੨. ਦੁਤਿਯਵਗ੍ਗੋ

੧. ਸਨਙ੍ਕੁਮਾਰਸੁਤ੍ਤਵਣ੍ਣਨਾ

੧੮੨. ਪੋਰਾਣਕਤ੍ਤਾਤਿ ਨਿਬ੍ਬਤ੍ਤਿਤ੍ਵਾ ਚਿਰਕਾਲਤ੍ਤਾ. ਜਾਤਤ੍ਤਾ ਜਨੋ, ਤਂ ਇਤੋ ਜਨੇਤੋ, ਤਸ੍ਮਿਂ. ਖਤ੍ਤਿਯੋ ਸੇਟ੍ਠੋ ਲੋਕਮਰਿਯਾਦਪਰਿਪਾਲਨਾਦਿਨਾ ਸਮ੍ਮਾਪਟਿਪਤ੍ਤਿਯਂ ਸਤ੍ਤਾਨਂ ਨਿਯੋਜਨੇਨ ਬਹੁਕਾਰਤ੍ਤਾ. ਸੋ ਹਿ ਪਰੇ ਤਥਾ ਪਟਿਪਾਦੇਨ੍ਤੋ ਸਯਮ੍ਪਿ ਤਤ੍ਥ ਪਤਿਟ੍ਠਿਤੋਯੇਵ ਹੋਤੀਤਿ ਸੇਟ੍ਠੋ ਵੁਤ੍ਤੋ. ਪਟਿਪਕ੍ਖਵਿਜ੍ਝਨਟ੍ਠੇਨ ਪੁਬ੍ਬੇਨਿਵਾਸਾਦੀਨਂ ਵਿਦਿਤਕਰਣਟ੍ਠੇਨ ਵਿਜ੍ਜਾਤਿ. ਸਦ੍ਧਾਹਿਰੋਤ੍ਤਪ੍ਪਬਾਹੁਸਚ੍ਚਵੀਰਿਯਸਤਿਪਞ੍ਞਾਤਿ ਇਮੇ ਸਤ੍ਤ ਸਦ੍ਧਮ੍ਮਾ. ਚਰਨ੍ਤਿ ਅਗਤਪੁਬ੍ਬਂ ਦਿਸਂ ਏਤੇਹੀਤਿ ਚਰਣਾਨਿ, ਸੀਲਾਦਯੋ ਪਨ੍ਨਰਸ ਧਮ੍ਮਾ.

ਸਨਙ੍ਕੁਮਾਰਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੨. ਦੇਵਦਤ੍ਤਸੁਤ੍ਤਵਣ੍ਣਨਾ

੧੮੩. ਅਪ੍ਪਞ੍ਞਤ੍ਤੇ ਏਵ ਸਿਕ੍ਖਾਪਦੇ ਛੇਜ੍ਜਗਾਮਿਕਮ੍ਮਸ੍ਸ ਕਤਤ੍ਤਾ ਸਲਿਙ੍ਗੇਨੇਵ ਚ ਠਿਤਤ੍ਤਾ ‘‘ਦੇਵਦਤ੍ਤੋ ਸਾਸਨਤੋ ਪਕ੍ਕਨ੍ਤੋ’’ਤਿ ਨ ਵਤ੍ਤਬ੍ਬੋਤਿ ਅਚਿਰਪਕ੍ਕਨ੍ਤੇਤਿ ਏਤ੍ਥ ‘‘ਸਾਸਨਤੋ ਪਕ੍ਕਨ੍ਤੇ’’ਤਿ ਅਵਤ੍ਵਾ ‘‘ਵੇਲ਼ੁਵਨਤੋ ਗਯਾਸੀਸਂ ਗਤੇ’’ਤਿ ਵੁਤ੍ਤਂ. ਪਕਤਤ੍ਤੋ ਹਿ ਭਿਕ੍ਖੁਸਙ੍ਘਂ ਭਿਨ੍ਦੇਯ੍ਯ, ਨ ਅਪਕਤਤ੍ਤੋਤਿ. ਵਲ਼ਵਾਯਾਤਿ ਵਲ਼ਵਾਯ ਕੁਚ੍ਛਿਯਂ ਜਾਤਂ.

ਦੇਵਦਤ੍ਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੩. ਅਨ੍ਧਕਵਿਨ੍ਦਸੁਤ੍ਤਵਣ੍ਣਨਾ

੧੮੪. ਜਨਤਨ੍ਤਿ ਜਨਾਨਂ ਸਮੂਹਂ, ਜਨਸਞ੍ਚਰਣਟ੍ਠਾਨਨ੍ਤਿ ਅਤ੍ਥੋ. ਮਨੁਸ੍ਸਾਨਂ ਅਨੁਪਚਾਰੇਤਿ ਯਤ੍ਤਕੇ ਕਸਨਾਦਿਕਿਚ੍ਚਂ ਕਰੋਨ੍ਤਾਨਂ ਸਞ੍ਚਾਰੋ ਹੋਤਿ, ਏਤ੍ਤਕਂ ਅਤਿਕ੍ਕਮਿਤ੍ਵਾ ਅਨੁਪਚਾਰੇ. ਸਂਯੋਜਨਵਿਪ੍ਪਮੋਕ੍ਖਾਤਿ ਸਂਯੋਜਨਵਿਮੋਕ੍ਖਹੇਤੁ. ਵਿਵੇਕਰਤਿਂ ਪਵਿਵੇਕਸੁਖਜ੍ਝਾਨਂ ਅਲਭਨ੍ਤੋ. ਚਿਤ੍ਤਾਨੁਰਕ੍ਖਣਤ੍ਥਨ੍ਤਿ ਪੁਬ੍ਬੇ ਮਂ ਮਨੁਸ੍ਸਾ ‘‘ਅਰਞ੍ਞਵਾਸੇਨ ਪਵਿਵਿਤ੍ਤੋ ਅਸਂਸਟ੍ਠੋ ਆਰਦ੍ਧਵੀਰਿਯੋ’’ਤਿ ਮਞ੍ਞਿਂਸੁ, ਇਦਾਨਿ ਗਾਮਨ੍ਤੇ ਵਸਨ੍ਤਂ ਦਿਸ੍ਵਾ ਗਣਸਙ੍ਗਣਿਕਾਯ ਨਿਵੁਟ੍ਠੋਤਿ ਅਪ੍ਪਸਾਦਂ ਆਪਜ੍ਜਿਸ੍ਸਨ੍ਤਿ. ਯਦਿਪਿ ਮੇ ਇਧ ਅਭਿਰਤਿ ਨਤ੍ਥਿ, ਏਵਂ ਸਨ੍ਤੇਪਿ ਇਧੇਵ ਵਸਿਸ੍ਸਾਮੀਤਿ ਵਿਕ੍ਖਿਤ੍ਤਚਿਤ੍ਤੇਨ ਹੁਤ੍ਵਾ ਨ ਵਸਿਤਬ੍ਬਂ, ਕੋ ਅਤ੍ਥੋ ਚਿਤ੍ਤਵਸਂ ਗਨ੍ਤ੍ਵਾਤਿ ਅਧਿਪ੍ਪਾਯੋ. ਸਤਿਪਟ੍ਠਾਨਪਰਾਯਣੋਤਿ ਸਤਿਪਟ੍ਠਾਨਭਾਵਨਾਰਤੋ. ਏਵਂ ਹਿਸ੍ਸ ਗਣਵਾਸੋਪਿ ਪਾਸਂਸੋ ਵਿਵੇਕਵਾਸੇਨ ਵਿਨਾ ਸਮਣਕਿਚ੍ਚਸ੍ਸ ਅਸਿਜ੍ਝਨਤੋ.

ਵਟ੍ਟਭਯਤੋ ਪਮੁਤ੍ਤੋ ਅਜ੍ਝਾਸਯਵਸੇਨਾਤਿ ਅਧਿਪ੍ਪਾਯੋ.

ਨਿਸੀਦਿ ਤਤ੍ਥ ਭਿਕ੍ਖੂਤਿ ਇਮਿਨਾ ਸਤ੍ਤੂਪਲਦ੍ਧਿਯਾ ਅਨਿਸ੍ਸਿਤਤ੍ਤਾ ਯਥਾਰੁਚਿਯਾ ਤੇਸਂ ਨਿਸਜ੍ਜਂ ਦਸ੍ਸੇਤਿ. ਤੇਨਾਹ ‘‘ਇਮਿਨਾ’’ਤਿਆਦਿ.

ਇਮਿਨਾ ਚ ਇਮਿਨਾ ਚ ਆਕਾਰੇਨ ਜਾਤਨ੍ਤਿ ਨ ਅਨੁਸ੍ਸਵਦਸ੍ਸਨਮੇਤਂ, ਨ ਅਨੁਸ੍ਸਵਗ੍ਗਹਣਂ. ਤਕ੍ਕਹੇਤੁ ਨਯਹੇਤੁ ਵਾ ਨ ਵਦਾਮੀਤਿ ਯੋਜਨਾ. ਪਿਟਕਂ ਗਨ੍ਥੋ ਸਮ੍ਪਦੀਯਤਿ ਏਤਸ੍ਸਾਤਿ ਪਿਟਕਸਮ੍ਪਦਾਨਂ, ਗਨ੍ਥਸ੍ਸ ਉਗ੍ਗਣ੍ਹਨਤੋ ਤੇਨ ਪਿਟਕਸ੍ਸ ਉਗ੍ਗਣ੍ਹਨਕਭਾਵੇਨ, ਕੇਨਚਿ ਗਨ੍ਥਾਨੁਸਾਰੇਨ ਏਵਂ ਨ ਵਦਾਮੀਤਿ ਅਤ੍ਥੋ. ਬ੍ਰਹ੍ਮਸ੍ਸ ਸੇਟ੍ਠਸ੍ਸ ਧਮ੍ਮਸ੍ਸ ਚਰਿਯਂ ਵਾਚਸਿਕਂ ਪਵਤ੍ਤਤੀਤਿ ਬ੍ਰਹ੍ਮਚਰਿਯਂ, ਧਮ੍ਮਦੇਸਨਾ. ਭਾਵਿਤੇਨ ਮਰਣਸ੍ਸ ਸਬ੍ਬਸੋ ਭਾਗੇਨ ਵਿਪ੍ਪਹਾਨੇਨ ਮਰਣਪਰਿਚ੍ਚਾਗੀਨਂ. ਤੇ ਚ ਖੀਣਜਾਤਿਕਾਤਿ ਆਹ ‘‘ਖੀਣਾਸਵਾਨ’’ਨ੍ਤਿ.

ਦਸਧਾ ਦਸਾਤਿ ਦਸਕ੍ਖਤ੍ਤੁਂ ਦਸ. ਅਞ੍ਞਨ੍ਤਿ ਪਞ੍ਚਸਤਾਧਿਕਸਹਸ੍ਸਤੋ ਅਞ੍ਞਂ. ਪੁਞ੍ਞਭਾਗਿਨੋਤਿ ਵਿਵਟ੍ਟਨਿਸ੍ਸਿਤਪੁਞ੍ਞਸ੍ਸ ਭਾਗਿਨੋ ਤਸ੍ਸਾ ਦੇਸਨਾਯ ਏਤ੍ਤਕਾ ਸਤ੍ਤਾ ਜਾਤਾਤਿ ਗਣੇਤੁਂ ਅਹਂ ਨ ਸਕ੍ਕੋਮੀਤਿ ਦਸ੍ਸੇਤਿ. ਬ੍ਰਹ੍ਮਧਮ੍ਮਦੇਸਨਨ੍ਤਿ ਬ੍ਰਹ੍ਮੁਨਾ ਵੁਤ੍ਤਂ ਆਹ.

ਅਨ੍ਧਕਵਿਨ੍ਦਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੪. ਅਰੁਣਵਤੀਸੁਤ੍ਤਵਣ੍ਣਨਾ

੧੮੫. ਅਭਿਭੂ ਸਮ੍ਭਵੋਤਿ ਤੇਸਂ ਦ੍ਵਿਨ੍ਨਂ ਮਹਾਥੇਰਾਨਂ ਨਾਮਾਨਿ. ਤੇਸਂ ਵਿਭਾਗਂ ਦਸ੍ਸੇਤੁਂ ‘‘ਤੇਸੂ’’ਤਿਆਦਿ ਵੁਤ੍ਤਂ. ਏਤੇ ਦ੍ਵੇ ਤਸ੍ਸ ਭਗਵਤੋ ਅਗ੍ਗਸਾਵਕਾਤਿ ਦਸ੍ਸੇਤਿ. ਅਵਜ੍ਝਾਯਨ੍ਤੀਤਿ ਹੇਟ੍ਠਾ ਕਤ੍ਵਾ ਚਿਨ੍ਤੇਨ੍ਤਿ. ਖਿਯ੍ਯਨ੍ਤਿ ਤਂ ਲਾਮਕਤੋ ਚਿਨ੍ਤੇਤਬ੍ਬਤਂ ਪਾਪੇਨ੍ਤਿ ਪਾਪਕਤਂ ਕਰੋਨ੍ਤਿ. ਵਿਤ੍ਥਾਰਯਨ੍ਤਾਤਿ ਤਮੇਵ ਲਾਮਕਤੋ ਚਿਨ੍ਤੇਤਬ੍ਬਤਂ ਵੇਪੁਲ੍ਲਂ ਪਾਪੇਨ੍ਤਾ. ਸਬ੍ਬੇ ਪਾਸਣ੍ਡਾ ਅਤ੍ਤਨੋ ਅਤ੍ਤਨੋ ਸਮਯੇ ਸਿਦ੍ਧਨ੍ਤੇ ਸਬ੍ਬੇ ਦੇਵਮਨੁਸ੍ਸਾ ਅਤ੍ਤਨੋ ਅਤ੍ਤਨੋ ਸਮਯੇ ਪਟਿਲਾਭੇ ਪਟਿਲਦ੍ਧਅਤ੍ਥੇ ਪੁਰਿਸਕਾਰਂ ਵਣ੍ਣਯਨ੍ਤੀਤਿ ਯੋਜਨਾ.

ਆਰਮ੍ਭਵੀਰਿਯਨ੍ਤਿ ਮਚ੍ਚੁਸੇਨਾਸਙ੍ਖਾਤਕਿਲੇਸਧੁਨਨੇ ਆਰਮ੍ਭਵੀਰਿਯਂ, ਯਾ ‘‘ਆਰਮ੍ਭਧਾਤੂ’’ਤਿ ਵੁਚ੍ਚਤਿ. ਨਿਕ੍ਕਮਵੀਰਿਯਨ੍ਤਿ ਕੋਸਜ੍ਜਪਟਿਪਕ੍ਖਭੂਤਂ ਵੀਰਿਯਂ, ਯਾ ‘‘ਨਿਕ੍ਕਮਧਾਤੂ’’ਤਿ ਵੁਚ੍ਚਤਿ. ਪਯੋਗਂ ਕਰੋਥਾਤਿ ਪਰਂ ਪਰਂ ਠਾਨਂ ਅਕ੍ਕਮਨਤੋ ਤਤੋਪਿ ਬਲਵਤਰਂ ਭਾਵਨਾਭਿਯੋਗਂ ਪਵਤ੍ਤੇਥਾਤਿ ਅਤ੍ਥੋ. ਤੇਨਾਹ ‘‘ਪਰਕ੍ਕਮਥਾ’’ਤਿ. ਕਿਲੇਸਸੇਨਾ ਨਾਮ ਰਾਗਾਦਿਕਿਲੇਸਸਮੂਹੋ, ਸੋ ਮਰਣਪਚ੍ਚਯਭਾਵਤੋ ‘‘ਮਚ੍ਚੁਨੋ ਸੇਨਾ’’ਤਿ ਵੁਚ੍ਚਤਿ. ਤਞ੍ਹਿ ਸਨ੍ਧਾਯ ਵੁਤ੍ਤਂ ‘‘ਮਹਾਸੇਨੇਨ ਮਚ੍ਚੁਨਾ’’ਤਿ (ਮ. ਨਿ. ੩.੨੭੨, ੨੭੫, ੨੭੬). ਖਨ੍ਧਾਨਂ ਪਠਮਾਭਿਨਿਬ੍ਬਤ੍ਤਿ ਜਾਤਿ, ਤਦਞ੍ਞਂ ਪਨ ਤੇਸਂ ਪਟਿਪਾਟਿ ਪਵਤ੍ਤਂ ਸਂਸਾਰੋਤਿ ਅਧਿਪ੍ਪਾਯੇਨਾਹ ‘‘ਜਾਤਿਞ੍ਚ ਸਂਸਾਰਞ੍ਚਾ’’ਤਿ. ਯਸ੍ਮਾ ‘‘ਏਕਮ੍ਪਿ ਜਾਤਿਂ ਦ੍ਵੇਪਿ ਜਾਤਿਯੋ’’ਤਿਆਦੀਸੁ ਤਸ੍ਮਿਂ ਤਸ੍ਮਿਂ ਭਵੇ ਆਦਾਨਨਿਕ੍ਖੇਪਪਰਿਚ੍ਛਿਨ੍ਨਖਨ੍ਧਪ੍ਪਵਤ੍ਤਿ ‘‘ਜਾਤੀ’’ਤਿ ਵੁਚ੍ਚਤਿ, ਸਾ ਏਵ ਯਾਵ ਪਰਿਨਿਬ੍ਬਾਨਾ ਅਪਰਾਪਰਂ ਪਵਤ੍ਤਮਾਨੋ ਸਂਸਾਰੋ ‘‘ਇਤੋ ਚਿਤੋ ਸਂਸਰਣ’’ਨ੍ਤਿ ਕਤ੍ਵਾ, ਤਸ੍ਮਾ ਆਹ ‘‘ਜਾਤਿਸਙ੍ਖਾਤਂ ਵਾ ਸਂਸਾਰ’’ਨ੍ਤਿ. ਪਰਿਚ੍ਛੇਦਨ੍ਤਿ ਪਰਿਯੋਸਾਨਂ. ਓਭਾਸਂ ਫਰੀਤਿ ਸਮ੍ਬਨ੍ਧੋ. ਆਲੋਕਟ੍ਠਾਨੇਤਿ ਅਤ੍ਤਨਾ ਕਤਆਲੋਕਟ੍ਠਾਨੇ. ਆਲੋਕਕਿਚ੍ਚਂ ਨਤ੍ਥੀਤਿ ਅਨ੍ਧਕਾਰਟ੍ਠਾਨੇ ਆਲੋਕਦਸ੍ਸਨਂ ਵਿਯ ਆਲੋਕਟ੍ਠਾਨੇ ਆਲੋਕਦਸ੍ਸਨਕਿਚ੍ਚਂ ਨਤ੍ਥਿ. ਤਸ੍ਮਾ ਤੇਸਂ ਸਤ੍ਤਾਨਂ ‘‘ਕਿਂ ਆਲੋਕੋ ਅਯਂ, ਕਸ੍ਸ ਨੁ ਖੋ ਅਯਂ ਆਲੋਕੋ’’ਤਿ? ਵਿਚਿਨਨ੍ਤਾਨਂ ਚਿਨ੍ਤੇਨ੍ਤਾਨਂ. ਸਬ੍ਬੇਤਿ ਸਹਸ੍ਸਿਲੋਕਧਾਤੁਯਂ ਸਬ੍ਬੇ ਦੇਵਮਨੁਸ੍ਸਾ. ਓਸਟਾਯ ਪਰਿਸਾਯਾਤਿ ਧਮ੍ਮਸ੍ਸਵਨਤ੍ਥਂ ਸਬ੍ਬੋਸਟਾਯ ਪਰਿਚਿਤਪਰਿਚ੍ਛਿਨ੍ਨਾਯ ਪਰਿਸਾਯ. ਸਦ੍ਦਂ ਸੁਣਿਂਸੂਤਿ ਨ ਕੇਵਲਂ ਸਦ੍ਦਮੇਵ ਸੁਣਿਂਸੁ, ਅਥ ਖੋ ਅਤ੍ਥੋਪੀਤਿ ਯਥਾਧਿਪ੍ਪੇਤੋ ਤੇਸਂ ਪਕਤਿਸਵਨੁਪਚਾਰੇ ਵਿਯ ਪਾਕਟੋ ਅਹੋਸਿ, ਤਿਸਹਸ੍ਸਿਲੋਕਧਾਤੁਂ ਵਿਞ੍ਞਾਪੇਸੀਤਿ.

ਅਰੁਣਵਤੀਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੫. ਪਰਿਨਿਬ੍ਬਾਨਸੁਤ੍ਤਵਣ੍ਣਨਾ

੧੮੬. ਏਵਂ ਤਂ ਕੁਸਿਨਾਰਾਯ ਹੋਤੀਤਿ ਯਥਾ ਅਨੁਰੋਧਪੁਰਸ੍ਸ ਥੂਪਾਰਾਮੋ ਦਕ੍ਖਿਣਪਚ੍ਛਿਮਦਿਸਾਯਂ, ਏਵਂ ਤਂ ਉਯ੍ਯਾਨਂ ਕੁਸਿਨਾਰਾਯ ਦਕ੍ਖਿਣਪਚ੍ਛਿਮਦਿਸਾਯਂ ਹੋਤਿ. ਤਸ੍ਮਾਤਿ ਯਸ੍ਮਾ ਨਗਰਂ ਪਵਿਸਿਤੁਕਾਮਾ ਉਯ੍ਯਾਨਤੋ ਉਪੇਚ੍ਚ ਵਤ੍ਤਨ੍ਤਿ ਗਚ੍ਛਨ੍ਤਿ ਏਤੇਨਾਤਿ ਉਪਵਤ੍ਤਨਨ੍ਤਿ ਵੁਚ੍ਚਤਿ, ਤਸ੍ਮਾ. ਤਨ੍ਤਿ ਸਾਲਪਨ੍ਤਿਭਾਵੇਨ ਠਿਤਂ ਸਾਲਵਨਂ. ਅਨ੍ਤਰੇਨਾਤਿ ਵੇਮਜ੍ਝੇ. ਅਪ੍ਪਮਜ੍ਜਨਂ ਅਪ੍ਪਮਾਦੋ, ਸੋ ਪਨ ਅਤ੍ਥਤੋ ਞਾਣੂਪਸਂਹਿਤਾ ਸਤਿ. ਯਸ੍ਮਾ ਤਤ੍ਥ ਸਤਿਯਾ ਬ੍ਯਾਪਾਰੋ ਸਾਤਿਸਯੋ, ਤਸ੍ਮਾ ‘‘ਸਤਿਅਵਿਪ੍ਪਵਾਸੇਨਾ’’ਤਿ ਵੁਤ੍ਤਂ. ਅਪ੍ਪਮਾਦਪਦੇਯੇਵ ਪਕ੍ਖਿਪਿਤ੍ਵਾ ਅਭਾਸਿ ਅਤ੍ਥਤੋ ਤਸ੍ਸ ਸਕਲਸ੍ਸ ਬੁਦ੍ਧਵਚਨਸ੍ਸ ਸਙ੍ਗਣ੍ਹਨਤੋ.

ਝਾਨਾਦੀਸੁ ਚਿਤ੍ਤੇ ਚ ਪਰਮੁਕ੍ਕਂਸਗਤਵਸੀਭਾਵਤਾਯ ‘‘ਏਤ੍ਤਕੇ ਕਾਲੇ ਏਤ੍ਤਕਾ ਸਮਾਪਤ੍ਤਿਯੋ ਸਮਾਪਜ੍ਜਿਤ੍ਵਾ ਪਰਿਨਿਬ੍ਬਾਯਿਸ੍ਸਾਮੀ’’ਤਿ ਕਾਲਪਰਿਚ੍ਛੇਦਂ ਕਤ੍ਵਾ ਸਮਾਪਤ੍ਤਿਸਮਾਪਜ੍ਜਨਂ ਪਰਿਨਿਬ੍ਬਾਨਪਰਿਕਮ੍ਮਨ੍ਤਿ ਅਧਿਪ੍ਪੇਤਂ. ਥੇਰੋਤਿ ਅਨੁਰੁਦ੍ਧਤ੍ਥੇਰੋ.

ਅਯਮ੍ਪਿ ਚਾਤਿ ਯਥਾਵੁਤ੍ਤਪਞ੍ਚਸਟ੍ਠਿਯਾ ਝਾਨਾਨਂ ਸਮਾਪਨ੍ਨਕਥਾਪਿ ਸਙ੍ਖੇਪਕਥਾ ਏਵ. ਕਸ੍ਮਾ? ਯਸ੍ਮਾ ਭਗਵਾ ਤਦਾ ਦੇਵਸਿਕਂ ਵਲ਼ਞ੍ਜਨਸਮਾਪਤ੍ਤਿਯੋ ਸਬ੍ਬਾਪਿ ਅਪਰਿਹਾਪੇਤ੍ਵਾ ਸਮਾਪਜ੍ਜਿ ਏਵਾਤਿ ਦਸ੍ਸੇਨ੍ਤੋ ‘‘ਨਿਬ੍ਬਾਨਪੁਰਂ ਪਵਿਸਨ੍ਤੋ’’ਤਿਆਦਿਮਾਹ. ਚਤੁਵੀਸਤਿ…ਪੇ… ਪਵਿਸਿਤ੍ਵਾਤਿ ਏਤ੍ਥ ਕੇਚਿ ਤਾਵ ਆਹੁ ‘‘ਭਗਵਾ ਦੇਵਸਿਕਂ ਦ੍ਵਾਦਸਕੋਟਿਸਤਸਹਸ੍ਸਕ੍ਖਤ੍ਤੁਂ ਮਹਾਕਰੁਣਾਸਮਾਪਤ੍ਤਿਂ ਸਮਾਪਜ੍ਜਤਿ, ਦ੍ਵਾਦਸਕੋਟਿਸਤਸਹਸ੍ਸਕ੍ਖਤ੍ਤੁਮੇਵ ਫਲਸਮਾਪਤ੍ਤਿਂ ਸਮਾਪਜ੍ਜਤਿ, ਤਸ੍ਮਾ ਤਦਾਪਿ ਚਤੁਵੀਸਤਿਕੋਟਿਸਤਸਹਸ੍ਸਸਙ੍ਖਾ ਸਮਾਪਤ੍ਤਿਯੋ ਸਮਾਪਜ੍ਜਤਿ. ਵੁਤ੍ਤਞ੍ਹੇਤਂ ਭਗਵਤਾ ‘ਤਥਾਗਤਂ, ਭਿਕ੍ਖਵੇ, ਅਰਹਨ੍ਤਂ ਸਮ੍ਮਾਸਮ੍ਬੁਦ੍ਧਂ ਦ੍ਵੇ ਵਿਤਕ੍ਕਾ ਬਹੁਲਂ ਸਮੁਦਾਚਰਨ੍ਤਿ ਖੇਮੋ ਚ ਵਿਤਕ੍ਕੋ ਪਵਿਵੇਕੋ ਚ ਵਿਤਕ੍ਕੋ’ਤਿ (ਇਤਿਵੁ. ੩੮). ਖੇਮੋ ਹਿ ਵਿਤਕ੍ਕੋ ਭਗਵਤੋ ਮਹਾਕਰੁਣਾਸਮਾਪਤ੍ਤਿਂ ਪੂਰੇਤ੍ਵਾ ਠਿਤੋ, ਪਵਿਵੇਕਵਿਤਕ੍ਕੋ ਅਰਹਤ੍ਤਫਲਸਮਾਪਤ੍ਤਿਂ. ਬੁਦ੍ਧਾਨਂ ਹਿ ਭਵਙ੍ਗਪਰਿਵਾਸੋ ਲਹੁਕੋ ਮਤ੍ਥਕਪ੍ਪਤ੍ਤੋ ਸਮਾਪਤ੍ਤੀਸੁ ਵਸੀਭਾਵੋ, ਤਸ੍ਮਾ ਸਮਾਪਜ੍ਜਨਵੁਟ੍ਠਾਨਾਨਿ ਕਤਿਪਯਚਿਤ੍ਤਕ੍ਖਣੇਹੇਵ ਇਜ੍ਝਨ੍ਤਿ. ਪਞ੍ਚ ਰੂਪਾਵਚਰਸਮਾਪਤ੍ਤਿਯੋ ਚਤਸ੍ਸੋ ਅਰੂਪਸਮਾਪਤ੍ਤਿਯੋ ਅਪ੍ਪਮਞ੍ਞਾਸਮਾਪਤ੍ਤਿਯਾ ਸਦ੍ਧਿਂ ਨਿਰੋਧਸਮਾਪਤ੍ਤਿ ਅਰਹਤ੍ਤਫਲਸਮਾਪਤ੍ਤਿ ਚਾਤਿ ਦ੍ਵਾਦਸੇਤਾ ਸਮਾਪਤ੍ਤਿਯੋ ਭਗਵਾ ਪਚ੍ਚੇਕਂ ਦਿਵਸੇ ਦਿਵਸੇ ਕੋਟਿਸਤਸਹਸ੍ਸਕ੍ਖਤ੍ਤੁਂ ਪੁਰੇਭਤ੍ਤਂ ਸਮਾਪਜ੍ਜਤਿ, ਤਥਾ ਪਚ੍ਛਾਭਤ੍ਤਨ੍ਤਿ ਏਵਂ ਚਤੁਵੀਸਤਿਕੋਟਿਸਤਸਹਸ੍ਸਸਙ੍ਖਾ ਦੇਵਸਿਕਂ ਵਲ਼ਞ੍ਜਨਕਕਸਿਣਸਮਾਪਤ੍ਤਿਯੋ’’ਤਿ.

ਅਪਰੇ ਪਨਾਹੁ ‘‘ਯਂ ਤਂ ਭਗਵਤਾ ਅਭਿਸਮ੍ਬੋਧਿਦਿਵਸੇ ਪਚ੍ਛਿਮਯਾਮੇ ਪਟਿਚ੍ਚਸਮੁਪ੍ਪਾਦਙ੍ਗਮੁਖੇਨ ਪਟਿਲੋਮਨਯੇਨ ਜਰਾਮਰਣਤੋ ਪਟ੍ਠਾਯ ਞਾਣਂ ਓਤਾਰੇਤ੍ਵਾ ਅਨੁਪਦਧਮ੍ਮਵਿਪਸ੍ਸਨਂ ਆਰਭਨ੍ਤੇਨ ਯਥਾ ਨਾਮ ਪੁਰਿਸੋ ਸੁਵਿਦੁਗ੍ਗਂ ਮਹਾਗਹਨਂ ਮਹਾਵਨਂ ਛਿਨ੍ਦਨ੍ਤੋ ਅਨ੍ਤਰਨ੍ਤਰਾ ਨਿਸਾਨਸਿਲਾਯਂ ਫਰਸੁਂ ਨਿਸਿਤਂ ਕਰੋਤਿ, ਏਵਮੇਵਂ ਨਿਸਾਨਸਿਲਾਸਦਿਸਿਯੋ ਸਮਾਪਤ੍ਤਿਯੋ ਅਨ੍ਤਰਨ੍ਤਰਾ ਸਮਾਪਜ੍ਜਿਤ੍ਵਾ ਞਾਣਸ੍ਸ ਤਿਕ੍ਖਵਿਸਦਭਾਵਂ ਸਮ੍ਪਾਦੇਤੁਂ ਅਨੁਲੋਮਪਟਿਲੋਮਤੋ ਪਚ੍ਚੇਕਂ ਪਟਿਚ੍ਚਸਮੁਪ੍ਪਾਦਙ੍ਗੇਸੁ ਲਕ੍ਖਕੋਟਿਸਮਾਪਤ੍ਤਿਸਮਾਪਜ੍ਜਨਵਸੇਨ ਸਮ੍ਮਸਨਞਾਣਂ ਪਵਤ੍ਤੇਤਿ, ਤਦਨੁਸਾਰੇਨ ਭਗਵਾ ਬੁਦ੍ਧਭੂਤੋਪਿ ਅਨੁਲੋਮਪਟਿਲੋਮਤੋ ਪਟਿਚ੍ਚਸਮੁਪ੍ਪਾਦਙ੍ਗਮੁਖੇਨ ਵਿਪਸ੍ਸਨਾਵਸੇਨ ਦਿਵਸੇ ਦਿਵਸੇ ਲਕ੍ਖਕੋਟਿਫਲਸਮਾਪਤ੍ਤਿਯੋ ਸਮਾਪਜ੍ਜਤਿ, ਤਂ ਸਨ੍ਧਾਯ ਵੁਤ੍ਤਂ, ‘ਚਤੁਵੀਸਤਿਕੋਟਿਸਤਸਹਸ੍ਸਸਙ੍ਖਾ ਸਮਾਪਤ੍ਤਿਯੋ ਪਵਿਸਿਤ੍ਵਾ’’’ਤਿ.

ਇਮਾਨਿ ਦ੍ਵੇਪਿ ਸਮਨਨ੍ਤਰਾਨੇਵ ਪਚ੍ਚਵੇਕ੍ਖਣਾਯਪਿ ਯੇਭੁਯ੍ਯੇਨ ਨਾਨਨ੍ਤਰਿਯਕਤਾਯ ਝਾਨਪਕ੍ਖਿਕਭਾਵਤੋ. ਯਸ੍ਮਾ ਸਬ੍ਬਪਚ੍ਛਿਮਂ ਭਵਙ੍ਗਚਿਤ੍ਤਂ ਤਤੋ ਤਤੋ ਚਵਨਤੋ ‘‘ਚੁਤੀ’’ਤਿ ਵੁਚ੍ਚਤਿ, ਤਸ੍ਮਾ ਨ ਕੇਵਲਂ ਅਯਮੇਵ ਭਗਵਾ, ਅਥ ਖੋ ਸਬ੍ਬੇਪਿ ਸਤ੍ਤਾ ਭਵਙ੍ਗਚਿਤ੍ਤੇਨੇਵ ਚਵਨ੍ਤੀਤਿ ਦਸ੍ਸੇਤੁਂ ‘‘ਯੇ ਹਿ ਕੇਚੀ’’ਤਿਆਦਿ ਵੁਤ੍ਤਂ. ਦੁਕ੍ਖਸਚ੍ਚੇਨਾਤਿ ਦੁਕ੍ਖਸਚ੍ਚਪਰਿਯਾਪਨ੍ਨੇਨ ਚੁਤਿਚਿਤ੍ਤੇਨ ਕਾਲਂ ਕਾਲਕਿਰਿਯਂ ਕਰੋਨ੍ਤਿ ਪਾਪੁਣਨ੍ਤਿ, ਕਾਲਗਮਨਤੋ ਵਾ ਕਰੋਨ੍ਤਿ ਪੇਚ੍ਚਾਤਿ.

ਪਟਿਭਾਗਪੁਗ੍ਗਲਵਿਰਹਿਤੋ ਸੀਲਾਦਿਗੁਣੇਹਿ ਅਸਦਿਸਤਾਯ ਸਦਿਸਪੁਗ੍ਗਲਰਹਿਤੋ. ਸਙ੍ਖਾਰਾ ਵੂਪਸਮ੍ਮਨ੍ਤਿ ਏਤ੍ਥਾਤਿ ਵੂਪਸਮੋਤਿ ਏਵਂ ਸਙ੍ਖਾਤਂ ਞਾਤਂ ਕਥਿਤਂ ਨਿਬ੍ਬਾਨਮੇਵ ਸੁਖਨ੍ਤਿ. ਲੋਮਹਂਸਨਕੋਤਿ ਲੋਮਾਨਂ ਹਟ੍ਠਭਾਵਾਪਾਦਨੋ. ਭਿਂਸਨਕੋਤਿ ਅਵੀਤਰਾਗਾਨਂ ਭਯਜਨਕੋ ਆਸਿ ਅਹੋਸਿ. ਸਬ੍ਬਾਕਾਰਵਰਗੁਣੂਪੇਤੇਤਿ ਸਬ੍ਬੇਹਿ ਆਕਾਰਵਰੇਹਿ ਉਤ੍ਤਮਕਾਰਣੇਹਿ ਸੀਲਾਦਿਗੁਣੇਹਿ ਸਮਨ੍ਨਾਗਤੇ. ਅਸਙ੍ਕੁਟਿਤੇਨਾਤਿ ਅਕੁਟਿਤੇਨ ਵਿਪ੍ਫਾਰਿਕਾਭਾਵਤੋ. ਸੁਵਿਕਸਿਤੇਨੇਵਾਤਿ ਪੀਤਿਸੋਮਨਸ੍ਸਯੋਗਤੋ ਸੁਟ੍ਠੁ ਵਿਕਸਿਤੇਨ. ਵੇਦਨਂ ਅਧਿਵਾਸੇਸਿ ਸਭਾਵਸਮੁਦਯਾਦਿਤੋ ਸੁਟ੍ਠੁ ਪਞ੍ਞਾਤਤ੍ਤਾ. ਅਨਾਵਰਣਵਿਮੋਕ੍ਖੋ ਸਬ੍ਬਸੋ ਨਿਬ੍ਬਿਦਭਾਵੋ. ਤੇਨਾਹ ‘‘ਅਪਞ੍ਞਤ੍ਤਿਭਾਵੂਪਗਮੋ’’ਤਿ. ਪਜ੍ਜੋਤਨਿਬ੍ਬਾਨਸਦਿਸੋਤਿ ਪਦੀਪਸ੍ਸ ਨਿਬ੍ਬਾਨਸਦਿਸੋ ਤਤ੍ਥ ਵਿਲੀਯਿਤ੍ਵਾ ਅਵਟ੍ਠਾਨਾਭਾਵਤੋ.

ਪਰਿਨਿਬ੍ਬਾਨਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਦੁਤਿਯਵਗ੍ਗਵਣ੍ਣਨਾ ਨਿਟ੍ਠਿਤਾ.

ਸਾਰਤ੍ਥਪ੍ਪਕਾਸਿਨਿਯਾ ਸਂਯੁਤ੍ਤਨਿਕਾਯ-ਅਟ੍ਠਕਥਾਯ

ਬ੍ਰਹ੍ਮਸਂਯੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.