੧੧. ਸਕ੍ਕਸਂਯੁਤ੍ਤਂ
੧. ਪਠਮਵਗ੍ਗੋ
੧. ਸੁਵੀਰਸੁਤ੍ਤਵਣ੍ਣਨਾ
੨੪੭. ਅਭਿਯਂਸੂਤਿ ਯੁਦ੍ਧਸਜ੍ਜਾਭਿਮੁਖਾ ਹੁਤ੍ਵਾ ਗਚ੍ਛਿਂਸੁ. ਤਤ੍ਰਾਤਿ ਤਸ੍ਮਿਂ ਅਸੁਰਾਨਂ ਅਭਿਯਾਨੇ ਅਯਂ ਦਾਨਿ ਵੁਚ੍ਚਮਾਨਾ ਅਨੁਪੁਬ੍ਬਤੋ ਕਥਾ. ਤੇਤ੍ਤਿਂਸ ਪੁਰਿਸੇ ਗਹੇਤ੍ਵਾਤਿ ਤੇਤ੍ਤਿਂਸ ਪੁਰਿਸੇ ਪੁਞ੍ਞਕਿਰਿਯਾਯ ਸਹਾਯਭੂਤੇ ਗਹੇਤ੍ਵਾ. ‘‘ਯਾਵਜੀਵਂ ਮਾਤਾਪਿਤੁਭਰੋ ਅਸ੍ਸ’’ਨ੍ਤਿਆਦਿਨਾ ਸਮਾਦਿਨ੍ਨਾਨਿ ਸਤ੍ਤ ਵਤਪਦਾਨਿ ਪੂਰੇਤ੍ਵਾ. ਅਧਿਗਣ੍ਹਨ੍ਤਂ ਅਭਿਭਵਨ੍ਤਂ. ਪੁਤ੍ਤਹਤਾਯਾਤਿ ਹਤਪੁਤ੍ਤਾਯ. ਸਾ ਸੁਰਾ ਨ ਹੋਤਿ, ਨ ਸੁਰਂ ਪਿਵਿਮ੍ਹਾਤਿ ਅਧਿਪ੍ਪਾਯੋ. ਤਤੋ ਪਟ੍ਠਾਯਾਤਿ ‘‘ਨ ਸੁਰਾ’’ਤਿ ਵੁਤ੍ਤਕਾਲਤੋ ਪਟ੍ਠਾਯ. ‘‘ਨ ਸੁਰਨ੍ਤਿ ਨ ਦਿਬ੍ਬਨ੍ਤੀਤਿ ਅਸੁਰਾ’’ਤਿ ਕੇਚਿ. ਹੇਟ੍ਠਿਮਤਲੇ ਅਨ੍ਤੋਭੂਮਿਯਂ ਆਯਾਮਤੋ ਦਸਯੋਜਨਸਹਸ੍ਸਂ.
ਉਰਗਾਦਿਸਹਚਰਿਤਾਨਿ ਠਾਨਾਨਿ ਉਰਗਾਦੀਨੀਤਿ ਆਹ ‘‘ਉਰਗਾਦੀਸੁ ਪਞ੍ਚਸੁ ਠਾਨੇਸੂ’’ਤਿ. ਪਠਮਾਲਿਨ੍ਦੇਤਿ ਪਠਮੇ ਪਰਿਭਣ੍ਡੇ. ਪਞ੍ਚਯੋਜਨਸਹਸ੍ਸਵਿਤ੍ਥਾਰਪੁਥੁਬਹਲਾਹਿ ਸਿਨੇਰੁਸ੍ਸ ਚਤੂਸੁਪਿ ਪਸ੍ਸੇਸੁ ਚਤ੍ਤਾਰੋ ਪਰਿਭਣ੍ਡਾ. ਸਿਨੇਰੁਸ੍ਸ ਹਿ ਤਸ੍ਮਿਂ ਤਸ੍ਮਿਂ ਪਸ੍ਸੇ ਯੁਗਨ੍ਧਰਾਦੀਸੁ ਪਞ੍ਚਸਤਪਰਿਤ੍ਤਦੀਪਪਰਿਵਾਰੇ ਮਹਾਦੀਪੇ ਚ ਲਭਿਤਬ੍ਬਸ੍ਸ ਮਹਤੋ ਅਤ੍ਥਸ੍ਸ ਵਸੇਨ ਮਹਤ੍ਥਾ. ਕੁਪਿਤਾਵਿਲਚਿਤ੍ਤਾਤਿ ਕੁਪਿਤੇਨ ਕੋਪੇਨ ਆਕੁਲਚਿਤ੍ਤਾ. ਯੁਦ੍ਧੇਸੀਤਿ ਯੁਦ੍ਧੇਸਿਨੋ. ਸੇਸੇਸੂਤਿ ਸੇਸੇਸੁ ਪਰਿਭਣ੍ਡੇਸੁ. ਸੇਸਾਤਿ ਸੁਪਣ੍ਣਾਦਯੋ.
ਵਮ੍ਮਿਕਮਕ੍ਖਿਕਾਤਿ ਸਪਕ੍ਖਿਕਉਪਚਿਕਾ. ਓਸਕ੍ਕਿਤ੍ਵਾਤਿ ਪਿਟ੍ਠਿਭਾਗੇਨ ਨਿਵਤ੍ਤਿਤ੍ਵਾ.
ਪਮਾਦਂ ਆਪਾਦੇਸੀਤਿ ਸਕ੍ਕਸ੍ਸ ਆਣਾਯ ਪਮਾਦਂ ਆਪਜ੍ਜਿ. ਸਟ੍ਠਿਯੋਜਨਂ ਵਿਤ੍ਥਾਰੇਨ. ਸੁਵਣ੍ਣਮਹਾਵੀਥਿਨ੍ਤਿ ਸੁਵਣ੍ਣਮਯਭੂਮਿਜਗਤਿਵੀਥਿਂ.
ਅਨੁਟ੍ਠਹਨ੍ਤੋਤਿ ਉਟ੍ਠਾਨਂ ਕਾਯਿਕਵੀਰਿਯਂ ਅਕਰੋਨ੍ਤੋ. ਅਵਾਯਮਨ੍ਤੋਤਿ ਵਾਯਾਮਂ ਚੇਤਸਿਕਵੀਰਿਯਂ ਅਕਰੋਨ੍ਤੋ. ਕਿਞ੍ਚਿ ਕਿਚ੍ਚਨ੍ਤਿ ਕਸਿਵਾਣਿਜ੍ਜਾਦਿਭੇਦਂ ਅਞ੍ਞਤਰਂ ਕਿਚ੍ਚਂ ਕਤ੍ਤਬ੍ਬਕਮ੍ਮਂ. ਵਰਨ੍ਤਿ ਪਵਰਂ. ਤੇਨਾਹ ‘‘ਉਤ੍ਤਮ’’ਨ੍ਤਿ. ਤਞ੍ਚ ਖੋ ਕਸਿਤਬ੍ਬਟ੍ਠਾਨਂ ਅਧਿਪ੍ਪੇਤਨ੍ਤਿ ਆਹ ‘‘ਓਕਾਸ’’ਨ੍ਤਿ. ਕਮ੍ਮਂ ਅਕਤ੍ਵਾਤਿ ਕਿਞ੍ਚਿਪਿ ਜੀਵਿਤਹੇਤੁਭੂਤਂ ਕਮ੍ਮਂ ਅਕਤ੍ਵਾ. ਜੀਵਿਤਟ੍ਠਾਨਂ ਨਾਮਾਤਿ ਤਸ੍ਸ ਜੀਵਿਤਸ੍ਸ ਹੇਤੁ ਨਾਮ. ਨਿਬ੍ਬਾਨਸ੍ਸ ਮਗ੍ਗੋਤਿ ਨਿਬ੍ਬਾਨਸ੍ਸ ਅਧਿਗਮੁਪਾਯਭੂਤੋ ਮਗ੍ਗੋ.
ਸੁਵੀਰਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੨. ਸੁਸੀਮਸੁਤ੍ਤਵਣ੍ਣਨਾ
੨੪੮. ਅਨ੍ਤਰੇਤਿ ਅਬ੍ਭਨ੍ਤਰੇ. ਏਵਂਨਾਮਕਨ੍ਤਿ ‘‘ਸੁਸੀਮੋ’’ਤਿ ਏਵਂਨਾਮਕਂ. ਏਕਂ ਪੁਤ੍ਤਮੇਵ ਅਞ੍ਞਤਰਂ ਅਤ੍ਤਨੋ ਪੁਤ੍ਤਮੇਵ.
ਸੁਸੀਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੩. ਧਜਗ੍ਗਸੁਤ੍ਤਵਣ੍ਣਨਾ
੨੪੯. ਸਮੁਪਬ੍ਯੂਲ਼੍ਹੋਤਿ ਉਭਿਨ੍ਨਂ ਸਹ ਏਵ ਸਮਾਗਮੋ, ਭੁਸਂ ਵਾ ਬ੍ਯੂਲ਼੍ਹੋਤਿ ਅਤ੍ਥੋ. ਭੁਸਾ ਪਨਸ੍ਸ ਬ੍ਯੂਲ਼੍ਹਤਾ ਦ੍ਵਿਨ੍ਨਂ ਸੇਨਾਨਂ ਸਮਾਗਨ੍ਤ੍ਵਾ ਸਮ੍ਪਿਣ੍ਡਿਤਭਾਵੇਨਾਤਿ ਆਹ ‘‘ਸਮ੍ਪਿਣ੍ਡਿਤੋ ਰਾਸਿਭੂਤੋ’’ਤਿ. ਪਚ੍ਛਿਮਨ੍ਤੋਤਿ ਰਥਪਞ੍ਜਰਸ੍ਸ ਪਰਨ੍ਤੋ ਪਚ੍ਛਿਮਨ੍ਤੋ ਪਚ੍ਛਿਮਕੋਟ੍ਠਾਸੋ. ਰਥਸਨ੍ਧਿਤੋਤਿ ਰਥਪਞ੍ਜਰਸ੍ਸ ਕੁਬ੍ਬਰੇਨ ਸਦ੍ਧਿਂ ਸਮ੍ਬਨ੍ਧਨਟ੍ਠਾਨਤੋ. ਤਦੇਵ ਪਮਾਣਨ੍ਤਿ ਤਦੇਵ ‘‘ਦਿਯਡ੍ਢਯੋਜਨਸਤਾਯਾਮੋ’’ਤਿ ਵੁਤ੍ਤਪ੍ਪਮਾਣਮੇਵ. ਦਿਗੁਣਂ ਕਤ੍ਵਾਤਿ ‘‘ਪਚ੍ਛਿਮਨ੍ਤੋ ਸਤਯੋਜਨੋ’’ਤਿਆਦਿਨਾ ਦਿਗੁਣਂ ਕਤ੍ਵਾ. ਚਨ੍ਦਮਣ੍ਡਲਸੂਰਿਯਮਣ੍ਡਲਕਿਙ੍ਕਿਣਿਕਜਾਲਾਦਿਭੇਦਸ੍ਸ ਸੇਸਾਲਙ੍ਕਾਰਸ੍ਸ. ਪਸ੍ਸਨ੍ਤਾਨਂ ਦੇਵਾਨਂ. ਰਾਜਾ ਨੋਤਿ ਅਮ੍ਹਾਕਂ ਰਾਜਾ ਦੇਵਸੇਟ੍ਠੋ. ਦੁਤਿਯਂ ਆਸਨਂ ਲਭਤੀਤਿ ਸਕ੍ਕੇ ਨਿਸਿਨ੍ਨੇ ਤਸ੍ਸ ਅਨਨ੍ਤਰਂ ਦੁਤਿਯਂ ਆਸਨਂ ਲਭਤਿ. ਤਸ੍ਮਾ ਦੇਵਸੇਟ੍ਠਤਾਯ ਸਕ੍ਕੋ ਵਿਯ ਗਾਰਵਟ੍ਠਾਨਿਯੋ, ਯਤੋ ਸਕ੍ਕੋ ‘‘ਤਸ੍ਸ ਧਜਗ੍ਗਂ ਉਲ੍ਲੋਕੇਯ੍ਯਾਥਾ’’ਤਿ ਆਹ. ਏਸ ਨਯੋ ਸੇਸੇਸੁਪਿ. ਅਸੁਰੇਹਿ ਪਰਾਜਿਤੋਤਿ ਅਸੁਰੇਹਿ ਪਰਾਜਯਂ ਆਪਾਦਿਤੋ. ਰਜਧਜਂ ਦਿਸ੍ਵਾਤਿ ਪਰਸੇਨਾਯ ਉਪਗਚ੍ਛਨ੍ਤਿਯਾ ਉਟ੍ਠਿਤਰਜਮਤ੍ਤਮ੍ਪਿ ਦਿਸ੍ਵਾ ਠਿਤੋਪਿ ਤਂ ਰਜਧਜਂ ਦਿਸ੍ਵਾ ਭੀਰੁਭਾਵੇਨ ਪਲਾਯਨਧਮ੍ਮੋ.
ਯਸ੍ਸ ਧਜਗ੍ਗਪਰਿਤ੍ਤਸ੍ਸ. ਆਨੁਭਾਵੋ ਵਤ੍ਤਤਿ ਅਸਮ੍ਮੁਖੀਭੂਤਾਹਿਪਿ ਦੇਵਤਾਹਿ ਸਿਰਸਾ ਸਮ੍ਪਟਿਚ੍ਛਿਤਬ੍ਬਤੋ. ਚੋਰਭਯਾਦੀਹੀਤਿ ਆਦਿ-ਸਦ੍ਦੇਨ ਰੋਗਭਯਾਦੀਨਞ੍ਚੇਵ ਵਟ੍ਟਦੁਕ੍ਖਸ੍ਸ ਚ ਸਙ੍ਗਹੋ ਦਟ੍ਠਬ੍ਬੋ ਵਿਧਿਨਾ ਭਾਵਿਤੇ ਪਰਿਤ੍ਤਸ੍ਸ ਅਤ੍ਥੇ ਉਪਚਾਰਜ੍ਝਾਨਾਦੀਨਮ੍ਪਿ ਇਜ੍ਝਨਤੋ.
ਦੀਘਵਾਪੀਨਾਮਕੇ ਗਾਮੇ ਚੇਤਿਯਂ ਦੀਘਵਾਪਿਚੇਤਿਯਂ. ਮੁਦ੍ਧਵੇਦਿਕਾ ਨਾਮ ਹਮ੍ਮਿਯਂ ਪਰਿਕ੍ਖਿਪਿਤ੍ਵਾ ਕਤਵੇਦਿਕਾ. ਬੁਦ੍ਧਗਤਂ ਸਤਿਂ ਉਪਟ੍ਠਪੇਤ੍ਵਾ ਪਰਿਤ੍ਤਰਕ੍ਖਗੁਤ੍ਤਿਂ ਆਹ. ਪਰਿਤ੍ਤਸ੍ਸ ਆਨੁਭਾਵੇਨ ਦ੍ਵੇ ਇਟ੍ਠਕਾ…ਪੇ… ਅਟ੍ਠਂਸੁ. ਤਥਾ ਹਿ ਤਸ੍ਮਿਂ ਨਿਸ੍ਸੇਣਿਯਂ ਠਿਤੇ…ਪੇ… ਅਟ੍ਠਂਸੂਤਿ.
ਧਜਗ੍ਗਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੪. ਵੇਪਚਿਤ੍ਤਿਸੁਤ੍ਤਵਣ੍ਣਨਾ
੨੫੦. ‘‘ਮਹਾਨੁਭਾਵਤਾਯ ਅਸੁਰਾਨਂ ਚਿਤ੍ਤਵੇਪਨੇਨ ਵੇਪਚਿਤ੍ਤੀ’’ਤਿ ਵਦਨ੍ਤਿ. ਇਸੀਹਿ ਪਨ ਅਭਯਂ ਯਾਚਿਤੇ ‘‘ਭਯਮੇਵ ਦਦਾਮੀ’’ਤਿ ਵਤ੍ਵਾ ਤੇਹਿ ‘‘ਅਕ੍ਖਯਂ ਹੋਤੁ ਤੇ ਭਯ’’ਨ੍ਤਿ ਅਭਿਸਪਵਸੇਨ ਵੁਤ੍ਤਕਾਲਤੋ ਪਟ੍ਠਾਯ ਵੇਪਨਚਿਤ੍ਤਤਾਯ ‘‘ਵੇਪਚਿਤ੍ਤੀ’’ਤਿ ਵੁਚ੍ਚਤਿ, ਯਂ ਲੋਕਿਯਾ ‘‘ਪੁਲੋਮੋ’’ਤਿ ਚ ਵਦਨ੍ਤਿ. ਨਿਪਾਤਪਦਾਨਿਪਿ ਕਾਨਿਚਿ ਅਤ੍ਥਵਿਸੇਸਜੋਤਕਾਨਿ ਹੋਨ੍ਤੀਤਿ ਆਹ ‘‘ਨਿਪਾਤਮਤ੍ਤ’’ਨ੍ਤਿ ਹੇਤੁਅਤ੍ਥਾਦੀਨਮੇਤ੍ਥ ਅਸਮ੍ਭਵਤੋ. ਤਨ੍ਤਿ ਸਕ੍ਕਂ ਦੇਵਾਨਮਿਨ੍ਦਂ. ਕਣ੍ਠੇ ਪਞ੍ਚਮੇਹੀਤਿ ਕਣ੍ਠਬਨ੍ਧਨਪਞ੍ਚਮੇਹਿ, ਵਿਭਤ੍ਤਿਅਲੋਪੇਨ ਨਿਦ੍ਦੇਸੋ. ਚਿਤ੍ਤੇਨੇਵਾਤਿ ‘‘ਇਮਂ ਬਨ੍ਧਾਮਿ, ਅਯਂ ਬਜ੍ਝਤੂ’’ਤਿ ਉਪ੍ਪਨ੍ਨਚਿਤ੍ਤੇਨੇਵ. ਬਜ੍ਝਤਿ ਬਦ੍ਧੋ ਹੋਤਿ, ਅਯਂ ਦੇਵਾਨੁਭਾਵੋ. ਮੁਚ੍ਚਤੀਤਿ ਏਤ੍ਥਾਪਿ ਏਸੇਵ ਨਯੋ. ਦਸਹੀਤਿ ‘‘ਚੋਰੋਸੀ’’ਤਿਆਦਿਨਾ ਇਧ ਵੁਤ੍ਤੇਹਿ ਦਸਹਿ. ਤੇਨਾਹ ‘‘ਇਮੇਹੀ’’ਤਿ. ਨਿਬ੍ਬਤ੍ਤਿਤ੍ਵਾ ਚਿਰਕਾਲਤਂ ਉਪਾਦਾਯ ਖੁਂਸਨਵਸੇਨ ਵਦਤਿ ‘‘ਜਰਸਕ੍ਕਾ’’ਤਿ. ਨ ਤਂ ਅਕ੍ਕੋਸਂ ਮਨਸਿ ਕਰੋਤਿ ਦੀਘਰਤ੍ਤਂ ਖਨ੍ਤਿਸੋਰਚ੍ਚੇਸੁ ਨਿਰੁਲ਼੍ਹਅਜ੍ਝਾਸਯਤ੍ਤਾ. ਮਹਾਪਟਿਗ੍ਗਹਣਨ੍ਤਿ ਮਹਨ੍ਤਂ ਉਪਸਮਬ੍ਯਞ੍ਜਨਂ. ਅਸ੍ਸਾਤਿ ਵੇਪਚਿਤ੍ਤਸ੍ਸ.
ਪਟਿਸਂਯੁਜੇਤਿ ਪਟਿਸਤ੍ਤੁ ਹੁਤ੍ਵਾ ਸਂਯੁਦ੍ਧਂ ਕਰੇਯ੍ਯ. ਤੇਨਾਹ ‘‘ਪਟਿਪ੍ਫਰੇਯ੍ਯਾ’’ਤਿ. ਉਪਸਮਂ…ਪੇ… ਮਞ੍ਞੇ ਉਪਸਮੇਨੇਵ ਪਚ੍ਚਤ੍ਥਿਕਸ੍ਸ ਨਾਯਕਭੂਤਸ੍ਸ ਕੋਧਸ੍ਸ ਪਟਿਸੇਧਨਤੋ. ਤਾਦਿਸੇ ਹਿ ਕੋਧੋ ਪਟਿਕਿਰਿਯਂ ਅਲਭਨ੍ਤੋ ਅਨੁਪਾਦਾਨੋ ਵਿਯ ਜਾਤਵੇਦੋ ਵੂਪਸਮ੍ਮਤਿ. ਯਦਾ-ਸਦ੍ਦੋ ਹੇਤੁਅਤ੍ਥੋ, ਨ ਕਾਲਤ੍ਥੋਤਿ ਆਹ ‘‘ਯਸ੍ਮਾ ਤਂ ਮਞ੍ਞਤੀ’’ਤਿ. ਤਾਵਦੇਵ ਦ੍ਵੇ ਗਾਵੋ ਯੁਜ੍ਝਨ੍ਤੇਤਿ ਤਸ੍ਮਿਂਯੇਵ ਖਣੇ ਦ੍ਵੀਸੁ ਗੋਣੇਸੁ ਯੁਜ੍ਝਨ੍ਤੇਸੁ.
ਖਨ੍ਤਿਤੋ ਉਤ੍ਤਰਿਤਰੋ ਅਞ੍ਞੋ ਅਤ੍ਥੋ ਨ ਵਿਜ੍ਜਤਿ ਅਨਨ੍ਤਰੇਵ ਅਸ੍ਸ ਵਿਰੋਧਂ ਅਨਤ੍ਥਂ ਪਟਿਬਾਹਿਤ੍ਵਾ ਦਿਟ੍ਠਧਮ੍ਮਿਕਸ੍ਸ ਚੇਵ ਸਮ੍ਪਰਾਯਿਕਸ੍ਸ ਚ ਸਂਵਿਧਾਨਤੋ. ਤਂ ਖਨ੍ਤਿਂ ਪਰਮਂ ਆਹੁ ਸੇਟ੍ਠਬਲਂ ਵਿਰੋਧਪਚ੍ਚਯਂ ਅਭਿਭੁਯ੍ਯ ਪਵਤ੍ਤਨਤੋ. ਬਾਲਯੋਗਤੋ ਬਾਲੋ, ਤਸ੍ਸ ਬਲਂ ਬਾਲਬਲਂ, ਅਞ੍ਞਾਣਨ੍ਤਿ ਆਹ ‘‘ਬਾਲਬਲਂ ਨਾਮ ਅਞ੍ਞਾਣਬਲ’’ਨ੍ਤਿ. ਤਂ ਯਸ੍ਸ ਬਲਨ੍ਤਿ ਤਂ ਅਞ੍ਞਾਣਬਲਂ ਯਸ੍ਸ ਪੁਗ੍ਗਲਸ੍ਸ ਬਲਂ, ਅਬਲਮੇਵ ਤਂ ਪਞ੍ਞਾਬਲੇਨ ਵਿਦ੍ਧਂਸੇਤਬ੍ਬਤੋ. ਪਟਿਵਤ੍ਤਾ ਨ ਵਿਜ੍ਜਤੀਤਿ ਧਮ੍ਮਟ੍ਠਂ ਪਟਿਪ੍ਫਰਿਤ੍ਵਾ ਅਭਿਭਵਿਤ੍ਵਾ ਪਵਤ੍ਤਾ ਨਤ੍ਥਿ. ਪਟਿਵਚਨਮਤ੍ਤਂ ਪਨ ਕੋਚਿ ਵਦੇਯ੍ਯਾਪਿ, ਤਂ ਅਕਾਰਣਨ੍ਤਿ ਦਸ੍ਸੇਨ੍ਤੋ ‘‘ਪਟਿਪ੍ਫਰਿਤ੍ਵਾ ਵਾ’’ਤਿਆਦਿਮਾਹ. ਬਾਲਬਲਨ੍ਤਿ ‘‘ਪਟਿਪ੍ਫਰਿਤ੍ਵਾ’’ਤਿ ਵਚਨਸ੍ਸ ਕਾਰਣਵਚਨਂ. ਤਸ੍ਸੇਵ ਪੁਗ੍ਗਲਸ੍ਸ ਪਟਿਕੁਜ੍ਝਨਕਸ੍ਸ. ਨਾਨਤ੍ਤਾਵਿਤਕ੍ਕਨਤੋ ਉਭਿਨ੍ਨਂ ਅਤ੍ਥਂ. ਤਿਕਿਚ੍ਛਨ੍ਤਨ੍ਤਿ ਅਨਤ੍ਥਪਟਿਬਾਹਨਮੁਖੇਨ ਪਣ੍ਡਿਤਕਿਚ੍ਚਕਰਣੇਨ ਪਟਿਸੇਧੇਨ੍ਤਂ. ‘‘ਬਾਲੋ ਅਯ’’ਨ੍ਤਿ ਏਵਂ ਪਞ੍ਞਪੇਤੁਂ ਹੇਤੁਫਲਾਨਂ ਅਨਵਬੋਧਤੋ ਚਤੁਸਚ੍ਚਧਮ੍ਮੇ ਅਛੇਕਾਤਿ.
ਵੇਪਚਿਤ੍ਤਿਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੫. ਸੁਭਾਸਿਤਜਯਸੁਤ੍ਤਵਣ੍ਣਨਾ
੨੫੧. ‘‘ਛੇਕਤਾਯਾ’’ਤਿ ਵਤ੍ਵਾ ਤਸ੍ਸ ਵਤ੍ਤੁਂ ਛੇਕਭਾਵਂ ਦਸ੍ਸੇਤੁਂ ‘‘ਏਵਂ ਕਿਰਸ੍ਸਾ’’ਤਿਆਦਿਮਾਹ. ਗਾਹਨ੍ਤਿ ਲਦ੍ਧਿਂ. ਮੋਚੇਤ੍ਵਾਤਿ ਯਸ੍ਸ ਪੁਨ ‘‘ਚੋਰੋ’’ਤਿ ਉਤ੍ਤਰਿ ਵਤ੍ਤੁਂ ਨ ਸਕ੍ਕੋਤਿ, ਏਵਂ ਵਿਮੋਚੇਤ੍ਵਾਤਿ ਪਠਮਂ ਵਤ੍ਤੁਂ ਨ ਸਕ੍ਕਾ. ਗਰੂਤਿ ਭਾਰਿਯਂ, ਦੁਕ੍ਕਰਨ੍ਤਿ ਅਤ੍ਥੋ. ਪਚ੍ਛਾਤਿ ‘‘ਪਰਸ੍ਸਾ’’ਤਿ ਵੁਤ੍ਤੋ ਸੋ ਕਿਞ੍ਚਿ ਪਠਮਂ ਵਦਨ੍ਤੋ ਅਤ੍ਤਨੋ ਅਧਿਪ੍ਪਾਯਂ ਪਵੇਦੇਤਿ ਨਾਮ, ਤਂ ਯਥਾਸਤ੍ਤਿ ਵਿਦਿਤਮਨੋ ਤਸ੍ਸ ਉਤ੍ਤਰਿ ਵਤ੍ਤੁਂ ਸਕ੍ਕੋਤਿ. ਤੇਨਾਹ ‘‘ਪਰਸ੍ਸ ਵਚਨਂ ਅਨੁਗਨ੍ਤ੍ਵਾ ਪਨ ਪਚ੍ਛਾ ਸੁਖਂ ਵਤ੍ਤੁ’’ਨ੍ਤਿ. ਅਪਿ ਚ ਅਸੁਰਿਨ੍ਦੇਨ ‘‘ਹੋਤੁ, ਦੇਵਾਨਮਿਨ੍ਦ, ਸੁਭਾਸਿਤੇਨ ਜਯੋ’’ਤਿ ਪਠਮਂ ਵੁਤ੍ਤਂ, ਵਿਸੇਸੋ ਚ ਪੁਬ੍ਬਂ ਉਪਨੇਨ੍ਤਂ ਅਨੁਵਤ੍ਤਤਿ. ਵਚਸਿ ਕੁਸਲੋ ਸਕ੍ਕੋ ਦੇਵਰਾਜਾ ਤਂ ਵਿਸੇਸਂ ਤੇਨੇਵ ਪੁਬ੍ਬਂ ਉਪਨਯਾਪੇਨ੍ਤੋ ਉਪਲਾਪਨਵਸੇਨ ‘‘ਤੁਮ੍ਹੇ ਖ੍ਵੇਤ੍ਥਾ’’ਤਿਆਦਿਮਾਹ. ਪੁਬ੍ਬਦੇਵਾਤਿ ਸਕ੍ਕਪਮੁਖਾਯ ਦੇਵਪਰਿਸਾਯ ਲੋਕੇ ਪੁਬ੍ਬੇਵ ਉਪ੍ਪਨ੍ਨਤ੍ਤਾ ‘‘ਪੁਬ੍ਬਦੇਵਾ’’ਤਿ ਪਸਂਸਵਚਨਂ. ਵੇਪਚਿਤ੍ਤਿਂ ਸਨ੍ਧਾਯ ‘‘ਤੁਮ੍ਹੇ’’ਤਿ ‘‘ਪੁਬ੍ਬਦੇਵਾ’’ਤਿ ਚ ਵੁਤ੍ਤਤ੍ਤਾ ‘‘ਤੁਮ੍ਹਾਕਂ ਤਾਵ ਪਵੇਣਿਆਗਤਂ ਭਣਥਾ’’ਤਿ ਵੁਤ੍ਤਂ. ਗਾਰਵਟ੍ਠਾਨਿਯਤ੍ਤਾ ਵੇਪਚਿਤ੍ਤਿਨੋ ਬਹੁਵਚਨਪਯੋਗੋ. ਦਣ੍ਡੇਨ ਅਵਚਾਰੋ ਅਵਚਰਣਂ ਦਣ੍ਡਾਵਚਰੋ, ਨਤ੍ਥਿ ਏਤ੍ਥ ਵੁਤ੍ਤੋ ਦਣ੍ਡਾਵਚਰੋਤਿ ਅਦਣ੍ਡਾਵਚਰਾ, ਸਕ੍ਕੇਨ ਵੁਤ੍ਤਾ ਗਾਥਾਯੋ.
ਸੁਭਾਸਿਤਜਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੬. ਕੁਲਾਵਕਸੁਤ੍ਤਵਣ੍ਣਨਾ
੨੫੨. ਰਥਸਦ੍ਦੋਤਿ ਰਥਾਲਙ੍ਕਾਰਭੂਤਾਨਂ ਕਿਙ੍ਕਿਣਿਕਜਾਲਾਦੀਨਂ ਸਦ੍ਦੋ. ਤਥਾ ਧਜਸਦ੍ਦੋ. ਆਜਾਨੀਯਸਦ੍ਦੋਤਿ ਆਜਾਨੀਯਾਨਂ ਹਸਿਤਸਦ੍ਦੋ ਚ. ਕਰੁਣਾਸਮਾਵਜ੍ਜਿਤਹਦਯੋਤਿ ਪਾਣਾਨਂ ਅਨੁਪਰੋਧੇਨ ਪਣਾਮਿਤਚਿਤ੍ਤੋ. ਈਸਾਮੁਖੇਨਾਤਿ ਰਥਕਪ੍ਪਰਮੁਖੇਨ. ਪੁਞ੍ਞਪਚ੍ਚਯਨਿਬ੍ਬਤ੍ਤੋਤਿ ਉਲ਼ਾਰਂ ਸੁਵਿਪੁਲਂ ਪੁਞ੍ਞਂ ਪਚ੍ਚਯਂ ਕਤ੍ਵਾ ਨਿਬ੍ਬਤ੍ਤੋ. ਨ ਸਜ੍ਜਤਿ ਕਤ੍ਥਚਿ ਅਪ੍ਪਟਿਘਟ੍ਟਨੇਨ ਗਚ੍ਛਨ੍ਤੋ. ਸਿਮ੍ਬਲਿਵਨੇਨਾਤਿ ਸਿਮ੍ਬਲਿਵਨਮਜ੍ਝੇਨ. ਵਿਭਗ੍ਗਂ ਨਿਮ੍ਮਥਿਤਨ੍ਤਿ ਇਤੋ ਚਿਤੋ ਵਿਭਗ੍ਗਞ੍ਚੇਵ ਨਿਰਵਸੇਸਤੋ ਮਥਿਤਞ੍ਚ ਹੋਤਿ.
ਕੁਲਾਵਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੭. ਨਦੁਬ੍ਭਿਯਸੁਤ੍ਤਵਣ੍ਣਨਾ
੨੫੩. ਸੁਪਚ੍ਚਤ੍ਥਿਕੋਤਿ ਸੁਟ੍ਠੁ ਅਤਿਵਿਯ ਪਚ੍ਚਤ੍ਥਿਕੋ ਪਟਿਸਤ੍ਤੁ. ਗਹਿਤੋਸੀਤਿ ਦੇਵਪਾਸੇਨ ਬਨ੍ਧਿਤ੍ਵਾ ਗਹਿਤੋ ਅਸਿ. ਬਦ੍ਧੋਵ ਅਹੋਸਿ ਸਕ੍ਕਸ੍ਸ ਪੁਞ੍ਞਾਨੁਭਾਵੇਨ. ਚੇਤਿਯਰਾਜਾ ਕਿਰ ਇਮਸ੍ਮਿਂ ਕਪ੍ਪੇ ਤਤੋ ਪੁਬ੍ਬੇ ਕੇਨਚਿ ਅਵੁਤ੍ਤਪੁਬ੍ਬਂ ਖਰਮੁਸਾਵਾਦਂ ਅਭਾਸਿ, ਤਾਵਦੇਵ ਵਿਰਜ੍ਝਿਤ੍ਵਾ ਮਹਾਪਥਵਿਯਾ ਵਿਵਰੇ ਦਿਨੇ ਨਿਪਤਿਤ੍ਵਾ ਅਵੀਚਿਅਗ੍ਗਿਜਾਲਾਨਮਿਨ੍ਦਨਮਹੋਸਿ. ਤਂ ਸਨ੍ਧਾਯ ਵੁਤ੍ਤਂ ‘‘ਚੇਤਿਯਰਞ੍ਞੋ ਪਾਪਂ ਸਨ੍ਧਾਯਾ’’ਤਿ. ਮਹਾਪਾਪਾਨੀਤਿ ਮਹਨ੍ਤਾਨਿ ਗਰੁਤਰਾਨਿ ਪਾਪਾਨਿ. ਤਥਾ ਹਿ ਵੇਪਚਿਤ੍ਤਿਨੋ ਸਪਥਕਰਣੇ ਨਿਦਸ੍ਸਨਭਾਵੇਨ ਏਤਾਨਿ ਅਟ੍ਠਕਥਾਯਂ ਆਗਤਾਨੀਤਿ.
ਨਦੁਬ੍ਭਿਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੮. ਵੇਰੋਚਨਅਸੁਰਿਨ੍ਦਸੁਤ੍ਤਵਣ੍ਣਨਾ
੨੫੪. ਦ੍ਵਾਰਪਾਲਰੂਪਕਾਨਿ ਵਿਯਾਤਿ ਦ੍ਵਾਰਪਾਲਾਕਾਰੇਨ ਕਤਪਟਿਮਾਯੋ ਵਿਯ. ਵਾਯਮੇਥੇਵ, ਨ ਅਨ੍ਤਰਾ ਸਂਕੋਚਂ ਆਪਜ੍ਜੇਯ੍ਯਾਤਿ ਅਧਿਪ੍ਪਾਯੋ. ਨਿਪ੍ਫਨ੍ਨਸੋਭਨੇਸੂਤਿ ਨਿਪ੍ਫਨ੍ਨਭਾਵੇਨ ਸੁਨ੍ਦਰੇਸੁ. ਸਬ੍ਬੇ ਹਿ ਅਨਿਪ੍ਫਨ੍ਨਾ ਅਤ੍ਥਾ ਨ ਸੋਭਨ੍ਤਿ. ਕਿਚ੍ਚਜਾਤਾਤਿ ਵਿਪ੍ਪਕਤਭਾਵੇਨ ਸਞ੍ਜਾਤਕਿਚ੍ਚਾ. ਅਕਿਚ੍ਚਜਾਤੋਤਿ ਅਸਞ੍ਜਾਤਕਿਚ੍ਚੋ ਕਿਚ੍ਚਰਹਿਤੋ ਨਾਮ ਨਤ੍ਥਿ ਗਮਨਟ੍ਠਿਤਸਯਨਨਿਸਜ੍ਜਾਦਿਵਸੇਨ ਉਪ੍ਪਜ੍ਜਨਕਦੁਕ੍ਖਵਿਨੋਦਨਭਾਵਤੋ. ਸਂਯੋਗਪਰਮਾਤ੍ਵੇਵ ਸਮ੍ਭੋਗਾਤਿ ਇਮੇਸਂ ਸਤ੍ਤਾਨਂ ਸਂਭੁਞ੍ਜਿਤਬ੍ਬਵਤ੍ਥੂਨਿ ਨਾਮ ਪਕਤਿਯਾ ਵਿਰੋਧਸੀਲਾਨਿਪਿ ਅਸਂਯੋਗੇਨ ਵਾ ਅਸੁਨ੍ਦਰਾਨਿਪਿ, ਤਾਨਿ ਅਭਿਸਙ੍ਖਰਣਪਚਨਸਂਯੋਜਨਪਰਮਾਨਿ ਵੇਦਿਤਬ੍ਬਾਨਿ ਤਥਾ ਸਤਿ ਸਮ੍ਭੋਗਾਰਹਭਾਵੂਪਗਮਨਤੋ. ਤੇਨਾਹ ‘‘ਪਾਰਿਵਾਸਿਕਓਦਨਾਦੀਨੀ’’ਤਿਆਦਿ. ਉਣ੍ਹਾਪੇਤ੍ਵਾ ਪਰਿਭੁਞ੍ਜਿਤਬ੍ਬਯੁਤ੍ਤੇ ਪਰਿਭਜ੍ਜਿਤ੍ਵਾਤਿ ਅਧਿਪ੍ਪਾਯੋ.
ਵੇਰੋਚਨਅਸੁਰਿਨ੍ਦਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੯. ਅਰਞ੍ਞਾਯਤਨਇਸਿਸੁਤ੍ਤਵਣ੍ਣਨਾ
੨੫੫. ਜਾਮਾਤਿਕਾ ਵੁਚ੍ਚਤਿ ਧੀਤੁਪਤਿ, ਸਸੁਰੋ ਭਰਿਯਾਯ ਪਿਤਾ, ਤਸ੍ਮਾ ਇਮੇ ਅਨ੍ਤਰਵਤ੍ਤਿਨੋ ਦ੍ਵੇ ਜਨਾ ਸਕ੍ਕਵੇਪਚਿਤ੍ਤਿਨੋ ਸੁਜਾਯ ਵਸੇਨ ਜਾਮਾਤਿਕਸਸੁਰਾ. ‘‘ਚਿਰਦਿਕ੍ਖਿਤਾਨ’’ਨ੍ਤਿ ਦਿਕ੍ਖਿਤ੍ਵਾ ਪਬ੍ਬਜਿਤ੍ਵਾ ਚਿਰਕਾਲਾਨਂ ਵਤਸਮਾਦਾਨਵਸੇਨ ਇਤੋ ਬਾਹਿਰਕਾਨਂ ਪਬ੍ਬਜਿਤਾਨਨ੍ਤਿ ਆਹ ‘‘ਚਿਰਸਮਾਦਿਨ੍ਨਵਤਾਨ’’ਨ੍ਤਿ. ਇਤੋ ਪਟਿਕ੍ਕਮਾਤਿ ਇਤੋ ਯਥਾਠਿਤਟ੍ਠਾਨਤੋ ਅਪੇਹਿ ਅਪਕ੍ਕਮ. ਨ ਪਟਿਕ੍ਕੂਲਸਞ੍ਞਿਨੋ ਗੁਣੇ ਗਾਰਵਯੋਗਤੋ. ਦੇਵਾ ਹਿ ਯੇਭੁਯ੍ਯੇਨ ‘‘ਮਯਂ ਪੁਬ੍ਬੇ ਗੁਣਵਨ੍ਤੇ ਪਯਿਰੁਪਾਸਿਤ੍ਵਾ ਤੇਸਂ ਓਵਾਦੇ ਠਤ੍ਵਾ ਪੁਞ੍ਞਾਨਿ ਉਪਚਿਨਿਤ੍ਵਾ ਇਧੂਪਪਨ੍ਨਾ’’ਤਿ ਗੁਣਵਨ੍ਤੇਸੁ ਆਦਰਭਾਵਂ ਉਪਟ੍ਠਪੇਨ੍ਤਿ.
ਅਰਞ੍ਞਾਯਤਨਇਸਿਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੧੦. ਸਮੁਦ੍ਦਕਸੁਤ੍ਤਵਣ੍ਣਨਾ
੨੫੬. ਚਕ੍ਕਵਾਲ਼ਮਹਾਸਮੁਦ੍ਦਪਿਟ੍ਠਿਯਨ੍ਤਿ ਚਕ੍ਕਵਾਲ਼ਪਬ੍ਬਤਪਾਦਸਮਨ੍ਤਾ ਮਹਾਸਮੁਦ੍ਦਤੀਰਪਿਟ੍ਠਿਯਂ. ਯਥੇਵ ਸਿਨੇਰੁਸਮੀਪੇ ਮਹਾਸਮੁਦ੍ਦੋ ਅਨੁਪੁਬ੍ਬਨਿਨ੍ਨੋ ਅਨੁਪੁਬ੍ਬਪੋਣੋ ਅਨੁਪੁਬ੍ਬਪਬ੍ਭਾਰੋ, ਏਵਂ ਯੇਭੁਯ੍ਯੇਨ ਚਕ੍ਕਵਾਲ਼ਪਾਦਸਮੀਪੇਪਿ. ਤੇਨਾਹ ‘‘ਰਜਤਪਟ੍ਟਵਣ੍ਣੇ ਵਾਲੁਕਪੁਲਿਨੇ’’ਤਿ. ਵੁਤ੍ਤਪ੍ਪਕਾਰਾਸੂਤਿ ਅਨਨ੍ਤਰਸੁਤ੍ਤੇ ਵੁਤ੍ਤਪ੍ਪਕਾਰਾਸੁ. ਅਸ੍ਸਮਪਦੇਨਾਤਿ ਅਸ੍ਸਮਪਦਵੇਮਜ੍ਝੇਨ. ਏਵਂ ਚਿਨ੍ਤਯਿਂਸੂਤਿ ‘‘ਯਂ ਨੂਨ ਮਯ’’ਨ੍ਤਿਆਦਿਨਾ ਯਥਾ ਪਾਲ਼ਿਯਂ ਆਗਤਂ, ਏਵਂ ਮਨ੍ਤਯਿਂਸੁ.
ਇਚ੍ਛਿਤਕਰੋਤਿ ਯਦਿਚ੍ਛਿਤਕਰਣਂ. ਦੁਟ੍ਠਾਨਨ੍ਤਿ ਦੁਰਾਸਯਾਨਂ. ਤੇ ਪਨ ਦੁਟ੍ਠਜ੍ਝਾਸਯਾ ਵਿਰੁਦ੍ਧਾ ਹੋਨ੍ਤੀਤਿ ਆਹ ‘‘ਦੁਟ੍ਠਾਨਂ ਵਿਰੁਦ੍ਧਾਨ’’ਨ੍ਤਿ. ਪਵੁਤ੍ਤਨ੍ਤਿ ਬੀਜਂ ਸਨ੍ਧਾਯ ਵਪਿਤਂ. ਤੇਨਾਹ ‘‘ਖੇਤ੍ਤੇ ਪਤਿਟ੍ਠਾਪਿਤ’’ਨ੍ਤਿ.
ਸਾਯਮਾਸਭਤ੍ਤਨ੍ਤਿ ਸਾਯਂ ਅਸਿਤਬ੍ਬਭੋਜਨਂ. ਯਥਾਵਾਰਂ ਭਕ੍ਖਿਤਮੇਤਂ ਦੇਵਾਨਂ ਵਿਯ ਸੁਖੁਮਂ ਗੁਰੁਵਾਸਞ੍ਚ ਨ ਹੋਤੀਤਿ ‘‘ਭਤ੍ਤ’’ਨ੍ਤਿ ਵੁਤ੍ਤਂ. ਗੇਲਞ੍ਞਜਾਤਨ੍ਤਿ ਸਞ੍ਜਾਤਗੇਲਞ੍ਞਂ. ਵੇਪਤੀਤਿ ਕਮ੍ਪਤਿ ਪਵੇਧਤਿ.
ਸਮੁਦ੍ਦਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.
ਪਠਮਵਗ੍ਗਵਣ੍ਣਨਾ ਨਿਟ੍ਠਿਤਾ.
੨. ਦੁਤਿਯਵਗ੍ਗੋ
੧. ਵਤਪਦਸੁਤ੍ਤਵਣ੍ਣਨਾ
੨੫੭. ਸਮਾਦਾਤਬ੍ਬਤੋ ਵਤਾਨਿ, ਅਞ੍ਞਮਞ੍ਞਂ ਅਸਙ੍ਕਰਸਭਾਵੇਨ ਪਬ੍ਬਜਿਤਬ੍ਬਤੋ ਪਦਾਨਿ, ਤਤੋ ਏਵ ਅਸਂਕਿਣ੍ਣਭਾਗਾਤਿ ਕਤ੍ਵਾ ‘‘ਵਤਕੋਟ੍ਠਾਸਾਨੀ’’ਤਿ ਵੁਤ੍ਤਂ. ਸਮਤ੍ਤਾਨੀਤਿ ਪੁਞ੍ਞਵਿਸੇਸਤਾਯ ਪੁਜ੍ਜਭਵਫਲਨਿਬ੍ਬਤ੍ਤਨੇਨ ਕਿਤ੍ਤਿਸਞ੍ਞਾਨੇਨ ਚ ਸਮਂ ਅਤ੍ਤਾਨਿ ਸਮਤ੍ਤਾਨਿ. ਪਰਿਪੁਣ੍ਣਾਨੀਤਿ ਅਖਣ੍ਡਾਦਿਭਾਵੇਨ ਸਬ੍ਬਸੋ ਪੁਣ੍ਣਾਨਿ. ਸਮਾਦਿਨ੍ਨਾਨੀਤਿ ਤਤ੍ਥ ਸਕ੍ਕਚ੍ਚਕਾਰਿਤਾਯ ਸਮ੍ਮਾ ਆਦਿਨ੍ਨਾਨਿ. ਮਾਤੁਲਾਨੀਤਿ ਪਿਤੁਭਗਿਨੀ, ਨ ਯਾ ਕਾਚਿ ਮਾਤੁਲਸ੍ਸ ਭਰਿਯਾ ਕੁਲਜੇਟ੍ਠਕਾਨਂ ਅਧਿਪ੍ਪੇਤਤ੍ਤਾ, ਭਰਿਯਾਪਿ ਵਾ ਮਾਤੁਲਸਮ੍ਬਨ੍ਧਤੋ ਗਹੇਤਬ੍ਬਾ, ਤਥਾ ਸਤਿ ਮਹਾਪਿਤੁਭਰਿਯਾਦੀਨਮ੍ਪਿ ਸਙ੍ਗਹੋ ਦਟ੍ਠਬ੍ਬੋ.
ਆਦਿ-ਸਦ੍ਦੇਨ ਜੇਟ੍ਠਭਗਿਨੀਨਂ ਸਙ੍ਗਹੋ. ਅਪਚਿਤਿਕਾਰਕੋਤਿ ਤੇਸਂ ਪਚ੍ਚੁਟ੍ਠਾਨਕਰੋ. ਯੋ ਕੋਚਿ ਦਦਨ੍ਤੋਪਿ ਸਾਪੇਕ੍ਖੋ ਦੇਤਿ, ਸੋ ਮੁਤ੍ਤਚਾਗੋ ਨ ਹੋਤਿ, ਅਯਂ ਪਨ ਨ ਏਵਨ੍ਤਿ ‘‘ਮੁਤ੍ਤਚਾਗੋ ਹੋਤੀ’’ਤਿ ਵੁਤ੍ਤਂ. ਵਿਸ੍ਸਟ੍ਠਚਾਗੋਤਿ ਨਿਰਪੇਕ੍ਖਪਰਿਚ੍ਚਾਗੋਤਿ ਅਤ੍ਥੋ. ਯਥਾ ਪਾਣਾਤਿਪਾਤਬਹੁਲੋ ‘‘ਲੋਹਿਤਪਾਣੀ’’ਤਿ ਵੁਚ੍ਚਤਿ, ਤਥਾ ਦਾਨਬਹੁਲੋ ‘‘ਪਯਤਪਾਣੀ’’ਤਿ ਵੁਤ੍ਤੋਤਿ ਆਹ ‘‘ਦੇਯ੍ਯਧਮ੍ਮਦਾਨਤ੍ਥਾਯ ਸਦਾ ਧੋਤਹਤ੍ਥੋ’’ਤਿ. ਵੋਸ੍ਸਗ੍ਗਰਤੋਤਿ ਦੇਯ੍ਯਧਮ੍ਮਸ੍ਸ ਪਰਿਚ੍ਚਜਨੇ ਅਭਿਰਤੋ. ਪਰੇਹਿ ਯਾਚਿਤਬ੍ਬਾਰਹੋਤਿ ਪਰੇਹਿ ਯਾਚਿਤੁਂ ਯੁਤ੍ਤੋ ਇਚ੍ਛਿਤਸ੍ਸ ਅਤ੍ਥਸ੍ਸ ਤਾਵਦੇਵ ਵਿਸ੍ਸਜ੍ਜਨਤੋ. ਦਾਨੇਨੇਵ ਯੁਤ੍ਤੋਤਿ ਸਬ੍ਬਕਾਲਂ ਦਾਨੇਨੇਵ ਯੁਤ੍ਤੋ ਅਭਿਣ੍ਹਂ ਪਵਤ੍ਤਮਹਾਦਾਨਤ੍ਤਾ. ਦਾਨੇ ਚ ਸਂਵਿਭਾਗੇ ਚਾਤਿ ਪਰਸ੍ਸ ਸਮ੍ਪੁਣ੍ਣਂ ਕਤ੍ਵਾ ਪਰਿਚ੍ਚਜਨਸਙ੍ਖਾਤੇ ਦਾਨੇ ਚ ਅਤ੍ਤਨਾ ਪਰਿਭੁਞ੍ਜਿਤਬ੍ਬਤੋ ਸਂਵਿਭਜਨਸਙ੍ਖਾਤੇ ਸਂਵਿਭਾਗੇ ਚ ਰਤੋ ਅਭਿਰਤੋ.
ਵਤਪਦਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੨. ਸਕ੍ਕਨਾਮਸੁਤ੍ਤਵਣ੍ਣਨਾ
੨੫੮. ਮਨੁਸ੍ਸਭੂਤੋਤਿ ਮਨੁਸ੍ਸੇਸੁ ਭੂਤੋ, ਮਨੁਸ੍ਸਤ੍ਤਂ ਵਾ ਪਤ੍ਤੋ. ਆਵਸਥਨ੍ਤਿ ਨਿਵਾਸਟ੍ਠਾਨਂ ਕਾਰੇਤ੍ਵਾ ਅਦਾਸਿ, ਤਸ੍ਮਾ ਵਾਸਂ ਅਦਾਸੀਤਿ ਵਾਸਵੋ. ਅਤ੍ਥ-ਸਦ੍ਦੋ ਇਧ ਕਾਰਣਪਰਿਯਾਯੋਤਿ ਆਹ ‘‘ਸਹਸ੍ਸਮ੍ਪਿ ਕਾਰਣਾਨ’’ਨ੍ਤਿ. ਸ੍ਵਾਯਮਤ੍ਥੋ ਹੇਟ੍ਠਾ ਵਿਭਾਵਿਤੋਵ. ਵਿਨਿਚ੍ਛਿਨਤਿ, ਤਸ੍ਮਾ ਸਹਸ੍ਸਂ ਪਞ੍ਞਾਅਕ੍ਖੀਨਿ ਏਤਸ੍ਸਾਤਿ ਸਹਸ੍ਸਕ੍ਖੋ. ਮਘਂ ਵੁਚ੍ਚਤਿ ਧਨਂ, ਤਂ ਪਨ ਸਦ੍ਧਾਸਙ੍ਖਾਤਂ ਮਘਂ ਅਸ੍ਸ ਅਤ੍ਥੀਤਿ ਮਘਵਾ. ਪੁਰੇ ਦਾਨਂ ਦਦਾਤੀਤਿ ਪੁਰਿਨ੍ਦਦੋ ਅਨੁਨਾਸਿਕਲੋਪਂ ਅਕਤ੍ਵਾ. ਪੁਞ੍ਞਾਨਿ ਕਾਤੁਂ ਸਕ੍ਕੋਤੀਤਿ ਸਕ੍ਕੋ.
ਸਕ੍ਕਨਾਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੩. ਮਹਾਲਿਸੁਤ੍ਤਵਣ੍ਣਨਾ
੨੫੯. ਸੋਤਿ ਸਕ੍ਕੋ ਦੇਵਰਾਜਾ. ਬਹੁਵਚਨੇ ਵਤ੍ਤਬ੍ਬੇ ਏਕਵਚਨਂ ਵੁਤ੍ਤਂ. ਵੁਚ੍ਚਤੀਤਿ ਵਚਨਂ, ਅਤ੍ਥੋ. ਤਸ੍ਮਾ ਬਹੁਵਚਨੇਤਿ ਬਹੁਮ੍ਹਿ ਅਤ੍ਥੇਤਿ ਅਤ੍ਥੋ. ਯਥਾ ਪਟਿਪਜ੍ਜਨ੍ਤੋ ਅਨੁਕ੍ਕਮੇਨ ਤੇ ਧਮ੍ਮੇ ਸਮਾਦਿਯਿਤ੍ਵਾ ਸਕ੍ਕੋ ਸਕ੍ਕਤ੍ਤਂ ਅਜ੍ਝਗਾ, ਤਂ ਪਟਿਪਤ੍ਤਿਂ ਦਸ੍ਸੇਤੁਂ ‘‘ਸਕ੍ਕੋ ਕਿਰਾ’’ਤਿਆਦਿ ਵੁਤ੍ਤਂ. ਅਨਨ੍ਤਰੇਤਿ ਸਕ੍ਕਭਾਵਸ੍ਸ ਅਤੀਤਾਨਨ੍ਤਰੇ ਅਤ੍ਤਭਾਵੇ. ਤਂ ਸਬ੍ਬਨ੍ਤਿ ਸਕ੍ਕਸ੍ਸ ਮਘਮਾਣਵਕਾਲੇ ਸਮ੍ਮਾਪਟਿਪਤ੍ਤਿਂ, ਤਾਯ ਸਕ੍ਕਭਾਵੂਪਗਮਨਞ੍ਚਾਤਿ ਤਂ ਸਬ੍ਬਂ. ਵੁਤ੍ਤੋ, ਤਸ੍ਮਾ ਤਤ੍ਥ ਵੁਤ੍ਤਨਯੇਨੇਵ ਵੇਦਿਤਬ੍ਬੋਤਿ ਅਧਿਪ੍ਪਾਯੋ.
ਮਹਾਲਿਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੪. ਦਲਿਦ੍ਦਸੁਤ੍ਤਵਣ੍ਣਨਾ
੨੬੦. ਮਨੁਸ੍ਸਦਲਿਦ੍ਦੋਤਿ ਮਨੁਸ੍ਸੇਸੁ ਦੁਗ੍ਗਤੋ. ਮਨੁਸ੍ਸਕਾਰੁਞ੍ਞਤਨ੍ਤਿ ਮਨੁਸ੍ਸੇਸੁ ਪਰਮਨਿਹੀਨਤਂ. ਮਨੁਸ੍ਸਕਪਣੋਤਿ ਮਨੁਸ੍ਸੇਸੁ ਵਾ ਪਰਮਨਿਹੀਨੋ. ਤਸ੍ਮਿਂ ਠਾਨੇਤਿ ਤਸ੍ਸ ਦੇਵਪੁਤ੍ਤਸ੍ਸ ਤਸ੍ਮਿਂ ਉਪ੍ਪਜ੍ਜਨਟ੍ਠਾਨੇ. ਲਾਮਕਤੋ ਚਿਨ੍ਤੇਨ੍ਤੀਤਿ ਤਸ੍ਸ ਪੁਰਿਮਵਤ੍ਥੁਂ ਨਿਸ੍ਸਾਯ ਹੀਨਤੋ ਚਿਨ੍ਤੇਨ੍ਤਿ. ਕਥੇਨ੍ਤੀਤਿ ਤਮੇਵ ਪਰੇਸਂ ਕਥੇਨ੍ਤਿ. ਵਿਤ੍ਥਾਰੇਨ੍ਤੀਤਿ ਵੁਤ੍ਤਮਤ੍ਥਂ ਵਿਤ੍ਥਾਰਿਕਂ ਕਰੋਨ੍ਤਿ. ਸਬ੍ਬਦਾ ਪਰਿਚ੍ਛਿਜ੍ਜ ਪਰਿਵਾਰਸਮ੍ਪਨ੍ਨੋ ਹੁਤ੍ਵਾ ਅਡ੍ਢਟ੍ਠਰਤਨੇ ਹਤ੍ਥਿਕ੍ਖਨ੍ਧੇ ਮਹਚ੍ਚਰਾਜਾਨੁਭਾਵੇਨ ਨਿਸਿਨ੍ਨਤ੍ਤਾ ਜਨਕਾਯੇਨ ਸਮੁਲ੍ਲੋਕਿਯਮਾਨੋ. ਅਵਲਮ੍ਬਨ੍ਤੀਤਿ ਓਲਮ੍ਬਨ੍ਤਿ. ਵਨ੍ਦਨਮਤ੍ਤਂ ਵਾ ਨਾਹੋਸਿ, ਅਞ੍ਞਦਤ੍ਥੁ ਪਚ੍ਚੇਕਬੁਦ੍ਧਤੋ ਅਤ੍ਤਨੋ ਸਮਾਨਾਦਰਕਿਰਿਯਂ ਪਚ੍ਚਾਸੀਸਤਿ. ਤੇਨ ਵੁਤ੍ਤਂ ‘‘ਸੋ’’ਤਿਆਦਿ. ਕ੍ਵਾਯਨ੍ਤਿ ਕੋ ਅਯਨ੍ਤਿ ਬ੍ਯਾਪਨ੍ਨਵਸੇਨ ਵਦਤਿ. ਕਾਲ਼ਰਤ੍ਤੇਹਿ ਸੁਤ੍ਤੇਹਿ ਸਿਬ੍ਬਿਤਤ੍ਤਾ ਵਣ੍ਣਵਿਕਾਰਂ ਦਿਸ੍ਵਾ ‘‘ਕੁਟ੍ਠਿਚੀਵਰਾਨਿ ਪਾਰੁਤੋ’’ਤਿ ਆਹ. ਮਹਾਨਿਰਯੇ ਨਿਬ੍ਬਤ੍ਤਿਤ੍ਵਾ ਮਹਾਦੁਕ੍ਖਂ ਪਚ੍ਚਨੁਭੋਤਿ. ਤਦਨੁਰੂਪਪਾਪਕਮ੍ਮਸ੍ਸ ਵਿਪਾਕਾਵਸੇਸੇਨ ਲਦ੍ਧੋਕਾਸੇਨ ਰਾਜਗਹੇ…ਪੇ… ਪਟਿਸਨ੍ਧਿਂ ਗਣ੍ਹਿ. ਕਾਮਞ੍ਚ ਏਤ੍ਥ ਪਟਿਸਨ੍ਧਿਗ੍ਗਹਣਂ ਕੁਸਲਕਮ੍ਮੇਨੇਵ, ਤਸ੍ਸ ਪਨ ਅਕੁਸਲਕਮ੍ਮਸ੍ਸ ਵਿਪਾਕਿਨੋ ਬਲਵਭਾਵਤੋ ਵੁਤ੍ਤਂ ‘‘ਵਿਪਾਕਾਵਸੇਸੇਨਾ’’ਤਿ. ਤੇਨਾਹ ‘‘ਗਹਿਤਕਾਲਤੋ…ਪੇ… ਨਿਕ੍ਖਨ੍ਤੋ’’ਤਿ. ਭਿਕ੍ਖਾਯ ਚਰਿਤੁਂ ਸਮਤ੍ਥਕਾਲਤੋ ਪਟ੍ਠਾਯ ਰੋਗਸ੍ਸ ਬਲਵਤਾਯ ਮਂਸਾਨਿ…ਪੇ… ਪਤਨ੍ਤਿ. ਞਾਣਂ ਪੇਸੇਤ੍ਵਾਤਿ ਵਿਪਸ੍ਸਨਾਪਟਿਪਾਟਿਯਾ ਭਾਵਨਾਞਾਣਂ ਨਿਬ੍ਬਾਨਂ ਪਟਿਪੇਸੇਤ੍ਵਾ ਪਵਤ੍ਤੇਤ੍ਵਾ. ਇਨ੍ਦ੍ਰਿਯਾਨਂ ਪਰਿਪਕ੍ਕਤ੍ਤਾ ਸਤ੍ਥੁ ਦੇਸਨਾਵਿਲਾਸੇਨ ਸੋਤਾਪਤ੍ਤਿਫਲੇ ਪਤਿਟ੍ਠਿਤੋ. ਚੁਮ੍ਬਟਨ੍ਤਿ ਪਾਦਚੁਮ੍ਬਟਂ. ਕੁਟ੍ਠਿਨੋ ਹਿ ਸਕਲਪਾਦਤਲਂ ਮਾ ਰੁਜੀਤਿ ਚੁਮ੍ਬਟਂ ਕਤ੍ਵਾ ਤਂ ਪਾਦਤਲੇ ਬਨ੍ਧਿਤ੍ਵਾ ਗਚ੍ਛਨ੍ਤਿ, ਮਤ੍ਤਿਕਪਾਤਿਂ ਭਿਨ੍ਦਿਤ੍ਵਾ ਵਿਯ ਤਥਾ ਨਿਹੀਨਮਨੁਸ੍ਸਤ੍ਤਭਾਵਤੋ ਚਵਿਤ੍ਵਾ ਸੁਵਣ੍ਣਪਾਤਿਂ ਪਟਿਲਭਨ੍ਤੋ ਵਿਯ ਦੇਵਤ੍ਤਭਾਵਂ ਗਣ੍ਹਨ੍ਤੋ ਚੁਤਿਚਿਤ੍ਤਤੋ ਦੁਤਿਯਚਿਤ੍ਤਵਾਰੇ ਆਦਾਨਚਿਤ੍ਤਕ੍ਖਣੇ ਦੇਵਲੋਕੇ ਨਿਬ੍ਬਤ੍ਤੋ.
ਮਗ੍ਗੇਨਾਗਤਾਤਿ ਮਗ੍ਗਾਧਿਗਮਨੇਨ ਆਗਤਾ ਉਪ੍ਪਨ੍ਨਾ. ਅਰਿਯਕਨ੍ਤਸੀਲਨ੍ਤਿ ਅਰਿਯਾਨਂ ਕਨ੍ਤਂ ਮਨਾਪਂ ਮਨੋਰਮਂ ਸੀਲਧਮ੍ਮਂ. ਅਰਿਯਾਨਂ ਅਧਿਚਿਤ੍ਤਅਧਿਪਞ੍ਞਾਸਿਕ੍ਖਾ ਵਿਯ ਅਧਿਸੀਲਸਿਕ੍ਖਾਪਿ ਸਬ੍ਬਾ ਅਤਿਵਿਯ ਕਨ੍ਤਾ ਏਵਾਤਿ ਆਹ ‘‘ਕਿਞ੍ਚਾਪੀ’’ਤਿਆਦਿ. ਇਮਸ੍ਮਿਂ ਪਨਤ੍ਥੇਤਿ ਇਮਸ੍ਮਿਂ ਸੋਤਾਪਨ੍ਨਸ੍ਸ ਭਵਸਙ੍ਖਾਤੇ ਅਤ੍ਥੇ ਨਿਦ੍ਧਾਰੇਤ੍ਵਾ ਵੁਚ੍ਚਮਾਨੇ. ਪਞ੍ਚਸੀਲਮ੍ਪਿ ਯਸ੍ਮਾ ਦਿਟ੍ਠਿ ਵਿਯ ਭਵਨ੍ਤਰੇਪਿ ਅਪ੍ਪਹੀਨਂ.
ਦਲਿਦ੍ਦਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੫. ਰਾਮਣੇਯ੍ਯਕਸੁਤ੍ਤਵਣ੍ਣਨਾ
੨੬੧. ਆਰਮਨ੍ਤਿ ਏਤ੍ਥ ਸਤ੍ਤਾਤਿ ਆਰਾਮਾ, ਮਨੋਰਮਾ ਉਪਵਨਾਦਯੋ. ਤੇ ਏਵ ਚੇਤੇਨ੍ਤਿ ਏਤ੍ਥ ਸਦ੍ਧਾਯ ਅਤ੍ਤਨੋ ਪੀਤਿਸੋਮਨਸ੍ਸਂ ਸਨ੍ਧਹਨ੍ਤੀਤਿ ਚੇਤਿਯਾਤਿ ਚ ਵੁਚ੍ਚਨ੍ਤਿ. ਮਨੁਸ੍ਸਰਮਣੀਯਭਾਵਸ੍ਸਾਤਿ ਮਨੁਸ੍ਸਾਨਂ ਆਰਮਣੀਯਭਾਵਸ੍ਸ. ਤਸ੍ਸ ਪਨ ਸੀਲਾਦਿਗੁਣਵਸੇਨ ਅਚਿਨ੍ਤੇਯ੍ਯਾਪਰਿਮੇਯ੍ਯਾਨੁਭਾਵਤਾਪਿ ਹੋਤੀਤਿ ਭਗਵਾ ‘‘ਨਾਗ੍ਘਨ੍ਤਿ ਸੋਲ਼ਸਿ’’ਨ੍ਤਿ ਅਵੋਚ. ਅਚੇਤਨਾਯ ਭੂਮਿਯਾ ਰਮਣੀਯਤਾ ਨਾਮ ਗੁਣਵਿਸਿਟ੍ਠਾਨਂ ਅਰਿਯਾਨਂ ਸੇਵਨਵਸੇਨ ਵੇਦਿਤਬ੍ਬਾਤਿ ਵੁਤ੍ਤਂ ‘‘ਇਦਾਨਿ…ਪੇ… ਗਾਮੇ ਵਾਤਿਆਦਿਮਾਹਾ’’ਤਿ.
ਰਾਮਣੇਯ੍ਯਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੬. ਯਜਮਾਨਸੁਤ੍ਤਵਣ੍ਣਨਾ
੨੬੨. ਯਜਨ੍ਤਾਨਨ੍ਤਿ ਦਕ੍ਖਿਣੇਯ੍ਯਂ ਉਦ੍ਦਿਸ੍ਸ ਦੇਨ੍ਤਾਨਂ. ਅਟ੍ਠੁਪ੍ਪਤ੍ਤਿਕੋ ਸੁਤ੍ਤਨਿਕ੍ਖੇਪੋਤਿ ਦਸ੍ਸੇਤ੍ਵਾ ਅਤ੍ਥਵਣ੍ਣਨਂ ਕਾਤੁਂ ‘‘ਤਦਾ ਕਿਰਾ’’ਤਿਆਦਿ ਵੁਤ੍ਤਂ. ਅਗ੍ਗਨ੍ਤਿ ਸੇਟ੍ਠਂ. ਤੇਹਿ ਤੇਹਿ ਵਾ ਯਥਾਲਦ੍ਧਸਪ੍ਪਿਆਦਯੋ ਮਾ ਨਸ੍ਸਨ੍ਤੁ, ਅਗ੍ਗਭਾਵੇਨ ਗਹਿਤਾਨਿ ਸਪ੍ਪਿਆਦੀਨਿ ਕੇਵਲਂ ਅਗ੍ਗਿਮ੍ਹਿ ਝਾਪਨੇਨ, ਦੇਵਾ ਮਨੁਸ੍ਸਾ ਮਿਚ੍ਛਾਗਾਹੇਨ ਮਾ ਨਸ੍ਸਨ੍ਤੁ. ਤਕ੍ਕੇਨਾਤਿ ਤਕ੍ਕਮਤ੍ਤੇਨ. ‘‘ਕਥੇਮਾ’’ਤਿ ਅਮ੍ਹੇ ਮਞ੍ਞਥ, ਇਦਾਨਿ ਪਸ੍ਸਥ, ਪਚ੍ਚਕ੍ਖਤੋ ਅਯਂ ਵੋ…ਪੇ… ਆਗਚ੍ਛਤੀਤਿ ਆਹਂਸੂਤਿ ਯੋਜਨਾ.
ਉਪਧਿਵਿਪਾਕਨ੍ਤਿ ਉਪਧੀਸੁ ਵਾ ਵਿਪਚ੍ਚਤਿ, ਉਪਧਯੋ ਵਾ ਵਿਪਾਕਾ ਏਤਸ੍ਸਾਤਿ ਉਪਧਿਵਿਪਾਕਂ. ਵਿਪ੍ਫਾਰਵਨ੍ਤਂ ਹੋਤਿ ਵਿਪੁਲਪਕ੍ਖਤਾਯ. ਭਿਕ੍ਖੁਸਙ੍ਘਸ੍ਸ ਅਦਂਸੁ ‘‘ਸਮ੍ਮਾਸਮ੍ਬੁਦ੍ਧੇਨ ਮਹਾਬ੍ਰਹ੍ਮੁਨਾ ਚ ਏਵਂ ਓਵਾਦੋ ਦਿਨ੍ਨੋ’’ਤਿ.
ਯਜਮਾਨਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੭. ਬੁਦ੍ਧਵਨ੍ਦਨਾਸੁਤ੍ਤਵਣ੍ਣਨਾ
੨੬੩. ਉਟ੍ਠਹਾਤਿ ਉਟ੍ਠਾਨਂ ਕਾਯਿਕਵੀਰਿਯਂ ਕਰੋਹਿ. ਤੇਨਾਹ ‘‘ਵਿਚਰ, ਲੋਕੇ’’ਤਿ. ਚੇਤਸਿਕਵੀਰਿਯਂ ਪਨ ਭਗਵਤਾ ਮਤ੍ਥਕਂ ਪਾਪਿਤਮੇਵ. ਤੇਨਾਹ ‘‘ਵਿਜਿਤਸਙ੍ਗਾਮਾ’’ਤਿ. ਦ੍ਵਾਦਸਯੋਜਨਿਕਸ੍ਸ ਉਚ੍ਚਭਾਵੇਨ. ਵਿਤ੍ਥਾਰਤੋ ਪਨ ਆਯਾਮਤੋ ਚ ਅਨੇਕਯੋਜਨਸਤਸਹਸ੍ਸਪਰਿਮਾਣਚਕ੍ਕਵਾਲ਼ਂ ਅਤਿਬ੍ਯਾਪੇਤ੍ਵਾ ਠਿਤਸ੍ਸ. ਪਨ੍ਨਭਾਰਾਤਿ ਪਾਤਿਤਭਾਰ. ਨਿਕ੍ਖੇਪਿਤਬ੍ਬਤੋ ਭਾਰਾਤਿ ਆਹ ‘‘ਓਰੋਪਿਤਖਨ੍ਧਾ’’ਤਿਆਦਿ. ਤੇ ਹਿ ਤਂਸਮਙ੍ਗਿਨੋ ਪੁਗ੍ਗਲਸ੍ਸ ਸਮ੍ਪਾਤਨਟ੍ਠੇਨ ਭਾਰਾ ਨਾਮ. ਵੁਤ੍ਤਞ੍ਹੇਤਂ ‘‘ਭਾਰਾ ਹਵੇ ਪਞ੍ਚਕ੍ਖਨ੍ਧਾ’’ਤਿ (ਸਂ. ਨਿ. ੩.੨੨). ਤਦੇਕਦੇਸਾ ਚ ਕਿਲੇਸਾਭਿਸਙ੍ਖਾਰਾ. ਪਨ੍ਨਰਸਾਯ ਪੁਣ੍ਣਮਾਯ ਰਤ੍ਤਿਨ੍ਤਿ ਯਥਾ ਪਨ੍ਨਰਸਪੁਣ੍ਣਮਾਯ ਰਤ੍ਤਿਯਂ ਪਰਿਪੁਣ੍ਣਕਾਲੇ ਉਪਕ੍ਕਿਲੇਸਵਿਮੁਤ੍ਤੋ ਚਨ੍ਦੋ ਸੋਭਤਿ, ਏਵਂ ਤਵ ਚਿਤ੍ਤਂ ਸਬ੍ਬਸੋ ਉਪਕ੍ਕਿਲੇਸਵਿਮੁਤ੍ਤਂ ਸੋਭਤੀਤਿ ਅਧਿਪ੍ਪਾਯੋ.
ਬੁਦ੍ਧਵਨ੍ਦਨਾਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੮. ਗਹਟ੍ਠਵਨ੍ਦਨਾਸੁਤ੍ਤਵਣ੍ਣਨਾ
੨੬੪. ਪੁਥੁਦ੍ਦਿਸਾਤਿ ਬਹੁਦਿਸਾ. ਕਾ ਪਨ ਤਾਤਿ ਆਹ ‘‘ਚਤਸ੍ਸੋ ਦਿਸਾ ਚਤਸ੍ਸੋ ਅਨੁਦਿਸਾ ਚਾ’’ਤਿ. ਅਨੁਦਿਸਾਗਹਣੇਨ ਚੇਤ੍ਥ ਉਦ੍ਧਂ ਅਧੋਪਿ ਗਯ੍ਹਤੀਤਿ ਚ ਦਸ੍ਸੇਤਿ. ਭੂਮਿਵਾਸਿਨੋਤਿ ਭੂਮਿਪਟਿਬਦ੍ਧਵੁਤ੍ਤਿਨੋ. ਏਤੇਨ ਰੁਕ੍ਖਪਬ੍ਬਤਨਿਵਾਸਿਨੋਪਿ ਗਹਿਤਾ ਹੋਨ੍ਤਿ. ਚਿਰਰਤ੍ਤਸਮਾਹਿਤਚਿਤ੍ਤੇਤਿ ਉਪਚਾਰਪ੍ਪਨਾਝਾਨਾਨਿ ਉਪ੍ਪਾਦੇਤ੍ਵਾ ਅਪਰਿਹੀਨਜ੍ਝਾਨਤਾਯ ਚਿਰਕਾਲਂ ਸਮਾਹਿਤਚਿਤ੍ਤੇ. ਆਪਾਣਕੋਟਿਕਨ੍ਤਿ ਜੀਵਿਤਪਰਿਯਨ੍ਤਂ ਯਾਵਜੀਵਂ. ਏਵਮਾਦੀਤਿ ਆਦਿ-ਸਦ੍ਦੇਨ ਅਵਸੇਸਪੁਞ੍ਞਕਿਰਿਯਵਤ੍ਥੂਨਿ ਸਙ੍ਗਣ੍ਹਾਤਿ. ਨਿਚ੍ਚਸੀਲਵਸੇਨ ਪਞ੍ਚਹਿ, ਨਿਯਮਸੀਲਵਸੇਨ ਦਸਹਿ. ਪਿ-ਸਦ੍ਦੇਨ ਤਤੋ ਕਤਿਪਯੇਹਿ ਉਪੋਸਥਸੀਲਵਸੇਨ ਅਟ੍ਠਹਿਪੀਤਿ ਦਸ੍ਸੇਤਿ. ਧਮ੍ਮਿਕੇਹੀਤਿ ਧਮ੍ਮਤੋ ਅਨਪੇਤੇਹਿ. ਪਮੁਖੋਤਿ ਪਮੋਕ੍ਖੋ.
ਗਹਟ੍ਠਵਨ੍ਦਨਾਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੯. ਸਤ੍ਥਾਰਵਨ੍ਦਨਾਸੁਤ੍ਤਵਣ੍ਣਨਾ
੨੬੫. ਬ੍ਰਹ੍ਮਜਾਣੁਕੋਤਿ ਦਕ੍ਖਿਣਜਾਣੁਮਣ੍ਡਲਂ ਪਥਵਿਯਂ ਠਪੇਤ੍ਵਾ ਵਨ੍ਦਮਾਨੋ ਬ੍ਰਹ੍ਮਜਾਣੁਕੋ ਨਾਮ ਤਥਾਭੂਤੋ ਹੁਤ੍ਵਾ. ਯਜਿਤਬ੍ਬਤੋ ਯਕ੍ਖੋ, ਪੂਜਨੀਯੋ. ਏਵਂ ਪੂਜਾਵਿਸੇਸਯੋਗਤੋ ਸਕ੍ਕੋਤਿ ਆਹ ‘‘ਸੋ ਯਕ੍ਖੋਤਿ ਸੋ ਸਕ੍ਕੋ’’ਤਿ. ਸਕ੍ਕਸ੍ਸ ਨਮਕ੍ਕਾਰਭਾਜਨਭੂਤਞ੍ਹਿ ਪੁਚ੍ਛਨ੍ਤੋ ਮਾਤਲਿ ‘‘ਕੋ ਨਾਮ ਸੋ ਯਕ੍ਖੋ’’ਤਿ ਆਹ. ਗੁਣਨੇਮਿਤ੍ਤਕੇਹੀਤਿ ਗੁਣਹੇਤੁਕੇਹਿ ਅਨਨ੍ਤਾਨਿ ਹਿ ਬੁਦ੍ਧਾਨਂ ਨਾਮਾਨਿ, ਤਾਨਿ ਚ ਖੋ ਸਬ੍ਬਾਨਿਪਿ ਗੁਣਨੇਮਿਤ੍ਤਕਾਨੇਵ. ਅਨਨ੍ਤਗੁਣਤ੍ਤਾ. ਵੁਤ੍ਤਞ੍ਹੇਤਂ –
‘‘ਅਸਙ੍ਖ੍ਯੇਯ੍ਯਾਨਿ ਨਾਮਾਨਿ, ਸਗੁਣੇਨ ਮਹੇਸਿਨੋ;
ਗੁਣੇਨ ਨਾਮਮੁਦ੍ਧੇਯ੍ਯਂ, ਅਪਿ ਨਾਮਸਹਸ੍ਸਤੋ’’ਤਿ. –
ਤਸ੍ਮਾ ਅਨੋਮਨਾਮਨ੍ਤਿ ਪਰਿਪੁਣ੍ਣਗੁਣਨਾਮਨ੍ਤਿ ਅਤ੍ਥੋ. ਸਮਤਿਕ੍ਕਮੇਨਾਤਿ ਸਮ੍ਮਾ ਸਮੁਚ੍ਛਿਨ੍ਦਨਵਸੇਨ ਅਤਿਕ੍ਕਮਨੇਨ. ਕਿਲੇਸਾਰੀਨਂ ਅਪੇਤਚਯੋਤਿ ਅਪਚਯੋ, ਸੋ ਆਰਮਿਤਬ੍ਬਟ੍ਠੇਨ ਆਰਾਮੋ ਏਤੇਸਨ੍ਤਿ ਅਪਚਯਾਰਾਮਾ. ਤੇਨਾਹ ‘‘ਵਟ੍ਟਵਿਦ੍ਧਂਸਨੇ ਰਤਾ’’ਤਿ.
ਸਤ੍ਥਾਰਵਨ੍ਦਨਾਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੧੦. ਸਙ੍ਘਵਨ੍ਦਨਾਸੁਤ੍ਤਵਣ੍ਣਨਾ
੨੬੬. ਪੂਤਿਮ੍ਹਿ ਦੇਹੇ ਮਾਤੁ ਸਰੀਰੇ ਸਯਨਤੋ, ਅਤ੍ਤਨੋ ਏਵ ਵਾ ਪੂਤਿਦੇਹਂ ਸਰੀਰਂ ਤਸ੍ਮਿਂ ਠਿਤਤਾਯ ਅਵਤ੍ਥਰਿਤ੍ਵਾ ਸਯਨਤੋ ਪੂਤਿਦੇਹਸਯਾਤਿ ਯੋਜਨਾ. ਕੁਣਪਮ੍ਹੇਤੇਤਿ ਏਤੇ ਮਨੁਸ੍ਸਾ ਅਸੁਚਿਦੁਗ੍ਗਨ੍ਧਜੇਗੁਚ੍ਛਪਟਿਕ੍ਕੂਲੇ ਮਾਤੁਕੁਚ੍ਛਿਸਙ੍ਖਾਤੇ ਕੁਣਪਸ੍ਮਿਂ ਦਸ ਮਾਸੇ ਨਿਮੁਗ੍ਗਾ. ਤੇਸਂ ਕਿਨ੍ਨਾਮ ਤ੍ਵਂ ਪਿਹਯਸੀਤਿ ਯੋਜਨਾ. ਏਤੇਸਂ ਏਤਂ ਵਿਹਯਾਮੀਤਿ ਏਤੇਸਂ ਇਸੀਨਂ ਏਤਂ ਸਮ੍ਮਾਪਟਿਪਤ੍ਤਿਂ ਵਿਹਯਾਮਿ. ਇਦਾਨਿ ਤਂ ਪਟਿਪਤ੍ਤਿਂ ਦਸ੍ਸੇਤੁਂ ‘‘ਨ ਤੇ ਸਂ ਕੋਟ੍ਠੇ ਓਪੇਨ੍ਤੀ’’ਤਿ ਵੁਤ੍ਤਂ. ਧਞ੍ਞਂ ਕੋਟ੍ਠੇ ਨ ਪਕ੍ਖਿਪਨ੍ਤਿ ਪਕ੍ਖਿਪਿਤਬ੍ਬਸ੍ਸ ਚ ਅਭਾਵਤੋ. ਤੇਨਾਹ ‘‘ਨ ਹਿ ਏਤੇਸਂ ਧਞ੍ਞ’’ਨ੍ਤਿ. ਪਰੇਸਂ ਨਿਟ੍ਠਿਤਨ੍ਤਿ ਪਰੇਸਂ ਗਹਿਤਂ ਸਨ੍ਤਕਂ ਤੇਸਂ ਪਾਕਾਯ ਨਿਟ੍ਠਿਤਂ. ਭਿਕ੍ਖਾਚਾਰਵਤ੍ਤੇਨਾਤਿ ਪਿਣ੍ਡਾਚਰਿਯਾਯ. ਏਸਮਾਨਾ ਪਰਿਯੇਸਨ੍ਤਾ. ਏਵਂ ਪਰਿਯਿਟ੍ਠੇਨ. ਯਾਪੇਨ੍ਤਿ, ਨ ਏਸਨ੍ਤਿ ਅਨੇਸਨਂ. ਸੁਸਮਾਦਿਨ੍ਨਸੁਨ੍ਦਰਵਤਾਤਿ ਸੁਟ੍ਠੁ ਸਮਾਦਿਨ੍ਨਸੋਭਨਵਤਾ.
ਏਵਂ ਸੁਭਾਸਿਤਭਾਸਿਨੋਤਿ ਗਨ੍ਥਧੁਰਵਿਪਸ੍ਸਨਾਧੁਰਾਨਂ ਵਸੇਨ ਗੁਣਪਰਿਮਾਣਸੁਭਾਸਿਤਸ੍ਸੇਵ ਭਾਸਨਸੀਲਾ. ਅਰਿਯੇਨ ਤੁਣ੍ਹੀਭੂਤੇਨ ਤੁਣ੍ਹੀਭੂਤਾ. ਤਤੋ ਏਵ ਮਨਸ੍ਸ ਸਾਤਿਸਯਂ ਸਮਞ੍ਚਰਾ. ਗਹਿਤਦਣ੍ਡੇਸੁ ਪਰਾਮਾਸਾਦਿਪਯੁਤ੍ਤੇਸੁ ਦਣ੍ਡਾਦਾਨਾਦਿਹੇਤੁ ਉਪ੍ਪਜ੍ਜਨਕਕਿਲੇਸਪਰਿਲ਼ਾਹਾਭਾਵਤੋ ਨਿਬ੍ਬੁਤਾ. ਤੇਨਾਹ ‘‘ਵਿਸ੍ਸਟ੍ਠਦਣ੍ਡਾ’’ਤਿ. ਸਾਦਾਨੇਸੂਤਿ ਸਭਵਾਦਾਨੇਸੁ. ਅਨਾਦਾਨਾਤਿ ਤਬ੍ਬਿਰਹਿਤਾ. ਤੇਨਾਹ ‘‘ਭਵਯੋਨੀ’’ਤਿਆਦਿ.
ਸਙ੍ਘਵਨ੍ਦਨਾਸੁਤ੍ਤਵਣ੍ਣਨਾ ਨਿਟ੍ਠਿਤਾ.
ਦੁਤਿਯਵਗ੍ਗਵਣ੍ਣਨਾ ਨਿਟ੍ਠਿਤਾ.
੩. ਤਤਿਯਵਗ੍ਗੋ
੧. ਛੇਤ੍ਵਾਸੁਤ੍ਤਵਣ੍ਣਨਾ
੨੬੭. ਵੁਤ੍ਤਤ੍ਥਮੇਵ ਹੇਟ੍ਠਾ ਦੇਵਪੁਤ੍ਤਸਂਯੁਤ੍ਤਵਣ੍ਣਨਾਯਂ.
ਛੇਤ੍ਵਾਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੩. ਦੁਬ੍ਬਣ੍ਣਿਯਸੁਤ੍ਤਵਣ੍ਣਨਾ
੨੬੮. ਦੁਬ੍ਬਣ੍ਣੋ ਦੁਦ੍ਦਸਿਕੋ ਵਿਰੂਪਵਣ੍ਣੋ. ਓਕੋਟਿਮਕੋਤਿ ਰਸ੍ਸਭਾਵੇਨ ਅਵਰਕੋਟਿਮਕੋ. ਸਕ੍ਕੇਨ ਗਹਿਤਨਾਮਮੇਵੇਤਂ, ਨ ਪਨ ਸੋ ਤਥਾਰੂਪੋ ਕੋਚਿ ਯਕ੍ਖੋ. ਤੇਨਾਹ ‘‘ਏਕੋ ਰੂਪਾਵਚਰਬ੍ਰਹ੍ਮਾ’’ਤਿ. ਯਦਿ ਏਵਂ ਕਸ੍ਮਾ ਸੋ ਤਥਾਰੂਪੋ ਹੁਤ੍ਵਾ ਆਗਤੋਤਿ ਆਹ ‘‘ਸਕ੍ਕੋ ਕਿਰਾ’’ਤਿ. ਕਥਂ ਪਨੇਤ੍ਥ ਞਾਯਤਿ ‘‘ਸੋ ਏਕੋ ਰੂਪਾਵਚਰਬ੍ਰਹ੍ਮਾ, ਨ ਪਨੇਸੋ ਅਵਰੁਦ੍ਧਕਯਕ੍ਖੋ’’ਤਿ ਯੁਤ੍ਤਿਂ ਦਸ੍ਸੇਨ੍ਤੋ ‘‘ਅਵਰੁਦ੍ਧਕਯਕ੍ਖਾ ਪਨਾ’’ਤਿਆਦਿਮਾਹ. ਦੇਵਾਨਂ ਵਚਨਂ ਸੁਤ੍ਵਾ. ਫਰੁਸੇਨਾਤਿ ਫਰੁਸਸਮਾਚਾਰੇਨ. ‘‘ਕੋ ਨਾਮ ਮਯ੍ਹਂ ਆਸਨੇ ਸਨ੍ਨਿਸਿਨ੍ਨੋ’’ਤਿ ਅਕ੍ਖਨ੍ਤਿਂ ਅਨੁਪ੍ਪਾਦੇਨ੍ਤੋ ਖਨ੍ਤਿਯਂ ਠਤ੍ਵਾ. ਬਲਵਚਿਤ੍ਤੀਕਾਰਨ੍ਤਿ ਗਰੁਤਰਂ ਸਕ੍ਕਾਰਬਹੁਮਾਨਂ. ਨੀਚਵੁਤ੍ਤਿਯਾਤਿ ਪਰਮਨਿਪਚ੍ਚਕਾਰੇ ਸੁਵੂਪਸਮਨੇ ਚ ਦਸ੍ਸਿਯਮਾਨੇ. ਸਕ੍ਕਸ੍ਸ ਤਾਯ ਏਵ ਆਚਾਰਸਮ੍ਪਤ੍ਤਿਯਾ ਸਕ੍ਕਾਸਨੇ ਠਾਤੁਂ, ਅਤ੍ਤਨੋ ਚ ਆਵਿਕਾਤੁਂ ਅਸਕ੍ਕੋਨ੍ਤੋ ਅਨ੍ਤਰਧਾਯਿ. ਉਪਹਤਚਿਤ੍ਤੋਮ੍ਹੀਤਿ ਖਨ੍ਤਿਮੇਤ੍ਤਾਨੁਦ੍ਦਯਾਸਬ੍ਭਾਵਤੋ ਪਰਸ੍ਮਿਂ ਉਪਹਤਚਿਤ੍ਤੋਮ੍ਹੀਤਿ ਸਕ੍ਕੋ ਅਤ੍ਤਨੋ ਸਭਾਵਂ ਵਦਤਿ. ਕੋਧਵਸੇ ਵਤ੍ਤੇਤੁਨ੍ਤਿ ਕੋਧੇਨ ਅਤ੍ਤਨੋ ਵਸੇ ਨਿਬ੍ਬਤ੍ਤੇਤੁਂ ਨ ਸੁਕਰੋਮ੍ਹਿ, ਅਥ ਖੋ ਕੋਧਂ ਮਯ੍ਹਂ ਵਸੇ ਨ ਵਤ੍ਤੇਮੀਤਿ ਅਧਿਪ੍ਪਾਯੋ. ਚਿਰਂ ਨ ਕੁਜ੍ਝਾਮੀਤਿ ਯਦਿ ਮੇ ਕਦਾਚਿ ਕੋਧੋ ਉਪ੍ਪਜ੍ਜੇਯ੍ਯ, ਤਂ ਕੋਧਂ ਅਨੁਵਤ੍ਤੇਨ੍ਤੋ ਚਿਰਕਾਲਂ ਨ ਕੁਜ੍ਝਾਮਿ. ਨ ਉਪਨਯ੍ਹਾਮੀਤਿ ਅਨ੍ਤੋ ਸਚੇ ਮੇ ਕੋਧੋ ਉਪ੍ਪਜ੍ਜੇਯ੍ਯ, ਖਿਪ੍ਪਮੇਵ ਚ ਨਂ ਪਟਿਵਿਨੇਯ੍ਯਨ੍ਤਿ ਤਂ ਮੇ ਪੁਬ੍ਬੇਵ ਵਤਂ ਪਰਿਪੂਰਿਤਂ.
ਦੁਬ੍ਬਣ੍ਣਿਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੩. ਸਮ੍ਬਰਿਮਾਯਾਸੁਤ੍ਤਵਣ੍ਣਨਾ
੨੬੯. ਆਬਾਧਿਕੋਤਿ ਆਬਾਧੋ ਅਸ੍ਸ ਅਤ੍ਥੀਤਿ ਆਬਾਧਿਕੋ. ਵਾਚੇਸੀਤਿ ਸਿਕ੍ਖਾਪੇਸਿ. ਸਮ੍ਬਰੋ ਨਾਮ ਅਸੁਰਮਾਯਾਯ ਆਦਿਪੁਰਿਸੋ ਪੁਰਾਤਨੋ ਅਸੁਰਿਨ੍ਦੋ. ਤਂ ਸਨ੍ਧਾਯਾਹ ‘‘ਯਥਾ ਸਮ੍ਬਰੋ’’ਤਿਆਦਿ. ਏਵਂ ਪਚ੍ਚਤਿ ਅਞ੍ਞੋਪਿ ਮਾਯਾਵੀ ਮਾਯਂ ਪਯੋਜੇਤ੍ਵਾ. ਉਪਵਾਦਨ੍ਤਰਾਯੋ ਨਾਮ ਖਮਾਪਨੇ ਸਤਿ ਵਿਗਚ੍ਛਤਿ, ਪਾਕਤਿਕਮੇਵ ਹੋਤੀਤਿ ਆਹ ‘‘ਏਵਮਸ੍ਸ ਫਾਸੁ ਭਵੇਯ੍ਯਾ’’ਤਿ. ਤੇਨਾਤਿ ਵੇਪਚਿਤ੍ਤਿਨਾ ਸਮ੍ਬਰਵਿਜ੍ਜਾਯ ਅਦਾਨੇਨ ਵਞ੍ਚਿਤਤ੍ਤਾ. ਤਥਾ ਅਕਤ੍ਵਾਤਿ ਇਸੀਨਂ ਸਨ੍ਤਿਕਂ ਨੇਤ੍ਵਾ ਖਮਾਪਨਵਸੇਨ ਕਾਤਬ੍ਬਂ ਅਕਤ੍ਵਾ.
ਸਮ੍ਬਰਿਮਾਯਾਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੪. ਅਚ੍ਚਯਸੁਤ੍ਤਵਣ੍ਣਨਾ
੨੭੦. ਸਮ੍ਪਯੋਜੇਸੁਨ੍ਤਿ ਅਞ੍ਞਮਞ੍ਞਂ ਵਾਚਸਿਕਂ ਫਰੁਸਂ ਪਯੋਜੇਸੁਂ. ਤੇਨਾਹ ‘‘ਕਲਹਂ ਅਕਂਸੂ’’ਤਿ, ਵਿਵਾਦਂ ਅਕਂਸੂਤਿ ਅਤ੍ਥੋ. ਅਤਿਕ੍ਕਮ੍ਮਵਚਨਨ੍ਤਿ ਵਚੀਸਂਵਰਂ ਅਤਿਕ੍ਕਮਿਤ੍ਵਾ ਵਚਨਂ. ਯਸ੍ਮਾ ਅਚ੍ਚਯੇ ਦੇਸਿਯਮਾਨੇ ਤਂ ਖੀਣਯਤਿ ਅਞ੍ਞਮਞ੍ਞਸ੍ਸ ਖਮਮਾਨਸ੍ਸ ਖਮਨਂ ਪਟਿਗ੍ਗਣ੍ਹਤੋ, ਤਸ੍ਮਾ ਵੁਤ੍ਤਂ ‘‘ਨਪ੍ਪਟਿਗਣ੍ਹਾਤੀਤਿ ਨ ਖਮਤੀ’’ਤਿ. ਤੁਮ੍ਹਾਕਂ ਵਸੇ ਵਤ੍ਤਤੁ, ਵਿਸੇਵਿਤਂ ਅਕਤ੍ਵਾ ਯਥਾਕਾਮਕਰਣੀਯੋ ਹੋਤੁ. ਮਿਤ੍ਤਧਮ੍ਮੋ ਇਧ ਉਤ੍ਤਰਪਦਲੋਪੇਨ ‘‘ਮਿਤ੍ਤੋ’’ਤਿ ਵੁਤ੍ਤੋਤਿ ਆਹ ‘‘ਮਿਤ੍ਤਧਮ੍ਮੇ’’ਤਿ. ਕਰਣਵਚਨਨ੍ਤਿ ‘‘ਮਿਤ੍ਤੇਹੀ’’ਤਿ ਕਰਣਵਚਨਂ ਭੁਮ੍ਮਤ੍ਥੇ. ਤੇਨਾਹ ‘‘ਮਿਤ੍ਤੇਸੂ’’ਤਿ. ਯਥਾ ਨਿਬ੍ਬਤ੍ਤਸਭਾਵਸ੍ਸ ਭਾਵਤੋ ਅਞ੍ਞਥਤ੍ਤਂ ਜਰਾ, ਏਵਂ ਮਿਤ੍ਤਭਾਵਤੋ ਵੁਤ੍ਤਵਿਪਰਿਯਾਯੋ ਅਮਿਤ੍ਤਧਮ੍ਮੋ ਜਰਾਪਰਿਯਾਯੇਨ ਵੁਤ੍ਤੋ. ਅਗਾਰਯ੍ਹਂ ਅਨਵਜ੍ਜਂ ਸਬ੍ਬਸੋ ਪਹੀਨਕਿਲੇਸਂ. ਤੇਨਾਹ ‘‘ਖੀਣਾਸਵਪੁਗ੍ਗਲ’’ਨ੍ਤਿ.
ਅਚ੍ਚਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੫. ਅਕ੍ਕੋਧਸੁਤ੍ਤਵਣ੍ਣਨਾ
੨੭੧. ਕੋਧੋ ਤੁਮ੍ਹੇ ਮਾ ਅਭਿਭਵੀਤਿ ਏਤ੍ਥ ਕੋਧੇਨ ਅਨਭਿਭਵਨੀਯਤ੍ਤਂ ਖਨ੍ਤਿਮੇਤ੍ਤਾਕਰੁਣਾਦਿਤਪ੍ਪਟਿਪਕ੍ਖਧਮ੍ਮਪਰਿਬ੍ਰੂਹਨੇਨ. ਤਥਾ ਹਿ ਤਂਸਮਙ੍ਗਿਨੋ ਕੋਧੋ ਅਭਿਭੁਯ੍ਯਤੀਤਿ ਆਹ ‘‘ਤੁਮ੍ਹੇਵ ਕੋਧਂ ਅਭਿਭਵਥ. ਕੁਜ੍ਝਨ੍ਤਾਨਂ ਮਾ ਪਟਿਕੁਜ੍ਝਿਤ੍ਥਾ’’ਤਿ. ਪਟਿਪਦਾਤਿ ਏਸਾ ਪਟਿਪਤ੍ਤਿ. ਮੇਤ੍ਤਾਤਿ ਅਪ੍ਪਨਾਪ੍ਪਤ੍ਤਾ ਮੇਤ੍ਤਾ. ਤਦੁਪਚਾਰੋ ਮੇਤ੍ਤਾਪੁਬ੍ਬਭਾਗੋ. ਨ ਵਿਹਿਂਸਤਿ ਕਿਞ੍ਚਿ ਏਤਾਯਾਤਿ ਅਵਿਹਿਂਸਾ. ਕਰੁਣਾਤਿ ਅਪ੍ਪਨਾਪ੍ਪਤ੍ਤਕਰੁਣਾ ਵੇਦਿਤਬ੍ਬਾ. ਤਦੁਪਚਾਰੋ ਕਰੁਣਾਪੁਬ੍ਬਭਾਗੋ. ਲਾਮਕਜਨਨ੍ਤਿ ਖਨ੍ਤਿਆਦੀਸੁ ਯੋਨਿਸੋਮਨਸਿਕਾਰਾਭਾਵੇਨ ਗਾਰਯ੍ਹਸਮਾਚਾਰਸਮਾਯੋਗੇਨ ਚ ਨਿਹੀਨਂ ਜਨਂ. ਪਚ੍ਚਯਪਰਿਸੁਦ੍ਧਿਯਾ ਕੋਧੋ ਅਭਿਮਦ੍ਦਮਾਨੋ ਪੁਗ੍ਗਲਂ ਅਭਿਮਦ੍ਦਤਿ, ਤਸ੍ਸ ਸੋ ਪਟਿਸਙ੍ਖਾਨਭਾਵਨਾਬਲੇਹਿ ਸਮ੍ਮਦੇਵ ਪਹਾਤਬ੍ਬੋਤਿ.
ਅਕ੍ਕੋਧਸੁਤ੍ਤਵਣ੍ਣਨਾ ਨਿਟ੍ਠਿਤਾ.
ਤਤਿਯਵਗ੍ਗਵਣ੍ਣਨਾ ਨਿਟ੍ਠਿਤਾ.
ਸਾਰਤ੍ਥਪ੍ਪਕਾਸਿਨਿਯਾ ਸਂਯੁਤ੍ਤਨਿਕਾਯ-ਅਟ੍ਠਕਥਾਯ
ਸਕ੍ਕਸਂਯੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.
ਨਿਟ੍ਠਿਤਾ ਚ ਸਾਰਤ੍ਥਪ੍ਪਕਾਸਿਨਿਯਾ
ਸਂਯੁਤ੍ਤਨਿਕਾਯ-ਅਟ੍ਠਕਥਾਯ ਸਗਾਥਾਵਗ੍ਗਵਣ੍ਣਨਾ.
ਪਠਮੋ ਭਾਗੋ ਨਿਟ੍ਠਿਤੋ.