੧੨. ਪਰਂਮਰਣਸੁਤ੍ਤਵਣ੍ਣਨਾ

੧੫੫. ਯਥਾ ਅਤੀਤਕਪ੍ਪੇ ਅਤੀਤਾਸੁ ਜਾਤੀਸੁ ਕਮ੍ਮਕਿਲੇਸਵਸੇਨ ਆਗਤੋ, ਤਥਾ ਏਤਰਹਿਪਿ ਆਗਤੋਤਿ ਤਥਾਗਤੋ, ਯਥਾ ਯਥਾ ਵਾ ਪਨ ਕਮ੍ਮਂ ਕਤੂਪਚਿਤਂ, ਤਥਾ ਤਂ ਤਂ ਅਤ੍ਤਭਾਵਂ ਆਗਤੋ ਉਪਗਤੋ ਉਪਪਨ੍ਨੋਤਿ ਤਥਾਗਤੋ, ਸਤ੍ਤੋਤਿ ਆਹ ‘‘ਤਥਾਗਤੋਤਿ ਸਤ੍ਤੋ’’ਤਿ. ਏਤਨ੍ਤਿ ‘‘ਏਵਂ ਹੋਤਿ ਭਵਤਿ ਤਿਟ੍ਠਤਿ ਸਸ੍ਸਤਿਸਮ’’ਨ੍ਤਿ ਏਵਂ ਪਵਤ੍ਤਂ ਦਿਟ੍ਠਿਗਤਂ. ਅਤ੍ਥਸਨ੍ਨਿਸ੍ਸਿਤਂ ਨ ਹੋਤੀਤਿ ਦਿਟ੍ਠਧਮ੍ਮਿਕਸਮ੍ਪਰਾਯਿਕਪਰਮਤ੍ਥਤੋ ਸੁਖਨ੍ਤਿ ਪਸਤ੍ਥਸਨ੍ਨਿਸ੍ਸਿਤਂ ਨ ਹੋਤਿ. ਆਦਿਬ੍ਰਹ੍ਮਚਰਿਯਕਨ੍ਤਿ ਏਤ੍ਥ ਮਗ੍ਗਬ੍ਰਹ੍ਮਚਰਿਯਂ ਅਧਿਪ੍ਪੇਤਂ ਤਸ੍ਸ ਪਧਾਨਭਾਵਤੋ. ਤਸ੍ਸ ਪਨ ਏਤਂ ਦਿਟ੍ਠਿਗਤਂ ਆਦਿਪਟਿਪਦਾਮਤ੍ਤਂ ਨ ਹੋਤਿ ਅਨੁਪਕਾਰਕਤ੍ਤਾ ਵਿਲੋਮਨਤੋ ਚ. ਤਤੋ ਏਵ ਇਤਰਬ੍ਰਹ੍ਮਚਰਿਯਸ੍ਸਪਿ ਅਨਿਸ੍ਸਯੋਵ. ਸੇਸਂ ਵੁਤ੍ਤਨਯੇਨ ਵੇਦਿਤਬ੍ਬਂ.

ਪਰਂਮਰਣਸੁਤ੍ਤਵਣ੍ਣਨਾ ਨਿਟ੍ਠਿਤਾ.