੮. ਪਦੀਪੋਪਮਸੁਤ੍ਤਵਣ੍ਣਨਾ

੯੮੪. ‘‘ਨੇਵ ਕਾਯੋਪਿ ਕਿਲਮਤਿ ਨ ਚਕ੍ਖੂਨੀ’’ਤਿ ਅਟ੍ਠਕਥਾਯਂ ਪਦੁਦ੍ਧਾਰੋ ਕਤੋ. ‘‘ਕਾਯੋਪਿ ਕਿਲਮਤਿ, ਚਕ੍ਖੂਨਿਪਿ ਵਿਹਞ੍ਞਨ੍ਤੀ’’ਤਿ ਵਤ੍ਵਾ ਯਤ੍ਥ ਯਥਾ ਹੋਤਿ, ਤਾਨਿ ਦਸ੍ਸੇਤੁਂ ‘‘ਧਾਤੁਕਮ੍ਮਟ੍ਠਾਨਸ੍ਮਿਂ ਹੀ’’ਤਿਆਦਿ ਵੁਤ੍ਤਂ. ਚਕ੍ਖੂਨਿ ਫਨ੍ਦਨ੍ਤਿ ਕਿਲਮਨ੍ਤੀਤਿਆਦਿ ਅਤਿਵੇਲਂ ਉਪਨਿਜ੍ਝਾਯਨੇ ਹੋਤੀਤਿ ਕਤ੍ਵਾ ਵੁਤ੍ਤਂ. ਇਮਸ੍ਮਿਂ ਪਨ ਕਮ੍ਮਟ੍ਠਾਨੇਤਿ ਆਨਾਪਾਨਕਮ੍ਮਟ੍ਠਾਨੇ. ਏਵਮਾਹਾਤਿ ‘‘ਭਿਕ੍ਖੁ ਚੇਪਿ ਆਕਙ੍ਖੇਯ੍ਯ, ਨੇਵ ਕਾਯੋ ਕਿਲਮੇਯ੍ਯਾ’’ਤਿ ਏਵਮਾਹ.

ਲਬ੍ਭਤੀਤਿ ਅਟ੍ਠਕਥਾਧਿਪ੍ਪਾਯੇ ਠਤ੍ਵਾ ਵੁਤ੍ਤਂ, ਪਰਤੋ ਆਗਤੇਨ ਥੇਰਵਾਦੇਨ ਸੋ ਅਨਿਚ੍ਛਿਤੋ. ਨ ਹਿ ਤਾਰਕਰੂਪਮੁਤ੍ਤਾਵਲ਼ਿਕਾਦਿਸਦਿਸਂ ਨਿਮਿਤ੍ਤੂਪਟ੍ਠਾਨਾਕਾਰਮਤ੍ਤਂ ਖਣਮਤ੍ਤਟ੍ਠਾਯਿਨਂ ਕਸਿਣਨਿਮਿਤ੍ਤੇਸੁ ਵਿਯ ਉਗ੍ਘਾਟਨਂ ਕਾਤੁਂ ਸਕ੍ਕੋਤਿ. ਤੇਨਾਹ ‘‘ਨ ਲਬ੍ਭਤੇਵਾ’’ਤਿ. ਆਨਿਸਂਸਦਸ੍ਸਨਤ੍ਥਂ ਗਹਿਤੋ, ਆਨਾਪਾਨਸ੍ਸਤਿਸਮਾਧਿਸ੍ਮਿਂ ਸਿਦ੍ਧੇ ਅਯਂ ਗੁਣੋ ਸੁਖੇਨੇਵ ਇਜ੍ਝਤੀਤਿ. ਯਸ੍ਮਾ ਭਿਕ੍ਖੂਤਿ ਇਮਸ੍ਮਿਂ ਵਾਰੇ ਨਾਗਤਨ੍ਤਿ ਯਥਾ ਪੁਰਿਮਵਾਰੇ ‘‘ਭਿਕ੍ਖੁ ਚੇਪਿ ਆਕਙ੍ਖੇਯ੍ਯਾ’’ਤਿ ਆਗਤਂ, ਏਵਂ ਇਧ ‘‘ਭਾਵਿਤੇ ਖੋ, ਭਿਕ੍ਖਵੇ, ਆਨਾਪਾਨਸ੍ਸਤਿਸਮਾਧਿਮ੍ਹੀ’’ਤਿ ਆਗਤਵਾਰੇ ਭਿਕ੍ਖੁਗ੍ਗਹਣਮਕਤਂ, ਤਸ੍ਮਾ ‘‘ਸੋ’’ਤਿ ਨ ਵੁਤ੍ਤਂ.