੯. ਵਨਸਂਯੁਤ੍ਤਂ

੧. ਵਿਵੇਕਸੁਤ੍ਤਵਣ੍ਣਨਾ

੨੨੧. ਸਂਵੇਜੇਤੁਕਾਮਾਤਿ ਅਤ੍ਥਤੋ ਸਂਵੇਗਂ ਉਪ੍ਪਾਦੇਤੁਕਾਮਾ. ਤਥਾਭੂਤਾ ਨਂ ਕਿਲੇਸਸਙ੍ਗਣਿਕਾਦਿਤੋ ਵਿਵੇਚੇਤੁਕਾਮਾ ਨਾਮ ਹੋਤੀਤਿ ਵੁਤ੍ਤਂ ‘‘ਵਿਵੇਕਂ ਪਟਿਪਜ੍ਜਾਪੇਤੁਕਾਮਾ’’ਤਿ. ਬਾਹਿਰੇਸੂਤਿ ਗੋਚਰਜ੍ਝਤ੍ਤਤੋ ਬਹਿਭੂਤੇਸੁ. ਪੁਥੁਤ੍ਤਾਰਮ੍ਮਣੇਸੂਤਿ ਰੂਪਾਦਿਨਾਨਾਰਮ੍ਮਣੇਸੁ. ਚਰਤੀਤਿ ਪਵਤ੍ਤਤਿ. ਤ੍ਵਂ ਜਨੋਤਿ ਤ੍ਵਂ ਅਤ੍ਤਨੋ ਕਿਲੇਸੇਹਿ ਜਨਨਤੋ ਵਿਸੁਂ ਜਾਤੋ ਤਾਦਿਸੇ ਏਵ ਅਞ੍ਞਸ੍ਮਿਂ ਜਨੇ ਇਮਂ ਅਯੋਨਿਸੋਮਨਸਿਕਾਰਵਸੇਨ ਪਵਤ੍ਤਮਾਨਂ ਛਨ੍ਦਰਾਗਂ ਵਿਨਯਸ੍ਸੁ ਵਿਨੋਦੇਹਿ. ਸਤਂ ਤਂ ਸਾਰਯਾਮਸੇਤਿ ਨਿਯ੍ਯਾਨਿਕਸਾਸਨੇ ਪਬ੍ਬਜਿਤ੍ਵਾ ਸਤ੍ਥੁ ਸਨ੍ਤਿਕੇ ਕਮ੍ਮਟ੍ਠਾਨਂ ਗਹੇਤ੍ਵਾ ਅਰਞ੍ਞਵਾਸੇਨ ਚ ਸਤਿਮਨ੍ਤਂ ਪਣ੍ਡਿਤਂ ਤਂ ਮਯਮ੍ਪਿ ਯਥਾਉਪ੍ਪਨ੍ਨਂ ਵਿਤਕ੍ਕਂ ਵਿਨੋਦਨਾਯ ਸਾਰਯਾਮ, ਸਤਂ ਵਾ ਸਪ੍ਪੁਰਿਸਾਨਂ ਕਿਲੇਸਵਿਗਮਨਧਮ੍ਮਂ ਪਟਿਪਜ੍ਜਿਤ੍ਵਾ ਵਸਨ੍ਤਂ ਤਂ ਸਾਰਯਾਮ ਵਟ੍ਟਦੁਕ੍ਖਂ. ਪਾਤਾਲਨ੍ਤਿ ਮੋਹਪਾਤਾਲਂ ਕਿਲੇਸਰਜੋ, ਤਦੇਵ ‘‘ਪਾਤਾਲ’’ਨ੍ਤਿ ਵੁਤ੍ਤਂ. ਮਾ ਅਵਹਰੀਤਿ ਹੇਟ੍ਠਾ ਦੁਗ੍ਗਤਿਸੋਤਂ ਮਾ ਉਪਨੇਸਿ. ਸਿਤਨ੍ਤਿ ਸਮ੍ਬਨ੍ਧਂ. ਤੇਨਾਹ ‘‘ਸਰੀਰਲਗ੍ਗ’’ਨ੍ਤਿ. ਵਿਵੇਕਮਾਪਨ੍ਨੋਤਿ ਕਿਲੇਸਵਿਵੇਕਂ ਸਮਥਵਿਪਸ੍ਸਨਾਭਾਵਨਮਾਪਨ੍ਨੋ. ਉਤ੍ਤਮਵੀਰਿਯਨ੍ਤਿ ਉਸ੍ਸੋਲ਼੍ਹਿਲਕ੍ਖਣਪ੍ਪਤ੍ਤਂ ਵੀਰਿਯਂ, ਚਤੁਬ੍ਬਿਧਂ ਸਮਪ੍ਪਧਾਨਵੀਰਿਯਂ ਵਾ ਸਮ੍ਪਤ੍ਤਂ. ਪਗ੍ਗਯ੍ਹਾਤਿ ਆਰੋਪੇਤ੍ਵਾ. ਪਰਮਵਿਵੇਕਨ੍ਤਿ ਪਰਮਂ ਸਮੁਚ੍ਛੇਦਵਿਵੇਕਂ.

ਵਿਵੇਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੨. ਉਪਟ੍ਠਾਨਸੁਤ੍ਤਵਣ੍ਣਨਾ

੨੨੨. ਕਾਯਦਰਥੋ ਹੋਤਿਯੇਵ ਨਿਯਮੇਨ, ਨ ਚਿਤ੍ਤਦਰਥੋ ਤਸ੍ਸ ਮਗ੍ਗੇਨੇਵ ਸਮੁਗ੍ਘਾਟਿਤਤ੍ਤਾ.

ਜਰਾਤੁਰੋਤਿ ਜਰਾਭਿਭਵਨੇਨ ਆਤੁਰੋਯੇਵ. ਪਦਦ੍ਵਯੇਪਿ ਏਸੇਵ ਨਯੋ. ਉਪਰਿਟ੍ਠਤਾਯ ਪਰਿਤੋ ਦੀਘਪੁਥੁਲਤਾਯ ਅਤਿਵਿਯ ਵਿਜ੍ਝਤੀਤਿ ਸਤ੍ਤਿਸਲ੍ਲਗ੍ਗਹਣਂ. ਏਵਂ ਹਿਸ੍ਸ ਤਣ੍ਹਾਸਲ੍ਲਸ੍ਸ ਸਦਿਸਤਾ. ਅਵਿਜ੍ਜਾਯ ਪਨ ਸਮ੍ਮੋਹਾਪਾਦਨੇਨ ਦੁਕ੍ਖਾਪਾਦਨੇਨ ਚ ਵਿਸਸਦਿਸਤਾ. ਰੁਪ੍ਪਤੋਤਿ ਵਿਕਾਰਂ ਆਪਾਦਿਯਮਾਨਸ੍ਸ ਪੀਲ਼ਿਯਮਾਨਸ੍ਸਾਤਿ ਅਤ੍ਥੋਤਿ ਆਹ ‘‘ਘਟ੍ਟਿਯਮਾਨਸ੍ਸਾ’’ਤਿ.

ਪਬ੍ਬਜਿਤਨ੍ਤਿ ਸਸਨ੍ਤਾਨਤੋ ਪਬ੍ਬਜਿਤਂ ਵਾ ਰਾਗਾਦਿਮਲਤੋ ਪਬ੍ਬਜਿਤਂ ਵਾ. ਤਸ੍ਮਾਤਿ ਯਸ੍ਮਾ ਥੇਰਸ੍ਸੇਵੇਤਂ ਵਚਨਂ, ਤਸ੍ਮਾ ਅਯਂ ਇਦਾਨਿ ਵੁਚ੍ਚਮਾਨੋ ਏਤ੍ਥ ਗਾਥਾਯ ਅਤ੍ਥੋ. ਦੇਵਤਾਯ ਹੀਤਿਆਦਿ ਵੁਤ੍ਤਸ੍ਸੇਵ ਅਤ੍ਥਸ੍ਸ ਪਾਕਟਕਰਣਂ. ਏਤ੍ਥਾਤਿ ਸੇਸਗਾਥਾਸੁ. ਅਤ੍ਥਸ੍ਸ ਵੁਤ੍ਤਨਯਤ੍ਤਾ ‘‘ਅਨੁਤ੍ਤਾਨਪਦਵਣ੍ਣਨਾ’’ਤਿ ਆਹ. ਵਿਨਯਾਤਿ ਹੇਤੁਮ੍ਹਿ ਨਿਸ੍ਸਕ੍ਕਵਚਨਨ੍ਤਿ ਤਸ੍ਸ ਹੇਤੁਮ੍ਹਿ ਕਰਣਵਚਨੇਨ ਅਤ੍ਥਮਾਹ ‘‘ਵਿਨਯੇਨਾ’’ਤਿ. ਤਥਾ ‘‘ਸਮਤਿਕ੍ਕਮਾ’’ਤਿ ਏਤ੍ਥਾਪਿ. ਪਰਮਪਰਿਸੁਦ੍ਧਂ ਸਂਕਿਲੇਸਸਮੁਚ੍ਛਿਨ੍ਦਨਤੋ. ਆਰਦ੍ਧਵੀਰਿਯਨ੍ਤਿ ਸਮ੍ਭਾਵਿਤਵੀਰਿਯਂ. ਸਮ੍ਭਾਵਨਞ੍ਚਸ੍ਸ ਪਗ੍ਗਣ੍ਹਨਂ ਪਰਿਪੂਰਣਞ੍ਚਾਤਿ ਆਹ ‘‘ਪਗ੍ਗਹਿਤਵੀਰਿਯਂ ਪਰਿਪੁਣ੍ਣਵੀਰਿਯ’’ਨ੍ਤਿ.

ਉਪਟ੍ਠਾਨਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੩. ਕਸ੍ਸਪਗੋਤ੍ਤਸੁਤ੍ਤਵਣ੍ਣਨਾ

੨੨੩. ਛੇਤਨ੍ਤਿ ਮਿਗਾਨਂ ਜੀਵਿਤਂ ਛੇਤਂ. ਤੇਨਾਹ ‘‘ਮਿਗਲੁਦ੍ਦਕ’’ਨ੍ਤਿ. ਰੋਹਿਤਮਿਗਨ੍ਤਿ ਲੋਹਿਤਵਣ੍ਣਂ ਖੁਦ੍ਦਕਮਿਗਂ, ‘‘ਮਹਾਰੋਹਿਤਮਿਗ’’ਨ੍ਤਿ ਕੇਚਿ. ਸਤ੍ਥੁ ਸਨ੍ਤਿਕੇ ਕਮ੍ਮਟ੍ਠਾਨਂ ਗਹੇਤ੍ਵਾ ਤਸ੍ਸ ਜਨਪਦਸ੍ਸ ਸੁਲਭਭਿਕ੍ਖਤਾਯ ਤਤ੍ਥ ਗਨ੍ਤ੍ਵਾ ਵਿਹਰਤੀਤਿ ਇਮਮਤ੍ਥਂ ਸਨ੍ਧਾਯ ‘‘ਪਠਮਸੁਤ੍ਤੇ ਵੁਤ੍ਤਨਯੇਨੇਵਾ’’ਤਿ ਵੁਤ੍ਤਂ. ਅਯਂ ਪਨ ਥੇਰੋ ਪਞ੍ਚਾਭਿਞ੍ਞੋ ਵਿਪਸ੍ਸਨਾਕਮ੍ਮਿਕੋ. ਠਤ੍ਵਾਤਿ ਪਦਾਨੁਬਨ੍ਧਨਵਸੇਨ ਗਮਨਂ ਉਪਚ੍ਛਿਨ੍ਦਿਤ੍ਵਾ ਥੇਰਸ੍ਸ ਆਸਨ੍ਨਟ੍ਠਾਨੇ ਠਤ੍ਵਾ. ਤਸ੍ਸ ਵਚਨਂ ਸੋਤੁਂ ਆਰਦ੍ਧੋ. ਅਙ੍ਗੁਟ੍ਠਕਂ ਜਾਲਾਪੇਸੀਤਿ ਅਧਿਟ੍ਠਾਨਬਲੇਨ ਦਣ੍ਡਦੀਪਿਕਂ ਵਿਯ ਅਤ੍ਤਨੋ ਅਙ੍ਗੁਟ੍ਠਕਂ ਜਾਲਾਪੇਸਿ. ਅਕ੍ਖੀਹਿਪਿ ਪਸ੍ਸਤਿ ਅਙ੍ਗੁਟ੍ਠਕਂ ਜਾਲਮਾਨਂ. ਕਣ੍ਣੇਹਿਪਿ ਸੁਣਾਤਿ ਤੇਨ ਵੁਚ੍ਚਮਾਨਂ ਧਮ੍ਮਂ ਏਕਦੇਸੇਨ. ਚਿਤ੍ਤਂ ਪਨਸ੍ਸ ਧਾਵਤੀਤਿ ਸਮ੍ਬਨ੍ਧੋ. ਏਤਸ੍ਸਪੀਤਿ ਲੁਦ੍ਦਕਸ੍ਸਪਿ.

ਅਪ੍ਪਪਞ੍ਞਨ੍ਤਿ ਏਤ੍ਥ ਅਪ੍ਪ-ਸਦ੍ਦੋ ‘‘ਅਪ੍ਪਹਰਿਤੇ’’ਤਿਆਦੀਸੁ ਵਿਯ ਅਭਾਵਤ੍ਥੋਤਿ ਆਹ ‘‘ਨਿਪ੍ਪਞ੍ਞ’’ਨ੍ਤਿ. ਕਾਰਣਜਾਨਨਸਮਤ੍ਥੇਨਾਤਿ ਇਮਿਨਾ ਕਾਰਣੇਨ ਸਤ੍ਤਾਨਂ ਸੁਖਂ, ਇਮਿਨਾ ਦੁਕ੍ਖਨ੍ਤਿ ਏਵਂ ਸਮਾਚਰਮਾਨੇਨ ਕਾਰਣਂ ਜਾਨਿਤੁਂ ਸਮਤ੍ਥੇਨ ਕਮ੍ਮਸ੍ਸਕਤਞਾਣਸਮ੍ਪਯੁਤ੍ਤਚਿਤ੍ਤੇਨਾਤਿ ਅਤ੍ਥੋ. ਸੁਣਾਤੀਤਿ ਕੇਵਲਂ ਸਵਨਮਤ੍ਤਵਸੇਨ ਸੁਣਾਤਿ, ਨ ਤਦਤ੍ਥਵਸੇਨ. ਤੇਨਾਹ ‘‘ਅਤ੍ਥਮਸ੍ਸ ਨ ਜਾਨਾਤੀ’’ਤਿ. ਕਾਰਣਰੂਪਾਨੀਤਿ ਸਭਾਵਕਾਰਣਾਨਿ. ਕਿਂ ਮੇ ਇਮਿਨਾਤਿ? ‘‘ਇਦਂ ਪਪਞ੍ਚ’’ਨ੍ਤਿ ਪਹਾਯ. ਵੀਰਿਯਂ ਪਗ੍ਗਯ੍ਹਾਤਿ ਚਤੁਬ੍ਬਿਧਂ ਸਮ੍ਮਪ੍ਪਧਾਨਂ ਵੀਰਿਯਂ ਪਗ੍ਗਣ੍ਹਿਤ੍ਵਾ.

ਕਸ੍ਸਪਗੋਤ੍ਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੪. ਸਮ੍ਬਹੁਲਸੁਤ੍ਤਵਣ੍ਣਨਾ

੨੨੪. ਸਮ੍ਬਹੁਲਾਤਿ ਸੁਤ੍ਤਨ੍ਤਨਯੇਨ ਸਮ੍ਬਹੁਲਾ. ਸੁਤ੍ਤਨ੍ਤੇ ਸਜ੍ਝਾਯਿਂਸੂਤਿ ਸੁਤ੍ਤਨ੍ਤਿਕਾ. ਵਿਨਯਂ ਧਾਰੇਨ੍ਤੀਤਿ ਵਿਨਯਧਰਾ. ਯੁਞ੍ਜਨ੍ਤੀਤਿ ਵਾਸਧੁਰੇ ਯੋਗਂ ਕਰੋਨ੍ਤਿ. ਘਟੇਨ੍ਤੀਤਿ ਤਤ੍ਥ ਵਾਯਾਮਂ ਕਰੋਨ੍ਤਿ. ਕਰੋਨ੍ਤਾਨਂਯੇਵ ਅਰੁਣੋ ਉਗ੍ਗਚ੍ਛਤੀਤਿ ਸਮ੍ਬਨ੍ਧੋ.

ਕੋਮੇਤਿ ਕਿਂ ਇਮੇ? ਤੇਨਾਹ ‘‘ਕਹਂ ਇਮੇ’’ਤਿ? ਵਜ੍ਜਿਭੂਮਿਂ ਵਜ੍ਜਿਰਟ੍ਠਂ ਗਤਾਤਿ ਵਜ੍ਜਿਭੂਮਿਯਾ. ਤੇਨਾਹ ‘‘ਵਜ੍ਜਿਰਟ੍ਠਾਭਿਮੁਖਾ ਗਤਾ’’ਤਿ. ਨਤ੍ਥਿ ਏਤੇਸਂ ਨਿਕੇਭਂ ਨਿਬਦ੍ਧਨਿਵਾਸਟ੍ਠਾਨਨ੍ਤਿ ਅਨਿਕੇਤਾ ਤੇਨਾਹ ‘‘ਅਗੇਹਾ’’ਤਿ. ਉਤੁ ਏਵ ਸਪ੍ਪਾਯਂ, ਉਤੁਵਸੇਨ ਵਾ ਕਾਯਚਿਤ੍ਤਾਨਂ ਕਲ੍ਲਤ੍ਤਾ ਸਪ੍ਪਾਯਂ. ਏਸ ਨਯੋ ਸੇਸੇਸੁਪਿ.

ਸਮ੍ਬਹੁਲਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੫. ਆਨਨ੍ਦਸੁਤ੍ਤਵਣ੍ਣਨਾ

੨੨੫. ਅਤਿਵੇਲਨ੍ਤਿ ਅਤਿਬਹੁਕਾਲਂ. ਭਿਕ੍ਖੁਨਾ ਨਾਮ ਉਪਗਤਾਨਂ ਉਪਨਿਸਿਨ੍ਨਕਥਾਮਤ੍ਤਂ ਵਤ੍ਵਾ ਗਨ੍ਥਧੁਰੇਹਿ ਵਾਸਧੁਰੇਹਿ ਵਾ ਯੁਤ੍ਤਪਯੁਤ੍ਤਚਿਤ੍ਤੇਨ ਭਵਿਤਬ੍ਬਂ, ਨਾਤਿਵੇਲਂ ਤੇਸਂ ਸਞ੍ਞਤ੍ਤਿਬਹੁਲੇਨ. ਥੇਰੋ ਪਨ ਤਦਾ ਕੇਨਚਿ ਕਾਰਣੇਨ ਬਹੁਵੇਲਂ ਗਿਹਿਸਞ੍ਞਤ੍ਤਿਬਹੁਲੋ ਅਹੋਸਿ, ਤਂ ਸਨ੍ਧਾਯ ਵੁਤ੍ਤਂ ‘‘ਅਤਿਵੇਲ’’ਨ੍ਤਿਆਦਿ. ਇਦਾਨਿ ਤਮਤ੍ਥਂ ਵਿਭਾਵੇਤੁਂ ‘‘ਭਗਵਤੀ’’ਤਿਆਦਿ ਵੁਤ੍ਤਂ. ਤਨ੍ਤਿ ਤਂ ਤਾਦਿਸਂ ਸਞ੍ਞਾਪਨਂ ਸਨ੍ਧਾਯ ਏਤਂ ‘‘ਅਤਿਵੇਲਂ ਗਿਹਿਸਞ੍ਞਤ੍ਤਿਬਹੁਲੋ’’ਤਿ ਵਚਨਂ ਵੁਤ੍ਤਂ. ਭਿਕ੍ਖੁਸਙ੍ਘਸ੍ਸ ਕਥਂ ਸੁਤ੍ਵਾਤਿ ਸਙ੍ਘਸ੍ਸ ਮਜ੍ਝੇ ਨਿਸੀਦਿਤ੍ਵਾ ਥੇਰੇਨ ਕਥਿਤਤ੍ਤਾ ਵੁਤ੍ਤਂ. ਸਤ੍ਥੁਸਾਸਨਨ੍ਤਿ ਪਿਟਕਤ੍ਤਯਂ ਵਦਤਿ.

ਪਸਕ੍ਕਿਯਾਤਿ ਉਪਸਕ੍ਕਿਤ੍ਵਾ ਗਨ੍ਤ੍ਵਾ. ਤਂ ਪਨ ਤਤ੍ਥ ਅਜ੍ਝੋਗਾਹਨਂ ਹੋਤੀਤਿ ਆਹ ‘‘ਪਵਿਸਿਤ੍ਵਾ’’ਤਿ. ਸਙ੍ਖਾਰਦੁਕ੍ਖਤੋ ਨਿਬ੍ਬਿਨ੍ਨਹਦਯਸ੍ਸ ਸਬ੍ਬਸਙ੍ਖਾਰਵਿਨਿਸ੍ਸਟਂ ਨਿਬ੍ਬਾਨਂ ਯਾਥਾਵਤੋ ਪਚ੍ਚਵੇਕ੍ਖਨ੍ਤਸ੍ਸ ਸਮ੍ਮਦੇਵ ਸਮਸ੍ਸਾਸਕਰਂ ਹੁਤ੍ਵਾ ਉਪਟ੍ਠਹਨ੍ਤਂ ਤਂ ਉਪਰਿ ਅਧਿਗਮਾਯ ਉਸ੍ਸੁਕ੍ਕਂ ਕਰੋਨ੍ਤੋ ਨਿਬ੍ਬਾਨਂ ਹਦਯੇ ਨਿਕ੍ਖਿਪਤਿ ਨਾਮਾਤਿ ਆਹ – ‘‘ਨਿਬ੍ਬਾਨਂ…ਪੇ… ਓਪੇਤਿ ਨਾਮਾ’’ਤਿ. ਨਿਬ੍ਬਾਨਂ…ਪੇ… ਆਰਮ੍ਮਣਤੋ ਓਪੇਤਿ ਨਾਮਾਤਿ ਆਨੇਤ੍ਵਾ ਸਮ੍ਬਨ੍ਧੋ. ਅਤ੍ਥਵਿਰਹਿਤਾ ‘‘ਬਿਲ਼ਿਬਿਲ਼ੀ’’ਤਿ ਪਵਤ੍ਤਕਿਰਿਯਾ ਬਿਲ਼ਿਕਾ, ਅਯਂ ਪਨ ਗਿਹਿਸਞ੍ਞਤ੍ਤਿਕਥਾ ਥੇਰਸ੍ਸ ਅਤ੍ਤਨੋ ਸਾਮਞ੍ਞਤ੍ਥਅਸਾਧਨਤੋ ਦੇਵਤਾਯ ਬਿਲ਼ਿਕਾ ਵਿਯਾਤਿ ਬਿਲ਼ਿਬਿਲ਼ਿਕਾਤਿ ਵੁਤ੍ਤਾ.

ਆਨਨ੍ਦਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੬. ਅਨੁਰੁਦ੍ਧਸੁਤ੍ਤਵਣ੍ਣਨਾ

੨੨੬. ਅਨਨ੍ਤਰੇ ਅਤ੍ਤਭਾਵੇਤਿ ਅਤੀਤਾਨਨ੍ਤਰੇ ਦੇਵਤ੍ਤਭਾਵੇ. ਥੇਰੋ ਹਿ ਤਾਵਤਿਂਸਦੇਵਲੋਕਾ ਚਵਿਤ੍ਵਾ ਇਧੂਪਪਨ੍ਨੋ. ਅਗ੍ਗਮਹੇਸੀਤਿ ਕਾਚਿ ਪਰਿਚਾਰਿਕਾ ਦੇਵਧੀਤਾ ਚਿਤ੍ਤਪਣਿਧਾਨਮਤ੍ਤੇਨ ਇਦਾਨਿਪਿ ਦੇਵਕਾਯੇ ਭਵਿਸ੍ਸਤਿ ਉਪਚਿਤਕੁਸਲਧਮ੍ਮਤ੍ਤਾਤਿ ਮਞ੍ਞਮਾਨਾ ਤਸ੍ਮਿਂ ਵਤ੍ਤਮਾਨਂ ਵਿਯ ਕਥੇਨ੍ਤੀ ‘‘ਸੋਭਸੀ’’ਤਿ ਆਹ. ਏਵਂ ਅਤੀਤਮ੍ਪਿਸ੍ਸ ਦਿਬ੍ਬਸੋਤਂ ਪਚ੍ਚੁਪ੍ਪਨ੍ਨਂ ਵਿਯ ਮਞ੍ਞੇਯ੍ਯ ਨਾਤਿਚਿਰਕਾਲਤ੍ਤਾਤਿ ਦਸ੍ਸੇਨ੍ਤੋ ‘‘ਪੁਬ੍ਬੇਪਿ ਸੋਭਸੀ’’ਤਿ ਆਹ. ਸੁਗਤਿਨਿਰਯਾਦਿਦੁਗ੍ਗਤਿਯਾ ਵਸੇਨ ਦੁਗ੍ਗਤਾ ਏਤਰਹੀਤਿ ਅਧਿਪ੍ਪਾਯੋ. ਪਟਿਪਤ੍ਤਿਦੁਗ੍ਗਤਿਯਾ ਕਾਮੇਸੁ ਸਮ੍ਮੁਚ੍ਛਿਤਭਾਵਤੋ.

ਪਤਿਟ੍ਠਹਨ੍ਤੋਤਿ ਨਿਵਿਸਨ੍ਤੋ. ਅਟ੍ਠਹਿ ਕਾਰਣੇਹੀਤਿ ਚਿਰਕਾਲਪਰਿਭਾਵਨਾਯ ਵਿਰੁਲ਼੍ਹਮੂਲੇਹਿ ਅਯੋਨਿਸੋਮਨਸਿਕਾਰਾਦਿਪਚ੍ਚਯਮੂਲਕੇਹਿ ਵੁਚ੍ਚਮਾਨੇਹਿ ਅਟ੍ਠਹਿ ਕਾਰਣੇਹਿ. ਰਤ੍ਤੋ ਰਾਗਵਸੇਨਾਤਿ ਸਭਾਵਤੋ ਸਙ੍ਕਪ੍ਪਤੋ ਚ ਯਥਾਸਮੀਹਿਤੇ ਇਟ੍ਠਾਕਾਰੇ ਸਕ੍ਕਾਯੇ ਸਞ੍ਜਾਤਰਾਗਵਸਾ ਰਤ੍ਤੋ ਗਿਦ੍ਧੋ ਗਧਿਤੋ. ਪਤਿਟ੍ਠਾਤੀਤਿ ਓਰੁਯ੍ਹ ਤਿਟ੍ਠਤਿ. ਦੁਟ੍ਠੋ ਦੋਸਵਸੇਨਾਤਿ ਸਭਾਵਤੋ ਸਙ੍ਕਪ੍ਪਤੋ ਚ ਯਥਾਸਮੀਹਿਤੇ ਅਨਿਟ੍ਠਾਕਾਰੇ ਸਕ੍ਕਾਯੇ ਸਞ੍ਜਾਤਦੋਸਵਸੇਨ ਦੁਟ੍ਠੋ ਰੁਪਿਤਚਿਤ੍ਤੋ. ਮੂਲ਼੍ਹੋ ਮੋਹਵਸੇਨਾਤਿ ਅਸਮਪੇਕ੍ਖਨੇਨ ਮੂਲ਼੍ਹੋ ਮੁਯ੍ਹਨਵਸੇਨ. ਵਿਨਿਬਦ੍ਧੋਤਿ ਅਹਂਕਾਰੇਨ ਵਿਸੇਸਤੋ ਨਿਬਨ੍ਧਨਤੋ ਮਾਨਵਤ੍ਥੁਸ੍ਮਿਂ ਬਨ੍ਧਿਤੋ. ਮਾਨਵਸੇਨਾਤਿ ਤੇਨ ਤੇਨ ਮਞ੍ਞਨਾਕਾਰੇਨ. ਪਰਾਮਟ੍ਠੋਤਿ ਧਮ੍ਮਸਭਾਵਂ ਨਿਚ੍ਚਾਦਿਵਸੇਨ ਪਰਤੋ ਆਮਟ੍ਠੋ. ਦਿਟ੍ਠਿਵਸੇਨਾਤਿ ਮਿਚ੍ਛਾਦਸ੍ਸਨਵਸੇਨ. ਥਾਮਗਤੋਤਿ ਰਾਗਾਦਿਕਿਲੇਸਵਸੇਨ ਥਾਮਂ ਥਿਰਭਾਵਂ ਉਪਗਤੋ. ਅਨੁਸਯਵਸੇਨਾਤਿ ਮਗ੍ਗੇਨ ਅਪ੍ਪਹੀਨਤਾਯ ਅਨੁ ਅਨੁ ਸਨ੍ਤਾਨੇ ਸਯਨਵਸੇਨ. ਅਪ੍ਪਹੀਨਟ੍ਠੋ ਹਿ ਤੇਸਂ ਅਨੁਸਯਟ੍ਠੋ. ਅਨਿਟ੍ਠਙ੍ਗਤੋਤਿ ਸਂਸਯਿਤੋ. ਵਿਕ੍ਖੇਪਗਤੋਤਿ ਵਿਕ੍ਖਿਤ੍ਤਭਾਵਂ ਉਪਗਤੋ. ਉਦ੍ਧਚ੍ਚਵਸੇਨਾਤਿ ਚਿਤ੍ਤਸ੍ਸ ਉਦ੍ਧਤਭਾਵਵਸੇਨ. ਤਾਪੀਤਿ ਤਾਪਿ ਦੇਵਕਞ੍ਞਾਯੋ. ਏਵਂ ਪਤਿਟ੍ਠਿਤਾਵਾਤਿ ਯਥਾਵੁਤ੍ਤਨਯੇਨ ਰਤ੍ਤਭਾਵਾਦਿਨਾ ਸਕ੍ਕਾਯਸ੍ਮਿਂ ਪਤਿਟ੍ਠਿਤਾ ਏਵ. ਨਰਦੇਵਾਨਨ੍ਤਿ ਪੁਰਿਸਭੂਤਦੇਵਾਨਂ.

ਪਟਿਗਨ੍ਤੁਨ੍ਤਿ ਅਪੇਕ੍ਖਾਵਸੇਨ ਤਤੋ ਅਪਗਨ੍ਤੁਂ ਅਪੇਕ੍ਖਂ ਵਿਸ੍ਸਜ੍ਜੇਤੁਂ. ਦੁਸ੍ਸਨ੍ਤਨ੍ਤਿ ਦਸਨ੍ਤਂ, ‘‘ਵਤ੍ਥ’’ਨ੍ਤਿ ਕੇਚਿ. ਸੂਚਿਂ ਯੋਜੇਤ੍ਵਾਤਿ ਸਿਬ੍ਬਨਸੁਤ੍ਤੇਨ ਸੂਚਿਂ ਯੋਜੇਤ੍ਵਾ ਪਾਸੇ ਚ ਪਵੇਸੇਤ੍ਵਾ. ਮਨਾਪਕਾਯੇ ਦੇਵਨਿਕਾਯੇ ਜਾਤਾ ਮਨਾਪਕਾਯਿਕਾ. ਤੇਸਂ ਪਭਾਵਂ ਦਸ੍ਸੇਤੁਂ ‘‘ਮਨਸਾ’’ਤਿਆਦਿ ਵੁਤ੍ਤਂ. ਸਮਜ੍ਜਨ੍ਤਿ ਸਂਹਿਤਂ. ਗਮਨਭਾਵਨ੍ਤਿ ਗਮਨਜ੍ਝਾਸਯਂ. ਵਿਕ੍ਖੀਣੋਤਿ ਵਿਚ੍ਛਿਨ੍ਦਨਵਸੇਨ ਖੀਣੋ. ਦੇਵਤਾਨਂ ਉਤ੍ਤਰਿਮਨੁਸ੍ਸਧਮ੍ਮਾਰੋਚਨੇ ਦੋਸੋ ਨਤ੍ਥੀਤਿ ਤਾਸਂ ਪੁਨ ਅਨਾਗਮਨਤ੍ਥਂ ਅਰਹਤ੍ਤਂ ਬ੍ਯਾਕਾਸਿ.

ਅਨੁਰੁਦ੍ਧਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੭. ਨਾਗਦਤ੍ਤਸੁਤ੍ਤਵਣ੍ਣਨਾ

੨੨੭. ਅਤਿਕਾਲੇਨਾਤਿ ਅਤਿਵਿਯ ਪੁਬ੍ਬਣ੍ਹਕਾਲੇਨ, ਕਾਲਸ੍ਸੇਵਾਤਿ ਅਤ੍ਥੋ. ਕੋਟਿਸਮ੍ਮੁਞ੍ਜਨਿਯਾਤਿ ਸਮ੍ਮੁਞ੍ਜਨਿਕੋਟਿਯਾ, ਸਮ੍ਮੁਞ੍ਜਨਿਯਾ ਏਕਦੇਸੇਨੇਵਾਤਿ ਅਤ੍ਥੋ. ਇਮਿਨਾ ਸਮ੍ਮਜ੍ਜਨੇ ਅਮਨਾਪਕਾਰਿਤਂ ਦਸ੍ਸੇਤਿ. ਮਜ੍ਝਨ੍ਹਿਕੇ ਵੀਤਿਵਤ੍ਤੇਤਿ ਗਿਹਿਸਂਸਗ੍ਗਵਸੇਨ ਕਾਲਂ ਵੀਤਿਨਾਮੇਨ੍ਤੋ ਮਜ੍ਝਨ੍ਹੇ ਬਹੁਵੀਤਿਵਤ੍ਤੇ. ਅਞ੍ਞੇਹਿ ਭਿਕ੍ਖੂਹੀਤਿ ਨਾਤਿਕਾਲਂ ਪਵਿਟ੍ਠੇਹਿ. ਨਿਸ੍ਸਕ੍ਕਵਚਨਞ੍ਚੇਤਂ. ਭਾਯਾਮਿ ਨਾਗਦਤ੍ਤਨ੍ਤਿ ਤਸ੍ਸ ਪਟਿਪਤ੍ਤਿਂ ਭਾਯਿਤਬ੍ਬਂ ਕਤ੍ਵਾ ਦੇਵਤਾ ਵਦਨ੍ਤੀ ਪਟਿਪਤ੍ਤਿਯਂ ਨਿਯੋਜੇਤਿ. ਸੁਪ੍ਪਗਬ੍ਭਨ੍ਤਿ ਕਾਯਪਾਗਬ੍ਬਿਯਾਦੀਹਿ ਅਤਿਵਿਯ ਸਮਨ੍ਨਾਗਤਂ.

ਨਾਗਦਤ੍ਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੮. ਕੁਲਘਰਣੀਸੁਤ੍ਤਵਣ੍ਣਨਾ

੨੨੮. ਓਗਾਹਪ੍ਪਤ੍ਤੋਤਿ ਵਿਸ੍ਸਾਸਵਸੇਨ ਅਨੁਪ੍ਪਵੇਸਂ ਪਤ੍ਤੋ. ਅਞ੍ਞਤਰਂ ਕੁਲਨ੍ਤਿ ਤਸ੍ਮਿਂ ਕੁਲੇ ਜਾਯਮ੍ਪਤਿਂ ਸਨ੍ਧਾਯ ਵਦਤਿ. ‘‘ਬਹੂਪਕਾਰਂ ਮੇ ਏਤਂ ਕੁਲਂ ਚਿਰਂ ਸਪ੍ਪਾਯਾਹਾਰਦਾਨਾਦਿਨਾ; ਤਸ੍ਮਾ ਇਧਾਹਂ ਅਗ੍ਗਦਕ੍ਖਿਣੇਯ੍ਯੋ ਜਾਤੋ; ਇਮੇਸਂਯੇਵ ਦੇਯ੍ਯਧਮ੍ਮਪਟਿਗ੍ਗਣ੍ਹਨੇਨ ਪੁਞ੍ਞਂ ਵਡ੍ਢੇਸ੍ਸਾਮੀ’’ਤਿ ਚਿਨ੍ਤੇਸਿ. ਤੇਨਾਹ ‘‘ਅਞ੍ਞਤ੍ਥ ਗਨ੍ਤ੍ਵਾ ਕਿਂ ਕਰਿਸ੍ਸਾਮੀ’’ਤਿਆਦਿ. ਸਾਤਿ ਦੇਵਤਾ. ਉਭੋਪੇਤੇਤਿ ਤਂ ਭਿਕ੍ਖੁਞ੍ਚ ਘਰਣਿਞ੍ਚ ਸਨ੍ਧਾਯ ਵਦਤਿ. ਪਟਿਗਾਧਪ੍ਪਤ੍ਤਾਤਿ ਪਟਿਗਾਧਂ ਪਤ੍ਤਾ ਅਞ੍ਞਮਞ੍ਞਸ੍ਮਿਂ ਪਤਿਟ੍ਠਿਤਵਿਸ੍ਸਾਸੇਨ.

ਵਿਸ੍ਸਮਪ੍ਪਤ੍ਤਿਵਸੇਨ ਸਨ੍ਤਿਟ੍ਠਨ੍ਤਿ ਏਤ੍ਥਾਤਿ ਸਣ੍ਠਾਨਂ, ਵਿਸ੍ਸਮਨਟ੍ਠਾਨਂ. ਸਮਾਗਨ੍ਤ੍ਵਾਤਿ ਸਨ੍ਨਿਪਤਿਤ੍ਵਾ. ਪਟਿਞ੍ਞੂਦਾਹਰਣੇਹਿ ਮਨ੍ਤਯਤੀਤਿ ਮਨ੍ਤਨਂ, ਞਾਪਕਂ ਕਾਰਣਂ. ਪਟਿਲੋਮਸਦ੍ਦਾਤਿ ਪਟਿਲੋਮਭਾਵੇਨ ਪਤਿਤਤ੍ਤਾ ਅਸਚ੍ਚਵਿਭਾਵਨਾ ਪਟਿਕੂਲਸਦ੍ਦਾ. ਤੇਨ ਕਾਰਣੇਨਾਤਿ ਤੇਨ ਕਾਰਣਪਟਿਰੂਪਕੇਨ ਮਿਚ੍ਛਾਵਚਨੇਨ. ਨ ਮਙ੍ਕੁਹੋਤਬ੍ਬਂ ਅਕਾਰਕਭਾਵਤੋ. ਸਦ੍ਦੇਨ ਪਰਿਤਸ੍ਸਤੀਤਿ ਪਰੇਹਿ ਅਤ੍ਤਨਿ ਪਯੁਤ੍ਤਮਿਚ੍ਛਾਸਦ੍ਦਮਤ੍ਤੇਨ ਪਰਿਤਸ੍ਸਨਸੀਲੋ. ਵਤਂ ਨ ਸਮ੍ਪਜ੍ਜਤੀਤਿ ਯਥਾਸਮਾਦਿਨ੍ਨਵਤਂ ਲਹੁਚਿਤ੍ਤਤਾਯ ਨ ਪਾਰਿਪੂਰਿਂ ਗਚ੍ਛਤਿ. ਸਮ੍ਪਨ੍ਨਵਤੋਤਿ ਪਰਿਪੁਣ੍ਣਸੀਲਾਦਿਵਤਗੁਣੋ

ਕੁਲਘਰਣੀਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੯. ਵਜ੍ਜਿਪੁਤ੍ਤਸੁਤ੍ਤਵਣ੍ਣਨਾ

੨੨੯. ਵਜ੍ਜਿਰਟ੍ਠੇ ਰਾਜਪੁਤ੍ਤੋਤਿ ਵਜ੍ਜਿਰਟ੍ਠੇ ਜਾਤਸਂਵਦ੍ਧੋ ਵਜ੍ਜਿਰਾਜਪੁਤ੍ਤੋ. ਸਬ੍ਬਰਤ੍ਤਿਚਾਰੋਤਿ ਛਣਸਮ੍ਪਤ੍ਤਿਯਾ ਇਤੋ ਚਿਤੋ ਚਰਨ੍ਤੇਹਿ ਅਨੁਭਵਿਤਬ੍ਬਨਕ੍ਖਤ੍ਤਮਹੋ. ਤੇਨਾਹ ‘‘ਕਤ੍ਤਿਕਨਕ੍ਖਤ੍ਤਂ ਘੋਸੇਤ੍ਵਾ’’ ਤਿਆਦਿ. ਏਕਾਬਦ੍ਧਂ ਹੋਤੀਤਿ ਯਸ੍ਮਾ ਚਾਤੁਮਹਾਰਾਜਿਕਦੇਵਾ ਤਸ੍ਮਿਂ ਦਿਵਸੇ ਨਕ੍ਖਤ੍ਤਂ ਘੋਸੇਤ੍ਵਾ ਅਤ੍ਤਨੋ ਪੁਞ੍ਞਾਨੁਭਾਵਸਿਦ੍ਧਾਯ ਦਿਬ੍ਬਸਮ੍ਪਤ੍ਤਿਯਾ ਮਹਨ੍ਤਂ ਨਕ੍ਖਤ੍ਤਕੀਲ਼ਾਸੁਖਂ ਅਨੁਭਵਨ੍ਤਿ, ਤਸ੍ਮਾ ਤਂ ਤੇਹਿ ਏਕਾਬਦ੍ਧਂ ਵਿਯ ਹੋਤਿ. ਭੇਰਿਆਦਿਤੂਰਿਯਾਨਨ੍ਤਿ ਭੇਰਿਮੁਦਿਙ੍ਗਸਙ੍ਖਪਣਵਵੀਣਾਦਿਤੂਰਿਯਾਨਂ. ਤਾਲ਼ਿਤਾਨਨ੍ਤਿ ਆਰਦ੍ਧਲਯਾਨੁਰੂਪਂ ਪਹਟਾਨਂ. ਵੀਣਾਦੀਨਨ੍ਤਿ ਵੀਣਾਵੇਣੁਗੋਮੁਖੀਆਦੀਨਂ. ਵਾਦਿਤਾਨਨ੍ਤਿ ਯਥਾਰਦ੍ਧਮੁਚ੍ਛਨਾਨੁਰੂਪਂ ਸਙ੍ਘਟ੍ਟਿਤਾਨਂ. ਅਭਾਸੀਤਿ ਤੇਨ ਸਦ੍ਦੇਨ ਆਕਡ੍ਢਿਯਮਾਨਹਦਯੋ ਅਯੋਨਿਸੋ ਉਮ੍ਮੁਜ੍ਜਿਤ੍ਵਾ ‘‘ਮਹਤੀ ਵਤ ਮੇ ਜਾਨੀ’’ਤਿ ਅਨੁਤ੍ਥੁਨਨ੍ਤੋ ਅਭਾਸਿ. ਛਡ੍ਡਿਤਦਾਰੁਕਂ ਵਿਯਾਤਿ ਵਨੇ ਛਡ੍ਡਿਤਨਿਰਤ੍ਥਕਕਲ਼ਿਙ੍ਗਰਂ ਵਿਯ. ਲਾਮਕਤਰੋਤਿ ਨਿਹੀਨਤਰੋ. ਦੇਵਤਾ ਪਠਮਪ੍ਪਿਤਂ ਆਣਿਂ ਪਟਾਣਿਯਾ ਨੀਹਰਨ੍ਤੀ ਵਿਯ ਤੇਨ ਭਿਕ੍ਖੁਨਾ ਵੁਤ੍ਤਮਤ੍ਥਂ ਅਪਨੇਨ੍ਤੀ ‘‘ਤਸ੍ਸ ਤੇ ਬਹੁਕਾ ਪਿਹਯਨ੍ਤੀ’’ਤਿ ਅਵੋਚਾਤਿ ਵੁਤ੍ਤਨ੍ਤਿ ਦਸ੍ਸੇਨ੍ਤੋ ‘‘ਥੇਰੋ’’ਤਿਆਦਿਮਾਹ. ਸਗ੍ਗਂ ਗਚ੍ਛਨ੍ਤਾਨਂ ਯਥਾ ਨੇਰਯਿਕਾ ਪਿਹਯਨ੍ਤਿ, ਏਵਂ ਸਮ੍ਮਾਪਟਿਪਨ੍ਨਸ੍ਸ ਤੁਯ੍ਹਂ ਬਹੂ ਪਿਹਯਨ੍ਤਿ, ਤਸ੍ਮਾ ਤ੍ਵਂ ‘‘ਪਾਪਿਯੋ’’ਤਿ ਅਤ੍ਤਾਨਂ ਮਾ ਮਞ੍ਞਿਤ੍ਥਾਤਿ ਅਧਿਪ੍ਪਾਯੋ.

ਵਜ੍ਜਿਪੁਤ੍ਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੦. ਸਜ੍ਝਾਯਸੁਤ੍ਤਵਣ੍ਣਨਾ

੨੩੦. ਨਿਸ੍ਸਰਣਪਰਿਯਤ੍ਤਿਵਸੇਨਾਤਿ ਅਦ੍ਧਾ ਇਮਂ ਪਰਿਯਤ੍ਤਿਂ ਨਿਸ੍ਸਾਯ ਵਟ੍ਟਦੁਕ੍ਖਤੋ ਨਿਸ੍ਸਰਿਤੁਂ ਲਬ੍ਭਾਤਿ ਏਵਂ ਨਿਸ੍ਸਰਣਪਰਿਯਤ੍ਤਿਵਸੇਨ. ਸਜ੍ਝਾਯਨਤੋਤਿ ਵਿਮੁਤ੍ਤਾਯਤਨਸੀਸੇ ਠਤ੍ਵਾ ਸਜ੍ਝਾਯਨਤੋ. ਇਦਾਨਿ ਤਸ੍ਸ ਨਿਸ੍ਸਰਣਪਰਿਯਤ੍ਤਿਵਸੇਨ ਸਜ੍ਝਾਯਨਕਰਣਂ, ਪਟਿਪਤ੍ਤਿਵਸੇਨ ਵਤ੍ਤਪਟਿਵਤ੍ਤਕਰਣਂ, ਵਿਪਸ੍ਸਨਾਭਾਵਨਞ੍ਚ ਦਸ੍ਸੇਤੁਂ ‘‘ਸੋ ਕਿਰਾ’’ਤਿਆਦਿ ਵੁਤ੍ਤਂ. ਅਰਹਤ੍ਤਂ ਪਤ੍ਤਦਿਵਸੇ ਪਟਿਪਤ੍ਤਿਕਿਤ੍ਤਨਾਯ ਪੁਰਿਮਦਿਵਸੇਸੁਪਿ ਤਥਾ ਪਟਿਪਜ੍ਜਿ, ਵਿਪਸ੍ਸਨਂ ਪਨ ਉਸ੍ਸੁਕ੍ਕਾਪੇਤੁਂ ਨਾਸਕ੍ਖੀਤਿ ਦਸ੍ਸੇਤਿ. ਕਾਲਂ ਅਤਿਵਤ੍ਤੇਤੀਤਿ ਇਦਂ ‘‘ਸਙ੍ਕਸਾਯਤੀ’’ਤਿ ਪਦਸ੍ਸ ਅਤ੍ਥਵਚਨਂ. ਥੇਰਸ੍ਸਾਤਿ ਸਜ੍ਝਾਯਕਤ੍ਥੇਰਸ੍ਸ.

ਧਮ੍ਮਪਦਾਨੀਤਿ ਸੀਲਾਦਿਧਮ੍ਮਕ੍ਖਨ੍ਧਦੀਪਕਾਨਿ ਪਦਾਨਿ. ਤੇਨਾਹ ‘‘ਸਬ੍ਬਮ੍ਪਿ ਬੁਦ੍ਧਵਚਨਂ ਅਧਿਪ੍ਪੇਤ’’ਨ੍ਤਿ. ਨ ਗਣ੍ਹਾਸਿ ਉਦ੍ਦੇਸਨ੍ਤਿ ਅਧਿਪ੍ਪਾਯੋ. ਪਾਲ਼ਿਯਂ ‘‘ਭਿਕ੍ਖੂਹਿ ਸਂਵਸਨ੍ਤੋ’’ਤਿ ਇਮਿਨਾ ਤੇਸਂ ਧਮ੍ਮਸ੍ਸਵਨਤ੍ਥਾਯਪਿ ਧਮ੍ਮੋ ਪਰਿਯਾਪੁਣਿਤਬ੍ਬੋਤਿ ਦਸ੍ਸੇਤਿ. ਵਿਰਜ੍ਜਤਿ ਏਤੇਨਾਤਿ ਵਿਰਾਗੋ, ਅਰਿਯਮਗ੍ਗੋ. ਜਾਨਿਤ੍ਵਾਤਿ ਪਰਿਞ੍ਞਾਭਿਸਮਯਵਸੇਨ ਦਿਟ੍ਠਸੁਤਾਦਿਂ ਯਾਥਾਵਤੋ ਜਾਨਿਤ੍ਵਾ ਪਟਿਵਿਜ੍ਝਿਤ੍ਵਾ. ਵਿਸ੍ਸਜ੍ਜਨਨ੍ਤਿ ਪਹਾਨਂ. ਨ ਬੁਦ੍ਧਵਚਨਸ੍ਸ ਵਿਸ੍ਸਜ੍ਜਨਂ. ਭਣ੍ਡਾਗਾਰਿਕਪਰਿਯਤ੍ਤਿਯਾਪਿ ਅਨੁਞ੍ਞਾਤਤ੍ਤਾ ਪਗੇਵ ਨਿਸ੍ਸਰਣਤ੍ਥਾਯ, ਤਤ੍ਥ ਪਨ ਮਤ੍ਤਾ ਜਾਨਿਤਬ੍ਬਾਤਿ ਦਸ੍ਸੇਨ੍ਤੋ ‘‘ਏਤ੍ਤਾਵਤਾ’’ਤਿਆਦਿਮਾਹ.

ਸਜ੍ਝਾਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੧. ਅਕੁਸਲਵਿਤਕ੍ਕਸੁਤ੍ਤਵਣ੍ਣਨਾ

੨੩੧. ਅਕੁਸਲੇ ਵਿਤਕ੍ਕੇਤਿ ਅਕੋਸਲ੍ਲਸਮ੍ਭੂਤਟ੍ਠੇਨ ਅਕੁਸਲੇ ਮਿਚ੍ਛਾਵਿਤਕ੍ਕੇ. ਯੋਨਿ ਵੁਚ੍ਚਤਿ ਉਪਾਯੋ, ਤਸ੍ਮਾ ਅਸੁਭਾਦਿਕੇ ਸੁਭਾਦਿਵਸੇਨ ਮਨਸਿਕਾਰੋ ਅਯੋਨਿਸੋਮਨਸਿਕਾਰੋਤਿ ਆਹ ‘‘ਅਨੁਪਾਯਮਨਸਿਕਾਰੇਨਾ’’ਤਿ. ਪਾਸਾਦਿਕਕਮ੍ਮਟ੍ਠਾਨਨ੍ਤਿ ਪਸਾਦਾਵਹਂ ਬੁਦ੍ਧਾਨੁਸ੍ਸਤਿਆਦਿਕਮ੍ਮਟ੍ਠਾਨਂ. ਬਲਵਪੀਤਿਞ੍ਚ ਸੁਖਞ੍ਚਾਤਿ ਨੀਵਰਣਵਿਕ੍ਖਮ੍ਭਨਤੋ ਬਲਵਨ੍ਤਂ ਉਪਚਾਰਜ੍ਝਾਨਸਹਗਤਂ ਪੀਤਿਞ੍ਚ ਸੁਖਞ੍ਚ.

ਅਕੁਸਲਵਿਤਕ੍ਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੨. ਮਜ੍ਝਨ੍ਹਿਕਸੁਤ੍ਤਵਣ੍ਣਨਾ

੨੩੨. ਨਨ੍ਦਨਵਗ੍ਗੇਤਿ ਨਨ੍ਦਨਵਗ੍ਗਵਣ੍ਣਨਾਯਂ ਤਤ੍ਥ ਇਧਾਪਿ ਗਾਥਾਯ ਵਿਸੇਸਾਭਾਵਤੋ. ਯਦਿ ਏਵਂ ਕਸ੍ਮਾ ਤਤ੍ਥ ਸਙ੍ਗੀਤਂ ਇਧ ਗਹਿਤਨ੍ਤਿ? ਦੇਵਤਾਪਟਿਸਂਯੁਤ੍ਤਤਂ ਉਪਾਦਾਯ ਦੇਵਤਾਸਂਯੁਤ੍ਤੇ ਸਙ੍ਗਹਿਤਮ੍ਪਿ ਅਟ੍ਠੁਪ੍ਪਤ੍ਤਿਯਾ ਪਟਿਸਂਯੁਤ੍ਤਤ੍ਤਾ ਇਧ ਗਹਿਤਂ.

ਮਜ੍ਝਨ੍ਹਿਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੩. ਪਾਕਤਿਨ੍ਦ੍ਰਿਯਸੁਤ੍ਤਵਣ੍ਣਨਾ

੨੩੩. ਤੇਰਸਮੇ ਯਂ ਵਤ੍ਤਬ੍ਬਂ, ਤਂ ਵਿਤ੍ਥਾਰਿਤਮੇਵਾਤਿ ਯੋਜਨਾ. ਜਨ੍ਤੁਦੇਵਪੁਤ੍ਤਸੁਤ੍ਤੇਤਿ ਜਨ੍ਤੁਦੇਵਪੁਤ੍ਤਸੁਤ੍ਤਸਂਵਣ੍ਣਨਾਯ. ‘‘ਤਤ੍ਥ ਸਙ੍ਗੀਤਂ ਇਧਾਪੀ’’ਤਿਆਦਿ ਅਨਨ੍ਤਰਸੁਤ੍ਤਵਣ੍ਣਨਾਯਂ ਵੁਤ੍ਤਨਯਮੇਵ.

ਪਾਕਤਿਨ੍ਦ੍ਰਿਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੪. ਗਨ੍ਧਤ੍ਥੇਨਸੁਤ੍ਤਵਣ੍ਣਨਾ

੨੩੪. ਗਨ੍ਧਾਰਮ੍ਮਣਂ ਉਪਨਿਜ੍ਝਾਯਤੀਤਿ ਗਨ੍ਧਸਙ੍ਖਾਤਂ ਆਰਮ੍ਮਣਂ ਉਪੇਚ੍ਚ ਨਿਜ੍ਝਾਯਤਿ, ਰੂਪਾਰਮ੍ਮਣੇਨ ਵਿਯ ਵਿਞ੍ਞਾਣੇਨ ਰੂਪਂ, ਗਨ੍ਧਾਰਮ੍ਮਣੇਨ ਤਂ ਉਪੇਚ੍ਚ ਨਿਜ੍ਝਾਯਤਿ ਪਚ੍ਚਕ੍ਖਤੋ, ਯਾਥਾਵਤੋ ਸਭਾਵਤੋ ਪਟਿਵਿਜ੍ਝਤੀਤਿ ਅਤ੍ਥੋ. ਉਪਸਿਙ੍ਘਿਸ੍ਸਤੀਤਿ ਤਣ੍ਹਾਵਸੇਨ ਉਪਗਨ੍ਤ੍ਵਾ ਸਿਙ੍ਘਿਸ੍ਸਤਿ.

ਏਕਙ੍ਗਮੇਤਂ ਥੇਯ੍ਯਾਨਨ੍ਤਿ ਆਰਮ੍ਮਣਵਸੇਨ ਥੇਯ੍ਯਵਤ੍ਥੂਸੁ ਵਿਭਜਿਯਮਾਨੇਸੁ ਏਕਮਙ੍ਗਮੇਤਂ ਗਨ੍ਧਾਰਮ੍ਮਣਨ੍ਤਿ ਆਹ ‘‘ਥੇਨਿਤਬ੍ਬਾਨ’’ਨ੍ਤਿਆਦਿ. ਓਜਾਪੇਕ੍ਖਾਯ ਥੇਯ੍ਯਾਯ ਪਵਤ੍ਤਮਾਨਾਯ ਧਮ੍ਮਾਰਮ੍ਮਣਤਾਪਿ ਤਸ੍ਸਾ ਸਿਯਾ, ਸਾ ਪਨ ਨ ਮਧੁਰਾ ਥੇਯ੍ਯਕਤਾ ਚਾਤਿ ‘‘ਪਞ੍ਚਕੋਟ੍ਠਾਸਾਨ’’ਨ੍ਤਿ ਵੁਤ੍ਤਂ. ਕਾਮਞ੍ਚ ਤਂ ਗਨ੍ਧਾਰਮ੍ਮਣਂ ਕੇਨਚਿ ਪਰਿਗ੍ਗਹਿਤਂ ਨ ਹੋਤੀਤਿ ਆਦਿਯਿਤੁਂ ਸਕ੍ਕਾ, ਸਤ੍ਥਾਰਾ ਪਨ ਅਨਨੁਞ੍ਞਾਤਤ੍ਤਾ ਨ ਯੁਤ੍ਤੋ ਤਸ੍ਸ ਪਰਿਭੋਗੋ. ਯਂ ਪਨ ਤੇਨ ਭਿਕ੍ਖੁਨਾ ਵੁਤ੍ਤਂ ‘‘ਨ ਹਰਾਮਿ ਨ ਭਞ੍ਜਾਮੀ’’ਤਿ, ਤਸ੍ਸਪਿ ਅਯਮੇਵ ਪਰਿਹਾਰੋ. ਵਣ੍ਣੀਯਤਿ ਫਲਂ ਏਤੇਨਾਤਿ ਵਣ੍ਣਂ, ਕਾਰਣਨ੍ਤਿ ਵੁਤ੍ਤਂ ‘‘ਵਣ੍ਣੇਨਾਤਿ ਕਾਰਣੇਨਾ’’ਤਿ.

ਤਸ੍ਮਿਨ੍ਤਿ ਤਸ੍ਮਿਂ ਭਿਕ੍ਖੁਸ੍ਮਿਂ. ਆਕਿਣ੍ਣਕਮ੍ਮਨ੍ਤੋਤਿ ਤਣ੍ਹਾਦਿਟ੍ਠਿਆਦਿਵਸੇਨ ਅਕੁਸਲਕਮ੍ਮਨ੍ਤੋ ਦਿਟ੍ਠਿਮੋਹਤਣ੍ਹਾਦਿਵਸੇਨ ਆਦਿਤੋ ਪਟ੍ਠਾਯ ਕੁਸਲਕਮ੍ਮਾਨਂ ਪਟਿਕ੍ਖੇਪਨਤੋ. ਦਿਟ੍ਠਿਵਸੇਨ ਚ ਕਥਿਨਕਕ੍ਖਲ਼ਖਰਿਗਤਤ੍ਤਾ ‘‘ਅਖੀਣਕਮ੍ਮਨ੍ਤੋ ਕਕ੍ਖਲ਼ਕਮ੍ਮਨ੍ਤੋ’’ਤਿ ਵੁਤ੍ਤਂ.

ਆਕਿਣ੍ਣਲੁਦ੍ਦੋਤਿ ਆਕਿਣ੍ਣੋ ਹੁਤ੍ਵਾ ਕਕ੍ਖਲ਼ੋ. ਤੇਨਾਹ ‘‘ਬਹੁਪਾਪੋ’’ਤਿਆਦਿ. ਮਕ੍ਖਿਤੋਤਿ ਲਿਤ੍ਤੋ. ਤਨ੍ਤਿ ਦੇਵਤਾਚੋਦਨਂ. ਤਸ੍ਮਾਤਿ ਅਤਿਕ੍ਕਮ੍ਮ ਠਿਤਤ੍ਤਾ‘‘ਤ੍ਵਞ੍ਚਾਰਹਾਮਿ ਵਤ੍ਤਵੇ’’ਤਿ ਏਵਮਾਹ.

ਗਵੇਸਨ੍ਤਸ੍ਸ ਅਤ੍ਤਨੋ ਸਨ੍ਤਾਨੇ ਉਪ੍ਪਾਦਨਵਸੇਨ ਪਰਿਯੇਸਨ੍ਤਸ੍ਸ. ਅਨੇਕਯੋਜਨਾਯਾਮਵਿਤ੍ਥਾਰਂ ਗਗਨਤਲਂ ਬ੍ਯਾਪੇਤ੍ਵਾ ਉਪ੍ਪਨ੍ਨਵਲਾਹਕਕੂਟਪ੍ਪਮਾਣਂ ਵਿਯ. ਸੁਦ੍ਧੋਤਿ ਸੀਲੇਨ ਪਰਿਸੁਦ੍ਧੋ ਅਯਨ੍ਤਿ ਜਾਨਾਸਿ. ਸੁਗਤਿਨ੍ਤਿ ਸੁਨ੍ਦਰਨਿਬ੍ਬਤ੍ਤਿਂ. ਤੇਨ ਨਿਬ੍ਬਾਨਸ੍ਸਪਿ ਸਙ੍ਗਹੋ ਸਿਦ੍ਧੋ.

ਗਨ੍ਧਤ੍ਥੇਨਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਸਾਰਤ੍ਥਪ੍ਪਕਾਸਿਨਿਯਾ ਸਂਯੁਤ੍ਤਨਿਕਾਯ-ਅਟ੍ਠਕਥਾਯ

ਵਨਸਂਯੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.