੮. ਪਠਮਉਪਕ੍ਖਟਸਿਕ੍ਖਾਪਦਵਣ੍ਣਨਾ

੫੨੮-੫੩੧. ਅਟ੍ਠਮੇ ਯੋ ਕਤ੍ਤਾਤਿ ਦਾਯਕਂ ਸਨ੍ਧਾਯ ਵੁਤ੍ਤਂ. ਪਟੋ ਏਵ ਪਟਕੋ. ‘‘ਅਪ੍ਪਗ੍ਘਂ ਚੇਤਾਪੇਤੀ’’ਤਿ ਇਦਂ ਨਿਸ੍ਸਗ੍ਗਿਯਪਾਚਿਤ੍ਤਿਯਾ ਅਨਾਪਤ੍ਤਿਂ ਸਨ੍ਧਾਯ ਵੁਤ੍ਤਂ, ਵਿਞ੍ਞਤ੍ਤਿਪਚ੍ਚਯਾ ਪਨ ਦੁਕ੍ਕਟਮੇਵ. ‘‘ਪੁਬ੍ਬੇ ਅਪ੍ਪਵਾਰਿਤੋ’’ਤਿ ਹਿ ਸੁਤ੍ਤੇ ਵਿਞ੍ਞਤ੍ਤਿਕਾਰਣਂ ਵੁਤ੍ਤਂ. ਮਾਤਿਕਾਟ੍ਠਕਥਾਯਮ੍ਪਿ ‘‘ਚੀਵਰੇ ਭਿਯ੍ਯੋਕਮ੍ਯਤਾ, ਅਞ੍ਞਾਤਕਵਿਞ੍ਞਤ੍ਤਿ, ਤਾਯ ਚ ਪਟਿਲਾਭੋਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨੀ’’ਤਿ (ਕਙ੍ਖਾ. ਅਟ੍ਠ. ਉਪਕ੍ਖਟਸਿਕ੍ਖਾਪਦ) ਅਞ੍ਞਾਤਕਵਿਞ੍ਞਤ੍ਤਿਤਾ ਪਕਾਸਿਤਾ, ਕੇਚਿ ਪਨ ‘‘ਦਾਯਕੇਨ ਦਾਤੁਕਾਮੋਮ੍ਹੀਤਿ ਅਤ੍ਤਨੋ ਸਨ੍ਤਿਕੇ ਅਵੁਤ੍ਤੇਪਿ ਯਦਗ੍ਘਨਕਂ ਸੋ ਦਾਤੁਕਾਮੋ, ਤਦਗ੍ਘਨਕਂ ਆਹਰਾਪੇਤੁਂ ਵਟ੍ਟਤਿ ਏਵਾ’’ਤਿ ਵਦਨ੍ਤਿ, ਤਂ ਰਾਜਸਿਕ੍ਖਾਪਦਟ੍ਠਕਥਾਯਪਿ ਨ ਸਮੇਤਿ, ਦੂਤੇਨ ਵਾ ਦਾਯਕੇਨ ਵਾ ‘‘ਆਯਸ੍ਮਨ੍ਤਂ ਉਦ੍ਦਿਸ੍ਸ ਚੀਵਰਚੇਤਾਪਨ੍ਨਂ ਆਭਤ’’ਨ੍ਤਿ ਆਰੋਚਿਤੇਪਿ ਮੁਖਵੇਵਟਿਯਕਪ੍ਪਿਯਕਾਰਕਾਦੀਨਂ ਸਨ੍ਤਿਕਾ ਆਹਰਾਪਨਸ੍ਸ ਤਤ੍ਥ ਪਟਿਕ੍ਖਿਤ੍ਤਤ੍ਤਾ. ਵੁਤ੍ਤਞ੍ਹਿ ਤਤ੍ਥ ‘‘ਇਮੇ ਦ੍ਵੇ ਅਨਿਦ੍ਦਿਟ੍ਠਕਪ੍ਪਿਯਕਾਰਕਾ ਨਾਮ, ਏਤੇਸੁ ਅਞ੍ਞਾਤਕਅਪ੍ਪਵਾਰਿਤੇਸੁ ਵਿਯ ਪਟਿਪਜ੍ਜਿਤਬ੍ਬਂ…ਪੇ… ਨ ਕਿਞ੍ਚਿ ਵਤ੍ਤਬ੍ਬਾ. ਦੇਸਨਾਮਤ੍ਤਮੇਵ ਚੇਤਂ ‘ਦੂਤੇਨ ਚੀਵਰਚੇਤਾਪਨ੍ਨਂ ਪਹਿਣੇਯ੍ਯਾ’ਤਿ ਸਯਂ ਆਹਰਿਤ੍ਵਾਪਿ ਪਿਣ੍ਡਪਾਤਾਦੀਨਂ ਅਤ੍ਥਾਯ ਦਦਨ੍ਤੇਸੁਪਿ ਏਸੇਵ ਨਯੋ’’ਤਿ. ਮੁਖਵੇਵਟਿਯਕਪ੍ਪਿਯਕਾਰਕਾਦਯੋ ਹਿ ਦਾਯਕੇਨ ਪਰਿਚ੍ਚਤ੍ਤੇਪਿ ਵਤ੍ਥੁਮ੍ਹਿ ‘‘ਅਸੁਕਸ੍ਸ ਸਨ੍ਤਿਕੇ ਚੀਵਰਪਿਣ੍ਡਪਾਤਾਦਿਂ ਗਣ੍ਹਥਾ’’ਤਿ ਅਨਿਦ੍ਦਿਟ੍ਠਤ੍ਤਾ ਏਵ ‘‘ਨ ਕਿਞ੍ਚਿ ਵਤ੍ਤਬ੍ਬਾ’’ਤਿ ਵੁਤ੍ਤਂ, ਨ ਪਨ ਤਸ੍ਸ ਵਤ੍ਥੁਨੋ ਮੁਖਵੇਵਟਿਯਾਦੀਨਂ ਸਨ੍ਤਕਤ੍ਤਾ, ਤਸ੍ਮਾ ਇਧਾਪਿ ਦਾਯਕੇਨ ਵਾ ਦੂਤੇਨ ਵਾ ‘‘ਯਂ ਇਚ੍ਛਥ, ਤਂ ਵਦਥਾ’’ਤਿ ਅਪ੍ਪਵਾਰਿਤਸ੍ਸ ਵਦਤੋ ਦੁਕ੍ਕਟਮੇਵ. ਅਗ੍ਘਵਡ੍ਢਨਕਨ੍ਤਿ ਚੀਵਰੇ ਅਗ੍ਘਵਡ੍ਢਨਕਂ ਨਿਸ੍ਸਾਯ ਪਵਤ੍ਤਂ ਇਦਂ ਸਿਕ੍ਖਾਪਦਂ, ਨ ਪਿਣ੍ਡਪਾਤਾਦੀਸੁ ਤੇਸੁ ਅਗ੍ਘਵਡ੍ਢਨਸ੍ਸ ਦੁਕ੍ਕਟਮਤ੍ਤਤ੍ਤਾ, ਪਣੀਤਪਿਣ੍ਡਪਾਤੇ ਸੁਦ੍ਧਿਕਪਾਚਿਤ੍ਤਿਯਤ੍ਤਾ ਚਾਤਿ ਗਹੇਤਬ੍ਬਂ. ਤੇਨੇਵ ‘‘ਚੀਵਰੇ ਭਿਯ੍ਯੋਕਮ੍ਯਤਾ’’ਤਿ ਅਙ੍ਗਂ ਵੁਤ੍ਤਂ.

ਪਠਮਉਪਕ੍ਖਟਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.