੫. ਪਪਾਤਵਗ੍ਗੋ

੧. ਲੋਕਚਿਨ੍ਤਾਸੁਤ੍ਤਵਣ੍ਣਨਾ

੧੧੧੧. ਲੋਕਚਿਨ੍ਤਨ੍ਤਿ ਲੋਕਸਨ੍ਨਿਵੇਸਪਟਿਸਂਯੁਤ੍ਤਵੀਮਂਸਾਵ. ‘‘ਲੋਕਚਿਤ੍ਤ’’ਨ੍ਤਿਪਿ ਪਾਠੋ, ਤਂਤਂਲੋਕਪਰਿਯਾਪਨ੍ਨਂ ਚਿਤ੍ਤਨ੍ਤਿ ਅਤ੍ਥੋ. ਨਾਲ਼ਿਕੇਰਾਦਯੋਤਿ ਆਦਿ-ਸਦ੍ਦੇਨ ਅਵੁਤ੍ਤਾਨਂ ਓਸਧਿਤਿਣਵਨਪ੍ਪਤਿਆਦੀਨਂ ਸਙ੍ਗਹੋ. ਏਵਰੂਪਨ੍ਤਿ ਏਦਿਸਂ ਅਞ੍ਞਮ੍ਪਿ ਤਂਤਂਲੋਕਚਿਤ੍ਤਂ.

ਵਿਗਤਚਿਤ੍ਤੋਤਿ ਅਤ੍ਤਤ੍ਥਪਰਤ੍ਥਤੋ ਅਪਗਤਵਿਤਕ੍ਕੋ ਅਦ੍ਦਸ ਏਵਂ ਅਧਿਟ੍ਠਹਿਂਸੂਤਿ ਸਮ੍ਬਨ੍ਧੋ. ਸਮ੍ਬਰਿਮਾਯਨ੍ਤਿ ਸਮ੍ਬਰੇਨ ਅਸੁਰਿਨ੍ਦੇਨ ਉਪ੍ਪਾਦਿਤਂ ਅਸੁਰਮਾਯਂ, ਯਂ ‘‘ਇਨ੍ਦਜਾਲ’’ਨ੍ਤਿਪਿ ਵੁਚ੍ਚਤਿ ਇਨ੍ਦਸ੍ਸ ਮੋਹਨਤ੍ਥਂ ਉਪ੍ਪਾਦਿਤਤ੍ਤਾ. ਸਮ੍ਪਰਿਵਤ੍ਤੇਤ੍ਵਾਤਿ ਪਰਿਧਾਵੇਤ੍ਵਾ. ਯਥਾ ਨੇਤਿ ਨੇ ਅਸੁਰੇ ਯਥਾ ਸੋ ਪੁਰਿਸੋ ਪਸ੍ਸਤਿ, ਏਵਂ ਅਧਿਟ੍ਠਹਿਂਸੁ. ਕਸ੍ਮਾ ਪਨੇਤੇ ਏਵਂ ਅਧਿਟ੍ਠਹਿਂਸੂਤਿ? ਤਂ ਪੁਰਿਸਂ ਤਤ੍ਥ ਤਥਾਨਿਸਿਨ੍ਨਂ ਦਿਸ੍ਵਾ ‘‘ਅਯਞ੍ਚ ਦੇਵੋ’’ਤਿ ਆਸਙ੍ਕਨ੍ਤਾ ਤਥਾ ਅਧਿਟ੍ਠਹਿਤ੍ਵਾ ਭਿਸਮੁਲ਼ਾਲਛਿਦ੍ਦੇਹਿ ਪਵਿਸਿਤ੍ਵਾ ਅਤ੍ਤਨੋ ਅਸੁਰਭਵਨਂ ਗਤਾ. ਤੇਨਾਹ ਭਗਵਾ – ‘‘ਦੇਵਾਨਂਯੇਵ ਮੋਹਯਮਾਨਾ’’ਤਿ.

੨-੩. ਪਪਾਤਸੁਤ੍ਤਾਦਿਵਣ੍ਣਨਾ

੧੧੧੨-੩. ਮਰਿਯਾਦਪਾਸਾਣੋਤਿ ਗਿਜ੍ਝਕੂਟਪਬ੍ਬਤਸ੍ਸ ਮਰਿਯਾਦਪਾਕਾਰਸਦਿਸੋ ਮਹਨ੍ਤੋ ਪਾਸਾਣੋ. ਅਨਿਟ੍ਠਰੂਪਨ੍ਤਿ ਏਤ੍ਥ ਰੂਪ-ਸਦ੍ਦੋ ਸਭਾਵਤ੍ਥੋ ‘‘ਪਿਯਰੂਪੇ ਸਾਤਰੂਪੇ’’ਤਿਆਦੀਸੁ (ਮ. ਨਿ. ੧.੪੦੮-੪੦੯) ਵਿਯਾਤਿ ਆਹ – ‘‘ਅਨਿਟ੍ਠਸਭਾਵ’’ਨ੍ਤਿ.

੫. ਵਾਲਸੁਤ੍ਤਵਣ੍ਣਨਾ

੧੧੧੫. ਉਪਾਸਨਨ੍ਤਿ ਆਚਰਿਯਉਪਾਸਨਂ, ਆਚਰਿਯਂ ਅਨ੍ਤੇਵਾਸਿਨਾ ਵਾ ਦਿਵਸੇ ਦਿਵਸੇ ਸਿਕ੍ਖਨਵਸੇਨ ਉਪਾਸਿਤਬ੍ਬਤੋ ਉਪਾਸਨਨ੍ਤਿ ਲਦ੍ਧਨਾਮਂ ਕਣ੍ਡਖਿਪਨਸਿਪ੍ਪਂ. ਕਣ੍ਡਂ ਅਤਿਕ੍ਕਮਨ੍ਤੇਤਿ ਸਰਂ ਖਿਪਨ੍ਤੇ. ਪੋਙ੍ਖਾਨੁਪੋਙ੍ਖਨ੍ਤਿ ਪੋਙ੍ਖਸਦ੍ਦਤ੍ਥਂ ਪਾਕਟਂ ਕਤ੍ਵਾ ਦਸ੍ਸੇਤੁਂ ‘‘ਏਕਂ ਕਣ੍ਡਂ ਖਿਪਿਤ੍ਵਾ’’ਤਿਆਦਿ ਵੁਤ੍ਤਂ. ਅਪਰਂ ਅਨੁਪੋਙ੍ਖਨ੍ਤਿ ਏਤ੍ਥ ਅਪਰਨ੍ਤਿ ਤਤਿਯਕਣ੍ਡਂ. ਅਨੁਪੋਙ੍ਖਂ ਨਾਮ ਇਦਨ੍ਤਿ ਦਸ੍ਸੇਤੁਂ ‘‘ਅਨੁਪੋਙ੍ਖਂ ਨਾਮ ਦੁਤਿਯਸ੍ਸ ਪੋਙ੍ਖ’’ਨ੍ਤਿ ਵੁਤ੍ਤਂ. ਤਞ੍ਹਿ ਤਤਿਯੇਨ ਸਰੇਨ ਵਿਜ੍ਝੀਯਤਿ. ਪੁਨ ਅਪਰਂ ਤਸ੍ਸ ਪੋਙ੍ਖਨ੍ਤਿ ਇਦਂ ਪਨ ਅਪਰਾਪਰਂ ਅਵਿਰਜ੍ਝਨਂ ਦਸ੍ਸੇਤੁਂ ਵੁਤ੍ਤਂ. ਦੁਰਭਿਸਮ੍ਭਵਤਰਨ੍ਤਿ ਅਭਿਭਵਿਤੁਂ ਅਸਕ੍ਕੁਣੇਯ੍ਯਤਰਂ. ਵਾਲਨ੍ਤਿ ਕੇਸਂ. ਸਤ੍ਤਧਾ ਭਿਨ੍ਦਿਤ੍ਵਾਤਿ ਸਤ੍ਤਕ੍ਖਤ੍ਤੁਂ ਵਿਫਾਲੇਤ੍ਵਾ. ਤਸ੍ਸ ਏਕਂ ਭੇਦਨ੍ਤਿ ਤਸ੍ਸ ਕੇਸਸ੍ਸ ਏਕਂ ਅਂਸੁਸਙ੍ਖਾਤਂ ਭੇਦਂ ਗਹੇਤ੍ਵਾ. ਵਾਤਿਙ੍ਗਣਮਜ੍ਝੇ ਬਨ੍ਧਿਤ੍ਵਾਤਿ ਵਾਤਿਙ੍ਗਣਫਲਸ੍ਸ ਮਜ੍ਝਟ੍ਠਾਨੇ ਬਨ੍ਧਿਤ੍ਵਾ. ਅਪਰਂ ਭੇਦਨ੍ਤਿ ਅਪਰਂ ਕੇਸਸ੍ਸ ਅਂਸੁਸਙ੍ਖਾਤਂ ਭੇਦਂ. ਅਗ੍ਗਕੋਟਿਯਂ ਬਨ੍ਧਿਤ੍ਵਾਤਿ ਯਥਾ ਤਸ੍ਸ ਵਾਲਭੇਦਸ੍ਸ ਊਕਾਮਤ੍ਤਂ ਲਿਖਾਮਤ੍ਤਂ ਵਾ ਕਣ੍ਡਸ੍ਸ ਅਗ੍ਗਕੋਟਿਂ ਅਧਿਕਂ ਹੁਤ੍ਵਾ ਤਿਟ੍ਠਤਿ, ਏਵਂ ਬਨ੍ਧਿਤ੍ਵਾ. ਉਸਭਮਤ੍ਤੇਤਿ ਵੀਸਤਿਯਟ੍ਠਿਮਤ੍ਤੇ ਠਾਨੇ ਠਿਤੋ. ਕਣ੍ਡਬਦ੍ਧਾਯ ਕੋਟਿਯਾਤਿ ਕਣ੍ਡਬਦ੍ਧਾਯ ਵਾਲਸ੍ਸ ਕੋਟਿਯਾ ਵਾਤਿਙ੍ਗਣਬਨ੍ਧਨਵਾਲਸ੍ਸ ਕੋਟਿਂ ਪਟਿਵਿਜ੍ਝੇਯ੍ਯ.

੮. ਦੁਤਿਯਛਿਗ੍ਗਲ਼ਯੁਗਸੁਤ੍ਤਵਣ੍ਣਨਾ

੧੧੧੮. ਅਧਿਚ੍ਚੁਪ੍ਪਤ੍ਤਿਕਨ੍ਤਿ ਯਦਿਚ੍ਛਾਵਸੇਨ ਉਪ੍ਪਜ੍ਜਨਕਂ. ਛਿਗ੍ਗਲ਼ੇਨਾਤਿ ਛਿਗ੍ਗਲ਼ਪਦੇਸੇਨ. ਛਿਗ੍ਗਲ਼ੁਪਰੀਤਿ ਹੇਟ੍ਠਿਮਯੁਗਸ੍ਸ ਛਿਗ੍ਗਲ਼ਪਦੇਸਸ੍ਸ ਉਪਰਿ. ਆਰੁਲ਼੍ਹਸ੍ਸ ਛਿਗ੍ਗਲ਼ੇਨਾਤਿ ਉਭਿਨ੍ਨਮ੍ਪਿ ਛਿਦ੍ਦੇਨ. ਗੀਵਪ੍ਪਵੇਸਨਂ ਵਿਯਾਤਿ ਚਤੁਨ੍ਨਂ ਯੁਗਾਨਂ ਛਿਦ੍ਦਪਦੇਸੇਨੇਵ ਉਪਰੂਪਰਿ ਠਿਤਾਨਂ ਛਿਦ੍ਦਨ੍ਤਰੇਨ ਕਾਣਕਚ੍ਛਪਸ੍ਸ ਗੀਵਪ੍ਪਵੇਸਨਂ ਅਧਿਚ੍ਚਤਰਸਮ੍ਭਵਂ. ਤਤੋਪਿ ਅਧਿਚ੍ਚਤਰਸਮ੍ਭਵੋ ਮਨੁਸ੍ਸਤ੍ਤਲਾਭੋ, ਤਤੋ ਅਧਿਚ੍ਚਤਮਸਮ੍ਭਵੋ ਅਰਿਯਮਗ੍ਗਪਟਿਲਾਭੋਤਿ ਦਸ੍ਸੇਨ੍ਤੋ ਆਹ ‘‘ਚਤੁਸਚ੍ਚਪਟਿਵੇਧੋ ਅਤਿਵਿਯ ਅਧਿਚ੍ਚਤਰਸਮ੍ਭਵੋ’’ਤਿ.

ਪਪਾਤਵਗ੍ਗਵਣ੍ਣਨਾ ਨਿਟ੍ਠਿਤਾ.