੪. ਤੁਲਾਕੂਟਸੁਤ੍ਤਵਣ੍ਣਨਾ

੧੧੬੪. ਰੂਪਕੂਟਂ ਸਰੂਪੇਨ ਸਦਿਸੇਨ ਛਲਵੋਹਾਰੋ. ਅਙ੍ਗਕੂਟਂ ਅਤ੍ਤਨੋ ਹਤ੍ਥਾਦਿਨਾ ਅਙ੍ਗਾਨਂ ਛਲਕਰਣਂ. ਗਹਣਕੂਟਂ ਮਾਨੇਸੁ ਗਹਣਵਸੇਨ. ਪਟਿਚ੍ਛਨ੍ਨਕੂਟਂ ਅਯਚੁਣ੍ਣਾਦਿਨਾ ਪਟਿਚ੍ਛਨ੍ਨੇਨ ਛਲਕਰਣਂ. ਮਹਤਿਯਾ ਤੁਲਾਯ. ਪਚ੍ਛਾਭਾਗੇਤਿ ਤੁਲਾਯ ਪਚ੍ਛਿਮਭਾਗੇ. ਹਤ੍ਥੇਨਾਤਿ ਹਤ੍ਥਪਦੇਸੇਨ. ਅਕ੍ਕਮਤੀਤਿ ਉਟ੍ਠਾਤੁਂ ਅਦੇਨ੍ਤੋ ਗਣ੍ਹਾਤਿ. ਦਦਨ੍ਤੋ ਪੁਬ੍ਬਭਾਗੇਤਿ ਪਰੇਸਂ ਦਦਨ੍ਤੋ ਪੁਬ੍ਬਭਾਗੇ ਹਤ੍ਥੇਨ ਤੁਲਂ ਅਕ੍ਕਮਤਿ. ਤਨ੍ਤਿ ਅਯਚੁਣ੍ਣਂ.

ਲੋਹਪਾਤਿਯੋਤਿ ਤਮ੍ਬਲੋਹਪਾਤਿਯੋ. ਸੁਵਣ੍ਣਵਣ੍ਣਾ ਕਰੋਨ੍ਤੀਤਿ ਅਸਨਿਖਾਦਸੁਵਣ੍ਣਕਨਕਲਿਮ੍ਪਿਤਾ ਸੁਵਣ੍ਣਵਣ੍ਣਾ ਕਰੋਨ੍ਤਿ. ਮਾਨਭਾਜਨਸ੍ਸ ਹਦਯਭੂਤਸ੍ਸ ਅਬ੍ਭਨ੍ਤਰਸ੍ਸ ਭਿਨ੍ਨਂ ਹਦਯਭੇਦੋ. ਨਿਮਿਯਮਾਨਸ੍ਸ ਤਿਲਤਣ੍ਡੁਲਾਦਿਕਸ੍ਸ ਸਿਖਾਯ ਅਗ੍ਗਕੋਟਿਯਾ ਭਿਨ੍ਨਂ ਸਿਖਾਭੇਦੋ. ਖੇਤ੍ਤਾਦੀਨਂ ਮਿਨਨਰਜ੍ਜੁਯਾ ਅਞ੍ਞਥਾਕਰਣਂ ਰਜ੍ਜੁਭੇਦੋ. ਰਜ੍ਜੁਗਹਣੇਨੇਵ ਚੇਤ੍ਥ ਦਣ੍ਡਕਸ੍ਸ ਗਹਣਂ ਕਤਮੇਵਾਤਿ ਦਟ੍ਠਬ੍ਬਂ.