੮. ਛੇਤ੍ਵਾਵਗ੍ਗੋ

੧. ਛੇਤ੍ਵਾਸੁਤ੍ਤਵਣ੍ਣਨਾ

੭੧. ਵਧਿਤ੍ਵਾਤਿ ਹਨ੍ਤ੍ਵਾ ਵਿਨਾਸੇਤ੍ਵਾ. ਅਪਰਿਦਯ੍ਹਮਾਨਤ੍ਤਾਤਿ ਅਪੀਲ਼ਿਯਮਾਨਤ੍ਤਾ. ਵਿਨਟ੍ਠਦੋਮਨਸ੍ਸਤ੍ਤਾ ਨ ਸੋਚਤਿ ਚੇਤੋਦੁਕ੍ਖਦੁਕ੍ਖਾਭਾਵਤੋ. ਵਿਸਂ ਨਾਮ ਦੁਕ੍ਖਂ ਅਨਿਟ੍ਠਭਾਵਤੋ, ਤਸ੍ਸ ਮੂਲਕਾਰਣਂ ਕੋਧੋ ਅਨਿਟ੍ਠਫਲਤ੍ਤਾਤਿ ਆਹ ‘‘ਵਿਸਮੂਲਸ੍ਸਾਤਿ ਦੁਕ੍ਖਵਿਪਾਕਸ੍ਸਾ’’ਤਿ. ਅਕ੍ਕੁਟ੍ਠਸ੍ਸਾਤਿ ਅਕ੍ਕੋਸਾਪਰਾਧਸ੍ਸ. ਅਕ੍ਕੋਸਪਹਾਰਤ੍ਥਸਮ੍ਬਨ੍ਧੇਨ ਹਿ ‘‘ਕੁਦ੍ਧਸ੍ਸਾ’’ਤਿ ਉਪਯੋਗਤ੍ਥੇ ਸਮ੍ਪਦਾਨਵਚਨਂ. ਸੁਖਂ ਉਪ੍ਪਜ੍ਜਤਿ ਕੋਧਂ ਨਸ੍ਸਤਿ. ਸੁਖੁਪ੍ਪਤ੍ਤਿਂ ਸਨ੍ਧਾਯ ਏਸ ਕੋਧੋ ‘‘ਮਧੁਰਗ੍ਗੋ’’ਤਿ ਵੁਤ੍ਤੋ, ਸੁਖਾਵਸਾਨੋਤਿ ਅਤ੍ਥੋ.

ਛੇਤ੍ਵਾਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੨. ਰਥਸੁਤ੍ਤਵਣ੍ਣਨਾ

੭੨. ਪਞ੍ਞਾਣਨ੍ਤਿ ਲਕ੍ਖਣਂ ਸਲ੍ਲਕ੍ਖਣੂਪਾਯੋ. ਦਿਸ੍ਵਾਤਿ ਦਸ੍ਸਨਹੇਤੁ. ‘‘ਚੋਲ਼ਰਞ੍ਞੋ ਰਟ੍ਠਂ ਚੋਲ਼ਰਟ੍ਠ’’ਨ੍ਤਿ ਏਵਂ ਰਟ੍ਠਂ ਰਞ੍ਞਾ ਪਞ੍ਞਾਯਤਿ.

ਰਥਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੩. ਵਿਤ੍ਤਸੁਤ੍ਤਵਣ੍ਣਨਾ

੭੩. ਸਦ੍ਧਾਯਾਤਿ ਸਦ੍ਧਾਹੇਤੁ. ਕੁਲਸਮ੍ਪਦਾਤਿ ਖਤ੍ਤਿਯਾਦਿਸਮ੍ਪਤ੍ਤਿਯੋ. ਸਬ੍ਬਲੋਕਿਯਲੋਕੁਤ੍ਤਰਵਿਤ੍ਤਪਟਿਲਾਭਹੇਤੁਤੋ ਸਦ੍ਧਾਵਿਤ੍ਤਮੇਵ. ਹੇਟ੍ਠਾ ਤਿਣ੍ਣਂ ਦ੍ਵਾਰਾਨਂ ਵਸੇਨ ਉਪ੍ਪਨ੍ਨਕਸ੍ਸ ਸਬ੍ਬਸ੍ਸਪਿ ਅਨਵਜ੍ਜਧਮ੍ਮਸ੍ਸ ਸਙ੍ਗਣ੍ਹਨਤੋ ‘‘ਧਮ੍ਮੋਤਿ ਦਸਕੁਸਲਕਮ੍ਮਪਥੋ’’ਤਿ ਵੁਤ੍ਤਂ. ਅਸਂਕਿਲਿਟ੍ਠਸੁਖਨ੍ਤਿ. ਨਿਰਾਮਿਸਂ ਸੁਖਂ. ਤਮੇਵ ਸਾਮਿਸਂ ਉਪਨਿਧਾਯ ਸਮ੍ਭਾਵੇਨ੍ਤੋ ਆਹ ‘‘ਅਸਂਕਿਲਿਟ੍ਠ’’ਨ੍ਤਿ. ਅਸੇਚਨਕਭਾਵੇਨ ਅਭਿਰੁਚਿਜਨਨਤੋ ਪਿਯਾਕਿਚ੍ਛਕਰਣਤੋ ਬਹੁਂ ਸੁਚਿਰਮ੍ਪਿ ਕਾਲਂ ਆਸੇਵਨ੍ਤਸ੍ਸ ਅਦੋਸਾਵਹਤੋ ਸਚ੍ਚਮੇਵ ਮਧੁਰਤਰਂ. ਨ ਹਿ ਤਂ ਪਿਵਿਤਬ੍ਬਤੋ ਸਾਦਿਤਬ੍ਬਤੋ ਅਨੁਭਵਿਤਬ੍ਬਤੋ ਰਸੋਤਿ ਵਤ੍ਤਬ੍ਬਤਂ ਅਰਹਤਿ. ਇਦਾਨਿ ਤਸ੍ਸ ਕਿਚ੍ਚਸਮ੍ਪਤ੍ਤਿਅਤ੍ਥੇਹਿਪਿ ਮਹਾਰਹਤਂ ਦਸ੍ਸੇਤੁਂ ‘‘ਸਚ੍ਚਸ੍ਮਿਂ ਹੀ’’ਤਿਆਦਿ ਵੁਤ੍ਤਂ. ਤਤ੍ਥ ਨਦੀਨਿਵਤ੍ਤਨਂ ਮਹਾਕਪ੍ਪਿਨਵਤ੍ਥੁਆਦੀਹਿ (ਧ. ਪ. ਅਟ੍ਠ. ੧.ਮਹਾਕਪ੍ਪਿਨਤ੍ਥੇਰਵਤ੍ਥੁ; ਅ. ਨਿ. ਅਟ੍ਠ. ੧.੧.੨੩੧; ਥੇਰਗਾ. ਅਟ੍ਠ. ੨.ਮਹਾਕਪ੍ਪਿਨਤ੍ਥੇਰਗਾਥਾਵਣ੍ਣਨਾ) ਦੀਪੇਤਬ੍ਬਂ, ਇਤਰਾਨਿ ਕਣ੍ਹਦੀਪਾਯਨਜਾਤਕ- (ਜਾ. ੧.੧੦.੬੨ ਆਦਯੋ) ਸੁਤਸੋਮ- (ਜਾ. ੨.੨੧.੩੭੧ ਆਦਯੋ) ਮਚ੍ਛਜਾਤਕੇਹਿ (ਜਾ. ੧.੧.੩੪, ੭੫; ੧.੨.੧੩੧ ਆਦਯੋ) ਦੀਪੇਤਬ੍ਬਾਨਿ. ਨਿਮ੍ਮਦ੍ਦੇਨ੍ਤਿ ਅਭਿਭਵਨ੍ਤਿ. ਮਧੁਰਤਰਨ੍ਤਿ ਸੁਨ੍ਦਰਤਰਂ ਸੇਟ੍ਠੇਸੂਤਿ ਅਤ੍ਥੋ. ਪਞ੍ਞਾਜੀਵੀਤਿ ਪਞ੍ਞਾਯ ਜੀਵਨਸੀਲੋਤਿ ਪਞ੍ਞਾਜੀਵੀ, ਪਞ੍ਞਾਪੁਬ੍ਬਙ੍ਗਮਚਰਿਯੋਤਿ ਅਤ੍ਥੋ. ਪਞ੍ਞਾਜੀਵੀਤਿ ਚ ਪਞ੍ਞਾਵਸੇਨ ਇਰਿਯਤਿ ਵਤ੍ਤਤਿ ਜੀਵਿਤਂ ਪਵਤ੍ਤੇਤੀਤਿ ਅਤ੍ਥੋਤਿ ਦਸ੍ਸੇਨ੍ਤੋ ‘‘ਯੋ ਪਞ੍ਞਾਜੀਵੀ’’ਤਿਆਦਿਮਾਹ. ‘‘ਜੀਵਤ’’ਨ੍ਤਿ ਕੇਚਿ ਪਠਨ੍ਤਿ, ਜੀਵਨ੍ਤਾਨਂ ਪਞ੍ਞਾਜੀਵਿਂ ਸੇਟ੍ਠਮਾਹੂਤਿ ਅਤ੍ਥੋ.

ਵਿਤ੍ਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੪. ਵੁਟ੍ਠਿਸੁਤ੍ਤਵਣ੍ਣਨਾ

੭੪. ਉਪ੍ਪਤਨ੍ਤਾਨਨ੍ਤਿ ਪਥਵਿਂ ਭਿਨ੍ਦਿਤ੍ਵਾ ਉਟ੍ਠਹਨ੍ਤਾਨਂ. ‘‘ਸੇਟ੍ਠ’’ਨ੍ਤਿ ਵੁਚ੍ਚਮਾਨਤ੍ਤਾ ‘‘ਸਤ੍ਤਵਿਧ’’ਨ੍ਤਿ ਵੁਤ੍ਤਂ, ਇਤਰੇਸਂ ਵਾ ਤਦਨੁਲੋਮਤੋ. ਖੇਮੋ ਹੋਤਿ ਦੁਬ੍ਭਿਕ੍ਖੁਪਦ੍ਦਵਾਭਾਵਤੋ. ਤੇਨਾਹ ‘‘ਸੁਭਿਕ੍ਖੋ’’ਤਿ. ਨਿਪਤਨ੍ਤਾਨਨ੍ਤਿ ਅਧੋਮੁਖਂ ਪਵਤ੍ਤਨ੍ਤਾਨਂ. ਪਵਜਮਾਨਾਨਨ੍ਤਿ ਵਜਨਸੀਲਾਨਂ. ਤੇ ਪਨ ਯਸ੍ਮਾ ਜਙ੍ਗਮਾ ਨਾਮ ਹੋਨ੍ਤਿ, ਨ ਰੁਕ੍ਖਾਦਯੋ ਵਿਯ ਥਾਵਰਾ, ਤਸ੍ਮਾ ਆਹ ‘‘ਜਙ੍ਗਮਾਨ’’ਨ੍ਤਿ. ਗਾਵੋਤਿ ਧੇਨੁਯੋ. ਤੇਨ ਮਹਿਂਸਾਦਿਕਾਨਮ੍ਪਿ ਸਙ੍ਗਹੋ ਦਟ੍ਠਬ੍ਬੋ. ਵਦਨ੍ਤਾਨਨ੍ਤਿ ਉਪ੍ਪਨ੍ਨਂ ਅਤ੍ਥਂ ਵਦਨ੍ਤਾਨਂ.

ਅਤ੍ਤਨੋ ਖਨ੍ਤਿਯਾਤਿ ਅਤ੍ਤਨੋ ਖਨ੍ਤਿਯਾ ਰੁਚਿਯਾ ਗਹਿਤਭਾਵੇਨ. ਇਤਰਾ ਦੇਵਤਾ ਤਸ੍ਸਾ ਵਿਸ੍ਸਜ੍ਜਨੇ ਅਪਰਿਤੁਸ੍ਸਮਾਨਾ ਆਹ. ਯਾਵ ਪਧਂਸੀਤਿ ਗੁਣਧਂਸੀ ਸਤ੍ਥੁਦੇਸਨਾਯ ਲਦ੍ਧਬ੍ਬਗੁਣਨਾਸਨਤੋ. ਪਗਬ੍ਬਾਤਿ ਪਾਗਬ੍ਬਿਯੇਨ ਸਮਨ੍ਨਾਗਤਾ, ਯਥਾ ਵਚੀਪਾਗਬ੍ਬਿਯੇਨ ਅਖਰਾ, ਤਥਾ ਵਾਚਾਯ ਭਵਿਤਬ੍ਬਂ. ਮੁਖਰਾਤਿ ਮੁਖਖਰਾ. ਦਸਬਲਂ ਪੁਚ੍ਛਿ ਸਣ੍ਹਂ ਸੁਖੁਮਂ ਰਤਨਤ੍ਤਯਸਂਹਿਤਂ ਅਤ੍ਥਂ ਸੋਤੁਕਾਮਾ. ਅਸ੍ਸਾ ਦੇਵਤਾਯ ਵਿਸ੍ਸਜ੍ਜੇਨ੍ਤੋ ਅਜ੍ਝਾਸਯਾਨੁਰੂਪਂ. ਉਪ੍ਪਤਮਾਨਾਤਿ ਉਪ੍ਪਤਨ੍ਤੀ ਸਮੁਗ੍ਘਾਟੇਤਿ ਓਧਿਸੋ. ਵਟ੍ਟਮੂਲਕਮਹਾਅਵਿਜ੍ਜਾਤਿ ਤਸ੍ਸਾ ਆਦੀਨਵਦਸ੍ਸਨਤ੍ਥਂ ਭੂਤਕਥਨਵਿਸੇਸਨਂ. ਓਸੀਦਨ੍ਤਾਨਨ੍ਤਿ ਪਟਿਪਕ੍ਖਵਸੇਨ ਅਧੋ ਸੀਦਨ੍ਤਾਨਂ, ਉਸ੍ਸਾਦਯਮਾਨਾਨਨ੍ਤਿ ਅਤ੍ਥੋ. ਪੁਞ੍ਞਕ੍ਖੇਤ੍ਤਭੂਤੋਤਿ ਇਦਂ ‘‘ਪਦਸਾ ਚਰਮਾਨਾਨ’’ਨ੍ਤਿ ਪਦਸ੍ਸ ਅਤ੍ਥਵਿਵਰਣਵਸੇਨ ਭੂਤਕਥਨਵਿਸੇਸਨਂ. ਯਾਦਿਸੋ ਪੁਤ੍ਤੋ ਵਾ ਹੋਤੂਤਿ ਇਦਂ ਪੁਰਿਮਪਦੇ ਦੇਵਤਾਯ ਪੁਤ੍ਤਗਹਣਸ੍ਸ ਕਤਤ੍ਤਾ ਵੁਤ੍ਤਂ.

ਵੁਟ੍ਠਿਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੫. ਭੀਤਾਸੁਤ੍ਤਵਣ੍ਣਨਾ

੭੫. ਕਿਂ ਸੂਧ ਭੀਤਾਤਿ ਏਤ੍ਥ ਸੁ-ਇਧਾਤਿ ਨਿਪਾਤਮਤ੍ਤਨ੍ਤਿ ਆਹ ‘‘ਕਿਂ ਭੀਤਾ’’ਤਿ? ਮਗ੍ਗੋ ਚ ਨੇਕਾਯਤਨਪ੍ਪਵੁਤ੍ਤੋਤਿ ਅਨੇਕਕਾਰਣਂ ਨਾਨਾਵਿਧਾਧਿਗਮੋਕਾਸਂ ਕਤ੍ਵਾ ਪਵੁਤ੍ਤੋ ਕਥਿਤੋ. ਤੇਨਾਹ ‘‘ਅਟ੍ਠਤਿਂਸਾਰਮ੍ਮਣਵਸੇਨਾ’’ਤਿਆਦਿ. ਏਵਂ ਸਨ੍ਤੇਤਿ ਏਵਂ ਸਬ੍ਬਸਾਧਾਰਣਾਨੇਕਾਯਤਨੇਹਿ ਨਿਬ੍ਬਾਨਗਾਮਿਮਗ੍ਗਸ੍ਸ ਤੁਮ੍ਹੇਹਿ ਪਵੇਦਿਤਤ੍ਤਾ ਲਬ੍ਭਮਾਨੇ ਖੇਮੇ ਮਗ੍ਗੇ ਕਿਂ ਭੀਤਾਯਂ ਜਨਤਾ ਉਪ੍ਪਥਭੂਤਾ ਵਿਪਰੀਤਦਿਟ੍ਠਿਤੋ ਗਣ੍ਹੀਤਿ ਅਤ੍ਥੋ? ਏਵਂ ਦੇਵਤਾ ਯਥਿਚ੍ਛਾਯ ਪੁਰਿਮਦ੍ਧੇਨ ਅਤ੍ਤਨਾ ਯਥਾਚਿਨ੍ਤਿਤਮਤ੍ਥਂ ਸਤ੍ਥੁ ਪਵੇਦਿਤਾ, ਪਚ੍ਛਿਮਦ੍ਧੇਨ ਅਤ੍ਤਨੋ ਸਂਸਯਂ ਪੁਚ੍ਛਤਿ. ਬਹੁਪਞ੍ਞਾਤਿ ਪੁਥੁਪਞ੍ਞ. ਉਸ੍ਸਨ੍ਨਪਞ੍ਞਾਤਿ ਅਧਿਕਪਞ੍ਞਾ. ਠਪੇਤ੍ਵਾਤਿ ਸਂਯਮੇਤ੍ਵਾ. ਸਂਵਿਭਾਗੀਤਿ ਆਹਾਰਪਰਿਭੋਗੇ ਸਮ੍ਮਦੇਵ ਵਿਭਜਨਸੀਲੋ. ਤੇਨਾਹ ‘‘ਅਚ੍ਛਰਾਯਾ’’ਤਿਆਦਿ. ਵੁਤ੍ਤਤ੍ਥਮੇਵ ਹੇਟ੍ਠਾ.

ਮਨੇਨਾਤਿ ਮਨੋਗਹਣੇਨ. ਪੁਬ੍ਬਸੁਦ੍ਧਿਅਙ੍ਗਨ੍ਤਿ ਪੁਬ੍ਬਭਾਗਸੁਦ੍ਧਿਭੂਤਂ ਅਙ੍ਗਂ. ਚਤੂਸੂਤਿ ਵੁਤ੍ਤਅਙ੍ਗਪਰਿਯਾਪਨ੍ਨਂ. ਯਞ੍ਞਉਪਕ੍ਖਰੋਤਿ ਦਾਨਸ੍ਸ ਸਾਧਨਂ. ਏਤੇਸੁ ਧਮ੍ਮੇਸੂਤਿ ਏਤੇਸੁ ਸਦ੍ਧਾਦਿਗੁਣੇਸੁ. ਯਥਾ ਹਿ ਸਦ੍ਧੋ ਪਚ੍ਚਯਂ ਪਚ੍ਚੁਪਟ੍ਠਪੇਤ੍ਵਾ ਵਤ੍ਥੁਪਰਿਚ੍ਚਾਗਸ੍ਸ ਵਿਸੇਸਪਚ੍ਚਯੋ ਕਮ੍ਮਫਲਸ੍ਸ ਪਰਲੋਕਸ੍ਸ ਚ ਪਚ੍ਚਕ੍ਖਤੋ ਵਿਯ ਪਤ੍ਤਿਯਾਯਨਤੋ, ਏਵਂ ਮੁਦੁਹਦਯੋ. ਮੁਦੁਹਦਯੋ ਹਿ ਅਨੁਦਯਂ ਪਤ੍ਵਾ ਯਂ ਕਿਞ੍ਚਿ ਅਤ੍ਤਨੋ ਸਨ੍ਤਕਂ ਪਰੇਸਂ ਦੇਤਿ. ਯੋ ਚ ਸਂਵਿਭਾਗਸੀਲੋ, ਸੋ ਅਪ੍ਪਕਸ੍ਮਿਮ੍ਪਿ ਅਤ੍ਤਨੋ ਸਨ੍ਤਕੇ ਪਰੇਹਿ ਸਾਧਾਰਣਭੋਗੀ ਹੋਤਿ. ਵਦਞ੍ਞੂ ਵਦਾਨਿਯਤਾਯ ਯਾਗਿਨੋਵ ਯੁਤ੍ਤਂ ਯੁਤ੍ਤਕਾਲਂ ਞਤ੍ਵਾ ਅਤ੍ਥਿਕਾਨਂ ਮਨੋਰਥਂ ਪੂਰੇਤੀਤਿ ਵੁਤ੍ਤਂ ‘‘ਇਤਿ…ਪੇ… ਚਤੂਸੂਤਿ ਆਹਾ’’ਤਿ.

ਵਾਚਨ੍ਤਿਆਦੀਨਿ ਤੀਣਿ ਅਙ੍ਗਾਨਿ ਤਿਵਿਧਸੀਲਸਮ੍ਪਤ੍ਤਿਦੀਪਨਤੋ. ਸਮ੍ਪਨ੍ਨਸੀਲੋ ਹਿ ਪਰਲੋਕਂ ਨ ਭਾਸੇਯ੍ਯ. ਸਦ੍ਧੋ ਏਕਂ ਅਙ੍ਗਂ ਪਯੋਗਾਸਯਸੁਦ੍ਧਿਦੀਪਨਤੋ. ਸੁਦ੍ਧਾਸਯਸ੍ਸ ਸਮ੍ਮਾਪਯੋਗੇ ਠਿਤਸ੍ਸ ਕਥਂ ਪਰਲੋਕਤੋ ਭਯਨ੍ਤਿ. ਦੁਕਵਸੇਨ ਚਤੁਰਙ੍ਗਯੋਜਨਾ ਦੁਕਨਯੋ. ਏਤੇਸੁ ਚਤੂਸੁ ਧਮ੍ਮੇਸੁ ਠਿਤੋਤਿ ਏਤੇਸੁ ਯਥਾਵੁਤ੍ਤਦੁਕਸਙ੍ਗਹੇਸੁ ਚਤੂਸੁ ਗੁਣੇਸੁ ਪਤਿਟ੍ਠਿਤੋ.

ਭੀਤਾਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੬. ਨਜੀਰਤਿਸੁਤ੍ਤਵਣ੍ਣਨਾ

੭੬. ਨਾਮਗੋਤ੍ਤਨ੍ਤਿ ਤਿਸ੍ਸੋ ਕਸ੍ਸਪੋ ਗੋਤਮੋਤਿ ਏਵਰੂਪਂ ਨਾਮਞ੍ਚ ਗੋਤ੍ਤਞ੍ਚ. ਨਿਦਸ੍ਸਨਮਤ੍ਤਮੇਤਂ, ਤਸ੍ਮਾ ਸਬ੍ਬਸ੍ਸ ਪਞ੍ਞਤ੍ਤਿਯਾ ਲਕ੍ਖਣਵਚਨਨ੍ਤਿ ਦਟ੍ਠਬ੍ਬਂ. ਨ ਜੀਰਤੀਤਿ ਅਸਭਾਵਧਮ੍ਮਤ੍ਤਾ ਉਪ੍ਪਾਦਵਯਾਭਾਵਤੋ ਜਰਂ ਨ ਪਾਪੁਣਾਤਿ. ਤੇਨਾਹ ‘‘ਜੀਰਣਸਭਾਵੋ ਨ ਹੋਤੀ’’ਤਿ. ਯਸ੍ਮਾ ਸਮਞ੍ਞਾਭਾਵਤੋ ਕਾਲਨ੍ਤਰੇਪਿ ਤਂ ਸਮਞ੍ਞਾਯਤੇਵ, ਤਸ੍ਮਾ ‘‘ਅਤੀਤਬੁਦ੍ਧਾਨਂ…ਪੇ… ਨ ਜੀਰਤੀਤਿ ਵੁਚ੍ਚਤੀ’’ਤਿ ਆਹ.

ਆਲਸਿਯਨ੍ਤਿ ਅਲਸਭਾਵੋ ਦਲ਼੍ਹਕੋਸਜ੍ਜਂ. ਤੇਨਾਹ ‘‘ਯੇਨਾ’’ਤਿਆਦਿ. ਠਿਤਿਨ੍ਤਿ ਬ੍ਯਾਪਾਰਂ. ਨਿਦ੍ਦਾਵਸੇਨ ਪਮਜ੍ਜਨਂ ਕਤ੍ਤਬ੍ਬਸ੍ਸ ਅਕਰਣਂ. ਕਿਲੇਸਵਸੇਨ ਪਮਜ੍ਜਨਂ ਅਕਤ੍ਤਬ੍ਬਸ੍ਸ ਕਰਣਮ੍ਪਿ. ਕਮ੍ਮਸਮਯੇਤਿ ਕਮ੍ਮਂ ਕਾਤੁਂ ਯੁਤ੍ਤਕਾਲੇ. ਕਮ੍ਮਕਰਣਵੀਰਿਯਾਭਾਵੋਤਿ ਤਂਕਮ੍ਮਕਿਰਿਯਸਮੁਟ੍ਠਾਪਕਵੀਰਿਯਾਭਾਵੋ. ਸੋ ਪਨ ਅਤ੍ਥਤੋ ਵੀਰਿਯਪਟਿਪਕ੍ਖੋ ਅਕੁਸਲਚਿਤ੍ਤੁਪ੍ਪਾਦੋ, ਨ ਵੀਰਿਯਸ੍ਸ ਅਭਾਵਮਤ੍ਤਂ. ਸੀਲਸਞ੍ਞਮਾਭਾਵੋ ਦੁਸ੍ਸੀਲ੍ਯਂ. ਵਿਸ੍ਸਟ੍ਠਾਚਾਰਤਾ ਨਾਮ ਅਨਾਚਾਰੋ. ਸੋਪ੍ਪਬਹੁਲਤਾਤਿ ਨਿਦ੍ਦਾਲੁਤਾ. ਯਤੋ ਗਹਣਹਤ੍ਥੋਪਿ ਨ ਕਿਲਾਸੁਪਿ ਪੁਰਿਸੋ ਨਿਦ੍ਦਾਯ ਅਭਿਭੁਯ੍ਯਤਿ. ਤੇਨਾਹ ‘‘ਤਾਯਾ’’ਤਿਆਦਿ. ਅਤਿਚ੍ਛਾਤਾਦੀਨੀਤਿ ਆਦਿ-ਸਦ੍ਦੇਨ ਅਭਿਭੁਯ੍ਯਤਾਦਿਂ ਸਙ੍ਗਣ੍ਹਾਤਿ. ਆਗਨ੍ਤੁਕਾਲਸਿਯਂ ਨ ਪੁਬ੍ਬੇ ਵੁਤ੍ਤਆਲਸ੍ਯਂ ਵਿਯ ਪਕਤਿਸਿਦ੍ਧਂ. ‘‘ਤੇ ਛਿਦ੍ਦੇ’’ਤਿ ਪਾਲ਼ਿਯਂ ਲਿਙ੍ਗਵਿਪਲ੍ਲਾਸੇਨ ਵੁਤ੍ਤਨ੍ਤਿ ਆਹ ‘‘ਤਾਨਿ ਛ ਛਿਦ੍ਦਾਨੀ’’ਤਿ. ਕੁਸਲਚਿਤ੍ਤਪ੍ਪਵਤ੍ਤਿਯਾ ਅਨੋਕਾਸਭਾਵਤੋ ਛਿਦ੍ਦਾਨਿ. ਤੇਨਾਹ ਭਗਵਾ – ‘‘ਯਤ੍ਥ ਵਿਤ੍ਤਂ ਨ ਤਿਟ੍ਠਤੀ’’ਤਿ. ਸਬ੍ਬਾਕਾਰੇਨ ਲੇਸਮਤ੍ਤਂ ਅਸੇਸੇਤ੍ਵਾਤਿ ਅਧਿਪ੍ਪਾਯੋ.

ਨਜੀਰਤਿਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੭. ਇਸ੍ਸਰਿਯਸੁਤ੍ਤਵਣ੍ਣਨਾ

੭੭. ਸਤ੍ਥਸ੍ਸ ਮਲਨ੍ਤਿ ਸਤ੍ਥਮਲਂ, ਯੇਨ ਸਤ੍ਥਂ ਮਲੀਨਂ ਹੋਤਿ, ਸਤ੍ਥਮਲਗ੍ਗਹਣੇਨ ਚੇਤ੍ਥ ਮਲੀਨਂ ਸਤ੍ਥਮੇਵ ਗਹਿਤਨ੍ਤਿ ਆਹ ‘‘ਮਲਗ੍ਗਹਿਤਸਤ੍ਥ’’ਨ੍ਤਿ. ਆਣਾਪਵਤ੍ਤਨਨ੍ਤਿ ਅਪ੍ਪਕੇ ਵਾ ਮਹਨ੍ਤੇ ਵਾ ਯਤ੍ਥ ਕਤ੍ਥਚਿ ਅਤ੍ਤਨੋ ਆਣਾਯ ਪਵਤ੍ਤਨਵਸੇਨ ਵਸਨਂ ਇਸ੍ਸਰਿਯਤ੍ਤਮਿਚ੍ਛਨ੍ਤਿ. ਮਣਿਰਤਨਮ੍ਪਿ ਵਿਸ੍ਸਜ੍ਜਨੀਯਪਕ੍ਖਿਕਤ੍ਤਾ ਉਤ੍ਤਮਂ ਭਣ੍ਡਂ ਨਾਮ ਨ ਹੋਤਿ, ਇਤ੍ਥੀ ਪਨ ਪਰਿਚ੍ਚਤ੍ਤਕੁਲਾਚਾਰਿਤ੍ਥਿਕਾਯਪਿ ਅਨਿਸ੍ਸਜ੍ਜਨੀਯਤਾਯ ਉਤ੍ਤਮਭਣ੍ਡਂ ਨਾਮ. ਤੇਨਾਹ ‘‘ਇਤ੍ਥੀ ਭਣ੍ਡਾਨਮੁਤ੍ਤਮ’’ਨ੍ਤਿ. ਤੇਸਂ ਤੇਸਞ੍ਹਿ ਪੁਰਿਸਾਜਾਨੀਯਾਨਂ ਉਪ੍ਪਤ੍ਤਿਟ੍ਠਾਨਤਾਯ ਉਤ੍ਤਮਰਤਨਾਕਰਤ੍ਤਾ ਇਤ੍ਥੀ ਭਣ੍ਡਾਨਮੁਤ੍ਤਮਂ. ਮਲਗ੍ਗਹਿਤਸਤ੍ਥਸਦਿਸੋ ਅਵਬੋਧਕਿਚ੍ਚਵਿਬਨ੍ਧਨਤੋ. ਸਤ੍ਥਮਲਂ ਵਿਯ ਸਤ੍ਥਸ੍ਸ ਪਞ੍ਞਾਸਤ੍ਥਸ੍ਸ ਗੁਣਾਭਾਵਕਰਣਤੋ ਪਞ੍ਞਾਸਤ੍ਥਮਲਂ. ਅਬ੍ਬੁ ਵੁਚ੍ਚਤਿ ਉਪਦ੍ਦਵਂ, ਤਂ ਦੇਤੀਤਿ ਅਬ੍ਬੁਦਂ, ਵਿਨਾਸਕਾਰਣਂ. ਨਨੁ ਹਰਣਂ ਸਮਣਸ੍ਸ ਅਯੁਤ੍ਤਨ੍ਤਿ? ਯੁਤ੍ਤਂ. ਤਸ੍ਸ ਅਨ੍ਵਯਤੋ ਬ੍ਯਤਿਰੇਕਤੋ ਚ ਯੁਤ੍ਤਤਂ ਦਸ੍ਸੇਨ੍ਤੋ ‘‘ਸਲਾਕਭਤ੍ਤਾਦੀਨੀ’’ਤਿਆਦਿਮਾਹ.

ਇਸ੍ਸਰਿਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੮. ਕਾਮਸੁਤ੍ਤਵਣ੍ਣਨਾ

੭੮. ‘‘ਅਤ੍ਤਕਾਮੋ’’ਤਿ ਪਾਲ਼ਿਯਂ ਵੁਤ੍ਤਤ੍ਤਾ ਆਹ ‘‘ਠਪੇਤ੍ਵਾ ਸਬ੍ਬਬੋਧਿਸਤ੍ਤੇ’’ਤਿ. ਤੇ ਹਿ ਸਬ੍ਬਸੋ ਪਰਤ੍ਥਾਯ ਏਵ ਪਟਿਪਜ੍ਜਮਾਨਾ ਮਹਾਕਾਰੁਣਿਕਾ ਪਰਤ੍ਥਕਾਮਾ, ਅਤ੍ਥਕਾਮਾ ਨਾਮ ਨ ਹੋਨ੍ਤਿ, ਯਾ ਚ ਤੇਸਂ ਅਤ੍ਤਤ੍ਥਾਵਹਾ ਪਟਿਪਤ੍ਤਿ, ਸਾਪਿ ਯਾਵਦੇਵ ਪਰਤ੍ਥਾ ਏਵਾਤਿ. ਵੁਤ੍ਤਂ ਪੋਰਾਣਟ੍ਠਕਥਾਯਂ. ਯਸ੍ਮਾ ਬੋਧਿਸਤ੍ਤਾ ਪਰਹਿਤਪਟਿਪਤ੍ਤਿਯਾ ਪਾਰਮਿਯੋ ਪੂਰੇਨ੍ਤਾ ਤਥਾਰੂਪਂ ਕਾਰਣਂ ਪਤ੍ਵਾ ਅਤ੍ਤਾਨਂ ਪਰੇਸਂ ਪਰਿਚ੍ਚਜਨ੍ਤਿ ਪਞ੍ਞਾਪਾਰਮਿਯਾ ਪਰਿਪੂਰਣਤੋ, ਤਸ੍ਮਾ ਇਧਾਪਿ ‘‘ਸਬ੍ਬਬੋਧਿਸਤ੍ਤੇ ਠਪੇਤ੍ਵਾਯੇਵਾਤਿ ਵੁਤ੍ਤ’’ਨ੍ਤਿ ਆਹ. ਕਲ੍ਯਾਣਨ੍ਤਿ ਭਦ੍ਦਕਂ. ਵਾਚਾਯ ਅਧਿਪ੍ਪੇਤਤ੍ਤਾ ਆਹ ‘‘ਸਣ੍ਹਂ ਮੁਦੁਕ’’ਨ੍ਤਿ. ਪਾਪਿਕਨ੍ਤਿ ਲਾਮਕਂ ਨਿਹੀਨਂ. ਤਂ ਪਨ ਫਰੁਸਂ ਵਾਚਨ੍ਤਿ ਸਰੂਪਤੋ ਦਸ੍ਸੇਤਿ.

ਕਾਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੯. ਪਾਥੇਯ੍ਯਸੁਤ੍ਤਵਣ੍ਣਨਾ

੭੯. ਸਦ੍ਧਾ ਬਨ੍ਧਤਿ ਪਾਥੇਯ੍ਯਨ੍ਤਿ ਸਦ੍ਧਾ ਨਾਮ ਸਤ੍ਤਸ੍ਸ ਮਰਣਵਸੇਨ ਮਹਾਪਥਂ ਸਂਵਜਤੋ ਮਹਾਕਨ੍ਤਾਰਂ ਪਟਿਪਜ੍ਜਤੋ ਮਹਾਵਿਦੁਗ੍ਗਂ ਪਕ੍ਖਨ੍ਦਤੋ ਪਾਥੇਯ੍ਯਪੁਟਂ ਬਨ੍ਧਤਿ ਸਮ੍ਬਲਂ ਸਜ੍ਜੇਤਿ. ਕਥਨ੍ਤਿ ਆਹ ‘‘ਸਦ੍ਧਂ ਉਪ੍ਪਾਦੇਤ੍ਵਾ’’ਤਿਆਦਿ. ਏਤਂ ਵੁਤ੍ਤਨ੍ਤਿ ‘‘ਸਦ੍ਧਾ ਬਨ੍ਧਤਿ ਪਾਥੇਯ੍ਯ’’ਨ੍ਤਿ ਏਤਂ ਗਾਥਾਪਦਂ ਵੁਤ੍ਤਂ ਭਗਵਤਾ. ਸਿਰੀਤਿ ਕਤਪੁਞ੍ਞੇਹਿ ਸੇਵੀਯਤਿ ਤੇਹਿ ਪਟਿਲਭੀਯਤੀਤਿ ਸਿਰੀ. ਇਸ੍ਸਰਿਯਂ ਵਿਭਵੋ. ਆਸਯਿਤਬ੍ਬਤੋ ਆਸਯੋ, ਵਸਨਟ੍ਠਾਨਂ ਨਿਕੇਤਨ੍ਤਿ ਅਤ੍ਥੋ. ਪਰਿਕਡ੍ਢਤੀਤਿ ਇਚ੍ਛਾਵਸਿਕਂ ਪੁਗ੍ਗਲਂ ਤਤ੍ਥ ਤਤ੍ਥ ਉਪਕਡ੍ਢਤਿ.

ਪਾਥੇਯ੍ਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੦. ਪਜ੍ਜੋਤਸੁਤ੍ਤਵਣ੍ਣਨਾ

੮੦. ਤਂ ਤਂ ਸਮਵਿਸਮਂ ਪਜ੍ਜੋਤਤੀਤਿ ਪਜ੍ਜੋਤੋ. ਪਦੀਪੋ ਅਨ੍ਧਕਾਰਂ ਵਿਧਮਿਤ੍ਵਾ ਪਚ੍ਚਕ੍ਖਤੋ ਰੂਪਗਤਂ ਦਸ੍ਸੇਤਿ, ਏਵਂ ਪਞ੍ਞਾਪਜ੍ਜੋਤੋ ਅਵਿਜ੍ਜਨ੍ਧਕਾਰਂ ਵਿਧਮਿਤ੍ਵਾ ਧਮ੍ਮਾਨਂ ਪਰਮਤ੍ਥਭੂਤਂ ਰੂਪਂ ਦਸ੍ਸੇਤਿ. ਜਾਗਰਬ੍ਰਾਹ੍ਮਣੋ ਵਿਯਾਤਿ ਜਾਗਰਖੀਣਾਸਵਬ੍ਰਾਹ੍ਮਣੋ ਵਿਯ. ਸੋ ਹਿ ਸਤਿਪਞ੍ਞਾਵੇਪੁਲ੍ਲਪ੍ਪਤ੍ਤਿਯਾ ਸਬ੍ਬਦਾਪਿ ਜਾਗਰੋ ਹੋਤਿ. ਗਾਵੋਤਿ ਗੋਜਾਤਿਯੋ. ਇਦਂ ਗੁਨ੍ਨਂ ਗੋਣਾਨਞ੍ਚ ਸਾਮਞ੍ਞਤੋ ਗਹਣਂ. ਕਮ੍ਮੇਤਿ ਕਰਣਤ੍ਥੇ ਭੁਮ੍ਮਵਚਨਂ. ਜੀਵਨਂ ਜੀਵੋ, ਸਹ ਜੀਵੇਨਾਤਿ ਸਜੀਵਿਨੋ. ਤੇਨਾਹ ‘‘ਕਮ੍ਮੇਨ ਸਹ ਜੀਵਨ੍ਤਾਨ’’ਨ੍ਤਿ, ਕਸਿਵਾਣਿਜ੍ਜਾਦਿਕਮ੍ਮਂ ਕਤ੍ਵਾ ਜੀਵਨ੍ਤਾਨਨ੍ਤਿ ਅਤ੍ਥੋ. ਗੋਮਣ੍ਡਲੇਹਿ ਸਦ੍ਧਿਨ੍ਤਿ ਗੋਗਣੇਨ ਸਹ. ਨ ਤੇਨ ਵਿਨਾ ਕਸਿਕਮ੍ਮਾਦੀਨਿ ਉਪ੍ਪਜ੍ਜਨ੍ਤਿ, ਗੋਰਸਸਿਦ੍ਧਿਯਾ ਚੇਵ ਕਸਨਭਾਰਵਹਨਸਿਦ੍ਧਿਯਾ ਚ ਕਸਿਕਮ੍ਮਏਕਚ੍ਚਵਾਣਿਜ੍ਜਕਮ੍ਮਾਦੀਨਿ ਇਜ੍ਝਨ੍ਤਿ. ਸਤ੍ਤਕਾਯਸ੍ਸਾਤਿ ਆਹਾਰੁਪਜੀਵਿਨੋ ਸਤ੍ਤਕਾਯਸ੍ਸ ਕਸਿਤੋ ਅਞ੍ਞਥਾ ਜੀਵਿਕਂ ਕਪ੍ਪੇਨ੍ਤਸ੍ਸਪਿ ਕਸਿਜੀਵਿਤਵੁਤ੍ਤਿਯਾ ਮੂਲਕਾਰਣਂ ਫਲਨਿਪ੍ਫਤ੍ਤਿਨਿਮਿਤ੍ਤਤ੍ਤਾ ਤਸ੍ਸ. ਇਰਿਯਾਪਥੋ ਚ ਇਰਿਯਨਕਿਰਿਯਾਨਂ ਪਵਤ੍ਤਨੁਪਾਯੋ. ‘‘ਸੀਤਨ੍ਤਿ ਨਙ੍ਗਲਸੀਤਕਮ੍ਮ’’ਨ੍ਤਿ ਵਦਨ੍ਤਿ.

ਪਜ੍ਜੋਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੧. ਅਰਣਸੁਤ੍ਤਵਣ੍ਣਨਾ

੮੧. ਰਣਨ੍ਤਿ ਕਨ੍ਦਨ੍ਤਿ ਏਤੇਹੀਤਿ ਰਣਾ, ਰਾਗਾਦਯੋ. ਤੇਹਿ ਅਭਿਭੂਤਤਾਯ ਹਿ ਸਤ੍ਤਾ ਨਾਨਪ੍ਪਕਾਰਂ ਕਨ੍ਦਨ੍ਤਿ ਪਰਿਦੇਵਨ੍ਤਿ. ਤੇ ਪਨ ਸਬ੍ਬਸੋ ਨਤ੍ਥਿ ਏਤੇਸਂ ਰਣਾਤਿ ਅਰਣਾ. ਨਿਕ੍ਕਿਲੇਸਾ ਖੀਣਾਸਵਾ. ਵੁਸਿਤਵਾਸੋਤਿ ਵੁਸਿਤਬ੍ਰਹ੍ਮਚਰਿਯਵਾਸੋ. ਭੋਜਿਸ੍ਸਿਯਨ੍ਤਿ ਭੁਜਿਸ੍ਸਭਾਵੋ. ਤੇਨਾਹ ‘‘ਅਦਾਸਭਾਵੋ’’ਤਿ. ਸਮਣਾਤਿ ਸਮਿਤਪਾਪਸਮਣਾਤਿ ਆਹ ‘‘ਖੀਣਾਸਵਸਮਣਾ’’ਤਿ. ਪੁਥੁਜ੍ਜਨਕਲ੍ਯਾਣਕਾਲੇ ਲੋਕਿਯਪਰਿਞ੍ਞਾਯ, ਸੇਕ੍ਖਾ ਪੁਬ੍ਬਭਾਗੇ ਲੋਕਿਯਪਰਿਞ੍ਞਾਯ, ਪਚ੍ਚਵੇਕ੍ਖਣੇ ਲੋਕਿਯਲੋਕੁਤ੍ਤਰਾਯ ਪਰਿਞ੍ਞਾਯ ਪਰਿਞ੍ਞੇਯ੍ਯਂ ਤੇਭੂਮਕਂ ਖਨ੍ਧਪਞ੍ਚਕਂ ਪਰਿਜਾਨਨ੍ਤਿ ਪਰਿਚ੍ਛਿਜ੍ਜਨ੍ਤਿ. ਖੀਣਾਸਵਾ ਪਨ ਪਰਿਞ੍ਞਾਤਪਰਿਞ੍ਞੇਯ੍ਯਾ ਹੋਨ੍ਤਿ. ਤਥਾ ਹਿ ਤੇ ਸਾਮੀ ਹੁਤ੍ਵਾ ਪਰਿਭੁਞ੍ਜਨ੍ਤਿ. ਵਨ੍ਦਨ੍ਤਿ ਨਂ ਪਤਿਟ੍ਠਿਤਨ੍ਤਿ ਵੁਤ੍ਤਂ, ਵਨ੍ਦਨੀਯਭਾਵੋ ਚ ਸੀਲਸਮ੍ਪਨ੍ਨਤਾਯਾਤਿ ਆਹ ‘‘ਪਤਿਟ੍ਠਿਤਨ੍ਤਿ ਸੀਲੇ ਪਤਿਟ੍ਠਿਤ’’ਨ੍ਤਿ. ਇਧਾਤਿ ਇਮਸ੍ਮਿਂ ਲੋਕੇ. ਖਤ੍ਤਿਯਾਤਿ ਲਕ੍ਖਣਵਚਨਨ੍ਤਿ ਆਹ ‘‘ਨ ਕੇਵਲਂ ਖਤ੍ਤਿਯਾਵਾ’’ਤਿਆਦਿ.

ਅਰਣਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਛੇਤ੍ਵਾਵਗ੍ਗਵਣ੍ਣਨਾ ਨਿਟ੍ਠਿਤਾ.

ਸਾਰਤ੍ਥਪ੍ਪਕਾਸਿਨਿਯਾ ਸਂਯੁਤ੍ਤਨਿਕਾਯ-ਅਟ੍ਠਕਥਾਯ

ਦੇਵਤਾਸਂਯੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.