੨-੫੫. ਸਮਾਧਿਮੂਲਕਠਿਤਿਸੁਤ੍ਤਾਦਿਵਣ੍ਣਨਾ

੬੬੩-੭੧੬. ਦੁਤਿਯਾਦਿਸੁਤ੍ਤੇਸੁ ਠਿਤਿਕੁਸਲੋਤਿ ਏਤ੍ਥ ਅਨ੍ਤੋਗਧਹੇਤੁਅਤ੍ਥੋ ਠਿਤਿ-ਸਦ੍ਦੋ, ਤਸ੍ਮਿਞ੍ਚ ਪਨ ਕੁਸਲੋਤਿ ਅਤ੍ਥੋਤਿ ਆਹ – ‘‘ਝਾਨਂ ਠਪੇਤੁਂ ਅਕੁਸਲੋ’’ਤਿ. ਸਤ੍ਤਟ੍ਠਅਚ੍ਛਰਾਮਤ੍ਤਨ੍ਤਿ ਸਤ੍ਤਟ੍ਠਅਚ੍ਛਰਾਮਤ੍ਤਂ ਖਣਂ ਝਾਨਂ ਠਪੇਤੁਂ ਨ ਸਕ੍ਕੋਤਿ ਅਧਿਟ੍ਠਾਨਵਸੀਭਾਵਸ੍ਸ ਅਨਿਪ੍ਫਾਦਿਤਤ੍ਤਾ. ਯਥਾਪਰਿਚ੍ਛੇਦੇਨ ਕਾਲੇਨ ਵੁਟ੍ਠਾਤੁਂ ਨ ਸਕ੍ਕੋਤਿ ਵੁਟ੍ਠਾਨਵਸੀਭਾਵਸ੍ਸ ਅਨਿਪ੍ਫਾਦਿਤਤ੍ਤਾ. ਕਲ੍ਲਂ ਜਾਤਂ ਅਸ੍ਸਾਤਿ ਕਲ੍ਲਿਤਂ, ਤਸ੍ਮਿਂ ਕਲ੍ਲਿਤੇ ਕਲ੍ਲਿਤਭਾਵੇਨ ਕਸਿਣਾਰਮ੍ਮਣੇਸੁ ‘‘ਇਦਂ ਨਾਮ ਅਸੁਕਸ੍ਸਾ’’ਤਿ ਵਿਸਯਵਸੇਨ ਸਮਾਪਜ੍ਜਿਤੁਂ ਅਸਕ੍ਕੋਨ੍ਤੋ ਨ ਸਮਾਧਿਸ੍ਮਿਂ ਆਰਮ੍ਮਣਕੁਸਲੋ. ਨ ਸਮਾਧਿਸ੍ਮਿਂ ਗੋਚਰਕੁਸਲੋਤਿ ਸਮਾਧਿਸ੍ਮਿਂ ਨਿਪ੍ਫਾਦਿਤਬ੍ਬੇ ਤਸ੍ਸ ਗੋਚਰੇ ਕਮ੍ਮਟ੍ਠਾਨਸਞ੍ਞਿਤੇ ਪਵਤ੍ਤਿਟ੍ਠਾਨੇ ਭਿਕ੍ਖਾਚਾਰਗੋਚਰੇ ਚ ਸਤਿਸਮ੍ਪਜਞ੍ਞਵਿਰਹਿਤੋ ਅਕੁਸਲੋ. ਕੇਚਿ ਪਨ ‘‘ਕਮ੍ਮਟ੍ਠਾਨਗੋਚਰੋ ਪਠਮਜ੍ਝਾਨਾਦਿਕਂ, ‘ਏਵਂ ਸਮਾਪਜ੍ਜਿਤਬ੍ਬਂ, ਏਵਂ ਬਹੁਲੀਕਾਤਬ੍ਬ’ਨ੍ਤਿ ਅਜਾਨਨ੍ਤੋ ਤਤ੍ਥ ਅਕੁਸਲੋ ਨਾਮਾ’’ਤਿ ਵਦਨ੍ਤਿ. ਕਮ੍ਮਟ੍ਠਾਨਂ ਅਭਿਨੀਹਰਿਤੁਨ੍ਤਿ ਕਮ੍ਮਟ੍ਠਾਨਂ ਵਿਸੇਸਭਾਗਿਯਤਾਯ ਅਭਿਨੀਹਰਿਤੁਂ ਅਕੁਸਲੋ. ਸਕ੍ਕਚ੍ਚਕਾਰੀਤਿ ਚਿਤ੍ਤੀਕਾਰੀ. ਸਾਤਚ੍ਚਕਾਰੀਤਿ ਨਿਯਤਕਾਰੀ. ਸਮਾਧਿਸ੍ਸ ਉਪਕਾਰਕਧਮ੍ਮਾਤਿ ਅਪ੍ਪਨਾਕੋਸਲ੍ਲਾ. ਸਮਾਪਤ੍ਤਿਆਦੀਹੀਤਿ ਆਦਿ-ਸਦ੍ਦੇਨ ਸਕ੍ਕਚ੍ਚਕਾਰਿਪਦਾਦੀਨਂਯੇਵ ਸਙ੍ਗਹੋ ਦਟ੍ਠਬ੍ਬੋ ਚਤੁਕ੍ਕਾਨਂ ਵੁਤ੍ਤਤ੍ਤਾ. ਤੇਨਾਹ ‘‘ਯੋਜੇਤ੍ਵਾ ਚਤੁਕ੍ਕਾ ਵੁਤ੍ਤਾ’’ਤਿ. ਲੋਕਿਯਜ੍ਝਾਨਵਸੇਨੇਵ ਕਥਿਤਂ ‘‘ਸਮਾਧਿਕੁਸਲੋ’’ਤਿਆਦਿਨਾ ਨਯੇਨ ਦੇਸਨਾਯ ਪਵਤ੍ਤਤ੍ਤਾ. ਨ ਹਿ ਲੋਕੁਤ੍ਤਰਧਮ੍ਮੇਸੁ ਅਕੋਸਲ੍ਲਂ ਨਾਮ ਲਬ੍ਭਤਿ. ਯਦਿ ਅਕੋਸਲ੍ਲਂ, ਨ ਕੁਸਲਸਦ੍ਦੇਨ ਵਿਸੇਸਿਤਬ੍ਬਤਾ ਸਿਯਾਤਿ.

ਸਮਾਧਿਮੂਲਕਠਿਤਿਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

ਝਾਨਸਂਯੁਤ੍ਤਵਣ੍ਣਨਾ ਨਿਟ੍ਠਿਤਾ.

ਨਿਟ੍ਠਿਤਾ ਚ ਸਾਰਤ੍ਥਪ੍ਪਕਾਸਿਨਿਯਾ

ਸਂਯੁਤ੍ਤਨਿਕਾਯ-ਅਟ੍ਠਕਥਾਯ ਖਨ੍ਧਵਗ੍ਗਵਣ੍ਣਨਾ.