੮. ਕਾਮਸੁਤ੍ਤਵਣ੍ਣਨਾ

੭੮. ‘‘ਅਤ੍ਤਕਾਮੋ’’ਤਿ ਪਾਲ਼ਿਯਂ ਵੁਤ੍ਤਤ੍ਤਾ ਆਹ ‘‘ਠਪੇਤ੍ਵਾ ਸਬ੍ਬਬੋਧਿਸਤ੍ਤੇ’’ਤਿ. ਤੇ ਹਿ ਸਬ੍ਬਸੋ ਪਰਤ੍ਥਾਯ ਏਵ ਪਟਿਪਜ੍ਜਮਾਨਾ ਮਹਾਕਾਰੁਣਿਕਾ ਪਰਤ੍ਥਕਾਮਾ, ਅਤ੍ਥਕਾਮਾ ਨਾਮ ਨ ਹੋਨ੍ਤਿ, ਯਾ ਚ ਤੇਸਂ ਅਤ੍ਤਤ੍ਥਾਵਹਾ ਪਟਿਪਤ੍ਤਿ, ਸਾਪਿ ਯਾਵਦੇਵ ਪਰਤ੍ਥਾ ਏਵਾਤਿ. ਵੁਤ੍ਤਂ ਪੋਰਾਣਟ੍ਠਕਥਾਯਂ. ਯਸ੍ਮਾ ਬੋਧਿਸਤ੍ਤਾ ਪਰਹਿਤਪਟਿਪਤ੍ਤਿਯਾ ਪਾਰਮਿਯੋ ਪੂਰੇਨ੍ਤਾ ਤਥਾਰੂਪਂ ਕਾਰਣਂ ਪਤ੍ਵਾ ਅਤ੍ਤਾਨਂ ਪਰੇਸਂ ਪਰਿਚ੍ਚਜਨ੍ਤਿ ਪਞ੍ਞਾਪਾਰਮਿਯਾ ਪਰਿਪੂਰਣਤੋ, ਤਸ੍ਮਾ ਇਧਾਪਿ ‘‘ਸਬ੍ਬਬੋਧਿਸਤ੍ਤੇ ਠਪੇਤ੍ਵਾਯੇਵਾਤਿ ਵੁਤ੍ਤ’’ਨ੍ਤਿ ਆਹ. ਕਲ੍ਯਾਣਨ੍ਤਿ ਭਦ੍ਦਕਂ. ਵਾਚਾਯ ਅਧਿਪ੍ਪੇਤਤ੍ਤਾ ਆਹ ‘‘ਸਣ੍ਹਂ ਮੁਦੁਕ’’ਨ੍ਤਿ. ਪਾਪਿਕਨ੍ਤਿ ਲਾਮਕਂ ਨਿਹੀਨਂ. ਤਂ ਪਨ ਫਰੁਸਂ ਵਾਚਨ੍ਤਿ ਸਰੂਪਤੋ ਦਸ੍ਸੇਤਿ.

ਕਾਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.