੪. ਪੁਰਾਣਚੀਵਰਸਿਕ੍ਖਾਪਦਵਣ੍ਣਨਾ

੫੦੩-੫. ਚਤੁਤ੍ਥੇ ਪਾਲ਼ਿਯਂ ਭਤ੍ਤਵਿਸ੍ਸਗ੍ਗਨ੍ਤਿ ਭਤ੍ਤਸ੍ਸ ਉਦਰੇ ਵਿਸ੍ਸਜ੍ਜਨਂ, ਪਵੇਸਨਂ ਅਜ੍ਝੋਹਰਣਂ ਭਤ੍ਤਕਿਚ੍ਚਨ੍ਤਿ ਅਤ੍ਥੋ, ਭੋਜਨਪਰਿਯੋਸਾਨੇਨ ਭਤ੍ਤਸ੍ਸ ਵਿਸ੍ਸਜ੍ਜਨਨ੍ਤਿਪਿ ਵਦਨ੍ਤਿ. ਤਤ੍ਥ ਨਾਮ ਤ੍ਵਨ੍ਤਿ ਸੋ ਨਾਮ ਤ੍ਵਂ, ਤਾਯ ਨਾਮ ਤ੍ਵਨ੍ਤਿ ਵਾ ਅਤ੍ਥੋ. ਪਿਤਾ ਚ ਮਾਤਾ ਚ ਪਿਤਰੋ, ਪਿਤੂਨਂ ਪਿਤਾ ਚ ਮਾਤਾ ਚ ਪਿਤਾਮਹਾ, ਤੇ ਏਵ ਯੁਗਲ਼ਟ੍ਠੇਨ ਯੁਗੋ, ਤਸ੍ਮਾ ਯਾਵ ਸਤ੍ਤਮਾ ਪਿਤਾਮਹਯੁਗਾ ਪਿਤਾਮਹਾਵਟ੍ਟਾਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ. ਏਵਞ੍ਹਿ ਪਿਤਾਮਹਗ੍ਗਹਣੇਨ ਮਾਤਾਮਹੋ ਚ ਪਿਤਾਮਹੀ ਮਾਤਾਮਹੀ ਚ ਗਹਿਤਾਵ ਹੋਨ੍ਤਿ. ਸਤ੍ਤਮਯੁਗਤੋ ਪਰਂ ‘‘ਅਞ੍ਞਾਤਕਾ’’ਤਿ ਵੇਦਿਤਬ੍ਬਂ. ਯਾਤਿ ਭਿਕ੍ਖੁਨੀ. ਪਿਤੁ ਮਾਤਾ ਪਿਤਾਮਹੀ, ਮਾਤੁ ਪਿਤਾ ਮਾਤਾਮਹੋ.

ਪਯੋਗੇ ਪਯੋਗੇ ਭਿਕ੍ਖੁਸ੍ਸ ਦੁਕ੍ਕਟਨ੍ਤਿ ‘‘ਧੋਵਾ’’ਤਿ ਆਣਾਪਨਵਾਚਾਯ ਏਕਾਯ ਏਵ ਤਦਨੁਗੁਣਸ੍ਸ ਸਬ੍ਬਸ੍ਸਾਪਿ ਪਯੋਗਸ੍ਸ ਆਣਤ੍ਤਤ੍ਤਾ ਵੁਤ੍ਤਂ.

੫੦੬. ਤਦਵਿਨਾਭਾਵਤੋ ਧੋਵਨਸ੍ਸ ‘‘ਕਾਯਵਿਕਾਰਂ ਕਤ੍ਵਾ’’ਤਿ ਚ ‘‘ਅਨ੍ਤੋਦ੍ਵਾਦਸਹਤ੍ਥੇ’’ਤਿ ਚ ਵੁਤ੍ਤਤ੍ਤਾ ਕਾਯੇਨ ਧੋਵਾਪੇਤੁਕਾਮਤਂ ਅਪ੍ਪਕਾਸੇਤ੍ਵਾ ਦਾਨਖਿਪਨਪੇਸਨਾਦਿਂ ਕਰੋਨ੍ਤਸ੍ਸ ਚ ਦ੍ਵਾਦਸਹਤ੍ਥਂ ਉਪਚਾਰਂ ਮੁਞ੍ਚਿਤ੍ਵਾ ਬਹਿ ਠਤ੍ਵਾ ਕਾਯਵਾਚਾਹਿ ਆਣਾਪੇਤ੍ਵਾ ਖਿਪਨਪੇਸਨਾਦਿਂ ਕਰੋਨ੍ਤਸ੍ਸ ਚ ਅਨਾਪਤ੍ਤਿ ਏਵ.

ਏਕੇਨ ਵਤ੍ਥੁਨਾਤਿ ਪਠਮਕਤੇਨ. ਪਞ੍ਚਸਤਾਨਿ ਪਮਾਣਂ ਏਤਾਸਨ੍ਤਿ ਪਞ੍ਚਸਤਾ. ਭਿਕ੍ਖੁਭਾਵਤੋ ਪਰਿਵਤ੍ਤਲਿਙ੍ਗਾਪਿ ਭਿਕ੍ਖੁਨੀ ਭਿਕ੍ਖੂਨਂ ਸਨ੍ਤਿਕੇ ਏਕਤੋਉਪਸਮ੍ਪਨ੍ਨਾ ਏਵ.

੫੦੭. ਤਾਵਕਾਲਿਕਂ ਗਹੇਤ੍ਵਾਤਿ ਅਤ੍ਤਨਾ ਕਤਿਪਾਹਂ ਪਾਰੁਪਨਾਦਿਅਤ੍ਥਾਯ ਤਾਵਕਾਲਿਕਂ ਯਾਚਿਤ੍ਵਾ. ਪੁਰਾਣਚੀਵਰਤਾ, ਉਪਚਾਰੇ ਠਤ੍ਵਾ ਅਞ੍ਞਾਤਿਕਾਯ ਭਿਕ੍ਖੁਨਿਯਾ ਆਣਾਪਨਂ, ਤਸ੍ਸਾ ਧੋਵਾਪਨਾਦੀਨਿ ਚਾਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ.

ਪੁਰਾਣਚੀਵਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.