੭. ਬ੍ਰਾਹ੍ਮਣਸਂਯੁਤ੍ਤਂ

੧. ਅਰਹਨ੍ਤਵਗ੍ਗੋ

੧. ਧਨਞ੍ਜਾਨੀਸੁਤ੍ਤਵਣ੍ਣਨਾ

੧੮੭. ਧਨਞ੍ਜਾਨਿਗੋਤ੍ਤਾਤਿ ਏਤ੍ਥ ਪੁਬ੍ਬਪੁਰਿਸਤੋ ਆਗਤਸ੍ਸ ਕੁਲਵਂਸਸ੍ਸ ਨਾਮਾਭਿਧਾਨਸਙ੍ਖਾਤਂ ਗਂ ਤਾਯਤੀਤਿ ਗੋਤ੍ਤਂ. (ਕਿਂ ਪਨ ਤਨ੍ਤਿ? ਅਞ੍ਞਕੁਲਪਰਮ੍ਪਰਾਸਾਧਾਰਣਂ ਤਸ੍ਸ ਕੁਲਸ੍ਸ ਆਦਿਪੁਰਿਸਸਮੁਦਾਗਤਂ ਤਂਕੁਲਪਰਿਯਾਪਨ੍ਨਸਾਧਾਰਣਂ ਸਾਮਞ੍ਞਰੂਪਨ੍ਤਿ ਦਟ੍ਠਬ੍ਬਂ.) ਧਨਞ੍ਜਾਨਿਗੋਤ੍ਤਂ ਏਤਿਸ੍ਸਨ੍ਤਿ ਧਨਞ੍ਜਾਨਿਗੋਤ੍ਤਾ. ਤਸ੍ਸਾ ਉਦਾਨਸ੍ਸ ਕਾਰਣਂ ਪੁਚ੍ਛਿਤ੍ਵਾ ਆਦਿਤੋ ਪਟ੍ਠਾਯ ਵਿਭਾਵੇਤੁਂ ‘‘ਸੋ ਕਿਰਾ’’ਤਿਆਦਿ ਵੁਤ੍ਤਂ. ਨਾਨਾਰਸਭੋਜਨਂ ਦੇਤੀਤਿ ਯੋਜਨਾ. ਪਞ੍ਚਗੋਰਸਸਮ੍ਪਾਦਿਤਂ ਸਾਲਿਭਤ੍ਤਂ ਸੂਪਸਾਕਬ੍ਯਞ੍ਜਨਂ ਨਾਨਾਰਸਂ ਬ੍ਰਾਹ੍ਮਣਭੋਜਨਂ. ਮਣ੍ਡਲਗ੍ਗਖਗ੍ਗਨ੍ਤਿ ਮਣ੍ਡਲਗ੍ਗਸਙ੍ਖਾਤਂ ਖਗ੍ਗਂ. ਦੁਵਿਧੋ ਹਿ ਖਗ੍ਗੋ ਮਣ੍ਡਲਗ੍ਗੋ ਦੀਘਗ੍ਗੋਤਿ. ਤਤ੍ਥ ਯਸ੍ਸ ਅਗ੍ਗੋ ਮਣ੍ਡਲਾਕਾਰੇਨ ਠਿਤੋ, ਸੋ ਮਣ੍ਡਲਗ੍ਗੋ. ਯਸ੍ਸ ਪਨ ਅਸਿਪੁਤ੍ਤਿਕਾ ਵਿਯ ਦੀਘੋ, ਸੋ ਦੀਘਗ੍ਗੋ.

ਸਾਸਨਾਤਿ ਅਨੁਸਾਸਨਾ. ‘‘ਨਮੋ…ਪੇ… ਸਮ੍ਬੁਦ੍ਧਸ੍ਸਾ’’ਤਿ ਏਵਂ ਵੁਤ੍ਤਾ ਪਞ੍ਚਪਦਿਕਗਾਥਾ. ਸਤ੍ਥੁਸਾਸਨੇ ਹਿ ਲੋਕਿਯਚ੍ਛਨ੍ਦਂ ਅਨਪੇਕ੍ਖਿਤ੍ਵਾ ਏਸਾ ਪਞ੍ਚਪਦਿਕਗਾਥਾਤਿ ਦਟ੍ਠਬ੍ਬਾ. ਓਕ੍ਕਾਵਰਧਰਾਤਿ ਪੁਬ੍ਬਪੁਰਿਸਸਙ੍ਖਾਤਉਕ੍ਕਾਕਵਂਸਵਰਧਾਰਿਕਾ. ਸਕ੍ਕਾਤਿ ਸਕ੍ਕੁਣੇਯ੍ਯਂ.

ਏਵਨ੍ਤਿ ‘‘ਸਚੇ ਮੇ ਅਙ੍ਗਮਙ੍ਗਾਨੀ’’ਤਿਆਦਿਨਾ ਇਮਿਨਾ ਪਕਾਰੇਨ. ‘‘ਪਞ੍ਚ ਗਾਥਾਸਤਾਨਿ ਪਨ ਅਟ੍ਠਕਥਂ ਆਰੁਲ਼੍ਹਾਨਿ, ਇਧ ਪਨ ਦ੍ਵੇ ਏਵ ਉਦ੍ਧਟਾ’’ਤਿ ਵਦਨ੍ਤਿ. ਪਹਰਿਤੁਂ ਵਾਤਿ ਏਕਵਾਰਮ੍ਪਿ ਹਤ੍ਥੇਨ ਵਾ ਪਾਦੇਨ ਵਾ ਪਹਰਿਤੁਮ੍ਪਿ ਪਰਾਮਸਿਤੁਮ੍ਪਿ ਅਸਕ੍ਕੋਨ੍ਤੋਤਿ ਅਤ੍ਥੋ. ਸੋ ਹਿ ਤਸ੍ਸਾ ਅਰਿਯਸਾਵਿਕਾਯ ਆਨੁਭਾਵੇਨ ਅਤ੍ਤਨੋ ਸਾਮਤ੍ਥਿਯੇਨ ਵਸੇ ਵਤ੍ਤਾਪਨਤ੍ਥਂ ਸਨ੍ਤਜ੍ਜਿਤ੍ਵਾਪਿ ਤਦਨੁਵਤ੍ਤਨ੍ਤੋ ਨਿਬ੍ਬਿਸੋ ਅਹੋਸਿ. ਤੇਨਾਹ ‘‘ਭੋਤੀ’’ਤਿਆਦਿ.

ਤਸ੍ਸ ਬ੍ਰਾਹ੍ਮਣਸ੍ਸਾਤਿ ਅਤ੍ਤਨੋ ਸਾਮਿਕਬ੍ਰਾਹ੍ਮਣਸ੍ਸ. ਉਪਸਂਹਰਨ੍ਤੀਤਿ ਉਪਨੇਨ੍ਤੀ. ਤਸ੍ਮਿਂ ਸਮਯੇਤਿ ਤਸ੍ਮਿਂ ਦੁਕ੍ਖੁਪ੍ਪਤ੍ਤਿਕਾਲੇ ‘‘ਸਬ੍ਬੇ ਸਙ੍ਖਾਰਾ ਦੁਕ੍ਖਾ’’ਤਿ ਭਗਵਤੋ ਵਚਨਂ ਅਨੁਸ੍ਸਰਿਤ੍ਵਾ ‘‘ਦਸਬਲਸ੍ਸ ਭਗਵਤੋ’’ਤਿਆਦੀਸੁ ਯਥਾਪਰਿਚਿਤਂ ਗੁਣਪਦਂ ਅਨੁਸ੍ਸਰਿ. ਤੇਨਾਹ ‘‘ਦਸਬਲਂ ਸਰੀ’’ਤਿ.

ਖਨ੍ਤਿਸੋਰਚ੍ਚਰਹਿਤਤਾਯ ਕੁਜ੍ਝਿਤ੍ਵਾ. ਭਿਜ੍ਜਿਤ੍ਵਾਤਿ ਸਂਯਤਾਭਾਵਤੋ ਤਸ੍ਸ ਬ੍ਰਾਹ੍ਮਣਸ੍ਸ ਅਨ੍ਤਰੇ ਮੇਤ੍ਤਿਭੇਦੇਨ ਭਿਜ੍ਜਿਤ੍ਵਾ. ਏਵਮੇਵਾਤਿ ਯਥਾ ਏਤਰਹਿ ਅਕਾਰਣੇਨ, ਏਵਮੇਵ ਅਞ੍ਞਦਾਪਿ ਅਕਾਰਣੇਨਾਤਿ ਅਤ੍ਥੋ. ਨਿਕ੍ਕਾਰਣਤਾਦੀਪਨੇ ਏਵਂ-ਸਦ੍ਦੋ, ਏਵ-ਸਦ੍ਦੋ ਪਨ ਅਵਧਾਰਣਤ੍ਥੋ. ਨਿਕ੍ਕਾਰਣਤਾ ਚ ਨਾਮ ਨਿਰਤ੍ਥਕਤਾ, ਨਿਰਤ੍ਥਕਵਿਪ੍ਪਲਾਪਭਾਵੇਨੇਤ੍ਥ ਏਵਂ-ਸਦ੍ਦਸ੍ਸ ਗਹਣੇ ਪਵਤ੍ਤਿ ਗਵੇਸਿਤਬ੍ਬਾ. ਗਰਹਤ੍ਥੋ ਵਾਯਂ ਏਵਂ-ਸਦ੍ਦੋ ਅਨੇਕਤ੍ਥਤ੍ਤਾ ਨਿਪਾਤਾਨਂ. ਗਰਹਤ੍ਥਤਾ ਚਸ੍ਸ ਵਸਲਿਸਦ੍ਦਸਨ੍ਨਿਧਾਨਤੋ ਪਾਕਟਾ ਏਵ.

ਗਾਮਨਿਗਮਰਟ੍ਠਪੂਜਿਤੋਤਿ ਇਮਿਨਾ ਗਾਮਨਿਗਮਰਟ੍ਠਸਾਮਿਕੇਹਿ ਪੂਜਿਤਭਾਵੋ ਦੀਪਿਤੋ ਗਾਮਾਦੀਨਂ ਤੇਸਂ ਵਸੇ ਵਤ੍ਤਨਤੋ. ਅਸੁਕਸ੍ਸ ਨਾਮ ਪੁਗ੍ਗਲਸ੍ਸ. ਸੇਸਨ੍ਤਿ ਅਭਿਕ੍ਕਨ੍ਤਨ੍ਤਿਆਦਿ, ਯਮ੍ਪਿ ਚਞ੍ਞਂ ਇਧਾਗਤਂ ਹੇਟ੍ਠਾ ਵਣ੍ਣਿਤਞ੍ਚ.

ਧਨਞ੍ਜਾਨੀਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੨. ਅਕ੍ਕੋਸਸੁਤ੍ਤਵਣ੍ਣਨਾ

੧੮੮. ਭਾਰਦ੍ਵਾਜੋਵ ਸੋਤਿ ਭਾਰਦ੍ਵਾਜੋ ਨਾਮ ਏਵ ਸੋ ਬ੍ਰਾਹ੍ਮਣੋ. ਗੋਤ੍ਤਵਸੇਨ ਹਿ ਤਯਿਦਂ ਨਾਮਂ, ਵਿਸੇਸੇਨ ਪਨੇਤਂ ਜਾਤਨ੍ਤਿ ਦਸ੍ਸੇਤੁਂ ‘‘ਪਞ੍ਚਮਤ੍ਤੇਹੀ’’ਤਿਆਦਿ ਵੁਤ੍ਤਂ. ਜਾਨਿਕਤਾਤਿ ਞਾਤਿਵਗ੍ਗਹਾਨਿਕਤਾ. ਪਕ੍ਖੋ ਭਿਨ੍ਨੋਤਿ ਤਤੋ ਏਵ ਞਾਤਿਪਕ੍ਖੋ ਨਟ੍ਠੋ. ਯਥਾ ਦੋਮਨਸ੍ਸਿਤੋ ਅਨਤ੍ਤਮਨੋਤਿ ਵਤ੍ਤਬ੍ਬਂ ਲਭਤਿ, ਏਵਂ ਕੁਪਿਤੋਤਿ ਆਹ ‘‘ਦੋਮਨਸ੍ਸੇਨ ਚਾ’’ਤਿ. ਦਸਹੀਤਿ ਅਨਵਸੇਸਪਰਿਯਾਦਾਨਵਸੇਨ ਵੁਤ੍ਤਂ ਪਞ੍ਚਹਿ ਗਾਥਾਸਤੇਹਿ ਅਕ੍ਕੋਸਨ੍ਤੋ ਤਥਾ ਅਕ੍ਕੋਸੇਯ੍ਯਾਤਿ ਕਤ੍ਵਾ. ਤਤ੍ਥ ਪਨ ਯੇਨ ਕੇਨਚਿ ਅਕ੍ਕੋਸਨ੍ਤੋਪਿ ਅਕ੍ਕੋਸਤਿਯੇਵ ਨਾਮ. ਕਰੋਸਿ ਮਮ ਭਾਤਿਕਸ੍ਸ ਪਬ੍ਬਜ੍ਜਂ.

ਸਮ੍ਭੁਞ੍ਜਤੀਤਿ ਸਮ੍ਭੋਗਂ ਕਰੋਤਿ. ਅਕ੍ਕੋਸਾਦੀਹਿ ਏਕਤੋ ਭੁਞ੍ਜਤਿ. ਵੀਤਿਹਰਤੀਤਿ ਬ੍ਯਤਿਹਾਰਂ ਕਰੋਤਿ, ਅਕ੍ਕੋਸਤੋ ਪਚ੍ਚਕ੍ਕੋਸਨਾਦਿਨਾ ਵਿਨਿਮਯਂ ਕਰੋਤੀਤਿ ਅਤ੍ਥੋ. ਤੇਨਾਹ ‘‘ਕਤਸ੍ਸ ਪਟਿਕਾਰਂ ਕਰੋਤੀ’’ਤਿ. ਅਸ੍ਸ ਅਨੁਸ੍ਸਵਵਸੇਨ ਸੁਤ੍ਵਾ ‘‘ਸਪਤਿ ਮ’’ਨ੍ਤਿ ਸਞ੍ਞਿਨੋ ਭਯਂ ਉਪ੍ਪਜ੍ਜੀਤਿ ਯੋਜਨਾ. ਅਸ੍ਸਾਤਿ ਬ੍ਰਾਹ੍ਮਣਸ੍ਸ. ਸੁਤ੍ਵਾਤਿ ਪਦਂ ਉਭਯਤ੍ਥਾਪਿ ਯੋਜੇਤਬ੍ਬਂ ‘‘ਤਵੇਵੇਤਂ ਬ੍ਰਾਹ੍ਮਣਾਤਿ ਸੁਤ੍ਵਾ, ਅਨੁਸ੍ਸਵਵਸੇਨ ਸੁਤ੍ਵਾ’’ਤਿ ਚ. ਕਾਮਂ ਕਿਸਵਚ੍ਛਾਦਯੋ ਸਪਨਂ ਨਾਦਂਸੁ, ਦੇਵਤਾਨਂਯੇਵ ਹਿ ਸੋ ਅਤ੍ਥੋ, ਸਤ੍ਤਾਨਂ ਪਨ ਤਥਾ ਸਞ੍ਞਾ ਉਪ੍ਪਨ੍ਨਾ, ਸੋਪਿ ਤਥਾਸਞ੍ਞੀ ਅਹੋਸਿ. ਤੇਨਾਹ ‘‘ਅਨੁਸ੍ਸਵਵਸੇਨਾ’’ਤਿ.

ਦਨ੍ਤਸ੍ਸ ਸਬ੍ਬਸੋ ਦਮਥਂ ਉਪਗਤਤ੍ਤਾ. ਨਿਬ੍ਬਿਸੇਵਨਸ੍ਸਾਤਿ ਰਾਗਦੋਸਾਦਿਹੇਤੁਕਵਿਪ੍ਫਨ੍ਦਨਰਹਿਤਸ੍ਸ. ਤਸ੍ਸੇਵਾਤਿ ਪਟਿਕੁਜ੍ਝਨ੍ਤਸ੍ਸੇਵ ਪੁਗ੍ਗਲਸ੍ਸ ਤੇਨ ਕੋਧੇਨ ਪਾਪਂ ਹੋਤਿ ਪਾਪਸ੍ਸ ਸਨ੍ਤਾਨਨ੍ਤਰਸਙ੍ਕਨ੍ਤਿਯਾ ਅਭਾਵਤੋ. ਕੇਚਿ ਪਨ ‘‘ਤਸ੍ਸੇਵਾਤਿ ਤਸ੍ਸੇਵ ਪਟਿਕੁਜ੍ਝਨ੍ਤਪੁਰਿਸਸ੍ਸ ਤੇਨ ਪਟਿਕੁਜ੍ਝਨੇਨ. ਪਾਪਿਯੋਤਿ ਪਟਿਕੁਜ੍ਝਨ੍ਤਪੁਗ੍ਗਲਸ੍ਸ ਲਾਮਕਤਰੋ’’ਤਿ ਏਵਮੇਤ੍ਥ ਅਤ੍ਥਂ ਵਦਨ੍ਤਿ. ਸਤਿਯਾ ਸਮਨ੍ਨਾਗਤੋ ਹੁਤ੍ਵਾ ਪਟਿਸਙ੍ਖਾਨੇ ਠਿਤੋ ਅਧਿਵਾਸੇਤਿ, ਨ ਸਹੋ ਮੂਲ਼੍ਹੋ ਹੁਤ੍ਵਾਤਿ ਅਧਿਪ੍ਪਾਯੋ. ਉਭਿਨ੍ਨਂ ਤਿਕਿਚ੍ਛਨ੍ਤਨ੍ਤਿ ਉਭਿਨ੍ਨਂ ਉਪ੍ਪਨ੍ਨਕੋਧਸਙ੍ਖਾਤਂ ਕਿਲੇਸਬ੍ਯਾਧਿਂ ਤਿਕਿਚ੍ਛਨ੍ਤਂ ਵੂਪਸਮੇਨ੍ਤਂ ਤਂ ਪੁਗ੍ਗਲਂ. ਯੋ ਪੁਗ੍ਗਲੋਤਿਆਦਿਨਾ ਪੁਰਿਮਾਸੁ ਗਾਥਾਸੁ ਪਵਤ੍ਤਿਤਾਨਿ ਪਦਾਨਿ ਸਮ੍ਬਨ੍ਧਿਤ੍ਵਾ ਦਸ੍ਸੇਤਿ. ਪਞ੍ਚਸੁ ਖਨ੍ਧੇਸੁ ਯਾਥਾਵਤੋ ਵਿਨੀਤਾ ਅਰਿਯਧਮ੍ਮਸ੍ਸ ਕੋਵਿਦਾ ਨਾਮ ਹੋਨ੍ਤੀਤਿ ਆਹ ‘‘ਧਮ੍ਮਸ੍ਸਾਤਿ ਪਞ੍ਚਕ੍ਖਨ੍ਧਧਮ੍ਮਸ੍ਸਾ’’ਤਿ. ਇਦਾਨਿ ਤਮਤ੍ਥਂ ਪਰਿਪੁਣ੍ਣਂ ਕਤ੍ਵਾ ਦਸ੍ਸੇਨ੍ਤੋ ਆਹ ‘‘ਚਤੁਸਚ੍ਚਧਮ੍ਮਸ੍ਸ ਵਾ’’ਤਿ.

ਅਕ੍ਕੋਸਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੩. ਅਸੁਰਿਨ੍ਦਕਸੁਤ੍ਤਵਣ੍ਣਨਾ

੧੮੯. ਤੇਨੇਵਾਤਿ ਭਾਤੁਪਬ੍ਬਜਿਤੇਨੇਵ. ਅਸ੍ਸੇਵਾਤਿ ਤਿਤਿਕ੍ਖਸ੍ਸ. ‘‘ਤਂ ਜਯਂ ਹੋਤੀ’’ਤਿ ਲਿਙ੍ਗਵਿਪਲ੍ਲਾਸਵਸੇਨ ਵੁਤ੍ਤਨ੍ਤਿ ਆਹ ‘‘ਸੋ ਜਯੋ ਹੋਤੀ’’ਤਿ, ਦੁਜ੍ਜਯਂ ਕੋਧਂ ਤਿਤਿਕ੍ਖਾਯ ਜਿਨਨ੍ਤਸ੍ਸਾਤਿ ਅਧਿਪ੍ਪਾਯੋ. ਯਸ੍ਮਾ ਤਿਤਿਕ੍ਖਾਦਯੋ ਨ ਕੋਧਵਸਿਕਂ ਧੁਰਂ, ਤਂ ਪਨ ਬਾਲਾਨਂ ਮਞ੍ਞਨਾਮਤ੍ਤਨ੍ਤਿ ਇਧ ਇਮਮਤ੍ਥਂ ਵਿਭਾਵੇਤੁਂ ‘‘ਕਤਮਸ੍ਸਾ’’ਤਿਆਦਿ ਵੁਤ੍ਤਂ. ਵਿਜਾਨਤੋਵ ਜਯੋ ਨ ਅਵਿਜਾਨਤੋ ਤਿਤਿਕ੍ਖਾਯ ਅਭਾਵਤੋ. ਨ ਹਿ ਅਵਿਜਾਨਨ੍ਤੋ ਅਨ੍ਧਬਾਲੋ ਕੋਧਂ ਵਿਜੇਤੁਂ ਸਕ੍ਕੋਤਿ. ਕੇਵਲਂ ਜਯਂ ਮਞ੍ਞਤਿ ਕਿਲੇਸੇਹਿ ਪਰਾਜਿਤੋ ਸਮਾਨੋਪੀਤਿ ਅਧਿਪ੍ਪਾਯੋ.

ਅਸੁਰਿਨ੍ਦਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੪. ਬਿਲਙ੍ਗਿਕਸੁਤ੍ਤਵਣ੍ਣਨਾ

੧੯੦. ਸੁਦ੍ਧਨ੍ਤਿ ਕੇਵਲਂ ਸਮ੍ਭਾਰਵਿਰਹਿਤਂ. ਸਮ੍ਭਾਰਯੁਤ੍ਤਨ੍ਤਿ ਕਟੁਕਭਣ੍ਡਾਦਿਸਮ੍ਭਾਰਸਹਿਤਂ. ਕਞ੍ਜਿਤੋ ਨਿਬ੍ਬਤ੍ਤਤ੍ਤਾ ਕਞ੍ਜਿਕਂ, ਆਰਨਾਲਂ, ਬਿਲਙ੍ਗਨ੍ਤਿ ਅਤ੍ਥੋ. ਨਾਮਂ ਗਹਿਤਂ ਸਙ੍ਗੀਤਿਕਾਲੇ ‘‘ਬਿਲਙ੍ਗਿਕਭਾਰਦ੍ਵਾਜੋ’’ਤਿ ਵਿਸੇਸਨਵਸੇਨ. ਤਯੋਤਿ ਧਨਞ੍ਜਾਨਿਯਾ ਸਾਮਿਕੋ ਭਾਰਦ੍ਵਾਜੋ, ਅਕ੍ਕੋਸਕਭਾਰਦ੍ਵਾਜੋ, ਅਸੁਨ੍ਦਰਿਕਭਾਰਦ੍ਵਾਜੋਤਿ ਆਦਿਤੋ ਤੀਸੁ ਸੁਤ੍ਤੇਸੁ ਆਗਤਾ ਤਯੋ. ਮੇਤਿ ਮਯ੍ਹਂ.

ਬਿਲਙ੍ਗਿਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੫. ਅਹਿਂਸਕਸੁਤ੍ਤਵਣ੍ਣਨਾ

੧੯੧. ਏਸਾਤਿ ਬ੍ਰਾਹ੍ਮਣੋ. ‘‘ਅਹਿਂਸਕੋ ਅਹ’’ਨ੍ਤਿ ਤਦਤ੍ਥਂ ਸਾਧੇਤੁਂ ਇਚ੍ਛਾਯ ਕਥੇਸੀਤਿ ਵੁਤ੍ਤਂ ‘‘ਅਹਿਂਸਕਪਞ੍ਹਂ ਪੁਚ੍ਛੀ’’ਤਿ. ਤਥਾ ਚੇ ਅਸ੍ਸਾਤਿ ਯਥਾ ਤੇ ਨਾਮਸ੍ਸ ਅਤ੍ਥੋ, ਤਥਾ ਚੇਤਂ ਭਵੇਯ੍ਯਾਸਿ ਅਨ੍ਵਤ੍ਥਨਾਮਕੋ ਭਵੇਯ੍ਯਾਸਿ ਅਹਿਂਸਕੋ ਏਵ ਸਿਯਾਤਿ. ਨ ਦੁਕ੍ਖਾਪੇਤਿ ਦੁਕ੍ਖਮਤ੍ਤਮ੍ਪਿ ਨ ਉਪ੍ਪਾਦੇਤਿ, ਦੁਕ੍ਖਤੋ ਅਪਨੇਤੀਤਿ ਅਤ੍ਥੋ.

ਅਹਿਂਸਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੬. ਜਟਾਸੁਤ੍ਤਵਣ੍ਣਨਾ

੧੯੨. ਜਟਾਪਞ੍ਹਸ੍ਸਾਤਿ ‘‘ਅਨ੍ਤੋਜਟਾ ਬਹਿਜਟਾ’’ਤਿ ਏਵਂ ਜਟਾਪਰਿਯਾਯਸ੍ਸ ਪਞ੍ਹਸ੍ਸ.

ਜਟਾਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੭. ਸੁਦ੍ਧਿਕਸੁਤ੍ਤਵਣ੍ਣਨਾ

੧੯੩. ਸੁਦ੍ਧਿਕਪਞ੍ਹਸ੍ਸਾਤਿ ‘‘ਨਾਬ੍ਰਾਹ੍ਮਣੋ ਸੁਜ੍ਝਤੀ’’ਤਿ ਏਵਂ ਸੁਦ੍ਧਸਨ੍ਨਿਸ੍ਸਿਤਸ੍ਸ ਪਞ੍ਹਸ੍ਸ. ਸੀਲਸਮ੍ਪਨ੍ਨੋਤਿ ਪਞ੍ਚਵਿਧਨਿਯਮਲਕ੍ਖਣੇਨ ਸੀਲੇਨ ਸਮਨ੍ਨਾਗਤੋ. ਤਪੋਕਮ੍ਮਨ੍ਤਿ ਅਨਸਨਪਞ੍ਚਾਤਪਤਪ੍ਪਨਾਦਿਪਰਿਭੇਦਨਤਪੋਕਮ੍ਮਂ ਕਰੋਨ੍ਤੋਪਿ. ਵਿਜ੍ਜਾਤਿ ਤਯੋ ਵੇਦਾਤਿ ਵਦਨ੍ਤਿ ‘‘ਤਾਯ ਇਧਲੋਕਤ੍ਥਂ ਪਰਲੋਕਤ੍ਥਂ ਞਾਯਨ੍ਤੀ’’ਤਿ ਕਤ੍ਵਾ. ਗੋਤ੍ਤਚਰਣਨ੍ਤਿ ਗੋਤ੍ਤਸਙ੍ਖਾਤਂ ਚਰਣਂ. ਬ੍ਰਾਹ੍ਮਣੋ ਸੁਜ੍ਝਤਿ ਜੇਟ੍ਠਜਾਤਿਕਤ੍ਤਾ. ਤਥਾ ਹਿ ਸੋ ਏਵ ਤਪਂ ਆਚਰਿਤੁਂ ਲਭਤਿ, ਨ ਇਤਰੋ. ਅਞ੍ਞਾ ਲਾਮਿਕਾ ਪਜਾਤਿ ਇਤਰਵਣ੍ਣਂ ਵਦਤਿ. ਵਚਨਸਹਸ੍ਸਮ੍ਪੀਤਿ ਗਾਥਾਨੇਕਸਹਸ੍ਸਮ੍ਪਿ. ਅਨ੍ਤੋ ਕਿਲੇਸੇਹਿ ਪੂਤਿਕੋ ਸਭਾਵੇਨ ਪੂਤਿਕੋ. ਕਿਲਿਟ੍ਠੇਹਿ ਕਾਯਕਮ੍ਮਾਦੀਹਿ ਕਾਯਦੁਚ੍ਚਰਿਤਾਦੀਹਿ.

ਸੁਦ੍ਧਿਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੮. ਅਗ੍ਗਿਕਸੁਤ੍ਤਵਣ੍ਣਨਾ

੧੯੪. ਅਗ੍ਗਿਪਰਿਚਰਣਵਸੇਨਾਤਿ ਅਗ੍ਗਿਹੁਤ੍ਤਜੁਹਨਵਸੇਨ. ਸਨ੍ਨਿਹਿਤੋਤਿ ਮਿਸ੍ਸੀਭਾਵਂ ਸਮ੍ਪਾਪਿਤੋ. ਤਥਾਭੂਤੋ ਚ ਸੋ ਸਪ੍ਪਿਨਾ ਸਦ੍ਧਿਂ ਯੋਜਿਤੋ ਨਾਮ ਹੋਤੀਤਿ ਆਹ ‘‘ਸਂਯੋਜਿਤੋ’’ਤਿ. ਅਪਾਯਮਗ੍ਗਂ ਓਕ੍ਕਮਤਿ ਮਿਚ੍ਛਾਦਿਟ੍ਠਿਮਿਚ੍ਛਾਸਙ੍ਕਪ੍ਪਾਦੀਨਂ ਅਤ੍ਤਨੋ ਸਨ੍ਤਾਨੇ ਸਮੁਪ੍ਪਾਦਨਤੋ. ਤੇਨਾਹ ‘‘ਇਮਂ ਲਦ੍ਧਿ’’ਨ੍ਤਿਆਦਿ.

ਜਾਤਿਯਾਤਿ ਸਦੋਸਕਿਰਿਯਾਪਰਾਧਸ੍ਸ ਅਸਮ੍ਭਵੇਨ ਪਰਿਸੁਦ੍ਧਾਯ ਜਾਤਿਯਾ. ਨਾਨਪ੍ਪਕਾਰੇ ਅਟ੍ਠਾਰਸਵਿਜ੍ਜਾਟ੍ਠਾਨਸਞ੍ਞਿਤੇ ਗਨ੍ਥੇ. ਸੁਤਵਾਤਿ ਸੁਤ੍ਵਾ ਨਿਟ੍ਠਂ ਪਤ੍ਤੋ ਅਗ੍ਗਦਕ੍ਖਿਣੇਯ੍ਯਤ੍ਤਾਤਿ ਅਧਿਪ੍ਪਾਯੋ.

ਪੁਬ੍ਬੇਨਿਵਾਸਞਾਣੇਨਾਤਿ ਇਦਂ ਲੋਕੇ ਸਾਸਨੇ ਚ ਨਿਰੁਲ਼੍ਹਤਾਵਸੇਨ ਵੁਤ੍ਤਂ. ਅਞ੍ਞੇ ਹਿ ਪੁਬ੍ਬੇਨਿਵਾਸਂ ਜਾਨਨ੍ਤਾ ਪੁਬ੍ਬੇਨਿਵਾਸਞਾਣੇਨੇਵ ਜਾਨਨ੍ਤਿ, ਭਗਵਾ ਪਨ ਸਬ੍ਬਞ੍ਞੁਤਞ੍ਞਾਣੇਨਪਿ ਜਾਨਾਤਿ. ਦਿਬ੍ਬੇਨ ਚਕ੍ਖੁਨਾਤਿ ਏਤ੍ਥਾਪਿ ਏਸੇਵ ਨਯੋ. ਸਬ੍ਬਸੋ ਜਾਤਿ ਖੀਯਤਿ ਏਤੇਨਾਤਿ ਜਾਤਿਕ੍ਖਯੋ, ਅਗ੍ਗਮਗ੍ਗੋ, ਤੇਨ ਪਤ੍ਤਬ੍ਬਤ੍ਤਾ ਆਪਨ੍ਨਤ੍ਤਾ ਚ ਜਾਤਿਕ੍ਖਯੋ ਅਰਹਤ੍ਤਂ. ਜਾਨਿਤ੍ਵਾ ਵੋਸਿਤਵੋਸਾਨੋਤਿ ਵਿਜਾਨਿਤਬ੍ਬਂ ਚਤੁਸਚ੍ਚਧਮ੍ਮਂ ਮਗ੍ਗਞਾਣੇਨ ਜਾਨਿਤ੍ਵਾ ਸੋਲ਼ਸਨ੍ਨਮ੍ਪਿ ਕਿਚ੍ਚਾਨਂ ਵੋਸਿਤਵੋਸਾਨੋ.

ਉਪ੍ਪਤ੍ਤਿਂ ਦੀਪੇਤ੍ਵਾਤਿ ਪਾਯਸਦਾਨਸ੍ਸ ਆਗਮਨਂ ਪਕਾਸੇਤ੍ਵਾ. ਗਾਥਾਹਿ ਅਭਿਗੀਤਨ੍ਤਿ ਦ੍ਵੀਹਿ ਗਾਥਾਹਿ ਮਯਾ ਅਭਿਗੀਤਂ. ਅਭੁਞ੍ਜਿਤਬ੍ਬਨ੍ਤਿ ਭੁਞ੍ਜਿਤੁਂ ਨ ਯੁਤ੍ਤਂ. ‘‘ਅਭੋਜਨੇਯ੍ਯ’’ਨ੍ਤਿ ਕਸ੍ਮਾ ਵੁਤ੍ਤਂ, ਨਨੁ ਭਗਵਤੋ ਅਜ੍ਝਾਸਯੋ ਅਚ੍ਚਨ੍ਤਮੇਵ ਸੁਦ੍ਧੋਤਿ? ਸਚ੍ਚਮੇਤਂ, ਬ੍ਰਾਹ੍ਮਣੋ ਪਨ ਪੁਬ੍ਬੇ ਅਦਾਤੁਕਾਮੋ ਪਚ੍ਛਾ ਗਾਥਾ ਸੁਤ੍ਵਾ ਧਮ੍ਮਦੇਸਨਾਯ ਮੁਦੁਹਦਯੋ ਹੁਤ੍ਵਾ ਦਾਤੁਕਾਮੋ ਅਹੋਸਿ, ਤਸ੍ਮਾ ਤਂ ਭਿਕ੍ਖੂਨਂ ਅਨਾਗਤੇ ਦਿਟ੍ਠਾਨੁਗਤਿਆਪਜ੍ਜਨਤ੍ਥਂ ਪਟਿਕ੍ਖਿਪਿ. ਤਥਾ ਹਿ ਅਨਨ੍ਤਰਸੁਤ੍ਤੇ ਕਸਿਭਾਰਦ੍ਵਾਜਸੁਤ੍ਤੇ ਚ ਏਵਮੇਵ ਪਟਿਪਜ੍ਜਿ. ਤੇਨਾਹ ‘‘ਤ੍ਵਂ ਬ੍ਰਾਹ੍ਮਣਾ’’ਤਿਆਦਿ. ਕਿਲਞ੍ਜਮ੍ਹਿ…ਪੇ… ਪਕਾਸਿਤਾਤਿ ਏਤੇਨ ਗਾਥਂ ਉਦ੍ਦੇਸਟ੍ਠਾਨੇਵ ਠਪੇਤ੍ਵਾ ਭਗਵਾ ਬ੍ਰਾਹ੍ਮਣਸ੍ਸ ਵਿਤ੍ਥਾਰੇਨ ਧਮ੍ਮਂ ਦੇਸੇਸੀਤਿ ਦਸ੍ਸੇਤਿ. ਗਾਯਨੇਨਾਤਿ ਗਾਯਨਕੇਨ, ਗਾਨੇਨ ਵਾ. ਅਤ੍ਥਞ੍ਚ ਧਮ੍ਮਞ੍ਚਾਤਿ ਸਦੇਵਕਸ੍ਸ ਲੋਕਸ੍ਸ ਹਿਤਞ੍ਚੇਵ ਤਸ੍ਸ ਕਾਰਣਞ੍ਚ. ਸਮ੍ਪਸ੍ਸਨ੍ਤਾਨਨ੍ਤਿ ਸਮ੍ਮਦੇਵ ਪਸ੍ਸਨ੍ਤਾਨਂ. ਧਮ੍ਮੋਤਿ ਪਵੇਣਿਆਗਤੋ ਚਾਰਿਤ੍ਤਧਮ੍ਮੋ ਨ ਹੋਤਿ. ਭੋਜਨੇਸੁ ਉਕ੍ਕਂਸਗਤਂ ਦਸ੍ਸੇਤੁਂ ‘‘ਸੁਧਾਭੋਜਨ’’ਨ੍ਤਿ ਆਹ. ਧਮ੍ਮੇ ਸਤੀਤਿ ਅਰਿਯਾਨਂ ਆਚਾਰਧਮ੍ਮੇ ਸਤਿ ਤਂ ਆਲਮ੍ਬਿਤ੍ਵਾ ਜੀਵਨ੍ਤਾਨਂ ਏਤਦੇਵ ਸੇਟ੍ਠਨ੍ਤਿ ‘‘ਸੋਮਂ ਭੁਞ੍ਜੇਯ੍ਯ ਪਾਯਸ’’ਨ੍ਤਿ ਤਂ ਆਰਬ੍ਭ ਕਥਾਯ ਉਪ੍ਪਨ੍ਨਤ੍ਤਾ.

ਸਲ੍ਲਕ੍ਖੇਤਿ ਅਯਂ ਬ੍ਰਾਹ੍ਮਣੋ. ਸੇਸਾ ਪਚ੍ਚਯਾ ਨਿਦ੍ਦੋਸਾ ਤੇ ਆਰਬ੍ਭ ਕਥਾਯ ਅਪ੍ਪਵਤ੍ਤਿਤਤ੍ਤਾ. ਕੁਕ੍ਕੁਚ੍ਚਵੂਪਸਨ੍ਤਨ੍ਤਿ ਅਗ੍ਗਿਆਹਿਤਪਦਸ੍ਸ ਵਿਯ ਸਦ੍ਦਸਿਦ੍ਧਿ ਵੇਦਿਤਬ੍ਬਾ. ਅਨ੍ਨੇਨ ਪਾਨੇਨਾਤਿ ਲਕ੍ਖਣਵਚਨਮੇਤਂ ਯਥਾ ‘‘ਕਾਕੇਹਿ ਸਪ੍ਪਿ ਰਕ੍ਖਿਤਬ੍ਬ’’ਨ੍ਤਿ. ਤੇਨਾਹ ‘‘ਦੇਸਨਾਮਤ੍ਤਮੇਤ’’ਨ੍ਤਿ. ਬਹੁਸਸ੍ਸਫਲਦਾਯਕਂ ਸੁਖੇਤ੍ਤਂ ਵਿਯ ਪਟਿਯਤ੍ਤਨ੍ਤਿ ਸਮ੍ਮਾ ਕਸਨਬੀਜਨਉਦਕਾਨਯਨਾਪਨਯਨਾਦਿਨਾ ਸੁਸਜ੍ਜਿਤਂ ਖੇਤ੍ਤਂ ਵਿਯ ਸੀਲਾਦਿਗੁਣਵਿਸੇਸਸਮ੍ਪਾਦਨੇਨ ਪਟਿਯਤ੍ਤਂ ਪੁਞ੍ਞਕ੍ਖੇਤ੍ਤਂ ਏਤਂ.

ਅਗ੍ਗਿਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੯. ਸੁਨ੍ਦਰਿਕਸੁਤ੍ਤਵਣ੍ਣਨਾ

੧੯੫. ਆਨੇਤ੍ਵਾ ਹੁਨਿਤਬ੍ਬਤੋ ਆਹੁਤਿ. ਸਪ੍ਪਿਮਧੁਪਾਯਸਾਦੀਹਿ ਅਗ੍ਗਿਂ ਜੁਹੋਤਿ ਏਤ੍ਥਾਤਿ ਅਗ੍ਗਿਹੁਤ੍ਤਂ, ਸਾਧਿਟ੍ਠਾਨਂ ਵੇਦਿਤਬ੍ਬਂ. ਤੇਨਾਹ ‘‘ਅਗ੍ਯਾਯਤਨ’’ਨ੍ਤਿਆਦਿ. ਸੁਵਿਸੋਧਿਤੋ ਚਸ੍ਸਾਤਿ ਨਿਹੀਨਜਾਤਿਕਾਨਂ ਅਨੇਨ ਸੁਟ੍ਠੁ ਵਿਸੋਧਿਤੋ ਚ ਭਵੇਯ੍ਯ. ‘‘ਮੇ’’ਤਿ ਪਦਂ ਆਨੇਤ੍ਵਾ ਸਮ੍ਬਨ੍ਧੋ.

ਅਫਲਂ ਕਰੋਤੀਤਿ ਇਤੋ ਪਟ੍ਠਾਯ ਯਾਵ ਦੇਮੀਤਿ ਪਦਂ. ਤਾਵ ਅਨਨ੍ਤਰਸੁਤ੍ਤਵਣ੍ਣਨਾਯ ਆਗਤਸਦਿਸਮੇਵਾਤਿ ਪੇਯ੍ਯਾਲਵਸੇਨ ਠਪੇਸਿ, ਨ ਸਪ੍ਪਿਸਙ੍ਖਾਰਟ੍ਠਪਨਂ. ਹਿਮਪਾਤਸ੍ਸ ਚ ਸੀਤਵਾਤਸ੍ਸ ਚ ਪਟਿਬਾਹਨਤ੍ਥਨ੍ਤਿ ਅਕਾਰਣਮੇਤਨ੍ਤਿ ਤਂ ਅਨਾਦਿਯਿਤ੍ਵਾ ਅਞ੍ਞਮੇਵ ਸੁਕਾਰਣਂ ਦਸ੍ਸੇਤੁਂ ‘‘ਪਟਿਬਲੋਵਾ’’ਤਿਆਦਿ ਵੁਤ੍ਤਂ. ਸਞ੍ਜਾਨਿਤ੍ਵਾਤਿ ‘‘ਨਾਯਂ ਬ੍ਰਾਹ੍ਮਣੋ’’ਤਿ ਸਞ੍ਜਾਨਿਤ੍ਵਾ.

ਨੀਚਕੇਸਨ੍ਤਨ੍ਤਿ ਰਸ੍ਸਕੇਸਨ੍ਤਂ. ਬ੍ਰਾਹ੍ਮਣਾਨਂ ਸੁਦ੍ਧਿਅਤ੍ਥਾ ਸਿਖਾਤਿ ਆਹ ‘‘ਪਵਤ੍ਤਮਤ੍ਤਮ੍ਪਿ, ਸਿਖਂ ਅਦਿਸ੍ਵਾ’’ਤਿ, ‘‘ਪਰਮਹਂਸਪਰਿਕ੍ਖਾਦਿਨਾ’’ਤਿ ਕੇਚਿ.

ਅਕਾਰਣਂ ਦਕ੍ਖਿਣੇਯ੍ਯਭਾਵਸ੍ਸ ਜਾਤਿ ਅਦਕ੍ਖਿਣੇਯ੍ਯਭਾਵਹੇਤੂਨਂ ਪਾਪਧਮ੍ਮਾਨਂ ਅਪਟਿਕ੍ਖੇਪਭਾਵਤੋ. ਏਤਨ੍ਤਿ ਸੀਲਾਦਿਭੇਦਂ ਚਰਣਂ. ਦਕ੍ਖਿਣੇਯ੍ਯਭਾਵਸ੍ਸ ਕਾਰਣਂ ਅਦਕ੍ਖਿਣੇਯ੍ਯਭਾਵਕਾਰਕਪਾਪਧਮ੍ਮਾਨਂ ਤਦਙ੍ਗਾਦਿਵਸੇਨ ਪਜਹਨਤੋ. ਅਸ੍ਸਾਤਿ ਬ੍ਰਾਹ੍ਮਣਸ੍ਸ. ਤਮਤ੍ਥਨ੍ਤਿ ਤਂ ਦਕ੍ਖਿਣੇਯ੍ਯਭਾਵਸ੍ਸ ਕਾਰਣਤਾਸਙ੍ਖਾਤਮਤ੍ਥਂ ਉਪਮਾਯ ਵਿਭਾਵੇਨ੍ਤੋ. ਸਾਲਾਦਿਕਟ੍ਠਾ ਜਾਤੋਵਾਤਿ ਸਾਲਾਦਿਵਿਸੁਦ੍ਧਕਟ੍ਠਾਵ ਜਾਤੋ. ਸਾਪਾਨਦੋਣਿਆਦਿਅਵਿਸੁਦ੍ਧਕਟ੍ਠਾ ਜਾਤੋ ਅਗ੍ਗਿਕਿਚ੍ਚਂ ਨ ਚ ਨ ਕਰੋਤਿ. ਏਵਨ੍ਤਿ ਯਥਾ ਅਗ੍ਗਿ ਯਤੋ ਕੁਤੋਚਿ ਜਾਤੋਪਿ ਅਗ੍ਗਿਕਿਚ੍ਚਂ ਕਰੋਤਿਯੇਵ, ਏਵਂ ਚਣ੍ਡਾਲਕੁਲਾਦੀਸੁ ਜਾਤੋਪਿ ਦਕ੍ਖਿਣੇਯ੍ਯੋ ਨ ਨ ਹੋਤਿ ਗੁਣਸਮ੍ਪਦਾਵਸੇਨ ਅਰਿਯਾਨਂ ਵਂਸੇ ਪਜਾਤਤ੍ਤਾਤਿ ਆਹ ‘‘ਗੁਣਸਮ੍ਪਤ੍ਤਿਯਾ ਜਾਤਿਮਾ’’ਤਿ. ਧਿਤਿਯਾ ਗੁਣਸਮ੍ਪਤ੍ਤਿਯਾ ਪਮੁਖਭਾਵਂ ਦਸ੍ਸੇਤੁਂ ‘‘ਸੋ ਹੀ’’ਤਿਆਦਿ ਵੁਤ੍ਤਂ. ਤਤ੍ਥ ਧਿਤਿਯਾਤਿ ਵੀਰਿਯੇਨ. ਤਞ੍ਹਿ ਅਨੁਪ੍ਪਨ੍ਨਾਨਂ ਕੁਸਲਧਮ੍ਮਾਨਂ ਉਪ੍ਪਾਦਨਪਰਿਬ੍ਰੂਹਨੇਹਿ ਤੇ ਧਾਰੇਤਿ. ਹਿਰਿਯਾ ਦੋਸੇ ਨਿਸੇਧੇਤਿ, ਸਮ੍ਮਦੇਵ ਪਾਪਾਨਂ ਜਿਗੁਚ੍ਛਨੇ ਸਤਿ ਤੇਸਂ ਪਵਤ੍ਤਿਯਾ ਅਵਸਰੋ ਏਵ ਨਤ੍ਥਿ. ਮੋਨਧਮ੍ਮੇਨ ਞਾਣਸਙ੍ਖਾਤੇਨ ਓਤ੍ਤਪ੍ਪਧਮ੍ਮੇਨ. ਕਾਰਣਾਕਾਰਣਜਾਨਨਕੋਤਿ ਤੇਸਂ ਤੇਸਂ ਧਮ੍ਮਾਨਂ ਯਥਾਭੂਤਂ ਠਾਨਂ, ਪਾਪਧਮ੍ਮਾਨਂ ਵਾ ਵਿਪ੍ਪਕਾਰਸਭਾਵਟ੍ਠਾਨਂ ਜਾਨਨਕੋ.

ਪਰਮਤ੍ਥਸਚ੍ਚੇਨ ਨਿਬ੍ਬਾਨੇਨ ਆਰਮ੍ਮਣਪਚ੍ਚਯਭੂਤੇਨ ਅਰਿਯਮਗ੍ਗੇਨ ਦਨ੍ਤੋ. ਇਨ੍ਦ੍ਰਿਯਦਮੇਨਾਤਿ ਤਤੋ ਏਵ ਅਰਿਯੇਨ ਇਨ੍ਦ੍ਰਿਯਸਂਵਰੇਨ ਉਪਗਤੋ. ਵਿਦਨ੍ਤਿ ਤੇਹਿ ਸਚ੍ਚਾਨੀਤਿ ਵੇਦਾ. ਮਗ੍ਗਵੇਦਾਨਂ ਅਨ੍ਤਨ੍ਤਿ ਅਰਿਯਫਲਂ. ਕਿਲੇਸਾਨਂ ਅਨ੍ਤਨ੍ਤਿ ਤੇਸਂ ਅਨੁਪ੍ਪਾਦਨਿਰੋਧਟ੍ਠਾਨਂ. ਯਞ੍ਞੋਤਿ ਅਗ੍ਗਫਲਂ. ਨਿਰਤ੍ਥਕਨ੍ਤਿ ਅਫਲਂ ਤੇਸਂ ਅਨਾਗਮਨਤੋ, ਆਗਤਾਨਮ੍ਪਿ ਅਗ੍ਗਦਕ੍ਖਿਣੇਯ੍ਯਾਭਾਵਤੋ. ਜੁਹਤਿ ਦੇਤਿ.

ਸੁਯਿਟ੍ਠਨ੍ਤਿ ਸੁਦਾਨਂ ਅਗ੍ਗਦਕ੍ਖਿਣੇਯ੍ਯਲਾਭੇਨ. ਸੁਹੁਤਨ੍ਤਿ ਤਸ੍ਸੇਵ ਵੇਵਚਨਂ. ਅਥ ਵਾ ਸੁਯਿਟ੍ਠਨ੍ਤਿ ਸੁਟ੍ਠੁ ਸਮ੍ਮਦੇਵ ਯਿਟ੍ਠਂ ਸਾਰੇ ਉਪਨੀਤਂ ਮਮ ਇਦਂ ਦੇਯ੍ਯਵਤ੍ਥੁ. ਸੁਹੁਤਨ੍ਤਿ ਏਤ੍ਥਾਪਿ ਏਸੇਵ ਨਯੋ.

ਉਪਹਟਮਤ੍ਤੇਤਿ ਬ੍ਰਾਹ੍ਮਣੇਨ ‘‘ਭੁਞ੍ਜਤੁ ਭਵ’’ਨ੍ਤਿ ਉਪਨੀਤਮਤ੍ਤੇ. ਨਿਬ੍ਬਤ੍ਤਿਤੋਜਮੇਵਾਤਿ ਸਵਤ੍ਥੁਕਂ ਅਗ੍ਗਹੇਤ੍ਵਾ ਵਤ੍ਥੁਤੋ ਵਿਵੇਚਿਤਓਜਮੇਵ. ਤੇਨ ਤਂ ਸੁਖੁਮਤ੍ਤਂ ਗਤਨ੍ਤਿ ਤਂ ਹਬ੍ਯਸੇਸਂ ਸਬ੍ਬਸੋ ਸੁਖੁਮਭਾਵਂ ਗਤਨ੍ਤਿ ਓਜਾਯ ਅਨੋਲ਼ਾਰਿਕਤਾਯ ਪੁਰਿਮਾਕਾਰੇਨੇਵ ਪਞ੍ਞਾਯਮਾਨਤਂ ਸਨ੍ਧਾਯ ਵੁਤ੍ਤਂ, ਨ ਪਨ ਓਜਾਯ ਏਵ ਕੇਵਲਾਯ ਗਹਣਂ ਸਨ੍ਧਾਯ. ਸਾ ਹਿ ਅਵਿਨਿਬ੍ਭੋਗਵੁਤ੍ਤਿਤਾਯ ਵਿਸੁਂ ਗਣ੍ਹਿਤੁਂ ਨ ਸਕ੍ਕਾ, ਤਸ੍ਮਾ ਦੇਵਤਾਹਿਪਿ ਸਵਤ੍ਥੁਕਾ ਗਯ੍ਹਤਿ. ਮਨੁਸ੍ਸਾਨਂ ਵਤ੍ਥੂਤਿ ਕਰਜਕਾਯਮਾਹ. ਓਲ਼ਾਰਿਕਵਤ੍ਥੁਤਾਯ ਦੇਵਾਨਂ ਵਿਯ ਗਹਣੀ ਨ ਤਿਕ੍ਖਾਤਿ ਦਿਬ੍ਬੋਜਸਮ੍ਮਿਸ੍ਸਤਾਯ ਸਮ੍ਮਾ ਪਰਿਣਾਮਂ ਨ ਗਚ੍ਛਤਿ. ਸੁਖੁਮਾਪਿ ਸਮਾਨਾ ਦਿਬ੍ਬੋਜਾ ਤੇਨ ਪਾਯਸੇਨ ਮਿਸ੍ਸਿਤਾ ਓਲ਼ਾਰਿਕਸਮ੍ਮਿਸ੍ਸਤਾਯ ਸੁਖੁਮਵਤ੍ਥੁਕਾਨਂ ਦੇਵਾਨਂ ਸੁਖਦਾ ਨ ਹੋਤੀਤਿ ਇਮਮਤ੍ਥਂ ਦਸ੍ਸੇਤਿ ‘‘ਗੋਯੂਸੇ ਪਨਾ’’ਤਿਆਦਿਨਾ. ਪਰਿਭੋਗਵਤ੍ਥੁਨੋ ਓਲ਼ਾਰਿਕਤਾਯ ਵਾ ਦੇਵਾਨਂ ਦੁਕ੍ਕਰਂ ਸਮ੍ਮਾ ਪਰਿਣਾਮੇਤੁਂ, ਦਿਬ੍ਬੋਜਾਯ ਗਰੁਤਰਭਾਵੇਨ ਮਨੁਸ੍ਸਾਨਂ. ਤੇਨਾਹ ਭਗਵਾ ‘‘ਨ ਖ੍ਵਾਹ’’ਨ੍ਤਿਆਦਿ. ਸਮਾਪਤ੍ਤਿਚਿਤ੍ਤਸਮੁਟ੍ਠਿਤਾ ਤੇਜੋਧਾਤੁ ਝਾਨਾਨੁਭਾਵਸਨ੍ਤੇਜਿਤਾ ਤਿਕ੍ਖਤਰਾ ਹੋਤੀਤਿ ਵੁਤ੍ਤਂ ‘‘ਅਟ੍ਠ…ਪੇ… ਪਰਿਣਾਮੇਯ੍ਯਾ’’ਤਿ. ਭਗਵਤੋ ਪਨ ਸੁਦ੍ਧੇਨੇਵ ਪਰਿਣਮਤੀਤਿ ਵੁਤ੍ਤਂ ‘‘ਪਾਕਤਿਕੇਨੇਵਾ’’ਤਿ, ਝਾਨਾਨੁਭਾਵਪ੍ਪਤ੍ਤੇਨ ਝਾਨੇਨ ਵਿਨਾ ਸਭਾਵਸਿਦ੍ਧੇਨੇਵ.

‘‘ਅਪ੍ਪਹਰਿਤੇ’’ਤਿ ਏਤ੍ਥ ਅਪ੍ਪ-ਸਦ੍ਦੋ ‘‘ਅਪ੍ਪਿਚ੍ਛੋ’’ਤਿਆਦੀਸੁ ਵਿਯ ਅਭਾਵਤ੍ਥੋਤਿ ਆਹ ‘‘ਅਪ੍ਪਹਰਿਤੇਤਿ ਅਹਰਿਤੇ’’ਤਿ. ਪਾਤਿਸਤੇਪਿ ਪਾਯਸੇ. ਨ ਆਲੁਲ਼ਤੀਤਿ ਨ ਆਵਿਲਂ ਹੋਤਿ. ਅਨਾਗਨ੍ਤਾਵ ਗਚ੍ਛੇਯ੍ਯ ‘‘ਅਤ੍ਤਨਾਪਿ ਨ ਪਰਿਭੁਞ੍ਜਿ, ਅਞ੍ਞੇਸਂ ਨ ਦਾਪੇਸਿ, ਕੇਵਲਂ ਪਾਯਸਂ ਨਾਸੇਸੀ’’ਤਿ ਦੋਮਨਸ੍ਸਪ੍ਪਤ੍ਤੋ.

ਦਾਰੁ ਸਮਾਦਹਾਨੋਤਿ ਦਾਰੁਹਰਿਦ੍ਦਿ ਦਾਰੁਸ੍ਮਿਂ ਤਸ੍ਸ ਦਹਨ੍ਤੋ. ਯਦੀਤਿਆਦਿ ਦਾਰੁਝਾਪਨਸ੍ਸ ਬਹਿਦ੍ਧਭਾਵਸਾਧਨਂ ਅਸੁਦ੍ਧਹੇਤੂਨਂ ਪਟਿਪਕ੍ਖਾਭਾਵਤੋ ਤਸ੍ਸ. ਖਨ੍ਧਾਦੀਸੁ ਕੁਸਲਾਤਿ ਤੇਸੁ ਸਭਾਵਤੋ ਸਮੁਦਯਤੋ ਅਤ੍ਥਙ੍ਗਮਤੋ ਅਸ੍ਸਾਦਤੋ ਆਦੀਨਵਤੋ ਨਿਸ੍ਸਰਣਤੋ ਜਾਨਨਤੋ ਛੇਕਾ ਪਣ੍ਡਿਤਾ. ਞਾਣਜੋਤਿਨ੍ਤਿ ਞਾਣਮਯਂ ਜੋਤਿਂ. ਜਾਲੇਮੀਤਿ ਪਜ੍ਜਲਿਤਂ ਕਰੋਮਿ. ਨਿਚ੍ਚਂ ਪਜ੍ਜਲਿਤਗ੍ਗਿ ਸਬ੍ਬਤ੍ਥਕਮੇਵ ਵਿਗਤਸਮ੍ਮੋਹਨ੍ਧਕਾਰਤਾਯ ਏਕੋਭਾਸਭਾਵਤੋ. ਸਬ੍ਬਸੋ ਵਿਕ੍ਖੇਪਾਭਾਵਤੋ ਨਿਚ੍ਚਸਮਾਹਿਤਤ੍ਤੋ. ਏਵਂ ਵਦਤੀਤਿ ਚਰਿਤਂ ਬ੍ਰਹ੍ਮਚਰਿਯਂ ਗਹੇਤ੍ਵਾ ਚਰਾਮੀਤਿ ਏਵਂ ਵਤ੍ਤਮਾਨਂ ਵਿਯ ਵਦਤਿ ਆਸਨ੍ਨਤਂ ਹਦਯੇ ਠਪੇਤ੍ਵਾ.

ਖਾਰਿਭਾਰੋਤਿ ਖਾਰਿਭਾਰਸਦਿਸੋ. ਤੇਨਾਹ ‘‘ਯਥਾ’’ਤਿਆਦਿ. ਖਨ੍ਧੇਨ ਵਯ੍ਹਮਾਨੋਤਿ ਕਾਜੇ ਪਕ੍ਖਿਪਿਤ੍ਵਾ ਖਨ੍ਧੇਨ ਵਯ੍ਹਮਾਨੋ. ਪਥਵਿਯਾ ਸਦ੍ਧਿਂ ਫੁਸੇਤਿ ਭਾਰਸ੍ਸ ਗਰੁਕਭਾਵੇਨ ਕਾਜਸ੍ਸ ਪਰਿਣਮਨੇਨ. ਮਾਨੇਨ ਅਤ੍ਤਨੋ ਜਾਤਿਆਦੀਨਿ ਪਗ੍ਗਣ੍ਹਤੋ ਅਞ੍ਞਸ੍ਸ ਤਾਨਿ ਨ ਸਹਤੀਤਿ ਆਹ – ‘‘ਤਤ੍ਥ ਤਤ੍ਥ ਇਸ੍ਸਂ ਉਪ੍ਪਾਦੇਨ੍ਤੋ’’ਤਿ, ਤਤ੍ਥ ਤਤ੍ਥ ਜਾਤਿਆਦਿਮਾਨਵਤ੍ਥੁਸ੍ਮਿਂ ਗਰੁਤਰਗ੍ਗਹਣੇਨ ਸਂਸੀਦੇਯ੍ਯਾਤਿ ਅਧਿਪ੍ਪਾਯੋ. ਕੋਧੋ ਧੂਮੋਤਿ ਯਥਾਪਿ ਭਾਸੁਰੋ ਅਗ੍ਗਿ ਧੂਮੇਨ ਉਪਕ੍ਕਿਲਿਟ੍ਠੋ, ਏਵਂ ਕੋਧੇਨ ਉਪਕ੍ਕਿਲਿਟ੍ਠੋ. ਞਾਣਗ੍ਗੀਤਿ ਤਸ੍ਸ ਕੋਧੋ ਧੂਮੋ. ਮੁਸਾਵਾਦੋਵ ਮੋਸਵਜ੍ਜਂ. ਯਥਾ ਞਾਣੇ ਸਤਿ ਮੁਸਾਵਾਦੋ ਨਤ੍ਥਿ, ਏਵਂ ਮੁਸਾਵਾਦੇ ਸਤਿ ਞਾਣਮ੍ਪੀਤਿ ਤੇਨ ਤਂ ਨਿਰੋਧਿਤਂ ਵਿਯ ਹੋਤੀਤਿ ਆਹ – ‘‘ਮੁਸਾਵਾਦੇਨ ਪਟਿਚ੍ਛਨ੍ਨਂ ਞਾਣ’’ਨ੍ਤਿ. ਯਥਾ ਸੁਜਾਯ ਵਿਨਾ ਬ੍ਰਾਹ੍ਮਣਾਨਂ ਯਾਗੋ ਨ ਇਜ੍ਝਤਿ, ਏਵਂ ਪਹੂਤਜਿਵ੍ਹਾਯ ਵਿਨਾ ਸਤ੍ਥੁ ਧਮ੍ਮਯਾਗੋ ਨ ਇਜ੍ਝਤੀਤਿ ਜਿਵ੍ਹਾ ਸੁਜਾਪਰਿਯਾਯਾ ਵੁਤ੍ਤਾ. ਜੋਤਿ ਠਿਯਤਿ ਏਤ੍ਥਾਤਿ ਜੋਤਿਟ੍ਠਾਨਂ ਵੇਦਿ, ਯਂ ਅਗ੍ਗਿਕੁਣ੍ਡਂ. ਸਤ੍ਤਾਨਂ ਹਦਯਂ ਜੋਤਿਟ੍ਠਾਨਂ ਞਾਣਗ੍ਗਿਨੋ ਤਤ੍ਥ ਸਮੁਜ੍ਜਲਨਤੋ. ਅਤ੍ਤਾਤਿ ਚਿਤ੍ਤਂ ‘‘ਆਹਿਤੋ ਅਹਂ ਮਾਨੋ ਏਤ੍ਥਾ’’ਤਿ ਕਤ੍ਵਾ.

ਧਮ੍ਮੋ ਰਹਦੋਤਿ ਅਸ੍ਸਦ੍ਧਿਯਾਦਿਆਲਸਿਯਾਭਾਵਤੋ ਕਿਲੇਸਮਲਪਕ੍ਖਾਲਨਤੋ ਪਰਮਗ੍ਗਿਨਿਬ੍ਬੁਤਾਵਹਨਤੋ ਅਰਿਯਮਗ੍ਗਧਮ੍ਮੋ ਅਨਾਵਿਲੋ ਰਹਦੋ. ਹੇਟ੍ਠੁਪਰਿਯਵਾਲੁਕਾਤਿ ਵਿਪਰਿਵਤ੍ਤਿਤਵਾਲੁਕਾ ਹੁਤ੍ਵਾ. ਆਲੁਲ਼ਾਤਿ ਆਕੁਲਜਾਤਾ. ਪਣ੍ਡਿਤਾਨਂ ਪਸਤ੍ਥੋਤਿ ਪਣ੍ਡਿਤਾਨਂ ਪੁਰਤੋ ਸੇਟ੍ਠੋ. ਸੇਟ੍ਠਭਾਵੇਨ ਸਨ੍ਤੋ ਪਾਸਂਸੋ ਹੁਤ੍ਵਾ ਕਿਲੇਸੇ ਭਿਨ੍ਦਤਿ ਸਮੁਚ੍ਛਿਨ੍ਦਤੀਤਿ ਸਬ੍ਭੀਤਿ ਵੁਚ੍ਚਤਿ. ਤੇਨਾਹ ‘‘ਉਤ੍ਤਮਟ੍ਠੇਨਾ’’ਤਿ. ਤਥਾ ਚਾਹ ਭਗਵਾ ‘‘ਮਗ੍ਗਾਨਟ੍ਠਙ੍ਗਿਕੋ ਸੇਟ੍ਠੋ’’ਤਿ (ਧ. ਪ. ੨੭੩).

ਵਚੀਸਚ੍ਚਨ੍ਤਿ ਇਮਿਨਾ ‘‘ਚਤੁਰਙ੍ਗਸਮਨ੍ਨਾਗਤਾ ਵਾਚਾ ਸੁਪਰਿਸੁਦ੍ਧਾ ਹੋਤੀ’’ਤਿ ਸਮ੍ਮਾਵਾਚਂ ਦਸ੍ਸੇਤਿ. ਸਚ੍ਚਸਂਯਮਪਦੇਹਿ ਦਸ੍ਸਿਤਾ ਮਗ੍ਗਧਮ੍ਮਾ ਇਧ ‘‘ਧਮ੍ਮੋ’’ਤਿ ਅਧਿਪ੍ਪੇਤਾਤਿ ਆਹ – ‘‘ਧਮ੍ਮੋਤਿ ਇਮਿਨਾ…ਪੇ… ਦਸ੍ਸੇਤੀ’’ਤਿ. ਮਗ੍ਗਸਚ੍ਚਂ ਗਹਿਤਂ ਅਨਨ੍ਤਰਗਾਥਾਯ ਅਨੇਕੇਹਿ ਵਿਸੇਸੇਤ੍ਵਾ ਵੁਤ੍ਤਤ੍ਤਾ. ਅਤ੍ਥਤੋਤਿ ਪੁਬ੍ਬਙ੍ਗਮਤ੍ਤਾਦਿਅਤ੍ਥਤੋ. ਤਾਯ ਹਿ ਸਕਿਚ੍ਚਂ ਕਰੋਨ੍ਤਿਯਾ ਇਤਰੇ ਸਬ੍ਬੇਪਿ ਤਦਨੁਵਤ੍ਤਿਕਾ ਹੋਨ੍ਤਿ. ਤਗ੍ਗਤਿਕਤ੍ਤਾਤਿ ਸਮ੍ਮਾਦਿਟ੍ਠਿਯਾ ਉਪਕਾਰਕਭਾਵੇਨ ਤਾਯ ਸਮਾਨਗਤਿਕਤ੍ਤਾ. ਆਰਮ੍ਮਣਞ੍ਹਿ ਵਿਤਕ੍ਕੇਨਾਹਟਂ ਪਞ੍ਞਾ ਵਿਚਿਨਿਤੁਂ ਸਕ੍ਕੋਤਿ. ਤਥਾ ਹਿ ਸੋ ਪਞ੍ਞਾਕ੍ਖਨ੍ਧੇਨ ਸਙ੍ਗਹਂ ਗਤੋ. ਧਮ੍ਮੋਤਿ ਸਭਾਵਤੋ ਸਮਾਧਿ ਗਹਿਤੋ, ਇਤਰੇ ਦ੍ਵੇ ਤਦੁਪਕਾਰਤ੍ਤਾ. ਤਥਾ ਹਿ ‘‘ਏਵਂਧਮ੍ਮਾ ਤੇ ਭਗਵਨ੍ਤੋ’’ਤਿਆਦੀਸੁ (ਦੀ. ਨਿ. ੨.੧੩; ਮ. ਨਿ. ੩.੧੯੭; ਸਂ. ਨਿ. ੫.੩੭੮) ਸਮਾਧਿ ‘‘ਧਮ੍ਮੋ’’ਤਿ ਵੁਤ੍ਤੋ. ਪਰਮਤ੍ਥਸਚ੍ਚਂ ਗਹਿਤਂ ਸਬ੍ਬੇਸਂ ਸੇਟ੍ਠਭਾਵਤੋ. ਯਥਾਹ – ‘‘ਯਾਵਤਾ, ਭਿਕ੍ਖਵੇ, ਧਮ੍ਮਾ ਸਙ੍ਖਤਾ ਵਾ ਅਸਙ੍ਖਤਾ ਵਾ, ਵਿਰਾਗੋ ਤੇਸਂ ਅਗ੍ਗਮਕ੍ਖਾਯਤੀ’’ਤਿ (ਇਤਿਵੁ. ੯੦; ਅ. ਨਿ. ੪.੩੪). ਅਤ੍ਥਤੋਤਿ ਤਤੋ ਏਵ ਪਰਮਤ੍ਥਤੋ, ਅਨਨ੍ਤਰਂ ਵੁਚ੍ਚਮਾਨਾਨਂ ਵਾ ਮਗ੍ਗਧਮ੍ਮਾਨਂ ਆਰਮ੍ਮਣਭਾਵਤੋ. ਪਞ੍ਚਙ੍ਗਾਨਿ ਗਹਿਤਾਨਿ ਤਾਸਂ ਮਗ੍ਗਭਾਵਤੋ. ਤੀਣਿ ਅਙ੍ਗਾਨਿ. ਬ੍ਰਹ੍ਮਚਰਿਯਂ ਨਾਮਾਤਿ ਏਤਂ ਨਿਬ੍ਬਾਨਗਾਮਿ ਉਤ੍ਤਮਟ੍ਠੇਨ ਮਗ੍ਗਬ੍ਰਹ੍ਮਚਰਿਯਂ ਨਾਮ. ਮਜ੍ਝੇ ਸਿਤਾਤਿ ਲੀਨੁਦ੍ਧਚ੍ਚਾਦਿਅਨ੍ਤਦ੍ਵਯਵਿਵਜ੍ਜਨੇਨ ਮਜ੍ਝੇ ਮਜ੍ਝਿਮਪਟਿਪਦਾਭਾਵਨਂ ਨਿਸ੍ਸਿਤਾ. ਸਸ੍ਸਤੁਚ੍ਛੇਦਗ੍ਗਹਣਂ ਹੇਤ੍ਥ ਪਧਾਨਤਾਯ ਨਿਦਸ੍ਸਨਮਤ੍ਤਂ. ਸੇਟ੍ਠਪ੍ਪਤ੍ਤੀਤਿ ਸੇਟ੍ਠਭਾਵਪ੍ਪਤ੍ਤਿ. ਤ-ਕਾਰੋ ਪਦਸਨ੍ਧਿਕਰੋਤਿ ‘‘ਸ ਉਜੁਭੂਤੇਸੂ’’ਤਿ ਵਤ੍ਤਬ੍ਬੇ ਮਜ੍ਝੇ ਤ-ਕਾਰੋ ਪਦਸਨ੍ਧਿਕਰੋ, ‘‘ਸ ਦੁਜ੍ਜੁਭੂਤੇਸੂਤਿ ਕੇਚਿ ਪਠਨ੍ਤਿ, ਤੇਸਂ ਦ-ਕਾਰੋ ਪਦਸਨ੍ਧਿਕਰੋ. ਸ-ਇਤਿ ਸੁਨ੍ਦਰਿਕੋ ਬ੍ਰਾਹ੍ਮਣੋ ਵੁਤ੍ਤੋਤਿ ਕਤ੍ਵਾ ਆਹ ‘‘ਸ ਤ੍ਵ’’ਨ੍ਤਿ, ਸੋ ਤ੍ਵਨ੍ਤਿ ਅਤ੍ਥੋ. ਧਮ੍ਮੋ ਸਾਰਿਯੋ ਪਰਿਧਾਨਭੂਤਾ ਅਲਙ੍ਕਾਰਾ ਏਤਸ੍ਸਾਤਿ ਧਮ੍ਮਸਾਰੀ. ਅਥ ਵਾ ਧਮ੍ਮੇਹਿ ਸਾਰਿਤਵਾਤਿ ਧਮ੍ਮਸਾਰੀ, ਤੇਹਿ ਸਾਰੇਤ੍ਵਾ ਠਿਤਵਾਤਿ ਅਤ੍ਥੋ. ਤੇਨਾਹ ‘‘ਕੁਸਲਧਮ੍ਮੇਹੀ’’ਤਿਆਦਿ.

ਸੁਨ੍ਦਰਿਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੦. ਬਹੁਧੀਤਰਸੁਤ੍ਤਵਣ੍ਣਨਾ

੧੯੬. ਸਮਨ੍ਤਤੋਤਿ ਦਕ੍ਖਿਣਵਾਮਾਨਂ ਵਸੇਨ ਸਮਨ੍ਤਤੋ. ਊਰੁਬਦ੍ਧਾਸਨਨ੍ਤਿ ਊਰੂਨਂ ਬਨ੍ਧਨਵਸੇਨ ਨਿਸਜ੍ਜਨਂ. ਦ੍ਵਿਨ੍ਨਂ ਊਰੂਨਂ ਅਞ੍ਞਮਞ੍ਞਬਨ੍ਧਨਵਸੇਨ ਆਭੁਜਿਤਾਕਾਰਂ ਸਨ੍ਧਾਯਾਹ ‘‘ਆਭੁਜਿਤ੍ਵਾਤਿ ਬਨ੍ਧਿਤ੍ਵਾ’’ਤਿ. ਹੇਟ੍ਠਿਮਕਾਯਸ੍ਸ ਅਨੁਜੁਕਂ ਠਪਨਂ ਨਿਸਜ੍ਜਾਵਚਨੇਨੇਵ ਬੋਧਿਤਨ੍ਤਿ ‘‘ਉਜੁਂ ਕਾਯ’’ਨ੍ਤਿ ਏਤ੍ਥ ਕਾਯ-ਸਦ੍ਦੋ ਉਪਰਿਮਕਾਯਵਿਸਯੋਤਿ ਆਹ ‘‘ਉਪਰਿਮਂ ਸਰੀਰਂ ਉਜੁਕਂ ਠਪੇਤ੍ਵਾ’’ਤਿ. ਤਂ ਪਨ ਉਜੁਕਟ੍ਠਪਨਂ ਸਰੂਪਤੋ ਪਯੋਜਨਤੋ ਚ ਦਸ੍ਸੇਤੁਂ ‘‘ਅਟ੍ਠਾਰਸਾ’’ਤਿਆਦਿ ਵੁਤ੍ਤਂ. ਪਰਿਮੁਖਨ੍ਤਿ ਏਤ੍ਥ ਪਰਿ-ਸਦ੍ਦੋ ਅਭਿਸਦ੍ਦੇਨ ਸਮਾਨਤ੍ਥੋਤਿ ਆਹ ‘‘ਕਮ੍ਮਟ੍ਠਾਨਾਭਿਮੁਖ’’ਨ੍ਤਿ, ਬਹਿਦ੍ਧਾ ਪੁਥੁਤ੍ਤਾਰਮ੍ਮਣਤੋ ਨਿਵਾਰੇਤ੍ਵਾ ਕਮ੍ਮਟ੍ਠਾਨਂਯੇਵ ਪੁਰੇਕ੍ਖਤੋਤਿ ਅਤ੍ਥੋ. ਪਰਿਗ੍ਗਹਟ੍ਠੋ ‘‘ਪਰਿਣਾਯਿਕਾ’’ਤਿਆਦੀਸੁ ਵਿਯ. ਮੁਖਨ੍ਤਿ ਨਿਯ੍ਯਾਨਟ੍ਠੋ ‘‘ਸੁਞ੍ਞਤਵਿਮੋਕ੍ਖਮੁਖ’’ਨ੍ਤਿਆਦੀਸੁ ਵਿਯ. ਪਟਿਪਕ੍ਖਤੋ ਨਿਗ੍ਗਮਨਟ੍ਠੋ ਹਿ ਨਿਯ੍ਯਾਨਟ੍ਠੋ, ਤਸ੍ਮਾ ਪਰਿਗ੍ਗਹਿਤਨਿਯ੍ਯਾਨਨ੍ਤਿ ਸਬ੍ਬਥਾ ਗਹਿਤਸਮ੍ਮੋਸਂ ਪਰਿਚ੍ਚਤ੍ਤਸਮ੍ਮੋਸਂ ਸਤਿਂ ਕਤ੍ਵਾ ਪਰਮਂ ਸਤਿਨੇਪਕ੍ਕਂ ਉਪਟ੍ਠਪੇਤ੍ਵਾਤਿ ਅਤ੍ਥੋ. ਛਬ੍ਬਣ੍ਣਾ…ਪੇ… ਨਿਸੀਦਿ ਬ੍ਰਾਹ੍ਮਣਸ੍ਸ ਪਸਾਦਸਞ੍ਜਾਨਨਤ੍ਥਂ. ਅਟਵਿਮੁਖਾ ਚਰਮਾਨਾਤਿ ਗੋਚਰਂ ਗਣ੍ਹਨ੍ਤਾ.

ਅਜ੍ਜਸਟ੍ਠਿਨ੍ਤਿ ਅਜ੍ਜ ਛਨ੍ਨਂ ਪੂਰਣੀ ਸਟ੍ਠੀ ਦਿਵਸਵੁਤ੍ਤਿ, ਅਜ੍ਜ ਆਦਿਂ ਕਤ੍ਵਾ ਛ ਦਿਵਸੇਤਿ ਅਤ੍ਥੋ. ਅਚ੍ਚਨ੍ਤਸਂਯੋਗੇ ਚੇਤਂ ਉਪਯੋਗਵਚਨਂ. ਅਜ੍ਜ ਛਦਿਵਸਮਤ੍ਤਕਾਤਿ ਅਜ੍ਜਤੋ ਛਟ੍ਠਦਿਵਸਮਤ੍ਤਕਾ. ਲਾਮਕਾਤਿ ਨਿਹੀਨਾ ਨਿਪ੍ਫਲਾ. ਤੇਨਾਹ ‘‘ਤਿਲਖਾਣੁਕਾ’’ਤਿਆਦਿ.

ਉਸ੍ਸਾਹੇਨਾਤਿ ਉਦ੍ਧਂ ਉਦ੍ਧਂ ਪਸਾਰੇਨ ਅਭਿਭਵਨੇਨ. ਤਂ ਪਨ ਨੇਸਂ ਅਭਿਭਵਨਂ ਦਸ੍ਸੇਤੁਂ ‘‘ਕਣ੍ਣਨਙ੍ਗੁਟ੍ਠਾਦੀਨੀ’’ਤਿਆਦਿਮਾਹ.

‘‘ਉਪ੍ਪਾਟਕਪਾਣਕਾ’’ਤਿ ਤਚਂ ਉਪ੍ਪਾਟੇਤ੍ਵਾ ਵਿਯ ਖਾਦਕਪਾਣਕਾ ਊਕਾਮਙ੍ਗੁਲਾਦਯੋ.

ਕਲ਼ਾਰਪਿਙ੍ਗਲਾਤਿ ਨਿਕ੍ਖਨ੍ਤਪਿਙ੍ਗਲਕ੍ਖਿਕਾ, ਕਲ਼ਾਰਪਿਙ੍ਗਲਾਤਿ ਵਾ ਰਤ੍ਤਗਤ੍ਤਾ ਚ ਪਿਙ੍ਗਲਚਕ੍ਖੁਕਾ ਚ. ਤਿਲਕਾਹਤਾਤਿ ਆਹਤਤਿਲਕਾ, ਤਿਲਪ੍ਪਮਾਣੇਹਿ ਬਿਨ੍ਦੂਹਿ ਸਮਨ੍ਤਤੋ ਸਨ੍ਥਤਸਰੀਰਾ.

ਪਟਿਗਾਥਾਹਿ ਬ੍ਰਾਹ੍ਮਣਸ੍ਸ ਧਮ੍ਮਦੇਸਨਂ ਵਡ੍ਢੇਸੀਤਿ ਪਕਤਿਯਾ ਤਸ੍ਸ ਅਤ੍ਤਨਾ ਕਥੇਤਬ੍ਬਂ ਧਮ੍ਮਦੇਸਨਂ ਪਬ੍ਬਜ੍ਜਾਗੁਣਕਿਤ੍ਤਨਵਸੇਨ ਸਤ੍ਤਹਿ ਵਡ੍ਢੇਸਿ. ਪਬ੍ਬਜਿਤ੍ਵਾਤਿ ਇਣਾਯਿਕਾਨਂ ਅਤ੍ਤਨੋ ਪਲਿਬੋਧਂ ਤਥਾ ਤਥਾ ਜਾਨਾਪੇਤ੍ਵਾ ਪਬ੍ਬਜਿਤ੍ਵਾ.

ਯਥਾ ਚ ਤਤ੍ਥ ਭਗਵਾ ਪਟਿਪਜ੍ਜਿ, ਤਂ ਦਸ੍ਸੇਤੁਂ ‘‘ਪੁਨ ਦਿਵਸੇ’’ਤਿਆਦਿ ਵੁਤ੍ਤਂ.

ਤਂ ਤਂ ਕੁਲਘਰਂ ਪੇਸੇਤ੍ਵਾਤਿ ਤਂ ਤਂ ਤਸ੍ਸ ਬ੍ਰਾਹ੍ਮਣਸ੍ਸ ਧੀਤਰਂ ਤਸ੍ਸ ਤਸ੍ਸਾਨੁਚ੍ਛਵਿਕਸ੍ਸ ਬ੍ਰਾਹ੍ਮਣਸ੍ਸ ਦੇਨ੍ਤੋ ਤਂ ਤਂ ਕੁਲਘਰਂ ਪੇਸੇਤ੍ਵਾ ਬ੍ਰਾਹ੍ਮਣਧਮ੍ਮੇ ਗਰੁਕਰਣਾਭਾਵਤੋ.

‘‘ਨਟ੍ਠੇ ਮਤੇ ਪਬ੍ਬਜਿਤੇ, ਨਪੁਂਸਕੇਪਿ ਭਤ੍ਤਰਿ;

ਇਤ੍ਥਿਯਾ ਪਤਿਸੇਟ੍ਠਾਯ, ਨ ਅਞ੍ਞੋ ਪਤਿ ਇਚ੍ਛਿਯੋ’’ਤਿ. –

ਅਯਞ੍ਹਿ ਬ੍ਰਾਹ੍ਮਣਧਮ੍ਮੋ. ਅਯ੍ਯਿਕਟ੍ਠਾਨੇਤਿ ਮਾਤਾਮਹਿਟ੍ਠਾਨੇ ਠਪੇਸਿ ਸਤ੍ਥੁ ਚਿਤ੍ਤਾਰਾਧਨਵਸੇਨਾਤਿ.

ਬਹੁਧੀਤਰਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਪਠਮਵਗ੍ਗਵਣ੍ਣਨਾ ਨਿਟ੍ਠਿਤਾ.

੨. ਉਪਾਸਕਵਗ੍ਗੋ

੧. ਕਸਿਭਾਰਦ੍ਵਾਜਸੁਤ੍ਤਵਣ੍ਣਨਾ

੧੯੭. ਦਕ੍ਖਿਣਾਗਿਰਿਸ੍ਮਿਨ੍ਤਿ ਦਕ੍ਖਿਣਾਗਿਰਿਜਨਪਦੇ, ਤਸ੍ਮਿਂ ਦਕ੍ਖਿਣਾਗਿਰਿਜਨਪਦੇ ਦਕ੍ਖਿਣਾਗਿਰਿਵਿਹਾਰੇ. ਖਨ੍ਧੇਸੁ ਠਪੇਤ੍ਵਾ ਯੁਗੇ ਯੋਤ੍ਤੇਹੀਤਿ ਯੋਤ੍ਤਰਜ੍ਜੂਹਿ ਯੁਤ੍ਤਾਨਿ ਪਯੋਜਿਤਾਨਿ ਇਚ੍ਚੇਵ ਅਤ੍ਥੋ.

ਪਠਮਦਿਵਸੇਤਿ ਵਪਨਦਿਵਸੇਸੁ ਪਠਮਦਿਵਸੇ ਆਰਦ੍ਧਦਿਵਸੇ. ਪਞ੍ਚਙ੍ਗਾਨਿਪਿ ਪਰਿਪੁਣ੍ਣਾਨਿ, ਪਗੇਵ ਇਤਰਙ੍ਗਾਨੀਤਿ ਦਸ੍ਸੇਤੁਂ ‘‘ਪਰਿਪੁਣ੍ਣਪਞ੍ਚਙ੍ਗਾ’’ਇਚ੍ਚੇਵ ਵੁਤ੍ਤਂ. ਹਰਿਤਾਲਮਨੋਸਿਲਾਅਞ੍ਜਨੇਹਿ ਉਰਤ੍ਥਨਾਦੀਸੁ ਠਪਿਤਤ੍ਤਾ ਆਭਾਯ ਉਜ੍ਜਲਗਤ੍ਤਾ. ਅਵਸੇਸਾ ਬਲੀਬਦ੍ਦਾ. ਕਿਲਨ੍ਤਗੋਣਂ ਮੋਚੇਤ੍ਵਾ ਅਕਿਲਨ੍ਤਸ੍ਸ ਯੋਜਨਂ ਕਿਲਨ੍ਤਪਰਿਵਤ੍ਤਨਂ.

ਸੀਹਕੁਣ੍ਡਲਾਨੀਤਿ ਸੀਹਮੁਖਕੁਣ੍ਡਲਾਨਿ. ਬ੍ਰਹ੍ਮਵੇਠਨਨ੍ਤਿ ਬ੍ਰਹ੍ਮੁਨੋ ਵੇਠਨਸਦਿਸਂ, ਅਸ੍ਸਨਖਵੇਠਨਸਦਿਸਨ੍ਤਿ ਅਤ੍ਥੋ.

ਬੁਦ੍ਧਾਨਂ ਕਿਚ੍ਚਾਨਿ ਕਾਲਵਸੇਨ ਵਿਭਤ੍ਤਾਨਿ ਪਞ੍ਚ ਕਿਚ੍ਚਾਨਿ ਭਵਨ੍ਤਿ. ਪੁਰੇਭਤ੍ਤਕਿਚ੍ਚਨ੍ਤਿ ਭਤ੍ਤਤੋ ਪੁਬ੍ਬੇ ਬੁਦ੍ਧੇਨ ਕਾਤਬ੍ਬਕਿਚ੍ਚਂ. ਵੀਤਿਨਾਮੇਤ੍ਵਾਤਿ ਫਲਸਮਾਪਤ੍ਤਿਯਾ ਕਾਲਂ ਵੀਤਿਨਾਮੇਤ੍ਵਾ. ਕਦਾਚਿ ਏਕੋਤਿਆਦਿ ਤੇਸਂ ਤੇਸਂ ਵਿਨੇਯ੍ਯਾਨਂ ਵਿਨਯਨਾਨੁਰੂਪਪਟਿਪਤ੍ਤਿਦਸ੍ਸਨਂ. ਪਕਤਿਯਾਤਿ ਪਕਤਿਬੁਦ੍ਧਵੇਸੇਨ. ਬੁਦ੍ਧਾਨਂ ਹਿ ਰੂਪਕਾਯਸ੍ਸ ਅਸੀਤਿਅਨੁਬ੍ਯਞ੍ਜਨਪਟਿਮਣ੍ਡਿਤ-ਬਾਤ੍ਤਿਂਸਮਹਾਪੁਰਿਸ- ਲਕ੍ਖਣ-ਕਾਯਪ੍ਪਭਾ-ਬ੍ਯਾਮਪ੍ਪਭਾ-ਕੇਤੁਮਾਲਾਵਿਚਿਤ੍ਤਤਾ ਬੁਦ੍ਧਵੇਸੋ. ਕਦਾਚਿ ਅਨੇਕੇਹਿ ਪਾਟਿਹਾਰਿਯੇਹਿ ਵਤ੍ਤਮਾਨੇਹੀਤਿ ਇਮਿਨਾ ਪਾਰਮੀਨਂ ਨਿਸ੍ਸਨ੍ਦਭੂਤਾਨਿ ਪਾਟਿਹਾਰਿਯਾਨਿ ਰੁਚਿਵਸੇਨੇਵ ਪਕਾਸਨਕਾਨਿ ਭਵਨ੍ਤਿ, ਨ ਸਬ੍ਬਦਾਤਿ ਦਸ੍ਸੇਤਿ. ਏਵਞ੍ਚ ਕਤ੍ਵਾ ‘‘ਇਨ੍ਦਖੀਲਸ੍ਸ ਅਨ੍ਤੋ ਠਪਿਤਮਤ੍ਤੇ ਦਕ੍ਖਿਣਪਾਦੇ’’ਤਿਆਦਿਵਚਨਂ ਸਮਤ੍ਥਿਤਂ ਹੋਤਿ. ਭਗਵਤੋ ਕਾਯੇ ਪੀਤਰਸ੍ਮੀਨਂ ਯੇਭੁਯ੍ਯਤਾਯ ‘‘ਸੁਵਣ੍ਣਰਸਸਿਞ੍ਚਨਾਨਿ ਵਿਯਾ’’ਤਿ ਵਤ੍ਵਾ ਕਾਯਮ੍ਹਿ ਨੀਲਾਦਿਰਸ੍ਮੀਹਿ ਤਹਂ ਤਹਂ ਪੀਤਮਿਸ੍ਸਿਤਂ ਸਨ੍ਧਾਯ ‘‘ਵਿਚਿਤ੍ਰਪਟਪਰਿਕ੍ਖਿਤ੍ਤਾਨਿ ਵਿਯ ਚਾ’’ਤਿ ਵੁਤ੍ਤਂ. ਮਧੁਰੇਨਾਕਾਰੇਨ ਸਦ੍ਦਂ ਕਰੋਨ੍ਤਿ ਤੁਟ੍ਠਰਵਰਵਨਤੋ.

ਤਤ੍ਥਾਤਿ ਵਿਹਾਰੇ. ਗਨ੍ਧਮਣ੍ਡਲਮਾਲ਼ੇਤਿ ਹਤ੍ਥੇਨ ਕਤਪਰਿਭਣ੍ਡੇ ਸਮੋਸਰਿਤਗਨ੍ਧਪੁਪ੍ਫਦਾਮੇ ਮਣ੍ਡਲਮਾਲ਼ੇ.

ਉਪਟ੍ਠਾਨੇਤਿ ਪਮੁਖੇ. ‘‘ਓਵਦਤੀ’’ਤਿ ਵਤ੍ਵਾ ਤਤ੍ਥੋਵਾਦਂ ਸਾਮਞ੍ਞਤੋ ਦਸ੍ਸੇਤੁਂ, ‘‘ਭਿਕ੍ਖਵੇ’’ਤਿਆਦਿ ਵੁਤ੍ਤਂ. ਸਮ੍ਪਤ੍ਤੀਤਿ ਚਕ੍ਖਾਦਿਇਨ੍ਦ੍ਰਿਯਪਾਰਿਪੂਰਿ ਚੇਵ ਹਤ੍ਥਾਦਿਸਮ੍ਪਦਾ ਚ. ਸਮਸ੍ਸਾਸਿਤਕਾਯੋ ਕਿਲਮਥਵਿਨੋਦਨੇਨ. ‘‘ਤਞ੍ਚ ਖੋ ਸਮਾਪਜ੍ਜਨੇਨਾ’’ਤਿ ਵਦਨ੍ਤਿ. ਦੁਤਿਯਭਾਗੇਤਿ ਇਮਿਨਾ ਅਪਰਭਾਗਂ ਤਯੋ ਭਾਗੇ ਕਤ੍ਵਾ ਤਤ੍ਥ ਪੁਰਿਮਭਾਗਂ ਸੇਯ੍ਯਨਿਸਜ੍ਜਾਵਸੇਨ ਸਮਾਪਤ੍ਤੀਹਿ ਵੀਤਿਨਾਮੇਤੀਤਿ ਦਸ੍ਸੇਤਿ. ਲੋਕਨ੍ਤਿ ਰਾਜਗਹਾਦੀਸੁ ਯਂ ਤਦਾ ਉਪਨਿਸ੍ਸਾਯ ਵਿਹਰਤਿ, ਤਤ੍ਥ ਅਞ੍ਞਤ੍ਥ ਵਾ ਬੁਜ੍ਝਨਕਂ ਵਿਨੇਯ੍ਯਸਤ੍ਤਲੋਕਂ ਬੁਦ੍ਧਚਕ੍ਖੁਨਾ ਵੋਲੋਕੇਤਿ. ਕਾਲਯੁਤ੍ਤਨ੍ਤਿ ਤੇਸਂ ਇਨ੍ਦ੍ਰਿਯਪਰਿਪਾਕਕਾਲਾਨੁਰੂਪਂ. ਸਮਯਯੁਤ੍ਤਨ੍ਤਿ ਤਸ੍ਸੇਵ ਵੇਵਚਨਂ. ਸਮਯਯੁਤ੍ਤਨ੍ਤਿ ਵਾ ਤੇਹਿ ਆਜਾਨਿਤਬ੍ਬਵਿਸੇਸਪਟਿਲਾਭਾਨੁਰੂਪਂ.

ਪਟਿਸਲ੍ਲੀਨੋਤਿ ਕਾਲਪਰਿਚ੍ਛੇਦਂ ਕਤ੍ਵਾ ਸਮਾਪਤ੍ਤਿਂ ਸਮਾਪਨ੍ਨੋ. ਅਧਿਪ੍ਪਾਯਂ ਸਮ੍ਪਾਦੇਨ੍ਤੋ ਤਂ ਅਵਿਰਾਧੇਨ੍ਤੋ, ਅਜ੍ਝਾਸਯਾਨੁਰੂਪਨ੍ਤਿ ਅਤ੍ਥੋ.

ਸਕਲ…ਪੇ… ਦੇਵਤਾਯੋਤਿ ਏਤ੍ਥ ਲੋਕਧਾਤੁਸਾਕਲ੍ਯਂ ਦਟ੍ਠਬ੍ਬਂ, ਨ ਦੇਵਤਾਸਾਕਲ੍ਯਂ. ਨ ਹਿ ਮਹਾਸਮਯੇ ਵਿਯ ਸਬ੍ਬਦਾ ਮਜ੍ਝਿਮਯਾਮੇ ਦਸਸਹਸ੍ਸਚਕ੍ਕਵਾਲ਼ੇ ਸਬ੍ਬਤ੍ਥ ਸਬ੍ਬਾ ਦੇਵਤਾ ਸਤ੍ਥੁ ਸਮੀਪਂ ਉਪਗਚ੍ਛਨ੍ਤਿ. ਕਿਲਾਸੁਭਾਵੋ ਕਿਲਮਥੋ.

ਵਿਹਾਰਚੀਵਰਪਰਿਵਤ੍ਤਨਵਸੇਨਾਤਿ ਵਿਹਾਰੇ ਨਿਵਤ੍ਥਨਿਵਾਸਨਪਰਿਵਤ੍ਤਨਵਸੇਨ. ਆਦਿਯਿਤ੍ਵਾਤਿ ਪਾਰੁਪਨਵਸੇਨ ਗਹੇਤ੍ਵਾ. ਤੇਨਾਹ ‘‘ਧਾਰੇਤ੍ਵਾ’’ਤਿ. ਭਿਕ੍ਖਾਚਾਰਨ੍ਤਿ ਭਿਕ੍ਖਤ੍ਥਂ ਚਰਿਤਬ੍ਬਟ੍ਠਾਨਂ.

ਅਤਿਰੋਚਮਾਨਨ੍ਤਿ ਤਂ ਤਂ ਅਤਿਕ੍ਕਮਿਤ੍ਵਾ ਸਮਨ੍ਤਤੋ ਸਬ੍ਬਦਿਸਾਸੁ ਵਿਰੋਚਮਾਨਂ. ਸਰੀਰਪ੍ਪਭਨ੍ਤਿ ਅਤ੍ਤਨੋ ਸਰੀਰਪ੍ਪਭਂ. ਜਙ੍ਗਮਂ ਵਿਯ ਪਦੁਮਸਰਨ੍ਤਿ ਰਤਨਮਯਕਿਞ੍ਜਕ੍ਖਂ ਰਜਤਮਯਕਣ੍ਣਿਕਂ ਸਮਨ੍ਤਤੋ ਸਮ੍ਫੁਲ੍ਲਿਤਕਞ੍ਚਨਪਦੁਮਂ ਸਞ੍ਚਾਰਿਮਸਰਂ ਵਿਯ. ਗਗਨਤਲਨ੍ਤਿ ਅਬ੍ਭਮਹਿਕਾਦਿਉਪਕ੍ਕਿਲੇਸਵਿਗਮੇਨ ਸੁਵਿਸੁਦ੍ਧਆਕਾਸਤਲਂ ਵਿਯ. ਤਮ੍ਪਿ ਹਿ ਤਾਰਾਗਣਕਿਰਣਜਾਲਸਮੁਜ੍ਜਲਤਾਯ ਸਮਨ੍ਤਤੋ ਵਿਰੋਚਤਿ. ਕਨਕਸਿਖਰਨ੍ਤਿ ਕਨਕਗਿਰਿਸਿਖਰਂ. ਸਿਰਿਯਾ ਜਲਮਾਨਨ੍ਤਿ ਸਬ੍ਬਸੋ ਅਨਵਜ੍ਜਾਯ ਸਬ੍ਬਾਕਾਰੇਨ ਪਰਿਪੁਣ੍ਣਕਾਯਤਾਯ ਅਨਞ੍ਞਸਾਧਾਰਣਾਯ ਰੂਪਕਾਯਸਿਰਿਯਾ ਸਮੁਜ੍ਜਲਂ, ਯਸ੍ਸਾ ਰੁਚਿਰਭਾਵੋ ਵਿਦ੍ਧੇ ਵਿਗਤਵਲਾਹਕੇ ਪੁਣ੍ਣਮਾਸਿਯਂ ਪਰਿਪੁਣ੍ਣਕਲਮਨੋਮਮਣ੍ਡਲਂ ਚਨ੍ਦਮਣ੍ਡਲਂ ਅਤਿਰੋਚਤਿ, ਪਭਸ੍ਸਰਭਾਵੋ ਸਹਸ੍ਸਰਂਸਿਕਿਰਣਤੇਜੋਜਾਲਸਮੁਜ੍ਜਲਂ ਸੂਰਿਯਮਣ੍ਡਲਂ ਅਭਿਭਵਤਿ, ਹੇਮਸਮੁਜ੍ਜਲਭਾਵੋ ਤਦੁਭਯੇ ਅਭਿਭੁਯ੍ਯ ਪਵਤ੍ਤਮਾਨਂ ਏਕਕ੍ਖਣੇ ਦਸਸਹਸ੍ਸਿਲੋਕਧਾਤੁਵਿਜ੍ਜੋਤਨਸਮਤ੍ਥ-ਮਹਾਬ੍ਰਹ੍ਮੁਨੋ ਪਭਾਸਮੁਦਯਂ ਅਭਿਵਿਹਚ੍ਚ ਭਾਸਤਿ ਤਪਤਿ ਵਿਰੋਚਤਿ.

ਸਮਨ੍ਤਪਾਸਾਦਿਕੇਤਿ ਸਮਨ੍ਤਤੋ ਪਸਾਦਾਵਹੇ. ਤਞ੍ਚ ਖੋ ਸਬ੍ਬਸੋ ਸਰਿਤਬ੍ਬਤਾਯਾਤਿ ਆਹ ‘‘ਪਸਾਦਨੀਯੇ’’ਤਿ. ਉਤ੍ਤਮਦਮਥਸਮਥਮਨੁਪ੍ਪਤ੍ਤੇਤਿ ਕਾਯਵਾਚਾਹਿ ਅਨੁਤ੍ਤਰਂ ਦਨ੍ਤਭਾਵਞ੍ਚੇਵ ਅਨੁਤ੍ਤਰਂ ਚਿਤ੍ਤਵੂਪਸਮਞ੍ਚ ਸਮ੍ਪਤ੍ਤੇ. ਅਪ੍ਪਸਾਦੇਨਾਤਿ ਪਸਾਦਾਭਾਵੇਨ, ਪਸਾਦਪਟਿਕ੍ਖੇਪੇਨ ਵਾ ਅਸ੍ਸਦ੍ਧਿਯੇਨ. ਉਭਯਥਾਪਿ ਨੋਤਿ ਅਪ੍ਪਸਾਦੋ ਮਚ੍ਛਰਿਯਨ੍ਤਿ ਉਭਯਥਾਪਿ ਨੋ ਏਵ, ਅਥ ਖੋ ਅਨਤ੍ਤਮਨਤਾਯ ਉਪਾਰਮ੍ਭਾਧਿਪ੍ਪਾਯੇਨ ਅਪਸਾਦੇਨ੍ਤੋ, ਭਗਵਤੋ ਮੁਖਤੋ ਕਿਞ੍ਚਿ ਦੇਸੇਤੁਕਾਮੋ ਵਾ ਏਵਮਾਹ. ਤਤ੍ਥ ਕਾਰਣਂ ਦਸ੍ਸੇਨ੍ਤੋ ‘‘ਭਗਵਤੋ ਪਨਾ’’ਤਿਆਦਿਮਾਹ. ਅਤਿਤ੍ਤਨ੍ਤਿ ਤਿਤ੍ਤਿਂ ਅਗਚ੍ਛਨ੍ਤਂ. ਕਮ੍ਮਭਙ੍ਗਨ੍ਤਿ ਕਮ੍ਮਹਾਨਿਂ.

ਤਿਕ੍ਖਪਞ੍ਞੋ ਏਸ ਬ੍ਰਾਹ੍ਮਣੋ, ਤਥਾ ਹਿ ਨ ਚਿਰਸ੍ਸੇਵ ਅਰਹਤ੍ਤਂ ਸਚ੍ਛਿਕਰਿਸ੍ਸਤਿ. ਕਥਾਪਵਤ੍ਤਨਤ੍ਥਮ੍ਪਿ ਏਵਮਾਹ – ‘‘ਏਵਂ ਅਹਂ ਇਮਸ੍ਸ ਕਞ੍ਚਿ ਧਮ੍ਮਂ ਸੋਤੁਂ ਲਭਿਸ੍ਸਾਮੀ’’ਤਿ. ਵੇਨੇਯ੍ਯਵਸੇਨਾਤਿ ਅਤ੍ਤਨੋ ਕਸਨਕਾਰਿਭਾਵਕਿਤ੍ਤਨਮੁਖੇਨ ਵਿਨੇਤਬ੍ਬਪੁਗ੍ਗਲਵਸੇਨ.

ਓਲ਼ਾਰਿਕਾਨੀਤਿ ਪਾਕਤਿਕਾਨਿ. ‘‘ਏਸ ਉਤ੍ਤਮਦਕ੍ਖਿਣੇਯ੍ਯੋ’’ਤਿ ਸਞ੍ਜਾਤਬਹੁਮਾਨੋ. ਪਾਲ਼ਿਯਂ ‘‘ਯੁਗਂ ਵਾ ਨਙ੍ਗਲਂ ਵਾ’’ਤਿ ਵਾ-ਸਦ੍ਦੋ ਅਵੁਤ੍ਤਵਿਕਪ੍ਪਤ੍ਥੋ. ਤੇਨ ਬੀਜਾਦਿਂ ਸਙ੍ਗਣ੍ਹਾਤਿ, ਤਸ੍ਮਾ ਬੀਜਂ ਵਾ ਈਸਂ ਵਾ ਪਰਿਗ੍ਗਹਯੋਤ੍ਤਾਨਿ ਵਾਤਿ ਅਯਮਤ੍ਥੋ ਦਸ੍ਸਿਤੋ ਹੋਤਿ. ਤਥਾ ਹਿ ਭਗਵਾ ਬ੍ਰਾਹ੍ਮਣਸ੍ਸ ਪਟਿਵਚਨਂ ਦੇਨ੍ਤੋ ‘‘ਸਦ੍ਧਾ ਬੀਜ’’ਨ੍ਤਿਆਦਿਮਾਹ. ਪੁਬ੍ਬਧਮ੍ਮਸਭਾਗਤਾਯਾਤਿ ਪਠਮਂ ਗਹਿਤਧਮ੍ਮਸਭਾਗਤਾਯ. ਯਂ ਪਨੇਤ੍ਥ ਵਤ੍ਤਬ੍ਬਂ, ਤਂ ਅਟ੍ਠਕਥਾਰੁਲ਼੍ਹਮੇਵ ਗਹੇਤਬ੍ਬਞ੍ਚ ਸਦ੍ਦਤੋ ਅਤ੍ਥਾਪਤ੍ਤਿਤੋ ਵਾ ਇਧ ਦਟ੍ਠਬ੍ਬਂ. ਬੁਦ੍ਧਾਨਂ ਆਨੁਭਾਵੋ ਅਯਂ, ਯਦਿਦਂ ਪਸਙ੍ਗਾਗਤਧਮ੍ਮਮੁਖੇਨ ਦੇਸਨਂ ਆਰਭਿਤ੍ਵਾ ਵੇਨੇਯ੍ਯਵਿਨਯਨਂ.

ਅਨਨੁਸਨ੍ਧਿਕਾਤਿ ਪੁਚ੍ਛਾਨੁਸਨ੍ਧਿਵਸੇਨ ਅਨਨੁਸਨ੍ਧਿਕਾ. ਏਵਨ੍ਤਿ ਇਦਾਨਿ ਵੁਚ੍ਚਮਾਨਾਕਾਰੇਨ. ਏਤ੍ਥਾਤਿ ਏਤਿਸ੍ਸਾ ਦੇਸਨਾਯ. ਸੋਤਿ ਭਗਵਾ. ਤਸ੍ਸਾਤਿ ਬ੍ਰਾਹ੍ਮਣਸ੍ਸ. ਅਨੁਕਮ੍ਪਾਯਾਤਿ ਅਸਬ੍ਬਞ੍ਞੂ ਹਿ ਸਤਿਪਿ ਅਨੁਕਮ੍ਪਾਯ ਪੁਚ੍ਛਿਤਮਤ੍ਤੇ ਤਿਟ੍ਠੇਯ੍ਯ, ਤਥਾ ਜਾਨਨ੍ਤੋਪਿ ਅਨਨੁਕਮ੍ਪਕੋ, ਭਗਵਾ ਪਨ ਉਭਯਧਮ੍ਮਪਾਰਿਪੂਰਿਯਾ ‘‘ਇਦਂ ਅਪੁਚ੍ਛਿਤ’’ਨ੍ਤਿ ਅਪਰਿਹਾਪੇਤ੍ਵਾ ਕਥੇਤਿ. ਸਮੂਲਨ੍ਤਿਆਦਿਨਾ ਸਙ੍ਖੇਪੇਨ ਵੁਤ੍ਤਮਤ੍ਥਂ ਵਿਵਰਨ੍ਤੋ ‘‘ਤਤ੍ਥਾ’’ਤਿਆਦਿਮਾਹ. ਤਤ੍ਥ ਬੀਜਸ੍ਸ ਕਸਿਯਾ ਮੂਲਭਾਵੋ ਨਾਨਨ੍ਤਰਿਯਤੋ ਤਪ੍ਪਮਾਣਵਿਧਾਨਤੋ ਚਾਤਿ ਆਹ ‘‘ਤਸ੍ਮਿਂ…ਪੇ… ਕਤ੍ਤਬ੍ਬਤੋ’’ਤਿ. ਤੇਨ ਅਨ੍ਵਯਤੋ ਬ੍ਯਤਿਰੇਕਤੋ ਚ ਬੀਜਸ੍ਸ ਕਸਿਯਾ ਮੂਲਭਾਵਂ ਵਿਭਾਵੇਤਿ. ਕੁਸਲਾਤਿ ਇਮਿਨਾ ਅਕੁਸਲਾ ਤਤੋ ਅਞ੍ਞਥਾਪਿ ਕਰੋਨ੍ਤਿ, ਤਂ ਪਨ ਅਪ੍ਪਮਾਣਨ੍ਤਿ ਦਸ੍ਸੇਤਿ.

ਤਸ੍ਸਾਤਿ ਬ੍ਰਾਹ੍ਮਣਸ੍ਸ ਬੀਜਟ੍ਠਾਨਿਯਸ੍ਸ ਧਮ੍ਮਸ੍ਸ ਚ ਉਪਕਾਰਭਾਵਤੋ. ਧਮ੍ਮਸਮ੍ਬਨ੍ਧਸਮਤ੍ਥਭਾਵਤੋਤਿ ਤਥਾ ਵੁਤ੍ਤਧਮ੍ਮਸ੍ਸ ਫਲੇਨ ਸਮ੍ਬਨ੍ਧਿਤੁਂ ਯੋਜੇਤੁਂ ਸਮਤ੍ਥਭਾਵਤੋ. ਤਪੋ ਵੁਟ੍ਠੀਤਿ ਵੁਤ੍ਤਵਚਨਂ ਸਨ੍ਧਾਯ ਵੁਤ੍ਤਂ. ਸਙ੍ਖੇਪਤੋ ਵੁਤ੍ਤਮਤ੍ਥਂ ਪਾਕਟਂ ਕਾਤੁਂ ‘‘ਅਯਂ ਹੀ’’ਤਿਆਦਿ ਵੁਤ੍ਤਂ. ਕਸ੍ਸਕਸ੍ਸ ਉਪਕਾਰਸ੍ਸ ਬੀਜਸ੍ਸ ਅਨਨ੍ਤਰਂ ਵੁਟ੍ਠਿ ਵੁਚ੍ਚਮਾਨਾ ਅਟ੍ਠਾਨੇ ਵੁਤ੍ਤਾ ਨਾਮ ਨ ਹੋਤਿ. ਕਸ੍ਮਾ? ਬੀਜਸ੍ਸ ਵਪ੍ਪਕਾਲੇ ਅਨੁਰੂਪਾਯ ਵੁਟ੍ਠਿਯਾ ਇਚ੍ਛਿਤਬ੍ਬਤੋ, ਤਸ੍ਮਾ ਅਵਸਾਨੇ ਮਜ੍ਝੇ ਵਾ ਵੁਚ੍ਚਮਾਨਾਯ ਧਮ੍ਮਸਮ੍ਬਨ੍ਧਸਮਤ੍ਥਤਾ ਤਸ੍ਸਾ ਵਿਭਾਵਿਤਾ ਨ ਸਿਯਾ. ਅਤ੍ਤਨੋ ਅਵਿਸਯੇਤਿ ਝਾਨਾਦਿਉਤ੍ਤਰਿਮਨੁਸ੍ਸਧਮ੍ਮੇ. ਪਚ੍ਛਾਪੀਤਿ ਕਸਿਸਮ੍ਭਾਰਕਥਨਤੋ ਪਚ੍ਛਾਪਿ. ਵਤ੍ਤਬ੍ਬੋਤਿ ਏਕਨ੍ਤੇਨ ਵਤ੍ਤਬ੍ਬੋ. ਤਦਨਨ੍ਤਰਂਯੇਵਾਤਿ ਬੀਜਾਨਨ੍ਤਰਂਯੇਵ. ਵੁਚ੍ਚਮਾਨਾ ਵੁਟ੍ਠਿ ਸਮਤ੍ਥਾ ਹੋਤਿ, ਬੀਜਸ੍ਸ ਫਲੇਨ ਸਮ੍ਬਨ੍ਧਨੇ ਸਮਤ੍ਥਾਤਿ ਦੀਪਿਤਾ ਹੋਤਿ ਅਨਨ੍ਤਰਵਚਨੇਨੇਵ ਤਸ੍ਸਾ ਆਸਨ੍ਨਉਪਕਾਰਤ੍ਤਦੀਪਨਤੋ.

ਸਮ੍ਪਸਾਦਲਕ੍ਖਣਾਤਿ ਪਸੀਦਿਤਬ੍ਬੇ ਵਤ੍ਥੁਸ੍ਮਿਂ ਸਮ੍ਮਦੇਵ ਪਸੀਦਨਲਕ੍ਖਣਾ. ਓਕਪ੍ਪਨਲਕ੍ਖਣਾਤਿ ਸਦ੍ਧੇਯ੍ਯਵਤ੍ਥੁਨੋ ਏਵਮੇਤਨ੍ਤਿ ਪਕ੍ਖਨ੍ਦਨਲਕ੍ਖਣਾ. ਮੂਲਬੀਜਨ੍ਤਿਆਦੀਸੁ ਮੂਲਮੇਵ ਬੀਜਂ ਮੂਲਬੀਜਂ. ਏਸ ਨਯੋ ਸੇਸੇਸੁਪਿ ਬੀਜਗਾਮਸ੍ਸ ਅਧਿਪ੍ਪੇਤਤ੍ਤਾ. ਭੂਤਗਾਮੋ ਪਨ ਮੂਲਂ ਬੀਜਂ ਏਤਸ੍ਸਾਤਿ ਮੂਲਬੀਜਨ੍ਤਿਆਦਿਨਾ ਵੇਦਿਤਬ੍ਬੋ. ਬੀਜਬੀਜਨ੍ਤਿ ਪਞ੍ਚਮਂ ਪਨ ਪਚ੍ਚਯਨ੍ਤਰਸਮਵਾਯੇ ਸਦਿਸਫਲੁਪ੍ਪਤ੍ਤਿਯਾ ਵਿਸੇਸਕਾਰਣਭਾਵਤੋ ਵਿਰੂਹਨਸਮਤ੍ਥੇ ਸਾਰਫਲੇ ਨਿਰੁਲ਼੍ਹੋ ਬੀਜਸਦ੍ਦੋ ਤਦਤ੍ਥਸਿਦ੍ਧਿਯਾ ਮੂਲਾਦੀਸੁਪਿ ਕੇਸੁਚਿ ਪਵਤ੍ਤਤੀਤਿ ਤਤੋ ਨਿਵਤ੍ਤਨਤ੍ਥਂ ਏਕੇਨ ਬੀਜ-ਸਦ੍ਦੇਨ ਵਿਸੇਸੇਤ੍ਵਾ ਵੁਤ੍ਤਂ ‘‘ਬੀਜਬੀਜ’’ਨ੍ਤਿ ‘‘ਦੁਕ੍ਖਦੁਕ੍ਖਂ ਰੂਪਰੂਪ’’ਨ੍ਤਿ ਚ ਯਥਾ. ਏਵਮ੍ਪਿ ਇਮਿਨਾ ਅਤ੍ਥੇਨ ਇਮਸ੍ਸਪਿ ਨਿਪ੍ਪਰਿਯਾਯੋਵ ਬੀਜਭਾਵੋਤਿ ਦਸ੍ਸੇਨ੍ਤੋ ਆਹ ‘‘ਤਂ ਸਬ੍ਬਮ੍ਪਿ…ਪੇ… ਗਚ੍ਛਤੀ’’ਤਿ.

ਇਦਾਨਿ ਕਥਞ੍ਚਿ ਵਤ੍ਤਬ੍ਬੇ ਸਦ੍ਧਾਯ ਓਪਮ੍ਮਤ੍ਤੇ ਬੀਜੇ ਸਦ੍ਧਾਯ ਬੀਜਭਾਵਂ ਵਿਭਾਵੇਤੁਂ ‘‘ਤਤ੍ਥ ਯਥਾ’’ਤਿਆਦਿ ਆਰਦ੍ਧਂ. ਕਾਮਂ ਸਦ੍ਧੂਪਨਿਸਂ ਸੀਲਂ, ਤਥਾਪਿ ਸਮਾਧਿਸ੍ਸ ਵਿਯ ਸਬ੍ਬੇਸਮ੍ਪਿ ਅਨਵਜ੍ਜਧਮ੍ਮਾਨਂ ਆਦਿਮੂਲਭਾਵਤੋ ਸਦ੍ਧਾਯਪਿ ਪਤਿਟ੍ਠਾ ਹੋਤੀਤਿ ਆਹ ‘‘ਹੇਟ੍ਠਾ ਸੀਲਮੂਲੇਨ ਪਤਿਟ੍ਠਾਤੀ’’ਤਿ. ਯਸ੍ਮਾ ਸਬ੍ਬਸ੍ਸੇਵ ਪੁਗ੍ਗਲਸ੍ਸ ਸਦ੍ਧਾਵਸੇਨ ਸਮਥਵਿਪਸ੍ਸਨਾਰਮ੍ਭੋ, ਤਸ੍ਮਾ ਸਾ ‘‘ਉਪਰਿ ਸਮਥਵਿਪਸ੍ਸਨਙ੍ਕੁਰਂ ਉਟ੍ਠਾਪੇਤੀ’’ਤਿ ਵੁਤ੍ਤਾ. ਤਨ੍ਤਿ ਧਞ੍ਞਬੀਜਂ. ਪਥਵਿਰਸਂ ਆਪੋਰਸਨ੍ਤਿ ਸਸਮ੍ਭਾਰਪਥਵੀਆਪੇਸੁ ਲਬ੍ਭਮਾਨਂ ਰਸਂ. ਗਹੇਤ੍ਵਾਤਿ ਪਚ੍ਚਯਪਰਮ੍ਪਰਾਯ ਗਹੇਤ੍ਵਾ. ਧਞ੍ਞਪਰਿਪਾਕਗਹਣਤ੍ਥਨ੍ਤਿ ਧਞ੍ਞਪਰਿਪਾਕਨਿਬ੍ਬਤ੍ਤਿਅਤ੍ਥਂ. ਰਸਨ੍ਤਿ ਸਦ੍ਧਾਸੀਲਮੂਲਹੇਤੁਸਮਥਵਿਪਸ੍ਸਨਾਭਾਵਨਾਰਸਂ ਆਦਿਯਿਤ੍ਵਾ. ਅਰਿਯਮਗ੍ਗਨਾਲ਼ੇਨਾਤਿ ਅਰਿਯਮਗ੍ਗਸੋਤੇਨ ਅਰਿਯਫਲਧਞ੍ਞਪਰਿਪਾਕਗਹਣਤ੍ਥਨ੍ਤਿ ਅਰਿਯਫਲਮੇਵ ਧਨਾਯਿਤਬ੍ਬਤੋ ਧਞ੍ਞਂ ਤਸ੍ਸ ਨਿਬ੍ਬਤ੍ਤਿਅਤ੍ਥਂ. ਧਞ੍ਞਨਾਲ਼ਂ ਨਾਮ ਕਣ੍ਡਸ੍ਸ ਨਿਸ੍ਸਯਭੂਤੋ ਪਚ੍ਛਿਮਦੇਸੋ, ਕਣ੍ਡੋ ਤਬ੍ਭਨ੍ਤਰੋ ਤਂਨਿਸ੍ਸਯੋਯੇਵ ਦਣ੍ਡੋ. ਪਸਵੋ ਨਾਮ ਪੁਪ੍ਫਂ. ਵੁਦ੍ਧਿਨ੍ਤਿ ਅਵਯਵਪਾਰਿਪੂਰਿਵਸੇਨ ਵੁਦ੍ਧਿਂ. ਵਿਰੂਲ਼੍ਹਿਨ੍ਤਿ ਮੂਲਸਨ੍ਤਾਨਦਲ਼੍ਹਤਾਯ ਵਿਰੁਲ਼੍ਹਤਂ. ਵੇਪੁਲ੍ਲਨ੍ਤਿ ਪਤ੍ਤਨਾਲ਼ਾਦੀਹਿ ਵਿਪੁਲਭਾਵਂ. ਖੀਰਂ ਜਨੇਤ੍ਵਾਤਿ ਤਰੁਣਸਲਾਟੁਕਭਾਵਪ੍ਪਤ੍ਤਿਯਾ ਤਣ੍ਡੁਲਸ੍ਸ ਬੀਜਸ੍ਸ ਬੀਜਭੂਤਂ ਖੀਰਂ ਉਪ੍ਪਾਦੇਤ੍ਵਾ. ਏਸਾਤਿ ਸਦ੍ਧਾ. ਪਤਿਟ੍ਠਹਿਤ੍ਵਾਤਿ ਕਮ੍ਮਪਥਾਕਮ੍ਮਪਥਸਮ੍ਮਾਦਿਟ੍ਠਿਸਹਿਤੇਨ ਆਦਿਤੋ ਪਵਤ੍ਤਸੀਲਮਤ੍ਤੇਨ ਪਤਿਟ੍ਠਹਿਤ੍ਵਾ. ਵੁਦ੍ਧਿਨ੍ਤਿਆਦੀਸੁ ਸੁਪਰਿਸੁਦ੍ਧਾਹਿ ਸੀਲਚਿਤ੍ਤਵਿਸੁਦ੍ਧੀਹਿ ਵੁਦ੍ਧਿਂ, ਦਿਟ੍ਠਿਕਙ੍ਖਾਵਿਤਰਣਵਿਸੁਦ੍ਧੀਹਿ ਵਿਰੂਲ਼੍ਹਿਂ. ਮਗ੍ਗਾਮਗ੍ਗਪਟਿਪਦਾਞਾਣਦਸ੍ਸਨਵਿਸੁਦ੍ਧੀਹਿ ਵੇਪੁਲ੍ਲਂ ਪਤ੍ਵਾ. ਞਾਣਦਸ੍ਸਨਵਿਸੁਦ੍ਧਿਖੀਰਨ੍ਤਿ ਸਾਦੁਰਸਸੁਵਿਸੁਦ੍ਧਿਭਾਵਤੋ ਞਾਣਦਸ੍ਸਨਵਿਸੁਦ੍ਧਿਸਙ੍ਖਾਤਂ ਖੀਰਂ ਜਨੇਤ੍ਵਾ. ਅਨੇਕ…ਪੇ… ਫਲਨ੍ਤਿ ਅਨੇਕਪਟਿਸਮ੍ਭਿਦਾ-ਅਨੇਕਾਭਿਞ੍ਞਾਣਪਰਿਪੁਣ੍ਣਂ ਅਰਹਤ੍ਤਫਲਸੀਸਂ ਨਿਪ੍ਫਾਦੇਤਿ.

ਬੀਜਕਿਚ੍ਚਕਰਣਤੋਤਿ ਬੀਜਕਿਚ੍ਚਸ੍ਸ ਕਰਣਤੋ. ਯਞ੍ਹਿ ਤਂਸਦਿਸਸ੍ਸ ਵਿਸਦਿਸਸ੍ਸ ਚ ਅਤ੍ਤਨੋ ਫਲਸ੍ਸ ਪਤਿਟ੍ਠਾਪਨਸਮ੍ਬਨ੍ਧਨਨਿਪ੍ਫਾਦਨਸਙ੍ਖਾਤਂ ਬੀਜਸ੍ਸ ਕਿਚ੍ਚਂ, ਤਸ੍ਸ ਕਰਣਤੋ ਨਿਬ੍ਬਤ੍ਤਨਤੋ ‘‘ਏਵਂ ਸਦ੍ਧਾ ਬੀਜਕਿਚ੍ਚ’’ਨ੍ਤਿ ਵੁਤ੍ਤਂ. ਇਮਿਨਾ ਅਨਞ੍ਞਸਾਧਾਰਣਂ ਸਦ੍ਧਾਯ ਕੁਸਲਧਮ੍ਮਾਨਂ ਬੀਜਭਾਵਂ ਦਸ੍ਸੇਤਿ. ਸਾ ਚਾਤਿਆਦਿਨਾ ਤਮੇਵਤ੍ਥਂ ਸਮਤ੍ਥੇਤਿ. ਇਦਾਨਿ ਤਤ੍ਥ ਆਗਮਂ ਦਸ੍ਸੇਨ੍ਤੋ ‘‘ਸਦ੍ਧਾਜਾਤੋ’’ਤਿਆਦਿਮਾਹ. ਤੇਨ ਯਥਾ ਸਪ੍ਪੁਰਿਸੂਪਨਿਸ੍ਸਯਸ੍ਸ ਸਦ੍ਧਮ੍ਮਸ੍ਸਵਨਸ੍ਸ ਚ, ਏਵਂ ਅਨਵਸੇਸਾਯ ਸਮ੍ਮਾਪਟਿਪਤ੍ਤਿਯਾ ਸਦ੍ਧਾ ਮੂਲਕਾਰਣਨ੍ਤਿ ਦਸ੍ਸੇਤਿ.

ਇਨ੍ਦ੍ਰਿਯਸਂਵਰੋ ਵੀਰਿਯਞ੍ਚ ਅਕੁਸਲਧਮ੍ਮੇ, ਦੁਕ੍ਕਰਕਾਰਿਕਾ ਧੁਤਙ੍ਗਞ੍ਚ ਅਕੁਸਲਧਮ੍ਮੇ ਚੇਵ ਕਾਯਞ੍ਚ ਤਪਤਿ ਵਿਬਾਧਤੀਤਿ ਤਪੋਤਿ ਵੁਚ੍ਚਤਿ. ਇਨ੍ਦ੍ਰਿਯਸਂਵਰੋ ਅਧਿਪ੍ਪੇਤੋ ਵੀਰਿਯਸ੍ਸ ਧੋਰਯ੍ਹਭਾਵੇਨ ਗਯ੍ਹਮਾਨਤ੍ਤਾ, ਇਤਰੇਸਂ ਵੁਟ੍ਠਿਭਾਵਸ੍ਸ ਅਨੁਯੁਞ੍ਜਮਾਨਤ੍ਤਾ. ਆਦਿ-ਸਦ੍ਦੇਨ ਕਲਲਙ੍ਗਾਰਵੁਟ੍ਠਿਆਦੀਨਂ ਸਙ੍ਗਹੋ. ਸਮਨੁਗ੍ਗਹਿਤਨ੍ਤਿ ਉਪਗਤਂ. ਵਿਰੁਹਨਾਮਿਲਾਯਨਨਿਪ੍ਫਤ੍ਤਿਵਚਨੇਹਿ ਧਞ੍ਞਬੀਜਸਨ੍ਤਾਨਸ੍ਸ ਵਿਯ ਤੇਸਂ ਵੁਦ੍ਧਿਯਾ ਸਦ੍ਧਾਬੀਜਸਨ੍ਤਾਨਸ੍ਸ ਤਪੋਵੁਟ੍ਠਿਯਾ ਆਦਿਮਜ੍ਝਪਰਿਯੋਸਾਨੇਸੁ ਉਪਕਾਰਤਂ ਦਸ੍ਸੇਤਿ.

ਪੁਰਿਮਪਦੇਸੁਪੀਤਿ ਅਪਿ-ਸਦ੍ਦੇਨ ਪਰਪਦੇਸੁਪੀਤਿ ਅਤ੍ਥੋ ਦਟ੍ਠਬ੍ਬੋ ‘‘ਹਿਰੀ ਮੇ ਈਸਾ, ਮਨੋ ਮੇ ਯੋਤ੍ਤ’’ਨ੍ਤਿ ਇਚ੍ਛਿਤਤ੍ਤਾ, ‘‘ਸਤਿ ਮੇ’’ਤਿ ਏਤ੍ਥ ਮੇ-ਸਦ੍ਦੋ ਆਨੇਤ੍ਵਾ ਯੋਜੇਤਬ੍ਬੋ. ਉਦਕਮ੍ਪਿ ਤਾਵ ਦਾਤਬ੍ਬਂ ਹੋਤਿ ਨਦੀਤਲ਼ਾਕਾਦਿਤੋ ਆਨੇਤ੍ਵਾ. ਵੀਰਿਯਬਲੀਬਦ੍ਦੇ ਚਤੁਬ੍ਬਿਧੇ ਯੋਜੇਤ੍ਵਾ. ਨਿਚ੍ਚਕਾਲਂ ਅਤ੍ਥੀਤਿ ਵਚਨਸੇਸੋ.

ਸਹ ਵਿਪਸ੍ਸਨਾਯ ਮਗ੍ਗਪਞ੍ਞਾ ਅਧਿਪ੍ਪੇਤਾ ਅਮਤਪ੍ਫਲਾਯ ਕਸਿਯਾ ਅਧਿਪ੍ਪੇਤਤ੍ਤਾ. ਵਿਪਸ੍ਸਨਾ ਪਞ੍ਞਾ ਚਾਤਿ ਦੁਵਿਧਾਪਿ ਪਞ੍ਞਾ ਉਪਨਿਸ੍ਸਯਾ ਹੋਤਿ ਵਿਸਿਟ੍ਠਭਾਵਤੋ. ਤੇਨਾਹ ‘‘ਯਥਾ ਹੀ’’ਤਿਆਦਿ. ਪਞ੍ਞਾਤਿ ਪਕਾਰੇਹਿ ਜਾਨਾਤੀਤਿ ਪਞ੍ਞਾ. ਪਞ੍ਞਵਤਂ ਪਞ੍ਞਾ ਪੁਰਤੋ ਹੋਤਿ ਯੋਨਿਸੋਮਨਸਿਕਾਰਸ੍ਸ ਵਿਸੇਸਪਚ੍ਚਯਭਾਵਤੋ, ਸਹਜਾਤਾਧਿਪਤੀਸੁ ਚ ਉਕ੍ਕਟ੍ਠਭਾਵਤੋ. ਸਿਰੀਤਿ ਸੋਭਗ੍ਗਂ. ਸਤਂ ਧਮ੍ਮਾ ਸਦ੍ਧਾਦਯੋ, ਅਨ੍ਵਾਯਿਕਾਤਿ ਅਨੁਗਾਮਿਨੋ. ਈਸਾਬਦ੍ਧਾ ਹੋਤੀਤਿ ਹਿਰਿਸਙ੍ਖਾਤਈਸਾਯ ਬਦ੍ਧਾ ਹੋਤਿ, ਪਞ੍ਞਾਯ ਕਦਾਚਿ ਅਪ੍ਪਯੋਗਤੋ ਮਨੋਸੀਸੇਨ ਸਮਾਧਿ ਇਧ ਵੁਤ੍ਤੋਤਿ ਆਹ ‘‘ਮਨੋਸਙ੍ਖਾਤਸ੍ਸ ਸਮਾਧਿਯੋਤ੍ਤਸ੍ਸਾ’’ਤਿ. ਸਮਂ ਉਪਨੇਤ੍ਵਾ ਬਨ੍ਧਿਤ੍ਵਾ ਬਦ੍ਧਰਜ੍ਜੁਕਤ੍ਤਾ ਸਮਾਧਿਯੋਤ੍ਤਂ. ਏਕਤੋ ਗਮਨਨ੍ਤਿ ਲੀਨਚ੍ਚਾਰਦ੍ਧਸਙ੍ਖਾਤਂ ਏਕਪਸ੍ਸਤੋ ਗਮਨਂ ਵਾਰੇਤਿ. ਮਜ੍ਝਿਮਾਯ ਵਿਪਸ੍ਸਨਾਵੀਥਿਯਾ ਪਟਿਪਾਦਨਤੋ ਕਾਯਾਦੀਸੁ ਸੁਭਸੁਖਨਿਚ੍ਚਤ੍ਤਭਾਵਵਿਗਮਨੇ ਪਞ੍ਞਾਯ ਵਿਸੇਸਪਚ੍ਚਯਾ ਸਤੀਤਿ ਵੁਤ੍ਤਂ – ‘‘ਸਤਿਯੁਤ੍ਤਾ ਪਞ੍ਞਾ’’ਤਿ ਤਸ੍ਸਾ ਸਤਿਵਿਪ੍ਪਯੋਗਾਸਬ੍ਭਾਵਤੋ. ਸਨ੍ਤਤਿਘਨਾਦੀਨਂ ਅਯਂ ਵਿਸੇਸੋ – ਪੁਰਿਮਪਚ੍ਛਿਮਾਨਂ ਧਮ੍ਮਾਨਂ ਨਿਰਨ੍ਤਰਤਾਯ ਏਕੀਭੂਤਾਨਂ ਵਿਯ ਪਵਤ੍ਤਿ ਸਨ੍ਤਤਿਘਨਤਾ, ਏਕਸਮੂਹਵਸੇਨ ਏਕੀਭੂਤਾਨਮਿਵ ਪਵਤ੍ਤਿ ਸਮੂਹਘਨਤਾ, ਦੁਬ੍ਬਿਞ੍ਞੇਯ੍ਯਕਿਚ੍ਚਭੇਦਵਸੇਨ ਏਕੀਭੂਤਾਨਮਿਵ ਪਵਤ੍ਤਿ. ਕਿਚ੍ਚਘਨਤਾ, ਏਕਾਰਮ੍ਮਣਵਸੇਨ ਏਕੀਭੂਤਾਨਮਿਵ ਪਵਤ੍ਤਿ ਆਰਮ੍ਮਣਘਨਤਾ. ਸਬ੍ਬੇਸਂ, ਸਬ੍ਬਾਨਿ ਵਾ ਕਿਲੇਸਾਨਂ ਮੂਲਸਨ੍ਤਾਨਕਾਨਿ ਸਬ੍ਬ…ਪੇ… ਸਨ੍ਤਾਨਕਾਨਿ. ਅਨੁਪ੍ਪਯੋਗੋ ਹਿ ਅਤ੍ਥੋ. ਪਦਾਲੇਤੀਤਿ ਭਿਨ੍ਦਤਿ ਸਮੁਚ੍ਛਿਨ੍ਦਤਿ. ਸਾ ਚ ਖੋ ‘‘ਪਦਾਲੇਤੀ’’ਤਿ ਵੁਤ੍ਤਾ ਲੋਕੁਤ੍ਤਰਾਵ ਪਞ੍ਞਾ ਅਨੁਸਯਪ੍ਪਹਾਨਸ੍ਸ ਅਧਿਪ੍ਪੇਤਤ੍ਤਾ. ਸਨ੍ਤਤਿਘਨਾਦਿਭੇਦਨਾ ਪਨ ਲੋਕਿਯਾਪਿ ਹੋਤਿ ਵਿਪਸ੍ਸਨਾਵਸੇਨ ਘਨਵਿਨਿਬ੍ਭੋਗਸ੍ਸ ਨਿਪ੍ਫਾਦਨਤੋ. ਤੇਨਾਹ ‘‘ਇਤਰਾ ਪਨ ਲੋਕਿਕਾਪਿ ਸਿਯਾ’’ਤਿ.

ਹਿਰੀਯਤੀਤਿ ਲਜ੍ਜਤਿ, ਜਿਗੁਚ੍ਛਤੀਤਿ ਅਤ੍ਥੋ. ਤਸ੍ਮਾ ‘‘ਪਾਪਕੇਹਿ ਧਮ੍ਮੇਹੀ’’ਤਿ ਨਿਸ੍ਸਕ੍ਕਵਚਨਂ ਦਟ੍ਠਬ੍ਬਂ, ਹੇਤੁਮ੍ਹਿ ਵਾ ਕਰਣਵਚਨਂ. ਓਤ੍ਤਪ੍ਪਮ੍ਪਿ ਗਹਿਤਮੇਵ, ਨ ਹਿ ਲਜ੍ਜਨਂ ਨਿਬ੍ਭਯਂ ਪਾਪਭਯਂ ਵਾ ਅਲਜ੍ਜਨਂ ਅਤ੍ਥੀਤਿ. ਰੁਕ੍ਖਲਟ੍ਠੀਤਿ ਰੁਕ੍ਖਦਣ੍ਡੋ. ਤੇਨ ਪਦੇਸੇਨ ਕਸਨਤੋ ਵਿਸੇਸਤੋ ਨਙ੍ਗਲਨ੍ਤਿ ਵੁਚ੍ਚਤੀਤਿ ਆਹ ‘‘ਈਸਾ ਯੁਗਨਙ੍ਗਲਂ ਧਾਰੇਤੀ’’ਤਿ. ਕਾਮਂ ਪਞ੍ਞਾਰਹਿਤਾ ਹਿਰੀ ਅਤ੍ਥਿ, ਹਿਰਿਰਹਿਤਾ ਪਨ ਪਞ੍ਞਾ ਨਤ੍ਥੇਵਾਤਿ ਆਹ ‘‘ਹਿਰਿ…ਪੇ… ਅਭਾਵਤੋ’’ਤਿ. ਸਨ੍ਧਿਟ੍ਠਾਨੇ ਕਮ੍ਪਨਾਭਾਵਤੋ ਅਚਲਂ. ਥਿਰਭਾਵੇਨ ਅਸਿਥਿਲਂ. ਹਿਰਿਪਟਿਬਦ੍ਧਪਞ੍ਞਾ ਪਟਿਪਕ੍ਖਵਸੇਨ ਚ ਅਸਿਥਿਲਭਾਵੇਨ ਚ ਅਚਲਾ ਅਸਿਥਿਲਾਤਿ ਆਹ ‘‘ਅਬ੍ਬੋਕਿਣ੍ਣਾ ਅਹਿਰਿਕੇਨਾ’’ਤਿ. ਨਾਲ਼ਿਯਾ ਮਿਨਮਾਨਪੁਰਿਸੋ ਵਿਯ ਆਰਮ੍ਮਣਂ ਮੁਨਾਤਿ ਪਰਿਚ੍ਛੇਦਤੋ ਜਾਨਾਤੀਤਿ ਮਨੋ. ਮਨੋਸੀਸੇਨਾਤਿ ਮਨਸੋ ਅਪਦੇਸੇਨ. ਤਂਸਮ੍ਪਯੁਤ੍ਤੋਤਿ ਇਮਿਨਾ ਕੁਨ੍ਤਸਹਚਰਣਤੋ ਪੁਰਿਸੋ ਕੁਨ੍ਤੋ ਵਿਯ ਮਨਸਹਚਰਣਸਮਾਧਿ ‘‘ਮਨੋ’’ਤਿ ਵੁਤ੍ਤੋਤਿ ਦਸ੍ਸੇਤਿ. ਸਾਰਥਿਨਾਤਿ ਕਸ੍ਸਕੇਨ. ਸੋ ਹਿ ਇਧ ਬਲੀਬਦ੍ਦਾਨਂ ਸਾਰਣਤੋ ਪਾਚਨਤੋ ‘‘ਸਾਰਥੀ’’ਤਿ ਅਧਿਪ੍ਪੇਤੋ. ਏਕਾਬਨ੍ਧਨਨ੍ਤਿ ਏਕਾਬਦ੍ਧਕਰਣਂ. ਸਕਕਿਚ੍ਚੇਤਿ ਸਕਕਿਚ੍ਚੇਨ ਯੁਤ੍ਤੇ. ਤੇਨ ਹਿ ਈਸਾਦੀਸੁ ਯਥਾਰਹਂ ਬਨ੍ਧਿਤ੍ਵਾ ਏਕਾਬਦ੍ਧੇਸੁ ਕਤੇਸੁ ਨਙ੍ਗਲੇਸੁ ਕਿਚ੍ਚਂ ਇਜ੍ਝਤਿ, ਨੋ ਅਞ੍ਞਥਾਤਿ ਤਂ ‘‘ਸਕਕਿਚ੍ਚੇ ਪਟਿਪਾਦੇਤੀ’’ਤਿ ਵੁਤ੍ਤਂ. ਅਵਿਕ੍ਖੇਪਸਭਾਵੇਨਾਤਿ ਅਤ੍ਤਨੋ ਅਵਿਕ੍ਖੇਪਸਭਾਵੇਨ. ਬਨ੍ਧਿਤ੍ਵਾਤਿ ਸਹਜਾਤਾਦਿਪਚ੍ਚਯਭਾਵੇਨ ਅਤ੍ਤਨਾ ਸਮ੍ਬਨ੍ਧਿਤ੍ਵਾ. ਸਕਕਿਚ੍ਚੇਤਿ ਹਿਰੀਆਦੀਹਿ ਯਥਾਸਕਂ ਕਤ੍ਤਬ੍ਬੇ ਕਿਚ੍ਚੇ.

ਚਿਰਕਤਾਦਿਮਤ੍ਥਨ੍ਤਿ ਚਿਰਭਾਸਿਤਮ੍ਪਿ ਅਤ੍ਥਂ. ਸਰਤਿ ਅਨੁਸ੍ਸਰਤਿ ਕਾਯਾਦਿਂ ਅਸੁਭਾਦਿਤੋ ਨਿਜ੍ਝਾਯਤਿ. ਫਾਲੇਤੀਤਿ ਪਦਾਲੇਤਿ. ਪਾਜੇਨ੍ਤਿ ਗਮੇਨ੍ਤੀਤਿ ਤਂ ਪਾਜਨਂ. ਇਧ ਇਮਸ੍ਮਿਂ ਸੁਤ੍ਤੇ ‘‘ਪਾਚਨ’’ਨ੍ਤਿ ਵੁਤ੍ਤਂ ਜ-ਕਾਰਸ੍ਸ ਚ-ਕਾਰਂ ਕਤ੍ਵਾ. ਫਾਲਪਾਚਨਨ੍ਤਿ ਇਮਮਤ੍ਥਂ ਦਸ੍ਸੇਤੁਂ ‘‘ਯਥਾ ਹਿ ਬ੍ਰਾਹ੍ਮਣ…ਪੇ… ਸਤੀ’’ਤਿ ਵੁਤ੍ਤਂ. ਇਦਾਨਿ ਤਮਤ੍ਥਂ ਵਿਤ੍ਥਾਰਤੋ ਦਸ੍ਸੇਨ੍ਤੋ ‘‘ਤਤ੍ਥ ਯਥਾ’’ਤਿਆਦਿਮਾਹ. ਨਙ੍ਗਲਂ ਅਨੁਰਕ੍ਖਤਿ ਭਿਜ੍ਜਨਫਾਲਨਤੋ. ਪੁਰਤੋ ਚਸ੍ਸ ਗਚ੍ਛਤੀਤਿ ਅਸ੍ਸ ਨਙ੍ਗਲਸ੍ਸ ਕਸ੍ਸਨੇ ਭੂਮਿਯਾ ਵਿਲਿਖਨੇ ਪੁਰਤੋ ਗਚ੍ਛਤਿ ਪੁਬ੍ਬਙ੍ਗਮਾ ਹੋਤਿ. ਗਤਿਯੋਤਿ ਪਵਤ੍ਤਿਯੋ. ਸਮਨ੍ਵੇਸਮਾਨਾਤਿ ਸਰਣਵਸੇਨ ਗਵੇਸਮਾਨਾ. ਆਰਮ੍ਮਣੇ ਵਾ ਕਾਯਾਦਿਕੇ ਉਪਟ੍ਠਾਪਯਮਾਨਾ ਅਸੁਭਾਦਿਵਸੇਨ ਪਞ੍ਞਾਨਙ੍ਗਲਂ ਰਕ੍ਖਤਿ. ਸਭਾਵਾਸਭਾਵੂਪਗਮੇ ਫਾਲੋ ਵਿਯ ਨਙ੍ਗਲਸ੍ਸ ‘‘ਆਰਕ੍ਖਾ’’ਤਿ ਵੁਤ੍ਤਾ ‘‘ਸਬ੍ਬਾਨਤ੍ਥਤੋ ਸਤਿ ਰਕ੍ਖਤੀ’’ਤਿ ਕਤ੍ਵਾ. ਤਥਾ ਹੇਸਾ ਆਰਕ੍ਖਪਚ੍ਚੁਪਟ੍ਠਾਨਾ. ਚਿਰਕਤਚਿਰਭਾਸਿਤਾਨਂ ਅਸਮ੍ਮੁਸ੍ਸਨਵਸੇਨ ਸਤਿ ਪਞ੍ਞਾਨਙ੍ਗਲਸ੍ਸ ਪੁਰਤੋ ਹੋਤੀਤਿ ਵਤ੍ਵਾ ਤਸ੍ਸ ਪੁਰਤੋਭਾਵਂ ਦਸ੍ਸੇਤੁਂ ‘‘ਸਤਿ…ਪੇ… ਨੋ ਪਮੁਟ੍ਠੇ’’ਤਿ ਆਹ. ਸਤਿਪਰਿਚਿਤੇਤਿ ਸਤਿਯਾ ਪਟ੍ਠਾਪਿਤੇ. ‘‘ਉਪਟ੍ਠਾਪਿਤੇ’’ਤਿਪਿ ਪਾਠੋ, ਅਯਮੇਵਤ੍ਥੋ. ਸਂਸੀਦਿਤੁਂ ਨ ਦੇਤੀਤਿ ਸਕਿਚ੍ਚਕਿਰਿਯਾਯ ਸਂਸੀਦਨਂ ਕਾਤੁਂ ਨ ਦੇਤਿ. ਕੋਸਜ੍ਜਸਙ੍ਖਾਤਂ ਸਂਸੀਦਨਂ ਕੋਸਜ੍ਜਸਂਸੀਦਨਂ.

ਪਾਤਿਮੋਕ੍ਖਸਂਵਰਸੀਲਂ ਵੁਤ੍ਤਂ ਕਾਯਿਕਵਾਚਸਿਕਸਂਯਮਸ੍ਸ ਕਥਿਤਤ੍ਤਾ. ਆਹਾਰੇ ਉਦਰੇ ਯਤੋਤਿ ਪਰਿਭੁਞ੍ਜਿਤਬ੍ਬਆਹਾਰੇ ਸਂਯਤਭਾਵਦਸ੍ਸਨੇਨ ਪਰਿਭੁਞ੍ਜਿਤਬ੍ਬਤਾਯ ਚਤੂਸੁਪਿ ਪਚ੍ਚਯੇਸੁ ਸਂਯਤਭਾਵੋ ਦੀਪਿਤੋਤਿ ਆਹ ‘‘ਆਹਾਰਮੁਖੇਨਾ’’ਤਿਆਦਿ. ਸਂਯਤਭਾਵੋ ਚੇਤ੍ਥ ਪਚ੍ਚਯਹੇਤੁ ਅਨੇਸਨਾਭਾਵੋਤਿ ਵੁਤ੍ਤਂ ‘‘ਨਿਰੁਪਕ੍ਕਿਲੇਸੋਤਿ ਅਤ੍ਥੋ’’ਤਿ. ਭੋਜਨਸਦ੍ਦੋ ਆਹਾਰਪਰਿਭੋਗੇ ਨਿਰੁਲ਼੍ਹੋਤਿ ਕਤ੍ਵਾ ਵੁਤ੍ਤਂ ‘‘ਭੋਜਨੇ ਮਤ੍ਤਞ੍ਞੁਤਾਮੁਖੇਨਾ’’ਤਿ. ਪਰਿਭੁਞ੍ਜਨਟ੍ਠੇਨ ਪਨ ਭੋਜਨਸਦ੍ਦਮੁਖੇਨਾਤਿ ਵੁਤ੍ਤੇ ਅਧਿਪ੍ਪੇਤਤ੍ਥੋ ਲਬ੍ਭਤੇਵ. ਤੇਨਾਤਿ ਕਾਯਗੁਤ੍ਤਾਤਿਆਦਿਵਚਨੇਨ. ਨ ਵਿਲੁਮ੍ਪਨ੍ਤੀਤਿ ‘‘ਦੀਪੇਤੀ’’ਤਿ ਪਦਂ ਆਨੇਤ੍ਵਾ ਸਮ੍ਬਨ੍ਧੋ.

ਦ੍ਵੀਹਾਕਾਰੇਹੀਤਿ ਅਦਿਟ੍ਠਾਦੀਨਂ ਅਦਿਟ੍ਠਾਦਿਵਸੇਨ ਦਿਟ੍ਠਾਦੀਨਞ੍ਚ ਦਿਟ੍ਠਾਦਿਵਸੇਨਾਤਿ ਏਵਂ ਦ੍ਵਿਪ੍ਪਕਾਰੇਹਿ. ਅਵਿਸਂਵਾਦਨਂ ਅਵਿਤਥਕਥਨਂ. ਛੇਦਨਂ ਮੂਲਪ੍ਪਦੇਸੇ ਨਿਕਨ੍ਤਨਂ. ਲੁਨਨਂ ਯਤ੍ਥ ਕਤ੍ਥਚਿ ਛੇਦਨਂ. ਉਪ੍ਪਾਟਨਂ ਉਮ੍ਮੂਲਨਂ. ਅਸਿਤੇਨਾਤਿ ਦਤ੍ਤੇਨ, ਲਾਯਿਤੇਨਾਤਿ ਅਤ੍ਥੋ. ਵਿਸਂਵਾਦਨਸਙ੍ਖਾਤਾਨਂ ਤਿਣਾਨਂ, ਅਟ੍ਠਨ੍ਨਂ ਅਨਰਿਯਵੋਹਾਰਾਨਨ੍ਤਿ ਅਤ੍ਥੋ. ਯਥਾਭੂਤਞਾਣਨ੍ਤਿ ਨਾਮ ਰੂਪਪਰਿਚ੍ਛੇਦਕਞਾਣਂ. ਸਚ੍ਚਨ੍ਤਿ ਵੇਦਿਤਬ੍ਬਂ ਅਵਿਪਰੀਤਵੁਤ੍ਤਿਕਤ੍ਤਾ ‘‘ਛੇਦਕਂ’’ ਛਿਨ੍ਦਨਕਂ. ਨਿਦ੍ਦਾਨਨ੍ਤਿ ਨਿਦ੍ਦਾਯਕਂ. ਇਦਮੇਵ ਸਚ੍ਚਂ ਮੋਘਮਞ੍ਞਨ੍ਤਿ ਦਿਟ੍ਠਿ ‘‘ਦਿਟ੍ਠਿਸਚ੍ਚ’’ਨ੍ਤਿ ਵੁਚ੍ਚਤਿ. ਦ੍ਵੀਸੁ ਵਿਕਪ੍ਪੇਸੂਤਿ ਭਾਵਕਤ੍ਤੁਸਾਧਨਵਸੇਨ ਦ੍ਵੀਸੁ ਵਿਕਪ੍ਪੇਸੁ. ‘‘ਨਿਦ੍ਦਾਨ’’ਨ੍ਤਿ ਉਪਯੋਗਵਸੇਨੇਵ ਅਤ੍ਥੋ.

ਸੀਲਮੇਵ ‘‘ਸੋਰਚ੍ਚ’’ਨ੍ਤਿ ਵੁਤ੍ਤਂ ‘‘ਪਾਣਾਤਿਪਾਤਾਦੀਹਿ ਸੁਟ੍ਠੁ ਓਰਤਸ੍ਸ ਕਮ੍ਮ’’ਨ੍ਤਿ ਕਤ੍ਵਾ. ਸਙ੍ਖਾਰਦੁਕ੍ਖਾਦੀਨਂ ਅਭਾਵਤੋ ਸੁਨ੍ਦਰਭਾਵਤੋ ਸੁਨ੍ਦਰੇ ਨਿਬ੍ਬਾਨੇ ਆਰਮ੍ਮਣਕਰਣਵਸੇਨ ਰਤਤ੍ਤਾ ਸੁਰਤੋ, ਅਰਹਾ. ਤਸ੍ਸ ਭਾਵੋ ਸੋਰਚ੍ਚਂ, ਅਰਹਤ੍ਤਂ. ਅਪ੍ਪਮੋਚਨਮੇਵ ਅਚ੍ਚਨ੍ਤਾਯ ਪਮੋਚਨਂ ਨ ਹੋਤਿ.

ਯਦਗ੍ਗੇਨ ਵਿਪਸ੍ਸਨਾਯ ਪਞ੍ਞਾਯ ਤਂਸਹਗਤਵੀਰਿਯਸ੍ਸ ਚ ਨਙ੍ਗਲਧੋਰਯ੍ਹਤਾ, ਤਥਾਪਵਤ੍ਤਕੁਸਲਭਾਵਨਾਯ ਚ ਕਸਿਭਾਵੋ ਚ, ਤਦਗ੍ਗੇਨ ਤਤੋ ਪੁਰੇਤਰਂ ਪਵਤ੍ਤਪਞ੍ਞਾਵੀਰਿਯਪਾਰਮੀਨਂ ਨਙ੍ਗਲਧੋਰਯ੍ਹਤਾ, ਤਥਾਪਵਤ੍ਤਕੁਸਲਭਾਵਨਾਯ ਚ ਕਸਿਭਾਵੋ ਵੇਦਿਤਬ੍ਬੋਤਿ ਦਸ੍ਸੇਨ੍ਤੋ ‘‘ਯਥਾ ਹੀ’’ਤਿਆਦਿਮਾਹ. ਧੁਰਂ ਵਹਤੀਤਿ ਧੋਰਯ੍ਹਂ. ਯਥਾਵੁਤ੍ਤਂ ਘਨਨ੍ਤਿ ਅਸ੍ਮਿਮਾਨਾਦਿਭੇਦਂ ਘਨਂ. ਵਹਿਤਬ੍ਬਾ ਆਦਿਭੂਤਾ ਧੁਰਾ ਏਤੇਸਂ ਅਤ੍ਥੀਤਿ ਧੁਰਾ, ਪੁਰਿਮਧੁਰਵਾਹਕਾ. ਤਂਮੂਲਕਾ ਅਪਰਂ ਧੁਰਂ ਵਹਨ੍ਤਾ ਧੋਰਯ੍ਹਾ. ਧੁਰਾ ਚ ਧੋਰਯ੍ਹਾ ਚ ਧੁਰਧੋਰਯ੍ਹਂ ਏਕਤ੍ਤਵਸੇਨ. ਵਹਨ੍ਤਨ੍ਤਿ ਕਸਨੇਨ ਪਵਤ੍ਤਨ੍ਤਂ.

ਕਾਮਯੋਗਾਦੀਹਿ ਯੋਗੇਹਿ ਖੇਮਤ੍ਤਾ ਅਨੁਪਦ੍ਦਵਤ੍ਤਾ. ਤਂ ਨਿਬ੍ਬਾਨਂ ਅਧਿਕਿਚ੍ਚ ਉਦ੍ਦਿਸ੍ਸ. ਵਾਹੀਯਤਿ ਵਿਪਸ੍ਸਨਾਯ ਸਹਗਤਂ. ਅਭਿਮੁਖਂ ਵਾਹੀਯਤਿ ਮਗ੍ਗਪਰਿਯਾਪਨ੍ਨਂ. ਖੇਤ੍ਤਕੋਟਿਨ੍ਤਿ ਖੇਤ੍ਤਮਰਿਯਾਦਂ. ਦਿਟ੍ਠੇਕਟ੍ਠੇਤਿ ਦਿਟ੍ਠਿਯਾ ਸਹਜਾਤੇਕਟ੍ਠੇ ਪਹਾਨੇਕਟ੍ਠੇ ਚ. ਓਲ਼ਾਰਿਕੇਤਿ ਉਪਰਿਮਗ੍ਗਵਜ੍ਝੇ ਉਪਾਦਾਯ ਵੁਤ੍ਤਂ, ਅਞ੍ਞਥਾ ਦਸ੍ਸਨਪਹਾਤਬ੍ਬਾਪਿ ਦੁਤਿਯਮਗ੍ਗਵਜ੍ਝੇਹਿ ਓਲ਼ਾਰਿਕਾਤਿ. ਅਣੁਸਹਗਤੇਤਿ ਅਣੁਭੂਤੇ. ਇਦਂ ਹੇਟ੍ਠਿਮਮਗ੍ਗਵਜ੍ਝੇ ਉਪਾਦਾਯ ਵੁਤ੍ਤਂ. ਸਬ੍ਬਕਿਲੇਸੇ ਅਵਸਿਟ੍ਠਸਬ੍ਬਕਿਲੇਸੇ ਪਜਹਨ੍ਤਂ ਅਨਿਵਤ੍ਤਨ੍ਤਂ ਗਚ੍ਛਤਿ ਪੁਨ ਪਹਾਤਬ੍ਬਤਾਯ ਅਭਾਵਤੋ. ਅਨਿਵਤ੍ਤਨ੍ਤਨ੍ਤਿ ਨ ਨਿਵਤ੍ਤਨ੍ਤਂ, ਯਥਾ ਨਿਵਤ੍ਤਨਂ ਨ ਹੋਤਿ, ਏਵਂ ਗਚ੍ਛਤੀਤਿ ਅਤ੍ਥੋ. ਤੇਨਾਹ ‘‘ਨਿਵਤ੍ਤਨਰਹਿਤ’’ਨ੍ਤਿਆਦਿ. ਏਤਂ ਪਨ ਤਵ ਧੁਰਧੋਰਯ੍ਹਂ.

ਏਵਮੇਸਾ ਕਸੀਤਿ ਯਥਾਵੁਤ੍ਤਸ੍ਸ ਪਚ੍ਚਾਮਸਨਂ. ਤੇਨਾਹ ‘‘ਨਿਗਮਨਂ ਕਰੋਨ੍ਤੋ’’ਤਿ. ਵੁਤ੍ਤਸ੍ਸੇਵ ਹਿ ਅਤ੍ਥਸ੍ਸ ਪੁਨ ਵਚਨਂ. ਪਞ੍ਞਾਨਙ੍ਗਲੇਨ ਸਤਿਫਾਲਂ ਆਕੋਟੇਤ੍ਵਾਤਿ ਪਞ੍ਞਾਸਙ੍ਖਾਤੇਨ ਨਙ੍ਗਲੇਨ ਸਦ੍ਧਿਂ ਸਤਿਫਾਲਸ੍ਸ ਏਕਾਬਦ੍ਧਭਾਵਕਰਣੇਨ ਆਕੋਟੇਤ੍ਵਾ. ਕਟ੍ਠਾਤਿ ਏਤ੍ਥ ‘‘ਕਸੀ’’ਤਿ ਪਦਂ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬਂ ‘‘ਕਟ੍ਠਾ ਕਸੀ’’ਤਿ. ਕਮ੍ਮਪਰਿਯੋਸਾਨਨ੍ਤਿ ਯਥਾਵੁਤ੍ਤਕਸਿਕਮ੍ਮਸ੍ਸ ਪਰਿਯੋਸਾਨਭੂਤਂ. ਯਦਿਪਿ ਪੁਬ੍ਬੇ ‘‘ਪਞ੍ਞਾ ਮੇ ਯੁਗਨਙ੍ਗਲ’’ਨ੍ਤਿਆਦਿਨਾ ਅਤ੍ਤੁਦ੍ਦੇਸਿਕਵਸੇਨਾਯਂ ਅਮਤਪ੍ਫਲਾ ਕਸਿ ਦਸ੍ਸਿਤਾ, ਮਹਾਕਾਰੁਣਿਕਸ੍ਸ ਪਨ ਭਗਵਤੋ ਦੇਸਨਾ ਸਬ੍ਬਸ੍ਸਪਿ ਸਤ੍ਤਨਿਕਾਯਸ੍ਸ ਸਾਧਾਰਣਾ ਏਵਾਤਿ ਦਸ੍ਸੇਨ੍ਤੋ ‘‘ਸਾ ਖੋ ਪਨੇਸਾ’’ਤਿਆਦਿਮਾਹ.

ਦਿਵਸੇਯੇਵਾਤਿ ਤਂਦਿਵਸੇ ਏਵ. ਆਦਿਮਾਹਾਤਿ ਏਤ੍ਥ ਆਦਿ-ਸਦ੍ਦੇਨ ਕਥਾਪਰਿਯੋਸਾਨੇ ਪਾਠਪਦੇਸੋ ਗਹਿਤੋਤਿ ਤਦਞ੍ਞਂ ‘‘ਏਵਂ ਵੁਤ੍ਤੇ’’ਤਿਆਦਿਪਾਠਂ ਸਨ੍ਧਾਯ ‘‘ਤਤੋ ਪਰਞ੍ਚਾ’’ਤਿ ਆਹ.

ਕਸਿਭਾਰਦ੍ਵਾਜਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੨. ਉਦਯਸੁਤ੍ਤਵਣ੍ਣਨਾ

੧੯੮. ਏਤਂ ਵੁਤ੍ਤਨ੍ਤਿ ‘‘ਓਦਨੇਨ ਪੂਰੇਸੀ’’ਤਿ ਏਤਂ ਵਚਨਂ ਵੁਤ੍ਤਂ. ‘‘ਗਹੇਤੁਂ ਸਮਤ੍ਥੋ ਨਾਮ ਨਾਹੋਸੀਤਿ ਭਗਵਤੋ ਅਧਿਟ੍ਠਾਨਬਲੇਨਾ’’ਤਿ ਵਦਨ੍ਤਿ. ਤਂ ਬ੍ਰਾਹ੍ਮਣਂ ਵਿਨੇਤੁਕਾਮਤਾਯ ਕਿਰ ਭਗਵਾ ਤਥਾ ਅਕਾਸਿ.

ਉਪਾਰਮ੍ਭਭਯੇਨਾਤਿ ਪਰੂਪਵਾਦਭਯੇਨ. ਅਵਤ੍ਵਾਵ ਨਿਵਤ੍ਤੋ ‘‘ਅਬ੍ਭਾਗਤੋਪਿ ਪਾਸਣ੍ਡੋ ਵਾਚਾਮਤ੍ਤੇਨਪਿ ਨ ਪੂਜੇਤਬ੍ਬੋ’’ਤਿ ਬ੍ਰਾਹ੍ਮਣਧਮ੍ਮੇ ਵੁਤ੍ਤਤ੍ਤਾ. ਪਕ੍ਕਨ੍ਤੋਤਿ ਬ੍ਰਾਹ੍ਮਣਸ੍ਸ ਧਮ੍ਮਂ ਅਵਤ੍ਵਾ ਪਕ੍ਕਨ੍ਤੋ ਬ੍ਰਾਹ੍ਮਣਸ੍ਸ ਨ ਤਾਵ ਞਾਣਂ ਪਰਿਪਕ੍ਕਨ੍ਤਿ. ਏਤਂ ਵਚਨਂ…ਪੇ… ਮਗਮਾਸਿ ‘‘ਪੁਨਪ੍ਪੁਨਞ੍ਚੇਵ ਵਪਨ੍ਤਿ ਬੀਜ’’ਨ੍ਤਿਆਦਿਨਾ ਧਮ੍ਮਂ ਕਥੇਤੁਂ ਅਵਸ੍ਸਂ ਆਕਙ੍ਖਨ੍ਤੋ. ਪਕਾਰਤੋ ਕਸ੍ਸਤੀਤਿ ਪਕਟ੍ਠਕੋ, ਰਸਤਣ੍ਹਾਯ ਪਕਟ੍ਠੋਤਿ ਅਤ੍ਥੋ. ਤੇਨਾਹ ‘‘ਰਸਗਿਦ੍ਧੋ’’ਤਿ.

‘‘ਪੁਨਪ੍ਪੁਨਞ੍ਚੇਵ ਵਪਨ੍ਤਿ ਬੀਜ’’ਨ੍ਤਿ ਇਮਂ ਦੇਸਨਂ ਆਰਭੀਤਿ ਸਮ੍ਬਨ੍ਧੋ. ਬੀਜਨ੍ਤਿ ਚ ਇਤਿ-ਸਦ੍ਦੋ ਨਿਦਸ੍ਸਨਤ੍ਥੋ ਵਾ. ਤੇਨ ਅਵਯਵੇਨ ਸਮੁਦਾਯਂ ਨਿਦਸ੍ਸੇਤਿ. ਓਸਕ੍ਕਸੀਤਿ ਸਙ੍ਕੋਚਸਿ. ਵੁਤ੍ਤਨ੍ਤਿ ਵਪਨਂ ਕਤਂ. ਤਸ੍ਮਾ ਵੁਤ੍ਤਂ ‘‘ਅਲਮੇਤ੍ਤਾਵਤਾ’’ਤਿ. ‘‘ਵਸ੍ਸਿਤ੍ਵਾ’’ਤਿ ਵੁਟ੍ਠਿਂ ਪਵਤ੍ਤੇਤ੍ਵਾ.

ਦੇਸਨਾ…ਪੇ… ਦਸ੍ਸੇਤਿ ਬ੍ਰਾਹ੍ਮਣੇਨ ਵੁਤ੍ਤਂ ਅਯੁਤ੍ਤਵਚਨਂ ਪਰਿਵਟ੍ਟੇਨ੍ਤੋਪਿ ਦਿਵਸੇ ਦਿਵਸੇ ਭਿਕ੍ਖਾਚਰਿਯਾ ਨਾਮ ਭਿਕ੍ਖੂਨਂ ਕਾਯਗਤਾ ਵੁਤ੍ਤੀਤਿ. ਖੀਰਂ ਹਤ੍ਥੇਨ ਨਯਨ੍ਤੀਤਿ ਵਾ ਖੀਰਨਿਕਾ. ਕਿਲਮਤੀਤਿ ਤਂਤਂਕਿਚ੍ਚਕਰਣਵਸੇਨ ਖਿਜ੍ਜਤਿ. ਫਨ੍ਦਤੀਤਿ ਅਨਤ੍ਥਸਮਾਯੋਗਵਸੇਨ ਵਿਪ੍ਫਨ੍ਦਤਿ. ਅਪੁਨਬ੍ਭਵਾਯਾਤਿ ਆਯਤਿਂ ਅਨੁਪ੍ਪਤ੍ਤਿਯਾ. ਮਗ੍ਗੋ ਨਾਮਾਤਿ ਉਪਾਯੋ ਨਾਮ ਨਿਬ੍ਬਾਨਂ, ਤਸ੍ਮਿਂ ਲਦ੍ਧੇ ਪੁਨਬ੍ਭਵਾਭਾਵਤੋ. ‘‘ਪੁਨਪ੍ਪੁਨ’’ਨ੍ਤਿ ਵਚਨਂ ਉਪਾਦਾਯ ਬੀਜਵਪਨਾਦਯੋ ਪੁਨਪ੍ਪੁਨਧਮ੍ਮਾ ਨਾਮ ਜਾਤਾਤਿ ਆਹ ‘‘ਸੋਲ਼ਸ ਪੁਨਪ੍ਪੁਨਧਮ੍ਮੇ ਦੇਸੇਨ੍ਤੇਨਾ’’ਤਿ.

ਉਦਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੩. ਦੇਵਹਿਤਸੁਤ੍ਤਵਣ੍ਣਨਾ

੧੯੯. ਉਦਰਵਾਤੇਹੀਤਿ ਵਾਤਕਤਵਿਜ੍ਝਨਤੋਦਨਾਦਿਵਸੇਨ ਅਪਰਾਪਰਂ ਵਤ੍ਤਮਾਨੇਹਿ ਉਦਰਵਾਤੇਹਿ, ਤਸ੍ਸ ਵਾ ਵਿਕਾਰੇਹਿ. ਨਿਬਦ੍ਧੁਪਟ੍ਠਾਕਕਾਲੇ ਪਨ ਧਮ੍ਮਭਣ੍ਡਾਗਾਰਿਕੋਵ. ਅਰਞ੍ਞਨ੍ਤਿ ਭਗਵਤੋ ਭਿਕ੍ਖੂਨਞ੍ਚ ਵਸਨਟ੍ਠਾਨਭੂਤਂ ਤਪੋਵਨਂ. ਤਂ ਨਿਦ੍ਧੂਮਂ ਹੋਤਿ ਉਦਕਤਾਪਨਸ੍ਸਪਿ ਅਕਰਣਤੋ. ਤਸ੍ਮਾਤਿ ਯਸ੍ਮਾ ਤਸ੍ਸ ਉਣ੍ਹੋਦਕਵਿਕ੍ਕਿਣਨਚਰਿਯਾਯ ਜੀਵਿਕਾਕਪ੍ਪਨਂ ਹੋਤਿ, ਤਸ੍ਮਾ.

ਵਤ੍ਤਮੇਤਂ ਤਸ੍ਸ ਪਤਿਕਾਰਤ੍ਥਂ ਪਰਿਕਥਾਦੀਨਮ੍ਪਿ ਕਾਤੁਂ ਲਬ੍ਭਨਤੋ. ਇਦਾਨਿ ਤਤ੍ਥ ਕਾਰਣਮ੍ਪਿ ਸਵਿਸਯਂ ਦਸ੍ਸੇਤੁਂ ‘‘ਵਣ੍ਣਂ ਹੀ’’ਤਿਆਦਿ ਵੁਤ੍ਤਂ. ਭਗਵਾ ਹਿ ਆਯਸ੍ਮਤੋ ਉਪਵਾਣਸ੍ਸ ਦੇਵਹਿਤਬ੍ਰਾਹ੍ਮਣਸ੍ਸ ਤਂ ਸਮ੍ਭਾਵਿਤਂ ਭਵਿਸ੍ਸਤਿ ਤਿਕਿਚ੍ਛਾਪਟਿਯਤ੍ਤਂ, ਤਾਯ ਚ ਅਤ੍ਤਨੋ ਰੋਗਸ੍ਸ ਵੂਪਸਮਨਂ, ਤਪ੍ਪਸਙ੍ਗੇਨ ਚ ਦੇਵਹਿਤਬ੍ਰਾਹ੍ਮਣੋ ਮਮ ਸਨ੍ਤਿਕਂ ਆਗਨ੍ਤ੍ਵਾ ਧਮ੍ਮਸ੍ਸਵਨੇਨ ਸਰਣੇਸੁ ਸੀਲੇਸੁ ਚ ਪਤਿਟ੍ਠਹਿਸ੍ਸਤੀਤਿ ਸਬ੍ਬਮਿਦਂ ਞਤ੍ਵਾ ਏਵਂ ‘‘ਇਙ੍ਘ ਮੇ ਤ੍ਵਂ, ਉਪਵਾਣ, ਉਣ੍ਹੋਦਕਂ ਜਾਨਾਹੀ’’ਤਿ ਅਵੋਚ. ਆਗਮਨੀਯਪ੍ਪਟਿਪਦਂ ਪੁਬ੍ਬਭਾਗਪ੍ਪਟਿਪਦਂ ਪੁਬ੍ਬਭਾਗਪ੍ਪਟਿਪਤ੍ਤਿਂ ਕਥੇਤੁਂ ਵਟ੍ਟਤਿ ਅਨੁਤ੍ਤਰਿਮਨੁਸ੍ਸਧਮ੍ਮਤ੍ਤਾ. ਸਦੇਵਕੇਨ ਲੋਕੇਨਾਤਿ ਅਨਵਸੇਸਤੋ ਲੋਕਸ੍ਸ ਗਹਣਂ. ਫਲਵਿਸੇਸਾਕਙ੍ਖਾਯ ਪੂਜੇਤਬ੍ਬਾਤਿ ਪੂਜਨੀਯਾ, ਤੇ ਏਵ ਇਧ ‘‘ਪੂਜਨੇਯ੍ਯਾ’’ਤਿ ਵੁਤ੍ਤਾ. ਤਥਾ ਆਦਰੇਨ ਪੂਜੇਤਬ੍ਬਤਾਯ ਸਕ੍ਕਾਰਿਯਾ, ਆ-ਕਾਰਸ੍ਸ ਰਸ੍ਸਤ੍ਤਂ, ਰਿ-ਸਦ੍ਦਸ੍ਸ ਚ ਰੇ-ਆਦੇਸਂ ਕਤ੍ਵਾ ‘‘ਸਕ੍ਕਰੇਯ੍ਯਾ’’ਤਿ ਵੁਤ੍ਤਂ. ‘‘ਅਪਚਯੇਯ੍ਯਾ’’ਤਿ ਵਤ੍ਤਬ੍ਬੇ ਯ-ਕਾਰਲੋਪਂ ਕਤ੍ਵਾ ‘‘ਅਪਚੇਯ੍ਯਾ’’ਤਿ ਵੁਤ੍ਤਂ. ਤੇਸਨ੍ਤਿ ਸਦੇਵਕੇਨ ਪੂਜਨੇਯ੍ਯਾਦੀਨਂ. ਹਰਿਤੁਨ੍ਤਿ ਨੇਤੁਂ.

ਏਤ੍ਤਕੇਨਪੀਤਿ ਉਪਸਙ੍ਕਮਨਾਦਿਨਾ ਏਤ੍ਤਕੇਨ ਅਪ੍ਪਮਤ੍ਤਕੇਨਪਿ ਕਤਵਤ੍ਤੇਨ ਅਯਂ ਕਿਤ੍ਤਿ…ਪੇ… ਸੋਮਨਸ੍ਸਜਾਤੋ.

ਯਜਮਾਨਸ੍ਸਾਤਿ ਦੇਯ੍ਯਧਮ੍ਮਂ ਦੇਨ੍ਤਸ੍ਸ. ਦਕ੍ਖਿਣਾਯ ਇਜ੍ਝਨਂ ਨਾਮ ਵਿਪੁਲਫਲਭਾਵੋਤਿ ਆਹ ‘‘ਮਹਪ੍ਫਲੋ ਹੋਤੀ’’ਤਿ. ਵਿਦਿਤਨ੍ਤਿ ਪਟਿਵਿਦ੍ਧਪਚ੍ਚਕ੍ਖਕਤਂ. ਆਜਾਨਾਤੀਤਿ ਵੁਤ੍ਥਭਵਾਦਿਂ ਪਰਿਯਾਦਾਯ ਜਾਨਾਤਿ ਪਟਿਵਿਜ੍ਝਤਿ. ਜਾਨਿਤ੍ਵਾਤਿ ਚਤ੍ਤਾਰਿ ਸਚ੍ਚਾਨਿ ਮਗ੍ਗਪਟਿਪਾਟਿਯਾ ਪਟਿਵਿਜ੍ਝਿਤ੍ਵਾ. ਅਗ੍ਗਪ੍ਪਤ੍ਤਤਾਯ ਕਤਕਿਚ੍ਚਤਂ ਪਤ੍ਤੋ. ਬ੍ਰਾਹ੍ਮਣੇਨ ਅਤ੍ਤਨਾ ਕਤੋ ਕਾਰੋ ਚ ਭਗਵਤੋ ਏਵ ਪਚ੍ਚੁਪਟ੍ਠਾਤੀਤਿ ਤਂ ਦਸ੍ਸੇਨ੍ਤੋ ‘‘ਇਮਿਨਾ ਖੀਣਾਸਵੇ ਯਜਨਾਕਾਰੇਨ ਯਜਨ੍ਤਸ੍ਸਾ’’ਤਿ ਵੁਤ੍ਤਂ.

ਦੇਵਹਿਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੪. ਮਹਾਸਾਲਸੁਤ੍ਤਵਣ੍ਣਨਾ

੨੦੦. ਯਸ੍ਮਾ ਤਸ੍ਸ ਬ੍ਰਾਹ੍ਮਣਸ੍ਸ ਅਨਿਸ੍ਸਯਸ੍ਸ ਜਿਣ੍ਣਭਾਵੇਨ ਵਿਸੇਸਤੋ ਕਾਯੋ ਲੂਖੋ ਜਾਤੋ, ਜਿਣ੍ਣਪਿਲੋਤਿਕਖਣ੍ਡੇਹਿ ਸਙ੍ਘਟਿਤਂ ਪਾਵੁਰਣਂ, ਤਸ੍ਮਾ ‘‘ਲੂਖਪਾਵੁਰਣੋ’’ਤਿ ਪਦਸ੍ਸ ‘‘ਜਿਣ੍ਣਪਾਵੁਰਣੋ’’ਤਿ ਅਤ੍ਥੋ ਵੁਤ੍ਤੋ. ਪਾਟਿਯੇਕ੍ਕਨ੍ਤਿ ਪੁਤ੍ਤੇਸੁ ਏਕਮੇਕੋ ਏਕਮੇਕਾਯ ਵਾਚਾਯ ਵਿਸੁਂ ਵਿਸੁਂ.

ਸਮ੍ਪੁਚ੍ਛਨਂ ਨਾਮ ਇਧ ਸਮ੍ਮਨ੍ਤਨਨ੍ਤਿ ਆਹ ‘‘ਸਦ੍ਧਿਂ ਮਨ੍ਤਯਿਤ੍ਵਾ’’ਤਿ. ਨਨ੍ਦਿਸ੍ਸਨ੍ਤਿ ਅਭਿਨਨ੍ਦਿਂ. ਅਤੀਤਤ੍ਥੇ ਹਿ ਇਦਂ ਅਨਾਗਤਵਚਨਂ. ਤੇਨਾਹ ‘‘ਨਨ੍ਦਿਜਾਤੋ…ਪੇ… ਅਹੋਸਿ’’ਨ੍ਤਿ. ਭੁਸ੍ਸਨ੍ਤਾਤਿ ਨਿਬ੍ਭੁਸ੍ਸਨਵਸੇਨ ਰਵਨ੍ਤਾ.

ਵਯੋਗਤਨ੍ਤਿ ਪਚ੍ਛਿਮਵਯਂ ਉਪਗਤਂ. ਸੋ ਪਨ ਯਸ੍ਮਾ ਪੁਰਿਮੇ ਦ੍ਵੇ ਵਯੇ ਅਤਿਕ੍ਕਮਵਸੇਨ ਗਤੋ. ਪਚ੍ਛਿਮਂ ਏਕਦੇਸਤੋ ਅਤਿਕ੍ਕਮਨਵਸੇਨ, ਤਸ੍ਮਾ ਵੁਤ੍ਤਂ – ‘‘ਤਯੋ ਵਯੇ ਗਤਂ ਅਤਿਕ੍ਕਨ੍ਤਂ ਪਚ੍ਛਿਮਵਯੇ ਠਿਤ’’ਨ੍ਤਿ.

ਨਿਪ੍ਪਰਿਭੋਗੋਤਿ ਜਿਣ੍ਣਭਾਵੇਨ ਜਵਪਰਕ੍ਕਮਹਾਨਿਯਾ ਅਪਰਿਭੋਗੋ ਨ ਭੁਞ੍ਜਿਤਬ੍ਬੋ. ਖਾਦਨਾ ਅਪਨੀਯਤੀਤਿ ਯਵਸਂ ਅਦਦਨ੍ਤਾ ਤਤੋ ਨੀਹਰਨ੍ਤਿ ਨਾਮ. ਥੇਰੋਤਿ ਵੁਡ੍ਢੋ.

ਅਨਸ੍ਸਵਾਤਿ ਨ ਵਚਨਕਰਾ. ਅਪ੍ਪਤਿਸ੍ਸਾਤਿ ਪਤਿਸ੍ਸਯਰਹਿਤਾ. ਅਵਸਵਤ੍ਤਿਨੋਤਿ ਨ ਮਯ੍ਹਂ ਵਸੇਨ ਵਤ੍ਤਨਕਾ. ਸੁਨ੍ਦਰਤਰੋਤਿ ਉਪਤ੍ਥਮ੍ਭਕਾਰਿਭਾਵੇਨ ਸੁਨ੍ਦਰਤਰੋ.

ਪੁਰਤੋਤਿ ਉਪਤ੍ਥਮ੍ਭਕਭਾਵੇਨ ਪੁਰਤੋ ਕਤ੍ਵਾ. ਉਦਕੇ ਪਤਿਟ੍ਠਂ ਲਭਤਿ ਤਤ੍ਥ ਪਤਿਟ੍ਠਤੋ ਥਿਰਪਤਿਟ੍ਠਭਾਵਤੋ. ਅਦ੍ਧਪਤਿਟ੍ਠੋ ਹਿ ਦਣ੍ਡੋ ਦਣ੍ਡਧਰਪੁਰਿਸਸ੍ਸ ਪਤਿਟ੍ਠਂ ਲਭਾਪੇਤਿ.

ਬ੍ਰਾਹ੍ਮਣਿਯੋਤਿ ਅਤ੍ਤਨੋ ਬ੍ਰਾਹ੍ਮਣਿਯੋ. ਪਾਟਿਯੇਕ੍ਕਨ੍ਤਿ ‘‘ਅਸੁਕਸ੍ਸ ਗੇਹੇ ਅਸੁਕਸ੍ਸ ਗੇਹੇ’’ਤਿ ਏਵਂ ਉਦ੍ਦੇਸਿਕਂ ਕਤ੍ਵਾ ਵਿਸੁਂ ਵਿਸੁਂ. ਮਾ ਨਿਯ੍ਯਾਦੇਹਿ, ਅਮ੍ਹਾਕਂ ਰੁਚ੍ਚਨਟ੍ਠਾਨਮੇਵਾਤਿ ਤਵ ਪੁਤ੍ਤਾਨਂ ਗੇਹੇਸੁ ਯਂ ਅਮ੍ਹਾਕਂ ਰੁਚ੍ਚਨਟ੍ਠਾਨਂ. ਤਤ੍ਥਮੇਵ ਗਮਿਸ੍ਸਾਮਾਤਿ ਸਬ੍ਬੇਸਮ੍ਪਿ ਏਤੇਸਂ ਅਨੁਗ੍ਗਹਂ ਕਾਤੁਕਾਮੋ ਭਗਵਾ ਏਵਮਾਹ.

ਤਤੋ ਪਟ੍ਠਾਯਾਤਿ ਸੋਤਾਪਤ੍ਤਿਫਲਪਟਿਲਾਭਤੋ ਪਟ੍ਠਾਯ. ਯਦਤ੍ਥਂ ਮਯਂ ਇਮਸ੍ਸ ਬ੍ਰਾਹ੍ਮਣਸ੍ਸ ਮਹਾਸਮ੍ਪਤ੍ਤਿਦਾਨਾਦਿਨਾ ਅਨੁਗ੍ਗਹੋ ਕਤੋ, ਸੋ ਚਸ੍ਸ ਪੁਤ੍ਤਪਰਿਜਨਸ੍ਸਪਿ ਅਤ੍ਥੋ ਸਿਦ੍ਧੋਤਿ ਸਤ੍ਥਾ ਨ ਸਬ੍ਬਕਾਲਂ ਤਸ੍ਸ ਬ੍ਰਾਹ੍ਮਣਸ੍ਸ ਪੁਤ੍ਤਾਨਂ ਗੇਹਂ ਅਗਮਾਸਿ, ਤੇ ਏਵ ਪਨ ਕਾਲੇਨ ਕਾਲਂ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਯਥਾਵਿਭਵਂ ਸਕ੍ਕਾਰਸਮ੍ਮਾਨਂ ਅਕਂਸੂਤਿ ਅਧਿਪ੍ਪਾਯੋ.

ਮਹਾਸਾਲਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੫. ਮਾਨਤ੍ਥਦ੍ਧਸੁਤ੍ਤਵਣ੍ਣਨਾ

੨੦੧. ਮਾਨੇਨ ਥਦ੍ਧੋਤਿ ‘‘ਅਯਂ ਖੋ’’ਤਿਆਦਿਨਾ ਪਗ੍ਗਹਿਤੇਨ ਮਾਨੇਨ ਥਦ੍ਧੋ ਬਜ੍ਝਿਤਚਿਤ੍ਤੋ ਥਦ੍ਧਅਯੋਸਲਾਕੋ ਵਿਯ ਕਸ੍ਸਚਿਪਿ ਅਨੋਨਤੋ. ਨ ਕਿਞ੍ਚਿ ਜਾਨਾਤਿ ਲੋਕੇ ਪਟਿਸਨ੍ਥਾਰਮਤ੍ਤਸ੍ਸਪਿ ਅਜਾਨਨਤੋ.

ਅਬ੍ਭੁਤਵਿਤ੍ਤਜਾਤਾਤਿ ਸਞ੍ਜਾਤਅਬ੍ਭੁਤਵਿਤ੍ਤਾ. ਵਿਤ੍ਤਂ ਵਿਤ੍ਤੀਤਿ ਚ ਤੁਟ੍ਠਿਪਰਿਯਾਯਾ. ਅਭੂਤਪੁਬ੍ਬਾਯਾਤਿ ਯਾ ਤਸ੍ਸਾ ਪਰਿਸਾਯ ਵਿਤ੍ਤਿ ਤਦਾ ਭੂਤਾ, ਸਾ ਇਤੋ ਪੁਬ੍ਬੇ ਅਭੂਤਾ. ਤੇਨਾਹ ‘‘ਅਭੂਤ…ਪੇ… ਸਮਨ੍ਨਾਗਤਾ’’ਤਿ. ਅਸ੍ਸ ਪੁਗ੍ਗਲਸ੍ਸਾਤਿ ਅਨੇਨ ਪੁਗ੍ਗਲੇਨ. ਅਪਚਿਤਾਤਿ ਪਰਮਨਿਪਚ੍ਚੇਨ ਪੂਜਨੀਯਸਾਮਞ੍ਞਤੋ ਤਤ੍ਥ ਅਤ੍ਤਨੋ ਪਕ੍ਖਿਪਨਂ ਇਧ ਦੇਸਨਾਕੋਸਲ੍ਲਂ.

ਮਾਨਤ੍ਥਦ੍ਧਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੬. ਪਚ੍ਚਨੀਕਸੁਤ੍ਤਵਣ੍ਣਨਾ

੨੦੨. ‘‘ਸਬ੍ਬਂ ਸੇਤ’’ਨ੍ਤਿ ਕੇਨਚਿ ਵੁਤ੍ਤੇ ਤਸ੍ਸ ਪਚ੍ਚਨੀਕਂ ਕਰੋਨ੍ਤਸ੍ਸੇਵ ਅਸ੍ਸ ਬ੍ਰਾਹ੍ਮਣਸ੍ਸ. ਵਿਨੇਤ੍ਵਾਤਿ ਵਿਨਾਸੇਤ੍ਵਾ. ਸੁਣਾਤੀਤਿ ਅਤ੍ਥੋਤਿ ‘‘ਸੁਣਾਤੀ’’ਤਿ ਕਿਰਿਯਾਪਦਂ ਆਹਰਿਤ੍ਵਾ ਗਾਥਾਯ ਅਤ੍ਥੋ ਵੇਦਿਤਬ੍ਬੋ ‘‘ਜਞ੍ਞਾ ਸੁਭਾਸਿਤ’’ਨ੍ਤਿ ਵੁਤ੍ਤਤ੍ਤਾ. ਨ ਹਿ ਅਸੁਤ੍ਵਾ ਦੇਸਿਤਂ ਜਾਨਿਤੁਂ ਸਕ੍ਕੋਨ੍ਤਿ.

ਪਚ੍ਚਨੀਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੭. ਵਨਕਮ੍ਮਿਕਸੁਤ੍ਤਵਣ੍ਣਨਾ

੨੦੩. ਵਨਕਮ੍ਮੇ ਨਿਯੁਤ੍ਤੋ, ਕਿਰਿਯਮਾਨੇਨ ਵਨਕਮ੍ਮਂ ਏਤਸ੍ਸ ਅਤ੍ਥੀਤਿ ਵਨਕਮ੍ਮਿਕੋ. ਇਮਸ੍ਮਿਂ ਵਨਸਣ੍ਡੇਤਿ ਇਮਸ੍ਮਿਂ ਏਵਂਮਹਨ੍ਤੇ ਵਨਸਣ੍ਡੇ. ਨ ਮੇ ਵਨਸ੍ਮਿਂ ਕਰਣੀਯਮਤ੍ਥਿ ਯਥਾ, ‘‘ਬ੍ਰਾਹ੍ਮਣ, ਤੁਯ੍ਹ’’ਨ੍ਤਿ ਅਧਿਪ੍ਪਾਯੋ. ਇਤਰਂ ਪਨ ਯਂ ਮਹਾਕਿਲੇਸਵਨਂ, ਤਂ ਮਗ੍ਗਞਾਣਫਰਸੁਨਾ ਸਮਾਧਿਮਯਸਿਲਾਯਂ ਸੁਨਿਸਿਤੇਨ ਸਬ੍ਬਸੋ ਉਚ੍ਛਿਨ੍ਨਮੂਲਂ, ਤਤੋ ਏਵ ਨਿਬ੍ਬਨਥੋ ਨਿਕ੍ਕਿਲੇਸਗਹਨੋ. ਵਿਵੇਕਾਭਿਰਤਿਯਾ ਏਕਕੋ ਅਭਿਰਤੋ ਪਟਿਪਕ੍ਖਵਿਗਮੇਨ. ਤੇਨਾਹ ‘‘ਅਰਤਿਂ…ਪੇ… ਜਹਿਤ੍ਵਾ’’ਤਿ.

ਵਨਕਮ੍ਮਿਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੮. ਕਟ੍ਠਹਾਰਸੁਤ੍ਤਵਣ੍ਣਨਾ

੨੦੪. ਧਮ੍ਮਨ੍ਤੇਵਾਸਿਕਾਤਿ ਕਿਞ੍ਚਿਪਿ ਧਨਂ ਅਦਤ੍ਵਾ ਕੇਵਲਂ ਅਨ੍ਤੇਵਾਸਿਕਾ. ਤੇਨਾਹ ‘‘ਵੇਯ੍ਯਾਵਚ੍ਚਂ ਕਤ੍ਵਾ ਸਿਪ੍ਪੁਗ੍ਗਣ੍ਹਨਕਾ’’ਤਿ. ਗਮ੍ਭੀਰਸਭਾਵੇਤਿ ਸਮਨ੍ਤਤੋ ਦੂਰਤੋ ਗਹਨਸਚ੍ਛਨ੍ਨਵਿਪੁਲਤਰਰੁਕ੍ਖਗਚ੍ਛਲਤਾਯ ਚ, ਤਦਾ ਹਿਮਪਿਣ੍ਡਸਿਨ੍ਨਭਾਵੇਨ ਮਯੂਰਯਾਨੇਹਿ ਪਤਿਟ੍ਠਾਤੁਂ ਅਸਕ੍ਕੁਣੇਯ੍ਯਤਾਯ ਚ ਗਮ੍ਭੀਰਭਾਵੇ.

ਬਹੁਭੇਰਵੇਤਿ ਬਹੁਭਯਾਨਕੇ. ਅਨਿਞ੍ਜਮਾਨੇਨਾਤਿ ਇਤ੍ਥਮ੍ਭੂਤਤ੍ਥੇ ਕਰਣਵਚਨਂ. ਅਤਿਸੁਨ੍ਦਰਂ ਵਤਾਤਿ ਏਵਂ ਸਨ੍ਤੇ ਨਾਮ ਅਰਞ੍ਞੇ ਏਵਂ ਨਿਚ੍ਚਲਕਾਯੋ ਨਿਸਿਨ੍ਨੋ ਝਾਯਨ੍ਤੋ ਅਤਿਵਿਯ ਸੁਨ੍ਦਰਞ੍ਚ ਝਾਨਂ ਝਾਯਸੀਤਿ ਵਦਤਿ.

ਅਚ੍ਛੇਰਰੂਪਨ੍ਤਿ ਅਚ੍ਛਰਿਯਭਾਵਂ. ਸੇਟ੍ਠਪ੍ਪਤ੍ਤਿਯਾਤਿ ਸੇਟ੍ਠਭਾਵਪ੍ਪਤ੍ਤਿਯਾ.

‘‘ਲੋਕਾਧਿਪਤਿਸਹਬ੍ਯਤਂ ਆਕਙ੍ਖਮਾਨੋ’’ਤਿ ਇਮਿਨਾ ਬ੍ਰਾਹ੍ਮਣੋ ਲੋਕਾਧਿਪਤਿਸਹਯੋਗਂ ਪੁਚ੍ਛਤਿ, ‘‘ਕਸ੍ਮਾ ਭਵ’’ਨ੍ਤਿਆਦਿਨਾ ਪਨ ਤਦਞ੍ਞਵਿਸੇਸਾਕਙ੍ਖਂ ਪੁਚ੍ਛਤੀਤਿ ਆਹ ‘‘ਅਪਰੇਨਪਿ ਆਕਾਰੇਨ ਪੁਚ੍ਛਤੀ’’ਤਿ.

ਕਙ੍ਖਾਤਿ ਤਣ੍ਹਾ ਅਭਿਕ੍ਖਣਵਸੇਨ ਪਵਤ੍ਤਾ. ਅਨੇਕਸਭਾਵੇਸੂਤਿ ਰੂਪਾਦਿਵਸੇਨ ਅਜ੍ਝਤ੍ਤਿਕਾਦਿਵਸੇਨ ਏਵਂ ਨਾਨਾਸਭਾਵੇਸੁ ਆਰਮ੍ਮਣੇਸੁ. ਅਸ੍ਸਾਦਰਾਗੋ ਲੋਭੋ ਅਭਿਜ੍ਝਾਤਿ ਨਾਨਪ੍ਪਕਾਰਾ. ਸੇਸਕਿਲੇਸਾ ਵਾ ਦਿਟ੍ਠਿਮਾਨਦੋਸਾਦਯੋ. ਨਿਚ੍ਚਕਾਲਂ ਅਵਸ੍ਸਿਤਾ ਸਤ੍ਤਾਨਂ ਅਵਸ੍ਸਯਭਾਵਤ੍ਤਾ. ਪਜਪ੍ਪਾਪਨਵਸੇਨਾਤਿ ਪਕਾਰੇਹਿ ਤਣ੍ਹਾਯਨਵਸੇਨ. ਨਿਰਨ੍ਤਾਤਿ ਅਨ੍ਤਰਹਿਤਾ ਨਿਰਵਸੇਸਾ.

ਅਨੁਪਗਮਨੋਤਿ ਅਨੁਪਾਦਾਨੋ. ਸਬ੍ਬਞ੍ਞੁਤਞ੍ਞਾਣਂ ਦੀਪੇਤਿ, ਤਸ੍ਸ ਹਿ ਵਸੇਨ ਏਵ ਨਾਨਾਸਭਾਵੇਸੁ ਭਗਵਾ ਸਮਨ੍ਤਚਕ੍ਖੁਨਾ ਪਸ੍ਸਤੀਤਿ ‘‘ਸਬ੍ਬੇ…ਪੇ… ਦਸ੍ਸਨੋ’’ਤਿ ਵੁਚ੍ਚਤਿ. ਅਰਹਤ੍ਤਂ ਸਨ੍ਧਾਯਾਹ, ਤਞ੍ਹਿ ਨਿਪ੍ਪਰਿਯਾਯਤੋ ‘‘ਅਨੁਤ੍ਤਰ’’ਨ੍ਤਿ ਵੁਚ੍ਚਤਿ.

ਕਟ੍ਠਹਾਰਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੯. ਮਾਤੁਪੋਸਕਸੁਤ੍ਤਵਣ੍ਣਨਾ

੨੦੫. ਇਤੋਤਿ ਮਨੁਸ੍ਸਤ੍ਤਭਾਵਤੋ. ਪਟਿਗਨ੍ਤ੍ਵਾਤਿ ਅਭਿਗਨ੍ਤ੍ਵਾ. ਸਗ੍ਗੇ ਹਿ ਨਿਬ੍ਬਤ੍ਤਨ੍ਤੋ ਕਮ੍ਮਫਲੇਨ ਧਮ੍ਮਤਾਵਸੇਨ ਪਟਿਸਨ੍ਧਿਕਾਲਤੋ ਪਟ੍ਠਾਯ ਅਭਿਰਤਿਵਸੇਨ ਅਭਿਰਮਤਿ ਏਵ ਨਾਮਾਤਿ.

ਮਾਤੁਪੋਸਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੦. ਭਿਕ੍ਖਕਸੁਤ੍ਤਵਣ੍ਣਨਾ

੨੦੬. ਵਿਰੂਪਂ ਗਨ੍ਧਂ ਪਸਵਤੀਤਿ ਵਿਸ੍ਸੋ, ਦੁਗ੍ਗਨ੍ਧੋ. ਬਾਹਿਤ੍ਵਾਤਿ ਅਤ੍ਤਨੋ ਸਨ੍ਤਾਨਤੋ ਬਹਿਕਤ੍ਵਾ ਨੀਹਰਿਤ੍ਵਾ. ਤਂ ਪਨ ਅਨਵਸੇਸਤੋ ਪਜਹਨਨ੍ਤਿ ਆਹ ‘‘ਅਗ੍ਗਮਗ੍ਗੇਨ ਜਹਿਤ੍ਵਾ’’ਤਿ. ਸਙ੍ਖਾਯਤਿ ਸਮ੍ਮਦੇਵ ਪਰਿਚ੍ਛਿਨ੍ਦਤਿ ਏਤਾਯਾਤਿ ਸਙ੍ਖਾ, ਞਾਣਨ੍ਤਿ ਆਹ ‘‘ਸਙ੍ਖਾਯਾਤਿ ਞਾਣੇਨਾ’’ਤਿ. ਭਿਨ੍ਨਕਿਲੇਸਤ੍ਤਾਤਿ ਨਿਰੁਤ੍ਤਿਨਯੇਨ ਭਿਕ੍ਖੁਸਦ੍ਦਸਿਦ੍ਧਿਮਾਹ.

ਭਿਕ੍ਖਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੧. ਸਙ੍ਗਾਰਵਸੁਤ੍ਤਵਣ੍ਣਨਾ

੨੦੭. ਪਚ੍ਚੇਤੀਤਿ ਪਤ੍ਤਿਯਾਯਤਿ ਸਦ੍ਦਹਤਿ. ਤਥਾਭੂਤੋ ਚ ਤਮਤ੍ਥਂ ਨਿਕਾਮੇਨ੍ਤੋ ਨਾਮ ਹੋਤੀਤਿ ਵੁਤ੍ਤਂ ‘‘ਇਚ੍ਛਤਿ ਪਤ੍ਥੇਤੀ’’ਤਿ. ਸਾਧੁ, ਭਨ੍ਤੇਤਿ ਏਤ੍ਥ ਸਾਧੁ-ਸਦ੍ਦੋ ਆਯਾਚਨਤ੍ਥੋ, ਨ ਅਭਿਨਨ੍ਦਨਤ੍ਥੋਤਿ ‘‘ਆਯਾਚਮਾਨੋ ਆਹਾ’’ਤਿ ਵਤ੍ਵਾ ਆਯਾਚਨੇ ਕਾਰਣਂ ਦਸ੍ਸੇਨ੍ਤੋ ‘‘ਥੇਰਸ੍ਸ ਕਿਰਾ’’ਤਿਆਦਿਮਾਹ. ਉਦਕਸੁਦ੍ਧਿਕੋ ਨ ਏਕਂਸੇਨ ਅਪਾਯੂਪਗੋ, ਲਦ੍ਧਿਯਾ ਪਨ ਸਾਵਜ੍ਜਕਿਲੇਸਭੂਤਭਾਵਤੋ ਆਯਾਚਤਿ. ਅਞ੍ਞਂ ਕਾਰਣਂ ਅਪਦਿਸਨ੍ਤੋ ‘‘ਅਪਿਚਾ’’ਤਿਆਦਿਮਾਹ. ਫਲਭੂਤੋ ਅਤ੍ਥੋ ਏਤਸ੍ਸਾਤਿ ਅਤ੍ਥਵਸਂ, ਕਾਰਣਨ੍ਤਿ ਆਹ ‘‘ਅਤ੍ਥਾਨਿਸਂਸਂ ਅਤ੍ਥਕਾਰਣ’’ਨ੍ਤਿ. ਪਪਞ੍ਚਸੂਦਨਿਯਂ ਪਨ ਫਲੇਨੇਵ ਅਰਣੀਯਤੋ ਅਤ੍ਥੋ, ਕਾਰਣਨ੍ਤਿ ਕਤ੍ਵਾ ‘‘ਅਤ੍ਥੋ ਏਵ ਅਤ੍ਥਵਸੋ, ਤਸ੍ਮਾ ਦ੍ਵੇ ਅਤ੍ਥਵਸੇਤਿ ਦ੍ਵੇ ਅਤ੍ਥੇ ਦ੍ਵੇ ਕਾਰਣਾਨੀ’’ਤਿ ਵੁਤ੍ਤਂ.

ਸਙ੍ਗਾਰਵਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੨. ਖੋਮਦੁਸ੍ਸਸੁਤ੍ਤਵਣ੍ਣਨਾ

੨੦੮. ਏਵਂਲਦ੍ਧਨਾਮਂ ਪਿਣ੍ਡਾਯ ਪਾਵਿਸੀਤਿ ਯੋਜਨਾ. ਏਵਮੇਵਨ੍ਤਿ ਕੇਨਚਿ ਅਨਿਮਨ੍ਤਿਤੇਨ ਸਯਮੇਵ ਉਪਸਙ੍ਕਮਨ੍ਤੇ. ਅਫਾਸੁਕਧਾਤੁਕਨ੍ਤਿ ਅਯੁਤ੍ਤਰੂਪਂ. ਸਭਾਧਮ੍ਮਨ੍ਤਿ ਸਭਾਯ ਚਰਿਤਬ੍ਬਂ ਚਾਰਿਤ੍ਤਧਮ੍ਮਂ. ਅਸਞ੍ਚਾਲੇਤ੍ਵਾਤਿ ਆਸਨਤੋ ਅਵੁਟ੍ਠਾਪੇਤ੍ਵਾ. ਉਜੁਕਮੇਵ ਆਗਚ੍ਛਤਿ ਲੋਕਗ੍ਗਨਾਯਕੋ ਭਗਵਾ ਸਬ੍ਬਸਤ੍ਤੁਤ੍ਤਮੋ ਅਤ੍ਤਨੋ ਉਤ੍ਤਰਿਤਰਸ੍ਸ ਅਭਾਵਤੋ ਲੋਕਸ੍ਸ ਅਪਚਿਤਿਂ ਨ ਦਸ੍ਸੇਤਿ. ਯੇ ਸਬ੍ਬਸੋ ਸਂਕਿਲੇਸੇ ਪਜਹਨ੍ਤਿ, ਤੇਵ ਪਣ੍ਡਿਤੇ ‘‘ਸਨ੍ਤੋ’’ਤਿ ਦਸ੍ਸੇਤਿ ‘‘ਏਤੇ’’ਤਿਆਦਿਨਾ.

ਖੋਮਦੁਸ੍ਸਸੁਤ੍ਤਵਣ੍ਣਨਾ ਨਿਟ੍ਠਿਤਾ.