੍ਤਬ੍ਬਮੇਵ ਨਤ੍ਥੀਤਿ ਦਸ੍ਸਨਤ੍ਥਂ ਵੁਤ੍ਤਂ. ਉਪਰਿਮਤਲੇ ਸਯਿਤਸ੍ਸ ਸਙ੍ਕਾ ਏਵ ਨਤ੍ਥੀਤਿ ‘‘ਹੇਟ੍ਠਾਪਾਸਾਦੇ’’ਤਿਆਦਿ ਵੁਤ੍ਤਂ. ਨਾਨੂਪਚਾਰੇਤਿ ਬਹਿ ਨਿਸ੍ਸੇਣਿਯਾ ਆਰੋਹਣੀਯੇ.

ਸਭਾਸਙ੍ਖੇਪੇਨਾਤਿ ਸਭਾਕਾਰੇਨ. ‘‘ਅਡ੍ਢਕੁਟ੍ਟਕੇ’’ਤਿ ਇਮਿਨਾ ਸਣ੍ਠਾਨਂ ਦਸ੍ਸੇਤਿ. ਯਤ੍ਥ ਤੀਸੁ ਦ੍ਵੀਸੁ ਵਾ ਪਸ੍ਸੇਸੁ ਭਿਤ੍ਤਿਯੋ ਬਦ੍ਧਾ, ਛਦਨਂ ਵਾ ਅਸਮ੍ਪਤ੍ਤਾ ਅਡ੍ਢਭਿਤ੍ਤਿ, ਇਦਂ ਅਡ੍ਢਕੁਟ੍ਟਕਂ ਨਾਮ. ਵਾਲ਼ਸਙ੍ਘਾਟੋ ਨਾਮ ਪਰਿਕ੍ਖੇਪਸ੍ਸ ਅਨ੍ਤੋ ਥਮ੍ਭਾਦੀਨਂ ਉਪਰਿ ਵਾਲ਼ਰੂਪੇਹਿ ਕਤਸਙ੍ਘਾਟੋ. ਪਰਿਕ੍ਖੇਪਸ੍ਸ ਬਹਿਗਤੇਤਿ ਏਤ੍ਥ ਯਸ੍ਮਿਂ ਪਸ੍ਸੇ ਪਰਿਕ੍ਖੇਪੋ ਨਤ੍ਥਿ, ਤਤ੍ਥ ਸਚੇ ਭੂਮਿਤੋ ਵਤ੍ਥੁ ਉਚ੍ਚਂ ਹੋਤਿ, ਉਭਤੋ ਉਚ੍ਚਵਤ੍ਥੁਤੋ ਹੇਟ੍ਠਾ ਭੂਮਿਯਂ ਨਿਬ੍ਬਕੋਸਬ੍ਭਨ੍ਤਰੇਪਿ ਅਨਾਪਤ੍ਤਿ ਏਵ ਤਤ੍ਥ ਸੇਨਾਸਨਵੋਹਾਰਾਭਾਵਤੋ. ਅਥ ਵਤ੍ਥੁ ਨੀਚਂ ਭੂਮਿਸਮਮੇਵ ਸੇਨਾਸਨਸ੍ਸ ਹੇਟ੍ਠਿਮਤਲੇ ਤਿਟ੍ਠਤਿ, ਤਤ੍ਥ ਪਰਿਕ੍ਖੇਪਰਹਿਤਦਿਸਾਯ ਨਿਬ੍ਬਕੋਸਬ੍ਭਨ੍ਤਰੇ ਸਬ੍ਬਤ੍ਥ ਆਪਤ੍ਤਿ ਹੋਤਿ, ਪਰਿਚ੍ਛੇਦਾਭਾਵਤੋ ਪਰਿਕ੍ਖੇਪਸ੍ਸ ਬਹਿ ਏਵ ਅਨਾਪਤ੍ਤੀਤਿ ਦਟ੍ਠਬ੍ਬਂ. ਪਰਿਮਣ੍ਡਲਂ ਵਾਤਿਆਦਿ ਮਜ੍ਝੇ ਉਦਕਪਤਨਤ੍ਥਾਯ ਆਕਾਸਙ੍ਗਣਵਨ੍ਤਂ ਸੇਨਾਸਨਂ ਸਨ੍ਧਾਯ ਵੁਤ੍ਤਂ. ਤਤ੍ਥ ਅਪਰਿਚ੍ਛਿਨ੍ਨਗਬ੍ਭੂਪਚਾਰੇਤਿ ਏਕੇਕਗਬ੍ਭਸ੍ਸ ਦ੍ਵੀਸੁ ਪਸ੍ਸੇਸੁ ਪਮੁਖੇਨ ਗਮਨਂ ਪਰਿਚ੍ਛਿਨ੍ਦਿਤ੍ਵਾ ਦਿਯਡ੍ਢਹਤ੍ਥੁਬ੍ਬੇਧਤੋ ਅਨੂਨਂ ਕੁਟ੍ਟਂ ਕਤ੍ਵਾ ਆਕਾਸਙ੍ਗਣੇਨ ਪਵੇਸਂ ਕਰੋਨ੍ਤਿ, ਏਵਂ ਅਕਤੋਤਿ ਅਤ੍ਥੋ. ਗਬ੍ਭਪਰਿਕ੍ਖੇਪੋਤਿ ਚਤੁਰਸ੍ਸਪਾਸਾਦਾਦੀਸੁ ਸਮਨ੍ਤਾ ਠਿਤਗਬ੍ਭਭਿਤ੍ਤਿਯੋ ਸਨ੍ਧਾਯ ਵੁਤ੍ਤਂ.

ਪਾਟੇਕ੍ਕਸਨ੍ਨਿਵੇਸਾਤਿ ਏਕੇਕਦਿਸਾਯ ਗਬ੍ਭਪਾਲ਼ਿਯੋ ਇਤਰਦਿਸਾਸੁ ਗਬ੍ਭਪਾਲ਼ੀਨਂ ਅਭਾਵੇਨ, ਭਾਵੇਪਿ ਵਾ ਅਞ੍ਞਮਞ੍ਞਭਿਤ੍ਤਿਚ੍ਛਦਨੇਹਿ ਅਸਮ੍ਬਨ੍ਧਤਾਯ ਪਾਟੇਕ੍ਕਸਨ੍ਨਿਵੇਸਾ ਨਾਮ ਵੁਚ੍ਚਤਿ. ਤਂ…ਪੇ… ਸਨ੍ਧਾਯ ਵੁਤ੍ਤਨ੍ਤਿ ਤਤ੍ਥ ਪਾਚਿਤ੍ਤਿਯੇਨ ਅਨਾਪਤ੍ਤੀਤਿ ਵੁਤ੍ਤਂ, ਨ ਦੁਕ੍ਕਟੇਨ. ਤਾਦਿਸਾਯ ਹਿ ਗਬ੍ਭਪਾਲ਼ਿਯਾ ਪਮੁਖਂ ਤੀਸੁ ਦਿਸਾਸੁ ਭਿਤ੍ਤੀਨਂ ਅਭਾਵੇਨ ਏਕਦਿਸਾਯ ਗਬ੍ਭਭਿਤ੍ਤਿਮਤ੍ਤੇਨ ਸਬ੍ਬਚ੍ਛਨ੍ਨਂ ਚੂਲ਼ਪਰਿਚ੍ਛਨ੍ਨਂ ਨਾਮ ਹੋਤਿ. ਤਸ੍ਮਾ ਦੁਕ੍ਕਟਮੇਵ. ਯਦਿ ਪਨ ਤਸ੍ਸ ਪਮੁਖਸ੍ਸ ਇਤਰਦਿਸਾਸੁਪਿ ਏਕਿਸ੍ਸਂ, ਸਬ੍ਬਾਸੁ ਵਾ ਭਿਤ੍ਤਿਂ ਕਰੋਨ੍ਤਿ, ਤਦਾ ਸਬ੍ਬਚ੍ਛਨ੍ਨਉਪਡ੍ਢਪਰਿਚ੍ਛਨ੍ਨਾਦਿਭਾਵਤੋ ਪਾਚਿਤ੍ਤਿਯਮੇਵ ਹੋਤੀਤਿ ਦਟ੍ਠਬ੍ਬਂ. ਭੂਮਿਯਂ ਵਿਨਾ ਜਗਤਿਯਾ ਪਮੁਖਂ ਸਨ੍ਧਾਯਾਤਿ ਏਤ੍ਥ ਉਚ੍ਚਵਤ੍ਥੁਂ ਅਕਤ੍ਵਾ ਭੂਮਿਯਂ ਕਤਗੇਹਸ੍ਸ ਪਮੁਖਂ ਸਨ੍ਧਾਯ ਅਪਰਿਕ੍ਖਿਤ੍ਤੇ ਪਾਚਿਤ੍ਤਿਯੇਨ ਅਨਾਪਤ੍ਤੀਤਿ ਇਦਂ ਕਥਿਤਂ. ਉਚ੍ਚਵਤ੍ਥੁਕਂ ਚੇ ਪਮੁਖਂ ਹੋਤਿ, ਤੇਨ ਵਤ੍ਥੁਨਾ ਪਰਿਕ੍ਖਿਤ੍ਤਸਙ੍ਖ੍ਯਮੇਵ ਪਮੁਖਂ ਗਚ੍ਛਤੀਤਿ ਅਧਿਪ੍ਪਾਯੋ. ਤਤ੍ਥਾਤਿ ਅਨ੍ਧਕਟ੍ਠਕਥਾਯਂ. ਜਗਤਿਯਾ ਪਮਾਣਂ ਵਤ੍ਵਾਤਿ ਪਕਤਿਭੂਮਿਯਾ ਨਿਪਨ੍ਨੋ ਯਥਾ ਜਗਤਿਯਾ ਉਪਰਿ ਸਯਿਤਂ ਨ ਪਸ੍ਸਤਿ, ਏਵਂ ਉਚ੍ਚਾਤਿਉਚ੍ਚਵਤ੍ਥੁਸ੍ਸ ਉਬ੍ਬੇਧਪ੍ਪਮਾਣਂ ਵਤ੍ਵਾ. ਏਕਦਿਸਾਯ ਉਜੁਕਮੇਵ ਦੀਘਂ ਕਤ੍ਵਾ ਸਨ੍ਨਿਵੇਸਿਤੋ ਪਾਸਾਦੋ ਏਕਸਾਲਸਨ੍ਨਿਵੇਸੋ. ਦ੍ਵੀਸੁ, ਤੀਸੁ ਵਾ ਚਤੂਸੁਪਿ ਵਾ ਦਿਸਾਸੁ ਸਿਙ੍ਘਾਟਕਸਣ੍ਠਾਨਾਦਿਵਸੇਨ ਕਤਾ ਦ੍ਵਿਸਾਲਾਦਿਸਨ੍ਨਿਵੇਸਾ ਵੇਦਿਤਬ੍ਬਾ. ਸਾਲਪ੍ਪਭੇਦਦੀਪਨਮੇਵ ਚੇਤ੍ਥ ਪੁਰਿਮਤੋ ਵਿਸੇਸੋਤਿ. ਪਰਿਕ੍ਖੇਪੋ ਵਿਦ੍ਧਸ੍ਤੋਤਿ ਪਮੁਖਸ੍ਸ ਪਰਿਕ੍ਖੇਪਂ ਸਨ੍ਧਾਯ ਵਦਤਿ.

੫੩. ਉਪਡ੍ਢਚ੍ਛਨ੍ਨਉਪਡ੍ਢਪਰਿਚ੍ਛਨ੍ਨਂ ਸੇਨਾਸਨਂ ਦੁਕ੍ਕਟਸ੍ਸ ਆਦਿਂ ਵਤ੍ਵਾ ਪਾਲ਼ਿਯਂ ਦਸ੍ਸਿਤਤ੍ਤਾ ਤਤੋ ਅਧਿਕਂ ਸਬ੍ਬਚ੍ਛਨ੍ਨਉਪਡ੍ਢਪਰਿਚ੍ਛਨ੍ਨਾਦਿਕਮ੍ਪਿ ਸਬ੍ਬਂ ਪਾਲ਼ਿਯਂ ਅਵੁਤ੍ਤਮ੍ਪਿ ਪਾਚਿਤ੍ਤਿਯਸ੍ਸੇਵ ਵਤ੍ਥੁਭਾਵੇਨ ਦਸ੍ਸਿਤਂ ਸਿਕ੍ਖਾਪਦਸ੍ਸ ਪਣ੍ਣਤ੍ਤਿਵਜ੍ਜਤ੍ਤਾ, ਗਰੁਕੇ ਠਾਤਬ੍ਬਤੋ ਚਾਤਿ ਵੇਦਿਤਬ੍ਬਂ. ਸਤ੍ਤ ਪਾਚਿਤ੍ਤਿਯਾਨੀਤਿ ਪਾਲ਼ਿਯਂ ਵੁਤ੍ਤਪਾਚਿਤ੍ਤਿਯਦ੍ਵਯਂ ਸਾਮਞ੍ਞਤੋ ਏਕਤ੍ਤੇਨ ਗਹੇਤ੍ਵਾ ਵੁਤ੍ਤਂ.

੫੪. ਪਾਲ਼ਿਯਂ ‘‘ਤਤਿਯਾਯ ਰਤ੍ਤਿਯਾ ਪੁਰਾਰੁਣਾ ਨਿਕ੍ਖਮਿਤ੍ਵਾ ਪੁਨ ਵਸਤੀ’’ਤਿ ਇਦਂ ਉਕ੍ਕਟ੍ਠਵਸੇਨ ਵੁਤ੍ਤਂ, ਅਨਿਕ੍ਖਮਿਤ੍ਵਾ ਪਨ ਪੁਰਾਰੁਣਾ ਉਟ੍ਠਹਿਤ੍ਵਾ ਅਨ੍ਤੋਛਦਨੇ ਨਿਸਿਨ੍ਨਸ੍ਸਾਪਿ ਪੁਨਦਿਵਸੇ ਸਹਸੇਯ੍ਯੇਨ ਅਨਾਪਤ੍ਤਿ ਏਵ. ਸੇਨਮ੍ਬਮਣ੍ਡਪਵਣ੍ਣਂ ਹੋਤੀਤਿ ਸੀਹਲ਼ਦੀਪੇ ਕਿਰ ਉਚ੍ਚਵਤ੍ਥੁਕੋ ਸਬ੍ਬਚ੍ਛਨ੍ਨੋ ਸਬ੍ਬਅਪਰਿਚ੍ਛਨ੍ਨੋ ਏਵਂਨਾਮਕੋ ਸਨ੍ਨਿਪਾਤਮਣ੍ਡਪੋ ਅਤ੍ਥਿ, ਤਂ ਸਨ੍ਧਾਯੇਤਂ ਵੁਤ੍ਤਂ. ਏਤ੍ਥ ਚਤੁਤ੍ਥਭਾਗੋ ਚੂਲ਼ਕਂ, ਦ੍ਵੇ ਭਾਗਾ ਉਪਡ੍ਢਂ, ਤੀਸੁ ਭਾਗੇਸੁ ਦ੍ਵੇ ਭਾਗਾ ਯੇਭੁਯ੍ਯਨ੍ਤਿ ਇਮਿਨਾ ਨਯੇਨ ਚੂਲ਼ਕਚ੍ਛਨ੍ਨਪਰਿਚ੍ਛਨ੍ਨਤਾਦੀਨਿ ਵੇਦਿਤਬ੍ਬਾਨਿ. ਪਾਚਿਤ੍ਤਿਯਵਤ੍ਥੁਕਸੇਨਾਸਨਂ, ਤਤ੍ਥ ਅਨੁਪਸਮ੍ਪਨ੍ਨੇਨ ਸਹ ਨਿਪਜ੍ਜਨਂ, ਚਤੁਤ੍ਥਦਿਵਸੇ ਸੂਰਿਯਤ੍ਥਙ੍ਗਮਨਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ.

ਸਹਸੇਯ੍ਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੬. ਦੁਤਿਯਸਹਸੇਯ੍ਯਸਿਕ੍ਖਾਪਦਵਣ੍ਣਨਾ

੫੫. ਛਟ੍ਠੇ ਮਾਤੁਗਾਮੇਨ ਸਦ੍ਧਿਂ ਚਤੁਤ੍ਥਦਿਵਸੇ ਸਯਨ੍ਤਸ੍ਸਾਪਿ ਇਮਿਨਾ ਸਿਕ੍ਖਾਪਦੇਨ ਏਕਾਵ ਆਪਤ੍ਤਿ. ਕੇਚਿ ਪਨ ਪੁਰਿਮਸਿਕ੍ਖਾਪਦੇਨਾਪੀਤਿ ਦ੍ਵੇ ਆਪਤ੍ਤਿਯੋ ਵਦਨ੍ਤਿ, ਤਂ ਨ ਯੁਤ੍ਤਂ ‘‘ਅਨੁਪਸਮ੍ਪਨ੍ਨੇਨਾ’’ਤਿ ਅਨਿਤ੍ਥਿਲਿਙ੍ਗੇਨ ਵੁਤ੍ਤਤ੍ਤਾ ਨਪੁਂਸਕੇਨ ਪਨ ਚਤੁਤ੍ਥਦਿਵਸੇ ਸਯਨ੍ਤਸ੍ਸ ਸਦੁਕ੍ਕਟਪਾਚਿਤ੍ਤਿਯਂ ਵਤ੍ਤੁਂ ਯੁਤ੍ਤਂ. ਕਿਞ੍ਚਾਪੇਤ੍ਥ ਪਾਲ਼ਿਯਂ ਪਣ੍ਡਕਵਸੇਨੇਵ ਦੁਕ੍ਕਟਂ ਵੁਤ੍ਤਂ, ਤਦਨੁਲੋਮਿਕਾ ਪਨ ਪੁਰਿਸਉਭਤੋਬ੍ਯਞ੍ਜਨਕੇਨ ਸਹ ਸਯਨ੍ਤਸ੍ਸ ਇਮਿਨਾ ਦੁਕ੍ਕਟਂ, ਪੁਰਿਮੇਨ ਚਤੁਤ੍ਥਦਿਵਸੇ ਸਦੁਕ੍ਕਟਪਾਚਿਤ੍ਤਿਯਂ. ਇਤ੍ਥਿਉਭਤੋਬ੍ਯਞ੍ਜਨਕੋ ਇਤ੍ਥਿਗਤਿਕੋਵਾਤਿ ਅਯਂ ਅਮ੍ਹਾਕਂ ਖਨ੍ਤਿ. ਮਤਿਤ੍ਥਿਯਾ ਅਨਾਪਤ੍ਤੀਤਿ ਵਦਨ੍ਤਿ. ਪਾਚਿਤ੍ਤਿਯਵਤ੍ਥੁਕਸੇਨਾਸਨਂ, ਤਤ੍ਥ ਮਾਤੁਗਾਮੇਨ ਸਦ੍ਧਿਂ ਨਿਪਜ੍ਜਨਂ, ਸੂਰਿਯਤ੍ਥਙ੍ਗਮਨਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ.

ਦੁਤਿਯਸਹਸੇਯ੍ਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੭. ਧਮ੍ਮਦੇਸਨਾਸਿਕ੍ਖਾਪਦਵਣ੍ਣਨਾ

੬੦. ਸਤ੍ਤਮੇ ਨ ਯਕ੍ਖੇਨਾਤਿਆਦੀਨਂ ‘‘ਅਞ੍ਞਤ੍ਰ ਵਿਞ੍ਞੁਨਾ’’ਤਿ ਇਮਿਨਾ ਸਮ੍ਬਨ੍ਧੋ. ਅਞ੍ਞਤ੍ਰ ਵਿਞ੍ਞੁਨਾ ਪੁਰਿਸਵਿਗ੍ਗਹੇਨ, ਨ ਯਕ੍ਖਾਦਿਨਾਪੀਤਿ ਏਵਮਤ੍ਥੋ ਗਹੇਤਬ੍ਬੋਤਿ ਅਧਿਪ੍ਪਾਯੋ. ਤਾਦਿਸੇਨਪਿ ਹਿ ਸਹ ਠਿਤਾਯ ਦੇਸੇਤੁਂ ਨ ਵਟ੍ਟਤਿ. ਤਂਤਂਦੇਸਭਾਸਾਯ ਅਤ੍ਥਂ ਯਥਾਰੁਚਿ ਵਟ੍ਟਤਿ ਏਵ.

ਇਰਿਯਾਪਥਾਪਰਿਵਤ੍ਤਨਂ, ਪੁਰਿਸਂ ਵਾ ਦ੍ਵਾਦਸਹਤ੍ਥੂਪਚਾਰੇ ਅਪਕ੍ਕੋਸਾਪਨਂ ਏਤ੍ਥ ਅਕਿਰਿਯਾ. ਵੁਤ੍ਤਲਕ੍ਖਣਸ੍ਸ ਧਮ੍ਮਸ੍ਸ ਛਨ੍ਨਂ ਵਾਚਾਨਂ ਉਪਰਿ ਦੇਸਨਾ, ਵੁਤ੍ਤਲਕ੍ਖਣੋ ਮਾਤੁਗਾਮੋ, ਇਰਿਯਾਪਥਪਅਵਤ੍ਤਨਾਭਾਵੋ, ਵਿਞ੍ਞੂਪੁਰਿਸਾਭਾਵੋ, ਅਪਞ੍ਹਵਿਸ੍ਸਜ੍ਜਨਾਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ.

ਧਮ੍ਮਦੇਸਨਾਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੮. ਭੂਤਾਰੋਚਨਸਿਕ੍ਖਾਪਦਵਣ੍ਣਨਾ

੭੭. ਅਟ੍ਠਮੇ ਅਨ੍ਤਰਾਤਿ ਪਰਿਨਿਬ੍ਬਾਨਕਾਲਤੋ ਪੁਬ੍ਬੇਪਿ. ਅਤਿਕਡ੍ਢਿਯਮਾਨੇਨਾਤਿ ‘‘ਵਦਥ, ਭਨ੍ਤੇ, ਕਿਂ ਤੁਮ੍ਹੇਹਿ ਅਧਿਗਤ’’ਨ੍ਤਿ ਏਵਂ ਨਿਪ੍ਪੀਲ਼ਿਯਮਾਨੇਨ ਅਤਿਬਦ੍ਧਿਯਮਾਨੇਨ. ਤਥਾਰੂਪੇ ਪਚ੍ਚਯੇ ਸਤਿ ਵਤ੍ਤਬ੍ਬਮੇਵ. ਸੁਤਪਰਿਯਤ੍ਤਿਸੀਲਗੁਣਨ੍ਤਿ ਏਤ੍ਥ ਅਤ੍ਥਕੁਸਲਤਾ ਸੁਤਗੁਣੋ, ਪਾਲ਼ਿਪਾਠਕੁਸਲਤਾ ਪਰਿਯਤ੍ਤਿਗੁਣੋਤਿ ਦਟ੍ਠਬ੍ਬਂ. ‘‘ਚਿਤ੍ਤਕ੍ਖੇਪਸ੍ਸ ਵਾ ਅਭਾਵਾ’’ਤਿ ਇਮਿਨਾ ਖਿਤ੍ਤਚਿਤ੍ਤਵੇਦਨਾਟ੍ਟਤਾਪਿ ਅਰਿਯਾਨਂ ਨਤ੍ਥੀਤਿ ਦਸ੍ਸੇਤਿ.

ਪੁਬ੍ਬੇ ਅਵੁਤ੍ਤੇਹੀਤਿ ਚਤੁਤ੍ਥਪਾਰਾਜਿਕੇ ਅਵੁਤ੍ਤੇਹਿ. ਇਦਞ੍ਚ ਸਿਕ੍ਖਾਪਦਂ ਪਣ੍ਣਤ੍ਤਿਅਜਆਨਨਵਸੇਨ ਏਕਨ੍ਤਤੋ ਅਚਿਤ੍ਤਕਸਮੁਟ੍ਠਾਨਮੇਵ ਹੋਤਿ ਅਰਿਯਾਨਂ ਪਣ੍ਣਤ੍ਤਿਵੀਤਿਕ੍ਕਮਾਭਾਵਾ. ਝਾਨਲਾਭੀਨਞ੍ਚ ਸਤ੍ਥੁ ਆਣਾਵੀਤਿਕ੍ਕਮਪਟਿਘਚਿਤ੍ਤਸ੍ਸ ਝਾਨਪਰਿਹਾਨਤੋ ਭੂਤਾਰੋਚਨਂ ਨ ਸਮ੍ਭਵਤਿ. ਉਤ੍ਤਰਿਮਨੁਸ੍ਸਧਮ੍ਮਸ੍ਸ ਭੂਤਤਾ, ਅਨੁਪਸਮ੍ਪਨ੍ਨਸ੍ਸ ਆਰੋਚਨਂ, ਤਙ੍ਖਣਵਿਜਾਨਨਾ, ਅਨਞ੍ਞਾਪਦੇਸੋਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ.

ਭੂਤਾਰੋਚਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੯. ਦੁਟ੍ਠੁਲ੍ਲਾਰੋਚਨਸਿਕ੍ਖਾਪਦਵਣ੍ਣਨਾ

੭੮. ਨਵਮੇ ਤਤ੍ਥ ਭਵੇਯ੍ਯਾਤਿ ਤਤ੍ਥ ਕਸ੍ਸਚਿ ਮਤਿ ਏਵਂ ਭਵੇਯ੍ਯ. ਅਟ੍ਠਕਥਾਵਚਨਮੇਵ ਉਪਪਤ੍ਤਿਤੋ ਦਲ਼੍ਹਂ ਕਤ੍ਵਾ ਪਤਿਟ੍ਠਪੇਨ੍ਤੋ ‘‘ਇਮਿਨਾਪਿ ਚੇਤ’’ਨ੍ਤਿਆਦਿਮਾਹ.

੮੨. ਆਦਿਤੋ ਪਞ੍ਚ ਸਿਕ੍ਖਾਪਦਾਨੀਤਿ ਪਾਣਾਤਿਪਾਤਾਦੀਨਿ ਪਞ੍ਚ. ਸੇਸਾਨੀਤਿ ਵਿਕਾਲਭੋਜਨਾਦੀਨਿ. ਸੁਕ੍ਕਵਿਸ੍ਸਟ੍ਠਿਆਦਿ ਅਜ੍ਝਾਚਾਰੋਵ. ਅਨ੍ਤਿਮਵਤ੍ਥੁਂ ਅਨਜ੍ਝਾਪਨ੍ਨਸ੍ਸ ਭਿਕ੍ਖੁਨੋ ਸਵਤ੍ਥੁਕੋ ਸਙ੍ਘਾਦਿਸੇਸੋ, ਅਨੁਪਸਮ੍ਪਨ੍ਨਸ੍ਸ ਆਰੋਚਨਂ, ਭਿਕ੍ਖੁਸਮ੍ਮੁਤਿਯਾ ਅਭਾਵੋਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ.

ਦੁਟ੍ਠੁਲ੍ਲਾਰੋਚਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੧੦. ਪਥਵੀਖਣਨਸਿਕ੍ਖਾਪਦਵਣ੍ਣਨਾ

੮੬. ਦਸਮੇ ਅਪ੍ਪਪਂਸੁਮਤ੍ਤਿਕਾਯ ਪਥਵਿਯਾ ਅਨਾਪਤ੍ਤਿਵਤ੍ਥੁਭਾਵੇਨ ਵੁਤ੍ਤਤ੍ਤਾ ਉਪਡ੍ਢਪਂਸੁਮਤ੍ਤਿਕਾਯਪਿ ਪਾਚਿਤ੍ਤਿਯਮੇਵਾਤਿ ਗਹੇਤਬ੍ਬਂ. ਨ ਹੇਤਂ ਦੁਕ੍ਕਟਵਤ੍ਥੂਤਿ ਸਕ੍ਕਾ ਵਤ੍ਤੁਂ ਜਾਤਾਜਾਤਵਿਨਿਮੁਤ੍ਤਾਯ ਤਤਿਯਪਥਵਿਯਾ ਅਭਾਵਤੋ.

ਵਟ੍ਟਤੀਤਿ ਇਮਸ੍ਮਿਂ ਠਾਨੇ ਪੋਕ੍ਖਰਣਿਂ ਖਣਾਤਿ ਓਕਾਸਸ੍ਸ ਅਨਿਯਮਿਤਤ੍ਤਾ ਵਟ੍ਟਤਿ. ਇਮਂ ਵਲ੍ਲਿਂ ਖਣਾਤਿ ਪਥਵੀਖਣਨਂ ਸਨ੍ਧਾਯ ਵੁਤ੍ਤਤ੍ਤਾ ਇਮਿਨਾਵ ਸਿਕ੍ਖਾਪਦੇਨ ਆਪਤ੍ਤਿ, ਨ ਭੂਤਗਾਮਸਿਕ੍ਖਾਪਦੇਨ. ਉਭਯਮ੍ਪਿ ਸਨ੍ਧਾਯ ਵੁਤ੍ਤੇ ਪਨ ਦ੍ਵੇਪਿ ਪਾਚਿਤ੍ਤਿਯਾ ਹੋਨ੍ਤਿ. ਉਦਕਪਪ੍ਪਟਕੋਤਿ ਉਦਕੇ ਅਨ੍ਤੋਭੂਮਿਯਂ ਪਵਿਟ੍ਠੇ ਤਸ੍ਸ ਉਪਰਿਭਾਗਂ ਛਾਦੇਤ੍ਵਾ ਤਨੁਕਪਂਸੁ ਵਾ ਮਤ੍ਤਿਕਾ ਵਾ ਪਟਲਂ ਹੁਤ੍ਵਾ ਪਤਮਾਨਾ ਤਿਟ੍ਠਤਿ, ਤਸ੍ਮਿਂ ਉਦਕੇ ਸੁਕ੍ਖੇਪਿ ਤਂ ਪਟਲਂ ਵਾਤੇਨ ਚਲਮਾਨਾ ਤਿਟ੍ਠਤਿ, ਤਂ ਉਦਕਪਪ੍ਪਟਕੋ ਨਾਮ.

ਅਕਤਪਬ੍ਭਾਰੇਤਿ ਅਵਲ਼ਞ੍ਜਨਟ੍ਠਾਨਦਸ੍ਸਨਤ੍ਥਂ ਵੁਤ੍ਤਂ. ਤਾਦਿਸੇ ਏਵ ਹਿ ਵਮ੍ਮਿਕਸ੍ਸ ਸਮ੍ਭਵੋਤਿ. ਮੂਸਿਕੁਕ੍ਕਰਂ ਨਾਮ ਮੂਸਿਕਾਹਿ ਖਨਿਤ੍ਵਾ ਬਹਿ ਕਤਪਂਸੁਰਾਸਿ. ਅਚ੍ਛਦਨਨ੍ਤਿਆਦਿਵੁਤ੍ਤਤ੍ਤਾ ਉਜੁਕਂ ਆਕਾਸਤੋ ਪਤਿਤਵਸ੍ਸੋਦਕੇਨ ਓਵਟ੍ਠਮੇਵ ਜਾਤਪਥਵੀ ਹੋਤਿ, ਨ ਛਦਨਾਦੀਸੁ ਪਤਿਤ੍ਵਾ ਤਤੋ ਪਵਤ੍ਤਉਦਕੇਨ ਤਿਨ੍ਤਨ੍ਤਿ ਵੇਦਿਤਬ੍ਬਂ. ਮਣ੍ਡਪਤ੍ਥਮ੍ਭਨ੍ਤਿ ਸਾਖਾਮਣ੍ਡਪਤ੍ਥਮ੍ਭਂ. ਉਚ੍ਚਾਲੇਤ੍ਵਾਤਿ ਉਕ੍ਖਿਪਿਤ੍ਵਾ. ਤਤੋਤਿ ਪੁਰਾਣਸੇਨਾਸਨਤੋ.

੮੮. ਮਹਾਮਤ੍ਤਿਕਨ੍ਤਿ ਭਿਤ੍ਤਿਲੇਪਨਂ. ਜਾਤਪਥਵਿਤਾ, ਤਥਾਸਞ੍ਞਿਤਾ, ਖਣਨਖਣਾਪਨਾਨਂ ਅਞ੍ਞਤਰਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ.

ਪਥਵੀਖਣਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

ਨਿਟ੍ਠਿਤੋ ਮੁਸਾਵਾਦਵਗ੍ਗੋ ਪਠਮੋ.