੧੦. ਭਿਕ੍ਖੁਸਂਯੁਤ੍ਤਂ

੧. ਕੋਲਿਤਸੁਤ੍ਤਵਣ੍ਣਨਾ

੨੩੫. ਸਾਵਕਾਨਂ ਆਲਾਪੋਤਿ ਸਾਵਕਾਨਂ ਸਬ੍ਰਹ੍ਮਚਾਰਿਂ ਉਦ੍ਦਿਸ੍ਸ ਆਲਾਪੋ. ਬੁਦ੍ਧੇਹਿ ਸਦਿਸਾ ਮਾ ਹੋਮਾਤਿ ਬੁਦ੍ਧਾਚਿਣ੍ਣਂ ਸਮੁਦਾਚਾਰਂ ਅਕਥੇਨ੍ਤੇਹਿ ਸਾਵਕੇਹਿ, ‘‘ਆਵੁਸੋ ਭਿਕ੍ਖਵੇ’’ਤਿ ਆਲਪਿਤਾ ਭਿਕ੍ਖੂ, ‘‘ਆਵੁਸੋ’’ਤਿ ਪਟਿਵਚਨਂ ਦੇਨ੍ਤਿ, ਨ, ‘‘ਭਨ੍ਤੇ’’ਤਿ. ਦੁਤਿਯਜ੍ਝਾਨੇ ਵਿਤਕ੍ਕਵਿਚਾਰਾ ਨਿਰੁਜ੍ਝਨ੍ਤਿ ਤੇਸਂ ਨਿਰੋਧੇਨੇਵ ਤਸ੍ਸ ਝਾਨਸ੍ਸ ਉਪ੍ਪਾਦੇਤਬ੍ਬਤੋ. ਯੇਸਂ ਨਿਰੋਧਾਤਿ ਯੇਸਂ ਵਚੀਸਙ੍ਗਾਰਾਨਂ ਵਿਤਕ੍ਕਵਿਚਾਰਾਨਂ ਨਿਰੁਜ੍ਝਨੇਨ ਸੁਵਿਕ੍ਖਮ੍ਭਿਤਭਾਵੇਨ ਸਦ੍ਦਾਯਤਨਂ ਅਪ੍ਪਵਤ੍ਤਿਂ ਗਚ੍ਛਤਿ ਕਾਰਣਸ੍ਸ ਦੂਰਤੋ ਪਸ੍ਸਮ੍ਭਿਤਤ੍ਤਾ. ਅਰਿਯੋਤਿ ਨਿਦ੍ਦੋਸੋ. ਪਰਿਸੁਦ੍ਧੋ ਤੁਣ੍ਹੀਭਾਵੋ, ਨ ਤਿਤ੍ਥਿਯਾਨਂ ਮੂਗਬ੍ਬਤਗ੍ਗਹਣਂ ਵਿਯ ਅਪਰਿਸੁਦ੍ਧੋਤਿ ਅਧਿਪ੍ਪਾਯੋ. ਪਠਮਜ੍ਝਾਨਾਦੀਨੀਤਿ ਆਦਿ-ਸਦ੍ਦੇਨ ਤਤਿਯਜ੍ਝਾਨਾਦੀਨਿ ਸਙ੍ਗਣ੍ਹਾਤਿ.

ਆਰਮ੍ਮਣਭੂਤੇਨ ਵਿਤਕ੍ਕੇਨ ਸਹ ਗਤਾ ਪਵਤ੍ਤਾਤਿ ਵਿਤਕ੍ਕਸਹਗਤਾਤਿ ਆਹ ‘‘ਵਿਤਕ੍ਕਾਰਮ੍ਮਣਾ’’ਤਿ. ਵਿਤਕ੍ਕਾਰਮ੍ਮਣਤਾ ਚ ਸਞ੍ਞਾਮਨਸਿਕਾਰਾਨਂ ਸੁਖੁਮਆਰਮ੍ਮਣਗ੍ਗਹਣਵਸੇਨ ਦਟ੍ਠਬ੍ਬਾ. ਤੇਨਾਹ ‘‘ਨ ਸਨ੍ਤਤੋ ਉਪਟ੍ਠਹਿਂਸੂ’’ਤਿ. ਨ ਪਗੁਣਂ ਸਮ੍ਮਦੇਵ ਵਸੀਭਾਵਸ੍ਸ ਅਨਾਪਾਦਿਤਤ੍ਤਾ. ਸਞ੍ਞਾਮਨਸਿਕਾਰਾਪੀਤਿ ਤਤਿਯਜ੍ਝਾਨਾਧਿਗਮਾਯ ਪਵਤ੍ਤਿਯਮਾਨਾ ਸਞ੍ਞਾਮਨਸਿਕਾਰਾਪਿ ਹਾਨਭਾਗਿਯਾਵ ਅਹੇਸੁਂ, ਨ ਵਿਸੇਸਭਾਗਿਯਾ. ਸਮ੍ਮਾ ਠਪੇਹੀਤਿ ਬਹਿਦ੍ਧਾ ਵਿਕ੍ਖੇਪਂ ਪਹਾਯ ਸਮ੍ਮਾ ਅਜ੍ਝਤ੍ਤਮੇਵ ਚਿਤ੍ਤਂ ਠਪੇਹਿ. ਏਕਗ੍ਗਂ ਕਰੋਹੀਤਿ ਤੇਨੇਵ ਵਿਕ੍ਖੇਪਪਟਿਬਾਹਨੇਨ ਅਵਿਹਤਮਾਨਸਤਾਯ ਚਿਤ੍ਤਸਮਾਧਾਨਵਸੇਨ ਏਕਗ੍ਗਂ ਕਰੋਹਿ. ਆਰੋਪੇਹੀਤਿ ਈਸਕਮ੍ਪਿ ਬਹੁਮ੍ਪਿ ਅਪਤਿਤਂ ਕਤ੍ਵਾ ਕਮ੍ਮਟ੍ਠਾਨਾਰਮ੍ਮਣੇ ਆਰੋਪੇਹਿ. ਦੁਤਿਯਅਗ੍ਗਸਾਵਕਭੂਮਿਯਾ ਪਾਰਿਪੂਰਿਯਾ ਆਯਸ੍ਮਾ ਮਹਾਭਿਞ੍ਞੋ, ਨ ਯਥਾ ਤਥਾਤਿ ਆਹ ‘‘ਮਹਾਭਿਞ੍ਞਤਨ੍ਤਿ ਛਲ਼ਭਿਞ੍ਞਤ’’ਨ੍ਤਿ. ਇਮਿਨਾ ਉਪਾਯੇਨਾਤਿ ਇਮਿਨਾ ‘‘ਅਥ ਖੋ ਮਂ, ਆਵੁਸੋ’’ਤਿਆਦਿਨਾ ਵੁਤ੍ਤੇਨ ਉਪਾਯੇਨ. ਵਡ੍ਢੇਤ੍ਵਾਤਿ ਉਤ੍ਤਰਿ ਉਤ੍ਤਰਿ ਵਿਸੇਸਭਾਗਿਯਭਾਵਾਪਾਦਨੇਨ ਸਮਾਧਿਂ ਪਞ੍ਞਞ੍ਚ ਬ੍ਰੂਹੇਤ੍ਵਾ ਬ੍ਰੂਹੇਤ੍ਵਾ.

ਕੋਲਿਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੨. ਉਪਤਿਸ੍ਸਸੁਤ੍ਤਵਣ੍ਣਨਾ

੨੩੬. ਅਤਿਉਲ਼ਾਰਮ੍ਪਿ ਸਤ੍ਤਂ ਵਾ ਸਙ੍ਖਾਰਂ ਵਾ ਸਨ੍ਧਾਯ ਵੁਤ੍ਤਂ ਸਬ੍ਬਤ੍ਥਮੇਵ ਸਬ੍ਬਸੋ ਛਨ੍ਦਰਾਗਸ੍ਸ ਸੁਪ੍ਪਹੀਨਤ੍ਤਾ. ਜਾਨਨਤ੍ਥਂ ਪੁਚ੍ਛਤਿ ਸਤ੍ਥੁਗੁਣਾਨਂ ਅਤਿਵਿਯ ਉਲ਼ਾਰਤਮਭਾਵਤੋ.

ਉਪਤਿਸ੍ਸਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੩. ਘਟਸੁਤ੍ਤਵਣ੍ਣਨਾ

੨੩੭. ਪਰਿਵੇਣਗ੍ਗੇਨਾਤਿ ਪਰਿਵੇਣਭਾਗੇਨ. ਕੇਚਿ ‘‘ਏਕਵਿਹਾਰੇਤਿ ਏਕਚ੍ਛਨ੍ਨੇ ਏਕਸ੍ਮਿਂ ਆਵਾਸੇ’’ਤਿ ਵਦਨ੍ਤਿ. ਤੇਤਿ ਤੇ ਦ੍ਵੇਪਿ ਥੇਰਾ. ਪਾਟਿਯੇਕ੍ਕੇਸੁ ਠਾਨੇਸੂਤਿ ਵਿਸੁਂ ਵਿਸੁਂ ਠਾਨੇਸੁ. ਨਿਸੀਦਨ੍ਤੀਤਿ ਦਿਵਾਵਿਹਾਰਂ ਨਿਸੀਦਨ੍ਤਿ. ਓਲ਼ਾਰਿਕੋ ਨਾਮ ਜਾਤੋ ਪਰਿਤ੍ਤਧਮ੍ਮਾਰਮ੍ਮਣਤ੍ਤਾ ਤਸ੍ਸ. ਤੇਤਿ ਥੇਰੋ ਭਗਵਾ ਚ.

ਪਰਿਪੁਣ੍ਣਵੀਰਿਯੋਤਿ ਚਤੁਕਿਚ੍ਚਸਾਧਨਵਸੇਨ ਸਮ੍ਪੁਣ੍ਣਵੀਰਿਯੋ. ਪਗ੍ਗਹਿਤਵੀਰਿਯੋਤਿ ਈਸਕਮ੍ਪਿ ਸਙ੍ਕੋਚਂ ਅਨਾਪਜ੍ਜਿਤ੍ਵਾ ਪਵਤ੍ਤਿਤਵੀਰਿਯੋ. ਉਪਨਿਕ੍ਖੇਪਨਮਤ੍ਤਸ੍ਸੇਵਾਤਿ ਸਮੀਪੇ ਠਪਨਮਤ੍ਤਸ੍ਸੇਵ.

ਚਤੁਭੂਮਕਧਮ੍ਮੇਸੁ ਲਬ੍ਭਮਾਨਤ੍ਤਾ ਪਞ੍ਞਾਯ ‘‘ਚਤੁਭੂਮਕਧਮ੍ਮੇ ਅਨੁਪਵਿਸਿਤ੍ਵਾ ਠਿਤਟ੍ਠੇਨਾ’’ਤਿ ਵੁਤ੍ਤਂ. ਲਕ੍ਖਿਤਬ੍ਬਟ੍ਠੇਨ ਸਮਾਧਿ ਏਵ ਸਮਾਧਿਲਕ੍ਖਣਂ. ਏਵਂ ਵਿਪਸ੍ਸਨਾਲਕ੍ਖਣਂ ਵੇਦਿਤਬ੍ਬਂ. ਅਞ੍ਞਮਞ੍ਞਸ੍ਸਾਤਿ ਅਞ੍ਞਸ੍ਸ ਅਞ੍ਞਸ੍ਸ ਨਾਨਾਲਕ੍ਖਣਾਤਿ ਵੇਦਿਤਬ੍ਬਂ. ਅਞ੍ਞਸ੍ਸਾਤਿ ਇਤਰਸ੍ਸ. ਧੁਰਨ੍ਤਿ ਵਹਿਤਬ੍ਬਭਾਰਂ. ਦ੍ਵੀਸੁਪਿ ਏਤੇਸੂਤਿ ਸਮਾਧਿਲਕ੍ਖਣਵਿਪਸ੍ਸਨਾਲਕ੍ਖਣੇਸੁ ਸਮ੍ਮਾਸਮ੍ਬੁਦ੍ਧੋ ਨਿਪ੍ਫਤ੍ਤਿਂ ਗਤੋ.

ਘਟਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੪. ਨਵਸੁਤ੍ਤਵਣ੍ਣਨਾ

੨੩੮. ਅਭਿਚੇਤਸਿ ਨਿਸ੍ਸਿਤਾ ਆਭਿਚੇਤਸਿਕਾ. ਪਟਿਪਕ੍ਖਵਿਧਮਨੇਨ ਅਭਿਵਿਸਿਟ੍ਠਂ ਚਿਤ੍ਤਂ ਅਭਿਚਿਤ੍ਤਂ. ਯਸ੍ਮਾ ਝਾਨਾਨਂ ਤਂਸਮ੍ਪਯੁਤ੍ਤਂ ਚਿਤ੍ਤਂ ਨਿਸ੍ਸਾਯ ਪਚ੍ਚਯੋ ਹੋਤਿਯੇਵ, ਤਸ੍ਮਾ ‘‘ਨਿਸ੍ਸਿਤਾਨ’’ਨ੍ਤਿ ਵੁਤ੍ਤਂ. ਨਿਕਾਮਲਾਭੀਤਿ ਯਥਿਚ੍ਛਿਤਲਾਭੀ. ਯਥਾਪਰਿਚ੍ਛੇਦੇਨਾਤਿ ਯਥਾਕਤੇਨ ਕਾਲਪਰਿਚ੍ਛੇਦੇਨ. ਵਿਪੁਲਲਾਭੀਤਿ ਅਪ੍ਪਮਾਣਲਾਭੀ. ‘‘ਕਸਿਰ’’ਨ੍ਤਿ ਹਿ ਪਰਿਤ੍ਤਂ ਵੁਚ੍ਚਤਿ, ਤਪ੍ਪਟਿਪਕ੍ਖੇਨ ਅਕਸਿਰਂ ਅਪ੍ਪਮਾਣਂ. ਤੇਨਾਹ ‘‘ਪਗੁਣਜ੍ਝਾਨੋਤਿ ਅਤ੍ਥੋ’’ਤਿ. ਸਿਥਿਲਮਾਰਬ੍ਭਾਤਿ ਸਿਥਿਲਂ ਵੀਰਿਯਾਰਮ੍ਭਂ ਕਤ੍ਵਾਤਿ ਅਤ੍ਥੋਤਿ ਆਹ ‘‘ਸਿਥਿਲਂ ਵੀਰਿਯਂ ਪਵਤ੍ਤੇਤ੍ਵਾ’’ਤਿ.

ਨਵਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੫. ਸੁਜਾਤਸੁਤ੍ਤਵਣ੍ਣਨਾ

੨੩੯. ਅਞ੍ਞਾਨਿ ਰੂਪਾਨੀਤਿ ਪਰੇਸਂ ਰੂਪਾਨਿ. ਅਤਿਕ੍ਕਨ੍ਤਰੂਪੋਤਿ ਅਤ੍ਤਨੋ ਰੂਪਸਮ੍ਪਤ੍ਤਿਯਾ ਰੂਪਸੋਭਾਯ ਅਤਿਕ੍ਕਮਿਤ੍ਵਾ ਠਿਤਰੂਪੋ, ਸੁਚਿਰਮ੍ਪਿ ਵੇਲਂ ਓਲੋਕੇਨ੍ਤਸ੍ਸ ਤੁਟ੍ਠਿਆਵਹੋ. ਦਸ੍ਸਨਸ੍ਸ ਚਕ੍ਖੁਸ੍ਸ ਹਿਤੋਤਿ ਦਸ੍ਸਨੀਯੋ. ਪਸਾਦਂ ਆਵਹਤੀਤਿ ਪਾਸਾਦਿਕੋ. ਛਵਿਵਣ੍ਣਸੁਨ੍ਦਰਤਾਯਾਤਿ ਛਵਿਵਣ੍ਣਸ੍ਸ ਚੇਵ ਸਰੀਰਸਣ੍ਠਾਨਸ੍ਸ ਚ ਸੋਭਨਭਾਵੇਨ.

ਸੁਜਾਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੬. ਲਕੁਣ੍ਡਕਭਦ੍ਦਿਯਸੁਤ੍ਤਵਣ੍ਣਨਾ

੨੪੦. ਵਿਰੂਪਸਰੀਰਵਣ੍ਣਨ੍ਤਿ ਅਸੁਨ੍ਦਰਛਵਿਵਣ੍ਣਞ੍ਚੇਵ ਅਸੁਨ੍ਦਰਸਣ੍ਠਾਨਞ੍ਚ. ਪਮਾਣਵਸੇਨਾਤਿ ਸਰੀਰਪ੍ਪਮਾਣਵਸੇਨ. ਇਚ੍ਛਿਤਿਚ੍ਛਿਤਨ੍ਤਿ ਅਤ੍ਤਨਾ ਇਚ੍ਛਿਤਿਚ੍ਛਿਤਂ. ਮਹਾਸਾਰਜ੍ਜਨ੍ਤਿ ਮਹਨ੍ਤੋ ਮਙ੍ਕੁਭਾਵੋ.

ਗੁਣੇ ਆਵਜ੍ਜੇਤ੍ਵਾਤਿ ਅਤ੍ਤਨਾ ਜਾਨਨਕਨਿਯਾਮੇਨ ਸਤ੍ਥੁਨੋ ਕਾਯਗੁਣੇ ਚ ਚਾਰਿਤ੍ਤਗੁਣੇ ਚ ਆਵਜ੍ਜੇਤ੍ਵਾ ਮਨਸਿ ਕਤ੍ਵਾ.

ਯੋਜਨਾਵਟ੍ਟਨ੍ਤਿ ਯੋਜਨਪਰਿਕ੍ਖੇਪਂ.

‘‘ਕਾਯਸ੍ਮੀ’’ਤਿ ਗਾਥਾਸੁਖਤ੍ਥਂ ਨਿਰਨੁਨਾਸਿਕਂ ਕਤ੍ਵਾ ਨਿਦ੍ਦੇਸੋਤਿ ਵੁਤ੍ਤਂ ‘‘ਕਾਯਸ੍ਮਿ’’ਨ੍ਤਿ. ਅਕਾਰਣਂ ਕਾਯਪ੍ਪਮਾਣਨ੍ਤਿ ਸਰੀਰਪ੍ਪਮਾਣਂ ਨਾਮ ਅਪ੍ਪਮਾਣਂ, ਸੀਲਾਦਿਗੁਣਾਵ ਪਮਾਣਨ੍ਤਿ ਅਧਿਪ੍ਪਾਯੋ.

ਲਕੁਣ੍ਡਕਭਦ੍ਦਿਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੭. ਵਿਸਾਖਸੁਤ੍ਤਵਣ੍ਣਨਾ

੨੪੧. ਪੁਰਸ੍ਸ ਏਸਾਤਿ ਪੋਰੀ, ਚਾਤੁਰਿਯਯੁਤ੍ਤਤਾ. ਤੇਨਾਹ ‘‘ਪੁਰਵਾਸੀਨ’’ਨ੍ਤਿਆਦਿ. ਸਾ ਪਨ ਦੁਤਵਿਲਮ੍ਬਿਤਖਲਿਤਵਸੇਨ ਅਪ੍ਪਸਨ੍ਨਲੂਖਤਾਦਿਦੋਸਰਹਿਤਾ ਹੋਤੀਤਿ ਆਹ ‘‘ਪੁਰ…ਪੇ… ਵਾਚਾਯਾ’’ਤਿ. ਅਸਨ੍ਦਿਦ੍ਧਾਯਾਤਿ ਮੁਤ੍ਤਵਾਚਾਯ. ਤੇਨਾਹ ‘‘ਅਪਲਿਬੁਦ੍ਧਾਯਾ’’ਤਿਆਦਿ. ਨ ਏਲਂ ਦੋਸਂ ਗਲੇਤੀਤਿ ਅਨੇਲਗਲਾ, ਅਵਿਰੁਜ੍ਝਨਵਾਚਾ. ਤੇਨਾਹ ‘‘ਨਿਦ੍ਦੋਸਾਯਾ’’ਤਿ. ਚਤੁਸਚ੍ਚਸ੍ਸ ਪਕਾਸਕਾ, ਨ ਕਦਾਚਿ ਸਚ੍ਚਵਿਮੁਤ੍ਤਾਤਿ ਆਹ ‘‘ਚਤੁਸਚ੍ਚਪਰਿਯਾਪਨ੍ਨਾਯਾ’’ਤਿ. ਤਾ ਹਿ ਚਤ੍ਤਾਰਿ ਸਚ੍ਚਾਨਿ ਪਰਿਚ੍ਛਿਜ੍ਜ ਆਪਾਦੇਨ੍ਤਿ ਪਟਿਪਾਦੇਨ੍ਤਿ ਪਵਤ੍ਤੇਨ੍ਤਿ. ਤੇਨਾਹ ‘‘ਚਤ੍ਤਾਰਿ ਸਚ੍ਚਾਨਿ ਅਮੁਞ੍ਚਿਤ੍ਵਾ ਪਵਤ੍ਤਾਯਾ’’ਤਿ. ਧਜੋ ਨਾਮ ਸਬ੍ਬਧਮ੍ਮੇਹਿ ਸਮੁਸ੍ਸਿਤਟ੍ਠੇਨ.

ਵਿਸਾਖਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੮. ਨਨ੍ਦਸੁਤ੍ਤਵਣ੍ਣ੍ਣਨਾ

੨੪੨. ਆਰਞ੍ਞਿਕੋਤਿਆਦੀਸੁ ਅਰਞ੍ਞਕਥਾਸੀਸੇਨ ਸੇਨਾਸਨਪਟਿਸਂਯੁਤ੍ਤਾਨਂ ਧੁਤਙ੍ਗਾਨਂ, ਪਿਣ੍ਡਪਾਤਕਥਾਸੀਸੇਨ ਪਿਣ੍ਡਪਾਤਪਟਿਸਂਯੁਤ੍ਤਾਨਂ, ਪਂਸੁਕੂਲਿਕਸੀਸੇਨ ਚੀਵਰਪਟਿਸਂਯੁਤ੍ਤਾਨਂ, ਤਗ੍ਗਹਣੇਨੇਵ ਵੀਰਿਯਨਿਸ੍ਸਿਤਧੁਤਙ੍ਗਸ੍ਸ ਚ ਸਮਾਦਾਯ ਵਤ੍ਤਨਂ ਦੀਪਿਤਨ੍ਤਿ ਵੇਦਿਤਬ੍ਬਂ. ਆਗਤੇਨ ਭਗਵਤਾ ਅਪਰਭਾਗੇ ਕਥਿਤਂ.

ਨਨ੍ਦਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੯. ਤਿਸ੍ਸਸੁਤ੍ਤਵਣ੍ਣਨਾ

੨੪੩. ਭਣ੍ਡਕਨ੍ਤਿ ਪਤ੍ਤਚੀਵਰਂ. ਨਿਸੀਦਿਯੇਵ ਵਤ੍ਤਸ੍ਸ ਅਸਿਕ੍ਖਿਤਤ੍ਤਾ. ਤੁਜ੍ਜਨਤ੍ਥੇਨ ਵਾਚਾ ਏਵ ਸਤ੍ਤਿਯੋਤਿ ਆਹ ‘‘ਵਾਚਾਸਤ੍ਤੀਹੀ’’ਤਿ.

ਵਾਚਾਯ ਸਨ੍ਨਿਤੋਦਕੇਨਾਤਿ ਵਚਨਸਙ੍ਖਾਤੇਨ ਸਮਨ੍ਤਤੋ ਨਿਚ੍ਚਂ ਕਤ੍ਵਾ ਉਪਤੁਦਨਤੋ ਸਨ੍ਨਿਤੁਦਕੇਨ. ਵਿਭਤ੍ਤਿਅਲੋਪੇਨ ਸੋ ਨਿਦ੍ਦੇਸੋ. ਤੇਨਾਹ ‘‘ਵਚਨਪਤੋਦੇਨਾ’’ਤਿ.

ਉਚ੍ਚਕੁਲੇ ਜਾਤਿ ਏਤਸ੍ਸਾਤਿ ਜਾਤਿਮਾ, ਬ੍ਰਹ੍ਮਜਾਤਿਕੋ ਇਸਿ. ਮਾਤਙ੍ਗੋਤਿ ਚਣ੍ਡਾਲੋ. ਤਤ੍ਥਾਤਿ ਕੁਮ੍ਭਕਾਰਸਾਲਾਯਂ. ਓਕਾਸਂ ਯਾਚਿ ਕੁਮ੍ਭਕਾਰਂ. ਮਹਨ੍ਤਂ ਦਿਸ੍ਵਾ ਆਹ – ‘‘ਪਠਮਤਰਂ ਪਵਿਟ੍ਠੋ ਪਬ੍ਬਜਿਤੋ’’ਤਿ. ਤਤ੍ਥੇਵਾਤਿ ਤਸ੍ਸਾਯੇਵ ਸਾਲਾਯ ਦ੍ਵਾਰਂ ਨਿਸ੍ਸਾਯ ਦ੍ਵਾਰਸਮੀਪੇ. ਮੇਤਿ ਮਯਾ. ਖਮ ਮਯ੍ਹਨ੍ਤਿ ਮਯ੍ਹਂ ਅਪਰਾਧਂ ਖਮਸ੍ਸੁ. ਤੇਤਿ ਤਯਾ. ਪੁਨ ਤੇਤਿ ਤਵ. ਗਣ੍ਹਿ ਉਗ੍ਗਨ੍ਤੁਂ ਅਪ੍ਪਦਾਨਵਸੇਨ. ਤੇਨਾਹ ‘‘ਨਾਸ੍ਸ ਉਗ੍ਗਨ੍ਤੁਂ ਅਦਾਸੀ’’ਤਿ. ਪਬੁਜ੍ਝਿਂਸੂਤਿ ਨਿਦ੍ਦਾਯ ਪਬੁਜ੍ਝਿਂਸੁ ਪਕਤਿਯਾ ਪਬੁਜ੍ਝਨਵੇਲਾਯ ਉਪਗਤਤ੍ਤਾ.

ਛਵੋਤਿ ਨਿਹੀਨੋ. ਅਨਨ੍ਤਮਾਯੋਤਿ ਵਿਵਿਧਮਾਯੋ ਮਾਯਾਵੀ.

ਸੋਤਿ ਮਤ੍ਤਿਕਾਪਿਣ੍ਡੋ. ‘‘ਸਤ੍ਤਧਾ ਭਿਜ੍ਜੀ’’ਤਿ ਏਤ੍ਥਾਯਮਧਿਪ੍ਪਾਯੋ – ਯਂ ਤੇਨ ਤਾਪਸੇਨ ਪਾਰਮਿਤਾਪਰਿਭਾਵਨਸਮਿਦ੍ਧਾਹਿ ਨਾਨਾਵਿਹਾਰਸਮਾਪਤ੍ਤਿਪਰਿਪੂਰਿਤਾਹਿ ਸੀਲਦਿਟ੍ਠਿਸਮ੍ਪਦਾਦੀਹਿ ਸੁਸਙ੍ਖਤਸਨ੍ਤਾਨੇ ਮਹਾਕਰੁਣਾਧਿਵਾਸੇ ਮਹਾਸਤ੍ਤੇ ਬੋਧਿਸਤ੍ਤੇ ਅਰਿਯੂਪਵਾਦਕਮ੍ਮਂ ਅਭਿਸਪਸਙ੍ਖਾਤਂ ਫਰੁਸਵਚਨਂ ਪਵਤ੍ਤਿਤਂ, ਤਂ ਮਹਾਸਤ੍ਤਸ੍ਸ ਖੇਤ੍ਤਵਿਸੇਸਭਾਵਤੋ ਤਸ੍ਸ ਚ ਅਜ੍ਝਾਸਯਫਰੁਸਤਾਯ ਦਿਟ੍ਠਧਮ੍ਮਵੇਦਨੀਯਂ ਹੁਤ੍ਵਾ ਸਚੇ ਸੋ ਮਹਾਸਤ੍ਤਂ ਨ ਖਮਾਪੇਤਿ, ਤਂ ਕਕ੍ਖਲ਼ਂ ਹੁਤ੍ਵਾ ਵਿਪਚ੍ਚਨਸਭਾਵਂ ਜਾਤਂ, ਖਮਾਪਿਤੇ ਪਨ ਮਹਾਸਤ੍ਤੇ ਪਯੋਗਸਮ੍ਪਤ੍ਤਿਪਟਿਬਾਹਿਤਤ੍ਤਾ ਅਵਿਪਾਕਧਮ੍ਮਤਂ ਆਪਜ੍ਜਤਿ ਅਹੋਸਿਕਮ੍ਮਭਾਵਤੋ. ਅਯਞ੍ਹਿ ਅਰਿਯੂਪਵਾਦਪਾਪਸ੍ਸ ਦਿਟ੍ਠਧਮ੍ਮਵੇਦਨੀਯਸ੍ਸ ਚ ਧਮ੍ਮਤਾ. ਯਂ ਤਂ ਬੋਧਿਸਤ੍ਤੇਨ ਸੂਰਿਯੁਗ੍ਗਮਨਨਿਵਾਰਣਂ ਕਤਂ, ਅਯਂ ਬੋਧਿਸਤ੍ਤੇਨ ਦਿਟ੍ਠੋ ਉਪਾਯੋ. ਤੇਨ ਹਿ ਉਬ੍ਬਾਲ਼੍ਹਾ ਮਨੁਸ੍ਸਾ ਬੋਧਿਸਤ੍ਤਸ੍ਸ ਸਨ੍ਤਿਕੇ ਤਾਪਸਂ ਆਨੇਤ੍ਵਾ ਖਮਾਪੇਸੁਂ. ਸੋਪਿ ਚ ਮਹਾਸਤ੍ਤਸ੍ਸ ਗੁਣੇ ਜਾਨਿਤ੍ਵਾ ਤਸ੍ਮਿਂ ਚਿਤ੍ਤਂ ਪਸਾਦੇਸਿ. ਯਂ ਪਨਸ੍ਸ ਮਤ੍ਥਕੇ ਮਤ੍ਤਿਕਾਪਿਣ੍ਡਸ੍ਸ ਠਪਨਂ ਤਸ੍ਸ ਸਤ੍ਤਧਾ ਫਾਲਨਂ ਕਤਂ, ਤਂ ਮਨੁਸ੍ਸਾਨਂ ਚਿਤ੍ਤਾਨੁਰਕ੍ਖਣਤ੍ਥਂ. ਅਞ੍ਞਥਾ ਹਿ ਇਮੇ ਪਬ੍ਬਜਿਤਾ ਸਮਾਨਾ ਚਿਤ੍ਤਸ੍ਸ ਵਸਂ ਵਤ੍ਤਨ੍ਤਿ, ਨ ਪਨ ਚਿਤ੍ਤਮਤ੍ਤਨੋ ਵਸੇ ਵਤ੍ਤਾਪੇਨ੍ਤੀਤਿ ਮਹਾਸਤ੍ਤਮ੍ਪਿ ਤੇਨ ਸਦਿਸਂ ਕਤ੍ਵਾ ਗਣ੍ਹੇਯ੍ਯੁਂ, ਤਦਸ੍ਸ ਨੇਸਂ ਦੀਘਰਤ੍ਤਂ ਅਹਿਤਾਯ ਦੁਕ੍ਖਾਯਾਤਿ. ਪਤਿਰੂਪਨ੍ਤਿ ਯੁਤ੍ਤਂ.

ਤਿਸ੍ਸਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੦. ਥੇਰਨਾਮਕਸੁਤ੍ਤਵਣ੍ਣਨਾ

੨੪੪. ਅਤੀਤੇ ਖਨ੍ਧਪਞ੍ਚਕੇਤਿ ਅਤੀਤੇ ਅਤ੍ਤਭਾਵੇ. ਛਨ੍ਦਰਾਗਪ੍ਪਹਾਨੇਨਾਤਿ ਛਨ੍ਦਰਾਗਸ੍ਸ ਅਚ੍ਚਨ੍ਤਮੇਵ ਜਹਨੇਨ. ਪਹੀਨਂ ਨਾਮ ਹੋਤਿ ਅਨਪੇਕ੍ਖਪਰਿਚ੍ਚਾਗਤੋ. ਪਟਿਨਿਸ੍ਸਟ੍ਠਂ ਨਾਮ ਹੋਤਿ ਸਬ੍ਬਸੋ ਛਡ੍ਡਿਤਤ੍ਤਾ. ਤਯੋ ਭਵੇਤਿ ਇਮਿਨਾ ਉਪਾਦਿਣ੍ਣਕਧਮ੍ਮਾਨਂਯੇਵ ਗਹਣਂ. ਸਬ੍ਬਾ ਖਨ੍ਧਾਯਤਨਧਾਤੁਯੋ ਚਾਤਿ ਇਮਿਨਾ ਉਪਾਦਿਣ੍ਣਾਨਮ੍ਪਿ ਅਨੁਪਾਦਿਣ੍ਣਾਨਮ੍ਪਿ ਦ੍ਵਿਧਾ ਪਵਤ੍ਤਲੋਕਿਯਧਮ੍ਮਾਨਂ ਗਹਣਂ ਅਵਿਸੇਸੇਤ੍ਵਾ ਵੁਤ੍ਤਤ੍ਤਾ. ਵਿਦਿਤਂ ਪਾਕਟਂ ਕਤ੍ਵਾ ਠਿਤਂ ਪਰਿਞ੍ਞਾਭਿਸਮਯਵਸੇਨ. ਤੇਸ੍ਵੇਵਾਤਿ ਤੇਭੂਮਕਧਮ੍ਮੇਸੁ ਏਵ. ਅਨੁਪਲਿਤ੍ਤਂ ਅਮਥਿਤਂ ਅਸਂਕਿਲਿਟ੍ਠਂ ਤਣ੍ਹਾਦਿਟ੍ਠਿਸਂਕਿਲੇਸਾਭਾਵਤੋ. ਤਦੇਵ ਸਬ੍ਬਨ੍ਤਿ ਹੇਟ੍ਠਾ ਤੀਸੁਪਿ ਪਦੇਸੁ ਇਧ ਸਬ੍ਬਗ੍ਗਹਣੇਨ ਗਹਿਤਂ ਤੇਭੂਮਕਵਟ੍ਟਂ. ਜਹਿਤ੍ਵਾਤਿ ਪਹਾਨਾਭਿਸਮਯਵਸੇਨ. ਤਣ੍ਹਾ ਖੀਯਤਿ ਏਤ੍ਥਾਤਿ ਤਣ੍ਹਕ੍ਖਯਸਙ੍ਖਾਤੇ ਨਿਬ੍ਬਾਨੇ ਵਿਮੁਤ੍ਤਂ. ਤਮਹਨ੍ਤਿ ਤਂ ਉਤ੍ਤਮਪੁਗ੍ਗਲਂ ਏਕਵਿਹਾਰਿਂ ਬ੍ਰੂਮਿ ਤਣ੍ਹਾਦੁਤਿਯਸ੍ਸ ਅਭਾਵਤੋ. ਏਤ੍ਥ ਚ ਪਰਿਞ੍ਞਾਪਹਾਨਾਭਿਸਮਯਕਥਨੇਨ ਇਤਰਮ੍ਪਿ ਅਭਿਸਮਯਂ ਅਤ੍ਥਤੋ ਕਥਿਤਮੇਵਾਤਿ ਦਟ੍ਠਬ੍ਬਂ.

ਥੇਰਨਾਮਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੧. ਮਹਾਕਪ੍ਪਿਨਸੁਤ੍ਤਵਣ੍ਣਨਾ

੨੪੫. ਮਹਾਕਪ੍ਪਿਨੋਤਿ ਪੂਜਾਵਚਨਮੇਤਂ ਯਥਾ ‘‘ਮਹਾਮੋਗ੍ਗਲ੍ਲਾਨੋ’’ਤਿ. ਤਥਾਰੂਪਨ੍ਤਿ ‘‘ਬੁਦ੍ਧੋ ਧਮ੍ਮੋ’’ਤਿਆਦਿਕਂ ਗੁਣਵਿਸੇਸਵਨ੍ਤਪਟਿਬਦ੍ਧਂ. ਸਾਸਨਨ੍ਤਿ ਦੇਸਨ੍ਤਰਤੋ ਆਗਤਵਚਨਂ. ਜਙ੍ਘਵਾਣਿਜਾਤਿ ਜਙ੍ਘਚਾਰਿਨੋ ਵਾਣਿਜਾ. ਕਿਞ੍ਚਿ ਸਾਸਨਨ੍ਤਿ ਅਪੁਬ੍ਬਪਵਤ੍ਤਿਦੀਪਕਂ ਕਿਞ੍ਚਿ ਵਚਨਨ੍ਤਿ ਪੁਚ੍ਛਿ. ਪੀਤਿ ਉਪ੍ਪਜ੍ਜਿ ਯਥਾ ਤਂ ਸੁਚਿਰਂ ਕਤਾਭਿਨੀਹਾਰਤਾਯ ਪਰਿਪਕ੍ਕਞਾਣਸ੍ਸ. ਅਪਰਿਮਾਣਂ ਗੁਣਸ੍ਸ ਅਪਰਿਮਾਣਤੋ ਸਬ੍ਬਞ੍ਞੁਗੁਣਪਰਿਦੀਪਨਤੋ, ਸੇਸਰਤਨਦ੍ਵਯੇ ਨਿਯ੍ਯਾਨਿਕਭਾਵਦੀਪਨਤੋ ਦਿਟ੍ਠਿਸੀਲਸਾਮਞ੍ਞੇਨ ਸਂਹਤਭਾਵਦੀਪਨਤੋਤਿ ਵਤ੍ਤਬ੍ਬਂ. ਯਥਾਨੁਸਿਟ੍ਠਂ ਪਟਿਪਜ੍ਜਮਾਨੇ ਅਪਾਯਦੁਕ੍ਖਤੋ ਸਂਸਾਰਦੁਕ੍ਖਤੋ ਚ ਅਪਤਨ੍ਤੇ ਧਾਰੇਤੀਤਿ ਧਮ੍ਮੋ. ਸੁਪਰਿਸੁਦ੍ਧਦਿਟ੍ਠਿਸੀਲਸਾਮਞ੍ਞੇਨ ਸਂਹਤੋਤਿ ਸਙ੍ਘੋਤਿ. ਰਤਨਤ੍ਥੋ ਪਨ ਤਿਣ੍ਣਮ੍ਪਿ ਸਦਿਸੋ ਏਵਾਤਿ.

ਨਵਸਤਸਹਸ੍ਸਾਨਿ ਅਦਾਸਿ ਦੇਵੀ. ਤੁਮ੍ਹੇਤਿ ਰਾਜਿਨਿਂ ਗਾਰਵੇਨ ਬਹੁਵਚਨੇਨ ਵਦਤਿ. ਰਾਗੋਤਿ ਅਨੁਗਚ੍ਛਨ੍ਤਰਾਗੋ.

ਜਨਿਤੇਤਿ ਕਮ੍ਮਕਿਲੇਸੇਹਿ ਨਿਬ੍ਬਤ੍ਤਿਤੇ. ਕਮ੍ਮਕਿਲੇਸੇਹਿ ਪਜਾਤਤ੍ਤਾ ਪਜਾਤਿ ਪਜਾਸਦ੍ਦੋ ਜਨਿਤਸਦ੍ਦੇਨ ਸਮਾਨਤ੍ਥੋਤਿ ਆਹ – ‘‘ਜਨਿਤੇ, ਪਜਾਯਾਤਿ ਅਤ੍ਥੋ’’ਤਿ. ਅਟ੍ਠਹਿ ਵਿਜ੍ਜਾਹੀਤਿ ਅਮ੍ਬਟ੍ਠਸੁਤ੍ਤੇ (ਦੀ. ਨਿ. ੧.੨੭੮) ਆਗਤਨਯੇਨ. ਤਤ੍ਥ ਹਿ ਵਿਪਸ੍ਸਨਾਞਾਣਮਨੋਮਯਿਦ੍ਧੀਹਿ ਸਹ ਛ ਅਭਿਞ੍ਞਾ ‘‘ਅਟ੍ਠ ਵਿਜ੍ਜਾ’’ਤਿ ਆਗਤਾ. ਤਪਤਿ ਪਟਿਪਕ੍ਖਵਿਧਮਨੇਨ ਵਿਜ੍ਜੋਤਤਿ, ਤਂ ਸੂਰਿਯਸ੍ਸ ਵਿਰੋਚਨਨ੍ਤਿ ਆਹ – ‘‘ਤਪਤੀਤਿ ਵਿਰੋਚਤੀ’’ਤਿ. ਝਾਨਂ ਸਮਾਪਜ੍ਜਿਤ੍ਵਾ ਸਮਾਹਿਤੇਨ ਚਿਤ੍ਤੇਨ ਵਿਪਸ੍ਸਨਂ ਵਡ੍ਢੇਤ੍ਵਾ ਫਲਸਮਾਪਤ੍ਤਿਂ ਸਮਾਪਜ੍ਜਿਤ੍ਵਾ ਨਿਸਿਨ੍ਨੋਤਿ ਆਹ – ‘‘ਦੁਵਿਧੇਨ ਝਾਨੇਨ ਝਾਯਮਾਨੋ’’ਤਿ. ਸਬ੍ਬਮਙ੍ਗਲਗਾਥਾਤਿ ਸਬ੍ਬਮਙ੍ਗਲਾਵਿਰੋਧੀ ਗਾਥਾਤਿ ਵਦਨ੍ਤਿ. ਤਥਾ ਹਿ ਵਦਨ੍ਤਿ –

‘‘ਮਙ੍ਗਲਂ ਭਗਵਾ ਬੁਦ੍ਧੋ, ਧਮ੍ਮੋ ਸਙ੍ਘੋ ਚ ਮਙ੍ਗਲਂ;

ਸਬ੍ਬੇਸਮ੍ਪਿ ਚ ਸਤ੍ਤਾਨਂ, ਸ ਪੁਞ੍ਞਵਿਤਮਙ੍ਗਲ’’ਨ੍ਤਿ.

ਪੂਜਂ ਕਾਰੇਤ੍ਵਾ ਏਕਂ ਅਗਾਰਿਕਧਮ੍ਮਕਥਿਕਂ ਉਪਾਸਕਂ ਆਹ. ਏਤ੍ਥ ਚ ‘‘ਝਾਯੀ ਤਪਤੀ’’ਤਿ ਇਮਿਨਾ ਆਰਮ੍ਮਣੂਪਨਿਜ੍ਝਾਨਾਨਂ ਗਹਿਤਤ੍ਤਾ ਧਮ੍ਮਰਤਨਂ ਗਹਿਤਮੇਵ. ‘‘ਬ੍ਰਾਹ੍ਮਣੋ’’ਤਿ ਇਮਿਨਾ ਸਙ੍ਘਰਤਨਂ ਗਹਿਤਮੇਵ. ਬੁਦ੍ਧਰਤਨਂ ਪਨ ਸਰੂਪੇਨੇਵ ਗਹਿਤਨ੍ਤਿ.

ਮਹਾਕਪ੍ਪਿਨਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੨. ਸਹਾਯਕਸੁਤ੍ਤਵਣ੍ਣਨਾ

੨੪੬. ਸਮ੍ਮਾ ਸਂਸਨ੍ਦਨਵਸੇਨ ਏਤਿ ਪਵਤ੍ਤਤੀਤਿ ਸਮੇਤਿ, ਸਮ੍ਮਾਦਿਟ੍ਠਿਆਦਿ. ਸਮ੍ਮਾ ਚਿਰਰਤ੍ਤਂ ਚਿਰਕਾਲਂ ਸਮੇਤਿ ਏਤੇਸਂ ਅਤ੍ਥੀਤਿ ਚਿਰਰਤ੍ਤਂਸਮੇਤਿਕਾ. ਤੇਨਾਹ ‘‘ਦੀਘਰਤ੍ਤ’’ਨ੍ਤਿਆਦਿ. ਇਦਾਨਿ ਇਮੇਸਨ੍ਤਿ ਏਤਰਹਿ ਏਤੇਸਂ. ਅਯਂ ਸਾਸਨਧਮ੍ਮੋ ਅਜ੍ਝਾਸਯਤੋ ਪਯੋਗਤੋ ਚ ਸਮ੍ਮਾ ਸਂਸਨ੍ਦਤਿ ਸਮੇਤਿ, ਤਸ੍ਮਾ ਮਜ੍ਝੇ ਭਿਨ੍ਨਂ ਵਿਯ ਸਮਮੇਵ ਨ ਵਿਸਦਿਸਂ. ਕਿਞ੍ਚ ਤਤੋ ਏਵ ਬੁਦ੍ਧੇਨ ਭਗਵਤਾ ਪਵੇਦਿਤਧਮ੍ਮਵਿਨਯੇ ਏਤੇਸਂ ਪਟਿਪਤ੍ਤਿਸਾਸਨਧਮ੍ਮੋ ਸੋਭਤਿ ਵਿਰੋਚਤੀਤਿ ਅਤ੍ਥੋ. ਅਰਿਯਪ੍ਪਵੇਦਿਤੇਤਿ ਅਰਿਯੇਨ ਸਮ੍ਮਾਸਮ੍ਬੁਦ੍ਧੇਨ ਸਮ੍ਮਦੇਵ ਪਕਾਸਿਤੇ ਅਰਿਯਧਮ੍ਮੇ. ਸਮ੍ਮਦੇਵ ਸਮੁਚ੍ਛੇਦਪਟਿਪ੍ਪਸ੍ਸਦ੍ਧਿਵਿਨਯਾਨਂ ਵਸੇਨ ਸੁਟ੍ਠੁ ਵਿਨੀਤਾ ਸਬ੍ਬਕਿਲੇਸਦਰਥਪਰਿਲ਼ਾਹਾਨਂ ਵੂਪਸਮੇਨ.

ਸਹਾਯਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਸਾਰਤ੍ਥਪ੍ਪਕਾਸਿਨਿਯਾ ਸਂਯੁਤ੍ਤਨਿਕਾਯ-ਅਟ੍ਠਕਥਾਯ

ਭਿਕ੍ਖੁਸਂਯੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.

ਨਿਟ੍ਠਿਤਾ ਚ ਸਾਰਤ੍ਥਪ੍ਪਕਾਸਿਨਿਯਾ

ਸਂਯੁਤ੍ਤਨਿਕਾਯ-ਅਟ੍ਠਕਥਾਯ ਨਿਦਾਨਵਗ੍ਗਵਣ੍ਣਨਾ.