੬. ਓਵਾਦਸੁਤ੍ਤਵਣ੍ਣਨਾ

੧੪੯. ਅਤ੍ਤਨੋ ਠਾਨੇਤਿ ਸਬ੍ਰਹ੍ਮਚਾਰੀਨਂ ਓਵਾਦਕਵਿਞ੍ਞਾਪਕਭਾਵੇਨ ਅਤ੍ਤਨੋ ਮਹਾਸਾਵਕਟ੍ਠਾਨੇ ਠਪਨਤ੍ਥਂ. ਅਥ ਵਾ ਯਸ੍ਮਾ ‘‘ਅਹਂ ਦਾਨਿ ਨ ਚਿਰਂ ਠਸ੍ਸਾਮਿ, ਤਥਾ ਸਾਰਿਪੁਤ੍ਤਮੋਗ੍ਗਲ੍ਲਾਨਾ, ਅਯਂ ਪਨ ਵੀਸਂਵਸ੍ਸਤਾਯੁਕੋ, ਓਵਦਨ੍ਤੋ ਅਨੁਸਾਸਨ੍ਤੋ ਮਮਚ੍ਚਯੇਨ ਭਿਕ੍ਖੂਨਂ ਮਯਾ ਕਾਤਬ੍ਬਕਿਚ੍ਚਂ ਕਰਿਸ੍ਸਤੀ’’ਤਿ ਅਧਿਪ੍ਪਾਯੇਨ ਭਗਵਾ ਇਮਂ ਦੇਸਨਂ ਆਰਭਿ. ਤਸ੍ਮਾ ਅਤ੍ਤਨੋ ਠਾਨੇਤਿ ਸਤ੍ਥਾਰਾ ਕਾਤਬ੍ਬਓਵਾਦਦਾਯਕਟ੍ਠਾਨੇ. ਤੇਨਾਹ ‘‘ਏਵਂ ਪਨਸ੍ਸਾ’’ਤਿਆਦਿ. ਯਥਾਹ ਭਗਵਾ ‘‘ਓਵਦ, ਕਸ੍ਸਪ…ਪੇ… ਤ੍ਵਂ ਵਾ’’ਤਿ. ਦੁਕ੍ਖੇਨ ਵਤ੍ਤਬ੍ਬਾ ਅਪ੍ਪਦਕ੍ਖਿਣਗ੍ਗਾਹਿਭਾਵਤੋ. ਦੁਬ੍ਬਚਭਾਵਕਰਣੇਹੀਤਿ ਕੋਧੂਪਨਾਹਾਦੀਹਿ. ਅਨੁਸਾਸਨਿਯਾ ਪਦਕ੍ਖਿਣਗ੍ਗਹਣਂ ਨਾਮ ਅਨੁਧਮ੍ਮਚਰਣਂ, ਛਿਨ੍ਨਪਟਿਪਤ੍ਤਿ ਕਤਾ ਵਾਮਗ੍ਗਾਹੋ ਨਾਮਾਤਿ ਆਹ ‘‘ਅਨੁਸਾਸਨਿ’’ਨ੍ਤਿਆਦਿ. ਅਤਿਕ੍ਕਮ੍ਮ ਵਦਨ੍ਤੇਤਿ ਅਞ੍ਞਮਞ੍ਞਂ ਅਤਿਕ੍ਕਮਿਤ੍ਵਾ ਅਤਿਮਞ੍ਞਿਤ੍ਵਾ ਵਦਨ੍ਤੇ. ਬਹੁਂ ਭਾਸਿਸ੍ਸਤੀਤਿ ਧਮ੍ਮਂ ਕਥੇਨ੍ਤੋ ਕੋ ਵਿਪੁਲਂ ਕਤ੍ਵਾ ਕਥੇਸ੍ਸਤਿ. ਅਸਹਿਤਨ੍ਤਿ ਪੁਬ੍ਬੇਨਾਪਰਂ ਨਸਹਿਤਂ ਹੇਤੁਪਮਾਵਿਰਹਿਤਂ. ਅਮਧੁਰਨ੍ਤਿ ਨ ਮਧੁਰਂ ਨ ਕਣ੍ਣਸੁਖਂ ਨ ਪੇਮਨੀਯਂ. ਲਹੁਞ੍ਞੇਵ ਉਟ੍ਠਾਤਿ ਅਪ੍ਪਵਤ੍ਤਨੇਨ ਕੂਲਟ੍ਠਾਨਂ ਵਿਯ ਤਸ੍ਸ ਕਥਨਂ.

ਓਵਾਦਸੁਤ੍ਤਵਣ੍ਣਨਾ ਨਿਟ੍ਠਿਤਾ.