੯. ਓਪਮ੍ਮਸਂਯੁਤ੍ਤਂ

੧. ਕੂਟਸੁਤ੍ਤਵਣ੍ਣਨਾ

੨੨੩. ਕੂਟਂ ਗਚ੍ਛਨ੍ਤੀਤਿ ਕੂਟਚ੍ਛਿਦ੍ਦਸ੍ਸ ਅਨੁਪਵਿਸਨਵਸੇਨ ਕੂਟਂ ਗਚ੍ਛਨ੍ਤਿ. ਯਾ ਚ ਗੋਪਾਨਸਿਯੋ ਗੋਪਾਨਸਨ੍ਤਰਗਤਾ, ਤਾਪਿ ਕੂਟਂ ਆਹਚ੍ਚ ਠਾਨੇਨ ਕੂਟਙ੍ਗਮਾ. ਦੁਵਿਧਾਪਿ ਕੂਟੇ ਸਮੋਸਰਣਾ. ਕੂਟਸ੍ਸ ਸਮੁਗ੍ਘਾਤੇਨ ਵਿਨਾਸੇਨ ਭਿਜ੍ਜਨੇਨ. ਅਵਿਜ੍ਜਾਯ ਸਮੁਗ੍ਘਾਤੇਨਾਤਿ ਅਵਿਜ੍ਜਾਯ ਅਚ੍ਚਨ੍ਤਮੇਵ ਅਪ੍ਪਵਤ੍ਤਿਯਾ. ਤੇਨ ਚ ਮੋਕ੍ਖਧਮ੍ਮਾਧਿਗਮੇਨ ਤਦਨੁਰੂਪਧਮ੍ਮਾਧਿਗਮੋ ਦਸ੍ਸਿਤੋ. ਅਪ੍ਪਮਤ੍ਤਾਤਿ ਪਨ ਇਮਿਨਾ ਤਸ੍ਸ ਉਪਾਯੋ ਦਸ੍ਸਿਤੋ.

ਕੂਟਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੨. ਨਖਸਿਖਸੁਤ੍ਤਵਣ੍ਣਨਾ

੨੨੪. ਏਵਂ ਅਪ੍ਪਕਾ ਯਥਾ ਨਖਸਿਖਾਯ ਆਰੋਪਿਤਪਂਸੁ, ਸੁਗਤਿਸਂਵਤ੍ਤਨਿਯਸ੍ਸ ਕਮ੍ਮਸ੍ਸ ਅਪ੍ਪਕਤ੍ਤਾ ਏਵਂ ਦੇਵੇਸੁਪੀਤਿ ਹੀਨੂਦਾਹਰਣਵਸੇਨ ਵੁਤ੍ਤਂ. ਅਪ੍ਪਤਰਾ ਹਿ ਸਤ੍ਤਾ ਯੇ ਦੇਵੇਸੁ ਜਾਯਨ੍ਤਿ, ਤਞ੍ਚ ਖੋ ਕਾਮਦੇਵੇਸੁ. ਇਤਰੇਸੁ ਪਨ ਵਤ੍ਤਬ੍ਬਮੇਵ ਨਤ੍ਥਿ.

ਨਖਸਿਖਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੩. ਕੁਲਸੁਤ੍ਤਵਣ੍ਣਨਾ

੨੨੫. ਵਿਧਂਸਯਨ੍ਤਿ ਵਿਹੇਠਯਨ੍ਤਿ. ਵਡ੍ਢਿਤਾਤਿ ਭਾਵਨਾਪਾਰਿਪੂਰਿਵਸੇਨ ਪਰਿਬ੍ਰੂਹਿਤਾ. ਪੁਨਪ੍ਪੁਨਂ ਕਤਾਤਿ ਭਾਵਨਾਯ ਬਹੁਲੀਕਰਣੇਨ ਅਪਰਾਪਰਂ ਪਵਤ੍ਤਿਤਾ ਯੁਤ੍ਤਯਾਨਂ ਵਿਯ ਕਤਾਤਿ ਯਥਾ ਯੁਤ੍ਤਂ ਆਜਞ੍ਞਰਥਂ ਛੇਕੇਨ ਸਾਰਥਿਨਾ ਅਧਿਟ੍ਠਿਤਂ ਯਥਾਰੁਚਿ ਪਵਤ੍ਤਤਿ, ਏਵਂ ਯਥਾਰੁਚਿ ਪਵਤ੍ਤਿਯਾ ਗਮਿਤਾ. ਪਤਿਟ੍ਠਾਨਟ੍ਠੇਨਾਤਿ ਅਧਿਟ੍ਠਾਨਟ੍ਠੇਨ. ਵਤ੍ਥੁ ਵਿਯ ਕਤਾ ਸਬ੍ਬਸੋ ਉਪਕ੍ਕਿਲੇਸਵਿਸੋਧਨੇਨ ਸੁਵਿਸੋਧਿਤਮਰਿਯਾਦਂ ਵਿਯ ਕਤਾ. ਅਧਿਟ੍ਠਿਤਾਤਿ ਪਟਿਪਕ੍ਖਦੂਰੀਭਾਵਤੋ ਸੁਭਾਵਿਤਭਾਵੇਨ ਅਵਿਕਮ੍ਪਨੇਯ੍ਯਤਾਯ ਠਪਿਤਾ. ਸਮਨ੍ਤਤੋ ਚਿਤਾਤਿ ਸਬ੍ਬਭਾਗੇਨ ਭਾਵਨੂਪਚਯਂ ਗਮਿਤਾ. ਤੇਨਾਹ ‘‘ਸੁਵਡ੍ਢਿਤਾ’’ਤਿ. ਸੁਟ੍ਠੁ ਸਮਾਰਦ੍ਧਾਤਿ ਮੇਤ੍ਤਾਭਾਵਨਾਯ ਮਤ੍ਥਕਪ੍ਪਤ੍ਤਿਯਾ ਸਮ੍ਮਦੇਵ ਸਮ੍ਪਾਦਿਤਾ.

ਕੁਲਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੪. ਓਕ੍ਖਾਸੁਤ੍ਤਵਣ੍ਣਨਾ

੨੨੬. ਮਹਾਮੁਖਉਕ੍ਖਲੀਨਨ੍ਤਿ ਮਹਾਮੁਖਾਨਂ ਮਹਨ੍ਤਕੋਲ਼ੁਮ੍ਬਾਨਂ ਸਤਂ. ਪਣੀਤਭੋਜਨਭਰਿਤਾਨਨ੍ਤਿ ਸਪ੍ਪਿਮਧੁਸਕ੍ਕਰਾਦੀਹਿ ਉਪਨੀਤਪਣੀਤਭੋਜਨੇਹਿ ਪਰਿਪੁਣ੍ਣਾਨਂ. ਤਸ੍ਸਾਤਿ ਪਾਠਸ੍ਸ. ਗੋਦੁਹਨਮਤ੍ਤਨ੍ਤਿ ਗੋਦੋਹਨਵੇਲਾਮਤ੍ਤਂ. ਤਂ ਪਨ ਕਿਤ੍ਤਕਂ ਅਧਿਪ੍ਪੇਤਨ੍ਤਿ ਆਹ ‘‘ਗਾਵਿਯਾ’’ਤਿਆਦਿ. ਸਬ੍ਬਸਤ੍ਤੇਸੁ ਹਿਤਫਰਣਨ੍ਤਿ ਅਨੋਧਿਸੋਮੇਤ੍ਤਾਭਾਵਨਮਾਹ – ਮੇਤ੍ਤਚਿਤ੍ਤਂ ਅਪ੍ਪਨਾਪ੍ਪਤ੍ਤਂ ਭਾਵੇਤੁਂ ਸਕ੍ਕੋਤੀਤਿ ਅਧਿਪ੍ਪਾਯੋ. ਤਮ੍ਪਿ ਤਤੋ ਯਥਾਵੁਤ੍ਤਦਾਨਤੋ ਮਹਪ੍ਫਲਤਰਨ੍ਤਿ.

ਓਕ੍ਖਾਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੫. ਸਤ੍ਤਿਸੁਤ੍ਤਵਣ੍ਣਨਾ

੨੨੭. ਅਗ੍ਗੇ ਪਹਰਿਤ੍ਵਾਤਿ ਤਿਣ੍ਹਫਲਸਤ੍ਤਿਯਾ ਅਗ੍ਗੇ ਹਤ੍ਥੇਨ ਵਾ ਮੁਟ੍ਠਿਨਾ ਵਾ ਪਹਾਰਂ ਦਤ੍ਵਾ. ਕਪ੍ਪਾਸਵਟ੍ਟਿਂ ਵਿਯਾਤਿ ਪਹਤਕਪ੍ਪਾਸਪਿਣ੍ਡਂ ਵਿਯ. ਨਿਯ੍ਯਾਸਵਟ੍ਟਿਂ ਵਿਯਾਤਿ ਫਲਸਣ੍ਠਾਨਂ ਨਿਯ੍ਯਾਸਪਿਣ੍ਡਂ ਵਿਯ. ਏਕਤੋ ਕਤ੍ਵਾਤਿ ਕਲਿਕਾਦਿਭਾਵੇਨ ਵੀਸਤਿਂਸਪਿਣ੍ਡਾਨਿ ਏਕਜ੍ਝਂ ਕਤ੍ਵਾ. ਅਲ੍ਲਿਯਾਪੇਨ੍ਤੋ ਪਿਣ੍ਡਂ ਕਰੋਨ੍ਤੋ. ਪਟਿਲੇਣੇਤੀਤਿ ਪਟਿਲੀਨਯਤਿ ਨਾਮੇਤਿ. ਅਲ੍ਲਿਯਾਪੇਨ੍ਤੋ ਤੇ ਦ੍ਵੇਪਿ ਧਾਰਾ ਏਕਤੋ ਸਮ੍ਫੁਸਾਪੇਨ੍ਤੋ. ਪਟਿਕੋਟ੍ਟੇਤੀਤਿ ਪਟਿਪਹਰਤਿ. ਤਤ੍ਥ ਖਣ੍ਡਂ ਵਿਯ ਨਿਯ੍ਯਾਸੋ. ਕਪ੍ਪਾਸਵਟ੍ਟਨਕਰਣੀਯਨ੍ਤਿ ਵਿਹਤਸ੍ਸ ਕਪ੍ਪਾਸਸ੍ਸ ਪਟਿਸਂਹਰਣਵਸੇਨ ਬਨ੍ਧਨਦਣ੍ਡਂ. ਪਵਤ੍ਤੇਨ੍ਤੋਤਿ ਕਪ੍ਪਾਸਸ੍ਸ ਸਂਵੇਲ੍ਲਨਵਸੇਨ ਪਵਤ੍ਤੇਨ੍ਤੋ.

ਸਤ੍ਤਿਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੬. ਧਨੁਗ੍ਗਹਸੁਤ੍ਤਵਣ੍ਣਨਾ

੨੨੮. ਦਲ਼੍ਹਧਨੁਨੋਤਿ ਥਿਰਤਰਧਨੁਨੋ. ਇਦਾਨਿ ਤਸ੍ਸ ਥਿਰਤਰਭਾਵਂ ਪਰਿਚ੍ਛੇਦਤੋ ਦਸ੍ਸੇਤੁਂ ‘‘ਦਲ਼੍ਹਧਨੂ’’ਤਿਆਦਿ ਵੁਤ੍ਤਂ. ਤਤ੍ਥ ਦ੍ਵਿਸਹਸ੍ਸਥਾਮਨ੍ਤਿ ਪਲਾਨਂ ਦ੍ਵਿਸਹਸ੍ਸਥਾਮਂ. ਵੁਤ੍ਤਮੇਵਤ੍ਥਂ ਪਾਕਟਤਰਂ ਕਤ੍ਵਾ ਦਸ੍ਸੇਤੁਂ ‘‘ਯਸ੍ਸਾ’’ਤਿਆਦਿਮਾਹ. ਤਤ੍ਥ ਯਸ੍ਸਾਤਿ ਧਨੁਨੋ. ਆਰੋਪਿਤਸ੍ਸਾਤਿ ਜਿਯਂ ਆਰੋਪਿਤਸ੍ਸ. ਜਿਯਾਬਦ੍ਧੋਤਿ ਜਿਯਾਯ ਬਦ੍ਧੋ. ਪਥਵਿਤੋ ਮੁਚ੍ਚਤਿ, ਏਤਂ ‘‘ਦ੍ਵਿਸਹਸ੍ਸਥਾਮ’’ਨ੍ਤਿ ਵੇਦਿਤਬ੍ਬਂ. ਲੋਹਸੀਸਾਦੀਨਨ੍ਤਿ ਕਾਲ਼ਲੋਹਤਮ੍ਬਲੋਹਸੀਸਾਦੀਨਂ. ਭਾਰੋਤਿ ਪੁਰਿਸਭਾਰੋ, ਸੋ ਪਨ ਮਜ੍ਝਿਮਪੁਰਿਸਸ੍ਸ ਵਸੇਨ ਏਦਿਸਂ ਤਸ੍ਸ ਬਲਂ ਦਟ੍ਠਬ੍ਬਂ. ਉਗ੍ਗਹਿਤਸਿਪ੍ਪਾ ਧਨੁਵੇਦਸਿਕ੍ਖਾਵਸੇਨ. ਚਿਣ੍ਣਵਸੀਭਾਵਾ ਲਕ੍ਖੇਸੁ ਅਵਿਰਜ੍ਝਨਸਰਕ੍ਖੇਪਵਸੇਨ. ਕਤਂ ਰਾਜਕੁਲਾਦੀਸੁ ਉਪਗਨ੍ਤ੍ਵਾ ਅਸਨਂ ਸਰਕ੍ਖੇਪੋ ਏਤੇਹੀਤਿ ਕਤੂਪਸਨਾਤਿ ਆਹ ‘‘ਰਾਜਕੁਲਾਦੀਸੁ ਦਸ੍ਸਿਤਸਿਪ੍ਪਾ’’ਤਿ.

‘‘ਬੋਧਿਸਤ੍ਤੋ ਚਤ੍ਤਾਰਿ ਕਣ੍ਡਾਨਿ ਆਹਰੀ’’ਤਿ ਵਤ੍ਵਾ ਤਮੇਵ ਅਤ੍ਥਂ ਵਿਤ੍ਥਾਰਤੋ ਦਸ੍ਸੇਨ੍ਤੋ ‘‘ਤਦਾ ਕਿਰਾ’’ਤਿਆਦਿਮਾਹ. ਤਤ੍ਥ ਜਵਿਸ੍ਸਾਮਾਤਿ ਧਾਵਿਸ੍ਸਾਮ. ਅਗ੍ਗਿ ਉਟ੍ਠਹੀਤਿ ਸੀਘਪਤਨਸਨ੍ਤਾਪੇਨ ਚ ਸੂਰਿਯਰਸ੍ਮਿਸਨ੍ਤਾਪਸ੍ਸ ਆਸਨ੍ਨਭਾਵੇਨ ਚ ਉਸੁਮਾ ਉਟ੍ਠਹਿ. ਪਕ੍ਖਪਞ੍ਜਰੇਨਾਤਿ ਪਕ੍ਖਜਾਲਨ੍ਤਰੇਨ.

ਨਿਵਤ੍ਤਿਤ੍ਵਾਤਿ ‘‘ਨਿਪ੍ਪਯੋਜਨਮਿਦਂ ਜਵਨ’’ਨ੍ਤਿ ਨਿਵਤ੍ਤਿਤ੍ਵਾ. ਪਤ੍ਤਕਟਾਹੇਨ ਓਤ੍ਥਟਪਤ੍ਤੋ ਵਿਯਾਤਿ ਪਿਹਿਤਪਤ੍ਤੋ ਵਿਯ ਅਹੋਸਿ, ਵੇਗਸਾ ਪਤਨੇਨ ਨਗਰਸ੍ਸ ਉਪਰਿ ਆਕਾਸਸ੍ਸ ਨਿਰਿਕ੍ਖਣਂ ਅਹੋਸਿ. ਸਞ੍ਚਾਰਿਤਤ੍ਤਾ ਅਨੇਕਹਂਸਸਹਸ੍ਸਸਦਿਸੋ ਪਞ੍ਞਾਯਿ ਸੇਯ੍ਯਥਾਪਿ ਬੋਧਿਸਤ੍ਤਸ੍ਸ ਧਨੁਗ੍ਗਹਕਾਲੇ ਸਰਕੂਟਾਦਿਦਸ੍ਸਨੇ.

ਦੁਕ੍ਕਰਨ੍ਤਿ ਤਸ੍ਸ ਅਦਸ੍ਸਨਂ ਸਨ੍ਧਾਯਾਹ, ਨ ਅਤ੍ਤਨੋ ਪਤਨਂ. ਸੂਰਿਯਮਣ੍ਡਲਞ੍ਹਿ ਅਤਿਸੀਘੇਨ ਜਵੇਨ ਗਚ੍ਛਨ੍ਤਮ੍ਪਿ ਪਞ੍ਞਾਸਯੋਜਨਾਯਾਮਵਿਤ੍ਥਤਂ ਅਤ੍ਤਨੋ ਵਿਪੁਲਤਾਯ ਪਭਸ੍ਸਰਤਾਯ ਚ ਸਤ੍ਤਾਨਂ ਚਕ੍ਖੁਸ੍ਸ ਗੋਚਰਭਾਵਂ ਗਚ੍ਛਤਿ, ਜਵਨਹਂਸੋ ਪਨ ਤਾਦਿਸੇਨ ਸੂਰਿਯੇਨ ਸਦ੍ਧਿਂ ਜਵੇਨ ਗਚ੍ਛਨ੍ਤੋ ਨ ਪਞ੍ਞਾਯੇਯ੍ਯ. ਤਸ੍ਮਾ ਵੁਤ੍ਤਂ ‘‘ਨ ਸਕ੍ਕਾ ਤਯਾ ਪਸ੍ਸਿਤੁ’’ਨ੍ਤਿ. ਚਤ੍ਤਾਰੋ ਅਕ੍ਖਣਵੇਧਿਨੋ. ਗਨ੍ਤ੍ਵਾ ਗਹਿਤੇ ਸੋਤੁਂ ਘਣ੍ਡਂ ਪਿਲ਼ਨ੍ਧਾਪੇਤ੍ਵਾ ਸਯਂ ਪੁਰਤ੍ਥਾਭਿਮੁਖੋ ਨਿਸਿਨ੍ਨੋ. ਪੁਰਤ੍ਥਿਮਦਿਸਾਭਿਮੁਖਂ ਗਤਕਣ੍ਡਂ ਸਨ੍ਧਾਯਾਹ ‘‘ਪਠਮਕਣ੍ਡੇਨੇਵ ਸਦ੍ਧਿਂ ਉਪ੍ਪਤਿਤ੍ਵਾ’’ਤਿ. ਤੇ ਚਤ੍ਤਾਰਿ ਕਣ੍ਡਾਨਿ ਏਕਕ੍ਖਣੇਯੇਵ ਖਿਪਿਂਸੁ.

ਆਯੁਂ ਸਙ੍ਖਰੋਤਿ ਏਤੇਨਾਤਿ ਆਯੁਸਙ੍ਖਾਰੋ. ਯਥਾ ਹਿ ਕਮ੍ਮਜਰੂਪਾਨਂ ਪਵਤ੍ਤਿ ਜੀਵਿਤਿਨ੍ਦ੍ਰਿਯਪਟਿਬਦ੍ਧਾ, ਏਵਂ ਅਤ੍ਤਭਾਵਸ੍ਸ ਪਵਤ੍ਤਿ ਤਪ੍ਪਟਿਬਦ੍ਧਾਤਿ. ਬਹੁਵਚਨਨਿਦ੍ਦੇਸੋ ਪਨ ਪਾਲ਼ਿਯਂ ਏਕਸ੍ਮਿਂ ਖਣੇ ਅਨੇਕਸਤਸਙ੍ਖਸ੍ਸ ਜੀਵਿਤਿਨ੍ਦ੍ਰਿਯਸ੍ਸ ਉਪਲਬ੍ਭਨਤੋ. ਤਂ ਜੀਵਿਤਿਨ੍ਦ੍ਰਿਯਂ. ਤਤੋ ਯਥਾਵੁਤ੍ਤਦੇਵਤਾਨਂ ਜਵਤੋ ਸੀਘਤਰਂ ਖੀਯਤਿ ਇਤ੍ਤਰਖਣਤ੍ਤਾ. ਵੁਤ੍ਤਞ੍ਹੇਤਂ –

‘‘ਜੀਵਿਤਂ ਅਤ੍ਤਭਾਵੋ ਚ, ਸੁਖਦੁਕ੍ਖਾ ਚ ਕੇਵਲਾ;

ਏਕਚਿਤ੍ਤਸਮਾਯੁਤ੍ਤਾ, ਲਹੁਸੋ ਵਤ੍ਤਤੇ ਖਣੋ’’ਤਿ. (ਮਹਾਨਿ. ੧੦);

ਭੇਦੋਤਿ ਭਙ੍ਗੋ. ਨ ਸਕ੍ਕਾ ਪਞ੍ਞਾਪੇਤੁਂ ਤਤੋਪਿ ਅਤਿਵਿਯ ਇਤ੍ਤਰਖਣਤ੍ਤਾ.

ਧਨੁਗ੍ਗਹਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੭. ਆਣਿਸੁਤ੍ਤਵਣ੍ਣਨਾ

੨੨੯. ਅਞ੍ਞੇ ਰਾਜਾਨੋ ਚ ਭਾਗਂ ਗਣ੍ਹਨ੍ਤਾ ਇਮੇ ਵਿਯ ਦਸਭਾਗਂ ਗਣ੍ਹਨ੍ਤੀਤਿ ਤੇਸਮਯਂ ਅਨੁਗਤਿ ਪਞ੍ਞਾਯਤਿ. ਮਹਾਜਨਸ੍ਸ ਆਨਯਨਤੋ ਆਨਕੋਤਿ ਆਹ ‘‘ਏਵਂਲਦ੍ਧਨਾਮੋ’’ਤਿ. ਇਦਾਨਿ ਤਂ ਆਦਿਤੋ ਪਟ੍ਠਾਯ ਆਗਮਨਾਨੁਕ੍ਕਮਂ ਦਸ੍ਸੇਤੁਂ ‘‘ਹਿਮਵਨ੍ਤੇ ਕਿਰਾ’’ਤਿਆਦਿਮਾਹ. ਕਰੇਣੁਨ੍ਤਿ ਕਰੇਣੁਕਂ, ਹਤ੍ਥਿਨਿਨ੍ਤਿ ਅਤ੍ਥੋ. ਸਕ੍ਕਰਿਂਸੂਤਿ ਅਨਤ੍ਥਪਰਿਹਰਣਵਸੇਨ ਪਸਤ੍ਥੂਪਹਾਰਵਸੇਨ ਚ ਪੂਜੇਸੁਂ. ਓਤਰੀਤਿ ਕੁਲ਼ੀਰਦਹਂ ਪਾਵਿਸਿ. ਪਟਿਕ੍ਕਮਿਤ੍ਵਾ ਠਪਨਵਸੇਨ ਅਪਕ੍ਕਮਿਤ੍ਵਾ ਪਤਿ.

ਸੁਵਣ੍ਣਰਜਤਾਦਿਮਯਨ੍ਤਿ ਕਿਸ੍ਮਿਞ੍ਚਿ ਛਿਦ੍ਦੇ ਸੁਵਣ੍ਣਮਯਂ, ਕਿਸ੍ਮਿਞ੍ਚਿ ਰਜਤਮਯਂ, ਕਿਸ੍ਮਿਞ੍ਚਿ ਫਲਿਕਮਯਂ ਆਣਿਂ ਘਟਯਿਂਸੁ ਬਨ੍ਧਿਂਸੁ. ਪੁਬ੍ਬੇ ਫਰਿਤ੍ਵਾ ਤਿਟ੍ਠਨ੍ਤਸ੍ਸ ਦ੍ਵਾਦਸ ਯੋਜਨਾਨਿ ਪਮਾਣੋ ਏਤਸ੍ਸਾਤਿ ਦ੍ਵਾਦਸਯੋਜਨਪ੍ਪਮਾਣੋ, ਸਦ੍ਦੋ. ਅਥਸ੍ਸ ਅਨੇਕਸਤਕਾਲੇ ਗਚ੍ਛਨ੍ਤੇ ਅਨ੍ਤੋਸਾਲਾਯਮ੍ਪਿ ਦੁਕ੍ਖੇਨ ਸੁਯ੍ਯਿਤ੍ਥ ਆਣਿਸਙ੍ਘਾਟਮਤ੍ਤਤ੍ਤਾ.

ਗਮ੍ਭੀਰਾਤਿ ਅਗਾਧਾ ਦੁਕ੍ਖੋਗਾਲ਼੍ਹਾ. ਸਲ੍ਲਸੁਤ੍ਤਞ੍ਹਿ ‘‘ਅਨਿਮਿਤ੍ਤਮਨਞ੍ਞਾਤ’’ਨ੍ਤਿਆਦਿਨਾ ਪਾਲ਼ਿਵਸੇਨ ਗਮ੍ਭੀਰਂ, ਨ ਅਤ੍ਥਗਮ੍ਭੀਰਂ. ਤਥਾ ਹਿ ਤਤ੍ਥ ਤਾ ਤਾ ਗਾਥਾ ਦੁਵਿਞ੍ਞੇਯ੍ਯਰੂਪਾ ਤਿਟ੍ਠਨ੍ਤਿ, ਦੁਵਿਞ੍ਞੇਯ੍ਯਂ ਞਾਣੇਨ ਦੁਕ੍ਖੋਗਾਹਨ੍ਤਿ ਕਤ੍ਵਾ ‘‘ਗਮ੍ਭੀਰ’’ਨ੍ਤਿ ਵੁਚ੍ਚਤਿ. ਪੁਬ੍ਬਾਪਰਮ੍ਪੇਤ੍ਥ ਕਾਸਞ੍ਚਿ ਗਾਥਾਨਂ ਦੁਵਿਞ੍ਞੇਯ੍ਯਤਾਯ ਦੁਕ੍ਖੋਗਾਹਮੇਵ, ਤਸ੍ਮਾ ਤਂ ਪਾਲ਼ਿਵਸੇਨ ‘‘ਗਮ੍ਭੀਰ’’ਨ੍ਤਿ ਵੁਤ੍ਤਂ ‘‘ਪਾਲ਼ਿਵਸੇਨ ਗਮ੍ਭੀਰਾ ਸਲ੍ਲਸੁਤ੍ਤਸਦਿਸਾ’’ਤਿ. ਇਮਿਨਾ ਨਯੇਨ ‘‘ਅਤ੍ਥਵਸੇਨ ਗਮ੍ਭੀਰਾ’’ਤਿ ਏਤ੍ਥ ਅਤ੍ਥੋ ਵੇਦਿਤਬ੍ਬੋ. ਮਹਾਵੇਦਲ੍ਲਸੁਤ੍ਤਸ੍ਸ ਅਤ੍ਥਵਸੇਨ ਗਮ੍ਭੀਰਤਾ ਪਾਕਟਾਯੇਵ. ਲੋਕਂ ਉਤ੍ਤਰਤੀਤਿ ਲੋਕੁਤ੍ਤਰੋ, ਨਵਵਿਧਅਪ੍ਪਮਾਣਧਮ੍ਮੋ, ਸੋ ਅਤ੍ਥਭੂਤੋ ਏਤੇਸਂ ਅਤ੍ਥੀਤਿ ਲੋਕੁਤ੍ਤਰਾ. ਤੇਨਾਹ ‘‘ਲੋਕੁਤ੍ਤਰਅਤ੍ਥਦੀਪਕਾ’’ਤਿ. ਸਤ੍ਤਸੁਞ੍ਞਤਧਮ੍ਮਮਤ੍ਤਮੇਵਾਤਿ ਸਤ੍ਤੇਨ ਅਤ੍ਤਨਾ ਸੁਞ੍ਞਤਂ ਕੇਵਲਂ ਧਮ੍ਮਮਤ੍ਤਮੇਵ. ਉਗ੍ਗਹੇਤਬ੍ਬਂ ਪਰਿਯਾਪੁਣਿਤਬ੍ਬਨ੍ਤਿ ਚ ਲਿਙ੍ਗਵਚਨਵਿਪਲ੍ਲਾਸੇਨ ਵੁਤ੍ਤਨ੍ਤਿ ਆਹ ‘‘ਉਗ੍ਗਹੇਤਬ੍ਬੇ ਚ ਪਰਿਯਾਪੁਣਿਤਬ੍ਬੇ ਚਾ’’ਤਿ. ਕਵਿਤਾਤਿ ਕਵਿਨੋ ਕਮ੍ਮਂ ਕਵਿਕਤਾ. ਯਸ੍ਸ ਪਨ ਯਂ ਕਮ੍ਮਂ, ਤਂ ਤੇਨ ਕਤਨ੍ਤਿ ਵੁਚ੍ਚਤੀਤਿ ਆਹ ‘‘ਕਵਿਤਾਤਿ ਕਵੀਹਿ ਕਤਾ’’ਤਿ. ਇਤਰਂ ‘‘ਕਾਵੇਯ੍ਯਾ’’ਤਿ ਪਦਂ, ਕਬ੍ਬਨ੍ਤਿ ਵੁਤ੍ਤਂ ਹੋਤਿ. ‘‘ਕਬ੍ਬ’’ਨ੍ਤਿ ਚ ਕਵਿਨਾ ਵੁਤ੍ਤਨ੍ਤਿ ਅਤ੍ਥੋ. ਤੇਨਾਹ ‘‘ਤਸ੍ਸੇਵ ਵੇਵਚਨ’’ਨ੍ਤਿ. ਚਿਤ੍ਤਕ੍ਖਰਾਤਿ ਵਿਚਿਤ੍ਰਾਕਾਰਅਕ੍ਖਰਾ. ਸਾਸਨਤੋ ਬਹਿਭੂਤਾਤਿ ਨ ਸਾਸਨਾਵਚਰਾ. ਤੇਸਂ ਸਾਵਕੇਹੀਤਿ ‘‘ਬੁਦ੍ਧਾਨਂ ਸਾਵਕਾ’’ਤਿ ਅਪਞ੍ਞਾਤਾਨਂ ਯੇਸਂ ਕੇਸਞ੍ਚਿ ਸਾਵਕੇਹਿ. ਅਨੁਗ੍ਗਯ੍ਹਮਾਨਾਤਿ ਨ ਉਗ੍ਗਯ੍ਹਮਾਨਾ ਸਵਨਧਾਰਣਪਰਿਚਯਅਤ੍ਥੂਪਪਰਿਕ੍ਖਾਦਿਵਸੇਨ ਅਨੁਗ੍ਗਯ੍ਹਮਾਨਾ. ਅਨ੍ਤਰਧਾਯਨ੍ਤਿ ਅਦਸ੍ਸਨਂ ਗਚ੍ਛਨ੍ਤਿ.

ਆਣਿਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੮. ਕਲਿਙ੍ਗਰਸੁਤ੍ਤਵਣ੍ਣਨਾ

੨੩੦. ਕਲਿਙ੍ਗਰਂ ਵੁਚ੍ਚਤਿ ਖੁਦ੍ਦਕਦਾਰੁਖਣ੍ਡਂ, ਤਂ ਉਪਧਾਨਂ ਏਤੇਸਨ੍ਤਿ ਕਲਿਙ੍ਗਰੂਪਧਾਨਾ. ਲਿਚ੍ਛਵੀ ਪਨ ਖਦਿਰਦਣ੍ਡਂ ਉਪਧਾਨਂ ਕਤ੍ਵਾ ਤਦਾ ਵਿਹਰਿਂਸੁ. ਤਸ੍ਮਾ ਵੁਤ੍ਤਂ ‘‘ਖਦਿਰਘਟਿਕਾਸੂ’’ਤਿਆਦਿ. ਪਕਤਿਵਿਜ੍ਜੁਸਞ੍ਞਿਤੋ ਨਤ੍ਥਿ ਏਤੇਸਂ ਖਣੋ ਵਿਜ੍ਝਨੇਤਿ ਅਕ੍ਖਣਵੇਧਿਨੋ ਤਤੋ ਸੀਘਤਰਂ ਵਿਜ੍ਝਨਤੋ. ‘‘ਅਕ੍ਖਣ’’ਨ੍ਤਿ ਵਿਜ੍ਜੁ ਵੁਚ੍ਚਤਿ ਇਤ੍ਤਰਖਣਤ੍ਤਾ. ਅਕ੍ਖਣੋਭਾਸੇਨ ਲਕ੍ਖਣਵੇਧਕਾ ਅਕ੍ਖਣਵੇਧਿਨੋ. ਅਨੇਕਧਾ ਭਿਨ੍ਨਸ੍ਸ ਵਾਲਸ੍ਸ ਵਿਜ੍ਝਨੇਨ ਵਾਲਵੇਧਿਨੋ. ਵਾਲੇਕਦੇਸੋ ਹਿ ਇਧ ‘‘ਵਾਲੋ’’ਤਿ ਗਹਿਤੋ.

ਬਹੁਦੇਵ ਦਿਵਸਭਾਗਂ ਪਧਾਨਾਨੁਯੋਗਤੋ ਉਪ੍ਪਨ੍ਨਦਰਥਪਰਿਸ੍ਸਮਵਿਨੋਦਨਤ੍ਥਂ ਨ੍ਹਾਯਿਤ੍ਵਾ. ਤੇ ਸਨ੍ਧਾਯਾਤਿ ਤੇ ਤਥਾਰੂਪੇ ਪਧਾਨਕਮ੍ਮਿਕਭਿਕ੍ਖੂ ਸਨ੍ਧਾਯ. ਇਦਂ ਇਦਾਨਿ ਵੁਚ੍ਚਮਾਨਂ ਅਤ੍ਥਜਾਤਂ ਵੁਤ੍ਤਂ ਪੋਰਾਣਟ੍ਠਕਥਾਯਂ. ਅਯਮ੍ਪਿ ਦੀਪੋਤਿ ਤਮ੍ਬਪਣ੍ਣਿਦੀਪਮਾਹ. ਪਧਾਨਾਨੁਯੁਞ੍ਜਨਵੇਲਾਯ ਨਿਵੇਦਨਵਸੇਨ ਤਤ੍ਥ ਤਤ੍ਥ ਏਕਜ੍ਝਂ ਪਹਤਘਣ੍ਡਿਨਿਗ੍ਘੋਸੇਨੇਵ ਏਕਘਣ੍ਡਿਨਿਗ੍ਘੋਸੋ, ਤਤ੍ਥ ਤਤ੍ਥ ਪਣ੍ਣਸਾਲਾਦੀਸੁ ਵਸਨ੍ਤਾਨਂ ਭਿਕ੍ਖੂਨਂ ਵਸੇਨ ਏਕਪਧਾਨਭੂਤੋ. ਨਾਨਾਮੁਖੋਤਿ ਅਨੁਰਾਧਪੁਰਸ੍ਸ ਪਚ੍ਛਿਮਦਿਸਾਯਂ ਏਕੋ ਵਿਹਾਰੋ, ਪਿਲਿਚ੍ਛਿਕੋਲ਼ਿਨਗਰਸ੍ਸ ਪੁਰਤ੍ਥਿਮਦਿਸਾਯਂ. ਉਭਯਤ੍ਥ ਪਵਤ੍ਤਘਣ੍ਡਿਸਦ੍ਦਾ ਅਨ੍ਤਰਾਪਵਤ੍ਤਘਣ੍ਡਿਸਦ੍ਦੇਹਿ ਮਿਸ੍ਸੇਤ੍ਵਾ ਓਸਰਨ੍ਤਿ. ਕਲ੍ਯਾਣਿਯਂ ਪਵਤ੍ਤਘਣ੍ਡਿਸਦ੍ਦੋ ਤਥਾ ਨਾਗਦੀਪੇ.

ਕਲਿਙ੍ਗਰਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੯. ਨਾਗਸੁਤ੍ਤਵਣ੍ਣਨਾ

੨੩੧. ਅਤਿਕ੍ਕਨ੍ਤਵੇਲਨ੍ਤਿ ਭਤ੍ਤਾਨੁਮੋਦਨਉਪਨਿਸਿਨ੍ਨਕਥਾਵੇਲਤੋ ਅਤਿਕ੍ਕਨ੍ਤਵੇਲਂ. ਅਸਮ੍ਭਿਨ੍ਨੇਨਾਤਿ ਸਰਸਮ੍ਪਤ੍ਤਿਤੋ ਅਸਮ੍ਭਿਨ੍ਨੇਨ, ਸਰਸ੍ਸ ਉਚ੍ਚਾਰਣਸਮ੍ਪਤ੍ਤਿਂ ਅਪਰਿਹਾਪੇਤ੍ਵਾਤਿ ਅਤ੍ਥੋ. ਅਪਰਿਸੁਦ੍ਧਾਸਯਤਾਯ ਨੇਵ ਗੁਣਵਣ੍ਣਾਯ ਨ ਞਾਣਬਲਾਯ ਹੋਤਿ. ਤਨ੍ਤਿ ਤਂ ਤਥਾ ਪਚ੍ਚਯਾਨਂ ਪਰਿਭੁਞ੍ਜਨਂ, ਤਂ ਤਥਾ ਮਿਚ੍ਛਾਪਟਿਪਜ੍ਜਨਂ.

ਨਾਗਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੦. ਬਿਲ਼ਾਰਸੁਤ੍ਤਵਣ੍ਣਨਾ

੨੩੨. ਘਰਾਨਂ ਸਨ੍ਧੀਤਿ ਘਰੇਨ ਘਰਸ੍ਸ ਸਮ੍ਬਨ੍ਧਟ੍ਠਾਨਂ. ਸਹ ਮਲੇਨ ਵਤ੍ਤਤੀਤਿ ਸਮਲਂ. ਗੇਹਤੋ ਗਾਮਤੋ ਚ ਨਿਕ੍ਖਮਨਚਨ੍ਦਨਿਕਟ੍ਠਾਨਂ. ਸਙ੍ਕਾਰਟ੍ਠਾਨਨ੍ਤਿ ਸਙ੍ਕਾਰਕੂਟਂ. ਕੇਚਿ ‘‘ਸਨ੍ਧਿਸਙ੍ਕਾਰਕੂਟਟ੍ਠਾਨ’’ਨ੍ਤਿ ਵਦਨ੍ਤਿ. ਵੁਟ੍ਠਾਨਨ੍ਤਿ ਆਪਨ੍ਨਆਪਤ੍ਤਿਤੋ, ਨ ਕਿਲੇਸਤੋ ਵੁਟ੍ਠਾਨਂ, ਸੁਦ੍ਧਨ੍ਤੇ ਅਧਿਟ੍ਠਾਨਂ. ਤਂ ਪਨ ਯਥਾਆਪਨ੍ਨਾਯ ਆਪਤ੍ਤਿਯਾ ‘‘ਦੇਸਨਾ’’ਤ੍ਵੇਵ ਵੁਚ੍ਚਤੀਤਿ ਆਹ ‘‘ਦੇਸਨਾ ਪਞ੍ਞਾਯਤੀ’’ਤਿ.

ਬਿਲ਼ਾਰਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੧. ਸਿਙ੍ਗਾਲਸੁਤ੍ਤਵਣ੍ਣਨਾ

੨੩੩. ਏਤ੍ਤਕਮ੍ਪੀਤਿ ਇਮਿਨਾ ਜਰਸਿਙ੍ਗਾਲੇਨ ਲਦ੍ਧਬ੍ਬਂ ਚਿਤ੍ਤਸ੍ਸਾਦਮਤ੍ਤਮ੍ਪਿ ਨ ਲਭਿਸ੍ਸਤਿ ਸਕਲਮੇਵ ਕਪ੍ਪਂ ਸਬ੍ਬਸੋ ਅਵੀਚਿਜਾਲਾਹਿ ਨਿਰਨ੍ਤਰਂ ਝਾਯਮਾਨਤਾਯ ਨਿਚ੍ਚਦੁਕ੍ਖਾਤੁਰਭਾਵਤੋ.

ਸਿਙ੍ਗਾਲਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੨. ਦੁਤਿਯਸਿਙ੍ਗਾਲਸੁਤ੍ਤਵਣ੍ਣਨਾ

੨੩੪. ਕਤਜਾਨਨਨ੍ਤਿ ਕਤੂਪਕਾਰਜਾਨਨਂ. ਕਤਵੇਦਿਤਾਤਿ ਤਸ੍ਸੇਵ ਪਰੇਸਂ ਪਾਕਟਕਰਣਵਸੇਨ ਜਾਨਨਮੇਵ. ਆਚਾਰਮੇਵਾਤਿ ਕਤਾਪਰਾਧਮੇਵ.

ਦੁਤਿਯਸਿਙ੍ਗਾਲਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਸਾਰਤ੍ਥਪ੍ਪਕਾਸਿਨਿਯਾ ਸਂਯੁਤ੍ਤਨਿਕਾਯ-ਅਟ੍ਠਕਥਾਯ

ਓਪਮ੍ਮਸਂਯੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.