੧੦. ਯਕ੍ਖਸਂਯੁਤ੍ਤਂ
੧. ਇਨ੍ਦਕਸੁਤ੍ਤਵਣ੍ਣਨਾ
੨੩੫. ਅਤ੍ਤਨੋ ਪਰਿਣਾਯਕਤ੍ਤੇਨ ਇਨ੍ਦੋ ਨਾਮ ਮਹੇਸਕ੍ਖੋ, ਇਨ੍ਦੋਤਿ ਸਮਞ੍ਞਾ ਅਸ੍ਸਾਤਿ ਕਤ੍ਵਾ ‘‘ਇਨ੍ਦਕੋ’’ਤਿਪਿ ਵੁਚ੍ਚਤਿ, ਤਸ੍ਸ ਇਨ੍ਦਕਸ੍ਸ. ਇਨ੍ਦਕੂਟੇ ਪਬ੍ਬਤੇ ਨਿਵਸਤੀਤਿ ਇਨ੍ਦਕੂਟਨਿਵਾਸੀ, ਤਸ੍ਸ ਇਨ੍ਦਕੂਟਨਿਵਾਸਿਨੋ. ਬਲਿਕਮ੍ਮੇਹਿ ਯਜਿਤਬ੍ਬਤੋ ਪੂਜਿਤਬ੍ਬਤੋ ਯਕ੍ਖੋ, ਤਸ੍ਸ ਯਕ੍ਖਸ੍ਸ. ਇਨ੍ਦਸ੍ਸ ਨਿਵਾਸਟ੍ਠਾਨਭੂਤਂ ਕੂਟਂ ਇਨ੍ਦਕੂਟਨ੍ਤਿ ਯਕ੍ਖਤੋ ਕੂਟੇਨ ਨਾਮਂ ਲਦ੍ਧਂ. ਇਨ੍ਦਕੂਟੋ ਇਨ੍ਦੋ ਉਤ੍ਤਰਪਦਲੋਪੇਨ ਯਥਾ ‘‘ਕੇਲਾਸਕੂਟੋ ਕੇਲਾਸੋ’’ਤਿ. ਇਨ੍ਦੋ ਯਕ੍ਖੋਤਿ ਕੂਟਤੋ ਯਕ੍ਖੇਨ ਨਾਮਂ ਲਦ੍ਧਂ. ਨ ਚੇਤ੍ਥ ਇਤਰੀਤਰਨਿਸ੍ਸਯਦੋਸੋ ਅਞ੍ਞਮਞ੍ਞੂਪਲਕ੍ਖਣਭਾਵਤੋ ਯਥਾ ਤਂ ‘‘ਕਾਯਕਮ੍ਮਟ੍ਠਾਨ’’ਨ੍ਤਿ. ਰੂਪਨ੍ਤਿ ਸਕਲਂ ਰੂਪਕ੍ਖਨ੍ਧਮਾਹ, ਨ ਰੂਪਾਯਤਨਨ੍ਤਿ. ਇਮਂ ਸਰੀਰਂ ਪੇਚ੍ਚ ਅਯਂ ਕਿਨ੍ਤਿ ਪਟਿਲਭਤੀਤਿ ਚੋਦੇਤਿ.
ਕੁਤੋ ਆਗਚ੍ਛਤੀਤਿ ਪਰਾਧਾਰਰੂਪੇ ਜੀਵੇ ਅਤ੍ਤਨਿ ਮਾਤੁਕੁਚ੍ਛਿਮੋਕ੍ਕਨ੍ਤੇ ਰੂਪਸ੍ਸ ਸਮ੍ਭਵੋਤਿ ਕੁਤੋ ਨਾਮ ਠਾਨਤੋ ਆਗਚ੍ਛਤਿ. ਤੇਨਾਹ ‘‘ਇਮਾਨਿ ਚ ਅਟ੍ਠੀਨਿ ਇਮਾ ਚ ਮਂਸਪੇਸਿਯੋ’’ਤਿਆਦਿ. ਕਥਂ ਨ੍ਵਯਨ੍ਤਿ ਅਯਂ ਕੁਚ੍ਛਿਸਙ੍ਖਾਤੇ ਗਬ੍ਭਰੇ ਕਥਂ ਸਜ੍ਜਤੀਤਿ ਪੁਚ੍ਛਤਿ. ‘‘ਸੀਹਾਨਂਵ ਨਦਨ੍ਤਾਨਂ, ਦਾਠੀਨਂ ਗਿਰਿਗਬ੍ਭਰੇ’’ਤਿਆਦਿਨਾ (ਥੇਰਗਾ. ਨਿਦਾਨਗਾਥਾ) ਗਬ੍ਭਰੋ ਚ ਕੁਚ੍ਛਿਵਾਚਕੋ ਆਗਤੋ. ਤੇਨਾਹ ‘‘ਗਬ੍ਭਰਸ੍ਮਿਨ੍ਤਿ ਮਾਤੁਕੁਚ੍ਛਿਸ੍ਮਿ’’ਨ੍ਤਿ. ਪੁਗ੍ਗਲਵਾਦੀਤਿ ਅਤ੍ਤਵਾਦੁਪਾਦਾਨੋ. ਯਥਾ ਹਿ ਮਚ੍ਛਮਂਸਂ ਭੁਤ੍ਤਂ ਫੇਣਂ ਵਿਯ ਹੁਤ੍ਵਾ ਵਿਲੀਯਤਿ, ਨ ਚ ਪਞ੍ਞਾਯਤਿ ਸਤ੍ਤਭਾਵੇਨ ਅਪ੍ਪਵਤ੍ਤਨਤੋ, ਏਵਮੇਵਂ ਯਦਿ ਮਾਤੁਕੁਚ੍ਛਿਸ੍ਮਿਂ ਗਬ੍ਭਭਾਵੇਨ ਉਪ੍ਪਨ੍ਨਂ ਰੂਪਂ ਸਤ੍ਤੋ ਨ ਭਵੇਯ੍ਯ ਨੋ ਵਡ੍ਢੇਯ੍ਯ, ਵਿਲੀਯਿਤ੍ਵਾ ਗਚ੍ਛੇਯ੍ਯ, ਪਞ੍ਞਾਯਤਿ ਚ ਤਂ ਰੂਪਂ, ਤਸ੍ਮਾ ਜੀਵੋਤਿ ਇਮਾਯ ਲਦ੍ਧਿਯਾ. ਏਵਮਾਹਾਤਿ ‘‘ਰੂਪਂ…ਪੇ… ਗਬ੍ਭਰਸ੍ਮਿ’’ਨ੍ਤਿ ਏਵਮਵੋਚ. ਪਠਮਨ੍ਤਿ ਏਤੇਸਂ ਪਞ੍ਚਨ੍ਨਂ ਪਠਮਂ. ਤੇਨਾਹ ‘‘ਪਠਮੇਨ ਪਟਿਸਨ੍ਧਿਵਿਞ੍ਞਾਣੇਨ ਸਦ੍ਧਿ’’ਨ੍ਤਿ. ‘‘ਜਾਤਿਉਣ੍ਣਂਸੂਹੀਤਿ ਜਾਤਿਏਲ਼ਕਾਯ ਉਣ੍ਣਂਸੂਹੀ’’ਤਿ ਵਦਨ੍ਤਿ. ‘‘ਗਬ੍ਭਂ ਫਾਲੇਤ੍ਵਾ ਗਹਿਤਉਣ੍ਣਾ ਜਾਤਿਉਣ੍ਣਾ. ਤਸ੍ਸਾ ਅਂਸੂਹਿ ਤੀਹਿ ਕਤਸੁਤ੍ਤਗ੍ਗੇ’’ਤਿ ਸਂਯੁਤ੍ਤਭਾਣਕਾਨਂ ਅਧਿਪ੍ਪਾਯੋ.
ਅਨਾਵਿਲੋਤਿ ਅਚ੍ਛੋ, ਸੁਪ੍ਪਸਨ੍ਨੋਤਿ ਅਤ੍ਥੋ. ਏਵਂਵਣ੍ਣਪ੍ਪਟਿਭਾਗਨ੍ਤਿ ਵੁਤ੍ਤਪ੍ਪਮਾਣਸਣ੍ਠਾਨਸਮ੍ਪਰਿਚ੍ਛਿਨ੍ਨਂ. ਕਲਲਂ ਸਮ੍ਪਵੁਚ੍ਚਤੀਤਿ ਅਤ੍ਤਭਾਵੋ ਭੂਤੁਪਾਦਾਰੂਪਸਙ੍ਖਾਤੋ ਸਨ੍ਤਾਨਵਸੇਨ ਪਵਤ੍ਤਮਾਨੋ ਕਲਲਂ ਨਾਮਾਤਿ ਕਥੀਯਤਿ.
ਕਲਲਾਤਿ ਯਥਾਵੁਤ੍ਤਕਲਲਰੂਪਹੇਤੁ ਤਂ ਨਿਸ੍ਸਾਯ ਪਚ੍ਚਯਂ ਕਤ੍ਵਾ. ਮਂਸਧੋਵਨਉਦਕਵਣ੍ਣਨ੍ਤਿ ਵਣ੍ਣਤੋ ਮਂਸਧੋਵਨਉਦਕਵਣ੍ਣਂ, ਸਣ੍ਠਾਨਤੋ ਪਨ ਵਿਲੀਨਤਿਪੁਸਦਿਸਂ.
ਪਰਿਪਕ੍ਕਨ੍ਤਿ ਪਰਿਪਾਕਕਲਲਭਾਵਤੋ ਪਰਿਪਾਕਂ ਗਤਂ ਸੁਪਰਿਪਾਕਂ ਗਤਂ. ਸਮੂਹਤਨ੍ਤਿ ਸਮੂਹਭੂਤਂ ਸਙ੍ਗਤਂ. ਵਿਵਟ੍ਟਮਾਨਨ੍ਤਿ ਪਰਿਣਮਨ੍ਤਂ. ਤਬ੍ਭਾਵਨ੍ਤਿ ਕਰਣੇ ਏਤਂ ਉਪਯੋਗਵਚਨਂ, ਤਬ੍ਭਾਵੇਨ ਪਰਿਣਮਨ੍ਤਨ੍ਤਿ ਅਤ੍ਥੋ. ਨਿਸ੍ਸਕ੍ਕੇ ਵਾ ਉਪਯੋਗਵਚਨਂ, ਤਬ੍ਭਾਵਤੋ ਕਲਲਭਾਵਤੋ ਕਲਲਂ ਵਿਪਰਿਣਮਨ੍ਤਂ. ਅਬ੍ਬੁਦਂ ਨਾਮ ਜਾਯਤਿ, ਅਬ੍ਬੁਦਂ ਨਾਮ ਸਮ੍ਪਜ੍ਜਤੀਤਿ ਅਤ੍ਥੋ.
ਵਿਲੀਨਤਿਪੁਸਦਿਸਾ ਸਣ੍ਠਾਨਵਸੇਨ, ਵਣ੍ਣਵਸੇਨ ਪਨ ਸਿਤਾ ਅਰਤ੍ਤਾਵ ਹੋਤੀਤਿ ਵਦਨ੍ਤਿ. ਮਣ੍ਡਨ੍ਤਿ ਦਾਰਿਕਾਨਂ ਤਥਾ ਪੀਲ਼ਨਤੋ ਨਿਬ੍ਬਤ੍ਤਮਰਿਚਪਕ੍ਕਸ੍ਸ ਸਾਰਭੂਤਂ ਰਸਂ. ਸਬ੍ਬਭਾਗੇਹਿ ਮੁਚ੍ਚਤੀਤਿ ਸੋ ਮਣ੍ਡੋ ਕਪਾਲੇ ਅਲਗ੍ਗੋ ਹੁਤ੍ਵਾ ਤਸ੍ਸ ਸਬ੍ਬਭਾਗੇਹਿ ਮੁਚ੍ਛਿਤ੍ਵਾ ਪਿਣ੍ਡਿਤੋ ਹੁਤ੍ਵਾ ਤਿਟ੍ਠਤਿ. ਏਵਰੂਪਾ ਪੇਸਿ ਹੋਤੀਤਿ ਸਾ ਪੇਸਿ ਗਬ੍ਭਾਸਯੇ ਕਤ੍ਥਚਿ ਅਲਗ੍ਗਾ ਯਥਾਵੁਤ੍ਤਮਣ੍ਡੋ ਵਿਯ ਪਿਣ੍ਡਿਤੋ ਹੁਤ੍ਵਾ ਤਿਟ੍ਠਤਿ. ਤੇਨਾਹ ‘‘ਵਿਲੀਨਤਿਪੁਸਦਿਸਾ’’ਤਿ.
ਪੇਸਿ ਨਿਬ੍ਬਤ੍ਤਤੀਤਿ ਏਤ੍ਥ ਪੇਸੀਤਿ ਨਿਸ੍ਸਕ੍ਕੇ ਪਚ੍ਚਤ੍ਤਵਚਨਨ੍ਤਿ ਆਹ ‘‘ਤਤੋ ਪੇਸਿਤੋ’’ਤਿ.
ਘਨਸ੍ਸ ਸਣ੍ਠਾਨਂ. ਨਿਬ੍ਬਤ੍ਤਂ ਕਮ੍ਮਪਚ੍ਚਯਾਤਿ ਤਂਸਣ੍ਠਾਨਂ ਰੂਪਧਮ੍ਮਨਿਬ੍ਬਤ੍ਤਿਯਾ ਜਾਯਤਿ. ‘‘ਜਰਾਮਰਣਂ ਅਨਿਚ੍ਚਂ ਸਙ੍ਖਤਂ ਪਟਿਚ੍ਚਸਮੁਪ੍ਪਨ੍ਨ’’ਨ੍ਤਿ (ਸਂ. ਨਿ. ੨.੨੦) ਹਿ ਵੁਤ੍ਤਂ.
ਪੀਲ਼ਕਾਤਿ ਪੀਲ਼ਕਸਦਿਸਾ ਮਂਸਪਿਣ੍ਡਾ ਜਾਯਨ੍ਤਿ.
ਸਤ੍ਤਮਾਦੀਨੀਤਿ ਆਦਿ-ਸਦ੍ਦੇਨ ਅਟ੍ਠਮਸਤ੍ਤਾਹਤੋ ਪਟ੍ਠਾਯ ਯਾਵ ਏਕਚਤ੍ਤਾਲੀਸਾ ਚਤੁਤ੍ਤਿਂਸ ਸਤ੍ਤਾਹਾਨਿ ਸਙ੍ਗਣ੍ਹਾਤਿ. ਪਰਿਣਤਕਾਲਨ੍ਤਿ ਗਬ੍ਭਸ੍ਸ ਪਰਿਣਤਕਾਲਂ. ਨਵਮਾਸਤੋ ਬਹਿ ਪਰਿਪਕ੍ਕੋ ਨਾਮ ਹੋਤਿ ਕੇਸਲੋਮਾਦਿਨਿਬ੍ਬਤ੍ਤਿਤੋ. ਤੇਨਾਹ ‘‘ਦ੍ਵਾਚਤ੍ਤਾਲੀਸੇ ਸਤ੍ਤਾਹੇ ਏਤਾਨਿ ਜਾਯਨ੍ਤੀ’’ਤਿ.
ਤਸ੍ਸਾਤਿ ਗਬ੍ਭਸੇਯ੍ਯਕਸਤ੍ਤਸ੍ਸ. ਮਾਤੁਉਦਰਪਟਲੇਨ ਏਕਾਬਦ੍ਧੋ ਹੋਤਿ ਯਤੋ ਮਾਤਰਾ ਪਰਿਭੁਤ੍ਤਆਹਾਰੋ ਆਮਾਸਯੇ ਪਤਿਟ੍ਠਿਤੇ ਗਬ੍ਭਸ੍ਸ ਨਾਭਿਨਾਲ਼ਾਨੁਸਾਰੇਨ ਗਬ੍ਭਗਤਸ੍ਸ ਸਰੀਰਂ ਸਮ੍ਪਤ੍ਵਾ ਆਹਾਰਕਿਚ੍ਚਂ ਕਰੋਤਿ. ਆਹਾਰਸਮੁਟ੍ਠਾਨਰੂਪਂ ਸਮੁਟ੍ਠਾਪੇਤੀਤਿ ਗਬ੍ਭਗਤਸ੍ਸ ਕਾਯੇ ਓਜਾਯ ਪਚ੍ਚਯੋ ਹੋਤਿ. ਸਾ ਚ ਤਂ ਪਚ੍ਚਯਂ ਲਭਿਤ੍ਵਾ ਓਜਟ੍ਠਮਕਂ ਰੂਪਂ ਸਮੁਟ੍ਠਾਪੇਤਿ. ਏਵਂ ਮਾਤਰਾ ਪਰਿਭੁਤ੍ਤਆਹਾਰਪਚ੍ਚਯੇਨ ਗਬ੍ਭਗਤੋ ਦਸ ਮਾਸੇ ਯਾਪੇਤਿ ਅਤ੍ਤਨੋ ਨਾਭਿਨਾਲ਼ਾਨੁਸਾਰਗਤੇਨੇਵ ਤੇਨ ਯਾਵ ਆਹਾਰਸਮੁਟ੍ਠਾਨਸਤ੍ਤਾਹੋ, ਤਤੋ ਪਟ੍ਠਾਯ ਆਹਰਣਤੋ. ਕੇਚਿ ਪਨ ‘‘ਮਾਤਰਾ ਪਰਿਭੁਤ੍ਤਆਹਾਰੋ ਬਾਹਿਰਵਗ੍ਗੋ ਵਿਯ ਤਸ੍ਸ ਕਾਯਂ ਅਭਿਸਨ੍ਨੇਤਿ ਪਰਿਸਨ੍ਨੇਤਿ, ਤੇਨ ਸੋ ਯਾਪੇਤੀ’’ਤਿ ਵਦਨ੍ਤਿ. ਕੁਚ੍ਛਿਗਤਂ ਉਦਰਪਟਲੇਨ ਤਿਰੋਹਿਤਤ੍ਤਾ ਬਹਿ ਠਿਤਨ੍ਤਿ ਵਤ੍ਤਬ੍ਬਤਂ ਨ ਅਰਹਤੀਤਿ ‘‘ਕੁਚ੍ਛਿਯਾ ਅਬ੍ਭਨ੍ਤਰਗਤੋ’’ਤਿ ਆਹ. ਮਾਤੁਕੁਚ੍ਛਿਗਤੋ ਨਰੋਤਿ ਮਾਤੁ ਤਿਰੋਕੁਚ੍ਛਿਗਤੋ. ਏਵਂ ਖੋਤਿ ਇਮਿਨਾ ਯਥਾਵੁਤ੍ਤਾਕਾਰੇਨ ਅਯਂ ਸਤ੍ਤੋ…ਪੇ… ਨਿਬ੍ਬਤ੍ਤਤਿ, ਤਸ੍ਮਾ ਰੂਪਂ ਨ ਜੀਵੋ. ਨ ਹਿ ਦਿਟ੍ਠਿਗਤਸ੍ਸ ਸਤ੍ਤਾਹਕ੍ਕਮੇਨ ਵੁਡ੍ਢਿਪ੍ਪਤ੍ਤੋ ਇਚ੍ਛਿਤੋ ਅਨਿਚ੍ਚਤਾਪਤ੍ਤਿਤੋ.
ਇਨ੍ਦਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੨. ਸਕ੍ਕਨਾਮਸੁਤ੍ਤਵਣ੍ਣਨਾ
੨੩੬. ਸਕ੍ਕਨਾਮਕੋਤਿ ਬਲਿਪੁਤ੍ਤੋ ਵਿਯ ਸਕ੍ਕਸ੍ਸ ਵਸੇਨ ਗਹਿਤਨਾਮੋ. ‘‘ਏਸੋ ਕਿਰਾ’’ਤਿ ਪਾਠੋ. ‘‘ਏਕੋ ਕਿਰਾ’’ਤਿਪਿ ਲਿਖਨ੍ਤਿ. ਮਾਰਸ੍ਸ ਪਕ੍ਖੇ ਗਤੋ ਮਾਰਪਕ੍ਖਿਕੋ. ਯਦਞ੍ਞਨ੍ਤਿ ਏਤ੍ਥ ਯਨ੍ਤਿ ਕਿਰਿਯਾਪਰਾਮਸਨਂ, ਤਸ੍ਮਾ ਯਂ ਅਞ੍ਞਸ੍ਸ ਅਨੁਸਾਸਨਂ, ਤਂ ਸਮਣਸ੍ਸ ਨ ਸਾਧੂਤਿ ਯੋਜਨਾ. ਕਾਰਣੇਨਾਤਿ ਕਾਰਣਮਤ੍ਤੇਨ ਸਂਵਾਸੋ ਜਾਯਤਿ. ਯੇਨ ਕੇਨਚਿ ਗਹਟ੍ਠੇਨ ਵਾ ਪਬ੍ਬਜਿਤੇਨ ਵਾ. ਤਂ ਕਾਰਣਨ੍ਤਰਂ ਸਮਾਗਤਂ ਪੁਰਿਸਂ ਸਪ੍ਪਞ੍ਞੋ ਸਮ੍ਬੁਦ੍ਧੋ ਅਨੁਕਮ੍ਪਿਤੁਂ ਨਾਰਹਤਿ ਵਿਸੇਸਾਧਿਗਮਾਭਾਵਾ, ਸਤਿ ਪਨ ਤਸ੍ਮਿਂ ਸਵਿਸੇਸਂ ਪਸਾਦੋ ਹੋਤੀਤਿ. ਮਨਸਾ ਚੇ…ਪੇ… ਨ ਤੇਨ ਹੋਤਿ ਸਂਯੁਤ੍ਤੋ ਸਿਨੇਹਵਸੇਨ ਅਨੁਕਮ੍ਪਾ ਅਨੁਦ੍ਦਯਾ ਤਸ੍ਸਾ ਅਸਂਕਿਲਿਟ੍ਠਸਭਾਵਤ੍ਤਾ.
ਸਕ੍ਕਨਾਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੩. ਸੂਚਿਲੋਮਸੁਤ੍ਤਵਣ੍ਣਨਾ
੨੩੭. ਗਯਾਯ ਅਵਿਦੂਰੇ ਭਵੋ ਗਾਮੋ ‘‘ਗਯਾ’’ਤਿ ਵੁਤ੍ਤੋਤਿ ਆਹ ‘‘ਗਯਾਯ’’ਨ੍ਤਿ, ਤੇਨਾਹ ‘‘ਗਯਾਯ ਅਵਿਦੂਰੇ ਨਿਵਿਟ੍ਠਗਾਮਂ ਉਪਨਿਸਾਯਾਤਿ ਅਤ੍ਥੋ’’ਤਿ. ਗੋਚਰਗਾਮਨਿਦਸ੍ਸਨਂ ਹੇਤਂ. ਇਦਂ ਉਪਰਿ ਇਦਂ ਹੇਟ੍ਠਾਤਿ ਨਤ੍ਥਿ ਉਪ੍ਪਟਿਪਾਟਿਯੋ ਮਞ੍ਚਪਾਦਾਨਂ ਦ੍ਵੀਸੁ ਪਸ੍ਸੇਸੁ ਦੀਘਭਾਵੇਨ. ਬਲਿਕਮ੍ਮਤ੍ਥਾਯ ਕਤਂ ਦੇਵਤਾਧਿਟ੍ਠਾਨਨ੍ਤਿ ਅਧਿਪ੍ਪਾਯੇਨ ਦੇਵਟ੍ਠਾਨੇ ਠਪੇਨ੍ਤਿ. ਅਟ੍ਠਪਾਦਮਞ੍ਚਸਦਿਸੋ ਕਿਰ ਸੋ ਹੇਟ੍ਠੁਪਰਿਪਰਿਵਤ੍ਤੇਤਬ੍ਬਤੋ. ਕਥਿਨਸਿਬ੍ਬਨਸੂਚਿ ਕਥਿਨਸੂਚਿ. ਅਪਚ੍ਚਤ੍ਥਰਿਤ੍ਵਾਤਿ ਕਿਞ੍ਚਿ ਸਙ੍ਘਿਕਸੇਨਾਸਨਸ੍ਸ ਉਪਰਿ ਪਟਿਚ੍ਛਦਨਂ ਅਪਚ੍ਚਤ੍ਥਰਿਤ੍ਵਾ. ਗਵਚ੍ਛਿਵਿਜ੍ਝਿਤਂ ਵਿਯਾਤਿ ਤੇਹਿ ਸੂਚਿਲੋਮੇਹਿ ਗਵਚ੍ਛਿਜਾਲਂ ਵਿਯ ਗਤਂ ਸਬ੍ਬਸੋ ਸਮੋਹਤਂ.
ਇਧਾਪਿ ‘‘ਖਰਸਰੀਰੋ’’ਤਿ ਵਤ੍ਵਾ ਖਰਸਰੀਰਂ ਕਥਿਨਸੂਚਿਸਦਿਸਤਾਯ ਲੋਮਸ੍ਸਾਤਿ ਤਸ੍ਸ ਤਥਾਭਾਵਸ੍ਸ ਕਾਰਣਂ ਦਸ੍ਸੇਨ੍ਤੋ ‘‘ਸੋ ਕਿਰਾ’’ਤਿਆਦਿਮਾਹ. ਅਤ੍ਤਨੋ ਹਤ੍ਥੇਹੀਤਿ ਸਙ੍ਘਿਕਤੇਲਸਮ੍ਮਕ੍ਖਿਤੇਹਿ ਅਤ੍ਤਨੋ ਸਰੀਰਂ ਮਕ੍ਖੇਸਿ. ਇਤੀਤਿ ਵੁਤ੍ਤਾਕਾਰੇਨ.
ਸਮਾਗਮਟ੍ਠਾਨਨ੍ਤਿ ਯਕ੍ਖਸਨ੍ਨਿਪਾਤਟ੍ਠਾਨਂ. ਸੋਤਿ ਸੂਚਿਲੋਮੋ ਯਕ੍ਖੋ. ਮਨ੍ਤਿ ਚ ਤਮੇਵ ਵਦਤਿ.
ਉਟ੍ਠਾਪੇਤ੍ਵਾਤਿ ਉਦ੍ਧਗ੍ਗਾ ਕਤ੍ਵਾ. ਅਪਨਾਮੇਸੀਤਿ ਯਥਾ ਸੋ ਅਤ੍ਤਨੋ ਕਾਯਂ ਉਪਨੇਤੁਂ ਨ ਸਕ੍ਕੋਤਿ, ਤਥਾ ਕਰੋਨ੍ਤੋ ਥੋਕਂ ਅਪਨਾਮੇਸਿ. ਅਮਨੁਞ੍ਞੋਤਿ ਫਰੁਸਤਿਕ੍ਖਤਾਯ ਨ ਮਨੁਞ੍ਞੋ. ਚਿਤ੍ਤਂ ਵਾ ਤੇ ਖਿਪਿਸ੍ਸਾਮੀਤਿ ਮਯ੍ਹਂ ਆਨੁਭਾਵੇਨ ਤਵ ਚਿਤ੍ਤਵਿਕ੍ਖੇਪਂ ਵਾ ਕਰਿਸ੍ਸਾਮਿ. ਯਥਾ ਪਨ ਸੋ ਚਿਤ੍ਤਵਿਕ੍ਖੇਪਂ ਕਰੇਯ੍ਯ, ਤਂ ਦਸ੍ਸੇਤੁਂ ‘‘ਯੇਸਞ੍ਹੀ’’ਤਿਆਦਿ ਵੁਤ੍ਤਂ. ਭੇਰਵਂ ਵਾਤਿ ਵੁਤ੍ਤਾਕਾਰੇਨ ਅਞ੍ਞਥਾ ਵਾ ਭਯਾਨਕਂ ਦਸ੍ਸਨਮਤ੍ਤੇਨੇਵ ਸਤ੍ਤਾਨਂ ਭਯਂ ਛਮ੍ਭਿਤਤ੍ਤਂ ਲੋਮਹਂਸਂ ਉਪ੍ਪਾਦੇਤੁਂ ਸਮਤ੍ਥਂ. ‘‘ਕਥੇਨ੍ਤਾਨਂਯੇਵਾ’’ਤਿ ਵਾ ਪਾਠੋ. ਤਂ ਦ੍ਵੀਸੁ ਪਾਦੇਸੁ ਗਹੇਤ੍ਵਾ ਪਾਰਂ ਗਙ੍ਗਾਯ ਖਿਪਿਸ੍ਸਾਮੀਤਿ ਯੋਜਨਾ.
ਕੁਤੋਨਿਦਾਨਾਤਿ ਕਸ੍ਮਾ ਕਾਰਣਾ? ਅਟ੍ਠਕਥਾਯਂ ਪਨ ਸਮਾਸਪਦਮੇਤਂ, ਵਿਭਤ੍ਤਿਅਲੋਪੇਨ ਨਿਦ੍ਦੇਸੋਤਿ ਦਸ੍ਸੇਤੁਂ ‘‘ਕਿਂਨਿਦਾਨਾ ਕਿਂਪਚ੍ਚਯਾ’’ਤਿ? ਅਤ੍ਥੋ ਵੁਤ੍ਤੋ. ਚਿਤ੍ਤਂ ਓਸ੍ਸਜਨ੍ਤੀਤਿ ਕੁਸਲਚਿਤ੍ਤਂ ਪਵਤ੍ਤਿਤੁਂ ਅਪ੍ਪਦਾਨਵਸੇਨ ਪੁਰਤੋ ਖਿਪਨ੍ਤਿ. ਕੁਤੋ ਸਮੁਟ੍ਠਾਯਾਤਿ ਮਿਚ੍ਛਾਵਿਤਕ੍ਕਾਨਂ ਸਮੁਟ੍ਠਾਨਂ ਪੁਚ੍ਛਤਿ?
ਕਾਮਰਾਗਾਦਯੋ ਸੁਭਨਿਮਿਤ੍ਤਾਦੀਸੁ ਅਯੋਨਿਸੋਮਨਸਿਕਾਰਹੇਤੂ. ਕਾਮੋ ਪਨ ਅਯੋਨਿਸੋਮਨਸਿਕਾਰੋ ਚ ਨਿਯਕਜ੍ਝਤ੍ਤਪਰਿਯਾਪਨ੍ਨੋਤਿ ਆਹ ‘‘ਅਯਂ ਅਤ੍ਤਭਾਵੋ ਨਿਦਾਨਂ ਏਤੇਸਨ੍ਤਿ ਇਤੋਨਿਦਾਨਾ’’ਤਿਆਦਿ. ਏਵਮੇਵਾਤਿ ਅਟ੍ਠਕਥਾਯਂ ਕੀਲ਼ਾਪਸੁਤਕੁਮਾਰਕਾ ਵਿਯ ਮਿਚ੍ਛਾਵਿਤਕ੍ਕਾ ਦਟ੍ਠਬ੍ਬਾ, ਤੇਸਂ ਉਪ੍ਪਤ੍ਤਿਟ੍ਠਾਨਭੂਤੋ ਲੋਕੋ ਵਿਯ ਅਯਂ ਅਤ੍ਤਭਾਵਲੋਕੋ. ਤੇਹਿ ਓਸ੍ਸਜਿਯਮਾਨਂ ਧਙ੍ਕਂ ਵਿਯ ਚਿਤ੍ਤਂ, ਤਸ੍ਸ ਪਾਦੇ ਬਦ੍ਧਦੀਘਸੁਤ੍ਤਕਂ ਵਿਯ ਤਂ ਦੂਰਾਨੁਬਨ੍ਧਂ ਸਂਯੋਜਨਨ੍ਤਿ ਏਵਂ ਉਪਮਾਯ ਸਂਸਨ੍ਦਨਂ ਦਟ੍ਠਬ੍ਬਂ.
ਪਾਪਵਿਤਕ੍ਕਾਨਂ ਤਂਸਮ੍ਪਯੁਤ੍ਤਕਿਲੇਸਾਨਞ੍ਚ ਤਣ੍ਹਾ ਵਿਸੇਸਪਚ੍ਚਯੋ ਤਦਭਾਵੇਨ ਤੇਸਂ ਅਭਾਵਤੋਤਿ ਆਹ ‘‘ਤਣ੍ਹਾਸਿਨੇਹਤੋ ਜਾਤਾ’’ਤਿ. ਅਤ੍ਤਭਾਵਪਰਿਯਾਪਨ੍ਨਤ੍ਤਾ ‘‘ਅਤ੍ਤਨਿ ਸਮ੍ਭੂਤਾ’’ਤਿ ਵੁਤ੍ਤਂ. ਤੇਨ ਨੇਸਂ ਅਨਞ੍ਞਹੇਤੁਕਤਂ ਦਸ੍ਸੇਤਿ, ਨਿਗ੍ਰੋਧਸ੍ਸੇਵ ਖਨ੍ਧਜਾਤੀਤਿ ਇਮਿਨਾ ਪਨ ਪੁਥੁਭਾਵਞ੍ਚ, ਵਿਸਤ੍ਤਾਤਿਆਦਿਨਾ ਦੁਬ੍ਬਿਨਿਸ੍ਸਟਤਞ੍ਚ. ਵਤ੍ਥੁਕਾਮੇਸੁ ਰੂਪਾਰਮ੍ਮਣਾਦੀਸੁ ਪੁਥੂਸੁ. ਪੁਥੂ ਕਿਲੇਸਕਾਮਾ ਕਾਮਰੂਪਤਣ੍ਹਾਦਯੋ. ਤੇਹਿ ਕਿਲੇਸਕਾਮੇਹਿ ਕਰਣਭੂਤੇਹਿ. ਅਤ੍ਤਭਾਵਂ ਖਨ੍ਧਪਞ੍ਚਕਂ. ਯੇ ਵਿਪਸ੍ਸਨਾਯ ਯੁਤ੍ਤਪਯੁਤ੍ਤਾ ਯਾਥਾਵਤੋ ਜਾਨਨ੍ਤਿ.
ਯਤੋਤਿ ਪਚ੍ਚਤ੍ਤੇ ਨਿਸ੍ਸਕ੍ਕਵਚਨਨ੍ਤਿ ਆਹ ‘‘ਯਂ ਨਿਦਾਨਮਸ੍ਸਾ’’ਤਿ. ‘‘ਵਿਨੋਦੇਨ੍ਤੀ’’ਤਿ ਕਤ੍ਤੁਨਿਦ੍ਦੇਸੇਨ ਯੇਨ ਨ ਵਿਨੋਦੇਨ੍ਤਿ, ਤਂ ਕਾਰਣਂ ਬਾਧਿਤਮੇਵਾਤਿ ਆਹ ‘‘ਮਗ੍ਗਸਚ੍ਚੇਨ ਵਿਨੋਦੇਨ੍ਤੀ’’ਤਿ. ਵਿਨੋਦਨਞ੍ਚੇਤ੍ਥ ਸਨ੍ਤਾਨਤੋ ਨੀਹਰਣਂ ਬਹਿਕਰਣਂ ਸਬ੍ਬਸੋ ਪਹਾਨਂ, ਪਹੀਨੇ ਚ ਤਸ੍ਮਿਂ ਕਿਲੇਸੇ ਓਘਂ ਤਰਨ੍ਤੀਤਿ ਦਸ੍ਸੇਨ੍ਤੋ ‘‘ਦੁਤ੍ਤਰ’’ਨ੍ਤਿਆਦਿਮਾਹ. ਏਤਸ੍ਮਿਂ ਅਧਿਗਤੇ ਨ ਪੁਨ ਭਵੋਤਿ ਅਪੁਨਬ੍ਭਵੋ, ਨਿਬ੍ਬਾਨਨ੍ਤਿ ਆਹ ‘‘ਅਪੁਨਬ੍ਭਵਸਙ੍ਖਾਤਸ੍ਸਾ’’ਤਿਆਦਿ. ਯਸ੍ਮਾ ਏਤ੍ਥ ‘‘ਯੇ ਨਂ ਪਜਾਨਨ੍ਤਿ, ਯਤੋਨਿਦਾਨ’’ਨ੍ਤਿ ਪਦਦ੍ਵਯੇਨ ਦੁਕ੍ਖਸਮੁਦਯਸਚ੍ਚਾਨਿ, ਵਿਨੋਦਨਗ੍ਗਹਣੇਨ ਮਗ੍ਗਸਚ੍ਚਂ, ਅਪੁਨਬ੍ਭਵਗ੍ਗਹਣੇਨ ਨਿਰੋਧਸਚ੍ਚਂ ਪਕਾਸਿਤਂ, ਤਸ੍ਮਾ ਵੁਤ੍ਤਂ ‘‘ਚਤ੍ਤਾਰਿ ਸਚ੍ਚਾਨਿ ਪਕਾਸੇਨ੍ਤੋ’’ਤਿ.
ਤਸ੍ਮਿਂਯੇਵਾਤਿ ਯਤ੍ਥ ਠਿਤੋ ‘‘ਰਾਗੋ ਚ ਦੋਸੋ ਚਾ’’ਤਿਆਦਿਨਾ ਪਞ੍ਹਂ ਪੁਚ੍ਛਿ, ਤਸ੍ਮਿਂਯੇਵ ਪਦੇਸੇ ਠਿਤੋ. ਦੇਸਨਾਨੁਸਾਰੇਨਾਤਿ ਸਤ੍ਥੁ ਸਾਮੁਕ੍ਕਂਸਿਕਧਮ੍ਮਦੇਸਨਾਯ ਅਨੁਸ੍ਸਰਣੇਨ. ਞਾਣਂ ਪੇਸੇਤ੍ਵਾਤਿ ਵਿਪਸ੍ਸਨਾਪਟਿਪਾਟਿਯਾ ਨਿਬ੍ਬਾਨਂ ਪਤਿ ਅਨੁਬੋਧਞਾਣਂ ਪੇਸੇਤ੍ਵਾ ਪਵਤ੍ਤੇਤ੍ਵਾ. ਸੋਤਾਪਤ੍ਤਿਫਲੇ ਪਤਿਟ੍ਠਿਤੋਤਿ ਸਹਸ੍ਸਨਯਪਟਿਮਣ੍ਡਿਤਸ੍ਸ ਪਠਮਮਗ੍ਗਸ੍ਸ ਅਧਿਗਮੇਨ ਪਠਮਫਲੇ ਪਤਿਟ੍ਠਿਤੋ ਪਟਿਲਭਤੀਤਿ ਯੋਜਨਾ. ਨ ਕਿਲਿਟ੍ਠਤ੍ਤਭਾਵੇ ਤਿਟ੍ਠਨ੍ਤਿ ਮਹਾਨੁਭਾਵਤ੍ਤਾ ਅਰਿਯਧਮ੍ਮਸ੍ਸ. ਸੇਤਕਣ੍ਡੁਪੀਲ਼ਕਸੂਚਿਯੋਤਿ ਸੇਤਭਾਵਂ ਪਤ੍ਵਾ ਕਣ੍ਡੁਪੀਲ਼ਕਾ ਲੋਮਸੂਚਿਯੋ ਸਬ੍ਬਾ ਅਨਵਸੇਸਾ ਪਤਿਤਾ ਪਰਿਭਟ੍ਠਾ ਅਪਗਤਾ. ਭੁਮ੍ਮਦੇਵਤਾਪਰਿਹਾਰਨ੍ਤਿ ਭੁਮ੍ਮਦੇਵਤ੍ਤਭਾਵਨ੍ਤਿ.
ਸੂਚਿਲੋਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੪. ਮਣਿਭਦ੍ਦਸੁਤ੍ਤਵਣ੍ਣਨਾ
੨੩੮. ਸੁਖਂ ਪਟਿਲਭਤੀਤਿ ਦਿਟ੍ਠਧਮ੍ਮਿਕਾਦਿਭੇਦਂ ਸੁਖਂ ਅਧਿਗਚ੍ਛਤਿ. ਨਿਚ੍ਚਮੇਵ ਸੇਯ੍ਯੋ ਸਤਿਮਤੋ ਆਯਤਿਂ ਹਿਤਚਰਣਤੋ. ਮਣਿਭਦ੍ਦੋ ‘‘ਸਤਿਮਾਪੁਗ੍ਗਲੋ ਸਤੋਕਾਰੀ ਸਮ੍ਪਤਿ ਵੇਰਂ ਨਪ੍ਪਸਵਤੀ’’ਤਿ ਅਧਿਪ੍ਪਾਯੇਨ ‘‘ਵੇਰਾ ਚ ਪਰਿਮੁਚ੍ਚਤੀ’’ਤਿ ਆਹ. ਭਗਵਾ ਪਨ ਸਤਿਮਨ੍ਤਤਾਸਿਦ੍ਧਿਯਾ ਵੇਰਪਰਿਮੁਚ੍ਚਨਂ ਨ ਅਚ੍ਚਨ੍ਤਿਕਂ, ਨਾਪਿ ਏਕਨ੍ਤਿਕਂ ਪਟਿਪਕ੍ਖੇਨ ਪਰਤੋ ਚ ਅਪ੍ਪਹੀਨਤ੍ਤਾਤਿ ਤਂ ਨਿਸੇਧੇਨ੍ਤੋ ‘‘ਵੇਰਾ ਚ ਨ ਪਰਿਮੁਚ੍ਚਤੀ’’ਤਿ ਵਤ੍ਵਾ, ਯਂ ਅਚ੍ਚਨ੍ਤਿਕਂ ਏਕਨ੍ਤਿਕਞ੍ਚ ਪਰਸ੍ਸ ਵਸੇਨ ਵੇਰਪਰਿਮੁਚ੍ਚਨਂ, ਤਂ ਦਸ੍ਸੇਨ੍ਤੋ ‘‘ਯਸ੍ਸਾ’’ਤਿ ਗਾਥਮਾਹ. ਕਰੁਣਾਯਾਤਿ ਅਪ੍ਪਨਾਪ੍ਪਤ੍ਤਾਯ ਕਰੁਣਾਯ. ਕਰੁਣਾਪੁਬ੍ਬਭਾਗੇਤਿ ਕਰੁਣਾਭਾਵਨਾਯ ਵਸੇਨ ਉਪ੍ਪਾਦਿਤਪਠਮਜ੍ਝਾਨੂਪਚਾਰੇ. ਸੋਤਿ ਕਰੁਣਾਭਾਵਨਂ ਭਾਵੇਨ੍ਤੋ ਪੁਗ੍ਗਲੋ. ਮੇਤ੍ਤਂਸੋਤਿ ਮੇਤ੍ਤਚਿਤ੍ਤਂ ਅਂਸੋ ਏਕੋ ਕੁਸਲਕੋਟ੍ਠਾਸੋ ਏਤਸ੍ਸਾਤਿ ਮੇਤ੍ਤਂਸੋ. ਤਸ੍ਸ ਕੇਨਚੀਤਿ ਤਸ੍ਸ ਅਰਹਤੋ ਕਰੁਣਾਯ ਮੇਤ੍ਤਾਭਾਵਨਾਯ ਚ ਸਾਤਿਸਯਤ੍ਤਾ ਤਦਭਾਵੇਨ ਕੇਨਚਿ ਪੁਗ੍ਗਲੇਨ ਸਦ੍ਧਿਂ ਵੇਰਪ੍ਪਸਙ੍ਗੋ ਨਾਮ ਨਤ੍ਥਿ. ਇਮਿਨਾ ਖੀਣਾਸਵੇਪਿ ਮੇਤ੍ਤਾਕਰੁਣਾਭਾਵਨਾਰਹਿਤੇ ਕੋਚਿ ਅਤ੍ਤਨੋ ਚਿਤ੍ਤਦੋਸੇਨ ਵੇਰਂ ਕਰੇਯ੍ਯ, ਨ ਪਨ ਤਸ੍ਮਿਂ ਮੇਤ੍ਤਾਕਰੁਣਾਚੇਤੋਵਿਮੁਤ੍ਤਿਸਮਨ੍ਨਾਗਤੇ ਕੋਚਿ ਵੇਰਂ ਕਰੇਯ੍ਯ. ਏਵਂ ਮਹਿਦ੍ਧਿਕਾ ਬ੍ਰਹ੍ਮਵਿਹਾਰਭਾਵਨਾਤਿ ਦਸ੍ਸੇਤਿ.
ਮਣਿਭਦ੍ਦਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੫. ਸਾਨੁਸੁਤ੍ਤਵਣ੍ਣਨਾ
੨੩੯. ਯਕ੍ਖੇਨ ਗਹਿਤੋ ਹੋਤੀਤਿ ਯਕ੍ਖੇਨ ਅਨੁਪਵਿਟ੍ਠੋ ਹੋਤਿ. ਤਸ੍ਸ ਯਕ੍ਖਗਹਣਸ੍ਸ ਕਾਰਣਂ ਮੂਲਤੋ ਪਭੁਤਿ ਵਿਤ੍ਥਾਰਤੋ ਦਸ੍ਸੇਤੁਂ ‘‘ਸੋ’’ਤਿਆਦਿਮਾਹ. ਤਸ੍ਸ ਅਨ੍ਤਿਮਭਵਿਕਤ੍ਤਾ ਆਦਿਤੋ ਪਟ੍ਠਾਯ ਅਧਿਸੀਲਸਿਕ੍ਖਾਯ ਸਕ੍ਕਚ੍ਚਂ ਪੂਰਣਨ੍ਤਿ ਦਸ੍ਸੇਤਿ ‘‘ਸੋ ਪਬ੍ਬਜਿਤਕਾਲਤੋ’’ਤਿਆਦਿਨਾ. ਪਚ੍ਚਾਹਾਰਨ੍ਤਿ ਪਟਿਕ੍ਖੇਪਂ. ਇਮਸ੍ਮਿਂ ਸਰਭਞ੍ਞੇਤਿ ਇਮਸ੍ਮਿਂ ਮਮ ਧਮ੍ਮਭਣਨੇ. ਪਤ੍ਤਿਨ੍ਤਿ ਪਤ੍ਤਿਦਾਨਂ. ਪਿਯਾ ਹੋਨ੍ਤਿ, ਤੇਨਾਹ ਭਗਵਾ ‘‘ਆਕਙ੍ਖੇਯ੍ਯ ਚੇ, ਭਿਕ੍ਖਵੇ, ਭਿਕ੍ਖੁ ‘ਸਬ੍ਰਹ੍ਮਚਾਰੀਨਂ ਪਿਯੋ ਚ ਅਸ੍ਸਂ ਮਨਾਪੋ ਚ ਗਰੁ ਚ ਭਾਵਨੀਯੋ ਚਾ’ਤਿ, ਸੀਲੇਸ੍ਵੇਵਸ੍ਸ ਪਰਿਪੂਰਕਾਰੀ’’ਤਿ (ਮ. ਨਿ. ੧.੬੫). ਤਥਾ ਚਾਹ ‘‘ਤਸ੍ਮਿਂ ਸਾਮਣੇਰੇ’’ਤਿਆਦਿ.
ਵੁਡ੍ਢਿਮਨ੍ਵਾਯਾਤਿ ਯੋਬ੍ਬਨਪ੍ਪਤ੍ਤਿਯਾ ਅਙ੍ਗਪਚ੍ਚਙ੍ਗਾਨਂ ਪਰਿਵੁਡ੍ਢਿਮਾਗਮ੍ਮ. ਕਾਮਸਮ੍ਭੋਗਸਮਤ੍ਥਤਾਵਸੇਨ ਪਰਿਪਕ੍ਕਿਨ੍ਦ੍ਰਿਯੋ. ਅਨੁਯੋਜੇਤ੍ਵਾਵਾਤਿ ਵਿਸ੍ਸਜ੍ਜੇਤ੍ਵਾਵ, ਗਿਹਿਭਾਵੇ ਵਾ ਅਨੁਯੋਜੇਤ੍ਵਾਵ. ‘‘ਪੁਬ੍ਬੇ ਤੁਯ੍ਹਂ ਪੁਤ੍ਤੋ ਸੀਲਵਾ ਕਲ੍ਯਾਣਧਮ੍ਮੋ ਲਜ੍ਜੀ ਕੁਕ੍ਕੁਚ੍ਚਕੋ ਸਿਕ੍ਖਾਕਾਮੋਤਿ ਸਮ੍ਭਾਵਿਤੋ, ਇਦਾਨਿ ਤਤੋ ਅਞ੍ਞਥਾ ਜਾਤੋ’’ਤਿ ਘੋਸਨਾਵਸੇਨ ਦੇਵਤਾਨਂ ਅਨ੍ਤਰੇ ਮਾਹੇਵ ਮੇ ਲਜ੍ਜਂ ਉਪ੍ਪਾਦੇਯ੍ਯ.
ਪਾਟਿਹਾਰਿਯਪਕ੍ਖਞ੍ਚਾਤਿ ਚਾਤੁਦ੍ਦਸੀਪਞ੍ਚਦਸੀਅਟ੍ਠਮੀਨਂ ਯਥਾਕ੍ਕਮਂ ਆਦਿਤੋ ਅਨ੍ਤਤੋ ਆਦਿਅਨ੍ਤਤੋ ਚ ਪਵੇਸਨਨਿਕ੍ਖਮਨਵਸੇਨ ਉਪੋਸਥਸੀਲਸ੍ਸ ਪਟਿ ਪਟਿ ਅਭਿਮੁਖਂ ਪਚ੍ਚਾਵਹਿਤਬ੍ਬਪਕ੍ਖਞ੍ਚ. ਤੇਰਸਿਯਾਪੀਤਿ ਪਰਂ ਸਤ੍ਤਮੀਨਵਮੀਸੁਪੀਤਿ ਅਤ੍ਥੋ. ਪਵੇਸਭੂਤਞ੍ਹਿ ਉਪੋਸਥਸੀਲਸ੍ਸ ਸਤ੍ਤਮੀਸੁ ਸਮਾਦਿਨ੍ਨਂ ਸੀਲਂ ਪਟਿਪਦਂ, ਨਵਮੀਸੁ ਨਿਕ੍ਖਮਭੂਤਨ੍ਤਿ ਆਚਰਿਯਾ. ਪੋਰਾਣਟ੍ਠਕਥਾਯਂ ਪਨ ਪਚ੍ਚੁਗ੍ਗਮਨਾਨੁਗਮਨਪਰਿਯਾਯੇਨ ਵੁਤ੍ਤਨ੍ਤਿ ਆਹ ‘‘ਮਨੁਸ੍ਸਾ’’ਤਿਆਦਿ. ਅਡ੍ਢਮਾਸਨ੍ਤਿ ਸਕਲਕਾਲਪਕ੍ਖਂ. ਏਵਞ੍ਹਿ ਵਸ੍ਸਵਾਸਸ੍ਸ ਅਨੁਗਮਨਂ ਗਤਂ ਹੋਤਿ. ਸੁਟ੍ਠੁ ਸਮਾਗਤਨ੍ਤਿ ਸੁਪਰਿਸੁਦ੍ਧਂ ਸਮ੍ਪਨ੍ਨਂ ਕਤ੍ਵਾ ਅਤ੍ਤਨੋ ਸਨ੍ਤਾਨਂ ਆਗਤਂ. ਤਂ ਪਨ ਅਤ੍ਤਨੋ ਚਿਤ੍ਤੇਨ ਸਮਂ ਪਕਾਰੇਹਿ ਯੁਤ੍ਤਂ ਹੋਤੀਤਿ ਆਹ ‘‘ਸਮ੍ਪਯੁਤ੍ਤ’’ਨ੍ਤਿ. ਅਰਹਨ੍ਤਾਨਂ ਅਨੁਕਰਣੇਨ ਸੇਟ੍ਠਚਰਿਯਂ. ‘‘ਨ ਤੇ ਹਿ ਯਕ੍ਖਾ ਕੀਲ਼ਨ੍ਤੀ’’ਤਿ ਅਤ੍ਤਨੋ ਪੁਤ੍ਤਸ੍ਸ ਕਾਯੇ ਅਧਿਮੁਚ੍ਚਨਂ ਅਤ੍ਤਨੋ ਕੀਲ਼ਨਂ ਵਿਯ ਹੋਤੀਤਿ ਕਤ੍ਵਾ ਆਹ.
ਉਪਾਸਿਕਾ ਯਥਾਵੁਤ੍ਤਉਪੋਸਥਸੀਲੇਨ ਸੀਲਵਤੀ, ਸਾਮਣੇਰੋ ਪਨ ਅਤ੍ਤਨੋ ਸਾਮਣੇਰਸੀਲੇਨ ਸੀਲਵਾ. ਉਪ੍ਪਤਿਤ੍ਵਾਤਿ ਆਕਾਸੇ ਉਪ੍ਪਤਿਤ੍ਵਾ. ਮੋਕ੍ਖੋ ਨਤ੍ਥਿ ਦੁਕ੍ਖਾਵਹਸ੍ਸ ਕਮ੍ਮਸ੍ਸ ਕਤੂਪਚਿਤਤ੍ਤਾ.
ਦੁਵਿਧੇਪਿ ਕਾਮੇਤਿ ਵਤ੍ਥੁਕਾਮਕਿਲੇਸਕਾਮੇ. ਕਿਲੇਸਕਾਮਂ ਪਰਿਚ੍ਚਜਨ੍ਤੋ ਏਵ ਹਿ ਵਤ੍ਥੁਕਾਮੇ ਪਰਿਚ੍ਚਜਤਿ ਨਾਮ. ਵਿਬ੍ਭਮਨਵਸੇਨ ਆਗਚ੍ਛਤਿ ਭਿਕ੍ਖਾਯ ਆਹਿਣ੍ਡਨਾਦਿਪਬ੍ਬਜਿਤਕਿਚ੍ਚਤੋ. ਉਪ੍ਪਬ੍ਬਜਿਤ੍ਵਾ ਵਿਗਤਸੀਲਸ੍ਸ ਜੀਵਤੋ ਆਨਾਪਾਨਮਤ੍ਤੇਨ ਜੀਵਨ੍ਤੋਪਿ ਸੋ ਮਤਕੋਵ. ਵੁਤ੍ਤਞ੍ਹੇਤਂ ‘‘ਮਰਣਞ੍ਹੇਤਂ, ਸੁਨਕ੍ਖਤ੍ਤ, ਅਰਿਯਸ੍ਸ ਵਿਨਯੇ, ਯੋ ਸਿਕ੍ਖਂ ਪਚ੍ਚਕ੍ਖਾਯ ਹੀਨਾਯਾਵਤ੍ਤਤੀ’’ਤਿ (ਮ. ਨਿ. ੩.੪੫).
ਉਣ੍ਹਟ੍ਠੇਨਾਤਿ ਸਪਰਿਲ਼ਾਹਟ੍ਠੇਨ. ਅਭਿਧਾਵਥਾਤਿ ਅਭਿਧਾਵਤੀਤਿ ਇਮਸ੍ਮਿਂ ਅਭਿਧਾਵਨਕਿਚ੍ਚੇ ਭਦ੍ਦਂ ਤੇ ਹੋਤੂਤਿ ਵਤ੍ਵਾ ਗਿਹਿਭਾਵਾਯ ਅਭਿਧਾਵਥ. ਨੀਹਰਿਤ੍ਵਾਤਿ ਨਿਕ੍ਖਾਮੇਤ੍ਵਾ. ਏਕਾਦਸਹਿ ਅਗ੍ਗੀਹਿ ਆਦਿਤ੍ਤਤ੍ਤਾ ਮਹਾਡਾਹਸਦਿਸੇ. ਸਲ੍ਲਕ੍ਖੇਤ੍ਵਾਤਿ ਗਿਹਿਭਾਵੇ ਆਦੀਨਵਂ, ਪਬ੍ਬਜ੍ਜਾਯ ਆਨਿਸਂਸਞ੍ਚ ਸਲ੍ਲਕ੍ਖੇਤ੍ਵਾ. ਹਿਰੋਤ੍ਤਪ੍ਪਂ ਪਟਿਲਭਿਤ੍ਵਾ ‘‘ਮਮ ਉਪ੍ਪਬ੍ਬਜਿਤੁਕਾਮਤਂ ਸਬ੍ਰਹ੍ਮਚਾਰਿਨੋ ਜਾਨਿਸ੍ਸਨ੍ਤੀ’’ਤਿ. ਚਤੁਨ੍ਨਂ ਪਰਿਸਾਨਂ ਚਿਤ੍ਤਸਙ੍ਖੋਭਵਸੇਨ ਸਕਲਜਮ੍ਬੁਦੀਪਂ ਖੋਭੇਤ੍ਵਾ.
ਸਾਨੁਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੬. ਪਿਯਙ੍ਕਰਸੁਤ੍ਤਵਣ੍ਣਨਾ
੨੪੦. ਪਚ੍ਚਨ੍ਤੇਤਿ ਪਰਿਯਨ੍ਤੇ. ਪਾਟਿਯੇਕ੍ਕਨ੍ਤਿ ਸਙ੍ਗੀਤਿਕਾਲੇ ਵਿਸੁਂ. ਯਮਕਵਗ੍ਗਾਦਿਕਾ ਬ੍ਰਾਹ੍ਮਣਵਗ੍ਗਪਰਿਯੋਸਾਨਾ ਛਬ੍ਬੀਸਤਿ ਵਗ੍ਗਾ ਏਤਿਸ੍ਸਾਤਿ ਛਬ੍ਬੀਸਤਿਵਗ੍ਗਾ, ਤਨ੍ਤੀਤਿ ਪਾਲ਼ਿ. ਉਚ੍ਚਾਰਪਸ੍ਸਾਵਾਦਿ ਏਵਰੂਪਂ ਦੁਬ੍ਭੋਜਨਂ, ‘‘ਅਸੁਚਿਜੇਗੁਚ੍ਛਭਾਵੇਨ ਦੁਟ੍ਠੁ ਭੋਜਨ’’ਨ੍ਤਿ ਕਤ੍ਵਾ, ਦੁਬ੍ਭੋਜਨਗ੍ਗਹਣੇਨ ਵਾ ਵਨ੍ਤਗਬ੍ਭਮਲਾਦੀਨਿ ਅਤਿਦਿਸਤਿ. ਛਵਿਆਦੀਨਿ ਛੇਤ੍ਵਾਤਿ ਛਵਿਆਦੀਨਿ ਅਤਿਵਿਜ੍ਝ ਅਤਿਵਿਯ ਪਵਿਸਿਤ੍ਵਾ. ਅਟ੍ਠਿਮਿਞ੍ਜਂ ਆਹਚ੍ਚ ਅਟ੍ਠਾਸਿ ਪੀਤਿਸਮੁਟ੍ਠਾਨਉਲ਼ਾਰੋਲ਼ਾਰਰੂਪਪ੍ਪਵਤ੍ਤਿਯਾ. ਤੇਨਾਹ ‘‘ਹਦਯਙ੍ਗਮਨੀਯੋ ਹੁਤ੍ਵਾ’’ਤਿ.
ਧਮ੍ਮਤਾਯ ਸਮਾਦਿਣ੍ਣਨ੍ਤਿ ਕਸ੍ਸਚਿ ਸਨ੍ਤਿਕੇ ਅਗ੍ਗਹੇਤ੍ਵਾ ਸਯਮੇਵ ਤਸ੍ਮਿਂ ਖਣੇ ਸਂਯਤਾ ਹੋਮਾਤਿ ਯਥਾਸਂਯਤਾ. ਤਤਿਯਪਦੇਨਾਤਿ ‘‘ਸਿਕ੍ਖੇਮ ਸੁਸੀਲ੍ਯ’’ਨ੍ਤਿ ਇਮਿਨਾ ਪਦੇਨ. ਸੇਸਾਤਿ ਵੁਤ੍ਤਾਵਸੇਸਾ. ਤਿਸ੍ਸੋ ਅਦਿਨ੍ਨਾਦਾਨਮਿਚ੍ਛਾਚਾਰਸੁਰਾਪਾਨਵਿਰਤਿਯੋ. ਗਹਿਤਾ ਗੋਬਲੀਬਦ੍ਦਞਾਯੇਨ. ਛਾਤਕਂ ਦੁਬ੍ਭਿਕ੍ਖਞ੍ਚ ਏਤ੍ਥਾਤਿ ਛਾਤਕਦੁਬ੍ਭਿਕ੍ਖਾ, ਜਿਘਚ੍ਛਾਦੁਬ੍ਭਿਕ੍ਖਾਬਹੁਲਾਯਾਤਿ ਅਤ੍ਥੋ. ਪਿਸਾਚਯਕ੍ਖਯੋਨਿਯਾਤਿ ਪੇਤ੍ਤਿਵਿਸਯਸਦਿਸਯਕ੍ਖਯੋਨਿਯਾ ਅਪਿ ਨਾਮ ਮੁਚ੍ਚੇਮਾਤਿ ਯੋਜਨਾ.
ਪਿਯਙ੍ਕਰਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੭. ਪੁਨਬ੍ਬਸੁਸੁਤ੍ਤਵਣ੍ਣਨਾ
੨੪੧. ਵਸਨਟ੍ਠਾਨਗ੍ਗਹਣੇਨ ਰਤ੍ਤਿਟ੍ਠਾਨਦਿਵਾਟ੍ਠਾਨਾਦਯੋ ਸਙ੍ਗਣ੍ਹਾਤਿ. ਦ੍ਵਾਦਸਹਤ੍ਥਮਤ੍ਤਮੇਵ ਗਣ੍ਹਾਤਿ ਪਕਤਿਸਞ੍ਚਰਣੂਪਚਾਰਮਤ੍ਤਬ੍ਯਾਪਨਤੋ. ਯਥਾਪਰਿਸਨ੍ਤਿ ਪਰਿਸਾਨੁਰੂਪਂ, ਯਤ੍ਥ ਯਤ੍ਥ ਪਰਿਸਾ ਤਿਟ੍ਠਤਿ, ਤਂ ਤਂ ਠਾਨਂ ਗਚ੍ਛਤਿ ਪਰਿਸਪਰਿਯਨ੍ਤਿਕਤ੍ਤਾ. ਸਤ੍ਥੁ ਮੁਖਵਿਕਾਰਾਭਾਵਤੋ ਪਵੇਸਾਨੁਞ੍ਞਂ ਸਲ੍ਲਕ੍ਖੇਨ੍ਤੀ ‘‘ਨੂਨ ਅਯਂ ਕਤਾਧਿਕਾਰਾ ਭਵਿਸ੍ਸਤੀ’’ਤਿ ਅਨੁਮਾਨਸਿਦ੍ਧਂ ਉਪਨਿਸ੍ਸਯਂ ਦਿਸ੍ਵਾ. ਏਕੀਭਾਵਗਮਨੇਨਾਤਿ ਹਤ੍ਥਪਾਸੂਪਗਮਨੇਨ ਪਰਿਸਾਯ ਮਿਸ੍ਸੀਭਾਵਪ੍ਪਤ੍ਤਿਯਾ. ਪੁਤ੍ਤਕਾਤਿ ਪੁਤ੍ਤਪੁਤ੍ਤਿਯੋ. ਅਨੁਕਮ੍ਪਾਯਞ੍ਹਿ ਕ-ਸਦ੍ਦੋ.
ਨਿਬ੍ਬਾਨਾਰਮ੍ਮਣੇਨ ਅਰਿਯਮਗ੍ਗੇਨ ਮੁਞ੍ਚਿਯਮਾਨਾ ਗਨ੍ਥਾ ‘‘ਨਿਬ੍ਬਾਨਂ ਆਗਮ੍ਮ ਪਮੁਚ੍ਚਨ੍ਤੀ’’ਤਿ ਵੁਤ੍ਤਾ. ਵੇਲਾਤਿਕ੍ਕਨ੍ਤਾਤਿ ਪਮਾਣਤੋ ਪਰਿਚ੍ਛਿਨ੍ਦਿਤੁਂ ਨ ਸਕ੍ਕਾਤਿ ਆਹ ‘‘ਪਮਾਣਾਤਿਕ੍ਕਨ੍ਤਾ’’ਤਿ. ਪਿਯਾਯਨਾਤਿ ਆਸੀਸਨਾ. ਆਸੀਸਨਂ ਪੇਮਵਸੇਨ ਪੇਮਵਤ੍ਥੁਨੋ ਏਸਨਾ ਪਤ੍ਥਨਾਵ ਹੋਤੀਤਿ ਆਹ ‘‘ਮਗ੍ਗਨਾ ਪਤ੍ਥਨਾ’’ਤਿ. ਤਤੋਤਿ ਪਿਯਪੁਤ੍ਤਾਦਿਤੋ. ਪਾਣੀਨਨ੍ਤਿ ਸਾਮਿਅਤ੍ਥੇ ਪੁਥੁਵਚਨਂ ਦੁਕ੍ਖਸਦ੍ਦਾਪੇਕ੍ਖਂ. ਕੇ ਮੋਚੇਤੀਤਿ ਮੋਚਨਕਿਰਿਯਾਯ ਕਮ੍ਮਂ ਪੁਚ੍ਛਤਿ? ਇਭਰੋ ਪਨ ਅਤ੍ਥਵਸੇਨ ਵਿਭਤ੍ਤਿਵਿਪਰਿਣਾਮੋਤਿ ‘‘ਪਾਣਿਨੇਤਿ ਆਹਰਿਤ੍ਵਾ ਵਤ੍ਤਬ੍ਬ’’ਨ੍ਤਿ ਆਹ. ਅਭਿਸਮ੍ਬੁਧਨ੍ਤਿ ਅਭਿਸਮ੍ਬੁਧਨ੍ਤੋ. ਤੇਨਾਹ ‘‘ਅਭਿਸਮ੍ਬੁਦ੍ਧੋ’’ਤਿ. ਸਦ੍ਧਮ੍ਮਸ੍ਸਾਤਿ ਉਪਯੋਗਤ੍ਥੇ ਸਾਮਿਵਚਨਨ੍ਤਿ ਆਹ ‘‘ਸਦ੍ਧਮ੍ਮਮੇਵ ਅਜਾਨਿਤ੍ਵਾ’’ਤਿ.
ਪੁਤ੍ਤਸ੍ਸ ਅਨੁਮੋਦਨਂ ਕਰੋਨ੍ਤੀਤਿ ਪੁਤ੍ਤਸ੍ਸ ਪਟਿਪਤ੍ਤਿਅਨੁਮੋਦਨਂ ਕਰੋਨ੍ਤੀ. ਉਗ੍ਗਤਾਤਿ ਏਤ੍ਥ ਕਲਲੇ ਵਟ੍ਟਦੁਕ੍ਖੇ ਨਿਮੁਜ੍ਜਮਾਨਾ ਤਤੋ ਸੀਸਂ ਉਕ੍ਖਿਪਿਤੁਂ ਅਸਕ੍ਕੋਨ੍ਤਿ ਅਜ੍ਜ ਬੁਦ੍ਧਾਨੁਭਾਵੇਨ ਪਞ੍ਞਾਸੀਸਂ ਉਕ੍ਖਿਪਿਤਾ ਉਗ੍ਗਤਾ. ਪੁਨ ਵਿਨਿਪਾਤਾਭਾਵਤੋ ਸਮ੍ਮਦੇਵ ਉਗ੍ਗਤਤ੍ਤਾ ਸਮੁਗ੍ਗਤਾ. ਤਥਾਭੂਤਾ ਸਾਸਨੇਪਿ ਉਗ੍ਗਤਾ ਸਮੁਗ੍ਗਤਾ ਜਾਤਾ. ਚਤੁਸਚ੍ਚਪਟਿਵੇਧਭਾਵਨ੍ਤਿ ਚਤੁਸਚ੍ਚਪਟਿਵੇਧਸ੍ਸ ਅਤ੍ਥਿਭਾਵਂ. ਕਣ੍ਡੁਕਚ੍ਛੁਆਦੀਤਿ ਆਦਿ-ਸਦ੍ਦੇਨ ਜੇਗੁਚ੍ਛਅਸਾਤਾਦਿਂ ਸਙ੍ਗਣ੍ਹਾਤਿ. ਦਿਬ੍ਬਸਮ੍ਪਤ੍ਤਿਂ ਪਟਿਲਭਤਿ ਪਵਤ੍ਤਿਯਂ ਸਮ੍ਪਤ੍ਤਿਦਾਯਿਨੋ ਕਮ੍ਮਸ੍ਸ ਕਤੋਕਾਸਤ੍ਤਾ. ਤੁਣ੍ਹੀ ਉਤ੍ਤਰਿਕੇ ਹੋਹੀਤਿ ਮਾਤੁ-ਵਚਨਂ ਸਮ੍ਪਟਿਚ੍ਛਿਤ੍ਵਾ ਤਸ੍ਸ ਵਿਸੇਸਾਧਿਗਮਸ੍ਸ ਅਵਿਬਨ੍ਧਕਰਣਸਮ੍ਮਾਪਯੋਗੇਨ ਯਥਾਲਦ੍ਧਵਿਸੇਸਾਯ ਮਾਤੁਯਾ ਵਸੇਨ ਯਸ੍ਮਾ ਧੀਤਾ ਦਿਟ੍ਠਧਮ੍ਮਿਕਸਮ੍ਪਤ੍ਤਿਲਾਭੀ, ਤਸ੍ਮਾ ਵੁਤ੍ਤਂ ‘‘ਮਾਤੁ ਆਨੁਭਾਵੇਨੇਵਾ’’ਤਿ.
ਪੁਨਬ੍ਬਸੁਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੮. ਸੁਦਤ੍ਤਸੁਤ੍ਤਵਣ੍ਣਨਾ
੨੪੨. ਕਰਣੀਯੇਨਾਤਿ ਏਤ੍ਥ ਕਰਣੀਯਨ੍ਤਿ ਵਾਣਿਜ੍ਜਕਮ੍ਮਂ ਅਧਿਪ੍ਪੇਤਨ੍ਤਿ ਤਂ ਵਿਵਰਨ੍ਤੋ ‘‘ਅਨਾਥਪਿਣ੍ਡਿਕੋ ਚਾ’’ਤਿਆਦਿਮਾਹ. ਵਿਕ੍ਕੀਯਤੀਤਿ ਵਿਕ੍ਕਯਂ ਗਚ੍ਛਤਿ. ਤਥੇਵ ਕਰੋਤੀਤਿ ਯਥਾ ਰਾਜਗਹਸੇਟ੍ਠਿਨਾ ਸਾਵਤ੍ਥਿਂ ਗਨ੍ਤ੍ਵਾ ਕਤਂ, ਤਥੇਵ ਰਾਜਗਹਂ ਗਨ੍ਤ੍ਵਾ ਕਰੋਤਿ. ਸ੍ਵਾਯਨ੍ਤਿ ਅਨਾਥਪਿਣ੍ਡਿਕੋ.
ਤਂ ਦਿਵਸਨ੍ਤਿ ਯਂ ਦਿਵਸਂ ਅਨਾਥਪਿਣ੍ਡਿਕੋ, ਗਹਪਤਿ, ਰਾਜਗਹਸਮੀਪਂ ਉਪਗਤੋ, ਤਂ ਦਿਵਸਂ. ਪਣ੍ਣਨ੍ਤਿ ਸਾਸਨਂ. ਨ ਸੁਣੀਤਿ ਅਸੁਣਨ੍ਤੋ ‘‘ਪਣ੍ਣਂ ਨ ਸੁਣੀ’’ਤਿ ਵੁਤ੍ਤੋ. ਧਮ੍ਮਗਾਰਵੇਨ ਹਿ ਸੋ ਸੇਟ੍ਠਿ ਅਞ੍ਞਂ ਕਿਚ੍ਚਂ ਤਿਣਾਯਪਿ ਨ ਮਞ੍ਞਿ. ਤੇਨਾਹ ‘‘ਧਮ੍ਮਸ੍ਸਵਨਤ੍ਥਾਯਾ’’ਤਿਆਦਿ. ਦਾਰਕਰੂਪਾਨਨ੍ਤਿ ਦਾਰਕਾਨਂ. ਅਨਤ੍ਥਨ੍ਤਰਕਰੋ ਹਿ ਰੂਪ-ਸਦ੍ਦੋ ਯਥਾ ‘‘ਗੋਰੂਪਾਨ’’ਨ੍ਤਿ. ਪਞ੍ਚਵਣ੍ਣਨ੍ਤਿ ਖੁਦ੍ਦਿਕਾਦਿਭੇਦਂ ਪਞ੍ਚਪ੍ਪਕਾਰਂ ਪੀਤਿਂ ਪਟਿਲਭਿ. ਅਨੁਕ੍ਕਮੇਨ ਹਿ ਤਾ ਏਤਸ੍ਸ ਸਮ੍ਭਵਨ੍ਤਿ. ‘‘ਸੀਸੇਨ ਉਟ੍ਠਾਯ…ਪੇ… ਗਚ੍ਛਤੀ’’ਤਿ ਪਦਂ ਪੀਤਿਸਮੁਟ੍ਠਾਨਰੂਪਵਸੇਨ ਲਕ੍ਖੇਤ੍ਵਾ ਵੁਤ੍ਤਂ.
ਸਿਵਥਿਕਾਯ ਵਸਤੀਤਿ ਸਿਵਥਿਕਾਯ ਸਮੀਪੇ ਵਸਤਿ. ਸੁਸਾਨਸ੍ਸਾਸਨ੍ਨਟ੍ਠਾਨੇ ਹਿ ਸੋ ਵਿਹਾਰੋ. ਅਥਸ੍ਸਾਤਿ ਅਥਸ੍ਸ ਅਨਾਥਪਿਣ੍ਡਿਕਸ੍ਸ ‘‘ਅਕਾਲੋ…ਪੇ… ਉਪਸਙ੍ਕਮਿਸ੍ਸਾਮੀ’’ਤਿ ਏਤਂ ਅਹੋਸਿ. ਬੁਦ੍ਧਗਤਾਯ ਸਤਿਯਾਤਿ ਅਞ੍ਞਂ ਕਿਞ੍ਚਿ ਅਚਿਨ੍ਤੇਤ੍ਵਾ ਬੁਦ੍ਧਗਤਾਯ ਏਵ ਸਤਿਯਾ ਸਯਨਵਰਗਤੋ ਨਿਪਜ੍ਜਿ. ਤੇਨ ਵੁਤ੍ਤਂ ‘‘ਤਂ ਦਿਵਸ’’ਨ੍ਤਿਆਦਿ.
ਬਲਵਪ੍ਪਸਾਦੋਤਿ ਬੁਦ੍ਧਾਰਮ੍ਮਣਾ ਬਲਵਤੀ ਸਦ੍ਧਾ. ਪੀਤਿਆਲੋਕੋਤਿ ਪੁਰਿਮਬੁਦ੍ਧੇਸੁ ਚਿਰਕਾਲਂ ਪਰਿਚਯਂ ਗਤਸ੍ਸ ਬਲਵਤੋ ਪਸਾਦਸ੍ਸ ਵਸੇਨ ‘‘ਬੁਦ੍ਧੋ’’ਤਿ ਨਾਮਂ ਸਵਨਮਤ੍ਤੇਨ ਉਪ੍ਪਨ੍ਨਾਯ ਉਲ਼ਾਰਾਯ ਪੀਤਿਯਾ ਸਮੁਟ੍ਠਾਪਿਤੋ ਵਿਪਸ੍ਸਨੋਭਾਸਸਦਿਸੋ ਸਾਤਿਸਯੋ ਆਲੋਕੋ ਹੋਤਿ ਚਿਤ੍ਤਪਚ੍ਚਯਉਤੁਸਮੁਟ੍ਠਾਨੋ. ਤੇਨਾਹ ‘‘ਸਬ੍ਬਤਮਂ ਵਿਗਚ੍ਛੀ’’ਤਿਆਦਿ. ‘‘ਦੇਵਤਾ ਹਿ ਕਤਾ’’ਤਿਪਿ ਵਦਨ੍ਤਿ, ਪੁਰਿਮੋ ਏਵੇਤ੍ਥ ਯੁਤ੍ਤੋ.
ਅਮਨੁਸ੍ਸਾਤਿ ਅਧਿਗਤਵਿਸੇਸਾ ਦੇਵਤਾ. ਤਾ ਹਿ ਸੇਟ੍ਠਿਸ੍ਸ ਸਮ੍ਪਤ੍ਤਿਂ ਪਚ੍ਚਕ੍ਖਤੋ ਪਸ੍ਸਿਂਸੁ. ਤੇਨਾਹ ‘‘ਅਯਂ ਮਹਾਸੇਟ੍ਠੀ’’ਤਿਆਦਿ. ਅਲ੍ਲਸਰੀਰਨ੍ਤਿ ਤਾਵਦੇਵ ਛਡ੍ਡਿਤਂ ਅਚ੍ਛਿਨ੍ਨਂ ਵਾ ਕਲ਼ੇਵਰਂ. ਅਪਰਮ੍ਪੀਤਿ ਮਤਂ ਕੁਥਿਤਕੁਣਪਂ. ਪਰਿਕਿਰਿਂਸੂਤਿ ਸਮਨ੍ਤਤੋ ਓਸਰਿਤਾ ਅਹੇਸੁਂ. ਆਲੋਕੋ ਅਨ੍ਤਰਧਾਯਿਪੀਤਿਵੇਗਸ੍ਸ ਮਨ੍ਦਭਾਵੇਨ ਤਂਸਮੁਟ੍ਠਾਨਰੂਪਾਨਂ ਦੁਬ੍ਬਲਭਾਵਤੋ.
ਇਮਿਨਾਵਾਤਿ ਅਧਿਕਾਰੇਨ ਸਹਸ੍ਸਪਦੇਨ ਏਵ ਸਮ੍ਬਨ੍ਧਿਤਬ੍ਬਾਨਿ. ਪਦਂ ਵੀਤਿਹਰਤਿ ਏਤ੍ਥਾਤਿ ਪਦਵੀਤਿਹਾਰੋ, ਪਦਵੀਤਿਹਾਰਟ੍ਠਾਨਂ. ਸਮਗਮਨੇਤਿ ਦੁਤਵਿਲਮ੍ਬਿਤਂ ਅਕਤ੍ਵਾ ਸਮਗਮਨੇ. ਤਤੋਤਿ ਤੇਸੁ ਸੋਲ਼ਸਭਾਗੇਸੁ. ਏਕੋ ਕੋਟ੍ਠਾਸੋਤਿ ਯਥਾਵੁਤ੍ਤਂ ਪਦਵੀਤਿਹਾਰਪਦੇਸਂ ਸੋਲ਼ਸਧਾ ਭਿਨ੍ਨਸ੍ਸ ਏਕੋ ਭਾਗੋ. ਪਵਤ੍ਤਚੇਤਨਾਤਿ ਯਥਾਵੁਤ੍ਤਕਲਾਸਙ੍ਖਾਤਸ੍ਸ ਪਦੇਸਸ੍ਸ ਲਙ੍ਘਨਧਾਵਨਪਵਤ੍ਤਚੇਤਨਾ. ਪਦਂ ਵਾ ਵੀਤਿਹਰਤਿ ਏਤੇਨਾਤਿ ਪਦਵੀਤਿਹਾਰੋ, ਤਥਾਪਵਤ੍ਤਾ ਕੁਸਲਚੇਤਨਾ. ‘‘ਤਸ੍ਸਾ ਫਲਂ ਸੋਲ਼ਸਧਾ ਕਤ੍ਵਾ’’ਤਿ ਵਦਨ੍ਤਿ. ਪਤਿਟ੍ਠਹਨ੍ਤਸ੍ਸ ਵਸੇਨ ਗਹਿਤਨ੍ਤਿ ਯੋਜਨਾ. ਵਿਵਟ੍ਟਨਿਸ੍ਸਿਤਾਯ ਏਵ ਰਤਨਤ੍ਤਯਪੂਜਾਯ ਧਮ੍ਮਸ੍ਸਵਨਸ੍ਸ ਸਿਕ੍ਖਾਪਦਸਮਾਦਾਨਸ੍ਸ ਸਰਣਗਮਨਸ੍ਸ ਚ ਅਤ੍ਥਾਯ ਗਚ੍ਛਤੋਪਿ ਵਸੇਨ ਵਟ੍ਟਤਿ. ਪਠਮਂ ਵੁਤ੍ਤਗਮਨਂ ਲੋਕੁਤ੍ਤਰਵਿਸੇਸਾਧਿਗਮਸ੍ਸ ਏਕਨ੍ਤਿਕਂ, ਦੁਤਿਯਂ ਅਨੇਕਨ੍ਤਿਕਨ੍ਤਿ ‘‘ਵਟ੍ਟਤਿਯੇਵਾ’’ਤਿ ਸਾਸਙ੍ਕਵਚਨਂ.
ਸੋਤਿ ਅਨਾਥਪਿਣ੍ਡਿਕੋ ਸੇਟ੍ਠਿ. ਅਨੁਯੁਤ੍ਤਾਤਿ ਅਨੁਗਾਮਿਨੋ ਸਹਾਯਾ. ਤੇਵ ਸਨ੍ਧਾਯ ਵਦਤਿ. ‘‘ਸਿਵਕੋ ਅਮਨੁਸ੍ਸੋ’’ਤਿ ਅਪਰੇ. ਨ ਕੇਵਲਂ ‘‘ਅਨੁਯੁਤ੍ਤਾਪਿ ਮੇ ਅਤ੍ਥਿ, ਕਸ੍ਮਾ ਭਾਯਾਮੀ’’ਤਿ ਏਵਂ ਸੂਰੋ ਅਹੋਸਿ? ਅਥ ਖੋ ਬੁਦ੍ਧਗਤਾਯ ਤਿਕ੍ਖਵਿਸਦਸਭਾਵੇਨ ਸਬ੍ਬਂ ਪਰਿਸ੍ਸਯਂ ਮਦ੍ਦਿਤ੍ਵਾਪਿ ਅਗਮਾਸੀਤਿ ਦਸ੍ਸੇਤੁਂ ‘‘ਅਪਿਚਾ’’ਤਿਆਦਿ ਵੁਤ੍ਤਂ. ਪਕ੍ਖਨ੍ਦਨਲਕ੍ਖਣਾ ਹਿ ਸਦ੍ਧਾ, ਤਾਯ ਯੁਤ੍ਤਕੋ ਸਪ੍ਪੁਰਿਸੋਪਿ ਸਦ੍ਧਮ੍ਮਗੁਣਵਸੇਨ ਸਬ੍ਬਂ ਪਰਿਸ੍ਸਯਂ ਮਦ੍ਦਿਤ੍ਵਾ ਪਕ੍ਖਨ੍ਦਤੀਤਿ ਦਟ੍ਠਬ੍ਬਂ.
ਸਬ੍ਬਕਾਮਸਮਿਦ੍ਧਤਾ ਪਰਿਚ੍ਚਾਗਸੀਲਤਾ ਉਲ਼ਾਰਜ੍ਝਾਸਯਤਾ ਪਰਦੁਕ੍ਖਾਪਨਯਕਾਮਤਾ ਪਰੇਸਂ ਹਿਤੇਸਿਤਾ ਪਰਸਮ੍ਪਤ੍ਤਿਪਮੋਦਨਾਤਿ ਏਵਮਾਦੀਨਂ ਮਹਾਗੁਣਾਨਂ ਵਸੇਨ ਨਿਚ੍ਚਕਾਲਂ ਅਨਾਥਾਨਂ ਪਿਣ੍ਡਦਾਯਕਤ੍ਤਾ ‘‘ਅਨਾਥਪਿਣ੍ਡਿਕੋ’’ਤਿ ਏਵਂ ਉਪ੍ਪਨ੍ਨਂ ਨਾਮਂ. ਏਵਮਾਹਾਤਿ ‘‘ਏਹਿ ਸੁਦਤ੍ਤਾ’’ਤਿ ਏਵਂ ਆਹ.
ਕਿਲੇਸਪਰਿਨਿਬ੍ਬਾਨੇਨਾਤਿ ਸਬ੍ਬਸੋ ਰਾਗਾਦਿਕਿਲੇਸਵੂਪਸਮੇਨ. ਕਿਲੇਸਵੂਪਸਮਨ੍ਤਿ ਸਬ੍ਬਸੋ ਸਬ੍ਬੇਸਂ ਕਿਲੇਸਾਨਂ ਵੂਪਸਮਂ ਅਗ੍ਗਮਗ੍ਗੇਨ ਪਤ੍ਵਾ. ਅਨੁਪੁਬ੍ਬਿਕਥਨ੍ਤਿ ਦਾਨਾਦਿਕਥਂ. ਸਾ ਹਿ ਅਨੁਪੁਬ੍ਬੇਨ ਕਥੇਤਬ੍ਬਤ੍ਤਾ ‘‘ਅਨੁਪੁਬ੍ਬਿਕਥਾ’’ਤਿ ਵੁਚ੍ਚਤਿ. ਤਂ ਸਨ੍ਧਾਯ ਵੁਤ੍ਤਂ – ‘‘ਅਥ ਖੋ ਭਗਵਾ ਅਨੁਪੁਬ੍ਬਿਂ ਕਥਂ ਕਥੇਸਿ. ਸੇਯ੍ਯਥਿਦਂ – ਦਾਨਕਥਂ ਸੀਲਕਥਂ ਸਗ੍ਗਕਥਂ ਕਾਮਾਨਂ ਆਦੀਨਵਂ ਓਕਾਰਂ ਸਂਕਿਲੇਸਂ ਨੇਕ੍ਖਮ੍ਮੇ ਆਨਿਸਂਸਂ ਪਕਾਸੇਸੀ’’ਤਿ (ਚੂਲ਼ਵ. ੩੦੫). ਮਤ੍ਥਕੇਤਿ ਅਨੁਪੁਬ੍ਬਿਕਥਾਯ ਉਪਰਿ ਪਰਤੋ. ਚਤ੍ਤਾਰਿ ਸਚ੍ਚਾਨਿ ਪਕਾਸੇਸੀਤਿ ਯਥਾ ਮਹਾਸੇਟ੍ਠਿ ਸਹਸ੍ਸਨਯਪਟਿਮਣ੍ਡਿਤੇ ਸੋਤਾਪਤ੍ਤਿਫਲੇ ਪਤਿਟ੍ਠਾਤਿ, ਏਵਂ ਪਵਤ੍ਤਿਨਿਵਤ੍ਤਿਯੋ ਸਹ ਹੇਤੁਨਾ ਵਿਭਜਨ੍ਤੋ ਚਤ੍ਤਾਰਿ ਅਰਿਯਸਚ੍ਚਾਨਿ ਪਕਾਸੇਸੀਤਿ.
ਸੁਦਤ੍ਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੯. ਪਠਮਸੁਕ੍ਕਾਸੁਤ੍ਤਵਣ੍ਣਨਾ
੨੪੩. ਰਥਿਕਨ੍ਤਿ ਰਚ੍ਛਂ. ਗਹੇਤ੍ਵਾਤਿ ਗਨ੍ਤ੍ਵਾ. ਸਿਙ੍ਘਾਟਕਨ੍ਤਿ ਅਞ੍ਞਤ੍ਥ ਤਿਕੋਣਾ ਰਚ੍ਛਾ ਵੁਚ੍ਚਤਿ. ਇਧ ਪਨ ‘‘ਚਤੁਕ੍ਕ’’ਨ੍ਤਿ ਵੁਤ੍ਤਂ. ‘‘ਮਧੁਪੀਕਾ’’ਤਿ ਏਤ੍ਥ ਮਧੁ-ਸਦ੍ਦੇਨ ਮਧੁਵਿਸੇਸੋ ਵੁਚ੍ਚਤੀਤਿ ਆਹ ‘‘ਗਨ੍ਧਮਧੁਪਾਨਂ ਪੀਤਾ ਵਿਯਾ’’ਤਿ. ਸਾਮਞ੍ਞਜੋਤਨਾ ਹਿ ਵਿਸੇਸੇ ਤਿਟ੍ਠਤੀਤਿ ਗਨ੍ਧਮਧੂਤਿ ਚ ਅਤਿਵਿਯ ਮਧੁਰੋ ਮਦਨਿਯੋ ਏਕੋ ਮਧੁਵਿਸੇਸੋ. ਤੇਨਾਹ ‘‘ਅਸਞ੍ਞੀ ਹੁਤ੍ਵਾ ਸਯਤੇਵਾ’’ਤਿ.
ਨ ਪਟਿਵਾਨੀਯਂ ਨ ਅਪਨੇਤਬ੍ਬਨ੍ਤਿ ਅਪ੍ਪਟਿਵਾਨੀਯਂ. ਤੇਨਾਹ ‘‘ਬਾਹਿਰਕਞ੍ਹੀ’’ਤਿਆਦਿ. ਯਂ ਕਿਞ੍ਚਿ ਸਨ੍ਤਪਣੀਤਭਾਵਾਵਹਂ ਨ ਸੇਚਨਨ੍ਤਿ ਅਸੇਚਨਕਂ. ਤਤੋ ਏਵ ਅਨਾਸਿਤ੍ਤਕਂ. ਓਜਵਨ੍ਤਨ੍ਤਿ ਬਹੁਸਮ੍ਮਤਓਜਵਨ੍ਤਸਦਿਸਤਾਯ ਓਜਵਨ੍ਤਂ. ਤੇਨਾਹ ‘‘ਯਥਾ ਹੀ’’ਤਿਆਦਿ. ਧਮ੍ਮਤਾਯਾਤਿ ਅਤ੍ਤਨੋ ਸਭਾਵੇਨੇਵ. ਮਧੁਰੋ ਇਟ੍ਠੋ. ਪਿਵਨ੍ਤੀ ਵਿਯਾਤਿ ਸੁਕ੍ਕਾਯ ਭਿਕ੍ਖੁਨਿਯਾ ਉਪਨੀਯਮਾਨਂ ਸਦ੍ਧਮ੍ਮਾਮਤਰਸਂ ਅਤ੍ਤਨੋ ਸੋਤਞ੍ਜਲਿਂ ਪੂਰੇਤ੍ਵਾ ਓਦਹਨ੍ਤੀਵ. ਵਲਾਹਕਤੋ ਆਗਤਂ ਵਲਾਹਕਂ.
ਪਠਮਸੁਕ੍ਕਾਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੧੦. ਦੁਤਿਯਸੁਕ੍ਕਾਸੁਤ੍ਤਵਣ੍ਣਨਾ
੨੪੪. ਬਹੁਂ ਵਤ ਪੁਞ੍ਞਂ ਪਸਵਤਿ ਸਬ੍ਬਗਨ੍ਥਵਿਮੁਤ੍ਤਿਯਾ ਸੀਲਸਮਨ੍ਨਾਗਤੇਨ ਅਗ੍ਗਦਕ੍ਖਿਣੇਯ੍ਯਾਯ ਸੁਕ੍ਕਾਯ ਥੇਰਿਯਾ ਭੋਜਨਸ੍ਸ ਦਿਨ੍ਨਤ੍ਤਾ.
ਦੁਤਿਯਸੁਕ੍ਕਾਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੧੧. ਚੀਰਾਸੁਤ੍ਤਵਣ੍ਣਨਾ
੨੪੫. ਏਕਾਦਸਮਂ ਉਤ੍ਤਾਨਮੇਵ ਦਸਮੇਨ ਸਦਿਸਤ੍ਤਾ. ਤਤ੍ਥ ਹਿ ਭੋਜਨਂ ਉਪਾਸਕਸ੍ਸ ਆਭਤਂ, ਇਧ ਚੀਵਰਦਾਨਨ੍ਤਿ ਅਯਮੇਵ ਵਿਸੇਸੋ.
ਚੀਰਾਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੧੨. ਆਲ਼ਵਕਸੁਤ੍ਤਵਣ੍ਣਨਾ
੨੪੬. ਆਲ਼ਵਿਯਨ੍ਤਿ ਇਤ੍ਥਿਲਿਙ੍ਗਵਸੇਨ ਤਂ ਰਟ੍ਠਮ੍ਪਿ ਨਗਰਮ੍ਪਿ ਵੁਚ੍ਚਤਿ. ਰਟ੍ਠੇ ਅਧਿਪ੍ਪੇਤੇਪਿ ਨ ਏਤ੍ਥ ਬਹੁਵਚਨਂ ਤਥਾਰੁਲ਼੍ਹਿਯਾ ਅਭਾਵਤੋ. ਤਞ੍ਚ ਭਵਨਨ੍ਤਿ ਤਞ੍ਚ ਆਲ਼ਵਕਸ੍ਸ ਯਕ੍ਖਸ੍ਸ ਭਵਨਂ. ਤਤ੍ਥਾਤਿ ਆਲ਼ਵਕਸ੍ਸ ਭਵਨੇ. ‘‘ਅਥ ਖੋ ਆਲ਼ਵਕੋ ਯਕ੍ਖੋ ਯੇਨ ਭਗਵਾ ਤੇਨੁਪਸਙ੍ਕਮੀ’’ਤਿ ਏਤ੍ਥ ਤਸ੍ਮਿਂ ਪਾਠਪਦੇਸੇ. ਅਯਮਨੁਪੁਬ੍ਬਿਕਥਾਤਿ ਅਯਂ ਇਦਾਨਿ ਵੁਚ੍ਚਮਾਨਾ ਅਨੁਪੁਬ੍ਬਤੋ ਆਗਤਾ ਕਥਾ. ਆਲ਼ਵਿਯਾ ਇਸ੍ਸਰੋਤਿ ਆਲ਼ਵੋ, ਆਲ਼ਵਕੋਤਿ ਚ ਰਾਜਾ ਵੁਤ੍ਤੋ. ਕਦਾਚਿ ਚੋਰਪਟਿਬਾਹਨਤ੍ਥਂ, ਕਦਾਚਿ ਉਸ੍ਸਾਹਸਤ੍ਤਿਵਿਭਾਵਨਵਸੇਨ ਪਟਿਰਾਜਨਿਸੇਧਨਤ੍ਥਂ, ਕਦਾਚਿ ਲਕ੍ਖਯੋਗ੍ਯਵਿਨਿਯੋਗਵਸੇਨ ਬ੍ਯਾਯਾਮਕਰਣਤ੍ਥਞ੍ਚ. ਮਿਗਾਨਂ ਵਨਨਤੋ ਵਸਨਤੋ ਵਾਨਤੋ ਵਾ ‘‘ਮਿਗਵਾ’’ਤਿ ਲਦ੍ਧਸਮਞ੍ਞਂ ਮਿਗਵਂ. ਤਸ੍ਸੇਵਾਤਿ ਰਞ੍ਞੋ ਏਵ. ਮਿਗੋਤਿ ਏਕੋ ਏਣਿਮਿਗੋ. ਤਿਯੋਜਨਨ੍ਤਿ ਅਚ੍ਚਨ੍ਤਸਂਯੋਗੇ ਉਪਯੋਗਵਚਨਂ. ਉਦਕਂ ਵਿਯ ਪਵਿਸਿਤ੍ਵਾ ਠਿਤਨ੍ਤਿ ਯਥਾ ਪਰਿਸ੍ਸਮਪ੍ਪਤ੍ਤੋ ਉਦਕਂ ਪਵਿਸਿਤ੍ਵਾ ਠਿਤੋ ਨਿਰਸ੍ਸਾਸੋ ਹੋਤਿ, ਏਵਂ ਵਿਯ ਠਿਤਂ. ਮੂਲਨ੍ਤਿ ਸਮੀਪਂ. ਯਕ੍ਖਂ ਦਿਸ੍ਵਾਵ ਰਞ੍ਞੋ ਭਯਂ ਛਮ੍ਭਿਤਤ੍ਤਂ ਊਰੁਤ੍ਥਮ੍ਭਂ ਅਹੋਸਿ, ਤਸ੍ਮਾ ਰਾਜਾ ਪਲਾਯਿਤੁਂ ਨਾਸਕ੍ਖਿ. ਤੇਨ ਵੁਤ੍ਤਂ ‘‘ਖਾਦਿਤੁਂ ਉਪਗਤੋ’’ਤਿ. ਅਥ ਰਾਜਾ ਦ੍ਵਿਧਾ ਛਿਨ੍ਨਂ ਮਿਗਂ ਦਤ੍ਵਾ ਅਤ੍ਤਾਨਂ ਮੋਚੇਤੁਕਾਮੋ ਅਹੋਸਿ. ਯਕ੍ਖੋ ‘‘ਨਨੁ ਮਮ ਹਤ੍ਥਗਤਕਾਲਤੋ ਪਟ੍ਠਾਯ ਮਿਗੋਪਿ ਮਮ ਸਨ੍ਤਕੋ, ਤਤ੍ਥ ਕਿਨ੍ਨਾਮ ਤੇ ਕੇਰਾਟਿਯਮਿਦਂ ਦਤ੍ਵਾ ਅਤ੍ਤਨੋ ਮੋਚਨ’’ਨ੍ਤਿ ਰਾਜਾਨਂ ਨ ਮੁਞ੍ਚਿ. ਅਥ ਰਾਜਾ ਤਸ੍ਸ ਤਾਦਿਸਂ ਪਟਿਞ੍ਞਾਤਂ ਅਕਾਸਿ. ਤੇਨ ਵੁਤ੍ਤਂ ‘‘ਰਾਜਾ ਤੇਨ ਸਦ੍ਧਿ’’ਨ੍ਤਿਆਦਿ. ਭਵਨਂ ਅਨੁਪਗਤਨ੍ਤਿ ਇਦਂ ਮਮ ਭਵਨਂ ਅਨੁਪਗਤਂ. ਅਨਨੁਞ੍ਞਾਤਨ੍ਤਿ ਉਪਗਤੇਨ ਸਾਮਿਭੂਤੇਨ ਅਨਨੁਞ੍ਞਾਤਞ੍ਚ. ਏਤੇਨ ਉਪਗਤਂ ਤਂ, ਇਦਾਨਿ ਤਾਦਿਸੇਨ ਅਨੁਞ੍ਞਾਤਞ੍ਚ ਖਾਦਿਤੁਂ ਲਭਾਮੀਤਿ ਦਸ੍ਸੇਤਿ.
ਮਚ੍ਚੁਪਥੇਤਿ ਮਚ੍ਚੁਗੋਚਰੇ. ਆਸਨ੍ਨਮਰਣਤਾਯ ਏਵਮਾਹਂਸੁ.
ਤਂ ਆਲ਼ਵਕਕੁਮਾਰਂ ਆਦਾਯ ਪਕ੍ਕਮਿਂਸੂਤਿ ਯੋਜਨਾ. ਤਸ੍ਸ ਰਞ੍ਞੋ ਮਹੇਸੀ ਆਲ਼ਵਕਕੁਮਾਰਸ੍ਸ ਮਾਤਾਤਿ ਵੁਤ੍ਤਾ. ਦੇਵਿਸਹਸ੍ਸਾਨਂ ਵਿਪ੍ਪਲਪਨ੍ਤੀਨਨ੍ਤਿ ਵਚਨਂ ਪਰਿਣਾਮੇਤਬ੍ਬਂ.
ਦੇਸਨਾਪਰਿਯੋਸਾਨੇਤਿ ਯਕ੍ਖਂ ਦਮੇਤ੍ਵਾ ਪਚ੍ਚਾਗਨ੍ਤ੍ਵਾ ਨਗਰਦ੍ਵਾਰਸਮੀਪੇ ਰੁਕ੍ਖਮੂਲੇ ਨਿਸਿਨ੍ਨੇਨ ਭਗਵਤਾ ਸਰਾਜਿਕਾਯ ਮਹਤਿਯਾ ਪਰਿਸਾਯ ਦੇਸਿਤਦੇਸਨਾਯ ਪਰਿਯੋਸਾਨੇ. ਸੋਤਿ ਭਗਵਾ. ਭਵਨੇ ਏਵਾਤਿ ਵਿਮਾਨੇ ਏਵ. ਭਗਵਾਪਿ ਪਸ੍ਸਤਿ ਪਕਤਿਚਕ੍ਖੁਨਾਵ ਨਿਗ੍ਰੋਧਸ੍ਸ ਉਪਰਿ ਨਿਬ੍ਬਤ੍ਤਤ੍ਤਾ.
ਤਤ੍ਰਾਤਿ ਤਸ੍ਮਿਂ ‘‘ਰੋਸੇਤੁਕਾਮਤਾਯਾ’’ਤਿ ਵਚਨੇ. ਤੇਸਨ੍ਤਿ ਸਾਤਾਗਿਰਿਹੇਮਵਤਾਨਂ. ਕਾਲਦੀਪਦੇਸਕੁਲਜਨੇਤ੍ਤਿਆਯੁਪ੍ਪਮਾਣਵਿਸਯਂ ਪਞ੍ਚਮਹਾਵਿਲੋਕਿਤਂ. ‘‘ਸੀਤਂ ਬ੍ਯਪਗਤਂ ਹੋਤਿ, ਉਣ੍ਹਞ੍ਚ ਉਪਸਮ੍ਮਤੀ’’ਤਿਆਦਿਨਾ (ਬੁ. ਵਂ. ੨.੮੩) ਆਗਤਾਨਿ ਦ੍ਵਤ੍ਤਿਂਸ ਪੁਬ੍ਬਨਿਮਿਤ੍ਤਾਨਿ. ਕਟਿਪ੍ਪਦੇਸਵਤ੍ਥਿਕੋਸਕਣ੍ਣਤੋ ਤਿਧਾ. ਸਦ੍ਦੋਤਿ ਆਲ਼ਵਕਸ੍ਸ ਉਗ੍ਘੋਸਿਤਸਦ੍ਦੋ.
ਇਮਿਨਾ ਪਸਙ੍ਗੇਨ ਸਕਲਜਮ੍ਬੁਦੀਪਂ ਬ੍ਯਾਪੇਤ੍ਵਾ ਪਵਤ੍ਤੇ ਅਪਰੇਪਿ ਤਯੋ ਸਦ੍ਦੇ ਯਥਾ ਏਤੇ, ਏਵਂ ਆਲ਼ਵਕਸ੍ਸ ਉਗ੍ਘੋਸਿਤਸਦ੍ਦੋਪੀਤਿ ਦਸ੍ਸੇਤੁਂ ‘‘ਚਤ੍ਤਾਰੋ’’ਤਿਆਦਿ ਵੁਤ੍ਤਂ. ਓਸਕ੍ਕਨ੍ਤੇਤਿ ਪਰਿਹਾਯਮਾਨੇ.
ਚੁਣ੍ਣੇਨ੍ਤਾਤਿ ਚੁਣ੍ਣੇਤੁਂ ਸਮਤ੍ਥਤਂ ਸਨ੍ਧਾਯ ਵੁਤ੍ਤਂ, ਨ ਪਨ ਚੁਣ੍ਣਨਵਸੇਨ ਵੁਤ੍ਤਂ. ਤੇਨਾਹ ‘‘ਮਾ ਕਸ੍ਸਚੀ’’ਤਿਆਦਿ. ਉਸ੍ਸਾਵਬਿਨ੍ਦੁਮਤ੍ਤਮ੍ਪੀਤਿ ਉਸ੍ਸਾਵਪਤਨਮਤ੍ਤਮ੍ਪਿ. ਖੁਰਪ੍ਪਂ ਸਲ੍ਲਂ.
ਸੇਟ੍ਠਾਨੀਤਿ ਅਜੇਯ੍ਯੇਨ ਅਪ੍ਪਟਿਹਤਭਾਵੇਨ ਉਤ੍ਤਮਾਨਿ. ਦੁਸ੍ਸਾਵੁਧਨ੍ਤਿ ਆਵੁਧਕਿਚ੍ਚਕਰਂ ਉਤ੍ਤਰਿਯਂ ਦੁਸ੍ਸਂ. ਇਮਾਨਿ ਕਿਰ ਸਕ੍ਕਾਦੀਨਂ ਪੁਞ੍ਞਾਨੁਭਾਵੇਨ ਨਿਬ੍ਬਤ੍ਤਾਨਿ ਅਪ੍ਪਟਿਹਤਪ੍ਪਭਾਵਾਨਿ ਪਟਿਪਕ੍ਖਵਿਧਮਨਯੁਤ੍ਤਾਨਿ ਅਵਜ੍ਝਾਨਿ ਆਵੁਧਾਨਿ. ਤੇਨਾਹ ‘‘ਯਦਿ ਹੀ’’ਤਿਆਦਿ.
ਅਸਨਿਵਿਚਕ੍ਕਂ ਵਿਯਾਤਿ ਅਸਨਿਮਣ੍ਡਲਂ ਵਿਯ.
ਪਿਤ੍ਤਨ੍ਤਿ ਅਲਗਦ੍ਦਪਿਤ੍ਤਂ. ਭਿਨ੍ਦੇਯ੍ਯਾਤਿ ਆਸਿਞ੍ਚੇਯ੍ਯ. ਸੁਖਨ੍ਤਿ ਸੁਕਰਂ. ਮੁਦੁਭੂਤਚਿਤ੍ਤਵਵਤ੍ਥਾਨਕਰਣਤ੍ਥਨ੍ਤਿ ਮੁਦੁਭੂਤਂ ਅਤ੍ਤਨੋ ਚਿਤ੍ਤੇ ਵਵਤ੍ਥਾਨਸ੍ਸ ਕਰਣਤ੍ਥਂ.
ਏਵਂ ਵੁਤ੍ਤੇਤਿ ‘‘ਨ ਖ੍ਵਾਹ’’ਨ੍ਤਿ ਏਵਂ ਵੁਤ੍ਤੇ. ਭਗਵਤੋ ਸਾਸਨੇ ਠਿਤੇ ਪਯਿਰੁਪਾਸਿਤ੍ਵਾ ਉਗ੍ਗਹਿਤਂ ਭਗਵਨ੍ਤਂ ਪਯਿਰੂਪਾਸਿਤ੍ਵਾ ਉਗ੍ਗਹਿਤਮੇਵ ਨਾਮਾਤਿ ਆਹ ‘‘ਕਸ੍ਸਪਂ…ਪੇ... ਉਗ੍ਗਹੇਸੁ’’ਨ੍ਤਿ. ਪੁਟ੍ਠਪਞ੍ਹਾਤਿ ਸਮ੍ਮਾਸਮ੍ਬੁਦ੍ਧੇਨ ਪੁਟ੍ਠਪਞ੍ਹਾ. ਯਸ੍ਮਾ ਬੁਦ੍ਧਵਿਸਯੇ ਪੁਟ੍ਠਪਞ੍ਹਾ, ਤਸ੍ਮਾ ਬੁਦ੍ਧਵਿਸਯਾਵ ਹੋਨ੍ਤਿ.
ਪਟਿਸੇਧੇਤ੍ਵਾਤਿ ਵਾਚਾਯ ਅਸਕ੍ਕੁਣੇਯ੍ਯਭਾਵੇਨੇਵ ਪਟਿਸੇਧੇਤ੍ਵਾ. ‘‘ਯਦਾਕਙ੍ਖਸੀ’’ਤਿ ਪਦਸਨ੍ਧਿਵਸੇਨ ਨਿਦ੍ਦੇਸੋਤਿ ਆਹ ‘‘ਯਦਿ ਆਕਙ੍ਖਸੀ’’ਤਿ. ਤੇਨ ਤੁਯ੍ਹਂ ਪੁਚ੍ਛਂ ਤਾਵ ਸੁਤ੍ਵਾ ਵਿਸ੍ਸਜ੍ਜੇਸ੍ਸਨ੍ਤਿ ਦਸ੍ਸੇਤਿ. ਤੇਨਾਹ ‘‘ਨ ਮੇ’’ਤਿਆਦਿ. ਦੁਤਿਯਵਿਕਪ੍ਪੇ ਦ-ਕਾਰੋ ਪਦਸਨ੍ਧਿਕਰੋਤਿ ਆਹ ‘‘ਯਂ ਆਕਙ੍ਖਸੀ’’ਤਿ. ‘‘ਪੁਚ੍ਛ, ਆਵੁਸੋ, ਸੁਤ੍ਵਾ ਜਾਨਿਸ੍ਸਾਮੀ’’ਤਿ ਅਵਤ੍ਵਾ ਸਬ੍ਬਞ੍ਞੁਬੁਦ੍ਧਸ੍ਸ ਅਨਿਯਮੇਤ੍ਵਾ ਵਚਨਂ ਸਬ੍ਬਵਿਸਯਂ ਹੋਤੀਤਿ ਆਹ ‘‘ਸਬ੍ਬਂ ਤੇ’’ਤਿਆਦਿ.
ਕਿਂ ਸੂਤਿ ਏਤ੍ਥ ਕਿਨ੍ਤਿ ਪੁਚ੍ਛਾਯਂ, ਸੂਤਿ ਸਂਸਯੇ, ਕਿਂ ਨੂਤਿ ਅਤ੍ਥੋ? ਇਧਾਤਿ ਇਮਸ੍ਮਿਂ ਲੋਕੇ. ਤਸ੍ਮਾ ਵਿਤ੍ਤਨ੍ਤਿ ਯਸ੍ਮਾ ਵਿਤ੍ਤਿਕਰਣਤੋ ਵਿਤ੍ਤਂ. ਸੁਕਤਨ੍ਤਿ ਸੁਟ੍ਠੁ ਸਕ੍ਕਚ੍ਚਂ ਕਤਂ. ਸੁਖਨ੍ਤਿ ਇਟ੍ਠਫਲਂ. ਤਤ੍ਥ ਯਂ ਪਧਾਨਂ, ਤਂ ਦਸ੍ਸੇਤੁਂ ‘‘ਕਾਯਿਕਚੇਤਸਿਕਂ ਸਾਤ’’ਨ੍ਤਿਆਦਿ ਵੁਤ੍ਤਂ. ਨਿਸ੍ਸਨ੍ਦਫਲਞ੍ਹਿ ਤਗ੍ਗਹਣੇਨ ਗਹਿਤਮੇਵ ਹੋਤਿ. ਅਪ੍ਪੇਤੀਤਿ ਪਾਪੇਤਿ. ਅਤਿਸਯਤ੍ਥਜੋਤਨੋ ਤਰ-ਸਦ੍ਦੋਤਿ ਆਹ ‘‘ਅਤਿਸਯੇਨ ਸਾਦੂ’’ਤਿ. ਰਸਸਞ੍ਞਿਤਾਯ ਇਟ੍ਠਾਨਂ ਰਾਗਾਦਿਧਮ੍ਮਾਨਂ. ਕੇਨ ਪਕਾਰੇਨਾਤਿ ਕਥਂ-ਸਦ੍ਦਸ੍ਸ ਅਤ੍ਥਮਾਹ. ਕਥਂਜੀਵਿਨ੍ਤਿ ਯਦਿ ਸਮਾਸਪਦਮੇਤਂ, ‘‘ਕਥ’’ਨ੍ਤਿ ਸਾਨੁਨਾਸਿਕਾ ਕਤਾਤਿ ਆਹ ‘‘ਗਾਥਾਬਨ੍ਧਸੁਖਤ੍ਥ’’ਨ੍ਤਿਆਦਿ.
ਸਦ੍ਧੀਧ ਵਿਤ੍ਤਨ੍ਤਿ ਏਕਦੇਸੇਨ ਸਮੁਦਾਯਦਸ੍ਸਨਂ ਸਮੁਦ੍ਦਪਬ੍ਬਤਨਿਦਸ੍ਸਨਂ ਵਿਯ. ਇਤਿ-ਸਦ੍ਦੋ ਆਦਿਅਤ੍ਥੋ ਦਟ੍ਠਬ੍ਬੋ. ‘‘ਵਿਤ੍ਤਿਕਰਣਤੋ ਵਿਤ੍ਤ’’ਨ੍ਤਿ ਵੁਤ੍ਤਮਤ੍ਥਂ ਸਨ੍ਧਾਯ ਹੇਤੂਪਮਾਹਿ ਯੋਜੇਤ੍ਵਾ ਦਸ੍ਸੇਤੁਂ ‘‘ਯਥਾ ਹੀ’’ਤਿਆਦਿ ਵੁਤ੍ਤਂ. ਤੇਨ ਸੁਖਾਵਹਨਤੋ, ਦੁਕ੍ਖਪਟਿਬਾਹਨਤੋ, ਦਾਲਿਦ੍ਦਿਯੂਪਸਮਨਤੋ, ਰਤਨਪਟਿਲਾਭਹੇਤੁਤੋ, ਲੋਕਸਨ੍ਤਤਿਆਵਹਨਤੋ ਚ ਸਦ੍ਧਾ ਵਿਤ੍ਤਂ ਯਥਾ ਤਂ ਹਿਰਞ੍ਞਸੁਵਣ੍ਣਾਦੀਨਿ. ਤੇਨਾਹ ‘‘ਏਵ’’ਨ੍ਤਿਆਦਿ. ਨਨੁ ਚੇਤਨਾ ਸਮ੍ਮਾਦਿਟ੍ਠਿਆਦਯੋ ਚ ਸਾਤਿਸਯਂ ਵਿਪਾਕਸੁਖਂ ਆਵਹਨ੍ਤਿ, ਤਂ ਕਥਂ ਸਦ੍ਧਾ ਆਵਹਤੀਤਿ? ਸਦ੍ਧਾਧੁਰਭਾਵਸਭਾਵਤੋ. ਤੇਨਾਹ ‘‘ਸਦ੍ਧਾਧੁਰੇਨ ਪਟਿਪਨ੍ਨਾਨ’’ਨ੍ਤਿ. ਤਸ੍ਸ ਚ ਸੇਸਪਦੇਸੁਪਿ ਯੋਜੇਤਬ੍ਬਂ.
ਇਦਾਨਿ ਯਂ ਹਿਰਞ੍ਞਸੁਵਣ੍ਣਾਦਿ ਸਦ੍ਧਾਵਿਤ੍ਤਸ੍ਸ ਓਪਮ੍ਮਂ, ਤਂ ਹੀਨਂ, ਸਦ੍ਧਾਵਿਤ੍ਤਮੇਵ ਉਤ੍ਤਮਨ੍ਤਿ ਪਾਲ਼ਿਯਂ ਸੇਟ੍ਠਗ੍ਗਹਣਂ ਕਤਨ੍ਤਿ ਦਸ੍ਸੇਤੁਂ ‘‘ਯਸ੍ਮਾ ਪਨਾ’’ਤਿਆਦਿ ਵੁਤ੍ਤਂ. ਪਰਲੋਕਂ ਗਤਂ ਅਨੁਗਚ੍ਛਤੀਤਿ ਅਨੁਗਾਮਿਕਂ. ਅਞ੍ਞੇਹਿ ਨ ਸਾਧਾਰਣਨ੍ਤਿ ਅਨਞ੍ਞਸਾਧਾਰਣਂ. ਸਬ੍ਬਸਮ੍ਪਤ੍ਤਿਹੇਤੂਤਿ ਸਬ੍ਬਾਸਂ ਸੀਲਸਮ੍ਪਦਾਦੀਨਂ ਲੋਕਿਯਲੋਕੁਤ੍ਤਰਾਨਂ ਸਮ੍ਪਤ੍ਤੀਨਂ ਹੇਤੁ. ਅਨਤ੍ਥਾਯ ਹੋਤਿ ਅਨੁਪਾਯਪਟਿਪਤ੍ਤਿਤੋ. ਤਸ੍ਮਾ ਅਨੁਗਾਮਿਕਤ੍ਤਾ. ਅਨਞ੍ਞਸਾਧਾਰਣਤ੍ਤਾ ਸਬ੍ਬਸਮ੍ਪਤ੍ਤਿਹੇਤੁਭਾਵਤੋ ਹਿਰਞ੍ਞਾਦਿਵਿਤ੍ਤਨਿਦਾਨਤ੍ਤਾ ਚ ਸਦ੍ਧਾਵਿਤ੍ਤਮੇਵ ਸੇਟ੍ਠਂ. ਉਕ੍ਕਟ੍ਠਪਰਿਚ੍ਛੇਦਦੇਸਨਾ ਯਥਾ ‘‘ਸਤ੍ਥਾ ਦੇਵਮਨੁਸ੍ਸਾਨ’’ਨ੍ਤਿ.
‘‘ਦਸਕੁਸਲਧਮ੍ਮੋ’’ਤਿ ਇਮਿਨਾ ਏਕਚ੍ਚਾਨਂਯੇਵ ਦਾਨਾਦਿਧਮ੍ਮਾਨਂ ਸਙ੍ਗਹੋ, ਨ ਸਬ੍ਬੇਸਨ੍ਤਿ ਅਸਙ੍ਗਹਿਤਸਙ੍ਗਣ੍ਹਨਤ੍ਥਂ ‘‘ਦਾਨਸੀਲਭਾਵਨਾਧਮ੍ਮੋ ਵਾ’’ਤਿ ਵੁਤ੍ਤਂ. ‘‘ਸੁਖ’’ਨ੍ਤਿ ਤਿਵਿਧਸ੍ਸਪਿ ਸੁਖਸ੍ਸ ਸਾਧਾਰਣਗ੍ਗਹਣਮੇਤਨ੍ਤਿ ਤਂ ਸਵਿਸੇਸਲਦ੍ਧਂ ਪੁਗ੍ਗਲਵਸੇਨ ਦਸ੍ਸੇਨ੍ਤੋ ‘‘ਸੋਣਸੇਟ੍ਠਿ…ਪੇ… ਆਵਹਤੀ’’ਤਿ ਆਹ. ਯੋ ਸੋ ਪਦੁਮਵਤਿਯਾ ਦੇਵਿਯਾ ਪੁਤ੍ਤੋ ਮਹਾਪਦੁਮੋ ਨਾਮ ਰਾਜਾ ਦਿਬ੍ਬਸੁਖਸਦਿਸਂ ਰਜ੍ਜਸੁਖਮਨੁਭਵਿਤ੍ਵਾ ਪਚ੍ਛਾ ਪਚ੍ਚੇਕਬੁਦ੍ਧੋ ਹੁਤ੍ਵਾ ਨਿਬ੍ਬਾਨਸੁਖਮਨੁਭਵਿ, ਤਂ ਨਿਦਸ੍ਸਨਭਾਵੇਨ ਗਹੇਤ੍ਵਾ ਆਹ ‘‘ਮਹਾਪਦੁਮਾਦੀਨਂ ਵਿਯ ਨਿਬ੍ਬਾਨਸੁਖਞ੍ਚ ਆਵਹਤੀ’’ਤਿ.
ਅਤ੍ਥੁਦ੍ਧਾਰਨਯੇਨ ਸਚ੍ਚਸਦ੍ਦਂ ਸਂਵਣ੍ਣੇਨ੍ਤੋ ‘‘ਅਨੇਕੇਸੁ ਅਤ੍ਥੇਸੁ ਦਿਸ੍ਸਤੀ’’ਤਿ ਆਹ. ਵਾਚਾਸਚ੍ਚੇ ਦਿਸ੍ਸਤਿ ਸਚ੍ਚਸਦ੍ਦੋ ‘‘ਭਣੇ’’ਤਿ ਵੁਤ੍ਤਤ੍ਤਾਤਿ ਅਧਿਪ੍ਪਾਯੋ. ਵਿਰਤਿਸਚ੍ਚੇ ਦਿਸ੍ਸਤਿ. ਵੇਰਮਣੀਸੁ ਹਿ ਪਤਿਟ੍ਠਿਤਾ ਸਮਣਬ੍ਰਾਹ੍ਮਣਾ ‘‘ਸਚ੍ਚੇ ਠਿਤਾ’’ਤਿ ਵੁਚ੍ਚਨ੍ਤਿ. ਅਤ੍ਤਾਕਾਰਮ੍ਪਿ ਵਤ੍ਥੁਂ ਇਦਮੇਵ ਸਚ੍ਚਂ ਮੋਘਮਞ੍ਞਨ੍ਤਿ ਪਵਤ੍ਤਿਯਾਕਾਰਂ ਉਪਾਦਾਯ ਦਿਟ੍ਠਿ ਏਵ ਸਚ੍ਚਨ੍ਤਿ ਦਿਟ੍ਠਿਸਚ੍ਚਂ, ਤਸ੍ਮਿਂ ਦਿਟ੍ਠਿਸਚ੍ਚੇ ਦਿਸ੍ਸਤੀਤਿ ਯੋਜਨਾ. ਬ੍ਰਾਹ੍ਮਣਸਚ੍ਚਾਨੀਤਿ ਪਰਮਤ੍ਥਬ੍ਰਹ੍ਮਾਨਂ ਸਚ੍ਚਾਨਿ, ਯਾਨਿ ‘‘ਸਬ੍ਬੇ ਪਾਣਾ ਅਵਜ੍ਝਾ, ਸਬ੍ਬੇ ਕਾਮਾ ਅਨਿਚ੍ਚਾ, ਸਬ੍ਬੇ ਭਵਾ ਅਨਿਚ੍ਚਾ, ਨਾਹਂ ਕ੍ਵਚਨਿ ਕਸ੍ਸਚਿ ਕਿਞ੍ਚਨਤਸ੍ਮਿ’’ਨ੍ਤਿਆਦਿਨਾ (ਅ. ਨਿ. ੪.੧੮੫) ਚਤੁਕ੍ਕਨਿਪਾਤੇ ਆਗਤਾਨਿ. ਪਰਮਤ੍ਥਭੂਤਂ ਸਚ੍ਚਂ ਨਿਬ੍ਬਾਨਂ. ਅਬ੍ਭਨ੍ਤਰਂ ਕਤ੍ਵਾਤਿ ਅਨ੍ਤੋਗਧਮੇਵ ਕਤ੍ਵਾ, ਤੇਹਿ ਸਦ੍ਧਿਨ੍ਤਿ ਅਤ੍ਥੋ ਪਰਮਤ੍ਥਸਚ੍ਚਾਨਮ੍ਪਿ ਸਾਦੁਤਰਤ੍ਤਾ. ਯਸ੍ਸਾਨੁਭਾਵੇਨਾਤਿ ਯਸ੍ਸ ਵਾਚਾਸਚ੍ਚਸ੍ਸ ਆਨੁਭਾਵੇਨ.
ਉਦਕਮ੍ਹਿ ਧਾਵਤੀਤਿ ਉਦਕਪਿਟ੍ਠਿਯਂ ਅਭਿਜ੍ਜਮਾਨਾਯਂ ਪਥਵਿਯਾ ਵਿਯ ਧਾਵਤਿ ਗਚ੍ਛਤਿ ਮਹਾਕਪ੍ਪਿਨਰਾਜਾ ਵਿਯ. ਵਿਸਮ੍ਪਿ ਸਚ੍ਚੇਨ ਹਨਨ੍ਤਿ ਪਣ੍ਡਿਤਾਤਿ ਕਣ੍ਹਦੀਪਾਯਨਾਦਯੋ ਵਿਯ. ਸਚ੍ਚੇਨਾਤਿ ਮਚ੍ਛਜਾਤਕੇ ਬੋਧਿਸਤ੍ਤਸ੍ਸ ਵਿਯ ਸਚ੍ਚੇਨ ਦੇਵੋ ਥਨਯਂ ਪਵਸ੍ਸਤਿ. ਸਚ੍ਚੇ ਠਿਤਾਤਿ ਵਿਰਤਿਸਚ੍ਚੇ ਵਾਚਾਸਚ੍ਚੇ ਚ ਠਿਤਾ ਤਯੋਪਿ ਬੋਧਿਸਤ੍ਤਾ. ਨਿਬ੍ਬੁਤਿਨ੍ਤਿ ਨਿਬ੍ਬਾਨਂ ਪਤ੍ਥਯਨ੍ਤਿ. ਸਾਦੁਤਰਨ੍ਤਿ ਸਾਤਤਰਂ ਇਟ੍ਠਤਰਵਿਪਾਕਦਾਨਤੋ.
ਰਸਾਨਨ੍ਤਿ ਨਿਦ੍ਧਾਰਣਤ੍ਥੇ ਸਾਮਿਵਚਨਂ. ਨਿਦ੍ਧਾਰਣਞ੍ਚ ਕੋਚਿ ਕੁਤੋਚਿ ਕੇਨਚਿ ਇਮਨ੍ਤਿ ਕਸ੍ਸਚਿ ਵਚਨਂ ਨ ਸਾਧੇਤੀਤਿ ਦਸ੍ਸੇਨ੍ਤੋ ‘‘ਯੇ ਇਮੇ’’ਤਿਆਦਿਮਾਹ. ਤੇਨ ਹਿ ਨਿਬ੍ਬਾਨਂ ਰਸਸਮੁਦਾਯਤੋ ਸਾਦੁਤਰਤਾਵਿਸੇਸੇਨ ਨਿਦ੍ਧਾਰੀਯਤਿ. ਤਤ੍ਥ ਯੇ ਇਮੇ ਵੁਚ੍ਚਨ੍ਤੀਤਿ ਯੋਜਨਾ. ਸਾਯਨੀਯਧਮ੍ਮਾਤਿ ਜਿਵ੍ਹਾਯ ਸਾਯਿਤਬ੍ਬਾ ਧਮ੍ਮਾ. ਰਸਾਯਤਨਂ ਰਸੋਤਿ ਆਹ ‘‘ਮੂਲਰਸੋ ਖਨ੍ਧਰਸੋ’’ਤਿਆਦਿ. ਫਲਰਸਨ੍ਤਿ ਫਲਸ੍ਸ ਰਸਂ, ਫਲਂ ਪੀਲ਼ੇਤ੍ਵਾ ਤਾਪੇਤ੍ਵਾ ਗਹੇਤਬ੍ਬਰਸਨ੍ਤਿ ਅਤ੍ਥੋ. ਅਰਸਰੂਪੋਤਿ ਆਚਾਰਰਹਿਤਸਭਾਵੋ. ਰੂਪਸ੍ਸ ਅਸ੍ਸਾਦਨਵਸੇਨ ਉਪ੍ਪਜ੍ਜਨਕਸੁਖਧਮ੍ਮਾ ਰੂਪਰਸਾ. ਏਸ ਨਯੋ ਸਦ੍ਦਰਸਾਦੀਸੁ. ਸਦ੍ਦਰਸੋਤਿ ਬ੍ਯਞ੍ਜਨਸਮ੍ਭੂਤੋ ਰਸੋ. ਵਿਮੁਤ੍ਤਿਰਸੋਤਿ ਵਿਮੁਤ੍ਤਿਸਮ੍ਪਤ੍ਤਿਕੋ ਰਸੋ. ਅਤ੍ਥਰਸੋਤਿ ਅਤ੍ਥਸ੍ਸ ਪਟਿਵਿਜ੍ਝਨਵਸੇਨ ਉਪ੍ਪਜ੍ਜਨਕਸੁਖਂ ਅਤ੍ਥਰਸੋ, ਤਥਾ ਧਮ੍ਮਰਸੋ ਵੇਦਿਤਬ੍ਬੋ. ਰੂਪਾਚਾਰਾਤਿਆਦੀਸੁ ਰਸਗ੍ਗਹਣੇਨ ਫਲਰਸਂ ਵਦਤਿ. ਸੋ ਹਿ ਫਲਸ੍ਸ ਰੂਪੋ ਚ, ਰਸਿਤਬ੍ਬਤੋ ਆਸਾਦੇਤਬ੍ਬਤੋ ਰਸੋ ਚਾਤਿ ‘‘ਰੂਪਰਸੋ’’ਤਿ ਵੁਚ੍ਚਤਿ. ਆਚਾਰੋ ਪਨ ਸਾਮਗ੍ਗੀਰਸਹੇਤੁਤਾਯ ‘‘ਰਸੋ’’ਤਿ ਵੁਤ੍ਤੋ. ਸਚ੍ਚਂ ਹਵੇਤਿ ਏਤ੍ਥ ਹਵੇਤਿ ਏਕਂਸਤ੍ਥੇ ਨਿਪਾਤੋ, ਏਕਂਸਤ੍ਥੋ ਚ ਅਵਧਾਰਣਮੇਵਾਤਿ ਆਹ ‘‘ਸਚ੍ਚਮੇਵ ਸਾਦੁਤਰ’’ਨ੍ਤਿਆਦਿ. ਸਰੀਰਮੁਪਬ੍ਰੂਹੇਨ੍ਤਿ, ਨ ਚਿਤ੍ਤਂ. ਨਨੁ ਚ ਸੁਖੁਪ੍ਪਤ੍ਤਿਪਯੋਜਨਤ੍ਤਾ ਚਿਤ੍ਤਮ੍ਪਿ ਉਪਬ੍ਰੂਹੇਨ੍ਤੀਤਿ? ਨ, ਸੁਖਸ੍ਸ ਸਰੀਰਬ੍ਰੂਹਨਂ ਪਟਿਚ੍ਚ ਉਪ੍ਪਨ੍ਨਤ੍ਤਾ. ਵਿਰਤਿਸਚ੍ਚਵਾਚਾਤਿ ਸਚ੍ਚਵਿਸੇਸੇਨ ਸਮ੍ਪਜ੍ਜਨਂ ਵਦਤਿ. ਚਿਤ੍ਤਮੁਪਬ੍ਰੂਹੇਤਿ ਪਦਾਲਿਕਾਯ ਵਿਰਤਿਵਾਚਾਯ ਸਚ੍ਚਰਸੇ ਸਤਿ ਸਮਥਵਿਪਸ੍ਸਨਾਦੀਹਿ ਚਿਤ੍ਤਪਰਿਬ੍ਰੂਹਨਸ੍ਸ ਸਮ੍ਭਵਤੋ ਮਗ੍ਗਫਲਾਨਿਸਂਸਂ ਗਣ੍ਹਾਤਿ. ਅਸਂਕਿਲੇਸਿਕਞ੍ਚ ਸੁਖਮਾਵਹਤਿ ਵਿਵਟ੍ਟਸਨ੍ਨਿਸ੍ਸਿਤਤ੍ਤਾ. ਵਿਮੁਤ੍ਤਿਰਸੋਤਿ ਫਲਸੁਖਂ ਵਦਤਿ ਨਿਬ੍ਬਾਨਸੁਖਮ੍ਪਿ ਵਾ. ਪਰਮਤ੍ਥਸਚ੍ਚਰਸੋ ਨਾਮ ਨਿਬ੍ਬਾਨਰਸੋ. ਤਥਾ ਹਿ ਤਂ ‘‘ਅਚ੍ਚੁਤਿਰਸਂ ਅਸ੍ਸਾਸਕਰਣਰਸ’’ਨ੍ਤਿਪਿ ਵੁਚ੍ਚਤਿ. ਤੇਨ ਪਰਿਭਾਵਿਤਤ੍ਤਾਤਿ ਵਿਮੁਤ੍ਤਿਰਸਸ੍ਸ ਸਾਦੁਤਰਭਾਵਦਸ੍ਸਨਤ੍ਥਂ. ਏਵਂ ਸਨ੍ਤੇਪਿ ‘‘ਵਿਮੁਤ੍ਤਿਰਸਪਰਿਭਾਵਿਤਤ੍ਤਾ’’ਤਿ ਏਤੇਨ ਕਾਮਂ ਵਿਮੁਤ੍ਤਿਰਸੋ ਵਾ ਪਰਮਤ੍ਥਸਚ੍ਚਰਸੋ ਵਾ ਸਾਦੁਤਰਰਸਾਤਿ ਦਸ੍ਸੇਤਿ. ਤਦਧਿਗਮੂਪਾਯਭੂਤਨ੍ਤਿ ਤਸ੍ਸ ਪਰਮਤ੍ਥਸਚ੍ਚਸ੍ਸ ਅਧਿਗਮੂਪਾਯਭੂਤਂ. ਅਤ੍ਥਞ੍ਚ ਧਮ੍ਮਞ੍ਚਾਤਿ ਫਲਞ੍ਚ ਕਾਰਣਞ੍ਚ ਨਿਸ੍ਸਾਯ ਪਵਤ੍ਤਿਤੋ ਅਤ੍ਥਰਸਾ ਧਮ੍ਮਰਸਾ ਚ ਸਾਦੂ, ਤਤੋਪਿ ਪਰਮਤ੍ਥਸਚ੍ਚਮੇਵ ਸਾਦੁਰਸਨ੍ਤਿ ਅਧਿਪ੍ਪਾਯੋ.
ਲੋਕੁਤ੍ਤਰਂ ਲੋਕਿਯਞ੍ਚ ਅਤ੍ਥਂ ਅਜਾਨਨ੍ਤੋ ਅਨ੍ਧੋ, ਲੋਕਿਯਤ੍ਥਮੇਵ ਜਾਨਨ੍ਤੋ ਏਕਚਕ੍ਖੁ, ਉਭਯਂ ਜਾਨਨ੍ਤੋ ਦ੍ਵਿਚਕ੍ਖੁ. ਪਰਹਿਤਂ ਅਤ੍ਤਹਿਤਞ੍ਚ ਅਜਾਨਨ੍ਤੋ ਅਨ੍ਧੋ, ਅਤ੍ਤਹਿਤਮੇਵ ਜਾਨਨ੍ਤੋ ਏਕਚਕ੍ਖੁ, ਉਭਯਤ੍ਥਂ ਜਾਨਨ੍ਤੋ ਦ੍ਵਿਚਕ੍ਖੁ. ਸੋ ਦ੍ਵਿਚਕ੍ਖੁਪੁਗ੍ਗਲੋ ਪਞ੍ਞਾਜੀਵੀ. ਤਂ ਪਨ ਗਹਟ੍ਠਪਬ੍ਬਜਿਤਵਸੇਨ ਵਿਭਜਿਤ੍ਵਾ ਦਸ੍ਸੇਤੁਂ ‘‘ਗਹਟ੍ਠੋ ਵਾ’’ਤਿਆਦਿ ਵੁਤ੍ਤਂ. ਗਹਟ੍ਠਪਟਿਪਦਂ ਆਰਾਧੇਤ੍ਵਾ ਚਾਤਿ ਯੋਜਨਾ. ਆਰਾਧੇਤ੍ਵਾਤਿ ਚ ਸਾਧੇਤ੍ਵਾਤਿ ਅਤ੍ਥੋ.
ਪੁਰਿਮਨਯੇਨੇਵਾਤਿ ਕਸ੍ਸਪਸਮ੍ਮਾਸਮ੍ਬੁਦ੍ਧਵਿਸ੍ਸਜ੍ਜਿਤਨਯੇਨੇਵ. ਕਿਞ੍ਚਾਪੀਤਿ ਅਨੁਜਾਨਨਸਨ੍ਦਸ੍ਸਨਤ੍ਥੇ ਨਿਪਾਤੋ. ਕਿਂ ਅਨੁਜਾਨਾਤੀਤਿ? ਗਾਥਾਯ ਚਤੂਹਿ ਪਦੇਹਿ ਵੁਤ੍ਤੇਸੁ ਅਤ੍ਥੇਸੁ ਏਕਸ੍ਸ ਅਤ੍ਥਸ੍ਸ ਸਿਦ੍ਧਿਯਂ ਇਤਰੇਸਮ੍ਪਿ ਸਿਦ੍ਧਿਂ ਅਨੁਜਾਨਾਤਿ. ਤੇਨਾਹ ‘‘ਯੋ ਚਤੁਬ੍ਬਿਧਮੋਘਂ…ਪੇ… ਪਰਿਸੁਜ੍ਝਤੀ’’ਤਿ. ਕਿਂ ਸਨ੍ਦਸ੍ਸੇਤੀਤਿ? ਯੇਸਂ ਪਾਪਧਮ੍ਮਾਨਂ ਬਲਵਭਾਵੇਨ ਓਘਤਰਣਾਦਿ ਨ ਸਿਜ੍ਝਤਿ, ਤੇਸਂ ਪਟਿਪਕ੍ਖਾਨਂ ਨਿਸ੍ਸਨ੍ਦੇਹਵਸੇਨ ਸਨ੍ਦਸ੍ਸਨਂ. ਤੇਨਾਹ ‘‘ਏਵਂ ਸਨ੍ਤੇਪੀ’’ਤਿਆਦਿ. ਓਘਤਰਣਨ੍ਤਿ ਓਘਤਰਣਪਟਿਪਤ੍ਤਿਂ. ਅਸਦ੍ਦਹਨ੍ਤੋਤਿ ਏਵਂ ਪਟਿਪਜ੍ਜਨ੍ਤੋ ਇਮਾਯ ਪਟਿਪਤ੍ਤਿਯਾ ਓਘਂ ਤਰਤੀਤਿ ਨ ਸਦ੍ਦਹਨ੍ਤੋ. ਨ ਪਕ੍ਖਨ੍ਦਤੀਤਿ ਪਕ੍ਖਨ੍ਦਨਲਕ੍ਖਣਾਯ ਸਦ੍ਧਾਯ ਨ ਉਗ੍ਘਾਟੀਯਤੀਤਿ ਨ ਓਤਰਤਿ. ਚਿਤ੍ਤਵੋਸ੍ਸਗ੍ਗੇਨਾਤਿ ਯਥਾਕਾਮਾਚਾਰਵਸੇਨ ਚਿਤ੍ਤਸ੍ਸ ਵੋਸ੍ਸਜ੍ਜਨੇਨ. ਪਮਤ੍ਤੋ ਪਮਾਦਂ ਆਪਨ੍ਨੋ. ਤਤ੍ਥੇਵਾਤਿ ਕਾਮੇਸੁ ਏਵ. ਵਿਸਤ੍ਤਤ੍ਤਾ ਲਗ੍ਗਤ੍ਤਾ. ਵੋਕਿਣ੍ਣੋਤਿ ਵਿਸੇਵਿਤੋ. ਤਸ੍ਮਾਤਿ ਵੁਤ੍ਤਸ੍ਸ ਚਤੁਬ੍ਬਿਧਸ੍ਸਪਿ ਅਤ੍ਥਸ੍ਸ ਹੇਤੁਭਾਵੇਨ ਪਚ੍ਚਾਮਸਨਂ. ਤਪ੍ਪਟਿਪਕ੍ਖਨ੍ਤਿ ਅਸ੍ਸਦ੍ਧਿਯਾਦੀਨਂ ਪਟਿਪਕ੍ਖਂ ਸਦ੍ਧਾਦੀਨਂ ਓਕਾਸਤ੍ਤਾ.
ਏਤਾਯਾਤਿ ਗਾਥਾਯਂ ਇਮਿਨਾ ਪਦੇਨਾਤਿ ਸਮ੍ਬਨ੍ਧੋ. ਸਪ੍ਪੁਰਿਸਸਂਸੇਵੋ ਸਦ੍ਧਮ੍ਮਸ੍ਸਵਨਂ ਯੋਨਿਸੋਮਨਸਿਕਾਰੋ ਧਮ੍ਮਾਨੁਧਮ੍ਮਪਟਿਪਤ੍ਤੀਤਿ ਇਮੇਸਂ ਸੋਤਾਪਤ੍ਤਿਮਗ੍ਗਾਧਿਗਮਸ੍ਸ ਅਙ੍ਗਾਨਂ ਆਸਨ੍ਨਕਾਰਣਂ ਸਦ੍ਧਿਨ੍ਦ੍ਰਿਯਨ੍ਤਿ ਆਹ ‘‘ਸੋਤਾਪਤ੍ਤਿਯਙ੍ਗਪਦਟ੍ਠਾਨਂ ਸਦ੍ਧਿਨ੍ਦ੍ਰਿਯ’’ਨ੍ਤਿ. ਵੁਤ੍ਤਞ੍ਹੇਤਂ – ‘‘ਸਦ੍ਧਾਜਾਤੋ ਉਪਸਙ੍ਕਮਤਿ, ਉਪਸਙ੍ਕਮਨ੍ਤੋ ਪਯਿਰੁਪਾਸਤਿ, ਪਯਿਰੁਪਾਸਨ੍ਤੋ ਸੋਤਂ ਓਦਹਤਿ, ਓਹਿਤਸੋਤੋ ਧਮ੍ਮਂ ਸੁਣਾਤੀ’’ਤਿਆਦਿ (ਮ. ਨਿ. ੨.੧੮੩, ੪੩੨). ਦਿਟ੍ਠੋਘਂ ਤਰਤਿ ਏਤੇਨਾਤਿ ਦਿਟ੍ਠੋਘਤਰਣਂ, ਦਿਟ੍ਠੋਘਸ੍ਸ ਤਰਣਂ. ਕਾਮਞ੍ਚੇਤ੍ਥ ‘‘ਤਰਤਿ ਓਘ’’ਨ੍ਤਿ ਵੁਤ੍ਤਂ, ਵਤ੍ਤਮਾਨਸਮੀਪੇਪਿ ਪਨ ਵਤ੍ਤਮਾਨਂ ਵਿਯ ਵੋਹਰਣਂ ਯੁਤ੍ਤਂ ਦਿਟ੍ਠੋਘਸ੍ਸ ਤਿਣ੍ਣਭਾਵਸ੍ਸ ਏਕਨ੍ਤਿਕਤ੍ਤਾਤਿ ‘‘ਸੋਤਾਪਨ੍ਨਞ੍ਚ ਪਕਾਸੇਤੀ’’ਤਿ ਵੁਤ੍ਤਂ. ਏਸ ਨਯੋ ਸੇਸੇਸੁਪਿ. ਦਿਟ੍ਠਿਵਿਚਿਕਿਚ੍ਛਾਦਿਪਟਿਪਤ੍ਤਨ੍ਤਰਾਯਕਰਾਨਂ ਪਾਪਧਮ੍ਮਾਨਂ ਸਮੁਚ੍ਛਿਨ੍ਨਤ੍ਤਾ ਸੋਤਾਪਨ੍ਨੋ…ਪੇ… ਅਪ੍ਪਮਾਦੇਨ ਸਮਨ੍ਨਾਗਤੋ. ‘‘ਸੋਤਾਪਤ੍ਤਿ…ਪੇ… ਤਰਤੀ’’ਤਿ ਏਤ੍ਤਕੇ ਵੁਤ੍ਤੇ ਸਕਿਦੇਵ ਇਮਸ੍ਸ ਲੋਕਸ੍ਸ ਆਗਮਨਮ੍ਪਿ ਗਹਿਤਂ ਸਿਯਾਤਿ ਤਨ੍ਨਿਵਤ੍ਤਨਤ੍ਥਂ ‘‘ਆਰਾਧੇਤ੍ਵਾ…ਪੇ… ਅਵਸੇਸ’’ਨ੍ਤਿ ਵੁਤ੍ਤਂ. ਨਨੁ ‘‘ਅਵਸੇਸ’’ਨ੍ਤਿ ਵੁਤ੍ਤਤ੍ਤਾ ਸੋਤਾਪਤ੍ਤਿਮਗ੍ਗੇਨ ਅਤਿਣ੍ਣਂ ਅਨਵਸੇਸਂ ਭਵੋਘਵਤ੍ਥੁ ਗਹਿਤਮੇਵ ਸਿਯਾਤਿ? ਨ, ਉਪਰਿ ਦ੍ਵੀਹਿ ਮਗ੍ਗੇਹਿ ਤਰਿਤਬ੍ਬਾਨਂ ਤੇਸਂ ਪਰਤੋ ਦ੍ਵਿਨ੍ਨਂ ਪਹਾਨਵਸੇਨ ਵੁਚ੍ਚਮਾਨਤ੍ਤਾ. ਅਪਵਾਦਵਿਸਯਮ੍ਪਿ ਪਰਿਹਰਤਿ – ‘‘ਏਵਂ ਏਸਾ ਚੋਦਨਾ ਅਤ੍ਤਨੋ ਵਿਸਯੇ ਨ ਪਤਿਟ੍ਠਾਤੀ’’ਤਿ. ਅਨਾਦਿਕਾਲਭਾਵਤ੍ਤਾ ਕਾਮਸਞ੍ਞਾਯ ਕਾਮੋਘਤਰਣਂ ਮਹਤਾ ਏਵ ਵੀਰਿਯੇਨ ਸਾਧੇਤਬ੍ਬਨ੍ਤਿ ਆਹ ‘‘ਵੀਰਿਯੇਨਾ’’ਤਿ. ਤਤਿਯਂ ਮਗ੍ਗਂ ਆਰਾਧੇਤ੍ਵਾ. ਕਾਮੋਘਸ੍ਸ ਵਤ੍ਥੁ ਕਾਮੋਘਵਤ੍ਥੁ, ਕਾਮਗੁਣੇਹਿ ਸਦ੍ਧਿਂ ਸਬ੍ਬੋ ਕਾਮਭਵੋ. ਕਾਮੋਘਸਞ੍ਞਿਤਨ੍ਤਿ ਕਾਮੋਘਸਙ੍ਖਾਤਂ. ਕਾਮਨਟ੍ਠੇਨ ਕਾਮੋ ਚ ਸੋ ਦੁਕ੍ਖੋ ਚਾਤਿ ਕਾਮਦੁਕ੍ਖਂ. ਅਸ੍ਸਾਦਨਟ੍ਠੇਨ ਕਾਮੋ ਏਵ ਸਞ੍ਞਾਤਿ ਕਾਮਸਞ੍ਞਾ, ਸਬ੍ਬਸੋ ਸਮੁਚ੍ਛਿਨ੍ਨਤ੍ਤਾ ਵਿਗਤਾ ਕਾਮਸਞ੍ਞਾ ਏਤਿਸ੍ਸਾਤਿ ਵਿਗਤਕਾਮਸਞ੍ਞਾ. ਸਬ੍ਬੇਸਂ ਰਾਗਾਦਿਮਲਾਨਂ ਮੂਲਭੂਤਤ੍ਤਾ ਸਤ੍ਤਸਨ੍ਤਾਨਸ੍ਸ ਵਿਸੇਸਤੋ ਮਲੀਨਸਭਾਵਾਪਾਦਨਤੋ ਪਰਮਂ ਉਕ੍ਕਂਸਗਤਂ ਮਲਨ੍ਤਿ ਪਰਮਮਲਂ, ਅਵਿਜ੍ਜਾ. ਤੇਨਾਹ ਭਗਵਾ – ‘‘ਅਵਿਜ੍ਜਾਪਰਮਂ ਮਲ’’ਨ੍ਤਿ (ਧ. ਪ. ੨੪੩).
ਪਞ੍ਞਾਪਦਂ ਗਹੇਤ੍ਵਾਤਿ ਯਥਾਵੁਤ੍ਤਂ ਪਞ੍ਞਾਪਦਂ ਹਦਯੇ ਠਪੇਤ੍ਵਾ. ਤਪ੍ਪਸਙ੍ਗੇਨ ਅਤ੍ਤਨੋ ਪਟਿਭਾਨੇਨ ਸਬ੍ਬੇਹਿ ਵਿਯ ਉਗ੍ਗਹਿਤਨਿਯਾਮੇਨ. ਸਬ੍ਬਤ੍ਥੇਵਾਤਿ ਪਞ੍ਚਸੁਪਿ ਠਾਨੇਸੁ. ਅਤ੍ਥਯੁਤ੍ਤਿਪੁਚ੍ਛਾਤਿ ਪਞ੍ਞਾਦਿਅਤ੍ਥਸਮਧਿਗਮਸ੍ਸ ਯੁਤ੍ਤਿਯਾ ਕਾਰਣਸ੍ਸ ਪੁਚ੍ਛਾ. ਤੇਨਾਹ ‘‘ਅਯਂ ਹੀ’’ਤਿਆਦਿ. ਪਞ੍ਞਾਦਿਅਤ੍ਥਂ ਞਤ੍ਵਾਤਿ ਪਞ੍ਞਾਧਨ-ਕਿਤ੍ਤਿ-ਮਿਤ੍ਤ-ਅਭਿਸਮ੍ਪਰਾਯਸਙ੍ਖਾਤਂ ਅਤ੍ਥਂ ਸਰੂਪਤੋ ਸਚ੍ਚਪਟਿਵੇਧਨਿਪ੍ਫਾਦਨੇਨ ਞਾਣੇਨ ਜਾਨਿਤ੍ਵਾ. ਨਨੁ ਏਸ ਲੋਕੁਤ੍ਤਰਂ ਸੋਤਾਪਤ੍ਤਿਮਗ੍ਗਫਲਪਞ੍ਞਂ ਤਦਧਿਗਮੂਪਾਯਂ ਲੋਕਿਯਪਞ੍ਞਞ੍ਚ ਅਭਿਭਵਿਤ੍ਵਾ ਠਿਤੋ, ਸੋ ਕਸ੍ਮਾ ਤਤ੍ਥ ਅਤ੍ਥਯੁਤ੍ਤਿਂ ਪੁਚ੍ਛਤੀਤਿ? ਸਚ੍ਚਮੇਤਂ, ਉਪਰਿ ਪਨ ਸਮਾਧਿਸ੍ਸ ਯੁਤ੍ਤਿਂ ਪੁਚ੍ਛਿਤੁਕਾਮੋ ਪਞ੍ਞਾਯ ਸੇਟ੍ਠਭਾਵਤੋ, ਤਸ੍ਸ ਚ ਏਕਦੇਸੇਨੇਵ ਅਧਿਗਤਤ੍ਤਾ ਤਮੇਵ ਆਦਿਂ ਕਤ੍ਵਾ ਪੁਚ੍ਛਤਿ. ‘‘ਕਾਯ ਯੁਤ੍ਤਿਯਾ’’ਤਿਆਦਿ ਅਤ੍ਥਵਣ੍ਣਨਂ ਅਤਿਦਿਸ੍ਸਤਿ ‘‘ਏਸ ਨਯੋ ਧਨਾਦੀਸੂ’’ਤਿ. ਤਤ੍ਥਾਪਿ ਅਤ੍ਥਯੁਤ੍ਤਿਪੁਚ੍ਛਾਭਾਵੋ ਪਨ ‘‘ਸਬ੍ਬਤ੍ਥੇਵਾ’’ਤਿ ਇਮਿਨਾ ਵਿਭਾਵਿਤੋਤਿ.
ਸਦ੍ਧਾਸੁਸ੍ਸੂਸਾਅਪ੍ਪਮਾਦਉਟ੍ਠਾਨਸਙ੍ਖਾਤੇਹਿ ਚਤੂਹਿ ਕਾਰਣੇਹਿ. ਕਾਯਸੁਚਰਿਤਾਦਿਭੇਦੇਨ ਆਜੀਵਟ੍ਠਮਕਸੀਲਭੂਤੇਨ. ਸਮਥਵਿਪਸ੍ਸਨਾਭੂਤੇਨ ਨਿਪ੍ਪਰਿਯਾਯੇਨ ਬੋਧਿਪਕ੍ਖਿਯੇ ਏਵ ਗਣ੍ਹਨ੍ਤੋ ‘‘ਅਪਰਭਾਗੇ’’ਤਿ ਆਹ. ਪਰਿਯਾਯਬੋਧਿਪਕ੍ਖਿਯਾ ਪਨ ਵਿਸੇਸਤੋ ਵੁਟ੍ਠਾਨਗਾਮਿਨਿਵਿਪਸ੍ਸਨਾਕਾਲੇਪਿ ਲਬ੍ਭਨ੍ਤਿ. ਪੁਬ੍ਬਭਾਗੇਤਿ ਵਾ ਤਰੁਣਵਿਪਸ੍ਸਨਾਕਾਲਂ. ਤਤੋ ਪੁਬ੍ਬਸਾਧਨਞ੍ਚ ਸਨ੍ਧਾਯ ‘‘ਅਪਰਭਾਗੇ’’ਤਿ ਪੁਨਾਹ, ਤਤੋ ਪਰਨ੍ਤਿ ਅਤ੍ਥੋ. ਧਮ੍ਮਨ੍ਤਿ ਪਟਿਪਤ੍ਤਿਧਮ੍ਮਂ. ਨ ਸਦ੍ਧਾਮਤ੍ਤਕੇਨੇਵ ਪਞ੍ਞਂ ਲਭਤੀਤਿ ਯੋਜਨਾ. ਯਦਿ ਏਵਂ ਕਸ੍ਮਾ ‘‘ਸਦ੍ਦਹਾਨੋ’’ਤਿ ਵੁਤ੍ਤਨ੍ਤਿ ਆਹ ‘‘ਯਸ੍ਮਾ ਪਨਾ’’ਤਿਆਦਿ. ਕਿਂ ਵੁਤ੍ਤਂ ਹੋਤੀਤਿਆਦਿਨਾ ਵੁਤ੍ਤਮੇਵ ਅਤ੍ਥਂ ਵਿਵਰਤਿ. ਨ ਕੇਵਲਂ ਸੁਸ੍ਸੂਸਾਮਤ੍ਤੇਨ ਪਞ੍ਞਾਪਟਿਲਾਭੋ, ਅਥ ਖੋ ਅਪ੍ਪਮਾਦੇਨ ਪਞ੍ਞਂ ਲਭਤੀਤਿ ਦਸ੍ਸੇਤੁਂ ਪਾਲ਼ਿਯਂ ‘‘ਅਪ੍ਪਮਤ੍ਤੋ ਵਿਚਕ੍ਖਣੋ’’ਤਿ ਵੁਤ੍ਤਨ੍ਤਿ ਤਦਤ੍ਥਂ ਦਸ੍ਸੇਨ੍ਤੋ ‘‘ਏਵ’’ਨ੍ਤਿਆਦਿਮਾਹ.
ਇਦਾਨਿ ਸਦ੍ਧਾਦੀਨਂ ਪਞ੍ਞਾਪਟਿਲਾਭਸ੍ਸ ਤਂਤਂਵਿਸੇਸਪਚ੍ਚਯਾਨਿ ਨੀਹਰਿਤ੍ਵਾ ਦਸ੍ਸੇਤੁਂ ‘‘ਏਵ’’ਨ੍ਤਿ ਵੁਤ੍ਤਂ. ਸੁਸ੍ਸੂਸਾਯਾਤਿ ਸੋਤੁਕਾਮਤਾਯ. ਸਾ ਅਤ੍ਥਤੋ ਉਪਸਙ੍ਕਮਨਾਦਿ. ਪਞ੍ਞਾਧਿਗਮੂਪਾਯਨ੍ਤਿ ਪਰਿਯਤ੍ਤਿਧਮ੍ਮਮਾਹ. ਤੇਨਾਹ ‘‘ਸੁਣਾਤੀ’’ਤਿ. ਗਹਿਤਂ ਨ ਪਮੁਸ੍ਸਤਿ, ਸਤਿਅਵਿਪ੍ਪਵਾਸਲਕ੍ਖਣੋ ਹਿ ਅਪ੍ਪਮਾਦੋਤਿ. ਨ ਕੇਵਲਂ ਯਾਥਾਵਤੋ ਗਹਣਕੋਸਲ੍ਲਮੇਵ ਵਿਚਕ੍ਖਣਤਾ, ਅਥ ਖੋ ਯਾਥਾਵਤੋ ਪਞ੍ਞਾਸਮ੍ਪਵੇਧਨਞ੍ਚਾਤਿ ਆਹ ‘‘ਵਿਤ੍ਥਾਰਿਕਂ ਕਰੋਤੀ’’ਤਿ. ਇਦਾਨਿ ਪਞ੍ਞਾਪਟਿਲਾਭਹੇਤੁਂ ਮਤ੍ਥਕਂ ਪਾਪੇਤ੍ਵਾ ਦਸ੍ਸੇਤੁਂ ‘‘ਸੁਸ੍ਸੂਸਾਯ ਵਾ’’ਤਿਆਦਿ ਵੁਤ੍ਤਂ. ਅਤ੍ਥਮੁਪਪਰਿਕ੍ਖਤੀਤਿ ਸੁਤਕਤਾਨਂ ਧਮ੍ਮਾਨਂ ਪਾਲ਼ਿਅਤ੍ਥੂਪਪਰਿਕ੍ਖਾਪੁਬ੍ਬਕਂ ਰੂਪਾਰੂਪਵਿਭਾਗਂ ਪਰਮਤ੍ਥਂ ਸਲਕ੍ਖਣਤੋ ਸਾਮਞ੍ਞਲਕ੍ਖਣਤੋ ਚ ਉਪਪਰਿਕ੍ਖਤਿ ਵੀਮਂਸਤਿ. ਅਨੁਪੁਬ੍ਬੇਨਾਤਿ ਏਵਂ ਞਾਤਪਰਿਞ੍ਞਂ ਪਤ੍ਵਾ ਤੀਰਣਪਰਿਞ੍ਞਾਯ ਤਤੋ ਅਨੁਕ੍ਕਮੇਨ ਤੀਰਣਪਰਿਞ੍ਞਂ ਪਹਾਨਪਰਿਞ੍ਞਞ੍ਚ ਮਤ੍ਥਕਂ ਪਾਪੇਨ੍ਤੋ ਮਗ੍ਗਪ੍ਪਟਿਪਾਟਿਯਾ ਪਰਮਤ੍ਥਸਚ੍ਚਭੂਤਂ ਨਿਬ੍ਬਾਨਂ ਸਚ੍ਛਿਕਰੋਤਿ.
ਇਮਾਨਿ ਸਦ੍ਧਾਦੀਨਿ ਚਤ੍ਤਾਰਿ ਕਾਰਣਾਨਿ ਮਤ੍ਥਕਂ ਪਾਪੇਤ੍ਵਾ ਦਸ੍ਸੇਨ੍ਤੋ ਆਹ ‘‘ਦੇਸਕਾਲਾਦੀਨਿ ਅਹਾਪੇਤ੍ਵਾ’’ਤਿ. ਯਸ੍ਮਿਂ ਦੇਸੇ ਯਸ੍ਮਿਂ ਕਾਲੇ ਯੇ ਚ ਸਹਾਯਕੇ ਨਿਸ੍ਸਾਯ ਯਂ ਕਿਚ੍ਚਂ ਤਿਰੇਤਬ੍ਬਂ, ਤਾਨਿ ਦੇਸਕਾਲਾਦੀਨਿ ਅਨਤਿਕ੍ਕਮਿਤ੍ਵਾ ਅਤ੍ਤਨੋ ਅਭਿਵੁਡ੍ਢਿਂ ਇਚ੍ਛਨ੍ਤੇਨ ‘‘ਅਯਂ ਨਾਮ ਦੇਸੋ, ਯਤ੍ਥਾਹਂ ਏਤਰਹਿ ਵਸਾਮਿ, ਅਯਂ ਕਾਲੋ, ਇਮੇ ਮਿਤ੍ਤਾ, ਇਮੇ ਅਮਿਤ੍ਤਾ, ਇਮੇ ਆਯਵਯਾ, ਅਹਞ੍ਚ ਏਦਿਸੋ ਜਾਤਿ-ਕੁਲ-ਪਦੇਸ-ਬਲਭੋਗ-ਪਰਿਵਾਰਾਦੀਹਿ, ਤਂ ਕਿਚ੍ਚਂ ਇਦਾਨਿ ਆਰਦ੍ਧਬ੍ਬਂ, ਇਦਾਨਿ ਨਾਰਦ੍ਧਬ੍ਬ’’ਨ੍ਤਿ ਸਬ੍ਬਂ ਉਪਪਰਿਕ੍ਖਿਤ੍ਵਾ ਪਟਿਪਜ੍ਜਿਤਬ੍ਬਂ. ਏਵਂ ਪਟਿਪਜ੍ਜਨ੍ਤੋ ਹਿ ਲੋਕਿਯਸ੍ਸ ਧਨਸ੍ਸ ਪਟਿਰੂਪਾਧਿਗਮੂਪਾਯਂ ਕਰੋਤਿ ਨਾਮ. ਲੋਕੁਤ੍ਤਰਸ੍ਸ ਪਨ ਸੀਲਵਿਸੋਧਨਾਦਿਵਸੇਨ ਵੇਦਿਤਬ੍ਬਂ. ਵਹਿਤਬ੍ਬਭਾਵੇਨ ਧੁਰੋ ਵਿਯਾਤਿ ਧੁਰੋ, ਭਾਰੋ. ਇਧ ਪਨ ਧੁਰਸਮ੍ਪਗ੍ਗਹੋ ਉਤ੍ਤਰਪਦਲੋਪੇਨ ਧੁਰੋ, ਵੀਰਿਯਂ. ਸੋ ਸਾਤਿਸਯੋ ਏਤਸ੍ਸ ਅਤ੍ਥੀਤਿ ਧੁਰਵਾ. ‘‘ਉਟ੍ਠਾਤਾ’’ਤਿ ਪਦੇਨ ਕਾਯਿਕਵੀਰਿਯਸ੍ਸ ਵਕ੍ਖਮਾਨਤ੍ਤਾ ‘‘ਚੇਤਸਿਕਵੀਰਿਯਵਸੇਨਾ’’ਤਿ ਵਿਸੇਸਿਤਂ. ਅਨਿਕ੍ਖਿਤ੍ਤਧੁਰੋ ਧੋਰਯ੍ਹਭਾਵਤੋ. ਤਿਣਾ ਭਿਯ੍ਯੋ ਨ ਮਞ੍ਞਤੀਤਿ ਤਿਣਂ ਵਿਯ ਪਰਿਭਵਨ੍ਤੋ ਅਤਿਭੁਯ੍ਯ ਵਤ੍ਤਤੀਤਿ ਅਤ੍ਥੋ. ਆਦਿਨਾ ਨਯੇਨਾਤਿ ਏਤ੍ਥ ਆਦਿ-ਸਦ੍ਦੇਨ –
‘‘ਕਰਂ ਪੁਰਿਸਕਿਚ੍ਚਾਨਿ, ਸੋ ਸੁਖਾ ਨ ਵਿਹਾਯਤਿ; (ਦੀ. ਨਿ. ੩.੨੫੩);
‘‘ਨ ਦਿਵਾ ਸੋਪ੍ਪਸੀਲੇਨ, ਰਤ੍ਤਿਮੁਟ੍ਠਾਨਦੇਸ੍ਸਿਨਾ;
ਨਿਚ੍ਚਂ ਮਤ੍ਤੇਨ ਸੋਣ੍ਡੇਨ, ਸਕ੍ਕਾ ਆਵਸਿਤੁਂ ਘਰ’’ਨ੍ਤਿ ਚ. (ਦੀ. ਨਿ. ੩.੨੫੩); –
ਏਵਮਾਦੀਨਂ ਸਙ੍ਗਹੋ. ਅਸਿਥਿਲਪਰਕ੍ਕਮੋ ਅਨਲਸਭਾਵਤੋ. ਏਕਮੂਸਿਕਾਯਾਤਿ ਏਕਾਯ ਮਤਮੂਸਿਕਾਯ. ਨਚਿਰਸ੍ਸੇਵਾਤਿ ਚਤੁਮਾਸਬ੍ਭਨ੍ਤਰੇਯੇਵ. ਚਤੁਸਤਸਹਸ੍ਸਸਙ੍ਖਂ ਚੂਲ਼ਨ੍ਤੇਵਾਸੀ ਵਿਯਾਤਿ ਕਾਕਣਿਕਡ੍ਢਕਹਾਪਣ-ਸੋਲ਼ਸ-ਕਹਾਪਣ-ਚਤੁਵੀਸਤਿ-ਕਹਾਪਣ-ਸਤਹਰਣਕ੍ਕਮੇਨ ਦ੍ਵੇ ਸਤਸਹਸ੍ਸਾਨਿ, ਚੂਲ਼ਕਮਹਾਸੇਟ੍ਠਿਨੋ ਧੀਤੁਲਾਭਵਸੇਨ ਦ੍ਵੇ ਸਤਸਹਸ੍ਸਾਨੀਤਿ ਏਵਂ ਚਤੁਸਤਸਹਸ੍ਸਸਙ੍ਖਂ ਧਨਂ ਏਕਮੂਲੇਨ ਯਥਾ ਚੂਲ਼ਨ੍ਤੇਵਾਸੀ ਵਿਨ੍ਦਿ, ਏਵਂ ਅਞ੍ਞੋਪਿ ਪਤਿਰੂਪਕਾਰੀ ਧੁਰਵਾ ਉਟ੍ਠਾਤਾ ਵਿਨ੍ਦਤੇ ਧਨਂ. ਅਯਞ੍ਚ ਅਤ੍ਥੋ ਚੂਲ਼ਕਸੇਟ੍ਠਿਜਾਤਕੇਨ ਦੀਪੇਤਬ੍ਬੋ. ਵੁਤ੍ਤਞ੍ਹੇਤਂ –
‘‘ਅਪ੍ਪਕੇਨਪਿ ਮੇਧਾਵੀ, ਪਾਭਤੇਨ ਵਿਚਕ੍ਖਣੋ;
ਸਮੁਟ੍ਠਾਪੇਤਿ ਅਤ੍ਤਾਨਂ, ਅਣੁਂ ਅਗ੍ਗਿਂਵ ਸਨ੍ਧਮ’’ਨ੍ਤਿ. (ਜਾ. ੧.੧.੪);
ਵਤ੍ਤਂ ਕਤ੍ਵਾਤਿ ਅਧਿਟ੍ਠਾਨਵਤ੍ਤਂ ਕਤ੍ਵਾ. ‘‘ਸਚ੍ਚਵਾਦੀ ਭੂਤਵਾਦੀ’’ਤਿ ਕਿਤ੍ਤਿਂ ਪਪ੍ਪੋਤੀਤਿ ਯੋਜਨਾ. ਇਚ੍ਛਿਤਪਤ੍ਥਿਤਨ੍ਤਿ ਯੇਹਿ ਮਿਤ੍ਤਂ ਇਚ੍ਛਤਿ, ਤੇਹਿ ਇਤਰਂ ਪਤ੍ਥਿਤਂ. ਮਿਤ੍ਤਾਨਿ ਗਨ੍ਥਤੀਤਿ ਮਿਤ੍ਤਭਾਵਂ ਘਟੇਤਿ. ਦਾਨਸ੍ਸ ਪਿਯਭਾਵਕਰਣਤੋ ‘‘ਦਦਂ ਪਿਯੋ ਹੋਤੀ’’ਤਿ ਵੁਤ੍ਤਂ. ਯਂ ਦਾਨਂ ਏਕਨ੍ਤਤੋ ਮਿਤ੍ਤਭਾਵਾਵਹਂ, ਤਂ ਦਸ੍ਸੇਨ੍ਤੋ ‘‘ਦੁਦ੍ਦਦਂ ਵਾ ਦਦਂ ਤਂ ਗਨ੍ਥਤੀ’’ਤਿ ਆਹ. ਦਦਨ੍ਤਿ ਚ ਲਕ੍ਖਣਵਚਨਮੇਤਨ੍ਤਿ ਆਹ ‘‘ਦਾਨਮੁਖੇਨ ਵਾ’’ਤਿਆਦਿ.
ਆਲ਼ਵਕਸ੍ਸ ਅਜ੍ਝਾਸਯਾਨੁਰੂਪਂ ਗਹਟ੍ਠਵਸੇਨ ਵਿਸ੍ਸਜ੍ਜੇਨ੍ਤੋ. ਸਦ੍ਧਾ ਏਤਸ੍ਸ ਅਤ੍ਥੀਤਿ ਸਦ੍ਧੋ, ਤਸ੍ਸ ਸਦ੍ਧਸ੍ਸ. ਘਰਮੇਸਿਨੋਤਿ ਘਰਾਵਾਸਸਙ੍ਖਾਤਂ ਘਰਂ ਏਸਨ੍ਤਸ੍ਸ. ਘਰਾਵਾਸਸਨ੍ਨਿਸ੍ਸਿਤਤ੍ਤਾ ‘‘ਘਰ’’ਨ੍ਤਿ ਕਾਮਗੁਣਾ ਵੁਚ੍ਚਨ੍ਤੀਤਿ ਆਹ ‘‘ਪਞ੍ਚ ਕਾਮਗੁਣੇ’’ਤਿ. ‘‘ਏਤੇ ਚਤੁਰੋ ਧਮ੍ਮਾ’’ਤਿਆਦਿਨਾ ਗਹਿਤਾ ਅਨਨ੍ਤਰਗਾਥਾਯ ਵੁਤ੍ਤਧਮ੍ਮਾ ਏਵਾਤਿ ਦਸ੍ਸੇਨ੍ਤੋ ‘‘ਵੁਤ੍ਤਪ੍ਪਕਾਰਂ ਸਚ੍ਚ’’ਨ੍ਤਿਆਦਿਮਾਹ. ਤਤ੍ਥ ‘‘ਇਮੇ ਕੁਸਲਾ, ਇਮੇ ਅਕੁਸਲਾ’’ਤਿਆਦਿਨਾ ਤੇ ਅਤ੍ਥੇ ਯਾਥਾਵਤੋ ਧਾਰਣਤੋ ਉਪਧਾਰਣਤੋ ਧਮ੍ਮੋ. ਸਞ੍ਞਾ ਚਿਤ੍ਤਚੇਤਸਿਕਾਨਂ ਧਾਰਣਂ, ਅਵਿਚ੍ਛੇਦਤੋ ਸਨ੍ਧਾਰਣਤੋ ਕੁਸਲਸਨ੍ਤਾਨਂ ਧਾਰੇਤੀਤਿ ਧਿਤਿ, ਵੀਰਿਯਂ. ਚਜਤਿ ਏਤੇਨਾਤਿ ਚਾਗੋ, ਦਾਨਂ. ਪਚ੍ਚਯਵੇਕਲ੍ਲਤੋ ਫਲੁਪ੍ਪਾਦਨਸਮਤ੍ਥਤਾਵਸੇਨ ਸਨ੍ਤਿ.
ਅਞ੍ਞੇਪੀਤਿ ਇਤੋ ਯਥਾਵੁਤ੍ਤਧਮ੍ਮਸਮੁਦਾਯਤੋ ਅਞ੍ਞੇਪਿ ਧਮ੍ਮਾ ਯਦਿ ਸਨ੍ਤਿ, ਤੇ ਧਮ੍ਮੇ ਪੁਚ੍ਛਸ੍ਸੂਤਿ. ਕਿਲੇਸੇ, ਕਾਯਵਾਚਾਦਿਕੇ ਵਾ ਦਮੇਤੀਤਿ ਦਮੋ, ਪਞ੍ਞਾ. ਉਟ੍ਠਹਤਿ ਉਸ੍ਸਹਤਿ ਏਤੇਨਾਤਿ ਉਟ੍ਠਾਨਂ, ਵੀਰਿਯਂ. ਏਤ੍ਥਾਤਿ ਏਤਿਸ੍ਸਾ ਪੁਚ੍ਛਾਯ. ਸਦ੍ਧਿਨ੍ਤਿ ਸਙ੍ਖੇਪਤੋ ਭਾਵਤ੍ਥਪਦਾਨਂ ਬਨ੍ਧਨੇਨ ਸਹ. ਏਕਮੇਕਂ ਪਦਨ੍ਤਿ ਪਞ੍ਞਾਦਿਕਮੇਕੇਕਂ ਪਦਂ. ‘‘ਪਞ੍ਞਾ ਇਮਸ੍ਮਿਂ ਠਾਨੇ ਪਞ੍ਞਾਤਿ ਧਮ੍ਮੋਤਿ ਚ ਆਗਤਾ’’ਤਿਆਦਿਨਾ ਪਞ੍ਞਾਦਿਅਤ੍ਥਸ੍ਸ ਉਦ੍ਧਰਣਂ ਅਤ੍ਥੁਦ੍ਧਾਰੋ. ਤਸ੍ਸ ਤਸ੍ਸ ਅਤ੍ਥਸ੍ਸ ‘‘ਪਞ੍ਞਾ ਪਜਾਨਨਾ’’ਤਿਆਦਿਨਾ (ਧ. ਸ. ੧੬) ਵੇਵਚਨਪਦਾਨਂ ਉਦ੍ਧਰਣਂ ਪਦੁਦ੍ਧਾਰੋ. ਪਜਾਨਾਤੀਤਿ ਪਞ੍ਞਾ, ਧਾਰੇਤੀਤਿ ਧਮ੍ਮੋ, ਦਮੇਤੀਤਿ ਦਮੋਤਿ ਏਵਂ ਪਦਸ੍ਸ ਕਥਨਂ ਪਦਵਣ੍ਣਨਾ.
ਅਜ੍ਜਾਤਿ ਵਾ ਏਤਰਹਿ. ਯਥਾਵੁਤ੍ਤੇਨ ਪਕਾਰੇਨਾਤਿ ‘‘ਸਦ੍ਦਹਾਨੋ ਅਰਹਤ’’ਨ੍ਤਿਆਦਿਨਾ ਵੁਤ੍ਤਪ੍ਪਕਾਰੇਨ. ਸਚ੍ਚਸਮ੍ਪਟਿਵੇਧਾਵਗਹਣਂ ਵਾ ਯਥਾਵੁਤ੍ਤੇਨ ਪਕਾਰੇਨ ਦਿਟ੍ਠਸਚ੍ਚਤਾਯ ਇਧਲੋਕਪਰਲੋਕਤ੍ਥਂ ਯਾਥਾਵਤੋ ਜਾਨਨ੍ਤੋ. ਏਵਞ੍ਚ ਯਕ੍ਖੋ ਸਤ੍ਥੁ ਦੇਸਨਾਨੁਭਾਵਸਿਦ੍ਧਂ ਪਞ੍ਹਂ ਪੁਚ੍ਛਨੇਨ ਅਤ੍ਤਨੋ ਪਟਿਲਾਭਸਮ੍ਪਤ੍ਤਿਂ ਵਿਭਾਵੇਨ੍ਤੋ ‘‘ਕਥਂਸੁ ਲਭਤੇ ਪਞ੍ਞ’’ਨ੍ਤਿਆਦਿਮਾਹਾਤਿ ਆਚਰਿਯਾ. ਸਮ੍ਪਰਾਯਿਕੋਤਿ ਏਤ੍ਥ ਚ-ਸਦ੍ਦੋ ਲੁਤ੍ਤਨਿਦ੍ਦਿਟ੍ਠੋ, ਤੇਨ ‘‘ਦਿਟ੍ਠਧਮ੍ਮਿਕੋ ਚਾ’’ਤਿ ਅਯਮਤ੍ਥੋ ਵੁਤ੍ਤੋ ਏਵਾਤਿ ਦਸ੍ਸੇਨ੍ਤੋ ‘‘ਯੋ ਅਤ੍ਥੋ…ਪੇ… ਦਸ੍ਸੇਤੀ’’ਤਿ ਆਹ. ਅਰੀਯਤਿ ਫਲਂ ਏਤਸ੍ਮਾਤਿ ਅਤ੍ਥੋ, ਕਾਰਣਂ. ਵਿਚਕ੍ਖਣੇ ਸਪਯੋਜਨਤਾਯ.
ਤਸ੍ਸ ਞਾਣਸ੍ਸਾਤਿ ਤਸ੍ਸ ਅਤ੍ਥਸ੍ਸ ਆਵਿਭਾਵਨਸ੍ਸ ਞਾਣਸ੍ਸ. ਗੁਣਵਿਸੇਸੇਹਿ ਚ ਸਦਿਸਸ੍ਸਪਿ ਅਞ੍ਞਸ੍ਸ ਅਭਾਵਤੋ ਅਗ੍ਗਦਕ੍ਖਿਣੇਯ੍ਯੋ ਬੁਦ੍ਧੋ ਭਗਵਾ. ਤੇਨਾਹ –
‘‘ਨਯਿਮਸ੍ਮਿਂ ਲੋਕੇ ਪਰਸ੍ਮਿਂ ਵਾ ਪਨ,
ਬੁਦ੍ਧੇਨ ਸੇਟ੍ਠੋਵ ਸਮੋਵ ਵਿਜ੍ਜਤਿ;
ਆਹੁਨੇਯ੍ਯਾਨਂ ਪਰਮਾਹੁਤਿਂ ਗਤੋ,
ਪੁਞ੍ਞਤ੍ਥਿਕਾਨਂ ਵਿਪੁਲਫਲੇਸਿਨ’’ਨ੍ਤਿ. (ਵਿ. ਵ. ੧੦੪੭);
ਸਹਿਤਪਟਿਪਤ੍ਤਿਨ੍ਤਿ ਪਞ੍ਞਾਸਙ੍ਗਾਹਿਕਂ ਅਤ੍ਤਨੋ ਪਟਿਪਤ੍ਤਿਂ. ਸੁਨ੍ਦਰਾ ਬੋਧਿ ਸੁਬੋਧਿ, ਬੁਦ੍ਧਸ੍ਸ ਸੁਬੋਧਿ ਬੁਦ੍ਧਸੁਬੋਧਿ, ਸਾ ਏਵ ਬੁਦ੍ਧਸੁਬੋਧਿਤਾ. ਧਮ੍ਮਸ੍ਸਵਨਤ੍ਥਂ ਸਨ੍ਨਿਪਤਿਤਦੇਵਤਾਹਿ ਸਙ੍ਘੁਟ੍ਠਸਾਧੁਕਾਰਸਦ੍ਦੁਟ੍ਠਾਨਞ੍ਚ.
ਸਤਪੁਞ੍ਞਲਕ੍ਖਣਨ੍ਤਿ ਸਤਸਹਸ੍ਸਕਪ੍ਪੇ ਪੁਞ੍ਞਸਮ੍ਭਾਰਸ੍ਸ ਕਤਤ੍ਤਾ ਤੇਸਂ ਪੁਞ੍ਞਾਨਂ ਵਸੇਨ ਸਤਪੁਞ੍ਞਲਕ੍ਖਣਂ ਅਨੇਕਪੁਞ੍ਞਨਿਬ੍ਬਤ੍ਤਲਕ੍ਖਣਂ. ਅਭਿਨਨ੍ਦਿਯਤਾਯ ਸਬ੍ਬੇਹਿ ਅਙ੍ਗੇਹਿ ਸਮੁਪੇਤਂ ਸਮਨ੍ਨਾਗਤਂ. ਕਤਪੁਞ੍ਞਭਾਵਂ ਬ੍ਯਞ੍ਜੇਨ੍ਤੀਤਿ ਬ੍ਯਞ੍ਜਨਾਨਿ, ਅਙ੍ਗਪਚ੍ਚਙ੍ਗਾਨਿ. ਤੇਸਂ ਪਰਿਪੁਣ੍ਣਤ੍ਤਾ ਪਰਿਪੁਣ੍ਣਬ੍ਯਞ੍ਜਨਂ. ਤਂ ਯਕ੍ਖੋ…ਪੇ… ਪੂਰੇਸੀਤਿ ਗਾਥਾਪੂਰਣਤ੍ਥਮੇਵ ਹਿ ਭਗਵਾ ਤਥਾਰੂਪਾਨਿ ਅਕਾਸਿ. ਅਬ੍ਯਾਧਿਤਾਤਿ ਅਰੋਗਾ. ‘‘ਅਬ੍ਯਥਿਤਾ’’ਤਿ ਕੇਚਿ ਪਠਨ੍ਤਿ, ਸਯਸਨ੍ਤਾਸਰਹਿਤਾਤਿ ਅਤ੍ਥੋ.
‘‘ਹਤ੍ਥਯੋ’’ਤਿ ਵਤ੍ਤਬ੍ਬੇ ‘‘ਹਤ੍ਥਕੋ’’ਤਿ ਵੁਤ੍ਤਂ. ਆਲ਼ਵਿਨਗਰਨ੍ਤਿ ਆਲ਼ਵਿਨਗਰਵਾਸਿਨੋ ਵਦਤਿ. ਭਵਤਿ ਹਿ ਤਤ੍ਰਟ੍ਠਤਾਯ ਤਂ-ਸਦ੍ਦੋ ਯਥਾ ‘‘ਗਾਮੋ ਆਗਤੋ, ਮਞ੍ਚਾ ਉਕ੍ਕੁਟ੍ਠਿਂ ਕਰੋਨ੍ਤੀ’’ਤਿ. ਏਕਕੋਲਾਹਲੇਨ ਵਤ੍ਤਮਾਨੇਨ.
ਸਮ੍ਪਿਣ੍ਡਿਤ੍ਵਾਤਿ ਸਨ੍ਨਿਪਤਿਤ੍ਵਾ. ਕਾਮਂ ਸਮ੍ਭਾਰੋ ਤੇਨ ਕਤੋਤਿ ਨਤ੍ਥਿ, ਯੁਦ੍ਧਤ੍ਥਂ ਪਨ ਬਹੁਸੋ ਉਸ੍ਸਾਹਸ੍ਸ ਕਤਤ੍ਤਾ ‘‘ਯੁਦ੍ਧਮਾਦਿਂ ਕਤ੍ਵਾ’’ਤਿ ਵੁਤ੍ਤਂ. ਤਮੇਵ ਆਲ਼ਵਕਸੁਤ੍ਤਂ ਕਥੇਸਿ ਤਸ੍ਸਾ ਏਵ ਦੇਸਨਾਯ ਸਨ੍ਨਿਪਤਿਤਪਰਿਸਾਯ ਸਪ੍ਪਾਯਤ੍ਤਾ. ਤੇਨਾਹ ‘‘ਕਥਾਪਰਿ…ਪੇ… ਅਹੋਸੀ’’ਤਿ. ਚਤੂਹਿ ਵਤ੍ਥੂਹੀਤਿ ਚਤੂਹਿ ਸਙ੍ਗਹਵਤ੍ਥੂਹਿ. ਪਰਿਸਨ੍ਤਿ ਅਤ੍ਤਨੋ ਪਰਿਸਂ. ‘‘ਇਤਰਞ੍ਚਾ’’ਤਿਪਿ ਵਦਨ੍ਤਿ.
ਆਲ਼ਵਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.
ਸਾਰਤ੍ਥਪ੍ਪਕਾਸਿਨਿਯਾ ਸਂਯੁਤ੍ਤਨਿਕਾਯ-ਅਟ੍ਠਕਥਾਯ
ਯਕ੍ਖਸਂਯੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.