੫. ਗਹਪਤਿਵਗ੍ਗੋ

੧. ਪਞ੍ਚਵੇਰਭਯਸੁਤ੍ਤਵਣ੍ਣਨਾ

੪੧. ਯਤੋਤਿ ਯਸ੍ਮਿਂ ਕਾਲੇ. ਅਯਞ੍ਹਿ ਤੋ-ਸਦ੍ਦੋ ਦਾ-ਸਦ੍ਦੋ ਵਿਯ ਇਧ ਕਾਲਵਿਸਯੋ. ਤੇਨਾਹ ‘‘ਯਦਾ’’ਤਿ. ਭਯਵੇਰਚੇਤਨਾਯੋਤਿ ਭਾਯਿਤਬ੍ਬਟ੍ਠੇਨ ਭਯਂ, ਵੇਰਪਸਵਨਟ੍ਠੇਨ ਵੇਰਨ੍ਤਿ ਚ ਲਦ੍ਧਨਾਮਾ ਚੇਤਨਾਯੋ. ਪਾਣਾਤਿਪਾਤਾਦਯੋ ਹਿ ਯਸ੍ਸ ਪਵਤ੍ਤਨ੍ਤਿ, ਯਞ੍ਚ ਉਦ੍ਦਿਸ੍ਸ ਪਵਤ੍ਤਿਯਨ੍ਤਿ, ਉਭਯੇ ਸਭਯਭੇਰਵਾਤਿ ਤੇ ਏਵ ਭਾਯਿਤਬ੍ਬਭਯਵੇਰਜਨਕਾਵਾਤਿ. ਸੋਤਸ੍ਸ ਅਰਿਯਮਗ੍ਗਸ੍ਸ ਆਦਿਤੋ ਪਟ੍ਠਾਯ ਪਟਿਪਤ੍ਤਿਅਧਿਗਮੋ ਸੋਤਾਪਤ੍ਤਿ, ਤਦਤ੍ਥਾਯ ਤਤ੍ਥ ਪਤਿਟ੍ਠਿਤਸ੍ਸ ਚ ਅਙ੍ਗਾਨਿ ਸੋਤਾਪਤ੍ਤਿਯਙ੍ਗਾਨਿ, ਤਦੁਭਯਂ ਸਨ੍ਧਾਯਾਹ ‘‘ਦੁਵਿਧਂ ਸੋਤਾਪਤ੍ਤਿਯਾ ਅਙ੍ਗ’’ਨ੍ਤਿ, ਸੋਤਾਪਤ੍ਤਿਅਤ੍ਥਂ ਅਙ੍ਗਨ੍ਤਿ ਅਤ੍ਥੋ. ਯਂ ਪੁਬ੍ਬਭਾਗੇਤਿ ਯਂ ਸਯਂ ਸੋਤਾਪਤ੍ਤਿਮਗ੍ਗਫਲਪਟਿਲਾਭਤੋ ਪੁਬ੍ਬਭਾਗੇ ਤਦਤ੍ਥਾਯ ਸਂਵਤ੍ਤਤਿ. ਕਿਂ ਪਨ ਤਨ੍ਤਿ ਆਹ ‘‘ਸਪ੍ਪੁਰਿਸਸਂਸੇਵੋ’’ਤਿਆਦਿ. ਸਪ੍ਪੁਰਿਸਾਨਂ ਬੁਦ੍ਧਾਦੀਨਂ ਅਰਿਯਞਾਣਸਞ੍ਞਾਣਜਾਤਾ ਪਯਿਰੁਪਾਸਨਾ, ਸਦ੍ਧਮ੍ਮਸ੍ਸਵਨਂ ਚਤੁਸਚ੍ਚਧਮ੍ਮਸ੍ਸਵਨਂ, ਯੋਨਿਸੋ ਉਪਾਯੇਨ ਅਨਿਚ੍ਚਾਦਿਤੋ ਮਨਸਿ ਕਰਣਂ ਯੋਨਿਸੋ ਮਨਸਿਕਾਰੋ, ਉਸ੍ਸੁਕ੍ਕਾਪੇਨ੍ਤੇਨ ਧਮ੍ਮਸ੍ਸ ਨਿਬ੍ਬਾਨਸ੍ਸ ਅਨੁਧਮ੍ਮਪਟਿਪਜ੍ਜਨਂ ਧਮ੍ਮਾਨੁਧਮ੍ਮਪਟਿਪਤ੍ਤੀਤਿ ਏਤਾਨਿ ਸੋਤਾਪਤ੍ਤਿਯਾ ਅਙ੍ਗਾਨਿ. ਅਟ੍ਠਕਥਾਯਂ ਪਨ ਸੋਤਾਪਤ੍ਤਿਅਙ੍ਗਨ੍ਤਿ ਪਦਂ ਅਪੇਕ੍ਖਿਤ੍ਵਾ ‘‘ਏਵਂ ਆਗਤ’’ਨ੍ਤਿ ਵੁਤ੍ਤਂ. ਠਿਤਸ੍ਸ ਪੁਗ੍ਗਲਸ੍ਸ ਅਙ੍ਗਂ. ਸੋਤਾਪਨ੍ਨੋ ਅਙ੍ਗੀਯਤਿ ਞਾਯਤਿ ਏਤੇਨਾਤਿ ਸੋਤਾਪਨ੍ਨਸ੍ਸ ਅਙ੍ਗਨ੍ਤਿਪਿ ਵੁਚ੍ਚਤਿ. ਇਦਂ ਪਚ੍ਛਾ ਵੁਤ੍ਤਂ ਅਙ੍ਗਂ. ਦੋਸੇਹਿ ਆਰਕਾਤਿ ਅਰਿਯੋਤਿ ਆਹ ‘‘ਨਿਦ੍ਦੋਸੋ’’ਤਿ. ਕਥਂ ਅਵਿਜ੍ਜਾ ਸਙ੍ਖਾਰਾਨਂ ਪਚ੍ਚਯੋਤਿਆਦਿਨਾ ਕੇਨਚਿਪਿ ਅਨੁਪਾਰਮ੍ਭਿਯਤ੍ਤਾ ਨਿਰੁਪਾਰਮ੍ਭੋ. ਞਾਣਂ ਸਨ੍ਧਾਯ ‘‘ਨਿਦ੍ਦੋਸੋ’’ਤਿ ਵੁਤ੍ਤਂ, ਪਟਿਚ੍ਚਸਮੁਪ੍ਪਾਦਂ ਸਨ੍ਧਾਯ ‘‘ਨਿਰੁਪਾਰਮ੍ਭੋ’’ਤਿ ਵਦਨ੍ਤਿ. ਉਭਯਮ੍ਪਿ ਪਨ ਸਨ੍ਧਾਯ ਉਭਯਂ ਵੁਤ੍ਤਨ੍ਤਿ ਅਪਰੇ. ਪਟਿਚ੍ਚਸਮੁਪ੍ਪਾਦੋ ਏਤ੍ਥ ਅਧਿਪ੍ਪੇਤੋ. ਤਥਾ ਹਿ ਵੁਤ੍ਤਂ ‘‘ਅਪਰਾਪਰਂ ਉਪ੍ਪਨ੍ਨਾਯ ਵਿਪਸ੍ਸਨਾਪਞ੍ਞਾਯਾ’’ਤਿ. ਨ ਹਿ ਮਗ੍ਗਞਾਣਂ ਵਿਪਸ੍ਸਨਾਪਞ੍ਞਾਤਿ. ਸਮ੍ਮਾ ਉਪਾਯਤ੍ਤਾ ਤਸ੍ਸ ਪਟਿਚ੍ਚਸਮੁਪ੍ਪਨ੍ਨੇ ਯਾਥਾਵਤੋ ਞਾਯਤੀਤਿ ਞਾਯੋ, ਪਟਿਚ੍ਚਸਮੁਪ੍ਪਾਦੋ. ਞਾਣਂ ਪਨ ਞਾਯਤਿ ਸੋ ਏਤੇਨਾਤਿ ਞਾਯੋ.

ਤਤ੍ਥਾਤਿ ਨਿਰਯੇ. ਮਗ੍ਗਸੋਤਨ੍ਤਿ ਮਗ੍ਗਸ੍ਸ ਸੋਤਂ. ਆਪਨ੍ਨੋਤਿ ਅਧਿਗਤੋ. ਅਪਾਯੇਸੁ ਉਪ੍ਪਜ੍ਜਨਸਙ੍ਖਾਤੋ ਵਿਨਿਪਾਤਧਮ੍ਮੋ ਏਤਸ੍ਸਾਤਿ ਵਿਨਿਪਾਤਧਮ੍ਮੋ, ਨ ਵਿਨਿਪਾਤਧਮ੍ਮੋ ਅਵਿਨਿਪਾਤਧਮ੍ਮੋ. ਪਰਂ ਅਯਨਨ੍ਤਿ ਅਤਿਵਿਯ ਸਵਿਸਯੇ ਅਯਿਤਬ੍ਬਂ ਬੁਜ੍ਝਿਤਬ੍ਬਂ. ਯੇਸਞ੍ਹਿ ਧਾਤੂਨਂ ਗਤਿਅਤ੍ਥੋ, ਬੁਦ੍ਧਿਪਿ ਤੇਸਂ ਅਤ੍ਥੋ. ਤੇਨਾਹ ‘‘ਅਵਸ੍ਸਂ ਅਭਿਸਮ੍ਬੁਜ੍ਝਨਕੋ’’ਤਿ.

ਪਾਣਾਤਿਪਾਤਕਮ੍ਮਕਾਰਣਾਤਿ ਪਾਣਾਤਿਪਾਤਸਙ੍ਖਾਤਸ੍ਸ ਪਾਪਕਮ੍ਮਸ੍ਸ ਕਰਣਹੇਤੁ. ਵੇਰਂ ਵੁਚ੍ਚਤਿ ਵਿਰੋਧੋ, ਤਦੇਵ ਭਾਯਿਤਬ੍ਬਤੋ ਭਯਨ੍ਤਿ ਆਹ ‘‘ਭਯਂ ਵੇਰਨ੍ਤਿ ਅਤ੍ਥਤੋ ਏਕ’’ਨ੍ਤਿ. ਇਦਂ ਬਾਹਿਰਂ ਵੇਰਂ ਨਾਮ ਤਸ੍ਸ ਵੇਰਸ੍ਸ ਮੂਲਭੂਤਤੋ ਵੇਰਕਾਰਪੁਗ੍ਗਲਤੋ ਬਹਿਭਾਵਤ੍ਤਾ. ਤੇਨੇਵ ਹਿ ਤਸ੍ਸ ਵੇਰਕਾਰਪੁਗ੍ਗਲਸ੍ਸ ਉਪ੍ਪਨ੍ਨਂ ਵੇਰਂ ਸਨ੍ਧਾਯ ‘‘ਇਦਂ ਅਜ੍ਝਤ੍ਤਿਕਵੇਰਂ ਨਾਮਾ’’ਤਿ ਵੁਤ੍ਤਂ, ਤਨ੍ਨਿਸ੍ਸਿਤਸ੍ਸ ਵੇਰਸ੍ਸ ਮੂਲਭੂਤਾ ਵੇਰਕਾਰਪੁਗ੍ਗਲਚੇਤਨਾ ਉਪ੍ਪਜ੍ਜਤਿ ਪਹਰਿਤੁਂ ਅਸਮਤ੍ਥਸ੍ਸਪੀਤਿ ਅਧਿਪ੍ਪਾਯੋ. ਨ ਹਿ ਨੇਰਯਿਕਾ ਨਿਰਯਪਾਲੇਸੁ ਪਟਿਪਹਰਿਤੁਂ ਸਕ੍ਕੋਨ੍ਤਿ. ਨਿਰਯਪਾਲਸ੍ਸ ਚੇਤਨਾ ਉਪ੍ਪਜ੍ਜਤੀਤਿ ਏਤੇਨ ‘‘ਅਤ੍ਥਿ ਨਿਰਯੇ ਨਿਰਯਪਾਲਾ’’ਤਿ ਦਸ੍ਸੇਤਿ. ਯਂ ਪਨੇਤਂ ਬਾਹਿਰਵੇਰਨ੍ਤਿ ਯਮਿਦਂ ਦਿਟ੍ਠਧਮ੍ਮਿਕਂ ਸਮ੍ਪਰਾਯਿਕਞ੍ਚ ਬਾਹਿਰਂ ਵੇਰਂ. ਪੁਗ੍ਗਲਵੇਰਨ੍ਤਿ ਵੁਤ੍ਤਂ ਅਤ੍ਤਕਿਚ੍ਚਂ ਸਾਧੇਤੁਂ ਅਸਕ੍ਕੋਨ੍ਤੋ ਕੇਵਲਂ ਪਰਪੁਗ੍ਗਲੇ ਉਪ੍ਪਨ੍ਨਮਤ੍ਤਂ ਵੇਰਨ੍ਤਿ ਕਤ੍ਵਾ. ਅਤ੍ਥਤੋ ਏਕਮੇਵ ‘‘ਚੇਤਸਿਕ’’ਨ੍ਤਿ ਵਿਸੇਸੇਤ੍ਵਾ ਵੁਤ੍ਤਤ੍ਤਾ. ਸੇਸਪਦੇਸੂਤਿ ‘‘ਅਦਿਨ੍ਨਾਦਾਨਪਚ੍ਚਯਾ’’ਤਿਆਦਿਨਾ ਆਗਤੇਸੁ ਸੇਸਕੋਟ੍ਠਾਸੇਸੁ. ਅਤ੍ਥੋ ਭਗ੍ਗੋਤਿ ਅਤ੍ਥੋ ਧਂਸਿਤੋ. ਅਧਿਗਤੇਨਾਤਿ ਮਗ੍ਗੇਨ ਅਧਿਗਤੇਨ. ‘‘ਅਭਿਗਤੇਨਾ’’ਤਿਪਿ ਪਾਠੋ, ਅਧਿਵੁਤ੍ਤੇਨਾਤਿ ਅਤ੍ਥੋ. ਤੇਨਾਹ ‘‘ਅਚਲਪ੍ਪਸਾਦੇਨਾ’’ਤਿ.

ਪਞ੍ਚਵੇਰਭਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੨. ਦੁਤਿਯਪਞ੍ਚਵੇਰਭਯਸੁਤ੍ਤਵਣ੍ਣਨਾ

੪੨. ਭਿਕ੍ਖੂਨਂ ਕਥਿਤਭਾਵਮਤ੍ਤਮੇਵ ਵਿਸੇਸੋਤਿ ਏਤੇਨ ਯਾ ਸਤ੍ਥਾਰਾ ਏਕਚ੍ਚਾਨਂ ਦੇਸਿਤਦੇਸਨਾ, ਪੁਨ ਤਦਞ੍ਞੇਸਂ ਵੇਨੇਯ੍ਯਦਮਕੁਸਲੇਨ ਕਾਲਨ੍ਤਰੇ ਤੇਨੇਵ ਦੇਸਿਤਾ, ਸਾ ਧਮ੍ਮਸਂਗਾਹਕੇਹਿ ‘‘ਮਾ ਨੋ ਸਤ੍ਥੁਦੇਸਨਾ ਸਮ੍ਪਟਿਗ੍ਗਹਂ ਵਿਨਾ ਨਸ੍ਸਤੂ’’ਤਿ ਵਿਸੁਂ ਸਙ੍ਗਹਂ ਆਰੋਪਿਤਾਤਿ ਦਸ੍ਸੇਤਿ.

ਦੁਤਿਯਪਞ੍ਚਵੇਰਭਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੩. ਦੁਕ੍ਖਸੁਤ੍ਤਵਣ੍ਣਨਾ

੪੩. ਸਮੁਦਯਨਂ ਸਮੁਦਯੋ, ਸਮੁਦੇਤਿ ਏਤਮ੍ਹਾਤਿ ਸਮੁਦਯੋ, ਏਵਂ ਉਭਿਨ੍ਨਂ ਸਮੁਦਯਾਨਮਤ੍ਥਤੋਪਿ ਭੇਦੋ ਵੇਦਿਤਬ੍ਬੋ. ਪਚ੍ਚਯਾਵ ਪਚ੍ਚਯਸਮੁਦਯੋ. ਆਰਦ੍ਧਵਿਪਸ੍ਸਕੋ ‘‘ਇਮਞ੍ਚ ਇਮਞ੍ਚ ਪਚ੍ਚਯਸਾਮਗ੍ਗਿਂ ਪਟਿਚ੍ਚ ਇਮੇ ਧਮ੍ਮਾ ਖਣੇ ਖਣੇ ਉਪ੍ਪਜ੍ਜਨ੍ਤੀ’’ਤਿ ਪਸ੍ਸਨ੍ਤੋ ‘‘ਪਚ੍ਚਯਸਮੁਦਯਂ ਪਸ੍ਸਨ੍ਤੋਪਿ ਭਿਕ੍ਖੁ ਖਣਿਕਸਮੁਦਯਂ ਪਸ੍ਸਤੀ’’ਤਿ ਵੁਤ੍ਤੋ ਪਚ੍ਚਯਦਸ੍ਸਨਮੁਖੇਨ ਨਿਬ੍ਬਤ੍ਤਿਕ੍ਖਣਸ੍ਸ ਦਸ੍ਸਨਤੋ. ਸੋ ਪਨ ਖਣੇ ਖਣੇ ਸਙ੍ਖਾਰਾਨਂ ਨਿਬ੍ਬਤ੍ਤਿਂ ਪਸ੍ਸਿਤੁਂ ਆਰਦ੍ਧੋ ‘‘ਇਮੇਹਿ ਨਾਮ ਪਚ੍ਚਯੇਹਿ ਨਿਬ੍ਬਤ੍ਤਤੀ’’ਤਿ ਪਸ੍ਸਤਿ. ‘‘ਸੋ ਖਣਿਕਸਮੁਦਯਂ ਪਸ੍ਸਨ੍ਤੋ ਪਚ੍ਚਯਂ ਪਸ੍ਸਤੀ’’ਤਿ ਵਦਨ੍ਤਿ. ਯਸ੍ਮਾ ਪਨ ਪਚ੍ਚਯਤੋ ਸਙ੍ਖਾਰਾਨਂ ਉਦਯਂ ਪਸ੍ਸਨ੍ਤੋ ਖਣਤੋ ਤੇਸਂ ਉਦਯਦਸ੍ਸਨਂ ਹੋਤਿ, ਖਣਤੋ ਏਤੇਸਂ ਉਦਯਂ ਪਸ੍ਸਤੋ ਪਗੇਵ ਪਚ੍ਚਯਾਨਂ ਸੁਗ੍ਗਹਿਤਤ੍ਤਾ ਪਚ੍ਚਯਤੋ ਦਸ੍ਸਨਂ ਸੁਖੇਨ ਇਜ੍ਝਤਿ, ਤਸ੍ਮਾ ਵੁਤ੍ਤਂ ‘‘ਪਚ੍ਚਯਸਮੁਦਯਂ ਪਸ੍ਸਨ੍ਤੋਪੀ’’ਤਿਆਦਿ. ਅਤ੍ਥਙ੍ਗਮਦਸ੍ਸਨੇਪਿ ਏਸੇਵ ਨਯੋ. ਅਚ੍ਚਨ੍ਤਤ੍ਥਙ੍ਗਮੋਤਿ ਅਪ੍ਪਵਤ੍ਤਿ ਨਿਰੋਧੋ ਨਿਬ੍ਬਾਨਨ੍ਤਿ. ਭੇਦਤ੍ਥਙ੍ਗਮੋਤਿ ਖਣਿਕਨਿਰੋਧੋ. ਤਦੁਭਯਂ ਪੁਬ੍ਬਭਾਗੇ ਉਗ੍ਗਹਪਰਿਪੁਚ੍ਛਾਦਿਵਸੇਨ ਪਸ੍ਸਨ੍ਤੋ ਅਞ੍ਞਤਰਸ੍ਸ ਦਸ੍ਸਨੇ ਇਤਰਦਸ੍ਸਨਮ੍ਪਿ ਸਿਦ੍ਧਮੇਵ ਹੋਤਿ, ਪੁਬ੍ਬਭਾਗੇ ਚ ਆਰਮ੍ਮਣਵਸੇਨ ਖਯਤੋ ਵਯਸਮ੍ਮਸਨਾਦਿਕਾਲੇ ਭੇਦਤ੍ਥਙ੍ਗਮਂ ਪਸ੍ਸਨ੍ਤੋ ਅਤਿਰੇਕਵਸੇਨ ਅਨੁਸ੍ਸਵਾਦਿਤੋ ਅਚ੍ਚਨ੍ਤਂ ਅਤ੍ਥਙ੍ਗਮਂ ਪਸ੍ਸਤਿ. ਮਗ੍ਗਕ੍ਖਣੇ ਪਨਾਰਮ੍ਮਣਤੋ ਅਚ੍ਚਨ੍ਤਅਤ੍ਥਙ੍ਗਮਂ ਪਸ੍ਸਤਿ, ਅਸਮ੍ਮੋਹਤੋ ਇਤਰਮ੍ਪਿ ਪਸ੍ਸਤਿ. ਤਂ ਸਨ੍ਧਾਯਾਹ ‘‘ਅਚ੍ਚਨ੍ਤਤ੍ਥਙ੍ਗਮਂ ਪਸ੍ਸਨ੍ਤੋਪੀ’’ਤਿਆਦਿ. ਸਮੁਦਯਤ੍ਥਙ੍ਗਮਂ ਨਿਬ੍ਬਤ੍ਤਿਭੇਦਨ੍ਤਿ ਸਮੁਦਯਸਙ੍ਖਾਤਂ ਨਿਬ੍ਬਤ੍ਤਿਂ ਅਤ੍ਥਙ੍ਗਮਸਙ੍ਖਾਤਂ ਭੇਦਞ੍ਚ. ਨਿਸ੍ਸਯਵਸੇਨਾਤਿ ਚਕ੍ਖੁਸ੍ਸ ਸਨ੍ਨਿਸ੍ਸਯਵਸੇਨ ਪਚ੍ਚਯਂ ਕਤ੍ਵਾ. ਆਰਮ੍ਮਣਵਸੇਨਾਤਿ ਰੂਪੇ ਆਰਮ੍ਮਣਂ ਕਤ੍ਵਾ. ਯਂ ਪਨੇਤ੍ਥ ਵਤ੍ਤਬ੍ਬਂ, ਤਂ ਮਧੁਪਿਣ੍ਡਿਕਸੁਤ੍ਤਟੀਕਾਯਂ ਵੁਤ੍ਤਨਯੇਨ ਵੇਦਿਤਬ੍ਬਂ. ਤਿਣ੍ਣਂ ਸਙ੍ਗਤਿ ਫਸ੍ਸੋਤਿ ‘‘ਚਕ੍ਖੁ ਰੂਪਾਨਿ ਵਿਞ੍ਞਾਣ’’ਨ੍ਤਿ ਇਮੇਸਂ ਤਿਣ੍ਣਂ ਸਙ੍ਗਤਿ ਸਮਾਗਮੇ ਨਿਬ੍ਬਤ੍ਤਿ ਫਸ੍ਸੋਤਿ ਵੁਤ੍ਤੋਤਿ ਆਹ ‘‘ਤਿਣ੍ਣਂ ਸਙ੍ਗਤਿਯਾ ਫਸ੍ਸੋ’’ਤਿ. ਤਿਣ੍ਣਨ੍ਤਿ ਚ ਪਾਕਟਪਚ੍ਚਯਵਸੇਨ ਵੁਤ੍ਤਂ, ਤਦਞ੍ਞੇਪਿ ਪਨ ਮਨਸਿਕਾਰਾਦਯੋ ਫਸ੍ਸਪਚ੍ਚਯਾ ਹੋਨ੍ਤਿਯੇਵ. ਏਵਨ੍ਤਿ ਤਣ੍ਹਾਦੀਨਂ ਅਸੇਸਵਿਰਾਗਨਿਰੋਧਕ੍ਕਮੇਨ. ਭਿਨ੍ਨਂ ਹੋਤੀਤਿ ਅਨੁਪ੍ਪਾਦਨਿਰੋਧੇਨ ਨਿਰੁਦ੍ਧਂ ਹੋਤਿ. ਤੇਨਾਹ ‘‘ਅਪ੍ਪਟਿਸਨ੍ਧਿਯ’’ਨ੍ਤਿ.

ਦੁਕ੍ਖਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੪. ਲੋਕਸੁਤ੍ਤਵਣ੍ਣਨਾ

੪੪. ਅਯਮੇਤ੍ਥ ਵਿਸੇਸੋਤਿ ‘‘ਅਯਂ ਲੋਕਸ੍ਸਾ’’ਤਿ ਸਮੁਦਯਤ੍ਥਙ੍ਗਮਾਨਂ ਵਿਸੇਸਦਸ੍ਸਨਂ. ਏਤ੍ਥ ਚਤੁਤ੍ਥਸੁਤ੍ਤੇ ਤਤਿਯਸੁਤ੍ਤਤੋ ਵਿਸੇਸੋ.

ਲੋਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੫. ਞਾਤਿਕਸੁਤ੍ਤਵਣ੍ਣਨਾ

੪੫. ਅਞ੍ਞਮਞ੍ਞਂ ਦ੍ਵਿਨ੍ਨਂ ਞਾਤੀਨਂ ਗਾਮੋ ਞਾਤਿਕੋਤਿ ਵੁਤ੍ਤੋਤਿ ਆਹ ‘‘ਦ੍ਵਿਨ੍ਨਂ ਞਾਤਕਾਨਂ ਗਾਮੇ’’ਤਿ. ਗਿਞ੍ਜਕਾ ਵੁਚ੍ਚਨ੍ਤਿ ਇਟ੍ਠਕਾ, ਗਿਞ੍ਜਕਾਹਿ ਏਵ ਕਤੋ ਆਵਸਥੋ ਗਿਞ੍ਜਕਾਵਸਥੋ. ਸੋ ਕਿਰ ਆਵਾਸੋ ਯਥਾ ਸੁਧਾਪਰਿਕਮ੍ਮੇਨ ਪਯੋਜਨਂ ਨਤ੍ਥਿ, ਏਵਂ ਇਟ੍ਠਕਾਹਿ ਏਵ ਚਿਨਿਤ੍ਵਾ ਛਾਦੇਤ੍ਵਾ ਕਤੋ. ਤਾਦਿਸਞ੍ਹਿ ਛਦਨਂ ਸਨ੍ਧਾਯ ਭਗਵਤਾ ਇਟ੍ਠਕਾਛਦਨਂ ਅਨੁਞ੍ਞਾਤਂ. ਤੇਨ ਵੁਤ੍ਤਂ ‘‘ਇਟ੍ਠਕਾਹਿ ਕਤੇ ਮਹਾਪਾਸਾਦੇ’’ਤਿ. ਤਤ੍ਥ ਦ੍ਵਾਰਬਨ੍ਧਕਵਾਟਫਲਕਾਦੀਨਿ ਪਨ ਦਾਰੁਮਯਾਨਿਯੇਵ. ਪਰਿਯਾਯਤਿ ਅਤ੍ਤਨੋ ਫਲਂ ਪਰਿਗ੍ਗਹੇਤ੍ਵਾ ਵਤ੍ਤਤੀਤਿ ਪਰਿਯਾਯੋ, ਕਾਰਣਨ੍ਤਿ ਆਹ ‘‘ਧਮ੍ਮਪਰਿਯਾਯਨ੍ਤਿ ਧਮ੍ਮਕਾਰਣ’’ਨ੍ਤਿ, ਪਰਿਯਤ੍ਤਿਧਮ੍ਮਭੂਤਂ ਵਿਸੇਸਾਧਿਗਮਸ੍ਸ ਹੇਤੁਨ੍ਤਿ ਅਤ੍ਥੋ. ਉਪੇਚ੍ਚ ਸੁਯ੍ਯਤਿ ਏਤ੍ਥਾਤਿ ਉਪਸ੍ਸੁਤੀਤਿ ਵੁਤ੍ਤਂ ‘‘ਉਪਸ੍ਸੁਤੀਤਿ ਉਪਸ੍ਸੁਤਿਟ੍ਠਾਨ’’ਨ੍ਤਿ. ਅਤ੍ਤਨੋ ਕਮ੍ਮਨ੍ਤਿ ਯਦਤ੍ਥਂ ਤਤ੍ਥ ਗਤੋ, ਤਂ ਪਰਿਵੇਣਸਮਜ੍ਜਨਕਿਰਿਯਂ. ਪਹਾਯਾਤਿ ਅਕਤ੍ਵਾ. ਏਵਂ ਮਹਤ੍ਥਞ੍ਹਿ ਵਿਮੁਤ੍ਤਾਯਤਨਸੀਸੇ ਠਤ੍ਵਾ ਸੁਣਨ੍ਤਸ੍ਸ ਮਹਤੋ ਅਤ੍ਥਾਯ ਸਂਵਤ੍ਤਤਿ. ਏਕਙ੍ਗਣਂ ਅਹੋਸੀਤਿ ਸਬ੍ਬਂ ਵਿਵਟਂ ਅਹੋਸਿ. ਤੀਸੁ ਹਿ ਭਵੇਸੁ ਸਙ੍ਖਾਰਗਤਂ ਪਚ੍ਚਯੁਪ੍ਪਨ੍ਨਵਸੇਨ ਮਨਸਿਕਰੋਤੋ ਭਗਵਤੋ ਕਿਞ੍ਚਿ ਅਸੇਸੇਤ੍ਵਾ ਸਬ੍ਬਮ੍ਪਿ ਤਂ ਞਾਣਮੁਖੇ ਆਪਾਥਂ ਉਪਗਚ੍ਛਿ. ਤੇਨ ਵੁਤ੍ਤਂ ‘‘ਯਾਵਭਵਗ੍ਗਾ ਏਕਙ੍ਗਣਂ ਅਹੋਸੀ’’ਤਿ. ਤਨ੍ਤਿਵਸੇਨ ਤਮਤ੍ਥਂ ਵਾਚਾਯ ਨਿਚ੍ਛਾਰੇਨ੍ਤੋ ‘‘ਵਚਸਾ ਸਜ੍ਝਾਯਂ ਕਰੋਨ੍ਤੋ’’ਤਿ ਵੁਤ੍ਤੋ. ਪਚ੍ਚਯਪਚ੍ਚਯੁਪ੍ਪਨ੍ਨਵਸੇਨ ਚ ਅਤ੍ਥਂ ਆਹਰਿਤ੍ਵਾ ਤੇਸਂ ਨਿਰੋਧੇਨ ਵਿਵਟ੍ਟਸ੍ਸ ਆਹਤਤ੍ਤਾ ‘‘ਯਥਾਨੁਸਨ੍ਧਿਨਾ’’ਤਿ ਵੁਤ੍ਤਂ. ਅਦ੍ਦਸ ਞਾਣਚਕ੍ਖੁਨਾ.

ਮਨਸਾ ਸਜ੍ਝਾਯਂ ਕਰੋਨ੍ਤੋ ‘‘ਤੁਣ੍ਹੀਭੂਤੋਵ ਪਗੁਣਂ ਕਰੋਨ੍ਤੋ’’ਤਿ ਵੁਤ੍ਤੋ. ਪਦਾਨੁਪਦਨ੍ਤਿ ਪਦਞ੍ਚ ਅਨੁਪਦਞ੍ਚ. ਪੁਰਿਮਞ੍ਹਿ ਪਦਂ ਨਾਮ, ਤਦਨਨ੍ਤਰਂ ਅਨੁਪਦਂ. ਘਟੇਤ੍ਵਾ ਸਮ੍ਬਨ੍ਧਂ ਕਤ੍ਵਾ ਅਵਿਚ੍ਛਿਨ੍ਦਿਤ੍ਵਾ. ਪਰਿਯਾਪੁਣਾਤੀਤਿ ਅਜ੍ਝਯਤਿ. ਆਧਾਰਪ੍ਪਤ੍ਤਨ੍ਤਿ ਆਧਾਰਂ ਚਿਤ੍ਤਸਨ੍ਤਾਨਪ੍ਪਤ੍ਤਂ ਅਪ੍ਪਮੁਟ੍ਠਂ ਗਤਤ੍ਤਾ ਆਧਾਰਪ੍ਪਤ੍ਤਂ ਨਾਮ. ਕਾਰਣਨਿਸ੍ਸਿਤੋਤਿ ਲੋਕੁਤ੍ਤਰਧਮ੍ਮਸ੍ਸ ਕਾਰਣਸਨ੍ਨਿਸ੍ਸਿਤੋ. ਆਦਿਬ੍ਰਹ੍ਮਚਰਿਯਕੋਤਿ ਆਦਿਬ੍ਰਹ੍ਮਚਰਿਯਂ, ਤਦੇਵ ਆਦਿਬ੍ਰਹ੍ਮਚਰਿਯਕਂ. ਧਮ੍ਮਪਰਿਯਾਯਾਪੇਕ੍ਖਾਯ ਪੁਲ੍ਲਿਙ੍ਗਨਿਦ੍ਦੇਸੋ. ਤੀਸੁਪਿ ਇਮੇਸੂਤਿ ਤਤਿਯਚਤੁਤ੍ਥਪਞ੍ਚਮੇਸੁ ਤੀਸੁ ਸੁਤ੍ਤੇਸੁ.

ਞਾਤਿਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੬. ਅਞ੍ਞਤਰਬ੍ਰਾਹ੍ਮਣਸੁਤ੍ਤਵਣ੍ਣਨਾ

੪੬. ਨਾਮਵਸੇਨਾਤਿ ਗੋਤ੍ਤਨਾਮਵਸੇਨ ਚ ਕਿਤ੍ਤਿਵਸੇਨ ਚ ਅਪਾਕਟੋ, ਤਸ੍ਮਾ ‘‘ਜਾਤਿਵਸੇਨ ਬ੍ਰਾਹ੍ਮਣੋ’’ਤਿ ਵੁਤ੍ਤਂ.

ਅਞ੍ਞਤਰਬ੍ਰਾਹ੍ਮਣਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੭. ਜਾਣੁਸ੍ਸੋਣਿਸੁਤ੍ਤਵਣ੍ਣਨਾ

੪੭. ਏਵਂਲਦ੍ਧਨਾਮੋਤਿ ‘‘ਜਾਣੁਸ੍ਸੋਣੀ’’ਤਿ ਏਵਂਲਦ੍ਧਨਾਮੋ ਰਞ੍ਞੋ ਸਨ੍ਤਿਕਾ ਅਧਿਗਤਨਾਮੋ.

ਜਾਣੁਸ੍ਸੋਣਿਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੮. ਲੋਕਾਯਤਿਕਸੁਤ੍ਤਵਣ੍ਣਨਾ

੪੮. ਆਯਤਿਂ ਹਿਤਂ ਤੇਨ ਲੋਕੋ ਨ ਯਤਤਿ ਨ ਈਹਤੀਤਿ ਲੋਕਾਯਤਂ. ਨ ਹਿ ਤਂ ਲਦ੍ਧਿਂ ਨਿਸ੍ਸਾਯ ਸਤ੍ਤਾ ਪੁਞ੍ਞਕਿਰਿਯਾਯ ਚਿਤ੍ਤਮ੍ਪਿ ਉਪ੍ਪਾਦੇਨ੍ਤਿ, ਕੁਤੋ ਪਯੋਗੋ, ਤਂ ਏਤਸ੍ਸ ਅਤ੍ਥਿ, ਤਤ੍ਥ ਵਾ ਨਿਯੁਤ੍ਤੋਤਿ ਲੋਕਾਯਤਿਕੋ. ਪਠਮਸਦ੍ਦੋ ਆਦਿਅਤ੍ਥਵਾਚਕਤ੍ਤਾ ਜੇਟ੍ਠਵੇਵਚਨੋਤਿ ਆਹ ‘‘ਪਠਮਂ ਲੋਕਾਯਤ’’ਨ੍ਤਿ. ਸਾਧਾਰਣਵਚਨੋਪਿ ਲੋਕਸਦ੍ਦੋ ਵਿਸਿਟ੍ਠਵਿਸਯੋ ਇਧਾਧਿਪ੍ਪੇਤੋਤਿ ਆਹ ‘‘ਬਾਲਪੁਥੁਜ੍ਜਨਲੋਕਸ੍ਸਾ’’ਤਿ. ਇਤ੍ਤਰਭਾਵੇਨ ਲਕੁਣ੍ਡਕਭਾਵੇਨ ਤਸ੍ਸ ਵਿਪੁਲਾਦਿਭਾਵੇਨ ਬਾਲਾਨਂ ਉਪਟ੍ਠਾਨਮਤ੍ਤਨ੍ਤਿ ਦਸ੍ਸੇਨ੍ਤੋ ‘‘ਆਯਤਂ ਮਹਨ੍ਤ’’ਨ੍ਤਿਆਦਿਮਾਹ. ਪਰਿਤ੍ਤਨ੍ਤਿ ਖੁਦ੍ਦਕਂ. ਏਕਸਭਾਵਨ੍ਤਿ ਏਕਂ ਸਭਾਵਂ. ਅਵਿਪਰਿਣਾਮਧਮ੍ਮਤਾਯਾਤਿ ਆਹ ‘‘ਨਿਚ੍ਚਸਭਾਵਮੇਵਾਤਿ ਪੁਚ੍ਛਤੀ’’ਤਿ. ਪੁਰਿਮਸਭਾਵੇਨ ਨਾਨਾਸਭਾਵਨ੍ਤਿ ਪੁਰਿਮਸਭਾਵਤੋ ਭਿਨ੍ਨਸਭਾਵਂ. ਪਚ੍ਛਾ ਨ ਹੋਤੀਤਿ ਪਚ੍ਛਾ ਕਿਞ੍ਚਿ ਨ ਹੋਤਿ ਸਬ੍ਬਸੋ ਸਮੁਚ੍ਛਿਜ੍ਜਨਤੋ. ਤੇਨਾਹ ‘‘ਉਚ੍ਛੇਦਂ ਸਨ੍ਧਾਯ ਪੁਚ੍ਛਤੀ’’ਤਿ. ਏਕਤ੍ਤਨ੍ਤਿ ਸਬ੍ਬਕਾਲਂ ਅਤ੍ਤਸਮ੍ਭਵਂ. ਤਥਾ ਚੇਵ ਗਹਣੇਨ ਦ੍ਵੇਪਿ ਵਾਦਾ ਸਸ੍ਸਤਦਿਟ੍ਠਿਯੋ ਹੋਨ੍ਤਿ. ਨਤ੍ਥਿ ਨ ਹੋਤਿ. ਪੁਥੁਤ੍ਤਂ ਨਾਨਾਸਭਾਵਂ, ਏਕਰੂਪਂ ਨ ਹੋਤੀਤਿ ਵਾ ਗਹਣੇਨ ਦ੍ਵੇਪਿ ਵਾਦਾ ਉਚ੍ਛੇਦਦਿਟ੍ਠਿਯੋਤਿ.

ਲੋਕਾਯਤਿਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੯. ਅਰਿਯਸਾਵਕਸੁਤ੍ਤਵਣ੍ਣਨਾ

੪੯. ਸਂਸਯੁਪ੍ਪਤ੍ਤਿ ਆਕਾਰਦਸ੍ਸਨਨ੍ਤਿ ‘‘ਕਸ੍ਮਿਂ ਸਤਿ ਕਿਂ ਹੋਤੀ’’ਤਿ ਕਾਰਣਸ੍ਸ ਫਲਸ੍ਸ ਚ ਪਚ੍ਚਾਮਸਨੇਨ ਵਿਨਾ ਕੇਵਲਂ ਇਦਪ੍ਪਚ੍ਚਯਤਾਯ ਸਂਸਯਸ੍ਸ ਉਪ੍ਪਜ੍ਜਨਾਕਾਰਦਸ੍ਸਨਂ. ਸਮੁਦਯਤਿ ਸਮੁਦੇਤੀਤਿ ਅਤ੍ਥੋਤਿ ਆਹ ‘‘ਉਪ੍ਪਜ੍ਜਤੀ’’ਤਿ.

ਅਰਿਯਸਾਵਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੦. ਦੁਤਿਯਅਰਿਯਸਾਵਕਸੁਤ੍ਤਵਣ੍ਣਨਾ

੫੦. ਦ੍ਵੇਪਿ ਨਯਾ ਏਕਤੋ ਵੁਤ੍ਤਾਤਿ ਇਦਂ ‘‘ਵਿਞ੍ਞਾਣੇ ਸਤਿ ਨਾਮਰੂਪਂ ਹੋਤੀ’’ਤਿਆਦਿਨਾ ਨਵਮੇ ਵੁਤ੍ਤਸ੍ਸ ਨਯਸ੍ਸ ‘‘ਅਵਿਜ੍ਜਾਯ ਸਤਿ ਸਙ੍ਖਾਰਾ ਹੋਨ੍ਤੀ’’ਤਿਆਦਿਨਾ ਦਸਮੇ ਵੁਤ੍ਤਨਯੇ ਅਨ੍ਤੋਗਧਤ੍ਤਾ. ਨਾਨਤ੍ਤਨ੍ਤਿ ਪੁਰਿਮਤੋ ਨਵਮਤੋ ਦਸਮਸ੍ਸ ਨਾਨਤ੍ਤਂ.

ਦੁਤਿਯਅਰਿਯਸਾਵਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਗਹਪਤਿਵਗ੍ਗਵਣ੍ਣਨਾ ਨਿਟ੍ਠਿਤਾ.