੩. ਭਾਰਵਗ੍ਗੋ

੧. ਭਾਰਸੁਤ੍ਤਵਣ੍ਣਨਾ

੨੨. ਉਪਾਦਾਨਾਨਂ ਆਰਮ੍ਮਣਭੂਤਾ ਖਨ੍ਧਾ ਉਪਾਦਾਨਕ੍ਖਨ੍ਧਾ. ਪਰਿਹਾਰਭਾਰਿਯਟ੍ਠੇਨਾਤਿ ਪਰਿਹਾਰਸ੍ਸ ਭਾਰਿਯਭਾਵੇਨ ਗਰੁਤਰਭਾਵੇਨ. ਵੁਤ੍ਤਮੇਵ ਅਤ੍ਥਂ ਪਾਕਟਂ ਕਾਤੁਂ ‘‘ਏਤੇਸਞ੍ਹੀ’’ਤਿਆਦਿਮਾਹ. ਤਤ੍ਥ ਯਸ੍ਮਾ ਏਤਾਨਿ ਠਾਨਗਮਨਾਦੀਨਿ ਰੂਪਾਰੂਪਧਮ੍ਮਾਨਂ ਪਙ੍ਗੁਲਜਚ੍ਚਨ੍ਧਾਨਂ ਵਿਯ ਅਞ੍ਞਮਞ੍ਞੂਪਸ੍ਸਯਵਸੇਨ ਇਜ੍ਝਨ੍ਤਿ, ਨ ਪਚ੍ਚੇਕਂ, ਤਸ੍ਮਾ ‘‘ਏਤੇਸ’’ਨ੍ਤਿ ਅਵਿਸੇਸਵਚਨਂ ਕਤਂ. ਪੁਗ੍ਗਲਨ੍ਤਿ ਖਨ੍ਧਸਨ੍ਤਾਨਂ ਵਦਤਿ. ਖਨ੍ਧਸਨ੍ਤਾਨੋ ਹਿ ਅਵਿਚ੍ਛੇਦੇਨ ਪਵਤ੍ਤਮਾਨੋ ਯਾਵ ਪਰਿਨਿਬ੍ਬਾਨਾ ਖਨ੍ਧਭਾਰਂ ਵਹਨ੍ਤੋ ਵਿਯ ਲੋਕੇ ਖਾਯਤਿ ਤਬ੍ਬਿਨਿਮੁਤ੍ਤਸ੍ਸ ਸਤ੍ਤਸ੍ਸ ਅਭਾਵਤੋ. ਤੇਨਾਹ ‘‘ਪੁਗ੍ਗਲੋ’’ਤਿਆਦਿ. ਭਾਰਹਾਰੋਤਿ ਜਾਤੋਤਿ ਭਾਰਹਾਰੋ ਨਾਮ ਜਾਤੋ.

ਪੁਨਬ੍ਭਵਕਰਣਂ ਪੁਨਬ੍ਭਵੋ, ਤਂ ਫਲਂ ਅਰਹਤਿ, ਤਤ੍ਥ ਨਿਯੁਤ੍ਤਾਤਿ ਵਾ ਪੋਨੋਭਵਿਕਾ. ਤਬ੍ਭਾਵਸਹਗਤਂ ਯਥਾ ‘‘ਸਨਿਦਸ੍ਸਨਾ ਧਮ੍ਮਾ’’ਤਿ, ਨ ਸਂਸਟ੍ਠਸਹਗਤਂ, ਨਾਪਿ ਆਰਮ੍ਮਣਸਹਗਤਂ. ‘‘ਤਤ੍ਰ ਤਤ੍ਰਾ’’ਤਿ ਯਂ ਯਂ ਉਪ੍ਪਤ੍ਤਿਟ੍ਠਾਨਂ, ਰੂਪਾਦਿਆਰਮ੍ਮਣਂ ਵਾ ਪਤ੍ਵਾ ਤਤ੍ਰਤਤ੍ਰਾਭਿਨਨ੍ਦਿਨੀ. ਤੇਨਾਹ ‘‘ਉਪਪਤ੍ਤਿਟ੍ਠਾਨੇ ਵਾ’’ਤਿਆਦਿ. ਪਞ੍ਚਕਾਮਗੁਣਿਕੋਤਿ ਪਞ੍ਚਕਾਮਗੁਣਾਰਮ੍ਮਣੋ. ਰੂਪਾਰੂਪੂਪਪਤ੍ਤਿਭਵੇ ਰਾਗੋ ਰੂਪਾਰੂਪਭਵਰਾਗੋ. ਝਾਨਨਿਕਨ੍ਤਿ ਝਾਨਸਙ੍ਖਾਤੇ ਕਮ੍ਮਭਵੇ ਰਾਗੋ. ਸਸ੍ਸਤਾਦਿਟ੍ਠੀਤਿ ਭਵਦਿਟ੍ਠਿ, ਤਂਸਹਗਤੋ ਰਾਗੋ. ਅਯਨ੍ਤਿ ਰਾਗੋ ਭਵਤਣ੍ਹਾ ਨਾਮ. ਉਚ੍ਛੇਦਦਿਟ੍ਠਿ ਵਿਭਵਦਿਟ੍ਠਿ ਨਾਮ, ਤਂਸਹਗਤੋ ਛਨ੍ਦਰਾਗੋ ਵਿਭਵਤਣ੍ਹਾ ਨਾਮ. ਏਸ ਪੁਗ੍ਗਲੋ ਖਨ੍ਧਭਾਰਂ ਆਦਿਯਤਿ ਤਣ੍ਹਾਵਸੇਨ ਪਟਿਸਨ੍ਧਿਗ੍ਗਹਣਤੋ. ‘‘ਅਸੇਸਮੇਤ੍ਥ ਤਣ੍ਹਾ ਵਿਰਜ੍ਜਤਿ ਪਲੁਜ੍ਜਤਿ ਨਿਰੁਜ੍ਝਤਿ ਪਹੀਯਤੀ’’ਤਿਆਦਿਨਾ ਸਬ੍ਬਪਦਾਨਿ ਨਿਬ੍ਬਾਨਵਸੇਨੇਵ ਵੇਦਿਤਬ੍ਬਾਨੀਤਿ ਆਹ ‘‘ਸਬ੍ਬਂ ਨਿਬ੍ਬਾਨਸ੍ਸੇਵ ਵੇਵਚਨ’’ਨ੍ਤਿ.

ਭਾਰਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੨. ਪਰਿਞ੍ਞਸੁਤ੍ਤਵਣ੍ਣਨਾ

੨੩. ਪਰਿਜਾਨਿਤਬ੍ਬੇਤਿ ਪਹਾਨਪਰਿਞ੍ਞਾਯ ਪਰਿਜਾਨਿਤਬ੍ਬੇ. ਤਥਾ ਪਰਿਜਾਨਨਞ੍ਚ ਤਤ੍ਥ ਛਨ੍ਦਰਾਗਪ੍ਪਹਾਨਂ, ਤੇਸਂ ਅਤਿਕ੍ਕਮੋਤਿ ਆਹ ‘‘ਸਮਤਿਕ੍ਕਮਿਤਬ੍ਬੇਤਿ ਅਤ੍ਥੋ’’ਤਿ. ਅਚ੍ਚਨ੍ਤਪਰਿਞ੍ਞਨ੍ਤਿ ਨਿਬ੍ਬਾਨਂ ਵਦਤਿ. ਤੇਨਾਹ ‘‘ਸਮਤਿਕ੍ਕਮਨ੍ਤਿ ਅਤ੍ਥੋ’’ਤਿ.

ਪਰਿਞ੍ਞਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੩. ਅਭਿਜਾਨਸੁਤ੍ਤਵਣ੍ਣਨਾ

੨੪. ਞਾਤਪਰਿਞ੍ਞਾ ਕਥਿਤਾ ‘‘ਅਭਿਵਿਸਿਟ੍ਠਾਯ ਪਞ੍ਞਾਯ ਜਾਨਨ’’ਨ੍ਤਿ ਕਤ੍ਵਾ. ਦੁਤਿਯਪਦੇਨਾਤਿ ‘‘ਪਰਿਜਾਨ’’ਨ੍ਤਿ ਪਦੇਨ. ਤਤਿਯਚਤੁਤ੍ਥੇਹੀਤਿ ‘‘ਵਿਰਾਜਯਂ ਪਜਹ’’ਨ੍ਤਿ ਪਦੇਹਿ.

ਅਭਿਜਾਨਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੪-੯. ਛਨ੍ਦਰਾਗਸੁਤ੍ਤਾਦਿਵਣ੍ਣਨਾ

੨੫-੩੦. ਧਾਤੁਸਂਯੁਤ੍ਤੇ ਵੁਤ੍ਤਨਯੇਨੇਵ ਵੇਦਿਤਬ੍ਬਾਨਿ, ਕੇਵਲਞ੍ਹਿ ਏਤ੍ਥ ਖਨ੍ਧਵਸੇਨ ਦੇਸਨਾ ਆਗਤਾ, ਤਤ੍ਥ ਧਾਤੁਵਸੇਨਾਤਿ ਅਯਮੇਵ ਵਿਸੇਸੋ. ਚਤ੍ਤਾਰਿ ਸਚ੍ਚਾਨਿ ਕਥਿਤਾਨਿ ਅਸ੍ਸਾਦਾਦੀਨਵਨਿਸ੍ਸਰਣਵਸੇਨ ਦੇਸਨਾਯ ਪਵਤ੍ਤਤ੍ਤਾ.

ਛਨ੍ਦਰਾਗਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

੧੦. ਅਘਮੂਲਸੁਤ੍ਤਵਣ੍ਣਨਾ

੩੧. ਅਘਂ ਵੁਚ੍ਚਤਿ ਪਾਪਂ, ਅਘਨਿਮਿਤ੍ਤਤਾਯ ਅਘਂ ਦੁਕ੍ਖਂ. ਇਦਞ੍ਹਿ ਦੁਕ੍ਖਂ ਨਾਮ ਵਿਸੇਸਤੋ ਪਾਪਹੇਤੁਕਂ ਕਮ੍ਮਫਲਸਞ੍ਞਿਤਂ. ਤਥਾ ਵਟ੍ਟਦੁਕ੍ਖਂ ਅਵਿਜ੍ਜਾਤਣ੍ਹਾਮੂਲਕਤ੍ਤਾ. ਅਘਸ੍ਸ ਨਿਮਿਤ੍ਤਤਾਯ ਅਘਂ ਦੁਕ੍ਖਂ. ਵਟ੍ਟਾਨੁਸਾਰੀ ਮਹਾਜਨੋ ਹਿ ਦੁਕ੍ਖਾਭਿਭੂਤੋ ਤਸ੍ਸ ਪਤਿਕਾਰਂ ਮਞ੍ਞਮਾਨੋ ਤਂ ਤਂ ਕਰੋਤੀਤਿ.

ਅਘਮੂਲਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੧. ਪਭਙ੍ਗੁਸੁਤ੍ਤਵਣ੍ਣਨਾ

੩੨. ਪਭਿਜ੍ਜਨਸਭਾਵਨ੍ਤਿ ਖਣੇ ਖਣੇ ਪਭਙ੍ਗੁਸਭਾਵਂ.

ਪਭਙ੍ਗੁਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਭਾਰਵਗ੍ਗਵਣ੍ਣਨਾ ਨਿਟ੍ਠਿਤਾ.