੪. ਬਕਬ੍ਰਹ੍ਮਸੁਤ੍ਤਵਣ੍ਣਨਾ

੧੭੫. ‘‘ਸਸ੍ਸਤੋ ਅਤ੍ਤਾ ਚ ਲੋਕੋ ਚਾ’’ਤਿ ਏਵਂ ਪਵਤ੍ਤਾ ਦਿਟ੍ਠਿ ਸਸ੍ਸਤਦਿਟ੍ਠਿ. ਸਹ ਕਾਯੇਨਾਤਿ ਸਹ ਤੇਨ ਬ੍ਰਹ੍ਮਤ੍ਤਭਾਵੇਨ. ਬ੍ਰਹ੍ਮਟ੍ਠਾਨਨ੍ਤਿ ਅਤ੍ਤਨੋ ਬ੍ਰਹ੍ਮਵਤ੍ਥੁਂ. ਅਨਿਚ੍ਚਂ ‘‘ਨਿਚ੍ਚ’’ਨ੍ਤਿ ਵਦਤਿ ਅਨਿਚ੍ਚਤਾਯ ਅਤ੍ਤਨੋ ਅਪਞ੍ਞਾਯਮਾਨਤ੍ਤਾ. ਥਿਰਨ੍ਤਿ ਦਲ਼੍ਹਂ, ਵਿਨਾਸਾਭਾਵਤੋ ਸਾਰਭੂਤਨ੍ਤਿ ਅਤ੍ਥੋ. ਉਪ੍ਪਾਦਵਿਪਰਿਣਾਮਾਭਾਵਤੋ ਸਦਾ ਵਿਜ੍ਜਮਾਨਂ. ਕੇਵਲਨ੍ਤਿ ਪਰਿਪੁਣ੍ਣਂ. ਤੇਨਾਹ ‘‘ਅਖਣ੍ਡ’’ਨ੍ਤਿ. ਕੇਵਲਨ੍ਤਿ ਵਾ ਜਾਤਿਆਦੀਹਿ ਅਸਮ੍ਮਿਸ੍ਸਂ, ਵਿਰਹਿਤਨ੍ਤਿ ਅਧਿਪ੍ਪਾਯੋ. ਉਪ੍ਪਾਦਾਦੀਨਂ ਅਭਾਵਤੋ ਏਵ ਅਚਵਨਧਮ੍ਮਂ. ਕੋਚਿ ਜਾਯਨਕੋ…ਪੇ… ਉਪਪਜ੍ਜਨਕੋ ਵਾ ਨਤ੍ਥਿ ਨਿਚ੍ਚਭਾਵਤੋ ਠਾਨੇਨ ਸਦ੍ਧਿਂ ਤਨ੍ਨਿਵਾਸੀਨਂ. ਨਿਚ੍ਚਭਾਵਞ੍ਹਿ ਸੋ ਪਟਿਜਾਨਾਤਿ. ਤਿਸ੍ਸੋ ਝਾਨਭੂਮਿਯੋਤਿ ਦੁਤਿਯਤਤਿਯਚਤੁਤ੍ਥਜ੍ਝਾਨਭੂਮਿਯੋ. ਚਤੁਤ੍ਥਜ੍ਝਾਨਭੂਮਿਵਿਸੇਸਾ ਹਿ ਅਸਞ੍ਞਸੁਦ੍ਧਾਵਾਸਾਰੁਪ੍ਪਭਵਾ. ਨਿਬ੍ਬਾਨਨ੍ਤਿ ਵਾ ਏਤ੍ਥ ਇਤਿ-ਸਦ੍ਦੋ ਆਦਿਅਤ੍ਥੋ, ਨ ਪਰਿਸਮਾਪਨਤ੍ਥੋ, ਤਸ੍ਮਾ ‘‘ਸਬ੍ਬ’’ਨ੍ਤਿ ਇਮਿਨਾ ‘‘ਅਸਞ੍ਞ…ਪੇ… ਭਵਾ’’ਤਿ ਵੁਤ੍ਤਂ ਸਙ੍ਗਣ੍ਹਾਤਿ. ਪਟਿਬਾਹਤੀਤਿ ਸਨ੍ਤਂਯੇਵ ਸਮਾਨਂ ਅਜਾਨਨ੍ਤੋਵ ‘‘ਨਤ੍ਥੀ’’ਤਿ ਪਟਿਕ੍ਖਿਪਤਿ. ਏਕੇ ਉਤ੍ਤਰਵਿਹਾਰਵਾਸਿਨੋ.

ਹੇਟ੍ਠੂਪਪਤ੍ਤਿਕੋਤਿ ਹੇਟ੍ਠਾ ਭੂਮੀਸੁ ਉਪ੍ਪਨ੍ਨਉਪਪਤ੍ਤਿਕੋ. ਇਦਾਨਿ ਤਮਤ੍ਥਂ ਵਿਵਰਿਤੁਂ ‘‘ਅਨੁਪ੍ਪਨ੍ਨੇ’’ਤਿਆਦਿ ਵੁਤ੍ਤਂ. ਹੇਟ੍ਠੁਪਪਤ੍ਤਿਕਂ ਕਤ੍ਵਾਤਿ ਯਥਾਠਿਤਭੂਮਿਤੋ ਹੇਟ੍ਠਾ ਤਤਿਯਜ੍ਝਾਨਭੂਮਿਯਂ ਉਪਪਤ੍ਤਿਝਾਨਂ ਕਤ੍ਵਾ, ਨ ਉਪਰਿਝਾਨਸ੍ਸ ਵਿਯ ਪਤ੍ਥਨਾਮਤ੍ਤਨ੍ਤਿ ਅਧਿਪ੍ਪਾਯੋ. ਪਠਮਕਾਲੇਤਿ ਤਸ੍ਮਿਂ ਭਵੇ ਪਠਮਕਾਲੇ. ਅਞ੍ਞਾਸਿ ਆਸਨ੍ਨਭਾਵਤੋ. ਉਭਯਨ੍ਤਿ ਤਂ ਤਂ ਅਤ੍ਤਨਾ ਕਤਕਮ੍ਮਞ੍ਚੇਵ ਨਿਬ੍ਬਤ੍ਤਟ੍ਠਾਨਞ੍ਚਾਤਿ ਉਭਯਂ. ਪਮੁਸ੍ਸਿਤ੍ਵਾ ਨਿਬ੍ਬਤ੍ਤਿਂ ਅਨੁਪਧਾਰੇਨ੍ਤੋ.

ਅਵਿਜ੍ਜਾਯ ਗਤੋਤਿ ਅਵਿਜ੍ਜਾਯ ਸਹ ਪਵਤ੍ਤੋ. ਸਹਯੋਗੇ ਹਿ ਇਦਂ ਕਰਣਵਚਨਂ. ਤੇਨਾਹ ‘‘ਸਮਨ੍ਨਾਗਤੋ’’ਤਿ. ਅਞ੍ਞਾਣੀਤਿ ਅਵਿਦ੍ਵਾ. ਪਞ੍ਞਾਚਕ੍ਖੁਵਿਰਹਤੋ ਅਨ੍ਧੀਭੂਤੋ, ਅਨ੍ਧਭਾਵਂ ਆਪਨ੍ਨੋਤਿ ਅਤ੍ਥੋ. ਅਨਾਗਤੇ ਸਦ੍ਦੋ ਹੋਤਾਯਂ ‘‘ਵਕ੍ਖਤੀ’’ਤਿ ਯਤ੍ਰਸਦ੍ਦਪਯੋਗੇਨ, ਅਤ੍ਥੋ ਪਨ ਵਤ੍ਤਮਾਨਕਾਲਿਕੋ. ਤੇਨਾਹ ‘‘ਭਣਤੀ’’ਤਿ. ਤੇਨਾਹ ‘‘ਯਤ੍ਰਾ’’ਤਿਆਦਿ.

ਮਗ੍ਗਚੋਰੋਤਿ ਮਗ੍ਗਪਰਿਬੁਨ੍ਧਕਚੋਰੋ. ਸਨ੍ਤਜ੍ਜਿਯਮਾਨੋਤਿ ‘‘ਅਵਿਜ੍ਜਾਗਤੋ ਵਤ, ਭੋ, ਬਕੋ ਬ੍ਰਹ੍ਮਾ’’ਤਿਆਦਿਨਾ ਸਨ੍ਤਜ੍ਜਿਯਮਾਨੋ. ਸਤਿਂ ਲਭਿਤ੍ਵਾਤਿ ਤੇਨੇਵ ਸਨ੍ਤਜ੍ਜਨੇਨ ਯੋਨਿਸੋ ਉਮ੍ਮੁਜ੍ਜਿਤ੍ਵਾ ਪੁਰਿਮਜਾਤਿਵਿਸਯਂ ਸਤਿਂ ਲਭਿਤ੍ਵਾ. ਨਿਪ੍ਪੀਲ਼ਿਤੁਕਾਮੋਤਿ ਘਂਸੇਤੁਕਾਮੋ ਦੋਸਂ ਦਸ੍ਸੇਤੁਕਾਮੋ ‘‘ਇਦਂ ਪਸ੍ਸ ਯਾਵਞ੍ਚ ਤੇ ਅਪਰਦ੍ਧ’’ਨ੍ਤਿ. ਪੁਞ੍ਞਕਮ੍ਮਾਤਿ ਪੁਞ੍ਞਕਾਰਿਨੋ. ਵੇਦੇਹਿ ਞਾਣੇਹਿ ਗਤਤ੍ਤਾ ਪਵਤ੍ਤਤ੍ਤਾ. ਅਨ੍ਤਿਮਾ ਬ੍ਰਹ੍ਮੁਪਪਤ੍ਤੀਤਿ ਸਬ੍ਬਪਚ੍ਛਿਮਾ ਬ੍ਰਹ੍ਮਭਾਵਪ੍ਪਤ੍ਤਿ. ਅਸ੍ਮਾਭਿਜਪ੍ਪਨ੍ਤੀਤਿ ਅਸ੍ਮੇ ਅਭਿਜਪ੍ਪਨ੍ਤਿ. ਆਯੁਵਣ੍ਣਾਦਿਵਸੇਨ ਬ੍ਰੂਹਿਤਗੁਣਤ੍ਤਾ ਬ੍ਰਹ੍ਮਾ. ਅਞ੍ਞੇਹਿ ਮਹਨ੍ਤਾ ਬ੍ਰਹ੍ਮਾ ਮਹਾਬ੍ਰਹ੍ਮਾ. ਅਭਿਭੂਤਿ ਤਂ ਬ੍ਰਹ੍ਮਲੋਕਂ ਜੇਟ੍ਠਕਭਾਵੇਨ ਅਭਿਭਵਿਤ੍ਵਾ ਠਿਤੋ. ਅਨਭਿਭੂਤੋਤਿ ਅਞ੍ਞੇਹਿ ਨ ਅਭਿਭੂਤੋ. ਅਞ੍ਞਦਤ੍ਥੂਤਿ ਏਕਂਸਵਚਨਮੇਤਂ. ਦਸ੍ਸਨਵਸੇਨ ਦਸੋ, ਸਬ੍ਬਂ ਪਸ੍ਸਤੀਤਿ ਅਧਿਪ੍ਪਾਯੋ. ਵਸਵਤ੍ਤੀਤਿ ਸਬ੍ਬਜਨਂ ਵਸੇ ਵਤ੍ਤੇਤਿ. ਇਸ੍ਸਰੋਤਿ ਲੋਕੇ ਇਸ੍ਸਰੋ. ਕਤ੍ਤਾ ਨਿਮ੍ਮਾਤਾਤਿ ਲੋਕਸ੍ਸ ਕਤ੍ਤਾ ਨਿਮ੍ਮਾਤਾ. ਸੇਟ੍ਠੋ ਸਜਿਤਾਤਿ ਅਯਂ ਲੋਕਸ੍ਸ ਉਤ੍ਤਮੋ ਸਂਵਿਭਜਿਤਾ ਚ. ਵਸੀ ਪਿਤਾ ਭੂਤਭਬ੍ਯਾਨਨ੍ਤਿ ਆਚਿਣ੍ਣਵਸਿਤ੍ਤਾ ਵਸੀ, ਅਯਂ ਪਿਤਾ ਭੂਤਾਨਂ ਨਿਬ੍ਬਤ੍ਤਾਨਂ ਭਬ੍ਯਾਨਂ ਸਮ੍ਭਵੇਸੀਨਨ੍ਤਿ ਪਤ੍ਥੇਨ੍ਤਿ ਵਿਕਤ੍ਥੇਨ੍ਤਿ ਪਿਹੇਨ੍ਤਿ ਮਾਨੇਨ੍ਤਿ.

ਏਤਨ੍ਤਿ ਵਿਪਰੀਤਸਞ੍ਞਾਵਸੇਨ ‘‘ਇਦਂ ਨਿਚ੍ਚਂ ਇਦਂ ਧੁਵਂ ਇਦਂ ਸਸ੍ਸਤ’’ਨ੍ਤਿਆਦਿਨਾ ਵੁਤ੍ਤਂ ਏਤਂ ਅਪ੍ਪਂ ਪਰਿਤ੍ਤਕਨ੍ਤਿ ਤਂ ਭਗਵਾ ਪਰਿਚ੍ਛਿਨ੍ਦਿਤ੍ਵਾ ਦਸ੍ਸੇਤਿ. ਤਂ ਪਨ ‘‘ਏਕਸ੍ਮਿਂ ਕੋਸਲਕੇ ਤਿਲਵਾਹੇ ਵਸ੍ਸਸਤੇ ਵਸ੍ਸਸਤੇ ਏਕੇਕਤਿਲੁਦ੍ਧਾਰੇ ਕਯਿਰਮਾਨੇ ਤਿਲਾਨਿ ਪਰਿਕ੍ਖਯਂ ਗਚ੍ਛਨ੍ਤਿ, ਨ ਤ੍ਵੇਵ ਅਬ੍ਬੁਦੇ ਆਯੂ’’ਤਿ ਏਵਂ ਵੁਤ੍ਤੋ ਅਬ੍ਬੁਦੋ, ਤਂਵਸੇਨ ਵੀਸਤਿਗੁਣਂ ਨਿਰਬ੍ਬੁਦੋ, ਤੇਸਂ ਨਿਰਬ੍ਬੁਦਾਨਂ ਵਸੇਨ ਨਿਰਬ੍ਬੁਦਸਤਸਹਸ੍ਸਂ. ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰਤੋ ਪਨ ਪਦੁਮੇ ਆਯੁਨੋ ਵਸ੍ਸਗਣਨਾ ਇਮਸ੍ਮਿਂਯੇਵ ਸਂਯੁਤ੍ਤੇ ਪਰਤੋ ਆਗਮਿਸ੍ਸਤਿ. ਅਨਨ੍ਤਦਸ੍ਸੀਤਿ ਅਨਨ੍ਤਸ੍ਸ ਞੇਯ੍ਯਸ੍ਸ ਅਨਵਸੇਸਤੋ ਦਸ੍ਸੀ. ਵਤਸੀਲਵਤ੍ਤਨ੍ਤਿ ਸਮਾਦਾਨਵਸੇਨ ਵਤਭੂਤਂ ਚਾਰਿਤ੍ਤਸੀਲਵਸੇਨ ਸਮਾਚਿਣ੍ਣਤ੍ਤਾ ਸੀਲਵਤ੍ਤਂ. ਤਂ ਪਨ ਏਕਮੇਵਾਤਿ ਆਹ ‘‘ਸੀਲਮੇਵਾ’’ਤਿ.

ਅਪਾਯੇਸੀਤਿ ਏਤ੍ਥ ਯਦਾ ਸੋ ਪਿਪਾਸਿਤੇ ਮਨੁਸ੍ਸੇ ਪਾਨੀਯਂ ਪਾਯੇਸਿ, ਤਂ ਸਮੁਦਾਗਮਤੋ ਪਟ੍ਠਾਯ ਦਸ੍ਸੇਤੁਂ ‘‘ਤਤ੍ਰਾ’’ਤਿਆਦਿ ਆਰਦ੍ਧਂ. ਪੁਬ੍ਬੇਤਿ ਪੁਰਿਮਜਾਤਿਯਂ. ਏਸ ਬ੍ਰਹ੍ਮਾ ‘‘ਜਰਾਮਰਣਸ੍ਸ ਅਨ੍ਤਂ ਕਰਿਸ੍ਸਾਮੀ’’ਤਿ ਅਜ੍ਝਾਸਯਵਸੇਨ ਝਾਨਂ ਨਿਬ੍ਬਤ੍ਤੇਤ੍ਵਾ ਬ੍ਰਹ੍ਮਲੋਕੇ ਨਿਬ੍ਬਤ੍ਤਿ, ਸੋ ਤਤ੍ਥ ਨਿਬ੍ਬਾਨਸਞ੍ਞੀ ਅਹੋਸਿ. ਝਾਨਰਤਿਯਾ ਵੀਤਿਨਾਮੇਤੀਤਿ ਤਦਾ ਤਸ੍ਸਾ ਕਿਰਿਯਾਯ ਅਵਿਚ੍ਛੇਦਤੋ ਪਵਤ੍ਤਿਂ ਉਪਾਦਾਯ ਵਤ੍ਤਮਾਨਪਯੋਗੋ. ਰਤ੍ਤਨ੍ਧਕਾਰੇ ਪੁਰਤੋ ਪੁਰਤੋ ਗਚ੍ਛਨ੍ਤਸ੍ਸ ਸਕਟਸ੍ਸ ਅਨੁਸ੍ਸਰਣਵਸੇਨ ਗਚ੍ਛਨ੍ਤਾਨਂ ਸਕਟਾਨਂ ਨਿਵਤ੍ਤਨਂ ਹੋਤੀਤਿ ‘‘ਸਬ੍ਬਸਕਟਾਨਿ ਤਥੇਵ ਨਿਵਤ੍ਤਿਤ੍ਵਾ’’ਤਿ ਵੁਤ੍ਤਂ.

ਕਮ੍ਮਸਜ੍ਜਾਤਿ ਯੁਦ੍ਧਸਜ੍ਜਾ. ਵਿਲੋਪਨ੍ਤਿ ਵਿਲੁਤ੍ਤਭਣ੍ਡਂ. ਏਣਿਕੂਲਸ੍ਮਿਨ੍ਤਿ ਏਤ੍ਥ ‘‘ਪਨਿਹਤਾਯ ਨਿਚ੍ਚਗਙ੍ਗਾਯ ਨਾਮ’’ਨ੍ਤਿ ਕੇਚਿ. ‘‘ਏਣਿਮਿਗਬਹੁਲਤਾਯ ਸੋ ਗਙ੍ਗਾਯ ਤੀਰਪ੍ਪਦੇਸੋ ਏਣਿਕੂਲਨ੍ਤਿ ਵੁਤ੍ਤ’’ਨ੍ਤਿ ਅਪਰੇ. ਗਙ੍ਗੇਯ੍ਯਕੋਤਿ ਗਙ੍ਗਾਸਨ੍ਨਿਵਾਸੀ.

ਬਦ੍ਧਚਰੋਤਿ ਪਟਿਬਦ੍ਧਚਰਿਯੋ. ਤੇਨਾਹ ‘‘ਅਨ੍ਤੇਵਾਸਿਕੋ’’ਤਿ. ਯਸ੍ਮਾ ਬੁਦ੍ਧੋ ਸਬ੍ਬਞ੍ਞੂ, ਤਸ੍ਮਾ ਅਞ੍ਞਾਸਿ, ਇਧ ਮਯ੍ਹਂ ਪਮੁਟ੍ਠਞ੍ਚ ਸਬ੍ਬਂ ਜਾਨਾਸੀਤਿ ਅਧਿਪ੍ਪਾਯੋ. ਸਬ੍ਬਂ ਬ੍ਰਹ੍ਮਲੋਕਂ ਓਭਾਸਯਨ੍ਤੋ ਸਬ੍ਬਮ੍ਪਿਮਂ ਬ੍ਰਹ੍ਮਲੋਕਂ ਭਗਵਾ ਓਭਾਸਂ ਅਭਿਭਵਿਤ੍ਵਾ ਅਨਞ੍ਞਸਾਧਾਰਣਂ ਅਤ੍ਤਨੋ ਓਭਾਸਂ ਓਭਾਸੇਨ੍ਤੋ ਤਿਟ੍ਠਤਿ.

ਬਕਬ੍ਰਹ੍ਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.