੩. ਸਮ੍ਬਰਿਮਾਯਾਸੁਤ੍ਤਵਣ੍ਣਨਾ

੨੬੯. ਆਬਾਧਿਕੋਤਿ ਆਬਾਧੋ ਅਸ੍ਸ ਅਤ੍ਥੀਤਿ ਆਬਾਧਿਕੋ. ਵਾਚੇਸੀਤਿ ਸਿਕ੍ਖਾਪੇਸਿ. ਸਮ੍ਬਰੋ ਨਾਮ ਅਸੁਰਮਾਯਾਯ ਆਦਿਪੁਰਿਸੋ ਪੁਰਾਤਨੋ ਅਸੁਰਿਨ੍ਦੋ. ਤਂ ਸਨ੍ਧਾਯਾਹ ‘‘ਯਥਾ ਸਮ੍ਬਰੋ’’ਤਿਆਦਿ. ਏਵਂ ਪਚ੍ਚਤਿ ਅਞ੍ਞੋਪਿ ਮਾਯਾਵੀ ਮਾਯਂ ਪਯੋਜੇਤ੍ਵਾ. ਉਪਵਾਦਨ੍ਤਰਾਯੋ ਨਾਮ ਖਮਾਪਨੇ ਸਤਿ ਵਿਗਚ੍ਛਤਿ, ਪਾਕਤਿਕਮੇਵ ਹੋਤੀਤਿ ਆਹ ‘‘ਏਵਮਸ੍ਸ ਫਾਸੁ ਭਵੇਯ੍ਯਾ’’ਤਿ. ਤੇਨਾਤਿ ਵੇਪਚਿਤ੍ਤਿਨਾ ਸਮ੍ਬਰਵਿਜ੍ਜਾਯ ਅਦਾਨੇਨ ਵਞ੍ਚਿਤਤ੍ਤਾ. ਤਥਾ ਅਕਤ੍ਵਾਤਿ ਇਸੀਨਂ ਸਨ੍ਤਿਕਂ ਨੇਤ੍ਵਾ ਖਮਾਪਨਵਸੇਨ ਕਾਤਬ੍ਬਂ ਅਕਤ੍ਵਾ.

ਸਮ੍ਬਰਿਮਾਯਾਸੁਤ੍ਤਵਣ੍ਣਨਾ ਨਿਟ੍ਠਿਤਾ.