੮. ਅਪ੍ਪਮਾਦਪੇਯ੍ਯਾਲਵਗ੍ਗੋ

੧. ਤਥਾਗਤਸੁਤ੍ਤਵਣ੍ਣਨਾ

੧੩੯. ਕਾਰਾਪਕਅਪ੍ਪਮਾਦੋ ਨਾਮ ‘‘ਇਮੇ ਅਕੁਸਲਾ ਧਮ੍ਮਾ ਪਹਾਤਬ੍ਬਾ, ਇਮੇ ਕੁਸਲਾ ਧਮ੍ਮਾ ਉਪ੍ਪਾਦੇਤਬ੍ਬਾ’’ਤਿ ਵੁਤ੍ਤਵਜ੍ਜੇਤਬ੍ਬਵਜ੍ਜਨਸਮ੍ਪਾਦੇਤਬ੍ਬਸਮ੍ਪਾਦਨਵਸੇਨ ਪਵਤ੍ਤੋ ਅਪ੍ਪਮਾਦੋ. ਏਸਾਤਿ ਅਪ੍ਪਮਾਦੋ. ਲੋਕਿਯੋਵ. ਨ ਲੋਕੁਤ੍ਤਰੋ. ਅਯਨ੍ਤਿ ਏਸਾਤਿ ਚ ਅਪ੍ਪਮਾਦਮੇਵ ਵਦਤਿ. ਤੇਸਨ੍ਤਿ ਚਤੁਭੂਮਕਧਮ੍ਮਾਨਂ. ਪਟਿਲਾਭਕਟ੍ਠੇਨਾਤਿ ਪਟਿਲਾਭਾਪਨਟ੍ਠੇਨ.

ਤਥਾਗਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੨. ਪਦਸੁਤ੍ਤਵਣ੍ਣਨਾ

੧੪੦. ਜਙ੍ਗਲਾਨਨ੍ਤਿ ਜਙ੍ਗਲਵਾਸੀਨਂ. ਜਙ੍ਗਲ-ਸਦ੍ਦੋ ਚੇਤ੍ਥ ਥਦ੍ਧਭਾਵਸਾਮਞ੍ਞੇਨ ਪਥਵੀਪਰਿਯਾਯੋ, ਨ ਅਨੁਪਟ੍ਠਾਨਵਿਦੂਰਦੇਸਵਾਚੀ. ਤੇਨਾਹ – ‘‘ਪਥਵੀਤਲਵਾਸੀਨ’’ਨ੍ਤਿ. ਪਦਾਨਂ ਵੁਚ੍ਚਮਾਨਤ੍ਤਾ ‘‘ਸਪਾਦਕਪਾਣਾਨ’’ਨ੍ਤਿ ਵਿਸੇਸੇਤ੍ਵਾ ਵੁਤ੍ਤਂ. ਸਮੋਧਾਨਨ੍ਤਿ ਅਨ੍ਤੋਗਧਭਾਵਂ. ਤੇਨਾਹ – ‘‘ਓਧਾਨਂ ਉਪਕ੍ਖੇਪ’’ਨ੍ਤਿ, ਉਪਨੇਤ੍ਵਾ ਪਕ੍ਖਿਪਿਤਬ੍ਬਨ੍ਤਿ ਅਤ੍ਥੋ.

ਪਦਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੩-੧੦. ਕੂਟਸੁਤ੍ਤਾਦਿਵਣ੍ਣਨਾ

੧੪੧-੧੪੮. ਵਸ੍ਸਿਕਾਯ ਪੁਪ੍ਫਂ ਵਸ੍ਸਿਕਂ ਯਥਾ ‘‘ਆਮਲਕਿਯਾ ਫਲਂ ਆਮਲਕ’’ਨ੍ਤਿ. ਮਹਾਤਲਸ੍ਮਿਨ੍ਤਿ ਉਪਰਿਪਾਸਾਦੇ. ‘‘ਯਾਨਿ ਕਾਨਿਚੀ’’ਤਿ ਪਦੇਹਿ ਇਤਰਾਨਿ ਸਮਾਨਾਧਿਕਰਣਾਨਿ ਭਵਿਤੁਂ ਯੁਤ੍ਤਾਨੀਤਿ ‘‘ਪਚ੍ਚਤ੍ਤੇ ਸਾਮਿਵਚਨ’’ਨ੍ਤਿ ਵਤ੍ਵਾ ਤਥਾ ਵਿਭਤ੍ਤਿਵਿਪਰਿਣਾਮੋ ਕਤੋ. ‘‘ਤਨ੍ਤਾਵੁਤਾਨ’’ਨ੍ਤਿ ਪਦਂ ਨਿਦ੍ਧਾਰਣੇ ਸਾਮਿਵਚਨਨ੍ਤਿ ਤਤ੍ਥ ‘‘ਵਤ੍ਥਾਨੀ’’ਤਿ ਵਚਨਸੇਸੇਨ ਅਤ੍ਥਂ ਦਸ੍ਸੇਤੁਂ ‘‘ਅਥ ਵਾ’’ਤਿਆਦਿ ਵੁਤ੍ਤਂ.

ਕੂਟਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

ਅਪ੍ਪਮਾਦਵਗ੍ਗਵਣ੍ਣਨਾ ਨਿਟ੍ਠਿਤਾ.