੧੦. ਵਜਿਰਾਸੁਤ੍ਤਵਣ੍ਣਨਾ

੧੭੧. ਸੁਦ੍ਧਸਙ੍ਖਾਰਪੁਞ੍ਜੇਤਿ ਰੂਪਾਰੂਪਵਿਭਾਗੇ ਕਿਲੇਸਸਙ੍ਖਾਰਸਮੂਹੇ. ਪਰਮਤ੍ਥਤੋਤਿ ਸਭਾਵੇਨ. ਯਥਾ ਨ ਹਿ ਸਤ੍ਤਸਞ੍ਞਿਤਸਙ੍ਖਾਰਪੁਞ੍ਜੋ ਨਾਮ ਪਰਮਤ੍ਥਤੋ ਉਪਲਬ੍ਭਤਿ, ਏਵਂ ਤਬ੍ਬਿਨਿਮੁਤ੍ਤੋ ਨਾਮ ਕੋਚਿ ਨ ਉਪਲਬ੍ਭਤਿ ਅਵਿਜ੍ਜਮਾਨਤ੍ਤਾ. ਵਿਜ੍ਜਮਾਨੇਸੂਤਿ ਯਥਾਪਚ੍ਚਯਸਮ੍ਪਤ੍ਤਿਯਾ ਲਬ੍ਭਮਾਨੇਸੁ. ਤੇਨਾਕਾਰੇਨਾਤਿ ਇਤ੍ਥਿਪੁਰਿਸਾਦਿਆਕਾਰੇਨ. ਵਵਤ੍ਥਿਤੇਸੂਤਿ ਪਚ੍ਚੇਕਂ ਪਚ੍ਚਯਵਿਸੇਸਸਮੁਟ੍ਠਿਤਂ ਸਣ੍ਠਾਨਵਿਸੇਸਂ ਉਪਾਦਾਯ ‘‘ਪੁਰਿਸੋ ਹਤ੍ਥੀ ਅਸ੍ਸੋ’’ਤਿਆਦਿਨਾ ਅਭਿਸਙ੍ਗਤੋ ਪਵਤ੍ਤੇਸੁ. ਸਮ੍ਮੁਤੀਤਿ ਸਤ੍ਤੋਤਿ ਵੋਹਾਰੋ. ਤੇਨਾਹ ‘‘ਸਮਞ੍ਞਾਮਤ੍ਤਮੇਵਾ’’ਤਿ. ਪਞ੍ਚਕ੍ਖਨ੍ਧਦੁਕ੍ਖਨ੍ਤਿ ਪਞ੍ਚਕ੍ਖਨ੍ਧਸਞ੍ਞਿਤਂ ਦੁਕ੍ਖਂ. ਵੁਤ੍ਤਂ ਹੇਤਂ ਭਗਵਤਾ ‘‘ਸਂਖਿਤ੍ਤੇਨ ਪਞ੍ਚੁਪਾਦਾਨਕ੍ਖਨ੍ਧਾ ਦੁਕ੍ਖਾ’’ਤਿ (ਦੀ. ਨਿ. ੨.੩੮੭; ਮ. ਨਿ. ੧.੧੨੦; ੩.੩੭੩; ਵਿਭ. ੨੦੨) ਅਞ੍ਞੋ ਨੇਵ ਸਮ੍ਭੋਤਿ ਯਥਾਵੁਤ੍ਤਦੁਕ੍ਖਤੋ ਅਞ੍ਞਸ੍ਸ ਸਙ੍ਖਤਧਮ੍ਮਸ੍ਸ ਅਭਾਵਤੋ. ਨ ਨਿਰੁਜ੍ਝਤੀਤਿ ਤਤੋ ਅਞ੍ਞਂ ਨ ਨਿਰੁਜ੍ਝਤਿ, ਉਪ੍ਪਾਦਤੋ ਹੋਤਿ ਨਿਰੋਧੋਤਿ.

ਵਜਿਰਾਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਸਾਰਤ੍ਥਪ੍ਪਕਾਸਿਨਿਯਾ ਸਂਯੁਤ੍ਤਨਿਕਾਯ-ਅਟ੍ਠਕਥਾਯ

ਭਿਕ੍ਖੁਨੀਸਂਯੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.