੭-੧੦. ਅਨੁਧਮ੍ਮਸੁਤ੍ਤਾਦਿਵਣ੍ਣਨਾ

੩੯-੪੨. ਅਪਾਯਦੁਕ੍ਖੇ ਸਕਲਸਂਸਾਰਦੁਕ੍ਖੇ ਚ ਪਤਿਤੁਂ ਅਦਤ੍ਵਾ ਧਾਰਣਟ੍ਠੇਨ ਧਮ੍ਮੋ, ਮਗ੍ਗਫਲਨਿਬ੍ਬਾਨਾਨਿ. ਤਦਨੁਲੋਮਿਕਾ ਚਸ੍ਸ ਪੁਬ੍ਬਭਾਗਪਟਿਪਦਾਤਿ ਆਹ ‘‘ਧਮ੍ਮਾਨੁਧਮ੍ਮਪਟਿਪਨ੍ਨਸ੍ਸਾ’’ਤਿਆਦਿ. ‘‘ਨਿਬ੍ਬਿਦਾਬਹੁਲੋ’’ਤਿ ਅਟ੍ਠਕਥਾਯਂ ਪਦੁਦ੍ਧਾਰੋ ਕਤੋ, ਪਾਲ਼ਿਯਂ ਪਨ ‘‘ਨਿਬ੍ਬਿਦਾਬਹੁਲਂ ਵਿਹਰੇਯ੍ਯਾ’’ਤਿ ਆਗਤਂ. ਉਕ੍ਕਣ੍ਠਨਬਹੁਲੋਤਿ ਸਬ੍ਬਭਵੇਸੁ ਉਕ੍ਕਣ੍ਠਨਬਹੁਲੋ. ਤੀਹਿ ਪਰਿਞ੍ਞਾਹੀਤਿ ਞਾਤਤੀਰਣਪ੍ਪਹਾਨਪਰਿਞ੍ਞਾਹਿ. ਪਰਿਜਾਨਾਤੀਤਿ ਤੇਭੂਮਕਧਮ੍ਮੇ ਪਰਿਚ੍ਛਿਜ੍ਜ ਜਾਨਾਤਿ, ਵਿਪਸ੍ਸਨਂ ਉਸ੍ਸੁਕ੍ਕਾਪੇਤਿ. ਪਰਿਮੁਚ੍ਚਤਿ ਸਬ੍ਬਸਂਕਿਲੇਸਤੋ ‘‘ਮਗ੍ਗੋ ਪਵਤ੍ਤਿਤੋ ਪਰਿਮੁਚ੍ਚਤੀ’’ਤਿ ਵੁਤ੍ਤਤ੍ਤਾ. ਤਥਾਤਿ ਇਮਿਨਾ ਇਤੋ ਪਰੇਸੁ ਤੀਸੁ ਮਗ੍ਗੋ ਹੋਤੀਤਿ ਦਸ੍ਸੇਤਿ. ਇਧਾਤਿ ਇਮਸ੍ਮਿਂ ਸੁਤ੍ਤੇ. ਅਨਿਯਮਿਤਾਤਿ ਅਗ੍ਗਹਿਤਾ. ਤੇਸੁ ਨਿਯਮਿਤਾ ‘‘ਅਨਿਚ੍ਚਾਨੁਪਸ੍ਸੀ’’ਤਿਆਦਿਵਚਨਤੋ. ਸਾਤਿ ਅਨੁਪਸ੍ਸਨਾ. ਤਤ੍ਥ ਨਿਯਮਿਤਵਸੇਨੇਵਾਤਿ ਇਦਂ ਲਕ੍ਖਣਵਚਨਂ ਯਥਾ ‘‘ਯਦਿ ਮੇ ਬ੍ਯਾਧਯੋ ਭਵੇਯ੍ਯੁਂ, ਦਾਤਬ੍ਬਮਿਦਮੋਸਧ’’ਨ੍ਤਿ. ਨ ਹਿ ਸਕ੍ਕਾ ਏਤਿਸ੍ਸਾ ਏਵ ਅਨੁਪਸ੍ਸਨਾਯ ਵਸੇਨ ਸਮ੍ਮਸਨਾਚਾਰਂ ਮਤ੍ਥਕਂ ਪਾਪੇਤੁਨ੍ਤਿ.

ਅਨੁਧਮ੍ਮਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

ਨਤੁਮ੍ਹਾਕਂਵਗ੍ਗਵਣ੍ਣਨਾ ਨਿਟ੍ਠਿਤਾ.