੯. ਪਠਮਸੁਕ੍ਕਾਸੁਤ੍ਤਵਣ੍ਣਨਾ

੨੪੩. ਰਥਿਕਨ੍ਤਿ ਰਚ੍ਛਂ. ਗਹੇਤ੍ਵਾਤਿ ਗਨ੍ਤ੍ਵਾ. ਸਿਙ੍ਘਾਟਕਨ੍ਤਿ ਅਞ੍ਞਤ੍ਥ ਤਿਕੋਣਾ ਰਚ੍ਛਾ ਵੁਚ੍ਚਤਿ. ਇਧ ਪਨ ‘‘ਚਤੁਕ੍ਕ’’ਨ੍ਤਿ ਵੁਤ੍ਤਂ. ‘‘ਮਧੁਪੀਕਾ’’ਤਿ ਏਤ੍ਥ ਮਧੁ-ਸਦ੍ਦੇਨ ਮਧੁਵਿਸੇਸੋ ਵੁਚ੍ਚਤੀਤਿ ਆਹ ‘‘ਗਨ੍ਧਮਧੁਪਾਨਂ ਪੀਤਾ ਵਿਯਾ’’ਤਿ. ਸਾਮਞ੍ਞਜੋਤਨਾ ਹਿ ਵਿਸੇਸੇ ਤਿਟ੍ਠਤੀਤਿ ਗਨ੍ਧਮਧੂਤਿ ਚ ਅਤਿਵਿਯ ਮਧੁਰੋ ਮਦਨਿਯੋ ਏਕੋ ਮਧੁਵਿਸੇਸੋ. ਤੇਨਾਹ ‘‘ਅਸਞ੍ਞੀ ਹੁਤ੍ਵਾ ਸਯਤੇਵਾ’’ਤਿ.

ਨ ਪਟਿਵਾਨੀਯਂ ਨ ਅਪਨੇਤਬ੍ਬਨ੍ਤਿ ਅਪ੍ਪਟਿਵਾਨੀਯਂ. ਤੇਨਾਹ ‘‘ਬਾਹਿਰਕਞ੍ਹੀ’’ਤਿਆਦਿ. ਯਂ ਕਿਞ੍ਚਿ ਸਨ੍ਤਪਣੀਤਭਾਵਾਵਹਂ ਨ ਸੇਚਨਨ੍ਤਿ ਅਸੇਚਨਕਂ. ਤਤੋ ਏਵ ਅਨਾਸਿਤ੍ਤਕਂ. ਓਜਵਨ੍ਤਨ੍ਤਿ ਬਹੁਸਮ੍ਮਤਓਜਵਨ੍ਤਸਦਿਸਤਾਯ ਓਜਵਨ੍ਤਂ. ਤੇਨਾਹ ‘‘ਯਥਾ ਹੀ’’ਤਿਆਦਿ. ਧਮ੍ਮਤਾਯਾਤਿ ਅਤ੍ਤਨੋ ਸਭਾਵੇਨੇਵ. ਮਧੁਰੋ ਇਟ੍ਠੋ. ਪਿਵਨ੍ਤੀ ਵਿਯਾਤਿ ਸੁਕ੍ਕਾਯ ਭਿਕ੍ਖੁਨਿਯਾ ਉਪਨੀਯਮਾਨਂ ਸਦ੍ਧਮ੍ਮਾਮਤਰਸਂ ਅਤ੍ਤਨੋ ਸੋਤਞ੍ਜਲਿਂ ਪੂਰੇਤ੍ਵਾ ਓਦਹਨ੍ਤੀਵ. ਵਲਾਹਕਤੋ ਆਗਤਂ ਵਲਾਹਕਂ.

ਪਠਮਸੁਕ੍ਕਾਸੁਤ੍ਤਵਣ੍ਣਨਾ ਨਿਟ੍ਠਿਤਾ.