੯. ਮਚ੍ਛਰਿਸੁਤ੍ਤਵਣ੍ਣਨਾ

੪੯. ਮਚ੍ਛਰਿਨੋਤਿ ਮਚ੍ਛੇਰਵਨ੍ਤੋ ਮਚ੍ਛੇਰਸਮਙ੍ਗਿਨੋਤਿ ਆਹ ‘‘ਮਚ੍ਛੇਰੇਨ ਸਮਨ੍ਨਾਗਤਾ’’ਤਿ. ਮਚ੍ਛੇਰਂ ਮਚ੍ਛਰਿਯਨ੍ਤਿ ਅਤ੍ਥਤੋ ਏਕਂ. ਨ ਵਨ੍ਦਤੀਤਿ ਵਨ੍ਦਨਮਤ੍ਤਮ੍ਪਿ ਨ ਕਰੋਤਿ, ਕੁਤੋ ਦਾਨਨ੍ਤਿ ਅਧਿਪ੍ਪਾਯੋ. ਉਪਟ੍ਠਾਨਂ ਕਾਤੁਨ੍ਤਿ ਮਧੁਰਪਟਿਸਨ੍ਥਾਰਂ ਕਰੋਤੀਤਿ ਯੋਜਨਾ. ਇਦਂ ਤਾਵ ਮੁਦੁਮਚ੍ਛਰਿਯਂ ਨ ਹਦਯਂ ਵਿਯ ਅਤ੍ਤਾਨਂ ਦਸ੍ਸੇਨ੍ਤਸ੍ਸ ਮਚ੍ਛਰਿਯਨ੍ਤਿ ਕਤ੍ਵਾ. ਕਿਂ ਤੁਯ੍ਹਂ ਪਾਦਾ ਰੁਜ੍ਜਨ੍ਤਿ ਨਨੁ ਤੁਯ੍ਹਂਯੇਵ ਆਗਤਗਮਨੇਸੁ ਪਾਦਾ ਰੁਜ੍ਜਨ੍ਤਿ, ਕਿਨ੍ਤੇ ਇਮੇ ਛਿਨ੍ਦਨ੍ਤੀਤਿ ਅਧਿਪ੍ਪਾਯੋ. ਸਾਮੀਚਿਮ੍ਪਿ ਨ ਕਰੋਤਿ ਕੁਤੋ ਦਾਨਨ੍ਤਿ ਅਧਿਪ੍ਪਾਯੋ. ਯਥਾਕਮ੍ਮਂ ਤਂਤਂਗਤਿਯੋ ਅਰਨ੍ਤਿ ਉਪਗਚ੍ਛਨ੍ਤੀਤਿ ਅਰਿਯਾ, ਸਤ੍ਤਾ. ਇਮੇ ਪਨ ਕੁਚ੍ਛਿਤਾ ਅਰਿਯਾਤਿ ਕਦਰਿਯਾ, ਥਦ੍ਧਮਚ੍ਛਰਿਨੋ. ਮਚ੍ਛਰਿਯਸਦਿਸਞ੍ਹਿ ਕੁਚ੍ਛਿਤਂ ਸਬ੍ਬਹੀਨਂ ਨਤ੍ਥਿ ਸਬ੍ਬਗੁਣਾਭਿਭੂਤਤ੍ਤਾ ਭੋਗਸਮ੍ਪਤ੍ਤਿਆਦਿਸਬ੍ਬਸਮ੍ਪਤ੍ਤੀਨਂ ਮੂਲਭੂਤਸ੍ਸ ਦਾਨਸ੍ਸ ਨਿਸੇਧਤੋ. ਇਤਿਆਦੀਹਿ ਵਚਨੇਹਿ. ਅਤ੍ਤਨੋ ਉਪਘਾਤਕੋਤਿ ਮਚ੍ਛਰਿਯਾਨੁਯੋਗੇਨ ਕੁਸਲਧਮ੍ਮਾਨਂ ਗਤਿਸਮ੍ਪਤ੍ਤਿਯਾ ਚ ਵਿਨਾਸਕੋ.

ਪੁਞ੍ਞਪਾਪਵਸੇਨ ਸਮ੍ਪਰੇਤਬ੍ਬਤੋ ਉਪਗਨ੍ਤਬ੍ਬਤੋ ਸਮ੍ਪਰਾਯੋ, ਪਰਲੋਕੋ. ਕਾਮਗੁਣਰਤੀਤਿ ਕਾਮਗੁਣਸਨ੍ਨਿਸ੍ਸਯੋ ਅਸ੍ਸਾਦੋ. ਖਿਡ੍ਡਾਤਿ ਕਾਯਿਕਖਿਡ੍ਡਾ ਵਾਚਸਿਕਖਿਡ੍ਡਾ ਚੇਤਸਿਕਖਿਡ੍ਡਾਤਿ ਏਵਂ ਤਿਵਿਧਾ. ਏਸ ਵਿਪਾਕੋਤਿ ਚੋਲ਼ਾਦੀਨਂ ਕਿਚ੍ਛਲਾਭੋਤਿ ਏਸ ਏਵਰੂਪੋ ਵਿਪਾਕੋ. ਯਮਲੋਕਨ੍ਤਿ ਪਰਲੋਕਂ. ਉਪਪਜ੍ਜਰੇਤਿ ਏਤ੍ਥ ਇਤਿ-ਸਦ੍ਦੋ ਪਕਾਰਤ੍ਥੋ. ਤੇਨ ਪਾਲ਼ਿਯਂ ਵੁਤ੍ਤਂ ਨਿਰਯਂ ਤਿਰਚ੍ਛਾਨਯੋਨਿਞ੍ਚ ਸਙ੍ਗਣ੍ਹਾਤਿ.

ਯਾਚਨ੍ਤਿ ਨਾਮ ਅਰਿਯਯਾਚਨਾਯ. ਵੁਤ੍ਤਞ੍ਹੇਤਂ ‘‘ਉਦ੍ਦਿਸ੍ਸ ਅਰਿਯਾ ਤਿਟ੍ਠਨ੍ਤਿ, ਏਸਾ ਅਰਿਯਾਨ ਯਾਚਨਾ’’ਤਿ (ਜਾ. ੧.੭.੫੯). ਯੇ ਸਂਵਿਭਜਨ੍ਤਿ, ਤੇ ਵਦਞ੍ਞੂ ਨਾਮ ਞਤ੍ਵਾ ਕਤ੍ਤਬ੍ਬਕਰਣਤੋ. ਵਿਮਾਨਪ੍ਪਭਾਯਾਤਿ ਨਿਦਸ੍ਸਨਮਤ੍ਤਂ, ਉਯ੍ਯਾਨਕਪ੍ਪਰੁਕ੍ਖਪ੍ਪਭਾਹਿ ਦੇਵਤਾਨਂ ਵਤ੍ਥਾਭਰਣਸਰੀਰਪ੍ਪਭਾਹਿਪਿ ਸਗ੍ਗੇ ਪਕਾਸੇਨ੍ਤਿਯੇਵ. ਪਕਾਸਨ੍ਤੀਤਿ ਵਾ ਪਾਕਟਾ ਹੋਨ੍ਤਿ, ਨ ਅਪਾਯਲੋਕੇ ਵਿਯ ਅਪਾਕਟਾਤਿ ਅਤ੍ਥੋ. ਪਰਸਮ੍ਭਤੇਸੂਤਿ ਸਯਂ ਸਮ੍ਭਤਂ ਅਨਾਪਜ੍ਜਿਤ੍ਵਾ ਪਰੇਹੇਵ ਸਮ੍ਭਰਿਤੇਸੁ ਸੁਖੂਪਕਰਣੇਸੁ. ਤੇਨਾਹ ਪਾਲ਼ਿਯਂ ‘‘ਵਸਵਤ੍ਤੀਵ ਮੋਦਰੇ’’ਤਿ, ਪਰਨਿਮ੍ਮਿਤਭੋਗੇਸੁ ਵਸਵਤ੍ਤੀ ਦੇਵਪੁਤ੍ਤਾ ਵਿਯ ਸੁਖਸਮਙ੍ਗਿਤਾਯ ਮੋਦਨ੍ਤੀਤਿ ਅਤ੍ਥੋ. ਏਵਂ ਵੁਤ੍ਤਸਮ੍ਪਰਾਯੋਤਿ ਏਤੇ ਸਗ੍ਗਾਤਿ ਏਵਂ ਹੇਟ੍ਠਾ ਵੁਤ੍ਤਸਮ੍ਪਰਾਯੋ. ਉਭਿਨ੍ਨਨ੍ਤਿ ਏਤੇਸਂ ਯਥਾਵੁਤ੍ਤਾਨਂ ਉਭਿਨ੍ਨਂ ਦੁਕ੍ਕਟਸੁਕਟਕਮ੍ਮਕਾਰੀਨਂ. ਤਤੋ ਚਵਿਤ੍ਵਾ ਤਤੋ ਨਿਰਯਸਗ੍ਗਾਦਿਤੋ ਚਵਿਤ੍ਵਾ ਮਨੁਸ੍ਸੇਸੁ ਨਿਬ੍ਬਤ੍ਤਤਿ. ਤੇਸੁ ਯੋ ਮਚ੍ਛਰੀ ਮਨੁਸ੍ਸੇਸੁ ਨਿਬ੍ਬਤ੍ਤੋ, ਸੋ ਦਲਿਦ੍ਦੋ ਹੁਤ੍ਵਾ ਪੁਬ੍ਬਚਰਿਯਵਸੇਨ ਮਚ੍ਛਰੀਯੇਵ ਹੋਨ੍ਤੋ ਦਾਰਾਦਿਭਰਣਤ੍ਥਂ ਮਚ੍ਛਕਚ੍ਛਪਾਦੀਨਿ ਹਨ੍ਤ੍ਵਾ ਪੁਨਪਿ ਨਿਰਯੇ ਨਿਬ੍ਬਤ੍ਤੋ. ਇਤਰੋ ਸੁਦ੍ਧਾਸਯੋ ਸਮਿਦ੍ਧੋ ਹੁਤ੍ਵਾ ਪੁਬ੍ਬਚਰਿਯਾਵਸੇਨ ਪੁਨਪਿ ਪੁਞ੍ਞਾਨਿ ਕਤ੍ਵਾ ਸਗ੍ਗੇ ਨਿਬ੍ਬਤ੍ਤੇਯ੍ਯ. ਤੇਨਾਹ ‘‘ਪੁਨ ਸਮ੍ਪਰਾਯੇਪਿ ਦੁਗ੍ਗਤਿਸੁਗਤਿਯੇਵ ਹੋਤੀ’’ਤਿ.

ਮਚ੍ਛਰਿਸੁਤ੍ਤਵਣ੍ਣਨਾ ਨਿਟ੍ਠਿਤਾ.