੫. ਕਸ੍ਸਪਸਂਯੁਤ੍ਤਂ
੧. ਸਨ੍ਤੁਟ੍ਠਸੁਤ੍ਤਵਣ੍ਣਨਾ
੧੪੪. ਸਨ੍ਤੁਟ੍ਠੋਤਿ ਸਕੇਨ ਉਚ੍ਚਾਵਚੇਨ ਪਚ੍ਚਯੇਨ ਸਮਮੇਵ ਚ ਤੁਸ੍ਸਨਕੋ. ਤੇਨਾਹ ‘‘ਇਤਰੀਤਰੇਨਾ’’ਤਿਆਦਿ. ਤਤ੍ਥ ਦੁਵਿਧਂ ਇਤਰੀਤਰਂ – ਪਾਕਤਿਕਂ, ਞਾਣਸਞ੍ਜਨਿਤਞ੍ਚਾਤਿ. ਤਤ੍ਥ ਪਾਕਤਿਕਂ ਪਟਿਕ੍ਖਿਪਿਤ੍ਵਾ ਞਾਣਸਞ੍ਜਨਿਤਮੇਵ ਦਸ੍ਸੇਨ੍ਤੋ ‘‘ਥੂਲਸੁਖੁਮਾ’’ਤਿਆਦਿਮਾਹ. ਇਤਰਂ ਵੁਚ੍ਚਤਿ ਹੀਨਂ ਪਣੀਤਤੋ ਅਞ੍ਞਤ੍ਤਾ. ਤਥਾ ਪਣੀਤਮ੍ਪਿ ਇਤਰਂ ਹੀਨਤੋ ਅਞ੍ਞਤ੍ਤਾ. ਅਪੇਕ੍ਖਾਸਦ੍ਦਾ ਹਿ ਇਤਰੀਤਰਾਤਿ. ਇਤਿ ਯੇਨ ਕੇਨਚਿ ਹੀਨੇਨ ਵਾ ਪਣੀਤੇਨ ਵਾ ਚੀਵਰਾਦਿਪਚ੍ਚਯੇਨ ਸਨ੍ਤੁਸ੍ਸਿਤੋ ਤਥਾਪਵਤ੍ਤੋ ਅਲੋਭੋ ਇਤਰੀਤਰਪਚ੍ਚਯਸਨ੍ਤੋਸੋ, ਤਂਸਮਙ੍ਗਿਤਾਯ ਸਨ੍ਤੁਟ੍ਠੋ. ਯਥਾਲਾਭਂ ਅਤ੍ਤਨੋ ਲਾਭਾਨੁਰੂਪਂ ਸਨ੍ਤੋਸੋ ਯਥਾਲਾਭਸਨ੍ਤੋਸੋ. ਸੇਸਪਦਦ੍ਵਯੇਪਿ ਏਸੇਵ ਨਯੋ. ਲਬ੍ਭਤੀਤਿ ਵਾ ਲਾਭੋ, ਯੋ ਯੋ ਲਾਭੋ ਯਥਾਲਾਭੋ, ਤੇਨ ਸਨ੍ਤੋਸੋ ਯਥਾਲਾਭਸਨ੍ਤੋਸੋ. ਬਲਨ੍ਤਿ ਕਾਯਬਲਂ. ਸਾਰੁਪ੍ਪਨ੍ਤਿ ਭਿਕ੍ਖੁਨੋ ਅਨੁਚ੍ਛਵਿਕਤਾ.
ਯਥਾਲਦ੍ਧਤੋ ਅਞ੍ਞਸ੍ਸ ਅਪਤ੍ਥਨਾ ਨਾਮ ਸਿਯਾ ਅਪ੍ਪਿਚ੍ਛਤਾਯ ਪਵਤ੍ਤਿਆਕਾਰੋਤਿ ਤਤੋ ਵਿਨਿਵਤ੍ਤਿਤਮੇਵ ਸਨ੍ਤੋਸਸ੍ਸ ਸਰੂਪਂ ਦਸ੍ਸੇਨ੍ਤੋ ‘‘ਲਭਨ੍ਤੋਪਿ ਨ ਗਣ੍ਹਾਤੀ’’ਤਿ ਆਹ. ਤਂ ਪਰਿਵਤ੍ਤੇਤ੍ਵਾਤਿ ਪਕਤਿਦੁਬ੍ਬਲਾਦੀਨਂ ਗਰੁਚੀਵਰਂ ਨ ਫਾਸੁਭਾਵਾਵਹਂ ਸਰੀਰਬਾਧਾਵਹਞ੍ਚ ਹੋਤੀਤਿ ਪਯੋਜਨਵਸੇਨ, ਨਾਤ੍ਰਿਚ੍ਛਤਾਦਿਵਸੇਨ ਪਰਿਵਤ੍ਤੇਤ੍ਵਾ. ਲਹੁਕਚੀਵਰਪਰਿਭੋਗੇ ਸਨ੍ਤੋਸਵਿਰੋਧਿ ਨ ਹੋਤੀਤਿ ਆਹ ‘‘ਲਹੁਕੇਨ ਯਾਪੇਨ੍ਤੋਪਿ ਸਨ੍ਤੁਟ੍ਠੋਵ ਹੋਤੀ’’ਤਿ. ਮਹਗ੍ਘਚੀਵਰਂ ਬਹੂਨਿ ਵਾ ਚੀਵਰਾਨਿ ਲਭਿਤ੍ਵਾ ਤਾਨਿ ਵਿਸ੍ਸਜ੍ਜੇਤ੍ਵਾ ਅਞ੍ਞਸ੍ਸ ਗਹਣਂ ਯਥਾਸਾਰੁਪ੍ਪਨਯੇ ਠਿਤਤ੍ਤਾ ਨ ਸਨ੍ਤੋਸਵਿਰੋਧੀਤਿ ਆਹ ‘‘ਤੇਸਂ…ਪੇ… ਧਾਰੇਨ੍ਤੋਪਿ ਸਨ੍ਤੁਟ੍ਠੋਵ ਹੋਤੀ’’ਤਿ. ਏਵਂ ਸੇਸਪਚ੍ਚਯੇਸੁ ਯਥਾਬਲਯਥਾਸਾਰੁਪ੍ਪਨਿਦ੍ਦੇਸੇਸੁ ਅਪਿ-ਸਦ੍ਦਗ੍ਗਹਣੇ ਅਧਿਪ੍ਪਾਯੋ ਵੇਦਿਤਬ੍ਬੋ.
ਪਕਤੀਤਿ ਵਾਚਾਪਕਤਿਆਦਿਕਾ. ਅਵਸੇਸਨਿਦ੍ਦਾਯ ਅਭਿਭੂਤਤ੍ਤਾ ਪਟਿਬੁਜ੍ਝਤੋ ਸਹਸਾ ਪਾਪਕਾ ਵਿਤਕ੍ਕਾ ਪਾਤੁਭਵਨ੍ਤੀਤਿ.
ਮੁਤ੍ਤਹਰੀਤਕਨ੍ਤਿ ਗੋਮੁਤ੍ਤਪਰਿਭਾਵਿਤਂ, ਪੂਤਿਭਾਵੇਨ ਵਾ ਛਡ੍ਡਿਤਤ੍ਤਾ ਮੁਤ੍ਤਹਰੀਤਕਂ. ਬੁਦ੍ਧਾਦੀਹਿ ਵਣ੍ਣਿਤਨ੍ਤਿ ‘‘ਪੂਤਿਮੁਤ੍ਤਭੇਸਜ੍ਜਂ ਨਿਸ੍ਸਾਯ ਯਾ ਪਬ੍ਬਜ੍ਜਾ’’ਤਿਆਦਿਨਾ ਸਮ੍ਮਾਸਮ੍ਬੁਦ੍ਧਾਦੀਹਿ ਪਸਤ੍ਥਂ.
ਏਕੋ ਏਕਚ੍ਚੋ ਸਨ੍ਤੁਟ੍ਠੋ ਹੋਤਿ, ਸਨ੍ਤੋਸਸ੍ਸ ਵਣ੍ਣਂ ਨ ਕਥੇਤਿ ਸੇਯ੍ਯਥਾਪਿ ਆਯਸ੍ਮਾ ਬਾਕੁਲਤ੍ਥੇਰੋ. ਨ ਸਨ੍ਤੁਟ੍ਟੋ ਹੋਤਿ, ਸਨ੍ਤੋਸਸ੍ਸ ਵਣ੍ਣਂ ਕਥੇਤਿ ਸੇਯ੍ਯਥਾਪਿ ਥੇਰੋ ਉਪਨਨ੍ਦੋ ਸਕ੍ਯਪੁਤ੍ਤੋ. ਨੇਵ ਸਨ੍ਤੁਟ੍ਠੋ ਹੋਤਿ, ਨ ਸਨ੍ਤੋਸਸ੍ਸ ਵਣ੍ਣਂ ਕਥੇਤਿ ਸੇਯ੍ਯਥਾਪਿ ਥੇਰੋ ਲਾਲ਼ੁਦਾਯੀ. ਅਯਨ੍ਤਿ ਆਯਸ੍ਮਾ ਮਹਾਕਸ੍ਸਪੋ. ਅਨੇਸਨਨ੍ਤਿ ਅਯੋਨਿਸੋ ਮਿਚ੍ਛਾਜੀਵਵਸੇਨ ਪਚ੍ਚਯਪਰਿਯੇਸਨਂ. ਉਤ੍ਤਸਤੀਤਿ ‘‘ਕਥਂ ਨੁ ਖੋ ਲਭੇਯ੍ਯ’’ਨ੍ਤਿ ਜਾਤੁਤ੍ਤਾਸੇਨ ਉਤ੍ਤਸਤਿ. ਤਥਾ ਪਰਿਤਸ੍ਸਤਿ. ਅਯਨ੍ਤਿ ਮਹਾਕਸ੍ਸਪਤ੍ਥੇਰੋ. ਏਵਂ ਯਥਾਵੁਤ੍ਤਏਕਚ੍ਚਭਿਕ੍ਖੁ ਵਿਯ ਨ ਪਰਿਤਸ੍ਸਤਿ, ਅਲਾਭਪਰਿਤ੍ਤਾਸੇਨ ਵਿਘਾਤਪ੍ਪਤ੍ਤਿਯਾ ਨ ਪਰਿਤ੍ਤਾਸਂ ਆਪਜ੍ਜਤਿ. ਲੋਭੋਯੇਵ ਆਰਮ੍ਮਣੇਨ ਸਦ੍ਧਿਂ ਗਨ੍ਥਨਟ੍ਠੇਨ ਬਜ੍ਝਨਟ੍ਠੇਨ ਗੇਧੋ ਲੋਭਗੇਧੋ. ਮੁਚ੍ਛਨ੍ਤਿ ਗੇਧਂ ਮੋਮੂਹਤ੍ਤਭਾਵਂ. ਆਦੀਨਵਨ੍ਤਿ ਦੋਸਂ. ਨਿਸ੍ਸਰਣਮੇਵਾਤਿ ਚੀਵਰੇ ਇਦਮਤ੍ਥਿਤਾਦਸ੍ਸਨਪੁਬ੍ਬਕਂ ਅਲਗ੍ਗਭਾਵਸਙ੍ਖਾਤਨਿਯ੍ਯਾਨਮੇਵ ਪਜਾਨਨ੍ਤੋ. ਯਥਾਲਦ੍ਧਾਦੀਨਨ੍ਤਿ ਯਥਾਲਦ੍ਧਪਿਣ੍ਡਪਾਤਾਦੀਨਂ. ਨਿਦ੍ਧਾਰਣੇ ਚੇਤਂ ਸਾਮਿਵਚਨਂ.
ਯਥਾ ਮਹਾਕਸ੍ਸਪਤ੍ਥੇਰੋਤਿ ਅਤ੍ਤਨਾ ਵਤ੍ਤਬ੍ਬਨਿਯਾਮੇਨ ਵਦਤਿ, ਭਗਵਤਾ ਪਨ ਵਤ੍ਤਬ੍ਬਨਿਯਾਮੇਨ ‘‘ਯਥਾ ਕਸ੍ਸਪੋ ਭਿਕ੍ਖੂ’’ਤਿ ਭਵਿਤਬ੍ਬਂ. ਕਸ੍ਸਪੇਨ ਨਿਦਸ੍ਸਨਭੂਤੇਨ. ਕਥਨਂ ਨਾਮ ਭਾਰੋ ‘‘ਮੁਤ੍ਤੋ ਮੋਚੇਯ੍ਯ’’ਨ੍ਤਿ ਪਟਿਞ੍ਞਾਨੁਰੂਪਤ੍ਤਾ. ਪਟਿਪਤ੍ਤਿਂ ਪਰਿਪੂਰਂ ਕਤ੍ਵਾ ਪੂਰਣਂ ਭਾਰੋ ਸਤ੍ਥੁ ਆਣਾਯ ਸਿਰਸਾ ਸਮ੍ਪਟਿਚ੍ਛਿਤਬ੍ਬਤੋ.
ਸਨ੍ਤੁਟ੍ਠਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੨. ਅਨੋਤ੍ਤਪ੍ਪੀਸੁਤ੍ਤਵਣ੍ਣਨਾ
੧੪੫. ਤੇਨ ਰਹਿਤੋਤਿ ਤੇਨ ਸਮ੍ਮਾਵਾਯਾਮੇਨ ਰਹਿਤੋ. ਨਿਬ੍ਭਯੋਤਿ ਭਯਰਹਿਤੋ. ਕੁਸਲਾਨੁਪ੍ਪਾਦਨਮ੍ਪਿ ਹਿ ਸਾਵਜ੍ਜਮੇਵ ਅਞ੍ਞਾਣਾਲਸਿਯਹੇਤੁਕਤ੍ਤਾ. ਸਮ੍ਬੁਜ੍ਝਨਤ੍ਥਾਯਾਤਿ ਅਰਿਯਮਗ੍ਗੇਹਿ ਸਮ੍ਬੁਜ੍ਝਨਾਯ. ਯੋਗੇਹਿ ਖੇਮਂ ਤੇਹਿ ਅਨੁਪਦ੍ਦੁਤਤ੍ਤਾ.
ਮਨੁਞ੍ਞਵਤ੍ਥੁਨ੍ਤਿ ਮਨੋਰਮਂ ਲੋਭੁਪ੍ਪਤ੍ਤਿਕਾਰਣਂ. ਯਥਾ ਵਾ ਤਥਾ ਵਾਤਿ ਸੁਭਸੁਖਾਦਿਵਸੇਨ. ਤੇਤਿ ਲੋਭਾਦਯੋ. ਅਨੁਪ੍ਪਨ੍ਨਾਤਿ ਵੇਦਿਤਬ੍ਬਾ ਤਥਾਰੂਪੇ ਵਤ੍ਥਾਰਮ੍ਮਣੇ ਤਥਾ ਅਨੁਪ੍ਪਨ੍ਨਪੁਬ੍ਬਤ੍ਤਾ. ਅਞ੍ਞਥਾਤਿ ਵੁਤ੍ਤਨਯੇਨੇਵ ਵਤ੍ਥਾਰਮ੍ਮਣੇਹਿ ਅਯੋਜੇਤ੍ਵਾ ਗਯ੍ਹਮਾਨੇ. ਵਤ੍ਥੁਮ੍ਹੀਤਿ ਉਪਟ੍ਠਾਕਾਦਿਚੀਵਰਾਦਿਵਤ੍ਥੁਮ੍ਹਿ. ਆਰਮ੍ਮਣੇਤਿ ਮਨਾਪਿਯਾਦਿਭੇਦੇ ਆਰਮ੍ਮਣੇ. ਤਾਦਿਸੇਨ ਪਚ੍ਚਯੇਨਾਤਿ ਅਯੋਨਿਸੋਮਨਸਿਕਾਰਸਤਿਵੋਸ੍ਸਗ੍ਗਾਦਿਪਚ੍ਚਯੇਨ. ਇਮੇਤਿ ਵੁਤ੍ਤਨਯੇਨ ਪਚ੍ਚਯਲਾਭੇਨ ਪਚ੍ਛਾ ਉਪ੍ਪਜ੍ਜਮਾਨਾ ਪਾਲ਼ਿਯਂ ਤਥਾ ਵੁਤ੍ਤਾਤਿ ਦਟ੍ਠਬ੍ਬਂ. ਏਵਂ ਉਪ੍ਪਜ੍ਜਮਾਨਤਾਯ ਨਪ੍ਪਹੀਯਨ੍ਤਿ ਨਾਮ. ਅਨੁਪ੍ਪਾਦੋ ਹਿ ਪਰਮਤ੍ਥਤੋ ਪਹਾਨਂ ਕਥਿਤਂ, ਤਸ੍ਮਾ ਤਤ੍ਥ ਕਥਿਤਨਯੇਨੇਵ ਗਹੇਤਬ੍ਬਨ੍ਤਿ ਅਧਿਪ੍ਪਾਯੋ.
ਅਪ੍ਪਟਿਲਦ੍ਧਾਤਿ ਅਨੁਪ੍ਪਤ੍ਤਿਯਾ. ਤੇਤਿ ਯਥਾਵੁਤ੍ਤਸੀਲਾਦਿਅਨਵਜ੍ਜਧਮ੍ਮਾ. ਪਟਿਲਦ੍ਧਾਤਿ ਅਧਿਗਤਾ. ‘‘ਸੀਲਾਦਿਧਮ੍ਮਾ’’ਤਿ ਏਤ੍ਥ ਯਦਿ ਮਗ੍ਗਫਲਾਨਿਪਿ ਗਹਿਤਾਨਿ, ਅਥ ਕਸ੍ਮਾ ‘‘ਪਰਿਹਾਨਿਵਸੇਨਾ’’ਤਿ ਵੁਤ੍ਤਨ੍ਤਿ ਆਹ ‘‘ਏਤ੍ਥ ਚਾ’’ਤਿਆਦਿ. ਇਮਸ੍ਸ ਪਨ ਸਮ੍ਮਪ੍ਪਧਾਨਸ੍ਸਾਤਿ ਚਤੁਤ੍ਥਸ੍ਸ ਸਮ੍ਮਪ੍ਪਧਾਨਸ੍ਸ ਵਸੇਨ. ਅਯਂ ਦੇਸਨਾਤਿ ‘‘ਉਪ੍ਪਨ੍ਨਾ ਮੇ ਕੁਸਲਾ ਧਮ੍ਮਾ ਨਿਰੁਜ੍ਝਮਾਨਾ ਅਨਤ੍ਥਾਯ ਸਂਵਤ੍ਤੇਯ੍ਯੁ’’ਨ੍ਤਿ ਅਯਂ ਦੇਸਨਾ ਕਤਾ. ਦੁਤਿਯਮਗ੍ਗੋ ਵਾ…ਪੇ… ਸਂਵਤ੍ਤੇਯ੍ਯਾਤਿ ਇਦਂ ਆਯਤਿਂ ਸਤ੍ਤਸੁ ਅਤ੍ਤਭਾਵੇਸੁ ਉਪ੍ਪਜ੍ਜਮਾਨਦੁਕ੍ਖਸਙ੍ਖਾਤਅਨਤ੍ਥੁਪ੍ਪਤ੍ਤਿਂ ਸਨ੍ਧਾਯ ਵੁਤ੍ਤਂ. ‘‘ਆਤਾਪੀ ਓਤ੍ਤਪ੍ਪੀ ਭਬ੍ਬੋ ਸਮ੍ਬੋਧਾਯਾ’’ਤਿਆਦਿਵਚਨਤੋ ‘‘ਇਮੇ ਚਤ੍ਤਾਰੋ ਸਮ੍ਮਪ੍ਪਧਾਨਾ ਪੁਬ੍ਬਭਾਗਵਿਪਸ੍ਸਨਾਵਸੇਨ ਕਥਿਤਾ’’ਤਿ ਵੁਤ੍ਤਂ.
ਅਨੋਤ੍ਤਪ੍ਪੀਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੩. ਚਨ੍ਦੂਪਮਸੁਤ੍ਤਵਣ੍ਣਨਾ
੧੪੬. ਪਿਯਮਨਾਪਨਿਚ੍ਚਨਵਕਾਦਿਗੁਣੇਹਿ ਚਨ੍ਦੋ ਉਪਮਾ ਏਤੇਸਨ੍ਤਿ ਚਨ੍ਦੂਪਮਾ. ਸਨ੍ਥਵਾਦੀਨਿ ਪਦਾਨਿ ਅਞ੍ਞਮਞ੍ਞਵੇਵਚਨਾਨਿ. ਪਰਿਯੁਟ੍ਠਾਨਂ ਪੁਨ ਚਿਤ੍ਤੇ ਕਿਲੇਸਾਧਿਗਮੋ. ਸਬ੍ਬੇਹਿਪਿ ਪਦੇਹਿ ਕਤ੍ਥਚਿ ਸਤ੍ਤੇ ਅਨੁਰੋਧਰੋਧਾਭਾਵਮਾਹ. ਅਤ੍ਤਨੋ ਪਨ ਸੋਮ੍ਮਭਾਵੇਨ ਮਹਾਜਨਸ੍ਸ ਪਿਯੋ ਮਨਾਪੋ. ਯਦਤ੍ਥਮੇਤ੍ਥ ਚਨ੍ਦੂਪਮਾ ਆਹਟਾ, ਤਂ ਦਸ੍ਸੇਨ੍ਤੋ ‘‘ਏਵ’’ਨ੍ਤਿਆਦਿਮਾਹ. ਨ ਕੇਵਲਂ ਚਨ੍ਦੂਪਮਤਾਯ ਏਤ੍ਤਕੋ ਏਵ ਗੁਣੋ, ਅਥ ਖੋ ਅਞ੍ਞੇਪਿ ਸਨ੍ਤੀਤਿ ਤੇ ਦਸ੍ਸੇਤੁਂ ‘‘ਅਪਿਚਾ’’ਤਿਆਦਿ ਵੁਤ੍ਤਂ. ਏਵਮਾਦੀਹੀਤਿ ਆਦਿ-ਸਦ੍ਦੇਨ ਯਥਾ. ਚਨ੍ਦੋ ਲੋਕਾਨੁਗ੍ਗਹੇਨ ਅਜਵੀਥਿਆਦਿਕਾ ਨਾਨਾਵੀਥਿਯੋ ਪਟਿਪਜ੍ਜਤਿ, ਏਵਂ ਭਿਕ੍ਖੁ ਤਂ ਤਂ ਦਿਸਂ ਉਪਗਚ੍ਛਤਿ ਕੁਲਾਨੁਦ੍ਦਯਾਯ. ਯਥਾ ਚਨ੍ਦੋ ਕਣ੍ਹਪਕ੍ਖਤੋ ਸੁਕ੍ਕਪਕ੍ਖਂ ਉਪਗਚ੍ਛਨ੍ਤੋ ਕਲਾਹਿ ਵਡ੍ਢਮਾਨੋ ਹੁਤ੍ਵਾ ਨਿਚ੍ਚਨਵੋ ਹੋਤਿ, ਏਵਂ ਭਿਕ੍ਖੁ ਕਣ੍ਹਪਕ੍ਖਂ ਪਹਾਯ ਸੁਕ੍ਕਪਕ੍ਖਂ ਉਪਗਨ੍ਤ੍ਵਾ ਗੁਣੇਹਿ ਵਡ੍ਢਮਾਨੋ ਲੋਕਸ੍ਸ ਵਾ ਪਾਮੋਜ੍ਜਪਾਸਂਸਤ੍ਥੋ ਨਿਚ੍ਚਨਵਤਾਯ ਚਨ੍ਦਸਮਚਿਤ੍ਤੋ ਅਧੁਨੁਪਸਮ੍ਪਨ੍ਨੋ ਵਿਯ ਚ ਨਿਚ੍ਚਨਵੋ ਹੁਤ੍ਵਾ ਚਰਤਿ.
ਅਪਕਸ੍ਸਿਤ੍ਵਾਤਿ ਕਿਲੇਸਕਾਮਵਤ੍ਥੁਕਾਮੇਹਿ ਵਿਵੇਚੇਤ੍ਵਾ. ਤਂ ਨੇਕ੍ਖਮ੍ਮਾਭਿਮੁਖਂ ਕਾਯਚਿਤ੍ਤਾਨਂ ਆਕਡ੍ਢਨਂ ਕਾਯਤੋ ਅਪਨਯਨਞ੍ਚ ਹੋਤੀਤਿ ਆਹ ‘‘ਆਕਡ੍ਢਿਤ੍ਵਾ ਅਪਨੇਤ੍ਵਾਤਿ ਅਤ੍ਥੋ’’ਤਿ. ਚਤੁਕ੍ਕਞ੍ਚੇਤ੍ਥ ਸਮ੍ਭਵਤੀਤਿ ਤਂ ਦਸ੍ਸੇਤੁਂ ‘‘ਯੋ ਹਿ ਭਿਕ੍ਖੂ’’ਤਿਆਦਿ ਵੁਤ੍ਤਂ.
ਨਿਚ੍ਚਨਵਯਾਤਿ ‘‘ਨਿਚ੍ਚਨਵਕਾ’’ਇਚ੍ਚੇਵ ਵੁਤ੍ਤਂ ਹੋਤਿ. ਕ-ਸਦ੍ਦੇਨ ਹਿ ਪਦਂ ਵਡ੍ਢਿਤਂ, ਕ-ਕਾਰਸ੍ਸ ਚ ਯ-ਕਾਰਾਦੇਸੋ. ਏਵਂ ਵਿਚਰਿਂਸੂਤਿ ਕਿਞ੍ਜਕ੍ਖਵਸੇਨ ਪਰਿਗ੍ਗਹਾਭਾਵੇਨ ਯਥਾ ਇਮੇ, ਏਵਂ ਵਿਚਰਿਂਸੁ ਅਞ੍ਞੇਤਿ ਅਨੁਕਮ੍ਪਮਾਨਾ.
ਦ੍ਵੇਭਾਤਿਕਵਤ੍ਥੂਤਿ ਦ੍ਵੇਭਾਤਿਕਤ੍ਥੇਰਪਟਿਬਦ੍ਧਂ ਵਤ੍ਥੁਂ. ਅਪ੍ਪਤਿਰੂਪਕਰਣਨ੍ਤਿ ਭਿਕ੍ਖੂਨਂ ਅਸਾਰੁਪ੍ਪਕਰਣਂ. ਆਧਾਯਿਤ੍ਵਾਤਿ ਆਰੋਪਨਂ ਠਪੇਤ੍ਵਾ. ਤਥਾਤਿ ਯਥਾ ਸਙ੍ਘਮਜ੍ਝੇ ਗਣਮਜ੍ਝੇ ਚ, ਤਥਾ ਵੁਡ੍ਢਤਰੇ ਪੁਗ੍ਗਲੇ ਅਪ੍ਪਤਿਰੂਪਕਰਣਂ. ਏਵਮਾਦੀਤਿ ਆਦਿ-ਸਦ੍ਦੇਨ ਅਨ੍ਤਰਘਰਪ੍ਪਵੇਸਨੇ ਅਞ੍ਞਤ੍ਥ ਚ ਯਥਾਵੁਤ੍ਤਤੋ ਅਞ੍ਞਂ ਅਸਾਰੁਪ੍ਪਕਿਰਿਯਂ ਸਙ੍ਗਣ੍ਹਾਤਿ. ਤਤ੍ਥੇਵਾਤਿ ਸਙ੍ਘਮਜ੍ਝੇ ਗਣਮਜ੍ਝੇ ਪੁਗ੍ਗਲਸ੍ਸ ਚ ਵੁਡ੍ਢਸ੍ਸ ਸਨ੍ਤਿਕੇ.
ਯਥਾਵੁਤ੍ਤੇਸੁ ਅਞ੍ਞੇਸੁ ਚ ਤੇਸੁ ਠਾਨੇਸੁ. ਪਾਪਿਚ੍ਛਤਾਪਿ ਮਨੋਪਾਗਬ੍ਭਿਯਨ੍ਤਿ ਏਤੇਨੇਵ ਕੋਧੂਪਨਾਹਾਦੀਨਂ ਸਮੁਦਾਚਾਰੋ ਮਨੋਪਾਗਬ੍ਭਿਯਨ੍ਤਿ ਦਸ੍ਸਿਤਂ ਹੋਤਿ.
ਏਕਤੋ ਭਾਰਿਯਨ੍ਤਿ ਪਿਟ੍ਠਿਪਸ੍ਸਤੋ ਓਨਤਂ. ਵਾਯੁਪਤ੍ਥਮ੍ਭਨ੍ਤਿ ਚਿਤ੍ਤਸਮੁਟ੍ਠਾਨਵਾਯੁਨਾ ਉਪਤ੍ਥਮ੍ਭਨਂ. ਅਨੁਬ੍ਬੇਜੇਤ੍ਵਾ ਚਿਤ੍ਤਨ੍ਤਿ ਆਨੇਤ੍ਵਾ ਸਮ੍ਬਨ੍ਧੋ. ਚਿਤ੍ਤਸ੍ਸ ਹਿ ਤਤੋ ਅਨੁਬ੍ਬੇਜਨਂ ਤਦਨੁਨਯਨਂ. ਤੇਨਾਹ ‘‘ਸਮ੍ਪਿਯਾਯਮਾਨੋ ਓਲੋਕੇਤੀ’’ਤਿ. ਵਾਯੁਪਤ੍ਥਮ੍ਭਕਂ ਗਾਹਾਪੇਤ੍ਵਾਤਿ ਕਾਯਂ ਤਥਾ ਉਪਤ੍ਥਮ੍ਭਕਂ ਕਤ੍ਵਾ.
ਓਪਮ੍ਮਸਂਸਨ੍ਦਨਂ ਸੁਵਿਞ੍ਞੇਯ੍ਯਮੇਵ. ਕਾਮਗਿਦ੍ਧਤਾਯ ਹੀਨਾਧਿਮੁਤ੍ਤਿਕੋ, ਅਵਿਸੁਦ੍ਧਸੀਲਾਚਾਰਤਾਯ ਮਿਚ੍ਛਾਪਟਿਪਨ੍ਨੋ.
ਅਙ੍ਗੁਲੀਹਿ ਨਿਕ੍ਖਨ੍ਤਪਭਾ ਆਕਾਸਸਞ੍ਚਲਨੇਨ ਦਿਗੁਣਾ ਹੁਤ੍ਵਾ ਆਕਾਸੇ ਵਿਚਰਿਂਸੂਤਿ ਆਹ ‘‘ਯਮਕਵਿਜ੍ਜੁਤਂ ਚਾਰਯਮਾਨੋ ਵਿਯਾ’’ਤਿ. ‘‘ਆਕਾਸੇ ਪਾਣਿਂ ਚਾਲੇਸੀ’’ਤਿ ਪਦਸ੍ਸ ਅਞ੍ਞਤ੍ਥ ਅਨਾਗਤਤ੍ਤਾ ‘‘ਅਸਮ੍ਭਿਨ੍ਨਪਦ’’ਨ੍ਤਿ ਵੁਤ੍ਤਂ. ਅਤ੍ਤਮਨੋਤਿ ਪੀਤਿਸੋਮਨਸ੍ਸੇਹਿ ਗਹਿਤਮਨੋ. ਯਞ੍ਹਿ ਚਿਤ੍ਤਂ ਅਨਵਜ੍ਜਂ ਪੀਤਿਸੋਮਨਸ੍ਸਸਹਿਤਂ, ਤਂ ਸਸਨ੍ਤਕਂ ਹਿਤਸੁਖਾਵਹਤ੍ਤਾ. ਤੇਨਾਹ ‘‘ਸਕਮਨੋ’’ਤਿਆਦਿ. ਨ ਦੋਮਨਸ੍ਸੇਨ…ਪੇ… ਗਹਿਤਮਨੋ ਸਕਚਿਤ੍ਤਸ੍ਸ ਤਬ੍ਬਿਰੁਦ੍ਧਤ੍ਤਾ. ਪੁਰਿਮਨਯੇਨੇਵਾਤਿ ‘‘ਇਦਾਨਿ ਯੋ ਹੀਨਾਧਿਮੁਤ੍ਤਿਕੋ’’ਤਿਆਦਿਨਾ ਪੁਬ੍ਬੇ ਵੁਤ੍ਤਨਯੇਨੇਵ.
ਪਸਨ੍ਨਾਕਾਰਨ੍ਤਿ ਪਸਨ੍ਨੇਹਿ ਕਾਤਬ੍ਬਕਿਰਿਯਂ. ਤਂ ਸਰੂਪਤੋ ਦਸ੍ਸੇਤਿ ‘‘ਚੀਵਰਾਦਯੋ ਪਚ੍ਚਯੇ ਦਦੇਯ੍ਯੁ’’ਨ੍ਤਿ. ਤਥਭਾਵਾਯਾਤਿ ਯਦਤ੍ਥਂ ਭਗਵਤਾ ਧਮ੍ਮੋ ਦੇਸਿਤੋ, ਯਦਤ੍ਥਞ੍ਚ ਸਾਸਨੇ ਪਬ੍ਬਜ੍ਜਾ, ਤਦਤ੍ਥਾਯ. ਰਕ੍ਖਣਭਾਵਨ੍ਤਿ ਅਪਾਯਭਯਤੋ ਚ ਰਕ੍ਖਣਜ੍ਝਾਸਯਂ. ਚਨ੍ਦੋਪਮਾਦਿਵਸੇਨਾਤਿ ਆਦਿ-ਸਦ੍ਦੇਨ ਆਕਾਸੇ ਚਲਿਤਪਾਣਿ ਵਿਯ ਕਤ੍ਥਚਿ ਅਲਗ੍ਗਤਾਯ ਪਰਿਸੁਦ੍ਧਜ੍ਝਾਸਯਤਾ ਸਤ੍ਤੇਸੁ ਕਾਰੁਞ੍ਞਨ੍ਤਿ ਏਵਮਾਦੀਨਂ ਸਙ੍ਗਹੋ.
ਚਨ੍ਦੂਪਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੪. ਕੁਲੂਪਕਸੁਤ੍ਤਵਣ੍ਣਨਾ
੧੪੭. ਕੁਲਾਨਿ ਉਪਗਚ੍ਛਤੀਤਿ ਕੁਲੂਪਕੋ. ਸਨ੍ਦੀਯਤੀਤਿ ਸਬ੍ਬਸੋ ਦੀਯਤਿ, ਅਵਖਣ੍ਡੀਯਤੀਤਿ ਅਤ੍ਥੋ. ਸਾ ਪਨ ਅਵਖਣ੍ਡਿਯਨਾ ਦੁਕ੍ਖਾਪਨਾ ਅਟ੍ਟਿਯਨਾ ਹੋਤੀਤਿ ਵੁਤ੍ਤਂ ‘‘ਅਟ੍ਟੀਯਤੀ’’ਤਿ. ਤੇਨਾਹ ਭਗਵਾ ‘‘ਸੋ ਤਤੋਨਿਦਾਨਂ ਦੁਕ੍ਖਂ ਦੋਮਨਸ੍ਸਂ ਪਟਿਸਂਵੇਦਯਤੀ’’ਤਿ. ਵੁਤ੍ਤਨਯਾਨੁਸਾਰੇਨ ਹੇਟ੍ਠਾ ਵੁਤ੍ਤਨਯਸ੍ਸ ਅਨੁਸਰਣੇਨ.
ਕੁਲੂਪਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੫. ਜਿਣ੍ਣਸੁਤ੍ਤਵਣ੍ਣਨਾ
੧੪੮. ਛਿਨ੍ਨਭਿਨ੍ਨਟ੍ਠਾਨੇ ਛਿਦ੍ਦਸ੍ਸ ਅਪੁਥੁਲਤ੍ਤਾ ਅਗ੍ਗਲ਼ਂ ਅਦਤ੍ਵਾਵ ਸੁਤ੍ਤੇਨ ਸਂਸਿਬ੍ਬਨਮਤ੍ਤੇਨ ਅਗ੍ਗਲ਼ਦਾਨੇਨ ਚ ਛਿਦ੍ਦੇ ਪੁਥੁਲੇ. ਨਿਬ੍ਬਸਨਾਨੀਤਿ ਚਿਰਨਿਸੇਵਿਤਵਸਨਕਿਚ੍ਚਾਨਿ, ਪਰਿਭੋਗਜਿਣ੍ਣਾਨੀਤਿ ਅਤ੍ਥੋ. ਤੇਨਾਹ ‘‘ਪੁਬ੍ਬੇ…ਪੇ… ਲਦ੍ਧਨਾਮਾਨੀ’’ਤਿ, ਸਞ੍ਞਾਪੁਬ੍ਬਕੋ ਵਿਧਿ ਅਨਿਚ੍ਚੋਤਿ ‘‘ਗਹਪਤਾਨੀ’’ਤਿ ਵੁਤ੍ਤਂ ਯਥਾ ‘‘ਵੀਰਿਯ’’ਨ੍ਤਿ.
ਸੇਨਾਪਤਿਨ੍ਤਿ ਸੇਨਾਪਤਿਭਾਵਿਨਂ, ਸੇਨਾਪਚ੍ਚਾਰਹਨ੍ਤਿ ਅਤ੍ਥੋ. ਅਤ੍ਤਨੋ ਕਮ੍ਮੇਨਾਤਿ ਅਤ੍ਤਨਾ ਕਾਤਬ੍ਬਕਮ੍ਮੇਨ. ਸੋਤਿ ਸਤ੍ਥਾ. ਤਸ੍ਮਿਨ੍ਤਿ ਮਹਾਕਸ੍ਸਪਤ੍ਥੇਰੇ ਕਰੋਤੀਤਿ ਸਮ੍ਬਨ੍ਧੋ. ਨ ਕਰੋਤੀਤਿ ਵੁਤ੍ਤਮਤ੍ਥਂ ਵਿਵਰਨ੍ਤੋ ‘‘ਕਸ੍ਮਾ’’ਤਿਆਦਿਮਾਹ. ਯਦਿ ਸਤ੍ਥਾ ਧੁਤਙ੍ਗਾਨਿ ਨ ਵਿਸ੍ਸਜ੍ਜਾਪੇਤੁਕਾਮੋ, ਅਥ ਕਸ੍ਮਾ ‘‘ਜਿਣ੍ਣੋਸਿ ਦਾਨਿ ਤ੍ਵ’’ਨ੍ਤਿਆਦਿਮਵੋਚਾਤਿ ਆਹ ‘‘ਯਥਾ ਪਨਾ’’ਤਿਆਦਿ.
ਦਿਟ੍ਠਧਮ੍ਮਸੁਖਵਿਹਾਰਨ੍ਤਿ ਇਮਸ੍ਮਿਂਯੇਵ ਅਤ੍ਤਭਾਵੇ ਫਾਸੁਵਿਹਾਰਂ. ਅਮਾਨੁਸਿਕਾ ਸਵਨਰਤੀਤਿ ਅਤਿਕ੍ਕਨ੍ਤਮਾਨੁਸਿਕਾਯ ਅਰਞ੍ਞਸਦ੍ਦੁਪ੍ਪਤ੍ਤਿਯਾ ਅਰਞ੍ਞੇਹਂ ਵਸਾਮੀਤਿ ਵਿਵੇਕਵਾਸੂਪਨਿਸ੍ਸਯਾਧੀਨਸਦ੍ਦਸਵਨਪਚ੍ਚਯਾ ਧਮ੍ਮਰਤਿ ਉਪ੍ਪਜ੍ਜਤਿ. ਅਪਰੋਤਿ ਅਞ੍ਞੋ, ਦੁਤਿਯੋਤਿ ਅਤ੍ਥੋ. ਤਤ੍ਥੇਵਾਤਿ ਤਸ੍ਮਿਂਯੇਵ ਏਕਸ੍ਸ ਵਿਹਰਣਟ੍ਠਾਨੇ ਵਿਹਰਣਸਮਯੇ ਚ ਫਾਸੁ ਭਵਤਿ ਚਿਤ੍ਤਵਿਵੇਕਸਮ੍ਭਵਤੋ. ਤੇਨਾਹ ‘‘ਏਕਸ੍ਸ ਰਮਤੋ ਵਨੇ’’ਤਿ.
ਤਥਾਤਿ ਯਥਾ ਆਰਞ੍ਞਿਕਸ੍ਸ ਰਤਿ, ਤਥਾ ਪਿਣ੍ਡਪਾਤਿਕਸ੍ਸ ਲਬ੍ਭਤਿ ਦਿਟ੍ਠਧਮ੍ਮਸੁਖਵਿਹਾਰੋ. ਏਸ ਨਯੋ ਸੇਸੇਸੁ. ਅਪਿਣ੍ਡਪਾਤਿਕਾਧੀਨੋ ਇਤਰਸ੍ਸ ਵਿਸੇਸਜੋਤਕੋਤਿ ਤਮੇਵਸ੍ਸ ਵਿਸੇਸਂ ਦਸ੍ਸੇਤੁਂ ‘‘ਅਕਾਲਚਾਰੀ’’ਤਿਆਦਿ ਵੁਤ੍ਤਂ.
ਅਮ੍ਹਾਕਂ ਸਲਾਕਂ ਗਹੇਤ੍ਵਾ ਭਤ੍ਤਤ੍ਥਾਯ ਗੇਹਂ ਅਨਾਗਚ੍ਛਨ੍ਤਸ੍ਸ ਸਤ੍ਤਾਹਂ ਨ ਪਾਤੇਤਬ੍ਬਨ੍ਤਿ ਸਾਮਿਕੇਹਿ ਦਿਨ੍ਨਤ੍ਤਾ ਸਤ੍ਤਾਹਂ ਸਲਾਕਂ ਨ ਲਭਤਿ, ਨ ਕਤਿਕਵਸੇਨ. ਪਿਣ੍ਡਚਾਰਿਕਵਤ੍ਤੇ ਅਵਤ੍ਤਨਤੋ ‘‘ਯਸ੍ਸ ਚੇਸਾ’’ਤਿਆਦਿ ਵੁਤ੍ਤਂ.
ਪਠਮਤਰਂ ਕਾਤਬ੍ਬਂ ਯਂ, ਤਂ ਵਤ੍ਤਂ, ਇਤਰਂ ਪਟਿਵਤ੍ਤਂ. ਮਹਨ੍ਤਂ ਵਾ ਵਤ੍ਤਂ, ਖੁਦ੍ਦਕਂ ਪਟਿਵਤ੍ਤਂ. ਕੇਚਿ ‘‘ਵਤ੍ਤਪਟਿਪਤ੍ਤਿ’’ਨ੍ਤਿ ਪਠਨ੍ਤਿ, ਵਤ੍ਤਸ੍ਸ ਕਰਣਨ੍ਤਿ ਅਤ੍ਥੋ. ਉਦ੍ਧਰਣ-ਅਤਿਹਰਣ-ਵੀਤਿਹਰਣਵੋਸ੍ਸਜ੍ਜਨ-ਸਨ੍ਨਿਕ੍ਖੇਪਨ-ਸਨ੍ਨਿਰੁਮ੍ਭਨਾਨਂ ਵਸੇਨ ਛ ਕੋਟ੍ਠਾਸੇ. ਗਰੁਭਾਵੇਨਾਤਿ ਥਿਰਭਾਵੇਨ.
‘‘ਅਮੁਕਸ੍ਮਿਂ ਸੇਨਾਸਨੇ ਵਸਨ੍ਤਾ ਬਹੁਂ ਵਸ੍ਸਵਾਸਿਕਂ ਲਭਨ੍ਤੀ’’ਤਿ ਤਥਾ ਨ ਵਸ੍ਸਵਾਸਿਕਂ ਪਰਿਯੇਸਨ੍ਤੋ ਚਰਤਿ ਵਸ੍ਸਵਾਸਿਕਸ੍ਸੇਵ ਅਗ੍ਗਹਣਤੋ. ਤਸ੍ਮਾ ਸੇਨਾਸਨਫਾਸੁਕਂਯੇਵ ਚਿਨ੍ਤੇਤਿ. ਤੇਨ ਬਹੁਪਰਿਕ੍ਖਾਰਭਾਵੇਨ ਫਾਸੁਵਿਹਾਰੋ ਨਤ੍ਥਿ ਪਰਿਕ੍ਖਾਰਾਨਂ ਰਕ੍ਖਣਪਟਿਜਗ੍ਗਨਾਦਿਦੁਕ੍ਖਬਹੁਲਤਾਯ. ਅਪ੍ਪਿਚ੍ਛਾਦੀਨਨ੍ਤਿ ਅਪ੍ਪਿਚ੍ਛਸਨ੍ਤੁਟ੍ਠਾਦੀਨਂਯੇਵ ਲਬ੍ਭਤਿ ਦਿਟ੍ਠਧਮ੍ਮਸੁਖਵਿਹਾਰੋ.
ਜਿਣ੍ਣਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੬. ਓਵਾਦਸੁਤ੍ਤਵਣ੍ਣਨਾ
੧੪੯. ਅਤ੍ਤਨੋ ਠਾਨੇਤਿ ਸਬ੍ਰਹ੍ਮਚਾਰੀਨਂ ਓਵਾਦਕਵਿਞ੍ਞਾਪਕਭਾਵੇਨ ਅਤ੍ਤਨੋ ਮਹਾਸਾਵਕਟ੍ਠਾਨੇ ਠਪਨਤ੍ਥਂ. ਅਥ ਵਾ ਯਸ੍ਮਾ ‘‘ਅਹਂ ਦਾਨਿ ਨ ਚਿਰਂ ਠਸ੍ਸਾਮਿ, ਤਥਾ ਸਾਰਿਪੁਤ੍ਤਮੋਗ੍ਗਲ੍ਲਾਨਾ, ਅਯਂ ਪਨ ਵੀਸਂਵਸ੍ਸਤਾਯੁਕੋ, ਓਵਦਨ੍ਤੋ ਅਨੁਸਾਸਨ੍ਤੋ ਮਮਚ੍ਚਯੇਨ ਭਿਕ੍ਖੂਨਂ ਮਯਾ ਕਾਤਬ੍ਬਕਿਚ੍ਚਂ ਕਰਿਸ੍ਸਤੀ’’ਤਿ ਅਧਿਪ੍ਪਾਯੇਨ ਭਗਵਾ ਇਮਂ ਦੇਸਨਂ ਆਰਭਿ. ਤਸ੍ਮਾ ਅਤ੍ਤਨੋ ਠਾਨੇਤਿ ਸਤ੍ਥਾਰਾ ਕਾਤਬ੍ਬਓਵਾਦਦਾਯਕਟ੍ਠਾਨੇ. ਤੇਨਾਹ ‘‘ਏਵਂ ਪਨਸ੍ਸਾ’’ਤਿਆਦਿ. ਯਥਾਹ ਭਗਵਾ ‘‘ਓਵਦ, ਕਸ੍ਸਪ…ਪੇ… ਤ੍ਵਂ ਵਾ’’ਤਿ. ਦੁਕ੍ਖੇਨ ਵਤ੍ਤਬ੍ਬਾ ਅਪ੍ਪਦਕ੍ਖਿਣਗ੍ਗਾਹਿਭਾਵਤੋ. ਦੁਬ੍ਬਚਭਾਵਕਰਣੇਹੀਤਿ ਕੋਧੂਪਨਾਹਾਦੀਹਿ. ਅਨੁਸਾਸਨਿਯਾ ਪਦਕ੍ਖਿਣਗ੍ਗਹਣਂ ਨਾਮ ਅਨੁਧਮ੍ਮਚਰਣਂ, ਛਿਨ੍ਨਪਟਿਪਤ੍ਤਿ ਕਤਾ ਵਾਮਗ੍ਗਾਹੋ ਨਾਮਾਤਿ ਆਹ ‘‘ਅਨੁਸਾਸਨਿ’’ਨ੍ਤਿਆਦਿ. ਅਤਿਕ੍ਕਮ੍ਮ ਵਦਨ੍ਤੇਤਿ ਅਞ੍ਞਮਞ੍ਞਂ ਅਤਿਕ੍ਕਮਿਤ੍ਵਾ ਅਤਿਮਞ੍ਞਿਤ੍ਵਾ ਵਦਨ੍ਤੇ. ਬਹੁਂ ਭਾਸਿਸ੍ਸਤੀਤਿ ਧਮ੍ਮਂ ਕਥੇਨ੍ਤੋ ਕੋ ਵਿਪੁਲਂ ਕਤ੍ਵਾ ਕਥੇਸ੍ਸਤਿ. ਅਸਹਿਤਨ੍ਤਿ ਪੁਬ੍ਬੇਨਾਪਰਂ ਨਸਹਿਤਂ ਹੇਤੁਪਮਾਵਿਰਹਿਤਂ. ਅਮਧੁਰਨ੍ਤਿ ਨ ਮਧੁਰਂ ਨ ਕਣ੍ਣਸੁਖਂ ਨ ਪੇਮਨੀਯਂ. ਲਹੁਞ੍ਞੇਵ ਉਟ੍ਠਾਤਿ ਅਪ੍ਪਵਤ੍ਤਨੇਨ ਕੂਲਟ੍ਠਾਨਂ ਵਿਯ ਤਸ੍ਸ ਕਥਨਂ.
ਓਵਾਦਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੭. ਦੁਤਿਯਓਵਾਦਸੁਤ੍ਤਵਣ੍ਣਨਾ
੧੫੦. ਓਕਪ੍ਪਨਸਦ੍ਧਾਤਿ ਸਦ੍ਧੇਯ੍ਯਵਤ੍ਥੁਂ ਓਗਾਹਿਤ੍ਵਾ ‘‘ਏਵਮੇਤ’’ਨ੍ਤਿ ਕਪ੍ਪਨਸਦ੍ਧਾ. ਕੁਸਲਧਮ੍ਮਜਾਨਨਪਞ੍ਞਾਤਿ ਅਨਵਜ੍ਜਧਮ੍ਮਾਨਂ ਸਬ੍ਬਸੋ ਜਾਨਨਪਞ੍ਞਾ. ਪਰਿਹਾਨਨ੍ਤਿ ਸਬ੍ਬਾਹਿ ਸਮ੍ਪਤ੍ਤੀਹਿ ਪਰਿਹਾਨਂ. ਨ ਹਿ ਕਲ੍ਯਾਣਮਿਤ੍ਤਰਹਿਤਸ੍ਸ ਕਾਚਿ ਸਮ੍ਪਤ੍ਤਿ ਨਾਮ ਅਤ੍ਥੀਤਿ.
ਦੁਤਿਯਓਵਾਦਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੮. ਤਤਿਯਓਵਾਦਸੁਤ੍ਤਵਣ੍ਣਨਾ
੧੫੧. ਪੁਬ੍ਬੇਤਿ ਪਠਮਬੋਧਿਯਂ. ਏਤਰਹੀਤਿ ਤਤੋ ਪਚ੍ਛਿਮੇ ਕਾਲੇ. ਕਾਰਣਪਟ੍ਠਪਨੇਤਿ ਕਾਰਣਾਰਮ੍ਭੇ. ਤੇਸੁ ਵੁਤ੍ਤਗੁਣਯੁਤ੍ਤੇਸੁ ਥੇਰੇਸੁ. ਤਸ੍ਮਿਨ੍ਤਿ ਤਸ੍ਮਿਂ ਯਥਾਵੁਤ੍ਤਗੁਣਯੁਤ੍ਤੇ ਪੁਗ੍ਗਲੇ. ਏਵਂ ਸਕ੍ਕਾਰੇ ਕਯਿਰਮਾਨੇਤਿ ‘‘ਭਦ੍ਦਕੋ ਵਤਾਯਂ ਭਿਕ੍ਖੂ’’ਤਿ ਆਦਰਜਾਤੇਹਿ ਭਿਕ੍ਖੂਹਿ ਸਕ੍ਕਾਰੇ ਕਯਿਰਮਾਨੇ. ਇਮੇ ਸਬ੍ਰਹ੍ਮਚਾਰੀ. ‘‘ਏਹਿ ਭਿਕ੍ਖੂ’’ਤਿ ਤਂ ਭਿਕ੍ਖੁਂ ਅਤ੍ਤਨੋ ਮੁਖਾਭਿਮੁਖਂ ਕਰੋਨ੍ਤਾ ਵਦਨ੍ਤਿ. ਯਞ੍ਹਿ ਤਨ੍ਤਿ ਏਤ੍ਥ ਤਨ੍ਤਿ ਨਿਪਾਤਮਤ੍ਤਂ ਉਪਦ੍ਦਵੋਤਿ ਵੁਚ੍ਚਤਿ ਅਨਤ੍ਥਜਨਨਤੋ. ਪਤ੍ਥਯਤਿ ਭਜਤਿ ਬਜ੍ਝਤੀਤਿ ਪਤ੍ਥਨਾ, ਅਭਿਸਙ੍ਗੋਤਿ ਆਹ ‘‘ਅਭਿਪਤ੍ਥਨਾਤਿ ਅਧਿਮਤ੍ਤਪਤ੍ਥਨਾ’’ਤਿ.
ਤਤਿਯਓਵਾਦਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੯. ਝਾਨਾਭਿਞ੍ਞਸੁਤ੍ਤਵਣ੍ਣਨਾ
੧੫੨. ਯਾਵਦੇਵਾਤਿ ਇਮਿਨਾ ਸਮਾਨਤ੍ਥਂ ‘‘ਯਾਵਦੇ’’ਤਿ ਇਦਂ ਪਦਨ੍ਤਿ ਆਹ ‘‘ਯਾਵਦੇ ਆਕਙ੍ਖਾਮੀਤਿ ਯਾਵਦੇਵ ਇਚ੍ਛਾਮੀ’’ਤਿ. ਯਦਿਚ੍ਛਕਂ ਝਾਨਸਮਾਪਤ੍ਤੀਸੁ ਵਸੀਭਾਵਦਸ੍ਸਨਤ੍ਥਂ ਤਦੇਤਂ ਆਰਦ੍ਧਂ. ਵਿਤ੍ਥਾਰਿਤਮੇਵ, ਤਸ੍ਮਾ ਤਤ੍ਥ ਵਿਤ੍ਥਾਰਿਤਮੇਵ ਗਹੇਤਬ੍ਬਨ੍ਤਿ ਅਧਿਪ੍ਪਾਯੋ. ਆਸਵਾਨਂ ਖਯਾਤਿ ਆਸਵਾਨਂ ਖਯਹੇਤੁ ਅਰਿਯਮਗ੍ਗੇਨ ਸਬ੍ਬਸੋ ਆਸਵਾਨਂ ਖੇਪਿਤਤ੍ਤਾ. ਅਪਚ੍ਚਯਭੂਤਨ੍ਤਿ ਆਰਮ੍ਮਣਪਚ੍ਚਯਭਾਵੇਨ ਅਪਚ੍ਚਯਭੂਤਂ.
ਝਾਨਾਭਿਞ੍ਞਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੧੦. ਉਪਸ੍ਸਯਸੁਤ੍ਤਵਣ੍ਣਨਾ
੧੫੩. ਲਾਭਸਕ੍ਕਾਰਹੇਤੁਪਿ ਏਕਚ੍ਚੇ ਭਿਕ੍ਖੂ ਭਿਕ੍ਖੁਨੁਪਸ੍ਸਯਂ ਗਨ੍ਤ੍ਵਾ ਭਿਕ੍ਖੁਨਿਯੋ ਓਵਦਨ੍ਤਿ, ਏਵਮੇਵਂ ਅਯਂ ਪਨ ਥੇਰੋ ਨ ਲਾਭਸਕ੍ਕਾਰਹੇਤੁ ਭਿਕ੍ਖੁਨੁਪਸ੍ਸਯਗਮਨਂ ਯਾਚਤਿ, ਅਥ ਕਸ੍ਮਾਤਿ ਆਹ ‘‘ਕਮ੍ਮਟ੍ਠਾਨਤ੍ਥਿਕਾ’’ਤਿਆਦਿ. ਏਸੋ ਹਿ ਆਨਨ੍ਦਤ੍ਥੇਰੋ ਉਸ੍ਸੁਕ੍ਕਾਪੇਤ੍ਵਾ ਪਟਿਪਤ੍ਤਿਗੁਣਂ ਦਸ੍ਸੇਨ੍ਤੋ ਯਸ੍ਮਾ ਤਾ ਭਿਕ੍ਖੁਨਿਯੋ ਚਤੁਸਚ੍ਚਕਮ੍ਮਟ੍ਠਾਨਿਕਾ, ਤਸ੍ਮਾ ਪਞ੍ਚਨ੍ਨਂ ਉਪਾਦਾਨਕ੍ਖਨ੍ਧਾਨਂ ਉਦਯਬ੍ਬਯਾਦਿਪਕਾਸਨਿਯਾ ਧਮ੍ਮਕਥਾਯ ਵਿਪਸ੍ਸਨਾਪਟਿਪਤ੍ਤਿਸਮ੍ਪਦਂ ਦਸ੍ਸੇਸਿ. ਅਨਿਚ੍ਚਾਦਿਲਕ੍ਖਣਾਨਿ ਚੇਵ ਉਦਯਬ੍ਬਯਾਦਿਕੇ ਚ ਸਮ੍ਮਾ ਦਸ੍ਸੇਸਿ. ਹਤ੍ਥੇਨ ਗਹੇਤ੍ਵਾ ਵਿਯ ਪਚ੍ਚਕ੍ਖਤੋ ਦਸ੍ਸੇਸਿ. ਸਮਾਦਪੇਸੀਤਿ ਤਤ੍ਥ ਲਕ੍ਖਣਾਰਮ੍ਮਣਿਕਵਿਪਸ੍ਸਨਂ ਸਮਾਦਪੇਸਿ. ਯਥਾ ਵੀਥਿਪਟਿਪਨ੍ਨੋ ਹੁਤ੍ਵਾ ਪਵਤ੍ਤਤਿ, ਏਵਂ ਗਣ੍ਹਾਪੇਸਿ. ਸਮੁਤ੍ਤੇਜੇਸੀਤਿ ਵਿਪਸ੍ਸਨਾਯ ਆਰਦ੍ਧਾਯ ਸਙ੍ਖਾਰਾਨਂ ਉਦਯਬ੍ਬਯਾਦੀਸੁ ਉਪਟ੍ਠਹਨ੍ਤੇਸੁ ਯਥਾਕਾਲਂ ਪਗ੍ਗਹਸਮੁਪੇਕ੍ਖਣੇਹਿ ਬੋਜ੍ਝਙ੍ਗਾਨਂ ਅਨੁਪਵਤ੍ਤਨੇਨ ਭਾਵਨਾਮਜ੍ਝਿਮਵੀਥਿਂ ਪਾਪੇਤ੍ਵਾ ਯਥਾ ਵਿਪਸ੍ਸਨਾਞਾਣਂ ਸੁਪ੍ਪਸਨ੍ਨਂ ਹੁਤ੍ਵਾ ਵਹਤਿ, ਏਵਂ ਇਨ੍ਦ੍ਰਿਯਾਨਂ ਵਿਸਦਭਾਵਕਰਣੇਨ ਵਿਪਸ੍ਸਨਾਚਿਤ੍ਤਂ ਸਮ੍ਮਾ ਉਤ੍ਤੇਜੇਸਿ, ਨਿਬ੍ਬਾਨਵਸੇਨ ਵਾ ਸਮਾਦਪੇਸਿ. ਸਮ੍ਪਹਂਸੇਸੀਤਿ ਤਥਾ ਪਵਤ੍ਤਿਯਮਾਨਾਯ ਵਿਪਸ੍ਸਨਾਯ ਸਮਪ੍ਪਵਤ੍ਤਭਾਵਨਾਵਸੇਨ ਉਪਰਿ ਲਦ੍ਧਬ੍ਬਭਾਵਨਾਵਸੇਨ ਚਿਤ੍ਤਂ ਸਮ੍ਪਹਂਸੇਸਿ, ਲਦ੍ਧਸ੍ਸਾਦਵਸੇਨ ਸੁਟ੍ਠੁ ਤੋਸੇਸਿ. ਏਵਮੇਤ੍ਥ ਅਤ੍ਥੋ ਵੇਦਿਤਬ੍ਬੋ.
ਮਨੁਤੇ ਪਰਿਞ੍ਞਾਦਿਵਸੇਨ ਸਚ੍ਚਾਨਿ ਬੁਜ੍ਝਤੀਤਿ ਮੁਨਿ. ਤੇਤਿ ਤਂ. ਉਪਯੋਗਤ੍ਥੇ ਹਿ ਇਦਂ ਸਾਮਿਵਚਨਂ. ਉਤ੍ਤਰੀਤਿ ਉਪਰਿ, ਤਵ ਯਥਾਭੂਤਸਭਾਵਤੋ ਪਰਤੋਤਿ ਅਤ੍ਥੋ. ਪਕ੍ਖਪਤਿਤੋ ਅਗਤਿਗਮਨਂ ਅਤਿਰੇਕਓਕਾਸੋ. ਉਪਪਰਿਕ੍ਖੀਤਿ ਅਨੁਵਿਚ੍ਚ ਨਿਵਾਰਕੋ ਨ ਬਹੁਮਤੋ. ਬੁਦ੍ਧਪਟਿਭਾਗੋ ਥੇਰੋ. ‘‘ਬਾਲਾ ਭਿਕ੍ਖੁਨੀ ਦੁਬ੍ਭਾਸਿਤਂ ਆਹਾ’’ਤਿ ਅਵਤ੍ਵਾ ‘‘ਖਮਥ, ਭਨ੍ਤੇ’’ਤਿ ਵਦਨ੍ਤੇਨ ਪਕ੍ਖਪਾਤੇਨ ਵਿਯ ਵੁਤ੍ਤਂ ਹੋਤੀਤਿ ਆਹ ‘‘ਏਕਾ ਭਿਕ੍ਖੁਨੀ ਨ ਵਾਰਿਤਾ’’ਤਿਆਦਿ.
ਚੁਤਾ ਸਲਿਙ੍ਗਤੋ ਨਟ੍ਠਾ, ਦੇਸਨ੍ਤਰਪਕ੍ਕਮੇਨ ਅਦਸ੍ਸਨਂ ਨ ਗਤਾ. ਕਣ੍ਟਕਸਾਖਾ ਵਿਯਾਤਿ ਕੁਰਣ੍ਟਕਅਪਾਮਗ੍ਗਕਣ੍ਟਕਲਸਿਕਾਹਿ ਸਾਖਾ ਵਿਯ.
ਉਪਸ੍ਸਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੧੧. ਚੀਵਰਸੁਤ੍ਤਵਣ੍ਣਨਾ
੧੫੪. ਰਾਜਗਹਸ੍ਸ ਦਕ੍ਖਿਣਭਾਗੇ ਗਿਰਿ ਦਕ੍ਖਿਣਾਗਿਰਿ ਣ-ਕਾਰੇ ਅ-ਕਾਰਸ੍ਸ ਦੀਘਂ ਕਤ੍ਵਾ, ਤਸ੍ਸ ਦਕ੍ਖਿਣਭਾਗੇ ਜਨਪਦੋਪਿ ‘‘ਦਕ੍ਖਿਣਾਗਿਰੀ’’ਤਿ ਵੁਚ੍ਚਤਿ, ‘‘ਗਿਰਿਤੋ ਦਕ੍ਖਿਣਭਾਗੋ’’ਤਿ ਕਤ੍ਵਾ. ਏਕਦਿਵਸੇਨਾਤਿ ਏਕੇਨ ਦਿਵਸੇਨ ਉਪ੍ਪਬ੍ਬਾਜੇਸੁਂ ਤੇਸਂ ਸਦ੍ਧਾਪਬ੍ਬਜਿਤਾਭਾਵਤੋ.
ਯਤ੍ਥ ਚਤ੍ਤਾਰੋ ਵਾ ਉਤ੍ਤਰਿ ਵਾ ਭਿਕ੍ਖੂ ਅਕਪ੍ਪਿਯਨਿਮਨ੍ਤਨਂ ਸਾਦਿਯਿਤ੍ਵਾ ਪਞ੍ਚਨ੍ਨਂ ਭੋਜਨਾਨਂ ਅਞ੍ਞਤਰਂ ਭੋਜਨਂ ਏਕਤੋ ਪਟਿਗ੍ਗਣ੍ਹਿਤ੍ਵਾ ਭੁਞ੍ਜਨ੍ਤਿ, ਏਤਂ ਗਣਭੋਜਨਂ ਨਾਮ, ਤਂ ਤਿਣ੍ਣਂ ਭਿਕ੍ਖੂਨਂ ਭੁਞ੍ਜਿਤੁਂ ਵਟ੍ਟਤੀਤਿ ‘‘ਤਿਕਭੋਜਨਂ ਪਞ੍ਞਤ੍ਤ’’ਨ੍ਤਿ ਵਚਨੇਨ ਗਣਭੋਜਨਂ ਪਟਿਕ੍ਖਿਤ੍ਤਨ੍ਤਿ ਵੁਤ੍ਤਂ ਹੋਤਿ. ਤਯੋ ਅਤ੍ਥਵਸੇ ਪਟਿਚ੍ਚ ਅਨੁਞ੍ਞਾਤਤ੍ਤਾਪਿ ‘‘ਤਿਕਭੋਜਨ’’ਨ੍ਤਿ ਵਦਨ੍ਤਿ.
‘‘ਦੁਮ੍ਮਙ੍ਕੂਨਂ ਨਿਗ੍ਗਹੋ ਏਵ ਪੇਸਲਾਨਂ ਫਾਸੁਵਿਹਾਰੋ’’ਤਿ ਇਦਂ ਏਕਂ ਅਙ੍ਗਂ. ਤੇਨੇਵਾਹ ‘‘ਦੁਮ੍ਮਙ੍ਕੂਨਂ ਨਿਗ੍ਗਹੇਨੇਵਾ’’ਤਿਆਦਿ. ‘‘ਯਥਾ ਦੇਵਦਤ੍ਤੋ…ਪੇ… ਸਙ੍ਘਂ ਭਿਨ੍ਦੇਯ੍ਯੁ’’ਨ੍ਤਿ ਇਮਿਨਾ ਕਾਰਣੇਨ ਤਿਕਭੋਜਨਂ ਪਞ੍ਞਤ੍ਤਂ.
ਅਥ ਕਿਞ੍ਚਰਹੀਤਿ ਅਥ ਕਸ੍ਮਾ ਤ੍ਵਂ ਅਸਮ੍ਪਨ੍ਨਗਣਂ ਬਨ੍ਧਿਤ੍ਵਾ ਚਰਸੀਤਿ ਅਧਿਪ੍ਪਾਯੋ. ਅਸਮ੍ਪਨ੍ਨਾਯ ਪਰਿਸਾਯ ਚਾਰਿਕਾਚਰਣਂ ਕੁਲਾਨੁਦ੍ਦਯਾਯ ਨ ਹੋਤਿ, ਕੁਲਾਨਂ ਘਾਤਿਤਤ੍ਤਾਤਿ ਅਧਿਪ੍ਪਾਯੇਨ ਥੇਰੋ ‘‘ਸਸ੍ਸਘਾਤਂ ਮਞ੍ਞੇ ਚਰਸੀ’’ਤਿਆਦਿਮਵੋਚ.
ਸੋਧੇਨ੍ਤੋ ਤਸ੍ਸਾ ਅਤਿਵਿਯ ਪਰਿਸੁਦ੍ਧਭਾਵਦਸ੍ਸਨੇਨ. ਉਦ੍ਦਿਸਿਤੁਂ ਨ ਜਾਨਾਮਿ ਤਥਾ ਚਿਤ੍ਤਸ੍ਸੇਵ ਅਨੁਪ੍ਪਨ੍ਨਪੁਬ੍ਬਤ੍ਤਾ. ਕਿਞ੍ਚਨਂ ਕਿਲੇਸਵਤ੍ਥੁ. ਸਙ੍ਗਹੇਤਬ੍ਬਖੇਤ੍ਤਵਤ੍ਥੁ ਪਲਿਬੋਧੋ, ਆਲਯੋ ਅਪੇਕ੍ਖਾ. ਓਕਾਸਾਭਾਵਤੋਤਿ ਬਹੁਕਿਚ੍ਚਕਰਣੀਯਤਾਯ ਕੁਸਲਕਿਰਿਯਾਯ ਓਕਾਸਾਭਾਵਤੋ. ਸਨ੍ਨਿਪਾਤਟ੍ਠਾਨਤੋਤਿ ਸਙ੍ਕੇਤਂ ਕਤ੍ਵਾ ਵਿਯ ਕਿਲੇਸਰਜਾਨਂ ਤਤ੍ਥ ਸਨ੍ਨਿਜ੍ਝਪਵਤ੍ਤਨਤੋ.
ਸਿਕ੍ਖਤ੍ਤਯਬ੍ਰਹ੍ਮਚਰਿਯਨ੍ਤਿ ਅਧਿਸੀਲਸਿਕ੍ਖਾਦਿਸਿਕ੍ਖਤ੍ਤਯਸਙ੍ਗਹਂ ਬ੍ਰਹ੍ਮਂ ਸੇਟ੍ਠਂ ਚਰਿਯਂ. ਖਣ੍ਡਾਦਿਭਾਵਾਪਾਦਨੇਨ ਅਖਣ੍ਡਂ ਕਤ੍ਵਾ. ਲਕ੍ਖਣਵਚਨਞ੍ਹੇਤਂ. ਕਿਞ੍ਚਿ ਸਿਕ੍ਖੇਕਦੇਸਂ ਅਸੇਸੇਤ੍ਵਾ ਏਕਨ੍ਤੇਨੇਵ ਪਰਿਪੂਰੇਤਬ੍ਬਤਾਯ ਏਕਨ੍ਤਪਰਿਪੁਣ੍ਣਂ. ਚਿਤ੍ਤੁਪ੍ਪਾਦਮਤ੍ਤਮ੍ਪਿ ਸਂਕਿਲੇਸਮਲਂ ਅਨੁਪ੍ਪਾਦੇਤ੍ਵਾ ਅਚ੍ਚਨ੍ਤਮੇਵ ਵਿਸੁਦ੍ਧਂ ਕਤ੍ਵਾ ਪਰਿਹਰਿਤਬ੍ਬਤਾਯ ਏਕਨ੍ਤਪਰਿਸੁਦ੍ਧਂ. ਤਤੋ ਏਵ ਸਙ੍ਖਂ ਵਿਯ ਲਿਖਿਤਨ੍ਤਿ ਸਙ੍ਖਲਿਖਿਤਂ. ਤੇਨਾਹ ‘‘ਲਿਖਿਤਸਙ੍ਖਸਦਿਸ’’ਨ੍ਤਿ. ਦਾਠਿਕਾਪਿ ਤਗ੍ਗਹਣੇਨੇਵ ਗਹੇਤ੍ਵਾ ‘‘ਮਸ੍ਸੁ’’ਤ੍ਵੇਵ ਵੁਤ੍ਤਂ, ਨ ਏਤ੍ਥ ਕੇਵਲਂ ਮਸ੍ਸੁਯੇਵਾਤਿ ਅਤ੍ਥੋ. ਕਸਾਯੇਨ ਰਤ੍ਤਾਨਿ ਕਾਸਾਯਾਨਿ.
ਵਙ੍ਗਸਾਟਕੋਤਿ ਵਙ੍ਗਦੇਸੇ ਉਪ੍ਪਨ੍ਨਸਾਟਕੋ. ਏਸਾਤਿ ਮਹਾਕਸ੍ਸਪਤ੍ਥੇਰੋ. ਅਭਿਨੀਹਾਰਤੋ ਪਟ੍ਠਾਯ ਪਣਿਧਾਨਤੋ ਪਭੁਤਿ, ਅਯਂ ਇਦਾਨਿ ਵੁਚ੍ਚਮਾਨਾ. ਅਗ੍ਗਸਾਵਕਦ੍ਵਯਂ ਉਪਾਦਾਯ ਤਤਿਯਤ੍ਤਾ ‘‘ਤਤਿਯਸਾਵਕ’’ਨ੍ਤਿ ਵੁਤ੍ਤਂ. ਅਟ੍ਠਸਟ੍ਠਿਭਿਕ੍ਖੁਸਤਸਹਸ੍ਸਨ੍ਤਿ ਭਿਕ੍ਖੂਨਂ ਸਤਸਹਸ੍ਸਞ੍ਚੇਵ ਸਟ੍ਠਿਸਹਸ੍ਸਾਨਿ ਚ ਅਟ੍ਠ ਚ ਸਹਸ੍ਸਾਨਿ.
ਅਯਞ੍ਚ ਅਯਞ੍ਚ ਗੁਣੋਤਿ ਸੀਲਤੋ ਪਟ੍ਠਾਯ ਯਾਵ ਅਗ੍ਗਫਲਾ ਗੁਣੋਤਿ ਕਿਤ੍ਤੇਨ੍ਤੋ ਮਹਾਸਮੁਦ੍ਦਂ ਪੂਰਯਮਾਨੋ ਵਿਯ ਕਥੇਸਿ.
ਕੋਲਾਹਲਨ੍ਤਿ ਦੇਵਤਾਹਿ ਨਿਬ੍ਬਤ੍ਤਿਤੋ ਕੋਲਾਹਲੋ.
ਖੁਦ੍ਦਕਾਦਿਵਸੇਨ ਪਞ੍ਚਵਣ੍ਣਾ. ਤਰਣਂ ਵਾ ਹੋਤੁ ਮਰਣਂ ਵਾਤਿ ਮਹੋਘਂ ਓਗਾਹਨ੍ਤੋ ਪੁਰਿਸੋ ਵਿਯ ਮਚ੍ਛੇਰਸਮੁਦ੍ਦਂ ਉਤ੍ਤਰਨ੍ਤੋ ਪਚ੍ਛਾਪਿ…ਪੇ… ਪਾਦਮੂਲੇ ਠਪੇਸਿ ਭਗਵਤੋ ਧਮ੍ਮਦੇਸਨਾਯ ਮਚ੍ਛੇਰਪਹਾਨਸ੍ਸ ਕਥਿਤਤ੍ਤਾ.
ਸਤ੍ਥੁ ਗੁਣਾ ਕਥਿਤਾ ਨਾਮ ਹੋਨ੍ਤੀਤਿ ਵੁਤ੍ਤਂ ‘‘ਸਤ੍ਥੁ ਗੁਣੇ ਕਥੇਨ੍ਤਸ੍ਸਾ’’ਤਿ. ਤਤੋ ਪਟ੍ਠਾਯਾਤਿ ਤਦਾ ਸਤ੍ਥੁ ਸਮ੍ਮੁਖਾ ਧਮ੍ਮਸ੍ਸਵਨਤੋ ਪਟ੍ਠਾਯ.
ਤਥਾਗਤਮਞ੍ਚਸ੍ਸਾਤਿ ਤਥਾਗਤਸ੍ਸ ਪਰਿਭੋਗਮਞ੍ਚਸ੍ਸ. ਦਾਨਂ ਦਤ੍ਵਾ ਬ੍ਰਾਹ੍ਮਣਸ੍ਸ ਪੁਰੋਹਿਤਟ੍ਠਾਨੇ ਠਪੇਸਿ. ਤਾਦਿਸਸ੍ਸੇਵ ਸੇਟ੍ਠਿਨੋ ਧੀਤਾ ਹੁਤ੍ਵਾ.
ਅਦਿਨ੍ਨਵਿਪਾਕਸ੍ਸਾਤਿ ਪੁਬ੍ਬੇ ਕਤੂਪਚਿਤਸ੍ਸ ਸਬ੍ਬਸੋ ਨ ਦਿਨ੍ਨਵਿਪਾਕਸ੍ਸ. ਤਸ੍ਸ ਕਮ੍ਮਸ੍ਸਾਤਿ ਤਸ੍ਸ ਪਚ੍ਚੇਕਬੁਦ੍ਧਸ੍ਸ ਪਤ੍ਤੇ ਪਿਣ੍ਡਪਾਤਂ ਛਿਨ੍ਦਿਤ੍ਵਾ ਕਲਲਪੂਰਣਕਮ੍ਮਸ੍ਸ. ਤਸ੍ਮਿਂਯੇਵ ਅਤ੍ਤਭਾਵੇ ਸਤ੍ਤਸੁ ਠਾਨੇਸੁ ਦੁਗ੍ਗਨ੍ਧਸਰੀਰਤਾਯ ਪਟਿਨਿਵਤ੍ਤਿਤਾ. ਇਟ੍ਠਕਪਨ੍ਤੀਤਿ ਸੁਵਣ੍ਣਿਟ੍ਠਕਪਨ੍ਤਿ. ਘਟਨਿਟ੍ਠਕਾਯਾਤਿ ਤਸ੍ਸ ਪਨ੍ਤਿਯਂ ਪਠਮਂ ਠਪਿਤਇਟ੍ਠਕਾਯ ਸਦ੍ਧਿਂ ਘਟੇਤਬ੍ਬਇਟ੍ਠਕਾਯ ਊਨਾ ਹੋਤਿ. ਭਦ੍ਦਕੇ ਕਾਲੇਤਿ ਈਦਿਸਿਯਾ ਇਟ੍ਠਕਾਯ ਇਚ੍ਛਿਤਕਾਲੇਯੇਵ ਆਗਤਾਸਿ. ਤੇਨ ਬਨ੍ਧਨੇਨਾਤਿ ਤੇਨ ਸਿਲੇਸਸਮ੍ਬਨ੍ਧੇਨ.
ਓਲਮ੍ਬਕਾਤਿ ਮੁਤ੍ਤਾਮਣਿਮਯਾ ਓਲਮ੍ਬਕਾ. ਪੁਞ੍ਞਨ੍ਤਿ ਨਤ੍ਥਿ ਨੋ ਪੁਞ੍ਞਂ ਤਂ, ਯਂ ਨਿਮਿਤ੍ਤਂ ਯਂ ਕਾਰਣਾ ਇਤੋ ਸੁਖੁਮਤਰਸ੍ਸ ਪਟਿਲਾਭੋ ਸਿਯਾਤਿ ਅਤ੍ਥੋ. ਪੁਞ੍ਞਨਿਯਾਮੇਨਾਤਿ ਪੁਞ੍ਞਾਨੁਭਾਵਸਿਦ੍ਧੇਨ ਨਿਯਾਮੇਨ. ਸੋ ਚ ਅਸ੍ਸ ਬਾਰਾਣਸਿਰਜ੍ਜਂ ਦਾਤੁਂ ਕਤੋਕਾਸੋ.
ਫੁਸ੍ਸਰਥਨ੍ਤਿ ਮਙ੍ਗਲਰਥਂ. ਉਣ੍ਹੀਸਂ ਵਾਲਬੀਜਨੀ ਖਗ੍ਗੋ ਮਣਿਪਾਦੁਕਾ ਸੇਤਚ੍ਛਤ੍ਤਨ੍ਤਿ ਪਞ੍ਚਵਿਧਂ ਰਾਜਕਕੁਧਭਣ੍ਡਂ. ਸੇਤਚ੍ਛਤ੍ਤਂ ਵਿਸੁਂ ਗਹਿਤਂ. ਦਿਬ੍ਬਵਤ੍ਥਂ ਸਾਦਿਯਿਤੁਂ ਪੁਞ੍ਞਾਨੁਭਾਵਚੋਦਿਤੋ ‘‘ਨਨੁ ਤਾਤਾ ਥੂਲ’’ਨ੍ਤਿਆਦਿਮਾਹ.
ਪਞ੍ਚ ਚਙ੍ਕਮਨਸਤਾਨੀਤਿ ਏਤ੍ਥ ਇਤਿ-ਸਦ੍ਦੇਨ ਆਦਿਅਤ੍ਥੇਨ ਅਗ੍ਗਿਸਾਲਾਦੀਨਿ ਪਬ੍ਬਜਿਤਸਾਰੁਪ੍ਪਟ੍ਠਾਨਾਨਿ ਸਙ੍ਗਣ੍ਹਾਤਿ.
ਸਾਧੁਕੀਲ਼ਿਤਨ੍ਤਿ ਅਰਿਯਾਨਂ ਪਰਿਨਿਬ੍ਬੁਤਟ੍ਠਾਨੇ ਕਾਤਬ੍ਬਸਕ੍ਕਾਰਂ ਵਦਤਿ.
ਨਪ੍ਪਮਜ੍ਜਿ ਨਿਰੋਗਾ ਅਯ੍ਯਾਤਿ ਪੁਚ੍ਛਿਤਾਕਾਰਦਸ੍ਸਨਂ. ਪਰਿਨਿਬ੍ਬੁਤਾ ਦੇਵਾਤਿ ਦੇਵੀ ਪਟਿਵਚਨਂ ਅਦਾਸਿ. ਪਟਿਯਾਦੇਤ੍ਵਾਤਿ ਨਿਯ੍ਯਾਤੇਤ੍ਵਾ. ਸਮਣਕਪਬ੍ਬਜ੍ਜਨ੍ਤਿ ਸਮਿਤਪਾਪੇਹਿ ਅਰਿਯੇਹਿ ਅਨੁਟ੍ਠਾਤਬ੍ਬਪਬ੍ਬਜ੍ਜਂ. ਸੋ ਹਿ ਰਾਜਾ ਪਚ੍ਚੇਕਬੁਦ੍ਧਾਨਂ ਵੇਸਸ੍ਸ ਦਿਟ੍ਠਤ੍ਤਾ ‘‘ਇਦਮੇਵ ਭਦ੍ਦਕ’’ਨ੍ਤਿ ਤਾਦਿਸਂਯੇਵ ਲਿਙ੍ਗਂ ਗਣ੍ਹਿ.
ਤਤ੍ਥੇਵਾਤਿ ਬ੍ਰਹ੍ਮਲੋਕੇਯੇਵ. ਵੀਸਤਿਮੇ ਵਸ੍ਸੇ ਸਮ੍ਪਤ੍ਤੇਤਿ ਆਹਰਿਤ੍ਵਾ ਸਮ੍ਬਨ੍ਧੋ. ਬ੍ਰਹ੍ਮਲੋਕਤੋ ਆਗਨ੍ਤ੍ਵਾ ਨਿਬ੍ਬਤ੍ਤਤ੍ਤਾ ਬ੍ਰਹ੍ਮਚਰਿਯਾਧਿਕਾਰਸ੍ਸ ਚਿਰਕਾਲਂ ਸਙ੍ਗਹਿਤਤ੍ਤਾ ‘‘ਏਵਰੂਪਂ ਕਥਂ ਮਾ ਕਥੇਥਾ’’ਤਿਆਦਿਮਾਹ.
ਵੀਸਤਿ ਧਰਣਾਨਿ ‘‘ਨਿਕ੍ਖ’’ਨ੍ਤਿ ਵਦਨ੍ਤਿ. ਅਲਭਨ੍ਤੋ ਨ ਵਸਾਮੀਤਿ ਸਞ੍ਞਾਪੇਸ੍ਸਾਮੀਤਿ ਸਮ੍ਬਨ੍ਧੋ.
ਇਤ੍ਥਾਕਰੋਤਿ ਇਤ੍ਥਿਰਤਨਸ੍ਸ ਉਪ੍ਪਤ੍ਤਿਟ੍ਠਾਨਂ. ਅਯ੍ਯਧੀਤਾਤਿ ਅਮ੍ਹਾਕਂ ਅਯ੍ਯਸ੍ਸ ਧੀਤਾ, ਭਦ੍ਦਕਾਪਿਲਾਨੀਤਿ ਅਤ੍ਥੋ. ਪਸਾਦਰੂਪੇਨ ਨਿਬ੍ਬਿਸਿਟ੍ਠਤਾਯ ‘‘ਮਹਾਗੀਵ’’ਨ੍ਤਿ ਪਟਿਮਾਯ ਸਦਿਸਭਾਵਮਾਹ. ਤੇਨਾਹ ‘‘ਅਯ੍ਯਧੀਤਾਯਾ’’ਤਿਆਦਿ.
ਸਮਾਨਪਣ੍ਣਨ੍ਤਿ ਸਦਿਸਪਣ੍ਣਂ, ਕੁਮਾਰਸ੍ਸ ਕੁਮਾਰਿਯਾ ਚ ਵੁਤ੍ਤਨ੍ਤਪਣ੍ਣਂ. ਇਤੋ ਚ ਏਤ੍ਤੋ ਚਾਤਿ ਤੇ ਪੁਰਿਸਾ ਸਮਾਗਮਟ੍ਠਾਨਤੋ ਮਗਧਰਟ੍ਠੇ ਮਹਾਤਿਤ੍ਥਗਾਮਂ ਮਦ੍ਦਰਟ੍ਠੇ ਸਾਗਲਨਗਰਞ੍ਚ ਉਦ੍ਦਿਸ੍ਸ ਪਕ੍ਕਮਨ੍ਤਾ ਅਞ੍ਞਮਞ੍ਞਂ ਵਿਸ੍ਸਜ੍ਜੇਨ੍ਤਾ ਨਾਮ ਹੋਨ੍ਤੀਤਿ ‘‘ਇਤੋ ਚ ਏਤ੍ਤੋ ਚ ਪੇਸੇਸੁ’’ਨ੍ਤਿ ਵੁਤ੍ਤਾ.
ਪੁਪ੍ਫਦਾਮਨ੍ਤਿ ਹਤ੍ਥਿਹਤ੍ਥਪ੍ਪਮਾਣਂ ਪੁਪ੍ਫਦਾਮਂ. ਤਾਨਿ ਪੁਪ੍ਫਦਾਮਾਨਿ. ਤੇਤਿ ਉਭੋ ਭਦ੍ਦਾ ਚੇਵ ਪਿਪ੍ਪਲਿਕੁਮਾਰੋ ਚ. ਲੋਕਾਮਿਸੇਨਾਤਿ ਗੇਹਸ੍ਸਿਤਪੇਮੇਨ, ਕਾਮਸ੍ਸਾਦੇਨਾਤਿ ਅਤ੍ਥੋ. ਅਸਂਸਟ੍ਠਾਤਿ ਨ ਸਂਸਟ੍ਠਾ. ਵਿਚਾਰਯਿਂਸੁ ਘਟੇ ਜਲਨ੍ਤੇਨ ਵਿਯ ਪਦੀਪੇਨ ਅਜ੍ਝਾਸਯੇਨ ਸਮੁਜ੍ਜਲਨ੍ਤੇਨ ਵਿਮੋਕ੍ਖਬੀਜੇਨ ਸਮੁਸ੍ਸਾਹਿਤਚਿਤ੍ਤਾ. ਯਨ੍ਤਬਦ੍ਧਾਨੀਤਿ ਸਸ੍ਸਸਮ੍ਪਾਦਨਤ੍ਥਂ ਤਤ੍ਥ ਤਤ੍ਥ ਇਟ੍ਠਕਦ੍ਵਾਰਕਵਾਟਯੋਜਨਵਸੇਨ ਯਨ੍ਤਬਦ੍ਧਉਦਕਨਿਕ੍ਖਮਨਤੁਮ੍ਬਾਨਿ. ਕਮ੍ਮਨ੍ਤੋਤਿ ਕਸਿਕਮ੍ਮਕਰਣਟ੍ਠਾਨਂ. ਦਾਸਗਾਮਾਤਿ ਦਾਸਾਨਂ ਵਸਨਗਾਮਾ.
ਓਸਾਪੇਤ੍ਵਾਤਿ ਪਕ੍ਖਿਪਿਤ੍ਵਾ. ਆਕਪ੍ਪਕੁਤ੍ਤਵਸੇਨਾਤਿ ਆਕਾਰਵਸੇਨ ਕਿਰਿਯਾਵਸੇਨ ਚ. ਅਨਨੁਚ੍ਛਵਿਕਨ੍ਤਿ ਪਬ੍ਬਜਿਤਵੇਸਸ੍ਸ ਅਨਨੁਰੂਪਂ. ਤਸ੍ਸ ਮਤ੍ਥਕੇਤਿ ਦ੍ਵੇਧਾਪਥਸ੍ਸ ਦ੍ਵਿਧਾਭੂਤਟ੍ਠਾਨੇ.
ਏਤੇਸਂ ਸਙ੍ਗਹਂ ਕਾਤੁਂ ਵਟ੍ਟਤੀਤਿ ਨਿਸੀਦੀਤਿ ਸਮ੍ਬਨ੍ਧੋ. ਸਾ ਪਨ ਸਤ੍ਥੁ ਤਤ੍ਥ ਨਿਸਜ੍ਜਾ ਏਦਿਸੀਤਿ ਦਸ੍ਸੇਤੁਂ ‘‘ਨਿਸੀਦਨ੍ਤੋ ਪਨਾ’’ਤਿਆਦਿ ਵੁਤ੍ਤਂ. ਤਤ੍ਥ ਯਾ ਬੁਦ੍ਧਾਨਂ ਅਪਰਿਮਿਤਕਾਲਸਙ੍ਗਹਿਤਾ ਅਚਿਨ੍ਤੇਯ੍ਯਾਪਰਿਮੇਯ੍ਯਪੁਞ੍ਞਸਮ੍ਭਾਰੂਪਚਯਨਿਬ੍ਬਤ੍ਤਾ ਨਿਰੂਪਿਤਸਭਾਵਬੁਦ੍ਧਗੁਣਵਿਜ੍ਜੋਤਿਤਾ ਲਕ੍ਖਣਾਨੁਬ੍ਯਞ੍ਜਨਸਮੁਜ੍ਜਲਾ ਬ੍ਯਾਮਪ੍ਪਭਾਕੇਤੁਮਾਲਾਲਙ੍ਕਤਾ ਸਭਾਵਸਿਦ੍ਧਤਾਯ ਅਕਿਤ੍ਤਿਮਾ ਰੂਪਕਾਯਸਿਰੀ, ਤਂਯੇਵ ਮਹਾਕਸ੍ਸਪਸ੍ਸ ਅਦਿਟ੍ਠਪੁਬ੍ਬਂ ਪਸਾਦਸਂਵਡ੍ਢਨਤ੍ਥਂ ਅਨਿਗ੍ਗਹੇਤ੍ਵਾ ਨਿਸਿਨ੍ਨੋ ਭਗਵਾ ‘‘ਬੁਦ੍ਧਵੇਸਂ ਗਹੇਤ੍ਵਾ…ਪੇ… ਨਿਸੀਦੀ’’ਤਿ ਵੁਤ੍ਤੋ. ਅਸੀਤਿਹਤ੍ਥਂ ਪਦੇਸਂ ਬ੍ਯਾਪੇਤ੍ਵਾ ਪਵਤ੍ਤਿਯਾ ‘‘ਅਸੀਤਿਹਤ੍ਥਾ’’ਤਿ ਵੁਤ੍ਤਾ. ਸਤਸਾਖੋਤਿ ਬਹੁਸਾਖੋ ਅਨੇਕਸਾਖੋ. ਸੁਵਣ੍ਣਵਣ੍ਣੋ ਅਹੋਸਿ ਨਿਰਨ੍ਤਰਂ ਬੁਦ੍ਧਰਸ੍ਮੀਹਿ ਸਮਨ੍ਤਤੋ ਸਮੋਕਿਣ੍ਣਤ੍ਤਾ. ਏਵਂ ਵੁਤ੍ਤਪ੍ਪਕਾਰੇਨ ਵੇਦਿਤਬ੍ਬਾ.
ਰਾਜਗਹਂ ਨਾਲ਼ਨ੍ਦਨ੍ਤਿ ਚ ਸਾਮਿਅਤ੍ਥੇ ਉਪਯੋਗਵਚਨਂ ਅਨ੍ਤਰਾਸਦ੍ਦਯੋਗਤੋਤਿ ਆਹ ‘‘ਰਾਜਗਹਸ੍ਸ ਨਾਲ਼ਨ੍ਦਾਯ ਚਾ’’ਤਿ. ਨ ਹਿ ਮੇ ਇਤੋ ਅਞ੍ਞੇਨ ਸਤ੍ਥਾਰਾ ਭਵਿਤੁਂ ਸਕ੍ਕਾ ਦਿਟ੍ਠਧਮ੍ਮਿਕਸਮ੍ਪਰਾਯਿਕਪਰਮਤ੍ਥੇਹਿ ਸਤ੍ਤਾਨਂ ਯਥਾਰਹਂ ਅਨੁਸਾਸਨਸਮਤ੍ਥਸ੍ਸ ਅਞ੍ਞਸ੍ਸ ਸਦੇਵਕੇ ਅਭਾਵਤੋ. ਨ ਹਿ ਮੇ ਇਤੋ ਅਞ੍ਞੇਨ ਸੁਗਤੇਨ ਭਵਿਤੁਂ ਸਕ੍ਕਾ ਸੋਭਨਗਮਨਗੁਣਗਣਯੁਤ੍ਤਸ੍ਸ ਅਞ੍ਞਸ੍ਸ ਅਭਾਵਤੋ. ਨ ਹਿ ਮੇ ਇਤੋ ਅਞ੍ਞੇਨ ਸਮ੍ਮਾਸਮ੍ਬੁਦ੍ਧੇਨ ਭਵਿਤੁਂ ਸਕ੍ਕਾ ਸਮ੍ਮਾ ਸਬ੍ਬਧਮ੍ਮਾਨਂ ਸਯਮ੍ਭੁਞਾਣੇਨ ਅਭਿਸਮ੍ਬੁਦ੍ਧਸ੍ਸ ਅਭਾਵਤੋ. ਇਮਿਨਾਤਿ ‘‘ਸਤ੍ਥਾ ਮੇ, ਭਨ੍ਤੇ’’ਤਿ ਇਮਿਨਾ ਵਚਨੇਨ.
ਅਜਾਨਮਾਨੋਵ ਸਬ੍ਬਞ੍ਞੇਯ੍ਯਨ੍ਤਿ ਅਧਿਪ੍ਪਾਯੋ. ਸਬ੍ਬਚੇਤਸਾਤਿ ਸਬ੍ਬਅਜ੍ਝਤ੍ਤਿਕਙ੍ਗਪਰਿਪੁਣ੍ਣਚੇਤਸਾ. ਸਮਨ੍ਨਾਗਤਨ੍ਤਿ ਸਮ੍ਪਨ੍ਨਂ ਸਮ੍ਮਦੇਵ ਅਨੁ ਅਨੁ ਆਗਤਂ ਉਪਗਤਂ. ਫਲੇਯ੍ਯਾਤਿ ਵਿਦਾਲੇਯ੍ਯ. ਵਿਲਯਨ੍ਤਿ ਵਿਨਾਸਂ.
ਏਵਂ ਸਿਕ੍ਖਿਤਬ੍ਬਨ੍ਤਿ ਇਦਾਨਿ ਵੁਚ੍ਚਮਾਨਾਕਾਰੇਨ. ਹਿਰੋਤ੍ਤਪ੍ਪਸ੍ਸ ਬਹਲਤਾ ਨਾਮ ਵਿਪੁਲਤਾਤਿ ਆਹ ‘‘ਮਹਨ੍ਤ’’ਨ੍ਤਿ. ਪਠਮਤਰਮੇਵਾਤਿ ਪਗੇਵ ਉਪਸਙ੍ਕਮਨਤੋ. ਤਥਾ ਅਤਿਮਾਨਪਹੀਨੋ ਅਸ੍ਸ, ਹਿਰਿਓਤ੍ਤਪ੍ਪਂ ਯਥਾ ਸਣ੍ਠਾਤਿ. ਕੁਸਲਸਨ੍ਨਿਸ੍ਸਿਤਨ੍ਤਿ ਅਨਵਜ੍ਜਧਮ੍ਮਨਿਸ੍ਸਿਤਂ. ਅਟ੍ਠਿਕਨ੍ਤਿ ਤੇਨ ਧਮ੍ਮੇਨ ਅਟ੍ਠਿਕਂ. ਆਦਿਤੋ ਪਟ੍ਠਾਯ ਯਾਵ ਪਰਿਯੋਸਾਨਾ ਸਵਨਚਿਤ੍ਤਂ ‘‘ਸਬ੍ਬਚੇਤੋ’’ਤਿ ਅਧਿਪ੍ਪੇਤਨ੍ਤਿ ਆਹ ‘‘ਚਿਤ੍ਤਸ੍ਸ ਥੋਕਮ੍ਪਿ ਬਹਿ ਗਨ੍ਤੁਂ ਅਦੇਨ੍ਤੋ’’ਤਿ. ਤੇਨ ਸਮੋਧਾਨਂ ਦਸ੍ਸੇਤਿ. ਸਬ੍ਬੇਨ…ਪੇ… ਸਮਨ੍ਨਾਹਰਿਤ੍ਵਾ ਆਰਮ੍ਭਤੋ ਪਭੁਤਿ ਯਾਵ ਦੇਸਨਾ ਨਿਪ੍ਫਨ੍ਨਾ, ਤਾਵ ਅਨ੍ਤਰਨ੍ਤਰਾ ਪਵਤ੍ਤੇਨ ਸਬ੍ਬੇਨ ਸਮਨ੍ਨਾਹਾਰਚਿਤ੍ਤੇਨ ਧਮ੍ਮਂਯੇਵ ਸਮਨ੍ਨਾਹਰਿਤ੍ਵਾ. ਠਪਿਤਸੋਤੋਤਿ ਧਮ੍ਮੇ ਨਿਹਿਤਸੋਤੋ. ਓਦਹਿਤ੍ਵਾਤਿ ਅਪਿਹਿਤਂ ਕਤ੍ਵਾ. ਪਠਮਜ੍ਝਾਨਵਸੇਨਾਤਿ ਇਦਂ ਅਸੁਭੇਸੁ ਤਸ੍ਸੇਵ ਇਜ੍ਝਤੋ, ਇਤਰਤ੍ਥਞ੍ਚ ਸੁਖਸਮ੍ਪਯੁਤ੍ਤਤਾ ਵੁਤ੍ਤਾ.
ਸਂਸਾਰਸਾਗਰੇ ਪਰਿਬ੍ਭਮਨ੍ਤਸ੍ਸ ਇਣਟ੍ਠਾਨੇ ਤਿਟ੍ਠਨ੍ਤਿ ਕਿਲੇਸਾ ਆਸਵਸਭਾਵਾਪਾਦਨਤੋਤਿ ਆਹ ‘‘ਸਰਣੋਤਿ ਸਕਿਲੇਸੋ’’ਤਿ. ਚਤ੍ਤਾਰੋ ਹਿ ਪਰਿਭੋਗਾਤਿਆਦੀਸੁ ਯਂ ਵਤ੍ਤਬ੍ਬਂ, ਤਂ ਵਿਸੁਦ੍ਧਿਮਗ੍ਗਤ੍ਤਂ ਸਂਵਣ੍ਣਨਾਸੁ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਏਤ੍ਥ ਚ ਭਗਵਾ ਪਠਮਂ ਓਵਾਦਂ ਥੇਰਸ੍ਸ ਬ੍ਰਾਹ੍ਮਣਜਾਤਿਕਤ੍ਤਾ ਜਾਤਿਮਾਨਪਹਾਨਤ੍ਥਮਭਾਸਿ, ਦੁਤਿਯਂ ਬਾਹੁਸਚ੍ਚਂ ਨਿਸ੍ਸਾਯ ਉਪ੍ਪਜ੍ਜਨਕਅਹਂਕਾਰਪਹਾਨਤ੍ਥਂ, ਤਤਿਯਂ ਉਪਧਿਸਮ੍ਪਤ੍ਤਿਂ ਨਿਸ੍ਸਾਯ ਉਪ੍ਪਜ੍ਜਨਕਅਤ੍ਤਸਿਨੇਹਪਹਾਨਤ੍ਥਂ. ਅਟ੍ਠਮੇ ਦਿਵਸੇਤਿ ਭਗਵਤਾ ਸਮਾਗਤਦਿਵਸਤੋ ਅਟ੍ਠਮੇ ਦਿਵਸੇ.
ਮਗ੍ਗਤੋ ਓਕ੍ਕਮਨਂ ਪਠਮਤਰਂ ਭਗਵਤਾ ਸਮਾਗਤਦਿਵਸੇਯੇਵ ਅਹੋਸਿ. ਯਦਿ ਅਰਹਤ੍ਤਾਧਿਗਮੋ ਪਚ੍ਛਾ, ਅਥ ਕਸ੍ਮਾ ਪਾਲ਼ਿਯਂ ਪਗੇਵ ਸਿਦ੍ਧਂ ਵਿਯ ਵੁਤ੍ਤਨ੍ਤਿ ਆਹ ‘‘ਦੇਸਨਾਵਾਰਸ੍ਸਾ’’ਤਿਆਦਿ. ‘‘ਸਤ੍ਤਾਹਮੇਵ ਖ੍ਵਾਹਂ, ਆਵੁਸੋ ਸਰਣੋ, ਰਟ੍ਠਪਿਣ੍ਡਂ ਭੁਞ੍ਜਿ’’ਨ੍ਤਿ ਵਤ੍ਵਾ ਅਵਸਰਪ੍ਪਤ੍ਤਂ ਅਰਹਤ੍ਤਂ ਪਵੇਦੇਨ੍ਤੋ ‘‘ਅਟ੍ਠਮਿਯਾ ਅਞ੍ਞਾ ਉਦਪਾਦੀ’’ਤਿ ਆਹ. ਅਯਮੇਤ੍ਥ ਦੇਸਨਾਵਾਰਸ੍ਸ ਆਗਮੋ. ਤਤੋ ਪਰਂ ਭਗਵਤਾ ਅਤ੍ਤਨੋ ਕਤਂ ਅਨੁਗ੍ਗਹਂ ਚੀਵਰਪਰਿਵਤ੍ਤਨਂ ਦਸ੍ਸੇਨ੍ਤੋ ‘‘ਅਥ ਖੋ, ਆਵੁਸੋ’’ਤਿਆਦਿਮਾਹ.
ਅਨ੍ਤਨ੍ਤੇਨਾਤਿ ਚਤੁਗ੍ਗੁਣਂ ਕਤ੍ਵਾ ਪਞ੍ਞਤ੍ਤਾਯ ਸਙ੍ਘਾਟਿਯਾ ਅਨ੍ਤਨ੍ਤੇਨ. ਜਾਤਿਪਂਸੁਕੂਲਿਕੇਨ…ਪੇ… ਭਵਿਤੁਂ ਵਟ੍ਟਤੀਤਿ ਏਤੇਨ ਪੁਬ੍ਬੇ ਜਾਤਿਆਰਞ੍ਞਕਗ੍ਗਹਣੇਨ ਚ ਤੇਰਸ ਧੁਤਙ੍ਗਾ ਗਹਿਤਾ ਏਵਾਤਿ ਦਟ੍ਠਬ੍ਬਂ. ਅਨੁਚ੍ਛਵਿਕਂ ਕਾਤੁਨ੍ਤਿ ਅਨੁਰੂਪਂ ਪਟਿਪਤ੍ਤਿਂ ਪਟਿਪਜ੍ਜਿਤੁਂ. ਥੇਰੋ ਪਾਰੁਪੀਤਿ ਸਮ੍ਬਨ੍ਧੋ.
ਭਗਵਤੋ ਓਵਾਦਂ ਭਗਵਤੋ ਵਾ ਧਮ੍ਮਕਾਯਂ ਨਿਸ੍ਸਾਯ ਉਰਸ੍ਸ ਵਸੇਨ ਜਾਤੋਤਿ ਓਰਸੋ. ਭਗਵਤੋ ਵਾ ਧਮ੍ਮਸਰੀਰਸ੍ਸ ਮੁਖਤੋ ਸਤ੍ਤਤਿਂਸਬੋਧਿਪਕ੍ਖਿਯਤੋ ਜਾਤੋ. ਤੇਨੇਵ ਧਮ੍ਮਜਾਤਧਮ੍ਮਨਿਮ੍ਮਿਤਭਾਵੋਪਿ ਸਂਵਣ੍ਣਿਤੋਤਿ ਦਟ੍ਠਬ੍ਬੋ. ਓਵਾਦਧਮ੍ਮੋ ਏਵ ਸਤ੍ਥਾਰਾ ਦਾਤਬ੍ਬਤੋ ਥੇਰੇਨ ਆਦਾਤਬ੍ਬਤੋ ਓਵਾਦਧਮ੍ਮਦਾਯਾਦੋ, ਓਵਾਦਧਮ੍ਮਦਾਯਜ੍ਜੋਤਿ ਅਤ੍ਥੋ, ਤਂ ਅਰਹਤੀਤਿ. ਏਸ ਨਯੋ ਸੇਸਪਦੇਸੁਪਿ.
‘‘ਪਬ੍ਬਜ੍ਜਾ ਚ ਪਰਿਸੋਧਿਤਾ’’ਤਿ ਵਤ੍ਵਾ ਤਸ੍ਸਾ ਸਮ੍ਮਦੇਵ ਸੋਧਿਤਭਾਵਂ ਬ੍ਯਤਿਰੇਕਮੁਖੇਨ ਦਸ੍ਸੇਤੁਂ, ‘‘ਆਵੁਸੋ, ਯਸ੍ਸਾ’’ਤਿਆਦਿ ਵੁਤ੍ਤਂ. ਤਤ੍ਥ ਏਵਨ੍ਤਿ ਯਥਾ ਅਹਂ ਲਭਿਂ, ਏਵਂ ਸੋ ਸਤ੍ਥੁ ਸਨ੍ਤਿਕਾ ਲਭਤੀਤਿ ਯੋਜਨਾ. ਸੀਹਨਾਦਂ ਨਦਿਤੁਨ੍ਤਿ ਏਤ੍ਥਾਪਿ ਸੀਹਨਾਦਨਦਨਾ ਨਾਮ ਦੇਸਨਾਵ, ਥੇਰੋ ਸਤ੍ਥਾਰਾ ਅਤ੍ਤਨੋ ਕਤਾਨੁਗ੍ਗਹਮੇਵ ਅਨਨ੍ਤਰਸੁਤ੍ਤੇ ਵੁਤ੍ਤਨਯੇਨ ਉਲ੍ਲਿਙ੍ਗੇਤਿ, ਨ ਅਞ੍ਞਥਾ. ਨ ਹਿ ਮਹਾਥੇਰੋ ਕੇਵਲਂ ਅਤ੍ਤਨੋ ਗੁਣਾਨੁਭਾਵਂ ਵਿਭਾਵੇਤਿ. ਸੇਸਨ੍ਤਿ ਯਂ ਇਧ ਅਸਂਵਣ੍ਣਿਤਂ. ਪੁਰਿਮਨਯੇਨੇਵਾਤਿ ਅਨਨ੍ਤਰਸੁਤ੍ਤੇ ਵੁਤ੍ਤਨਯੇਨੇਵ.
ਚੀਵਰਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੧੨. ਪਰਂਮਰਣਸੁਤ੍ਤਵਣ੍ਣਨਾ
੧੫੫. ਯਥਾ ਅਤੀਤਕਪ੍ਪੇ ਅਤੀਤਾਸੁ ਜਾਤੀਸੁ ਕਮ੍ਮਕਿਲੇਸਵਸੇਨ ਆਗਤੋ, ਤਥਾ ਏਤਰਹਿਪਿ ਆਗਤੋਤਿ ਤਥਾਗਤੋ, ਯਥਾ ਯਥਾ ਵਾ ਪਨ ਕਮ੍ਮਂ ਕਤੂਪਚਿਤਂ, ਤਥਾ ਤਂ ਤਂ ਅਤ੍ਤਭਾਵਂ ਆਗਤੋ ਉਪਗਤੋ ਉਪਪਨ੍ਨੋਤਿ ਤਥਾਗਤੋ, ਸਤ੍ਤੋਤਿ ਆਹ ‘‘ਤਥਾਗਤੋਤਿ ਸਤ੍ਤੋ’’ਤਿ. ਏਤਨ੍ਤਿ ‘‘ਏਵਂ ਹੋਤਿ ਭਵਤਿ ਤਿਟ੍ਠਤਿ ਸਸ੍ਸਤਿਸਮ’’ਨ੍ਤਿ ਏਵਂ ਪਵਤ੍ਤਂ ਦਿਟ੍ਠਿਗਤਂ. ਅਤ੍ਥਸਨ੍ਨਿਸ੍ਸਿਤਂ ਨ ਹੋਤੀਤਿ ਦਿਟ੍ਠਧਮ੍ਮਿਕਸਮ੍ਪਰਾਯਿਕਪਰਮਤ੍ਥਤੋ ਸੁਖਨ੍ਤਿ ਪਸਤ੍ਥਸਨ੍ਨਿਸ੍ਸਿਤਂ ਨ ਹੋਤਿ. ਆਦਿਬ੍ਰਹ੍ਮਚਰਿਯਕਨ੍ਤਿ ਏਤ੍ਥ ਮਗ੍ਗਬ੍ਰਹ੍ਮਚਰਿਯਂ ਅਧਿਪ੍ਪੇਤਂ ਤਸ੍ਸ ਪਧਾਨਭਾਵਤੋ. ਤਸ੍ਸ ਪਨ ਏਤਂ ਦਿਟ੍ਠਿਗਤਂ ਆਦਿਪਟਿਪਦਾਮਤ੍ਤਂ ਨ ਹੋਤਿ ਅਨੁਪਕਾਰਕਤ੍ਤਾ ਵਿਲੋਮਨਤੋ ਚ. ਤਤੋ ਏਵ ਇਤਰਬ੍ਰਹ੍ਮਚਰਿਯਸ੍ਸਪਿ ਅਨਿਸ੍ਸਯੋਵ. ਸੇਸਂ ਵੁਤ੍ਤਨਯੇਨ ਵੇਦਿਤਬ੍ਬਂ.
ਪਰਂਮਰਣਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੧੩. ਸਦ੍ਧਮ੍ਮਪ੍ਪਤਿਰੂਪਕਸੁਤ੍ਤਵਣ੍ਣਨਾ
੧੫੬. ਆਜਾਨਾਤਿ ਹੇਟ੍ਠਿਮਮਗ੍ਗੇਹਿ ਞਾਤਮਰਿਯਾਦਂ ਅਨਤਿਕ੍ਕਮਿਤ੍ਵਾਵ ਜਾਨਾਤਿ ਪਟਿਵਿਜ੍ਝਤੀਤਿ ਅਞ੍ਞਾ, ਅਗ੍ਗਮਗ੍ਗਪਞ੍ਞਾ. ਅਞ੍ਞਸ੍ਸ ਅਯਨ੍ਤਿ ਅਞ੍ਞਾ, ਅਰਹਤ੍ਤਫਲਂ. ਤੇਨਾਹ ‘‘ਅਰਹਤ੍ਤੇ’’ਤਿ.
ਓਭਾਸੇਤਿ ਓਭਾਸਨਿਮਿਤ੍ਤਂ. ‘‘ਚਿਤ੍ਤਂ ਵਿਕਮ੍ਪਤੀ’’ਤਿ ਪਦਦ੍ਵਯਂ ਆਨੇਤ੍ਵਾ ਸਮ੍ਬਨ੍ਧੋ. ਓਭਾਸੇਤਿ ਵਿਸਯਭੂਤੇ. ਉਪਕ੍ਕਿਲੇਸੇਹਿ ਚਿਤ੍ਤਂ ਵਿਕਮ੍ਪਤੀਤਿ ਯੋਜਨਾ. ਤੇਨਾਹ ‘‘ਯੇਹਿ ਚਿਤ੍ਤਂ ਪਵੇਧਤੀ’’ਤਿ. ਸੇਸੇਸੁਪਿ ਏਸੇਵ ਨਯੋ.
ਉਪਟ੍ਠਾਨੇਤਿ ਸਤਿਯਂ. ਉਪੇਕ੍ਖਾਯ ਚਾਤਿ ਵਿਪਸ੍ਸਨੁਪੇਕ੍ਖਾਯ ਚ. ਏਤ੍ਥ ਚ ਵਿਪਸ੍ਸਨਾਚਿਤ੍ਤਸਮੁਟ੍ਠਾਨਸਨ੍ਤਾਨਵਿਨਿਮੁਤ੍ਤਂ ਪਭਾਸਨਂ ਰੂਪਾਯਤਨਂ ਓਭਾਸੋ. ਞਾਣਾਦਯੋ ਵਿਪਸ੍ਸਨਾਚਿਤ੍ਤਸਮ੍ਪਯੁਤ੍ਤਾਵ. ਸਕਸਕਕਿਚ੍ਚੇ ਸਵਿਸੇਸੋ ਹੁਤ੍ਵਾ ਪਵਤ੍ਤੋ ਅਧਿਮੋਕ੍ਖੋ ਸਦ੍ਧਾਧਿਮੋਕ੍ਖੋ. ਉਪਟ੍ਠਾਨਂ ਸਤਿ. ਉਪੇਕ੍ਖਾਤਿ ਆਵਜ੍ਜਨੁਪੇਕ੍ਖਾ. ਸਾ ਹਿ ਆਵਜ੍ਜਨਚਿਤ੍ਤਸਮ੍ਪਯੁਤ੍ਤਾ ਚੇਤਨਾ. ਆਵਜ੍ਜਨਅਜ੍ਝੁਪੇਕ੍ਖਨਵਸੇਨ ਪਵਤ੍ਤਿਯਾ ਇਧ ‘‘ਆਵਜ੍ਜਨੁਪੇਕ੍ਖਾ’’ਤਿ ਵੁਚ੍ਚਤਿ. ਪੁਨ ਉਪੇਕ੍ਖਾਯਾਤਿ ਵਿਪਸ੍ਸਨੁਪੇਕ੍ਖਾਵ ਅਨੇਨ ਸਮਜ੍ਝਤ੍ਤਤਾਯ ਏਵਂ ਵੁਤ੍ਤਾ. ਨਿਕਨ੍ਤਿ ਨਾਮ ਵਿਪਸ੍ਸਨਾਯ ਨਿਕਾਮਨਾ ਅਪੇਕ੍ਖਾ. ਸੁਖੁਮਤਰਕਿਲੇਸੋ ਵਾ ਸਿਯਾ ਦੁਵਿਞ੍ਞੇਯ੍ਯੋ.
ਇਮਾਨਿ ਦਸ ਠਾਨਾਨੀਤਿ ਇਮਾਨਿ ਓਭਾਸਾਦੀਨਿ ਉਪਕ੍ਕਿਲੇਸੁਪ੍ਪਤ੍ਤਿਯਾ ਠਾਨਾਨਿ ਉਪਕ੍ਕਿਲੇਸਵਤ੍ਥੂਨਿ. ਪਞ੍ਞਾ ਯਸ੍ਸ ਪਰਿਚਿਤਾਤਿ ਯਸ੍ਸ ਪਞ੍ਞਾ ਪਰਿਚਿਤਵਤੀ ਯਾਥਾਵਤੋ ਜਾਨਾਤਿ. ‘‘ਇਮਾਨਿ ਨਿਸ੍ਸਾਯ ਅਦ੍ਧਾ ਮਗ੍ਗਪ੍ਪਤ੍ਤੋ ਫਲਪ੍ਪਤ੍ਤੋ ਅਹ’’ਨ੍ਤਿ ਪਵਤ੍ਤਅਧਿਮਾਨੋ ਧਮ੍ਮੁਦ੍ਧਚ੍ਚਂ ਧਮ੍ਮੂਪਨਿਸ੍ਸਯੋ ਵਿਕ੍ਖੇਪੋ. ਤਤ੍ਥ ਕੁਸਲੋ ਹਿ ਤਂ ਯਾਥਾਵਤੋ ਜਾਨਨ੍ਤੋ ਨ ਚ ਤਤ੍ਥ ਸਮ੍ਮੋਹਂ ਗਚ੍ਛਤਿ.
ਅਧਿਗਮਸਦ੍ਧਮ੍ਮਪ੍ਪਤਿਰੂਪਕਂ ਨਾਮ ਅਨਧਿਗਤੇ ਅਧਿਗਤਮਾਨਿਭਾਵਾਵਹਤ੍ਤਾ. ਯਦਗ੍ਗੇਨ ਵਿਪਸ੍ਸਨਾਞਾਣਸ੍ਸ ਉਪਕ੍ਕਿਲੇਸੋ, ਤਦਗ੍ਗੇਨ ਪਟਿਪਤ੍ਤਿਸਦ੍ਧਮ੍ਮਪ੍ਪਤਿਰੂਪਕੋਤਿਪਿ ਸਕ੍ਕਾ ਵਿਞ੍ਞਾਤੁਂ. ਧਾਤੁਕਥਾਤਿ ਮਹਾਧਾਤੁਕਥਂ ਵਦਤਿ. ਵੇਦਲ੍ਲਪਿਟਕਨ੍ਤਿ ਵੇਤੁਲ੍ਲਪਿਟਕਂ. ਤਂ ਨਾਗਭਵਨਤੋ ਆਨੀਤਨ੍ਤਿ ਵਦਨ੍ਤਿ. ਵਾਦਭਾਸਿਤਨ੍ਤਿ ਅਪਰੇ. ਅਬੁਦ੍ਧਵਚਨਂ ਬੁਦ੍ਧਵਚਨੇਨ ਵਿਰੁਜ੍ਝਨਤੋ. ਨ ਹਿ ਸਮ੍ਬੁਦ੍ਧੋ ਪੁਬ੍ਬਾਪਰਵਿਰੁਦ੍ਧਂ ਵਦਤਿ. ਤਤ੍ਥ ਸਲ੍ਲਂ ਉਪਟ੍ਠਪੇਨ੍ਤਿ ਕਿਲੇਸਵਿਨਯਂ ਨ ਸਨ੍ਦਿਸ੍ਸਤਿ, ਅਞ੍ਞਦਤ੍ਥੁ ਕਿਲੇਸੁਪ੍ਪਤ੍ਤਿਯਾ ਪਚ੍ਚਯੋ ਹੋਤੀਤਿ.
ਅਵਿਕ੍ਕਯਮਾਨਨ੍ਤਿ ਵਿਕ੍ਕਯਂ ਅਗਚ੍ਛਨ੍ਤਂ. ਤਨ੍ਤਿ ਸੁਵਣ੍ਣਭਣ੍ਡਂ.
ਨ ਸਕ੍ਖਿਂਸੁ ਞਾਣਸ੍ਸ ਅਵਿਸਦਭਾਵਤੋ. ਏਸ ਨਯੋ ਇਤੋ ਪਰੇਸੁਪਿ.
ਇਦਾਨਿ ‘‘ਭਿਕ੍ਖੂ ਪਟਿਸਮ੍ਭਿਦਾਪ੍ਪਤ੍ਤਾ ਅਹੇਸੁ’’ਨ੍ਤਿਆਦਿਨਾ ਵੁਤ੍ਤਮੇਵ ਅਤ੍ਥਂ ਕਾਰਣਤੋ ਵਿਭਾਵੇਤੁਂ ਪੁਨ ‘‘ਪਠਮਬੋਧਿਯਂ ਹੀ’’ਤਿਆਦਿ ਵੁਤ੍ਤਂ. ਤਤ੍ਥ ਪਟਿਪਤ੍ਤਿਂ ਪੂਰਯਿਂਸੂਤਿ ਅਤੀਤੇ ਕਦਾ ਤੇ ਪਟਿਸਮ੍ਭਿਦਾਵਹਂ ਪਟਿਪਤ੍ਤਿਂ ਪੂਰਯਿਂਸੁ? ਪਠਮਬੋਧਿਕਾਲਿਕਾ ਭਿਕ੍ਖੂ. ਨ ਹਿ ਅਤ੍ਤਸਮ੍ਮਾਪਣਿਧਿਯਾ ਪੁਬ੍ਬੇਕਤਪੁਞ੍ਞਤਾਯ ਚ ਵਿਨਾ ਤਾਦਿਸਂ ਭਵਤਿ. ਏਸ ਨਯੋ ਇਤੋ ਪਰੇਸੁਪਿ. ਤਦਾ ਪਟਿਪਤ੍ਤਿਸਦ੍ਧਮ੍ਮੋ ਅਨ੍ਤਰਹਿਤੋ ਨਾਮ ਭਵਿਸ੍ਸਤੀਤਿ ਏਤੇਨ ਅਰਿਯਮਗ੍ਗੇਨ ਆਸਨ੍ਨਾ ਏਵ ਪੁਬ੍ਬਭਾਗਪਟਿਪਦਾ ਪਟਿਪਤ੍ਤਿਸਦ੍ਧਮ੍ਮੋਤਿ ਦਸ੍ਸੇਤਿ.
ਦ੍ਵੀਸੂਤਿ ਸੁਤ੍ਤਾਭਿਧਮ੍ਮਪਿਟਕੇਸੁ ਅਨ੍ਤਰਹਿਤੇਸੁਪਿ. ਅਨਨ੍ਤਰਹਿਤਮੇਵ ਅਧਿਸੀਲਸਿਕ੍ਖਾਯਂ ਠਿਤਸ੍ਸ ਇਤਰਸਿਕ੍ਖਾਦ੍ਵਯਸਮੁਟ੍ਠਾਪਿਤਤੋ. ਕਿਂ ਕਾਰਣਾਤਿ ਕੇਨ ਕਾਰਣੇਨ, ਅਞ੍ਞਸ੍ਮਿਂ ਧਮ੍ਮੇ ਅਨ੍ਤਰਹਿਤੇ ਅਞ੍ਞਤਰਸ੍ਸ ਧਮ੍ਮਸ੍ਸ ਅਨਨ੍ਤਰਧਾਨਂ ਵੁਚ੍ਚਤੀਤਿ ਅਧਿਪ੍ਪਾਯੋ. ਪਟਿਪਤ੍ਤਿਯਾ ਪਚ੍ਚਯੋ ਹੋਤਿ ਅਨਵਸੇਸਤੋ ਪਟਿਪਤ੍ਤਿਕ੍ਕਮਸ੍ਸ ਪਰਿਦੀਪਨਤੋ. ਪਟਿਪਤ੍ਤਿ ਅਧਿਗਮਸ੍ਸ ਪਚ੍ਚਯੋ ਵਿਸੇਸਲਕ੍ਖਣਪਟਿਵੇਧਭਾਵਤੋ. ਪਰਿਯਤ੍ਤਿਯੇਵ ਪਮਾਣਂ ਸਾਸਨਸ੍ਸ ਠਿਤਿਯਾਤਿ ਅਧਿਪ੍ਪਾਯੋ.
ਨਨੁ ਚ ਸਾਸਨਂ ਓਸਕ੍ਕਿਤਂ ਪਰਿਯਤ੍ਤਿਯਾ ਵਤ੍ਤਮਾਨਾਯਾਤਿ ਅਧਿਪ੍ਪਾਯੋ. ਅਨਾਰਾਧਕਭਿਕ੍ਖੂਤਿ ਸੀਲਮਤ੍ਤਸ੍ਸਪਿ ਨ ਆਰਾਧਕੋ ਦੁਸ੍ਸੀਲੋ. ਇਮਸ੍ਮਿਨ੍ਤਿ ਇਮਸ੍ਮਿਂ ਪਾਤਿਮੋਕ੍ਖੇ. ਵਤ੍ਤਨ੍ਤਾਤਿ ‘‘ਸੀਲਂ ਅਕੋਪੇਤ੍ਵਾ ਠਿਤਾ ਅਤ੍ਥੀ’’ਤਿ ਪੁਚ੍ਛਿ.
ਏਤੇਸੂਤਿ ਏਵਂ ਮਹਨ੍ਤੇਸੁ ਸਕਲਂ ਲੋਕਂ ਅਜ੍ਝੋਤ੍ਥਰਿਤੁਂ ਸਮਤ੍ਥੇਸੁ ਚਤੂਸੁ ਮਹਾਭੂਤੇਸੁ. ਤਸ੍ਮਾਤਿ ਯਸ੍ਮਾ ਅਞ੍ਞੇਨ ਕੇਨਚਿ ਅਤਿਮਹਨ੍ਤੇਨਪਿ ਸਦ੍ਧਮ੍ਮੋ ਨ ਅਨ੍ਤਰਧਾਯਤਿ, ਸਮਯਨ੍ਤਰੇਨ ਪਨ ਵਤ੍ਤਬ੍ਬਮੇਵ ਨਤ੍ਥਿ, ਤਸ੍ਮਾ. ਏਵਮਾਹਾਤਿ ਇਦਾਨਿ ਵੁਚ੍ਚਮਾਨਾਕਾਰਂ ਵਦਤਿ.
ਆਦਾਨਂ ਆਦਿ, ਆਦਿ ਏਵ ਆਦਿਕਨ੍ਤਿ ਆਹ ‘‘ਆਦਿਕੇਨਾਤਿ ਆਦਾਨੇਨਾ’’ਤਿ. ਹੇਟ੍ਠਾਗਮਨੀਯਾਤਿ ਅਧੋਭਾਗਗਮਨੀਯਾ, ਅਪਾਯਦੁਕ੍ਖਸ੍ਸ ਸਂਸਾਰਦੁਕ੍ਖਸ੍ਸ ਚ ਨਿਬ੍ਬਤ੍ਤਕਾਤਿ ਅਤ੍ਥੋ. ਗਾਰਵਰਹਿਤਾਤਿ ਗਰੁਕਾਰਰਹਿਤਾ. ਪਤਿਸ੍ਸਯਨਂ ਨੀਚਭਾਵੇਨ ਪਤਿਬਦ੍ਧਵੁਤ੍ਤਿਤਾ, ਪਤਿਸ੍ਸੋ ਪਤਿਸ੍ਸਯੋਤਿ ਅਤ੍ਥਤੋ ਏਕਂ, ਸੋ ਏਤੇਸਂ ਨਤ੍ਥੀਤਿ ਆਹ ‘‘ਅਪ੍ਪਤਿਸ੍ਸਾਤਿ ਅਪ੍ਪਤਿਸ੍ਸਯਾ ਅਨੀਚਵੁਤ੍ਤਿਕਾ’’ਤਿ. ਸੇਸਂ ਸੁਵਿਞ੍ਞੇਯ੍ਯਮੇਵ.
ਸਦ੍ਧਮ੍ਮਪ੍ਪਤਿਰੂਪਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.
ਸਾਰਤ੍ਥਪ੍ਪਕਾਸਿਨਿਯਾ ਸਂਯੁਤ੍ਤਨਿਕਾਯ-ਅਟ੍ਠਕਥਾਯ
ਕਸ੍ਸਪਸਂਯੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.